Павел Латушка паінфармаваў прадстаўнікоў Кангрэса мясцовых і рэгіянальных уладаў Савета Еўропы пра праблематыку легалізацыі беларусаў

Намеснік кіраўніцы Аб’яднанага Пераходнага Кабінета, член Каардынацыйнай Рады Павел Латушка сустрэўся з віцэ-прэзідэнткай Кангрэса мясцовых і рэгіянальных уладаў Рады Еўропы, дакладчыцай па дэмакратычнай Беларусі Сесіліяй Дальман Ээк. Размова адбылася ў рамках візіту спадарыні Ээк у Польшчу, мэта якога азнаёміцца з дзейнасцю інстытутаў беларускіх дэмсіл і выклікамі, з якімі сутыкаюцца беларусы за мяжой у кантэксце транснацыянальных рэпрэсій рэжыму.

Латушка прадставіў напрамкі дзейнасці АПК, у тым ліку ў частцы пазітыўных практык легалізацыі вялікай колькасці беларусаў у Польшчы і адвакатавання вырашэння праблемных пытанняў легалізацыі беларусаў.

Прадстаўнік Кабінета як кіраўнік беларускай часткі Рабочай групы пры МУС Польшчы распавёў пра асноўныя выклікі, з якімі сутыкаюцца беларусы ў гэтых пытаннях у кантэксце транснацыянальных рэпрэсій рэжыму Лукашэнкі. Сярод іх працяглыя тэрміны разгляду заяў на дакументы, што прыводзіць да заканчэння тэрміну дзеяння пашпартоў падчас чакання рашэнняў, блакаванне банкаўскіх рахункаў, прымяненне Дублінскага рэгламенту і іншае.

Павел Латушка падкрэсліў, што беларусы, у адрозненні ад грамадзян іншых краін, якія знаходзяцца ў ЕС, не могуць разлічваць на абарону сваёй дзяржавы, якая не выдае і не працягвае тэрмін дзеяння пашпартоў. Гэта робіць становішча грамадзян Беларусі асабліва ўразлівым.

Прадстаўнік АПК таксама праінфармаваў пра экстэрытарыяльны пераслед беларусаў з боку рэжыма, якія пражываюць на тэрыторыі Польшчы: пра сотні распачатых крымінальных спраў, мэтай якіх з’яўляецца пераслед беларусаў за мяжой, спробы вярбоўкі, шантажу праз пераслед сваякоў і блізкіх у Беларусі.

Палітык адзначыў важнасць прызнання з боку Кангрэса мясцовых і рэгіянальных уладаў Рады Еўропы і ПАРЕ дзейнасці прадстаўнічага органа беларусаў – Каардынацыйнай рады, якая мае свае афіцыйныя дэлегацыі ў гэтых міжнародных парламенцкіх арганізацыях. Такім чынам, беларускае грамадства мае свой легітымны голас на міжнародных платформах і ў міжнародных кантактах, адзначыў Павел Латушка.

Па выніках візіту віцэ-прэзідэнткі Кангрэса абагульненая інфармацыя пра дзейнасць дэмакратычных сіл Беларусі і асноўныя выклікі, з якімі сутыкаюцца беларусы за мяжой, будуць прадстаўленыя Кангрэсу мясцовых і рэгіянальных уладаў Рады Еўропы.

@CabinetBelarus

Заява Каардынацыйнай Рады Беларусі з нагоды вызвалення 123 палітзняволеных

Каардынацыйная Рада вітае вызваленне 123 палітычных зняволеных, сярод якіх Нобелеўскі лаўрэат Алесь Бяляцкі, і выказвае сваю ўдзячнасць адміністрацыі Прэзідэнта ЗША Дональда Трампа і Дзяржаўнаму дэпартаменту ЗША за намаганні, накіраваныя на выратаванне жыцця і здароўя беларусаў, незаконна пазбаўленых свабоды рэжымам Лукашэнкі. Таксама выказваем удзячнасць Прэзідэнту Украіны Уладзіміру Зяленскаму і ўкраінскаму боку за тое, што Украіна прыняла беларускіх палітзняволеных і займалася іх апекай.

