#كبسوله_فرح 💊
الحلقه الثالثه عشر...
بقلمي:- Hanin ❤
وفعلا نسيت الموضوع.... يلا في يوم العرس جاتني رساله من ايمن... فتحتها لقيته نفس الفيديو... حاولت أشرح ليه م سمعني... ويلا طبعا انت عارفه الباقي....
أفنان قالت لي (لوف... الموضوع ده وراهو قصه طويله وخطيرة... بس م تخافي بتتحلي أن شاء الله... يلا بعد شويه الباب دقا... أفنان فاتت فتحت الباب جاء داخل السموأل... قال لي (لوف... اول شي انت زوله زيك زي أفنان واحد... وثانيا أيمن ده بالنسبه لي  أخ اكتر من صديق.. وروح وحياه... عشان كده انا دايرك تحكي لي ال حصل بالتفصيل... )حكيت ليه كل شي حصل من طقطق للسلام عليكم... السموأل ده ختي يده في رأسه وقعد... قال لي (إيلاف... انا أخوك الكبير صح؟؟ )قلت ليه (السموأل م تقول لي... )قاطعني قال لي (ح تسمعي كلامي وتلمي حاجاتك وترجعي بيتك... والقصه دي محلوله... )قلت ليه (لا... لا ي السموأل. . م راجعه.. م برجع لراجل م وثق فيني... وحطم لي كبريائي )قال لي (ارجعي ي لوف... ارجعي وخليك واثقه أنه مستحيل انا اتخلي عنك... وفي اي وقت احتجتي لي او أيمن عمل ليك حاجه او م قدرت تتعايشي معاه... تأكدي انا الحارجعك السودان... )قلت ليه (كويس )قال لي (قبل م تطلعي.. اديني رقم فريد )مليته رقم فريد،، ومشيت لميت حاجاتي وانا ببكي... م عارفه انا ببكي علي شنو بالضبط.. علي روحي.. ولا علي حبي لايمن.. ولا علي شك أيمن فيني... ولا عشان الحاجات دي كلها 💔💔😢... المهم خلصت.. ولما جئت طالعه لقيت ايمن قاعد بره مع السموأل... اول ما شافني وقف علي حيله... انا قلت السلام عليكم وقلت للسموأل انا جاهزه.... أيمن جا شال لي شنطتي ونزلها ودعت أفنان وبكيت معاها زين ومشيت... أيمن فتح لي باب العربيه القدام انا فتحت الباب الورا وركبت... م فتح خشمه وساق لحدي م وصل البيت... جا نزل لي شنطتي ومشي فتح باب الشقه ودخل الشنطه... ده كله وانا من العربيه م نزلت... جاني راجع قال لي (لو م دايراني اقعد معاك عادي ممكن أطلع اخلي ليك البيت.... ) صريت ليه وشي ونزلت... مشيت خشيت البيت لقيته مقلوب فوقاني تحتاني... عاينت ليه نظام ده شنو؟؟؟ قال لي ( م كنت متوقع أنك ممكن تكوني راجعه الليله... إلا والله كنت جبت زول ينظف البيت ) برضو خشمي م فتحته... الكلام ده كان الساعه 7 م .... مشيت غيرت ملابسي وجيت بديت نضافه... طلع من غرفته لقاني بنضف... قال لي (خليها بكره الصباح انا بجيب زول ينضفها... انتي تعبانه ) بقلبي قلت ليه (اشتكيت ليك.. ولا سألتك )وبرضو م رديت عليه وواصلت نضافه.... جا بدأ يساعدني ويشيل لي الحاجات... المهم اشتغل معاي... انتهينا زي حوالي الساعه 10 م كده... قال لي (أمشي ارتاحي بعد ده ) برضو م رديت 《اي عارفه نفسي حقاره 😌😌 انتو مالكم 》... مشيت استحميت وبقيت جعانه طلعت لقيت أكل ماف في المطبخ....وماف ولا شي بعملوهو... بقيت بطنطن وبتكلم مع روحي ( الواحد م يغيب من البيت أسبوع يجي يلقاه مقلوب فوقاني تحتاني... لا وغير كده ماف أكل ... ي ربي هسي انا اسوي شنو ) جاني صوت أيمن من ورا (حقك علي ي ستهم... تعبتك معاي ) عاينت ليه بطرف عيني وطلعت خليت ليه المطبخ... أيمن طلع من البيت وفات جاب أكل وجا... جا دقا لي باب الغرفه انا أبيت أفتح ليه.... قال لي (لوف.. الأكل انا جبته وختيته في المطبخ اطلعي عشان تاكلي.. )ومشي دخل غرفته... بعد اتاكدت أنه دخل... طلعت مشيت المطبخ... أكلت ولما جئت راجعه الغرفه لقيته في وشي...كان بعاين لي ينظرة بتاعت انكسار كده... م اشتغلت بيه... قام مسكني من يدي وقال لي (لوف... حبيبتي انا والله العظيم اسف... والله قدر م فتشت كلام عشان أعتذر بيه م لقيت😢😢.. انا عارف انا غلطت في حقك كتير... بس المسامح كريم... )قاطعته وقلت ليه (بس انا م كريمه )وجربت يدي منه...وجريت خشيت غرفتي... للحظه حسيت بضعف وحنين ليه بس تاني اتذكرت هو عمل لي شنو قعدت أبكي... بكيت كده لما نمت وانا ببكي... م صحيت إلا الصباح... قمت لقيت ايمن مافيش قلت اكيد بكون فات الشغل... وطلعت بره... كنت حاسه بفراغ كبير ... واشتقت لناس بيتنا... انا تقريبا من جئت هنا م اتكلمت معاهم ومستحيل اني افتح خشمي معاه عشان اقول ليه دايره اتكلم مع ناس أمي... طالعه ماشه ع المطبخ لقيت في الصاله كيس صغيروني كده... احترت ده بتاع منو... قلت يمكن بتاع أيمن بس الفضول كان قاتلني مشبت عليه فتحته لقيت جواهو تلفون جديد ومعاهم شريحه وورقه مكتوب عليها.. (اسف انا طلعت بدري.. ده تلفون ومعاه شريحه ركبيها واشتغلي بيه... وفي قروش في ظرف إذا احتجتي لحاجه ممكن تطلبيها وده رقمي إذا احتجتي لي ) ابتسمت ابتسامه جانبيه ورجعت الحاجات في محلهم ومشيت المطبخ... دايره اعمل لي فطور... وفي أثناء م بقطع في الخضار سرحت...
flash back...
كنت واقفه بالزفاف في نص الكوافير...  وعيوني كانت مورمه من كترت البكاء... البت المكيجتني اجتهدت شديد أنها تخفي آثار البكاء بس بدون فائده... لحدي م جا أيمن...
يتبع..
مع كل

#كبسوله_فرح 💊
الحلقه الرابعه عشر...
بقلمي :- Hanin ❤
لحدي م جا ايمن خاشي الغرفه... مسك لي يدي وقال لي(  انت واحده رخيصة.... وأنا اتزوجتك بس عشان خاطر أبوك وأمك اللهم غاليين علي... عشان م اشلهم بعمايلك ي عفنه 😠 بس لما نبقي في بيت واحد بوريك كيف تقلي ادبك تاني مع زول) قلت ليه (ايمن.. انا والله م عملت شي... وقسما بالله الفيديو ده م حقيقي... بس اصبر لي اشرح ليك ) قال لي( تشرحي لي شنو بالضبط... تشرحي لي الوداك بيت ناس محمد شنو... ولا تشرحي لي أنك كنت قاعده معاه في غرفه واحده ليه.. لا وبدون طرحه وكمان قاعده معاه في السرير... ايلاف شعرك الأنا لحدي م اتزوجتك ما حصل شفت منه سبيبه طايره بالغلط اجي ألقاك فاكاهو لا ولمنو؟؟؟ لاكتر زول انا بكرهه في حياتي... وأكتر زول اذاني في الدنيا... صراحه م كنت متخيل أنه انت تصلي للمستوي المنحط ده... ياخ ع الأقل كان تراعي لمشاعري... بس لا انت واحده انانيه... نفسي اعرف لقيتي عنده شنو وانا م لقيته عندي... اتكلمي ) انا صراحه كنت مصدومه فيه أنه بقول لي كلام زي ده... لأنه عمره م سمعني كلمه شينه بكيت لما الله غفر لي....
back...
فجاه حسيت بيدي واجعني عاينت لقيت يدي اتجرحت والجرحه كانت كبيره قعدت أبكي من الالم... مشيت غرفتي وقفت الدم وربطتها.. تاني م قدرت اعمل شي... مشيت غرفتي ورقدت وانا الجوع داير يقطع مصاريني... قلت اطلب دليفري اتذكرت ما معاي قروش... قلت اشيل من القروش الختاها لي تاني قلت استحالة اهبشها... مشيت الصاله وفتحت التلفزيون وقعدت أحضر من الم يدي والبكاء البكيته صدعت ونمت في محلي داك... صحيت علي حركه زول شايلني فتحت عيوني لقيته ده ايمن... قلت ليه ( نزلني... بتكلم معاك انا... نزلني ) نزلني وقال لي ( انت المنومك في الكنبه شنو ) قلت ليه ( وانت الاداك حق تلمسني منو؟؟؟ )بتكلم معاه فجأه مسك لي يدي قال لي (لوف يدك مالها؟؟؟ ) م اشتغلت بيه كتير.. مشيت ع غرفتي وأنا الجوع خلاص انتهي مني... جا فتح الباب.. قال لي ( اول شي..أنت جرحت نفسك بشنو؟؟ وكيف؟؟ تاني حاجه انت ليه م اكلتي حتي الآن؟؟ ) عاينت ليه بطرف عيني وقلت ليه (م شغلتك كتير )قال لي (لوف بطلي مساخه.. انا بتكلم معاك )قلت ليه (دي طريقتي م عجبتك انت م مجبور علي... رجعني السودان الليله قبل بكره )م رد ع كلامي... طلع من الغرفه... تم نص ساعه جا دقا لي الباب قال لي( انا جبت ليك أكل... تعالي اكلي) عملت روحي م سامعه.. جا قعد جنبي ف السرير.. قال لي (لوف.. حتي ولو كنت زعلانه مني ده م بيعني أنه انت م تاكلي... أنت زوله كبيره وعاقله... حركات الشفع دي حقه تبطليها  )قلت ليه (لو سمحت اقفل الباب وراك لما تطلع )وقبلت علي الاتجاه التاني... أيمن قال لي (لوف... لو م اتحركتي قدامي بالجد الحاعمله م حيعجبك  )م اشتغلت بيه كتير... قام من السرير وجا شالني وطلع بي ع المطبخ... انا قعدت اضرب فيه ونزلني ي حيوان وانت قائل روحك بتقدر تجبرني ع أي شي انت دايره تبقي غلطان... وأنا م شافعه... فكني ياخ... وقعدت أصرخ... قال لي (شافعه ي ايلاف... شافعه وستين ألف شافعه... وأحسن تاكلي عشان م اجبرك أنك تاكلي ) عاينت ليه جوه عيونه قلت ليه (م بتقدر تجبرني ع حاجه انا م دايراها ).... قال لي (عايزه تجربي )عاينت ليه وابتسمت ابتسامه بتاعت سخريه 😏وقبلت ماشه ع غرفتي... مسكني من يدي وقبلني عليه وقرب علي شديد  انا خلاص حيلي مات ودموعي رقرقو😢😢 وقلت ليه بصوت حنين(خلاص باكل والله باكل ) ضحك وفكاني.. قال لي (الواحد حقه يكون بقدر يتحمل عواقب طوله لسانه😛 )... انا بقيت قدر السمسمه... خش المطبخ وجا طالع شايل الأكل... قال لي (تعالي اكلي  )مشيت اكلت وشغاله بحمر ليه😒😒 وهو يشيل ويتبسم😄... خلصت أكل قائمه ماشه قال لي الكيس ده حقك... قلت ليه (م دايره حاجه منك انا ) قال لي (وانا م بطلب منك تشيله. .. ده حقك علي وانا بديك ليه )قلت ليه (م دايره حق منك انا... وللمره الزفتميه حل من طريقي ) قال لي بصوت مليان غضب (لوف.. انا م حاستحمل تراهاتك دي كتير.... صح انا غلطانه في حقك بس خالص ده م بيعني أنك ممكن تتعاملي معاي غلط كتير فاهمه الحته دي انت؟؟؟ ) قلت ليه (انت م مضطر تتحملني... وأنا م مضطره اتعامل معاك... كده انتهينا ).... ومشيت خليته... بقي واقف زي الزوله الصابه فيه مطره ووشه ده جاب ميه لون😠😠... انا م عبرته وخشيت غرفتي.... مر علينا أسبوع م اتلاقينا... انا بصحي الصباح بدري بجهز ليه الشاي وبرجع بنوم... هو بصحي بشرب الشاي وبطلع بمشي الشغل.. بجي راجع بخش غرفته انا بطلع بجهز ليه الفداء وبرجع غرفتي... بتغدي بطلع بمشي.. وين انا م عارفه💁.. بجي راجع بالليل بلقاني نمت... نحنا شغالين بالطريقه دي.. مر علينا أسبوع واتنين ولما تمينا شهر... انا بتذكر لما كنا في السودان انا قدمت لعقد شغل هنا في مستشفي كبير في ماليزيا واديتهم الإيميل بتاعي.. ففي يوم جاتني رساله من اداره المستشفي عشان اجي اعمل المقابلة
يتبع
مع كل الريد السمح شديد ليكم

