.

البــارت 21 ○


الثــروة الـمنسيـة 🍀

👌🏻👇🏻 😍
📚 @rewayatyamania  🇾🇪


بلقيس رجمت القلم والدفتر ودخلت غرفة امها

سالم دخل بعدها وبيصيح: مالش تراجمي هكذا يابنت؟

بلقيس بكيت: لمه عتتزوج ! مااشتيش

سالم: ليش،؟

بلقيس: لانهن بيوقعين كلبات قالت لي كنز بيجننها خالاتها

سالم ضحك: لاتصدقيش كنز  في كل شي.. عتجي وتوبه لش وتوقع ساع امش وتعاون جدتش امد انتي تدرسي

بلقيس فرحت: صدق؟

سالم: اكيد

جدتها: عتخرجي يابنت تقربي عشاء او اجي اموتش.

سالم ضحك: هيا جاوبي.

@rewayatyamania المصدر الأول للروايات

في المدينه..

أنس سار لصاحب الكافتيريا: ششتغل معك من الساعة2 للساعة6 المغرب بس

صاحب الكافتيريا: مابش يا تشتغل من مره او الله يفتح عليك

أنس: خلاص خاطرك .. مشي في الشارع وبيدخل من محل لمحل ويسأل من يشتي عمل

تعب وجلس ع الرصيف وهو لابس شنطة المدرسه.. مشي من جنبه واحد من الفصل: مالك جلست او تمت البطاريه

أنس ضحك وقف ومشي معه: بين ادور عمل مابش.

صاحبه  بصدمه: عمل ؟؟ منك صدق او تمزح

أنس: مش مزح

صاحبه: عادك صغير من عيوظفك.

أنس أشر بفمه مدري

صاحبه: لكن والله صدق به واحد مثلك بيشتغل جنبنا في الفرن حق الخبز

أنس: مابيشتغل؟

صاحبه: يسير مع السياره اللي توزع الخبز ينزلهن للبقالات.

أنس سكت وجالس بيفكر كيف يفعل بعد ماتغير ابن عمه عليه وبيطالبه بمبلغ ايجار معهم
شاف سوبر ماركت كبير دخل لاعند المحاسب .. انس: ياعم تشتوا موظف

المحاسب: قل لابوك يخرج يدور لنفسه يلا يابطل خلينا نبسر عملنا

أنس بضبح: ليش بتحاكيني هكذا سعم ان انا جاهل هو لي العمل مش لابي

المحاسب ضحك: لك انت ! هيا جي بقعتي بتعرف كيف تفعل؟

أنس: ماقلت اجي بقعتك .. بين ادور عمل ثاني ارتب اوزع..

المحاسب: مابش عمل

أنس ضبح وخرج ورجع للبيت عند ابن عمه جلس يذاكر ويكتب الواجبات

ابن عمه رجع بسندوتشات جلس ياكل وهو بيقرا الجرايد تم ياكل وخرج

أنس بيقرا الجرايد وفي الزاويه كان وظائف شاغره.. كلهم بيطالبوا متعلمين متخرجين بشهايد وتخصصات متعدده

أنس عطش قام يشرب ماء شاف الدبه فاضيه خرج للبقاله قالوا له المحطه ماقد وزعت لنا ماء رجع راح للمحطه وشاف واحد بنفس عمره بيعبي الماء في الدبيب.. شاف اللي بيحاسب دخل لاعنده: ياعم

المحاسب: الله يدي لك الله كريم

أنس بضبح: مابين اشحت اسمع اول .. تشتي توظف حد !

المحاسب شافه: مثل من ؟ انت !!

أنس شاف للولد اللي بيشتغل هذك من اول معه دبب خيرات يعبيهن قلت لو اتوظف واحد يعبي وواحد يسايب للي مراعيين الدبيب.

المحاسب: والله فكره لكن ما معك الا 500 لليوم كله

أنس فرح حسها كثير عن العمل الاول: 500 قليل ليوم مارأيك 250 ل6 ساعات اجي بعد المدرسه واروح مغرب

المحاسب: تمام

أنس: خلاص بكره انا اجي.. ورجع
فكر يخلي اللي بيستلمها من المحطه للاكل والشرب
وهكذا عتكفيه للايجار وللاكل والشرب.

@rewayatyamania المصدر الأول للروايات

في القريه..

سليم واقف جنب اللي بيجهزوا الخيمه جنب بيته لعرس بنته


وداخل البيت..

ام أنس: قالوا قد به واحده بتدل ملابس ياسلام منه كله لاعد نطلع للمدينه ولاشي .. هيا نخطى لاعندها نبسر مامعها

بنتها: مع ماعد اشتي شي ابي مابش معه

امها بفرحه: مالهم شي صورتهم مرتاحين يابنت وقع مهرش حالي 300 الف ماوقع لمرة ابن الشيخ الا 100 بس

بنتها فرحت: صدق ؟ يعني اكتسي

امها: ابوش قال يشلوا منها يذهبو هم والباقي اسير اشل لش كسوه

بنتها: تمام شاخطى ذلحين معش.. سارت تلبس
.
.

بيت الشيخ..

الشيخ: من قرص الخبز هولا ؟

مرته الثالثه: هي مرة ابنك ولاتعرف تفعل شي حمي زلطك وحرقة قلب ابنك

زوجته الثانيه صرعتها: بطلي كذب هو انتي .. مابحد هي مرة ايمن

الشيخ بضبح: بتكذبي علياااا !!!

زوجته الثالثه بخوووف: ماقد تمت شهر وبتسير بيت اهلها ابنك ماعرف كيف يضبطها في البيت انا مااشتي افعل مشاكل واحارش بس مااشتيش حد يتحاكا عليك وعلى ابنك وانت قدك المهم هنا والكل في الكل

الشيخ نسي الكذبه: صدق ؟ وين جااا ايمن ادعيه.

زوجته الثانيه بصوت واطي لها: حسبش الله يا ظالمه

زوجته الثالثه شافتها بنظرات ضبح: وبه شي اشتي اقلك عليه.

عمر مابحدهو من الصبح مايرجع الا الليل انا مفتجعه عليه بين احسب عيالك عيالي ياشيخ بين اهتم بهم اكثر من امهاتهم حسهن الا في التفاريط ونسوان القريه

الشيخ لفت لأم عمر: بعيني لكن حاضر ماعد فايدتكن ! وقدي هي ماسكه كل شي.

ايمن وصل: مالكم خير

الشيخ: وين مرتك

ايمن: بيتهم  ليش؟

الشيخ بدأ يبهذله وايمن يشوف مرة ابوه تزيد تعلمه وتشجع ابوه عليه حس بحقددد عليها..

بعد ماسمع الكلام الجارح وتهديد الاب قرر ينتقم من مرة ابوه ويزوج ابوه بواحده تقهرها.

نفس الوقت امره ابوه يخرج يدي مرته.. وصل باب بيتهم ودق الباب



📚 @rewayatyamania  🇾🇪

.

البــارت 22 ○


الثــروة الـمنسيـة 🍀

👌🏻👇🏻 😍
📚 @rewayatyamania  🇾🇪


الشيخ بدأ يبهذله وايمن يشوف مرة ابوه تزيد تعلمه وتشجع ابوه عليه حس بحقددد عليها..

بعد ماسمع الكلام الجارح وتهديد الاب قرر ينتقم من مرة ابوه ويزوج ابوه بواحده تقهرها.

نفس الوقت امره ابوه يخرج يدي مرته.. وصل باب بيتهم ودق الباب

جاوبت زوجة اخو سميه من ورا الباب: هي في المستوصف شلها ابي

ايمن: ليش مالها ؟

زوجه اخوها بأسلوب رزع: مدري جت تاعبه ميته حالتها حاله كأنها كانت في قبر مش مزوجه بأبن الشيخ حقنا.

وغلقت الباب..

ايمن طلع السياره ومشي للمستوصف.

شاف ابوها جالس في كرسي سأله وقال له اللي حصل

دخل وهي في غرفه وفي يدها المغذيه: هيا قومي اخطي معي

سميه شافته: اين

ايمن: البيت

سميه: قالوا اراعي تتم هذه واروح

ايمن: انا اشتي تتميها في البيت

سميه مستغربه ماله

ايمن سحب المغذيه في يده ومشي

ابوها: الى اين

ايمن: اخطى ياعم اوصلك وارجع البيت انا وهي

ابوها: تمام لكن شاقلك كلمه.. البنت امانه في رقبتك يحصل في بنتي شي الله لا ابراك ولاسامحك

ايمن: مالك ياعم مابه داعي لهذا الكلام

ابوها: مدري ليش مش انا مرتاح مارضت تقلي بكلمه رغم بين ابسر بعيني انها مريضه وغاثيه

ايمن حس بذنب: مابش شي.


طلعوا السياره وصل ابوها وشل الشنطه حق ثيابها ورجع بيتهم وقفوا

سمية: ادخل بهذه قبالهم !

ايمن: مارجعتش بها الا امد يرحموش من العمل لانش تاعبه.. ابي قال ارجعش

سميه سكتت وفرحت من كلامه: تمام.

ايمن: هيا انزلي شاف الكيس اللي اشتراه بعد ماوصاه الدكتور تهتم باكلها سوا... فتح شنطتها طرح الكيس في ثيابها ونزل بالشنطه

دخلت وكلهم مجتمعين فوق العشاء

كنز قامت وزاعله: يوووو مالش يا سميه ؟

زوجته الثالثه: مسرع او قد بتوحمي

ايمن شافها بضبح وقال لابوه: اباه رجاء قل لها تسكت وماتدخل في شي مايعنيها

ابوه: ماقالت !! مافيها ؟ بتغير

ايمن عصب من رد ابوه وطلع قبل سميه بعد ما استفزته مرة ابوه

سميه: ماتشتوا شي !

