بارت 200


ثاني يوم الصبح 🌝

في الهند ....


أحمد : بيبدل يسير معهد الانجليزي حقه ..


معاذ : قام بيجهز لهم صبوح 🍛🍲 ...


منير : كمل يلبس وفتح تلفونه بيتصفح النت .. فجاءه بهررين عيونه 🙄 ومش مصدق بيتفرج من صفحه لاصفحه .. انصدم رجم التلفون حقه 📱 وكان يصيح 😡ليش هكذا يا آيه لييييييش. وكسر المرايه بيده ...


معاذ واحمد : سمعوا صياحه وصوت حاجه اكتسرت حملوا 🏃🏻🏃🏻 يبسروا ماله ...


منير : ماسك يده بيخرج منها دم 👋🏻..

معاذ : مسك يده 👋🏻وابسر الدنيا مكسره مستغرب 😳 مالك ايش حصل ..


منير :آيه آيه يامعاذ 😔 ...


أحمد : افتجع علي اخته 😰 مالها اختي ايش فيها ...


منير : صورها ملان الفيس بوك هي وواحد والتعليقات وكلام يوجع 😔ليش هكذا يا أيه لييش انا مراعي أكمل اقرى وأجي اخطبش 💍 ليش هكذا ..


أحمد : حمل ادى تلفونه 📱 يتفرج مابه انصدم 😳 واتصل ع طول لابيتهم محد بيرد عادهم راقدين جلس فوق الكنبه ومغطي ع وشه بيده .



........ ........ ........



في صنعاء ....



رزق : نكزه ضوء الشمس ☀ لافوقه فتح عيونه وابسر نفسه فالشارع كان نفسه يقوم ويلقى ان هذا كله حلم زعل ع نفسه 😔 سمع صوت من بطنه وحس بالجوع ذكر انه بدون أكل .. قام بيخطي يدور له مايأكل 🚶🏼 ويحاول يوصل لبيت عادل ابسر صاحب الفرن بيخبز سار وقف من بعيد بيتفرجه 👀...


صاحب الفرن : انتبه له وقد حالته حاله باين فيه التعب وشعره مشعفل ووجهه موسخ رحمه 😥 شل له 2 خاص .. هاه ابني كل هولاء واداله 20 ..

رزق : تشارغت عيونه بالدموع 😢 مشنا شحات ياعم انا ابن عبدالله ال**** التاجر حق صنعاء القديمه بس لأني جاوع شاشل الخاص بس الزلط مع ..



صاحب الفرن : استغرب منه 🤔وبيحاكي نفسه الولد شكله شابع نفس صدق بس معقوله يكون ابن ناس ويكون ان هذا التاجر بس ليش هو فالشارع ... ابسره بارد ... جي جي يا ابني ادخل هنيه ادفى شويه شق النار 🔥 من البرد هذا ...



رزق : مع شكرا .. انا اشتي اسير بيت عمي عادل ..

صاحب الفرن : من عمك عادل اسكه قلي مالك هكذا فالشارع مدام وانت صدق ابن ناس ..


رزق : بيحكي له من امه وابوه وسميره وانها طردته ومن هو عمه عادل ...


صاحب الفرن : زعل عليه 😔 بعد ماحس بالصدق في كلامه ... طيب خلاص يا ابني اجلس هنيه أمد ما اكمل اخبز واروحك معي البيت حقي اخلي مرتي تدي لك لده👕👖 من حق جهالي ونبسر كيف نروحك لأهلك ...


رزق : بكي 😭 ماشي مشتيش ارجع عندهم اشتي عمي عادل بس ..


صاحب الفرن : خلاص تمام لابعدا وعنبسر كيف اجلس ذلحين كل وادفى ...


....... ......... ..........


في بيت عادل ...


تهاني : قربت الصبوح🍲🍛 ودخلت تقيمهم ...


هبه : كانت مدفايه بس وقد عيونها مومات من كثر مابكيت 😭.


تهاني : هيا حبيبي صبوح قومي .

هبه : شابعه مشتيش 😔 قد قاموا بابا ولاعادهم نقوم ندور رزق ..


عادل : قد قام سمعهن دخل لعندهن .. صباح الخير ..


تهاني : صبحك الله بالخير والعافيه ..


هبه : هيا بابا نخرج ندور رزق 😔 ..


عادل : اصتبح واخطى للمدرسه بساعتي 🏫 قد بداء الدوام بيسجلوا الطلبه وشرجع ابسرهم فالقسم مافعلوا واسير ادوره ...


تهاني : تنهدت بزعل 😔 الله يعينك وأنا اقوم اتصل لأحلام ورجاء لو به عندهن خبر ...


عادل : وانا ازيد ابسر عبدالكريم لو لقيوه ..


تهاني : اين عيلقاه والله مافي حسهم يافرحتهم انه ضاع.




........ ........ ........


في بيت عبدالكريم ..


سميره : قامت وتحت عيونها حارق وفمها كله حبوب من القهر 😔 ع صوت رزوعه الباب حقهم 🚪سارت تفتح وانهم اخوتها وصلهم الخبر حق آيه ...


أخوتها : دخلوا بيصيحوا 😡 ماهو هذا الي ابسرنا ماهو خبر بنتش اين كنتي ...


سميره : بكيت 😭 بس قووى الي فيني مكفيني مدراني مدراني والله اني كنت اوبه لها.


أخوها : بيصيح 😡 أينهي هذه. اين جت وطت رؤؤسنا والله لأذبحها عاد ابوها مرزي لها من أمس وبيدورها ...


سميره : لحقته تمسكه وهي بتبكي 😭 قوى يا أخي مع انا فدال رجلك لاتفعل بها شي البنت غاويه مدراها وبعدا الحمدلله هي غر جت ع شويه صور بس ويوم سارت معه المطعم هي وصاحبتها بس ...


أخوها : وعادهو بس 😡 ماعاد به وقد بنتش خرجت معه وابوها وينهو هذا واخوها عندهم عادي ..


سميره : عبدالكريم مخبوط ع وشه مريض من امس ولاعاد فتح فمه بكلمه طول الليل وأنا بينكمدله محمي 🤒 ومحمد قد ظربها لما دماها وخرج من البيت .



آيه : بتسمعهم غلقت الباب 🚪 ع نفسها مفتجعه منهم وبتبكي 😭 وبتحاول تتصل لصاحبتها تدبر لها رقم هاني ...



@qesasanani

بارت 201



بعد الظهر ...


في بيت صاحب الفرن ..

رزق : بعد ماحممته مرته ولبسته من لداه جهالها 👕👖 جالس في طرف الغرفه ساكت ..


مرته : يوووه مرحمه ذيه الولد والله انه هزر قلبي 💔..


صاحب الفرن : والله مادري حالي كيف افعل بينقل أسير اسال صدق في صنعاء القديمه حيت ماقلي ع المحلات حقهم وأبسر منهو اخوه وارده لهم .


مرته : يووه مع حرام لاترجعش لهم والله لوتبسر كيف جسمه حوارق وانا بينحممه قلي كانت تظربه 😔 مره اخوه ..


صاحب الفرن : كان كيف نفعل به .


مرته : اسكه سير اسال وابسر ذيه الي بيقل عمه عادل لوبه احد يعرفه ونشله عنده ..



صاحب الفرن : ذلحين قومي قربي لنا نتغداء وبعدا عنبسر كيف عيحلها الله من عنده ويرحم ذيه الجاهل ...



...... ...... ......


في المستشفى 🏨...


أم يسرى : يادكتور هيا أيحين عتخرجني ..

الدكتور : نزيد نطمن عليش ياخاله لبكره ان شاء الله .

أم يسرى : ماشي مع قوى يا ابني والله ان قدنا بخيره بعد ما ابسرت ذيه ولفتت لعبدالصمد وابتسمت 🙂..

عبدالصمد : قرب حبها في رآسها 😘 تسلموا لي يارب ..


الدكتور : طيب شاخليهم يفعلوا لش ذلحين فحوصات ونبسر كيف النتيجه لو امورش تمام شكتب لش ع خروج ..


أم يسرى : أيووه قوى ياولدي رضي عليك 😃 ..


عبدالصمد : بيصافدها .. مابلا قدنتوا فاقدين للشيخ تشتوا تروحوا عنده 😉..

أم يسرى : ضحكت 😊 مابلا اشتي اروح ابسرك سوى وأجلس معك ومع مرتك قدنا فاقده لكم ..


عبدالصمد : بس يا امه احنا ماعنجيش معاكم ذمار ومانشتيش عمي صالح ولا أحد يدرى اين احنا ..


أم يسرى : يوووه😱 ليش ياابني والله ان قدنا فارحه اننتوا عتجوا معانا خلاص ..


عبدالصمد : نوال يا امه مقدهيش مستعده تبسر عمي ولا يونس موجوعه قووي لوتبسروا مرحمها 💔 وانا مشتيش أضغط عليها وزد معيفه وتاعفه قلت أخليها لما هي من نفسها تقلي تشتي تبسرهم ..


أم يسرى : والله ماعندها حجه يا إبني الي حصل فيكم مشو قليل 😔 .




...... ....... .......


في بيت حميد ...


تقيه : يا بنتي اسكه قوى رزي انتي تاعبه وواحمه ولابترضي تسمعي الكلام ..


يسرى : والله اننا بينصيح فوقها من اول قلتلها هي غير تشبح البنت وأنا شاعاونكم ...


نوال : مالكن عليا .. أمانه خلني افعل عصيد ع مرق حامض لأبي حميد أنا داريه ان قد عيوقعوا خاورين لعصيدتي 🍲..


تقيه : ماهذه والله انش صدقتي والله ماكوده يجلس يقلي هيا ماهي حقش العصيد هذه والله ماعصيد الإ عصيده نوال 🍲 ...


نوال : ضحكت 😃 هيا ابسرتوا ..يله خلوني افعلها لهم قبل مايروحوا هم وعمي قناف ..


يسرى : يووه هذه قد البنت قامت 👶🏻 أدخل أبسرها ..


نوال : بعد مادخلت يسرى .. ياأمه قلوا لي كيف العيال زد سيرتوا تبسروهم مدري مالي هذه الفتره كودي بينحلمهم ..

تقيه : ماتشتيش تقلقها .. ولافيهم الإ العافيه أنتي غير افتهني وبردي قلبش ❤ مفتهنين ولافيهم شي اوبهي لزوجش وللي في بطنش بس ..



عم حميد : جاء وبيداعي . ييييه يا ام قايد الغداء حاصل هيا قربين لي وادي غداء المستشفى 🏨..


تقيه : هيا ابسرتي عنجلس نتجابر وقدوذا ابوش جاء هيا اقطبي اعصدي امد ما اقرب لهم ...




....... ...... ......


في بيت عبدالكريم



محمد : عادهو وصل .. دخل بيدور أمه ادخلوا قلوا لها تدي لي الان عنوان بيت هاني ورقمه قبل ما ادخل اشرب من دمها 😡 ..


سميره : بتهديه .. يا ابني ماعتفعل بعنوان بيتهم قد ايذه قالت لك الولد سافر ..


محمد : بصياح 😡 ولو سافر سعم ماعدبش معه اهل هانا ولا كيف قسما بالله لأخليه يجي يتزوج بها ورجله فوق رقبته ماشي انا شتحمل لكم بظلمها واقتلها بدعت بنا بين الناس ...


سميره : خلاص ماعليك انت ادخل بدل امد ما اديلك ماتأكل وأنا شدخل أحاكيها أنا ..


محمد : معاكم 10 دقايق امد مالبس ماشي حرام ما أخرجها لكم الإ جنازه وأبي اينهم عندهم عادي ولافعلوا بها شي 😡 ...


سميره : أبوك مسكين مطروح ع وشه مريض من امس ولاقد إحترك ...


محمد : دخل يبدل 👕👖..


سميره : بتدقدق لآيه الباب 🚪 افتحي افتحي ياهانم افتحي فتحوا لش قبر ...


آيه : مفتجعه 😰 مشتيش افتح لأحد يحاكيني .

سميره : افتحي بينقلش ادخل أحاكيش انا قبل ما يجي اخوش حالف مايخرجش الإ جنازه ..


آيه : افتجعت 😰 وقامت تفتح لها ..مالكم ماتشتوا.


سميره : ابسرت وجهها منفخ وكله حوارق وعند فمها مجروح وتحت عيونها حارق زعلت عليها 😔 مهما كان في الأخير هي بنتها .. اديلي رقم هذا الي كنتي تحاكيه واينهو عنوان بيتهم لاخوش ..



آيه : رقمه مغلق قالوا سافر وعنوان بيتهم معرفش 🤔 تذكرت عنوان الشقه بس ماصديتش تقلهم لأنهم مشهم داريين انها تزوجت به عرفي راكنين انه بس صور واتصالات افتجعت لو يدروا ماعيفعلوا بها أكثر من هكذا ...


سميره : كان ادخلي ارتزعي هانا وادي التلفون الي كنتي تتواصلي به معه 📱 ..


آيه : ماعدبش تلفون 📱أنا رجعته له أخر مره لأنه قلتله ماعاد يحاكينيش وبعدا لاتصيحوش هو يشتي يخ

طبني وقد حاكى امه والكل ..


سميره : ابسرتها ورحمتها 😔 والله ماعد دري حالي اقتهر عليش وع غواش ولا اقتهر عن نفسي خطبه مه يامدبره وقد سمع بش امه الصلاه كنتي لعبه ينتقم من اخوش قله ورسله ساع ما اخوش ظربه ادخلي ارتزعي بقعتش ماعدبش له لاخرجه ولا دخله..

آيه : والمدرسه 🏫 عيتبدا من السبت ..