Мы лічым важным працягваць практыку камунікацыі з мэтай вызвалення палітычных зняволеных пры адначасовым выкарыстанні інструментаў ціску на рэжым Лукашэнкі.

Мы адзначаем, што рэжым Лукашэнкі ў чарговы раз здзейсніў прымусовую дэпартацыю грамадзян Беларусі, пазбавіўшы іх права свабоднага выбару месца пражывання на тэрыторыі ўласнай краіны. Мы заклікаем нашых еўрапейскіх партнёраў даць гэтым дзеянням адпаведную міжнародна-прававую ацэнку.

Звяртаемся да краін ЕС з заклікам прыняць і спрыяць легалізацыі былых палітзняволеных.

Мы лічым прынцыпова важным працягваць намаганні, накіраваныя на вызваленне ўсіх палітычных зняволеных, незаконна ўтрымліваемых рэжымам Лукашэнкі, і забеспячэнне ім права далейшага пражывання ў Беларусі, а таксама на поўную рэабілітацыю як палітвязняў, так і ўсіх рэпрэсаваных беларусаў.

Мы таксама лічым важным дамагацца спынення рэпрэсій і дэкрыміналізацыі грамадска-палітычнага жыцця ў краіне, спынення экстэрытарыяльнага пераследу беларусаў, якія вымушана пакінулі тэрыторыю краіны, і пачатку дыялогу з беларускім грамадствам.

Звяртаемся да краін ЕС дамагацца рэалізацыі падыходу, які ўтрымліваецца ў Заключэнні Савета ЕС па Беларусі ад 24 лютага 2024 года, пункт 5 якога заклікае «ўлады Беларусі распачаць сапраўдны і інклюзіўны дыялог з усімі слаямі грамадства з мэтай правядзення свабодных і справядлівых выбараў пад назіраннем АБСЕ/БДІПЧ і ў адпаведнасці з міжнародна прызнанымі стандартамі».

16 снежня 2025 года

Прагаласавалі 40 дэлегатаў адзінагалосна «за». Вынікі галасавання па фракцыях:

«Каманда Латушкі і Рух “За Свабоду”»: 26 з 28
«Беларусы»: 0 з 12
«Незалежныя беларусы»: 2 з 8
«Еўрапейскі выбар»: 7 з 8
«Моладзевы наступ»: 3 з 8
«Наша справа / Беларускія хрысціянскія дэмакраты»: 0 з 6
«Хопіць баяцца»: 1 з 3
Пазафракцыйныя дэлегаты: 1 з 5

Кангрэс мясцовых і рэгіянальных уладаў Рады Еўропы працягнуў мандат дэлегацыі дэмакратычных сіл Беларусі на наступныя 2 гады

«Сённяшняя дыскусія — гэта ўнёсак у будучыню, гэта новы досвед для беларусаў, якія змогуць пазней рэалізаваць яго ў дэмакратычнай Беларусі», — заявіў намеснік кіраўніцы Аб’яднанага Пераходнага Кабінета, дэлегат Каардынацыйнай Рады Павел Латушка падчас рабочай сустрэчы «12 прынцыпаў незалежнага дэмакратычнага кіравання Рады Еўропы: уступ, інструменты і лепшыя практыкі», арганізаванага Кангрэсам мясцовых і рэгіянальных уладаў Рады Еўропы на просьбу дэлегацыі беларускіх дэмакратычных сіл, якая складаецца з чальцоў і чалінь Каардынацыйнай Рады ў Кангрэсе.