ام ايمن: صدقت اللي قالت فيكن المتعلمات حق دلع مش زواجه.

الزوجه الثانيه رحمتها: اجلسي تعشي

سميه: الحمدلله شابعه والابره في يدي

الزوجة الثانيه: كان اطلعي يابنتي افتهني

@rewayatyamania المصدر الأول للروايات

في الغرفه..
دخلت سميه وهو جالس فاتح شنطتها بيخرج الكيس اشتغربت

ايمن انحرج: ما فتحت الشنطه الا امد بس اخرج لش هولا طرحتهن في السياره امد لحد يبسرهن منهم.

سميه استغربت طيبته معها: ناهي سهل افتحها قد بين اشل ثيابك من دولابك

ايمن: هو صدق... راح جلس وخرج كتابه ودفتر وبيذاكر

سميه جلست وماسكه المغذيه بيدها الثانيه تعبت وهي رافعه لها: تقدر تعلقها

ايمن شافها قام مسك المغذيه دور لقي في بقعته في الجدر مسمار علق المغذيه في طرف المسمار جنبها.

سميه رفعت عينها بعينه: شكرا

ايمن جلس مطنن لها دقيقه ساكت بس بيتأمل تفاصيل ملامحها كأنه كل يوم بيكتشف فيها شي ويحفظ شكلها اكثر واكثر

سميه منتظره يتكلم انحرجت من حدة نظراته نزلت عيونها وبتقرش اللصقه بدون ماتنتبه من ربشة نظراته لها

ايمن: ليش عتبعديها راعي

سميه: ها.. سحبت يدها .. شافته ، اصلا ماانتبهت

ايمن مشي من جنبها ناولها الكيس: هذا شليت لش بسكوت عصير وحليب لاجوعتي كلي

سميه استغرررربت وفررحت كانت ماتوصل لها هذه الجعاله الا لو حد من اهلها جاء من المدينه وادالهم.

شكرا لك.

ايمن مارد انحرج وفرح انه عجبها مشي سكته

سميه ليش هكذا لما واحد يشكره يزنط ويدعمم ولما ادعمم يرجع لي يخ مادريت كيف افعل بالولد هذا

ايمن جالس بيفكر غريبه والله ان انا اول يوم ادرا باسمها.. نسيت لما عقدوا لنا

سميه بتتفرج لها خلصت: يا .. سكتت ماعرفت كيف تدعيه محرجه تنطق اسمه.. اي.. من قالتها  بهدوءءء وصوت خفيييييف

ايمن لفت لها بسرعه حس بشي عجيب لما نطقت اسمه وكأنه اول مره يسمعه  قام مسرع لاعندها مبتسم بدون شعور

سميه انحرجت من ابتسامته وضحككت مستغربه وقفته متصنم قدامها ومبتسسسم

ايمن :ليش بتضحكي

سميه: انت ضحكتني حين ضحكت الاول.. لفتت راسها ع جنب من الخجل

ايمن شافها وانحرج من الموقف وانها ضحكت عليه: ذلحين كيف يفعلوا؟

سميه: مدري

ايمن: سهل لو خليناها للصبح ونسير نبعدها

سميه: تمام

ايمن: ماتعلمتي كيف يبعدوا الابر !

سميه: مادرست طب انا لصف ثالث ثانوي

ايمن: هنيت لش تميتي

سميه: انت ما تميت؟

ايمن جلس بعيد شويه منها في طرف الوساده: انا درست لصف ثاني ثانوي ووقفت 3 سنوات وذلحين معي الشهاده.

سميه هزت راسها: اها

ايمن: صعب قوووي ياهمتاه ابي بيصيح

سميه: انا احب الدراسه قوي

ايمن: انتي شاطره؟

سميه خزيت وابتسمت وسكتت

ايمن شافها جالسه بالبالطو حب يكلمها باسلوب مايبين لها انه بدا يعجب بها بهنجمه: ...



📚 @rewayatyamania  🇾🇪

.

البــارت 23 ○


الثــروة الـمنسيـة 🍀

👌🏻👇🏻 😍
📚 @rewayatyamania  🇾🇪


ايمن شافها جالسه بالبالطو حب يكلمها باسلوب مايبين لها انه بدا يعجب بها بهنجمه: وليش بالبالطو ليش مابعدتيه؟؟ او عتخرجي بيتكم.. ابي بهذلني بسببش

سميه شافت انه بدأ يتغير معها ماحبت تزعله وبعد كلامها مع مرة اخوها ونصايحها لها انها تبدأ تهتم به عشان يعجب بها بخوف جاوبت سريع:  مع مع ماشخرجش شابعده بس الابره في يدي وبدات توجعني قوي نبعدها وبس.. بدأت تفك اللصقه من الأطراف وشافت نص الابره داخل يدها خافت وقلبت وشها غمضت عينها

ايمن شافها قام لجنبها: مالش

سميه: ابسر ها يمكن الابره حنبت داخل

ايمن قرب مسك يدها

سميه حست بإحراج سحبت يدها شويه

ايمن مسك يدها اكثر: لحظه لاتخافي.. سحبها بسرعه.. خرج دم مسك يدها وضغط مكان الابره يوقف الدم

سميه بتحاول تسحب يدها بس ماقدرت كان ماسكها

طلعت امه: يا ايمن.. ايمن

@rewayatyamania المصدر الأول للروايات

ايمن خاف بعد يدها من يده وقام بسرعه وبصوت واطي: ارقدي غمضي عينش

سميه بتعجب: ليش

ايمن رجم البطانيه فوق وشها وطفى الفانوس  ورقد

امه دخلت شافتهم نوم: ياي رقده من ذلحين جعلش مرقدة اهل الكهف قومي العمل مراعي لش حق يومين بيتكم

ايمن عارف انه لو هنجم امه بتخاف منه وتخرج: مااااالكم ماتخلوا واحد يرقددد.. ماهيش عيشه هذه والله لافلت لكم البيت واخرج ماتبسروا لي صوره

امه قربت لاجنبه: وهذه مالها ماتت !

ايمن: مريضه سحبتها من المستوصف ابوها قال لو وقع بها شي انا غريمه.. اقتلوها امد يحبسوني وتفتهني يمه انا داري ماعتفتهني الا لو ما ابنش يموت ويورثين ابي خالاتي

امه صاحت: يووووو  مالك يا ابني ماحصلك مافعلت

ايمن: البنت قال الدكتور كانت عتموت مجاعه عندنا اسبوع مااكلتوها ولاشربتوها ناقصه حديد وفيتامينات فيها ضعف

امه: يووو خلاص ولاعليك الا اوبه لها ترجع صحتها بعدا ترجع للعمل انا مافيني للشقا قدني تاعبه وكبيره ع العمل.

ايمن: تمام ذلحين اشتي ارقد

امه: يله تصبح ع خير

سميه تشتي تتنفس تحت البطانيه سمعت الباب اتقفل وفتحت البطانيه ظلام

ايمن بصوت واطي: قد خرجت؟

سميه: مدري

ايمن ولع الفانوس

سميه نفسها تسأله ليش مهتم بها كيف تغير: هو صدق ابي قال هكذا؟

ايمن: انتي على ذمتي يعني لو وقع بش شي انا مسؤول.

سميه فرحت من كلامه حست فيه طيبه شعور غريب ماعرفت تفسره ناحيته معقول بدأت تحبه ! معقول من يوم وموقف تغيرت نظرتها له والكره اللي كرهته طول الاسبوع اللي كانت معه!!

فعلا الأنثى كائن مخلوق من احاسيس تفرحها المعامله الحلوه وتزهرها..

سميه: كتفك شكل( تشافى) ؟؟

ايمن متجمل من سؤالها: ايوه الحمدلله قده اشكل
.
.

نازل عند الشيخ..

الشيخ: اجمع اهل القريه واعزمهم الخميس نفعل لايمن عرس سار تزوج وعقد لنفسه ماعيقولوا علينا

سالم: ياسلام مارأيك ياشيخ اتعرس معه قد حاكيت خالي يدي لي بنته

الشيخ: ضخم

سالم: وزد ابن مدير المدرسه عيتزوج الخميس نفعل عرس جماعي

الشيخ: والتكاليف عليا ولايهمكم شي

سالم: تسلم الله يبارك فيك.

الشيخ: عمر اطلع ادعي اخوك
.
.

بيت سليم..

رجعت مرته وبنته

ارزاق كانت فارحه بكسوتها والملابس الجديده والعطور والمكياج والاكسسوارات اكثر من فرحتها بالزواج نفسه.. ((كان حلم اي بنت في القريه تتزوج ولو مبكر ولو انها ماتعرف ايش الزواج والمسؤوليه فقط تفرح بزواجها عشان تمتلك الحريه في وضع احمر الشفاه ولبس الملابس المطرزه والسماح لها بالحضور في الاعراس لانه البنت العازبه لاتحضر المناسبات الكبيره..))

@rewayatyamania المصدر الأول للروايات

في المدينه..

أنس بيذاكر حاول يلحق كل مافاته رغم دخوله المدرسه بعد ما فاتته دروس كثيره.. كان متشجع ومتحمس لانه بيسمع مدح من المعلمين في مستواه.. ابدا ماكانت ظروفه وفراقه عن اهله وعمله في سن صغير عائق انه يثابر ويجتهد كان كل حلمه وتفكيره انه يكون مثل ابناء المدينه انه يسكن فيها مع اهله ويمتلك سياره وعيشه حديثه تختلف عن عيشة اهله

سمع ابن عمه واصحابه بيتكلموا عن بعض الاحياء القديمه والقرى الذي تواجد وسكن فيها يهود اليمن قديما يوجد بها كنز مدفون تحت البيوت وفي بعض الاراضي القديمه..

