روايات يمنية📚🇾🇪

رواية الثروة المنسية للكاتبة: عبير الكبسي

.

البــارت 75 ○

الثــروة الـمنسيـة 🍀

👌🏻👇🏻 😍
📚 @rewayatyamania 🇾🇪

سالم: اول ماكان يتقاتلوا ويتقاسموا الارض والشجر قدو طمع بينهم الان بسبب القات كل من بيبسر نفسه

الشيخ: والبن كان نفس الشي

سالم بضبح بيدهف يده في الهواء: والله ماكان هكذا قدهم الا بيتقاتلوا رصاص واصل بيتطاير على الساقيه والماء ومقسمين الشجر والارض... اول كان كلهم يشتغلوا في الارض ويقطفو البن على حبه حبه ... ذلحين انا عندي لك رأي عمر يمسك بدلي

الشيخ: عمر معه جامعه مش فاضي للهدار حق المزارعين .. ومااقبلش حد غيرك يمسكها

سالم: انا ماقدرت الصدق وادخل في مقاتله معهم

الشيخ: محد فاهم العمل غيرك صورتك تشتي تجنني الليله

سالم: لاحول ولاقوة الا بالله

الشيخ: سير وشل سلاحك وراسي لك

سالم: ماشاقاتل حد انا يكفي العمل اللي قد فعلناه ظلمنا نفسنا بيدنا

الشيخ: ماتقصد

سالم: ياشيخ صدقني رجع لكل واحد ارضه احسن مايرجع بينهم قتل وثار .. اذا فعلوا هكذا على ورقتين قات وساقيه كيف بعدا عيقع بعيالك

الشيخ مسك دقنته وبنظره: اعتبر هذا تهديد منك ! قدك ناوي تحرضهم عليا

سالم ضبح: انا مانا داري مالك اليوم ماعد رضيت تفهمني

الشيخ: هي كلمتين شل سلاحك وتصرف والا عيقع خبر ثاني .. وبصوت مرتفع وصياح انت مجنووووون بعد تعبي هذا كله افلتها لهم

@rewayatyamania المصدر الأول للروايات

سالم ساكت وجالس داخل نفسه مصمم على رأيه الارض مش حق الشيخ حق المزارعين واهل القريه.. حاسس نفسه جبان وكاره نفسه لاول مره ان خوفه وتردده خلاه يخسر بنته وسكوته على ظلم الشيخ لاهل القريه.

الشيخ: ايوه هكذا اسكت وافعل الصح يلا سير تصرف قلت لك وراسي لك ماعد تشتي.

سالم ضرب ع ركبه الثنتين بيده وضبح وقام: خاطرك ياشيخ.

الشيخ: الله معك.

سالم خرج من عنده وبيشوف العمال في الحوش بيعمروا الدور الخامس وملحق في الحوش والسيارات ال3.. فتح الباب وخرج وشاف اهل القريه بلبسهم البالي ومسايبتهم للماء رغم قد بعض بقيه القرى وصلها الماء والكهرباء والشيخ بيلاحق الزلط حق اهل القريه لاجيبه وتجارة عياله... والرجال اللي متحمل ابنه فوق ظهره يسعفه لابعد مستوصف مش مؤهل ولافيه دكتور مختص !

حس بقهر وانه اخس من الشيخ اللي ساعده ووصل للظلم هذا كله..

@rewayatyamania المصدر الأول للروايات

في المدينه..
زهور خرجت مسكت بلقيس: يو على أشياء تجنن روعه روعه

بلقيس مسكتها: اشتي ابسر

زهور: لا تأخرنا لاتنسي عنخطى مابش زلط حق مواصلات الان مابلا لبكره للدوام والجامعه.

بلقيس: تمام مشين.
.
.

في المعرض..
أنس كمل يكلم المشرف وبيضحك بيمشي وقف في باب المعرض وبيتفرج الناس سايرين راجعين ويتخيل نفسه فين كان في قريه قدامه ارض وزراعه وشويه غنم يرعاهن.. حس انه فعل الصح لما قرر يدرس ويكمل واهم شي انه عرف واحده وحبها بس فين هي الآن وايش بتفعل جالس يكلم نفسه وهي كانت مسافه امتار جنبه مش منتبه لها
.
.

وصلين باب السكن..

تأخرتين عن الموعد.. بلقيس خايفه لاتنطرد الشارع بعد ماقالت لها زهور انها مره تأخرت وراحت بيت عمها شافتهم بيسألوهن بكيت

زهور حاولت تدي عذر: المسكينه ضيعت زلطها جلسنا ندورها وتاخرنا ها كيف قد بتبكي ترحم الله

بلقيس شافتها باستغراب وكانها مكذبتها

صدقهن ودخلين... وصلين لباب السكن وبتضحك زهور على بلقيس

وبلقيس ضحككت ع الموقف وبكاها .. جلسين يضحكين

استقبلتهن المتنمره وهي واقفه ماسكه خصرها بيد: بتضحككك يعني بالعاني.. الآن تدي بدله

بلقيس: ايش؟

المتنمره رجمت لاوشها البلوزه: قلعتي زرارها ماانتي والفه تغسلي الا جلابيات وزنين بس صح

بلقيس : والله ماعسيته غسلتهن وناولتش

زهور مسكتها من يدها: عادش عتبرري لها امشي خليها تسير تدوره وتخيطه كانت عتغسله هي

بلقيس خايفه

المتنمره بصياح: انتي مالش دخل

زهور رجعت بلقيس وراها: الا لي دخل وماعتفعلي اسكه؟

المتنمره دهفتها ع جنب: شغلي معها هي الحساده مابش معها منه تقلع حقي الان ادي بدله

بلقيس ساكته ومنتظره زهور تدافع عنها

زهور حبت تستقضي لنفسها هزرتها: مره ثانيه اعرفي كيف تتكلمي مع الناس

المتنمره مسكت يدها: تشتي ذلحين اوريش كيف تتكلمي معي وتعرفي من انا !!

https://tttttt.me/+Ecxq_OzMYh40M2E0

📚 @rewayatyamania 🇾🇪