شما يحچي عدل! يبقه اعوج الخنجر
لــسـانـك لا تـعوجــه گبال المعـتـبـر

وادم عـندي ! تفرح لو لفــاني الـشيب
وگلت يحله الگمر بالشيب من يكثر

وجرّوني بحچيهم ! غشمه ما يدرون
تــطـلـع(كشخة) الــموال من يـنـجر

ابتعد عن وادمك تكبر وتأخذ صيت.
چــا هــوّه الـضـوه شـما يــبتعـد يـكـبر

وادم لليغثني .....إلسانها ( مگشّر )
يصخم وجهه خاطر عيشته الدفتر

وانه نظارة اعمه من الفشل محطوط
(چانون) واصيرن صاحب من احتر

ما ثنّي الحچايه الثنّه جنح الطير
اكو وادم تحطها بگلبك وتصغر

محظر عذري كلما اطيح اگول تهون
الهوه محد يسمعه بساعة اليعثر

يونس امه وحده وطلع من بطنين
الاصل ثابت يضل خل الوكت يفتر

شبيه وانطي عطوه وانه عايش ميل
الميل الينطي عطوه يموت ما يگدر

على النعمه التطيح النمل هد فزاع
وابن ادم تـحـشـمـه تـشـوفـه يـتكـتـر

عيش لوادمك تأخذ حچي المو زين
الــ طـيب گلب بــ حچايه يتـقـشـمر

عيش بكيفك ولا تاخذ حچايه .
تاكل بالضوه من تطي المرايه

ينزل راس اخوه من يصعد الميزان
الزلمه الزين كون اتكضه الحچايه

وضوء الجهه اليسره الصحبة مره تصير
مشي جنازه اريد بصحبتك هايه

اعشگ شوچ تاليت الورد مذبوح
الگطن من ينكتل تفزعله شرايه

تعتگ يلا يطلع صوتها البيبان
اكو شي لو عتگ شرايته هوايه

خمر ما شارب ودايخ بطوله الميل
يكتلك ما يلچمك طعن المرايه

الكرم مو بس بديه.. براسي اكرم شيب
اهو الراعي اذيته وونسته بنايه

وتره هو المطر دوسة اجدام الغيم
ميز ناسك وخل كلمن ورايه

حسين السور 💚🍃

أحن للدم ..
أحن لبيتي المّهدّم..
أحن لوجوه مآكلها الفقر والضيم
مثل الباب المّثلّم..
أحن لوطن ميحبّني !..
أحن لناس أدافع عنها وتسبّني !.
(طَشرتّني الوجوه الباردة بلا روح)
وما عندي ولف بحّرورّتة يلمّني ..
هنانة الگاع للعشاگ
هناك الگاع
لليمشون بجنازة !.
كلش صعبة
( بالغربة أذا سألوك)
هم بعدة الوطن يمشي أعلى عكازة ؟!..
(وتره العندة وطن مكسور مثل العود)
ما مجبور بس عل الدمع يتوازة..
ورغم هذا احنّلكم
رغم هذا
أگول الموت للشبان
يمكن لليحبّة عتاب !..
احن لكل قفل بالباب ..
أحن لكل فرح چذاب ..
أنة عندي وطن
صح قاسي
مثل الموت بس حباب..
من أول ليلة من عفت النخل
صبّحت وجهي تراب ..
وهو اليعّشگ بلا عين
بعد ما يدري
هاي الشمس گرّصة خبز للجوعان
لو شمّعة زيارة لشاب بالسرداب ..

