قصة غربـة والـدي للكاتبة: ابنـة ذاك الأميـر

.

البـارت 1 >>

#غربة_والدي
#ابنة_ذاك_الأمير

👌🏻👇🏻 😍
📚 @rewayatyamania  🇾🇪


هنالك ناس يعيشون واقع الغربة، ناس يشتاقون لغائب..
يعيشون الآم الغربة..
ناس يعيشون واقع قصتي الممزوجه بمخيلتي اتمنى أن تنال إعجابكم فهي أول قصة لي🥰




.....:ٱماااه اماااه أبي بيتصلوا دولي قالوا تشتروا كرت نت نجابرهم قدهم فاقدين لناا


الام :يووة هو قد حاكاني أمس ونسيت
خلي اختش تسير تشتري بسرعه



بعد فترة زمنية:

تسنيم:مارضيش يوصل النت زززفت أستغفر الله العظيم


الام:حاولي مرة ثانيه لاهو عيسبر


تسنيم:سبر سبر


تسنيم أبسرت صورة ابوها ظهرت على شاشه التلفون عيونها امتلإين دموع وبدأت تجابره


تسنيم في داخلها:((أبي لما يتصل ليش يقع بي هكذا اجلس ادمع شاقوي نفسي اصلا هن الا سبع سنين  ،بس والله انهن خيرات ،خلاص خلاص اسكت لاعاد يحسو امي ))مسحت دموعها


كلهم بيجابروا أبوهم سماء وحسن ،واكيد امهم أمل.....


حسن : بااااباااااا كيف انتوا انتوا داريين أن سماء وتسنيم مابيستمعين كلام ماما و.......


قاطعته سماء: بابا أبسرو هذا حتى مايخلينا نتحاكا كلمه ،اااف أستغفر الله العظيم
وبصياح حسسسسسن خليني احاكي بابا ........


أمل:حتى محانبه وانتوا بتحاكوا ابوكم 😩

وكملوا يتجابروا





العشي:

أمل: تسنيم ياتسنيم عشيتي اخوتش 


تسنيم:ايوه يااماه قد حسن رقد اول وسماء بتلعب بالايباد


أمل: الله يحفظش يابنتي امنتيني ،الله يسعدش ويدي لش مابتتمني ويبعد عنش كل شر ومكروه


"بدعوات أمي أنجو من عثرات الحياة 💜


تسنيم حبت رأس امها: امييين ياررب يااحلى أم بالعالم زيددوا لي من هذه الدعوات خيراات وبعدين هذا واجبي إذا ماساعدتكم من عيساعدكم ، اهم شي الله يحفظكم انتوا وأبي ويدي لكم العافيه ويوصلني لما اسعدكم مثل مابتسعدوني 


أمل: الله يوصلني لما ابسرش اكبرر دكتورة

تسنيم: اممممممين ياررررب

أمل:طفي القنديل ودفي اخوتش وجي ارقدي ......


تسنيم :تمام بس أكتب يومياتي وارقد


أمل: تمام بس لاتتاخري في النوم وبعدا ماتقدري تقومي

تسنيم:حاضر

طبعاً تسنيم تكتب في دفتر وكأنها تكلم شخص

وبدأت تكتب في دفترها (( اليوم قمت الصباح ورفعت مع أمي واتصلنا لأبي وجابرناهم مدري ليش كل ماتصل لهم اشتي أبكي وخايفه لو أمي تحس بهذا الشي لان امي والكل تتأثر قووووي لأني أبي مش موجود ودائماً أمي ماتحسسنا ان ابي بعيد عننا وتلبي كل شي لنا واكيد بمساعدة أبي لها اليوم قريت محادثه بينهم أمي تقول أنا بين اغثى على هولاء البنات عيكبرين وأنت مش موجود وعيتزوجين ولا ابسرنك سواء

ابي قال لها مافعل يامرة ما اسوي أنا مابيدي شي ورزقي مش عندكم رزقي في بلاد ثانيه اجي عندكم ومابش معي عمل ولاشي اجلس اطنن أنا بين اغثى والكل على بناتي وعليش وعلى أبني بس مابيدي عيفرجها أرحم الراحمين .


وقتها أنا أدركت ان أبي والكل بيحس مثلي عكس ماابسره في التلفون جامد ويقوينا ويقل لنا عنجتمع قريب ، وبعض اوقات تجي في بالي افكار واتخيل ان هو الحمدلله أن أبي عايش وبنسمع صوته ونبسره عكس بعض الناس يتمنوا يشوفوا ابوهم يوم واحد ، الحمدلله أن أبي بين اسمع صوته وحسه في حياتي هذه اكبر نعمه .... عجزت ماكتب لكن هذا بس لليوم ))



حافظوا على آبائكم فهم نعمه لا تتعوض طيعوهم ولبوا لهم كل طلباتهم انتبهوا تغثوهم فانتوا ماعتدروا بنعمتهم الا لما تفقدوهم 🥺🥺

.
.


في بيت اخر 🏡

.....: أنت داري يا عصام والله إن أنا بين اغثى على اختك كن أسأل عليها لا زوج ولا سند وعايشه في بيت وحدها يعلم الله كيف حالتها وكيف بناتها


عصام: والله مابين انساها وبين اسير لعندها كل اسبوع وهي في عافيه الحمدلله


سميه : ايوة الله يحفظك ويدي لك العافيه لاتكن تنساها قد انت اخوها وبمقام ابوها


عصام: أول مرة ادرى أنش تحبي خواتي وتراعيهن الله يقدرني على سعادتش انتي والجهال
سيري خليهم يغلقو الإنترنت ويرقدوا


سميه: آمين يارب ،ايوة صح قدو شرق اسير اخليهم يرقدوا


هشام: سلا ادي شاحني من اللغاج أمي عيجوا ويفصلوا النت وبعدا لاشحنت التلفون ولا انترنت


سلا: يااخي انت مالك عتذلنا وتهيننا على شاحن ،بين اقلك امد مايشتحن شويه أشتي أبسر الواجبات اللي عيرسلين لي البنات


امهم سميه: ماهن من واجبات هذا الساع قدو ليل اخطي ارقدي انتي وياه، والشاحن لا لك ولا لها وفصلت الانترنت وخرجت

هشام: ابسرتي حقش اللغاجه لا لي ولا لش واتغطا ورقد


سلا: يخ اهبل ☹️وخرجت



















📚 @rewayatyamania  🇾🇪

.