«Кангрэс для нас — унікальнае месца для атрымання досведу мясцовай дэмакратыі. Будучыня Беларусі менавіта ў пашырэнні паўнамоцтваў мясцовых органаў улады, дэцэнтралізацыі ўлады. У супрацьвагу таму, што стварыў Лукашэнка, калі адбылася поўная цэнтралізацыя і персаналізацыя ўлады, калі ўсе рашэнні нават на самым нізкім узроўні прымаюцца толькі з яго згоды. Мы разумеем важнасць гэтай рэформы і працуем над ёй. Каардынацыйная Рада разглядала таксама законапраект аб мясцовых уладах у Беларусі. Гэта адзін з нашых прыярытэтных кірункаў для ўсіх дэмакратычных сіл, якія змагаюцца за перамены», — падкрэсліў Павел Латушка.

Павел Латушка падчас сваёй прамовы адзначыў, што працягваецца праца над праектам Аб’яднанага Пераходнага Кабінета «Кадравы рэзерв для Новай Беларусі», калі пры дапамозе еўрапейскіх краін ствараецца магчымасць падрыхтоўкі новых патэнцыйных кадраў. Таксама Павел Латушка адзначыў, што ў Польшчы рэалізоўваецца праект «Новыя кадры для Новай Беларусі», дзе ўжо падрыхтавана каля 100 будучых патэнцыйных беларускіх дыпламатаў.

«Выбары, якія адбыліся ў Каардынацыйную Раду, — гэта прыклад прамой дэмакратыі з выкарыстаннем электронных тэхналогій. Дэмакратычны рух за мяжой змог беспрэцэдэнтна гэта арганізаваць. Гэта празрыстасць, тэхналогіі і е-дэмакратыя. Мы ганарымся тым фактам, што ў нас атрымалася гэта зрабіць. Мы плануем праводзіць наступныя выбары, на якіх беларусы змогуць галасаваць, а не проста прысутнічаць.

Карыстаючыся гэтай сустрэчай, я хацеў бы падзякаваць Кангрэсу за фармалізаванае рашэнне ад 15 снежня працягнуць мандат дэлегацыі беларускіх дэмакратычных сіл у Кангрэсе мясцовых і рэгіянальных уладаў на наступныя 2 гады. Гэта для нас вельмі важна і матывуе да далейшай працы. Хацеў бы падзякаваць за „зялёнае святло“ на ўдзел прадстаўнікоў Каардынацыйнай Рады ў назіранні за мясцовымі выбарамі ў краінах-сябрах Савета Еўропы. Гэта будзе для нас унікальны досвед, які мы зможам пераняць для будучых дэмакратычных выбараў у Беларусі.

12 прынцыпаў незалежнага дэмакратычнага кіравання Рады Еўропы мы, безумоўна, закладаем у аснову нашай працы. І гэтыя прынцыпы — наша будучыня, над гэтым мы будзем мэтанакіравана працаваць», — адзначыў Павел Латушка.

Каментар спікера Каардынацыйнай Рады Беларусі Арцёма Брухана да прынятай Заявы КР

Вызваленне 123 палітычных зняволеных — гэта важная і доўгачаканая падзея, якая стала вынікам намаганняў міжнародных партнёраў і сістэмнай працы дэмакратычных сіл з партнёрамі.

Каардынацыйная Рада вітае гэты крок і выказвае ўдзячнасць усім, хто прыклаў высілкі для выратавання жыцця і здароўя людзей, незаконна пазбаўленых свабоды. Асобна хачу падкрэсліць, што сярод вызваленых — Марыя Калеснікава і Максім Знак, якія былі членамі Прэзідыума Каардынацыйнай Рады і былі асуджаныя менавіта ў межах так званай «справы Каардынацыйнай Рады».

Іх вызваленне мае асаблівае сімвалічнае і палітычнае значэнне для ўсяго беларускага дэмакратычнага руху. Мы разумеем, што пасля перажытага ім патрэбны час для аднаўлення. Разам з тым хачу адзначыць: як толькі ў Марыі Калеснікавай і Максіма Знака з’явіцца жаданне і магчымасць, Каардынацыйная Рада будзе шчыра рада запрасіць іх да ўдзелу ў сваіх пасяджэннях і далейшай сумеснай працы.