#كبسوله_فرح 💊
الحلقه الخامسه عشر...
بقلمي:- Hanin ❤
فرحت شديد... وبقيت انطط في نص البيت... جا أيمن خاشي... لما شافني بنطط أستغرب وقال بينه وبين نفسه (معقوله ايلاف تطلع بتتعامل مع الجن؟؟ ) جا مسك لي يدي... قال لي (لوف.. أنت كويسه.. ) قلت ليه (ياخ انا مبسوطة... ومبسوطه شديد كمان.. )أبتسم وقال لي (عساك دايما ) لما قال لي كده انا ياداب انتبهت ليه... اشتقت ليه شديد ياخ... انا شهر كامل م شفته... كان شكله متغير شديد... عمل ليه لحيه... وعمل ليه عضلات وفجاه بقي طويل (انتو ي اولاد صحي الزول البرفع حديد ببقي طويل😎) المهم..  قلت ليه ( انت عارف الليله انا سمعت احلي خبر كنت منتظراهو من زمان )أيمن قال لي (معقوله ي لوف زهجتي مني للدرجه دي لما كنتي منتظره الخبر ده من زمان وفرحانه كده شديد لما سمعتي بيه )قلت ليه (بالعكس انا م زهجت منك ولا شي... بس بالجد انا كنت منتظره الخبر ده من زمان... وهسي اتحقق... ياخي الحمد لله )أيمن حسا بالانكسار وقال ليها (كويس ي ايلاف...  جهزي نفسك لأنه طيارتنا بكره الساعه 7 ص ) انا اتفاجات وقعدت في الأرض... وقلت ليه (قلت شنو؟؟؟ طياره شنو؟؟ ونحنا مسافرين وين؟؟ ) قال لي(إيلاف نحنا راجعين السودان،، انتي مش ليك زمن بتقولي دايره ترجعي السودان.. اها نحنا راجعين بكره )... انا قعدت أبكي وابكي.. جا أيمن رفعني من الأرض... وقال لي ( لوف.. قلبي انا.. في شنو؟؟ البيكيك شنو؟؟انت مش كنت عارفه الخبر وكنت فرحانه قبل شويه؟؟  )قلت ليه (لا.. انا م كنت فرحانه عشان الحاجه دي... بس كنت فرحانه عشان الطلب القدمته في المستشفي ال هنا أتقبل... وكنت اخيرا حانزل عشان اشتغل... ورسلو لي رساله قبيل أنه مفترض اجي بكره عشان اعمل المقابله )أيمن قال لي (إيلاف.. iam so sorry بس نحنا مضطرين نرجع السودان بكره... لأنه بالجد الموضوع م مستحمل أنه نقعد هنا ) قعدت أبكي واعزي... وانعل في حظي... يعني كل م أحس أنه خلاص اتفتحت علي وأنه أموري حتظبط بتجي حاجه وتخربها لي... قلت ليه (طيب ي أيمن ما ممكن ناجل السفر لبعد بكره؟؟ )قلت ليها (لا والله ي لوف... مافي طريقه ) قلت ليه (خير ) قال لي (بس في حل.. ممكن ناخر رحلتنا ساعتين لحدي م تتمي المقابله بتاعتك ونسافر  )نطيت لي في رقبته وحضنته وقلت ليه (شكرا ليك ياخ... أنت احسن زول والله )... هو أبتسم وقال لي ( وانت نعمه ربنا البشكر عليها ربي كل يوم وبدعي أنها م تزول💐)...
وفعلا أجل لينا رحلتنا تلاته ساعات... وأنا مقابلتي كانت الساعه 8 ص...
انا اليوم داك م نمت للساعه 2 ص... قاعده صاحيه... طلعت أشرب مويه لقيت ايمن قاعد بره ماسك اللابتوب بتاعه وشغال... احترت هو شغال شنو؟؟؟ مشيت خشيت المطبخ وجيت طالعه ناداني... جيت عليه.. قال لي (اول شي ي ايلاف... انا دايرك تسمعني من البدايه ومن غير م تقاطعني كويس ) حركت ليه راسي بمعني كويس... واصل كلامه(ايلاف انا قدر ما فتشت عن كلام اقوله واعتذر بيه م لقيت.. كل مره اقول اجي أعتذر ليك فيها بتخذلني شجاعتي.. بس ي ايلاف هسي انا مجبور اني أعتذر ليك... وزي ما قال الشيخ الشعراواي"نظغوا جروحكم من الداخل قبل خياطتها " عشان كده ي ايلاف... انا اسف... اسف علي كل كلمه شينه انا سمعتك ليها... اسفه علي كل تعامل زفت انا اتعاملته معاك... اسف علي كل دمعه انتي نزلتيها بسببي... اسف علي كل ليله انت سهرتيها بسببي... انا عارف أنه الاعتذار ما حيحل حاجه... ولا حينسيك المريت بيه... بس انا عارفك انتي زوله طيبه ومسامحه... عشان كده ي ايلاف لو بتقدري تسامحيني ي ريت لو تعفي لي ال عملته فيك... وأنا أوعدك اني ح اجيب ليك حقك... حاخلصه ليك كامل مكمل... بس سامحيني ي رفيقه الروح...)خلص كلامه ده والدموع كانت ماليه عيونه... انا كنت ببكي معاه... ومع كل كلمه هو كان بقولها وكل دمعه انا بنزلها كنت بحس أنه قلبي بنضف تجاه... لحدي آخر كلمه قالها انا حسيت نفسي تجاه صافيه... وما في اي شي كعب مني ليه... بس كل حب... بعد خلص انا قمت حضنته... وقلت ليه (حبك ي مرام الروح مولود فيني بالفطره... كيف أزعل منك وأنا حملي كله ع قفاك )... ابتسم لي ابتسامه حسيت معاها أنه روحي اتردت... وقال لي(قومي نومي بعد ده... لأنه بكره يومك طويل.. )قلت ليه سمح... وفعلا مشيت نمت نومه يمكن من جيت هنا م حصل نمت زيها... نمت مرتاحه ومطمنه وحاسه أنه الجاي كل خير...
الصباح اصبحنا أيمن وصلني المستشفي وفات علي شغله كان عنده شويه حاجات قال يتمها قبل م نسافر... فعلا انا خشيت المقابله وعملتها وطلعت ظريفه.. وكانت النتيجه مرضيه... خلصت زي حوالي الساعه 9 ونص جاني أيمن ومشينا البيت ستفنا ملابسنا وطوالي ع المطار...وصلنا السودان... وأيمن وداني بيتنا.. كنت مشتاقه لناس بيتنا شديد... لاقيت أبوي جنب الباب ماشي الجامع... مسكته وقعدت أبكي.... انا قريب الساعه ببكي وبعزي.. أمي جات بتكورك ليه (منو ي محجوب الفي الباب؟؟ )جات لقتني انا... مسكت فيها وقعدت أبكي.
يتبع
مع كل الريد السمح شديد ليكم♡♡

#كبسوله_فرح 💊
الحلقه السادسه عشر...
بقلمي :-Hanin ❤
مسكت أمي وقعدت أبكي... بكيت كل الأيام المره العشتها بدونها.. بكيت كل الوجع الحسيت بيه... بكيت قدره ما الله اداني قدره اني أبكي... بعد خلصت أمي مسكتني من جضومي وقالت لي (الزول بكبر بعقل... ولا بكون لسه في جنه )... قلت ليها وانا بتنهد(مهما عقلت ي أمي... مستحيل اني أعقل معاك.. )وقعدت أضحك... يلا قعدنا معاهم حبه وكان مفترض أنه نمشي لبيت ناس أيمن... وفعلا اتحركنا مشينا اول م وصلنا لقينا بيتهم كله مستنينا في الباب... خالتو سلمي دي حضنتني وبقت تبكي.. انا اتذكرت أمي قبيل وبكاها معاي وتاني بقيت أبكي... بكيت لما قلت كفاي... ومشيت سلمت علي عمو سعد... يلا هو بالذات كنت بحس معاه  بأمان خرافي... كنت بحس زي كأني بعرفه من زمان... بحس معاه بنفس الأمان البحسه مع أبوي... المهم سلمت عليهم وسلمت علي آليا واسعد وأحمد... وطبعا حبيبه ايلاف.. مرام السمحه... سلمت عليهم ودخلنا البيت... قعدنا كلنا في الصاله وبدينا نتونس
طبعا هم ظريفين شديد... عنده آليا... ودي أكبر واحده في البيت عمرها كان 28 وسنه وطبعا بتها مرام... وعندهم أسعد ده ورا آليا عمره 26 سنه وده خريج هندسه بس اشتغل مع أبوه وماسك الفرع بتاع الصين... عندهم أحمد وده الأصغر من أيمن وعمره20 سنه وده بقرا طب... (ومن هنا التحيه لكل زول بقرا في المجال الطبي✋...الناس المدعوكين وعينهم طالعه ووقتهم كله بقضو قرايه... ليكم كل الحب والله... وخلقتم بلسما فلا تشتكوا )وطبعا زولي أيمن ده قارئ هندسه نفط وحضر ماجستير في اداره الأعمال عشان خاطر شغل أبوه وهو عمره 25 سنه...
.. أحمد قال لي (مره اخوي السمحه.. شنو يعني سافرتي ونسيت صحبك.. اخوي نساك لينا كلنا )قلت ليه (معقوله ياخ يا أبوحميد... ده انت الكل في الكل ياخ... بس م حبيت اشغلك... اها قرايتك ماشه كيف انت؟؟ امتحاناتكم قربت صح؟؟؟ )قال لي (والله ي لوف..  انا عيني طلعت... أنت عارفه الmedicine ده قدر ما حاولت حلف لو يدخل لي في رأسي... وأنا امتحاني فضل ليه أقل من أسبوعين )قلت ليه (خير ي زول انا بشتغل معاك الأسبوعين ديل وأن شاء الله ربنا يوفقك )قال لي (انتي زولتي ياخ.. والله لو كان عندك أخت أصغر منك هسي كنت جكستها  )خالتو سلمي قالت ليه (بس ده المطفشك.. هسي لو بتفكر في قرايتك قدر م بتفكر في البنات الزمن ده كنت بروف الدفعه ) قال ليها (أمي.. أنت بس م تلقي فرصه فيني تبدي تشغليها لي... سمح ذاتي مارق مخلي ليكم البيت ده )قعدنا نضحك... عمو سعد قال لايمن (لما تخلص تعال لاحقني ع المكتب )أيمن قال ليه (حاضر )... قعدنا نتونس كده... ايمن فات علي ابوه...  خشي المكتب ابوه قال ليه (أيمن.. انا طلبت تجي السودان بأسرع فرصه ممكنه لأنه المحكمه طلبتها للشهاده... ومافي طريقه أنه نخبي عليها اكتر من كده!! ) رد عليه (أبوي.. زي ما انت عارف انا م وريتها حتي الآن.. فالحكايه بتاعت أنه تمشي تشهد دي دايره ليها وقت عشان هي تقتنع بيها ) قال ليه (خير.. المهم حاول أنه تتكلم معاها )واتناقش معاه في أمور في الشغل... بعد خلص جاني لقاني قاعده مع أحمد بشرح ليه في حاجات.. قال ليه(شنو ي أبوحميد انت استغلالي كده ليه.. ياخ خليها ترتاح.. )عاينت ليه وانا ببتسم (لا لا.. والله انا ال قلت ليه أراجع معاك.. وهو كان مصر أنه أرتاح بس م مشكله )... قال لي (خلاص هسي كدي خليه وواصلي بكره... هسي قومي ارتاحي )... قمت معاه ومشيت وصف لي الغرفه وقال لي (ارتاحي.. انا بجيك بعدين عندي معاك موضوع.. تمام )قلت ليه تمام... بقيت أفكر في انه موضوعه معاي شنو... والبحصل شنو؟؟ في أثناء م انا قاعده جاتني مكالمه من فريد.. رديت (اووو... زولي السمح.. شوق والله )قال لي (عايني اول حاجه انت زوله كعبه... الحاجه التانيه انا م دائر معاك إي كلام... الحاجه التالته.. حمد لله ع السلامه )ضحكت وقلت ليه (الله يسلمك... وأنا كمان اشتقت ليك )قعد يضحك واتونس معاي كده وسألته من الشغل واخباره.. في نص الكلام قال لي (لوفتي.. دايره أسألك سؤال.. تتذكري موضوع محمد )قلت ليه (مستحيل انساه.. أنت عارف بسبب الموضوع ده انا علاقتي مع أيمن م اتصلحت حتي الآن... وأيمن شك فيني انا مستحيل اقدر اسامح الزول العمل كده )قال لي (ولو جاتك فرصه تعاقبي الزول ده... أنت حتعاقبيه )قلت ليه (والله اكله بسنوني )ضحك وقال لي (بتعمليها ي مجنونه... المهم كدي انا برجع ليك بعدين.. وسلمي لي ع ايمن )وقفل الخط... بعد شويه جاتني مكالمه من ايمن فتحت الخط قال لي(اميرتي الجميله... ممكن تشرفيني بحضورك في الجنينة تحت )قلت ليه (حاضر )وانا محتاره في انه هو دائر شنو... المهم لبست لي توب وطلعت ليه... لقيت معاه ابوي وعمو سعد... احترت الحاصل شنو.. سلمت عليهم وقعدت... أبوي قال لي (إيلاف.. اول حاجه.. انا عمري م زعلت منك في شئ... وعمري م فقدت ثقتي فيك ولا حصل مره حاولت اني أشك في تربيتك لأنه انا المربيك... واتذكري أنه انا سندك... بس ليه خبيتي عني حاجه زي؟؟ )
يتبع

#كبسوله_فرح💊
الحلقه السابعه عشر...
بقلمي:- Hanin ❤
(ليه ي ايلاف خبيتي حاجه زي دي واتعذبتي براك) انا استغربت وقلت في نفسي معقوله ممكن يكون عرف.. بس منو الوراهو.. عمو سعد اتكلم(ايلاف.. انا قبل اليوم قلت ليك أنه انت عندي زيك زي آليا واحد م بتفرقي في حاجه.. وأنه انا مستحيل اتخلي عنك ).. انا بقيت م فاهمه شي.. بعد شويه جا داخل فريد والسموأل وافنان.. يلا أنا في اللحظه دي بقيت متفاجاه من أنه ديل اتلمو سوا كيف.. جو سلمو علينا وقعدو.. السموأل قال لي(ايلاف.. الحاجه الانتي م عارفاها أنه أيمن رفع قضيه علي محمد ومودة.. وفي خلال الشهر الفات ده كان في جلسات بتاعت محكمه.. وأنه جيتكم السودان دي لأنه القاضي طلبك للشهاده)واصل فريد(انا اتحريت ورا القضيه.. وكان معاي صاحبي محامي.. في الجلسات الفاتت محمد قال أنه انت الاغويته وانت ال كنت بتصري علي أنه يعمل معاك كده..حتي عرض سجلات مكالمات فيها انت متصله عليه.. أما بالنسبه لموده فهي انكرت تماما انه في اليوم داك انت اتصلت عليها او سالتيها من مرام والجلسه الجايه مطلوب فيها حضورك للتمثيل أمام المحكمه.. أفنان قالت لي(ايلاف.. نحنا كلنا متأكدين منك.. بس عايزين نخلص ليك حقك من الحيوان ده ).. الكلام ده كله كانو بقولو وانا كنت حاسه بنفسي اني بحلم..ده كله عمله ايمن وانا طيله الفتره ديك كنت ظالماهو..أبوي قال لي(حتي ي بتي أيمن ده قبل أسبوعين كان نزل السودان حضر واحده من الجلسات ورجع تاني.. وكان متواصل معانا اول باول ) انا رفعت راسي وعاينت لايمن لقيته بعاين لي بنظره كده مخلوطه حنيه باعتذار بعتاب بحاجات كتيره نظره كده انا لما عيوني دمعت معاها.. ده كله وهو كان ساكت.. بعد خلصو كلامهم.. عمو سعد قال لي (اها ي بتي رأيك شنو.. لأنه بكره جلسه المحكمه المفترض تكوني موجوده فيها ) عاينت لايمن جوه عيونه وقلت ليهم (انا م عندي استعداد اني امشي )وقمت خاشه جوه.. أيمن لحقني وانا ماشه مسك لي يدي وقال لي بصوت حنين(في شنو ي ايلاف مخليك ترفضي تمشي.. أنت م دايره تخلصي حقك؟؟ انا م وريتك بالموضوع ده لأني كنت دائر احله بعيد منك.. ولولا القاضي طلبك م كنت حتعرفي بالموضوع ده إلا بعد ينتهي!! )رديت عليه وأنا ببكي(انا بكره المحاكم ي أيمن...  ولا عمري اتخيلت أنه ممكن اتخت في موقف زي ده.. انا خايفه أنه أمشي عشان أشهد والمحكمة تطلعني انا الغلطانه.. انا عارفه القانون ف بلدنا دي عمره ما اخد لزول حقه كامل.. ودائما بظلم المظلومين.. انا كنت بصبر ع الموضوع ده لحدي ما أموت وهو جوه حدود بيتنا انا وانت... بس الليله الموضوع ده حيبقي علي لسان إي زول البسوي والما بسوي...ولو فشلت في إثبات أنه انا م عملت حاجه كعبه..حابقي انا الزوله الكعبه قدام أي زول.. انا لما كنت انت بتتهمني انا كنت بتقطع فما بالك لما الخلق دي كلها تبدأ تعاين لي علي أساس اني الزوله الباطله.. لا ي أيمن.. انا م بقدر علي الحاجه دي )أيمن مسح لي دموعي وقال لي(ايلاف.. ومن توكل علي الله فهو حسبه.. الله معاك وانا معاك.. وتأكدي تماما حتي ولو الناس دي كلها شافتك كعبه انا مستحيل اشوفك )زحيت منه وقلت ليه(بس انت شوفتني ي أيمن.. شوفتني كعبه وعاملتني بأسوأ طريقه علي أساس الحاجه دي... إذا انت الزول الأنا روحي معاه صدق الحاجه دي وما اداني فرصه اني أوضح ليه الحاصل.. تفترض أنه الناس التانيه ح تصدق.. أيمن الانثي في مجتمعنا مضطهده... ما عندها غير شرفها.. فاهمني... نحنا عندنا المره شرف.. بدونه بتبقي وصمه عار... بدونه بتكون ولا شئ.. محمد كراجل ممكن يطلع من الموضوع ده عادي... بس انا مستحيل أطلع منه سالمه.. ودائما حيشار لي علي أساس انا الزوله الكعبه الزوله الباطله..)لما خلصت كلامي ده لقيت ايمن عيونه لما دمعت.. قال لي (انا اسف ي ايلاف وعمري ما حاخذلك تاني )وفات خلاني... انا رجعت غرفتي وبقيت ببكي.. بكيت قدر ما الله اداني قدره قمت اتوضيت..و صليت وقعدت في المصلايه قعدت ادعي(ي رب.. أنت عارف اني مظلومة.. وانت أدري بكل شي حصل.. أنت عارف اني ما عملت شي كعب ولا عمري عصيت واتعديت محارمك... ي رب انصرني عليه... انا ما لي غيرك... )وبكيت.. وتاني استخرت ربي في انه أمشي ولا لا... ونمت في محلي داك... م صحيت إلا علي صوت خالتو سلمي وهي بتقول لي (لوف... قومي ي بتي من الأرض... راقده ليه كده )قمت معاها وقعدت ف السرير... رقدتني في حضنها وقالت لي (إيلاف.. ربنا ما برد دعوه المظلوم.. ولا برد زول لجأ ليه... أنت بس خليك متيقنه بالصبر وربنا م بظلمك.. ونحنا كلنا معاك )مسكت فيها شديد وقعدت أبكي وأقول ليها(والله ي ماما سلمي انا م عملت حاجه كعبه.. والله م غلطت عليه )قالت لي وهي بتهدي فيني(انا واثقه منك ي بتي.. والله لو شفت بعيوني بكذب عيوني وبصدقك انت... م تبكى )وختت يدها علي راسي وبدت تقرأ لي في قران لحدي م رجعت نمت.. صحيت الصباح وانا مطمئنه صليت الصبح  .. ومشيت ليهم.. لقيتهم كلهم متجمعين.
يتبع
مع كل الريد السمح شديد ليكم ♡♡
#حنين ♡

