تم التعديل👆🏻👆🏻

البـارت رقـم 21

انتـقمــت لنفســي 🖤


👌🏻👇🏻 😍
📚 @rewayatyamania 🇾🇪


بيت رحاب..

آية خلصت تصلي وفتحت لها الباب وهي عيونها بعد بكاء

رحاب حست عليها بس مابينت لها: كنتي بتصلي؟

آية بتخبي نظراتها وتتهرب: ايوه

رحاب: البسي بسرعة نخرج السوق

آية : تمام.

رحاب خرجت فوق السياره وبتكلم بلال: حاول لاتتقرب منها هذه الفتره

بلال: ليش

رحاب : لانها في سن وظروف فيها عتخليها تتعلق بأي حد !!


شافو امهم خرجت وآية نفس الوقت سكتوا


في السوق
نزلوا سوبر ماركت كبير صادفت العائلتين في نفس المكان!

رحاب وآية في قسم الأدوات المنزليه

بلال وأمه بيتمشوا على بقيه الاقسام ويجمعوا اشياء


في قسم القرطاسيات ..

فاروق واقف بعيد عن مرته بيتكلم مع صاحبه في التلفون ومرته بتتكلم مع اخت فاروق في التلفون وهي بتشوف مع عيالها الأشياء وظهرها لفاروق : يعني برأيش هذا الحل امد يهجعنا هدارها؟ اخاف يجنن اكثر ويقلب الدنيا عليها ...

سكتت تسمع رد اخت فاروق..

فاروق كمل وجاء وواقف وراها يشوف العيال بيجمعوا وبيسمعها

مرته ماحست انه وراها تفتكر مراعي لهم مكانه بعيد عنهم: الله يحفظش كيف اقله ابسرتها مع واحد ماعيصدقش هو يعرف بنته تشتي اكذب عليه كذبه ساع هذه قولي بغيرها..

فاروق سمعها سحب التلفون من وراها

مرته نكزت وخافت متوووتره فلتت ومشيت لايتصايح معها جلست تمشي  عشان لايتصايحوا قدام الناس...



ام رحاب : أخيرا لقيناهن هيا سير ادعي رحاب احاكيها

بلال مشي لاعندهن مسك رحاب :جاوبي امي

رحاب: طيب ابسر آية اوقف معها الرجال بيتفاقد لها الشوله

بلال: تمام سيري امي مراعيه

آية: يعني عاد يحتاج لها دبه غاز صح؟

 بلال واقف وبيشوف الرجال لفت لها بيضحك: مع على الكهرباء عتشتغل

آية ضحكككت: كون بطل تعلق على كل شي


خالة آية مرت ابوها مصدومه شافتها  وتاكدت لما آية لفتت وضحكت له وهم واقفين وحدهم

فلتتها ورجعت لاعند زوجها بتدور فين هو ؟

 بلال اخذ السله ومشيوا للمحاسب بيحاسبوا

رحاب بعد ماشافتهم بيضحكوا جالسه تكلمه: انتبه لتصرفاتك اخر مره احذرك لو حد شافك من الاهل او خطيبتك او اهلها ؟؟



ابن فاروق : اين انتي يا ماما بابا بيدورش في كل مكان

امه: اين ابوك ؟؟

 ابنها : قد حاسب وخطي للسياره .

امه سير أدعية الان قل له يجي آية هنا

ابنها باستغراب: آية اختي

امه ضربته : هيا سير ادعيه بين اقلك بسرعه

ابنها بيجري بسرعه خرج من البوابه ومشي  لف يسار للسياره حق ابوه

رجع فاروق بعد ماسمع الخبر بسرررعه للسوبر ماركت

: اين آية ؟ لقيتيها فين ؟

 مرته خايفه ومرتبشه: هانك قسم الادوات المنزليه مع واحد لابس شميز جنز وبنطلون ابيض وهي لابسه حجاب ابيض مخطط بأسود

فاروق سحبها من يدها بعصبية: انتي ناسيه ان انا كنت واقف وانتي بتخططي مع اختي! اخرتكن طلعتين متفقات على البنت ؟

 مرته بتتفرج الناس كلهم بيشوفوهم وهو معصب: وطي صوتك ولاتضيع وقت والله ان بنتك هنا

فاروق: الان شاخليهم يغلقوا كل البوابات واقل مواصفاتهم لكن يمين بالله لو كذبتي لايقع معش تصرف ثاني بتسمعي؟

 مرته: تمام انا موافقه افعل ماشتيت ان شاءالله حتى اخرج من راسك اليوم متاااااكده

فاروق راح الاستعلامات يبلغ عليهم..


بلال وامه ورحاب خرجوا من البوابه واتجهوا يمين كانت سيارته واقفه  طلعوا السياره..


عند الاستعلامات

ضابط الأمن: كيف بنت عمرها 18 ضايعه وماقلهم بحجاب ابيض واسود

فاروق: يعني اعلمك انا مهرتك ؟؟ انت اخبر تصرف بنتي ماتتكلمش عندها إعاقه وكانت واقفه مع هذا الشخص بهذه المواصفات واللبس

ضابط الأمن: طيب ايش اسمها ندعيها باسمها

فاروق ضابح ويتصايح معه: اقلك عندها إعاقه لو بتسمع وتتكلم ماضاعت

ضابط الأمن طيب شابلغ الموظفين باللاسلكي واحده بهذه المواصفات

فاروق وانا شاسبق ادور..

مرته خارج  مكتب الاستعلامات: ها ماقال لك؟

فاروق: اسمعي انتي ادخلي من بوابه الدخول وانا اراعي في بوابه الخروج تمام؟؟

مرته: تمام



فوق السياره ..

بلال  بيمزح ويخورهن: ما نفسكن تتعشين ؟

 رحاب بتتخور وتراشي آية

ام رحاب : بتسأل آية ايش يعجبها ؟

آية انبسطت حست لأول مره انها عايشه مع أسره وبدون تهديدات خالتها وتطنيشها لها شعور اول مره تحسه بالاهتمام..


بعد  ساعه وصلوا البيت..



















📚 @rewayatyamania 🇾🇪

البـارت رقـم 22

انتـقمــت لنفســي 🖤


👌🏻👇🏻 😍
📚 @rewayatyamania 🇾🇪


بعد ساعه وصلوا البيت .

بلال: بكره اشتري دبه الغاز

آية ناولته المبلغ اللي باقي معها كله:اشتري بها ولو ماكفت خلاص مش ضروري

بلال شاف المبلغ كان قليل يشتري دبه غاز بس ذكر معهم زياده مخبايه احتياط يديها لها: يهياااه هذه تكفي بس وشلي الباقي

آية : تشتري دبه !! مش تعبي

رحاب جت قاطعتهم : ايوه تكفي شراء هو عيتصرف ماتقلقيش ويلا رقده الصبح معش اول يوم دوام في الوظيفه

آية مبسوطة وفارحه انها عتشتغل: طيب

بلال: يلا خاطركن

رحاب: وانا اجي معك تصبحي على خير يا آية

آية: وانتي من اهله وقفلت على نفسها ودخلت ترتب اشيائها اللي اشترتهن.

.

في البيت ..

رحاب دخلت شافت امها قد رقدت : اجلس نتكلم انا وانت

بلال: داري ماتشتي تقلي لي ومراعي امي ترقد نتكلم انا مش داري اين حسش وليش بتفكري هكذا!  مافيها يعني لو كلمتها ومزحت معها ؟؟

رحاب : ايوووه مافيها انا دارية انك اخي حبيبي محترم ومخلق ومش قصدك شي بس البنت في سن مش فاهمه هذا الشي هي بعد مشاكل وحاسه بوحده اخاف تتعلق ومش هي ناقصه

بلال باستغراب: تتعلق بي ؟؟؟

ضحكككك : انتي مجنونه؟ مابتبسريش كيف تتكلم معي!

رحاب: ايوه بس بدأت تتغير ويتغير كلامها معك وماشتيش تتطور هي اكثر وتتعلق بك

بلال: واذا تعلقت مافيها؟

رحاب : بس خباله يابلال

بلال: قلي لي مافيها خطبه وشكلها مفركشه والبنت ماشاءالله عتتغير طباعها اين المشكله ؟؟

رحاب سكتت

بلال: انا داري ايش بين افعل ولو ماتعلقت بي عتتعلق بغيري وانا موقفي معها وتعاملي مثلش تماما لا ازيد ولا اقل.

رحاب سرحت شويه: طيب
.
.


في السوبر ماركت..

الكل روح وبدأوا يغلقوا وفضي المكان ماعدلا العمال

ضابط الاستعلامات: مضيع وقتك هنا يا اخ اخرج دور بنتك خارج يمكن خرجت قبل ماتبلغ ؟

فاروق شاف لمرته وحس انها كذبت عليه : طيب يا اخي شكرا

ضابط الاستعلامات : ادي رقمك بكره نراجع تسجيل كاميرات المراقبه ولو لقيناها نبلغك

فاروق جلس يمليه رقمه..

مرته سبقت للسياره خايفه منه..

فاروق شافها وقدو معصببب خرج وطلع السياره: انا تضحكي عليا هكذا!  خليتيني مضحكه قبال الناس كلهم 

مرته بتحلف ومنفعله: ليش مش مصدقني؟

فاروق شاف جهاله معهم: نتفاهم في البيت
.
.