Спікер Каардынацыйнай Рады Беларусі Арцём Брухан

Не мы адны заўважылі, што на Усебеларускім народным сходзе толькі і размоваў было, што пра 2020 год і поспехі дэмсілаў за межамі Беларусі. У спікера Каардынацыйнай рады Арцёма Брухана дык і ўвогуле склалася ўражанне, што дэмсілы ўдзельнічалі ў УНС. Сядзелі недзе ў зале, і Лукашэнка ўвесь час да іх звяртаўся.

А што так?

Цалкам стрым са спікерам КР глядзіце тут: https://www.youtube.com/watch?v=hgDEeuGzEU4

Шчыра віншую ўсіх, хто святкуе Каталіцкае Раство, з гэтым светлым святам

Гэтае свята нагадвае нам пра каштоўнасць чалавечай годнасці, салідарнасці і ўзаемнай падтрымкі. У час складаных выпрабаванняў яно ўмацоўвае веру ў мір, справядлівасць і годную будучыню.

Няхай яно прынясе у вашыя дамы спакой і цеплыню, падорыць надзею і сілу духу. Няхай гэтае святло яднае нас у імкненні да свабоднай і дэмакратычнай Беларусі. Жадаю вам і вашым блізкім дабра, вытрымкі і веры ў перамены.

З павагай,
Спікер Каардынацыйнай Рады Беларусі

Что ждет Лукашенко в 2026?

Сегодня в прямом эфире Павел Латушко и Артем Брухан подведут итоги этого года, расскажут о планах на 2026 год, а также обсудят следующие темы:

– Наш человек в окружении Лукашенко.

– Подарок диктатору на Новый год.

– Прямая военная угроза для беларусов из-за действий Лукашенко.

– Попытки диктатора выйти из изоляции.

– Освобождение политзаключенных.

– Атаки со стороны режима в отношении представителей демсил.

– Информация про Анжелику Мельникову.

Прямой эфир начнется в 19:00 по минскому времени на ютуб-канале Павла Латушко.

Дарагія беларусы і беларускі!

Новы год – гэта заўсёды момант надзеі. Час падвесці вынікі, падумаць пра будучыню і ўспомніць, што нават у самых складаных абставінах у беларусаў застаецца галоўнае – салідарнасць, адказнасць перад краінай і прага да свабоды.

Каардынацыйная рада з’яўляецца агульнай палітычнай пляцоўкай, якая аб’ядноўвае розныя погляды, досвед і пазіцыі. У сённяшніх умовах яна выконвае ролю прадстаўнічага органа – месца, дзе можа фармавацца агульная воля, дзе вядзецца дыскусія і прымаюцца рашэнні. Гэта інстытут для палітычнай канкурэнцыі, але і для пошуку балансу.

У маі 2026 года адбудуцца выбары ў Каардынацыйную раду. Яны маюць асаблівае значэнне, бо дазваляюць умацаваць легітымнасць і пацвердзіць, што гэты інстытут застаецца адкрытым і сапраўды прадстаўнічым органам. Выбары – гэта спосаб захаваць сувязь з грамадствам і забяспечыць пераемнасць палітычнай адказнасці.
Будучыня Беларусі патрабуе спакойнай, паслядоўнай працы і рашэнняў, якія прымаюцца з разуменнем складанасці моманту. Менавіта праз інстытуты, праз прадстаўніцтва і праз узаемную адказнасць з’яўляецца магчымасць набліжацца да вырашэння крызісу ў Беларусі.

Новы год – гэта таксама пра чалавечае: пра падтрымку, цеплыню і надзею. Хай у наступным годзе будзе больш спакою, даверу і сілы слухаць адно аднаго. Гэта неабходна, каб наша Беларусь захавала сваю незалежнасць і магла развівацца.

З Новым годам!
Няхай ён стане годам вытрымкі, адказных рашэнняў і крокаў, якія набліжаюць нас да агульнай мэты.