سميره : لاعاد مدرسه 🏫 ولاعاد لش خرجه احمدي الله لازد احد عبرش وزد جاء يخطبش عنزوجش ماشي قدش هنيه بقعتش خرجت وغلقت عليها الباب ....



🌹meme_abdalgaleel



@qesasanani

بارت 202



في بيت عادل ...


عادل : اتصل لتهاني 📱 اتغدوا انتوا ماقد شاروحش ازيد افعل لفه فالشوارع ابسره ..



تهاني : ومن له نفس يأكل 😔 .. الله يفرحنا برجعته ..


هبه : ذكرت ان رزق كل مايزعل كان يعجبه يخلي أحمد ولا معاذ يشلوه المقبره حملت لعند أمها 🏃‍♀ ياماما ياماما قلوا لهم يبسروه لو هو فالمقبره هو كان لما يزعل يسير هاناك ..



تهاني : اوذا بينحاكيه راعي .. عيس حين ذكرتي ..


عادل : طيب تمام اوذا شازيد أسير أدوره هاناك ..


وصل المقبره بيتلفت 👀 بيدور رزق ودخل زار الحج عبدالله وجلس عند القبر بيسقي الشجر ويسكب له ماء قري له الفاتحه هو وخاله فاطمه وبيجابره .. سامحني ياحج ماقدرتش احافظ ع امانتك بس والله ماهو بيدي ونزلت دمعته 😢..



الحارس : ابسره من بعيد عند القبر جاء لعنده لانه متعود يوبه للقبور ويسقيهن وعادل يدي له مبلغ 💴..


عادل : ما ابسرتش رزق ابن الحج عبدالله هانا ماجاش كذا ...


الحارس : انا امس ابسرت ولد من هذولاك الي كانوا يجوا معك ولا مع العيال جلس هانا شويه ورحله ..


عادل : فرح 😃 اطمن ان رزق بخير .. طيب مشنت داري اين سار ..



الحارس : ماشي والله ذلحين ابسر القبر هذا زرعته مثل ماقلتلي بس عاد ...


عادل : قاطعه ... اسهل اسهل مره ثانيه حاكيني انا مستعجل خرج زلط 💴 من جيبه ومكنه وخطي خرج التلفون بيتصل 📱 لتهاني يقلها انه بخير بس ان شاء الله يلقوه ...


تهاني : بعد ماغلقت معه ابسرت هبه 👀 ريت والله وانتي تلوهتي من امس قالوا كان هاناك ..


هبه : طيب وذلحين ماهو مالقيوش 😔..


تهاني : اوذا بيدوروه ..

تلفون البيت رن ☎..

هبه : سارت تجاوب وانه معاذ وقدهي بتحكي له .. يامعاذ رزق ضايع ..

تهاني : حملت هزرت السماعه ☎ من يدها وبهررت فوقها .. هاه ابني كيف انت وكيفو احمد ومنير ..


معاذ : بقلق 😰 اول ماله رزق مابتقل هبه صدق ضايع كيف ضاع ..


تهاني : لاتقلقش مابش شي ان شاء الله عنلقاه ..

معاذ : بيصيح 😡كيف ضاع ماحصل ..

تهاني : سميره قالت قامت الصبح وماعد بحد هو شكله هرب من كثر ماكانت تظربه وبتحكي له ماحصل من بعد ماسافر ...


معاذ : اقتهر قووي 😔 طيب وذلحين كيف ليش مااتصلش لأبي وجاء عندكم .. انتوا داريين معانا عطله بعد اسبوع شحجز وأجي ..

تهاني : وماعتجي تفعل يا ابني قدوذا أبوك بيدوره ..


معاذ : مدراني قد شجنن عليه ماهو هذا اليوم من اوله وماهي قصه آيه هي وهذك الولد ..

تهاني : استغربت 😳 ولد مه وقصه مه ..

معاذ : حكى لها ان صور هبه وهاني ملان النت ..


تهاني : اصبر هذا انتقام الباري منهم شتصل لخالتك رجاء وافهم منها ..



....... ....... .......


بعد العصر ..

صاحب الفرن : لو اشلك للمعطاره الي بتقل حقكم والحاره عتعرفها ..


رزق : أيوووه اعرف اينهي بس معرفش منين يخطوا لها الشوارع بس أنا مشتيش ارجع عند عبدالكريم اشتي اسير عند عمي عادل ..


صاحب الفرن : تمام خلينا نسير لاهاناك اول ونسال ونبسر كيف اكيد عنلقى احد يعرف عمك عادل ..


رزق : أيووه العمال حقنا الي فالمحلات يعرفوه لكن امانه لاتشلوني عند عبدالكريم وبكي 😭..



صاحب الفرن : خلاص لاتبكيش والله ما ارجعك عنده مسكه وخطيوا 👬...


....... ........ ......


في بيت حميد


عم حميد : هيا حمدلله ع سلامتها ياشيخ ..


الشيخ قناف : الله يسلمك وسامحنا يا أخي قد بينشغلك ..

عم حميد : أين شغله الله المستعان والله ان قدنا زاعل اننتوا عترجعوا غطوه ريت والله وتجلسوا عندنا كما كان ..


الشيخ قناف : والله انه نفسي بس قد انت داري بالهرم والجنان حقنا مابلا نرجع ..


عم حميد : المهم ماذلحين تكون تنتبهوا لها وكن طلعها تفعل فحوصات ..


الشيخ قناف : ايوه أكيد لكن سبحان الله ابسرت مرضتها خرجت لطريق بكم ابسرت عبدالصمد ..


عم حميد : ايوه سبحان الله ..اهم شي اتطمن قلبها عليه ..


...... ....... ......


في الهند ....


معاذ : قلهم ان رزق ضايع ..

أحمد : قد عيجنن من موظوع آيه وذلحين رزق ..خاصه بعد ما اتصل لمحمد وفهم منه الموظوع ..


منير : جالس مقهور 😔 وزاعل ع آيه وهو الي كان بيحبها صدق وكان ناوي جد يخطبها .


ميس : بتتصل لمعاذ 📱 مرحبا كيفك .. شوبكم اليوم ماحدا اجاء ع الجامعه ..


معاذ : اصلا حصلت بعض المشاكل معانا فاليمن. واحنا زاعلين محد له نفس في دراسه ..



ميس : اها لكان ربي يعينكم . اسمعني اكيد ماحدا فيكم طبخ وما اكلتوا شي مدام صوتك مخنوق هيك انا هلا عم اطبخ لي راح اكثره وابعث لكم مع الحارس تبع السكن.



معاذ : لا لا اسلمي بنطلب ديلفري وخلاص ..


ميس : ياعيب الشوم ديلفري وانا هون خلاص خلاص أنا راح ابعثه باي .


....... ....... ......


في صنعاء ...


صاحب الفرن : سال ع محلات الحج عبدالله ودلوه ..وصل لمكان بيسال رزق هيا مه من هانا ..

رزق : ايووه ادخلوا من الشارع الثاني .


صاحب الفرن : دخل وابسر المحلات بيحاكي نفسه 🤔 والله ان شكل هذا الولد بيقل الصدق مدام وطل

ع به محلات ومعطاره صدق ..


رزق : انتوا ادخلوا اسألوهم ع عمي عادل وانا شاراعي لكم هانا مشتيش ادخل لاهو عبدالكريم أخي داخل ويشلني معه بعدا ..


صاحب الفرن : طيب تمام اجلس هنيه مش تسير كذا ولا كذا ..ودخل يسال وبيطقس وفعلا تأكد من كلام رزق لما العامل قله ايوه معه ولد اسمه رزق ..


العامل : ذلحين يا اخي انت ماتشتي بتتسؤال ..

صاحب الفرن : طيب وعادل ال*** تعرفه ..

العامل : ايووه بس اول تقلي ليش وماتشتي ..

صاحب الفرن : الصدق انا لقيت ولد قال اسمه رزق وهو ابن الحج عبدالله وبيحكي له وانه مره اخوه طردته قالت هم لقيوه والولد يشتي يرجع عند عادل قد حلفني لا اقل لحد انه هانا .


العامل : بيحب رزق من محبه الحج عبدالله وداري كيف عبدالكريم خرج بيدوره ويصيح يارزق ..

رزق : سمع صوته افتجع لاهو عبدالكريم هانا تخبى .

العامل : حمل لعنده مالك لاتفتجعش 😰 انا ناصر عبدالكريم مشو هانا ..


صاحب الفرن : فرح لما ابسر رزق مسكه 😄 ذلحين هيا مه يارزق افلتك عنده وانا راكن ولا اراعي لما اشلك لاعند عمك عادل .


العامل : خلاص يا اخي تسلم الف شكرا والله ان جميلك فوق راسنا انا شتصرف ..

رزق : تنهد ارتاح بس عادهو مش مستوعب ولا قدر يصدق انهم لقيوه ومشوا ابنهم ..



العامل : دخله المعطاره معه واتصل لعادل 📱 ان رزق عنده. .


عادل : ع طول دور السياره وهو فالشارع بيدوره وسار طريقهم 🚘.



🌹meme_abdalgaleel


@qesasanani

بارت 203




في المعطاره ...

وقت المغرب 🌚 ...


عادل : وصل وقف السياره 🚘 ونزل .


رزق : كان داخل ابسر سيارته حمل لعنده 🏃🏻 عمو عادل حضنه وبكي 😭 ..

عادل : مسكه حضنه .. اين كنت مالك فلت البيت قد عنجنن عليك ماخليت بقعه مادورتك فيها ...


العامل : خرج لعنده بيسلم عليه .. اهلا يا استاذ عادل كيف حالك ..


عادل : الحمدلله .. كيف لومالقيته قد عنجنن عليه ..

العامل : بيحكي له ...

عادل : مسك رزق وطلعوا فوق السياره 🚘 خرج تلفونه واتصل لتهاني 📱 ومكنه التلفون .. هاه حاكي خالتك تهاني وهبه قد عتموت خوف وقلق عليك .


رزق : شل السماعه وبيحاكيهن ويبكي 😭 لاتفتجعوش انا قد شاجي عندكم سميره خرجتني من البيت طردتني .. كان يشتي يقلهم قالت أنا مشنا ابنهم بس كمل الرصيد وماقد تكلمش ..


عادل : يووه كمل الرصيد يله اسهل اهم شي اتطمنوا عليك ذلحين نوصل واتصل لعبدالكريم اقله اني ماعد شارجعكش عنده ..


رزق : أيوووه قوى مشتيش أرجع عندهم اشتي عندكم 😔...




وصلوا البيت 🏠 ...

رزق : فتح باب السياره 🚘 وحمل بيطلع الدرج بيدقدق الباب 🚪..


هبه : سارت تفتح الباب 🚪 ابسرت رزق حضنته وبكيت 😭 ليش هربت من البيت وفلتنا ..


رزق : بيبسر خوفها عليه .. طنن 🤔 يعني صدق هي أختي وامنا رجمتني انا وياها ولا هي مفتجعه عليا لأني اخوها وتربينا جمعه أنا ابن من وبكي 😭 ...


تهاني : بتداعيه تحاكيه .. ييييه رزق مالك مطنن 🤔 اين سيرت ليش هربت من البيت كنت عتتصلنا لو تبسر كيف قدحنا عنجنن عليك لوكان ضعت ومحد لقيك ...


رزق : تاعب اشتي ارقد 😴 ...


تهاني : هيا ادخل اديلك عشاء اول وترقد وخطيت للمطبخ ..


هبه : فارحه 😃 بتصيح لها ... ياماما شاشل تلفونكم ارسل لمعاذ انه لقيناه اكيد انه قلق كل شويه بيرسل ...


رزق : اطرح فوق الكنبه ع وجهه ورقد من التعب 😴 ..


عادل : طلع وخطي ع طول طريق التلفون ☎ بيتصل لعبدالكريم ..مابيردش عاد الإتصال مره ثانيه ..


سميره : جاوبت .. الووو ماتشتي . بتتحاكى خايفه لاقد دري بموظوع آيه .

عادل : بيحاكيها بضبح 😤 اينهو زوجش ..

سميره : راقد😴 مريض ماتشتي منه ..

عادل : خلاص قليله قد رزق عندي ولا ينسى مايسير غطوه يكتب الي اتفقنا عليه عند المحامي 📝 ..



سميره : شله ولا اشبع به وغلقت التلفون في وجهه ☎...


تهاني : جت تقيم رزق يتعشى 🍟🌯 يوووه ع قد حمى فيه قدهو ساع النار شكله استبرد قدهو مريض 🤒 ...


عادل : راعي شاجي ادخله للغرفه وشربيه علاج وافعلي له كمادات نبسر للصبح لوما افتهنش نشله عند الدكتور .


تهاني : حسبها الله سميره ربي ينتقمها كيف قد الولد بسبتها لكن ربك يمهل ولا يهمل ابسرت ماقال معاذ انه صور آيه هي وولد صاحبها ملان النت ..


عادل : اتفاجاء 😳 قلي بغيرها بغير خباله ..


تهاني : والله انه معاذ قلي ادخل حاكيه وابسر وزد طمنه ع رزق لوتبسر كيف قد كان عيجنن عليه قد كان بيقل عيجي معاهم اجازه ..


عادل : تمام وانت قد طمنتي أحلام ورجاء ..

تهاني : أيووه ..



....... ....... .... ....


في الهند ...


معاذ : بيتجابر مع ابوه ..فرح 😄 يعني الحمدلله لقيتوه وقد عيجلس عندكم ...


عادل : ايووه ماعاد منهاش خلاص قد جيت لعبدالكريم من هذه الناحيه انه يكتب لي تنازل عن الولد ولا يديله شي من ورثه ..


