البـارت رقـم 111

انتـقمــت لنفســي 🖤


👌🏻👇🏻 😍
📚 @rewayatyamania 🇾🇪


هاجر : ماله هذا بيجنن !؟ انا اللي قدمت شكوى

الكاتب: اجلسي اشتي اسألش

هاجر جلست: هاه قلت او عتشك فيني

الكاتب: ايش من اتفاق اتفقتين عليه ؟

هاجر لفتت للشغاله وبهررت: هاه حين كنت اوصيها تنتبه على جهالي صح ؟ ولفتت لها مره ثانيه

الكاتب بيشوف حركاتها: هذه النظرات والغمزات على جهالش مش انا

الشغاله خافت بدأت تبكي

الكاتب: اجلسي وجاوبي انتي ايش الاتفاق؟

هاجر قربت تشاورها: والله لو تفضحيني ان انا طلبتش سحر انه من بلاش

الكاتب ضبح من اسلوبها ضرب على الماسه: ممنوع الكلام الانفرادي جاوبين

الشغاله سارحه تفكر كيف تخرج نفسها

هاجر: واثقه فيها انها مالها مصلحه تتكلم على شي زي هذا

الشغاله جت لها فكره لما هددتها هاجر وقررت لو تقله سبب الاتفاق انه عترتاح وتبتعد عنها الشبهه

:هي طلبتني اشوف لها شيخ عشان يتغير زوجها

الكاتب: قصدش مشعوذ؟

الشغاله: ايوه

الكاتب: ياسلام عاد في ناس متخلفه هكذا تثق بناس وتفلت قوة الله؟ خرج هاجر امد مكتب ودخل هو والشغاله في مكتب الضابط اللي بيحقق

 اتكلمي بالضبط كل اللي حصل؟

الشغاله بدأت تسرد كل شي .

مره ثانيه حققوا مع هاجر ومن ضمن اللي سألها كم كان ياخذ وكيف كنتي تدبري له الزلط لايحس زوجش

 فردها كان: كان معي زلط وجمعيات وتمت رجعت آخر مره بعت خاتم واللي بعدها ماعد لقيت الذهب .

رجعوا ياخذوا عنوان صاحب الذهب وحققوا معه لو وصلهم ذهب من الشغاله..

كانت آية في الموضوع بصوره مباشرة  بتتابع معهم التحقيق بعد ماعرفت..
.
.

بعد تعب يوم طويل في البيت..

مصطفى بياكل خلص و بيتشكرها: في ناس ينسحروا بأخلاق وجمال وحماشه وذوق وعلم وايش اقول كمان قلك مشعوذين

آية ضحكت: مش مصدقه انها مجنونه لهذه الدرجه صدقني انهم سرقوها يامصطفى الشغاله وحقها المشعوذ

مصطفى: اكيد ماهذا وهذا عقاب الله فيها تستاهل.

فلت الصحن من يدها لفوق رجلها

مصطفى قام بسرعه يشوف: انجرحتي ؟

آية استغربت: لا مابش شي

مصطفى: الحمدلله ورجع جلس

آية: على فكره انت تغيرت قوي !!

مصطفى استغرب: كيف يعني تغيرت ؟؟

آية: يعني قد حصل لي من قبل أكثر من هذا وماكانت ردة فعلك مثل ذلحين

مصطفى: والله ياروحي انا طبعي لو ركزت على شي ما انتبه للي حولي كم مره اعتذرت لش ع هذك الموقف

آية: تشتي الصراحه مش زاعله ابدا انك غيرت شغلك ومش مهم اي شغل يربحك اكثر اهم شي اني رابحه وجودك معي هذا الأهم

مصطفى حس براحه قوي من كلامها: وانا كل يوم عن يوم اكتشف فيش اشياء تخليني احبش اكثر وما امل منش

آية: وليش عتمل مني ! عيجي يوم وتمل يعني

مصطفى: ياهمتاه بدأ نكد النسوان





















📚 @rewayatyamania 🇾🇪

البـارت رقـم 112

انتـقمــت لنفســي 🖤


👌🏻👇🏻 😍
📚 @rewayatyamania 🇾🇪


سامرين الاصحاب وبيتكلموا

سام: قلت لك آية مش بسيطه وعادها جاهله جيت تقلي ذلحين وقدي محاميه

عماد بضبح: عادها بتدرس

بلال كان قد عرف بالخبر وتطمن عليها وع القضيه بس بيحاول يفهم وجهة نظر عماد: ليش خير ماحصل

عماد: عاد هذا الثاني بيفعل نفسه مش داري

بلال: ايوه كنت معاك اصلا صح

سام: تصدق القضيه رجعت لافوق راس هاجر وهذا الاخجف ودف وصدق لها مره حق ذربه ومشاكل

عماد بعصبيه ومش بيمزح: انت اللي ودفت بي واصل فوق رأسي هرم وطلبات نمسك قضيتها ونحل مشكلتها

بلال شافه معصب: خلاص حصل خير ذلحين يسدوا ماعلينا احنا صلوا على النبي

سام: مصليين عليه..  عليه أفضل  الصلاه والسلام لكن يبطل الطبيعه حقه هذه الزنط عادي لو اعترف انها خسرت قضيته

عماد: تتحداني اوريك من يخسر بيننا الايام انا والا هي قلك مش بسيطة عتشوفوا.