في غرفته
جالس من فوق يتفرج للحوش مطفايه غرفتها دخل وقفل الستاره بيفكر في كلامه مع رحاب

ويتخيل نفسه لو اعجبت به فورا جاء على باله لقانتها عصبيتها وانها عادها صغيره والمشاكل اللي فيها  بيقنع نفسه مستحيل يفكر التفكير اللي بتحسه رحاب ويسأل نفسه ويبرر : اهتمامي بها لانها صغيره وقصتها مؤثره بس الله يهديش يارحاب..



في غرفتها ممدده بتتفرج السقف وتفكر

لو اشتغلت ايش شاشتغل ؟ بعدين هل عيحترموني؟ مش عارفه ليش الناس كلها لما تتكلم معي تعصب وتتكلم معي بطريقه مستفزه ؟

ماقدرش اوقع مثل رحاب والناس بتعاملني مثل خالتي اصلا هي عاملتني هكذا لاني كنت اسكت لها بس الان ماعد اقدرش امسك نفسي لو حد عصبني

بس مش كلهم بخباثه خالتي اليوم ام رحاب طيبه كانت ولازم اغير طباعي شويه الناس طيبه معي ماتستاهل اعاملهم مثل ماعاملتني خالتي وابي وعمتي والمدرسات وكل اللي كنت اعرفهم.

غمضت عيونها وهي بتفكر وتخطط انها تتغير عشان يتغير المحيط اللي حولها وماتكرر نفس المشاكل السابقه اللي واجهتها ..
.
.


في بيت ابوها..

فاروق : من البدايه اشتي اعرف التخطيط اللي كان بينش وبين اختي

مرته: ولاشي احنا بنهمك وصحتك لايرتفع لك ضغط او سكر بسببها قلنا تهدأ وتقنع منها

فاروق عصب : وشاهدأ حين تقلي لي بنتي مع واحد ؟ انتي مجنونه والا ماهو !! قسما بالله لو لقيت آية وطلع ان انتي السبب وخططش هذه يمين بالله لارجعش شغاله تحت رجلها

مرته عصبت: هي الحجه عندي طيب وانا والله لو لقيتها او دريت عنها خبر يمين بالله ماقلك شي

فاروق: تمام عنبسر .. شل تلفونها وخرج وقفل الباب عليها

مرته جلست تداعيه وتدق الباب يفتح لها. .

فاروق متوتر معصب يشتي يكشف خطتها فتح محادثتها مع اخته...

مابش شي كله محذوف الكلام بينهن اتصل لها اتصال وساكت

اخته ردت : ها ماوقع ؟؟

الوو...؟؟

فاروق: بيض الله وجهش يابنت ابي وامي هكذا تفعلي انتي القريبه لو هي غريبه وبنت الناس!

اخته صاحت: يوووه فاروق اسمع اول يا اخي

فاروق معصب: لا انا اخوش ولا اعرفش وقلي لي ماحصل لما آية خرجت من البيت

اخته ظنت ان مرته قد كلمته كل شي : ماقالت لك مرتك؟

فاروق : كل شي اتحاكي انتي ادرى منش ليش خرجت آية ؟

اخته قلبت على مرته:....






















📚 @rewayatyamania 🇾🇪

البـارت رقـم 23

انتـقمــت لنفســي 🖤


👌🏻👇🏻 😍
📚 @rewayatyamania 🇾🇪


فاروق : كل شي اتحاكي انتي ادرى منش ليش خرجت آية ؟

اخته قلبت على مرته: هي مرتك ماتشتيهاش وانا كم جلست ادافع عليها واعقلها وهي ولا الظاهر انها يوم ماخرجت هددتها تشل فلوسها وذهب امها

فاروق: اي فلوس واي ذهب؟

اخته: مدري

فاروق: بين اقلش تكلمي بتسمعي؟؟

اخته: جلست تكلمه بكل شي وعن تخطيط مرته انها تشل ذهبها تسوي مشروع.

فاروق: يعني انتين السبب الان في هربة بنتي من البيت حرام لو يوقع بها شي وماعد القاها انكن ماتشوفين يوم خير  ..

قفل في وجهها التلفون ودخل لاعند مرته

مرته: مش من حقك تفعل هذا الاسلوب معي

فاروق: اششش اصاه  ولا اسمع صوتش! قسما بالله لو ما انا ماسك اعصابي وضد مدة اليد اني قد بردت قلبي فيش بس عيجي لش يوم اول القاها.

ايش من قلب معش انتي وايش من طمع قد قصرت معش بشي !! كل شي نفسش في بتشتريه اغلى لبس وعطور ومكياج وعيالش احسن مدارس ولبس وسفريات !!

ليش ماتقلي لي ماشتيش بنتك من البدايه

مرته: عادك ذكرت توقع حنون عليها على الاقل فكر في عيالك ولا بتعبر حد فيهم وتشتي اربيها لك وانت نفسك مش قادر عليها اين ماسرت وجيت وهي تتليقن وترفع صوتها وتتويقح انت ابوها وماتطيق تصرفاتها واكثر من كان يضربها

فاروق: كنت اربي اب بس انتي خبيثه كيف تعاملي يتيمه هكذا قلي لي شل بنتك ماقدرت اربيها

مرته بكيت وبدات تتملعن : ماكنت اشتي تفلتني وتدور غيري تربيها ولا حد كان عيقدر على طباعها واخلاقها من حبي فيك ربيتها وتحملتها وعاملتها بنتي بس هو انت حساس ونكرت كل شي فعلته لك وبنتك

فاروق تاثر من كلامها وصدق هدأ شويه..
.
.


ثاني يوم الصبح..

رحاب بتدق الباب لآية : هيا آية تأخرت

آية خرجت بشنطه صغيره

رحاب: ليش ماتلبسي اللي اشتريناها امس وتطرحي الكتب فيها

آية : ليش الكتب اشتي ادرى ما ششتغل اول

رحاب دخلت بسرعه جمعتهن لشنطتها ومسكت الشنطه: هيا سريع تاخرنا نتكلم لوما نوصل

بلال في الحوش : اوصلكن؟

رحاب : لا مابش داعي

بلال: وفرتي بترول وتعب

رحاب طنشته وبتمشي هي وياها : شغلش يا آية عيكون في الفصل مساعده لي يعني عتكوني طالبه في صف ثاني ثانوي وثالث ثانوي

آية: كيف طالبه وشغل ! بتضحكي عليا عشان ادرس غصب؟

رحاب: ماضحكت عليش هو عتفعلي الثنتين تكوني طالبه تستفيدي من الحصص لانش عتمثلي على البنات انش طالبه ونفس الوقت تقلي لي ما بيحصل مع البنات
.
.


في حارتهم..
ابوها رجع لشكوكه لما شافها وجاء يفعل لفه على طريقه العمل...

كانت باب المدرسه هي وآية دخلين


في حارتهم..

بلال خرج بسيارته واستغرب شاف سيارة ابوها واقفه ! مشي عادي ماوقف

فاروق جلس منتظر ساعتين بدون اي نتيجه قرر يرجع البيت.

وصل له اتصال من ضابط الأمن : ها زد لقيتوها ؟

فاروق : ماشي لقيت انت المواصفات اللي بلغتك امس؟

ضابط الأمن: بصراحه انا مشغول جدا ومعي إشراف على الموظفين وانا برأيي انك تجي لانك انت اللي عتعرف بنتك بنفسك

فاروق: يله الان جايي في الطريق لاعندك
.
.


في المدرسه ..

آية دخلت وبتحاول تذكر نفسها انها بتغير طبيعتها واسلوبها .

رحاب بتمشي هي وياها: آية هذا الصف تعالي اعرفش على البنات

آية دخلت معها وهي متخوفه شويه من البنات ونظرتهن لها بس كانت متطمنه انها مابتدرس لان اكثر سبب كرهها بالمدرسه كان فشلها الدراسي ورسوبها..

البنات رحبوا بها لأن رحاب كلمتهن من قبل..

بتشوف ابتسامتهن لها وبعضهن يفسحين لها مكان تجلس معاهن

انبسطت شويه وحست براحه بدأين يسألين على اسمها وترد وهن يعرفين بنفسهن

رحاب شافتها انسجمت معهن غمزت لها على الاتفاق اللي بينهن وغمزت لأشطر واحده بالصف واشرت على آية وخرجت.



في غرفة المدرسات

رحاب جالسه بتتكلم مع المدرسات على آية يحاولين يتفهمين وضعها وسلوكها وانه بسبب معاناتها وظروفها.

.
.


في بيت رحاب..

