قصيدة القداس

باسم الخاقاني



احب امي التصليلك

خذّيت اعزازها وكل يوم تدعيلك
وطن مبيوع لو محسود
سبع عيون علكاظم نخليلك
بقداس الكنايس شوك
كافي المكبره تغنيك
اضحك ...اضحك خل اغنيلك

مشتاكين ...
ياريحه خبز مبيوك من عمال متعوبين
مشتاكين
ياطاري عشك وانجاب بين جنود مشتاكين
مشتاكين ..
شوك اعمى لقميص حسين
ملهوفين ..يمعود مّسج ملهوف للشيله
ياسنبل كعد ضامي
تنه الفلاح يدعيله

احبك يامطر مشتاك يقره جفوف
تدعي الله على النية

احبك يارساله عاشگه لملهوف كل شويه يقراها لمعزتها انضمت جوا بيرية

عجل يابة شحلاتك
يا لعد
يا چا
ياگحلة عرب بعيون كردية
وطن هاي امي عراقية

من اريد اسمع تراتيلك اتغطه بنعاويها
من اريد اهواك اجي بـ نية حمامة هور
متبلل جنحها ابوست الشلال
من اريد انعاك

دللول بحلك نثيه بظناها تعاتب الجتال
من اريد اقراك افك صدري
واشوف شكد عراقيين بالغربه ويحنولك
ملتمين ومسامر عشگهم مابرد ليلة
شما تبرد يغنولك

يمعود خذانه الشوك من تشتاك هاي اضلوعنه ادفيك
من. تزعل نبوس تراب كل عتبه
ابداعه حنه الباب وضما العتبه
ازعل خاطر انراضيك
وطن محلاك

احب الجف المحنى المسح قرئانك المترب
واحب الرصعه من تهمس دفو انجيلك
واحبك
احبك

واحب امي التناغيلك.....

رحلة ممتعة مع الشاعرة رقية الحاج



وي غبشة عمال المسطر
بجويريد ابلايا انگاب

كاشخ بهديمات ارفيجي
وبالدربونه اتلفت طاب

زيبگ جدم عيوني ..وگلبي
يتسابگ وي ريح الهاب

چن ميل وساعة صريفتهم
واتنطر باگي اعله الباب

يمتى افلانه تفك الباب؟

عدت فترة وطولي تجمد
و گليبي تحول عطاب

خاف تأخرت اعله الموعد؟
خاف وخاف ابلايا اسباب

عاينت اعله الساعة البيدي
وبس رويه الساعه مخليها

مااعرف وكتي وطلعتها
چا انشد ياهوه اعليها

وافرك بچفوفي من الحيرة
واتذكر چفي ابلا چف

وفجئة المح طرف اعبايتها
و فز دلال العين و رف

عدت من سدي وفرحانه
وتكابر جدامي اعناد

باسن خد چفيها اچفوفي
وعن لا طول شردت غاد

انه الصل ربعي يسموني
يمها الحيل اخويط وباد

وتمشينا

تمشينا ونيتها المعهد
وانـه ابلا نية املاحكها

و تتلبد عن عين الوادم
حديثة وبت ابيوت وحگها

وسرنه ودرب الجان شطوله
شو صار اتذكر شبرين

وضلينه بسكتتنه نسولف
ياهوه اليبدي امتانين

وما اچذب اعليكم سولفنه
لچن بس باللسان العين

و واحدنه يعاين للـ آخر
خجلانين و محد بادر

حدما وصلت يم معهدها
والتمت وادم بالشارع

دنگت عيوني بساعتها
وضل دلالي اعليها يباوع

راحت ماگلتلها اعشگها
ونار وچن شبت بچلاي

ذبيت اللوم اعله گليبي
چا المن جبتك وياي؟

رديت وگايد صفناتي
وصدري محمل ضيم هواي

وعيني المطرت مدري الدنيا
بس اذكر خدي اعلي ماي..