جلس سارح في كلامها له في المحكمه ندم انه تسرع وصرح لها باعجابه لها كان مفكر الموضوع غير وانه خاين زوجها وانها تستحقه حس بقهر ان الموضوع سوء فهم وانه انذل لما كلمها وردت له بهذك الطريقة وماحترمت رأيه.
.
.


بعد أيام قبل بدئ الجامعات اثناء التسجيلات..الخ

عماد: ايوه متطوع ومشتيش راتب شامسك الماده هذه لسنه رابعة شريعه وقانون..

خرج وهو بيتحلف لها بينه وبين نفسه  !

تتوقعوا متحلف لها  خير او شر ؟؟


وصل له اتصال من المكتب حقه انهم حددوا الجلسه في المحكمه لقضية هاجر وآية.
.
.

في المحكمه جمعت لها نسوان الجيران يشهدين على اخلاقها وطباعها ( كل اللي كانين يتنمرين على آية)

وحاسه بالقوه ومتحديه وتتمنى تكسر آية قدام الكل انتقام للي سوته فيها.

آية جالسه هي وعماد مش عارفين لوين وصلوا في التحقيق عشان يبدأوا الدفاع.

القاضي استدعى هاجر والشغاله واقفه وشخص واقف 

بدأ بالشغاله: ايش حصل بالتفصيل لما شليتي الذهب ؟

الشغاله: انا كان فوقي دين سلف وماما ماتجيب كل الفلوس اللي يديها بابا تخبي ربع منها والباقي تقلي يكفي ويوم جنني هذا تهديد يشتي فلوسه قلت له يبيع الذهب ويشل حقه ويرجع لي الباقي وكذب

هاجر: ذهبي انا ؟؟؟؟

آية وعماد لفتو لبعض اول ماسمعوا

آية كلها ثقه رجل فوق رجل مبتسمه بتشوفه بتحدي

الشخص: انا مش مشعوذ بس جننونا النسوان كل يوم يشتوا سحر ومافي شغل قلت اسوي كذا

هاجر منصدمه والنسوان جيرانها منصدمات فيها كيف تسوي شي مثل هذا وتتهم آية انها هي

بدأت القاعه كلها بالازعاج واصوات همس ..

القاضي استدعى هاجر: لو جينا للحق نعاقب والكل الناس للي بتشاركهم وتدي لهم قيمة وتصدق بهم اكثر من ربها ايش رأيش حددي عقوبتش !؟؟

هاجر مفجوعه بترجف: انا اتعاقب !

هاجر بدأت تمثيليتها تبكي وتتمسكن: هي قالت لي شيخ ويقرا من العين والسحر ونصبوني وانا مالي دخل

الشغاله: كذابه انتي قلتي تشتي عمل سوينا كثير عمل لبابا و زوجه بابا ، والله هي واحده كذابه كل اللي قالته في آية كذب ..

جلست تحكي وتوضح كل شي اتهمت آية فيه

بداين النسوان يتكلمين عليها كلهن ويتشاورين

آية قامت: الي سرق يتحاسب و بق

عماد وقف وقاطعها فكر باتتهم مرة ابوها: اعتقد مثل ماقالت هي مالها دخل واكيد المتهمه واللي متعاونه معه بيرجعوا كل المشاكل فوقها طبي

ايه قاطعته ولفتت للقاضي: اظن ماعد في شي نتفلسف فيه وندافع عليه الموضوع واضح اللي حابه اقوله ان هذه ( اشرت لخالتها ) مالها دخل بالموضوع رغم كل اللي سوته الا انها أم وحاضنه لأطفالها ماسوت اي جريمه قانونيه تستحق عليها العقوبات، جرائمها أنسانيه والحاكم الوحيد هو فوق مش أنسان.

كانت هاجر صغيره عاجزه ذلتها كلمات آية

رجع الموقف والناس كلهم يتكلموا على طيبتها وكيف رجعت هي تدافع عنها رغم كانت القضيه عليها.

بس مانسيت الشغاله حاولت توقف مع قضيتها عشان يخففوا عقوبتها و((تحمل الشخص اللي سرق الشغاله وهاجر ومارضي يدي للشغاله فلس ))

ووعدتها تمسك قضيتها اذا تخرجت وسمحوا لها بمزاولة المهنة.


على خرجتهم..






















📚 @rewayatyamania 🇾🇪

البـارت رقـم 113

انتـقمــت لنفســي 🖤


👌🏻👇🏻 😍
📚 @rewayatyamania 🇾🇪


على خرجتهم..

عماد: اضمن لش من الان بتمسكي القضيه .

آية شافته مبتسمه عادي: عارفه وعاد الجاي اقوى

عماد: اذا الموضوع تحدي ، اخاف بدل ما ادعمش أعقدش من أولها

آية: وانا اتحداه أي حد يقدر يعقدني وخرجت

عماد بيضحك وداخل نفسه مصدقه نفسها المره هذه مشيت معاها هذه عشان مش قضيه والحق كان معها
بس طيب يا آية باتشوفي .