البـارت 2 >>

غـربـة والـدي 💗

👌🏻👇🏻 😍
📚 @rewayatyamania  🇾🇪


نعرفكم على شخصيات القصة 😀:

بيت أحمد🏠:

أحمد.. الأب أبو تسنيم ماقد ذكرته في القصة بس البارتات الجايه عنتعرف عليه

احمد مغترب عمره ٤٠سنه متغرب من سبع سنوات



أمل.. الام عمرها ٣٦سنه عايشه هي وبناتها وابنها الوحيد في بيتها ومتواضعة



تسنيم.. البنت الكبيرة عمرها ١٧سنه تدرس اخر سنه ثانوية


سماء.. البنت الاصغر عمرها ١٠سنوات تدرس في الصف السادس الابتدائي


حسن.. الولد الوحيد عمره سبع سنوات حالي ومشاكس



بيت عصام:

عصام.. الأب عمره ٤٥ سنه إنسان على قد حاله متوظف


سميه.. الأم عمرها ٤٠سنه طيبه قوي وتحب أمل اخت زوجهاا وترحمها لان زوجها مغترب


هشام.. الولد الكبير عمرة ٢٢سنه يدرس جامعه في مجال الطب


سلا.. البنت الاصغر عمرها ١٢سنه تدرس في الصف الثامن


هولا اللي تدور عليهم احداث القصة ☺️




نرجع لقصتنا:

يوم الثاني الصبح:

الساعه ٧
حسن: ماما ماما قوموا جاوع

أمل: اصبحنا واصبح الملك لله يا ابني خلينا نرقد حتى للساعه ٨ قدك كبير كم جهدي اكون ابكر واقوم من بحين

وقامت سبرت الصبوح ودعت البنات واصتبحوا


أمل: تسنيم أنا شاسير ادي الحواله اللي حول لنا ابوش واتصرف وانتي ابدئي سبري الغداء وسماء تكنس البيت وتنظف


سماء وتسنيم: تمااام


أمل: يوه عيجبرني الباري بعافيتكن أدي لي ياسماء البالطوة ......


أمل خرجت ومراعيه لباص


تسنيم: سماء أبداي في المطبخ معي ونكمل ونسير نكنس البيت


سماء: مع ياروحي جي أول نكنس لاحد يبدي ابسرتي خاله احلام بتجي يووميه قدو ساع الدددوام وبعدين الغداء توووه


تسنيم: تمااام

.
.

عصام: كيف الدراسه ياهشام ولازد بنبسرك الا وقت الأكل بس، لو قد بتحضر الماجستير ماعتفعل هذا وعادو بكالوريوس

وجلس يدي له محاضرة على انه يكون يجتمع معاهم ويخفف على نفسه في المذاكرة

((أهلي دائماً يقولوا لي هكذا 🌚😁))


هشام: ولاعليكم يابه وقام يحب رأسه ،وبعدين هو طب علاسب اهتم، بدل الخبرة والمفراغه

عصام: ايوة اهتم وذاكر وخلي وقت لاهلك وعائلتك ،وذاحين يله اخطى معي نسير نبسر عمتك قدلك منها من العيد

هشام: هيا خطينا .....

.
.

نرجع عند أمل..

فووق البااص بتتذكرر قبل سبع سنين :
اه اه ياأحمد فلتني وحدي والجهال بيكبروا والمسؤولية بتكبر الله يقويني على تربيتهم ويحفظك ويدي لك الصحه والعافيه ويرزقك ويبعد عنك الحرام اااه وسرحت بتفكيرها


قبل سبع سنين:

أمل: ماهووو ياأحمد عتقوم عتقصد الله كودك راقد من عيصرف علينا قد احنا ٥انفار((اشخاص))


أحمد: مالش يامرة الأمر كله بيد الله اللي أدى رزقنا من اول عيدي رزقنا ذاحين الامور عتحتل بإذن الله


بعد بنص شهرر تقريبا:

أحمد: اسمعي يامرة أنا لقيت لي عمل، واحد صاحب عرض عليا اني اسافر واورد له بضائع وكل شي ((السفرة والمصروف )) على حسابه مارأيش


أمل: ابسر لافيها خيرة لك وانت داري انك قدهاا الله يوفقك أحسن من ما تجلس بدون عمل


أحمد: أيوة وأنا قد قلت فرصة وجت لك ي أحمد لاتضيعها ، أن شاء الله مايكون الا خير بس ماحد يدرى بالموضوع الا أنا وانتي لاتكلمي أحد حتى البنات

أمل: حاضر



نرجع لعند البنات..

تمين يكنسين البيت ودخلين المطبخ

سماء: تسنيمو أختي حبيبتي أنا شاسير أنظف الحماام بسرعه

تسنيم: بما أن فيها تسنيمو حبيبتي ومدري مه صدقيني ماتبدي 😝 الحمام عادني نظفته مابش معانا جهال يمهدووا 😂


وجلسين يتحانبين((بيتصايحين)) عند البااب 😂😂


((الاخت الصغيره دائماً تعتمد على الاخت الكبيره ‌☹️⁩))


نرجع :
بيتحانبين ودق الباب تسنيم افتجعت لو هي امها ماقد كملين العمل

تسنيم: سماء بسرعه احملي لفي اللي مهدنا وسبرت شعرها بعشوائية وهي بتلهف وفتحت الباب وكانت الصدمه....



نررجع عن أمل اللي سااارحه بأفكارها :

مرت الايام
خرجت الفيزة والجواز وكل شي سابر


أحمد كلم أبوه وأمه وأخوته وخواته، وكمان كلم ابو أمل واخوتها وماحد عارررض وتووكل على الله


اليووم يووم سفره:

الساعه ٤الفجر

أمل :بتبكي اههههئ والله ماتوقعت ان هوو ال م و ض و ع صد د د ق وان هو عيسبرر بسرعه اهههئ اهههئ كان أتخيل لي انك بتكذب عليااا من كثر مابين اجننك اههههئ اهئ عاد حسن صغير ماقد بسرته سواء


أحمد: هيا مه انتي قلتي لي دور لك عمل والباري رزقني هذا العمل، صلِ على النبي واذكري الله كلها سنه او سنتين بالكثير واكون راجع، لاتقلقي الله معي ومعاكم وضمها أستودعكم الله في كل وقت وحين


أمل: استودعك الله 😭😭 الله يرجعك لنا بالسلامة


أحمد: هيا ناهي عتجلس تبكي انزلي افعلي لنا لقمه ناكلها من يدش لآخر مرة 🤤


أمل: حاضر الان ،ومسحت دموعها ونزلت
سبرت الصبوح




















📚 @rewayatyamania  🇾🇪

.

