كاظم اسماعيل الكاطع


تمنيتج مثل ما اريد ...ضني
... وزاعلت ضني

تمنيتج هدم بالروح ويحير اليجي اليبني

شفتج يا حمامه محجله بجرحين
بالدم ريش متحني
ومنو يسمع غنه الخرسان
ومنو اليدري بكلبهم شايب يغني

تمنيتج مثل ضهري
جسر محني

جسر ينكطع بيه
يذبني فوك الماي والمي يبتعد عني

واطيح بكاع لا كاعج... ولا كاعي
ولا بيها اثر منج
ولا بيها اثر مني

تمنيتج مغارة كيف
بيها انزع جلد حزني

ومن بعدج واتوب الروح
جانت كاوليه
او وين ما يردونها اتغني..

البطن النگلتك شيصير منها الهيل ..


رائد ابو فتيان

لا ماشا الله يخبل عليك الشوك
مدري شضاف لعيونك حچي النضره
مو شرط الحلوا تلكا حلوا ومحبوب
ومن اتقربتلك وضحت الفكره
امن اسمعك كلمة تخجل.. والبياض يروح
ومن الله تطك بخدودك الحمره

اجيك وتبتسم وامشي وتضل حزنان
وجمالك بالاثنين يزيد بالفطرة
مثلك ما شفت ضحكتك تسبي العين
وتصير أحلى من تخنكك العبره
احبك جي تدنك لو حجيت وياي
يم خياله اتطخ راسه المهره
المهم حظنه كعد خل توكف الدمعات
غزل تنكط عيونك واشتهيت أقره
البطن النگلتك شيصير منه الهيل
وعلى يا نار جانت حزنك تخدره

مصبحة بيا وجه.. أمك وطلكت بيك
بخد يوسف بدت بوجوهنه الصفره
كون بواسطه هذا الجمال يصير
بس ماريد أشك بالخالق وقدره
بلون وجوهنه ناسينه ساعة الليل
دكلي بوجهك انت شناسيه الكمره


دفو جفوفك خبز طالع أمن التنور
ابيض ظاهرك ورويحتك سمره
استلذ بيك وانسم واحجي خمس أشكال
مدمن بيك مو مدمن على الخمره

عريان السيد خلف

" توصيني "



توصينــــــــــي
اعله يا ذمّة توصيني؟؟؟....
وحياتي انت ونبض يسري بشراييني...
ويظل اسمك علامة توسّم اسنيني.....
ولوَنك مو دمع ....ما شالتك عيني....
ويلوموني....أحسّك تكبر بروحي...
ويلوموني....ونه بلا شوفتك
شينفعن اعيوني...؟؟؟؟
يشوكي...ورجوتي...ودنياتي ولوني....
وعذابي ولهفتي....وشكواي واضنوني....
يخيّعونك عليّه ...وبيك خيّعوني....
يواهس تضحك الدنيه عله اشفافك....
يبو الليل الحلو اليلعب عله اجتافك....
أحس روحي تآمن بيك واتخافك....
واحسّك ....مدري شنهو انت.....
لغز لا حجي ولا سكته...
ولا غيرك نبع بالشوك يرويني...
وتوصيني ....
لونّك مو دمع ما شالتك عيني....

من اروع قصائد الشعر الشعبي
قصيدة (عيون جاهل) :


عامر عاصي
......

سحگت الليل وهمت وحدي..وعليش تهيم وحدك
سحگت الليل كله وما لگيت احد

واجيت براي
وتعبت الجفن واحد...والاحلام هواي

حلم ابيض...حلم احمر....حلم اسود
وحسبت هموم سَفره لأمس جان ابعد

شيردني لأمس يا برد يا حراس
القطار ينوح بضلوعي
جرح يغفه وجرح يوعي
وعرفني الياس
وشبگ روحي بحنين من الجرح للراس
لگيت الناس
شفت هواي ناس وما لگيت الناس

ترد وياي ...تعبت الجفن واحد والاحلام هواي
ترد ابعد....
شيردني لأمس يا ليل يا چرغد
سحگت الليل كله وما لگيت احد

ومن ذبني القطار وهمت چان غروب
شفت شامات چفك عله خدود البوب
وشفت گطرات ليل يطيحن بصفي
وشلت گطرة ضلام ونامت بچفي
ودفت گطرة....وعفت گطرة
ويصب الليل فوگ بيوتكم مطره