#كبسوله_فرح 💊
الحلقه الثامنه عشر...
بقلمي :-Hanin ❤
لقيتهم كلهم متجمعين.. صبحت عليهم وقلت ليهم(جلسه في الحرم أن شاء الله  )وعاينت لايمن وعمو سعد وقلت ليهم (الجلسه بتاعت المحكمه الساعه كم؟؟ )أيمن رفع راسي وعاين لي وهو متفاجئ.. عمو سعد أبتسم وقال لي (الساعه 10 ص )قلت ليه (خلاص خير ي عمو... انا جاهزه لما تكونو طالعين ادوني خبر )...ورجعت غرفتي، أيمن لحقني وقال لي (إيلاف انت جاده أنك موافقه تمشي؟؟ )،  قلت ليه (اي يا ايمن،  لأني لو مشيت بالجد حأكون مذنبة في نظر الناس ديل، وأنا م عندي أدنى استعداد اني أعيش العشته معاك مرة تانيه ) ايمن قال لي بصوت مكسور كده(حاضر ي ايلاف ،ربنا يعينا )ومشي، زي حوالي الساعه 9 ونص اتصل علي أيمن وقال لي أنهم طالعين خلاص.. انا طلعت  وركبت معاهم العربيه...عمو سعد كان يوصي فيني وصايا كتيره وأنه م أخاف وربنا موجود وأنهم م حيسيبوني... وكلام كتير.. كنت ببتسم ليه ابتسامه بتاعت رضا كده ، قلت ليه حاضر.... وصلنا المحكمه لقينا السموأل وفريد وافنان منتظرننا.. بعد شويه جا أبوي ومعاه أمي.. الساعه 10 إلا 10 دقائق دخلنا القاعه... بعد شويه القاضي جا داخل والجلسه بدت.... اول حاجه قام محامي الدفاع وبدأ المرافعة :-
محامي الدفاع :- سيدي القاضي، كما نعلم جميعا أن حيثيات القضيه أخذت منحي آخر، وأن موكلي في آخر جلسه قد اتهم المدعيه بأنها هي التي كانت تجرجره للذريله وتستدرجه بكل حنكة ودهاء ، وأنا من هذا المكان ،  أريد أن استدعي للشهاده موكلي محمد حسين....
القاضي :- لك الأذن
المحامي :- شكرا سيدي القاضي
انا طبعا لحدي تلك اللحظه كنت متماسكه... بس بعد شفت محمد فجاه حسيت بالخوف.. بس اتمالكت أعصابي.. محمد أتوجه للمنصه ووقف
المحامي:- محمد حسين ، ذكرت في الجلسه السابقه أن دكتورة ايلاف هي التي كانت تستدرجك وانك كنت تحاول صدها ، ولكنك لم تذكر كل التفاصيل... هل لك ان تحكي لنا ما الذي حدث بالضبط؟؟
محمد:- اول حاجه انا ايلاف دي معرفتي بيها قديمه.. من زمن هي كانت في الثانوي.. كانت دفعه اختي، وكانت بتجي بيتنا كتير بحجه أنه تراجع مع اختي، وأنا كنت أكبر منهم ب 6 سنه.. فلما اجي ماري بجنبهم وهم بذاكرو كنت بحس بيها بتعاين لي ، بس انا كنت بعتبر دي أمور شفع وما اشتغلت بيها ، بعد فتره نحنا رحلنا وتاني ما شفتها إلا قبل عرسها بمدة قصيره، كانت مرام بتي عيانه وهي كانت مسؤوله عن حالتها ، انا م اتذكرتها بس هي اول م شافتني وجات تسلم علي كانت بتعاين لي شديد.. انا احترت ،وفي نفس اليوم داك جاتني مكالمه منها ، انا رديت وهي سلمت وبقت تذكرني أنه هي منو وأنها اشتاقت لي.. وأنها ممكن تخلي خطيبها ومستعده تتزوجني، طبعا هي كانت حتتزوج أيمن اللهو اخو طليقتي وأم بتي،انا صراحه انصدمت لدرجه اني م قدرت أرد عليها والمكالمه استمرت 12 دقيقه ، تاني بقت تتصل علي بشكل يومي ، انا كنت مره برد ومره لا ،  لحدي في يوم اتصلت علي وانا بتي مرام كانت عيانه وطلبت مني اني اطلع معاها وأنها اشتاقت لي والكلام البتقوله لي كل مره ، انا قلت ليها أنه بتي عيانه وانا م بقدر اطلع.. فقالت لي مرام ،  قلت ليها إي.. قالت لي خلاص بجيك في البيت ،قلت ليها بس انا براي قالت لي م مشكله ده الدايراهو انا، وفعلا جاتني البيت ومرام كانت مريضه شديد فلما شافتها كتبت لي دوا وقالت لي جيبه ليها، انا طلعت الصيدليه ولما جئت راجع دخلت غرفه مرام ولقيت ايلاف مافيشه خشيت غرفتي لقيتها قاعده وهي في منظر استغفر الله العظيم... وحاولت أنها تغويني بس ف اللحظه ديك كانت مرام صحت فهي فاتت... وبقت بعد اليوم داك تتصل علي وتقول لي أنه م تسيبني.. انا م اشتغلت بيها.. بس لما كترتها وريت اختي مودة وقلت ليها اتصرفي...
محامي الدفاع :- شكرا لك ي سيد محمد... سيدي القاضي.. لدي فيديو أريد عرضه ع المحكمه بعد إذن سيادتكم
القاضي:-لك الأذن...
المحامي:- شكرا سيدي...
وفعلا عرض الفيديو عليهم... وكان الفيديو الجاني انا وأيمن قبل العرس.. بس المرة دي كان بطريقه كأنه انا البحرض فيه...وظاهر فيه بكاء مرام... يلا أنا في اللحظه ديك انهرت وبقيت أبكي...
محامي الدفاع :- سيدي القاضي أريد الآن أن استدعي المدعيه دكتورة ايلاف للشهاده...
محامي الادعاء :- أعتذر سيدي القاضي فإن موكلتي ليست بحاله جيده تسمح لها بالشهادة.. لذا اطلب من سيادتكم أن تمنحونا بعض الوقت....
القاضي:- إذا... أجلت المحكمه للساعه 1 ظ..... رفعت المحكمة
انا من شدة الصدمة العلي م قدرت أمشي ، إلا سندتني أمي وافنان ، ايمن ده طلع من المحكمه وجري علي محمد ضربه ضرب لما قرب يقتله... حجزوهم بعد تعب ، محمد قال ليه (انت ابقي راجل واقدر لم مرتك واملي ليها عينها ، بدل جاي تتراجل علي )ايمن تاني ضربه ، ضربه لما كسر ليه يده... وطبعا ده كله جنب المحكمة ، دخلوهم الاتنين مركز الشرطه ومحمد رفع علي أيمن دعوة.. وسجنوهو ، والمحكمة تاني اتأجلت لبعد بكره..
يتبع...
مع كل الريد السمح شديد ليكم ♡♡
#حنين ♡

#كبسوله_فرح 💊
الحلقه التاسعه عشر....
بقلمي :-Hanin ❤
عمو سعد طلع ايمن بكفالة ، ورجعه البيت.. اول ما جاء خاشي انا مشيت عليه مسكته وقعدت أبكي... هو هداني وقال لي (م تبكي ي لوف ، انا لو ما جبت ليك حقك من الكلب ده ابقي م راجل )وانا ببكي وما قادره اسكت ، هداني وقعد معاي لحدي م نمت ، طلع لعمو سعد ودار بينهم النقاش...
عمو سعد :- ايمن.. ايلاف دي بتي زيها زي آليا واحد ، وأنا مستحيل أشك فيها ، بس قصة الفيديو ده شنو؟ وليه ما في زول جاب لي سيرته قبل كده ؟
ايمن :- أبوي ، انا الفيديو ده جاني يوم العرس الصباح ، وحكي ليه القصة بتاعت الفيديو كلها.....
عمو سعد :- يلا محمد ده بمنتهي الخساسه ، أصله م ممكن يكون زول بالتفاهة دي ... بس خليه علي...
ايمن :- لا ي ابوي ، انا ح أخلص حق مرتي... ولو ما خليته يبوس التراب البتمشي عليه ابقي م راجل...
عمو سعد :- ايمن م تتهور ، بسبب تهورك ده الجلسه اتأجلت.. انا طلعتك بكفالة.. بس الله أعلم المرة الجاية اقدر اطلعك ولا لا... خليك هادئ....
ايمن هز ليه رأسه وطلع خلاهو..... عمو سعد قعد مع روحه وبقي يفكر.....
عند آليا وخالتو سلمي كان الوضع لا يقل سوءا.... آليا دي كانت حاضنة بتها وبتبكي ، و خالتو سلمي بتهديها...
آليا قالت ليها(معقوله ي أمي محمد ينزل للمستوي ده ، معقوله أنه يعمل لإيلاف العمايل البطالة دي كلها ، م راعى لبته ولا أنه دي حرمة نسيبه  )واتفقعت بكاء ، خالتو سلمي (ي بتي م تبكي ، أحمدي ربك أنه ربنا حلاك من واحد تافه وفرقكم ، والله ي بتي لولا قسمة بتك دي انا م كان خليتك تتزوجيه ، بس ربك غالب ، كدي اديني رومه جميلتي دي ، انا اشتقت ليها... خليها تنوم معاي الليله )وشالت منها البت وخشت غرفتها لقت عمو سعد قاعد وماسك رأسه وبفكر في الحاصل ده ، نومت مرام وجات قعدت جنبه وقالت ليه بحنيه الدنيا كلها(مالك ي أبوهم ؟  م تشيل هم.. بتتحلي والله ، وكل شي خليه علي ربنا  )عمو سعد قال ليها(انت ي سلمي ما عارفه محمد عمل شنو... محمد ده طلع أتفه مخلوق ممكن يلاقيك ، انا زعلان من روحي لأني شكيت في ايلاف ، بس ورب الكعبه إلا اخليه يجيني حابي علي ركبه )وحكي ليها القصة بكل تفاصيلها.. لما خلص خالتو سلمي دي ختت يديها علي رأسها وبقت تبكي... (معقوله ي سعد محمد يطلع كده... حسبي الله ونعم الوكيل منه... حسبي الله ونعم الوكيل )....
الجو في بيتنا كان اكتر وضع متأزم وأمي دي كانت خاشة في حاله تانية... كانت بتبكي وابوي لا عارف يصبرها  لا عارف يصبر روحه...
بالجد قصتي دي دخلت الناس في حاله بطالة خلاص.. بقت كل الناس شايله هم ، انا الموضوع ده ازمني شديد.. وبقيت أفكر كيف اطلع الناس من الموود ده.... لحدي م جاء يوم الجلسة الصباح طلعت عليهم لقيت عمو سعد وأيمن وخالتو سلمي طالعين.... سألتهم ماشين وين؟؟ قالو لي أنهم ماشين المحكمه وما حبوا أنهم يصحوني لأنه م دايرين يسوقوني... اصريت عليهم اني ماشه وفعلا... طلعت معاهم ، وصلنا المحكمة والقاضي جا داخل ، والمرة دي استدعوني انا للشهادة...
محامي الدفاع :-دكتورة ايلاف.. نريد أن نسألك لماذا لم تحضري الجلسات السابقه؟
انا :-صراحه انا م كنت عارفه أنه زوجي السيد أيمن رفع قضيه علي محمد... واتفاجات بالحاجه دي بعد م نزلت السودان قبل اربعه ايام
محامي الدفاع:- هل لما ان نعلم لماذا زوجك لم يخبرك بهذا؟ رغم ان هذا الأمر كله مربوط بك ؟ وإن انت محور القضية ؟
محامي الادعاء :- اعترض سيدي القاضي ، هذا السؤال ليس له علاقة بالقضية الأساسية
محامي الدفاع :- بل له علاقه وثيقة سيدي ، لماذا تقدم زوجها بهذه الدعوة ؟ أوليس كان من الأحق أن تتقدم هي بهذه الدعوة ؟ اليست هي المتضرر الأكبر
القاضي :-اعتراض مقبول ، هذا السؤال غير منطقي، لأنه يحق لأي كان من أقرباء المدعية تقديم الشكوى
محامي الدفاع :- عذرا سيدي القاضي ، إذا دكتورة ايلاف ، هل يمكنك أن تقصي علينا ما حدث بالضبط
انا حكيت ليهم بالحصل كله... وبعد خلصت
م. د:- هذه القصة محض افتراء ، وكلنا نستطيع أن نتبين من الوهلة الأولي أن ليس لها اساس من الصحة ، كيف يمكن لامرأة محترمة أن تذهب لرجل في بيته لوحدها وذلك لمجرد تعلقها بالطفلة؟ وإذا كان فعلا أمر موكلي لا يهمها لماذا إذا لم تخبر أيمن الحقيقه عندما اتصلت عليه وسألته من ابنه موكلي ؟ ولماذا لم تطلب من مودة أن تأتي لها البيت كما زعمت هي أنها قد اتصلت عليها ؟ سيدي.. كل هذه نقاط توضح أن هذه الدكتورة المحترمة قد استغلت فرصة وجود موكلي لوحده في منزله وقامت باغواءه ، وأن موكلي عندما لم يستجب لها وشعرت بالخطر عندما أخبر موكلي زوجها قامت باختلاق هذه القصة لتظهر أنها هي المظلومة.... هذا كل ما لدي سيادة القاضي...
القاضي :- الديك أي شئ سيادة المحامي ؟
م. إ:- نعم لدي....
يتبع....
مع كل الريد السمح شديد ليكم ♡♡
#حنين ♡