ادهم عادل 💚🍃

تنويه !
قد تكون هذه الترجمة الشعرية الشعبية لنص ملحمة گلگامش السومري الأصلي مشوهة لكنهما ينتميان إلى ذات الجنوب .
..
ملحمة گلگامش في الصداقة و الخلود
( انكيدو البخت )
..
چانت الآلهه اتخلف مثيل الناس
و ارباب الجهل كلمن يرد عبده
و بس انا چنت ثلثيني رب و انسان
ظالم و العبيد الظالم اتعبده
و الناس اشتكت من جوري يم عشتار
و تهي الها اتخلق واحد بطل ندّه
انكيدو البخت بس صاحب الصيّاد
و نبذته الغزاله اللايذه ابسدّه
طفلين و سبب صحبتنا عركه و غيظ
و ارباب الحرب بعثت من يردّه
شمس صفره و رمل درب الخلود الموت
و ملك مو يمها من الحانه للخِدّه
شتْرف من ورد بس الگصب للناي
المجد لأهل الچفوف الخشنه المْيرْده
و عطش و ذيابه و شمكثر صلاة الخوف
مهي لواگه الصلاة ابـ ساعة الشده
و ماكو فياي بس يم نبتة العِشّار
و فيّ هذا النبات اسمومه محتده
شمس امعگربه و فيّ الشجر مسموم
تبخ شوچ اعله عينك فتحة الورده
و مناديل الورق تنبت الگاع اشواك
تجر وحده و تفز بمچانهن وحده
عصا امظله و تفك ع المطر وجه اقماش
وجه الكوبرا و بالضيف تتغده
و رمال تحركت حدر الجدم شتريد
تبي اتجرنا لعوالم مالهن رده
فشل موته انغرگ بتراب و احنه تراب
و امس وي نوح فوگ الماي نتعده
الگاع اتشگگت و اتلاحگتها اطيور
بـ مناگرهن أبر خيطن لك الجردا
ماكنة الخياطه و تنگر اعله الگاع
ما لگطت قمح لگطت فتگ بـ إرده
مثل حلقه النهايه اويه البدايه تضيع
و كذا حال العوالم : دائرة عقده
عبرناهن و اديها اتشابچن ع الهام
و مثل يدّة السلّه اتوحّدن وحده
القلم فوك الإذن ترچية النجار
و مشى لغاب الارز فصلهن و رده
اشاور ياهو و اوراق الشجر ذانات
و ازعّل ياهو چلمه ابالي مو عِدّه
ها يا صاحبي : المارد نبات الغاب
و اليذبحه ‚ ايفخر بصوابه يتحدى
جرح يلتم و لا شگ راس بالصندوگ
و تتعناه تلچمه الصمته و الخرده
و ذبحنا الجنّي چن نسرة عِليْ و جبناه
و تلگتنا المدينه ابـ هيبة الهده
اوروك و بشر من قبل آدم بيچ
و عشتار اگصرتلي و بينت امْودّه
گصيره انتي لأن معگوده ويّه الروح
و حبل الينعگد يگصر وره العگده
معگوده اويه روح الثار و الطوفان
ايا ذات البسوسه الفارق المُده
يخذلك و التكتلك يرد يحچي وياك
و يمازح چن و لا مخلف معك وعده
گالت صحبتك گلت البگا ابـ تموز
جهنم يدّچ و حر لاثگه ابـ يدّه
و يفك لك گلبه لو طالست أيده الباب
و مدت چف حقد ما صافحت حقده
يـ كل طير انكتل بالسهم ما معذور
شاف ابـ ذيله ريشه و ظنه من جلده
اصبعين ايتلاگن و المسبّه اتصير
عشرتي وياچ مو سيفي و حظن غمده
و چفچ متـْنَظِف : عامل مناجم جير
و ضميرچ : محبره و كلساعه يتبده
و حر بـ جفوني مو سهران بـ أمچافاچ
اهي قصة خمر جفني احمر من اهده
الخمر سوس الحچي و حتى البُطل نمّام
سجن ياما رسايل بـ البحر وَدّه
و خبلني الگزاز اشماله صار اقفاص
شي ساجن عطر شي ورق شي ورده
گالت : انته طين ابـ ناري صرت افخار
يزيده الماي طين و نار التجمده
گلت : لا بارك الله بلونچ الميشوم
ابيض يا حمام الشر ألتزهده
حمالة نهد چن منظره من اقماش
و نظر ميدوزا حدر المنظره املبده
و تغني عيونچ برفة علم عالصيف
و تهفي ارموشچ اعله الجمر و اترمده
صدر شباچ گالت ينكشف مو عار
اذا اگفاه منستر و اعبايته البرده
حر و ما غرتني و لا انا جاهل راي
و طفل مفطوم يم الجيد المْثدّى
حذر بياع احط ع اللابسات انگاب
تجي بحشمه و تبوگ امحلّك و كدّه
و حذر گصهن طبگ صيوانها الحلاق
و غشيمه الذان يطبگ بيها و ترده
دزري اثيابچ و گالت يموت الناي
اذا انسدت بيوت ازرايره اتخمده
و يصير الناي من ينزر : قلم خطاط
و يرد اخرس كتابه و ما من ايغرده
و اذا ابـ ناي و حبر تكتب رسم الانغام
يغينيها الورق من تنفخ ابـ خده
: گلتلها و شلج بالنوط رزّة باب
و يذر بيها المكض للفتحه و السده
يالمالچ ظهر يا عمله يـ أم وجهين
تودعين ابـ وجه و اگفاچ مو طرده
أهمست لـ انكيدو ان ردلي اعتبار اللات
و امكْنك من حكم ولده و ولد ولده
أيم منجل مشط ما گصّت ابـ محصول
انه سنبل فولاذ و يبترچ حده
هُنا الصاحب يفضلك ع الخلد و الجاه
يتجرّى اعله دينه و يشهر امهنده
انهضمت لالهه و لعنت الاخو الجحجاح
و عليه ودّت مرض ‚ للگبر بيه وَدّه
يـ انكيدي و اخوي التوم توم الموت
و لو طبع البذر طگ شجره من لحده
و لماذا احزن عزيز الكبرياء مغمور
و ابو النفس البلم طافح على المَدّه
و چثيره أصحابه من يملك بلم بالهور
مو حباً طمع بـ العبره مَن وَدّه
احزن للضحك لك و اهوه فاگد روح
خاطر ما يكدر خاطرك كمده
اليدور فضل يخبصها و ابن الخير
تعرگ گصته لمن توگف اتحمده
غفى انكيدو ابـ نعش مو موت نوم اسهام
السهم لو نام خشبة قوسه الامْخدّه
طبعا ما تضل خام أسود ابـعاشور
و اجه ابـ ذوق المنيه المحْزنه و گده
اليگص هام القلم واضح بـ خطّه ايصير
و يشچ مثل السهم من يطعن الچبده
و دمك ع الرمل لو لاحه برق الغيم
گزاز احمر يصير اعله الثرى ازْمرْده
الداس امرايتك بيها انعكس مدفون
و مثل نوم الخفافيش أنگلب الأردى

