#رواية_محطة_الرحيل
*#محطة_الرحيل《17》*
*#الاخيــــــــــــــــــــــــــرة*
*#بقلم_جمانة*​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏
​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​‏​​‏​​‏​​‏​​‏​​
منال... يلا قمت الونسة ما بتخلص وما بعرف اسي عبير وولدك حسام بسووا في شنو غطسوا كدا اكيد يا كاسرين شي يا بتشاكلوا

قمت سويت الغداء الليلة علي مرة خالد عند اهلها عندهم عرس
ومشيت الم اوضتي العبارة عن ورق عمل وامتحانات حقت سعيد
معاناتي الدائمة دي آخرة البتتزوج استاذ

اول زواجي كنت متخوفة وما مستعدة ادخل في تجربة جديدة
اتزوج واحد ما بعرف غير اسمه وشغله وعلى ضمانة خالي
بس بعدها اكتشفت زي ما في اولاد الحرام في اولاد حلال بخافوا الله
وده الاكتشفتوا بي معاشرتي لسعيد
ابدا ما جاب سيرة طليقته بالشين رغم معظم البتطلقوا بطلعوا الف عيب في المرة
بس قال لي شوفي يا بت الناس عندي نقاط هي بتحدد نحاج علاقتنا او لا
اول شي الاحترام والثقة وخصوصياتنا ما تطلع برا
ما بحب المرة البتشتغل سمعت انك حنانة
عايزك تقعدي معززة مكرمة واحتياجاتك تجيك لحد عندك تمام
وانا قلت تمام وفعلا ليومنا هذا لا رفع يده علي لا بسمع كلام الناس ويدخلهم في حياتنا
اخواتي اتزوجوا باقي اصغر وحدة حاليا في ثالثة ثانوي إعادة
اخوي طاع تهريب لإحدى الدول الأوروبية واستقر هناك واخد الجنسية وما مقصر في امي بحاجة
رغم امي قلبها مقطوع عليهو فوق ال 13 سنة هو مغترب
رجع سعيد متأخر من المدرسة لان شغال معسكر في المدرسة
ختيت ليهو الغداء وبقي يحكي عن يومه بعدها اخد ليهو نومة صغيرة عشان يطلع يجيب حاجات للبيت عنده صحبه محمد من زمان هم مع بعض حتي اتعرفنا علي زوجته سلمى وحدة طيبة ودمها خفيف بشكل
سعيد عزمهم يجوا يومين تلاتة عندنا عندهم ٣ أطفال
فرحت بجيتهم لان لينا قريب ٣ سنوات من بعض

باليل اجتمعنا كلنا اي واحد بمرتوا واولاده الا خالد لان مرتو مافي
عندنا شاي باليل حاجة مقدسة فرشنا السراير من العصرية وحفاظة الموية البرتقالية علي جنب والطيور سكتوا خلاص لأنهم طول اليوم عاملين ازعاج
مترأسة القعدة نسيبتي حكومات علي قول اسينات

لساها قوية وصاحبة كلمة رغم كبر سنها بس كلمتها ما بتبقى اتنين
بقوا يتناقشوا عن توزيعة طلاب الأساس طبعا بنات اسينات اكيد مع سعيد في المدرسة وما شاء الله هم شاطرات

جات يقين دلوعة البيت قعدت في رجلين ابوها وتقول الا عايزة بسكويت رويال ما عايزة بسكويت جلكوز
الا قام عمها خالد اشتري ليها من الدكان ورجع

سبأ ونبأ اكتر شي بشبهوا ابوهم الله يرحمه شفته في الصور

بس يقين نسخة من اسينات يمكن عشان كدا إبراهيم بحبها

كنت مستغربة لما عرفت انه متزوج مرت اخوه بس عاينت حوالي لقيت كتير متزوجين نسوان اخوهم
ولي يومنا ده في بس ما كتير
بعدين كيف نحن نحرم حاجة حللها الله منو نحن؟؟
خلصنا شاينا والكل مشو نامو
انا رقدت بناتي في الصالة وختيت مخدات في طرف السرير عشان اريج ما تقع
لبست واتجهزت لسعيد مرت ليلتنا
بكثير من الحنية والحب الاتعودته من سعيد
بتجي في بالي ايام تعذيب عباس لي وبسرعة بمحي الفكرة من رأسي واغمض وافتح ألقى القدامي سعيد اضم نفسي في حضنه

الصباح بدري كان الجمعة فتحت صالة المرحوم البقت للضيوف فتحنا بابها على الصالة
وخالد بعد غيرنا بني البيت بني لنفسه أوضة وبرندة منفصلين
واستغلينا أوضة فضل والصالة للضيوف وك غرفة للبنات لانهم كبروا