#كبسوله_فرح 💊
الحلقه العشرون...
بقلمي :-Hanin ❤
م. إ :-نعم لدي، دكتورة ايلاف... أنت ذكرتي أنك كنت في المستشفي عندما اتصل عليك محمد .. وأنك اتصلت علي أيمن لتتاكدي من صحة كلام محمد ؟ هل هذا صحيح ؟ 
نا :- أيوه صاح
م. إ :-إذا مؤكد أنه المكالمة كانت مستلمه وليست صادرة؟؟
انا :- أيوه أكيد...
م. إ :-  .. شكرا لك ي دكتورة ايلاف... سيدي القاضي بعد إذن سيادتكم أريد أن استدعي إلي الشهادة الآنسة مودة
القاضي :- لك الأذن
وقامت مودة من محلها بتقدل في نص المحكمة
القاضي :- ي آنسة لو سمحت.. المحكمة م عندها ليك وقت... ممكن تسرعي
م. إ:- انسه مودة حسين.. لو سمحتي ممكن تحكي للمحكمة علاقتك بدكتورة ايلاف ؟
مودة :- انا علاقتي بايلاف ابتدت من كنا في الثانوي كانت زميلتي... بس كانت جنها اولاد... وكانت طوالي بتعاين لاخوي... وبتقول لي انه لازم احبه... وكلام كتير... فكان علاقتي بيها متذبذبه ، وقلت لحدي م رحلنا من الحلة... وتاني م لاقيتها إلا في المستشفي
م. إ :- وكيف كانت ردة فعلك عندما لاقيتيها ؟؟
مودة :- صراحة كنت متفاجئة بيها ، لأني م كنت متخيلة أنها بقت دكتورة وكلام زي ده
م. إ:- وعندما شاهدتيها هل تبادلتم الأرقام ؟
مودة :- أيوه
م. إ :- ومن منكم طلب من الآخر رقم هاتفه ؟
مودة :-  هي من طلبت رقم هاتفي وأنا أعطيته اياها
م. إ:- في ذلك اليوم الذي وقعت فيه الحادثة هل اتصلت عليك ام لا ؟
مودة :- إيلاف دي م اتصلت علي نهائي.... لكن بعد العرس بقت بتتصل علي كتير وبتقول لي اقول لاخوي أنه م يوري أيمن وبتترجاني...
م. إ:-امممممم... طيب ، ما هي طبيعة علاقتك بالسيد أيمن؟؟
مودة في اللحظة ديك اتلبشت وبقت تتنحنح وقالت ليه
مودة :- أيمن هو أخو زوجة اخوي آليا...
م. إ:- انا لم إسأل من علاقته باخوك أو أي شخص ، بل سألت من طبيعة علاقتك به ؟ '
مودة :- علاقتي معاه كانت طيبة... وكنت بتعامل معاه كويس باعتبار علاقة النسب البينا
م. إ:- لمجرد علاقة النسب ام هناك شئ آخر ؟
مودة :- انت قاصد شنو؟
 م. إ :- أعني ألم تكوني تكني له أي عواطف ؟
مودة :- لا.. م كنت بكن ليه عواطف 
م. ا :- عذرا آنسة مودة أريد ان أطرح عليك آخر سؤال ، هل كنت تعلمين بوجود كاميرات مراقبة في منزلك ؟
مودة :- كاميرات مراقبه وفي بيتنا نحنا ، لا ما كان في أي حاجة زي.. واصلا مافي زول بفكر في حاجة زي دي
م. إ :-شكرا.. آنسة مودة.. بعد إذن سيادتك أريد ان استدعي للشهادة ا/السموأل
القاضي :-لك الأذن
م.  إ:- ا/ السموأل، هل لك أن تحكي لنا كيفية علاقتك مع أيمن ومودة ؟ ومن متي أنت تعرفعهما ؟
السموأل :- علاقتي بايمن ومودة من زمن الجامعة ،أيمن صحبي واخوي ،  بس بعد خلصنا جامعة مودة علاقتي بيها انقطعت وما لاقيتها تاني إلا يوم عرس أخت أيمن آليا من اخوها محمد.. وبرضو علاقتي بيها م كانت شديدة..
م. د:- إذن.. تقريبا انت لديك دراية بكل شي حاصل معهم..
السموأل :-نعم
م. إ:-إذن هل لك علم بنوع العلاقة بين أيمن ومودة؟
السموأل :- مودة من ايام الجامعه كانت بتكن مشاعر عاطفية لايمن حتي حاولت تصارحه كم مرة.. بس هو رفض العلاقة دي.. وتاني م اشتغل بيها كتير.. بعد فترة زمنية اتصل علي أيمن وقال لي أنه اخته آليا عاوزة تتزوج ولما عرفت العريس منو صراحة في البداية اتفاجات ، والموضوع م طمني ، وبحكم أنه هو اخوي انا سألت معارفي وأصحابي عنه وعرفت أنه شخص ردئ جدا وأنه مستحيل يتزوجها عشان بحبها بسبب تعدد علاقته ،ولما سألت اكتر عرفت أنه مودة زوجت اخوها لأخت أيمن عشان تضغط علي أيمن ويتزوجها ، لأنها عرفت أنه دي الورقة الرابحة، بسبب تعلق أيمن باخته ، فأنا حذرت أيمن من الحاجة دي عشان ياخد حذره التام من اي لعبه ممكن تتعمل عليه.. وفعلا بعد فترة ابتدت تلميحات محمد واليا لايمن وأسرته أنه يتزوج مودة بس أيمن كان رافض تماما ، ومن هنا ابتدت مشاكل أيمن ومحمد البسببها حصلت مشاكل بين محمد واليا واتطلقوا..وبعد فترة زمنية م بعيدة  حصل حادث لايمن بسببه دخل في غيبوبة متواصلة لمدة ثلاثة شهور ، واتهم فيها محمد واتسجن بس بسبب غياب الأدلة الكافية والثبوتات الكافية محمد أفرج عنه... واتقفلت القضية علي كده
م. إ :- شكرا لك ا/السموأل.. سيدي القاضي يبدو للكل ان ملامح القضية أوشكت علي الوضوح، وهذا ي سيدي تقرير من مركز الاتصالات به كل تفاصيل مكالمات دكتورة ايلاف منذ لقاءها بمحمد الي أن سافرت الي ماليزيا مع زوجها أيمن.. وفيها يتضح أن جميع المكالمات بينها وبين محمد هي مكالمات واردة ما عدا مكالمة واحدة وهي في نفس يوم الحادثة.. ويتضح أيضا رقم هاتف الآنسة مودة ومدة المكالمة دقيقة ونصف وهي بعد ساعة من مكالمة محمد لإيلاف وهنا يتضح كذب الآنسة مودة بخصوص ان دكتورة ايلاف لم تتصل عليها في ذلك اليوم وكذلك كذب السيد محمد بأن ايلاف هي من كانت تتصل عليه..
القاضي أتناول الورقة وبدأ يقرأ فيها.. ومحمد ده قلع عيونه وبقا يعاين لي ولايمن
يتبع
مع كل الريد السمح شديد ليكم♡♡
#حنين ♡

#كبسوله_فرح 💊
الحلقة الحادية والعشرون...
بقلمي :-Hanin  ❤
م. إ :- سيدي القاضي أريد أن استدعي للشهادة السيد محمد
القاضي :-لك الأذن
محمد قام من مكانه وهو منفوخ وجا وقف قدام المحامي
م. إ:- أستاذ محمد أولا أريد ان أسألك.. هل أرسلت لنسيبك أيمن فيديو في صباح يوم زواجه؟
محمد :-لا م رسلت ليه اي شي... وحتي انا م عندي رقم ايمن عشان ارسله ليه
م. إ :- وما هو السبب الذي دفعك لتركيب كاميرات مراقبة في المنزل ؟
محمد :- انا م مركب اي كاميرات مراقبة في بيتنا...
م. إ :- مقاطعا... إذا بماذا تفسر تصوير ما حدث بينك وبين مدام ايلاف في تلك الليلة ؟
محمد ده سكت وقلع عيونه وبقي يعاين للمحامي
م. إ:-سيد محمد هل لك ان تفسر لنا كيف تم تصوير هذا الفيديو ؟  سيدي القاضي ، موكلتي أتاها فيديو قبل اسبوع من ليلة الزفاف ومعه رسالة تهديد مفداها أنها إذا لم تتراجع عن قرار الزواج فإنها سوف تندم ، وأيضا نفس الفيديو قد وصل لزوجها صبيحة  يوم زواجهما وأنا أريد ان أعرض علي المحكمة نفس الفيديو
والفيديو الاترسل لي عرضوهو كان فيه نفس التفاصيل بس معروضة بطريقة تانية ، وفي نهاية الفيديو ما كان صوت مرام ظاهر...
م. إ :-سيدي ، مما سبق يتضح نفس الفيديو ولكن دون صوت مرام... وفي هذا واضح جدا أن المرسل كان هدفه أن يوقع بين أيمن وايلاف... وأيضا هناك رسالة أرسلت من قبل مودة الي أيمن مضمونها أن يقم أيمن بضبط زوجته ومعها صورة قديمة وفيها يتضح محمد وايلاف في شكل غير أخلاقي وعندما قمنا بتحليل الصورة وجد أنها غير حقيقية... ومن هنا أريد ان أسأل ما الذي دفع بها لفعل هذا...هل لمجرد أنه نسيب اخوها ام لشئ ما في نفسها ؟وامامك فاتورة من المتجر الذي اشتريت منه هذه الكاميرات باسم محمد حسين...  سيدي كل هذه الأشياء تتضح أمامك..
القاضي عدل نظارته وقال لينا :- جهة الدفاع هل لديك أي سؤال او اي إضافة ؟
م. د :- قال ليه لا
محمد وبصوت أشبه للبكاء :- الصراحة انا م عملت كده.. ايلاف اي عجبتني.. بس انا ما كان عندي اي علاقة بالحصل ده.. والكلام الحكيته ده كله كان محض افتراء... ايلاف دي كان هدفي اني اطفشها من طريق مودة عشان تتزوج أيمن، بس انا م صورت الفيديو ، الصورته مودة عشان تثبت لايمن أنه ايلاف كعبة ، بس والله انا بحب بتي والسبب الخلاني أكره مودة انها كانت سبب في مرض مرام اليوم داك ولولا ايلاف كانت الزمن ده راحت من يدي... بس ايلاف م عملت كده...وبدأ يبكي زي الأطفال وبقول ايلاف اعفي لي انا ظلمتك 
القاضي :- بعد الاطلاع علي جميع حيثيات القضية واعتراف المتهم حكمت المحكمة علي المتهمة مودة حسين بالسجن ثلاثة سنوات وللمتهم محمد حسين بالسجن سنتين... رفعت الجلسة
مودة جات بجنبي قالت لي (وتربة أمي ي ايلاف ما اخليك تتهني بيه )وساقوها ، بعد انتهت الجلسة انا طلعت مع ابوي وامي وعمو سعد وأيمن بره وقلت ليهم (انا ماشة بيتنا اقعد يومين تلاته ، و بعدين اجي )أيمن قال لي (ماشي) بالجد كنت محتاجة ابعد شديد عن كل ال حصل ده وما كنت بحس بالراحة دي إلا في بيتنا ، رجعت البيت مع ناس أمي ، اول ما وصلنا انا مسكت أمي وقعدت أبكي  بكيت لما نمت وانا ببكي.. صحيت الصباح اول زول جاء ع بالي دائرة اشيل تلفوني اتصل عليه أمي جاتني وقالت لي (مرام الروح ، انت كويسة )قلت ليه وانا بضحك علي الكلمة دي لأنها ذكرتني بايمن (شديدة ي أمها ، انت أصبحت كيف ي نور العين )قالت لي (انا كويسة ، يلا بطلي كسل وقومي اتصلي علي راجلك اتصل علي قبل نص ساعة وانا قلت ليه نايمة... قلت ليها (حاضر ي أمي، بس انت اسم مرام الروح ده جبتيه من وين؟ )ابتسمت وقالت لي (انا الله رزقني بولد وبت م ولد بس ، هي اقصد م بت بس )قعدت أضحك وقلت ليها ( انا ولد ي ماما كويس )قالت لي وهي بتضحك (بالجد ربنا يخليكم لبعض انت وأيمن.. في يوم وانت في ماليزيا ايام المحكمة الأوائل هو اتصل علي ابوك وكان بتكلم معاه واداني ليه سلمت عليه ووصيته عليك قال لي بتك ي أمي مرام روحي ، في زول بوصوهو علي روحه ؟بالجد اتطمنت عليك وانت معاه )ابتسمت ليها ابتسامة رضا وقلت ليها ويخليك لي انت كمان..اتصلت علي أيمن رد علي بصوت مليان لهفة(ايلاف انت كويسة ؟ انا بتصل عليك من قبيل وانت م بتردي .. عندك شي )قلت لبها (لا انا كويسة بس كنت مرهقة شوية وكنت نايمة )قال لي(اجي اوديك دكتور )ضحكت وقلت ليه (انت نسيت اني دكتورتك ولا شنو؟؟ )سكت مسافة وقام ضحك قال بصوت خافض (واحلي دكتورة ربنا خلقها ) سكت وقلت ليه (انت وين )قال لي (انا في البيت ، بس طالع ماشي ع الشغل لأنه في أوراق مفترض أرسلها مع السموأل بعد بكره )قلت ليه (أيمن انا دائرة اعزم السموأل بيتنا عشان يتعشي معانا واشكره بالمرة علي العمله معاي )قال لي (ليه في بيتكم ، ما يكون في بيتنا نحن )قلت ليه (لأني قاعدة هنا ، بس لو كنت قاعدة هناك أكيد كان ح يكون العشاء هناك ، وبعدين م فرقت لو هنا ولا هناك واحد )قال لي (وانت ح تقعدي هناك كتير؟ )
يتبع
مع كل الريد السمح شديد ليكم ♡♡
#حنين♡

#كبسوله_فرح 💊
الحلقة الثانية والعشرون
بقلمي :-Hanin ❤
سكت شوية وقلت ليه (محتاجة اقعد شوية وبعدين ح اجي ، ويعني انا م بعيدة منكم شديد صح )قال لي (لوف ، نحنا مفترض نرجع بعد أسبوع )قلت ليه (وين ؟ )قال لي (بيتنا ، يعني ح يكون وين ) سكت مسافة وقلت ليه ( بس انا م ماشة معاك تاني ي أيمن ، اسفة جدا ) وقفلت الخط ، وقمت مشيت لأمي قلت ليها  (أمي ، انا دائرة اعمل غدا واعزم السموأل وافنان وفريد )أمي قالت لي ( جدا ، متين دائرة تعمليه؟ )قلت ليها (بكره )قالت لي (حلو.. لأنه بعد بكره ح نبدأ نمشي السوق عشان نشتري ليك حاجاتك )قلت ليها (حاجات شنو؟ )قالت لي ( أيمن لما اتصل علي قبيل قال لي أنه مفترض تسافرو بعد اسبوع )كشرت وشي وقلت ليها (المفترض شي والواقع شي مختلف تماما ) ومشيت خليتها.. اتصلت علي أفنان وعزمتها وشلت منها رقم السموأل واتصلت عليه وشكرته شديد قال لي (لوف ، انا قبل اليوم قلت ليك أنه انت زيك زي أفنان واحد ، ومافي أخت بتشكر اخوها ، بس لو دائرة تشكريني ممكن تنفذي لي طلبي ده )قلت ليه (عيوني ليك )قال لي(اوعديني أنك عمرك م حتسيبي أيمن، أيا كانت الظروف او المشاكل ال مرت بيكم دائما خليكم جبل صنديد  )سكت وما عرفت اقول ليه شنو.. بس قلت ليه (حاضر )قال لي (أيوه دي اختي البعرفها )واتونست معاه كده وبعدين قفلت ، وتأتي اتصلت علي فريد  (الو ، وين ي سجم )رد(اوووووو سجمي، أقسم بالله هسي داير اتصل عليك )قلت ليه (بطل طلس ، المهم بكره ح تجي تتعشي معاي )قال لي (ممكن من هسي اجيك ، م عندي مشكله )قلت ليه (انت م عندك أهل يلموك)قال (م عندي مقطوع من شجرة )وقعد يضحك.. في اللحظة ديك أمي جاتني داخلة وهي ملامح وشها م عاجباني... (إيلاف  أنت صحي قلت أنك م راجعة مع أيمن )قلت ليها (أي يا أمي ، ويا ريت ما نتناقش في الموضوع ده ) قالت لي (م علي كيفك ي ايلاف ، صح انا م بدخل في قراراتك بس ده م موضوع بلعبوا فيه ، اديني سبب واحد مقنع يخليك م ترجعي معاه )قلت ليها(أنه انا دايرة اتطلق منه )ختت يدها في رأسها وقالت لي (نعم !وليه أن شاء الله؟ أيمن ده لو فتشتي الدنيا دي كلها م تلقي زيه ، ولو م رجعتي ليه انا م عافية عنك)قلت ليها وانا ببكي (معليش ي أمي بس انا خالص ما عندي استعداد اني أواصل معاه، كفاية العشته معاه ، انا م ح اقدر أعيش مع واحد ما وثق فيني واتهمني لمجرد أنه شاف فيديو وحكم علي بالباطل حتي من غير ما يسألني او يديني فرصة اني ادافع عن نفسي ، انا ما ح اقدر أخت عيني في عينه لأني كل ما أشوفه ح اكرهه زيادة ، صح انا حبيته شديد بس بالجد هو كرهني فيه ، وذات الله ي أمي تجبروني اني أرجع ليه انا انتحر ، ولا انتو تلمو في بتكم ولا هو يلم ليه في مرة )وطلعت من الغرفة وخليتها قاعدة متمحنة في نص السرير، غيرت ملابسي وطلعت مشيت علي المستشفي كان في رأسي أنه أمشي ازور الناس الكانو بخففو علي لما أكون زهجانة... ولما وصلت اول ما جئت داخلة لقيت عمو عثمان البواب سلمت عليه وقال لي(بتي السمحة ، وينك انت ياخي عرستي ونسيتينا ، ما بتجي تسالي من ابوك؟ )ابتسمت ليه وقلت ليه (لا والله يابا ، بس انا كنت مسافرة وياداب جيت ، انت كيفك وكيف حالك؟ )واتونست معاه وخشيت جوه ومشيت مكتبي القديم ولاقيت كل أصحابي القدام وبقيت بفتش في شخصية محددة بس م لقيتها ، رجعت لعمو عثمان وسألته منه ، أبتسم وقال لي (سبحان الله ي بتي ، أمس كان في سيرتك ، وياهو الليلة جيتي ، هو ح يجي بعد شوية استنيهو جوه ).. رجعت المكتب وقعدت في الكرسي واتذكرت.. 
flash back..
لما ايمن ده جابوه عيان وعامل الحادث كان الاصطاف بتاع المستشفي كله طلع ليه بحكم أنه حالته الجا بيها كانت متأخرة شديد ، انا كنت بتونس مع عمي التقي.. عمو التقي ده واحد من ناس دارفور كان راجل صالح شديييييييد جا يتعالج في المستشفي من زمان وم كان معاه زول ولما علاجه انتهي وطالع من المستشفي لقته عربية دقشته وجابوه تاني راجع واسعفوه هو كان كويس باستثناء أنه فقد ذاكرته تماما ونسي اي شي حتي اسمه.. ولما محاولات الدكاترة فشلت قرروا أنه يخلوهو ف المستشفي يمكن زول من أهله يجي يفتش عليه ، فبقي عمو التقي قاعد معانا ف المستشفي وهسي ليه عشر سنة من الكلام ده..بتذكر لما اسعفناه جيته تاني راجعة قال لي (الفيشن ده حالتو  نوط اوكاي  )قلت ليه( قصدي البيشن)قال لي (بس ياهو.. )قلت (والله هو منتهي رسمي وقانوني بس يومه م تم.. ربنا يرفعه )فجأة قال لي (ي بتي انت م دايرة تعرسي  )قلت ليه (ليه ي عمي التقي انت قنعت مني خلاص.. والله انا لسه صغيرة ع العرس عمره كله 22 سنة ، ولا حسيت اني بايرة )قال لي (ي بتي ، البت غير السترة والراجل م عندها شي )قلت ليه وانا بضحك (خلاص ي عمي التقي شفت المريض الجابوهو هسي ده لو بقي كويس وفتح انا بعرسه )عمو التقي (أن شاء الله ي بتي ، بس كان عرستي وحصلت ليك مشاكل معاه اوعك تسيبيه.. خليك معاه خطوة بخطوة سمح ، عشان بعدين م تقولي عمك التقي هو السبب لأنه حرضك ع العرس )
يتبع
مع كل الريد السمح