أنس: بيقولوا ان عندنا في القريه بير ملانه حنشان وان فيه كنز

ابن عمه: لاتصدق عندنا في القريه كم ياخرطات وانه من قرب منه قتلوه

أنس متحمس: ايوه صدق قد ماتت عجوزه وواحد

ابن عمه: العجوزه أجلها والولد يمكن فلت وغرق اكيد عيموت

اصحابه قاطعوه وواصلوا تأكيد الخرافات هذه ويتفلسفوا من القصص القديمه... كان وضعهم المادي البسيط يخليهم يحلموا بالكنوز ويتأثروا بالقصص والافلام اللي فيها كنوز.

https://tttttt.me/+Ecxq_OzMYh40M2E0



📚 @rewayatyamania  🇾🇪

.

البــارت 24 ○


الثــروة الـمنسيـة 🍀

👌🏻👇🏻 😍
📚 @rewayatyamania  🇾🇪


بيت سليم..

في غرفتهن خواتها كلهن متجمعات المزوجات بعيالهن وهي

شمس بتتفرج كسوتها وملابسها: يارب زوجني وانا يقع لي من هذا كله

اختها الكبيره: يامجنونه لاتستعجلي ع روحش سنه والا سنتين وزوجوش وتندمي

شمس: كلكن معكن ذهب وادوان حاليات وانا مع

اختها بتهز ابنها اللي يبكي: هيا شليه سكتيه تعلمي للبزا من ذلحين.

شمس شلته وبتلاعبه دخلته عند الغنم والدجاج
.
.

بيت سالم..

الجده في غرفه امها لفلفت ثياب ام بلقيس وكل ادواتها وطرحتهن في شواله

بلقيس: اين عتجي بهن حق امي

جدتها: ارجمهن امد ابوش عيتزوج بنت اخي

بلقيس دمعت: لاترجميهن اديهن لي حق امي

جدتها صيحت فوقها: خرجيهن لوما نتصدق بهن

بلقيس: قوا خليهن امي عتغثى

جدتها بصياح: زكاش عقلش قد ماتت قلك تغثى اتصدقي اجر لامش

بلقيس: اجر؟

جدتها: ايوه تدخل الجنه

بلقيس فرحت: صدق؟ تمام

خرجت للصاله خرجت منهن اكثر ثياب يعجبها فوق امها خبتهن لها في شنطه ثيابها وخرجت بقية الثيابات.

@rewayatyamania المصدر الأول للروايات

يوم الخميس...

انس بعد ما سأل ابن عمه اين يشتري زنه جديده بسعر مناسب له.. اشترى له ولابوه ورجع صباح يوم الخميس يحضر عرس اخته


بعد العصر

كل عروسه تجهزت وبانتظار يشلوها بيت عريسها.. الا سميه كانت مثل العروس اليتيمه اللي ماجربت تلبس وتتزين وتفرح مثل كل بنت كانت مستغربه ان ايمن عيتعرس يعني ايش !
يعني ماعيطلقها ! معقول هي عروسته مش مصدقه كأن شي غريب بيحصل


الزوجه الثانيه طلعت مع اخت عمر المزوجه بس عايشه في المدينه دخلت غرفه سميه في يدها فستان ابيض

سميه وقفت

اخت عمر ( رحاب): هذه مرة ايمن؟

سميه مستغربه

زوجه الشيخ: ايوه بنتي متزوجه في المدينه جت تتعرس

رحاب سلمت عليها:  كيف انتي؟؟

سميه بتسلم عليها: الحمدلله

زوجه الشيخ: هيا قومي تجهزي وتلبسش الفستان وتتوجش ( تلبسها التاج وتسرحها )

سميه: ليش؟

رحاب: كيف ليش قالوا لي ان انتي مافعلتي عرس اديت فستان استأجرت لش ونلبسش

سميه فرحت: صددق؟

زوجة الشيخ ابتسمت انها فرحت ومسكت الفستان ورفعته: كيف هو حالي؟

سميه ابتسمت بفرحه وخزا وغطت وشها: ايوه حالي

رحاب: هيا غسلي شعرش وجي اسبره لش

سميه: تمام

زوجة الشيخ: وبعدا عنطلع لش الكسوه خليناها تكسيش

رحاب: حاكاني ايمن ان انتي مااكتسيتي.. مراعين حد من الجهال يطلعها

سميه حجفت زوجة الشيخ: انتي اطيب واحده في هذا البيت.. ومن حين شفتش حسيتش بدل امي الله يرحمها.. ودمعت....

زوجه الشيخ زعلت عليها: امش ميته؟؟ شافتها بكيت الله يرحمها ولاتغثي ولاشي انا امش وام زوجش طيبه بس الله يهديها عتحبش معها معها هي تحنج ايمن قوي.

رحاب: هيا مابش وقت عيجي زوجش بعد المغرب
.
.

جنب بيت سليم خيمه النسوان ..

كل النسوان فيها لابسات وفوقهن اللثم والستاره..( طبق قوانين قريتهم )

كانت الخيمه مفرشه بطربال ازرق ( نوع من انواع الخيم ) ومغطايه كان يحرسها أنس

بلقيس فلتت بيتهم وراحت تشوف العروسه حق بيت سليم

كنز لقيتها وبتلعب جنب الخيمه

بلقيس زعلانه جالسه تلعب بالحجار

أنس: يله يابنات من هنا

كنز: عيزنط حين هو عرس اخته

بلقيس: لو كان عرس ابوه انه غاثي

أنس بيقلد دور الرجال بما انه بيدلعوه انه الاخ الكبير رغم انه الفرق بينه وبينهن سنتين.

كنز: واحنا معنا حريوه طز فيه خلي حريوتهم لهم قد ابسرناها جي نسير نبسر مرة اخي

بلقيس راحت معها

طلعين عند العروسه بعد مالبست فستانها وبتمكيجها اخت زوجها وتصلح شعرها

بلقيس: عروستكم وقعت قمر احلى منهن كلهن

رحاب بهررت فوق كنز: ليش اين سرتين

بلقيس شافتهن

كنز: نبسر خالة بلقيس

رحاب: ابوش تزوج

بلقيس: ايوه

رحاب: جعله عمى امش ماقد تمت شهر

بلقيس: لاتدعيش ع ابي ادعي ع جدتي هي اللي زوجته.

ام ايمن طلعت: يله الجهال من هنا انزلين يله... النسوان نازل

رحاب: صدق جين؟

خالتها مرة ابوها: اكيد عرس ابن الشيخ ياويلهن مايجين.

سميه قامت تشوف نفسها في المرايه بعد ماتصلحت مسكت فمها من الصدمه عجبها كل شي شافت نفسها صدق عروسه زي ماتمنت.

@rewayatyamania المصدر الأول للروايات


الشيخ وزع لهم قات للي في الخيمه حق الرجال  انبسطو اهل القريه منه وبدأوا يستسلموا له .. بضبح وغرور وين سليم ماجاء

واحد من اهل القريه: عند نسبه اليوم عرس بنته

الشيخ هز راسه
.
.

وقت اذان المغرب..

بيت سالم

ام سالم مع بنت اخوها بعد ماوصلوها وساروا جلست تكلمها: اشتي توقعي مره وتخلفي له عيال.. ابني يرحم ماتهنى ولا يوم اشتي افرح بجهاله قبل مااموت

بلقيس بتتفرجها بحقد

العروسه منحرجه وبتتفرج بنت سالم ولعمتها

ام سالم: معش شهر ساع كل نسوان القريه ماتفعلي شي.. اخرجي والفي حطب وارجعي لوما يجي دولش للعمل... وبلقيس عتفعل كل شي




📚 @rewayatyamania  🇾🇪

.

البــارت 25 ○


الثــروة الـمنسيـة 🍀

👌🏻👇🏻 😍
📚 @rewayatyamania  🇾🇪


بلقيس بتتفرج جدتها بحقد ذكرت انها ادت لها كنز كتب صف ثاني راحت في الزوه بعد ماطردتها جدتها من الغرفه وخرجت فرشها للصاله جنب المطبخ.. جلست تقرا وتتهجا وتكتب.
.
.

بيت الشيخ..
وصل ايمن وكان حاسس انه عريس بس متخيل بيوصل لواحده بشرشفها ولثمتها ومغطيه شعرها اللي شافه يوم سرقه زي الحلم وهي بتظفره..


فتح الباب وشافها قدامه جالسه فوق المدكا ومنزله راسها مثل اول يوم شافها فيه

تفاجأ انبهر لدرجة انه شك ورجع من الباب خرج وقفل عليها تركها في خووف ! في تساؤل في لحظة خذلان (( ماله ماعجبته او يمكن غير رأيه !! قد بنقلهن مش ضروري)) يعلم الله ماله خرج بدون مايتكلم كان مبهرر يمكن قال لهم يزوجوه واحده غيري! !!))

نزل للدرج وسألهن وهن في الصاله خالاته وامه واخته: من اللي في المكان !

امه: مرتك ياسعم من؟ او ماعرفتها

الزوجه الثالثه: يووو ياسين عليك يا ايمن فجعتك قد بنقلهن نبسر لك واحده احلى

ايمن قاطعها وشاف امه: هذه سميه؟

رحاب وامها وامه ضحككين: ايوه هي ...

ماكملين كلامهن  مشي بسرعه عدى الدرجات هذك في ثواني ودخل لعندها بسرعه: مالش ساكته !

سميه تفاجأت به وقفت: ما كلمتني؟

ايمن بضحكه ملان وشه ويمشي لاعندها: ماعرفتش

سميه خزيت وفعلت نفس حركتها رجعت وشها ع جنب ومسكت فمها لما تضحك زي عادتها

ايمن هذه اللحظه عرفها هي بس بصوره مختلفه..

اليوم حس نفسه عريس لما ابوه سامحه وفعله عرس يعني الان قادر يعيش معها بدون تأنيب ضمير حتى انه حبها وهي حبته...