Спікер Каардынацыйнай рады
Арцем Брухан

Шчыра віншую ўсіх, хто сёння святкуе праваслаўнае Раство, з гэтым светлым і важным святам

Раство нагадвае нам пра каштоўнасць чалавечай годнасці, узаемнай павагі і салідарнасці. У часы выпрабаванняў яно ўмацоўвае веру ў мір, справядлівасць і будучыню, у якой чалавек і яго правы знаходзяцца ў цэнтры ўвагі.

Гэта свята таксама нагадвае, наколькі важныя для Беларусі ўзаемнае разуменне і дыялог. Толькі праз уменне слухаць і чуць адно аднаго, праз адказную размову і павагу да розных поглядаў мы зможам пераадолець падзелы і рухацца да прымірэння і адзінства.

Няхай Раство прынясе ў вашы дамы спакой і цеплыню, падорыць надзею і ўнутраную сілу. Няхай святло гэтага свята яднае нас у імкненні да вольнай, дэмакратычнай і мірнай Беларусі, дзе кожная сям’я зможа разам, на сваёй Радзіме, святкаваць гэтыя светлыя дні.

З павагай,
Спікер Каардынацыйнай Рады Беларусі
Арцем Брухан

Адкрытае агульнае пасяджэнне Каардынацыйнай Рады, 14.01.2026

1) Прэзентацыя кандыдатак у дэлегацыю ПАРЭ. — Міжнародная камісія.

2) Абмеркаванне Праекта палажэння аб выбарах у КР. — ПГ па ўнясенні зменаў у палажэнне, “Каманда Латушкі і Рух “За Свабоду”.

https://youtube.com/live/f_0-3kJZ8l0

Вынікі выбараў чальца дэлегацыі Каардынацыйнай рады ў ПАРЭ

14 студзеня адбыліся слуханні Каардынацыйнай Рады па пытанню абрання шостага прадстаўніка ў склад дэлегацыі КР у Парламенцкай Асамблеі Рады Еўропы.

Свае кандыдатуры вылучылі тры сяброўкі КР з розных фракцый: Таццяна Мартынава (фракцыя «Хопіць Баяцца»), Рыта Гаціх (фракцыя «Каманда Латушкі і Рух "За Свабоду"»), Таццяна Хоміч (фракцыя «Беларусы»)

Па выніках рэйтынгавага галасавання ў склад дэлегацыі абрана Рыта Гаціх (фракцыя «Каманда Латушкі і Рух "За Свабоду"») набраўшы 64 бала.

Такім чынам, дэмакратычныя сілы у ПАРЭ прадстаўляюць:
Аляксандра Мамаева (кіраўніца дэлегацыі), Павел Латушка, Павел Церашковіч, Маргарыта Ворыхава, Валер Мацкевіч і Рыта Гаціх.

Прадстаўнікі беларускіх дэмакратычных сіл могуць уключацца ў місіі па назіранні за мясцовымі выбарамі ў краінах-членах Рады Еўропы

Бюро Кангрэса мясцовых і рэгіянальных уладаў Рады Еўропы прыняло рашэнне аднавіць запрашэнне для прадстаўнікоў беларускіх дэмакратычных сіл — дэлегатаў Каардынацыйнай Рады, абраных 25–27 мая 2024 года, для ўдзелу ў 50-й сесіі Кангрэса.

Акрамя таго, Каардынацыйнай Радзе прапанавана прызначыць трох прадстаўнікоў з ліку сваіх дэлегатаў, якія будуць абраныя ў маі 2026 года, для ўдзелу ў сесіях Кангрэса ў 2026 і 2027 гадах. Дадаткова могуць быць прызначаныя тры намеснікі. Такім чынам, мандат працы беларускай дэлегацыі працягнуты яшчэ на два гады.