ام رحاب: اتصلت لش رأسا لا وساطات و لا الناس اللي جوا لكم مننا يا اختي الصدق صدمتونا بالشروط
يعني مصممين على البيت يدي لها بيت وحدها ؟

ام خطيبة بلال: ايوه مافيها شي حقها

ام رحاب: وهذا حقه وبيت ابوه يفلته ويخرج يستأجر بيوت الناس امد حق بنتكم؟

ام خطيبه بلال: وبنتي تشتي تستقل وتاخذ راحتها

ام رحاب: البيت كله لها لا معه اخوه ولا حد ومعه طابق كامل لحاله

ام خطيبه بلال: والله مانا داريه بهذا كله

ام رحاب: وذلحين قد دريتي موافقين نتم بها مش انتوا موافقين حقكم ماشتيتوا بس لاندخل الناس لانهم بيحوجوا الموضوع ويزيدوا فيه وينقصوا

ام خطيبة بلال:...

















https://tttttt.me/joinchat/AAAAAEIz_KDfjDgo7Gaxwg




📚 @rewayatyamania 🇾🇪

البـارت رقـم 24

انتـقمــت لنفســي 🖤


👌🏻👇🏻 😍
📚 @rewayatyamania 🇾🇪


ام رحاب: وذلحين قد دريتي موافقين نتم بها مش انتوا موافقين حقكم ماشتيتوا بس لاندخل الناس لانهم بيحوجوا الموضوع ويزيدوا فيه وينقصوا

ام خطيبة بلال: ماعليش من احد احنا وافقنا يهمنا الرجال ونفس الوقت بنتي قدي زواجه حقي اضمن انها عترتاح وماتدخل في مشاكل

ام رحاب: اكيد ماهذا كلامش صح وانا معي بنت ولو يجوا يخطبوها شافعل مثل مافعلتي واشرط نفس الشي. ولو تشتي نكسي احنا موافقين تشتوا تكسوا انتوا براحتكم

ام خطيبه بلال: الصدق شهرين قليل نكسي ونجهزها عليكم الكسوه واحنا ماكودنا نلاحق صالات ونحجز هولا الاشياء وانتوا عليكم الذهب والكسوه

ام رحاب : ان شاءالله بإذن الله ارجع اتصل لش ونسد اي حين نخرج السوق

ام خطيبه بلال : تمام ان شاء الله

ام رحاب: سلمي على وجدان ( خطيبة بلال).

. 
.


في السوبر ماركت جالس بيتفرج الكاميرات والتسجيل وعينه تلف من شاشه لشاشه تعب مالقي حد اوقات كان يعلق ويوقف التسجيل وأوقات يجاوب المكالمات ضبح مالقي شي من اللي وصفته زوجته وصل لجزء من التسجيل في قسم المستلزمات وقام وقف: خلاص من هذا الوقت المسجل انا كنت منتظر وواقف يمكن خارج نسير ندور مكان ثاني

الضابط : على راحتك اهم شي تحتاج خدمات شي في قسم الشرطة انا موجود.

فاروق تأكد انه ماكانت موجودة: طيب مشكور خاطرك

خرج وهو بيفكر ويحس انه مغفل كان يسمعها بتكذب نفس الكذبة قدامه ورجعت تقوله كيف صدقها حتى لو حلفت ، اكيد كذبت عليا خافت احاسبها واعاقبها و اكيد هي اللي خبت بنتي واتفقت مع اختي والدليل قصه خالتها اللي سارت تدور شهايدها وملفها من اي حين مع آية خاله ومن اي حين تعرف حد

وانا مثل الغبي جالس بعد كذباتها لازم اكشف كذبتها بس كيف أبدأ اهدي نفسي وابين لها ان انا مش خايف عليها عشان لاتجلس تلعب باعصابي وكل يوم تدي لي قصه هذا اخر حل معها اقلها لقيت البنت واشوف ردة فعلها عتبين اذا معها او لا.

فتح الباب ودخل متطمن

مرته: ها مافعلت؟

فاروق : ولاشي لقيتها وكانت مع واحده مش واحد وعلى فكره تشبه واحده من خبيراتش

مرته: خبيراتي من منهن؟

فاروق: اظن انها هناء ( اكثر واحده من صاحبات مرته تحب آية وهي تحبها) ومرته تكرهها

مرته: كيف عرفت انها هي ابسرتها؟

فاروق: مالش دخل سيري قربي غداء الان.
.
.


في بيت رحاب...

بلال كان مراعي لها بدبة الغاز في الحوش

رحاب وآية دخلين البيت

بلال: ليش تاخرتين.؟؟

رحاب : اشترينا دفاتر لآية وجهز نفسك اليوم مابش خبره ولاخرجه

بلال: ليش؟

رحاب: عليك المواد العلميه تشرحها لآية

بلال: طيب تمام ولايهمش على كل سؤال ماتعرفيه خلع واقلع اذنش

آية بتضحك على اسلوب كلامه لما يمزح معها يضحك ردود فعله مميزه.
 
رحاب شافتهم : طيب يلا ابسر لها الشوله وصلحها 

بلال بيوصل دبة الغاز بالشولة: ايوه ذكرت يا آية اشتي اقلش تنتبهي

رحاب: اكيد عتنتبه يعني عتحرق نفسها بالعاني؟

بلال شافها بنظره: انتي يا استاذه ولا كلمه رجاء سيري اوقفي هانك بعيد

آية ابوش كان في الحاره الصبح بيدورش !

آية مبورده : طيب

بلال :هكذا طيب بس ؟

 آية: مافعل اخرج افتح له الباب ؟

رحاب ضحكككت : تستاهل بردت قلبي فيك

آية شافتها وابتسمت

بلال: هيا ناهي ارجع افتح له الباب انا وافرش له سجاده حمراء لغرفتش والا اقلش أسير اديه انا بنفسي

رحاب شافته خلص يصلح الغاز: قدها سابره ؟؟

بلال: ايووه

رحاب: يلا اخرج من هنا

بلال طيب: وهذا خرجت  لفت لآية : تشتي شي؟

آية: مع شكرا بس خفف الافلام الهنديه شويه تشتي تفجعني ابطل اخرج صح

بلال بنظرات صادقه وبيبرر: والله العظيم انه جاء مالش انتي فارحه بروحش مفكره كل شي مزح معش

آية انكسفت منه انصدمت وماعد ردت.
.
.


فوق الغداء

ام رحاب: اي حين عتستلم الجمعيه

بلال: ليش؟

ام رحاب: عشان البنت نسير نكسيها (شراء جهاز العروسه) للعرس

بلال: ايش من عرس ماعد اشتيش

رحاب: ليش ؟؟

بلال بنرفزه: هكذا انكسرت نفسي منها

امه: مش بكيفك تلعب مع بنات الناس رحنا وادينا كلمه مانقل لهم ليش ماتشتيش

رحاب: قلي لهم بيحلم  يشل اللي في باله

بلال بعصبية: ...




















📚 @rewayatyamania 🇾🇪

البـارت رقـم 25

انتـقمــت لنفســي 🖤


👌🏻👇🏻 😍
📚 @rewayatyamania 🇾🇪


امه: مش بكيفك تلعب مع بنات الناس رحنا وادينا كلمه مانقل لهم ليش ماتشتيش

رحاب: قلي لهم بيحلم  يشل اللي في باله

بلال بعصبية: لاتطلعيها راسي وانا ماشتيش

امهم: ايش في مالكم صلوا على النبي

رحاب: عليه الصلاه والسلام مدري ماله بيتقارح

بلال: مابش فيني شي بس قد سديت انا وامي نقلهم خلاص مانشتي شروطهم

امه: تفاهمت انا وامها وسدينا ابني معه بيت ليش يستاجر وياخذ بيت خارج وقالت خلاص

بلال طنش كمل ياكل وطرح الملعقه وراح يغسل يده وخرج الحوش عناد في رحاب

آية :خلصت تتغدى خرجت بالصحن والملعقه تغسل

بلال شافها وهو جالس في الدرج: مسرع تغديتي

آية مطنشه مابترد عليه

بلال: ايش تغديتي

آية: اندومي

بلال: هيا ناهي غداء اندومي ؟

آية: ليش يعجبك تدور معي محانبه وهدار

بلال: مدري مزاج

آية طنشته ودخلت الغرفه

بلال: جهزي كتبش واخرجي يلا

آية: مشتيش ( لا اريد)

بلال: مش بكيفش الان مراعي

آية طنشته وقفلت الباب ع نفسها وجلست فوق السرير بتفكر في تصرفاته المتناقضه وقت طيب معها ووقت يجننها بأسلوبه

بلال بيدق الباب : هيا اخرجي معي بعدا عمل

رحاب خرجت: مش بالصميل مالك وبعدين عادها جت من المدرسه

بلال:عناد فيش تبطلي حقش الأفكار هذه شايفتني جاهل او مراهق !! بتحاولي تمنعيني عنها

آية سمعت هذا الكلام وفهمته بطريقتها ( انه مهتم بها ومعجب)

جمعت الكتب وخرجت

بلال شاف رحاب وابتسم: انا داري ايش اسوي وانتي ريحي بالش بتسمعي !!

آية ناولته الكتاب..

بلال جلس فتح الكتاب من اخره: ايش مش فاهمه ؟؟

آية سحبت الكتاب وفتحت من اول صفحه ( من هنا) !!!
.
.


في بيت فاروق

هاجر ( مرته) بتتصل بهناء صاحبتها : صدق آية عندش ؟؟

صاحبتها ماسمعت سوا مع ازعاج العيال فكرتها قالت صدق نجي انا وآية عندش ردت : ايوه ) اهلا وسهلا حيا بكن

هاجر: كيف ؟

هناء: الله المستعان عادي جي اي وقت حيا بش

فاروق دخل وهي بتتكلم شافته : آية عند هناء

سحب التلفون ورجمه للارض: انتي بتستغفليني ؟ كل يوم بكذبه

مرته: والله انها عندها حتى اتصل اسأل!!

فاروق: انا كذبت عليش عشان اكتشف كذبش وانتي بتسايريني كل يوم بموضوع

هاجر بصدمه: والله انها عندها مالك بتكذبني؟

فاروق: اتصلي اشوف قدامي ولو ماطلعت عندها والله ياهاجر ماتجلسي لي في البيت يوم من الشارع لبيت اهلش

هاجر بتكابر عشان كذبها اخذت التلفون وتحاول تعيد تشغيله ومارضي: هيا شوف كيف طفيته

فاروق سحبها من يدها :البسي الان وقدامي لبيت هناء تعرفيه؟

 هاجر: ايوه هيا نسير ذلحين ولو مابحد هي راضيه شلني بيت أهلي.