انه المتعوب ادگ يا باب
كل البوب تنسه ويرجع المحبوب
ادگ يا باب يصحه السيسبان وترف بيه ذنوب
ادگ يا باب ...صار تراب
ادگ يا باب ما ينسد
شيريد الجهل يا باب يا معضد
عرفت البوب كلهه وما عرفني احد

وبعد شامه..وبعد ليل...ورفيف التوت
رسمت عيونكم بأول محطه تفوت
شفت ضحكاتكم ثالث محطه تفوت
علگت الصور تاسع محطه تفوت
وبأخر محطه شفت ماكو بيوت
صحت؟چا وين اهلنه
وصرت گطرة بليل
چا وينه الحلم والمن رضينه نموت
الياحد يا نزف يا صوت يا مرود
اصيح الليل كله وما لگينه احد

وصرخ بيه الضلام تشوف..؟...لا ما اشوف
امشي وبالدرب عثره وبراعم خوف

وينگط متاعي سنين
ذكرت اول عبايه تعثرت بيهه وشبگني الطين

بعد ما اشوف!!
من عيني لسواد الليل كل اجفوف

واديه عيون جاهل غصت بنجمه!!
احن لأول عبايه اتعثرت بيهه وصحت يمه!

انه الضايع ...ضفرت الطين كله زلوف
الم دموعكم من عتبة الجامع!!!

الم صفصاف ليل اتوسل الشارع
ويگلي اتشوف ،؟.....

ايهاب عيال الظالمي


( المتعوب ) :


يالمتعوب ..
گالولي : الگمر وجهين ، گلت : ينحب
يا انتَ الشحيحك ماي
ما احب اليحبني بساع كون اتعب
مدري شلون مو سيف الحچي ويكتل
واضم الـ "آخ" ما اغنيك
من كون الله من امثالي لا ينطيك

چم دوب الصلاته عثوگ يم لونك نوه يدنگ !
چم دوب القصيده نموت حتى تعيش وانت بكيفك تشگگ !
شمدريني اليموت بلا ذنب ما عاش
شمدريني الحلم عاگول يسگي بروحه ويخضّر

عافية اليندهك "ها"
ولا چن گلبي يندهلك لوّن مريت انا هنا
سنابك ظلمة تجزاني ويفز لونك
طيفك من يمر مسحاة وانت بكل محطة بروحي زارع گاع
نشفت سالفة بروحي يالتبچيها وترد ليك
مو منك اخاف عليك
هي الهاضمتني اندلك بيا "ليش"
كاروك العتب جيتك ..
و المن جايني بدونك ؟
و انه تبچيني الـ شلونك
ولا ماي اليفززلك عطش گلبي
ولا فيّ شجرة يندهلك شمس ما عثرت بلوني
و چا ذاك التعب والضيم ؟

كل خوفي الضوه البايگني حسبة ليل ويذِلَّك
مو فنجان ليش چفوفي ترجفلك !
يكفر بالورد والياس ، تارس عين جدمي الشوچ البدربك
ولو مثل الجرح گلبك .. يركض للگطن گلبك
خطواتي صلاة "افيش" للجناز
ولا شديت بيرغ شوچ ..
هاي سنين فصلية القطار اعزاز

يالمتعوب انت الـ "آخ" مو گدك
ولو يا ريت چنت بعيد طاحت دمعتي بخدك
انت و تدري اشكي المن ؟
بكل روجة عتب الگاك فيّ مشحوف ،
لحد ما تيهت گلبك يحب يا گاع

قصيدة ( شمسنا )

للشاعر صفاء السراي ..



شمسنا بلا تراجيها
شمسنا بلا گصايبها
من تصبح شمسنا بلا معاضدها تصير فياي
شمسنا وحوبة البردي

والناطور من يغفى اعلى صوت الماي
شمسنا اتّيه بالبستان
تغفى ويه الشلب فدنوب
وننطرها بصبحنه الجاي
شمسنا يعز علينه نگول
مامش بالضماير الها بينه مچان
شمسنا وموش ياهو الچان
على جناح الحمام انحمل الها نذور
وي كل طير كومة نذور
ومكاتيب بورق من خوف
شمسنا بليل موجوعة
غشمة وماعرفنا نطير
غشمة وما عرفنه نثور
غشمة وجولة الغشمة سفر
يا هيي ، يصويحب
يا جرح عاشر صوت
لمحت امچانك من بعيد

ولك دسرج حزن گلبك دخلنه نفوت
يا گنطار ،
يا شلوة ،
يالمارضيت تموت
شمسنا بليل موجوعة
ولك دضفر گصايبها
ولك لبّس معاضدها ودخلنة نفوت .