معاذ : يوووه حرام ويشل كلشي له ...


عادل : أنا قد طلعت سألت فالجامع الكبير انا والحج الله يرحمه وقالوا انه مايصلحش يورث وقد كتبله الحج بآسمه بيع وشراء هو ويزن لأنه داري بعبدالكريم فانا استغليت هذه النقطه وسعم يكتب لي تنازل ..



معاذ : آها 🙂 ذلحين فهمت .. خلاص عيس اهم شي تشلوه ..


عادل : يله شرق عليك قدهو عندكم ليل قوم ارقد سهرتك وسلم ع العيال ..


...... ....... .........


ثاني يوم الصبح 🌝...


في بيت عم حميد ...


عم حميد وعبدالصمد : بيودعوا طارق والشيخ قناف ومرته ...


طارق : وانت ايحين عترجع الحديده ...


عبدالصمد : قلت ازيد اليوم اشتي ازيد ابسر ابن حسين الله يرحمه لاهم يحتاجوا شي والله انحنا مقصرين ..


طارق : ايوه صح والله ماصاحب الا هكذا الي يوبه لأهل صاحبه في مماته اكثر من ماهو بخير

🌹meme_abdalgaleel


@qesasanani

بارت 204



في بيت عادل ...


عادل : بيبدل عيسير المدرسه 👕👖 هيا مه افتهن الولد ولا أخطيه عند الدكتور ..


تهاني : ماشي والله انه جالس محمي 🤒 مخبوط سير لك بس وانا لمايقوم شبسره ماشي شاخطيه للمستوصف الي في نهايه الشارع ..


عادل : يله تمام وشازيد ع رواحتي اسير لمدرسه هبه اسجل رزق معاها والكل ..


تهاني : ايوه عيس لكن كيف عتفعل من ملفه ونشتي لداته وحاجته ..


عادل : شتصل لعند محمد ابن عبدالكريم اقله يوكفهن لي .


هبه : راقده 😴 اخيرا طعمت النوم قدلها يومين بتقلق ع رزق ..



....... ....... ......


في بيت عبدالكريم ...


سميره : فتحت الباب 🚪 ع آيه قومي اصتبحي ياهانم ..


آيه : شابعه مشتيش اكل شي ..


سميره : طرحت الصبوح 🍛🍲 فالقاع اذوكه تشتي تأكلي ولابرضاش وخرجت وغلقت الباب ..



آيه : ملان نوم رجعت ترقد من القهر والوجع 😴..


محمد : دخل لعندها للمطبخ .. يا امه جهزوا لداه رزق وحاجته شاسير للمدرسه اسحب ملفه واجي اشلهن لعمي عادل يشتيهن ..


سميره : سيره بغير رجعه لكن .. ذلحين قلي مافعلت مع هذاك الولد لقيت بيتهم ووصلت له ..


محمد : قال لي صاحب عيدي لي اليوم رقم ابوه وشبسر كيف بس الي فهمته ان ابوه مدلع له للطرف يعني يعلم الله ماعنفعل احنا وياهم .. وابي مشهم ناويين يفعلوا شي ..


سميره : أبوك جالس بيمكنها رقده ولا قد فتح فمه معي بكلمه 😷 وانا قد شجنن لاعاد جزمت اخرج ولا ابدي وشي قبال مخلوق اختي فضحتنا وبدعت بنا ورجعت تبكي 😭 ...


محمد : والله لأخليهم يندموا لاتقلقوش ...


سميره : أنا مشتيش يندموا انا اشتيه يجي يخطب اختك نسكت السنه الناس ..


وهم بيتجابروا ..دقدق الباب 🚪..


محمد : خطي يفتح الباب وانهي عمته اماني ...

أماني : دخلت بتصيح 😡.. أينهي أمك أينهي الي ماقدرتش تربي بنتها قد بدعت بي قبال اهل زوجي سودت با اوجاهنا ...


سميره : خرجت لها محمشه. هيا مالش بتحطمي 😡 الناس تدخل تسلم وانتي دخلتي تمكنيني مقارحه .


أماني : سلام مه وقد فضيحه بنتش ملان الدنيا قد بينقل انش عتوهي وانش هذك ام لسان ونص اين جي زوجش ابسر ماعيفعل في فضيحته هذه ...


سميره : اوذك اخوش عندش راقد 😴 وبعدا خلاص ماقد اجرمتش البنت غاويه والحمدلله الموظوع ماهو الا صور وبس .


أماني : دعممتها ودخلت لعند عبدالكريم ابسرته ممدد صاحت 😡 إنا وعاد لك نفس ترقد وقد سمعه بنتك ملان الدنيا ...


عبدالكريم : ساكت مطنن 🤔 بيتفرجها سكته


أماني : بتحاكيه بتصيح 😡 وهو ولا كلمه فلتته وخطيت ..


....... ........ ......


في بيت عادل ...


تهاني : بتداعي هبه .. ياهبه اسكه جي اتصلي لأبوش قليله عنشل رزق للمستشفى 🏨 جالس مريض ..


هبه : يله تمام ...


تهاني : دخلت لبست ونزلت رزق وهبه وشلته المستشفى 🏨..


..... ....... .......


في بيت حميد ...


عبدالصمد : بيداعي نوال . يانوال هيا عتجي نخطي نبسر مره صاحبي الي قلتلش ماشجزمش أسير وحدي .


نوال : أيووه طيب تمام هيا بساعتي ادخل البس ..


عبدالصمد : يله تمام امد ما اوقف تاكسي 🚖 ..


نوال : ابسرت لنا لوبه رحله لغطوه ..

عبدالصمد : أيووه قد حجزت لغطوه الصبح الساعه 7 يله انجزي امد ما اوقف التاكسي🚖 ...


نوال : دخلت تلبس وبتتجهز ع خرجتها شمت رايحه الأكل🍲 الي بتفعل تقيه تغاثت مع الحمل ودخلت الحمام ترجع ...


تقيه : سمعتها خطيت لعندها بتضحك 😄 هيا مه قد قرحت العيافه ...


نوال : يووه يا امه امانه ان قد بينحس روحي عتخرج .. اسكه قلوا لعبد الصمد يخطى بس ماعد شقدرش أخطى معه ماكملتش الكلمه الاوقد حملت مره ثانيه للحمام ترجع ..


تقيه : خرجت تدعي عبدالصمد ... يا ابني خلاص اخطى لك نوال ماعد قدرت تاعبه شويه ..


عبدالصمد : افتجع عليها 😰 ليش مالها خلاص ماعاد شاسيرش ادعوها اشلها المستشفى 🏨 ...


تقيه : ضحكت عليه 😂 مستشفى مه يا ابني الله يهديك هو هكذا يقع بالواحمات اخطى لك بس ...


عبدالصمد : مع اسهل نشلها نطمن عليها ..


نوال : خرجت لعنده .. مابش فيني شي اخطى لك بس هو بس تغاثيت من شم الاكل ..


عبدالصمد : يعني متأكده اخطى ..


نوال : أيووه والله اخطى لك بس ..


عبدالصمد : سار لهاناك دورهم اتفاجأء😳 وان البيت قدهو فندق استغرب وبيسال اينهم قالوا مدري قد نقلوا ...


🌹meme_abdalgaleel

@qesasanani

بارت 205



اليووم السبت أول يوم دراسه ...


في بيت عادل ...

تهاني : بتجهز هبه تسير المدرسه 🏫..


هبه : ياماما خلوني اجلس لما يفتهن رزق ونسير المدرسه جمعه ..


تهاني : اسهل لما يفتهن وعتسيروا جمعه يله شرق ع ابوش يشتي يوصلش ويخطي مدرسته 🏫..


عادل : كان داخل فالغرفه بيلبس 👖👕 كمل وخرج لعندهن .. هيا هبه اقطبي امد ما ابسر اخوش كيفهو اليوم ودخل لعند رزق ..


رزق : ممدد فوق السرير حقه بعد ما اشترى له عادل في غرفه هبه مغطي وشه بالبطانيه ..


عادل : بيقيمه .. رزق حبيبي كيف انت اليوم ..

رزق : فتح البطانيه وجهه ذابل شاحب تحت عيونه حارق فتح عيونه 👁 بيجاوبه بتعب الحمدلله ..


عادل : ماتشتي ياحبيبي اديلك معي لما اروح ..

رزق : ولا حاجه ..

عادل : جلس جنبه ومسك ع شعره ... ماينفعش ياحبيبي هكذا قدلك يومين ولا بتاكل حاجه عتموت هكذا مابلا تقوم المدرسه🏫 بداءت قد سجلتك مع اختك في نفس المدرسه ..


رزق : نزلت دموعه 😭 ..

عادل : مالك ياروحي ليش بتبكي من زعلك اسكه قلي ماحصل من قهرك هكذا ليش هربت من البيت ..



رزق : حضن عادل قووي وهو بيبكي 😭 سميره ظربتني وطردتني قالت انا مشنا ابنهم وهم لقيوني انا وهبه فالشارع أمي رجمتنا هي كذابه صح انا ابي عبدالله صح وامي فاطمه وبيتشنهج قووي ...



عادل : انصدم 😳 من كلامه وقحص ع اسنانه بقوووه 😡 وعصب منها. ..مادريش مايرد عليه معقوله الحقاره توصل بسميره انها تقل لطفل هكذا وتدمر حياته .. بعده من حظنه ومسك وجهه بيده لاتصدقهاش هذه كذابه بتكرهك بس تشتي تزعلك انت ابن الحج عبدالله يعني هو هذا الي مزعلك ..


رزق : ايوووه ..😭 لكن كيفه انا وهبه ولدنا في نفس اليوم وهي قالت المره الي كانت تجي تبسرنا واحنا جهال هي أمنا وبعدا ابسروا انا وهبه فينا شبه صدق ..


عادل : حس ان الولد بداء فعلا يفكر 🤔 ويتسأل يشتي يتهرب من الكلام معه ذلحين لمايرتب ماعيقله .. رزق حبيبي اسمعني ذلحين شتاخر ع المدرسه 🏫 لما اروح ونتجابر بس لاتقلش لاحد هذا الكلام الأخبل لانه كذب تمام واشتي اروح وقد أكلت وقدنت بخير وغطوه تسير المدرسه مع أختك ومسح دموع رزق😭 ..



رزق : بزعل 😔 تمام ..


عادل : دعى هبه ورجم لها داير السياره 🚘 انزلي افتحيها وانا اشرب بسرعه وقال تهاني شتصلش اول ما اوصل شكل سميره قالت له الحقيقه وهذا الي ممرض الولد ..


تهاني : خفعت صدرها بيدها 😱 يوووه والفعله الله يصيبها في روحها وماهو ذلحين ماقلت له ..

عادل : قلتله كذب .. المهم حسش مع التلفون شتصلش وافهمش ماحصل وخطي ..

تهاني : دخلت لعند رزق وهي مقهوره بس بتكابر .. هيا حبيبي ماتشتي افعلك صبوح افعلك بيض ساع الي كانت تفعلك أمك فاطمه وبعدا ننزل للسوبر ماركت ونشتري الي تشتي ..


رزق : هداء شويه بعد كلام عادل بس عاد الف حاجه وحاجه بتلف في راسه 😇 .. تمام

....... ........ .........


الساعه 11


في بيت عبدالكريم ...


عبدالكريم : تلفونه بيرن 📱 مطنشه جالس مابيكلمش أحد حاسس بالقهر وانه هذه دعوه ابوه عليه ..

تلفون البيت ☎ رجع يرن ..

سميره : بعد ماجاوبت دخلت بتصيح 😱 قووم قوووم اتصلوا من القسم قالوا محمد ظرب رصاص قتل واحد والثاني مكون 🔫 اطرحت فالقاع وبتبكي وتصيح 😭..


عبدالكريم : كان يضحك مهستر 😂😂😂 هذا عقاب ربي ويضحك قوووي ...


سميره : مسكته وبتخفعه وتضربه 👊🏻👊🏻👋🏻👋🏻 وتصيح 😡 ابني عيضيع بعد اخته وانت بتضحك وتدهفه .. قوم اخطي ابسر ابنك ..


عبدالكريم : اطرح فالقاع وجلس يبكي 😭 مسك تلفونه خرجه واتصل لعادل 📱 يا أخي قووي انقذني وصوته بكاء ..

عادل : استغرب منه 😳 حس ان به شي .. مالك مابه ..


عبدالكريم : قالوا محمد قتل واحد🔫 وكون الثاني وهو فالقسم ..


عادل : ايييييش 😳 من قتل ماهو اوذا شاجيلك الآن ...


....... ........ ........


في الحديده 🌊...


نوال : بتتصل لعبدالصمد 📱 ياروحي اشتري غداء من خارج ماقدرتش افعل حاجه ...


عبدالصمد : ضحك هههه 😂 الله يعيننا ع العيافه هذه عتكمل جيبي ...


نوال : والله هكذا خلاص لاتشتريش شاقوم افعل 😔 خلاص ...


عبدالصمد : يوه يوه أنا فدال حبيبي الزعول اديلش عيوني 👁 مش الا غداء اتجهزي وشاجي لش نخرج نتغداء خارج ..


نوال : بتدلع عليه .. ماعليا خلاص قدنا زاعله 😔 ..


عبدالصمد : بيساليها ويضحك 😂 خلاص الغداء ع حسابش عتحاسبي انتي ..


نوال : طيب تمام انا شاحاسب ..


عبدالصمد : بيحانكها 😜 طيب ولما عتحاسبي من زلط من .

نوال : ضبحت اووووف 😤 خلاص شابعه ..