و حط امرايتك بره القفص للطير
و وجهه المنعكس بره القفص شرده
الگمر تگدر تنزله اتصب له شط ع الگاع
لچن دوني الطبع يا سالفه اتصعده
همت و السكته موقف حانة الخرسان
و نشدت الناس عن نوح و عَدِن جَده
معشر من بخلهم شبه ما ينطون
لاخوهم و انته رايد منهم النشده
عرّاف و تخيّل نشده ما ينطيك
و سگط من شبچة الغربيل ما صدّه
السمچ يتمنى نفسه يصير صاحب شين
و كـ غربيل الشبچ و يطيح من عنده
و مو طبشور انه و ما امشي إلا ابـ گود
الربع لو گوه يا محلاتها الوِحده
أ تمنعني من اغوصن ماي حدر الگاع ؟
و امشي ابـ جوفها و اعبر وره السده
و بحر الموت اسود و الگطن سفّان
و طبعك ما تلون گلبه من بعده
و اذا لاحت چفوفك گطره منه اتموت
و انته ابـ نص بحر يا نوحك اتهده
يا جد الخلد درب الخلود منين
گال اسبوع لا تغفه و تصل حده
غفيت و ما رهم ‚ نبع الحياه مغلوگ
و حدر من البحر حابس عشب خلده
و ميدوزا ابـ بحر گشه و تدوّر عين
و غصت بالشط : غَرَگ ماموث البزنده
شيحل مضبوبهن و چفوفي مبتلات
و مغاليج النبع بـ استيل منسده
و لا مثل الهدايا ابـ نص سجن چذاب
الشريط الي شبگها ابـ لمسه يتبده
بـ سماعة طبيب من ارد اجيب اخبار
يا دكة گلب يا اجس نهد وحده
و جبتها و يا هضيمه الراگ خان الماي
اهو القندول ما يحفظ شكر قنده
يگلكامش غلط امنت عشبه ابـ راگ
و اجترتها بت الحيه الامْسِعده
يـ صل زادك لحم ‚ نفسك دنت لـ أعشاب
صدگ ماتنترس بس بالثرى المعده
الحيه اليابسه من الروح : جسم اگراب
يـ لو مل صار بيها اسيوفنا امْغمْده
منها و هل حيايه اشما يصلها الشيب
كل عربيد يبدل كل شهر جلده
و رجعت ابلا خلود و ادركت الانسان
الذكرى الطيبه بين الوادم اتخلْده
..

رزاق ليلو الركابي 💚🍃

. سيد عريان خلف💚🍃

**جنت أظنك **
كتبة هذه القصيدة بسنة 1965/8/6 وكانت من روائد قصائد الشاعر عريان السيد خلف في تلك السنة
____________

جنت اظنك توكف ابوجه الوكت
واتنشف الدمعه ابجفنها
او جنت اظنك بالمحبه الفاجده او حنت لابنها
ثاري سجينة خواصر كطع الدلال ...سنها
جاسي واجروحك ينزن
لو ردت تنشدني عنها
مادريت المايهزها الريح؟تالي ايخف وزنها
او مادريت اكلوب ..شطوط العشك تركس لاذنها
حاير..اعيونك الحلوه..اعله اليود صدها اشلهنها
وآنه كل وني وعذابي او لوعة البجلاي منها
واعدت واتاملتها...او ردت او خانت عهدها
ركطه..نفضت غيضها او طبت حفر..وامنت سدها
آخ يا نسمة شبابي الغربت ياهو اليردها
اوسمت اجروحي الجثيره اوحاير ابيا صورة اشدها
عاد يل جتفت روحي ابسلسلة حسرات هدها
لاتذوبها ابلهيب اجفاك من كونك تودها
او كافي منبت ضيم صارت
عاد خل تنجه ابجردها
عفيه روحي اشلون طول اجفاك مافكدت رشدها
وكحه والوكحه طويلة بال تتحمل وجدها
آآآآخ ياروحي البعد هينوب مايعدل غصنها
ورطتني ابزيد وعبيد...او مثل فص الملح بالماي ظنها
طاحت بآخر درك واتبرت الخلان منها
هاي روحي الماتمل منهم.. بعد

قصيدة (مسودنين)
من القصائد الخالدة للراحل الشاعر الكبير (محمد الغريب)
يقول :-

هااا گضت .... هااا لا بعدهه
ها گضينه...ها بعد بينه نفس
ها لگينه عيوننه .. ها ما لگينه
ها لگينه الخوف... ها بان الخرس
ياهم احنه ...منين اجينه
لـــ يانهايه احنه ابتدينه
اتضيع بين اشفافنه حروف السؤال
وتهنه وسط بيوت اهلنه
ولا تصح چلمة تعال
وصاحت الوادم علينه مسودنين
وشگگينه اثياينه
وصاحت الوادم ددلو التايهين
وتيهينه ابوابنه ؟!! مسودنين وتايهين
لا اخذنه الكاس قبله
ولا توضينه اعله دين
وصاار فكر البينه دهله
لاهو مااي ولاهو طين
مسودنين؟! نبچي ما ندري عليمن
نضحك وما ندري ليش
ما درينه انبعنه يمته
وما درينه انبعنه بيش
كبرت الفشله بسواد عيونه ونده الجبين
مسودنين!؟
صاحت اعلينه الشوارع لا تجون
وصاحت الوادم ابد ما يستحون
مسودنين؟!!
تعرف الوادم حجينه
بس تسد اسماعهه
واحنه محد يشترينه
وتركض ع الباعهة
ﻻ حجينه بالف شفه
لا لبسنه هدوم ترفه
لا كدرنه نعيش يوم ملونين
وباعنه الما يشترينه
وصاحت الوادم علينه مسودنين!!
وصاحت الوادم علينه مسودنين!!

