❤️
124




سمر: بتخطى في ممر المستشفى .. في يدها شوكلاته بتأكلها 🍫..


نزآر: خطي من جنبها سحب الشوكلاته 🍫من يدها بيأكلها ويضحك ههه😜 .


سمر: لفتت له بضبح 😤 بدل ماتشل البواقي كنت عتقلي وشديلك واحد جديد ..


نزآر: 😯 أوووو مش معقول الزناطه عتدي لي واحد جديد مايخرجش منش أصلا شي كان ليش شليته أنتي أحذق عباد الله ههههه..


سمر: حطت يدها في خصرها ... مشنا حاذقه هيا انزل اشتري الي تشتي وأنا شاحاسب..



نزآر: يشتي يحانكها ...مع إشتري أنتي بعدا حرآم انزل اشتري شوكلاته غاليه وترجعي تبكي 😜.


سمر: بعند ... تمام وفلتت وبتخطى بعصبيه نزلت للبوفيه تشتري له 😡.


..............



جنى: بتختبر أخر اختبار في الترم مافهمتش شي نزلت لاعند أحمد يوريها 📝..


أحمد: كان ناسي باب غرفته 🚪مردود نسي مايغلقه ممدد فوق السرير ويده تحت رآسه وفاعل رجل ع رجل بيحاكى جنات فالتلفوون ...

تصدقي اني بينهم كيف شقدر أجلس بدونش طول هذه الفتره كلها كيف عيكون يومي بدون ما أشوفش وزد ذلحين عنسافر نعتمر أنا وجدي يعني ماذلحين البعد بعدين بس شاكن اتصلش كل يوم ياويلش ماترديش ..


جنات: ضحكت عليه 😂ههههه وأنا عتوحشني قووي بس ممنوع تتصلي يوميه أنت عتسير تعتمر وتعتكف في بيت الله ولا تمكنها رمسه ..


أحمد: بيقلد زآعل 😔 هكذا ياشوعه أنا قد شجنن شفقدش وأنتي بتضحكي هيا ناهي إن ماخليتش تتصلي لي وأطنش..


جنات: هههه أتحداك أنت أصلا بتحبني ماتسخاش 😍.


أحمد: إبتسم 😊 ماهذه أكيد مسخاش عليش ..والله لوتعرفي كم أحبش ماعاد تبعدي عني دقيقه واحده انا قررت شاحاكي جدي اني أشتيش هو وعدني إنه عيتغير يعني معتقدش إنه عيغصبني ع بنت خالي لأني صدق مشتيهاش قد حكيتلش ..


جنات: حبيبي ماما بتداعيني أجاوبها وأرجع أتصلك ..

أحمد: تمام ياكل عمري 😍..



جنى: سمعت كل المجابره بينهم كانت واقفه عند الباب🚪 إقتهرت وحست عيونها كلها شرر ونار ومشاعرها لأحمد اقتلبت حقد له ولحبيبته نكعت الكتاب من يدها بدون ماتنتبه وطلعت غرفتها ...


أحمد: قام يغلق باب غرفته 🚪 إبسر كتاب 📙مرجوم فتحه وإنه حق جنى ..خفع رآسه بيده أوووف شكلها سمعت..



................


في بيت عآصم ..

جنات: هآه ماما دعيتيني ..


رهآم: أيوووه ياروحي .. جي إجلسي جنبي ما أوريش ..


جنات: مستغربه 😳 تمام.

رهآم: خرجت لها صوره .. هآه قلبي أنتي قلتي نفسش تعرفي أبوش امس في بيتنا كنت بينندش في حآجاتي القديمه ولقيتها قلت أديها لش ..


جنات: بتتفرح الصوره بتحاول تركز في كل ملامحه ... ماما مايشبهنيش أبدآ أنا أشبهش قووى بس ذلحين مدرى كيف قد شكله .


رهآم: ايوه ماتشبهش لا أنتي ولا أختش وقعتوا سآعي .. ذلحين شلي الصوره لش احتفظي بها عندش ..


جنات: فرحت وحبتها 😘..



..........


سمر: دخلت للمكتب عند نزآر وفي يدها كيس ملان شوكلاته وعصيرات 🍭🍡🍬🍿🍫.




نزآر: إبسرها وضحك 😂 ههههه طلعتي كريمه يابنتي هذولاء كلهن من عياكلهن .. هيا إجلسي نفعل خونه ساع الجهال ونأكلهن جمعه .





@qesasanani

❤️
125




جنى: طلعت غرفتها بتأكل في نفسها قلبها بيحرق بتفكر 🤔 كيف تفرق بين أحمد وحبيبته ... امممم أول شي لازم أشل رقم تلفونها وأعرف منهي وبعدا شتصرف ...


أحمد: بيدق لها باب الغرفه 🚪 جنى .. هذا كتابش لقيته عند غرفتي ..


جنى: جاوبته كأن مابش في حسها ولاحسسته بشي .. شلته منه 😀 أيووه كتابي 📙قدله ضايع يومين بيندوره أين لقيته .



أحمد: في نفسه فرح إنها ماسمعتش 😃 لقيته عند باب غرفتي يمكن الشغاله تخايلها إنه حقي طرحته .. يله ذاكري سوى عاد معش غطوه ورعى الله من تجمل ..


جنى: أيووه أكيد ولايهمك الأولي كالمعتاد .. بس كنت أشتي تلفونك📱 لومعك رصيد اتصل لصاحبتي أسألها ع شي بس مدرى ماله الحارس ماسددش فاتورتي وقد حاكيته الصبح ..



أحمد: اوذك نازل شليه الباس ***وأنا أدخل اسمر مع جدي شويه أبسر لابه شي ناقص للسفر ..


جنى: نزلت فتحت تلفونه📱 قلبت فيه وقريت رسايله مع جنات ...🤔آها يعني إسمها جنات ... وسجلت الرقم .. ..



..................



عبدالعزيز: بيراجع أوراق الشركه منسجم .📝.



جنى: دخلت لاعنده .. زيزو حبيبي شاشل تلفونك إشتي منه برنامج ولأنه برايفت شتصل منه به رقم بيتصلي أتأكد لو بنت او لا ..


عزيز: تمام ياروحي ومكنها التلفون 📱..




............



سندس: بتتصل لجنات تحاكيها إن أكرم قلها انه بيحبها 😍 .


جنات: ضحكت ههههه 😂 قد قلتلش ماصدقتيش يله عيس نرجع نتزوج جمعه الأربعه ..



جنى: بتتصل من تلفون عبدالعزيز برقم جنات .. الخط إنتظار ..


........

في بيت عآصم

عآصم: رهوم قلبي ❤.


رهآم: هآه حياتي ..


عآصم: قد شكلش عتقعي جده ههه بس الصدق عتقعي حاليه جده صغيره وساع القمر ..


رهآم :.مافهمتش كلامه 😳 مستغربه ... ماهو و.


عآصم: واحد من عيال أصحابي بيدرس فالجامعه مع جنات وشكله معجب بها أبوه حاكاني يبسر رأينا لو موافقين نخطب والعرس بعد الجامعه ...
❤️


@qesasanani

❤️
126



بعد يومين ...

أحمد : سافر هو والشيخ ناصر ونجات وسلوى يعتمروا ...


عبدالعزيز: جالس وحده في البيت هو وجنى ..



جنى: ضابحه البيت فاضي 😤 دخلت لاعند أبووها .. بابا هيا نخرج ..


عبدالعزيز: كان معه ملفات وورق خيرات بيراجعهن 📝 .. مارأيش أكمل وبعدا نخرج ..

جنى: نفخت أوووف ماعه قدنا شقرح جلسه فالبيت 🏨.


عبدالعزيز: 😃 ولايزعل القمر حقي شتصل لأكرم يجي يخرجش واتعشوا خارج ..


جنى: ولو إنه لغجه 😁 لكن يله إسهل أهم شي أخرج .



..........

سامي: اتصل لعآصم .. هيا نخرج نتعشى ادي رهآم والعيال والحقنا لامطعم ال****.


عآصم: يله تمام الآن اسبقونا ...



.............

الشيخ : أول مادخل الحرم وإبسر الكعبه 🕋 نزل دموعه وجهش بالبكاء 😭 .... وبيدعي الله يسامحه ..


نجات: بتصلي وتدعي هي وسلوى.



............

في المطعم .....


وصلوا بيت سامي وبيت عآصم المطعم وحجزوا طاوله كبيره في قسم العوائل ...



أكرم: فوق السياره 🚘 بيجابر جنى .. اين تشتي تسيري ..


جنى: إشتي مطعم ال****..

أكرم: طبعآ قل إهتمامه فيها وكل تفكيره قدهو محصور في سندس .. بعيد هذا المطعم الي تشتيه شاشلش مطعم ثاني .. مسك تلفونه 📱 ورسل لسندس .. حبيبي أنا خرجت بنت خالي مطعم ال***.


سندس : قريت الرساله وإبتسمت ردت عليه واحنا في نفس المطعم ☺ وشاورت جنات إن أكرم عيجي ...


جنات: بهررت فوقها 😳 وقري من الخباله كلهم هآنا .. ماقد كملتش الكلمه إلا واحمد بيتصل لها ...


سندس: ضحكت هههه 😂 هيا قري أنتي ...