راحت تلبس عبايتها وهو منتظرها في السياره..
.
.


بيت رحاب..
جالسين آية وبلال في الدرج وبينهم في الدرجه اللي فوق رحاب ..

آية بعد ماسمعت شرح المسألة بتحاول تحل التمرين اللي اداه لها طبقت الخطوات على القانون وكتبت النتيجه شافته: ها حليتها صح ؟؟

بلال شاف الحل ولفت لرحاب مبتسم

رحاب: يعني مفكرني دارية اذا صح او غلط! ! انا أدبي درست ماعرفش هيا قول

بلال معصب: ياغبيه حرام عليش والله حرام

آية ضبحت وقامت وقفت: انا كتبت مثل ماقلت لي اوووف ماعد اشتيش

بلال: حرام ماكملتي تدرسي وانتي ذكيه هكذا حليتيها بسرعه وصح

آية كانت تشتي تنزل وتروح غرفتها وقفت مكانها ابتسمت بفرحه: صدق ؟

 رحاب: ماشاءالله وانت مالك بتفعل حركات هنديه قل لها صح

بلال: ايش فهمش انتي امد تنبهر بنفسها مثل ما انبهرت

آية فارحه ومبتسمه

رحاب: هيا كمل لها باقي درسين وتتم الوحدة الأولى

آية : يهياه او شادرس الكتاب كله ؟

بلال: وتدفعي لي حق الدروس الخصوصية

آية : من اين ادفع لك ابيع لك الشوله

بلال ضحك : شاخصمه من مهرش (قصده لما تتزوج)

آية ابتسمت وسكتت فكرت يقصدها لانه بايفسخ!!!

رحاب : هيا سريع كمل الدرسين عشان تدخل تحل تمارين الوحده الاولى

بلال رجع فتح درس جديد وبدأ يلخص لها الدرس ويشرح لها تمرين...



















https://tttttt.me/joinchat/AAAAAEIz_KDfjDgo7Gaxwg




📚 @rewayatyamania 🇾🇪

البـارت رقـم 26

انتـقمــت لنفســي 🖤


👌🏻👇🏻 😍
📚 @rewayatyamania 🇾🇪


في بيت هناء..

هاجر: يو حسبش الله انتي قلتي لي في التلفون؟

هناء: والله ماقلت غير حيا بش جي انتي وآية خير ليش وينها ؟

هاجر معصبه متوتره: يوووه والله لايجنن جنان قوا تصرفي افعلي اي شي قولي انها عندش يامنعاه!

هناء: آسفه الصدق ماقدرش هذه الكذبه كبيره ي اختي ماينفعش دوروا البنت عيركن انها عندي

هاجر: يشلوها الجن هي وابوها جننتني كرهتني عيشتي هي وياه

هناء: لاحول ولاقوة الا بالله الله يعينش

هاجر خرجت وهي خايفه

فاروق شافها وحدها نزل من السياره :هاا !مالها مارضت تجي؟

هاجر شافت في ناس في الحاره : اطلع شاقلك في السياره

فاروق : تكلمي ذلحين وين هي لانزل اكسر البيت فوق راسهم حين هي عندهم ولايتحاكوا

مشي للباب

هاجر خافت يعصب عليهم: ماشي مش هي عندهم ارجع من الجنان طلعت السياره وقفلت الباب

فاروق معصب وبيصيح في الشارع :جنااان هاااه والله ماشفتي الجنان حاضر ياهاجر قلت لش كذابه

هاجر معصبه وبتبكي: طيب ماعتفعل تشتي تشلني بيتنا شلني افتهن من جنانك انت وبنتك المجنونه انا مادخلني ماناش داريه

فاروق معصب بيمشي الطريق. .

شافها بتعانده وتطلب تروح بيتهم بدأ يفكر يغير رأيه لو هي كمان راحت من بيبقى مع جهاله في البيت ويخاف يحصل لهم مثل ماحصل ل آية ..

هاجر طول الطريق وهي تغلط آية واللي سوته وانه مالها ذنب ولا دخل وهو مابش بيده شي يسويه هي اللي خرجت وغلطت

فاروق بيسمعها وبيتخزن كلامها في راسه وبدأ يتحامل على آية وانها غلطانه وماعد في قدامه حل غير يقول للناس انها ماتت

هاجر: ماينفعش تقل ماتت قل عند جدتها وهجعنا هدارها تعبتنا وتعبتك ولاعد بتداوم ولاشي ابسر كيف انت مثل المجنون بتلاحقها تشتي تخسر عملك وتخسرنا ؟؟
.
.

بيت رحاب..

آية كملت تذاكر وبتسمع اذان المغرب بتفكر تقوم تصلي والا ترتاح شويه !!

بتشوف الكتب والمكان اللي هي فيه حست انها بدأت تتغير وقررت وفكرت مع نفسها تتغير وتهتم بصلاتها قامت تتجهز وفرشت السجاده وخرجت عشان تصلي

بلال في الحوش: آية تشتي شي من خارج؟؟

آية: ايوه

بلال: اكتبيهن في ورقة سريع شاسير انفعهم

آية ذكرت مابش معها فلوس كافيه: لا خلاص ذكرت ماشتيش شي

بلال: احسن وفرتي

وخرج



داخل البيت..

رحاب: بلال مش مصدق لذلحين انه عيتزوج جالس ياخر دفع الجمعيه قد المدرسات ضابحات ماسلمت حق الشهر هذا حاكيه قوا يمه

امها: كيف مايشتيش لايكون الولد معجب بهذه اللي اديتوها !! او يشتي يفسخ عشان آية

رحاب: ماشي ماقال هكذا بس بيقل ماعد يشتي خطيبته

امها: مش هو على مايشتي ولاعد شادخل في شي يسد هو والناس

 
بعد عشر دقايق وهن في نفس الموضوع سمعين صوت الباب : اسكتي لايسمعش شافتح الموضوع انا

رحاب: ايوه لانه بيعاندني في هذا الموضوع بالذات


في الحوش..

بلال دخل ودق غرفه آية

آية فتحت الباب وواقفه وراه : ادخلي

بلال: ادخل ؟

آية دهفت الباب : مش انت مالك بتجنن انا بين اقل انها رحاب

بلال: لاتقليش كوني اسالي اول كم جهدي اجلس اعلمش كل شي

آية : ايش تشتي ؟

بلال: هكذا ايش تشتي بقزز بدل ماتقلي كثر الله خيرك..

آية : جاي تحانب لعندي واقل كثر الله خيرك على ايش ؟؟؟

شافت يده امتدت بالكيس

بلال : هيا شليه سريع سريع

آية: انا ماطلبتك شي

بلال: شلي هيا وعنتحاسب اخر الشهر

آية سحبت الكيس منه : هيا بحق عنادك والله لاشلهن لي وماحاسبش فلس

بلال ضحك: خاطرش هن اصلا لش وبتفعل نفسها مابتطلبش وهي واصل طلبات


من داخل البيت امه ورحاب بيسمعين الضحك ومجابرته..

بلال فتح الباب ودخل : هيا رحاب يامنعاه العشاء جاوع بسرعه اشتي اخرج

امه بضبح: وين تخرج ؟ ماشاءالله هذا اللي ناقص نسمع الجيران بنا ؟ ماقد لقيت عذر اقلهم من هذه

بلال: لاحول ولاقوة الا بالله مابه لهذا كله؟

 رحاب: يعني مش انت داري

بلال طرح الاكياس ويشتي يخرج ضابح

امه: جي لهنا بين احاكيك

بلال مشي وواقف وماسك نفسه لايعصب فوق امه

امه: ادفع حق الجمعيه

بلال: قد حاكيت رحاب مابش معي صرفت منها تراعي لوما استلم

امه: محد قلك تقرحها مصاريف على خبرتك انا اعرف الصبح والزلط حق الناس عندي

بلال فتح الباب وخرج ضابح

أمها رجعت تصيح فوق رحاب : كله منش انتي السبب جت تدي لي بنت عزبه لوسط البيت

رحاب زعلت ودخلت غرفتها





















📚 @rewayatyamania 🇾🇪

البـارت رقـم 27

انتـقمــت لنفســي 🖤


👌🏻👇🏻 😍
📚 @rewayatyamania 🇾🇪


في الحوش
آية بتكنس غرفتها لخارج وتكنس قدام الباب شافته خرج معصب وشافها وماكلمها وخرج

جلست مستغربه ليش ضابح قفلت الباب وفتحت الكيس بتتفرج داخله جعاله واندومي وببسي وعصير وجبن وتونه ومربى وليز وحليب وقشطه وكاتب لها في ورقه ملاحظة اكلش مثل الدمم (القطط)

ضحكت وغيرت ملامحها باستهزاء سامج رجعت تبتسم للاشياء وترتبهن فوق الطاقه ( الشباك)

رجعت جلست بعد ماخلصت تنظف وتذكر مدحه لها انها ذكيه راجعت حل التمارين وفتحت الوحده الثانيه تقرا وتفهم الحل عشان تبان قدامه شاطره



مع أصحابه..