مرتضى العكيلي


انا ذاك الغريب التوجعه الناس
انا اليذكر هله اعله مرورة الكاس

انا ال لا ياخذه الله ولايخلي
انا المايدري وين يسولف البي

انا المرعده العوز تمرعد الشات
انا اللمو زتاته الناس من مات

انا الشدته الدنيه بريلهه جروخ
انا ال لوما لعوز تهابه الشيوخ

انا الماعده اخو يحشمه اعله اليعيل
انا اليطلع غموسه بتواسيل

انا الدكه الوكت والعوز بهداي
انا الجاب التراجي بنيته شراي

انا المايدري عدمن باجر يبات
انا الباكن مكاتيبه الحمامات

انا الكل ذني بيه وعاشك وحاب
انا المحبوبته بضحكتهه الف باب

حمزة ال جبور

- متحف الثورات -

الخايط ولايات ضيمك
يدري ضحچك لابد بسده حزن
الفوضوية التارسة أروقة السلالم
تعيدني لواقع فكرهم
ماصخة العيشة وشعرهم

الشضايا شفايف وعشگت رگبتك
سقطت الآف الأفكار بباب تفعيلة ثورتك

يجي يوم السلطة تنذل
وتضحك عيون الحبيبة
و متحف الثورات يتغنى بگذلتك

الوادم تفرهد احلامك
وهنه ما بيهن جگاره
وجم قصيدة خوف مرهونه بشهگتك
الشعب بحة بعبرتك

حزنك يچمل عمرنا الكلف ذكرى
اليذرع درابين گلبك
يعثر بتنهيد ثورة

چانن افكارك منارة حب جنوبي
مزگو ثوبك وذر بس ما لگوك
بكل خصر مشدود وزرة
سلسلة بكل جيد سمرة

ممكن يگيدون : فكرك
امنياتك ، ورقتك ، سمرة اديك
بس ضحكتك تبقى حرة
الشهگ زعلك وي رشفات التتن
واعتذرلك بيش ما عند الله توت
وداس المكابر اعذره

وآنه ياخذني الجنون
ويشتعل بگليبي حد نزف الثچالى
واصحى لني امنگع بنث اللعن

المسرحية انتهت من گبل الخليقة
شماله ما يقفل ستاراته الجفن ؟!

من مسحت اول صواب بطرف ردني
هيست معنى الحزن
جنوني والوادم نقيضين بسجن

كفروك وكفروني
وطحناا بالحبوبي مبدأ
منين ما نلتف علينه يلالي سن

شبعد وانفاق السياسة تضيج بيك ؟!
انتحاريتك هواك

آاااخ يا سگمك البارد
ادري بيك انسيت حزنك والشوارع
والبنفسج والدمار
والخيانة العربية
والخيانة الفارسية
والخيانة البلشفية
لچن شعبك ما نساك
لچن شعبك ما نساااك

بهاء سوادي ...


صوتها لَمسة اصابـع..
يرسم بـروحي گُمر ،
وساجيه تجـيب الفَرح بالماي
يتحوگل ..
ويرگص للشَـجر ..
واحنه عصافير ويتـامه
ومن تجي الحلوه ..

خلگ بستان يتمـشّى
نركُض منْ سبيـل الگـذله
كل واحد يّلم عشّه"
سهر
سهر
نلتم بأغانيها سهرْ ..
صوتها بوسة حِلم للعـين
للميتـين..
للعَدليـن ..

بأعصاب الجسـم
بالكيف يتمشى نهـر....
صوتها جناح ونثيث بـ ريشْ
اذ يصفگ يگصّرلي الدرب
تهمـس،
وتهجس
وتلمـس..
والحَنين بصوتها يخضّر اماني
وذكرى مَجنونه بطعَم ليلة حَرب..