Асобна варта адзначыць шэраг дадатковых рашэнняў Бюро, ініцыяваных беларускай дэлегацыяй падчас сесій 2025 года і ў межах пастаяннай камунікацыі з Кангрэсам, у тым ліку падчас візіту дакладчыцы па Беларусі ў Польшчу.

У склад беларускай дэлегацыі, якую ўзначальвае чаліня фракцыі «Каманда Латушкі і Рух "За Свабоду"» Ірына Халопіца, уваходзяць: Аляксандра Дойніч і Яўгеній Караулаў («Моладзевы наступ»), Юрый Губарэвіч і Аляксей Міхалевіч («Каманда Латушкі і Рух "За Свабоду"»), Паліна Бродзік («Беларусы»).

Сярод ключавых дадатковых рашэнняў:

– прадстаўнікі беларускіх дэмакратычных сіл могуць уключацца ў місіі па назіранні за выбарамі ў краінах-членах Рады Еўропы;
– Бюро Кангрэсу пагадзілася з прапановай дазволіць прызначэнне моладзевага дэлегата або дэлегаткі ад беларускіх дэмакратычных сіл, пачынаючы з 2026 года.

Таксама Кангрэс праінфармаваў, што, нягледзячы на фармальнае завяршэнне прыёму заявак у ініцыятыву Rejuvenating Politics 2026, было прынята рашэнне дадаткова адкрыць прыём заявак ад моладзі з беларускіх дэмакратычных сіл. Удзельнікі змогуць узяць удзел у дзвюх сесіях Кангрэса ў 2026 годзе.

У бліжэйшы час будзе падрыхтавана асобнае паведамленне з дэталямі для патэнцыйных кандыдатаў.

Каардынацыйная Рада прыняла Палажэнне аб выбарах

Каардынацыйная Рада прыняла Палажэнне аб выбарах у Каардынацыйную Раду, якое рэгламентуе парадак арганізацыі і правядзення выбараў у склад Каардынацыйнай Рады чарговых скліканняў.

Вынікі галасавання:
За — 40
Супраць — 0
Устрымаліся — 2

У галасаванні прынялі ўдзел 42 з 80 дэлегатаў. Колькасць дэлегатаў ад фракцый, якія прынялі ўдзел у галасаванні:

«Каманда Латушкі і Рух “За Свабоду”» — 24 з 28
«Беларусы» — 8 з 12
«Незалежныя беларусы» — 2 з 8
«Еўрапейскі выбар» — 4 з 8
«Моладзевы наступ» — 3 з 8
«Наша Справа / Беларускія Хрысціянскія Дэмакраты» — 0 з 6
«Хопіць баяцца» — 1 з 3
Пазафракцыйныя дэлегаты — 0 з 5

У адпаведнасці з Палажэннем, выбары ў Каардынацыйную Раду праводзяцца ў онлайн-фармаце і доўжацца адзін тыдзень — з 00:00 першага дня галасавання да 24:00 апошняга дня галасавання па мінскім часе. З улікам раней прынятага рашэння Каардынацыйнай Рады, галасаванне павінна адбыцца з 11 па 17 мая 2026 года ўключна.

Галасаванне адбываецца па спісах выбарчых суб’ектаў, што замацоўвае прапарцыйную выбарчую сістэму. Для ўдзелу ў размеркаванні мандатаў усталяваны мінімальны прахадны парог у 3%.

Удзельнікамі выбараў з’яўляюцца выбарчыя суб’екты. Выбарчымі суб’ектамі могуць быць палітычныя партыі, устаноўчыя камітэты партый, арганізацыі грамадзянскай супольнасці, фракцыі Каардынацыйнай Рады дзейнага склікання, іх кааліцыі, а таксама групы грамадзян, якія аб’ядналіся для ўдзелу ў выбарах і адпавядаюць патрабаванням Палажэння аб выбарах.