بلال خرج كيس من جيبه: اللي سلفته زلط يفرق لاوسط الكيس هذا

سام: الله كريم

صاحبه : سير جنب اي جامع

بلال: يا انذال حقي مابين اطلبش منكم مش هي الف الفين فوقك انت 200$ وانت يامدبر فوقك ميه الف عادهي سلفه من الراتب

سام خرج من جيبه الزلط: ابسر بدون ماتتكلم اديتها من نفسي ماكان في داعي لشغل الشحاته هذا

وزد فوقها مني لك 300$ سلف

بلال ضحك: امانه صدق

صاحبهم الثالث: يا اخي اللي فوقي استلفتها منه اقضيك داري انك عتحتاجها هرمتنا رسايل اصلا

بلال ضحك شاف سام: وانت من وين استلفتها ؟

سام: ماعليكم معي حبيبه مزلطه

بلال: اووف هذه حبيبه معها جنسيه كنديه او امريكيه دام الموضوع سلف بالدولار

سام ضحك: والله ماتصدق لو اقلك بس شلها سكته وهجعنا دحسك

بلال: ماتكفيش دبروا لي فوقها 500 لاخر الشهر.
.
.


في غرفتها

آية كملت تذاكر و فتحت دفاتر صاحبتها وشافت دروس كثيرر رجعت تلخص المهم وتكتبه في دفتر..

رحاب قررت قرار وخرجت لآية تكلمها

 آية فتحت لها باب الغرفه.

رحاب جلست فوق السرير وشافت الكتب والدفاتر: ذاكرتي؟

آية : ايوه

رحاب: وايش لقيتي اليوم شفتي شي على البنات او شي

آية: لا ماقد عرفتهن سوا ولاحفظت اسمائهن وبعدين كلهن طيبات

رحاب: هن طيبات وكلهن ياسلام بس اوقات البنت بتوثق في اي حد وتفتح له قلبها وتدي له مشاعرها وهي مش داريه صادق او كاذب

آية: عتدرى مع الوقت

رحاب: كيف ؟

آية بتفكر في اللي بيسويه معها بلال: من تصرفاته واشياء كثير

رحاب: اي حد لما يلقى ويتعرف على شخص دائما بيكون بأفضل شي عنده ابدا مايبين الجانب السيء فيه

آية سكتت

رحاب شافتها بنظره ومبتسمه لها: مثلا اسألش سؤال

آية: ايش؟

رحاب: كيف تشوفي بلال أخي

آية بسرعه ردت: مستفزززز ويعجبه يبرقط الناس ويعايرهم

رحاب ضحكت: هو طبعه هكذا اوقات قد يكون منه مزح بس لو اقلش كيف تشوفيه طيب؟

آية انحرجت منها وبالذات لانها اخته لايبين اعجابها به: ماعرفش طيب او مع انتي اخته تعرفيه

رحاب احتارت معها وحست انها مش مهتمه به مثل اهتمام بلال بآية: المهم اشتي اوصل لش فكرة البنات اللي في صفش كلهن كويسات محترمات بنات ناس وبعضهن بيتاثر من قصص صاحباتهن او من مسلسلات او اي شاب يحاول يلاحقهن ويدي لهن كلام حالي وبيصدقين وكثير شباب للأسف مش صادقين بتكون مرحله تعارف وتسليه بس فكرة انه يكمل وعده لها بيكذبوا

آية: وانتي ايش عرفش قد حبيتي ؟؟؟

رحاب انحرجت من سؤالها بس كانت صريحه معها: ايوه ومش انا بس وحدي كثير بنات صاحباتي وبعدين طالبات كشفتهن  مثل ماقلت لش بيدي كلام ولما تقله اخطبني يتعذر

آية: و افرضي وافق وخطبها وافرضي في واحد عيخطبها بس يشتي يتاكد !!

رحاب: حلووو إذا من اولها تسأله هذا السؤال اذا اعترف لها بمشاعره ماتبادله شي تقله اخطبني اول عشان تعرف صدقه معها .

آية سكتت

رحاب: المهم مانصدق المشاعر من اولها اي شي نحسه مش معناه حب على طول قد يكون إعجاب من طرف واحد والثاني معه حد ثاني ترجع تتعذب هي او هو

آية ضبحت : طيب ماليش دخل منهن انا عليا اقلش لو شفت شي

رحاب ضحكت ورجعت بنظررره ونص عين: وانتي لو حبيتي من عيحارش بش

آية: مابش معي أهل اول عشان القى حد أحبه .

رحاب اتأثرت من كلامها: واحنا هنا ايش بنفعل مش انا اختش وامي امش وبلال مثل اخوش وعتجي مرته وتوقع لنا اخت ثالثه

آية ماقتنعت بكلامها صح طيبين بس يبقى داخلها نقص ردت على كلامها بإبتسامه لطف للي فعلوه معها اما على اللي قالته هي مش حاسه ان معها حد غير نفسها.

رحاب شافت ابتسامتها وقامت: يلا ارقدي عشان الصبح معنا مدرسه

لمحت كتاب جنبها بتقراه: ياسلام هذا الكتاب جدا















https://tttttt.me/joinchat/AAAAAEIz_KDfjDgo7Gaxwg




📚 @rewayatyamania 🇾🇪

البـارت رقـم 28

انتـقمــت لنفســي 🖤


👌🏻👇🏻 😍
📚 @rewayatyamania 🇾🇪


 لمحت كتاب جنبها بتقراه: ياسلام هذا الكتاب جدا روعه يغير الواحد وغيرني وحببني ادخل علم نفس

آية: حالي بس مبالغ بيتكلم عن السعاده والنجاح ومش كل الناس مثل بعض

رحاب: عشان هكذا طبع الكتاب وخلاه مثل النصائح عشان توصلي للسعاده والنجاح

آية: وانتي وصلتي للنجاح والسعاده !! هوذا ماتغير فيش شي

رحاب: مثل ايش يتغير قصدش؟

آية: يعني مش انتي غنيه ولا معش سياره حقش وعاد بلال بيتحكم بش في اشياء كثيره

رحاب ضحكت: ومن قال لش ان السعاده كل اللي قلتيه السعاده هي ان انا قدرت اتجاوز مشاكل في حياتي مثل ابي لما مات وامي لما مرضت ولما جربت شعور النجاح بعد مارسبت وعدت الثانويه  هذه كلها نجاح وسعاده انش تثبتي قوتش لنفسش وتواصلي طريقش... السعاده مش ماديات هي شعور تحسيه لما انتي الان هنا وحدش ساكنه في غرفه صغيره وهاربه ايش احساسش مرتاحه والا ببيتكم كنتي مرتاحه !

آية: هنا مرتاحه أكثر

رحاب: ليش رغم ان انتي بيتكم على ماوصفتيه كبير وكنتي مدرسه افضل من اللي انتي فيها الان

آية: صح بيت كبير بس مشاكل واصل ومش مرتاحه ومعاقبه في غرفتي لو جوا ضيوف عند خالتي تغلق عليا عشان محد يضحك عليها انها بتربي بنت زوجها

والمدرسه كانت افضل مدرسه بس مابش معامله سوا ولا سديت انا وصاحباتي

رحاب: يعني السعاده هي شعور  مش شي مادي وفلوس .

آية: صح كلامش كنت اقرا الكتاب بدون نفس الان خورت اعيد اقراه من اوله

رحاب: ولو استوعبتي وكتبتي كل نقطه ونصيحه مهمه فيه وطبقتيها اضمن لش تعيشي ناجحه وسعيده بحياتش وانتي قويه وشجاعه ناقصش بس معرفه

آية انبسطت كثير بكلام رحاب واول ماخرجت من عندها جلست تقرا وتربطه بحياتها ..

رحاب خرجت من عندها وهي مرتاحه ومتطمنه ان مابش في حسها من اخوها يبقى اللي عينه عليها هو بلال مش هي.



وصل بلال قفل باب السياره وغلقها وشاف غرفتها مغلقه دخل البيت.

ام رحاب: ليش رجعت كنت ترقد خارج لهذا الساع

بلال شاف يده ضحك: الساعه 10 صلي على النبي ياحجه

رحاب: اللي يشوفك كيف خرجت معصب مايصدق كيف رجعت اعوذ بالله منك مثل الجني

بلال خرج الفلوس من جيبه وطرحها في يدها: هااا بالدولار تشلي حق الجمعية بسسسس والباقي فارق الصرف تديها

رحاب: ماعه الباقي نصيبي حق التأخير حين تحملت الاحراجات بسببك

بلال: هاتي الفلوس انا بصرفها و ارجعها لش

رحاب بمحانكه: تحلم والله ماادي حاجه وبعدين من اين معك دولارات!

بلال قام يهزر الفلوس منها جلس يسافطها واخذ الفلوس

رحاب بدلع على اخوها : هيا قوا قوا والله ماعتوقع لي منها الا 3000 بس

بلال بيتحيلا لها رجع لها الزلط : وبعدين انا زعلان منش

رحاب: ليش؟؟

بلال: كيف ليش ! بتتصرفي تصرفاات هذه اليومتين نفسي اكسر راسش عليها.