عريان آل سيد خلف

(تل الورد)

صابحني بعتابك خل ترد روحي
ووهسني بدلالك ياشتل شمام
حتى ازهگ واشوفك وينها جروحي

وبيه اشبع غرورك يا اعز جتال
يتمايل غنج لو بي ثگل نوحي

تعاتبني اعله حالك صار بيك شصار
جا شِدِل جروحك هاي واشتوحي

گبل حبك جبل مالاح طرفي السيل
هسه اول زخاخ يغطن اسفوحي

منك ماروت يدعج بعد روحي
ولا رادت...ولاسمعت...ولاحبت
ولا تحمل نجاة بليل لوغنت

اعلمها الورع واطبگ عليها الباب
تذكر ضحكتك واجهرت ما عنت

ما لاحتك ليش.. واشوفك اصبح طيف
اشلون ابعدت عنها اشلون ماجنت

وعيونك بغير عيونها اتهنت
وجفوفك بغير جفوفها اتحنت

ياتل الورد تل اخر السباح
حتى اطفه من اشوف ارويحتي انتلت
گلت انجفى الماي وذبل عود الياس
والوادم نست وبغيرنه اتسلت

واول ما شفت طولك نسيت الصوت
وروحي لا سبب بجفوفك افتلت
ياگمرة حياتي البعد ماهلت

يا انت وكفاني اتوهدنت وياك
تحسبني ..وحسبتي وياك مافلت

كلمن عرف وشره وشال منها الشال
واتعده العمر ...والوادم اندلت

هسه الراح راح...وبين ايديك الروح
بس ذمة برگبتك يوم لو سلت .

مصطفى عماد



انعيش بجمله نبيع بجمله نموت بجمله
ودمنه الطايح لمن يرخص
تستعدل اوضاع العمله
نطلع من صبح الله نباوع
نتخيل ازهار الشارع
جوري يطب و نرجس طالع
بس بالتالي راح الغالي
ومات النرجس بس ما بايع
وأطفال التعبر متحمسه
كلمن يحلم حلمه لنفسه
وطالب يركض عابر درسه
خاف حجاية امه تمسه
هسة تأخر عن الدنيا
وراح بحضن الجنه يطالع
وشبان اتونس مشيتهم
متخرجين بعصرة دمهم
وعمالة الدوله معينتهم
وحمال يعاين لمتونه يكلهن
خو ما دمجن سال
بس شويه اطيني مجال
ما اكدر اوكف مستعجل
بلبيت اجواعه الاطفال
يارب كلمن شايل همه
وكلمن قوته يجيبه بدمه
ومتحزم بدعوات من امه
ويرجع محمول الحمال
وﭼـاي الفقره يطيب الخاطر
ماي السلطه يلعب الروح
بس شنسوي هذا الواقع
ابن القاط الوجه يخبل
وابن الباله خلي يروح
حته بموته الباشا يخبل
بس ابن الكاسب مذبوح

كافي نموت وكافي نموت
كافي نعيش اصلاً ما لازم
وداعة حشمة ثوب ام حازم
ما نرتاح الا من نموت

علو الصوت و نصو الصوت
وبيد الحكام الريموت
واسكت لا تحجي عل الواقع

و محد يگدر يحجي يموت

مشاركة من فقرة #قصيدة_وشاب

محمد خالد


گبل من انتلاگه بشوگ
الدمع بعيونه يــلالي

گـبل مافـارگك خايف عليك تروح
صدگ صارت تروح من ايدي يالغالي!

بقه بيه الحزن تارس الروح اشكال
ٱنه تالي اليروح يصيرلي خيالي

اثر حيه برمل شدريك رايح راد
گالاها سـعد بس ضلـت ابالي

انا ادري اليطيح تصير صعبه يكوم
بس راح ارجع وما عوفه چتالي

موش انا اليطيح ومايرد الثأر
مثل البدوي مارديتلك خالي

وباچر راح ارد مهيوب بين اعداي
واضحك ع اليگلي تكسرك اليالي

مو شجره وغصن من انكسر ما اطيح
تبقى اشما احدب هيبته اهلالي

يجي ويلومني البطران هذا شبيه!
اانا المأخوذ حگي ومحد ابحالي

انا ذاك البريء بغرفة التعذيب!
انطك وانسطر والـ (اخ) تبرالي

كاظم اسماعيل الكاطع

صوت اهنا وصوت اهنا
وصوت يمر على اعضامي اوصليل اوياه
وصوت يمر سهم وبكاغد اتلكاه
وكلها اصوات تتلاعه