أكرم: دخل هو وجنى المطعم جلسوا خارج فالطاوله وهو سار يطلب الأكل ...


جنات: خرجت للحوش حق المطعم تجاوب أحمد 📱..


سندس: خرجت لاعند أكرم تبسره..

جنى: بتتفرج يمين وشمال ماعجبهاش المطعم قامت تدور أكرم تقله لايطلبش يسيروا مطعم ثاني ..


جنات: ماسكه التلفون 📱بتخطى وتجابر أحمد إبسرت قدامها بنت نسخه منها بتخطى تسمرت بقعتها 😳 يبسين أرجلها ... معقووله هذه أختي .. أكييييد هذه أختي ..


أحمد: بيحاكيها فالتلفوون 📱.. ألووووو يييييه ألووووو حبيبي مالش طننتتي ألوووة..


جنات: بعجل .. هآه أحمد شتصلك بعدا غلقت تلفونها 📱 وبتحمل بسرعه تدعي رهآم تجي تبسرها ..



جنى: سارت تدعي أكرم يروحوا إبسرته واقف مع سندس بيتجابروا ...طننت 🤔 إيش يعني بطل يحبني يعني لا أكرم ولا أحمد عصبت 😡 وقربت لاعنده بنخيط بتحاكيه كرومي هيا نسير مطعم ثاني هذا ماعجبنيش ...



أكرم: ارتبش انها إبسرتهم 😱 هآه .. أيووه طيب تمام مسك جنى وخطيوا ..



سندس: ضبحت منه 😤 ودخلت المطعم وهي مقهوره منه ... ليش فعل هكذا وليش تسميه كرومي وليش مسك يدها ..
❤️



🌹meme_abdalgaleel



@qesasanani

❤️
127



أكرم: فوق السياره بيحطم 😡 ذلحين أين تشتي تسيري من اللعب في المطاعم ..


جنى: ضحكت 😃 هههه مالك ضبحت ولا طايرت عليك الجوو..



أكرم: مابش معي جو هذه زميلتي لقيتها وسلمت عليها ..


جنى: بتتليقن عليه 😉 ههههه عادي عادي هيا مه احنا أصحاب قلي الصدق قد أحمد قلي انه بيحب جنات عاد حنبت عندك 😉.



أكرم: إييييش 😳😳 أحمد قلش ..



.............


جنات: بتحمل بسرعه ماما ماما أختي هانا إبسرتها 😃..


رهآم: كانت بتاكل معاهم كلهم ... طرحت العصير من يدها إيييش 😳
جنى هانا فينهي بعدت الكرسي وقامت تدورها ..


يوسف: اختي 😃 وحمل بعدهن يبسرها..


عآصم وسامي: لحقوها افتجعوا لو عبدالعزيز هاناك ..



رهآم: فارحه عتبسر بنتها 😃 خرجين يدورنها مابحد ..


جنات : ياماما كانت هانا والله انهي هانا إبسرتها ...


...............


جنى: مالك مستغرب هكذا ههههه 😃 أيووه قلي ع جنات .. بس أمانه كيفهي حآليه ..


أكرم: الصدق شكلها قمر 😁 وعيونها تشبهش قووي ..


جنى: ضبحت في نفسها 😤 بتأكل في روحها .. بس تشتي تغاوى .. أيووه ذلحين مارأيك لو تعرفني عليها أصاحبها ونرجع نقل لجدي انها صاحبتي نفعل مفاجأءه لأحمد ..


أكرم: أنتي داريه هي بنت عمه سندس شرجع احاكيها وتتعرفي عليهن الثنتين ..




جنى: هآه هذك البنت الي معاك إسمها سندس ..


أكرم: أيووه شاخليش ترجعي تتعرفي عليها..


..............




رهآم: زعلت انها ماعد لقيتش جنى دخلت ومازد رضيتش تتعشى ..


جنات: فارحه انها إبسرت أختها 😃 وجالسه بتفكر فيها وتجابر سندس عليها وكيف شكلها ...



سندس: بتفكر🤔 في شكل البنت الي جت هزرت أحمد بتلوم نفسها أنها قفت ع طول اول ماسمعت احد بيدعي كرومي ... ليش أنا غبيه هكذا ليش ما ابسرتهاش يمكن تطلع حاليه ويمكن ان بينهم شي ليش تقله كرومي ..


جنات: خفعتها ... يييه من بينجابر ..


سندس: بتحكي لها وزاعله 😔.



أحمد: جالس بيقلق ع جنات ايش حصل وليش غلقت رسل لها طمنيني ...



روحوا من المطعم كلهم ...


جنى: أول شي فعلته بعد ماتأكدت ان أحمد بيحب جنات من أكرم اتصلت لصاحبتها يفكرين في شي يفرقين بينهم ..


رهآم: مقهوره وزاعله انها ما ابسرتش جنى 😔..
❤️




@qesasanani

❤️
128


بعد يوميين ..


عآصم: بيداعي رهآم ييييه رهومي قلبي ❤ .

رهآم: بترفع البيت اليوم جمعه إجازه ...هآه حبيبي ..مالك قد قمت ماترتاح ..


عآصم: إبتسم ومسك يدها حبها 😘 كان نفسي ياروحي بس مفعل صآحبي الي قلتلش يشتي جنات لإبنه إتصل يبسر ماقلنا ..


رهآم: فعلت يدها في خدها وضحكت ههه يوووه نسيت ماقلها 😃..


عآصم: ضحك 😂 ههههه مابلا ماتشتيش تقعي جده ..

رهآم: خلاص اليوم شاحاكيها في بيتنا هي وأمي لمانسير نتغدا ..



............


أحمد : كمل يصلي جمعه في الحرم 🕋 وأتصل لجنات .. كيف روحي جمعتش عسل مثلش ..


جنات: كانت بتلبس البالطوه بتتجهز عيسيرين بيت عبدالله .. جاوبته .. جمعتك خير وبركه ..


أحمد: خير وبركه بس .. مابش جمعتك حآليه ساعك ولا وحشتني 😔.


جنات: إلا وحشتني ووحشتني قووى ☺ ...


أحمد: جبر حبيبتي الي وحشتها .. أنتي دآريه سفري وبعدي عنش خلاني أتأكد أني ماعد أقدرش أعيش من غيرش اليوم شاحاكي أمي وأقلها أول مانرجع تجي تخطبش 😀..


جنات : خزيت وضحكت ☺ هآه ..


أحمد: يووه جبرني بالي بتخزا ..


يوسف: بيداعي .. جنات يييه هيا أين أنتي قد بابا مراعي فوق السياره 🚘 .


جنات: يله باي شرجع اتصلك قدهم مراعيين لي خارج ..


..........


مريم: بتصيح فوق عيالها 😡 ياجهالي بس نداش خلوني أكمل عملي خالكم عيجي يتغدا هو وخالتكم سمر وجنى ..


أكرم: يا أمه لو صدقتي أبي وخرجنا نتغدا خارج ..


مريم: مع حرآم عبدالعزيز وجنى بيأكلوا من السوق ولا من يد الشغالات من يوم ماسافروا خليهم الله يأكلوا سوى ..


أكرم: يله ماشتيتوا .. شدخل أتصل لصاحبي 📱..


مريم: إبتسمت له ☺ منهو هذا صاحبك الي كودك لاسي عرض التلفون بتجابره ولما تبسرني تغلق 😉 .


أكرم: كان مسنب باب المطبخ .. قحص ع أسنانه وابتسم 😁 هذا صاحبي تعرفت عليه فالجامعه ..


مريم: قصدك تعرفت عليها 😉 هههه إسمعني لو هي بنت ناس وبتحبها صدق قلي وأنا شخطبها لك حين قد نستك جنى ...


أكرم: فرح 😃 وقرب حبها في رآسها ..والله إنها بنت ناس وأبوها في الأمارات بس جت تقرى الجامعه هآنا عند جدتها وعمها ..


مريم : خلاص عنجلس ونتجابر منها سوى ومالك إلا مايرضيك مسرع الأيام بتخطى عادنا كنت أمس المراسل حق خالك عزيز وخالتك هناء واليوم قد ابني بيحب ❤ .


أكرم: شكلكم عتخطبوا لي أنا وأحمد بس لاقد تتحاكوش أحمد يشتي بنت عمتها ..



مريم: ضحكت 😃 ههههه والله مانا مصدقه مسرع كبرتوا عذا كنتوا جهال بتلعبوا وتتضاربوا .



................


جنى: بتقيم سمر ... سموره هيا شرق عنتأخر ع عمه مريم ..


سمر: بتتمطط اوووه ملاني نوم خلوني أرقد اليوم إجازتي ..



جنى: قد أذن ظهر هيا ..قد بابا عيرجع من الجامع 🕌 .



سمر: أووووف منش .. بعدت البطانيه وقامت ..


جنى: طلعت غرفتها .. تتصل لصاحبتها 📱 هيا ماهو قليلي رضي ..


صاحبه جنى: أكييييد 😃 اطمني مالش إلا نفرق بينهم ..
❤️


🌹meme_abdalgaleel


@qesasanani

❤️
129




في بيت عبدالله ...


كلهم فوق الغداء ..بيضحكوا ويمزحوا ..


سندس وجنات: جالسات جنب بعض ..

يوسف: جنب خاله سامي ..

سيده: بتحاكى يوسف .. أمانه يا إبني كمل إتغدا وسير لاعند أمك حفيظه قلها تجي عندنا ..