رحاب: هو انت اللي يشتي لك كسر راس لولا ان البنت متمرده وشابعه مشاكل ان قد تعلقت بك

بلال: مافعلت شي محسستني قلت لها احبش بتحسددددي بس يعلم الله ماعتفعلي بمرتي

رحاب ضحكت: شلوك احسدهن على ايش لقانه ومحانبه ويعجبك تقرح قلب واحد من عيعجب بك

بلال بنظره مسك لحيته: تتحديني اوريش انزل صورتي كم واحده عتفعل لايك وتعلق

رحاب: هي مافعلت لك هيبه الا الدقن وجلست تقلده باستهزاء ( تتحديني اوريش انزل صورتي ) اكره اللي فارحين بنفسهم مثلك من اي حين بتتحاكا هكذا

انت كنت اول واحد تتلغج على العيال اللي فارحين بارواحهم بس عقاب الله اللي يتضحك على حد يوقع مثله

بلال ضحكك: والله انه صدق كلامش الله يسامحنا بس ..

رحاب..

رحاب استغربت دعاها بنبره مختلفه: هااه.

بلال: رجاء مره ثانيه تشوفيني اعطف و اعامل المسكينه هذه بنفس طبعي لاتجلسي تفكري افكارش الغبيه غثيتيني عيب مش اختي اللي تفكر فيني هكذا مابقيتي للناس! ماشاغيرش معاملتي معها  شاعاملها هكذا واكثر كمان بتسمعي

رحاب: الصدق مالي دخل طز انا بريت ذمتي وقلت لها وقلت لك والان كل واحد حر وأخبر بنفسه


في غرفتها قفلت الكتاب وجالسه تفكر  في كلام رحاب ليش قالت على اخوها ان فيه جانب سيء وهي حاسدة رحاب على تعامله معها و وقفته وتفهمه لها وقررت أن تطبق السطر اللي قرأته في الكتاب ( لاتحكم على الآخرين من خلال الناس )

.
.

ثاني يوم الصبح ..

بلال نزل يشغل السياره ويتفاقدها وبيفكر بكلام رحاب: انا شالاحظ اذا حسيتها تغيرت تصرفاتها معي  على طول اغير اسلوبي معها بس البنت جنيه مش هي من البنات اللي بيعجبين بأي حد.
 

ام رحاب واقفه في الباب

ورحاب وآية بيفتحين باب السياره يطلعين شافوها ووقفين

ام رحاب: ادي معش الزلط حق الجمعيه واليوم نخرج نشل الذهب مع خطيبة اخوش.

رحاب: تمام

بلال: يعني كذبتوا عليا ان دوري بعدين

رحاب:...





















📚 @rewayatyamania 🇾🇪

البـارت رقـم 29

انتـقمــت لنفســي 🖤


👌🏻👇🏻 😍
📚 @rewayatyamania 🇾🇪


بلال: يعني كذبتوا عليا ان دوري بعدين

رحاب: طبعا عشان تقطب تدي اللي فوقك وتستلمها كامله ونسير نشل الذهب قبل مايرتفع قدك داري اعياد وموسم اعراس

بلال: و طبعا من اللي يختار الذهب انا صح ؟؟

رحاب: ليش عتلبسه انت ؟؟

آية ضحكككت

بلال شافها في المرايه: ماكرها (اخيرا) توقع لش تتشمتي فيني

آية: يعني ايش دخلك انت في الذهب تختاره

بلال: هي تجي تتحكم وتختار وانا ادفع؟ زلطي اكيد شادلع واختار وبعدين لمن عتلبسه؟؟ لي اكيد يعني هي ماعتبسرهش انا اللي شابسره لازم اختار أنا وبعدين مالكن النسوان مبعسسات لازم جدتها وامها وامه والقبيله  تخرج عشان الحريوه تشتري ذهب

وبدأ يقلد كلام النسوان ويقلد اصواتهن

ابسرتي على ذهب اختاروا لها من ثقله ووزنه اختنقت الحريوه هذا اللي تشتين تخرجين تزنطين وتختارين الثقيل والمدري كيف على كيف الرجال يتكعف امد انتين تهوكين

آية بتضحكك على تقليده ورحااب 

وصلين باب المدرسه

رحاب: الله يجعله يوم خير قد ضحكت لما شبعت. خاطرك.

بلال اشر لهن بيده مع السلامه ومشي رد على التلفون

سام: بارك لي

بلال: على ايش؟

سام: امي استلمت نصيبها من الارض وحق الخطبه عليها 

بلال: ما شابارك الا لما تخطب

سام: اليوم نشل الذهب وبقيه الكسوه لو لحقنا وسرنا نخزن عندهم ونسلم الشنطه

بلال: لو انا بهم لادفعك غرامه تأخير حين اديت كلمه للبنت سنتين وعادك الا ذكرت تخطب وبعدا ايش الحظ هذا امس بتدور زلط واليوم عتخطب دنيا ههههه وانا سايرين اليوم نشل ذهب العرس لو الرزم عندك خيرات وثقال عليك ارجم لاعندي اخبيهن لك اشل للمره بهن ذهب لوما تحتاجهن ونبيعهن لك

سام ضحك: الله اكبر عليك وعيونك هي قليل ياجني قلك ذهب

بلال: يلا نرجع نتواصل نلتقي سوا بعد السوق نفهم التفاصيل

سام ضحك: والا خرجنا السوق سوا نبسر من يحتاج وفى للثاني .

بلال: تم متواصلين ..
.
.


بيت فاروق..

هاجر : فاروق..!

زوجها: ماتشتي ؟

هاجر : ام سام اتصلت نخرج السوق انا وياها نشل كسوة ابنها عتخطب له

فاروق: مسرع انتين النسوان لاقد السوق والشراء في الموضوع تتباخرين عادها كانت بتموت في العنايه مسرع !

هاجر : مش لهذه الدرجه هو الا جرح وخيطوا لها وتباخرت ذلحين ماقلت

فاروق: المطلوب ماتشتي اخطب لابنها انا ؟؟

هاجر: بين استأذن اسير؟

فاروق: سيري ومن بيحاكيش اصلا واصل بتنفذي مافي راسش

هاجر تأففت وخرجت من عنده تتصل لأم سام.
.
.


بعد العصر ..

آية جالسه في الحوش بتسقي الشجر

 رحاب: مابتفعلي يا آية ليش ماتذاكري ؟

آية: قلت اشم هواء شويه ضبحت واذاكر بعدا

رحاب: عتخرجي معنا السوق؟

آية: كنت اشتي اقلش بس قلت لاتتضايقوا حين عتسيروا مع اهل خطيبة بلال

رحاب: لا عادي مابش شي ، انا ماحاكيتش امد تذاكري بس تشتي تجي؟؟

آية: ايوه شابيع الاخراص ( حلق الأذن )

رحاب : سريع ادخلي البسي

آية دخلت غرفتها بعدت الاخراص حقها في فاين وخبته في الشنطه ولبست عبايتها والحجاب والشنطه وخرجت .
.
.


في السوق فوق سياره سام..

سام: وصاحبي عيشتري اليوم الذهب مارأيكم نتفق من محل واحد امد يتعاون معنا في السعر

امه: مش هو ثياب صلاه بالدرزن يرخصوا هو ذهب كل جرام بقوله مابش داعي للاحراجات يعلم الله كيف هم وكيف الذهب اللي عيشتروه

سام: واين المشكله ! عادي يشلوا بكم ما كان واحنا نشل على قدرنا

امه: ولو طلعوا مرتاحين احسن مننا وانا اشل ذهب عادي على قدر زلطك

سام: ليش تفكري هكذا يا أمي عادي يقع بكم ماوقع كل واحد يعيش على قدره ماعلينا من الناس يقولوا ما قالوا  نعيش لنفسنا والا نجلس نعيش نهم الناس؟!

هاجر بتشاور ام سام: هكذا الرجال حسهم في وادي مش داريين كيف النسوان نصهن بيفكرين ويرجعين يتكلمين على واحد ماعليش منه نسير لنا نبسر كل المحلات ونختار

ام سام: تمام

جنب محل الذهب جنب السياره ونزلوا

بلال وامه ورحاب وآية واقفين جنب محل شافوه صغير المحل رجعوا مشيوا شويه شافوا محل كبير ومشهور دخلوه...

بلال دخل الأول وامه معه جنبه آية ورحاب كانين واقفات وراه في الشارع..

آية لمحت قدامها السيارة حق بيت جيرانهم رجعت بسرعه

رحاب: مالش؟

 آية : اسبقوا وانا شالحقكم شاسير المحل هذا اللي هنا

رحاب: مش قلتي تشتي تبيعي ؟ انا داريه انش محرجه تبيعي ! بيعي قبل مايجو اهل العروسه ذلحين هيا ادخلي ( بتسحبها من يدها )

وبلال بيتكلم في التلفون ويضحك رجع خرج من باب المحل وبيناديه: سااام ووو سااام

سام سمعه والتفت بسرعه..

آية ماعرفت وين تروح بعد ماشافها تخبت بسرعه ورا رحاب وعكست اتجاهها ومشيت للخلف عشان لايلمح وجهها

سام بيمشي باتجاههم لمحها: انت هنا واحنا في هذك المحل

رحاب بتداعيها : آية ..آية..؟؟!

سام ماقدر قدام بلال يرفع عينه ويشوف بس سمع رحاب وتأكد انها هي آية..














https://tttttt.me/joinchat/AAAAAEIz_KDfjDgo7Gaxwg




📚 @rewayatyamania 🇾🇪

البـارت رقـم 30

انتـقمــت لنفســي 🖤


👌🏻👇🏻 😍
📚 @rewayatyamania 🇾🇪


رحاب بتداعيها : آية ..آية..؟؟!

سام ماقدر قدام بلال يرفع عينه ويشوف بس سمع رحاب وتأكد انها هي آية..

