الشاعر: : : (عباس العبادي)

#قصيدة: : ||خلهن مو وكتهن خاطر احچيهن||

خلهن
مو وكتهن خاطــر احجيهن
يجيني الليل وكعد وانفردبيهن
وافتح بابهن
فتحت جناح الطير
وراويك الماامراويهن
اجروح ابابهن قوس وحضن نشاب
ويرشكني اعله طولي امنين ماجيهن
هجرانك جدم
وجروحي واحة طين
اتظيك ابطونهن ويعرضن اكفيهن

ومن كتلك ادعيلي
اجروح كلبي اكبار
اتذكر كلتلي
الله يخليهن
جابالجذب كتلي الله يشفيهن
وﻻتنشدني عنهن
كلشي مابيهن
حمر من نار هجرك والسهر بليل
بس انت العيونك ماادري شبيهن
جفل غصن العيون
وطار منهن النوم
وبجيت امصاوت المخ وي بواجيهن

انه اعيوني امهات
وفاجدات اوﻻد
خافن ذلتي وما ذبن اعبيهن
من اخر نجم ضك بلهاة النور
ولحد موت الشمس واعبيهن اعليهن

بساتينك زهن
بس شلي بيهن كون
غيري ايشم وردهن وانه اﻻسجيهن
حرام الماي يلعب يم اشاف الشوج
واجروفة العطش يبس جﻻويهن
انه اطيتك اسنيني
ابشحة الساعات
ووصيتك اعليهن موش تطيهن

وانه اسنيني الشموع
الفوك منهن نار
تنزف روسهن واتضيع رجليهن
نبت رمح المساحي بجبدت الكيعان
ﻻجن ماحين لوما مساحيهن

اذا مات الجرح
كثر اللجم يحييه
والجروح الكبار الموت يحييهن
وﻻتنشدني عنهن
كلشي مابيهن
حمر من نار هجرك والسهر بليل
بس انت العيونك ما ادري شبيهن
انه اعيوني طوس وليلهن ناعور
ينترسن دمع والليل يجفيهن

عباس العبادي 💚🍃

بعد انتهاء صمت الطف
نطق لسان الامام الحسين قائلا:

ماكو امان الطف نهبني....
وحته ماباكتني ناسي مدري ناسي
من طحت ضميت اديه حته ماينباك اصبعي تلمست مبيوك راسي....
نايم وجسمي توزع حصه حصه...
ومو شرط واحد يطيح تبوكه ناس
حجارة باكت مرة گصه...
والله نفسيات عدهم
باكو المحبس اكبالي
وبالخيم وشلت بواجي
ومن مشو واحد صحتله انطيته اصبعي
بس كلتله بذمته الياخذ تراجي...
بكوسر ضلوعي حوافر صلفه كعدن..
خربن فيي وجزن..
مايريدن بس يريدن دوم تجويهن شمس..
خربن كل شغل امس
نمت بالطف والله حيرة
درت ايدي بصفي الاكبر
درت ايدي نايم بصفي عرس
اشتهيت الله وطحت بالطف وذر
وهمه فزعولي ضرس
هناك بالطف كل اصابعهم سوة
اشرو كلهم عليه وطفي خص
تمضمض الطف بهل بيتي ومن شرب عبد الله غص
وبحوافر خيلهم سحكو صبح
اكو وادم شبر ماصعدو ل الله
وانه صاعدلي رمح....
كربله كاروك النه والله هزاهه بنحر....
كلشي بالطف باكني...
سهم بايكله نحر....
باكو احزامي اللبسته
روحو حلفو الماي بايكله ضهر
همه سبعين الف ليل
واحنه بس سبعين شمعه وعدنه بالطف بس كمر
نايم وروحي تهبت والعطش بيه فرش
شمعه خلصت شمعه ذابت
شمعه بيدي مكمطه اشتعلت عطش
الخيم وجت والطف يسولف هوه
هناك ضهر المشرعه توة التوة
لان ضلمه دروبهم باكو ضوة
وانه وي روحي اسولف...
وكت خله البرحي نايم عالتراب ويسحك عليه النوه
واخيرا ارد اكمل وارد اوضح مساله
لليحب الله صدك
الله داينكم نحر ردو اله.....

..كرار وحيد ..💙💦

السيده زينب تقول ل يزيد ..