رهآم: يووه كملي منها .. أمانه كيفهي ..

سامي: ضحك هههه😀 عآدهي عتقبرنا .. قد عجزنا إحنا وهي عادهي شباب ..


مره سامي: حرآم عليك قل ماشاء الله لايقع بالمره شي بسببك 🙂.


عآصم: ياعمه مارأيكم قلت فرصه إن إحنا مجتمعين أحاكيكم كلكم .. صاحبي محمد ال**** إبنه بيدرس مع جنات فالجامعه والولد أعجب بها اتصلي يفاتحوا فيها قلت نبسر رأيكم ورآيئها ..


سيده: إبتسمت 😀 ماشاء الله قذا بنتي كبرت وبيخطبوها ..

سندس وجنات: تباسرين .

جنات: حطت الملعقه من يدها 🍽 مشتيش اتزوج با أحد وفلتت وقامت ..


سندس: فهمت ان علشان أحمد .. لحقتها ..


رهآم: قامت بعدهن دخلت للغرفه تبسر جنات ...


جنات: بتبكي فوق السرير 😭 .

رهآم: مسكتها من ورآها مال روح ماما بتبكي .. مالش ياقلبي محد عيغصبش ع شي الرأي هو رأيش ..


جنات : مشتيش أتزوج با أحد اشتي أكمل دراستي ..

سندس: بتتكركر عليها وتحانكها 😜أيوووه ماتشتيش أحد ياعمه هههه مالكم عليها ...


جنات: خفعتها بالوساده .. بطلي خباله ..


رهآم: حست إن به شي بينهن ... إبسرت جنات .. جنات حبيبي أنا ماشاقلش حآجه ..بس لوتشتي تقلي لي شي أنا مستعده أسمعش أنا صآحبتش وأختش قبل ما أكون أمش ولو به أحد في بالش قليلي عليه 🙂..



سندس: ضحكت هههه 😂 وأنا ياعمه أقلش ماعتصيحيش فوقي ..



رهآم: ماشاصيحش بس يله قلين لي مابه وابتسمت لهن 😃..



تلفون جنات وصلت رساله من أحمد 📱 فتحتها مكتوب (أحبببك ❤.

جنات: إبتسمت 🙂 حطت التلفون من يدها وإبسرت لرهآم .. ماما أحكيلش ماعتصيحيش فوقي ..


رهآم: شووور .. ولاعاد معاكن واحد أحبه قليلي بس أوبهي يسمعش عآصم 😉..


جنات وسندس: ضحكين عليها وحكين لها انها بيحبين أكرم وأحمد


..............



جنى : فوق السياره سايرين بيت مريم .. رسلت لصاحبتها .. ( لاتنسي أنتي عليش أحمد وهو جنات وتعرفي أحلى هديه مني ..

❤️


@qesasanani

❤️
130



الشيخ ناصر: مارأيكم نتم نتغدا ونخرج السوق كودحنا ندور لهم هدايا ونشتي يومين ندور الحاجات حق الهرمات جنى وسمر.


نجات: عست أرجلها .. يووه يا أبه ما أنا مازد قدرت أخرجوا أنتوا ..


سلوى: وأنا والكل تاعبه نفتهن ذلحين والعشي نخرج ..


أحمد: ضحك عليهن 😂 هههه خلاص العجايز يجلسين وانا وجدو عنخرج ..


الشيخ ناصر : أيوووه نخرج إحنا وندور لنا نسوان مع الطريق 😜 .


نجات : إبسرته بضبح 😤 بعد ماشاب ودوه الكتاب قدك يحسن الله الختام قلك يتزوج قل نزوج ذيه الوليد مش أنت ..

أحمد: إبتسم ولمعين عيونه 😊 أيووه ياجده زوجوني أمانه قبالي بنت ساع القمر فالجامعه لما نرجع سيرين إخطبنها لي ..


الشيخ ناصر : إبسره بقلبه عين 😡 بنت مه من الجامعه وجنى ماهي إحنا سدينا من جهلكم إننتوا لبعض مامعك إلا جنى وغيرها لاتحلمش ..


أحمد: ضبح 😤 وقام من فوق الغداء .. مايكفيش كسرت قلب خالي وبسببك حصلنا كل الي حصل مش أنت قلت تغيرت طيب ليش تعبت نفسك وجيت تعتمر فلتهم وحنق ...


............


في بيت مريم.....


سمر وجنى: بيقربين الغداء مع مريم ...



عبدالعزيز: جالس فالديوان هو وزوج مريم ..


أكرم: شاقوم أبسر هذولاء الجيف قد متنا جوع 😁...


جنى: في يدها العصير تدخله إبسرت أكرم جيي لاعندهن سنبت ..


أكرم: هيا عتغدنا قد عنموت جوع ياكسلات 😜..


جنى: قذا عنزوجك وتجي تغديك بحين 😉..


أكرم : ضحك وقرب يشاورها دلا .. حاكيت أمي موافقه قالت تشتي تعرفها بس ..شرجع أشلكن لاعندهم تبسرنها ...


جنى: بلائمه😏 منها وجنات ...


أكرم : شاحاكي أحمد وأقله قد حاكيت أمي تسير تبسر الثنتين ..


سمر: إبسرتهم ضحكت 😂 ههه مش معقوله كيف للدجاجه والديك سدين ..


جنى: الأخ بيحب الحمدلله عنفتهن منه نقلعه نزوجه ...


سمر: 😳 قززت وشها بضحك من ورايا .. نتم نتغدا وأشتي تفهمني الموظوع كله ..



جنى: ماقدرتش تمسك نفسها لما حست ان الموظوع قد عيدخل فالجد رسلت لصاحبتها رسليله من ذلحين ...


............



في بيت عبدالله ...


سامي: مخزن ..خلاص اتصلهم ونبيهم مابش نصيب ...


عآصم: قدهو ذيه .. محد عيغصبها بس خبلاء بكيت ...


سيده: هن هكذا البنات لما أحد يقلهن زوج يفتجعين ويبكين 😭 .




باب البرد بيدق🚪 .


سيده : يله خاطركم تموا خزانتكم أسير أفتح قدهي حفيظه نسير نجلس لنا ...

❤️


@qesasanani

❤️
131



سلوى: لحقت أحمد ... دخلت لاعنده .. بتداعيه .


أحمد: جالس في البلكونه حق الفندق بيشرب شقاره .. إبسرها رجم الشقاره للشارع ..


سلوى: دخلت لاعنده ...بنت مه ياإبني كيف لوماتعرفت عليها .

أحمد: بضبح 😤 يا أمه لو كلامش ساع جدي خليني وحدي أخرج لي ...


سلوى : مسكته وجلست هي وياه .. مع ماسخاني عليك جي قلي ماقصتك ..


أحمد : بيحكي لها ...



...............


جنات : رقدت عند سندس ..


سندس: بتجابر أكرم في التلفون 😱 يوووه حاكيتها يامجنون وكيف تبسرتي شافجعها ههههه.


أكرم : بيضحك عليها 😂 هههههه اسهل شاكويها أهم شي إرجعي اتصلحي ..

سندس: أيووه مالك إلا أحلى تصلاح أشعفل شعري 💇 وافعلي مكياج أسود وأزرق 😜 ..


أكرم : أيوووه هههه 😂 وزيد إلبسي شوال مشطط ..


جنات : بتسمعها وتضحك عليهم 😂 والله إنهم 2مجانين الله يعيننا عليهم ..
تلفونها رن 📱 رقم برايفت .. فكرت ترد أو لا رجعت قالت أكيد أحمد لأنه بيتصل دولي .. ردت ألووووو.


المتصل : كيف حبيب قلبي ❤ .


جنات : ماركزتش فالصوت .. أهلا وحشتني قووي ..


المتصل : مش أكثر مني ياعمري .

جنات : ركزت فالصوت 😳 .. عفوا من معي ..



المتصل : ضحك 😂 هههه ليش من كثرنا ماعد عرفتيناش من عيتصلش إلا واحد بيحبش بس أنا مزكم ومستبرد ..


جنات : شكلك غلطان مع السلامه ..


في نفس الوقت الوقت الي كانت جنات بتحاكي المتصل وصلت رسآله لأحمد مكتوب فيها ( أنت مصدق إن جنات بتحبك يا أهبل هي متعوده تلعب ع الشباب إتصلها وانت عتتأكد )..


أحمد: إتصل كان التلفون مشغول 📱 دخل الشك في رآسه ..


بعدها بعشر دقايق ...



وصل تسجيل صوتي لأحمد بالجزء الأول من المكالمه الي كانت بين المتصل وجنات ...



أحمد : خفع رآسه بيده وقحص أسنانه 😔 ليش هكذا ياجنات ليش معقوله كل الهدوء والأدب يطلع منش هكذا ..


رسلها ( ياخساره حبي لش وياخساره إني زعلت جدي مني علشان أخطبش طلعتي ماتستاهليش ) ..


جنات : أول ماقريت الرسآله تفاجاءت 😳 ماهو ماله هذا مافعلت وقرحت بكاء 😭 .


سندس : إبسرتها .. كانت عادهي بتحاكي أكرم ... أكرم باي شتصلك بعدا مدرى مالها جنات ..