من قال ان الزواج بدون حب فاشل !

الحب بيخلق وبيوجد سواء قبل او بعد الزواج  المهم انه يستمر ، عمره ماكان الحب قبل الزواج مقياس مثالي لتوافقهم... العشره نفسها وجو الاهتمام والاحترام خلق الحب بينهم في اسبوع..

@rewayatyamania المصدر الأول للروايات

بيت عريس بنت سليم..

تفاجأت بالبيت اللي وصلت له كان البيت اللي قدامه سياره لما كانت ترعى الغنم هي واختها شمس ويتكلمين عليه بيت المدير حق المدرسه...

كانت فارحه وهي بتتفرج بيتهم
كان احسن من بيت ابوها ، منتظره تشوف كيف شكل العريس من كثر ماخوفتها اختها وجلست تتخيله لها بشع ومخيف وعصبي

دخل العريس لغرفتها منحرج  كشف عن وجهها  لها الطرحه وجلس


بعد صمت قليل بدأوا يتعرفوا ع بعض درست او لا ولصف كم وكم عمرها

بدأ يكلمها عن نفسه وشغله ودراسته .. تفاجأت انه متفوق في الثانويه بامتياز وانه بانتظار حصوله على منحه خارج البلاد

ارزاق: عتفلتني هنا وتسافر ؟

زوجها: لا ، تراعي لي هنا اتم اجراءات السفر واشلش معي

ارزاق كانت اسعد لحظه بحياتها انه الزوج المجهول قبل ماتزف له كان كحظ بالنسبه لها ابدا ماكانت توقعاتها لهذه الدرجه.. بدأت تفكر انها عتسافرر !! وبتحس بفرحه غير بدأ الحب بالنسبه لها من هذه اللحظه حبته كون الشخص اللي ارتبطت به مميز ونادر عن ازواج بنات القريه

كل واحد له تفسيره وطريقته في الحب وهذا الحب في زمن البساطه كان عفوي جدا...
.
.

بيت سالم..
جلست بنت خاله مع امه المتحكمه بكل اللحظات وكل مكان بالبيت والأشخاص..

وصل سالم شاف بنته بلقيس وامه في الصاله.. دخل لعروسته للغرفه يتعرف ع ملامح وجهها اللي مايعرفها رغم انها من اهله،  ويبدأ يعلمها ويمليها قوانينه وشروطه..

كانت بتفكر بينها وبين نفسها كيف طباع زوجها ، اكيد مايهمه شي ان مرته ماتت وما انتظر لها تتم ال40 يوم .. كيف بتعيش مع بنته اللي نظراته كره لها

وعمتها المتشرطه من لحظة وصولها في كل شي وفضولها وفلسفتها.

سالم وصل ومخزن ولما يخزن بتتغير طبيعته بيتكلم ببرود بنوع ما من العدم اهتمام..

جلس في بقعته ( فرش ومدكا ) شافها جالسه في مكانها: مبروك

زوجته: الله يبارك

سالم: غيري ثيابش واخرجي نتعشى ونسمر مع امي وبنتي.

زوجته كانت نوعا ما  لقنه (ماتسكت على شي): ياعيبتك كسرت نفسي لبسوني واستأجروا لي زنه وسبرتني الشارعه امد اعجبك حتى مابسرتني؟ كنت عتقل لهم انك عادك حزين على مرتك لا البسش

سالم استغرب من جرأتها وكتم غضبه: ..


https://tttttt.me/+Ecxq_OzMYh40M2E0



📚 @rewayatyamania  🇾🇪

.

البــارت 26 ○


الثــروة الـمنسيـة 🍀

👌🏻👇🏻 😍
📚 @rewayatyamania  🇾🇪


سالم استغرب من جرأتها وكتم غضبه: مش هي اول زواجه لش عشان اكسر نفسش والقصه مش هي فستان ومكياج امد اعجب بش... شاعجب بش لوما تعوضي بنتي على امها اللي ماتت وتوبهي لامي الكبيره في السن وتقدري تتعايشي معها مثل زوجتي الاولى رغم هرم امي ، وتخلفي لي الولد اللي نفسي فيه.. لما احسش قدرتي تهتمي بكل شي بيقلقني هذه الفتره شاعجب بش واحبش
اطرحي هولا في اذنش.. بنتي لاتغثيها وحاولي تكسبيها وامي لاترادديها واعرفي تعيشي احلى عيشه

(( وكأنه بعض الرجال يفكر انه تصدق على الأرمله او المطلقه لما تزوجها  وكأنه الوحيد الذي عانى ولازم تثبت نجاحها في الزواج عشان لايشمتوا فيها الناس بسبب طلاقها الاول مازال للاسف الى الان... رغم الاحداث اللي كانت في الروايه قبل عشرات السنين.. هي لها الحق كمان تعيش تتعوض وكأنها اول زواجه لها بما انها حياه وعشره.)))

سالم وقف وفتح الباب: مراعي لش خارج وقفل الباب

زوجته قامت تغير ملابسها وهي بتبكي على المهام اللي لقيتها من اول يوم بدأت تفكر كيف تثبت نجاحها حتى لو تلجأ لكيد النسوان واسحار المشعوذين حسب وعد امها لها انها ماتخلي حد يشمت فيها

@rewayatyamania المصدر الأول للروايات

مرت الايام وكان كل واحد يفرض حبه بطريقته...

ارزاق كسبت حب اهل زوجها وزاد شوقها وحبها لزوجها اللي ماعرفته الا ايام بس كان
كان عكس توقعاتها بعد ماتصورته باخس صوره..

كسبت اهله وحبهم لها لطيبتها ومراعاتها لهم وميزتها لخوات زوجها


سميه كانت مطابنه خالة زوجها وامه اكثر من طبانهن ببعضن البعض...

وبدأت بعض الاحداث المهمه..

بيت الشيخ..
الزوجه الثالثه  شافت العجين بعد ماعجنت سميه وراحت تدي الحطب من ورا البيت... دخلت بسرعه المطبخ فتحت لثمتها وقلعت شعر من راسها  وفعلت في العجين.. كانت بتشوفها الزوجه الثانيه من خارج المطبخ جنب طاسه العجين مستغربه مش دورها ايش دخلها!!

وصل الشيخ... دخل

اين الغداء؟

سميه دخلت بالحطب توفي للتنور اللي بدات تخبز: الان ياعم اقرب..

الزوجه الثالثه خرجت من جنبها سكته وبتشاور الشيخ

الزوجه الثانيه بتتفرج بهدوء ايش بيحصل

وصلت ام ايمن وفي يدها اللبن بعد ما حلبت البقره حقهم

الشيخ صاح فجأه ودخل للمطبخ: افتحي طاسة العجين

وصل ايمن في يده اكياس بيسمع صياح ابوه في المطبخ

سميه فتحت غطا طاسه العجين ومستغربه ماله: خير ياعم مالك؟

الشيخ جلس في الارض وسحب الشعره من العجين ووقف زبط الطاسه للجدر: الله يلعنش ويلعن من رباش ياقذره

ايمن اقتهرررر من معامله ابوه لها... بيشوفها بتشتغل وبتحاول ترضي الكل رغم نصايحه لها بس عشان لايدخل زوجها بمشاكل مع ابوه.

الزوجه الثانيه وام ايمن دخلين المطبخ وبيحاولين يهدأين الشيخ: مالك ماحصل !

الشيخ: بتأكلونا من يدها ولاتعرف ولاتعلمت النظافه كيف الولد هذا عايش معها

سميه من الخوف وزعلها انه لعن اهلها جلست في الزاويه متكومه حول نفسها بتبكي

الزوجه الثانيه: والله ما انظف ولا احلى من عملها بس الله لاسامح المناققين ( شافت طبينتها)

الزوجه الثالثه: ماقصدش

الزوجه الثانيه: خرجت تدي حطب وابسرتش بعيني تفتحي شعرش وانتي جنب الطاسه.. يا ظالمه ياحاسده امرش لله

الزوجه الثالثه بتمثيل وبكاء: شفت ياشيخ صدقت كيف تكرهني من حين اديتي فوقها وهي هكذا ..

الشيخ: والله انكن تمرضين واحد وانه وجب اتزوج اللي تربيكن كلكن

ام ايمن جريت تجهز له الاكل وتقرب له لغرفته

ايمن دخل للمطبخ سحبها وعلى خرجته سمعها

@rewayatyamania المصدر الأول للروايات

الزوجه الثالثه قربت لاعند طبينتها: اذا ماخليته يطلقكن كلكن .. وضحكت باستفزاز ودلع وطلعت غرفتها

ايمن شاف خالته ومرته في يده: اذا مازوجته باللي تقهرها ما انا ايمن

خالته: والله ماهي مرتك انها هي هذه الشيطانه الله يلعنها

ايمن هزر سميه بعده وطلعها للغرفه دخل وقفل وصيح: ليش جالسه مسكينه ، كم حذرتش منها ومشاكلها.. ليش ماقلتي لابي

سميه: افتجعت يضربني وماعيصدقني بيكرهني مش طايق صورتي هنا وانت داري شايف معاملته لي.

ايمن جالس بيفكر وضابح: انا شعرف كيف افعل واريحش منهم.... ونزل لاعند ابوه

سميه كانت مقهوره بس حب ايمن وخوفه عليها بينسيها الظلم اللي بتعيشه

@rewayatyamania المصدر الأول للروايات

انس وصل القريه فارررح بشهادته

ابوه كان مبسوووط وحاسس بحظ وتوفيق عياله بيخفف همومه

امه: قدك معطل؟

انس: ايوه شاجلش معكم يومين وارجع

امه: مابش رجعه اجلس عاون ابوك في الارض.