عقيل العرد
...


اوتار المرحلة اكتملت نسجناها

ولحن معزوفة الثورة بده يدندن على شفافي

الطفل والشاب والحرمة تهجوا كلمة الـ (كافي)

الشعب صدره انترس منك جذب يچوي
حرامي الوان اليحلمون
.. ماتدري؟

شباب الوطن نگط دمهم من اوشالة اخر حِب؟

بجيبك جم فقير يموت
وصفار الناس كل ما زاد مثل السعف من يشب

الحناجر راح تهتف (طيح)
وشجن رفض الشعب دافي

وخاف اتضيع اوصافي
انا الجوعان
انا البطران
انا الحافي

انه البيه ملامح نار
لكن مستحي وطافي

انه الراويته وجه الله
وطلع وجه الله مو صافي

وخاف اتطيح تعذرنا
اذا شوهنه وجهك يوم … لا تزعل

شعارك باجر نصبغه بنزاهة چف الاسكافي

محسن الخياط....



اعلگ نذر للعناي ...واوكف للذي ايوّچي

انا ذاك التلولح بالجو وبالليل
اسامر ونتي بضحچي

انا طعم الشروگي البي حلات الكوت
وملوحة عمايرچي

وموت من الضحك بالجوع
ومن اشبع اگوم ابچي

وتلاحگت الحجي من طاح
جبته عليه متوچي

الحچي من اغتاض مني يخاف
يتشرد ولزّم بي
ماشايف حزن هچي

وادگ اعله الجرح بالليل
بس... شكبرك عله الروح ...ماتحچي
ولك دحچي

شفت بغداد جاسمهه الحزن نصين
نص يضحك ونص يبچي

وشفت كركوك چن زيبگ
عله چفة بلم وبليل والشامت معبرچي

الوكت فراك بالمگلوب طوّل سبّگ الغربان
وگرطف سبّگ المسچي
ولك دحچي ...
ولك دحچي ...

...

عامر عاصي

وتعنّيتك
لگيت عيون تفّاگه
ولگيت العيد ، لليگدر عله سياگه
ولگيت صواب حافي ، ونِشفَن رياگه

بختكم .....
بخت كسرى اِلماحفَظ طاگه
وتعنّيت الصِدِگ .. ثاري الچِذِب باگه

وتعنّيت الجروح ، الحَطَّن زواگه

ألف ناگه بحنينك
يل بچيت بشوگ الف ناگه

وگِلِت هم يوم تنسانه ؟
گِلِتلَك يوم نتلاگه ،

وتلاگينه ، شتلاگينه ؟
يتيم ودمعِته بعينه

ولا مَرّ بيه فرح للشيب ، جرحه بحَلِگ سچينه
تلاگينه بصبر صفصاف ...
مَلْ ،... شِتخلّف سنينه ؟

ولِچمنه جروحنه بعاشور ..
كلمن يبچي لِحسينه

وألف موعد فرح بالريح ،
چا وينه الفرح ، وينه ؟

الشباب الماوفه الديّان ، بالشيب انطلب دينه

ولِفونه اليوم ديّانه
حلم محروم ، عرَّسْ من تلاگينه
حلم محروم ، يتنانه
وأصير انته
وتصير آنه...

هاشم الخزاعي

هذا الدم


قطار ابيض
حلم ابيض
كحل ابيض
شوط من الضحك والهم

دم ما دار
بعروكَ التخاف وتشرد وتنذم
دم جان اعل ريجه يبات
وكَبال الهوه مهندم

مقدس
نزفه شرعيته
ما يحتاج صك غفران
من افندي
لو من معمم

خشن
ومن الحرير انعم
دم مشكوله بي ذمه
بوكت بيهه الذمم شروه
وركَب ماتسوه تتذمم

دمّك هذا
وانت أعلم
الركَبه التختل من السيف
تيبس بعد ما تنشم
الراس المارهم بس راس
من الذبح ما يسلم
مد سجّادتك مادام
مايبطل فريضه الدم

دمّك هذا

مو أي دم ...
.