محمد الغريب 💚🍃

الشاعر: : : (عباس العبادي)

#قصيدة: : ||خلهن مو وكتهن خاطر احچيهن||

خلهن
مو وكتهن خاطــر احجيهن
يجيني الليل وكعد وانفردبيهن
وافتح بابهن
فتحت جناح الطير
وراويك الماامراويهن
اجروح ابابهن قوس وحضن نشاب
ويرشكني اعله طولي امنين ماجيهن
هجرانك جدم
وجروحي واحة طين
اتظيك ابطونهن ويعرضن اكفيهن

ومن كتلك ادعيلي
اجروح كلبي اكبار
اتذكر كلتلي
الله يخليهن
جابالجذب كتلي الله يشفيهن
وﻻتنشدني عنهن
كلشي مابيهن
حمر من نار هجرك والسهر بليل
بس انت العيونك ماادري شبيهن
جفل غصن العيون
وطار منهن النوم
وبجيت امصاوت المخ وي بواجيهن

انه اعيوني امهات
وفاجدات اوﻻد
خافن ذلتي وما ذبن اعبيهن
من اخر نجم ضك بلهاة النور
ولحد موت الشمس واعبيهن اعليهن

بساتينك زهن
بس شلي بيهن كون
غيري ايشم وردهن وانه اﻻسجيهن
حرام الماي يلعب يم اشاف الشوج
واجروفة العطش يبس جﻻويهن
انه اطيتك اسنيني
ابشحة الساعات
ووصيتك اعليهن موش تطيهن

وانه اسنيني الشموع
الفوك منهن نار
تنزف روسهن واتضيع رجليهن
نبت رمح المساحي بجبدت الكيعان
ﻻجن ماحين لوما مساحيهن

اذا مات الجرح
كثر اللجم يحييه
والجروح الكبار الموت يحييهن
وﻻتنشدني عنهن
كلشي مابيهن
حمر من نار هجرك والسهر بليل
بس انت العيونك ما ادري شبيهن
انه اعيوني طوس وليلهن ناعور
ينترسن دمع والليل يجفيهن

عباس العبادي 💚🍃

بعد انتهاء صمت الطف
نطق لسان الامام الحسين قائلا:

ماكو امان الطف نهبني....
وحته ماباكتني ناسي مدري ناسي
من طحت ضميت اديه حته ماينباك اصبعي تلمست مبيوك راسي....
نايم وجسمي توزع حصه حصه...
ومو شرط واحد يطيح تبوكه ناس
حجارة باكت مرة گصه...
والله نفسيات عدهم
باكو المحبس اكبالي
وبالخيم وشلت بواجي
ومن مشو واحد صحتله انطيته اصبعي
بس كلتله بذمته الياخذ تراجي...
بكوسر ضلوعي حوافر صلفه كعدن..
خربن فيي وجزن..
مايريدن بس يريدن دوم تجويهن شمس..
خربن كل شغل امس
نمت بالطف والله حيرة
درت ايدي بصفي الاكبر
درت ايدي نايم بصفي عرس
اشتهيت الله وطحت بالطف وذر
وهمه فزعولي ضرس
هناك بالطف كل اصابعهم سوة
اشرو كلهم عليه وطفي خص
تمضمض الطف بهل بيتي ومن شرب عبد الله غص
وبحوافر خيلهم سحكو صبح
اكو وادم شبر ماصعدو ل الله
وانه صاعدلي رمح....
كربله كاروك النه والله هزاهه بنحر....
كلشي بالطف باكني...
سهم بايكله نحر....
باكو احزامي اللبسته
روحو حلفو الماي بايكله ضهر
همه سبعين الف ليل
واحنه بس سبعين شمعه وعدنه بالطف بس كمر
نايم وروحي تهبت والعطش بيه فرش
شمعه خلصت شمعه ذابت
شمعه بيدي مكمطه اشتعلت عطش
الخيم وجت والطف يسولف هوه
هناك ضهر المشرعه توة التوة
لان ضلمه دروبهم باكو ضوة
وانه وي روحي اسولف...
وكت خله البرحي نايم عالتراب ويسحك عليه النوه
واخيرا ارد اكمل وارد اوضح مساله
لليحب الله صدك
الله داينكم نحر ردو اله.....

..كرار وحيد ..💙💦

السيده زينب تقول ل يزيد ..

اني اخت النخيته وجابلي الماي
اذا سولف وي الله يسولف وياي

انا اخت الكمر بس اشبه الليل
الشمس لو صد عليها دور فياي

انا ام اليتامه وام الاكبار
وانا اول حجاب بكاعكم هاي

من انكت عباتي اترسك اخلاق
ولو شيله رقيه زايده هواي

تاجك صح ذهب بس تاج الحسين
عندي حسين يترس گصتك ماي

حلفته برقيه وساكت الراس
كلي انخيني زينب كتله وفاي

البگه براسك ولو راسك رمح بي
ولخاطر رقيه اعله الرمح جاي

مابيهم صدك حتى انخه الحسين
ولا يحتاج احشم الشايل الواي

اصل الشام ( شامت )
شالو التاء وبين مستواهه بيوم ملكاي

مقطع من قصيدة انا اخت النخيته

مصطفى العيساوي 💙💦

**تل الورد**

عاتبني ابعتابك خل ترد روحي

أوَهّسني ابدلالك ، يا شتل شمّام

حتى ازهكَ ، وَشوفَك وينها اجروحي

بيّه اشبع غرورك

يا أعز جتّال

يتمايل غَنج لو بيّه ، ثُكَل نوحي

تعاتبني اعله حالك

صار بيك الصار

جا شِدِّل اجروحك هاي وشتوحي

كَبل حبك ، جبل مالاح طرفي السيل

هَسّه أول زخاخ

إيغطّن سفوحي

ومنّك ماروت يَدعَج بعد روحي

ولارادت ولا سمعت ولا حَبّت

ولا تحمل { نجاة } ابليل لو غَنّت

اعلمها الورع واطبكَ عليها الباب

تذكر ضحكتك ، واجهرت ما عَنّت

لا لامتك ليش ، وشوفك اصبح طيف

شلون ابعدت عنها

شلون ما جَنّت

وعيونك ابغير عيونها اتهَنّت

وجفوفك ابغير جروحها اتحَنّت

يا تل . تل آخر السبّاح

حته اطفه من اشوف رويحتي انتَلّت .