#كبسوله_فرح 💊
الحلقة الرابعة والعشرون
بقلمي :-Hanin  ❤
انا ركبت الطائرة واتكلت ف الكرسي وبقيت بتذكر ف أيمن وكيف أنه حياتي بدت معاه وأنه دخل حياتي وغيرها والمشاكل ال حصلت لينا وأنه كيف خلص لي حقي وبقيت بتبسم براي ، وفي عز انشغالي سمعت صوت واحدة بتقول (لو سمحتي ي أخت ممكن تمسكي لي البيبي ده؟ )رفعت راسي لقيت مرة حلاتا شايلة ليها توأم ومادة لي واحد ، ابتسمت واتناولت منها البيبي وساعدتها تقعد ،الطائرة اتحركت وبقيت اتونس معاها عرفت أنه اسمها مي وهي دكتورة ومتزوجة ليها سنتين وديل اول اولاد ليها وأنه زوجها مقيم ف ماليزيا وهي نزلت عشان تولد ف السودان وهسي راجعة ليه ، اتونست معاها ولما عرفت اني انا دكتورة ايلاف قالت لي بصدمة (انت دكتورة ايلاف ال كانت قضيتها قبل كم أسبوع؟ )رديت ليها بهدوء وأنا بضحك (اي انا ايلاف ذاتها )اتحرجت وقالت لي (سبحان الصدف، كنت متمنية الاقيك واتعرف عليك عشان اهنيك ع براءتك ودي اصلا كانت حاجة محتومة )ضحكت معاها وطلبت مني احكي ليها تفاصيل القضية م حبيت احرجها حكيت ليها القصة كلها وبكل بلاهة قالت لي (زوجك ده عثل ياخ)ضحكت وقلت ليها (فعلا ) المهم تبادلنا الأرقام واتفقنا أنه نتلاقي... وصلنا وأول م نزلنا من الطيارة لاقاني أيمن وجا جاري علي وحضني وهمس لي في اضاني (لوفتي ، أقسم بالله لو م كان جيتي الليلة كنت حاجيك بكره )ضحكت وقلت ليه (أهو انا جيتك ي سيدي... قول لي تاني انا افوتك وين ) وعرفته علي مي وسلم عليها وطلعنا بره لقينا زوجها لسه م جاء اتصلت عليه قال ليها أنه عربيته عطلانه وم حيقدر يجيها... ايمن عرض عليها انه نوصلها بس هي رفضت واصرينا عليها.... وفعلا وصلناها وفي الطريق قالت لايمن (أيمن ، شكرا ليك ع التوصيلة انت فعلا زول كويس )أيمن طبعا م فاهم حاجة ضحكت عليه وهو يتلفت علي وبسال فيني بعيونه أنه هي قاصدة شنو أشرت ليه أنه يجاوبها بس (تسلمي ي مدام مي ، ده واجب اي سوداني نبيل أنه يعمل كده )ضحكت علي سوداني نبيل دي وواصلنا طريقنا لحدي م وصلنا لحدي م وصلناها حلفت إلا نخش ايمن رفض لأنه كان الزمن متأخر وقال ليها وقت تاني... ومشينا بيتنا.... 🙈🙈🙈🙈🙈 اول م وصلنا ايمن حضني وقال لي (زولتي السمحه.... والله اشتقت ليك ) قلت ليه (وانا اكتر والله بالجد كنت محتاجة اني أرجع في أقرب وقت... والا كنت جنيت هناك من كترة الأسئلة اللافة ف راسي ونفسي تتجاوب )حمر لي وقال لي (انت جاية عشان أسئلتك يعني ما جاية عشاني ؟ ) قلت ليه (وحلاتي الزعلان وهو صاري وشه!!  لا والله بس اشتقت ليك واتكسفت اقول اني اشتقت ليك تقوم تفهمني غلط )قال لي ( وحلاتي الخجلان... افهمك غلط ليه يختي؟  أنت مش مرتي؟؟ ولا تكوني خلعتيني ف السودان وانا م جايب خبر؟؟ )ضربته ع كتفه وقلت ليه ( في زول بخلع روحه بيده ) قال لي ( اموت انا في البحبني) وقضينا باقي اليوم بنغيظ في بعض.....وفعلا عشنا احلي حياة م كنت بتوقع اني ممكن أعيش حياة زي دي..... بعد أسبوعين من جيت ماليزيا نزلت شغل وكنت يوميا بلاقي افنان بالجد كانت عز الاهل بالنسبه لي.... في يوم ايمن قال لي انه أسعد حيوصل الساعه 4 عصر وأنه انا ماشي أجيبه.... م عرفت جاي ليه لكن قلت احتمال أنه جاي لشغل.... جا البيت وكنت بالجد مشتاقة لزول من ريحة تراب بلدي...قعدنا نتعشي وقال لينا (بعد العشا انا دايركم ف موضوع... )عاينت لايمن وما فهمت شي طبعا بس قلنا ليه خير... خلصنا وزبطت ليهم الشاي وجينا قعدنا ، أسعد قال لينا ( أولا انتو اول نفرين يعرفو بالموضوع ده.. بس بالجد انا م ممكن اقول الكلام ده لغيرهم خصوصا انت ي لوف.. أنت اول واحدة مفترض تعرفي بيه ) طبعا قلقني وختيت قلبي ف يدي.. ( أسعد اتكلم انا بالجد م بحب أمور التشويق دي..  أنطق ف شنو؟ ) قال لينا وهو بضحك من شكلنا ( استهدوا بالله كل الموضوع اني حابي اتزوج واستقر... ) أيمن جدعه بالمسند وقال ليه (قطعت قلبنا.. هسي ده الموضوع الجاي بيه من السودان.. م كان تقول الكلام بالتلفون وخلاص ) أسعد قال ليه ( لا لا ماف طريقة.. كان لازم اجي لانه العروس هنا... ) أيمن قال ليه (اوعي تكون الفي بالي ) أسعد ( بس ياها ياخوي.. ومنو غيرها قدر يسرق قلبي ويحير حواسي ) انا طبعا بقيت قاعدة وسطهم زي الاطرش ف الزفة وبتلفت.. ف النهاية ايمن قال ليه (منتهي ي اخوي..ده علي انا )انا بقيت اقول ليهم فهموني معاكم شي.. ايمن طلع لي لسانه وقال لي (أبيت ي زوله ، اتحرقي بجازك  )وطلعو خلوني طبعا اتغظت منهم وقلت الليلة إلا اندمهم.. اتصلت علي أفنان م بترد ، بعد شوية اتصل علي السموأل وقال لي (لوفي ، السمحة اختي... أفنان دي طلعت ونست تلفونها ف البيت وتقريبا قالت جاياك لسه م وصلتك؟ )قلت ليه (لا لا.. بس الباب يدق بتكون دي هي ) وقفلت منه ومشيت فتحت الباب.. لقيت دي أفنان وجات طايرة وحضنتني وبقت مرة تبكي ومرة تزغرد انا قلت البت جنت.. قلت ليها (ي بت مالك؟ جنيتي انت )قالت لي (في زول م بفرح أنه بورته اتفكت )
مع كل الريد السمح شديد ليكم
#حنين♡

#كبسوله_فرح 💊
الحلقة الخامسة والعشرون...
بقلمي :-Hanin ❤
بقيت بعاين ليها وانا م فاهمة حاجة... قلت ليها (اوعي تقولي لي... )هزت لي رأسها وهي بتتخجل قالت لي (أيوه... بس هو... وجا الليلة هنا عشان يمشي يتقدم لاخوي )انا دي بقيت ازغرد واكورك... اتصلت عليه(ي حيوان جاي تخطب أعز صاحبه عندي وم توريني... الليلة ي زفت إلا تبيت انت وأخوك بره البيت )قال لي(ي زولة ، انا كنت دائر صحبتك هي التجي تبشرك بالخبر السمح ده ..و بعدين هي متين لحقت توصل ليك الخبر؟ )قلت ليه (هي معاي ف البيت )قال لايمن(اسمعني.. اوصل انت للسموال براك انا راجع البيت )ضحكت وقلت ليه (عتبة بيتي م بتعتبها ي جزمة... امشي يلا )وقفلت الخط ف وشه ، فاته للسموأل وطلبو منه يد افنان وفعلا السموأل وافق وأيمن قال ليه (الأدب والذوق بقول أنه مفروض يجو كبار البيت ويطلبو يد أختك... بس دي حاجة مبدئية.. و بعدين حيجيك أبوي وامي )السموأل قال ليه (والله ي أيمن أزعل منك ي راجل انت اخوي... وبعدين أفنان دي أختك ولو دائر الليلة سوقها وامشي )أسعد نط (طوالي والله ي السموأل... عندي صاحبي ابوه مأذون أجيبه ونعقد طوالي )السموأل وأيمن ديل ضحكوا باعلي صوت،  ايمن( الشفقة تطير ، اتقل شوية )اسعد(أذكرك ي اخوي انت عملت شنو لما كنت داير تعرس ايلاف احكي للسموأل ولا اخليك مستور )ايمن(المؤمن ستير... و بعدين انا زي اخوك ) وقعدوا يضحكو... السموأل (ايمن ، نحنا حننزل نعمل الخطوبة والعرس كله ف السودان عشان م تكون تكلفة السفر والكلام ده ) واتفقو ع كل شي... وكانو متفقين أنه السموأل يأجر شقة يتمو فيها العرس... انا لما عرفت بالموضوع ده جطت وكوركت وقلت ليه (ليه؟؟ خوتك معاي طلعت كلام ساي؟؟ ولا انا م أختك زي م قلت؟ بتقول لي اختي وتجي تقول ح اعمل العرس ف شقة؟، يشق بطنك ي السموأل )ضحك وقال لي (لولا أنه خالتو رقية أكدت علي أنه انت بتها كنت قلت أنه انت جايبنك من التربية اللئيمة دي  ) المهم نزلنا السودان السموأل وكل أبوي ع افنان... وجونا عمو سعد وخالتو سلمي واليا وطلبو من أبوي يد افنان ووافقو وقالو الخطوبه بعد أسبوع... وبقينا ف مشية السوق والجية وقبل يوم من الخطوبة مشينا السوق و راسي لف ف السوق ووقعت افنان دي بكت قدرتها واتصلت ع أيمن... ايمن ده جاري جري ووداني الدكتور...بعد م فتحت لقيت ايمن جنبي وحضني وبقي يبكي (ايلاف... م تخوفيني عليك كده تاني.. انا بموت بدونك )قلت ليه (بعد خرف أن شاء الله... يومي قبل يومك ).. الدكتور جا داخل وقال لي (د.  ايلاف... لازم تعتني بنفسك وتاكلي كويس ع الأقل عشان خاطر البيبي  )عاينت لايمن وأيمن عاين لي وقلت ليه(دكتور انا حامل؟؟ )قال لي( أيوه ولازم تخلي بالك منه شديد وتبعدي من اي تعب.. لأنه الشهور الأولي دي متعبة... أنت م محتاجة أشرح ليك الكلام ده )اتفقعت بالبكاء.. ايمن جا علي (ايلاف انت عندك مكنة بتاعت تصنيع دموع... زعلانة تبكي ، فرحانة تبكي، ياخي كفاية دموع )م قدرت أرد من شدة الفرحة... رجعنا البيت وورينا أمي وابوي وبيت ناس ايمن... أمي دي حلفت علي تاني ملعقة م ارفعها... (كان نفسي اقيف ع عرس افنان... بس شكله ماف طريقة) امي قالت (افنان بتي... وبعدين ف عرسك كان واقف منو؟؟ مش انا؟؟ حوجتك لحاجة... يلا بطلي رغي ي ناكرة الافضال )ضحكت وحضنتها وقلت ليها (الله يخليك لي )وفعلا تمت الخطوبة وحددوا العرس بعد شهر..وامي حبست افنان وبقينا نمشي يوميا نختار الشيلة أسبوعين نحنا بنمشي... في يوم انا تعبت م كلمت زول.... مشيت الدكتور وفحصت..الدكتور قال لي انه لازم اخلي بالي من البيبي لأنه وضعه م مستقر وتغذيته ضعيفة... أبيت أوري ايمن لأنه كان ح يسوقني معاه..بس بقيت م بتعب روحي..وحتي افنان كانت مراعية لي شديد وم بتتعبني..فضل اسبوع للعرس مشينا حجزنا ف الكوافير..وفات معانا ايمن واسعد..اسعد قال لي (ايلاف... انا داير افنان بس نص ساعة..وريت امي ابت تخليني اشوفها... جيت لخالتو رقية حلفت كانت تخليني اخش ليها..يلا هسي لو عرفو انا جيت معاكم ح يقتلوني... بس نص ساعة )حنيت عليه وقلت لبه خلاص امشي بس نص ساعة لو زدتها بمشي البيت وبخليها ليك وانت اتصرف تاني مع خالتك رقية ) ساقها وفات..ايمن قال لي(لوفتي... ياخ م خلاص خلينا نرجع بيتنا..العرس ده م دائر ينتهي... وبعدين اشتقت لبتي ياخ )قلت ليه(والقال ليك بت منو... هسي احتمال يطلع ولد )قال لي (البجيبو ربنا كله كويس.. مش منك انت.. أصله م فارقة... بت او ولد) قلت ليه (بكره تعال لي انا ماشة السوق)قال لي (وافنان وين مش كنت بتبدليها بي  )قلت ليه (افنان م ينفع تطلع بعد ده تاني... و بعدين انا دايرة اطلع معاك انت..  أوليس لي حق... أوليس ولا م أوليس؟ )قال لي (خلاص ي أوليس انت بجيك 9 ص.. الزمن بدري وتقدري ترجعي قبل م الشمس تسخن.. وما تتعبي روحك )وقعدنا اتونسنا لحدي م افنان واسعد جو وأيمن رجعنا البيت.. وقبل م أنزل مسك لي يدي.. أفنان نزلت قبلي ودخلت البيت. .
مع كل الريد السمح شديد ليكم ♡♡
#حنين♡