عزيز عسكر

( هذا انه)
مدري المن حذوني شراع يل خصرك تعدى الشيب..
بين الروج والغافين شمس الله ويه وجهي تغيب..
غاد من العمر تابوت صوته يجيسني من ارتاح
ماتدري المناير بيك من كل كمره اشوفك جاي..
لكيت الدم رسايل غافيه بكل بيت وانت
ويه الكلايد ذيج شفتك ماي..
ياسجه التبات وياي بيها انت..
ياغيمه اعله وجه الكاع تتبدى حزنها انت..
افز من ياتعب والكاك ماخذني العباة الخوف صوت يريد..
دلني الفخاتي وياك وندليت حزني منين
بس ماوجدت شيريد..
اليشرب من رفيض الناس يتكسر بعينه الماي
انه بيا ضوى متانيك حسبة حيل..
بثيابك عبر ياغيم وانت بصف سمار الروح عديت الكناطر بيض هاك الطيف والباكو سواجيه التهو باليل..
ركضت منين ما بالدنيا يفتك باب

بس ماجستك ورديت يم روحي شكثر تعباااان
وجهي شلون مايندار يلكه لحزنك مرايااات
ﻻكي الدفو موادع ريح واطلع من كفاه بردان
ولصابيعك بخلكي شموع لوسافر ضواك وياي تشربني صبر سفان
شفتني وياك مزنه تناطر بنادم ورى ضنوني
وطحت كاع بسماك بغير ماتدري لحد مافززك لوني
هذا انه
وهذاك انته شتلت حجايتي بعمرك
وﻻكضيت بس ياااحيف
اشم طول السنابل سالفه بروحي
وارد منك غريب وياي واكسر خاطر عيوني

وين ادري الجدايل لوعرض بعيونها النسيان تضحك للعطش شلال

يلي منين ماغنوك اصابيعي تفز خيال
يا اخر سالفه بعين الفلح للكاع باكو من خيالي سنين
من تاهو طريج الله انه الرديتهم للطين
وهذااا انه

بعدني انسان
جواز لكل غريب يريد بيه يسافر لروحه
وهذا انه
شمس وفياي للما سولف جروحه

قصيدة للجبل

كاظم أسماعيل الكاطع



,
خمسين عام انزفت
والدم ينز من جلد
كتبي واناشيدي

يالغشتك حالتي
ما عيشاني الشعر لا يوم حط بيدي
بطل امن المدرسة
وحب
وجكارة
وعلج
يا چنبر اوليدي
قاطي الجديد انكوى
ومتحضر لعيدي

رحت اخطب اخت الكمر
ووياي اجاويدي
ليل الخميس أنتجي
والكمر مثل الطفل
نايم على ايدي
باكتني غفوة حلم
وانباك كل شي حلو
من صوغتي وصيدي
سنين واني انتظر ...

ملكه جمعنا سوه
وي بنت المعيدي
وسلابة الهور اجت
صعدو على نخلتي
وهزو عناكيدي
عريس وتسلبت
ضموني جمعه وسبت
ومصباح الاحد مشو
باعوني بمريدي

نزعو هدوم العلي
والناس حسبالهم
هذا فلم (سي دي)"""
واتريد اسمعك شعر
وتريد تغريدي
واحنه نعيش بزمن
ينسه بحور الشعر
بي الفراهيدي
حال اليأسره الزمن

اركض وره دنيتي
وحبالها بجيدي
خمسين عام انزفت
والدم ينز من جلد كتبي
واناشيدي
يالغشتك حالتي
ما عيشاني الشعر لا يوم حط بيدي
بطل امن المدرسة
وحب

وجكارة
وعلج
يا جنبر اوليدي

اضع بين ايديكم قصيدة من الشعر الحقيقي


عباس العبادي
_______________


أمّنت الرمل وإنهدم بيّه الراگ..
وظل عندي أمل بالبحر من ضگته.

مالح والبحر من نفس ظهر الگاع..
گلت توگف ابعينه الغزّرت بإخته.

و مدّيت الچفوف و نشف وجه الـ ( هاك )..
ردت يابسه امن الجفه الشاربته.

وإلتمّن وراك اسنين عمري اطيور..
وطشّرْت السنين ابوجهك الدرته.

درت وجهك گبل لا يصفه فوگي الماي..
گبل لا روجته اتفارگ الدافنته.

نسيت إشچم غصن من عمري لأجلك طاح..
وإشچم طير شاري اعيوني هجّرته.