البـارت 3 >>

غـربـة والـدي 💗

👌🏻👇🏻 😍
📚 @rewayatyamania  🇾🇪


نكمل اللي بتتذكر أمل..

عند البنات اللي بيشاهدين بصمت ومستغربات


أحمد: هههه مالكن يابابا ادخلين لاتفتجعين هي ماما بتكبر الامور أحيانا، وحضنهن وبيسلم عليهن ويوصيهن ينتبهين لنفسهن ولامهن

وقال: تسنيمو بنتي الكبيره انتبهي لاختش ولامش واستمعي كلام ماما انتي بنتي الكبيره وحقي القمر الله يحفظش وضمها وباسها في رأسها وكانت صغيره🥺عمرها عشر سنوات


وقال: سمائي ياروح بابا انتي استمعي ماما واختش وانتبهي لحسن الله يحفظش ويخليكم لي كلكم وباسها في رأسها وكان عمرها خمس سنوات

طبعاً حسن مازال طفل رضيع

وضمهن الثنتين وقال: انتبهين لنفسكن 😞


وبعدين نزلين هن وابوهن والشنط في يدة علشان يودع ابوه وأمه وخواته واخوته
واصتبحوا كلهم صبوح جماعي
وودعهم ومشي


صاحب الباص: هيي ييه يا اخت وصلنا لآخر موقف ممكن تتفضلي


أمل: هااهاا
(( عادها استوعبت خزيت ونزلت)) 😂😂


‌O_o⁩‌

🥺حقاً
من قال أن الغربة كربة
الغربة صعبة
الغربة هي إحساس بالوحدة وأنك غريب عن العالم ....💔🥺



في الخارج:

أحمد: استغفرالله العظيم ماهي هذه الشمووس تدقع الواحد دقع وتمرضه


صاحبه: صلِ على النبي ياصفي (( لقب يلقب لاسم احمد)) احنا ماجينا هنا الاعلاسب نشقى ونشتغل ونشمس ونبرد وندور لقمه العيش 


أحمد ابسره وهو مهموم :
احح اح تصدق يا صاحبي إن قد بين افكر ارجع اليمن تعبت غربه والله تعبت جهالي بيكبروا وانا بعيد عنهم وعاد إحنا في بلاد الغرب لاحد يحس بك ولاحد يسأل عليك بلااادك عز كأن كل الناس أهلك أما هانا ولانعرف أحد وعاد الكل يبسرك باشمئزاز لانك يمني لاحول ولا قوة الا بالله
 

صاحبه: ماهو مابتقل إنا انت بتجنن والا كيف، كرها وصلنا لاهنا بعد شق الأنفس المطارات مغلقه والطريق مش هي سواء

اذكر الله واجلس اللي صبرت سبع سنين عتصبر الباقي ، ومسك كتفه وقال هانت ياصاحبي هانت والله مااضاقت الا وفرجت ،جهالك في رعاية الله وحفظه ،الباري ماعيسخى عليك ولاعليهم أذكر الله وقم نتعشى


أحمد: والنعم بالله بس جهالي بيكبروا بسرعه أبني ابسرته وهو مولود ذاحين عمره سبع اح اح  ، هيا هيه قم نتعشى ماعاد بيسلي على قلوبنا الا نعبي بطوننا هههههه 😂😂



في اليمن:

نرجع لتسنيم 😁:
فتحت الباب وهي بتحطم ((تهدر)) بنتكم المحترمه مارضيت ترفع مثل الناس ياتسنيم افعلي ياتسنيم سوي وهي بترفع برأس اصابيعها وبتتحاكا وهي بتخطى ، يعني فتحت الباب ورجعت على وراها ولا شافت من في الباب


.....: احم احم عمه


انصدمت تسنيم ووقفت تبسر من وكان هشام: خفعت على راسها اووه العفو منك وهربت


تسنيم دخلت الغرفه: سماء سماء بسرررعه دخلي خالي وهشام المجلس بسرعه


سماء ببرود: يوه مش هم امي


تسنيم بتدهفها: مش هي أمي احملي


جلست مطننه وبتفكر((يوه ماعيقل عليا، مجنونه، وهو لايعرفني ولا اعرفه قوي ياعيبااه مافعلتي يا تسنيم ، وضحكت حلا حن خالي مش معه في الباب ))


طبعاً خالها سار يشتري بعض الفواكه والحلا علاسب مايسير بيده


قاطعتها سماء: ياااه ياهوووو قومي البسي وسبري عصير لخالي وهشام وأنا اسير اجابرهم لما تجي امي


تسنيم لبست بسرعه وسبرت العصير


تسنيم بتلهف وتسبر شكلها وبتفكر كيف عتدخل وقدهي خازززيه قوي وبعدين قالت طز مش هو بقصد مني وقالت ههههف ودخلت


تسنيم: حيا الله من جاء كيف انتوا كيف حالكم واين الناس


عصام وهو يشل العصير: الله يحييش الحمد لله كلنا في خير نسأل عنكم كيف الدراسه واين امش وحسن


تسنيم قربت العصير لهشام وجلست

قالت: والله أمي ساروا يستلموا الزلط وحسن في الشارع بيلعب


وجلسوا يتحاكوا ويتجابروا وتسنيم تتحاشا نظرات هشام


بعدما أمل استلمت الحواله وروحت البيت وتغدوا وحاكينها البنات ان هو جاء خالهن


بعد الغداء:

أمل: أنا شاسير اتفرط عند جيراننا مرة يحيي ال... ولدت انتبهي لاخوتش


تسنيم: ماشاء الله صلاه على النبي كودهم بيت ال..... معاهم مناسبات مابيفضى بيتهم ابددددا الله يعينش يااااا أبررارر على الكناس والقشاع

((أبرار طبعاً بنت الجيران بيت ال..... 😂😂😂))


حاضر تمام عتنتبه لهم لكن صفاء عتجي عندي علشان نحضر الدرس حق غدوة


أمل: هههههههههه الله يقرفكن من بنات مابتهمين الا القشاع والكناس بيدي الباري عوون وعافيه ،وصفاء حياا بها قد هي بنت البيت


https://tttttt.me/+Ecxq_OzMYh40M2E0





📚 @rewayatyamania  🇾🇪

.