ويمر جتال ابوي ابمستحه اتلكاه
وابوسه اهنا واحبه اهنا
واكومن كومة الديوان بوداعه

وانه دوسة جرف لأول جدم وداه
و شفت الذيب والراعي اجو منا
اعرف الذيب واطباعه

ادري بصحبته شيريد
ناوي يطر جزيرة وصاحبه امتاعه

صاحبته بغلات الزلم صحبة يوم
ما قصر تريك بالكلب وتغده بالجتفيين
وظم مني سهم لليل تجواعه

ومشاني بدرب بس الدرب شبرين
حته اتلوحني اذراعة
ينصه الصوت ... يعله الصوت
اذا عودك ذبل بالماي
راضع موت من كاعه

ولو شفت العشك هم ينشره وينباع
لا تعتب عالشراي كثر اللوم عالباعه

انه الليلة الچ يا روح
لكص جفچ ..وعلكه برمح المداعه
لهوس واكلب الكهوه
واخلي الدله سماعه

الغفه بفي النخل يترجه تمره اتطيح
مو مثل التشلبه وجاب بذراعه

عقيل العرد

مصلاية روحي.. وگلبي تربه
تلمع مثل چلآب صبه
انه اعله مجرى الماي كصبه
خلكي اعله ونسة ربعي اغصبه
وما صاح الي بنادم واشربه

احنا الكتابة ال عالحياطين
غربه انخلقنا ومتنه غربة

الدنيا بيه هواي دارت
راوتني كلشي وبيه حارت
وايامي مدري شلون صارت
بكل خيلها اعله ضلوعي غارت

لكن بقيت وما درت بال
لكل مهرة كلبي يلوك خيال
واكف تجيه لكل ظهر مال
وشايل وي الوياي ما شال

وانه شبدر من عندي تقصير
صورة وثكل وجه البسامير
تكضي وسوالف باجر تصير
وارجع وابري الذيب والبير

وارجع ولاية وبابي مفتوح
وعطر الهلا من ثيابها يفوح
شنوني بس ضليت مملوح
وجفوفي من عثك السما تلوح

الوكت يضربني واضربه
شد رايته وشبعني غربه
اعطش والم وجهي واشربه
ما نزل راسي لغير تربه


الجذب سيد والوفه انعاب
عجه الوكت والمستحه اتراب
ياروحي ما رهمولج احباب
حنة نذر بس مالكت باب

كالولها اتمني وتمنت
ولشوفة الميتين حنت
روحي تلوع وسكته ونت
مثل الاغاني الما تغنت
مبيوك صوتي,, وفشله اطلبه


بجفوف خشنه اندهمج الطين

ونلوح بالليل الشياطين
ولد الله گوم وي السلاطين
احنا الكتابة ال عالحياطين
غربه انخلقنا ومتنه غربة

كرار العبساوي

عن لسان حال ام الشهيد



يكهرب تارس اخشوم المسايير

يشاهد سالفة كل الخطاطيــــــر

ضحكتك مالحة اخبيزة تنانيــر

بياض اخدودك يفشل الطباشيـر

يـدحّه وسامري وصوت المزامير

يجدحة غيض بعيون النواطيـــر

يثايه الما دنت منها الدواويــــــر

اشبيح وفحطت ممشه الشواجير

وبشمس المواقف فيّك اﭼـبيـــــر

اشلونج من تگلي عليك شيصير؟

لـ افيّلك لحد ما يكسر عليـــــــك

فييّ وتلتم عليك العصافيـــــــــر

وظل اضحك وياهن بالتصاويـــر

وگللهن گدرنا وياجـــن نطيــــــر

كرار العقابي ....


كالو الواجب كلت رد السلام
كالو اكثر شي يضوجك
كلت اليشامر حجار وبيته جام
كالو اصلك كلت طين
وماكلت من ياعمام

الكثره ماتعني الرجوله

الكمر وحده وع النجم يمشي اعله طوله
حته من تلاكي ربك
مايكلك جايني من ياحموله..

تعيش وتموت العشيره
ويبقه لونك..

وانت بلدنيا اعله اخيك
كاطع بجلمة شلونك

ياغرورك يا ابن ادم
ليش تكبر ع الاصابع
وانت متخلبص ضفيره
ازغر كبال اليريدك
وهوه راح يشوفك بعينه الجبيره..