اني اخت النخيته وجابلي الماي
اذا سولف وي الله يسولف وياي

انا اخت الكمر بس اشبه الليل
الشمس لو صد عليها دور فياي

انا ام اليتامه وام الاكبار
وانا اول حجاب بكاعكم هاي

من انكت عباتي اترسك اخلاق
ولو شيله رقيه زايده هواي

تاجك صح ذهب بس تاج الحسين
عندي حسين يترس گصتك ماي

حلفته برقيه وساكت الراس
كلي انخيني زينب كتله وفاي

البگه براسك ولو راسك رمح بي
ولخاطر رقيه اعله الرمح جاي

مابيهم صدك حتى انخه الحسين
ولا يحتاج احشم الشايل الواي

اصل الشام ( شامت )
شالو التاء وبين مستواهه بيوم ملكاي

مقطع من قصيدة انا اخت النخيته

مصطفى العيساوي 💙💦

**تل الورد**

عاتبني ابعتابك خل ترد روحي

أوَهّسني ابدلالك ، يا شتل شمّام

حتى ازهكَ ، وَشوفَك وينها اجروحي

بيّه اشبع غرورك

يا أعز جتّال

يتمايل غَنج لو بيّه ، ثُكَل نوحي

تعاتبني اعله حالك

صار بيك الصار

جا شِدِّل اجروحك هاي وشتوحي

كَبل حبك ، جبل مالاح طرفي السيل

هَسّه أول زخاخ

إيغطّن سفوحي

ومنّك ماروت يَدعَج بعد روحي

ولارادت ولا سمعت ولا حَبّت

ولا تحمل { نجاة } ابليل لو غَنّت

اعلمها الورع واطبكَ عليها الباب

تذكر ضحكتك ، واجهرت ما عَنّت

لا لامتك ليش ، وشوفك اصبح طيف

شلون ابعدت عنها

شلون ما جَنّت

وعيونك ابغير عيونها اتهَنّت

وجفوفك ابغير جروحها اتحَنّت

يا تل . تل آخر السبّاح

حته اطفه من اشوف رويحتي انتَلّت .

كَلت انجفه الماي

وذبل عود الياس

والوادم نست

وبغيرنه اتسلّت

وأول ماشفت طولك نسيت الصوت

وروحي بلا سبب بجفوفك افتَلَت

يا كَمرة حياتي البَعد ماهَلّت

يا أنتَ ، وكفاني اتوهدنت ويّاك

تحسبني وحسبتي وياك ما فلّت

كلمن عرف وشره ، وشال منها الشال

وتعدّه العمر والوادم اندَلّت

هسه الراح راح ، وبين ايديك الروح

بس ذمّه ابركَبتك يوم لو سَلّت .

عريان السيد خلف💙💦

ياعبد هذا جرح مو فركه هاي

الفركه مابيها عبد هل كد الم

جرحك وفرزنته مابين الجروح

ياعبد لومو جرح ليش نلجم

احنا عكس الناس بحساس الجروح

عدنا مفهوم الجرح مو اله دم

كبل لايطلع جرحنه نحط دواه

اي وحقك ياعبد نشتمه شم

تخيل انته شلونها احبابك وراك

من عفتهم شافو الليل تلهم

احساس وحشه طالب بيوم الخميس

فايت لصفه بلا رفعه علم

ياعبد خضنا حرب كلنا بجفاك

علدموع شتعتقد واحد سلم

هاك دور كلوبنا وشوف الجروح

الرجع سالم اجا محصل سهم

بلكزيزه ونبتدي نحس بجفاك

بيبان حزن البيت اذا شيلها دم

بلشوارع كلها نلكاك امنيات

نحس غيابك علحياطين نرسم

نصبر على الدمعه يفضحنا النحيب

العبره رجفه عسكري مزور عدم

بي لحن صوت الدمع ينزل عليك

ولذلك لازم نسميه نغم

وعينه اعترفت عزف لحن الدموع

ماتنشف على كد مابيها هم

حتى جرحك مانحط فوكاه ضماد

ياعبد لازم نحط فوكاه علم

ايهاب المالكي 💙💦

رديلي الفرح رديت
معضد باب يبچيني
وأحن حنة حمامة بيت
مثل الطاكـ محني عكاه عالمهجور
يلتم العكد بينه ويعبرني ثلاثيني
جنح عصفور ... تايه والعكود تدور .. تايه والعكود دور .
للفضوه نشرنه چفونه جناحين
صارت بلحظه طيارات وغنغنه
وجرح جنحي الطفل ياطوفه غصن التين
وجنح غنيده دك جنحي وكسر عمري
وعبرنه سواجي وبساتين .
بالحفره كبرنه سنين
وردينه لهلنه هدومنه تنكط محبه وطين .
يغنيدة امس ياحلوة الحلوات، صار العمر طوفة طين.
وغفينه ولكينه الدرب والسماك وقمر الدين .
نتختل وره النسوان والشياب
وندك المحله الحلوه باي اباب
يا أول جرس أرعن نتل فرحة وكاحتنه
كبرنه سنين
يا أول جرس إنتلني ... إنتلني
لغنيدة امس للضحكه ردلي جناحي رجعني .
وتغيب الشمس خضره على محّجر الجوارين
وألمح عمتي من بعيد وتضمي بعبايتها
وحس البيت
عمه الشمس ماتت وانت مارديت .
عمه الشمس ماتت وانه مارديت
رديلي الفرح رديت .
معضد باب يبچيني وأحن حنة حمامة بيت
أتلمس ثلاثيني وازتهن شدة امفاتيح
مارهمن ولامفتاح .
لا افتك العمر بيهن ولا افتكيت .

مظفر النواب 💙💦

كون يمك
يا بخت جنحة اليذبه الريح يمك!
كون أشوفك ..
كون ويّ فجر السوالف تغبش عيوني عليك
اتشيل خطوة شوفها وتنكلها يمك
وديّ اشوفك ..
ودي أطيرن محترك واطفة عتب حار اعله دمك..
بلجن اباجي الطفو غيرة دفو وتذوب رسوم الشتة الصك اعله دمك !