@qesasanani

❤️
132



صآحبه جنى : رسلت لجنى تم التسليم خلاص إطمني شكله قريهن ...



جنى: رسلت لها 😀 تسلمي لي والله لو يفلتها لأديلش أحلى هديه ...



............


سندس: قريت رساله أحمد ... إبسرت جنات ..😡 هذا ماله بيتخيبل من قد يقلوا له تخايله إنش لعبه عنده أو ماهو عيلعب بش خبلاء بتبكي عليه والله مايستاهل دموعش بس أنا شاربيه .


جنات : فوق السرير جالسه بتبكي 😭 خلاص ياسندس قوى ابردي خلاص هو حر بس لبش يقل عليا لعابه مافعلت أنا ...

وهن بيتحاكين تلفون سندس وصلت رسآله من أكرم ( هيا طمنيني مالها جنات بتبكي 😭..


سندس: إتصلت له 📱 وهي بتفوور ... إسمعني يا أكرم لو ابن خالتك هذا تخايله إن مدرى من قد يقلوا له يحترم نفسه قبل مايقل ع جنات إنها لعابه ولو الحركه الي فعلها بيتعذر انه مايشتيش يخطبها فقله غيره ملان بيدوروا رضاها عادها اليوم رجعت واحد هو الي خسر بنت عمتي ماهو غيره ملان ..



أكرم : 😳 مشو مستوعب مابتقل ..... يييييه ناهي لحضه إهدائي مابه لهذا كله فهميني ماحصل ..


سندس: قبل شويه عادهو بيحب فيها ويجابرها وبعدها رسلها انها لعابه وياخساره انه زعل جده علشانها وكلام أخبل ..



أكرم : خلاص .. غلقي غلقي شتصله ذلحين أفهم ماهو الموظوع ..



سندس: رآعي وأنت لو عتطلع ساعه من ذلحين الله يفتح عليك ..

أكرم : قلب فوقها 😡 مش وقت خبالتش هذه الساع سامجه اول نبسر مالهم أنا متأكد إنه بيحبها ...



...............


جنى: نزلت لاعند سمر ..


سمر: بتقرى كتاب ..


جنى: سموري إشتي أحاكيش في حاجه فعلتها ولو صيحتي فوقي لأنش داريه مقدرش أخبي عليش شي بس اول احلفي لي ماتتحاكى أبدا وعد وأمانه فوق ذمتش ...



سمر : غلقت الكتاب 📕 وطرحته من يدها .. مالش ماقد فعلتي من نثره كما هي عوايدش وبعدا والله ما اتحاكى تعرفيني ..



جنى: شليت رقم حبيبه أحمد وبتحكي لها مافعلت ...



سمر : 😡 بتصيح فوقها ..


جنى : حنقت وخرجت من عندها.


...............


أكرم : غلق مع سندس وإتصل لأحمد ... ألووو مالك ع جنات ..


أحمد : بيتحاكى بضبح 😤 عاد الناس اول تقل كيف أنت هذا دخلت مهري قد حملين يتصلين لك .



أكرم : يا أخي عتقلي مالك من الحكى من شق نخرك ..ليش رسلت للبنت هكذا ..



أحمد : أنا حررر مادخلكم مني .. تخلي أصحابها الي بيوحشوها ينفعوها صدقتها وحبيتها حسبت انها بتحبني صدق وإنها لعابه ...



أكرم : انصدم 😳 لعابه إيييش فهمني مابه ...


أحمد : يده ماسك رآسه يا أكرم قوى مش وقتك رآسي قد عيقرح وأوبه لنفسك شكل سندس عتطلع ساعها كلهن حق لعب وغلق ..


أكرم : ألووو يييه ... رجم التلفون للقاع 📱 ماهو لعابات مه ماله هذا ساع ابليس طبز وغلق في وشي هكذا ماشرقدش مابش معي إلا أتصل لسمر لامشهي فالمستشفى أسير لاعندها ..




🌹meme_abdalgaleel



@qesasanani

❤️
133


رهآم : سآمره هي وعآصم ويوسف ..


عآصم : يوسفي حبيبي عتقوم ترقد شرق عليك ..

يوسف : يابابا قوى خليني زيد شويه اتواله معاكم قدنا كل يوم رقده بحين ..


رهآم : إبسرته وضحكت هههه 😂 أنت يوميه بتمكنا هكذا من وعادك جاهل وماترقد إلا متأخر .


عآصم : ضحك ههههه 😂 أيووه تذكري لما كنتي تدخليه ترقديه وأدخل لاعندكم وقدش رآقده وهو بيلعب ..


يوسف : ضحك هههه هي ماما بتنوم بسرعه أنا مادخلني .. ذلحين لومعي أخ اني شخور ادخل أرقد نجلس نتجابر أنا وهو قد بينحسد جنات من حين جت سندس وهن بيجلسين جمعه ..


عآصم : إبسر رهآم وإبتسم 😊 قل لماما تدي لنا نونو وأنا قدنا أشتي أخ لك والكل ..


رهآم: غالطتهم 😁 فالموظوع ... يله يله رقده بسرعه غطوه مدرسه ...

............



سمر : بتحاكي أكرم فالتلفون 📱 هأه كرومي مع أنا فالبيت جي ..


أكرم: لبس بسرعه وسار لاعندها .



.........


سامي : مال البنات مايخرجين يسمرين عندنا مابيشبعنش جلسه وحدهن ...


مره سامي: 😃 بنات خليهن يتوالهين وحدهن ماتشتي منهن .


سيده : امانه قومي إدعيهن يجين عندنا ..


سامي: اوذا شاقووم أنا .. بيدقدق لهن باب الغرفه 🚪 ..


جنات : مسحت الدموع وبتهوي وشها بيدها ..


سندس: ماتشتيش تحسسه بشي بتتخيبل بوشها وتفعل حركات أهلا بسامي ماجاء بك عندنا 😁 .



سامي: طرح يده في وشها وهو بيدخل بيصافدها .. سامي ماعدبش عمو 👊🏻👊🏻 . إبسر عيون جنات مورمه ووشها أحمر قرب جلس في طرف السرير ... مال حبيبي من زعلش ..


جنات : إبتسمت كذب 😃 ولاشي بخير ..


سامي: قرب جنبها .. هيا مه احنا اصحاب من ايحين بتخبي عليا .. مالش ..


سندس : تشتي تغير الموظوع ماتشيش تحسسه بشي ..بكيت ع أبوها 😭 نفسها تعرفه.


جنات : لفتت لها .. أيووه أيووه نفسي أبسر بابا حتى من بعيد .


...........



في بيت الشيخ ...



جنى : سامره مع عبدالعزيز فالصاله بيتفرجوا التلفزيون وحسها مشو عندها سآرحه بتهم سمر لو تتحاكى ..


أكرم : دقدق الباب .. مسائكم حالي ساعي صح 😃 ..


جنى : إبسرته وقامت من فوق الكرسي .. إبتسمت أيووه حالي قووى يله عيس انك جيت اشتي أجابرك ..


عبدالعزيز : في يده الرموت بيقلب التلفزيون ..ضحك ههه 😂 سبحان الله كيف لكم سديين .



أكرم : نبع لافوق الكنبه وحط رجل فوق رجل ... 😁 قدلنا خيرات يله قومي عشيني ..


جنى : تمام .. يله وأنت قوم معي أحاكيك ..


سمر : سمعت صوت أكرم خرجت من غرفته تدوره .


عبدالعزيز : دخل هو وجنى يدوا لهم عشاء ..


سمر : 🤔 في نفسها الحق البنت هذه يعلم الله ماقد بتخطط .


@qesasanani

❤️
134


في بيت عبدالله

سامي : يعني هو هذا بس الي مزعلش 😔 كنتي عتقلي لي وأنا شاوريش حتى من بعيد ..

سندس : غمزت لجنات 😉 مصائب قوم عند قوم فوائد وضحكت ههههه ..


جنات : ضحكت وخفعتها بالدبدوب 😃.


سامي: مصيبه مه مافهمتش 😳.


جنات : ماعليك منها هذه مخرفه .. بس ذلحين صدق عتخليني أبسره .. بس أهم شي إنتبه ماما رهآم تعرل بشي ..


سآمي : أكييييد ولايهمش مشنا مجنون أقلها...وقرب حبها في رآسها 😘 يله قومي غسلي وشش واخرجين اسمرين عندنا ..



...........


في المطبخ ...


جنى : بتكسر البيض 🍳 ذلحين قلي أيحين عتعرفني ع حبيبتك وحبيبه أحمد ...


أكرم : مادريتيش ماوقع 😱 اليوم أحمد مدرى ماطبزه وقال ماعد يشتيهاش وتصايح معاها ..



جنى : فرحت في نفسها بس بتقلد زاعله 😔 يووه زعلتني حرام ليش ماتصالحهم ..


أكرم : قد حاولت اتصله بس الولد حانق وغلق التلفون 📱 في وشي .. وحط يده عرض الجدر .. ذلحين أمانه قليلي بطلتي تحبي أحمد الي ولا رضيتي تعبريني علشانه نسيتيه بسرعه هكذا كيف لوما ..



جنى : إرتبشت 😁 هآه .. أصلا أكتشفت اننتوا أخوتي الاثنين أحمد كان حبه زياده لأنحنا تربينا جمعه تهيألي انه حب بس صدق أنتوا الاثنيين أخوتي .. ذلحين هيا ابسر لي موعد مع سندس اتعرف عليها ..