عبدالصمد : اسهل لاتاكليش انتي شاجيلش تأكلي بنتي بس وضحك ههههه 😂 ...


نوال : ضحكت ههه 😂 طيب شاوريك لما تروح ..



@qesasanani

بارت 206



في قسم الشرطه 👮🏻...


عادل : وصل ومعه عبدالكريم .. دخلوا بيسألوا ع محمد ...


الظابط : 👮🏻 هاه انتوا اهله ...


عادل : أيوه يافندم ماحصل اين الولد ...


الظابط : الولد نازل فالحجز ..اتهجم ع ابو هاني ال*** وهو خارجي من بيته إتصايح معاه وهزوره والمرافقين حقه نزلوا له رجع ابنكم سحب مسدس من واحد من المرافقين وضرب عليهم واحد مكون والثاني مات ولما سالناه ليش تهجم عليه قال هو ابنه ضحك ع اخته وهو جاء بيحاكى الاب ويشتي الولد يخطب اخته وهو دهفه وتصايحوا ...



عادل : طيب ممكن نبسره لو سمحت .

الظابط : لحضه وطلعه لهم ...


عبدالكريم : بيتفرجه بزعل 😔 ليش يا ابني هكذا ليييش تضيع مستقبلك هكذا ..


محمد : مصدوم 😳 مشو مصدق انه قتل .. هم ظربوني ودهفوني لما قلتله ابنه ضحك ع أختي وكانوا يدهفوني من عند الباب وانا مادريتش بنفسي هزرت منه المسدس 🔫 اشتي افجعهم بس ماكنش قصدي اقتله وقدهو مفتجع 😰 ذلحين ماعيفعلوا بي عيقلووني صح ..


عادل : مسكه من كتفه .. ان شاء الله خير لاتفتجعش عنبسر اهل الميت ونحاول نتفاهم معاهم لو عيرضوا ندفع لهم ديه ونعالج المكون ..


محمد : نزلت دموعه 😢 قووى ياعم عادل قوى ابسروهم مشتيش أموووت ..



....... ........ ........


في بيت عبدالكريم ...



آيه : خرجت من غرفتها بعد ماسمعت صياح أمها وبكاها 😭 مالكم بتبكوا مابه ..

سميره : بصياااح 😡 اخطي من قبال وشي اخطي... هذا كله بسببش يا قليله الحياء أخوش قتل 🔫 وقامت تخفعها وتضربها بدعتي بنا وخليتي أخوش مجرم واطرحت فالقاع بتبكي 😭 ..


آيه : اقتهرت 😔 وفلتت وخطيت ودخلت المطبخ تفعل الغداء لأن امها بتبكي ..


....... ....... ........



في السوبر ماركت ...


تهاني : بتخطي وماسكه رزق في يدها 👫 هيا حبيبي اشتري لك كل الي تشتي ..

رزق : اسهل اشتري لي ايسكريم 🍦 ولهبه ..


تهاني : اسهل الإيسكريم 🍦 لأن عادك مريض وبعدا ماعتروح هبه من المدرسه الإ وقد حقها ماهي ..


رزق : طيب تمام ششتري لنا شوكلاته 🍫 وجو نسير للمدرسه حق هبه نروحها ...


تهاني : يله تمام اجعل لكم الي تشتي وانا بسرعه ادخل ادي حاجه من الثلاجه ونسير للمدرسه 🏫 نروحها ..



........ ....... ......

في ذمار ...


طارق : ع رجعته للبيت ابسر خالته خيريه مروحه من المستشفى 🏨 وفي يدها فراشه وشكلها تاعبه وصل البيت وبيحاكي ابوه ..



صالح : بضبح 😤 وأنا مفعلها تعيش ولا تموت ماعاد دخلني بها ...


طارق : أنا قلت أقلكم لو عتحاكوا يونس لو عيسير يبسرها مهما كان هي امه ..


صالح : لمه تلمها .. خليه غير بعيد عنها بس ابسر محلاه كيف قدهو يكفي ماقد كرهته فيكم وخلته يفعل باأخته هكذاك ..


طارق : اسهل يا ابه حسابها عند الله قدو يطيعها .


صالح : اوذك عندك يسدوا حاكيه لروحك وخرج من عنده 🚶🏼 بيداعي يسرى تقرب الغداء ..



طارق : خرج تلفونه 📱 وبيتصل ليونس يقله ..


يونس : ايوه قد قلي خالي اتصلي أمس قلي انه طلعت الفحوصات وقالوا فيها ورم في حلقها لكن الصدق يا أخي والله ماقدر قلبي 💔 ..



طارق : لاحول ولاقوه الإبالله .. اسهل يا اخي سير افعل واجبك وابسرها لو تحتاج شي مهما كان الطاعه هي أمك ..


يونس : قدنا شبسر لانا شخطى عصر بساعتي ابسرها وارجع أخزن ..



طارق : وشل لها زلط 💴 اكيد انهي بحاجه علاجات ولا مابش معاك جيت من عندي ...


يونس : اسلم يا اخي الخير موجود .. وتنهد 😔... كيف انت لعندها برغم ان قد فعلت بكم هكذا لكن قد ربي جازاها من عنده ..


طارق : اللهم لاشماته .. محد يشمت فالمرض يا أخي حسابها عند الله ماعيضيعش حق اختي ...


....... ........ .......


في الهند ..


احمد : دري بموظوع أخوه من ابن اماني اتصله📱 يقله. قد عيجنن ويشتري يرجع ...



معاذ : بيهديه ... يا اخي ماعتفعل لو رجعت قد الي حصل حصل هذا محمد غاوي من يومه ولا رضي يسمع أحد ..


منير : استغفر الله العظيم بس ماهي هذه المصايب حلقت فوق راسكم ..



أحمد : مابلا دعوه سيدي ع أبي والله انهم كانوا يدعوا عليهم دعاء ساع المطر هم وأمي وماماتوا الإ قهر من أبي وقدهم اشكل قد عنخرجهم من المستشفى وبكي 😭 وانا حانب بينهم لا انا ساخي ع أخوتي ولا أنا الي سخيت ع سيدي ..


معاذ : مسكه من كتفه ... اهداء يا أخي اذكر الله .. الله يرحمهم ويعينكم اوذا شتصل📱 لأبي أكيد قدهم داريين نفهم منهم الموظوع ..



عادل : بعد ماجابره بالي حصل .. قله ان أهل المقتول رافضين أي صلح ولا ديه ويشتوا قصاص رآس برآس وعادهم بيحاولوا معاهم ويبسروا وساطات ...





🌹meme_abdalgaleel


@qesasanani

بارت 207


في بيت عبدالكريم ...


أماني : بتدقدق الباب 🚪 ..


آيه : فتحت لها ..


أماني : إبسرتها من فوق لاتحت 🙄 هيا طابت نفسش ياقمر فضحتينا واخوش قتل ودهفتها بيدها .. هيا اخري من قبال وشي أين جت أمش ودخلت لعند سميره ...



آيه : خطيت وهي بتبكي 😭 تدخل تكمل تفعل الغداء ..


سميره : بتتصايح مع أماني وطردت أماني من عندها بصياح 😡.. اخرجي من عندي ..


آيه : خرجت اللحمه من الثلاجه وفتحت الكيس تغسلها 🍖🍗 تغاثت فلتتها من يدها وحملت طريق الحمام ترجع ع خرجه أماني ..


أماني : إبسرتها وقد بتصيح 😡 وتمدمد ايديها .. هيا قومي قومي ياقمر ابسري بنتش قدي بتتغاثى من اللحمه صوره عيال الحرام ماذلحين عيدخلوا بيتنا صدق خرجت وصرعت الباب ...


سميره : حملت ساع المجنونه 🏃‍♀ من الغرفه تبسر آيه .. ابسرتها فالحمام بترجع دخلت سحبتها من شعرها وتهزورها ... او قدش واحمه يابنت الكلب وتلطومها 👋🏻👋🏻...


آيه : مفتجعه بتبكي 😭 مشنا داريه اي بتوجعوني ..


سميره : وهي بتخفعها .. كيف مشنتي داريه أنتي قلتي مابلا كنتي تجابريه فالتلفون ويوم سيرتي معه المطعم أنتي وصاحبتش 😡..


آيه : وهي بتبكي 😭 هو كان زوجي إحنا تزوجنا عرفي فالمدرسه وكنت أسير حقه الشقه ...


سميره : ماعد قدرت تمسك أعصابها كانت تلطومها 👋🏻 وتبكي وتصيح وترجع تلطوم نفسها 😭 ماهو هذا ياربي ليش فعلت بي هكذا .. وبتدهف آيه اخطي البسي نخطى نبسر دكتوره نبسر لاقدش واحمه قبل مايجي أبوش ماذلحين ماعد لش الإ القبر وتصيح .😡 عتفضحينا ..



آيه : دخلت تلبس وهي مفتجعه وبتبكي قوي 😭 رسلت لصاحبتها تقلها تحاول توصل لهاني تقله انها واحمه. ..


صاحبتها : رسلت لها وهو مايفعلش هذه غلطتش قال هو مايدخلش ...


آيه : خرجت مع امها ودموعها ولا وقفت 😭 مفتجعه من الي عيحصل لها وصدق عيقتلوها ..


سميره : طول الطريق بتبكي 😭 ماعد دريت منين تجي لها المصايب ..


وصلين عند الدكتوره. ع نهايه الدوام مازد رضيتش تراشتها سميره قوى مسأله حياه اوموت فهمت منها بعد ماكشفت ع آيه قالت لها ايوه حامل ..


سميره : ترجتها وباست يدها 👋🏻 تنزله .. قوى والله لأديلش الي تشتي أبوها عيقتلها وفضيحتنا عتقع ملان الدنيا ..


آيه : مسنبه بتسمع كلام أمها وقدهي مفتجعه 😰 خلاص عيقتلوها شلت نفسها وحملت 🏃‍♀ خرجت من العياده بتهرب ..


سميره : لحقت🏃‍♀ بعدها بتداعيها يا آيه جي كذا أين عتسيري ..


آيه : حملت 🏃‍♀وماعد بانش لها آثر ..


سميره : اطرحت في الرصيف بتبكي 😭 كيف افعل ذلحين ماشاقل لأبوها وللناس أين جت بنتي ...



......... ......... .........


في مدرسه هبه🏫 ..


رؤي: قدهي كارهه لها كره العماء 😖 خاصه لما زد شافت المدرسات اليوم في اول يوم كيف فاقدات لها وبيبوسنها 😘 زاد حقدها عليها ..


تهاني : بتدق باب الفصل 🚪 وفي يدها رزق ..


الاستاذه : اهلا وسهلا با ام هبه كيف حالش ..


تهاني : الحمدلله كيف انتي . هيا ابسري حقنا الطالب هذا عيداوم مع هبه ان شاء الله هو نفس صفها .


هبه : ابسرت رزق وامها فرحت 😄 وحملت عندهم .


الأستاذه : اها 🙂 ماشاء الله ايش يقربلها اخوها انا اعرف معاذ بس ..


تهاني : ايوه بس اخوها فالرضاعه ..


الأستاذه : ماشاء الله اصلا قد بينحس فيها ساع الشبه مدري كيف ..



رؤى : بتتبسر رزق بحقد بعد مافعل بها هكذاك فالموت 😖 ..



رزق : ابسرها بضبح 😤و بيجابر هبه اتحداها ماذلحين تزيد تزعلش من غطوه شاجي معش وادافع عنش ..



هبه : فرحت 😃 يووه لو يزيد يجي يزن هانا ونرجع كلنا جمعه مثل زمان ..


تهاني : إستاذنت لهبه وروحتها معاهم ومسكتهم 👫 وروحوا ..



رؤى : بعد ماخرجوا الشر ملان عيونها 😖 ... وتعمدت قدام الصف كله يا أستاذه أقلش حاجه ..


الأستاذه : مالش يا رؤى ..


رؤى : انتي داريه هبه مش بنتهم هم لقيوها هي وهذا الولد فالشارع وربوهم. هم اخوه تؤام .


العيال فالصف : مستغربين وبداؤا يتحاكوا مستغربين والدوشه 😱 ملان الصف ..


الأستاذه : صيحت فوقها 😡 بسسس ماهو هذا الكلام والخباله لاتصدقوش ياعيال ..


رؤى : الا يصدقوا وبتتلفت للعيال ..مشو كذب ياعيال هم اهله اصحاب ماما وهم قالوا لها ابسري كيف قلتي يا استاذه الا يشبهها ..


الأستاذه : صيحت فوقهم وخرجت وبداءت تحاكي المدرسات وقدهن زاعلات ع هبه رحمنها 😔 ومراعيات ايحين عيجي رزق يعرفنه ...



🌹meme_abdalgalee


@qesasanani

بارت 208




في بيت عادل ...


عادل : روح البيت 🏚 اول مادخل ابسر رزق وهبه بيلعبوا فرح 😃 ان رزق بيلعب دخل للمطبخ لعند تهاني هيا مه زد رزق سأل ولا تحاكى ..


تهاني : ماشي خرجته اجعل له 🍫 وسيرنا روحنا هبه وأنتوا مافعلتوا ..


عادل : والله ان الموظوع معقد اهل المقتول قبايل ومايشتوا الإ راسه ..


تهاني : يووه 😱 مسكين حرام عادهو صغير لو يشلوا ديه بس ليش قتله ..


عادل : بيحكي لها ماحصل ..


رزق : دخل لعندهم . خاله تهاني ايحين عنتغداء قدنا جاوع ..


عادل : ابتسم له وشعفل شعره 🙂 هيا جي نلعب نبسر من عيفوز فالبلايستيشن امد ماتقرب لنا ..