بلال: اين البيت ( العائله) ؟؟

سام: في هذك المحل قدك داري بالنسوان يلفين كل بقعه لوما يعجبهن شي

بلال ضحك: يلا خليكم على راحتكم

سام تمام: اي خدمات؟؟

بلال مد يده يسلم عليه يودعه: تسلم

سام سلم عليه ومشي باتجاه آية...

آية دخلت سوق تجاري كبير وطلعت الدور الثاني دخلت تضيع الوقت وتختار فساتين وتقايسهن في غرفه القياس..

سام دخل المجمع بيتمشى في المحلات بيدور يتلفت!! مش موجوده خرج يشوف المحلات اللي جنب المجمع التجاري مالقيها  ..

تلفونه بيرررن( ألوالده, جاوبها: ايوه يلا جيت الآن.

ورجع للمحل اللي فيه امه وهاجر.

رحاب دخلت المحل مع امها وملتهيه نسيت آية..

بلال واقف وبيتلفت يشوف آية مش موجوده !!

فجأه ذكر ( سام جيران آية !!! ) ضرب على الماسه اووو لاتكون خافت !!

سام كان واقف لما كانت واقفه معقول شافها؟؟

كيف افعل وفين هذه البنت وبعدا كيف مافكرت اشل رقمها !

 رحاب قربت منه وبيدها مسكته وبصوت واطي على الأقل سلم عليهم عيب توقف هكذا

بلال: من هم ؟

 رحاب: ام خطيبتك

بلال: قلدش الله كيف أعرفها من بين النسوان كلهن وبعدا مش وقت وين آية؟؟

رحاب: مدري يمكن سارت المحلات اللي جنبنا.

بلال: طيب  كملوا اشتروا وانا اسير ادورها واتصلي لما تخلصوا

رحاب بهررت له بعيونها : كيف تفلت وتسير

بلال معصب: يعني ايش فايدة جلستي !! ايش افعل اسير امسكها من يدها جنب امها واللي معها واسلم عليها

رحاب ضحكت: انقلع طز فيك ماتشتي تشوفها ؟

 بلال: شفتها بس موقفي بايخ وانا جالس اتفرج سرقة لو شافتني امها عيب

رحاب بمزح: طيب شوفها وارجع وانتبه تجي انت وهي وتشوفك خطيبتك .

بلال لمح خطيبته بسرعه وهو مستحي ومتوتر وخرج

بيدورها مختفيه جالس يدخل من محل لمحل وضابح كيف مافكر ياخذ رقم تلفونها !!!

 آية نفس الوضع تدخل محل وتجلس تقايس عبايات ملابس  لمحت الدور الارضي محل ذهب قررت تنزل تبيع اخراصها ( الحلق)

بلال دخل المجمع التجاري ولقي سام مره ثانيه من التوتر: مسرع جيتوا هنا بعدا مابش ذهب

سام: في محل ذهب هنا بيتعاملوا معه جيراننا

بلال تووتر: تمام بس مش حالي

سام ضحك: ياسعم انه فستان هو ذهب ماتفرقش كله سوا كلهم نفس التشكيله.

بلال متوتر وكعادته لما يتوتر جالس يمسح دقنته

سام: مالك بتقلق ! شكلهم بيختاروا ذهب من ابوه ( ضخم او غالي)

بلال مالقي طريقة يخرجه من المجمع: ماشي بس جي نتجابر خارج شويه ونشرب عصير ضبحت هنا لوي من محل لمحل

سام خرج معه وواقفين باب المجمع بيتكلموا



في المحل الذهب الثاني ..

العروسه بتختار الذهب مع امها..

ام رحاب قدامهن بتتكلم : وين بلال وآية ؟

 العروسه سمعت ولفتت لعمتها ( ام رحاب)

رحاب قربت تشاورها: مش وقت قدامهم ذلحين تذكري آية

ام رحاب ردت بصوت عادي مسموع: يووه نسيت تمام

العروسه شكت في شي ومن آية وهي تعرفت على اهل خطيبها ومافي معه الا اخت واحده !!



في المجمع التجاري..

آية بتنزل من السلالم الكهربائيه وقدها في النص بتنزل شافت قدامها بلال وسام خارج المجمع

التفتت بسرعه تشوف على يدها اليمين المحلالي بتهرب فيه 2 نسوان واقفات يتكلمين قدام المحل

وصلت للأرض..

خالتها تشتي تمشي مع ام سام  ..

ام سام لمحت آية ضغطت على يد هاجر بقوة: هذه بنت زوجش !! آية ؟؟؟؟

هاجر لفتت وانصدمت شافتها واقفه قدام الكل صاحت: آية !!

بلال وسام واقفين سمعوها بتدعيها لفتوا لها !!!

خالتها تشتي تمشي مع ام سام  وانصدمت شافتها واقفه: آية !!

كان في ناس واقفه التفتت لما دعتها

آية توترت مش لاقيه كيف وفين تهرب قدامها سام وبلال وهن جنبها والكل بيتفرج ..

طنشت وبتمشي..

هاجر مشيت بسرعة مسكتها: وين عتسيري وين كنتي انتي دارية ابوش قد جنن وجنني بسببش؟

آية سحبت يدها بقوة من يدها وجريت بسرعه قدام الكل

بلال بعد من الطريق لها

سام واقف بيتفرجها ويشوف ردة فعل بلال هل كانت معهم او صدفه واقفه !!!

آية ماكلمت بلال ولا اي حد خرجت في الشارع بسرعه وام سام وهاجر بيلحقنها

هاجر: الحقها يا سام مالك واقف بتتفرج ؟؟!!
















https://tttttt.me/rewayatyamania/39767





📚 @rewayatyamania 🇾🇪

🖤


بـارتـات يومنـا الخـمـيـس👆🏻😍

البـارت رقـم 31

انتـقمــت لنفســي 🖤


👌🏻👇🏻 😍
📚 @rewayatyamania 🇾🇪


في محل الذهب..

ام رحاب شافت بيختارين الذهب الغالي: كيف تشتين سعر الذهب احنا اتفقنا المهر مليونين ومنه كسوة وذهب ؟؟

ام وجدان: اهم شي الذهب والباقي سهل حتى لو قليتوا الملابس عليها احنا عنوفي لها ونكسيها احسن كسوة بس بنتي مايقل ذهبها عن مستوانا

رحاب: خير اختاروا اللي تشتوه عادي والباقي نكسي به على قدر المهر

ام وجدان التفتت لبنتها وبتشاورها: مبين انهم طماعين من اولها وهم بيتشرطوا

وجدان كانت ضابحه ان خطيبها ما استغل الفرصه يشوفها يقول حتى السلام عليكم او يتواصل معها: انا ايش دخلني انتوا اللي وافقتوا

ام رحاب ورحاب شافين الوضع متوتر شويه وكأنه مش عاجب لأهل خطيبه بلال الموضوع.

رحاب: تصرفي كيف نجلس واقفين هكذا؟

ام رحاب خرجت الفلوس: مايغلى على عروستنا اللي نفسها فيه ..



خارج في الشارع..

سام شافهن وسمع مرة جارهم هاجر وشاف آية بتمشي بسرعه والناس في الشارع: بتمشي كيف الحقها!

هاجر معصبه: تصرف انت داري مافعلت بنا وبأمك؟

بلال حاول يأخرهم شويه: خير ايش في ؟

سام: تعرف هذك البنت اللي كانت واقفه معاكم؟

بلال: ماعرفهاش مالها! هي كانت بتسأل اختي على محلات ذهب

هاجر: ايوه تشتي تبيع ذهب امها المجنونه هذه وهاربه من البيت قوا الحقوها

بلال لفت يشوف آية..

آية: وقفت تكس بسرعة وطلعت معه..

هاجر بعصبيه: خلاص ماذلحين تموا تفرجوا براحتكم هربت

سام: خلاص انتين تمين السوق وانا شالحقها بسيارتي.. فلتهم ومشي

بلال: تشتي اجي معك اشلك بسيارتي اقرب ؟؟!!

سام بيشوف التكس بيمشي بطيء مع زحمه الشارع والسوق : والبيت اهلك كيف؟ سهل سيارتي قدام شويه شاخطى بسرعه؟

ومشي بيسرع..

بلال لحقه وفتح سيارته بالمفتاح اللي في يده : اطلع

سام شافها اقرب ماتردد: يلا بسرعة حاول تلحقها

بلال طلع السياره وشغلها: نحاول شوف كم سيارات

وبعدين ايش القصه ؟فهمني؟ من هذه ومالكم عليها تعرفوها ؟

سام: ايوه ، هذه بنت جارنا اللي حكيت لك عنها

بلال بيمزح معه ويمشي بطيء: او كان بينكم شي اعترف!

سام: يا اخي جنيه البنت ماكان بيننا الا مضاربه واصل

بلال ضحك له وبغمزه: قلدك الله هذه جنيه ! وجهها طفولي وملامحها بريئه مابلا ما ادت لك وجه

سام: ما الشكل شكل لكن مصيبه ماخلت لحد حاله كم قد فعلت لاهلها مشاكل

بلال: بيني وبينك هن النسوان يزيدين بها يمكن امها مش قادرة تتعامل معها

سام: هذه خالتها مرت ابوها قد شبعتها دنيا

بلال ضرب على السكان: اهااا كان هذا السبب عشان مرة ابوها قد قلت لك شكل البنت ترحم

سام: قلدك الله خليك في حالك مش انت داري بشي ذلحين وين سارت هذه الجنيه

خرج راسه من الطاقه يشوف: السياره تقول قدام او كيف؟

بلال: يعني اين عتسير شارع لا فيه يمين ولايسار وزحمه اول مانخرج من الزحمه اعرف الا اسابق

سام ضابح: ماكلفني الله الاحق وانا مدري

بلال بيغالطه لفت لوجهه: ارجع؟

 سام شافه: بعقلك !! لااا خلينا نرجع البنت لأهلها

بلال بيشوف الطريق خفت الزحمه ومشي بسرعه: انت داري كم رقم التكس!