العمر رمشة عين موت وخلي ذكره
باجر يموت البخور ويبقه عطره

نحجي ع الطاووس واحنه اصل الغرور
والظلام نكول لبن ادم جهل والعلم نور

واحنه مانفتهم كلشي
يم اخو المكتول نضحك
يم المعرسين نبجي
نكابل الفايت سراها
كبالها ع الحنه نحجي

يم المفارك نسولف عله الملكه
يم المسلبين من جفوفه ولفه
نحجي ع الماخوذ حكه

هذا كله
وما نريد يلوحنه بلدنيه هم
نعبد الله واحنه داخلنه صنم
نترك الغركان ونطلع البلم..

ندعي من الله الرزق واحنه الكطعنه
اجم عشك من عشك دافي ..

وندعي من الله الستر واحنه الفضحنه
اجم عرك بلطين غافي

وجم عرس سألونه عنه
وجانو باخر نفس

واحنه ماقصرنه كلش
كلنه خوش بنيه بس…
هيه هاي ال بس ثقافه
هيه هاي البس تبده كبالها
اجم حلم جان من الطفوله..
ورادت لقسمتها تمشي
عله سنة الله ورسوله

لازم انحط بيها انه
واحنه ابد مابيها انه

ياعلم يانور هذا وياثقافه
واحنه لجدام الغلط صرنه مسافه

وكالو وكالو واخر شي شفت
ماكو نتيجه

ناس مترد السلام
ناس كلها بيوت جام
ناس سولتها العمام.

عشت وحدي وكلت ع الناس السلام

سعود الخفاجي

رايح
وين رايح
والشواطي التارسه عيونك نسوك بلايه روح
وواهسك ضحكة يتيم
الماخذك منك درب مايشتهيك
الشوچ اخضر والمشه برايه غشيم

رايح لوادم ادور تراب عدها
العدهم يبات الهوه ميبسين روحي
ولالكيت اليمطر عيونه اعله خدها
رايح لديره ادور بيها وجهك
صار لي شجم يوم ادور مالكيته
ولالگيت السالفه البيهم تشبهك
تيهتني سنين بوجوه النستني البارحه
ليل يتوچه اعله روحه
وناس يم ناس بحضنها شگد سوالف طايحه

ظلمه والوادم سكاره
ومدري وين لياجهنم رايحه
ياوجه بعيوني اشبگه يكلي شسمك
ومن قريت عيونك انت منين جانت واضحه
ياحبيبي وواهسي وصاحب جروحي
ضحكتني مره وحده
وطلعت الضحكه اعله روحي
واخ يالمدري شلكيت بصف ضحكتك
مدري احبك

مدري احبك
مدري لا بس لاكرهتك
ضيعتني بعينهم وانه اللكيتك
تيهت روحي ومشت عميه اعله نيتك
ليش موشسمك جنت وانه العرفتك
انتظرتك
مااجيت
يمنه
يسره

اتلفتت يمي ولگيت
ناس تضحك
وناس تضحك
وناس تضحك
وافتهمت السالفه تخصني ومشيت
يافشلتي اگبالهم وانه بحرگتي
وياغربتي بليل مايسمع شهگتي
او اخ لوتسمع صرختي
وداعتك ناقصني انت

وغيرك يبين نشاز
ومن يجي يخربط كشختي
وجانت الدنيا حلم بعيون كافر
خلص وطب لجهنم
ليش نحلم
يله حبني
حبني قشمرني بهله ومشتاگلك
حبني والعباس انه استاهلك
حبني واتمشه اعله طولي براحتك

ووين مامديت اديك بروحي اخذ تفاحتك
حبني والله اسمك سوالف مايملهه الساني
انه والله مفصل ولايك عليك
ومايلوك اعليك واحد ثاني
كتلي خدك وين حته اندل واجيك
وصرت خد ومحد اندلاني
يله حبني
كلي احبك
والاحبك