رزق : بيفعل يده عضلات 💪🏻 انا طبعا شافوز ابسروا كيف قدنا عضلات .

عادل : اسكه اعسهن 💪🏻 يووه قدهن كبار عتفوز عليا ..


....... ....... .......



في الشارع ...


سميره : بعد مادورت آيه ما لقيتهاش روحت البيت 🏚 وقدهي عتجنن ..


آيه : بتخطى فالشارع وهي بتبكي 😭 مشي داريه أين تسير ولا كيف عتفعل ولا تعرف أحد فكرت تسير عند صاحبتها اول ما فتحت الباب 🚪 ام صاحبتها ابسرتها طردتها .. أخرجي ماجاء بش ولا تشتي تزيد تفعلي لبنتي فضيحه كنا ندخلش بيتنا وخليت بنتي تصاحبش وانتي هكذا ...


آيه : بتبكي 😭 ياخاله والله انهي هي الي عرفتني ع هاني ..


أم صاحبتها : بتصيح 😡 قدش فدال بنتي ياصايعه ياضايعه خرجه من بيتنا ...


آيه : خرجت وهي بتبكي وقفت لها سياره 🚘..

صاحب السياره : هيا يا قمر معانا نسير نتغداء و نخزن ..


آيه : مادريتش اين تسير رجعت فتحت باب السياره 🚘 وطلعت معه .. .



....... ....... ........


في الحديده 🌊..


في المطعم ..

عبدالصمد : بيحانكها هيا أكلي بنتي سواء كلي خيرات 😜 ...



نوال : ضحكت هههه 😂 هيا عناد فيك ومدام بينخسرك شاكل هذا وازيد اخليك تطلب لي .


عبدالصمد : ضحك هههه 😂 المشكله ان شهيتش مفتوحه للأكل بس ماتشتيش تطبخي ..


نوال : مدت لسانها بتحانكه 😜 أيوه يعجبني اخسرك ..


عبدالصمد : مارأئيش لو نسير نبسر دكتوره نبسر كيف وضعش ونطمن ونبسر هو بنت ولا ولد ...



نوال : قوى من الهرم ولافيني شي ساع الريال مشتيش دكتوره وحق زمان مافعلين هي عتدي لي فيتامينات بس يخلني دبه وماقد عيبناش الا فالرابع ..


عبدالصمد : بيضحك ههههه 😂 اصلا قد عتوقعي دبه بدون فيتامينات من كثر الأكل ..


نوال : هيا ماعليك ايوه اغذي الجاهل هيا زيد ادي لي واحد عصير مانجو كبير 🍹..


عبدالصمد : يوووه 😱والهواره.


نوال : ضحكت ههههه 😂 هيا امانه ..


عبدالصمد : يله حاضر من عيوني ..





ايش توقعاتكم ايش عيحصل لهبه ورزق وخلوني اشوف ارائكم تشتوا يرجعوا لنوال وعبدالصمد ولا يكملوا حياتهم مع عادل وتهاني بدون مايعرفوا من اهلهم 🙂..



@qesasanani

بارت 209


ثاني يووم ...


في بيت عبدالكريم ...


عبدالكريم : مع إنشغاله بموظوع محمد ماركزش ان آيه مابحد ...


أماني : جت ودخلت لعنده ... هيا مه مافعلتوا يا أخي قد علي سار لعند محامي قالوا شاطر في هذه الجرايم ..


عبدالكريم : والله انحنا من أمس بنحاول معاهم وابو المقتول قبيلي قال والله مايقبر ابنه الإ مع ابني قدوذا اليوم عنشل وساطه ونبسر كيف ...



أماني : مدام وهو قبيلي قله ابننا غاوي اولا وثانيا هو سار يشتي يزوجوا الولد بأخته بعد ماضحك عليها وقدهي واحمه هذا لاهو قبيلي صدق ولا الشرف عندهم رخيص ..


عبدالكريم : انصددم 😱 اييييش ضحك عليها وقدهي واحمه ماقدر يمسك نفسه 😡 قام ع طول بيصيح سمييييره آيييييه وبيدورها في غرفتها ...


أماني : يووووه 😱 مشنا داريه ان مشنت داري ..


سميره : افتجعت حملت لعنده 🏃‍♀ مالك بتصيح ...


عبدالكريم : مسكها وبيضربها 👋🏻 بنتش واحمه وساكته 😡 الحجه عند تربيتش .. وينهي مابحدهي في الغرفه اقسم بالله ما اليوم لا أقتلش أنتي وياها ...



سميره : بتبكي 😭 ومفتجعه ... مشنا داريه أينهي هي هربت أمس ..


عبدالكريم : جن جنووونه 😡 وكييف هربت مسك سميره وبيضربها قوي ويركظها با أرجله فضحتيني أنتي وبنتش كيف عاد شابدي وشي بين الناس وخفع رآسه فالجدر ...


أماني : بتتفرج سكته وقدهي زاعله 😔 ع الي حصل لهم .. رجعت قربت تمسك سميره تقيمها قد فمها ملان دم ... مكنتي رزق وهبه عيال حرام لما ادى لش الله ابن حرام من عرضش ...


عبدالكريم : ابسرها بعصبيه 😡 لو بنتش مارجعتش من ذلحين للعشي أنتي طالق ولاعاد اشتي أحد منكم ..

سميره : مسكته من أرجله وبتبكي 😭 منين اديها هي هربت لما شليتها لعند الدكتوره مادخلني أنا تطلقني ...


عبدالكريم : دهفها برجله 😡 جلست اصدق كلامك والحق بعدش لما ضيعت ابي وعيالي ..فلتها وخرج ..



........ ........ .........


في مدرسه هبه 🏫 ...


هبه : فارحه 😃 انها اليوم داومت هي ورزق وبتعرفه ع صاحباتها ..


رزق : بيبسر البنات والعيال لما يبسروهم جمعه يتشاوروا .. دكم هبه مالهم بيتحاكوا علينا ..


هبه : ابرد منهم يمكن انهم بيحسدوا انك معي ..


في الرآحه ...

خرجوا يصتبحوا وجلسوا فوق الكرسي ..


2 مدرسات خاطيات قفاهم 👭


الأوله : هيا إبسري👀 هو هذا اخوها الي قالوا ..

الثانيه : يووه😱 مساكين والله اننا زعلت عليهم حين سخيت امهم ترجمهم فالشارع ع قد أم ..


الأوله : لكن ماشاء الله ع الأستاذ عادل ومرته ربوا هبه وبيدلعوها قوي لاتقلي الإ انها صدق بنتهم مش بس الإ لقيوها ..


الثانيه : لكن مدري يعلم الله ليش ماشلوا الولد معاهم حتى مسجل بإسم ناس ثانين وذلحين قدهو عندهم ..


رزق وهبه سمعوهم 👂🏻.


هبه : كانت بتأكل السندوتش 🌯 حطت من يدها وتشارغت عيونها بالدموع 😢 مالهن هذولاء بيقلين علينا هكذا والله لا اسير اقل للمديره تصيح فوقهن. .


رزق : إكتبد قووي ومسكها لاتسيريش وبكي 😭 يمكن انه كلامهن صدق . .

هبه : مستغربه منه كيف كلامهن صدق والله لا أقل لبابا يجوا يصيحوا فوقهن ..


رزق : هي سميره لما طردتني من البيت 🏡 قالت لي اننا مشنا أبنهم وانهم لقيوني انا وانتي وهم ربونا وانه هذك المره الي كانت تجي تبسرنا واحنا جهال هي أمنا الصدقيه رجمتنا عند الجامع 🕌 وابي عبدالله وعمي عادل شلونا ...


هبه : واقفه مبلوده 😳 وعيونها ملان دموع .. ذكرت الموقف حق الحديده 🤔 لما لقيت نوال وذكرت كلام عادل وتهاني لماسمعتهم وقالوا لها هي البنت الي فالمسلسل وبداءت تتذكر طراطيش كلام وهو صغار جلست فوق الكرسي وبكيت 😭 ....


رزق : بيبكي جنبها 😭 حتى عيدميلادنا جمعه إبسرتي وبيقلوا انحنا نتشابه .. منهي أمنا وأبونا ليش فلتونا فالشارع ..


هبه : وهي بتتشنهج قد عتقرح بكاء 😭 انا ابسرتها فالحديده 🌊 لكن شكلها طيبه وبتحكي لرزق بس ليش رجمتنا وبتبكي ...


رزق : بيتحاكى بصوت متقطع من البكاء ..مشهي طيبه أنا أكرهها 😭 ليش تفلتنا بسببها سميره كانت تفعل بي هكذا وتظربني اكرهها قوووي ...


دق الجرس 🔔 والطلبه بيرجعوا الفصول ..

هبه ورزق : جالسين بقعتهم بيتذكروا حاجات ويتجابروا ويبكوا 😭...


رزق : كيف نفعل ذلحين أين نسير ..


هبه : قد عتموت بكاء 😭 أيينه نسير وبابا عادل وماما تهاني واخي معاذ نفلتهم يعني خلاص إحنا مابش معانا أب وأم ...


رزق : بيبكي 😭 انا لما سألت عمي عادل قلي انها سميره بتكذب .


هبه : قوووم نروح ونسألهم 😭..


الأستاذه : أبسرتهم سارت تصيح 😡 ليش مايدخلوا ابسرتهم بيبكوا استغربت مالكم. .. من ظربكم ..


هبه : وهي بتبكي 😭 اتصلي لبابا اشتي اروووح وكانت تصيح مثل المجنووونه قلبي قلبي ❤عيوووقف اتصلي له شاموووت شاموت ...


رزق : بيحضنها ويبكي 😭 ..


الأستاذه : حملت تتصل 📱لعادل. افتجعت عليهم ..



بعد شويه عادل جاء للمدرسه 🏫 لأن مدرسته قريبه ...


عادل : ايش في يا استاذه خير مال العيال ..


الأستاذه : مدري ق

د عيطفحوا بكاء 😭 ولارضيوا يقلوا لي جالسين عند الشجره ..


عادل : بيخطي لعندهم ابسرهم بيبكوا حمل 🏃🏻 مالكم ماحصل ...


هبه : تشتي تحاكيه 😷 ماعاد قدرتش بتحاول ولافايده ...


عادل : مسكها بقووه افتجع عليها بيهزورها 😰 مالش يابابا مالها يارزق مالكم بتبكوا هكذا مالها مابتتحاكاش ...


رزق : وهو بيبكي قووي 😭 وصوته قدهو مشحب وبيتحاكي بصوت مقطع منهو ابونا. ليش امي رجمتنا فالجامع 🕌 وارتجم ...



عادل : بيصيح قوووي للحارس ولا احد يجي يشلهم معه للسياره قدهو مفتجع عليهم ومصدوم 😰 ان العيال دريوا خلاص طلعهم فوق السياره 🚘 وشلهم للمستشفى. ..




🌹meme_abdalgaleel


@qesasanani

بارت 210



في الحديده 🌊...


عآمر : يله خاطرك انا شارحلي ..


عبدالصمد : يووه مسرع ..

عآمر : مابلا قد شكل المره بتوحم اشتي اشلها عند الدكتوره ..



عبدالصمد : ريت والله ومرتي ترضى تسير معاها والله ان قد تراشيتها نسير نطمن عليها مارضيتش قالت وحق زمان ماوقع بهن ..


عآمر : اخلي مرتي تتصلها ولو رضيت شاشلهن الثنتين ..


عبدالصمد: راعي اوذا شتصلها 📱لو عتخطى ..


نوال : مع قوى ياحبيبي مافايده والله مافيني شي كما قدنا فالرابع لوتشتي ندرى ماهو نرجع نسير بنت ولا ولد ..


عبدالصمد : نطمن ع صحتش وع صحه النونو لوتشتي علاجات ولا شي ..


نوال : والله اني بخيره أطمن ووعد لو أحس بتعب شاقلك ..


عبدالصمد : بيحاكي عآمر .. خلاص الله يفتح عليك يا اخي اخطى لك بس والله مارضيت ...



....... ....... .......


في الهند ....


منير : هيا أحمد قوى أخي قوم اخطى لك المعهد ماعتستفيد من الجلسه هانا ماعتقدرش تفعلهم شي ...

أحمد : يا اخي والله مالي نفس افعل شي تاعب من روحي ..


معاذ : قوم اخطى لك معانا الجامعه حقنا منها تتواله ومنها أطمن عليك لاتجلسش وحدك فالبيت ..


منير : أيووه قوم اخطي هيا ونعرفك ع مجنونه معاذ وابسر معاذ وغمز له 😉 ..



معاذ : ضحك هههه 😂 لاتصدقش هو بيدور له مواظيع ولا مابش شي ..


منير : هيا ناهي يامابش شي والله اننا مستعد حتى احلف يمين انك قد بتحبها 😍 والكل ..


أحمد : ضحك هههه 😂 خلاص بس انت وياه اوذا شخطى معاكم وابسر بنفسي واحكم ..



....... ........ ........


في القسم ...


الظابط : يا أخي والله ما نا داري مااقلك الولد عنحوله النيابه خلاص وبعدا سدوا أنتو وياهم ..


عبدالكريم : بينراشى الظابط👮🏻 قوى يا اخي زيد خليه اليوم عندكم قبل ماندخل النيابه وتتحول القضيه المحكمه نبسر لو الوساطه عتنفع معاهم حرام ندمر مستقبل الولد قدك داري بغوى العيال وخاصه ان الموظوع مثل ماقلتلك وابنهم فعل هكذا بالبنت ..