خرجين النسوان حق حارتهم ويمسكين يدها: يو يا بنتي والله ماكنت اعرف .. والثانيه قد ربش كبير كشف الظالمين .. والثالثة آية سكتتها

وانا ماتهمنيش ولا منتظره حد يشمت فيها  تسلمين كلكن.. مع السلامه

ام سام واقفه بتتفرج هاجر ماقدرت مثل كل مره توقف معاها راحت لاعند آية تطلب السماح على كل شي سوته فيها ووقفت ضدها مع هاج

كانين بيتكلمين لما وصلين للحوش وسام منتظر ومصطفى بيقرب السياره

آية لأم سام : وايش ينفعني ذلحين هذا الكلام ! اتقوا الله في كل همزه ولمزه ، بطلين تفعلين للناس قصه وتقييم وتحكمين انتين مش الله خلين تفرطاتكن مناقشه كيف تربين عيالكن كيف تتعبين على دراستهم مش فلانه وعلانه وخراب بيوت الناس اتقين الله عشان مايجي لكن مثلها يوم مثل هذا

سام بيسمعها وساكت ماقدر يدخل خاصه ومش عارف ايش حصل بس شاف امه ماسكه يدها وتستسمح منها

آية طلعت مع مصطفى مبتسمه وهو بيصلح لها حجابها

كان سام واقف بيتفرجها وتعامل مصطفى معها ويكلم امه: من يصدق هذه المجنونه سبرت عيشتها مع زوجها

أمه وهي بتبكي: والله ما مجانين الا احنا وان البنت عاقله ظلمناها حسبي الله عليش ياهاجر حسبي الله فيش ونعم الوكيل.

سام بعصبيه: هيا اطلعي هاه مش وقت ذلحين تتصايحين

امه طلعت وبتشرح له كل شي حصل.
.
.

فاروق رجع للبيت نظيف ومرتب وطبخت وجالسه تغديهم الصغار وتجابر ابنه الكبير وتشرح له سؤال سألها

فاروق دخل سكته شاف الفرق

هناء: يلا اغسل يدك واجلس اقرب غداء

فاروق راح يغير ثيابه ..

هناء لحقته للغرفه: اطلب منك طلب

فاروق: انتي تتحاكي بس وكل شي يمشي مش بس تطلبي

هناء: اشتي الجهال تسمح لهم يسيروا اليوم عند امهم حرام فاقدين لها قوي وزد هي اكيد عتكون متأثره وفاقده لهم

فاروق: انتي تشتي تجننيني صح عتجلطيني جلطه ثانيه

هناء: ماشي مش قصدي والله خلاص براحتك سهل اي حين ماتشتي

فاروق مبتسم لها: انا اقصد من طيبتش يعني انا شفت وعشت مع شي والآن عكسه تماما بين اشوف سبحان الله ريت والله وكنتي مرتي من اولها وربيتي آية انتي البنت هذه انظلمت وانا في غفله ماذهنت الا اخر عمري

هناء: الله كريم مابيفلت حد شوف كيف عايشه

فاروق: ولو في شي انكسر داخلها لكن الحمدلله على كل حال

هناء: المهم ذلحين موافق يسيروا ؟

فاروق: اللي تشوفيه صح سويه قدش امهم الثانيه انتي واخبر بهم .
.
.


في المطعم منتظرين لطلبهم يوصل ..

مصطفى بيقلدها ويقلد كلامها

آية جلست تضحك وتسكته بالمنيو وكل مايتكلم تسكته

مشيوا من جنبهم اطفال

مصطفى رفع يده: اي حين ربي يرزقنا

آية: هانت اخر سنه هذه وبعدين اوحم

مصطفى: توحمي من نصها وتكمل السنه وقد معنا جاهل

آية: تصدق كنت متخوفه ومأجله فكره الخلفه لايقع ببنتي مثلي واموت كنت خايفه اموت وهي صغيرة وتبقى وحدها

مصطفى: وانا !! وين رحت ؟

آية: انت عتتزوج اكيد وانا خايفه تدي لها خاله

مصطفى بحماس وابتسامه: مثل خالتش الشريره  باقي مع خالتش خوات !!

آية ضربته مره ثانيه بالمنيو وضحكت مالك اليوم عليا تشتي احبسك

مصطفى: بس لو انا بش ما اتعقد يعني هكذا تشبهي سندريلا واهم من في القصه الأمير وبيصلح الكرفته

آية بابتسامه كلها حب ودلع : تشتي الصدق أمير صدق بس اكتشفت انك أمير من قريب يعني كنت مفكرتك سواق الأمير..

مصطفى: من صدق حابب اعتذر لش على كل لحظه كنت فيها مشغول عنش وبعيد منش كنت مضيع هذه السعاده كلها عشان ايش وياريت منه فايده كان حريق دم شغل واصل وهم ومشاكل.

آية: الحمدلله .