انس: اشتي ارجع اشتغل هانك واعاون ابي حق الارض ماتكفيكم

ابوه: اذا راجع لشغل مابش رجعه يا انس اجلس هنا عاوني يا ابني رضي عليك ظهري ماعدوش حق حراثه والعمل والغنم جور ع اختك وامك

أنس بزعل بعد ما ارتاح في عيشه المدينه اكثر: حاضر

وخرج عند اصحابه..



📚 @rewayatyamania  🇾🇪

.

البــارت 27 ○


الثــروة الـمنسيـة 🍀

👌🏻👇🏻 😍
📚 @rewayatyamania  🇾🇪


بيت سالم..
خالتها شافت جدتها نوم: هيا بلقيس جي عاونيني

بلقيس كانت بتذاكر مع كنز واجب كتبته لهن سميه

خالتها: يله يابنت روحي بيتكم وقومي يابلقيس عاونيني

بلقيس: لاتروحي اجلسي اكتبي اسير اجاوب واجي
ماقد لعبناش

خالتها: ادخلي اعجني بطني بتوجعني

بلقيس شلت المعجنه (وعاء العجين) وفعلت الطحين وخميره وماء بسرررعه عجنته وفعلت ملح وهي بتتفرج كنز من الباب لاتروح ورجعت شافت الملح وهي بتسكبه حست انها زيدته زيدت دقيق وعجنت

خالتها دخلت: تميتي؟

بلقيس: ايوه

خالتها ناولتها كومة ملابس: اغسلي لي هولا بساعتش

بلقيس: يوو عتروح كنز .. بعدا اغسلهن

خالتها: ماشي مابش خرجه الا لما تتميهن

بلقيس شلتهن وطرحتهن في اللجن ( حوض الغسيل): وسكبت صابون وتغسل واحده بعد الثانيه وتفحرهن بيدها

كنز جت: هيا بلقيس تميت الواجب شاسبق العب خارج تمي وجي

بلقيس: تمام

خالتها كانت ممدده في الغرفه نعست

بلقيس خرجت تضحي الاولات عشان ترجع تتم الباقيات لمحت خالتها نوم جلست تلعب مع كنز

كنز: مغالطه خرجتي وماقد تميتي واجبش تشتي اوقع اشطر منش وارجع ادرسش ساع الاستاذه سميه

بلقيس: طيب اسير اتم اكتب الواجب ونسير تصحح لنا سميه

دخلت البيت

@rewayatyamania المصدر الأول للروايات

خالتها نكزت لما دخلت شافت الثياب في الارض والماء كله تم والصابون مطعفر شويه في الارض .

هزرتها بظفيرتها: مالش ماتستمعيني وانا ساع امش والا عليه ابوش بس يكسر راسي اوامر عليش وانتي مابتستمعيني تشتي الولد ينزل عليا تشتي تشقي بي انتي وابوش وجدتش... وتلف شعرها وتهزرها معها

بلقيس بتصيح وتبكي

الجده قامت: مالش ماوقع ماله ابني

بلقيس بدأت وهي تبكي تتكلم مش مفهوم

خالتها تحارش قبل: ها كيف نعثت الصابون والماء تمته كله قد بين اقلها خليني اغسل انا ولاا رضيت ولا بتستمتع

جدتها شافت الصابون والماء شلت الخيزرانه ورجعت تضرب بلقيس

بلقيس بتبكي وتحاول تغطي ع الضربات بيدها...

جنب الباب.. كنز بتكتب في الجدر بالقص ( طبشور ابيض) الحروف والكلمات واسمها واسم بلقيس

أنس: مايكتبوش بلقيس هكذا (بالقيس) مسحها وكتب بلقيس

كنز: واسمي صح ياولد او مع

أنس كان معجب بشخصيتها ومميزه عن بنات القريه بحكم انها بنت الشيخ كانت ملابسها مرتبه ماترعاش غنم: اسمي أنس، وانتي يا كنز كتبتي اسمش صح.. انتي داريه اسمش حالي قوي مثلش

كنز فررررحت وراحت تدعي بلقيس من الباب: بلقيس جاوبي انس بيعلمني كيف تكتبي اسمش جي تعلمي جي ابسري شهادته

خالتها سمعت: أنس من ؟؟، يااااي بتحاكي جهال ابسري ياعمه كيف بتحاكي جهال !

جدتها: والله ماراحت لها لاعند ابوها يقتلها ويربطها وافتهن منها.. خلفه بنات مامنهن الا هم

ادي الولد وانتي لاماتت هذه نفتهن..

بلقيس بتسمعهن ومقهوووره حست باليتم حست بحاجتها لأمها تدافع عليها وتحميها مثل ماكانت تفعل لما تضربها جدتها وابوها

كنز دخلت بتشوفها بتبكي شافت خالتها بضبح وتذكرت مشاكل الخالات: وانتي مالش ع الجاهله تضربيها صيحي بس يكفي

خالة بلقيس مسكتها وخرجت كنز وقفلت الباب

أنس شافها فلتت من الباب مستغرب: تضاربتين؟

 كنز بكيت: ماشي بس خالتها دهفتني وضربتها

أنس: هي امها ماتت ؟؟

كنز مسحت دموعها: ايوه

ابوه شافه واقف مع بنت الشيخ بصوت دعاه

انسسسسسس

أنس حس اسمه بيرررن في الارض هذه النبره نبرة غضب اكيد ابي صيح ان انا بين اجابر بنت...
يو لو يحس ان انا بين احبها ويفهم !

@rewayatyamania المصدر الأول للروايات

كنز هربت للبيت وهي بتبكي

امها: مالش؟

كنز: خالة بلقيس دهفتني وخرجتني من بيتهم

ام ايمن: تستااااهلي مابيخرجش الشارع ! كان زمان في عمرش وقد انا مخطوبه وعرسي بعد سنه.
قرين لكن جني في البيت ع قد جهال.

كنز شافت سميه: يووو نسيت الواجب يا استاذه هانك

ام كنز: ياااي اجلسي مابش سيره قلك استاذه اذا ماتعرف تعجن كيف عتقرا وتكتب اخلي ابوش يدي مدرسه من وسط المدينه لاجلش يا كنز

ايمن كان واقف جنب سميه قرب شويه للدرج وشافها: وابي والكل نشتي الرابعه متعلمه تقرا وتكتب وتوبه للعمل حق ابي

ام كنز ارتفعت حواجبها: العقل زينه اوبه اجمع حسك.. شافت سميه وشافته ماصدقنا اللي حصل

ايمن: وارجعي تعلمي مع كنز خليها تعلمكن

ام ايمن: وانتي مالش واصل طالع او مصدقه ان انتي حريوه هو الا يوم


https://tttttt.me/+Ecxq_OzMYh40M2E0



📚 @rewayatyamania  🇾🇪

.

البــارت 28 ○


الثــروة الـمنسيـة 🍀

👌🏻👇🏻 😍
📚 @rewayatyamania  🇾🇪


ام ايمن: وانتي مالش واصل طالع او مصدقه ان انتي حريوه هو الا يوم

سميه شافت انها الزوجه الثانيه في المطبخ حبت انها تساعدها وماسخيت عليها

ايمن: معي الامتحان حقي يوم الاحد اشتي تذاكر لي

امه: عتختبر هذه السنة

ايمن: ايوه.

سميه ع نزلتها: ابدا احفظ النصوص انزل اعاون واطلع لك

ايمن: تمام

ام ايمن شافت انها فارحه تتجمل مع طبينتها: خلاص بس سيري ذاكري له وانتي عاونيني في دوري

سميه دخلت جلست بتنقي معها: شويه امد مايحفظ واسير

خالة زوجها تجملت منها وبتراشيها ماتعس شي ويتجابرين ويضحكين.. وام زوجها والثالثه بيتبرقطين.

@rewayatyamania المصدر الأول للروايات


بيت سالم..

سالم دخل: السلام عليكم

مرته في الغرفه سمعت الصوت جلست تحاول تبكي تحاول مابش دموووع قامت تمثل دور المريضه وخرجت بسرعه لاعنده..

بلقيس بتتفرج لابوها بنظرات آخر امل فيه هو انه يرحمها وينصفها... كانت منتظره الوقت هذك كله لابوها

سالم شافها في الزاويه عرف انها قد انضربت: ماقد فعلتي

امه خرجت من المطبخ بتعرج وتسحب الرجل الثانيه: مدري ماللبنت هذه امانه انها قتلتنا

مرته واقفه شلت الاكياس من يده وماسكه بطنها باليد الثانيه: سهل لاعد تحاكيه يا عمه حرام سهل انا مثل امها شاتحملها عشانه

سالم بيسمعهن: ماحصل ؟؟

امه: قومي حاكي ابوش مافعلتي

خالتها بضحكه وتبهرر لها: سسسهل سهل هي مش داريه يمكن لوما نعثت الصابون ولعبت بالماء

سالم: كيف مش داريه وهي بتفعل عمل البيت قبل ماتتزوجي

امه: هي بالعاني بتجنن خالتها بتحرق من حين جت راسها براسها

خالتها فارحه وبتمثل بنظراتها دور المسكينه مسكت بطنها وكأنها بتتوجع

سالم شافها ماسكه بطنها: مالش؟

مرته: تاعبه يمكن حين غسلت لده خيرات وتمهرت

عمتها: ادخلي صورة البنت هذه عتعدمنا الولد من حسدها

بلقيس بكيت بقهررر بعد ماشافت آخر شخص توقعت تلجأ له ينصفها ، ادا لها ظهره ومشي مع واحده عادها جت من أيام

جدتها عصبت من بكاها: يا سالم

سالم خرج

امه: باقي شي ابري ذمتي لاوقع شي توقع داري بنتك بتلعب مع العيال خارج

سالم امتلا غضضضضب وحس انه لهذا الشي وخلاص مايقدر يسكت

مرته تحاول تمثل دور الطيبه: لاتعسها خلاص اخر مره لها تلعب مع ولد

سالم جنن اكثر وخرج هزرها بشعرها: انتي تشتي تجننيني انا ضبحت منش ومن اللي بتفعليه ليش عتجننيني هكذا ! ارجمش للكلاب تاكلش والا وسط البير وارتاح منش

بلقيس بكيت: والله يا اباه ماحاكيت حد كنت العب مع كنز ولا طعفرت صابون هي كانت تقلي اغسلهن لها وغسلت نصهن اخرج ابسر وجت.