#كبسوله_فرح 💊
الحلقة الثالثة والعشرون
بقلمي :- Hanin ❤
back....
 رجعت لواقعي علي صوت الباب بدق... فتحت عيوني وهي مليانة دموع ، قلت (ادخل )دخل الزول ال كنت راجيهو ومن غير ما أحس لقيت روحي جريت عليه وحضنته ، مسكني من رأسي وقال لي (بتي السمحة ، كيفك ، انت كويسة؟ )م قدرت أرد بس حسيت براحة شديدة وهو بتكلم معاي وبهدي فيني قال لي (انا مش قلت ليك اصبري علي البجيك واتحملي مشاكلك وما تخلي راجلك عشان م تقولي السبب عمك التقي )قلت ليه (عمي التقي انا م قدرت اقعد معاه وهو متهمني.. ده شكك فيني )قال لي(اصبري عليه ي بتي ، برضو مهما حصل ف النهاية هو سترتك وغطاك )قلت ليه (حاضر ي عمي ، حارجع ليه ) عمي التقي كان عنده قدرة خرافية في أنه يقنعني بأي حاجة بالمنطق ، كان بحسسني بغلطي براحة وبخليني اسوي الصح من غير م يضغط علي ، قعدت اتونس معاه لقريب العصر قلت ليه (عمو التقي ، الليلة انا عازماك غداء، وما دايرة منك ولا اعتراض )هز رأسه وقال لي (خلاص ي السمحة انا أمشي اقشر واجي )ضحكت وقلت ليه خير ، طلعت بره استنيته شوية لحدي م  جاني لابس بنطلون وقميص وشاكي جيته (وين ي تأتأ ، اللي بشوفك كده ح يأول أنه انت خطيبي ياخوي  )ضحك وقال لي (انت اصلا م بتعقلي ي مجنونة )طلعنا ومشينا مطعم كنا دائما بنمشي ليه دايما وطلبنا الغداء وأثناء م نحنا بناكل عمو التقي قام وقال (اووووو، ولدي السمح ، القعدة دي كانت فاقداك بس والله ، رفعت راسي لقيته أيمن 😲 قلت ليه (انت الجابك هنا شنو؟؟ )قال لي (شنو ي قلبي انا المطعم ده مكتوب فيه ممنوع دخولي ولا شنو )عمو التقي حدر لي نظام اسكتي وقال ليه(ولدي ، اقعد نتغدي دائر تأكل شنو انت؟ )أيمن ولا كضب طوالي جرا الكرسي وقعد (حاكل الاكلته حبقلبي انا )ورفع لي حاجبه ، وبببببع علي انا منه ي اخواني الوليد ده ماله سميح زي ده وسرحت في تفاصيل وشه مدة بعد شوية انتبهت لقيته بعاين لي وببتسم همس لي في اضاني (عادي عادي ي بتي م تتكسفي انا زي راجلك وكده ) وقعد يضحك.... عاينت ليه بغيظ ووقفت ع حيلي وقلت لعمو التقي (انا ماشة... أنت ماشي معاي ولا قاعد مع ولدك؟ ) أيمن وقف ع حيله وقال لعمو التقي (عمو انا ماشي... تمشي معاي ولا مع بتك السمحة؟ ) انا بعاين ليه بغيظ وخلاص اتمليت منه.... عمو التقي ضحك فينا وقال لينا اقعدوا حنسنا وقعدنا وبقي يونس فينا (انتو عارفين انا متذكر أي حاجة عن حياتي الفاتت ، م متذكر انا كنت متزوج ولا لا ، كان عندي عيال ولا لا ، م متذكر انه في زول بريدني ولا لا... بس الحاجة الوحيدة المتذكرها أنه انا قلبي مليان بحب زول انا م عارفه منو بس متأكد أنه هو بمجرد م يظهر قدامي انا حاعرفه لأنه القلب م محتاج ليه دليل ي عيون قلب عمكم فهمتو  )انا عاينت لعمو التقي وعاينت لايمن لقيته يعاين لي بعين مليانه حب ومحنة قال لي(ايلاف خلينا نرجع بيتنا... خلينا نرجع لحياتنا نحنا ما ننفع نعيش بعيدين عن بعض.. انا اتخلقت ليك وانت البتكمل لي حياتي... سيبي العناد وارجعي معاي وخلينا نبدأ حياتنا من اول وجديد واوعدك أنه عمري م حاخذلك تاني ولا اخليك تشوفي مني حاجة كعبة )ابتسمت ليه وقلت ليه (حاضر ي مرام الروح )عمو التقي قال لينا (احم احم... انا هنا لو سمحتوا )قعدنا نضحك وكملنا قعدتنا ديك واتحركنا علي المستشفي رجعنا عمو التقي ومشينا ع بيتنا... اول م وصلنا لقينا أمي (ايلاف وين انت ؟ انا بتصل عليك من الصباح م بتردي)مشيت حضنتها وبوستها في جبهتها وقلت ليها ( ستي وحبيبة قلبي ، حقك علي... والله انا م قصدي ازعلك... بس انت عارفة أنه انا م عندي ضابط لاعصابي)عاينت لي وعاينت لايمن (انتو خلاص رجعتو لبعض )أيمن أبتسم ليها وقال ليها (م قلت ليك قبل اليوم خليها علي ي أمي )ضحكت ليه وقالت ليه (فعلا انت مافي زيك اتنين )وضحكنا وتمينا يومين معاهم ف البيت ورجعنا بيت ناس أيمن قعدنا يومين خالتو سلمي كانت بتعاملني بطريقة انا ذاتي لما كنت بخجل منها بالجد ربنا يخليها لينا .. وكان اصلا نحنا مفترض نرجع ماليزيا بعد أسبوع ، بس أحمد كان ممتحن وانا كان مفترض اقعد معاه عشان أراجع خليت ايمن يسافر قدامي وانا قعدت راجعت مع احمد  كل شي ولما امتحن وخلص انا قررت إني مفترض أرجع أسافر... واتصلت علي أيمن (الو ايمن....كيفك )رد لي (حبيية قلبي أنا... عاين خلاص كفاك والله... المعرسك انا ولا احمد.. مش مفترض ترجعي بعد ده ، وبالمناسبة المستشفي أمس رسلت ليك رسالة أنه مفترض تجي تنزلي بعد ده )قلت ليه (حيلك حيلك كدي سلم علي اول... كنت دائرة اقول ليك راجعة... بس بعد ده م جاية ذاتي )ضحك وقال لي(والله اجي اخطفك من أهلك وزول يقدر يفتح خشمه معاي ماف )قلت ليه (مجنون وبتعملها )واتونسنا كده... بعد ثلاثة يوم انا كنت ف مطار الخرطوم مسافرة لاغلي زول ف دنياي...وامي دي م خلت وصية م وصتني ليها نبع الحنان ياخ. جابني المطار أبوي وعمو سعد وأيمن والباقيين منعوهم من الجية عشان م يعزو ف المطار...
يتبع....
مع كل الريد السمح شديد ليكم ♡♡
#حنين ♡

#كبسوله_فرح 💊
الحلقة السابعة والعشرون..
بقلمي:-Hanin ❤
خلصت منها ومشيت ليه قال لي (م بدري... كان لسه فضل عشرة دقائق والحفلة تبدأ.. كانت تتميها لما الحفلة تبدأ بعدين تجي )قلت ليه (ايمن حيلك حيلك.. ف شنو انت فاير كده... هسي م ياهو جيتك )قال لي(تمام... نحنا نسينا نشتري ملابس لحنة أسعد )قلت ليه فعلا.. قال لي (خلاص افتحي الدولاب اختاري لي لبسة )قلت ليه (تمام )فتحت الدولاب لقيته فاضي م عدا كيس كبير... عاينت ليه وقلت ليه(ماف ملابس )قال لي (جيبي الكيس ده )اديته الكيس... فتحه طلع لي فستان أقل م يقال عنه أنه خونفشاري... حاجة كده تسوي ي ليل ، شلته منه وقلت ليه ده لي انا.. قال لي (لا... لحبيبتي ايلاف )وطلع ليه بنطلون وقميص بنفس لون الفستان... المهم اتظبطنا ولما جئت طالعة قال لي(لوف... الطرحة وين؟ )قلت ليه (حرام ياخ بعد تسريحتي دي ألبس طرحة )خشا الدولاب وجا لبسني الطرحة وقال لي(انا الحاجة لما تبقي حقتي معناها حقتي بس... اتفقنا )ابتسمت ليه وطلعنا الحفلة لما جينا داخلين الناس دي كلها تعاين لينا... كنا جاذبين الأنظار... والعجب لما الحفلة ابتدت وبقت رابة ياخ نحنا رقصنا رقيص... انا دي لما كرعيني وجعوني... بعد الحفلة خلصت ايمن قال لي (م كنت قايلك هجاجة للدرجة دي )قلت ليه(ولا انا م كنت قايلة نفسي كده)... ورجعني البيت ومشيت بغيظ ف افنان ووريتها الفيديو بتاع الحفلة... واتونسنا كده ورقدنا نمنا لأنه بكره كانت حنتها... وصحينا من الصباح وبقينا ف شغل البيت... م خلينا حاجة م عملناها... اتصلت علي أيمن وقلت ليه(رسل لي أحمد عشان يجي يشيل ليك هدومك )قال لي (انا جاي بنفسي عشان أشوف بتي اشتقت ليها ياخ )ضحكت وقلت ليه خير.... وفعلا جا وشال ملابسه وأنا مشيت مع افنان الكوافير... وافنان دي طلعت عثثثثثثل قوووومر 14 بس... وجا ساقنا السموأل ودانا الحفلة... يلا حفلة افنان دي كانت حاجة تانية... ياخ نحنا ربينا فيها ربه عجيبة خلاص وأيمن ده يشيل ويصور فينا بعد الحفلة خلصت أمي قالت ليه (اوعك توري الصور دي لاخوك يقوم يشيل نورة بتي ساي )ايمن ضحك وقال ليها (وهي لما كانت بتشوف ف صور اخوي م كانت بتشيل نورته )افنان دي خدودها بقت طماطم بس من الخجل... ضربت ايمن ع كتفه وقلت ليه عيب كده... ضحك وفات... الساعة 3 ص انا اتصلت عليه وقلت ليه (ايمن... انا عاوزة ايسكريم هسي ده )قال لي (لوف... أولا الساعة 3 ص.. الحاجة التانية انا شغال مع الطباخ.. الحاجة الثالثة انا مستحيل ألقي بتاع ايسكريم فاتح زي الزمن ده )قلت ليه (م عارفة اتصرف شوف لي ولا بتك ح تطلع مشوهة )وقفلت الخط بعد نصف ساعة جاني وشايل ليه كيس كبير ف يده اتصل علي تلفون قال لي(اطلعي بره انا راجيك  )قلت ليه(انا ما في البيت... انا ف بيت الجيران )قال لي (الوداك بيت الجيران بالليل ده شنو )قلت ليه (مع افنان... البيت مليان ورحلنا )قال لي (تمام )... جاني ف البيت وطلعت ليه شلت منه الكيس واديته كيس قلت ليه (الكيس ده م تفتحه إلا بكره وانت جاي العقد كويس )قال (ليه فيه قنبلة موقوتة )وضحك... قلت ليه (في زول بقتل أبو عياله؟؟ )اتونس معاي قرابة النصف ساعة تلفونه ضرب(أيوه.. انا قريب.. خلاص هسي بجيك )قال لي(هسي ده الطباخ.. قال لي انت وين؟ ماف زول غيري معاه... أحمد لافي من جكس لجكس )قلت ليه( خلاص أمشي )قال لي(حاف كده.. طالع تلاتة صباحا وافتش ليك الآيسكريم واجيبه ليك وماف لي مكافأة؟ )وغمز لي عينه... قلت ليه(بطل قلة أدب والا ورب النعمة أصرخ ألم الناس عليك )قال لي(صرخي مرتي ويا ناس حر )هبشت بطني وقلت(شوفتي ي بتي ابوك بقل ف أدبه كيف؟ )ضحك وقال (شفتي ي بتي لو م كده انت م كان جيتي)عاينت ليه وقلت(اقسم بالله عمرك م بتعقل... ونزلت مشيت... البوم  التاني صحيت الصباح وقمنا ع الشغل كنا عاملين فطور ومع الشغل ملابسي م غيرتها... في عز انشغالي جاتني رسالة من ايمن(ام بتي... خلاص كفاك شغل... وخلي بالك من بتي وامشي ارتاحي بعد ده )ضحكت وقلت ليه(حاضر ي ابوها ) خلصنا الفطور ومشينا ارتحنا شوية.. قريب الضهر ايمن اتصل علي وانا كنت في الكوافير مع افنان قال لي(عايني في منك كم نسخة تاني؟ )قلت ليه(انا آخر نسخة )قال لي(وانا محظوظ اني حزت عليها... انا ح اجي اسوقك بعد ده ، عشان الحق العقد )قلت ليه(خلاص انا ذاتي انتهيت... تعال بعد ده )جاني وكان لابس ليه جلابية سمنية (تتذكرو لما مشيت الترزي.. يلا أنا كنت مفصلة لايمن جلابية من عنده بس م حبيت اوريه وخليتها مفاجأة )ايمن قال لي(بس انت عرفتي مقاسي من وين؟ )قلت ليه (أولا انا مرتك يعني لازم أكون عارفة مقاسك.. وبعدين شلت جلابية قديمة وقلت للترزي يفصلها نفس المقاس... والترزي طلع شاطر... )قال لي (ورب الكعبة بحبك )قلت لبه(وانا بموت فيك )ووداني البيت لقيت خالتو سلمي حارساني قالت لي(لوف... آليا دي م منها اي فائدة... أمشي اقيفي مع الطباخ... لأنه الغداء ح يبدأ )وفعلا مشيت اشتغلت معاه بعد شوية ايمن اتصل علي وقال لي... .
مع كل الريد السمح شديد ليك

#كبسوله_فرح 💊
الحلقة الثامنة والعشرون
بقلمي :- Hanin ♡
(ايلاف... ولا ثانية ف المكان الانتي فبه ده م تقعديها... عايني انت لو م هاميك البيبي الفي بطنك ده انا بهمني.. يلا أمشي جوه ولا كلمة ).. أتلفت لقيته وراي... عاينت ليه وخشيت... عملنا الغداء... وبعد خلصنا جاتني مكالمة من رقم غريب رديت (الو... أي اهلين... ميوش... وصلتي متين؟؟ الليلة.. خلاص لازم تصلينا ف البيت... الليلة الزفة... خلاص بعدين تجي الحفلة ف الصالة... خلاص تمام  )اتصلت ع ايمن (انا ماشة الكوافير.. ح تجي تسوقني ولا أمشي مع أحمد )قال لي(انا م عارف المعرسك أحمد ولا انا )م رديت ليه وقفلت الخط ف وشه.. قعدت شوية جات مرام وقالت لي (حالتو لوف...اياحكاكي معاي...)وجرتني معاها مشيت وراها... لحدي م وصلت الجنينة طلع لي ايمن... (لوفتي... أنت زعلانة مني ف حاجة؟ )م رديت ليه... شلت تلفوني واتصلت ع آليا (الو آليا.. اسمعيني انا سائقة مرام معاي الكوافير... خلاص تمام )قفلت اتصلت ع أحمد (الو... حمود... اسمعني ملابس مرام ف غرفة آليا جيبهم لي تحت وتعال عشان توديني الكوافير)ده كله وأيمن بعاين لي... بعد قفلت اداني عين انا لما رجعت لورا.. بس نهائي م اشتغلت بيه وبقيت واقفة... أحمد جاب لي كيس الملابس وقال لي ارح... أيمن قال ليه (أحمد خليها بوصلها انا )قلت ليه(لا ي أحمد.. انا ماشة معاك )ايمن قال ليه ( احمد انا بتكلم معاك امشي )وبقينا نتناقر كده... احمد قال لي (عايني ي لوف.. لما تقررو أنه الحيوديك منو اديني تلفون... انا عندي مزة راجياني )وفات خلانا واقفين... مرام قالت لي (حالتو لوف... ايح ياحي الحفية بتبدا هسي )بقيت واقفة وبعاين لايمن مشيت ركبت العربية وصلني وزول فتح خشمه مع التاني ماف.. لما وصلنا اتصلت ع بت خالتي قلت ليها ف كيس عند افنان جيبيه لي... جابته وسلمت ع ايمن وبقت تتنايص وتتخافف ايمن لما شافني اتضايقت منها...  قال لي (لوفتي... خلي بالك من الحتة مني الجواك وخلي لي بالك من نفسك )وفات... اتغاظت غيظ هي من الحكاية دي وبقت تعاين لي بقعر عينها وفاتت... رسل لي رسالة (ما بعاين لغيرك )انا ابتسمت وخشيت الكوافير...لبسنا واتجهزنا وجاء أيمن ومعاه أسعد وأحمد والسموال وحلمي... اي زول فيهم كان سائق ليه عربية، انا ركبت مع أيمن وأسعد طبعا مع عروسه وباقي البنات ركبو مع أحمد والسموال وحلمي... ومشينا الحفلة كنا شبايين العروس لابسين اسود كلهم فساتين م عداي كنت لابسة توب... والأولاد لابسين بدل سوداء... جينا خاشيين اي ولد مع بت... نحنا خلينا بعد العريس والعروس دخلوا جينا خاشين انا وأيمن... أثناء م ماشيين ايمن قال لي(ايلاف... انا ستين ألف مرة م قلت ليك م تلبسي كعب عالي )أتلفت عليه دائرة أرد ليه المصور ثبتنا ف الشاشة وكأنه انا بعاين ليه... فجأة أصحاب ايمن بدوا يصفروا.. أتلفت عليهم وبقي يضحك انا من الخجل م عرفت أمشي وين... مشينا قعدنا ف ترابيزة وأيمن حالف م أقوم بالشبط لأنه كعبه عالي وانا خلاص زعلت.السموأل جا ساق ايمن يبشروا للعريس وحذرني اقوم.. جاتني واحدة قالت لي(الحفلة م عاجباك ولا شنو قاعدة وبتعايني كده )أتلفت عليها ودايرة اشاكلها من الغبينة الفيني لقيتها مي... قمت سلمت عليها وقعدت معاي قالت (قاعدة مالك والحفلة رابة... قومي ارقصي )قلت ليها(لابسة كعب عالي وأيمن حالف كان يخليني أقوم )قالت لي (انت لابسة توب اسود وانا لابسة شبط دهبي كعبه وسط هاك البسيه )وحلفتني... لبسته وقامت أفنان أشرت لي.. مشيت عليها وربيناها ربة من أمها... أيمن جا جنبي قال لي(المدام.. شايف رأسك قوي... قومتي ليه )قلت ليه(شوف... والله غيرته )وضحكت... المهم كملنا حفلتنا ديك وبعدها كان الجرتك خلصناهو كله  ف الصالة... طلعنا ووصلنا مي البيت... وجينا راجعين طوالي عشان نستف لافنان شنطتها لأنهم مسافرين شهر العثل...وفعلا وديناهم المطار... وجيت راجعة مع أيمن بيتهم لأنه قال لي إلا أمشي أبيت معاهم... فعلا مشيت والصباح رجعت البيت... قعدنا بعد العرس أسبوعين وطوالي رجعنا لبيتنا... أيمن كان معيشني احلي عيشة.. وكان نهائي م بخليني اعمل حاجة وحتي كان بوديني المستشفي الصباح وبجيني الضهر يطمن علي والمساء بجي يرجعني البيت... كانت حياتنا ماشة ع المنوال ده... حتي مي نقلت المستشفي معاي وبقينا شغالين سوا وكانت بتاخد بالها مني شديد وبتهتم بي ، خصوصا انا كان حملي متازم والجنين م ثابت... لما فضل لي شهر للولادة ايمن رجعني السودان... قعد معاي يومين ورجع تاني وقال لي (بجي قبل المواعيد بتاعت الولادة بيوم... )وفعلا الأيام مرت لحدي م جا اليوم الحاولد  فيه بكره  الصباح.... وأيمن اتصل لي وقال أنه متحرك جاي...
*************************
قفلت المذكرات بتاعت ماما ، وبقيت قاعدة منتظرة بابا ع أحر من الجمر ، منتظرة اعرف تفاصيل باقي القصة والحصل شنو وانا اتولدت كيف... بابا فتح الباب نطيت وجريت عليه وسلمت عليه.. قال لي(فرحتي... بت مرتي السمحة... عايني الليلة حبوبة سلمي عازمانا عشاء