أكرم : خلاص ولايهمش شاحاكيها وقدهو مع الطريق تتعرفي ع جنات وتحاكي أحمد تصالحيهم ..



سمر : دخلت المطبخ .. إبسرت جنى بضبح ويدها في خصرها ماقد معش 😤 ...


جنى : بفجيعه من سمر لاتتحاكى .. غالطت فالموظوع .. يووه حرق البيض 🍳 هيا جي افعلي بيض لأكرم جاوع ..



أكرم : أيووه هيا نفعلنا عشاء ونطلع لنا بطاطيس وجعاله ونطلع نسمر فالجباء 😁 ..


جنى : تشتي تفحط 🏃 يله أيوه أسير أدي جعاله من غرفتي..



سمر : بتفعل العشاء وتجابر أكرم .



أكرم : حكى لها ع أحمد والي حصل ..


سمر : فعلت نفسها مشي داريه ...خلاص أنا شتصله 📱وأتفاهم معه .




......

أحمد : ماقدرش يرقد طول الليل بيتذكر كلامه مع جنات وأول مره ابسرها وكل شويه بيعيد التسجيل يسمعه ماقدرش يستوعب إنها بتلعب عليه .. عصب رجم تلفونه لاعرض الجدر 📱 وكسره .


جنى وأكرم : طلعوا الجبا ..


سمر: عادها فالغرفه بتحاول تتصل لأحمد مغلق 📱.


@qesasanani

❤️
135



بعدها ب4 أيام ...



أكرم : في المطار هو وعبدالعزيز ✈بيستقبلوا المسافرين ..


أحمد: خاطي وحده ضابح 😤 من موظوع جنات وزيد متصايح مع جده لأنه يشتي يزوجه بجنى .



سلوى : بتخطى عربيه الشيخ ونجات جنبها ..


عبدالعزيز : استغرب لما ابسر أحمد اول مره مشو جنب جده .. بيسلم عليه وشاوره دلا .. مالك انت وأبي وشك مقلوب ..


أحمد : ضحك 😂.. ولاشي بس مع التعب ...



أكرم : بيسلم عليهم وقرب لاعند أحمد دكمه 👊🏻 في كتفه .. حمدلله ع السلامه يابياع ومغلق تلفونك ..


أحمد : حضنه وضحك 😃 مش وقت الهدار هانا عنتجابر فالبيت .




...............


سامي : بيتصل لجنات .. كيف انتي ..

جنات : كانت بتفعل الغداء 🍲 في المطبخ بتطلع قهرها في الطبخ ورفاع البيت ماتشتيش تحسس امها انها زاعله .. جاوبته .. الحمدلله هيا مه لقيت شي ..


سامي : أين امش فالمستشفى 🏥.


جنات : أيووه قد عيروحوا بعد شويه ..

سامي : يله تمام .. أمس دريت أين شركته خطيت بعده من بيتهم وسألت ع مواعيد العمل غطوه الصبح ياسعم شاجيلش اخرجش انتي وسندس أصبحكن ..


جنات : خلاص تمام .. بس اتصل أنت لماما ..


............


وصلوا بيت الشيخ ..


مريم وسمر وجنى: إستقبلنهم بالمحجره .

عيال مريم : بيقرحوا بالقريح .

الحراس والمرافقين بيضربوا رصاص وقد المبرع فالباب استقبلوهم ببرع جيين من عمره ..


المسافرين نزلوا من فوق السيارات 🚘 ..

الكل بيسلم عليهم ..


أحمد : سلم بسرعه وطلع بسرعه غرفته رجم شنطته وارتجم فوق السرير .



أكرم : لحقه فتح الباب🚪 ودخل جلس فوق السرير بيتنبع ..


أحمد : بيدهفه... أكرم 😡 قوم لوسمحت مشو وقت الخباله حقك ضابح من روحي .



النسوان نازل بيجهزين الغداء .


سمر : فلتتهن وطلعت لأحمد دقت الباب ودخلت ..


أكرم : إبسرها وابتسم وبيأشرلها بيده هيا جي جي كذا اداش الله جي سدي إنتي وابن أخوش وأن معي اتصال مهم وغمز 😉 .


أحمد : إبسره بربع عين 😏 أجلس ع خبالتك لما ترجع تبيعك .



سمر : ذلحين عتقلي مالك صدق الي قلي أكرم ..


أحمد : تنهد بحرقه .. ياسمر طلعت بتلعب وتحاكى شباب وانا الأخبل الي تصايحت مع جدي إشتي اخطبها ..


سمر : تشتي تفهمه بس بدون ماتقل إنها جنى وراء الموظوع ...طيب وكيف دريت ...إبسرتها أنت بعينك ..


أحمد : سمعتها يا سمر .. قد كسرت تلفوني 📱ولا شاسمعش ..


سمر : ومن ادالك التسجيل ..

أحمد : رقم رسلي انها حق شباب وانه بتحاكي واحد هذك الوقت اتصلت وتلفونها مشغول بعدها بشويه وصلني من نفس الرقم تسجيل بصوتها ...


سمر : خفعته في رجله 😁 لأنك غبي .. أصلا باينه انها لعبه أحد يفرق بينكم مادرى الي رسلك إنها بتحاكي واحد هذك الساع قلك تتصل تتأكد وكيف وصله التسجيل لأن جنات ماعتديه له إلا لو كان من الطرف الثاني ..



أحمد : طنن في كلامها 🤔 شويه .. لكن صوتها وبتقله وحشتني وهو بيقلها كلام حب ..


سمر : شنزل أقرب الغداء معاهن وأنت قلبها في رآسك وفكر في البنت صح إبتسمت ونزلت 😀.



........

أكرم : بيحاكى سندس فالتلفون 📱.. خلاص مثل ماسدينا ذلحين تعرفي ع بنت خالي غطوه في المطعم الي قلتلش وشلي جنات معش وبعدا عنبسر كيف نصالحهم علشان نخلي امي تجي تتعرف عليكن الثنتين هي وخالتي ...




أحمد : طول الليل مارقدتش بيفكر في كلام سمر 🤔 .


جنات : بدون نوم مراعيه للصبح يجي تبسر عبدالعزيز 😀.



تقولوا ايش عيحصل 😜



@qesasanani

❤️
136



ثاني يوم الصبح ...


سامي : بيطرق باب بيت عآصم لجنات تخرج ..


جنات : كانت فارحه 😃 لبست بسرعه وخرجت ع خرجتها دخلت لاعند رهآم حبتها 😘 .. ادعي لي ياماما ..


رهآم : بتلبس عتسير المستشفى 🏥ضحكت عليها ههههه إييش هذه الفرحه كلها لو أنا داريه ان الصبوح خارج عيفرحش هكذا إن قد صبحتش ..


جنات : بتحرك عيونها ..بمزح ماصبوح سآع صبوح رجمت لها بوسه فالهواء وخرجت 😘 .


..............


بيت الشيخ ....


جنى : رآقده طول الليل سامرين مع المسافرين ..


أحمد : نزل الصاله ماقدرش يرقد بيشرب بن 🍺 ..



الشيخ : نزلته نجات ونزلوا يصتبحوا إبسر أحمد ولا حاكاه .

أحمد : قام حبه فوق رآسه 😘 صباح الخير كيف انت .


الشيخ : لاقد عقلت فاأنا بخير وإن عادك ع رآيك لاتصبحش عليا .


أحمد : سكت وجلس فوق الكنبه .

سلوى : بتقرب الصبوح وتدعيهم كلهم ..


سمر : لبست وعتسير المستشفى ... يله خاطركم ادعوا لي .


نجات : جي يابنتي اصتبحي لاتسيريش بغير أكال ..


سمر : شاصتبح فالمستشفى قد تأخرت 🏥 .


عبدالعزيز: نزل مبدل مارضيش حتى يصتبح يسير الشركه ..



...........



باب الشركه ...

سامي : فوق السياره 🚘 مجنب هو وجنات ..


جنات : قلبها ❤ بيدق بسرعه بتحس النبضات في كل مكان في جسمها ..



عبدالعزيز : وصل بسيارته 🚘 وقف وبيفتح الباب ينزل ..


سامي : إبسره .. أشر لجنات .. هيا إبسري الي عينزل من فوق السياره 👦🏻 أبوش الي لابس بدله كحلي .


جنات : متوتره ..بتسحب اللثمه وتفتح عيونها 😳 خرجت وشها من الطاقه ماسكه يدها بقوه في ممسكك السياره ... بتتلفت يمين وشمال تدوره ... إبسرته قدامها بلمت ..


عبدالعزيز : وهو بيغلق السياره نكعين عليه الدواير 🔑 وطي يشلهن ..


جنات : حطت يدها ع قلبها ❤ قلبي بينحسه عيخرج ونزلت دموعها 😭 يعني هذا بابا .. ليش سخى يفلت ماما .. حرام الي فعله جدي حرمني من أبي وبسببه حرم أختي من أمي إيش ذنبنا نعيش هكذا بسببه وبتبكي 😭..


سامي : بيهديها .. قوى جنات بس لاتخلينيش أحس بالذنب وأندم إني وريتش أمش عتبسر وشش وتقلي انت خرجتها تصبحها ولا تبكيها 😭 ..



...........


في المستشفى ..