ماكملت

خالتها بتكذبها وتمسك ابوها: سهل سهل خليها هي ضابحه ذلحين تقل ماقالت انا شتحمل هي مثل بنتي.. شافت امه بتجهز الغداء راحت للمطبخ

سيري امسكيه لايضربها وانا اقرب قد انتي تاعبه ياعمه

سالم شافها وطيبتها فرح انها عتكون لبنته الحنان وقت مايحتاج يقسى ويربيها

بلقيس كانت تتفرجهم وحانقه تتغدا.. بعد الضرب والحرمان انها تخرج وتلعب مع بلقيس وحد يجي عندها... وكأنها تقرر عليها تحتبس في سجن مع الاشغال العامه بس السجن هذا اوجع من السجن اللي نعرفه لانه سجن وقسوه من ناس ربينا معهم والبيت اللي بنحس بالألفه والأمان فيه..

الصدمه والوجع اللي بتعيشها بلقيس اكثر من اي سجين اذنب ودخل يتعاقب على ذنوبه.

@rewayatyamania المصدر الأول للروايات

بيت سليم

ابوه: انت مجنون عتقع رجال تفكر انك عادك جاهل

انس: مافعلت

ابوه: تجابر البنت وتلعب معها  انا  ابسر ابني بيلعب ومع من بنت الشيخ يا انس تشتي يقتلك

أنس: ماكنت بين العب خطيت من هانك وهي بتكتب اسمها غلط وصلحته وكتبت الصح..
مافيها

ابوه: ولو تبسر بنت تنزل عينك للارض وتمشي

أنس: ليش هنا كل شي مايسبرش وفي المدينه مافيها شي بيلعبين في الشارع بنات الحاره معنا كره ووقل

ابوه: مادخلك منهم انت ابن سليم ولو سرت المدينه فسرت عشان تتعلم مش تغير ما ربينا عليه بتفهم

انس ضبح وبعناد شخص في سنه بيبرر لنفسه مالهم هكذا هنا كله عيب كله مايسبرش هانك ناس اغنى من الشيخ وعايشين طيبين لابيحبسوا حد ولا يسرقوا حد ليش هنا عيشتنا ضبح....
.
.

في غرفته وهي بتذاكر له..

ايمن: يابنت قبالش واحده لابي جميله وصغيره بس ماتوقع احلى منش

سميه خزيت ولطمته ع يده: هيا مالك يازوجي بتخزي بي

ايمن ضحك: يعجبني لو ما تخزي.. بس من صدق نفسي اسكت خالتي احسها راسها براسش وراسي

سميه: انا مادخلني افعل مااشتيت

ايمن: ليش؟

سميه: يعاقبني الله وترجع تدي فوقي مره

ايمن: ومافيها

سميه: والله يا ايمن؟

ايمن: انا ما اشتي الا اعيش مع مره واحده وما اشتي لجهالي الا ام واحده العيشه اللي عشتها مااشتيها لهم

سميه فرحت ومسكت الدفتر وبتكتب: ان شاءالله
هيا ابدأ حل هذه المسأله.




📚 @rewayatyamania  🇾🇪

.

البــارت 29 ○


الثــروة الـمنسيـة 🍀

👌🏻👇🏻 😍
📚 @rewayatyamania  🇾🇪


ثاني يوم

الكل في الارض بيزرعوا ويحصدوا بعض الاشجار المزروعه

الشيخ كان يلف جولته الصباحيه يدي لهم الأوامر

سالم بدأ يتراجع عن نظرته للشيخ انه ظالم شاف انه بيوزع لهم مبلغ او مكافاه

الشيخ: اجلس ياسالم معي ورق اشتي منك تحسبهن للآن كم الربح وكم حق المزارعين

سالم جالس بيحسسب ومصدووووم اهل القريه بيشلوا النص والتعب تعبهم والارض ارضهم

والشيخ نص المبلغ لاجيبه.. بدأ يفكر يخدعه وينقص من المبلغ ويتذكر ان ابنه متعلم لايراجع المبالغ ويفضحه..

بدأ يلعب الشيطان بنفسه ويقول حقي بيدي لي اقل مما استحق اخصم لنفسي اكثر.. بس مااشتيش ااكل اهل بيتي حرام.. فقرر انه يضمن حصوله ع الفلوس من عدمه انه يشتغل مع الشيخ  وبس ظلم مش ظلم هم راضيين على نفسهم.

الشيخ: يا سالم  اشتي تكلمهم في المدينه يدوا لقريتنا مدرسه بنتي تحب القرايه خيرات ولازم تطلع دكتوره ترفع راسي.

سالم حس بغيره ان بنته برضو تحب الدراسه: طيب ياشيخ لاي حين عتخلي بنتك تدرس؟

الشيخ: لما يجي لها زوج

سالم: سوا.. بدأ يفكر يجهز لبلقيس ملف يدرسها..

@rewayatyamania المصدر الأول للروايات

في غرفتهم
سميه: ايمن اسير بكره مع بيتنا المدينه عرس بنت عمي؟

ايمن: ابوش عيسير؟

سميه: ايوه وعنرجع نفس اليوم

ايمن: تمام بس لاتحاكي حد ويعرف مافيناش لكسار راس ابي

سميه فرحت: تمام

ايمن: ادي الكوت المعلق

سميه قامت وادته وناولته

ايمن خرج زلط من جيبه وناولها: خلي هذه حاجتش
لو احتجتي شي او شي.

سميه شافتها عدة ورق من فئة الميه: يووو خيرات يا ايمن خليها لك

ايمن: معي ماتقلقي خلي هذه لش اشتري مافي نفسش.

سميه: اتنقش؟

ايمن: افعلي مااشتيتي

سميه فرحت وخبتها وبدأت تجهز لنفسها ثياب ووصته يذاكر امد تنزل تجهز العشاء وتخبز وترجع


كالعاده ما مر على نزلتها ربع ساعه وبدأ الصياح واصواتهن ملان البيت راهن بينه وبين نفسه انها خالته..

نزل وتأكد من الموضوع فتح الباب لابوه بدون مايحسين وخلا ابوه يوقف في الباب يسمع زوجته بتبهذل بسميه وتعاير امه وطبينتها وتتحداهن وتعايرهن بجهالهن

الشيخ عصبببب

ايمن مسكه قبل مايتكلم: الحل عندي يا ابه لقيت لك ناس ياسلام.. المره هذه انا جاي معك اخطب لك وازوجك

ابوه لفت له: بيت من

ايمن جلس يوصف له الناس وكيف هم ..الخ

الشيخ فرح ومسك كتف ابنه بقوة: الان معي ولد يحس بي يفهمني واعتمد واركن عليه

ايمن بفرحه انه رجع لابوه: وهذه الايام بين اذاكر واختبر وشاتعلم وامسك ارضك ومالك وكل شي واركن بس

ابوه: ضخم باقي عمر هذا خلي عينك عليه ابسر من بيمسخه.. وانا اعرفوا اجهز لكم احسن مستقبل مايحلمو به عيال القريه..

(( هكذا الطمع يبدأ في الشخص اللي يعتبر نفسه مسؤول على رعيته يطلع ينصف حق المظلومين لجيبه و لمستقبل عياله ))

ايمن دق صدره: ولايهمك اركن انت بس.

@rewayatyamania المصدر الأول للروايات

بيت سليم..

بلقيس جالسه تكتب الواجب اللي ماكتبته مع كنز وتتذكر اللي حصلها وتبكي.

جدتها خرجت شواله الذره: قومي يابنت اسحبيها.. ظهري مكسر

بلقيس  قامت حاولت تسحبها وماقدرت: ثقيله

جدتها: يله خرجي على شويه شويه ونقيهن

بلقيس بضبح وتكلم نفسها والله لافعل نفسي انقيهن وااكلهم حجار هي وخالتي.. بدأت تنقي

خالتها جالسه تخيط حزام الجمبيه ( بدأت تخيط احزمه جنابي وتديهن لدلاله تبيعهن لها في المدينه
... افعلي لنا قهوه ( قشور البن تسمى فهوة القشر)  يا بلقيس

بلقيس شافتها بضبح: حاضر

جدتها: ولاتفعلي لي سكر

سالم وصل دخل: السلام عليكم انا جاوع العشاء سريع شخرج معي عمل ويمكن نسافر المدينه

امه: هذا الساع؟

بلقيس سمعته وخرجت: قوا يا اباه اجي معك

سالم بصياح: اين تجي كلهم رجال

بلقيس جلست تهم كيف تجلس معهن وايش ناويات لها في غيابه.

@rewayatyamania المصدر الأول للروايات

بدأ اهل القريه يقتنعوا بالاشجار بعد مايقطفوا ويبتاعين بكثرره ويروح الارباح للشيخ ولهم نسبه.. بما انهم مش متعلمين ماكانوا يعرفوا كم الربح وكم المفروض يكون لهم بس الفلوس القليل هذه كانت تعميهم عن حقهم وارضهم والاشجار اللي ارباحها مؤقته..
.
.

بعد يومين..
سميه رجعت من المدينه بعد ما اشترت له هديه عطر واشترت لها فستان وتنقشت

انبهر ايمن بها وحب انها ذكرته.... كان حبهم على قدهم ببساطته


اما ارزاق...


https://tttttt.me/+Ecxq_OzMYh40M2E0




📚 @rewayatyamania  🇾🇪

.