البـارت 4 >>

غـربـة والـدي 💗

👌🏻👇🏻 😍
📚 @rewayatyamania  🇾🇪


عند تسنيم وصاحبتها صفاء

صفاء :كيف انتي ،،،،،،،بعد السؤال عن الحال والاحوال
صفاء: لو تبسري بابا ماقالوا لي 😍😍قالوا لي لو انجح هذه السنه وبما اني ثانويه يعني🌚 عيخلوني اشارك في الحفل حق التخرج حق المدرسه ويحضروا معي ،وبببتفاعللل يوووه يا تسنيمم كمم قد تررراشيتهم وترجيتهم يخلوني اددخل وهذا لو نجحت أتخيلي وأرسب مش هو بحق المرراشاه 😅 ،وانتي ماقال عمو احمد عيخلوش تشاركي ،وبعديين اكككييد عيخلوش ويحضرروا والكل لانش متفوقة واشطر واحدة في الفصل

""وطبعاً هذا الكلام كله بعده بعده😂😂 ماخلت لتسنيم فرصه أنها تتحاكا ""


تسنيم بحزن: انتي عارفه أن أبي ماعيقدر يحضر مالش،
عتحضر أمي وهي تمسك دموعها أبي عتصور له وكأنه معي 😌


صفاء: الله يقرررفش ماتفاااعلتي الا مع ماااقال ابووووش وااانا من اوول بين أهدر إن قد تراشيت أبي ولو أرسب ومدري مه اااخس عليييش 


تسنيم ساكته ولا ادت أي ردة فعل


صفاء: يووه صررفوا عليناا مالش قلبتي وجهش اننننااا آسفه ماتوقعت انش تزعلي

وجلست شويه منتظرة أي ردة فعل من تسنيم


صفاء: يااه أنا آسفه والله ماتوقعت إني سااامجه لهذه الدرجة ، الله يقررفني لازد تحاكيت وسدت فمها وقالت هااا سكتتت

هدددددددددددددددوووووءءء


صفاااء: تسنننيم مالشش والله مازيد اتحاكاا ابددا ،سهل ياروحي فترة وتمر لاتهمي أن أبوش ماعيجي أنا بس سألت لان كان أتخيل لي أن قد عيرجع ،واذا ماحضر أبوش قد أبي لي ولش صح


تسنيم ساكته


صفاء: تسنيم أمانه لازعلتي مني والله ماكان قصدي انش تزعلي والله ماازيد حتى اذكر أبي الا لما يرجع أبوش وهي مبتسمة سامحيني، هي مالش عتقلبي اليوم نكككد والله مازيد اتحاكاا والله والله والله


تسنيم بابتسامه وتفكير: ((صدق من قال ماتحس بالنعمة اللي انت فيها الا لما تفقدها، ماأحس بقيمة بابا الا لما أحد يكلمني عن أبوه أو أبسر أحد يبكي لوفاة أبوة ،الله يحفظكم لي ويدي لكم الصحه والعافيه ويبعد عنكم كل مكروه))......


تسنيم بعدد صمتتت طويل :
سامحيني يا صفاء لو زيدت لش الكٱبه والله إني ماابين اقدر افضفض الا لش اتخييلي ياا صفاء والله أنني دريت بقيمه أبي ذلحين لما سافر واغترب، والا كان موجود بس ماكان به هذا الحب كله احياان ابسر أمي وااغثى عليها كم جهدها تتحملنا ٣جهال، صح أن أنا بين اشل شويه حمل عنها لكن احس ان الحمل والمسؤولية كلهاا فوووقهاا ،

من لما سافر ابي وحياتنا انقلبت أمي تعبت وأبي بيتعب أتخيل لهم الاثنين أن الزلط هي كل شي صح أن كل شي يشتي زلط بس لما كان أبي موجود كان الله يطرح البركه ، أما ذلحين قعت حياتنا ملل وروتين يومي أمي تسير تتصرف واحنا أنا وسماء نسبر الغداء وننظف البيت وبعد الغداء دراسه وحل الواجبات والعشي نتصل لأبي،

خلااص كل يوم نفس الروتين مممااابش تغيرر قدد بين احس بضببح وكٱبه وسط البيت، أتخيلي اني  لما اسير المدرسه احس ان هي سبيل النجاه من بيتنا والضبح والملل كني أدعي لي يا صفاء هذه الددعوه بس الله يجمع بيناا احنا وبابا عما قريب واهم شي قلي في خير وعافيه ووددمووعها اعلنين النزول 😔😔


صفاء وهي بتضم تسنيم : اوول شي ماابش بينناا هذا الكلام الله يسامحش ومدري ماهو انتي ياتسنيم أختي وصديقتي من صف أول وتوأم روحي واي شي يزعلش أناا موجودة واذاني صااغيه لكل كلمه تقوليها انا احبش قوووي صح أن الله ما ادا لي اخت لكن انتي اختي وأخي وصديقه عمري انتي صاااحبه ال ١٢سنه انتي قلبي وروحي والله إني حاااسه بش لكن ماتوقعت أنش عتفقددي أبوش هكذا ،ومسحت دموعها وبعدت تسنيم من حضنها ومسحت دموعها وبعدين صدددقيني أن الباري عيجمع بينكم قررريب قررريب قوووي فددديتشش يااروحي امسحي دموعش وخفعتها غدوة نسير ندي للاستاذه كلامنا كله بدل الدرس 😂😂😂


تسنيم :ضحكت

وكملين تحضير الدرس

وكاان الشرح برررررفكت ‌👍🏻⁩‌👍🏻⁩
                                     ""ابسرتة""😅😅



حلوة الصديقة التي تفهمك من نبرة صوتك تفهمك من علامات وجهك تفهم ضحكتك وابتسامتك💜💜



تسنيم الليل تكتب في دفتر يومياتها: لولا صفاء  صديقتي اللي اشكي لها لكنت ذاحين ضابحه وضيقه صح ان ابي سافر وعمري صغير عشر سنوات بس كنت متعودة على حياتنا بوجود ابي لذلك افقده كثير وكملت تكتب ايش حصل في يومها .....

















📚 @rewayatyamania  🇾🇪

.