ودي اغافل ليلهم و أبحر واذب كَلبي بشريعة
ودي ابوكن جسمي وابعد
وديّ افك باب السنين السودة واشرد

وديّ لاجن شدو برجلي جرس يشهد علية
وبس اشيلن خطوتي الحراس تكعد!

بس اشيلن خطوتي ايردهة الكزاز ..اعيونهم صارت كزاز
ابكل جفن يندله حلمك!
ظفروا رموشي حبل وتنطروا جية ظلام ..وصلبوا اعله عيوني حلمك!

وانت يا المجروح خاف احجي والجمك ..
لو تطاوعني الجروح تصير غيمة
وحتى اراويك شكثر ينزل مطر بالكاع دمك
فاهية الدنيا
طفت لذة طعمها
ولبست انكاب اعلة نجمك ..

كون يمــــــــــــــــــــــــك !
الخالد كاظم اسماعيل الكاطع💙💦

ألعب. ..العب

انه بيه من الدعه
لطولك الف وركة عنب
وارجه كربك بالتهجي
وروحي تباعة ذهب
بالحلم وياي جنك
بالحلم ختيله تلعب
من اطش وياك ست خطوات تتعب
من أبحر بيك تتعب
يلي نايم على طولك
مثل الكلاده اتلجلج
خرزه ليلو وخرزه كهرب
خرزه ليلو وسندلوس وخرزه كهرب وخرزه أبعد
من نجمة الله البعيده
وخرزه اكرب. ..اكرب. ..
كلش اكرب يابعد سجة المجر
ومن سجة الغراف اكرب
انت وحدك ولله دولة
ونومتك والله منصب
كدرت طبعي عله طبعك
وانت كلما اتساهلت وياي تصعب
يلي حسنك فوك كل الناس
شمرة عصا وبيك شويه ملعب
ألعب ....العب. ...العب
يابعد خالي. ..
عليك الحمزه ابو حزامين تلعب
انه تندك روحي هلهوله ابمسامير امنشوفك
ويه كل الناس تلعب
وانت كلبك ينكسر مسقوله ورديه أمن اعوفك ويه كل الناس تلعب
نشدوا الوادم عن انياشينك
الحلوة كلت :بويه ولك كل وصله منك شكل تلعب
أمس شفتك بالحلم بيدك كزوه
تصيد كمطات العصافير
وعسل مشمشه محروكة كلب
ومشربك بخيط الشمس
والضحجه بيدك وانه
جدامك على اميتك جنت مذبوح ارابيلك
ولك لاتعتذر خليني افيدك وانكضي
وياليل. ..وياليل وسط الزهدي حلمي
يلي طولك نايل امكدر كدر
هاك أخذ روحي وياك يحبيب ربابه وبيها ألعب
مدري انت وياي مدري الدنيا تلعب
ترس حظني أتريد تلعب
همة ألعب انه بعد اشويه
يوكع خجلي أو وياك ألعب
انه منين اجيلك وانته بيني وبينك اجويريد وسالوفة ورد وبيوت الكصاصيب كلي منين اجيلك الف مكتوب كتبتلك والف سكته
وانته ما داريت روحي بخلك لفته! بخلك كلبي
اشنون كيفك وانه كل سا معتنيلك
اجي كبالك وارجع كبالك
عجايب! روحه جيه معتنيلك!
روحي جدامك تكلي :شيلني شويه من اتراب الهجر. ...
أخذ نفس وشماردت للطلع والقداح اشيلك
انه داخل عد اصبعك
كبلي محد كال للاصبع دخيلك
سولفيت بفكري عنك لاستكانات العرس والسوك والصفه وسراكي ألناس ولا خليت لاعطار. ..ولا بكال ولا بايع مسج جا عشك هذا لو عزه! كلي طبعك
جوز كبلك ناس جازت
كتله جوز انت
وجزيت انته وغدت روحي
جنازه روحي بين ايدك
افكهه وتنعكد
يلي حسنك ريحة اللفته
وبابك نوم. ..عنوانك ورد عشره باب السيف عد عكد النصاره لحظرة السابي الخلك. ..
سيد نهد انه كلش. ..كلش اهوايه احبك نقطه. ..بوسه
المخلص العاشك عبد وشويه أبعد
مدري انت وياي مدري ال بالبريد وياي يلعب!
كون اصيرن طابع ابنهدك واظلن
يمنه. ..يسره وياك ألعب. ..العب. ..

مظفر النواب 💙💦

(( عِــشكـَـْــتك حلم ))