Кожны выбарчы суб’ект павінен:

– мець уласную назву;
– мець палітычную праграму на перыяд, не меншы за тэрмін паўнамоцтваў новага склікання Каардынацыйнай Рады, і дэклараваць каштоўнасці (прынцыпы ці ідэалогію), на аснове якіх ён сфармаваны;
– падаць спіс не менш як з 10 кандыдатаў у дэлегаты Каардынацыйнай Рады, якія выказалі згоду на ўдзел у выбарах;
– забяспечыць гендарную квоту не менш за 40% асобаў менш прадстаўленага полу ад агульнай колькасці кандыдатаў у спісе. Існуе магчымасць зніжэння квоты да 20% рашэннем Выбарчай камісіі для тых выбарчых суб'ектаў, якія аргументавана не могуць выканаць квоту ў 40% (арганізацыі ў сферы бяспекі, ветэранскія арганізацыі беларускіх добраахвотнікаў і іншыя падобныя арганізацыі).

Кожны выбаршчык мае адзін голас і можа прагаласаваць за адзін са спісаў выбарчых суб’ектаў.

Наступным крокам па падрыхтоўцы выбараў у Каардынацыйную Раду будзе фармаванне Выбарчай камісіі, аб чым будзе паведамлена дадаткова.

Аб’ява аб прыёме заявак у Выбарчую камісію

У адпаведнасці з Палажэннем аб выбарах, Каардынацыйная Рада абвяшчае прыём заявак на вылучэнне кандыдатур у склад Выбарчай камісіі.

Кандыдатуры чальцоў Камісіі могуць быць вылучаны:

– фракцыямі Каардынацыйнай Рады;
– Нацыянальнай лідаркай і кіраўніцай Аб’яднанага Пераходнага Кабінета Беларусі;
– Аб’яднаным Пераходным Кабінетам Беларусі;
– палітычнымі партыямі;
– іншымі арганізацыямі грамадзянскай супольнасці.

Колькасць кандыдатур — не больш за 2 асобы ад адной фракцыі, структуры або арганізацыі. Для вылучэння кандыдатуры ў склад Камісіі неабходна запоўніць адпаведную форму.

Заяўкі прымаюцца да 27 студзеня. У выпадку неабходнасці тэрмін падачы можа быць падоўжаны.

📣 Набор заявак: моладзевы/моладзевая дэлегат/дэлегатка ад беларускіх дэмакратычных сіл

Кангрэс мясцовых і рэгіянальных уладаў Рады Еўропы абвяшчае набор заявак на ўдзел у праграме Rejuvenating Politics у 2026 годзе.

У межах праграмы будзе адабрана 46 моладзевых дэлегатаў з розных краін, у тым ліку дэлегат/дэлегатка ад беларускіх дэмакратычных сіл, якія прымуць удзел у 50-й і 51-й сесіях Кангрэса.

Рашэнне аб прызначэнні моладзевага/моладзевай дэлегата/дэлегаткі ад дэмакратычных сіл Беларусі з 2026 года стала адным з вынікаў супрацы дэлегацыі дэмакратычных сіл Беларусі ў Кангрэсе, у склад якой уваходзяць чальцы і чаліні Каардынацыйнай рады, а таксама Беларускага Нацыянальнага Моладзевага Савета «РАДА» з Кангрэсам мясцовых і рэгіянальных уладаў Рады Еўропы.

Тры нагоды, чаму варта прыняць удзел
1️⃣ Голас беларускай моладзі на еўрапейскім узроўні

Вы атрымаеце магчымасць прадстаўляць інтарэсы і досвед беларускай моладзі ў Кангрэсе мясцовых і рэгіянальных уладаў Рады Еўропы, удзельнічаць у дыскусіях і ўплываць на фармаванне палітык у сферы ўдзелу моладзі ў дэмакратычных працэсах.

2️⃣ Унікальны досвед і міжнародныя кантакты

Удзел у сесіях Кангрэса — гэта практычны досвед працы ў міжнароднай інстытуцыі, знаёмства з моладзевымі дэлегатамі і дэлегаткамі з розных краін, а таксама магчымасць стаць часткай еўрапейскай супольнасці Rejuvenating Politics.