البـارت 5 >>

غـربـة والـدي 💗

👌🏻👇🏻 😍
📚 @rewayatyamania  🇾🇪


الليل يومياً يكلموا ابوهم عبر الاتصال الفيديو صوت وصوره ويتجابرووا وكل يوم يزداد اشتياقهم لبعض

واحيانا تحصل مواقف تخليهم يتذكروا أبوهم ويحزنوا على فراقه وبالأخص تسنيم


مرررت نص سنه وهم على هذا الحال ابوهم مغترب وصرفتهم توصل لعندهم وأمهم تتحمل الهم والجنان وصرفة البيت، والبنات يدرسين والولد يلعب ويحانك ومامحلي الدنيا الا هوو ‌💜



تسنيم بتكتب في دفتر يومياتها:
هاهي سبع سنوات ونصف مرت بحلوها ومرها مرت بكل لهفه واشتياق مرت بكل ذكرياتها مرت وأنا يا أبي أشتاق لرؤيتك يوماً بعد يوم أبي كم من مرة تمنيت أن تراني أنا وإخوتي عندما نتشاجر وتتكلم يكفي اصمتوا لقد ازعجتوني كم من مرة تمنيت وجودك في لحظة ما، كم من مرة تمنيت أن أبوح لك عن مدى حبي واشتياقي لك افتقدك أبي افتقدك بشدة ...😔😔


((صح أن الأب المتوفي يشتاقوا له كل هذا الاشتياق بس كمان الأب المغترب كذلك وسبع سنين مش قليل العمر بيمشي ويخطى وكل وأحد بعيد عن الثاني))



نرجع:
ومرت الايام والبنات وأمل بيجننين أحمد يسفرهن عنده أو يرجع لان كلهم تعبووا من بعدهم عن بعض وطبعا المطارات مغلقه والطريق متعبه .....



سميه: سلا شلي لهشام هذه الكيكه والشاي قلي له قالت أمي تاكل بالغصب تعب مذاكرة وزد مريض حرام عليك جننتها

سلا: تمام وشلتهن

بتدق الغرفه

هشام: ادخلي ياسلا كن افتحي وخلاص عادهي عتدق

سلا: احم احم أشتي اخلي لك شويه خصوصيه

هشام رجمها بالوساده ((المخده)): قلك خصوصيه
ادي اللي في يدش

سلا: ماشدي اللي في يدي الا بشرط

هشام: اف ماهو الشرط اقطبي عيبرد الشاي

سلا: اممم اشتي اتصل لبنات عمتي

هشام: عمتي منى ؟

سلا: من منى يا اهبل ☹️ عمتي أمل

هشام بلهفه 😁: ادي رقم بسرعه بس مش تجلسي تجابري خيرات خمس دقائق بس

سلا: تمام يله اكتب ٧٧٦....

هشام: مابيرد مغلق

سلا: خلاص سجل رقم تسنيم اكتب ٧٧٢....

هشام فرح

واتصلت سلا لتسنيم واكيد تسنيم سألت رقم من اللي بتتصل سلا منه

وغلقت تسنيم وكتبت الاسم سلا الروح وهي مبتسمه

(كل واحد معجب بالثاني بس بصمت 🌚)




بعد يومين:

تسنيم: يابابا هيااا قد بيقلووا عيفتحو المطارات اقطعووا لنا جووازات علاسب نجي عندكم ونبسركم قدد احنا فاقدين لكم والا جوا أنتوا والا مااقد فقددتونا لوو تبسروا ساع من أنا طويلة لاتفتجعوا عتقلووا مش انا معترف أن هي بنتي 😂😂😂 


سماء هزرت التلفون: سعليش ماعيفتجعوا ولا ، صدددق يابابا ابددو جهززوا لنا يمكن يفتحوا فجأة ونجي عندكم قد لكم ٧سنين وشويه


أحمد ضحك: هههههههههه الله يعين مرتي عليكن والمحانبه، لكن الدراسه يابناتي ماينفع تفلتنها تسنيم باقي لها نص سنه وانتي باقي لش نص سنه وتكوني اعداديه

تسنيم: سهل الدراسه سنه والاسنتين ماعتضر

اما أمل بتسمع سكته ويدها على خدهاا

فجأة كلهمم ضحكوا وبيبسروا صلى أمل


أحمد: قد خليتوا مرتي تطنن من اول وانتين ساع الراديو 😂😂


أمل: احلم انت وبناتك وادفوا سواء المطارات مغلقه وجوازي يشتي تجديد والبنات يشتين جوازات والطريق متعبه ومدري مه واتخيل لكم أن الدنيا سايبه.....


أحمد ضحك: كان مانقل لبناتش الملغجات لافتحووا جيتوا انتوا عندي ماشي عتجي انا عندكم وكفى الله المؤمنين شر القتال تعببت حتى أناا غربه......


كملوووا يتجابروا ويضحكوا وغلقوا.......




تسرريع للأحداث 🌚🌚

بعد شهر ونص...

اليوم يوم حفل تكريم تسنيم ....

تسنيم: امماه ابسرتووا اين طرحت الساعه


أمل: ماتفعلي يابنتي بالساعه اقطبي ابوش جنني اتصالات قال يشتي يبسرش قبل ماتسيري


تسنيم: كيف ماافعل بالساعه وانتوا دارريين أنها نفس لون الباقه ((باقه الورد ))، خلاص خلاص لقيتها ،ويله كملللت 😁😁


طبعاً به مدارس يعملوا حفل تخرج للطلاب قبل إختبارات الوزاري


نرجع:

واتصلوا لابوهم
أحمد: مبررروك يابنتي الف الف مبروك وعقبال تخرجش من  الجامعه ،فررحتي ماتنوصف كُبرتي وكَبرتي بي باقي سنة ودخلتي جامعه ومدري مه وبعدين شيبت أنا وامش هههههههههه


تسنيم: الله يبارك فيكم لكن ناقص وجودكم وددمعت😢😢وطنشت الكلام الباقي....


أحمد: هيا مالش عتدمعي وتبكي إن شاء الله السنه الثانيه وانتي بتحتفلي عندي


تسنيم: كل سنه وانتوا بتقلوا هكذاا 😞


أحمد: تيه السنه قدو من جددد ، اليووم معي لكم خبررر يفرح وبدأ يحاكيهم كلهم


...: هديتي لتسنيم بمناسبه تخرجها ان شاء الله انكم عتجوا عندي قريب بس تكملي اختبارات الوزاري وتكمل سماء باقي السنه😍😍😍


كللهم: مااااهووو كيفه


الكككل فرررح بهذا الخبررر فرررحه ماتنوصف وساروا الحفل بنفس رضيه ومفتوحه وكل واحد مبتسم اكثر من الثاني



https://tttttt.me/+Ecxq_OzMYh40M2E0




📚 @rewayatyamania  🇾🇪

.