مصطفى: مدري ليش وافقت يخطبوش لي


















https://tttttt.me/joinchat/AAAAAEIz_KDfjDgo7Gaxwg




📚 @rewayatyamania 🇾🇪

البـارت رقـم 114

انتـقمــت لنفســي 🖤


👌🏻👇🏻 😍
📚 @rewayatyamania 🇾🇪


مصطفى: وقتها كان مجرد دحس الأهل انه وقت اتزوج وامي ترتاح تشوفني مستقر ومفكرها كنت عيشه يوم حالي يوم عادي مثل كلام اصحابي

آية بتسمعه وبتحس نفس الأحساس: ايوه

مصطفى: بس ماندمت ولا مره واحده انش وقعتي مرتي بالعكس دايما احمد الله وأشكره انش كنتي انتي مرتي

آية: رغم تصرفاتك ماكانت مبينه ابدا هذا الشي

مصطفى: تعرفي يا آية ايش اخس صفه في مجتمعنا انها ظلمت الكثير وحصلت خلافات كثيرة،  ما ادولناش فرصه نختار الشخص والبعض لو اختار الشخص مايحصل معرفة بينهم ويحددوا في توافق او لا

آية: بس انت لو تشوف القضايا اللي أغلبها  الآن من بنات انخدعين نفس الشي برأيي بيعتمد هذا الشي على مصداقيه الشخص نفسه كم يا ناس تعرفت على ناس وطلع واقعهم غير كلامهم عن نفسهم

مصطفى: وانتي ندمتي انش اخترتيني!

آية: بصراحه في اشياء بتوازن اشياء في علاقتي معك ، مثلا احترامك لي واحترام مساحتي الشخصيه وحريتي في حياتي العامه وانك بتدعمني خلتني اتغاضى عن تصرفات ماحبيتها فيك ، كنت كل اهتمامك وشغفك ووقتك لمصلحتك اوكي حقك مثل ماجبت لي حريه شخصيه بس كنت افكر لو معنا اطفال وينك عنهم كل وقتك

مصطفى: يعني لو ماكنت تغيرت وغيرت شغلي ورجعت وازنت بين شغلي وانتي !

آية: كان اكيد بنوصل لنقطه اختلاف ومشاكل

مصطفى: والحمدلله انه ماوصلنا لها

كان النقاش والحوار والتفاهم في حل مشاكلهم بيزيدهم حب و اعجاب بأفكار بعض كان ملح الحياه المقبول مش بالمشاكل الثقيله تسمى ملح الحياه لأن المشاكل الكبيره هي مر الحياه .
.
.


بيت أهل هاجر..

هاجر كان دورها تنظف المطبخ وتسوي غداء

مرة اخوها دخلت تجهز رضاعه ابنها وبتشرب ماء بدأت تشرب ورشت بقيه الماء للارض: ييييخ كيف غسلتي القلص كله زفر امانه كيف كان متحملش فاروق

هاجر بضبح: كان معي شغاله ياروحي

مرة اخوها: كان مفروض تتعلمي منها عشان مثل هذه الايام اللي انتي فيها !

هاجر: قصدش انا شغاله !! تقصدي هكذا؟

مرى اخوها : شوفي لاتدوري مشاكل ماعد حد طايق لش في هذا البيت اخوش قدو متحلف لش جننتينا مشاكل ومحاكم وسمعتي بنا كل مكان بس هذا عقاب الله ماخليتي حد في حاله نسيتي كم كنتي تعلمي اخوش عليا كم ايام عشتها مقهوره من تحت راسش وكنت شاتطلق

هاجر: وياريت اطلقتي بس تستاهلي عيشتش معه هي اكبر عقاب بتمثلي انش مفتهنه وانا اعرف طباع اخي بيشبعش حياه ومشاكل

مرة اخوها بضحكه مستفزه ويدها على خصرها: كان زماااان ياحياتي بس الشيخ حقي كان صدق مش سارق مثل الشيخ حقش ( وضحكت ضحكه مستفزه)

وبتداعيه
يا زوجي ياروحي ..

جاء يجاوبها

شل الرضاعه اديها لابنك

اخو هاجر: حاضر ومشي.

مرة اخوها: ولو اشتي ذلحين اقله يقلعش من البيت اقدر بس حرام ماعد بش معش مخلوق.

هاجر معصبه وتشتي تبدا ترد وو..

مرة اخوها خرجت وقفلت عليها باب المطبخ وهي بتضحك وداخل نفسها: ( استغفر الله لاشيخ ولاشي اعوذ بالله اعوذبالله هو الا بس اجننها كيف متفاهمه مع اخوها وتقتهر انها ماقدرت تفرقنا زمان ).

هاجر تمت تطبخ وجالسه سارحه شافت عيالها جوا لاعندها دخلوا من الحوش فرحت وقامت لاعندهم حضنتهم وغرفت الغداء وقربت..



فوق الغداء ..

مرة اخو هاجر طيبه بس ماكانت تبين قدامها طيبتها منقهره من تصرفات هاجر وكل اللي سوته في الناس وشرها ( كانت تقرب لعيال هاجر وتغرف الاكل قدامهم..


في المطبخ..