الظابط : تعاطف معاه ... حسبنا الله ونعم الوكيل بس هم هكذا عيال المسؤلين بيفعلوا كمن فعله ويزيد يخرجوا منها ساع الشعره من العجين انا شازيد أخليه اليوم عندي فالحجز وانتوا حاولوا معاهم ماشي والله ان القضيه لاقد دخلت المحكمه الله يعينكم خاصه ان مابش دوله ولاحكومه عيجلس غير محبوس يعلم الله كم سنين وبعدا يتحاكم ...


عبدالكريم : طيب شكرا يا اخي تسلم .. خرج من عنده واتصل لعلي ولأنسابه يبسر مافعلوا من الواسطه ..


علي : والله انهي أخرتها يفعلوا ببنتنا هكذا وعادحنا نسير نتوسط يعفوا ع الولد ونزيد نديلهم ديه ...



........ ........ ..........



في المستشفى 🏨 ...


عادل : علامات الخوف والقلق ع وجهه 😰 هاه دكتور طمني مافيها بنتي ليش عجمت فجاءه ماعد قدرتش تتحاكى ...



الدكتور : هذا شكلها تعرضت لصدمه نفسيه قوويه قد ضربنا لها ابره 💉وفعلنا لها فحوصات نطمن عليها ..


عادل : طيب والولد كيف قدهو اشتي ادخل اطمن عليهم ..


الدكتور : والولد والكل قد ظربنا له ابره 💉 مهدئه لانه منهار قووي ماحصل لما انهاروا هكذا عادهم أطفال ماقد جراء عليهم ..


عادل : تنهد بزعل 😔 طيب ممكن أدخل لعندهم ليش خرجتني ..

الدكتور : راقدين لما يقوموا وشادخلك ...


عادل : اتصل 📱 لتهاني يقلها ماحصل ..


تهاني : صااااحت 😱 يوووووه ياقلبي عليهم من قلهم اشتي اجي للمستشفى ماشفلتهمش وحدهم ...



عادل : مدرى وصلت المدرسه🏫 وهم هكذا من خوفي عليهم ماعد سألتش لا كيف ولا ماحصل . ذلحين اسمعي البسي بسرعه شاجيلش الان احنا فالمستشفى الي فالشارع الثاني بسرعه لايسيروا يقوموا ومابش احد عندهم ...



تهاني : مع اسهل شاجي وحدي مدام وانتوا قريبين لاتفلتهمش وحدهم لويقوموا خطيت تلبس وهي بتبكي 😭 مشي داريه كيف عتفعل لما هبه تقلها مشنتي أمي ...


........ ........ ........


في الشارع ...


آيه : لقيت نفسها فالشارع من جديد بعد ماكانت أمس مع واحد بتخطي وهي بتبكي 😭 وتتفرج يدها بتبسر الزلط الي ادالها الرجال 💴 وتدعي ع هاني حسبي الله فيك ياهاني انت وصاحبتي الي وصلت لهانا بسببكم أيش افعل وكيف أسوي لو أرجع بيتنا عيقتلوني ولو أجلس فالشارع ماعيوقع بي ذكرت ان الرجال ادالها عنوان واحده قلها هذه معاها بيت 🏠 فيه بنات خيرات لو هي تشتي تسير عندها وتقلها انهي من طرفه وقفت تاكسي 🚖 وادت له العنوان وهي بتبكي 😭 خلاص اختارت هذا الطريق وانها تمشي فيه لأنه مابش معاها اي خيار. .



@qesasanani

بارت 211

بعد العصر


في بيت عبدالكريم ...

عبدالكريم : روح يبدل بسرعه يسيروا يتوسطوا وبيتصل لعادل 📱 ...


عادل : إعتذر منه .. سامحني والله ماشقدرش العيال فالمستشفى 🏨 مرتك المصون من يوم ماطردت رزق وقالت له ان مشهو ابنكم وانه لقيط والولد مريض واليوم هبه مدري من قلها والاثنين قال الدكتور فيهم انهيار عصبي ..


عبدالكريم : نزلت دمعته وتنهد 😢 لاحول ولاقوه الإ بالله والله ان هذا كله بذنبهم خلاص يا اخي عذرك معك ولو فضيت شاجي ابسرهم. خرج من الغرفه طريق سميره.

سميره : كانت جالسه بتقراء قرآن وتدعي 🙌🏻 لمحمد ان ربي يفرجها عليه وبتبكي 😭...


عبدالكريم : إبسرها بنظره كره 😖 ربي انتقم منش في جهالش رزق مريض فالمستشفى من حين طردتيه وقلتي له ان مشهو ابننا وعادش كذبتي وقلتي انه هرب وحده لكن قدش في طريقش وربي بينتقم مني والكل لأني كنت اصدقش ذلحين لقيتي بنتش ولا قومي لفلفي لداتش 👚👗👖وبيت أهلش ..


سميره : بتتراشاه وتبكي 😭 مشي داريه ماتفعل ولا كيف ترجع آيه ..


عبدالكريم : ابسرها وهو معصب معش للعشي 😡 ماشي كل واحد في طريقه خرج وصرع الباب 🚪..


سميره : جلست تبكي 😭 ومشي داريه ماتفعل خلاص خسرت بيتها وجهالها ..


........ ......... ........


في المستشفى 🏨...


تهاني : جالسه فوق الكرسي فالوسط بين السرير الي فيه هبه والسرير الي فيه رزق ..


رزق : فتح عيونه وشكله تاعب 🤒 ومحمي ..

تهاني : قربت جنبه وبتحبه في رآسه 😘 مال حبيبي هيا عتقوم قدنا فارحه ان قد افتهنت رجعت تمرض ..

رزق : حضنها بقوه وبكي 😭 ياخاله تهاني صدق مشحنا عيالكم منهي امي أنا مشتيش ام ثانيه الا امي فاطمه ...


تهاني : حضنته وبتبكي 😭 لاتصدقش احد انتوا عيالنا ومابش معك ام الإ فاطمه ولاتصدقش كلام أحد هذولاء كلهم كذابين ..



هبه : فتحت عيونها👁 ابسرت تهاني قرحت بكاء 😭 بس جالسه مش هي قادره تتكلم ..

تهاني : حظنتها ودموعها مغرقه وجها 😭 مال ابي وروحي مافيش ليش ماتتحاكي الله ينتقم منه اللي قهركم وقهرنا معاكم ..


رزق : ياخاله قلوا لنا الصدق عيال من احنا وانا وهبه صدق تؤام .


عادل : ع دخلته كان نازل بيشتري العلاجات 💊💉 وأكل للعيال 🍕🍟سمعه .. دخل طرح كيس العلاجات وجلس جنبه وهو ماسك يده 👋🏻 وابسر تهاني 👀 خلاص ماعد بش داعي نخبي شي والعيال قد دريوا بس ظروري يسمعوا الكلام مني ويفهموا الصح ..

تهاني : بهررت 🙄 فوقه وبتصييح عادل بس مالك. .


عادل : بداء يحكي لهم بهدوء انهم صدق لقيوهم وانهم تؤام واحلام رضعتهم ويزن صدق أخوهم وانهم حبوهم وانهم عيالهم هم مشهي الأم الي ولدت الأم هي الي ربت وسهرت وتعبت ودرست وان خاله فاطمه حبته اكثر من اخوته والحج عبدالله دافع عنه لأخر دقيقه قبل مايموت ووصاه عليه وبيجابرهم بهدوء ..


هبه : بتسمع وهي بتبكي 😭وحاضنه تهاني بقوه ..


رزق : بس أنا بينحبكم أنتوا وامي فاطمه وابي عبدالله مشتيش يوقع لي أهل ثانيين ما احبهمش هم رجمونا وفلتونا😔 ...


تهاني : قامت تحضنه وتبوسه 😘 وانتوا عيالنا احنا ومابش معاكم أهل غيرنا ولو أحد قلكم اي شي وقفوا في وشه وقلوا له احنا عيالهم ..


رزق : اليوم فالمدرسه🏫 كلهم بيتحاكوا وسمعناهم ..


عادل : غطوه نسير المدرسه 🏫انا وانتوا ونصيح فوقهم واقلهم هذا كله كذب والي اتحاكى هكذا أنا شعلمه الأدب ...


رزق : وصوته بيتقطع 😭أيوووه صيحوا فوقهم احنا عيالكم وبس ..


عادل : يله قوموا كلوا 🍕🍟 قد اشتريت لكم بيتزا وشبس من الي يعجبكم ..


تهاني : خرجت الأكل🍕🍟 تأكلهم بتغصبهم مارضيوش ..


هبه : غطت وشها بالبطانيه وبتبكي سكته 😭 حاسه قلبها عيقرح 💔 بتتذكر شكل أمها نوال . ليش فلتتنا وهو كان باين عليها طيبه وكانت تبوسني😘 قوي وتحضني وهي بتبكي وبتسال عليا وع رزق مليون فكره وفكره بتلعب في رآسها ..



........ ........ ........


في الهند ...


بعد ماروحوا من الجامعه ..

منير : هيا مه صدقت وهو بيغمز لأحمد 😉..


أحمد : الصدق ولا إبن عمه ..

معاذ : أيووه أكيد الصدق ...

أحمد : البنت شكلها بتحبك واضح قوي 😍 وانت الصدق أول مره أبسرك مهتم ببنت هكذا يعني شكلك واضح لاعاد تحاولش تكابر 😜...



معاذ : ضحك وحمر وشه ☺ انتوا مابش منكم الإ مجابره خبلاء اقوم اتصل لأبي أبسر كيفهم وقدنا فاقد للعيال أجابرهم ..


أحمد : أيووه وانا والكل اشتي احاكيهم ..


معاذ : أتصل 📱..


عادل : إبسر رقمه 📱 وخرج يحاكيه من خارج .


معاذ : عرف الي حصل وقد عيجنن مقهور عليهم قوي 😔 ..


أحمد : بيسمعه حس في شي بعد ماغلق فهم منه واقتهر 😔..


منير : تنهد 😔 استغفر الله العظيم بس مال المصايب واحده بعد واحده ..


معاذ : انا قدنا مفتجع ع هبه قوي بينهم لو ماعد تقدرش تتحاكى ...

أحمد : جي نسير للمستشفى 🏨 هيا نبسر دكتور ونسأله نقله الي حصل ونتأكد هي حالتها عارضه ولا عتجلس هكذا 😔


@qesasanani

بارت 212




ثاني يوم الصبح 🌝..



عادل : خرج العيال من المستشفى 🏨 وروحهم البيت ..

تهاني : نزلتهم من السياره 🚘 ولفتت لعادل .. عتنزل ..


عادل : مع اطلعوا انتوا شخطى للمدرسه 🏫 حق العيال أبسر من الي فعل بالعيال هكذا واعلمهم الأدب ..


رزق : ابسره وعادهو تاعب 🙁 شلوني معاكم وانا اوريكم المدرسات الي قالين هكذا ...


عادل : اسهل ياحبيبي انت عادك تاعب أطلع افتهن بس وانا شتصرف ..

تهاني : إبسرته يشتي يسير .. لفتت لعادل 👀 اسهل ماعتتأخروش شله معاك بساعتكم ..


عادل : فتح له باب السياره 🚘 يله أطلع. وخطيوا المدرسه ...


....... ........ ........


في بيت أهل سميره ....


سميره : قامت وجالسه فالمكان بتبكي 😭 ..


أمها : سمعت صوتها بتبكي 😭 دخلت لعندها .. يابنتي ماعيفعل لش البكاء خلاص ماعد عتغيري شي قد الي سبر سبر كم قد نصحناش كم قد لنا لش يابنتي خفي وانتي ماتشتي الا قولش ..


سميره : صيحت 😡 بببببس ماعدناش ناقصه مواعظ بنتي يعلم الله أين قدهي وابني عيقتلوه وانا زوجي طلقني ماعد ازيد افعل بروووحي وبتخفع وشها ...



أمها : رحمتها ومسكتها 😔 اذكري الله يابنتي ان شاء الله كله عيسبر ابوش قال عيحاكي عبدالكريم يردش وموظوع محمد اوذا بيتوسطوا قالوا أمس ابو المقتول سكت لما دري ليش محمد تهجم ع ابو هاني وانه الولد ماكنش قصده يقتله هم الي ظربوه وهو سحب المسدس 🔫 يشتي يدافع عن نفسه ولا مكنش معه سلاح ...


سميره : وهي بتبكي 😭 وتهز رآسها وبنتي وبنتي يا أمه ماعيردها بنتي خلاص ضاعت ...


أمها : مادريتش ماتقلها سكتت وبتبكي جنبها 😭...



........ ........ ......


في بيت علي ...


أماني : بتقرب الصبوح 🍛🌭لعلي عيخرج مع عبدالكريم يكملوا موظوع محمد ...


علي : قلي ان شاء الله يقبلوا بالديه حرام ويخرج هذا الولد المسكين أمس الأب سكت ع الله ما المصاب قد تنازلوا اهله مقابل انه نعالجه وندي مليون ..


أماني : أيوووه وكم يشتوا ديه ...

علي : علمي علمش بس شلي لش حين اخوش تاجر عيقلوا 3 او 4 مليون ويتنازلوا ع حقهم بس ما الحق العام ماعذر ما محمد يحتبس حتى سنه ..



أماني : حسبنا الله ونعم الوكيل هذا الجنان كله من تحت راس آيه ولا تشتي الصدق والله انه عقاب ربي لسميره ...



علي : حسبنا الله ونعم الوكيل يله اقوم أخطى لي لا أتأخرش ..


أماني : تشتي تتحاكى وسكتت 🙊..


علي : مالش ماكنتي تشتي تقلي ..

أماني : خلاص اسهل مش وقت كما تموا المشاكل عنتحاكى ..