كَلت انجفه الماي

وذبل عود الياس

والوادم نست

وبغيرنه اتسلّت

وأول ماشفت طولك نسيت الصوت

وروحي بلا سبب بجفوفك افتَلَت

يا كَمرة حياتي البَعد ماهَلّت

يا أنتَ ، وكفاني اتوهدنت ويّاك

تحسبني وحسبتي وياك ما فلّت

كلمن عرف وشره ، وشال منها الشال

وتعدّه العمر والوادم اندَلّت

هسه الراح راح ، وبين ايديك الروح

بس ذمّه ابركَبتك يوم لو سَلّت .

عريان السيد خلف💙💦

ياعبد هذا جرح مو فركه هاي

الفركه مابيها عبد هل كد الم

جرحك وفرزنته مابين الجروح

ياعبد لومو جرح ليش نلجم

احنا عكس الناس بحساس الجروح

عدنا مفهوم الجرح مو اله دم

كبل لايطلع جرحنه نحط دواه

اي وحقك ياعبد نشتمه شم

تخيل انته شلونها احبابك وراك

من عفتهم شافو الليل تلهم

احساس وحشه طالب بيوم الخميس

فايت لصفه بلا رفعه علم

ياعبد خضنا حرب كلنا بجفاك

علدموع شتعتقد واحد سلم

هاك دور كلوبنا وشوف الجروح

الرجع سالم اجا محصل سهم

بلكزيزه ونبتدي نحس بجفاك

بيبان حزن البيت اذا شيلها دم

بلشوارع كلها نلكاك امنيات

نحس غيابك علحياطين نرسم

نصبر على الدمعه يفضحنا النحيب

العبره رجفه عسكري مزور عدم

بي لحن صوت الدمع ينزل عليك

ولذلك لازم نسميه نغم

وعينه اعترفت عزف لحن الدموع

ماتنشف على كد مابيها هم

حتى جرحك مانحط فوكاه ضماد

ياعبد لازم نحط فوكاه علم

ايهاب المالكي 💙💦

رديلي الفرح رديت
معضد باب يبچيني
وأحن حنة حمامة بيت
مثل الطاكـ محني عكاه عالمهجور
يلتم العكد بينه ويعبرني ثلاثيني
جنح عصفور ... تايه والعكود تدور .. تايه والعكود دور .
للفضوه نشرنه چفونه جناحين
صارت بلحظه طيارات وغنغنه
وجرح جنحي الطفل ياطوفه غصن التين
وجنح غنيده دك جنحي وكسر عمري
وعبرنه سواجي وبساتين .
بالحفره كبرنه سنين
وردينه لهلنه هدومنه تنكط محبه وطين .
يغنيدة امس ياحلوة الحلوات، صار العمر طوفة طين.
وغفينه ولكينه الدرب والسماك وقمر الدين .
نتختل وره النسوان والشياب
وندك المحله الحلوه باي اباب
يا أول جرس أرعن نتل فرحة وكاحتنه
كبرنه سنين
يا أول جرس إنتلني ... إنتلني
لغنيدة امس للضحكه ردلي جناحي رجعني .
وتغيب الشمس خضره على محّجر الجوارين
وألمح عمتي من بعيد وتضمي بعبايتها
وحس البيت
عمه الشمس ماتت وانت مارديت .
عمه الشمس ماتت وانه مارديت
رديلي الفرح رديت .
معضد باب يبچيني وأحن حنة حمامة بيت
أتلمس ثلاثيني وازتهن شدة امفاتيح
مارهمن ولامفتاح .
لا افتك العمر بيهن ولا افتكيت .

مظفر النواب 💙💦

كون يمك
يا بخت جنحة اليذبه الريح يمك!
كون أشوفك ..
كون ويّ فجر السوالف تغبش عيوني عليك
اتشيل خطوة شوفها وتنكلها يمك
وديّ اشوفك ..
ودي أطيرن محترك واطفة عتب حار اعله دمك..
بلجن اباجي الطفو غيرة دفو وتذوب رسوم الشتة الصك اعله دمك !

ودي اغافل ليلهم و أبحر واذب كَلبي بشريعة
ودي ابوكن جسمي وابعد
وديّ افك باب السنين السودة واشرد

وديّ لاجن شدو برجلي جرس يشهد علية
وبس اشيلن خطوتي الحراس تكعد!

بس اشيلن خطوتي ايردهة الكزاز ..اعيونهم صارت كزاز
ابكل جفن يندله حلمك!
ظفروا رموشي حبل وتنطروا جية ظلام ..وصلبوا اعله عيوني حلمك!

وانت يا المجروح خاف احجي والجمك ..
لو تطاوعني الجروح تصير غيمة
وحتى اراويك شكثر ينزل مطر بالكاع دمك
فاهية الدنيا
طفت لذة طعمها
ولبست انكاب اعلة نجمك ..