دخلت مرة اخوها تسوي الشاهي

هاجر متجمله من معاملتها لعيالها: انتي لسانش شي وقلبش شي ثاني

مرة اخوها : تعرفي ليش!! عشان بين افعل حساب ليوم مثل هذا ( اشرت عليها ) اخاف اكره واحقد واظلم حد وربي يرجعه لي بيوم من الأيام اما اللي بين افعله معش بين انتقم لنفسي وارد لش كل كلمه جارحه جرحتيني بها من قبل..

وخرجت من المطبخ.
.
.


بعد أيام رجعت تداوم محاضرات أخر سنه وتحضر تدريبات في مكتب محاماه ايام فراغ محاضراتها..


في قاعة المحاضرات

دخل عماد بثقه عرف عن نفسه وانه بيكون استاذ ماده من موادهم

آية ضبحت لما شافته طرحت دفترها والقلم فوق الماسه لما انضرب سلك الدفتر طلع صوت لفت انتباه عماد وشافها

عماد مبتسم وهو بيعرف عن نفسه: واكثر شي احبه في نفسي هو لما يتعقد مني شخص ازيد اساعده اكرهه فيني لما يشوفني زي الناس ويفهمني























📚 @rewayatyamania 🇾🇪

البـارت رقـم 115

انتـقمــت لنفســي 🖤


👌🏻👇🏻 😍
📚 @rewayatyamania 🇾🇪


مكان ثاني..

اخت فاروق بتتكلم مع هاجر: لاتعاتبيش مشغوله بيت فاروق مرته واحمه وبين اعاونها في الجهال

هاجر: ماذلحين قد بتعاونيها

اخت فاروق: تشتي الصدق والله انها مسكينه ولو تشوفي كيف بتعامل جهالش ولو جينا للصدق انتي جعجعتي اخي مدري كيف صدقت لش جلستي توسوسي لي بس الحمدلله حين ذهنت

هاجر: ماذلحين قدو اخوش ، وبعدا بنته قد شلت ورثكم كله ماعد بش فايده انش تدوري مصالح منه

اخت فاروق: لاعد تحاوليش كان زمان اصدق لش وابليسش ماذلحين الحمدلله دريت بالفرق

هاجر قفلت وهي مقهوره وقررت اخر خطه لها تحرق قلب آية وتسير تتكلم عند اهل زوجها ولزوجها عن هروب آية وكيف يرضوا ببنت معها مشاكل وقضيه وينتبهوا منها..

بعد ماعرفت موقع بيت ام مصطفى من جارتها القديمه راحت لها..

اول مادخلت كانت موجوده بنتها استقبلتها ودخلت في الديوان منتظره..

ام مصطفى بتصلي العصر

بنتها لهاجر بعد ماعرفت بنفسها وقرابتها لآية: خير ايش في ؟؟

هاجر: شكل امش ماتشتي تقابلني بس انا الصدق جيت ابري ذمتي ، ومصطفى عادو اخوش

اخت مصطفى منصدمه من جيتها والكلام اللي بتقوله: يووه يعني هذه مصيبه على اخي صح ؟

هاجر: انا قلت لش وانتو اخبر

اخت مصطفى: خلاص انا شاكلمه يطلقها

هاجر حست براحه انها بتنتقم من اللي قد سوته آية فيها (نسيت اخر موقف معها في المحكمه).

روحت قبل ماتتليقن عليها ام مصطفى بحكم علاقتها القويه بآية


راحت للحاره حق بيت فاروق..

لقيت ابنها بيلعب.. مسكته وجلست تكلمه: ايش سويت من اللي قلت لك !

ابنها بيحاول يتهرب منها ويشوف اصحابه بيلعبوا يشتي يلحقهم: ماقد سويت شي

امه: ماتشتي ارجع لكم !

ابنها: الا بس ماقد قدرت افعل شي

امه بعصبيه: ليش

ابنها: مدري مش وقت ذلحين بعدا يمه مش وقت وهرب منها

هاجر  مشيت وهي بتتحلف لهم كلهم: والله لانكد عيشتكم كلكم مثل مانكدتوا عليا عيشتي


بعد مارجعت بيتها..
.
.

آية بتغسل الصحون ومصطفى واقف بيشرب شاي : كيف كان يومش

آية: عادي بس لو تعرف من عيدرسنا في ماده من المواد

مصطفى: من؟

آية: عماد

مصطفى: يخ كم اعصب لما اشوف او اسمع اسمه ماصدقت خلصت من جلسات المحكمه

آية: وانا مثلك

مصطفى: مش مرتاح له ابدا

آية: ماعلينا منه ، انت كيف شغلك

مصطفى: رواق هادئ مرتاح نفسيا والله يعني اشكرش انش السبب للراحه اللي وصلت لها ماكلفني الله

آية: ما رأيك اليوم نزور ابوك ونرجع بيت خالتك

مصطفى: ورجعت تقول خالتك ، أمي

آية: نسيت نسيت امك الله يحفظها..

مصطفى سمع رنه تلفونه راح ياخذ التلفون من فوق الطاوله وبيقرأ اسمها اخته بيقول لآية: عمرها طويل اختي بتتصل..
.
.

في مكان ثاني..