البـارت 6 >>

غـربـة والـدي 💗

👌🏻👇🏻 😍
📚 @rewayatyamania  🇾🇪


تسنيم: صفاء صف صف 😂 قلي مبررروك

صفاء: مالش شكلش من كثر الفرحه نسيتي أن أنا خريجه نفسش‌☹️⁩

تسنيم دكمتها والإبتسامة شاقه وجهها شق: قلي مبررروك لصاحبتش اللي تمنت أن الله يجمعها بابوها
قلي مبررروك لصاحبتش اللي اذتش يوميه بدموعها كل ماتتذكر أبوها
قلي مبررررروك لي ياصفاء، الباري استجاب لي دعواتي ياصفاء وضمتهاا بقوووة


صفاء عررفت على طول قصد تسنيم وهي تمسح دموعها: مبرروك ياقلبي مبررروك ياروح صاحبتش مبررروك يا احلى اخت مبرروك ياروحي والله فررررحت لش من قلبي ،اليوووم يسجله التاريخ احلى يوم في حياتي يوم تخرجي ويوم ضخم بالنسبة لصاحبتي واختي ،وبعدت من حضنها وهي مكشرة وانتي فارحه بقوتش ونسيتي أنش عتفلتيني وتنسيني صح ‌☹️⁩‌☹️


تسنيم مسكت يدها: صفاء ياروحي والله ما انساااش دقيقة ولاحتى ثانية أنتي تحملتيني ببكائي وجنناني وهمي وحزني انتي اعظم من أخت  أنتي سندي وقوتي في هذه الدنيا ياروحي أنتي نعمه من الله ولايمكن إني افرط فيها وأنتي اووول واحدة تعرف بالخبر من صاحباتي

وضمتهاااا بقووة والله مانساااش أبدا ولا القى صاحبه نفسش احبشششش قووووووي


صفاء: وأنا احبشششش اقوووى الله يوصلش بالسلامة ياروحي مش ماتكني تتصلي لي


تسنيم: آميين يارررب ،حااضرر كل سااعه وأنا بين اجننش 😅😂😂


قد تنجب لك الحياة صديق هو الكمال لأشيائك الناقصة ، صديق بعالم كامل ❤️



.....: يله بنااات تجهزوا الحفل بدأ


وبدأ حفل التكريم واكيد تسنيم عزمت على خالها ومرته وجهاله فيما بينهم هشام وطبعا اهل ابوها مش موجودين هم في عدن لذلك ماذكرتهم كثير لأن مابش لهم دور كبير


وهشام بيصور لزوج عمته مباشر وهو مبتسم


وكمل الحفل

وساروا دورة عائليه(هذا الشي اكيد 🌚) وكانت مواقف روعه واتصوروا بتلفون هشام صورة جماعيه


هشام بيسوق السيارة وفاتح أغاني بأعلى الاصوات 😂وكل شويه نظره لعند تسنيم



المغرب :

أمل: هيا سميه مارأيش نروح قد انا تاعبه من الصبح

سميه: ايوة هيا اقل لهشام حتى أنا قد انا تاعبه

هشام ياهشام

هشام: التفت مالكم يمه

سميه: هيا نروح قد احنا تاعبات أنا وعمتك

جت تسنيم اللي كانت بتتصور على المناظر الجميلة 😂😂

هشام قفا صلى تسنيم وابتسم وقال: اليوم الرأي كله رأي تسنيم اللي تشتيه تسنيم أنا حاضر فيه


تسنيم من تحت البرقع مبتسمه قووي ووضح لها مدى اعجاب هشام بها

قالت مارأيك نروح أمي وخالتي سميه ونسير أنا وأنت وسماء وسلا نشتري عشاء ونروح البيت لأن قدهي اخر جمعه لنا يمكن


أمل بهررت لها


هشام بعدم تصديق: ها ماهو ماقلتي واتغيرين ملامح وجهه كيف اخر جمعه لنا!


تسنيم بحزن على هشام ممزوج بفرح انها عتشوف ابوها: أصلا إحنا يمكن نسافر عند ابي بعد اختبارات الوزاري


هشام خطي وقال يله أنا شاسبق السيارة


وخطيوا ووصلوا الامهات الى بيوتهن 😂😂


وعصام قال ماعيسير معاهم قدو تاعب

ووصاهم يسيروا بسرعه ويرجعوا بسرعه



سماء وسلا جنب هشام في السيارة ((طبعا بعد محانبه من تجلس جنب هشام قدام السيارة وفي الاخير جلسين الثنتين))

وتسنيم وراهم

هشام بيبسر لتسنيم من المرايه

وتسنيم سارحه في الطاقه

هشام: ايوة يابنات عمتي ايش تشتين نشتري عشاء

سلا: ايوة اختك ماعبش لها وجود

هشام ابسر تسنيم جالسه على وضعها سارحه وقال أصلا بنات عمتي قد عيسافرين

سماء بتخط راقدة 😂😂😂
((احلى نوم فوق السيارة 😂🌚))


هشام وقف السياره فجأة ...


وتسنيم ركزت: يوة مالك وقفت

هشام: أنا بين اتحاكى من اول ايش تشتي عشاء

تسنيم خزيت: العفو ماركزت ، عادي اللي تشتي

هشام: ايش تشتي انتي

بمزح يله اطلبي اللي في خاطرش لان هشام اللي يخرج معه مرة تكون الخرجه ضخمه ويطلب اللي يشتي حتى عيونه لو يطلبهن لا هشاام يديهن له وضحك

تسنيم حمررررت خزاء

سلا: ايوة صح اطلبي اللي تشتي ياتسنيم والله أن هي آخر خرجه من جيب هشام

وطلبين لهن

هشام: ادي تلفونش يا تسنيم اكتب لش رقمي علاسب لو حصل شي والا شي تتصلي لي

وتسنيم ناسيه ان رقمه عندها

مكنته التلفون

وبدأ يسجل......





















📚 @rewayatyamania  🇾🇪

.

