روايات يمنية📚🇾🇪

رواية الثروة المنسية للكاتبة: عبير الكبسي

.

البــارت 7 ○

الثــروة الـمنسيـة 🍀

👌🏻👇🏻 😍
📚 @rewayatyamania 🇾🇪

ارزاق شافت سياره مدير المدرسه واقفه جنب المدرسه: هنيت لبنات المدير اكيد عايشات احلى عيشه معهم سياره وابوهن يعلمهن ومعه زلط خيرات وابي بيتعب ومابش معه شي.

شمس: يخ مانشتيش قرايه ضبح قالين البنات ان كنز مابتلعب معهن ولا بتخرج الصبح انها بتسير المدرسه ضبح يابنت وبعدا صعب

ارزاق: يا هبلا المتعلم عيعيشش في المدينه لانرعى غنم ولا نحمل ماء ونحطب.. عنعيش عيشه غير

شمس: انا اشتي العب مااشتيش لا اتزوج ولاشي.

ارزاق: وانا ماشتي راشيتهم وامي صيحت.. وبكيت جلست تبكي...

شمس شافت رجال داعت التيس ... ومحد لفت .. جلسين يضحكين

@rewayatyamania المصدر الأول للروايات

وصل الظهر يتغدا..

انس جلس منزل راسه

ابوه: مفتهن ! اللي فعلته فيني اخر عمري نزلت راسي قبال الرجال اتبهذل بسببك بعد ما تمنيتك ؟؟؟

أنس: يا اباه جعل لي اموت ذلحين لاقمت من بقعتي والله انه هو اللي خرج الباكت وانه كذاب هو وخبرته.... بدأ يتشنج ويعصب وهو بيبكي... هانوني وبهذلوني وانا والله مااسكت لهم قلت لهم لو انت رجال انت وياه سير قبال ابوك اشربها وقاموا ضاربوا وساروا سبقوا بالشكاوي لكم

ابوه اقتهررر انه ظلم ابنه وعرف انه تبلى عليه عشان يشل اللي يشتيه... وصلوا دقو الباب بقوووه

مرته نكزززت: يا ساترررر من هذا عيكسر الباب فز ياولد افتح

انس فتح

2 عسكر: اين ابوك

سليم قام وعاد دموعه قهر ع ابنه في عيونه: خير مالك

العسكري: اخطى معنا

سليم: اين..

مسكوه: عتدرا هانك

سليم التفت وبيكلمه ويرفع صوته: ادخل ولاتخرج من البيت الا لما اروح ولاتسير مدرسه ولابقعه

سليم بيلحقه: مافعلت يا اباه !

سليم: ادخل وقفل

امه واقفه وبدات صياح: يوووو مالهم مافعل ابوووك يا ولد

انس دخل وضبح جالس بياكل نفسه ويشك الشيخ السبب او لا

@rewayatyamania المصدر الأول للروايات

بيت الشيخ خالد..

كنز وصلت بدرجاتها لاعند ابوها: اباه ابسر جيت الاولى كل درجاتي 100

ابوها مش فاهم شي: يعني ايش؟

كنز: يعني انا اشطر واحده

خالتها مرة ابوها: يلا معش سنه وتجلسي في البيت.. ماعد بش بنات عندنا يدرسين ويخرجين وهن عزبات

الشيخ خالد: ليش

مرته: تشتي الخلق يتكلموا عليك بناتك سايرات جيات قبال الخلق... يدرسوا الرجال بدل مانسوانك مش قادرات يربنهم امس ابسر عمر بيشقور في الحوش ويرجع متأخر وتخازين.. من عيمسك مالك واراضيك غير عيالك

الشيخ خالد اقتنع بكلامها: سواا مابش عندنا بنات يدرسين

كنز: يا اباه ابسر مااحلى استاذتنا متعلمه وماشاءالله عليها تعجبني قوي حين هي متعلمه

مرته غارت: قومي سيري دوري مهره قالت متعلمه هذك فالته مابش معها اهل

الشيخ خالد لفت لها: كسرررتي راسي ياعجوز قومي قامت قيامتكن نسوان..

كنز: اباه عتخليني ادرس؟

الشيخ: معش لصف سادس وتجلسي في البيت

كنز حنقت وحقدت ع خالتها سارت الغرفه

الشيخ خالد شل من زوجته الثالثه طاسه المرق شافها مبتسمه له , وبيفكر في كلام كنز ع الاستاذه

@rewayatyamania المصدر الأول للروايات

بيت سالم..

بلقيس جالسه بتقلب الكتب حق كنز وتكتب الحروف في دفتر قديم من دفاتر كنز

امها: مابتفعلي يابنت

بلقيس: جالسه اقري نفسي

امها: ماتفعلي بالقرايه ! قومي جي اعلمش كيف تخيطي قراقيش للنيني

بلقيس بضبح: مااشتيش

امها: ارجمي القراطيس هذه وقومي افعلي لش مهره شاولد وبعدا عتوبهي لاخوش انتي

بلقيس بضبح: ناهي اتم الواجب اللي ادت لي كنز واجي

امها بمسخره: ادت لش واجب قدها ساع ابوها بتفعل نفسها هيبه

بلقيس: والله ان كنز طيبه خبيرتي (صاحبتي)

امها: قومي افرشي لجدتش بقعتها ترقد

بلقيس: قد بطنش كبيره يمه

امها: صلِ ع النبي لاتمرعيني ادعي لي اقوم بالسلامه

جدتها: اين ابوش يا بلقيس؟

بلقيس: مدري

جدتها: قلي له امش ميتتني جوع قدنا شاطفح

ام بلقيس: عاد انتي طفحتي فوق القرم ( اقراص خبز تخبز في تنور حطب) واللبن ياحجه... اللهم صبر وقوه بس.. ادي لها تاكل

بلقيس لفت دفترها وقامت تقرب لجدتها.

جدتها: قلي لها هولا بردين تقوم تخبز لي دافيات احقاوي بيوجعني اشتي ادفا

ام بلقيس: العجوز هذه خرفت والا مه.. ادي وانا اقلش مافعل ... شلت القرم ودفتهن قلبتهن فوق موقد النار

بلقيس: ادي لها

امها: خليها تراعي ياسعم خبزناهن

بلقيس ضحكت هي وامها: شافت امها بتضحك فرحت ، اشتي اسالش يا اماه كم عمرش؟

امها: مدري يابنتي لكن اظن 22 سنه

بلقيس: فرق بيننا.. وبدأت تحسب بيدها الثنتين
جدتها قاطعتهن اين العشاء الله لاوفقكن.

بلقيس: 15 سنه اكبر مني

امها بتعجب: مادراش اننا خلفتش وعمري15

بلقيس: حسبت

امها: كيف لوما ومابتقريش

بلقيس: قد حفظت الارقام

امها ناولتها: سيري ناولي جدتش تتعشى
وانا اجهز لابوش العشاء

بلقيس ناولت جدتها

https://tttttt.me/+Ecxq_OzMYh40M2E0

📚 @rewayatyamania 🇾🇪