اخو آية بيكلم اخوه الصغير: انتبه تصدق اللي علمتك امي وقالت لك نقول لأبي

اخوه: انا اشتي ترجع مثل ماقالت

اخوه: بس لاتصدق ماينفعش نفعل هكذا

ابوه كان داخل لاعندهم يشوف مذاكرتهم وسمع الكلام دخل يسألهم ايش علمتهم.

ابنه الكبير بهرر لاخوه يسكت وتكلم هو: ولاشي

ابوه: اتكلم!

ابنه: ولاشي هي بتعلمنا نذاكر ون

ابنه الصغير: كذاب هي قالت نقلك ان خالتي بتضربنا وتحبسنا وت..

فاروق قاطعه: وخالتك بتفعل هكذا صدق!!
.
.


نرجع لبيت مصطفى..

اخته: وينك ولاعد شفناك ولاشي

مصطفى: عاد احنا بنذكركم ذلحين انا وآية

اخته بنبره جاده شويه: آية !!

مصطفى بممازحه: ايوه او مش مصدقه

اخته: ما رأيك تجي بدون آية

مصطفى: ليش؟

اخته: عشان في موضوع حابين نكلمك فيه وحدك

مصطفى: اقلقتيني ايش في تكلمي الان

اخته: اعرفك عتعصب وماعتتفهم قلت لك لما تجي

مصطفى: ياجناه عتتحاكي

اخته بمحانكه: لا لوما تجي.

مصطفى: الان جاي
.
.


بيت فاروق

فاروق: جاوب وهي بتفعل هكذا !

ابنه الكبير ...





















📚 @rewayatyamania 🇾🇪

البـارت رقـم 116

انتـقمــت لنفســي 🖤


👌🏻👇🏻 😍
📚 @rewayatyamania 🇾🇪


ابنه الكبير: لا مابتفعلش عشان هكذا بين اقله يسكت لايكذبش ويفعل لخالتي مشاكل والله انها احسن من امي من حين ذاكرت لي وانا بين انجح ومن حين بتجابرني كيف اتعامل مع أصحابي ماعد حد بيزيد عليا

الولد الصغير: بس انا احب امي

فاروق: وامك مابتحبك لما بتعلمك الكذب والشر هكذا ولو عتصدقها عتوقع مثلها و محد يحبك ولا يصاحبك

هناء دخلت وماحبت كيف بيكلم ابنه ع امه حاولت تخرجه وتتفاهم معه: على الاقل لما يكبر الان عادو طفل مش فاهم شي غير هو بحاجه امه ، عن نفسي انا مايهمنيش ايش بتعلمهم وايش يفعلوا هم جهال اهم شي انت مصدق لي وواثق فيني

فاروق هدأ من غضبه شويه: لاحول ولاقوة الا بالله ماعدناش داري هذه المره اي حين عتعتبر.
.
.

في بيت امه

مصطفى دخل: خير ايش في ؟

اخته الصغيره سحبته لغرفتها: خليك هنا اكلمك انا اول قبل ماتفضحني قدامهم

مصطفى: منهم ! ايش في

ام مصطفى: علياااء ياعليااااء مصطفى جاء ؟؟

علياء: اجلس لاتخرج شاقلها اكلمك اول وبعدا سهل

خرجت تجاوب امها

ام مصطفى: مصطفى وين

علياء: في غرفتي اشتي اكلمه

امها: قسما بالله لو تدي له حرف والله العظيم

علياء قاطعتها وهي بتضحكك: ايش فيها!

امها : استحي على نفسش قلك مافيها خالتها حق مشاكل وبتدور..

علياء قاطعتها: يووه قصدش اكلمه ع مرته ، لا ماسخاش ع آية

امها: الا المنافقه يا بناتي وخراب البيوت الله يهديكن ماتشتي منه طيب

علياء: حاجه

امها: والله لو تطلبيه زلط

علياء: خلاص يمه قوا والله ماهو زلط هيا لايخرج اشتي اكلمه على شي

دخلت غرفتها وقفلت

مصطفى: ساعه قلت او بتسوي لي حنيذ ورجعتي ومابش حتى قلص عصير

اخته: اكيد آية ماقصرت ادتك شابع ذلحين مش وقت بطنك اشتي اكلمك يا اخي حبيبي انت الوحيد اللي عتتفهمني وتحاكي الكل وتقنعهم قوا قوا

مصطفى ابتسم وبزنط: دريت تشتي تسافري تدرسي الماجستير

اخته بخزا: لا ، في شي ثاني

مصطفى: عريس

اخته انصدمت: كيف عرفت

مصطفى بضبح وعصبيه: من وين عرفتيه يابنت وبعدا جايه تكلمي مصطفى او مصطفى مابيغير عليش ومش اخوش

اخته بخوف: هو حين انت متفهم كلمتك وبعدين والله مابيكذب مراعي لي اتم ويشتي يجي

مصطفى ابتسم لها كان بيمزح معها: احلى منش!