#كبسوله_فرح 💊
 الحلقة التاسعة  والعشرون (قبل الاخيرة )
بقلمي:-Hanin ❤
قلت ليه (لا لا ي بابا... انا خلصت قراية قبيل، خلينا نمشي لأني ذاتي اشتقت ليها )وانا كان ف بالي أنه اعرف باقي القصة... واعرف الحصل شنو... لأنه آخر توقيع لماما ف دفتر مذكراتها كان الساعة 10 م... يلا ماف زول ح يتم القصة دي إلا حبوبة سلمي أو حبوبة رقية... مشينا البيت ولقيناهم وسلمو علينا.. حبوبة سلمي قالت لي(ايويتي.. حبيبة امها شنو ي بتي طولتي م جيتينا ، بجي كده برضو ي بتي؟ )بستها ف راسها وقلت ليها(معقولة ي تيتا انا انسي حبيبة أمي.. بس والله الامتحانات بتاعت الاكستيرنال قربت وانا مضغوطة شديد... بس وعد بعد أخلص بيتنا م حامشيه وحاجي اقعد معاك شهر )ضحكت وقالت لي (كويس ي بكاشة.. يلا خلصي عشان دايراك ف موضوع )بعد خلصنا من الأكل قعدنا كلنا... كان في جدو سعد وعمتو آليا ومرام الروح كانت بتها ايلاف الجننتها بالبكاء وحبوبة بتقول ليها (خالص م شلتي طباع السموك عليها )وعمتو آليا تضحك... وفي عمو اسعد معاه خالتو أفنان واولادهم ولاء ووليد... وعمو أحمد ومعاه مزته زي م مسميها هو زوجته العثل إسلام واولاده حسام وحلا... وطبعا كان ف دادي العثل حاضني عليه وقاعدين... قاعدين نتونس... قمت قلت ليهم (ي جماعة انا عندي ليكم سؤال... بس ي ريت ماف زول يزعل من كلامي ده.. )كلهم عاينو لي وقالو لي(لا لا... ي بتي ولا يهمك )عاينت لابوي وقلت ليهم(انا لقيت مذكرة ماما الله يرحمها... وفيها مكتوب كل تفاصيل حياتها مما اتزوجت بابا  المشاكل ال مرت بيها وكيف أنها وبابا قدروا يتجاوزوها لحدي عرس عمو أسعد... لحدي م جا اليوم المفترض تولدني فيه... وتاني م عرفت حاجة... ممكن تحكو لي )... حبوبة سلمي بقت تحكي لي...
flash back...
في اليوم داك أمك جاها تعب الولادة وبقت تصرخ... اتصلت علي حبوبتك رقية وقالت لي (سلمي... ايلاف بتولد.. انا ومحجوب حنوديها الدكتور الحقونا... )مشينا المستشفي ولقينا ايلاف دخلوها عملية مستعجلة وأبوك ده جا من المطار وطوالي نزل ف المستشفي... ايلاف كانت حالتها حرجة جدا.. لأنه حملها كان صعب جدا.. ف العملية نزفت دم كتير جدا... وخشت ف حالة بتاعت غيبوبة... أنت كنت حجمك صغيروني ودخلوك الحضانة طوالي... وبدأ الدكتور يطمنا ف حالة أمك... هي كانت ف غيبوبة أسبوعين م فتحت... ف يوم نحنا كنا ف البيت وأيمن جا علينا قال طالع المستشفي قلت ليه (انت جيت هسي اقعد اتغدا)رفض وطلع لأمك... أمك ف اليوم داك فتحت ووعيت...
دادي بدأ يحكي..... (بعد م أمك فتحت قالت لي (أيمن... بتي كيفها... انا دائرة اشوفها... )جبتك ليها وابتدت تبوس فيك وبتبكي... وبتقول لي(أيمن.. بتي أمانة ف رقبتك ، ختها ف عيونك وخالص م تخلي زول يعمل ليها حاجة كعبة ولا زول ياذيها ، ربيها أحسن تربية وبعد تكبر قول ليها أنه أمك كانت بتحبك صح هي شافتك ساعات محدودة بس نفسها وروحها فيك... كلها كان نفسي اربيها واكبرها واعلمها وازوجها واشيل أولادها بس م بيدي... قول ليها تحافظ ع نفسها شديد ، وتخلي بالها منك... قول ليها انا بحبك.. وعليك الله ي أيمن خلي بالك من الحتة منك الشلتها ف جواي دي ، بتي سميها اية وهى الحتجيب ليك الفرحة )انا بقيت أبكي وقلت ليها(بتك ح تقولي ليها الكلام ده كله براك... أنت الحتكبريها وانت الحتربيها... انا ما لي غيرك ي ايلاف.. ح تسيبني لمنو ؟ )ابتسمت وقالت لي(الأعمار بيد الله... بس تأكد اني بحبك ولا انا كان فيني أعيش من غيرك )الدكتور جا قال لي زمن الزيارة انتهي وطلعت... قعدت بره ساعتين وأمك أصرت أنها تكون شايلاك ، بعد ساعتين الدكاترة يجو بجارو ع غرفة أمك.. وجات الممرضة جارية وهي شايلاك... سألتها ف شنو؟  قالت (د. ايلاف حالتها اتراجعت)بعد شوية جا الدكتور من جوه وقال لي(انا لله وانا إليه راجعون... البقاء لله وحده ، أصبر عشان بتك ي ايمن )انا م صدقت لزيت الدكتور ودخلت لقيت ايلاف راقدة ف السرير ومغطينها بملاية بيضاء... كانت خلاص بقت جثة هامدة وانا بقيت براي وخلاص ايلاف اختفت من بين يدي... فجأة بقيت انا براي بدون حبيبة قلبي ، من غير الزول البقول لي ايمون ولا الحيدلعني... من غير زول اصحي بوشه الصباح ويبدأ يشاكلني أنه اتأخرت عليه... ايلاف خلاص ماتت.. راحت من يدي ، فاتت وبقيت من غير سند ، حتي الفترة ديك كان ألمي هين بس لما جابتك الممرضة لي وعاينت ليك اتذكرت انك ح تكوني من غير ام حتربي براك من غير زول يقول ليك حبيبة ماما... م هان علي حضنتك وبقيت أبكي.. بكيت كل يوم انت حتعيشه من غير أمك ، بكيت كل لحظة انت ح تكوني بتساليني فيها من أمك وانا م بعرف أرد عليك ، قضينا ايام العزا وانت من حضني م مشيتي ، حتي كنت باكلك انا وبعمل ليك كل حاجاتك ، كنت شايفة صورة مصغرة من ايلاف الأنا فقدتها بس ربنا عوضني بيك انت .... حبوبتك رقية كانت مصرة أنه انا أواصل حياتي واتزوج واديك ليها تربيك ، بس انا رفضت وقررت اني اربيك بنفسي زي م وصتني أمك...
مع كل الريد السمح شديد ليكم ♡♡
#حنين

الحلقة الثلاثون
back
وابوي لسه مواصل.. واهو ي ايه كبرتي واتعلمتي وانا لسه معاك ي بسمة في الزمن الصعب..
بابا خلص من الكلام وهو بتنهد من البكاء حبوبة سلمي دي لما قرب يغمي عليها من البكاء... حتي جدو سعد كان ببكي كلهم كانو ببكو... انا من شدة البكاء لما م قادرة اتكلم بس قمت وحضنت بابا وقلت ليه (ربنا يخليك لي)
قعدنا شوية وبعد هدينا...عمو اسعد قال لي (اية.. أمك كانت #كبسوله_فرح لأي زول عرفها... كانت #كبسوله_فرح لكل حزن لاقي اسرتها... كانت #كبسوله_فرح لأي زول عاشرها واحتك بيها... أمك بالجد م كان في زول بشبها... بس ربنا يرحمها ي بتي... )خالتو أفنان قالت لينا(بالجد كانت فرحة لكل زول حباها... بس ربنا يرحمها ويغفر ليها )... مرام قالت لي (ايه خالتو ايلاف كانت مسمياني مرام الروح وكانت بتحبني حتي اكتر من روحها... بسببي حصلت ليها أكبر مشكلة ف حياتها بس برضو لحدي م ماتت كانت بتحبني بالجد ربنا يرحمها... كان نفسي تكون عائشة عشان اوريها اني بالجد بحبها... لاني كنت بحس بيها امي التانية )... حضنت مرام وقلت ليها (وانا وهي كمان بنحبك ي ام امي ) بابا قال لي (أمك ايلاف ضحت بحياتها عشانك... لأنه بعد فترة من الوفاة اتصل علي دكتورها ال كانت متابعة معاه وقال لي(أستاذ أيمن... في حاجة انا مفترض اديك ليها... بتقدر تمر علي الساعة كم؟ )قلت ليه (بمر عليك العصر )وفعلا مشيت ليه وسلمني رسالة مكتوب عليها (أيمن... مرام الروح♡ انا بحبك شديد... صدقني انا عمري ما كنت متخيلة اني ممكن اقدر أواصل حياتي معاك... بس قسمتي كانت أكبر مني ومنك... تأكد أنه انت ف حياتي اول زول وآخر زول... واني  بحبك جدا... انا آسفة ي أيمن... الرسالة دي لو قريتها بكون انا مع ربنا سبحانه وتعالي...اعفي لي لأنه انا م وريتك... بس الدكتور قال لي انه انا عندي مشكلة ف القلب.. ولو خليت الجنين يعيش ممكن أفقد حياتي ، ووضعني قدام خيارين يا انا ي جناي ، اعفي لي لأنه انا اخترت جناي... لأنه أحق بالعيش مني.. ربي لي بتي كويس ي أيمن... وقول ليها تعفي لي لأنه هي ح تعيش من غير ام... بس أمها لو عاشت هي م حتكون حية.. وأنه أمها مستحيل تمنع بتها من الحياة... اعفوا لي انتو الاتنين... وكونوا لبعض #كبسوله_فرح لأي حزن بلاقيكم ويمرضكم... وأنا بحبكم الاتنين... )انا بعد الرسالة دي انهرت.. لأنه ايلاف كانت عارفة روحها ح تموت لو استمرت بس واصلت عشانك انت ي دنياي )
صحيت من سرحتي الطويلة ديك والدموع مالية عيوني  ع صوت تلفوني بضرب وكان المتصل قسم الطوارئ (الو... دكتورة آية ، ممكن لو سمحتي تجي المستشفي بأسرع م يمكن ، مريض الغرفة 7 حالته اتازمت شديد ، والدكتور منتظرك)شلت مفتاح عربيتي وجريت ع المستشفي.، كان عندي مريض ف المستشفي حالته متأخرة شديد.. كان طفل عمره 10 سنة وكان عنده قلبين وواحد فيه مشكلة وكان لازم يتم استئصاله ، العملية كانت صعبة وعمر الطفل صغير فالدكاترة كانو خايفين من العملية... بس حالته اتازمت شديد.. وفعلا مشيت المستشفي لقيته جهزوهو للعملية ودخلت العملية كانت صعبة شديد وكبيرة جدا... اتذكرت عهدي لنفسي ولروح أمي أنه م اخلي أي مريض قلب يموت... وابذل أقصي ما في وسعي عشان انقذه ، العملية استغرقت 18 ساعة ، والحمد لله نجحت.. وفي فترة وجيزة صات ذيعي ف البلد كلها...وبعد فترة استضافوني ف قناة تلفزيونية وكان الحوار كالاتي :-
المذيع :- د. أية أولا عرفينا عن نفسك...
انا :- انا دكتورة اية ايمن سعد سودانية الجنسية.. أخصائية قلب.. عمري27 سنة
المذيع :- ومنذ متي وانت تقيمين ف بريطانيا؟
انا :- انا اتحصلت علي الزمالة البريطانية من 4سنوات واتكرمت ف السودان كاصغر طبيبة حائزة ع الزمالة البريطانية... والحمد لله ربنا وفقني وما زلت مستمرة
المذيع :- د. أية.. العملية التي قمتي باجراءها كان بها من الخطورة ما يجعل اي طبيب غير ماهر يتراجع عن قرار القيام بها.. ما الذي دفعك إلي المخاطرة؟
انا :- اتنهدت وقلت ليه :-انا قاطعة عهد بيني وبين نفسي أنه م اخلي مريض قلب يموت طالما انا ف وسعي اني انقذه... وحكيت ليه قصتي مع المرض ده... حتي المذيع ابتدأ يبكي
المذيع :- انا آسفة د. أية
وواصلنا البرنامج وخلص وانا رجعت بيتنا
جاتني رسالة ف ايميلي محتواها(د. أية... أولا سلام عليكم ، ثانيا .. انا سيف الدين حلمي أخو المريض العملتي ليه العملية وبعد إذنك لو م عندك حاجة ممكن نتلاقي في أسرع فرصة ممكنة؟ )انا استغربت من الرسالة بس رديت (حاضر ي أستاذ سيف ، انا بكره مداومة ف المستشفي ممكن تجيني هناك )وكنت مرهقة ونمت ع كده... الصباح مشيت المستشفي ولقيت في الرسيبشن رسالة أنه ف زول منتظرني مشيت عليه لقيت ولد وجيه كده عاينت ليه.. قال لي (د. أية.. سلام عليكم انا سيف الدين حلمي...رسلت ليك رسالة أمس )سلمت عليه وقعد شكرني شديد واتونس معاي شوية وبعد جا طالع قدم لي دعوة أنه اجيهم ف البيت... انا اترددت بس هو أصر وقال لي (أمي مريضة شوية والا كانت جاتك هنا ف المستشفي وشكرتك بنفسها )
مع ك