عِــشكـَـْــتك حلم
بالوحشة البعيده اتسامر اجفوني
وعِــشكـَـتكَ
من ونيــن النايحـه الحره
التلم مجرى الدمـع
من عينها اعيوني
وعرفتك تستحي من العايزه الجبحه
وتـِفل فل الظفاير سفة اضنوني
وتوسمتك .. نِكـش بجفوف بدويه
وذهب ليره .. وشهامه .. اتوج شمس لوني
وتِـعودتك
حليب الوالده الطيبه
وصبرها .. وشيبها
اليتعب على امتونــي
ونذرتك وجه للنجمه الجديده
ونايل وغايه
سمارك عزّتي .. وعشاكـَك اهوايه
عشير الكل عشير ايصونك ابروحه
وبري من كل وجه لو ما حفظ مايه
اشـمّك بالجفوف الطاهره الخشنه
واشوفك بالوفي الكِصٌته امندّايه
وأبورح
لو هبوبك يلتكَـي اّبارح
واخضّر بالعطش من هيبتك دايه
انه ابغيرك كـَمر ما شافته اولايه
انه ابغيرك قلب نِـــيٌته امغـَطـّـايه
ويظل طرواك
نسمة بر.. لايرخص شرفهه
ولاهي تتعـثــّر
يمن طرواك .. خاوه الجدم والمعبر
يمن طرواك.. خاوه الجرح والخنجر
تعودتك
شهامه وخوف ومكابر
وتعـّودتك
محــّبه وليل ومسامر
وتعـّودتك .. خليل وخل
حبيب وكل حبيبه اتبيع طاريها
و ِنــِــتْ
ما بِعِـتْ طاري الراح والمجبل
يمنجل مايلف الردي من االسنبل
يذل وجـــــــه اليضدّك
ونته ابد ما اتذل

عريان السيد خلف💙💦

عثر خلگي وتبدّت وسعة البال..
وتخيّلْت القوافي المالها اعنان.

حچوا عني ابكثر ما چان فرعون..
يذبح من بني اسرائيل رضعان.

أحط إذني إعله صدر السيف والگاه..
من گد ما حچه ابطرواي فحطان.

إبكثر ما للمناجل عدهم اسنون..
ومثل سچينة الغمّان عميان.

عبّرت السوالف كونهن صوت..
وعذت بالله منهن كونهن جان.

أغيّم والجفون ايمطرن إگبور..
وأمسحهن وأشوف اتراب وأچفان.

لهسّه ابباب جرحي الخنجر ايبات..
ولهسّه اچفوفي عد إفلان وإفلان.

ولهسّه امتوني من احمولهم سود..
ولهسه اجفوني من انطارتي اضخان.

إنچفت بيبانهم يم طاسة الماي..
وفزعتلي السمه المن غير بيبان.

أبد ما حشّمت بس يستحي الباب..
يسكت وآنه الي بخاصرته نيشان.

الغزاله التنهطر من خوفها اتصيح..
السباع ايگومن إمن الگاع خرسان.

نهر ماخذ گفاي إعله المشاحيف..
وشارب من مكر دنياي گيعان.

أحط إيدي ابگفه الما يعرف ايفوج..
وأكره كل نهر ما شال غرگان.

وأعاند من تهد بخيولها الريح..
روج ايوگّف إعله الغيم سفان.

حليم وفرزنت ضحك الشياطين..
وأسكت وآنه أعرفه ابليس شيطان.

درب طاحوا ابصدري طيحة الفوس..
تشاويت، وگلت طيحات رضعان.

الطفل لازم ابزغره ايطيح ويگوم..
ولو طيحاتهم طيحات شبّان.

گمت والحيل يتشلبه إعله الإمتون..
إبمهر يگطر ضوه وبإعناد فرسان.

أجر نفسي ويتيه ابريّتي الليل..
وأفح ويصعد اويه الريح دخّان.

غرت واتنگّبت جدامي الأوجوه..
جزتني وجابت النسوان، نسوان.

و عفيت وبالعفو تنقاس الإرجال..
الرگاب اليعفو عنها السيف تنهان.

عبرت والشراع ايدغدغ الغيم..
أنا الما عبّرتها اشلون ما چان.

ما خلّيت حملي ابعازة امتون..
السمه تنذل لون تحتاج عمدان.

... عباس العبادي💙💦

الكبير عبد الأمير المسلماوي - ذاكرة مدينة

(( قصيدة الحرامية ))

اذكر بعد ما مفطوم

كاروكي جذع نخلة

وحدري كربه ، كربه ونص ومغطتني سليه

وامي مشيله مدري بيش وصله شماغ چفيه

وابوي عگاله اسود طوخ ومحزم برديه

بچعب الحوش بستوگه

عـالرف تمره معلوگه

وجدي معلگ بسمار لا مو صورة عوچيه

وعلى الشاطي يرد مشحوف يمرح بيه مرديه

وبخشم اختي هيله عران يوم تلبسه هي ويوم لحضيه

واخوتي تلعب محاچيل

كل صگعه برهن من فرده زهديه

وچلبه مكرم السامع

تهز بذويلهه لأمي

وتشكي من الحراميه

وگني وثنعش فروج

ودجاجات اربعة ولاري ، وسته لو سبع بشات

وياهن خضيريه ؟

وياهن خضيريه

وعدنه گباب فرهه ثنين

الزغيره بيهه ملمومين والغربيه للخطار

وگهوه وهاون وفنجان

ودلة تزحف عله النار

وگونية شكر للچاي

مرچية عله گونية ، ذخر للأربعينيه

واذكر يوم گمريه

فطموني عله صبيره

وحلو حلگي بتميره

نمت والچلبة تتنطر الفجريه

وچفتونه الحرامية ... باگونه الحرامية

باگو كل غلايچنه ، والمصخنه والجاون ، والرحى التركية

والسجادة والسبحة الحسينية

والقران ... لا موجود ، صاحت حيل بيهم اختي نشميه

يـبــــــو لحگـــو حرامية ... يـهـــــــو لحگـــــو حرامية

وكلشي راح ... أي والله

بس ضل جدي متعلگ بسماره

وضل فنجانه يضحك الخطاره

وضل عـران هيله مال الحراره

وهدأت اختي نشمية

وامي تصيح

فدوة الكم ، يبعد امكم ، ييمه الراح ميخالف

وابوي عله النهر واگف

امي تگله يا كاظم درد وهجعلك شويه

يگلهه لا يفخرية ...