سمر : بتدور ممرضه تنزل تشتري لها صبوح .. لقيت واحده مكنتها زلط تنزل تدي لها بسكوت وعصير ..

الممرضه : البوفيه مغلقه يادكتوره.


نزآر : ابسرهن دري انها بدون صبوح ..نزل من نفسه لاخارج المستشفى إشترى لها سندوتشات وعصير وطلع .. هآه دكتوره اتفضلي وناولها الكيس .


سمر : بإستغراب ... إيش هذا ؟؟!.


نزار : بيضحك 😃 ناهي مش وقت التعزاز أنا داري انش بغير صبوح شليه ..


سمر : شاشله لأني جاوعه .. بس بشرط تقلي بكم .


نزار : إبتسم 😃 مشتيش زلط ادي رقمش أمس الليل دورناه كان به حاله وأشتي استشيرش فيها ..


سمر : هآه 😳 رقمي ..


نزار: خرج تلفونه 📱 يله كم الرقم مليني ...😃



🌹meme_abdalgaleel


@qesasanani

❤️
137



بعد العصر ....


سندس : بتتصل لجنات .. هيا قدش جاهزه نسير ..

جنات : راقده من حين وصلت .. مقهوره بعد ما أبسرت أبوها 😔 .. والله ماشقدر أجي معش سيري أنتي بس وبعدا ماعادبش داعي لجيتي ليش تتعرف عليا وقدنا خلاص أنا وأحمد .


سندس : بتتراشاها .. هيا قووى جناتي ... ماعترضاش جدتي سيده تخليني أخرج وحدي .


جنات : إتصلي لأي واحده من البنات تخرج معش ماقدرت ضابحه راقده من حين روحت ..


............

عآصم : مالها جنات اليوم مااتغدتش معانا ..


يوسف : بحنق 😰 شاااابعه .. قد صبحها خالو سامي فالسووق وأنا إبن البطه السوداء ..


رهآم : ضحكت 😂 ههههه أصلا لو يشلك يشتي يشل العيال قال يخرج البنات يغيرين جو ..



...................


جنى : دخلت لاعند عبدالعزيز .. بابا شخرج أنا وأكرم السوق عيوصلني ..


عبدالعزيز : بيبدل عينزل يخزن عيجوا يسلموا ع الشيخ وأحمد .. خلي السواق يشلش ياروحي علشان أكرم يخزن معانا وبعدا عيجين النسوان اليوم يبسرين جدتش وعمتش سلوى اخرجي السوق غطوه ..


جنى : بدلع 😍 هيا يابابا قووى ياروحي أصلا عيجين عجايز مجلس أفعل عندهن وبعدا سموره فالمستشفى يعني شضبح وحدي .


عبدالعزيز : تحيلا لها ... أنتي داريه انش دلوعه ساع أمش الله يخليش لي ياروحي يله سيري 😃😃
.


............


أحمد : بيبدل ..

أكرم : ممدد فوق سرير أحمد وطارح رجل فوق رجل وبيهز رجله ... سير أحلق الدقنه أول 🎅 ياداعشي .


أحمد : إبسره وضحك 😂 حر ماعليك .. يله قووم بدل شرق ننزل نخزن ..


أكرم : خزنوا لروحكم ياقلبي مانا معي موعد مع المزه 😍 .

أحمد : تنهد ذكر جنات .. أكرم ممكن طلب ؟..


أكرم : سنب وسار لجنبه بيصافده .. من عيوني ياعيوني 😍 اطلب روحي بس تحلق الدقنه وشعفل شعر أحمد ...


أحمد : بيضحك 😂 ههههه بس امانه رزي وبيتصافدوا .. هيا خليني أقلك أمانه ...


أكرم : ارتزح عرض الجدر وربع ايديه .. يله قلي ماتشتي ..



أحمد : أمس سمر قالت لي .. وبيحكي له .. أمانه إسأل سندس وافهم منها الموظوع سوى خايف أكون ظلمت جنات وخسرتها ...


أكرم : 😃 دكمه في كتفه هكذا تعجبني ..


..................



سندس : لبست وتجهزت .. بتتمرى .. 😊 مربوشه .. أووف شوعه هذه الطرحه ألبس بدلها وكل شويه بتغير طرحات ..رجعت تتصل لجنات .. جناتي هيا غيري رأيش وجي مادريتش ما البس من طرحه كلهن شوعات ..


جنات : البسي الطرحه الخضراء الي فيها وردات بيضاء بتطلع فوقش تجنن ..


............

جنى : كملت تتجهز واتصلت لأكرم قدهي مراعيه نازل فالحوش .

أكرم : أخرج وشغل السياره 🚘 وخطيوا ..


سندس : جت لها صاحبتها وقدهن في المطعم مراعيات ..



أكرم : وصل المطعم واتصلها 📱 هاه حبيبي قد وصلتي .


سندس : أيوووه قدحنا دآخل .

أكرم : دخل هو وجنى بيتلفت يمين وشمال بيدورهن إبسرهن .. ابتسم .. هن الي جالسات فوق هذك الطاوله يله سيري لاعندهن وأنا شجلس هانا .


جنى : قلبها بيحرق ❤ بتأكل في نفسها تشتي تبسر جنات لفتت وهن مقفيات خطيت لاعندهن بخطوات متسارعه مستعجله تتعرف عليهن ..



أكرم : إبسر سندس إبتسم لها 😊
وأشر لها ..


جنى : قربت لاعندهن .. أنتين جنات وسندس ... أنا جنى بنت خال أكرم .


سندس : إبسرتها وبلمت 😳 سنبت طننت في وشها ..

جنى : إبتسمت 😁 بلئم مالش مبلوده أنتي سندس ولاجنات ..


سندس: قلبها بيدق قووى ❤ عجمت ماعاد قدرت تتكلم .. بتفكر في عقلها 🤔 يا الله كيفهن نسخه يعني هذه جنى بنت عمتى ويعني أكرم ابن عمه جنات وأحمد هو يقرب له يعني ايش .. أحمد ايش يقرب لها ممكن يكون أخوها ولا ابن عمتها ولا ماهو حست بدوخه في رآسها والدنيا بتلف بها ..سومت كانت عتدرب مسكت بالماسه ..


جنى : بتتليقن عليها ... مالش عجمتي أنا بشر مشنا جني 👹 .



سندس : شلت شنطتها 👜 وخطيت ..

صاحبه سندس : لحقتها بتداعيها .


جنى : مستغربه من تصرفها ..


أكرم : إبسرهن من بعيد إستغرب مالها سندس 🤔 حمل بعدها يفهم ماحصل بيداعيها ..


سندس : بتبكي 😭 وهي بتخطي مارضيتش تجاوب ..



أكرم: حمل لاعند جنى يفم ماحصل .


جنى: مدرى أول ما ابسرتني إبسرت عفريت مادريتش منهي الي هربت سندس ولاجنات .


أكرم : سندس أصلا جنات مابحد ماجتش معاها ...




@qesasanani

❤️
138



سندس : وقفت تاكسي 🚖 وطلعت هي وصاحبتها وهي بتبكي 😭 .


صاحبتها : بتحاول تهديها وتفهم ماحصل ليش فعلت هكذا ..


سندس : بتتصل لجنات وهي بتبكي 😭. تجي بسرعه لابيت صاحبتهن تشتيها ضروري وماتشتيش أحد في البيت يدرى ماحصل ..


جنات : قلقت عليها 😱 قامت تلبس وخرجت تستأذن من رهام وسارت ..


..............


في بيت الشيخ ...


الرجال : ملان الملحق مخزنين بيسلموا ع الشيخ وأحمد ..


أحمد : جالس معاهم بس حسه في وادي ثاني .. خرج تلفونه 📱 يتصل لأكرم يبسر سأل سندس ع جنات ..


أكرم : بيسوق السياره🚙 معصب .. ياجنى قليلي لوسمحتي ماحصل ماقلتي لها 😡 ..



جنى : بتنفخ 😤 أوووف منك قلتلك ماقد حاكيتهاش إبسرتني وكأنها ابسرت عفريت سعم ماقصدك .. حنقت منه ولفت وشها للطاقه ...



تلفون 📱 أكرم بيرن ..


أكرم : خرجه يمكن لوهي سندس لأنه كان يتصلها وتكنسل .. جاوب وانه أحمد ..


أحمد : بيحاكيه بصوت واطي .. ويحانك 😜.. وريحهم هيا لاتشدفك المزه حقك وتنسى ماتسألها ع جنات ..


أكرم : بصوت مقهور ... مزه مه قد خربت الدنيا قدنا مروح وشاقلك ماحصل 😔.



أحمد : غلق وطنن شويه 🤔 معقوله لما حسين انحنا نشتيهن صدق لعبين علينا ..


عبدالعزيز : إبسره مطنن كان جالس قدامه خفعه بعودي قات 🌿 ييييه يا مطنن ..


أحمد : إبسره وإبتسم 😊.

عبدالعزيز : اشر له بيده .. هيا جي جنبي معي لك مجبر ..



................



جنات : وصلت بيت صاحبتهن دخلت وسندس بتبكي 😭 بتسأل صاحبتهن .. مالها .. ماعجبتش أهل أكرم ولا ماحصل ..


صاحبتهن : مدرى البنت جت لاعندنا وسندس اول ما ابسرتها بكيت وشلت شنطتها 👜وخرجت .