چلمه سامعهه شكثر من غير ناس

بس اريد اسمعها منك
يله فنك

الراحلة ..وجدان النقيب



تهت والمستحة بروحي
أدور وين ما بيه بگايا إرماد
وأتوسد على جروحي

وأفزع چلمة التنگال
توگفلي بوجه نوحي

وأداري الآه....هلبت
من عيون الناس أداريني
وألاگيني وحيدة هم
وأختل بيني وبيني

شنو ذنبي وحرمني الضيم عشريني ؟

شنو ذنبي وحرمني المسچ والحنة
وعلى جروحي يتچيني ؟

أعيش إلمن ؟
وأموت بـ ليش !
آنه أصلاً ضمير الناس موتني ميحييني
آنه بلا ظفيرة وشوگ تشعل ظلمة سنيني
آنه بلاية غير الـ هم
يوميلي ويواسيني

وتهت ما بيني وبيني
اتوچة اعله طاري الشوگ
من أتعب واسليني

وأشهگني نِفس محتام
مامش رية تشريني

وأتخايل الجنة بعين خنگت كل ضحك بيه
وأتوچه اعله آهي النوب
بلكي تعيني شوية

اتمايز عيون الناس تاخذ مني كل حيلي
اواسي بروحي أگول تهون واتجرع بخت ليلي
واغني الآه
تعثر كل محطاتي بغنه الـ ويلي
واعاتبني اعله كل ونه تغنيلي بسواديني
يمن بالروح مطبوعات
ناغَنّي وأغنيني

أنه من طين
موش حجار
متعوب وترف طيني

غَنيني اريد ابچي فرح مبيوگ من عيني

اليكم قصيدة بعنوان (وجه ثاني)

للأستاذ ...غانم الفياض

مايبردني الوكت وهمومي ناري
ومايجف نهر الحزن وعيوني جاري
من كثر مالوعتني اجفوف ابووي
كمت احس بكل ارض بالدنيه داري
وكمت اشوفن وجه امي بكل حديقه
وكل مزار ايصير.. بعيوني مزاري

انه اليه بكل شبر من كاعي صوت
وبگلب كل نخله من نخلاتي طاري

بيه شوگ لكل غصن ماصار فاس
وكل وجه صلت على خدوده الضهاري

بيه لهفه لأول ابنادم عرفته
بلون وجهي ..
ولمعة اعيوني...
وسماري

وانت وحدك بيك احس خلك الصحاري
وانت وحدك تجدح بروحي محبه
ودمع الموادع شراري

وانت وحدك بيك احس روحي غريبه
وبيك احس عين السمه لعيني جريبه
بيك اشوفن اول ولايه ابحياتي
حظن امي وايد ابووي
و لهفة اول موعد وي اول حبيبة

بيك احس روحي غريبه
وبيك احس روحي مسيح
ايشيل بالمنفه صليبه

ويمك احتاز العمر ثاني جديد
وبيك اكطر مشتهاتي وابجي گلبي
الماعرف المن يحن
والمن يريد

يمك احتاج العمر ثاني جديد
ويمك احتاج الوجه ثاني جديد

لان كل العاشرتهم
عاشروني ..بوجه نصه احسين
والثاني يزيد

عزيز السماوي


أغانيك نهر تاخذ حنيني انهار
أغانيك سفن من نار

فرح ورد القميص إبجية الخطار

أغانيك جمر بيت الفقير و عزة الأفكار
أغانيك تهز ليل المدينه بگمرة الاسرار

أغانيك فرح درويش
يلعب بالجمر والنار
أغانيك تمس جرح الشهيد بدمعة الثوار

وين إتغني بجفوفك تريد إلوين ؟
يهيم الصوت بالگمره عَلَيّْ مهرين
أغانيك نزيف إعيون
تجيب الكل صبح شمسين
دلّيني العراق إمنين .؟

زين كريم


ما دام صرنه غرب ...ادعيلي وادعيلك

ونرجع لأول درب
من چنت خالي گلب
من غيرك اشكيلك

وتدري انه موتي سهل
بس بالوداع انكتل ... مالحگ ابچيلك

ومالك شغل بالبچي
ولاتنصح أعله السهر
بس نام وادخيلك

بهتت صدگ عازتك
تارسلي دنيا چنت
هسه شترس ليلك ؟

باولها من جربت
ثاريك ونسة وكت
مومال عشره وعمر
ولا مال نبچیلك

لا صاحبي ولا عرف
ولا بيك شدة نزف
ولا أمي تدعيلك

تلاكينه عگب الثلج
بس انه چويته

ثاري رجفته برد.. غمضت.. هديته
يافشله وشكد دفو
وياي لميته

لمضت دمعتي خجل
وتوسلت بيهه
مابيه اصغر بعد
ياعين حاچيهه

هايه جزاته اليحن
كسرات يكظيهه..