ونسيت إشچم حجل لبّسك جف الطين..
وإشچم رشه إمهدّب ما رضا إتعتّه.

آنه الفصّلت متني إعله خصر البير..
و شلتك والحچي البالبير ما شلته.

و طلعنه امبللين إثنينّه ونشدوك..
عني، وگلت: لا بالله ما شفته.

و عذرتك حتى أگلّك نختلف باللون..
خنت، والگال عنّك خنت لاسنته.

گلتله الخوف يسلب فطنة الغزلان..
و بعد مخلب البير ابوجه ذاكرته.

البحر من يختنگ يثگل ابوجه الريح..
و تشرب غيض صدره و ضيج خاصرته.

أترجّى أستظل ابغصنك المكسور..
أكابر، و أدري بأم الضوه إمذبلته.

و ندستك، والإعروگ اتفرهد امن الماي..
تَفز يالحصّتك بالساجيه السكته.

عَرَض صدر العطش و ابباب عودك صاح..
و زفّك للحطب لوما اتلاحگته.

آنه الطشّرت عيني إعله عودك ماي..
و أنا الشدّيتلك كسرك وجبّرته.

و رجعنا امبللين إثنينّه ونشدوك..
عنّي وگلت لا بالله ما شفته.

وعذرتك، حتى أگلّك نختلف باللون..
خنت، والگال عنّك خنت لاسنته.

گلتله الينكسر ينتچي إعله النسيان..
والإيغثّه العطش يغلط ابسالفته.

هذني وغيرهن والبالصدر ما تاب..
شراك، ومن ثگل جدم النبض بعته.

و بعدني أستنجد البملوحتي امخاويه..
أمس فرفح إلسانه وملح چمّلته.

حاشى ايخونّي المن نفس ظهر الگاع..
وَفي، وتوگف ابعينه الغزّرت بإخته.

مقطوعة ... لمحسن الخياط



شوكت ياطور الحلو اتعرف عليك
واحجي سالفتي واشوفن حالتك

كون ادگ روحي على الدگ البديك
وباليعجبك دور واركش فالتك

شتنطي لليطلب على راسه يجيك
يبوس شباچك.... يحني مرايتك

انت احلى الناس بس اطباع بيك
تفضل الغربه اعله ولد ولايتك

عزيز عسكر || اغــاني ||

انه بيا موت انه بيا موت
من من والعذاب الوان احسبه
وعبرتني الجيل
مايسوه التعده الماي
كاسين الچذب والكاس
دين اسود وانه بلا دين
وجه الدم يعبر الدم
وانته العبرتني بوجهك لدمي بوجه خايف
وانه بلا دين
وك بهداي اخذني من الحزن والليل
وك بهداي احبك يافجر ناسي
وعطش كاسي
وتعب مثل الله مايگضي
وك بهداي
انه چفوفك خذاهه الضي
تحدي الضي
وانه المات امن امس كادود بس من رد
تعداه التعب والفي
وك ياشيب غني غني شما حزن غني
گالولي الوطن عده وگلت ظني
هلبت والعمر كله اعله خصرك طاح
صورهه بركضتك والسكته مثل الطيف
عدت يانبي التفاح
رديت ولگيت اخر گلب مثلي يدلي الريح
ببنادم
حرامات وبعد والـ اخ يا ادم
المن ضيعتني وضيعت ناسك ولك يادم
هذا الخوف الموت وعذاب الناس
وك من يوجه ادم
هذا الشيب والحرمان وك منك
عليمن ضيعتني وضيعت ناسك ولك يادم
شاورني وگلت ياموت عبر الناس
وجوه الكناطر مثل كل الناس
يسحكهه الرمل والطين والسلطان
يسحكهه التعب وتموت وبعدهه تصلي للسلطان
امس وحدي وعله الحيطان
دم كل القصايد يركض من الخوف
امس كل انبياء الله اعله كاس تطوف
حذاء الحاكم يصلي وقبلته الناس
امس والغربه وجه ادم
شما يسكر نبي ينداس
وظل مكسور مدري شحرك ومد وكفته بعيني
واغاني تصيحلي ياموت دليني
اخ ومن ثگل بيه التعب للغيب
بثيابي مشه الشيطان والحرمان
سحكت اول مناره انذكر بيهه اسمك
سحگت الدين حدما وصل جدمي لشارب السلطان
وك ياليل فك بيبانك اعله الليل
طش كل الخمر فوك المناير خلهه تسكر حيل
ليش الناس مومثلي اش يخوفهه وتصليلك
بنات الليل والفقره وسكاره الليل كلهه انته
الماتت والتريد تموت كلهه انته
الشعر والكره والحب والدمع والخوف كلهه انته
وبعدهه تخاف منك ياصدگ ياخوف
يبايعني اعله هاي الناس بعتك وشتريت الكاس
كتبتك من جنت للناس من جنت من اموت تموت
من چنه اعله هم الناس نسكر واليموت نموت
وين انته يبايعني لگيتك بالچذب والخوف
ببيوت الحكومه الباگتك مني
لگيتك انته والدنيه صبح وبيوت
كتبتك واستحت روحي
ياحزن الدفاتر
ظلمه ظلمه بسكتتك مديت اصابيعي ومتت
ونهرين من دمك رسمني الجوع غربه
غنيتلك عمر السنابل والمناجل والثياب البيهه صوتك
وانته غربه
وجبتك من الظلمه سكتات السواجي
الماله وي الماي غنوه
او عفتك بدورات ليلي
شموع يشربهه الضلام بغير عنوه
والمضايف بيك تكبر
وانته شامات بخصر كل السمر
ورموش حلوه
ماكتبتك للصرايف
وانته عدهه مرورة الگهوه وبراد الماي ياصوت النثايه
وطير شلوه
اخ منك ضيعتني وضعت منك
حروفك وگاعك وناسك كلهه بچفوف المراجع
كلهه بچفوف السياسه وانته ماكو
الناس التحبك گبل هم باعتك من ما لگتك بالشوارع
وانته ماكو
ليل يشرب ليل ياوجه الصحاري وظن بعيد
شوف يتعده اعله شوف وعيد يتعده اعله عيد
انه من گتلك بعتني
اثنينه انبعنه بغلاتك للبعيد
اثنينه انبعنه بغلاتك للبعيد