بعدهم ما مشو عنه .. بعد عدنه الحرامية

هذولاك الحرامية

واشوفه غـط شليف البوه ، وتناوش الكسرية

ومشه عنه ابوي وراح

يدبچ والنخل وياه

يهوس والگصب وياه

عد عينچ ينشمية ... عد عينچ يفخرية

اذكر أي نعم اذكر..

عبد الامير المسلماوي 💙💦

.....

من اجمل ما بولايتنه ... جهل الناس!
محتفلين بعرس القاسم يوم استشهاد العباس!
من اجمل ما بولايتنه الفقره هواي
عبد الله مخلينه خرافه ومصدكين بــ (عبد الماي) !
وكلشي يشور
الاستاذ ! الحجي! الست !
نذر السيد ..!
كلها اتشور
من الشرطي لأكبر راس
ومجنون اليكتبله روايه
وعاقل حيل الخطله دعايه
بولايتنه الحوته تسولف
والكمر يخاف من الحوته
والبلبل محظور يغني
وفحل الماعز صوته يخبل !!!!!!
مظطهدينه !!!!!
وحيل يحقله يجرب صوته
بولايتنه تشرب دم الفقره يحقلك
بس ميحقلك تشرب كاس
بولايتنه المؤمن صخره
والعاهر مليانه احساس
بولايتنه ناس هوايه .. بس مو حيل هوايه الناس
والشجره تموَت من البلبل
وتفك حلكين اعله الفاس
و عدنا آدم ساكت مايحجي
ومسَلم قابيل الساحه
ومن يصرح مانتصنتلة ومايوصل للباب اصياحه
ناس انسحكت.....
ناس ارتاحت.......
وناس بسد آدم ذباحه
وكلها من آدم .......حط كوره وكور التفاحه
جاهسه العالم مرتاحه
والدين شكد ريفي الهسه
ومحرم الحب والحريه
وناسخ كل آيات الشورى
ومطبق نص الفصليه
مايحجي بلغة القاروره
واترف ادواته التوثيه
وشكليات بلا تبرير
وي يوسف ما ممكن تمشي..... خاف بدربك يصدف بير
وزحمه تصادق وحشي شلون !!!!
ماكاتلهم دم الحمزه!!
لا كاتلهم فرق اللون
بنت السيد بس للسيد
ميهم عانس تبقى سنين
الظاهر جان الله يفرق عنده حصانه الطين وطين
واهل الدين اكبر اللادين
يتريكون بدمع الفقره
ويتغدون بشرف الحره
ويتقيؤون بنفس السفره
ويخمسونه السيد حسين
وبولايتنه الساسه خوارج
والسجاده شكد حزبيه !!
الــ مو بالتيار الزاجل
ماله صلاه وي الفضيه
وسايقنا يعجبك,, مو سايق
بس يتراجع مايتقدم
ومن العبريه ايفول دم!
واكبر خرسان العبريه ...
وطن يوزع للمو فقره
ويفرش جمره بدرب الحافي
الياكل بينه نصبله بدمنا ......وانصبله ومانسمع كافي
ونقطه ابين النقطه و نقطه
واتفتش كل مامر نقطه
من أرجع بيتي انكث جلدي؟؟
الشغله تفشل!!!!!!!
بصمات الشرطه اعله اردافي!!
بولايتنه هوايه سوالف
بس الوادم مقتنعين
خاف اتعمق وتعيروني
جوى المرمر كلش طين


عقيل العرد - السماوة 💙💦

( هلي) - زين كريم 💛🍃

هلي وعيون اليسافر ماتسافر

ومدري ياغيمه الخذتكم نجمه نجمه وأنه أباوع

وضلت أمكاتيبكم تصفن تراب

وهندست كل الشوارع ...

وياعگبكم ماعگب ذاك النسيم

وبعد ماتضوي الزوايا المشطيتوها أصابع .

عوديتوني أبونسكم صرتوا سوله

وصرتوا للتيهات عرفه

ااااخ روحي المالگت مرسه أعله ظنكم

و ااااخ جرحي الشافكم لذه أويه نزفه

چنتوا يمي وچنت أگول الغربه چذبه

وهسه چذبة وطن كلفه ... !!!

ويكبر المامش بظني

هواي ناس بروحي لچن موش يمها

هواي فلوها الظفاير

بس تريد العرف شمها

أمولع بطارف سچچکم

غربه بدرابيني طشت

الليل بعيوني يلمها...