اخته رجعت تستحي: هيا مصطفى بس خباله

مصطفى: ماناش موافق

اخته: طيب ماقد عرفته

مصطفى: مش موافق حد يجي سكره البيت يعني لو جيت من يدلعني ويميزني وينكت لي تشتي تنخطبي وتتزوجي والضحك والدلع له هاه

اخته ميته خزا وبتضحك: هيا مصطفى من قال لي اكلمك

مصطفى بيمازحها مهنجم: اول أعرفه ويجلس معي اشوفه وبعدين ادعمش عند الكل اذا عجبني انا
.
.

فاروق اتصل لاخو هاجر يهدده انه مرته لو ماتبطل تعلم جهالها لايحرمهم منها..

اخوتها كانوا ضابحين منها ومن المشاكل اللي بتفعلها لنسوانهم منعوها من الخرجه ابدا لو تشتي شي تكلمهم..

كانين نسوان اخوتها يردين لها معاملتها لهن ويجبرنها كل يوم على عمل البيت كله كان اخر اليوم تكون مرهقه بطلت تفكر في آية وعيالها واي حد رجعت تتقرب من الله وتغيرت وندمت على عمرها اللي ضاع في حسد وشر كان فات الاوان وضاعت عليها حياتها بس حاولت تسوي شي لاخرتها وتستغفر للشر اللي سوته في كل الناس .
.
.

الأيام مرت بسرعه ماحسوا فيها

آية تروح هي ومصطفى الشغل والجامعه ويرجعوا يتغدوا ويقضوا العصر بيت اهلها واهله اوقات واوقات يتمشوا وبحوث وتجهيز لحفل تخرجها ، كانت كل يوم تتعلم في حياتها شي جديد من القضايا اللي مسكتها في منظمات تطوعية لتدافع عن حقوق الفتيات من زواج مبكر وتعنيف وطلاق وحرمان التعليم كانت ناشطه وتميزت قبل ماتاخذ رخصه مزاوله المهنة وبطاقه المحاماه بس استحقتها بسرعه للخبرات اللي جمعتها اخر سنه دراسية لها..



يوم التخرج..

آية كان لها اسبوع مخبيه نتيجه الفحص اللي رسلوه لها عشان تفاجئ مصطفى في هذا اليوم..

مصطفى شافها لابسه ومتأنقه: ياسلام ايش الاناقه هذه كلها وبعدين تقدري تمشي بالكعب هذا !

آية ايوه بمساعده واحد

مصطفى ضحك: بعقلش اطلع اتحملش انا ونتكرم انا وانتي

آية بدلع كانت لابسه تيشرت صور زوج وزوجه  لابسين كوفيه تخرج وصوره طفل وكأنها الزوجه حامل لابس كوفيه تخرج صغيره

مش انت فتحت ازرار عبايتها: ابني

مصطفى منذهل بفرحه ماعرف كيف يعبر عن شعوره هذك اللحظه: يعني انتي حامل!  آية !! حضنها بفرحه

آية بدلع: خربت حجابي

مصطفى بفرحه وحماس: مش وقت حجابش وتخرجش ليش ماقلتي لي اي حين عرفتي في الشهر كم؟

آية ضحكت شافت الساعه: مجنون شهر كم عادو اسبوعين بعدين هيا تأخرنا بتلبس وتدور شنطتها

مصطفى: راعي مش مصدق اليوم احلى يوم بحياتي تخرجش وابني ونجاح شغلي يارب لك الحمد والشكر

آية دمعت من فرحه مصطفى: يارب ي روحي ايامنا كلها فرحه


















https://tttttt.me/joinchat/AAAAAEIz_KDfjDgo7Gaxwg




📚 @rewayatyamania 🇾🇪

البـارت رقـم 117

انتـقمــت لنفســي 🖤


👌🏻👇🏻 😍
📚 @rewayatyamania 🇾🇪


وقت اهدائها الكلمه والشكر لأبوها وزوجها وفجأه وهي من بين المعازيم هي وبلال ومرته وامها

: للاستاذه و رفيقه الدرب والانسانه اللي لولاها بعد الله ماكنت في المكان هذا اهديها نجاحي : الاستاذه رحاب

 بعد الحفل
كانت هديتها من مصطفى فاجأها انه مجهز لها مكتب محاماه بأسمها وبعدها بدأت تمسك قضايا بسيطه وتساعد المساكين اللي ماعندهم حق الاتعاب وفي يوم

وصلتها قضيه شخص وتفاجأت ان عماد محامي خصم موكلها حست بتحدي بعد مافازت بالقضيه حق المشعوذ ( وانحبس لانه رسل الفلوس كلها بلاده )
.
.

في المحكمه
القاضي : وبعد النظر في القضية يبرئ المتهم وتدفع التعويضات من قبل موكل المحامي عماد
رفعت الجلسه

بعد ماخرجت والتقوا بالسياره

فتح الطاقة: آية لهنا وانتهى التحدي بيننا انتي افضل واقوى طالبه وبنت شفتها والتحدي اللي بدأ كان دافع مني لش ودعم لانش عنيده جيت لش بهذا الأسلوب وفي يوم بلقاش جالسه مستشاره مش بس محاميه الله يوفقش .

آية فرحت من كلامه .
.
.