علي : والله لاتقلي لي مالش ..


أماني : كنت اشتي اسال لو ادي اخي الديه وهذه الزلط كلها عيرجع يحسبها من حقه فالورث ولا من حقنا كلنا ...


علي : ابسرها بضبح 😤 سألتش بالله هذا مجبر .. يله خاطرش وخرج ..




....... .. ...... .......


في المدرسه 🏫..


عادل : دخل وماسك رزق في يده 👬 طريق الإداره ...


المديره : أهلا وسهلا .. هيا مه سلامات مالهم العيال امس ..


عادل : بعصبيه 😡 من المدرسات الفاضلات حقكم يا استاذه بالله عليش أحد يتحاكى قدام اطفال يقل انهم مش عيالنا وانهم لقيناهم فالشارع والطلبه طول أمس بيبسروهم ويتحاكوا عليهم نفسي ادرى من الي أخترع الكذبه هذه هبه مسكينه عجمت من الصدمه ومريضه وهذا عادنا خرجته من المستشفى 🏨واديته معي ..



المديره : تفاجاءت من الكلام 😱 يوووه معقول يقلين هكذا لأطفال حتى لو هو صدق منهن هولاء وبتدعي السكرتيره تشل رزق معاها يبسر منهن ...



عادل : بهنجمه 😡 ذلحين انا ماعيفعلين لي ذلحين وقد بنتي تاعبه هكذا وابن صاحبي مريض ليش الكلام الكذب هذا ..


المديره : بتعتذر منه وتتاشف ..


عادل : مفعل بالأسف يا استاذه والخبر الكذب هذا قدهو ملان المدرسه أنا اشتي ملفات العيال لو سمحتي شاخرجهم ماعد ينفعش يجلسوا في مدرسه 🏫أخلاق المدرسات هكذا ...



المديره :يوووه 😱 مع شاخليهن يعتذرين وشاقل للطلبه ان الموظوع كذب وابسر من الي قال هكذا واعاقبه ...


عادل : خلاص ماعاد منهاش والله جهزي لي الملفات خلاص واشتي تدخلي صف العيال تصيحوا فوقهم واشتي تتصرفي مع مدرساتش ..


السكرتيره : دخلت ومعاها رزق والمدرسات وبعد ماتهزائين دريت انها رؤى الي قالتلهن ..


المديره : تعرف رؤى وانها مشاغبه وحق مشاكل سارت للفصل ومعاها عادل ورزق هزائتها قدام الطلبه وقالت لهم انها كذابه وفصلتها اسبوع .


رزق : تنهد وارتاح شويه برغم انه جالس تاعب وزاعل 😔...



عادل : شل ملفاتهم وقرر يدخلهم المدرسه الي هو فيها حتى لو مشهي خاصه يكونوا قدام عينه ع الأقل هذه السنه لما يطمن ع وظعهم ...





🌹meme_abdalgaleel


@qesasanani

بارت 213


عدت 3 شهور ومابش احداث جديده ...


تهاني وعادل : بيحاولوا يفعلوا المستحيل يسعدوا رزق وهبه ..


هبه : جالسه مابتتكلمش 😷 وعقلها ولا بيوقف تفكير ووزنها نزل ضعفت وتغيرت ماعدهيش هبه الدلوعه كثيره الطلبات مطننه طول اليوم .


رزق : برغم كل معامله تهاني وعادل له الإ ان اثر الصدمه مؤثره له باين عليه في مستوى دراسته وقدهو منطوي وطول اليوم هادي وزاعل 😔 ....



محمد : بعد وساطات اهل المقتول قبلوا الديه بس عادهو محبوس الحق العام ...



آيه : خلاص مستقبلها ضاع 😔 وبطنها بداءت تكبر قدهي فالشهر الخامس وعايشه لها في بيت الليل ..


سميره : عبدالكريم رجعها احترام لأبوها بس ماعدبش بينه وبينها اي كلام كل واحد في حاله وقدهي منعزله عن الناس كلهم خلاص مغلقه ع نفسها ماعدهيش قادره تواجه الناس .


عبدالكريم : قسم الورث بشرع الله بينه وبين خواته وقدهو من المحلات للجامع للمقبره وبيدعي ربه انه يسامحه ع عصيانه لأبووه 😔....


خيريه : حالتها من سي لأسواء وبعد اصرار من طارق ليونس سار يبسرها وحط لها مبلغ تسافر تتعالج مع خاله بس قالوا ان المرض منتشر وماعدبش أمل ..


صالح : تزوج بواحده من القريه وبتعامل طارق ويونس بكل طيبه واحترام ..



........ ........ .......

في الحديده 🌊..


نوال : ماراي حبيبي لو اليوم نخرج نشتري سرير للنونو وحاجاته ...


عبدالصمد : ضحك هههه 😂 ايووه ولو نشتري وردي ويطلع ولد ولا نشتري ازرق وتطلع بنت ...


نوال : نشتري الوان مناسبه للاثنين وبعدا نشتري الحاجات الاساسيه اول وبعدا لما اولد ونبسر ماهو نشتري بقيه الحاجات ..


عبدالصمد : مشنا داري ليش مشنتي راضيه نسير نفعل تلفزيون ونبسر ماهو ع الاقل نشتري واحنا داريين ابسري محلى عامر قدهو داري ماعيوقع له ..

نوال : ابسرته وابتسمت 🙂 مدري اشتي يقع لنا مفاجاءه واشتي احس كيف شفرح ..

عبدالصمد : ضحك 😂ههه وشعفل شعرها مابلا بتهمي لو تطلع بنت ع ما اشتي واجلس احانكش طول الحمل لما تولدي ..


نوال : بتحانكه ويمكن يطلع ولد مادراك ماناش ساخيه عليك تزعل من ذلحين 😜.


عبدالصمد : تصدقي نفسي في تؤام يوقع لنا بنت وولد👶🏻👶🏻 قد اسمش دبه هكذا يخرجوا اثنين ههه..



نوال : ذكرت هبه ورزق تنهدت ونزلت دمعتها 😢 مسحتها بسرعه ..


عبدالصمد : يوووه مال حبيبي وبيمسح دموعها 😢 عادوذا كنا بنضحك ..


نوال : مدري يمكن افتجعت من الولاده ...


عبدالصمد : ولا عيوقع شي انتي بس شكلش افتجعتي لما ابسرتي يسرى لماتعبت وبعدا ماشاء الله عليها قد هي مثل الحصان 🐴..


نوال : حاولت تكابر وسنبت .. هيا قوم نخرج نشتري .


عبدالصمد : يله تمام البسي امد ما اخرج معي الكاميرا والذواكر 📸 انتي داريه كل مره اقل شاشلهن أخرجهن صور وانسى حقنا الصور فالحفله وفالعرس ..


نوال : أيووه صدق مابش ولا صوره كلهن فالذواكر حتى حقك فالعرس ماقد ابسرتهنش ...



........ ........ .......

في ذمار ..


طارق : بيتحيلى لنوال قدهي بتسنت 👶🏻.

يسرى : بتتحيلى للكسله هذه قد ابن عمها بيخطى ماشاء الله عليه ...


طارق : مالش ع بنتي بتحسدي ان قد بينحبها اكثر منش 😜...


يسرى : بتحانكه وتتدلع 💃 ماسخاك اصلا تحب واحده أكثر مني حتى لو بنتي ...


طارق : مسك بنته وبيبوسها 😘 ابسرتي ماما الحساده بتحسد اني بينحبش ...


يسرى : ناهي اسمعني مش وقت البنت قدنا فاقده لعبدالصمد ونوال مارأيك نسافر نبسرهم اشتي ابسرها سعمن قد بطنها ..


طارق : ضحك هههه 😂 اين بطنها ع قوله عبدالصمد قدهي دبه ماعادهوش باين اين بطنها واين وجهها ...


يسرى : ضحكت عليه ههههه😂 حرام عليكم جمنتوها هن بعضهن هكذا يورمين مع الحمل وبعدا ماشاء الله قدهي فالسابع اكيد عتقع بطنها كبيره ولما تولد عترجع تضعف ..


طارق : بيحانكها أيووه ساعش لما كنتي ساع الفيل وجالسه ساعه 😜

يسرى : بهررت فوقه 🙄 والله هكذا.وخفعته بالشال ..

طارق : ضحك هههه 😂 قصدي رجعتي ساع الغزال .. هيا قومي اتصلي لهم قليلهم عنجي غطوه ...



🌹meme_abdalgaleel


@qesasanani

بارت 214

ثاني يوم وقت العصر ..


في بيت عادل ...


تهاني : مارائيك نفرح العيال نخرجهم الحديقه ونسير ليزن نشله معاهم لاعادهم عيفرحوا شويه ..


عادل : يله تمام أنتي اتصلي📱 لأحلام تجهزه والله اني مقهور عليهم قوي ولاعاد عجبني حالهم ..


تهاني : شازيد اقل لأحلام تتجهز هي والكل حرام تخرج تنفخ معانا والكل .


عادل : تمام .. وانا اسير اقل للعيال يتجهزوا أمد ماتتصلي لها ..

تلفون البيت بيرن ☎ ..


عادل : اوذا شاجاوبه مع طريقي امد ماتتصلي .. سار بيجاوب الو الو محد بيرد ...


باب البيت بيدقدق 🚪 ..

عادل : هيا من هذه الشغله مدرينا نجاوب التلفون ولا الباب . وخطي يفتح الباب فتحه وقف انصدم وابتسم في نفس الوقت 🤗...


معاذ : مد يده يحضنه ☺ هيا مه يا ابو معاذ عتمكنوني ابتسامه ولا مافقدتونيش ..


عادل : بيحضنه ويسلم عليه 😘 ليش ماتقلي انك عتجي اخرج استقبلك وبعدا ماهي هذه الحركات ياعلي شنب 👨🏻..


معاذ : ضحك 😂 هههه كيف وقعت به . وين امي والعيال ودخل بيصيح يا أمه ييييه هبه وين انتي رزق ..


تهاني : كانت بتحاكي احلام فالتلفون 📱 سمعت صوته يوووه هذا صوت معاذ الا الا وانهو صوته شاغلق اقوم ابسر وارجع اتصلش خاطرش ..


هبه : سمعت صوت معاذ حملت 🏃‍♀ تشتي تخرج تحضنه ذكرت انهو مشو أخوها رجعت الغرفه😔 ..


رزق : ابسرها رجعت .. رجع بعدها وجلس جنبها ..


تهاني : خرجت ابسرته قدامها فرحت 😃بتسلم عليه وتصيح فوقه ليش مايقلهم ..


معاذ : بيتلفت يمين وشمال وينهم العيال مابحد اومه ...


عادل : تنهد 😔 هكذا من حين دريوا قدهم فالغرفه ع طول ..


معاذ : فتح باب الغرفه عليهم وهو بيضحك 😃 ويمد يده من الي فقدني عيحمل يحضني الأول ..


رزق : حمل حضنه وبيسلم عليه 😘 ...


هبه : اول ما ابسرته نزلت دموعها وبتتفرجه سكته 😭 ...


معاذ : حضن رزق وسلم عليه 😘 وخطي لعند هبه ... والله ياهباتي مش انتي فاقده لأخوش . ليش ماتشتيش تسلمي عليا قد جيت بدون ما اقلكم افعلش مفاجاءه..


هبه : تشتي تتحاكى اااا ماقدرتش رجعت حضنته وبتبكي 😭 ...



معاذ : اقتهر عليا ونزلت دموعه 😢 مسحهن بسرعه يله هيا جو اوريكم ما اديت لكم معي مسكهم في يده وخرج 👫 ..


رزق : لفت له ... احمد جاء معك ..

معاذ : ماشي سجل الجامعه جيت انا ومنير بس وبيفتح الشنطات يخرج لهم اللعب 🎎🎁والحاجات الي ادالهم .


هبه : بتتفرج سكته ماعدبش شي بيفرحها ..

معاذ : اديت لش هذك العروسه الي تعجبك الي بيعلنوا عليها ابسريها واديت لش لده هنديه ومن حقهن النقط هيا قومي جربيهن ابسر كيف عتوقعي ...


هبه : بكيت😭 ودخلت الغرفه ..


رزق : لحق بعدها 🚶🏼 ...


عادل : ابسر معاذ 😔 هيا هذا حالهم من يوم مادريوا ..


معاذ : اقوم ابدل بس وانا شبسرهم ..


....... ........ .........


في الحديده 🌊 ..


عبدالصمد : مخزن هو وطارق ..هيا مه صدقتني ان قد أختك دبه ..


يسرى : حرام عليك والله اننا توقعت ع كلامك انها دبه قوي هذا الورام هو ماء مشو سمنه ...


نوال : في يدها نوال الصغيره بتلاعبها 👧🏻 هيا قليله والله اننا اقله انها سمنه مع الحمل بس يضحك عليا ...


طارق : طيب ليش مورمه ماء ماقالت لش الدكتوره ولا هو هكذا عادي ...


عبدالصمد : أين دكتوره هي أختك رضيت تسير بينتراشاها من اول الحمل نسير نطمن عليها مارضيتش ولاحتى رضيت نبسر مامعانا بنت ولا ولد ...


يسرى : ابسرتها 😨 يوووه ليش وانتي ماينفعش هكذا خاصه وانتي مورمه هكذا ..


طارق : مشو ع ماتشتي غطوه نخطيها بالصميل ...


نوال : تشتي تغالطهم بتضحك 😃 ناهي ذلحين قوموا نخرج قد افتهنتوا ..


عبدالصمد : أيووه وقدهو ندي الصور مع الطريق ..

طارق : زيد خلينا نجلس لمغرب نصلي وبعدا نخرج من مره وقدهو نتعشى خارج ..