البـارت 7 >>

غـربـة والـدي 💗

👌🏻👇🏻 😍
📚 @rewayatyamania  🇾🇪


أمل بتحاكي أحمد عن كل شي حصل في الحفل

أحمد: والله ان اخوش طلع اصيل هو ومرته وجهاله الله يبارك فيه

وجلسوا يتحاكوا ......



نرجع عند تسنيم وهشام:

هشام بدأ يسجل الرقم واستغرب من الاسم كان مكتوب سلا الروح 🤤♥️

طلع نظره لعند تسنيم
وتسنيم استغربت ، ومكنها التلفون وضحك وغلق باب السيارة

تسنيم شلت التلفون وابسرت الاسم وقالت يوووة أنا كنت راكنه ان هو ماعيعرف  😅😂

واشتروا عشاء

هشام: لو تحتاجوا شي والا شي أنا موجود

سماء وتسنيم: تسلم ♥️



الفجر:

أمل تصلي حمدد وشكر لله وتدعي
لك الحمد ياربي اللي عتجمعني بزوجي وتلم شملنا لك الحمد ياربي على كل قدر قدرته لي
يااااارب سامحني على كل لحظة تذمرت فيها بسبب بعدي عن أحمد وفي الأول والأخير

الحمدلله على كل حال سواء في البعد أو القرب٠٠٠
وكملت تدعي لما اذن الفجر




يوم ثاني الساعه 10 الصبح:

تسنيم: اح ياظهري قد انا مكسرة

سماء: تستاهلي محد قال لش تلبسي صندل كعب😝

تسنيم: أصبحنا وأصبح الملك لله

امه يمه جوا شلوا بنتكم أنا عاد انا ساليه وفارحه من امس لاتجيش هذه تخرب سعادتي بحقها الفلسفه

أمل: صلينا على النبي اخطين نصتبح قدو شرق خليتكن ترقدين حن انتين تاعبات


وقامين اصتبحين


تسنيم: سماء ادي لي تلفوني افتح النت قد له من أمس مغلق

فتحت التلفون ولقيت رسائل خيرات من عماتها واعمومها وبتبسر الحالات لقيت حاله سلا الروح
بهررت😳😳

ابسرت صوره وهو باحسن شكل ولبس ومهنجم
ومكتوب ( كلما قررت اخطي خطوة يَرجعني الوقت الى الوراء بخطوات 😢😢)

والصورة الثانية (لم يحالفني الحظ بالاعتراف ولو لمرة 💔)

استغربت وشلت تلفون امها وابسرت الحاله مش ظاهرة عند امها

قالت: يعني حالاته ظاهرات لي بس والله ان الكلام لي

ودخلت الواتس اب وابسرت رساله منه افتجعت


دخلت قريتها مكتوب :
((صباح الظهر 😂 كيف انتي بعد الحفل والصندل الكعب 😂
اول شي ما اقدر اخبي عليش، أصلا قدو واضح أنا معجب بش يابنت عمتي ومش قصدي شي ثاني ، والله كنت من أول مااعرفش ، بس من هذاك اليوم وأنتي في بالي ماقدرت انسى شكلش ولاصوتش ولاعيونش ومازد دريت ما اكتب أصلا أنا قررت اعترف لش، بحبي لش، أيوة أنا احبش مش اعجاب بس ♥️ لوما قلتي لي عتسافروا مازد دريت كيف افعل اشتي اعوضش وتكون لنا ذكريات خيرات اسمعيني لاتقلي أن أنا مدري ايش بس هذا مافي قلبي لش واتمنى انش تبادليني نفس الشعور ، طبعا لما قريت اسمي في تلفونش حسيت أن أنا المقصود رغم أن اعجابنا ببعض وحبنا كان صامت 😂 بس الحب الصادق يبقى للابد ومستحيل ينتسى اذا انتي تبادليني نفس الشعور قلي لي بس احبك وانا شاعرف الباقي واذا ماتبادليني نفس الشعور اقري الرساله بصمت ولاتردي بشي وفي الاخير الله يجمعكم انتوا وعمي على خير واكيد والله ما انساش واحبش ياتسنيم احبش ♥️♥️))


تسنيم مصدومه من جرأته وكلامه وفرحت قوي ومازد دريت ماترسل
بعد تفكير دام لربع ساعه ومازال هشام منتظر رسلت له ((☺️♥️☺️))


هشام فرح قوي قال أخيرا حققت مافي نفسي أهم شي ادرى بمشاعرها تجاهي مش احبها على الفاضي


((نصيحه لما اي شخص يحب شخص آخر يكون متأكد من مشاعره تجاهه مش يهبب بالكلام ويخرج مافي قلبه والشخص الآخر مايعطيه اي اهتمام يكون يتأكد بحتى بصيص أمل 😢))


رسل لها: أهم شي اهتمي بدراستش وذاكري الاختبارات على الابواب
وطبعاً أنا حبي لش حب طاهر ولايمكن اني ااذيش او اضرش وفي الأخير احبش ♥️


تسنيم رسلت له: 👋🏻☺️

وخطيت ترفع البيت وتكنس وتنظف


https://tttttt.me/+Ecxq_OzMYh40M2E0




📚 @rewayatyamania  🇾🇪

.

البـارت 8 >>

غـربـة والـدي 💗

👌🏻👇🏻 😍
📚 @rewayatyamania  🇾🇪


مرت الايام واختبرت تسنيم واكيد كان يشجعها هشام وكان يشتري لها عشاء أحيانا ويقول لهم اشتراه علاسب يطعموا من أكل البلاد قبل مايسافروا ويراسلها وكان حبهم جميل .....


