ايما صباح



بيت اهلي يل ما واصله، منين
يعرف مغيرتك عناوين ؟
فرگاك شب اويه الحياطين
وانا ادري وينك بس گلت وين..

درت الوجه يمبدي حيلي ؟
وململم النار بدليلي
البارحة ابچي بمواويلي
والهسه ما خلصان ليلي

بس اغفى فوگي تطيح نجمة
وزلفي الهوى خلافك يلچمه
اشهگ ولا راحتني نسمة
من گلبي گلبي يفز والزمه

وگمت اشتمر عن ريحك اعتاب
وامشي ويردني الباب للباب
شيلمني من اتبده عطاب ؟
يل بيه هجرك مآدري شعاب

معيوب حالي وبالي معيوب
وهذا الطراد يريدله گلوب
تمشي ووراك تصيح الدروب
لنته عدو ولا إنت محبوب

ولا إنت تشبه لوني واشريك
لثگة ثياب إتعيب راعيك
لو ادري من تعوفني اشبيك
چا ما شِدَهْ دنياي طاريك

چا باول صيارك جزيتك
لا صحتك ولا كبريتك
وين اشرد بروحي إمن اذيتك ؟
كون الله لا حطني بخطيتك .

جبآر رشيد


لمحتلك الف مرة

وانت تعرف غايتي

وما طاوعتني

وسولفتلك سالفة عاشگ خجول

وانت تعرف هوة اني وما عرفتة وخجلتني

وسولفتلي علة الحرب

والموت

والدم

والضحاية

وكلمة المحتاجها ما سمعتني

وكلشي گتلي وكلمة الميت عليه

عاندت روحك عليها وعاندتني

وبينن كلهن عليك

وانتفض وجهك بوجهي وصيحتني

وضيعتني

وهسة من طاحت اسنيني اذكرتني

ليش من گلبك رجف ما صارحتني

وشبيك من عينك خذتني

اتذكرت موقف بچيت وطيحتني

ومن اجيتك حتى بحچاية چذب ماجاملتني

واني اجيتك غاسل چفوفي بورد من سلميت

وانت غاسل چفك بماي الغرور وصافحتني

وكلشي ما واضح عليك

واني حتى هدومي تهواك واحسن فاضحتني

يشكن ايامك خسارات وضياع

واني چي حبيتك سنيني احسن رابحتني

چان من ضلعي خشبها بلام عمرك

وعبرت حتى اليكرهك بيهن وما عبرتني

وشاغ گلبك من سمع طاري الجرح

وچفوفي ركضن صبرنه

وانت يا صانع جروحي

اللا عفتني ابچي ولا ما صبرتني

ومرمرتني

موتتني

ومرة غازلتك چذب وتورطيت

والف مرة تعذرت ماسامحتني

وتزعل وتاخذ عيوني وما اگلك

شو خذت كلشي لچن ما صالحتني

وصالحيتك وصاحبيتك وأنت انت

صاحبت شعري وبد ما صاحبتني

غانم الفياض


وحگ امي وحزنها من الزغر لليوم
اليومية بمصاب الزمن فاجعها
وحگ خدودها الصارن سواجي دموع
وحر موگد حظنها
ودم مدامعها

منجل مااصيرن ..لاتحطلي سنون
ماحشن سنابل غيري زارعها
من وحشة عذابي .. وغربة الايام
شفتك نجمة شعت
گلت اتابعها

لگيتك مثلي تايه.. ما الك عنوان
وروحك مثل روحي
وگبلي بايعها

وكت الضيج ايس .. لاتظن يغير
البوكت النفاهه الغيرة نازعها

انا من اول گلتلك هاك ايدي وياك
صرت سيوف عمية
تحش بصابعها

بسك ..
لاتغش اذني بحلاوة صوت
كل دگات گلبك
گلبي سامعها
...........................................................