البــارت 30 ○


الثــروة الـمنسيـة 🍀

👌🏻👇🏻 😍
📚 @rewayatyamania  🇾🇪


اما ارزاق سافر زوجها المدينه يعامل اوراقه وبقيت هي تشتغل وتتعب لأهله على أمل تروح معه.

كانت مسالمه مثل ابوها الرجل المسالم اللي فلت حقوقه وارضه خوف على عائلته وابنه يلحق بهم ضرر ويتحملوا نتيجه دفاعه على حقهم  احساسه بخوفه على عائلته كان أهم من خوفه على ورث اجداده وارضه وحقه.. ولأنه مش بيده شي كان الرأي المخالف الضعيف جنب رأي الاغلبيه من عيال عمه واصل شغله على ارضه اللي انتسبت للشيخ في لحظه تهديد غصب عنه.


أنس جاء لاعنده: اباه سير ارتاح وخليني انا اقطف بدلك

سليم: جي اعلمك كيف لانه لو تغلط لايغرمونا.. وانا اسير اصلي وارتاح

انس: تمام من اين اقطف

سليم بدأ يعلمه...

@rewayatyamania المصدر الأول للروايات

في مكان ثاني..

أيمن وصل لاعند شباب متجمعين وجالسين شاف عمر مخزن اشر له يجي لاعنده

عمر  قام بخوف لايفضحه: مادراك ان انا هنا

ايمن: ليش مخزن؟

عمر: مافيها كل الشباب مخزنين وانت ياسعم بتخزن

ايمن: مادخلك مني انا والله لو يدرا ابي لايعلقك قدو حالف لك

عمر: وانت والله لو تحاكيه يا ايمن

ايمن هزره بالكوت: ماعتفعل ها ! يله اخطى قدامي للبيت

عمر دهف يد اخوه: مش قبالهم عيضحكوا عليا

ايمن: خلاص امشي سكته

عمر مشي معه

ايمن شاف اللي في سنه بيشتغلوا في الارض: ها ابسر الجهال مابيفعلوا وانت مبحشم

عمر بضبح: مادخلكم مني انا حر

ايمن: مش انت حر ابسر أنس قالوا بيسير يدرس ويشتغل ويساعد ابوه

عمر: ليش وانت ياسعم مابتفعل لابوك واصل وانت في غرفتك

ايمن عصب وضربه: مادخلك مني انت مادخلك بين ادرس سعم مثلك فاشل

عمر بمسخره: بتقريك مره

ايمن: ايووووه

عمر ضحك عليه: والله لو يدروا اهل القريه لايشمتوا بك

ايمن لاحظ ريحته سجاير: عمر معك سجاره خورت واحده

عمر فرح: صدق ؟؟ تشتي !

ايمن: ايوه بس لاتحاكي ابي

عمر خرج الباكت من داخل الزنه مخبيها: تمام بس وانت لاتقل لابي

ايمن: ولايهمك عنتبهذل سوا.. بس من بيدي لك

عمر: واحد من الخبره بيسسير المدينه وادي له زلط

ايمن: بكم هن!

عمر: الباكت بميه ريال لكن بين ادي له 200 حق شقاه ب300 ادي وانا اقله

ايمن: هيا نسير لاعنده

عمر بضبح: قد بهذلتني قبالهم عيضحكوا عليا لو ارجع

ايمن: قل لي بسمه واسير انا اخليه يدي لنا جمعه.

عمر: تمام اسمه عدنان

ايمن بيحاول باسلوبه يكسبه ويعرف منه من مسخه: خلاص اسبق للبيت لاحد يحس وانا اسير

عمر فرح: تمام يا احسن اخ

ايمن ابتسم له نص ابتسامه وانتظر لما مشي ورجع لاعند اصحابه

عمر سبق للبيت

@rewayatyamania المصدر الأول للروايات

بيت سالم..

جدتها: من امس لليوم عادش نصها

بلقيس: هوذك ابي جاء وقربت العشاء ورقدنا وبكرت عجنت وخبزت وفعلت غداء وغسولت والان انقي.

خالتها وصلت من بيت اهلها ومعها كعك ولوز وزبيب قسمت لعمتها شويه ونسيت بلقيس

الجده ادت لبلقيس حبه كعك و3 حبات لوز و4 زبيب: انتي عادش صغيره ماتحتاجي تتغذي انا ارحم وخالتش واحمه

بلقيس رغم نفسها فيهن زعلت ان خالتها طنشتها ردتهن لها: انا مااشتيش

جدتها: وفرتي.. من حنق على غير امه سلي.

بلقيس ذكرت امها وجلست تبكي

جدتها: كم روحش في البكاء

خالتها خرجت وجلست جنب عمتها: يمه مارأيش لو نخطب بلقيس لابن خالتي بيدوروا له حريوه

جدتها: ما اكره ( ياريت) ، قدو وقتها تنخطب وكما سنه سنتين تزوجت وتربت على يد زوجها امد تقدر تعيش

بلقيس استغربت ايش من زواج بيمزحين!

انا مااشتيش اتزوج اشتي ادرس ساع الاستاذه سميه واتزوج قالت لنا احسن شي البنت تتزوج 18 لانصدق ونتزوج 13 سنه

خالتها: ماتزوجت الا وهي معنسه وكانوا عيزوجوها بالشيخ لاتصدقي لها

بلقيس مافهمت: هوذا انتي مثلها وتزوجتي ابي انتي معنسه يعني

خالتها فكرتها بتتريق عليها شافت لجدتها: اكسر فمها على هذا الحكا

جدتها: تستاهل وقحه ماتعرف كيف تتحاكى 

بلقيس شافت كل واحده ملتهيه كانت ماتنقيش سوا تغرف وتمشي بيدها بسرعه وكملتها

جدتها: هيا اطرحيهن لبكره وشليتيهن بالعربيه لاعند ام بسام تجي تطحنهن

بلقيس: تمام

جدتها: جي رزمي رجلي

بلقيس ضبحت وسارت تشوف طلباتهن اللي ماتنتهي وظلمهن لها

خالتها : تقلي يا عمه عيوافق ابوها

جدتها: خليه عليا وانا اقنعه

خالتها: تمام

بلقيس مطنشه وفاكره الأمر عادي زيها زي بنات القريه
.
.

بيت سليم..
أنس وصل فارح لقي رزمه زلط خمسينات في الارض

ابوه: سألت حق من هي؟

أنس: من لقي لقي خلاص

ابوه صيح وقام لبس وخرج معه: مابش من لقي لقي.. اسال حق الناس يا ابني شقاهم تعبهم..

أنس: ولو كذب واحد وقال حقه

ابوه: الله يحمله

أنس: من تسأل والا من وبعدا من معه هذا كله؟

ابوه شك في الشيخ: ما مزلط الا الشيخ بس يمكن سالم حين بيقسم الزلط

أنس: اسير بيت سالم والشيخ اسألهم


https://tttttt.me/rewayatyamania/51250



📚 @rewayatyamania  🇾🇪

☘

بارتـات يومنـا الخميـس 👆🏻😍

.

البــارت 31 ○


الثــروة الـمنسيـة 🍀

👌🏻👇🏻 😍
📚 @rewayatyamania  🇾🇪


أنس: اسير بيت سالم والشيخ اسألهم

ابوه خاف اول ماقال اسير بيت الشيخ بس لقيها فرصه انه الشيخ يتجمل من ابنه اكثر وما يأذيه: ايوه سير بيت سالم وان مش هي حقه سير لبيت الشيخ .. هم اللي كانوا يقسمو الزلط

أنس شلها وخرج بيعدها وهو بيمشي وصل بيت سالم

جدتها: قومي ابسري من عيجي هذا الساع

بلقيس سارت تفتح الباب

أنس مخبي يده ورا ظهره: وين ابوش يابنت

بلقيس: اسمي بلقيس وابي مابحد ماتشتي منه

أنس: هو ضاع عليه شي

بلقيس: وانا مادراني ياذكي

أنس قزز من ردها وشعرها المشعفل ولبسها اللي كان عجيب وغريب.. مشي

بلقيس قفلت بعده ودخلت

جدتها: صوت ولد من هذا

بلقيس: واحد بيسأل على ابي قال لو ضاع علينا شي

خالتها: ومالش ماتقلي له يديها افرضي ابوش ضيعها ياغبيه خليتيه يسير

بلقيس قربت ترزم رجل جدتها: هو مشي من نفسه ماافعل له

جدتها زبطتها: انتي بقره وعاد بقرتنا احسن منش ماتفكريش ولا تعقلي

خالتها ضحكت

بلقيس ضبحت واقتهرت

@rewayatyamania المصدر الأول للروايات

بيت الشيخ..