كان يوميا يرفعوا البيت على شويه شويه ويجهزوا الاداه وقبل السفر باسبوع تجمعوا العائلتين بيت اهل أحمد وبيت أهل أمل علشان يودعوهم


وجلسوا عندهم اسبوع العائلتين وكانت أحلا الأيام


في يوم من الايام هشام بيقرب الغداء للرجال هو وعبدالرحمن (عبدالرحمن ابن عم تسنيم وتقريباً هم نفس العمر )

هشام بيشل الصحون من يد تسنيم وعبد الرحمن يشل الباقي

هشام ماعجبه أبدا

هشام: عبدالرحمن ايش رأيك نتقسم أنا من باب المطبخ وأنت تكون باب المجلس علشان تكون قريب

عبدالرحمن: تمام

تسنيم ابسرت هشام بإعجاب وابتسامه

هشام: والله ياتسنيم عتفلتيني قد هي آخر ايام لنا مع بعض

تسنيم: ماافعل قد هي حال الدنيا

هشام: أهم شي تنتبهي على نفسش ولاتخلي احد يلعب بعقلش

تسنيم: ولا عليك لاتوصي حريص

هشام ابتسم: ممكن طلب

تسنيم: اطلب ياقل.. قصدي يا هشام

هشام: كملي ينفع تقولي ياقلبي وضحك

وتسنيم انحرجت قوي

هشام: طلبي الوحيد أنش توعديني أنش ماتحبي غيري ولو لي نصيب فيش لما ترجعي ونتزوج، واخطبش من عمي أحمد وانتوا مسافرين ويكون العرس اول ماترجعوا

تسنيم: يهي خيالك واسع مستحيل إني اتزوج من الخارج وأن شاء الله يكون لنا نصيب أنا وياك

هشام: فديتش الله يخليش لي قولي لي اخر كلمه بس

تسنيم: 🤨🤨

هشام: قولي أحبك

تسنيم: هشاام الرز عيبرد والرجال مراعيين لك

عبدالرحمن داخلي ووقف يسمع الوشوشه

هشام: هيا قوليها وأنا ارحلي

تسنيم: هشام لاتحرجني خلاص

هشام: هيا ماشي والله ماا اخطى لا اجلس في المطبخ

تسنيم: خلاص ناهي أحبك ❤️☺️☺️

عبدالرحمن دخل: هااا هاااا ماسمعت وضحك فضحتكم

تسنيم: افتتتتجعت قوووي

هشام: اصه لا اندع لك بوكس اخليك تموت

عبدالرحمن: مالك هكذا انا مش أنا حاسد وتسنيم تستاهل كل خير وانت والكل يله تستاهل تسنيم ❤️ الله يوفقكم


تسنيم اُحرجت منه ودخلت المطبخ


عبدالرحمن: امانه ياهشام انتبه لتسنيم لانها بتحب عمي ومالقيت لها سند كون انت سندها
وبعدين دكمه والا اقل لك خلاص قد هي عتفلتك 😝😝وضحك

وساروا يكملوا يقربوا الغداء



وجاء اليوم المنتظر اليوم يوم السفر :

تسنيم: مدري مالي متوووترة ماعاد أشتي اسير

أمل: هههههههههه ياسعم ان احنا عنزوجش أول شي جننتينا انتي واختش وذلحين ماعتشتي
أنا عن نفسي قد أنا مررراعيه اي حين عتطير😂

تسنيم: الله يجمعنا على خير

أمل: آممين


الفجر بينزلوا الاداه والشنط وبعد التوديع والبكاء والاكثر بكااء صفاء على صديقه طفولتها تسنيم 😔

((صفاء جت تمسي عند تسنيم وكانت أحلا ذكريات واحلا يوووم))


خرجووا من البيت للمطار
وهم فارحين ومتوترين في نفس الوقت


أما هشام ودعهم وعلى طول روح البيت صلى غرفته ورقد وهو ضااابح



المممهممممم 😅‌✌🏻


من بعد التعب والسفر  والترنزيت ورسائل صفاء وهشام علشان يتطمنوا على تسنيم وأمل والجهال


اجتمعووا هم وابوووهم وكان اللقاء فظييع حضن من بعد ٨سنيين تقريباً واشتياق وفرررقه وغررربه وتعبب ٠٠


أحمد: الحمدلله اللي جمعني بكم على خير وعافيه
والحمد لله أن ربي رزقني باجمل مرة في الدنيا


أحمد يكلم أمل💗
شكرا لكل لحظه تحملتيني وتحملتي الجهال كل هذا اللي وصلت له بفضلش بعد الله وصبرش عليااا الله يديمش لي وللبنات ولحسونه‌💗


البنات حجفين امهن وابوهنن الله يخليكم لنا الاثنين


تسنيم في دفتر يومياتهاا :
واجتمعت اليوم أنا وسندي وقوتي وبلسمي أبي ،اليوم يسجله التاريخ يوماً لن تنساه ذاكرتي يوماً كنت اتمناه لمدة أعوام وهااا هو اليوم تحقق،،

اليوم يوم جميل بكل تفاصيله لن انسى اي جزء منه أو أي دقيقة أو ثانيه دممت لي أبي عزاً وسنداً وظهراً ياسيد الرجال 💜💜
وساأختم دفتري دفتر غربة والدي الذي تحملني لمده ٧سنوات ب

""عائلتي """
     جهتي الحلوة من الحياة ونورها 💗💗💗


#انتهت




حفظ الله عائلتكم ورعاهم 💗💗
أتمنى أن تنال إعجابكم




https://tttttt.me/rewayatyamania/46112












📚 @rewayatyamania  🇾🇪

رأيكم بالقصة متابعينا الاحباء

غربة والدي

ممتـازة ❤️
جيـدة 💙
لابـأس 💛

مرحبا متابعينا الاكارم..

في اقتراح طرح على الإدارة وحابة اخذ رأيكم فيه.. ايش رأيكم كل فترة نسوي مقابلة مع كاتب او كاتبة..

بحيث نحدد يوم تضعوا اسئلتكم في الادارة ونوصلهن للكاتب/ة ونحدد يوم لعرض اسئلتكم في القناة مع الاجابات

اشوف كم لايك وعليه اقرر المهم اللايكات تتعدى ال500

4 ايام وينقفل الحجز

نكنسل يعني؟؟ اذا ما تشتوا خلاص المشاهدة ١١٠٠ والمتابعين اكثر من ٢٠٩٥٠ والتصويت ١٢٢

طيب حاضر ولا تزعلوا وفوا الـ ٢٠٠ ونحدد موعد أول مقابلة.. وبعدها اكون اكملت تجهيز رواية جميلة لكم

شكرا جزيلا للمتفاعلين🌹🌹

نجمتنا وضيفتنا القادمة

الكاتبة المتألقة والمتميزة

😍أميــــــــــــرة اليمـــــــــن😍


جهزوا اسئلتكم الذي تحبوها للكاتبة وارسلوها للإدارة وسيتم إيصالها لها وسترد ومن ثم سنحدد يوم لعرض المقابلة كاملة في القناة

ارسال الاسئلة مسموح من الآن وحتى عصر يوم السبت

بوت الإدارة من هنا
@YemRewBot