نوال : هزرت يسرى .. هيا كان قومي معي اوريش السرير والحاجات الي قد اشتريت قدنا مراعيه ايحين اولد...


يسرى : خطيت معاها وبتتفرج الحاجات وابسرت قباضات🎀 وضحكت😂 يوووه وهولاء ماهن ..


نوال : عجبني تحيلت لهن لما اكن امشط شعرها وابسري محلى ذيه الفستان👗 قد حلفت لعبدالصمد لا البسها لما نخرج من المستشفى ..


يسرى : يووه سكنه جبرني محلاه سعمنهو ☺ بس مدراش لايطلع ولد ..


نوال : مدري قلبي حاسس انها عتطلع بنت وبعدا عبدالصمد نفسه في بنت والكل .


يسرى : هيا كودكم تدوروا اسامي من ذلحين مش ترجعي تحنبي انا كنت من البدايه داريه انحنا عنسميها نوال ..


نوال : واحنا عنسميها يسرى لاهي بنت ولا طارق لاهو ولد ..


يسرى : هيا ناهي لش من الخباله سعمنهو قضاء امانه دوري لها اسم حالي ..




اذن مغرب وخرجوا اشتروا عشاء 🍱🍟 وساروا فوق البحر ..


عبدالصمد : اوذا شخطى بساعتي ادي الصور لايسير يغلق وشرجع بساعتي ..


ياترى ايش حكايه الصور الي طلعت في رآس عبدالصمد فجأة🤔


@qesasanani

بارت 215



في بيت عادل ...


معاذ : دقدق الباب 🚪 وفتحه بيتشقر .. بدى رآسه وهو مبتسم ☺ ممكن أدخل ولا ارحلي ..


هبه : بتفرجه سكته 😷 ...

رزق : اينه ترحلك هو بيتكم 😔..


معاذ : تغيرت ملامحه اكتبد 😔 من رد رزق .. دخل جلس جنبه وبيحاول يمزح معه ويصافده ويشعفل شعره .. اصلا خلاص ماعدناش ابنكم قدنا 👳🏻‍♀هندي ومعي نقطه ابسرها وبيضحك 😃 ههه ضروري استأذن من أصحاب البيت ..


رزق : ابتسم 🙂 مابش معك نقطه عادك يمني ..

معاذ : ابسر العروسه👀 الي ادى لهبه مطروحه فوق التسريحه مالعبتش بها عادها بالكرتون ... هباتي العروسه ماعجبتش وقام فتحها وجلس فالقلع بيركب لها البطاريه هيا ابسري محلاها كيف بتحكي قصص قد جلست ادورها لما لقيتها هاه شليها .


هبه : شلتها من يده وحطتها جنبها ..


معاذ : زعل 😔 لأنه بيبسر كيف حالتهم .. طيب ماتشتوش اديلكم الهديه الي رسلكم احمد معي وخرج من يده سلس لهبه مكتوب فيه اسمها بالإنجليزي ومكن رزق ميداليه مكتوب فيها اسمه .


رزق : بيتفرجها ويقلبها 👀 كيف قدروا يكتبوا اسمي في حبه الرز .


معاذ : معاهم آله ساع القلم 🖋 يكتبوا بها وبعدا يدخلوها وسط هذه ...


رزق : فوق سريره ابسر معاذ وطنن في وشه شويه ورجع قرح بكاء 😭 كان مكبود ..


تهاني : سمعته بيبكي كانت تشتي تدخل تبسره ..


عادل : مسكها من يدها 👋🏻 خليهم هو ومعاذ خليه يسد معاهم ..


معاذ : قام جلس جنبه وحضنه ... مالك ياروحي والله بتبكي 😭مافرحتش اننا رجعت .


رزق : وهو بيتكبرد 😭 أنت داري ان سميره كانت تظربني وطردتني من البيت وقالت لي مشنا ابنهم وبيوريه يده 👋🏻 ابسر كيف حرقتني ..


معاذ : مسك يده وحبها 😘 انت داري يوم القيامه الله عيخليك ترجع تحرقها ويعاقبها اين احسن نعاقبها إحنا ولا يعاقبها الله .


رزق : بيبكي 😭 الله يعاقبها .. لكن اشتي اقلك حاجه انت تعرف أمنا صح هي كانت تجي تبسرنا وانت صيحت فوقها وخبيتنا منها صح ليش هي فلتتنا أنا أكرهها ..


معاذ : ابسر هبه ودموعها بتنزل 😭 قام جلس فالقاع ونزل الاثنين جنبه . طيب عتسمعوني أنا وتصدقوا الكلام الي شاقلكم .


رزق : أيووه 😔..

هبه : هزت رآسها ايووه ..


معاذ : بيجابرهم كيف لقيهم وان امهم بتحبهم وكانت تبكي عليهم قووي 😭 وكانت تجي تتطمن عليهم وقالت له يوبه لهم هو اخوهم الكبير وانها طيبه ماكانتش تشتي تفلتهم بس ابوهم كان ضايع يمكن صدمته سياره او مات وهي ماتعرفش أحد وخلتهم عنده تسير تدوره لأنه مابش معاها زلط تستر تشتري لهم حليب وأنه مابش أم ترجم عليها وانها أكيد بتسير تدورهم بس ماعد لقيتهمش لأنهم نقلوا وبيحكي لهم ان الرسول محمد لما ماتت أمه عاش بدون اب وام وان ربي حبه وخلاه رسول وكيف تعذب بس هم الحمدلله ربي يحبهم وادى لهم الحج عبدالله وعادل وانهم يحبوهم وجلس يحكي لهم ويجابرهم كم يحبوهم وانهم زاعلين لأنهم زاعلين وانه جاء من الهند علشانهم وقال لرزق ان ابوه الحج عبدالله ذلحين زاعل فالقبر حقه هو وامه فاطمه لأنه زاعل وحاول يقنعهم انه مايخلوش هذا الموظوع يؤثر عليهم بالعكس يفرحوا ان ربي ادالهم اهل بيحبوهم هكذا وهم ماسك أيديهم 👋🏻 . ..


هبه : مسحت دموعها 😢 بيدها لأنها دايما تقتنع بكلام معاذ . وقالت له أنا ابسرتها فالحديده 🌊 وكانت تبكي قووي 😭 وحضنتني قوي وكانت تبوسني 😘 وكانت تسألني كيفهو رزق وكيف احنا مرتاحين ..



معاذ : ابسرها بتتحاكى 😃 فرح حضنها قوووي وانا أحبش قووي ..

رزق : فرح 😄 وقام اسير اقلهم انهي تحاكت .


معاذ : مسكه 👋🏻 ماشي نفعلها لهم مفاجئه هيا بدلوا واخرجكم نتعشاء ونسير ندي يزن حرام كان مراعي يسير الحديقه معاكم وانا جيتي خربت الخرجه وبعدا فالمطعم نقلهم ..


قاموا لبسوا وخرج معاذ وهم في يده 👫..


عادل وتهاني : ابسروهم مبدلين في يده 👫 فرحوا ..


معاذ : هيا قوموا اتجهزوا العيال عزموكم ع مطعم ونسير ندي يزن معانا ...


تهاني : فرحت وقربت تحبهم 😘.



عادل : سحب معاذ ع جنب ماقلتلهم 😃 لما رضيوا يخرجوا معك ..


معاذ : ضحك 😂 هههه سر المهنه ..


عادل : هيا ناهي لك ياسر المهنه انت عتبسر هههه.

معاذ : خفع رآسه .. اوووه😱 ع نسوه اينهي شريحتي عادهي شغاله صح ..

عادل : ايوه بس ليش الخفعه هذه بكلها هههه سعم عتطير عليها ..


معاذ : ابتسم وخزي ☺ نسيت ماطمن احمد ان قد وصلنا .. وفي نفسه بيضحك ذلحين قد ميس عتجنن لأني ماطمنتهاش ..

عادل : شلها من باب دولابك ..

معاذ : يله تمام ألبسوا امد ما ارسله وابدل ...


@qesasanani

بارت 216



في الحديده 🌊 ..


كملوا يتعشوا وضحكوا 😂ع نوال وانها بتسمن وروحوا ...



في بيت عبدالصمد ...


عبدالصمد : يله تصبحوا ع خير أدخل ارقد نقوم الصبح نسير العرج نعوض سيره هذك المره حق النخيل الي قرحتها اختها عرض ههه ..


طارق : لاتضحكش 😂ع مرتي ايذا مرتك واحمه لاعاد تطيرها لنا هي ...


نوال : بتضحك ههههه ما انا عادهو بدري عليا باقي لي 3 اشهر للولاد ..


دخلوا غرفتهم ..

عبدالصمد : حط الكيس الي فيه الصور فوق التسريحه وخطي يبدل 👕👖 ...


نوال : شلت الكيس جلست فوق كرسي التسريحه وبتخرج الصور تتفرجهن وبتضحك ع اشكالهم 😂 ههه يووه ع اشكال معانا امانه شكلنا مضحك ومننا صدق فعلنا خطوبه 💍 ...



عبدالصمد : خطي لجنبها وسنب اسكه ورينا ..

نوال : بتمكنه وبيتفرجوا صورهم ويضحكوا 😂 ..


عبدالصمد : شل الكيس .. هيا جي نجلس سوى ونبسرهن وبيخرج صوره حق العرس فالقاعه وبيوريها من هذا ومن هذا ....



نوال : ابسرت صوره وفتحت عيونها 😳 وانصدمت وتغيرت ملامح وشها وقلبها دق بسرعه 💗.. منهم هذولاء العيال ..



عبدالصمد : ابسرها وابتسم 😊 هذا يزن ابن حسين صاحبي الله يرحمه الي قلتلش وهذا اخو حسين ابسري محلاه ماشاء الله اسمه رزق مدري فيه جاذبيه غير طبيعيه من اول ما ابسرته وانا بينحبه قوي وقلبي معلق به ❤ عاد بنت جيرانهم والكل سبحان الله والبنت اسمها هبه هذولاء الإثنين فيهم قبله ماشاء الله مدري مامعلقني بهم ...


نوال : ماقدرتش تمسك نفسها قامت ع طول دخلت الحمام جلست تبكي 😭 معقوله الزمن جمعك بعيالك ياعبدالصمد وخلاك تحبهم هكذا بدون ماتعرف انهم عيالك كيف اقلك انهم عيالك ريت والله وانا اقدر بس خايفه من رده فعلك ومن رده فعلهم ..


عبدالصمد : بيدقدق ✊🏻 لها لأنه استغرب من قومتها فجاءه والدموع الي نزلت من عيونها افتجع لاهي تاعبه .. نوال حبيبي مالش ياروحي تاعبه ..


نوال : بتمسح دموعها 😭 وحاولت تقوم وتكابر فتحت الباب 🚪 وخرجت .. ولافيني شي بس حسيت شويه تعب وقد افتهنت ...



....... ....... ........



في صنعاء .


في المطعم ...


كلهم جالسين ومبسوطين فارحين ان العيال تغيرت نفسيتهم ..


يزن ورزق : بيلعبوا فوق اللعب .

هبه : جالسه جنب معاذ بتأكل ..

عادل : فارح 😃 انها بتأكل .. ازيد اطلب لش ياروحي ..


هبه : اشرت له برآسها ماشي ..

معاذ : أبسرها وابتسم ☺ خلاص اسهل ماذلحين ومسكها من كتفها ..

هبه : لفتت لعادل ☺ خلاص شكرا يابابا قدنا شابعه ..


عادل : لمعت عيونه وفرح 😃 هبه بتتحاكي ..

تهاني : نزلت دموعها 😢 من الفرحه ماصدقتش قامت تبوسها ع طول 😘 يووه لو درينا ان جيت معاذ عتخليش تتحاكي ان قد خليناه يجي ..


عادل : ابسر معاذ وضحك 😃يعني قد كنت داري انا اوريك 👌🏻..


معاذ : هي تحاكت اول واحنا فالبيت لما كنت عندهم بس قلنا نفعلها لكم مفاجاءه ...



هبه : معاذ لو سمحت قوم معي ألعب ..

معاذ : ابسرها وابتسم 😊 فارح انها بداءت تتحسن .. يله هيا قومي مسكها وخطيوا 👫 ..



تهاني : بعد ماخطيوا بتتجابر هي وعادل الحمدلله ان جيت معاذ غيرتهم هكذا يعلم الله ماتجابر معاهم ..


عادل : ماشاء الله عليه مامعاذ عاقل من يومه. الله يصلحه ..


والعيال بيلعبوا ومعاذ عندهم وبيصورهم رن تلفونه 📱جاوب وانها ميس اتصلت تتطمن عليه ..


معاذ : بيحاكيها وهو مبتسم ☺ حتى أنتي والله وحشتيني وعادهو يوم واحد ..


هبه : جت من وراه سمعته ابتسمت .. من بتحاكي 😉 ...


معاذ : ارتبش وضحك 😅 هاه هذه وغلق التلفون ..

هبه : خلاص وعد والله ما اقل لبابا قلي بتحبها 😍 هي هنديه صح .


معاذ : ضحك هههه 😂 مع مشي هنديه هي اردنيه جي نجلس اوريش صورتها لما تصورنا فالجامعه بس مثل ما سدينا سر ..


هبه : ايووه سر 😍 .. ابسرتها الله محلاها قمريه بس ليش بتجلس بشعرها حرام عتدخل النار ..


معاذ : بيشرح لها انهم بيخرجوا هكذا بس لو خطبها ووافقت عيخليها تلبس حجاب وجلسوا يتجابروا وساروا كملوا لعب مع يزن ورزق ...



@qesasanani