3️⃣ Развіццё лідарскіх і прадстаўніцкіх кампетэнцый

Праграма дазволіць паглыбіць веды ў сферы дэмакратычнага ўдзелу, мясцовага самакіравання і моладзевай палітыкі, развіць навыкі публічных выступаў, аргументацыі і прадстаўніцтва інтарэсаў на міжнародным узроўні.

Каго мы шукаем?
Моладзь, якая:
- мае выразную сувязь з беларускімі дэмакратычнымі сіламі;
- актыўна ўдзельнічае ў грамадскім, моладзевым, адукацыйным жыцці або мясцовым самакіраванні;
- цікавіцца ўдзелам моладзі ў дэмакратычных працэсах;
- гатовая прадстаўляць перспектыву беларускай моладзі на еўрапейскім узроўні;
- пражывае па-за межамі Беларусі;
- прыме ўдзел у абедзвюх (50-й і 51-й) сесіях Кангрэса - 28.03-02.04, 24-29.10.
📌 Важна: кандыдаты павінны быць гатовыя да публічнасці. Інфармацыя пра удзел моладзевага/моладзевай дэлегата/дэлегаткі ў сесіях Кангрэса будзе асвятляцца публічна, у тым ліку праз камунікацыйныя каналы арганізатараў.

Фінансавыя ўмовы ўдзелу
Арганізатары імкнуцца забяспечыць падтрымку дэлегата/дэлегаткі ў частцы пакрыцця выдаткаў. Удзел у другой сесіі будзе суправаджацца поўным пакрыццём выдаткаў (праезд, пражыванне). Што датычыцца першай сесіі, умовы пакрыцця выдаткаў знаходзяцца на стадыі ўдакладнення і будуць залежаць ад наяўнасці дадатковых рэсурсаў. Не выключаецца магчымасць, што выдаткі, звязаныя з удзелам у першай сесіі, удзельніку/удзельніцы спатрэбіцца пакрыць самастойна.

Інфармацыя па гэтым пытанні будзе даведзена да ведама адабранага/адабранай удзельніка/удзельніцы дадаткова.

Што ўключае заяўка?
Кандыдаты павінны:
-запоўніць афіцыйную аплікацыйную форму;
-адказаць на пытанні пра матывацыю, досвед і бачанне ўдзелу моладзі ў дэмакратычным жыцці;
-запісаць кароткае відэа (да 30 секунд) з адказам на пытанне пра чаканні ад удзелу ў праграме;
-дадатковым плюсам да заяўкі будзе рэкамендацыйны ліст ад арганізацыі (на ангельскай мове), з якой звязаны/звязаная заяўнік/заяўніца.
📌 Важна: перад падачай заяўкі неабходна ўважліва азнаёміцца з поўным тэкстам Call for applications.

Тэрміны
Дэдлайн падачы заявак 29 студзеня 2026 г., да 18:00 CET. Вынікі адбору будуць паведамленыя да 10 лютага 2026 года.

Як падаць заяўку?
Запоўненую заяўку неабходна даслаць на адрас: congress.youth@coe.int
⚠️ Няпоўныя заяўкі або заяўкі, пададзеныя пасля дэдлайну, разглядацца не будуць.

Выбары ў Каардынацыйную раду яшчэ не пачаліся, а імі ўжо цікавяцца… спецслужбы. Стрым са спікерам КР Арцёмам Бруханом

Як сёлета пройдуць выбары ў Каардынацыйную раду, чым яны будуць адрозненівацца ад папярэдніх? Як зацікавіць беларусаў вылучаць свае кандыдатуры і ўзяць удзел у галасаванні? Чым выклікана цікавасць спецслужбаў да выбараў у КР і як абараніць гэты орган ад агентуры?

На гэтыя ды іншыя пытанні адказвае спікер Каардынацыйнай рады Арцём Брухан: https://youtu.be/bR5092Y8Za4