كون يمــــــــــــــــــــــــك !
الخالد كاظم اسماعيل الكاطع💙💦

ألعب. ..العب

انه بيه من الدعه
لطولك الف وركة عنب
وارجه كربك بالتهجي
وروحي تباعة ذهب
بالحلم وياي جنك
بالحلم ختيله تلعب
من اطش وياك ست خطوات تتعب
من أبحر بيك تتعب
يلي نايم على طولك
مثل الكلاده اتلجلج
خرزه ليلو وخرزه كهرب
خرزه ليلو وسندلوس وخرزه كهرب وخرزه أبعد
من نجمة الله البعيده
وخرزه اكرب. ..اكرب. ..
كلش اكرب يابعد سجة المجر
ومن سجة الغراف اكرب
انت وحدك ولله دولة
ونومتك والله منصب
كدرت طبعي عله طبعك
وانت كلما اتساهلت وياي تصعب
يلي حسنك فوك كل الناس
شمرة عصا وبيك شويه ملعب
ألعب ....العب. ...العب
يابعد خالي. ..
عليك الحمزه ابو حزامين تلعب
انه تندك روحي هلهوله ابمسامير امنشوفك
ويه كل الناس تلعب
وانت كلبك ينكسر مسقوله ورديه أمن اعوفك ويه كل الناس تلعب
نشدوا الوادم عن انياشينك
الحلوة كلت :بويه ولك كل وصله منك شكل تلعب
أمس شفتك بالحلم بيدك كزوه
تصيد كمطات العصافير
وعسل مشمشه محروكة كلب
ومشربك بخيط الشمس
والضحجه بيدك وانه
جدامك على اميتك جنت مذبوح ارابيلك
ولك لاتعتذر خليني افيدك وانكضي
وياليل. ..وياليل وسط الزهدي حلمي
يلي طولك نايل امكدر كدر
هاك أخذ روحي وياك يحبيب ربابه وبيها ألعب
مدري انت وياي مدري الدنيا تلعب
ترس حظني أتريد تلعب
همة ألعب انه بعد اشويه
يوكع خجلي أو وياك ألعب
انه منين اجيلك وانته بيني وبينك اجويريد وسالوفة ورد وبيوت الكصاصيب كلي منين اجيلك الف مكتوب كتبتلك والف سكته
وانته ما داريت روحي بخلك لفته! بخلك كلبي
اشنون كيفك وانه كل سا معتنيلك
اجي كبالك وارجع كبالك
عجايب! روحه جيه معتنيلك!
روحي جدامك تكلي :شيلني شويه من اتراب الهجر. ...
أخذ نفس وشماردت للطلع والقداح اشيلك
انه داخل عد اصبعك
كبلي محد كال للاصبع دخيلك
سولفيت بفكري عنك لاستكانات العرس والسوك والصفه وسراكي ألناس ولا خليت لاعطار. ..ولا بكال ولا بايع مسج جا عشك هذا لو عزه! كلي طبعك
جوز كبلك ناس جازت
كتله جوز انت
وجزيت انته وغدت روحي
جنازه روحي بين ايدك
افكهه وتنعكد
يلي حسنك ريحة اللفته
وبابك نوم. ..عنوانك ورد عشره باب السيف عد عكد النصاره لحظرة السابي الخلك. ..
سيد نهد انه كلش. ..كلش اهوايه احبك نقطه. ..بوسه
المخلص العاشك عبد وشويه أبعد
مدري انت وياي مدري ال بالبريد وياي يلعب!
كون اصيرن طابع ابنهدك واظلن
يمنه. ..يسره وياك ألعب. ..العب. ..

مظفر النواب 💙💦

(( عِــشكـَـْــتك حلم ))

عِــشكـَـْــتك حلم
بالوحشة البعيده اتسامر اجفوني
وعِــشكـَـتكَ
من ونيــن النايحـه الحره
التلم مجرى الدمـع
من عينها اعيوني
وعرفتك تستحي من العايزه الجبحه
وتـِفل فل الظفاير سفة اضنوني
وتوسمتك .. نِكـش بجفوف بدويه
وذهب ليره .. وشهامه .. اتوج شمس لوني
وتِـعودتك
حليب الوالده الطيبه
وصبرها .. وشيبها
اليتعب على امتونــي
ونذرتك وجه للنجمه الجديده
ونايل وغايه
سمارك عزّتي .. وعشاكـَك اهوايه
عشير الكل عشير ايصونك ابروحه
وبري من كل وجه لو ما حفظ مايه
اشـمّك بالجفوف الطاهره الخشنه
واشوفك بالوفي الكِصٌته امندّايه
وأبورح
لو هبوبك يلتكَـي اّبارح
واخضّر بالعطش من هيبتك دايه
انه ابغيرك كـَمر ما شافته اولايه
انه ابغيرك قلب نِـــيٌته امغـَطـّـايه
ويظل طرواك
نسمة بر.. لايرخص شرفهه
ولاهي تتعـثــّر
يمن طرواك .. خاوه الجدم والمعبر
يمن طرواك.. خاوه الجرح والخنجر
تعودتك
شهامه وخوف ومكابر
وتعـّودتك
محــّبه وليل ومسامر
وتعـّودتك .. خليل وخل
حبيب وكل حبيبه اتبيع طاريها
و ِنــِــتْ
ما بِعِـتْ طاري الراح والمجبل
يمنجل مايلف الردي من االسنبل
يذل وجـــــــه اليضدّك
ونته ابد ما اتذل

عريان السيد خلف💙💦

عثر خلگي وتبدّت وسعة البال..
وتخيّلْت القوافي المالها اعنان.

حچوا عني ابكثر ما چان فرعون..
يذبح من بني اسرائيل رضعان.

أحط إذني إعله صدر السيف والگاه..
من گد ما حچه ابطرواي فحطان.

إبكثر ما للمناجل عدهم اسنون..
ومثل سچينة الغمّان عميان.

عبّرت السوالف كونهن صوت..
وعذت بالله منهن كونهن جان.

أغيّم والجفون ايمطرن إگبور..
وأمسحهن وأشوف اتراب وأچفان.

لهسّه ابباب جرحي الخنجر ايبات..
ولهسّه اچفوفي عد إفلان وإفلان.

ولهسّه امتوني من احمولهم سود..
ولهسه اجفوني من انطارتي اضخان.

إنچفت بيبانهم يم طاسة الماي..
وفزعتلي السمه المن غير بيبان.