عريان ال سيد خلف

ضيعتني ...
.
.ضيعتني بغيمتك ..
وآنه على حالي اهلال ديره
وانطفيت الخاطرك .. كت للنفس
.بلجت علينه ...اتجيبه غيره

وذوبتلك حتى اصابيع العرايس ..
وآنه هاجس ...
امشي واضحك للضحك .. وعيوني ..
بعيون اليضدونك تجابس
بس احسنهم يكولون ابكلبهم .. (( ضيعك ))
واسيتهم بيه .. وجرت منك دمعتي
وماشفتني ....وماكلتلك ....
ضيعتني ....!

ومدري ليش الليل مو ليلي ..
ولا دنياي دنيه ..
ولا على جفوفي انلظم خيط الثلج ..
والعين عميه ...

وكلت لا ينهظم راعي الروح ...
لو بينت وسط الروح ثنيه ...

و ضيعتني .....

من جنت غيبه .. وعطية الله
وعسى وياريت اشوفك ؟؟؟؟
جانوا ايدكون بابي اعليك .. واتعذر واكول الليل
هد حيله وغفه الغبشه الغبشه !!!
و العراريس ...
اعله غفوتهم .. يفل الليل طوله ..
وطولك العريس
يا بعد امهاتي
يا براد الماي .. من تنشف لهاتي
وما تعديت اعله حك روحي ..
وخذت منك وردتي
ولا توسلتك تفل منك شبكتي !!
بس لوّن..بيه ابكثر مابيك .. جا سالت دمعتي
وضيعتني ..!!!

يابو المقلم على التلوين ...
جف ابيض سماوي ...
يا فرع مسكون ... وكلوبه ضوي ..
ونفذاته تطلع عالكهاوي ...

آنه احس .. تتهدم اكتاري .. كتر يهدم كتر
واثبت ..وطول الشمس .. جواهه ابشبر ...
عن لا تكول الناس داوي ..!
ولك يالكلك بلاوي ..!

وخاطرك .. والخاطر المرسوم بجفوفي ..
وشم ..بطلت اخاوي !!

ومن كلت بذات عنك .. عاتبتني ..
وضيعتني

ابكثر ما شرعت صدري .. اتنفسك ليلي ونهاري
مره نكطع ... مرة جاري ..
وآنه يا طولة خلك روحي شكثر ..
صبر الصواري
جنت اشم جفي .. ابتفاطين الفجر .. من تنكطع
عالكاع وردة ...
وجان خيط الود .. كتر عندي .. وكتر عندك حبيبي
ومن ردت كربك ... لكيت الخيط سايب
ليش ..؟؟؟
يا تالي الحبايب ....
ليش ؟؟؟؟
ماكتلي اعله غفله .....