جواد زغير


أهم بيمن ،،؟
وأحن ألمن ،،؟
ياهو أيبلل عيوني و احضنه بـ شوف

أغني ألمن ،،؟
وأضيع ألمن ،،؟
أشو عشرين من گلبي أنگضن بالخوف

هــاي الدنيا صفنة بوب ،،
هنياله الـ لـگالـه چفوف
هنياله الـ شتل روحه ضريح و حظى بـ ناس أطوف

وهنياله اليصلي و قبلته أهلالـين
اثاري الدنيا لذتها بسمار الـ طـين

و اثاري الفرح : گذله تحن لـ أصابيعك
و اثاري الحزن : من تهوى الوجوه التهوى توديعك
ونوبات العيون أتصح دليل و راي ،،
 لاچن گلبك أيضيعك

وأنه گلبي متاع لكل غريب مسافر لـ حلمه ،،
وحزن للـ مشتهي يبچي

أنه گلبي أ.من اشوغن ما يدگ ،، يحچي

عبد الكريم القصاب


ولو كل الكَلوب اسرار ،
ولو كل الدروب اكَصار ،
ولـــو كل شي
ورغم كل شي

حاول تحب كل الناس
بس لا تعتمد عالناس
اصدور الناس ظلمة غار
ناس اسرار

ايجوز ابعد انسان ايصيرلك شريان
ويجوز اقرب صديق ايصيرلك جــزار
ناس اسرار
ناس اسرار
لا تمشي ابدرب مديوس
هاي ادروب تعبانه ، عليها اثار
سويلك درب تنشاف بيه وتشوف ،

درب تشتعل بيْه شمعة فرح للناس ،
بس لا تعتمد عالناس
سويلك درب تلكَه عليْه نفسك
سفينه وصاريه وبحّار
انت ايجوز تلكَه النار بالجنه،

نعم ،

ويجوز تلكَه الجنه وسط النار
المهم انت الذي تختار
المهم لا تنسى حب الناس ،
بس لا تعتمد عالناس

اعزف على العود بريشه من جمار ،
اكتب عالنجــــــــوم بلـؤلـؤة محـار
اكسر قيدك ابايدك
كَبل ما يعتك وترهم على الزنجار ،
احفر كَبرك ابايدك .
يمكن باجر امن اتموت

ما تلكَــه ولا حفّـار

بشير المرشدي

سافر بروحك لحد اخر بچي
ولم فشلتك حطها بالجنطه متاع
وامشي عنهم وين ماعد الله گاع

ناسك اتدور سفه ابين البيادر
وانت ماشافوك ياگلبي شلب
روح بلكت غاد
بالغربه زرع روحك يشب

الناس مو مالت عشگ مالت لعب
ضيع واشطب عالهويه
عمرك الگضيته يمهم والله يستاهل شطب

الناس واقعها ضباب
والظمير الظال عدهم ظال ابعازة ملح
يله ياگلبي شجاك
لم غراضك
وابحر بواهس طعنتك مر عله الغربه صبح

غيب محد يشتهي اشموسك تشع
واترس اشليلك سوالف ناگعه بمي الدمع

ليش دليت اعله روحك
سيفهم وانت نحر
وليش من امحل وكتهم جيتهم جية نهر

ناسك اتدور مصالح وانت جيبك بي يتيم
عيش وارفع لافتت الله كريم

تولتك عصات وكتك تنفش بروحك گطن
وانت تدري الطبعه ابيض حصته بالدنيا الطعن
گوم زت شوغة فشلتك
واوگف براس الرمح..