#كبسوله_فرح 💊
الحلقة الحادية والثلاثون
بقلمي :- Hanin ❤
اليوم التاني طلعت مشيت علي المستشفي ومنها اتصلت علي سيف الدين عشان يوصف لي البيت قال لي(انا منتظرك تحت لي ساعة )نزلت مشيت ليه وطلعنا ع بيتهم.. اول ما وصلنا قال لي (في البيت في أمي وأختي وابوي بجي بعد شوية )خشينا البيت... بيت أقل ما يقال عنه خورافي.. فتحنا الباب لقينا مرة م كبيرة شديد قاعدة ف الهول اول ما شافتنا جات علي وحضنتني (بتي السمحة.. شكرا ليك والله بجد نحنا م عارفين من غيرك ممكن نعمل شنو.. وربنا يخليك لينا )وكلام كتير انا اول م حضنتني اتذكرت أمي والغصة وقفت ف حلقي...جا أبوهم ولقاها بتبكي هو مسكني وسلم علي ف راسي وشكرني لما دمع... انا خلاص فاض بي... سألتهم من أمين (اخوهم الكان عيان )قالو لي ف الغرفة فوق.. مشيت عليه سلمت عليه واتونست معاه كنت عاوزة بأي طريقة اتهرب من الجو داك لأنه كان بذكرني بامي وابوي.. وأثناء م قاعدة سرحت...
flash back..
بعد م خلصنا التكريم الكان معمول في برج الفاتح الاتكرمت فيه ك اصغر طبيبة حائزة علي الزمالة البريطانية رجعنا البيت كلنا بناس حبوبة رقية وجدو محجوب... ومنها مشينا البيت انا وبابا... و في الطريق بابا قال لي (فرحتي... انا ماشي المطعم داك اجيب لينا عشاء واجي.. وفعلا نزل ولما جا طالع من المطعم كان بأشر لي وأنا بعاين ليه ومبتسمة جا قاطع الزلط.. بس جات عربية طقشته... انا جريت عليه لقيته سايح ف دمه مسكته حضنته وبقيت ببكي وأقول ليهم( جيبو إسعاف.. جيبو إسعاف أبوي بموت ي ناس... ساعدوني) الاسعاف جا
. واسعفو بابا  نفس المستشفي الكانت فيها ماما ودخلوهو عملية مستعجلة وأنا كنت منهارة تماما ، لحدي م طلع من العملية ودخلوهو غرفة الإنعاش الدكاترة قالو انه خلاص طلع من مرحلة الخطر ، دخلت عليه وأنا خايفة.. مشيت لقيته نائم حضنت يده علي ، فتح عيونه وقال لي (فرحتي... انا خلاص أيامي ف الدنيا انتهت... المعدودة لي تمت..من زمن ايلاف ماتت انا كنت خايف أنه ما أقدر أوفي ليها بوعدي واحافظ عليك واربيك زي ما هي عاوزة... بس الليلة انا ممكن اقيف قدامها وبكل ثقة وأقول أنه انا ربيتك وعلمتك.. كان نفسي ازوجك بس ربنا ما قاسم لي اشيل عيالك... انا همي انزاح وخلاص الفيني كملت... أنت كبرتي كملي مشوارك وما تقيفي وارفعي رأس أمك فوق وتأكدي أنه نحنا فوق هنا شايفنك ونحنا بنحبك )ويده وقعت من بين يدي والأجهزة بقت تصفر معلنة وفاة ابوي... انا من الخلعة بقيت لا عارفة أبكي ولا أصرخ ولا اعمل شنو بس سكت... ايام العزاء انتهت وانا خالص دمعة م نزلت مني بس كنت ساكتة حبوبة رقية خافت علي وقالت ليهم ودوها لشيخ خلوهو يقرأ ليها بس برضو م نفع انا كنت خشمي م بفتحو مع زول ولا كنت بقعد معاهم بس كنت بطلع باكل براي وبرجع غرفتي.. بعد شهرين جاني جدو محجوب وقال لي (أية.. أبكي ي بتي.. البكاء بريح ما تحبسي حاجة ف قلبك.. كده بتمرضي ، كلنا بنموت ي بتي بس أي زول بيومه ، اطلعي من غرفتك دي وكملي باقي حياتك.. أنت لسه صغيرة ما تخلي أحلامك تبهت )وقال لي كلام كتير انا كنت بعاين ليه وساكتة بعد خلص انا قلت ليه(حاضر ي جدو.. أن شاء الله)بعد يومين من الكلام ده انا لميتهم كلهم وقلت ليهم (انا ماما اتوفت وانا لسه م عرفت ف الدنيا دي شي ، بابا كان بالنسبة لي آب وأم وأخت وصاحب وكل شي... كان بالنسبة لي أكبر سند.. والليلة انا حاسة أنه سندي انكسر.. بقيت حاسة بروحي وحيدة.. انا م ح اقدر اقعد ف السودان ده تاني.. انا جهزت أوراق سفري وبكره ح أمشي أقطع التذكرة وحاسافر ما عارفة انا ح أرجع متين او انا ممكن اقعد قدر شنو بس كل الدايراهو منكم أنكم تعفو لي لو انا عملت ليكم حاجة كعبة )ناس البيت كلهم حبوباتي وجدودي واعمامي وعمتي عزو زين وبعدين قالو لي البتشوفيهو مناسب اعمليه... انا جيت بريطانيا واشتغلت بجد، كنت بشتغل طول النهار.. بس بمجرد م يجي الليل كانت الذكريات كلها بتجي علي بالي وبقعد أتألم وعشت علي المنوال ده.....
back.
صحتني خالتو رحمة من النوم وقالت لي(أية ي بتي ليه نايمة ع الكرسي... قومي نومي ع السرير... بسم الله ي بتي بتبكي مالك؟؟ )قلت ليها (لا لا ي خالتو رحمة بس طولت ما لاقيت لي أسرة سودانية بالحنية دي فاتذكرت ناس بيتنا )حضنتني وقالت لي(الله يرد غربتك ي بتي )ابتسمت ليها ونزلنا تحت... لقيناهم ختو الغدا.. قعدنا ف الصفرة اتغدينا وبعد خلصنا عمو حلمي قعد بتونس معاي.. سألني من اسمي قلت ليه (اسمي اية ايمن )عاين لي جوه عيوني وقال لي (ابوك اسمه ايمن منو؟ )قلت ليه(أيمن سعد )الراجل ده قام من محله وجا علي وحضني وبقي يبكي.. بكا زي الشافع الصغير لما بقي يتنهد وخالتو رحمة دي لما خلاص بقت تقطع من البكاء.. طبعا أنا احترت من الحاصل ده شنو، بعد خلاص هدو عمو حلمي بدأ يحكي لي (أية ي بتي ، ابوك ده كان صحبي شديد واكتر من اخوي كنا شغالين سوا ف ماليزيا ، لحدي م نزل لما أمك ايلاف كانت بتولد وسمعت أنه هي اتوفت ف الولادة وتاني من الزمن داك م لاقيته....
م

#كبسوله_فرح 💊
الحلقة الثانية والثلاثون
بقلمي :- Hanin ❤️
البركة فيكم ف أمك ي بتي ، هو نقل شغله السودان وخلي اخوه اسعد يجي يمسك فرع ماليزيا وانا بعده بسنة جاني عقد عمل هنا ف بريطانيا وتاني اخباره انقطعت ... اكتر من 25 سنة ي بتي انا م لاقيت ابوك.. بس دائر أسألك سؤال ابوك كيفه؟؟ )عاينت ليه جوه عيونه وقلت ليه(بابا تعيش انت ي عمو )والله عمو حلمي ده اتفقع بالبكاء زي الشفع ، انا كنت بحاول أبكي بس م قدرت. دي كانت مشكلتي.. كنت قدر ما أحاول أبكي بابا م بقدر بحس بس بغصة وبعدها م بقدر اتكلم... عمو حلمي بعد عرف انا منو حلف إلا اجي ارحل عشان اقعد معاهم.. انا ف البداية رفضت رفض تام بس بقي يوميا بجيني ف المستشفي.. لو ما جا هو بجي ولده سيف تقريبا الحكاية دي استمرت شهرين.. بعدها لقيت الموضوع بقي بايخ قررت ارحل... وفعلا ف خلال يومين بس انا كنت ف بيت عمو حلمي... عمو حلمي كان عنده ولدين سيف وده طبيب أسنان وأمين وده عمره عشرة سنة وبنت واحدة اسراء دي بتقرا ف تانية جامعة صيدلة... يلا كان مقسم البيت ع شكل شقق... الأرضي لعمو حلمي وخالتو رحمة وإسراء وفوق شقتين.. واحدة لأمين والتانية لسيف... يلا أنا ادوني شقة أمين وعمو حلمي قال لي(أمين م برضي نهائي أنه زول يسكن ف بيته.. بس من عرفك دي انتي اداكي ليه بدون أي تردد... ربنا يحفظك ي بتي )ابتسمت ليه وشكرته... كنت حاسة أنه انا حاحس بالوحدة فطلبت من إسراء أنها ترحل معاي وفعلا رحلت... بقت اكتر من اختي وبراجع معاها كتير ومرات بمشي ليها ف الجامعة ونطلع سوا... كنت ف الفترة دي كلها بشوف سيف ما ندر.. سألت منه إسراء قالت لي(سيف ده زمان نحنا بنشوفه من ستة شهور لسنة... مرات كتيرة يغيب وبجي يقعد يومين تلاتة.. هو بشتفل بره كتير فعشان كده ما متواجد ، بس الفترة ال انت قعدتي فيها دي بقي يجي البيت كتير ويقعد كمان )قالت الكلام الأخير ده ورفعت لي حاجبها... ابتسمت ليها وانا مستغربة في كلامها... المهم بعد حكاية بتاعت شهر ونص كنت انا جاية من المستشفي اتصل علي سيف.. رديت (اووو ، سيفو... وين انت ليك أسبوع بره البيت؟ )قال لي(يوتي.. انا عازمك عشاء الليلة )قلت ليه (م فاضية ليك )قال (عندك شفع )رديت ليه (وراي مرضي وعيانين)قال لي(اعتبريني واحد من المرضي والعيانين البتعالجيهم وتعالي عالجيني  )وبقيت اكاوي فيه لحدي م وصلت البيت لقيت عربية سيف واقفة تحت ، قلت ليه (انت جيت متين؟ )قال (من زمن بقول ليك عازمك ي سجم )قلت ليه(مش سجم يلا شوف البطلع معاك )قال لي(بتطلع معاي حبيبتي)وطلع لي لسانه، انا اتغظت منه ومشيت... بعد شويه جا دقا لي الباب فتحت اسراء اتكلم معاها وجاني قال لي(أية نص ساعة والقاك تحت والا وقسما بالله اجي اشيلك)كشرت ليه وشي وما رديت عليه.. مرت النص ساعة جا تاني دقا الباب لقاني م جاهزة قال (خمس دقائق ي يوتة وتبقي مارقة )وقعد ف الصالة بره.. انا ولا هببت ليه ورجعت نمت بعد شوية أحس ليك بزول شايلني ولسوء حظي خالتو رحمة وعمو حلمي ف اليوم ده كانو مافيشين و اسراء طلعت مع أمين.. يعني ماف إلا انا... طلعني من الشقة بتاعتنا ودخلني شقته لقيت النور مطفي وانا بصرخ نزلني وقال لي(عنيدة وراسك قوي )قلت ليه (طلعني والا وذات الله أصرخ ألم عليك الناس )ضحك وقال لي(صرخي ساي زول بسمعك ماف... حيطان البيت دي كلها وحتي القزاز كلها عازلة للصوت )وضحك.. قلت ليه (داير شنو انت؟ )قال لي(بس تتعشي معاي ي سجم ولا شي تاني )ولع النور لقيته راصي الصفرة ومجهز العشاء وكل شي.. حمرت ليه وقلت ليه(انت ما خاتي مخدر ف الاكل عشان ادوخ وانوم وبعدين تعمل فيني عمايل بطالة ولو ناس عمو قبضوك تقول انا الجيتك صح؟ )ضحك وقال لي(البسمعك ي أية بحلف يقول أنه انت لا دكتورة ولا سجم رماد، ياخ يخرب بيت المسلسلات البتحضريها )ضحكت ومشيت اتعشينا وبعد خلصنا جاب لي تفاح قال لي(قطعيه... بحاول أقطع فيه يدي انجرحت )نطيت وقلت ليه(دقيقة اعقمها ليك )ضحك وقال لي(لا لا صغيرة.. بس انا م بعرف استخدم سكين )قطعت الأولي لما جئت ف التانية لاقتني حاجة حادة جوه فتحت التفاحة لقيت خاتم ومعاه ورقة صغيرة مكتوب عليها(تتزوجيني؟ )انا فتحت عيوني كبار وبقيت اعاين لسيف الكان مبتسم وفي عيونه في بريق أمل وترجي بقول لي وافقي.. من غير م اشعر لقيت روحي بهز ليه رأسي. جا جاري وحضني وقال لي(ألف حمد الله عليك ي وطن طال اغترابي عنه وأخيرا اليوم وطأت قدماي ترابه)انا دي من الفرحة لما م قادرة أنطق وبقيت بس حاضناه وبضحك... سيف كان مستعجل جدا  كلم اعمامي للزواج.. ونزلنا السودان بعد أسبوعين والعرس اتحدد بعد شهر... فعلا ربنا م بحرم زول من السعادة... سيف عمل لي احلي عرس وكان دائما بفرحني بالحاجات البسيطة البعملها لي بعد يوم العرس كنا مسافرين تاني يوم... من الصباح قلت لسيف وديني المقابر...  ساقني المقابر...بابا وماما كانو مدفونين جنب بعض قعدت جنب القبرين وبكيت.. بكيت كل الدموع ال كانت محبوسة ف جواي من وفاة بابا وما قدرت انزلها... بكيت ماما ال

ضحت بحياتها عشان أعيش انا بكيت الدموع ال كانت محبوسة جواي وما كنت قادرة انزلها... بكيت لما حسيت بحسي راح من البكاء... سيف جا قعد جنبي وقال لي(أدعي ليهم بالرحمة ي أية... هم صاح هسي مع ربهم بس أكيد شايفنك وحاسين بيك وما بفيدهم شي إلا دعواتك... واوعدك ي أية انا عمري ما حاسيبك تفقدي واحد منهم.. واخليك طول عمرك مبسوطة طول ما انا عايش)... وحضني عليه وقعد يبكي معاي.... وساقني العربية ركبنا وانا من بعيد وبعاين لقبر ماما وبابا (الليلة ي بابا آخر أمنية اتمنتها ماما اتحققت.. وياهو لقيت ود الحلال البشيلني في عيونه... والليلة ي بابا انا بقيت الزولة الدايرها انت... الليلة حققت ليك كل امانيك... اشتقت ليك ي بابا وكمان لماما العمري م شفتها... أنت هناك بعيد بس عمرك من قلبي ما طلعت ولا فت... ربنا يرحمكم ي اغلي من دنياي )ومسكت يد سيف وشلنا ليهم الفاتحة سوا واتحركنا....
بعد سته سنة........
كان عندي ايلاف الكبيرة وهي ماشة أولي مدرسة والصغير ايمن لسه بحبي... وأنا مالكة أكبر مستشفي (ايلاف لأمراض القلب )... وعندي اكتر زوج محب ف الدنيا دي سيف الدين.....
وزي ما طلبت ماما من بابا أنه نبقي #كبسوله_فرح للمرض والحزن الليلة بقينا
♡♡♡♡♡♡♡♡♡♡♡♡♡♡♡♡♡♡
#النهاية
خامس ايام عيد الفطر المبارك
كل سنة وانتو طيبين وينعاد عليكم بالخير واليمن والبركات..
#الخلاصة......
#كبسوله_فرح ابتدت من ايلاف وكيف أنها اتلاقت مع ايمن وحبته.. والمشاكل المرت بيهم وأنهم اتغلبو عليها وعاشوا حياتهم سعيدين..وكيف أنه ايلاف عاشت حياتها مصدر سعادة وفرح للناس التانيين.. لحدي م اتوفت وكيف أنه ايمن حبى ايلاف ونفذ وصيتها بالحرف الواحد وربي بتهم زي ما طلبت هي وبتعكس مدي حب ايمن ليها.. . القصة دي كانت مركبة... وممكن أنها تكون معقدة شوية... حاولت اني ما اختصر تفاصيلها... او اني أقص منها شي.. لأنه حقيقي م بتتقص... الرواية دي فيها من كياني كتير... وصراحة اجتهدت فيها شديد عشان اقدر اطلعها بالشكل ده... أن شاء الله تعجبكم.....
#خلاصة_تانية...
-ما كل حزن بلاقينا ف حياتنا لازم يكون نهاية الدنيا... بالعكس ممكن يكون لخير قدام بس لسه نحنا ما عشناهو
-م كل مشكلة بتواجهنا معناها معاها نحنا نخسر الناس البنحبهم مرات المشاكل بتفتح عيونا علي الناس الغلط ال كنا خاتين ليهم مكانة كبيرة هم م بستحقوها
-مرات لما نصبر علي المر ربنا بكافأنا بالعمرنا م اتمنيناهو
-م كل زول قال لينا حاجة نحنا لازم نصدقها... مرات في ناس بكونو قصدهم الشينة لينا
-حافظو علي البتحبوهم وعبروا ليهم بأي طريقة... المهم مشاعركم م تكون جواكم.. احبابكم أولي بيها...
-وفي النهاية #ابقوا_عافية وعيشوا حياتكم... هو العمر أصله كم؟؟
شجعوني بارائكم.. ومقترحاتكم.. وانتقاداتكم...لأنها بتهمني.... وسامحوني ع الاخطاء الفي الرواية دي لانه دي اول رواية لي...
ونتلاقي ف رواية تانية أن شاء الله....
مع كل الريد السمح شديد ليكم ♡♡
#كبسوله_فرح
#انتهت
بقلمي:-Hanin ❤