انس واقف مراعي يفتحوا له

عمر ضررب كنز: سيري انتي افتحي يله

كنز تشتي ترجع له الضربه وقام خافت جريت تفتح الباب وهو واقف بضحكه: أنس ماتشتي

أنس شاف انها متذكره اسمه وابتسمت له تجمل منها: وين ابوش

عمر قرب جنبها وقف سحبها من شعرها ودخلها ووقف بدلها: من اين تعرفيه ماتشتي وانت هنا

أنس: اشتي الشيخ

عمر: يشتي الشيخ من انت تحاكي الشيخ

أنس: اشتيه موضوع مهم قوي

ايمن وصل وهم في الباب بعد ماراح وبهذل وهدد اللي بيدي لاخوه السجاير ووصل له رساله من الشيخ انه بيدي راسه لو يزيد يشوف اخوه معهم انهم يفلتوه: مالكم ماحصل ؟؟؟

أنس: اشتي الشيخ مارضي يخليني احاكيه

ايمن: ماتشتي منه؟

أنس: اشتي اقله شي مهم واسأله وادي له

ايمن: ماهو

أنس: هي أمانه ابي قال اوصلها ليده

ايمن شاف اخوه: ابسر طريق يدخل يحاكي ابي

عمر دخل وصيح فوق كنز: حسابش معي بعدا من اين يعرفش

ام كنز: تمسى وقل ياالله رضاك انت وامك من دوار الهدار هذا الساع

عمر: ادخلين يله.. عيدخل الولد

ايمن دخل هو وأنس للديوان

الشيخ شافه: مااداه هذا لهنا

عمر: قد بين اقل لأيمن مابيفهم مش هو داري بشي ولا مابيحصل وماوقع المره الاولى

ايمن شافه بنظرة ضبح كيف يكلمه هكذا وهو الاكبر: تمام حسابك مع ابي بعدا

أنس: ابي قال اجي اسألك لو ضاع عليك شي ياشيخ

الشيخ بضحكة استهزاء: يضيع عليا شي!  انا ؟؟ قلبتني انت وابوك اهبل ادوع

أنس خرج من جيبه الزلط: مابلا هذه

ماخلاه يكمل كلامه....!!! الشيخ بهرر: من اين سرقت هذه ياكلب؟؟

أنس بخوف ونظراته بتتوزع لعمر وأيمن والشيخ وحاسس انه بيشترغ بريقه من نظرة الشيخ: والله ماسرقت لقيتها على الأرض وقلت اسألك محد معه زلط خيرات الا انت

الشيخ يكرهه لانه ابن سليم: ماقصدددك ! لا معي زلط خيرات تشلها

ايمن بيهدي ابوه: اباه صلِ على النبي مالك! بيقلك لقيها وماقصد شي كلامه سوا ورجال انه اداها صاحب امانه

الشيخ: قل لابوك ماعيرحله مني ! مابيدور ؟ مايشتي يطلع عليا

انس: والله ماقال شي هو انا اللي لقيتها ياشيخ ولا شليت ريال فتشني هاا فتشني (<< قرب من ايمن.. فتح جيوبه وخرجهن من البنطلون  ونفل جيب الشميز وزعل مشي

الشيخ سكت وبيعدها... مش داري حق من بس واثق انه لو حق حد بيجوا لعنده يسألوه اصحاب القريه

ايمن لحق أنس وخرج معه: تسلم يابطل على الأمانه

أنس بضبح فتح الباب وخرج: اصلا ماناش بحاجه الزلط بين اشتغل لو اشتي

ايمن سكت وغلق بعده الباب وذكر وقاحة اخوه معه رجع لاعند ابوه وتكلم بكل شي للشيخ ومنعه من الخرجه عقاب

@rewayatyamania المصدر الأول للروايات

بيت سالم...
رجع ووصل من السفر دخلت معه مرته للغرفه تناوله ملابسه وتعلق الكوت وهي بتكلمه على بلقيس وعلى انها بتجابر ولد.. وانه وقت يخطب لها عشان تجلس في البيت وتبطل دخله وخرجه وسنتين تكبر شويه وتتزوج

سالم: تمام موافق

مرته: يعني ارد لهم خبر

سالم: تمام خطبه بس والعرس لبعد 3 سنين

مرته: سوا عاد الولد نفسه صف تاسع يتم المدرسه

سالم: تمام قلي لهم موافق.



في الصاله..
الجده بتتسمعهم شافت بلقيس وبابتسامه: ابوش وافق تنخطبي

بلقيس ببراءة ابتسمت: صدق

الجده تغيرت ملامحها: ومالش فارحه يابنت




📚 @rewayatyamania  🇾🇪

.

البــارت 32 ○


الثــروة الـمنسيـة 🍀

👌🏻👇🏻 😍
📚 @rewayatyamania  🇾🇪


الجده تغيرت ملامحها: ومالش فارحه يابنت

بلقيس: يعني شالبس طرحه ويجوا الناس كلهم يبسروني

الجده عوجت فمها: هذا اللي انتي فارحه به

بلقيس: ايوه

الجده: وتبكري تعجني وتخبزي وتفعلي صبوح وتنظفي وتطبخي غداء وتحطبي وتسايبي ماء وترعي الغنم وترجعي للمطبخ

بلقيس: بين افعلهن كلهن لكم اعرف

الجده: وحين يخطبوش ماعد بش لعب في الحاره مع احد ولاتجابري مخلوق

بلقيس: قد انتوا حابسين لي من اينه بين احاكي حد

جدتها بضبح ضربتها على ظهرها: قومي كسرتي راسي لغاجه ، ساع امش اعوذ بالله معها لكل شي رد

بلقيس نكزت من الضربه وشافت جدتها بحقد

@rewayatyamania المصدر الأول للروايات

في الديوان بيت الشيخ ... مخزنين

سالم: تخيل لوما طلعت يا شيخ الربح كان فوق ماتوقعناه ززززلط القات هذا رزق بيبتاعين كلهن مايجي 2 ولاعد علاقيه

الشيخ: زززيدوا اسحبوا الاراضي اللي تحت بكره البن شل نص البقعه والماء الساقيه كلها بتسير للبن ننزل لاعندهم بكره وقلعناهن ووسعنا القات

سالم: تمام انت داري ياشيخ النوع هذا حق القات مابلا ارضنا والكل محوش عليه اغلب مايبتاع في السوق هو

الشيخ فرررح: بدأت تخليني افكر في القرى اللي جنبنا ما رأيك نسير نقنع مشايخها والمزارعين

سالم: كلها عنب قد الورق والاغصان متفرعات حرام نقلعها

الشيخ بضبح: حرمت عليك عيشتك قال حرام.. خليهم يسترزقوا ويتوسع اسمنا لكل بقعه ويبتاع

سالم: تمام... بس عتوقع مشاكل يا شيخ كل يوم واحنا في شريعه مع اصحاب الساقيه والماء

الشيخ: سلاحك معك وادخل بهنجمه وعيفتجعوا منك وشويه قرشين ارشي هنا وهنا وسبر حالك

سالم نفث ريشه وارتزح للوساده اللي وراه حس انه بيتمشيخ: بعدك ياسيد الكل انت تؤمر واحنا بعدك

الشيخ: وراقب لي سليم وابنه مش مرتاح لهم ابدا حاسس انهم سرق او كيف... امس يجي لي برزمه زلط

سالم شافه: امانه ! انا بين اقل اني ضيعتها في المدينه

الشيخ: هي حقك؟

سالم: الله المستعان شاكذب عليك والاماريه فيها ورقه عرض الربل مكتوب فيها كم باقي لي فوق انسابي بين اقاضيهم تدينت منهم

الشيخ فتح الكوت وخرجها ورجمها له: حقك

سالم سرح شويه وبيفكر كان أنس بيحوم حول بيته له يومين معقول هو !!! قرر لايكلم الشيخ ويتصرف شخصيا مع ابوه

سليم قفل الباب بعد سالم والكلام اللي سمعه منه (( انه شاكك في ابنه بس احتراما له قفل الموضوع قدام الشيخ لايفعل له مشاكل وانه متحلف له ايش بيشله قدام بيتهم الا انه يسرقه وبيعاكس بنته ))

جلس يشوف ابنه التصرف اللي فعله امس وانه كان يقلهم من لقيها حقه وشك انه سرقها وخاف يتبهذل اكثر وينسجن مره ثانيه او يفعلوا بابنه شي

أنسسسسس.. بصوته الغاضب

@rewayatyamania المصدر الأول للروايات

انس قام جاوب سريع بخوف بعد ماكان بيقرا مجلة العربي اداله واحد من اصحاب عيال عمه بدأ يتعود عليها كل مايرجع ابن عمه يدي له معه منهن كان يحب نفسه يشوف كل شي عجيب وغريب بعيد عن واقعه بين هذه الاوراق

بدأ يفهم اشياء كثيره وتجي له اسئله وفضول يعرف اكثر واكثر حس القريه كانت مغلقه عليه بسبب ضغط العمل وروتينهم وانعدام المكاتب واكشاك الجرايد..

صوت ابوه وهو ضابح نساه المعلومات اللي جلس لمدة ساعه يقراهن بصوت واحد بلحظه غضب واحده بخوووف: خير مالك ماحصل يا اباه

ابوه لطمه: سارق ياكلب سارق ؟ ليش !

انا تعبت منك بهذلتني اكثر ماترفع راسي خلفت 7 بنات محد فتح فمه عليا وانت سمعت بي اهل القريه... قوم اخرج من بيتي يله سير عيش في المدينه افتحس واوقع رجال وكما عقلت رجعت

أنس بقهررر شاف ابوه مجروح من الكلام اللي سمعه !

هو كيف وابوه كيف بكلمه واحده بيصدق اهل القريه دخل غرفته وبضبح بيلف ملابسه وكتبه.. كان يمد السماطه ( الشال) ويرصهن ويربط.... وخرج

امه تبكي وتهدا ابوه يراضيه يمسك ابنه ... والاب ضاابح

انس خرج وقفل الباب... مشي في الظلام في لحظة غضب مش داري وين يسير بس بيفكر انه بيكون مرتاح اكثر وابوه يخلص منه اذا هو سبب وجع راس ابوه ومشاكله مع اهل القريه..

هو رجع عشانهم رغم حبه للمدينه...اللي حس انها الضوء اللي بتدي له وتغير منه وتقوي ثقته بنفسه مش عشان كبر المدينه وتطورها بس عشان مش حاسس نفسه ضعيف خاضع لظلم وسيطرة اقوياء.. عشان بيحس بحريه مافي قوانين وخضوع لاشخاص.. بيدرس ويشتغل ويقرا ويشوف حياه مختلفه منوعه..

بدأ يمشي رغم حزنه خطوات مدروسه للأيام الجايه كان كله طموح شغف يتغير.. وبعد 3 سنواااات...




📚 @rewayatyamania  🇾🇪