وضيعتني

من ميسان واحد مبدعيهاا

جواد زغير

"اشطبني" ....

اشطبني
أسم
فوگ الرمل مكتوب ما أتعبك
ضباب
أعله المري مصلوب ما أخسرك

أشطبني
بـ ضحك
بـ دموعك
بـ نسيان
من عمرك حزن حايل

أشطبني
بـ سحابه
بـ هندس
بـ دخان
من ليلك گمر ذابل

لا تحتار بـ أدموعي
الحزن ثوبي

ولا تنشد قبلتك وين
خليك لـ صلاتك وأنه لـ ذنوبي

ما مكسور خاطر حتى تبچيلي

ولا ضايع بـ دربك حتى توميلي

أنه مكتوبلي العثرات ما يحتاج تحچيلي

صـدگ نوبات أذم روحـي
وصدگ نوبات أمل نوحي

لچن شفت الحزن صاحب طويله أوياي و أعشگته
و شفت عمر النهر يركض تعب مو ماي
منها وفرزنت علتي مثل علته

عليمن چا امعطلني ؟
السفر واجب اذا كل السچچ غنت
و اذا رب المشابگ بارد بملگاي أكص اچفوفي اذا صلت

دتيهني
الدمع چذبه اذا ما عطل الرايح
دتيهني
ألك كل التعب و الـ مو تعب طايح

ما ألومك
و لا ازعل
المثلي بكلشي يقنع حتى بـ الله وياك

وأعذرني
أعله كل لهفـه
أعله كل رجفه
أعله كل مكتوب مني مطرز بـ أهواك

أشطبني
العشگ مو نخوه حتى انخاك

ولا گلبي ضريح أيمام
من تدعي يگلك هاك

أشطبني

المواسم تايهه بعمري
و خريفك عمره ما يگضي

أشطبني
وراي اهموم
لا حظك ولا حظي

شلك بيه ؟

الجريده
اليجزي موعدها وطنها أرفوف

ولك بابي رهم عـ الريح
مو ذاك اليتاني أچفوف

يـ ما تشبهني من احتار
ضم چفك
عتبتي بـ ندم مرشوشه

أنه حتى من أفك بابي
افكه لـ نسمه تستاهل
شلي بـ چفوف مغشوشه

يـ بايعني
أشنفع وجهك ؟
أنه أمناطر وجه بي ماي

أشنفع فيـّك ؟
أنه متعـوب
بس تعبي بدليلي وما أتلمه أفياي

انا المامش وراها جنازته صياح ...



محسن الخياط في ذمة الله

محسن الخياط .....


ملح روحي وشربهه الليل والمامش شرب طيفه
ومشيت وكلبي وصله هنا
وصله بحد سواليفه
العمر جربة نخل وبشوج واكف وبطرك ليفه
وتلمست العدو من السيف ...
جيه بيه انكسر سيفه
يريد ايضوكني الزنجار حسباله الذهب زيفه
وكفت انكر الاوي الماي لاوني مشاحيفه

الثلج مو عار بجويريد عار اليجرد بصيفه

انه امشي وتمشي الحجايه وترد بيه عتيجه
من الصبر شجره
وشفت روحي بصيص يريد
يتعب يوصف الكمره

نكلت الروح اسولفها
لكيت اسنين احد السيف وايامي اعله طارفها
اجيت اسكت ...تبديت
الشمس تزهد بالمرايه

وبعد ياهو اليضوي الها وبعد ياهو اليلم جفها
الجرح كبلك وصل ليها
وكبل ماتلتف يلفها

ويطشرهه والمهه من الضلام وهي نيليه
ويطشرهه والمهه من اللهيب وهي برديه

ي وانته اطباع ماتتبدل بروحي
مثل عشك السمج للماي وك روحي شوديلك
اوديلك ضوه مرايات لجروحي
اوديلك قصيده مسافره بروحي
يلمتاهت عطش بالليل وانشمرت بعيد
وجلبت وانكطعت بروحي

وتلكيته هذاك ال بالعمر مكتوب
وفراكك تلكيته

وكبل مااحجي حاجيته
وشفت غمك العشك بالروح مثل الماي
ياخذ كيش ساجيته....