أبد ما حشّمت بس يستحي الباب..
يسكت وآنه الي بخاصرته نيشان.

الغزاله التنهطر من خوفها اتصيح..
السباع ايگومن إمن الگاع خرسان.

نهر ماخذ گفاي إعله المشاحيف..
وشارب من مكر دنياي گيعان.

أحط إيدي ابگفه الما يعرف ايفوج..
وأكره كل نهر ما شال غرگان.

وأعاند من تهد بخيولها الريح..
روج ايوگّف إعله الغيم سفان.

حليم وفرزنت ضحك الشياطين..
وأسكت وآنه أعرفه ابليس شيطان.

درب طاحوا ابصدري طيحة الفوس..
تشاويت، وگلت طيحات رضعان.

الطفل لازم ابزغره ايطيح ويگوم..
ولو طيحاتهم طيحات شبّان.

گمت والحيل يتشلبه إعله الإمتون..
إبمهر يگطر ضوه وبإعناد فرسان.

أجر نفسي ويتيه ابريّتي الليل..
وأفح ويصعد اويه الريح دخّان.

غرت واتنگّبت جدامي الأوجوه..
جزتني وجابت النسوان، نسوان.

و عفيت وبالعفو تنقاس الإرجال..
الرگاب اليعفو عنها السيف تنهان.

عبرت والشراع ايدغدغ الغيم..
أنا الما عبّرتها اشلون ما چان.

ما خلّيت حملي ابعازة امتون..
السمه تنذل لون تحتاج عمدان.

... عباس العبادي💙💦

الكبير عبد الأمير المسلماوي - ذاكرة مدينة

(( قصيدة الحرامية ))

اذكر بعد ما مفطوم

كاروكي جذع نخلة

وحدري كربه ، كربه ونص ومغطتني سليه

وامي مشيله مدري بيش وصله شماغ چفيه

وابوي عگاله اسود طوخ ومحزم برديه

بچعب الحوش بستوگه

عـالرف تمره معلوگه

وجدي معلگ بسمار لا مو صورة عوچيه

وعلى الشاطي يرد مشحوف يمرح بيه مرديه

وبخشم اختي هيله عران يوم تلبسه هي ويوم لحضيه

واخوتي تلعب محاچيل

كل صگعه برهن من فرده زهديه

وچلبه مكرم السامع

تهز بذويلهه لأمي

وتشكي من الحراميه

وگني وثنعش فروج

ودجاجات اربعة ولاري ، وسته لو سبع بشات

وياهن خضيريه ؟

وياهن خضيريه

وعدنه گباب فرهه ثنين

الزغيره بيهه ملمومين والغربيه للخطار

وگهوه وهاون وفنجان

ودلة تزحف عله النار

وگونية شكر للچاي

مرچية عله گونية ، ذخر للأربعينيه

واذكر يوم گمريه

فطموني عله صبيره

وحلو حلگي بتميره

نمت والچلبة تتنطر الفجريه

وچفتونه الحرامية ... باگونه الحرامية

باگو كل غلايچنه ، والمصخنه والجاون ، والرحى التركية

والسجادة والسبحة الحسينية

والقران ... لا موجود ، صاحت حيل بيهم اختي نشميه

يـبــــــو لحگـــو حرامية ... يـهـــــــو لحگـــــو حرامية

وكلشي راح ... أي والله

بس ضل جدي متعلگ بسماره

وضل فنجانه يضحك الخطاره

وضل عـران هيله مال الحراره

وهدأت اختي نشمية

وامي تصيح

فدوة الكم ، يبعد امكم ، ييمه الراح ميخالف

وابوي عله النهر واگف

امي تگله يا كاظم درد وهجعلك شويه

يگلهه لا يفخرية ...

بعدهم ما مشو عنه .. بعد عدنه الحرامية

هذولاك الحرامية

واشوفه غـط شليف البوه ، وتناوش الكسرية

ومشه عنه ابوي وراح

يدبچ والنخل وياه

يهوس والگصب وياه

عد عينچ ينشمية ... عد عينچ يفخرية

اذكر أي نعم اذكر..

عبد الامير المسلماوي 💙💦

.....

من اجمل ما بولايتنه ... جهل الناس!
محتفلين بعرس القاسم يوم استشهاد العباس!
من اجمل ما بولايتنه الفقره هواي
عبد الله مخلينه خرافه ومصدكين بــ (عبد الماي) !
وكلشي يشور
الاستاذ ! الحجي! الست !
نذر السيد ..!
كلها اتشور
من الشرطي لأكبر راس
ومجنون اليكتبله روايه
وعاقل حيل الخطله دعايه
بولايتنه الحوته تسولف
والكمر يخاف من الحوته
والبلبل محظور يغني
وفحل الماعز صوته يخبل !!!!!!
مظطهدينه !!!!!
وحيل يحقله يجرب صوته
بولايتنه تشرب دم الفقره يحقلك
بس ميحقلك تشرب كاس
بولايتنه المؤمن صخره
والعاهر مليانه احساس
بولايتنه ناس هوايه .. بس مو حيل هوايه الناس
والشجره تموَت من البلبل
وتفك حلكين اعله الفاس
و عدنا آدم ساكت مايحجي
ومسَلم قابيل الساحه
ومن يصرح مانتصنتلة ومايوصل للباب اصياحه
ناس انسحكت.....
ناس ارتاحت.......
وناس بسد آدم ذباحه
وكلها من آدم .......حط كوره وكور التفاحه
جاهسه العالم مرتاحه
والدين شكد ريفي الهسه
ومحرم الحب والحريه
وناسخ كل آيات الشورى
ومطبق نص الفصليه
مايحجي بلغة القاروره
واترف ادواته التوثيه
وشكليات بلا تبرير
وي يوسف ما ممكن تمشي..... خاف بدربك يصدف بير
وزحمه تصادق وحشي شلون !!!!
ماكاتلهم دم الحمزه!!
لا كاتلهم فرق اللون
بنت السيد بس للسيد
ميهم عانس تبقى سنين
الظاهر جان الله يفرق عنده حصانه الطين وطين
واهل الدين اكبر اللادين
يتريكون بدمع الفقره
ويتغدون بشرف الحره
ويتقيؤون بنفس السفره
ويخمسونه السيد حسين
وبولايتنه الساسه خوارج
والسجاده شكد حزبيه !!
الــ مو بالتيار الزاجل
ماله صلاه وي الفضيه
وسايقنا يعجبك,, مو سايق
بس يتراجع مايتقدم
ومن العبريه ايفول دم!
واكبر خرسان العبريه ...
وطن يوزع للمو فقره
ويفرش جمره بدرب الحافي
الياكل بينه نصبله بدمنا ......وانصبله ومانسمع كافي
ونقطه ابين النقطه و نقطه
واتفتش كل مامر نقطه
من أرجع بيتي انكث جلدي؟؟
الشغله تفشل!!!!!!!
بصمات الشرطه اعله اردافي!!
بولايتنه هوايه سوالف
بس الوادم مقتنعين
خاف اتعمق وتعيروني
جوى المرمر كلش طين