سام: ماشي طبعا مالحقت المح رقم وانت ياسعم ان انا كمبيوتر

بلال بيمشي بسرعه شاف السياره اختفت: كان من نلاحق قلدك الله

سام: مدري والله ضيعناهم خيرة الله ارجع بس

بلال فرح: هيا يسدوا وانت ماعليك اهلها اخبر بها يدوروها هم
.
.


في البيت..
وصلت ودخلت الحوش فرحت انها وصلت بأمان ومحد شافها جلست شويه تتنفس ودخلت غرفتها وقفلت.

بعد ماخلصوا مشاويرهم... فوق السياره

هاجر: يعلم الله البنت هذه مابتفعل؟ شكلها جالسه في الشوارع كل ماخرجنا بقعه لقيتها

ام سام: يووو لو تقلي لابوها هكذا عيجنن مش انتي ناقصه

هاجر: بيكذبني كل ماقلت له شفتها جنن هذه المره والله ماتحاكى طز خليها تنقلع لاعد رجعت مقلع عيطلقني الرجال بسببها

سام بيسمع سكته ...

امه : وانت كيف ماقدرت تلحقها! بنيه بتكس وضاعت عليك؟

سام: زحمه واستاجرت تكس في نفس اللحظه شفتوها اين ادورها ومش داري رقم السياره..

.
.

فوق السياره..

ام رحاب: ابسرتي كيف هم طماعين ، والله يا ابني لو سكت لها وجلست تمكنك دلع هكذا لاتبيع البيت

بلال: لو معي شادلعها ولو مابش معي ترضى بوضعي مابش عندي غنج وبعدا امانه لاعد تكرهوني في هذه الزواجه قد كسرتوا نفسي من اولها شروط وطمع

رحاب: ايوه صدق ماقلت لي اين آية ؟؟

بلال جلس يحكي لهم اللي حصل... ووصلوا البيت

بلال دخل بالسيارة

ونزلت رحاب بسرعه شافت جزمتها مش عند الباب ؟





















📚 @rewayatyamania 🇾🇪

البـارت رقـم 32

انتـقمــت لنفســي 🖤


👌🏻👇🏻 😍
📚 @rewayatyamania 🇾🇪


ونزلت رحاب بسرعه شافت جزمتها مش عند الباب ؟

بلال خاف وبعصبيه بيأشر بيده : طيب افتحي الباب  ؟؟

رحاب قربت تفتح الباب مقفل..

مابحد هي !!

بلال خاف جلس يدق الباب مابتجاوب ، معش رقمها؟

رحاب: ايوه

بلال: طيب مالش مبورده (بارده) اتصلي !!!

رحاب خرجت تلفونها وهي معصبه من نرفزته: طيب اعصابك مالك انا لما اتوتر ارتبش ماعرفش ايش اسوي

ناولته تلفونها مابش معي رصيد

بلال سحب تلفونها من يدها وخرج تلفونه بيضغط على الأرقام واتصل...

سمعوا الرنه من غرفتها

رحاب: نسيت تلفونها هنا ؟؟؟

بلال قرب من الباب ومازال جاري الاتصال : آية جاوبي لو موجوده؟؟

داخل الغرفه واقفه ورا الباب تسمع لو في اصوات ثانيه بس كلام ام رحاب وكلام رحاب وبلال ماقدرت تميززز لو في اصوات ثانيه

مطنشه وخايفه

ام رحاب: هيا ادخلوا البيت كما جت عنعرف هيا جننتونا من يوم ماجت واحنا في هم هذه المواقف اللي خايفه منها تحصل

رحاب طلعت مع امها..

بلال رجع السيارة ومتردد يخرج او ينتظر !!

.
.


 بيت ابوها وقت العشاء

فاروق: بيتعشى

مرته بتشوفه

فاروق لمح نظراته لها !

هاجر شافت عينه بعينها بدأت تتكلم (أن..

عيالها بيتضاربوا

فاروق صيح فوقهم : بس اجلسوا والله لاعلقكك انت وهو

هاجر سكتت وجالسه تفكر بينها وبين نفسها: اقله او لا ؟ ماعيصدقني واخاف يفعل مشكله او يرجع يدورها ماكرها هدأ هذه اليومتين

فاروق بعصبيه: وانتي مالش من حين جيتي بتتفرجيني( تشوفيني) ؟؟

هاجر شافته بخوف: مافي شي

فاروق مستغرب خوفها: والله ان في شي اعرفششش اعرف مصايبش

هاجر: لو قلت لك ايش ماقلت ماعتصدق انت قلت كذابه !! اصلا فليش اتكلم؟؟

.
.

بيت بلال..

جالس في الدرج بيرسل لها رسايل : طيب طمنيني عليش انتي وين بتقري الرسايل؟

وصلته رساله...

انتوا وحدكم في البيت

بلال: ايوه وين انتي وانا شاجي لش بالسيارة؟

آية قرأت رسالته وضحكت فتحت باب الغرفه سحبته مره واحده( خطاف حديد) وطلع صوت خرجت

 بلاال نكززز وقف: اعوذ بالله فجعتيني؟ انتي هنا !!!

آية : ايوه كنت فاكره جوا معاكم

وبعصبيه : انت كيف ماتتحاكى وتقل لي ان سام جاي السوق ؟؟

كل مره تمكني انا مثل اخ وانا واقف معش وانت خراط حتى لما هربت فعلت نفسك ماتعرفني واقف معه و تتفرج كانت عتشلني خالتي وانت واقف تتفرج

وهربت مع تكس وانت ولا تشغل سيارتك وتهربني منهم ..

بلال بيسمعها شايف ملامحها جاده ومعصبه بتتكلم بسررررعه ماقدر يمسك نفسه ضحكك : اخرسي ولاصوت ولانفس اهدأي

آية: وعادك تضحك !! يعني بتتمسخر عليا متآمر معهم اعترف ليش بتلعب بأعصابي ؟؟

بلال ضرب على السياره وعصب: مراعين لش داخل

آية: شفت انك تشتي تودف بي شفت؟
والله لاهرب من هنا

بلال بيقلدها وهي بتجري: هكذا عتهربي

ويضحككك مابحد انا مجنون اديهم انتي اديتي لي فرصه اجاوب ارد جالسه تسالي وتجاوبي وتعصبي

وبعدين اوقات اقل ذكيه واوقات انصدم من غبائش

آية: والله انك سامج

بلال: اول شي كيف أدافع عنش واهربش منهم وجنان وانا نكرت لسام اني اعرفش جاء يسأل عنش !

تشتي يعني اهربش ولوين بعدين تسيري !

كنت عارف انش ذيبه بتتصرفي من نفسش وبعدا من قلش يا هبلا ان انا ماساعدتش تهربي تعرفي ان انا لحقناش بالسياره حقي كان عيلحقش بسيارته وانا غالطته عشان اسوق عشان اضيعش وتهربي براحتش

هو هكذا جزاته اللي يسوي خير

آية ابتسمت ومسكت فمها: يووو صدق مافكرتش هكذا  كنت زاعله انك معاهم

بلال: ذكيه اصلا

آية: بس ليش تقله يجي السوق

بلال: وفي هذه الصدق انا حمار كيف ما انتبهت نسيت اصلا الموضوع

رحاب خلصت تصلي سمعت مجابره فتحت الباب خرجت: آية جيتي ؟

بلال بيضحك: اين جت هي هنا من حين ماجينا متخبيه تفتكر انهم جوا معنا يدوها

رحاب ضحكت: انتي قصتش قصه لاعد تخرجيش من البيت

آية: شاخرج واهرب محد يقدر يمسكني بس اخاف يعرفوا ان انا عندكم

بلال عشان يبعد لها الخوف والزعل وحب انها ضحكت: جلس يقلدها لرحاب وهي بتجري في الحوش

رحاب بتضحك: صدق هكذا كنتي تجري

آية: لاتصدقيه هذا الضفدع مابين اجريش هكذا..

رحاب: سمعت اصواتكم لداخل بس كنت اصلي ماخرجت افرع على ايش تحانبتوا

آية: امانه كيف يعزم سام وهو عارف انه جارنا

رحاب شافته بهررت: صح هو انت قلت لهم يجوا؟

بلال: ايووووه انا ماكنت داري مالها هذه الهبلا تفكر بالعاني لو صدق اشتي يعرفوا الان اتصل لابوها مش داريه ان معي رقمه ..

كيف انتين النسوان تتهمين الرجال دائما وتظنين فيهم هكذا

رحاب: ناهي يا عريس الغفله شكل معك مره عتوريك النسوان صدق فيها فقعسه

بلال ضبح: قلنا خلاص لاعد تكرهوني فيها

آية واقفه شافت موضوع يخصهم فلتت واستأذنت تروح غرفتها.






















📚 @rewayatyamania 🇾🇪