جنات : قربت حضنت سندس ماحصل قليلي ..


سندس : حضنتها بقوه وقرحت بكاء😭 ..

صاحبتهن : خرجت يتحاكين براحتهن .

................


عبدالعزيز : طرح يده فوق رجل أحمد ...ذلحين عتقلي مالك أنت وجدك ..


أحمد : مابش شي ياخالو ..


عبدالعزيز : قد حاكتني أمك الصبح .. انك تشتي واحده وانك بتعتبر جنى أختك وبعدا إطمن ولو جنى بنتي أنا ماشكسرش قلبك جنى عادهي صغيره وعتكبر وتلقى نصيبها وأنا معك قلي بنت منهي نسير نخطبها .


أحمد : إبتسم له وحبه في رآسه 😘 تسلم لي يا أحلى خال بس معي موظوع صغير أكمله ولاقدنا حق خطوبه من معي غيرك وجنى لاتقلقش عليها قدحنا أصحاب وهي في نفسها تشتي تتعرف عليها ..


عبدالعزيز : إستغرب 😳 جنى من أيحين ..


أحمد : قبل ما اسافر أنا وأكرم حاكيناها هي وسمر ..


عبدالعزيز : ومادخل أكرم .. لاتقليش قد جنى اقتنعت به .



أحمد : ضحك هههه 😂 هذه المجنونه يعلم الله بمن عترجع تقتنع .. هذا أكرم يشتي واحده والكل واليوم شل جنى تتعرف عليها ..


عبدالعزيز : طرح يده فوق المدكى 😁 وأنا قد بينقل كيف لهم قدهم أصحاب وخرجات جمعه .



..............

في بيت صاحبتهن ...



جنات : ذلحين عتقلي لي مالش او أتصل لأكرم أنا أفهم مابه .



سندس يدها بترتعش 👋🏻 اتحاكت بصعوبه الكلام بيخرج منها ببط ... جنى طلعت جنى البنت هي جنى ..



جنات : مسكت يدها .. ييه مالش اذكري الله بنت مه وجنى من .


سندس : بتأتى ... ب ب ب بنت خال أكرم ..


جنات : مركزه معاها 😳 أيوه مالها بنت خاله مافعلت بش ليش هربتي لما ابسرتيها ..


سندس : وهي بتبكي جنى ... جنى .. جنى هي ساعش والله انهي انتي تشبهش 😭

جنات : حمر وشها وحست جسمها كله بيدخن ..😤 قصدش جنى اختي .. قصدش اكرم ابن عمتي واحمد ايييش منهو وبدائت تبكي جنب سندس 😭 .



سندس : ماعد دريتش هو ماهو مذكرش اكرم ما كان يقل بس اعتقد انه ابن خاله لانه بيت أحمد هو بيت جد أكرم أبو أمه ..



جنات : صآحت ... 😱 يعني كنت بينحب أخي ودوخت ..



مسكينه ياجنات من صدمه لا صدمه 😔.




@qesasanani

❤️
139



سمر : كملت مناوبتها وروحت وصلت ترقد ..


سلوى : دخلت تقيمها .. يا أختى مش وقت الرقده قومي قد النسوان بيسألين عليش أنتي وجنى ماهو هذا العمر الي معاكن ع قد بنات ..


سمر : ممدده فوق السرير ... وليش جنى ماتنزل ..


سلوى : علمي علمش مامعاها .. خرجت هي وأكرم ...


سمر : بهررت عيونها 😳وقامت تدور تلفونها 📱 تتصل تبسر اينهم لاعد تفعل شي .. لقيت رساله مكتوب فيها .. هذا رقمي نزار .. بس ع فكره اشتي اسمع صوتش فالتلفون هو حالي ساع الطبيعه وغمزه 😉 .. إبتسمت .


سلوى : هيا شرق مش وقت الشخاره 😃 بدلي وأخرجي .



سلوى : ع خرجتها من غرفه سمر .. ابسرت جنى داخليه دعتها .. هيا ادخلي لاعند سمر عادهي عتتصلش وبدلي بساعتكن وجين النسوان بيسألين عليكن ..



...............



أكرم : أشر لأحمد من باب الديوان يخرج ..


أحمد : قام لاعنده وخرجوا الحوش بيتجابروا ... ذلحين عتفهمني .. ماحصل ..


أكرم : بيحكي له ..


أحمد : 🤔 أمممم معتقدش انه بدون سبب بس مدام جنى كانت واقفه معاها يمكن قالت لها شي يزعلها تعرف جنى كيفهي دلوعه ومغروره يمكن جرحتها بشي.


أكرم : وأنا قد قلت هكذا خرج تلفونه 📱 يتصلها ..



...............


في بيت صاحبتهن ...


بعد مافاقت جنات .. جالسه بتبكي وبتفكر كيف تتأكد انه احمد اخوها او لا خرجت تلفونها تتصل لأكرم 📱. في نفس اللحظه رن تلفون سندس ..


سندس : هذا أكرم بيتصل ..

جنات : هزرت التلفون 📱 من يدها تحاكيه ... بصوت مقهور ألووو أكرم قلي أحمد ايش يقرب لك بالظبط ..



أكرم : من معي سندس ولا جنات.


جنات : جنات جنات .. بس أول قلي أحمد ايش يقرب لك بالظبط .


أكرم : بيأشر لأحمد انها جنات .. فتح السبيكر .. اول مالها سندس ايش حصل بنت خالي زعلتها بشي.



جنات : محد زعلها .. اول جاوبني قوى وبكيت 😭 أحمد ايش يقرب لجنى بنت خالك أخوها ولا مع .


أحمد : سمع صوتها وتنهد بحرقه .... بس مستغرب ايش دخل جنى وليش جنات بتسأل ومنين تعرف جنى ارتبش بيأشر لأكرم يفهم منها .


أكرم : منين تعرفي جنى ومادخل أحمد فالموظوع وليش سندس روحت بتبكي 😭 .


جنات : صيحت .😡. اوووف منك أول جاوبني لاتحرقش قلبي .



أحمد : ماعد قدرش يصبر سحب التلفون من أكرم ... جنى بنت خالي ياجنات مشهي اختي بس ليش بتسألي مافعلت جنى ..



جنات : سمعت أحمد وارتبشت .. قلبها دق ❤ . وفرحت 😃 يعني مشنت انت أخوها احلف .



أحمد : رفع صوته .. جنات ايييش في ؟؟ مافعلت جنى منين تعرفيها وبعدا لحضه فهميني منهو الي اتصلش وايش موظوع الشباب وليش بتلعبي عليا ..



جنات : ذكرت 🤔انهم متزاعلين .. وفي نفس الوقت ذلحين طلع ابن عمتها يعني حبهم مكتوب عليه بالفشل ... ردت عليه ودموعها بتنزل ... 😭 أول شي أنا شارد عليك لسبب واحد لأني مشنا لعابه ولا حق شباب ولا كذبت عليك ولو كنت مريض وشكاك هذه مشكلتك أم انت بالنسبه لي خلاص انتهيت وبكيت 😭.



أحمد : طيب لحضه وأنا شاقلك هذك اليوم اتصلتش وتلفونش مشغول وصلتني رساله ... بيحكي لها ..


جنات : وانا اتصلي واحد وبتحكيله .....


أحمد : خفع رآسه بيده .. اووف يعني أحد لعب بنا مثل ماقالت سمر ... آسف سامحيني ..



جنات : تشتي تسامحه .. ردت عليه وقلبها بيتقطع 💔 خلاص انساني ومن اليوم انت ماضي وغلقت التلفون ورجعت تبكي 😭 .




اكرم : شل التلفون 📱 وبيحطم فوق أحمد ... غلقتوا ومادريتش مالها سندس بيتصلها وتلفونها مغلق اتصل لجنات كنسلت وغلقته .





.................


جنى : حكت لسمر ماحصل في المطعم .


سمر : استغربت 😳يعني هكذا بدون سبب . قلي الصدق



جنى : بتحلف لها انها مافعلت شي وتتأكد من أكرم كله قدامه .



سمر: خلاص قومي نبدل والعشي عنتجابر نطلع الجباء احنا والعيال بس والله لو ادرى ان لش دخل هذه المره ياويلش





🌹meme_abdalgaleel


@qesasanani

❤️
140



بعد شهر ....

نزار : بيتحاكى فالتلفون 📱قد ابسرت المشرف وخليته يغير كل أوقات مناوبتش معي ..



سمر : بتضحك عليه هههه 😂 مجنون مش ع أساس غبني ع من عيودف بي وأنا المغروره الزناطه كيف لوما ماعد تشتيش تفلتني حتى فالمناوبه ..


نزآز: هههه مفعل مشو أنا هو هذا الأخبل الي إسمه نزآر مدرى كيف لوماتعلق بش هكذا وحبش قووى 😍 أما أنا عادنا بينبسرش زناطه ومغروره ...


سمر : سعم حنقت .. والله 😔 هكذا خلاص حذ شاقل للمشرف مشتيش يغير اوقاتي ..


نزار : هههه جبر الحانقه حقي وعتسخى عليا .. وبعدا المفروض هذه الأيام تدلعيني حين أبي وأمي مسافرين ..