عقيل العرد - السماوة 💙💦

( هلي) - زين كريم 💛🍃

هلي وعيون اليسافر ماتسافر

ومدري ياغيمه الخذتكم نجمه نجمه وأنه أباوع

وضلت أمكاتيبكم تصفن تراب

وهندست كل الشوارع ...

وياعگبكم ماعگب ذاك النسيم

وبعد ماتضوي الزوايا المشطيتوها أصابع .

عوديتوني أبونسكم صرتوا سوله

وصرتوا للتيهات عرفه

ااااخ روحي المالگت مرسه أعله ظنكم

و ااااخ جرحي الشافكم لذه أويه نزفه

چنتوا يمي وچنت أگول الغربه چذبه

وهسه چذبة وطن كلفه ... !!!

ويكبر المامش بظني

هواي ناس بروحي لچن موش يمها

هواي فلوها الظفاير

بس تريد العرف شمها

أمولع بطارف سچچکم

غربه بدرابيني طشت

الليل بعيوني يلمها...

يلوح خيال الصبح ياريته لاح
ويحكم الحادي على خيله ونوكه
يا كحيله يشوف سبكت بالرواح
ويا كحيله العاودت مسبوكه
انه شوكي اليتعب وما يستراح
شمعه ضلت للصبح معلوكه
وشوكي لو يمطر على البر والسفاح
ينبت ابين النخل وعروكه
الزهدي والبرحي خذن نفس اللكاح
لكن اشوف الفرق بعثوكه
لا تنوج للغزاله بلا سلاح
ولا تغير بكاع ما مسحوكه
ولا تنود ويه الغنه وغناك راح
والربابه الهزتك مخنوكه
النار هزت بالجدر والفوك فاح
وروحي كامت لك واهي محروكه
طيني احمر وانت طينك بيه ملاح
وخل نشوف بياحديقه البوكه

محسن الخياط 💛🍃

‌‎الدنيا تتعب من تحطني أبالها
آنه أول ما صرت خيالها
الليل رافگني و ترست اعيونه نوم
و فرزنت نجماتها من اهلالها
الميت اتعرفه عزيز من النگاب
و الجنازه اتبين من الشالها
السلم من اليسره ما داخل مضيف
و من تلومه الناس گال اشمالها
شايل براسي حچي من احچي اموت
ناس صعدت بالحچي المو مالها
مامحول يم سلف مابي جبير
ومامسولف سالفه يم الزغار
ولامثني احجايتي وكايل دخيل
ولامفرع يم عگل مطلوبه ثار
اكره الورده الترافه بعركه عيب
انا احب السيف جي صاحب قرار
طيحت الماعنده اخو اتعثر المضيف
الماله بالوادم ربع يكضيها صار
جويت التنور تنطي الخبزه صيت
ضيف المعزب تشوف ابابه نار
الطير لو صفك يجي اباله الرحيل
الطير متوارد احسه اوي القطار
المايخلي لروحه قيمه تقدره ليش
اهواي وادم مستحه اتكلهه الكبار
هيه سمعه وناسنه ادور الصفير
الحمامه اشما تزل سمعتهه غار
ابقه عالي المايلوحك صوج اديه
جانت الخبزه نبي ابوكت الحصار
المنجل امنتكله شيخ ايصير سيف
وينسه حجمه ويمشي بسمه المستعار
ماكعدت ابراس غيري وبكته ليل
وماكشخت ابيت غيري بنص نهار
انا احب اسوالفي مثلي حلال
اسوالفي ايشبهني هم بيهن سمار
البدوي هلهولة نده عنده الرعيد
موتت الغيمه عرس للكلبه حار
لا تهد ايدك تره الناعور مات
وكمنه نقره الفاتحه للعنده ثار
صاحبي انطيته تفكتي وكتله صيد
الطيره ضلت حاطه وصاحبنه طار
الفاتحه البيهه بجي صاحبهه زين
الخير ابسابع سلف ونحسبه جار
ولاتقيم صاحبك لو وجهه جاك
انته قيم صاحبك من تستدار
الشريف المايشر حجيه اعله اخوه
اليكشخ ابثوب الحجي يم ربعه عار
امنين اجيب لناسنه سيد بخيت
يحجي وي الله صدك من يستخار

مصطفى العيساوي 💛🍃