بعد شهور كانت كأنها سنوات عليها هي ومصطفى اي حين يلتقوا بطفلتهم في المستشفى منتظر جنب غرفه العمليات بقلق هو وابوها واول ماخرجت راح اخذ بنته رغم خوفه وقلقه على آية و فاروق كان جنب راس آية

اول ماحضنت بنتها ودمعت كانوا خارج بيخلصوا اوراق المستشفى حست بحنان وامان وجلست تتكلم معها كأنها شخص عاقل بيفهمها..


(( انتي مصدقة ان حضنتي لش هذه عوضتني كل حضنه كنت محتاجتها بحياتي من امي، انتي مابتكوني مثل اي بنت عاديه بربيش تربيه غير بعوض لش كل نقص احتجته بحياتي ، مابخليش تكبري وتتعبي عشان تفهمي الحياه ، بعلمش بكل سهوله بدون ماتنزل منش دمعه واحده، مابخليش تكبري تنتظري رجل تتزوجيه عشان تهربي من واقع وحياه ماتحبيها، بخليش تتزوجي عشان تعيشي حياه حلوه ، بخليش تدرسي عشان تتعلمي وتستفيدي مش عشان تنجبري تاخذي شهاده وتدعمي نفسش بها، لما تكبري وتطلعي حلوه مثلي ماتسلمي قلبش لأي شاب يتقرب منش الحبيب يتخلى لما تستسلمي بسهوله والصديق المحترم بيبقى لش أخ مثل خالو بلال ماتخلي حد يستقوى عليش ويظلمش دافعي عن نفسش لاتخافي من حد، قولي لا للغلط وللغلطان ، لو شفتي حد مايشبهش لاتحكمي عليه وتتنمري وتلوميه قد يكون عاش واقع غير الي عشتيه وانحرم من اشياء بحياته ساعديه افهميه لاتحكمي على حد الا لما تعاشريه، لاتسمحي لحد يتكلم عن حد بغيابه، كوني مثل اسمش نقاء ، لاتخلي الحياه والناس تلوثش ،

الناس يابنتي متعبين عشان تفهميهم خلي اصدقائش معدودين وكثري الكتب وتعلمي كل يوم حاجه جديده اذا لقيتي بيوم حد ضعيف مكسور محتاج اوقفي معه ..

تعرفي كل اللي كانوا يعرفوا قصتي يحسوا بشفقه عليا ويفكروني انظلمت وانا الوحيده اللي مستمتعه بكل خطوه خطيتها بحياتي وغيرتني للأفضل وبالعكس انتصرت وانتقمت لنفسي

مسحت دموعها وهي مبتسمه وبنتها بتتفرجها وترمش بعيونها وكأنها مركزه معها بدات تتثاوب وتنعس !

والا اقلش صعبت عليش الحياه صح !!
يارب يطول في عمري واكون لش احلى أم

دخل مصطفى: من بتكلمي؟

آية حضنتها: روحي

مصطفى قرب من آية حب راسها وجلسو يتأملوا ملامحها من تشبه

وصلت ام مصطفى بعد ماجهزت لها البيت والاكل وكل شي

ورجعت لحياه مريحه بعد الحياه اللي بدأتها بتعب.



#انتهت










https://tttttt.me/rewayatyamania/39767




📚 @rewayatyamania 🇾🇪

🖤


بـارتـات يومنـا السـبـت والأخـيــرة👆🏻😍

تعليق الكاتبة عبير الكبسي👇🏻😍

خالص تقديري ومحبتي لكل متابعين رواياتي ،يسعدني مشاركتكم تقييمكم وانتقادكم للروايه، و انتظروا القادم قريبا عبير الكبسي

للتعليق عبر بوت الإدارة

@YemRewBot

متابعينا الجدد..


اهلا وسهلا بكم🌹🌹🌹 ولقراءة الروايات السابقة اتفضلوا عبر هذا الرابط

https://tttttt.me/ArchiveRY2/80

نشكر كل من تفاعل وشارك وإليكم برد الكاتبة المتميزة عبير الكبسي👇🏻😍

لكل من تابع بصمت وكل من قرأ وعبر عن روايتي بحروف أسعدتني.. لجميع التعليقات والردود التي وصلتني
أنتم الحافز الجميل لقصصي دائما و أبدا شكراً جزيلاً من اعماق قلبي لردودكم الرائعة وانتقادكم البناء أنتم الأروع ولكم اهدي نجاح رواياتي كونوا دوماً بإنتظار كل ماهو جديد كل تقديري لكل من علق وأرسل كلماته الرائعه🌹🌹🌹🙏🏻🙏🏻🙏🏻

.

#انتظرونا ومع قصة جديدة للكاتبة هنـاء عبـدالعـزيـز بعنـوان


ضيـــاع

ابتداءً من مسـاء غدٍ الثـلاثـاء بإذن الله

وذلك على قنـاتـكم روايـات يمنيـة عبـر الـرابـط التـالـي😍👇🏻


https://tttttt.me/joinchat/AAAAAEIz_KDfjDgo7Gaxwg

قصة ضيــاع للكـاتبـة: هنــاء عبـدالعزيـز