يلوح خيال الصبح ياريته لاح
ويحكم الحادي على خيله ونوكه
يا كحيله يشوف سبكت بالرواح
ويا كحيله العاودت مسبوكه
انه شوكي اليتعب وما يستراح
شمعه ضلت للصبح معلوكه
وشوكي لو يمطر على البر والسفاح
ينبت ابين النخل وعروكه
الزهدي والبرحي خذن نفس اللكاح
لكن اشوف الفرق بعثوكه
لا تنوج للغزاله بلا سلاح
ولا تغير بكاع ما مسحوكه
ولا تنود ويه الغنه وغناك راح
والربابه الهزتك مخنوكه
النار هزت بالجدر والفوك فاح
وروحي كامت لك واهي محروكه
طيني احمر وانت طينك بيه ملاح
وخل نشوف بياحديقه البوكه

محسن الخياط 💛🍃

‌‎الدنيا تتعب من تحطني أبالها
آنه أول ما صرت خيالها
الليل رافگني و ترست اعيونه نوم
و فرزنت نجماتها من اهلالها
الميت اتعرفه عزيز من النگاب
و الجنازه اتبين من الشالها
السلم من اليسره ما داخل مضيف
و من تلومه الناس گال اشمالها
شايل براسي حچي من احچي اموت
ناس صعدت بالحچي المو مالها
مامحول يم سلف مابي جبير
ومامسولف سالفه يم الزغار
ولامثني احجايتي وكايل دخيل
ولامفرع يم عگل مطلوبه ثار
اكره الورده الترافه بعركه عيب
انا احب السيف جي صاحب قرار
طيحت الماعنده اخو اتعثر المضيف
الماله بالوادم ربع يكضيها صار
جويت التنور تنطي الخبزه صيت
ضيف المعزب تشوف ابابه نار
الطير لو صفك يجي اباله الرحيل
الطير متوارد احسه اوي القطار
المايخلي لروحه قيمه تقدره ليش
اهواي وادم مستحه اتكلهه الكبار
هيه سمعه وناسنه ادور الصفير
الحمامه اشما تزل سمعتهه غار
ابقه عالي المايلوحك صوج اديه
جانت الخبزه نبي ابوكت الحصار
المنجل امنتكله شيخ ايصير سيف
وينسه حجمه ويمشي بسمه المستعار
ماكعدت ابراس غيري وبكته ليل
وماكشخت ابيت غيري بنص نهار
انا احب اسوالفي مثلي حلال
اسوالفي ايشبهني هم بيهن سمار
البدوي هلهولة نده عنده الرعيد
موتت الغيمه عرس للكلبه حار
لا تهد ايدك تره الناعور مات
وكمنه نقره الفاتحه للعنده ثار
صاحبي انطيته تفكتي وكتله صيد
الطيره ضلت حاطه وصاحبنه طار
الفاتحه البيهه بجي صاحبهه زين
الخير ابسابع سلف ونحسبه جار
ولاتقيم صاحبك لو وجهه جاك
انته قيم صاحبك من تستدار
الشريف المايشر حجيه اعله اخوه
اليكشخ ابثوب الحجي يم ربعه عار
امنين اجيب لناسنه سيد بخيت
يحجي وي الله صدك من يستخار

مصطفى العيساوي 💛🍃

..............القربان...............
.........عبد الكريم القصاب.......

ياهو الكَال دفنوا بالتراب اهلال ؟
ياهو الكَال ....
عمود الضاويات آنكسر ظهره ومال ؟
امس مالت الدنيه بناسها وما مال
عسى لا كَالها لله وهيّ ابد متصير
محمد ما اِله جتال .
ابو الغيره نزل سجده اعلى كَاعه وباسها ..وكَلبه تبدّه وسال .
عثك برحي ،
.رضع مونة حلاة امه ونزل بسلال
محمد سنبله وطاحت رغيف اعيال .
بذره وسيّرت نجمه اعلى وجه الكَاع ،
والبذره وراها آجيال .
آشعظم معناك يمحمد !!
آشعظم نور البوجهك والسنين آثكَال !!
كَد مابيك من اشموس ، من انجوم ،
شفت كَبّة سما برجّال
خذت كل الضوه حد مابقالك ظل ،
حد ظلك صبح شلال .
تتشرف خيوط الشمس
....لثيابك تصير اذيال
الشرف كَامة جبل عالي ،
وانت اشراع عالقمه
.....وظلك عالسفح شلال
هنيالك على ادروب الغدن بيدك رسن ...
......وآنت اعلى من خيّال .
هاي دروب ماتنّسي ولاتنمل ،
هاي دروب بيها المايرى يندل ،
هنيالك .....
صعدت اعلى البراق بدوسة التمثال
شعلاتك وانت ساجد أعلى من اهلال .
ياشفّة نبي وموال ،
اشلون آتموت ؟ يا هو الكَال ؟
وآنت المرتوي من ماي معسول ...
ونبت حرّي وحجي معدول .
وانت الغاسلك صوت السما....
....وما خلّه بيك آشكال .
وانت السابح بضيء السما .....
.. وطالع آمن المشكاة .
آشلون آتموت ....
...وانت المأ اِلك جتّال ؟
يمحمد محبّينك بجوا حسبالهم ميت .
بجوا حسبالهم دفنوا جسد ....
...وتراب فوكَه آنهال .
بجوا كالوا كبر هذا .
كَلت :لا ، موكَبر هذا .
هذا كَراب سيف لركَبه الشيطان .
هذا آزناد للزلزال .
هذا لسان قرآن وعشب جنه ....
.....وسواجي اشكال
هذا مئذنه ....
والمئذنه مفتاح باب الله ...
.. وحواليهه تطوف آجيال .
هذا الماله جتال .
أبو الغيره .....
نزل سجده اعلى كَاعه وباسها ....
...ودمه تبدّه وسال .
عثك برحي ....
رضع مونة حلاة آمه ونزل بسلال .
محمد سنبله وطاحت رغيف اعيال ،
بذره آمعفّره وطاحت بحضن الكَاع .
والبذره وراها آجيال .

فـاضـل عـبـد الـسادة


انتباه انتباه انتباه السالفه اشويه طويلة ..
السالفه قصة حياتي وما أظن تنتهي بليلة
بيهه ايامي التعيسة وبيها ايامي الجميلة
وقصتي بيها احداث حلوة مثل ليلة والف ليلة
وقصتي تصلح فلم هندي وابد ما تحتاج حيلة
ومخرج القصة زماني الماشفت مخرج مثيلة
خوش مثل فلم بيه وكفه واكفلي اعله حيلهه
محزم وعصاته بيده يطكني كل ما اشتكيله
خربص اسنيني عليه وتيهت راس الشليله
وصرت ناسي منين انه والمن ارجع يا قبيلة
شكد مواليدي يعالم ياهو رباني بشليله
وياهو هز كاروكي بيده ولوله بذني وسهر ليلة
وياهو وصلني بحياتي شلون ارد فضله وجميله
من وعيت وانه ضايع ماكو عنوان اعتنيله
ولاكو واحد دكلي صدرة وكلي ذب حملك واشيله
بيه حزن الناس كلها وعيني بالدمعة بخيلة
احترك وانطفي بكته مثل ريكات الرميلة
وانه يالطيبين ونتي ونت المصيوب جيلة
وهمي ما سولفته لحد خاف يحسبني اشتكيله
كورت همي اعله كلبي وجيمت روحي العليلة
عفيه روحي عفيه كلبي همومنه سهلة وقليلة
ومن تضكني الدنيا اغني هاي عاداتج يهيله
انتي ويامن وفيته وياهو ما هديتي حيله
حيل بعد وياي جوري وعيلي بالما يرضه عيلة
انتباه السالفة شويه طويلة
راح يوم.. واجه يوم.. وانه ذاك وذاك ليلي
للصبح ما يغفه جفني وللصبح كعده اعله حيلي
للورق اشتكي اهمومي وخافي حسراتي بدليلي
ردت واحد يجلي ضيمي اشتكيله ويشتكيلي
لمت كلبي كتله عاشر خل تشم الناس هيلي
كضت ثلث سنين عمري وانه ما اعرف خليلي
ريتني ما عاشريته ولاكضيت وياه ليلي
انتباه السالفة شويه طويلة
شرد اكلك عالهويته وبيش اوصفه بيا وصف
20ما زاد عمره زغير وراوي وترف
حلو ويخجل من خياله وبي يعالم ينحلف
شفته واتمناه كلبي وقبله ما حن الولف
ومن بعد سكته طويلة الشوك خللاني اعترف
كتله احبك صد عليه وكالي انته شكد صلف
شلون تنطق هالحجايه وما الك بيه عرف
كتله هذا الي احسه وجرحك بكلبي كلف
من اشوفك انسه روحي وكلبي يمعود يرف
وشكثر حاولت اكلك لجن خانتني الجسارة
ويامه من عمري ليالي لخاطرك راحت خسارة
سكته احبك وآآخ لو تدري شكثر يم بابكم لازم خفارة
وانته خالي ومو بحالي الشوك ما جربت ناره
هسه اجيتك اشكي ضيمي شفت ما منها جاره
لو تردني بجرح ثاني لا داويني بعبارة
كالي شتريد اكلك كتله كول الي تكوله
كول احبك كول اكرهك يلي صرت لروحي سوله
كال لا والله احبك كالها بضحكه خجول
ما جنت متصور انه هيه تقنع بهل سهولة
وظلت محبته وياي مثل المستحيلة
انتباه السالفة شويه طويلة
وصار اجمل امنياتي وصرت اجمل امنياته
وتالي ما تالي شلكيته سالفه بحلك الشماته
ثاري مو بس انه حبني ثاري هم غيري بحياته
وثاري كل ساعة حبيب وماخذ الناس بحلاته
اكرهته وكرهت المحبة وكرهت كل ذكرياته
ورجعت من درب شوكه روحي خجلانه وذليلة
انتباه السالفة شويه طويلة
وراح اسولفها بصراحة لا الف ولا ادور
عاندت وكتي بوكاحه وكتله كل ما بيك جور
الجان ظلت تشوف عيني والعمر حزن وسرور
وكل بشر تاليته يصفه واحد من اهل الكبور
وما اطولها عليكم واكتفي بذني السطور
الحزن من كد ما عشكته صار وي دمي يدور
انه اسحنه بصبر روحي وهوه يحركني بخور
يصوغ حسراتي قصايد خاصة تهز الشعور
نشدو ليلي شكد سهرته مثل المتاني السحور
الناس كلمن اله طوره وانه الي 70 طور
مرة اكتب مرة اصفن مرة دمع العين اسيله
والسوالف كلها تكضي وتبقه سالفتي طويلة

نعم للانتفاضه .. ونعم للتغيير
وكنيسة جرح .. بيها الملح راهب دير
وجثث تتحرك .. البي روح مابي روح
وگعد علگمي الحنطه بحضن جربه شعير
ونسب صلب النهر .. جم ثار حية گيش
ويم گبر الدلو شگد وج بخور البير
ولا ذمة مناره برگبة الآذان
وعلى مراية السكته يمشط التكبير
الهلال المنحرف .. شيبه بلحية الغيم
ومجالس ضخمه كلش بآية التطهير
حور العين .. تتباچه عله حور الدين
وخط الاستواء اصبح مشط تطبير
المسافه من الخشم للريه ... درب الشام
الهوه ستيراد بي والحسره بي تصدير
وفي خيال زينب .. مثل شامه بليل
اطوخ من بلال وجون لونه يصير
ولأن زينب صدگ .. حبل السبي بي طول
وإلى لو جذب .. فالجذب حبله اگصير

مهند حمود 💚🍃

( هلي)

هلي وعيون اليسافر ماتسافر

ومدري ياغيمه الخذتكم نجمه نجمه وأنه أباوع

وضلت أمكاتيبكم تصفن تراب

وهندست كل الشوارع ...

وياعگبكم ماعگب ذاك النسيم

وبعد ماتضوي الزوايا المشطيتوها أصابع .

عوديتوني أبونسكم صرتوا سوله

وصرتوا للتيهات عرفه

ااااخ روحي المالگت مرسه أعله ظنكم

و ااااخ جرحي الشافكم لذه أويه نزفه

چنتوا يمي وچنت أگول الغربه چذبه

وهسه چذبة وطن كلفه ... !!!

ويكبر المامش بظني

هواي ناس بروحي لچن موش يمها

هواي فلوها الظفاير

بس تريد العرف شمها

أمولع بطارف سچچکم

غربه بدرابيني طشت

الليل بعيوني يلمها

زين كريم 💚🍃

لزامط تضل لو يرك بيك لحيل
السيف لينثلم بل معركه يفشل!!!

وخذ طبع انه كتلك بل حمل لتميل
لبحر شايل سفن بس جتفه مايهدل!!!

وذا عتازوك انزل لا تحسب اطيح
يكبر بل لعيون لمطر من ينزل!!!

وخل مشيك عدل لو كلشي بيك ايصير
بلا جدم لبلم من يمشي مايكزل!!!

وبس عله طيور تكلي هيه تشيخ
دحطهه مكبره لفزاعه ماتجفل!!!

مو كلمن محدب ينحسب مذلول
لقوس محدب ومن ينتفض يكتل!!

()ومو كل خيط يهزل بل جفوف انشوف
لبريسم يجرحك لا تضن يهزل)؛

اريد اعرف اشسوه وحته هيج يخاف
من يكثر لغيم نجم شو يختل!!!

وليغرك لّون عل شجر عله صوت
تره كبال نخل شفت اطبر يرتل!!!

لكاع الي تخضر لا تضل تشيخ
الصفار يرد عليهه السمه من توشل!!!

()وشما ضكني تعب بيه لعطا يزيد
من تخنك لخيمه يزود بيهه ضل))

وعليه ومن غرت مارجفتلي اجدام
لمناجل من تهد مايرجف سنبل!!!

((ومتأثر علي لو تبقه تحجي سنين
فانوس بضوه شيفيد من تشعل!!!))

((وخذ دورال سعف راح انه اصيرن ريح
خاطرتنصطر لمن عليك اجبل))

ياسين كحيط الحلفي 💚🍃

چنــــه زغــــار وأبشرك هسه هـــم زغار
ولأن نبقى على گاعـك مانصير كبــــار
چــــان اليكــــذب يگولوله ربــــك فــوك
يخليــــك بجهنــــم لاتعيــــد الصــــــار
هسه اليكــــذب يكــولولــــه ربــــك راح
يحطـــك بالعراق ونسوا طــــاري النار
شعب ماضاگ بس طعم الخراب البيك
اخــــذت اعمارنــه وماشفنه بيك إعمار
راتب ماشفــــت وتريــــد ارتــــب بيــك؟
يالتكبــــر عًلًــــيْ تــدري برگبتي زغار
أنه الچنت امس حاسبلك الف حساب
وانــــت الماچنت حاسبلـي الف دينار
يالخيــــرك لجــــارك بيتــــك شتنطي؟
انــــه تمنيته ماوصى على سابع جار
يالخليت بينــــه الحيـره تلعــــب دور
وموبــس حار شعبك حتى جوك حار
ماشفنــــه الصبح يالبيك ليل و ليـــل
ليلــــك والدخــــن يتسابقــــن خطـــار
يخنگنه الدخن والخوف چــــان عليك
ونگول يجوز وجهك هسه اسود صار
فكــــر بينه مٌـره حلوه لاااااا منـريــــد
تــــره شعبك نبي ومالگه بگاعك غــار
مچلب بالحضاره اشفت منــــك عــود
عــــدا اثار القصف ماشفت بيك اثــار
واهـو الثور المجنح لو نفخ بــي روح
چــــا عافــــك گبــــل ولغيـــر عالم طار

زياد المعماري 💚🍃