سمر : يووه صدق أيحين قد عيجوا .. عاد عبدالعزيز أمس بيسألني قلي ليش أهلك مازد جوش بعد ماتعرف عليك ..قلتله هم مسافرين أبوك تعب شويه سار يفعل فحوصات.


نزآر: إن شاء الله بعد إسبوع قد عيجوا وعبدالعزيز أنا شامر له للشركه علشان لايقلش دعممت والله إني متجمل منه قووى انه واقف جنبنا وانه اقنع عمي يوافق بعد ماكان رافض تنخطبي بواحد تعرفيه ...



سمر : الله يخليه لي .. والله اني بينحسه صاحبنا مش أخي بيفهمني أنا وجنى حتى العيال أصحاب معاهم لوتبسر يوميه كيف بيدحس أحمد يسير معه يخطبوا البنت الي يشتي ..


نزآر : إستغرب 😳ليش او ماقد تصالحش معاها قد تصايحنا أنا وأنتي ألف مره وتصالحنا ...


سمر : ضحكت 😂ههههه علشان تعرف انني طيبه بس وتعرف قيمتس إبسر حبيبه أحمد تلفونها مغلف من بعد ماتصايح معاها وزيد هذك المجنونه سندس محد داري ماحصل ولابتجاوب أكرم فعلت له حظر قد عيجننوا مساكين .


...............



رهآم : دخلت لاعند جنات .. هيا مالش ماقد تجهزتيش نسير العرس ..


جنات : ضابحه 😤 من روحها .. مشتيش أخرج وصلوني معاكم عند سندس ..

رهآم : مالش أنتي وسندس هذه الفتره مشنتين معجبات لي لا أكل وتحت عيونش حارق وكودش فالغرفه وسندس قد أمي بتشكي لي منها كودها مغلقه ع نفسها وتبكي 😭 ..



جنات : حضنت رهآم وبكيت .. 😭 ولا به شي تاعبه بس مخنوقه .


رهآم : قلقه ع بنتها ..من يوم ماخرجش سامي تصتبحي مازد عجبتينيش ماحصل مابه 😰 .



جنات : ماتشتيش تقلها من موظوع أحمد .. ذكرت موظوع أبوها ... ماما لو أقلش إحلفي ماتصيحي هذك اليوم إحنا ماخرجناش نصتبح هو شلني وابسرت بابا من بعيد وأنا ضابحه زعلت من بعد ما إبسرته .



رهآم : زعلت منها 😔 طيب وليش مخبيين عليا يعني أنا شمنعش من بسره أبوش أنا كل خوفي لو يدروا بش وتحصل لنا مشاكل ..


جنات : حبتها في خدها 😘
أنا أسفه مدرى كيف فعلت هكذا .. يله هيا قومي اصلح شعرش تسيري وانتي تجنني يحسدوني عليش ..



................

سندس : بتقلب في تلفونها 📱 بتقرى رسايل أكرم بتتذكر وتبكي😭 .


...............
في بيت الشيخ ...


أحمد : ممدد فوق الكنبه في يده التلفون بيتصل برقم جنات 📱 .. مغلق .. ضب😤 ح و طرح التلفون رجم..


سمر : ع خرجتها من الغرفه إبسرته حاكته .... هيا مه جالسه مغلقه له 🙁 .


أحمد : وشه مقهور وزاعل😔 أيووه الله يشلني الي شكيت فيها وزعلتها .


سمر : خلاص قد حصل .. طيب سندس جالسه مابتجاوبش ..


أحمد : أيووه لاعليا ولاع أكرم قد جربنا نتصل بأرقام ثانيه ولابترد .. قدنا قلق عليها قووى 😔 .


سمر : طيب قلي انت تعرف بيتهم أو مع ..


أحمد : بإستغراب 😳 أيوووه ليش لاتقليش أسير من الجنان .



سمر : مع وصلني وشاسير لاعندها أنا أتوسط لك وقدك هذك المدبر وغمزت له 😉 ..



أحمد : فرح 😃 وقرب يحبها أييييوووه هكذا العمات ولا بلاش 😘.



جنى : ع نزلتها من الدرج إبسرتهم إبتسمت 😁 هيا ماقد معاكم ..


أحمد : عادهو يشتي يقلها ...


سمر : غمزت له 😉 قلتله اليوم شعزمكم عشاء ويتصل لأكرم .



@qesasanani

🥀
🥀
141



بعدها بيومين ....


عبدالعزيز : طيب وأكرم ليش مايحاكيني ولا عيسير أبوه .🤔.


أحمد : ضحك هههه 😂 هو قد وكلني أقلك تحاكي أبوه ماقد صديش يحاكيه قد حاكى عمتي وموافقه قالت تشتي بس تعرفها .

عبدالعزيز : يعني ماعد معانا إلا نقنع جدك هيا نطلع لاعنده مش نسير نفاتح عند الناس وجدك رافض ..


أحمد : أنت اطلع حاكيه وأنا شطلع لاعند جنى تنزل تقله إنها بتعتبرني أخوها يدرى انه عيكسر قلوبنا الاثنيين 💔 ..


..............

في بيت عبدالله ..

سامي : روح من عمله متأخر بعد العصر .. وصل بيداعي مرته تدي له غداء ..


جنات : جاوبته .. أهلا اوذا شاقرب لك مابحد خرجت هي وماما سيده عند الولاد ..

سامي : وأنتي هانا 😃 هيا مدام مابحدهن ادعي سندس و يوسف والعيال وجوا نخرج وشتغدا خارج يله طحسين القات عليا هههه ..


...............


في بيت الشيخ ....




عبدالعزيز : طلع هو وسلوى يحاكوا الشيخ ..

الشيخ ناصر : أنا قلت ماشي يعني ماشي خلاص قفلوا هذا الموظوع جنى لأحمد ومابش معي كلام غيره وأنتوا أحرار ..


سلوى : يا أبه حرام عليك تكسر قلب أحمد 💔 طول عمرك بتدلعه وتدي له الي يشتي بدون مايطلب ولاهذا الموظوع عتقهره طول عمره ..


الشيخ : قزز بحواجبه .. 😡 يعني ماتشتوا أكسر قلب جنى .


عبدالعزيز : يا أبه جنى هي في نفسها سارت تتعرف ع البنت ماعتكسر قلوبهم إلا لو زوجتهم 💔 .


الشيخ : مشنا راضي وأنتوا أخبر .


.............


أحمد : بيدقدق باب 🚪الغرفه ع جنى .


جنى : كانت بتتحمم ماسمعتش 🚿 الباب ..

.............


العشي ...



رهآم : روحت من العرس مصلحه وأخر حلاوه 👩🏼..

عآصم : بيتحيلا لها 😃 .. الله محلا القمر حقي تجنني اليوم .

رهآم : ضحكت بخزا 😊 عآصم بس ..

عآصم : يوووه جبرني بالي تخزا 😊

وقبصها في خدودها ..


يوسف : جاء يدقدق الباب يشتي عشاء 🚪 ..


عآصم : فتح الباب ومسكه بيده 😃 اليوم أمك عروسه خلي جنات تعشيك .

يوسف : ضبح اووف 😤 بتتجابر هي وسندس راقده عندها شاسير افعلي بيض لنفسي 🍳 .



عآصم ورهام : ضحكوا عليه ههه😂 ..



@qesasanani

🥀
🥀
142



بعدها بيومين ....


أحمد : بيتصل لأكرم .. هيا أين أنت ماقد جيتش ..

أكرم : في الطريق قدنا جيي بس تقل ماعيفعل جدي لو يدرى .

أحمد : بقهر 😔 اسهل خلي اليوم نشل سمر تتوسط لنا وتبسر مالهن ولما قدحنا سديين عنقنع جدي سوى ...


...........


في بيت عآصم ..


رهآم : اليوم ماسارتش المستشفى 🏥 رفعت البيت هي والبنات .. يله ياقمارى جهزين لنا جلسه حاليه أدخل أبدل .


سندس : تشتي تغير جو الزعل الي هن فيه .. أيووووه ياعمه ونفتح لنا أغاني ..

يوسف : وأنا أخرج أشتري لكن كيك وحلويات يله إحمدين الله عليا.


جنات : وأنا شدخل افعل نار أبخر وأفعل شاهي حليب اسبقيني بدلي ياسندس وأنا شلحق .


..............


سيده : بتحاكى مره سامي .. هيا جي نسير عند رهآم قد إتصلت لي قالت نجي عندها نتواله ..


مره سامي : يله هيه .. أقووم ألبس وأبدل للجهال ونخطي .

سيده : يله تمام انجري نخلي سامي يخطينا معه قبل مايخرج .

...........


في بيت الشيخ ...


أكرم : وصل فالحوش فوق السياره بيطرق لأحمد 🚘 يخرج .


أحمد : فارح مبسوط ان سمر عتسير 😃. دخل لاعند سمر .. هيا سمورتي قد أكرم جاء بيطرق .

سمر : إبسرته وإبتسمت له 😊جبر المستعجل قد عيطير ...يله البس البالطوه بساعتي أمد ماتخرج لاعنده.

أحمد : ضحك هههه 😂 قد قلبي عيطير قلبي ❤ هيا اقطبي .


جنى : ضبحت وحدها نزلت تجلس عند سمر .. دخلت ابسرتهم إستغربت 😳 يوووه أين عتسيروا من ورايا ..


سمر : إرتبشت ماتشتيش تقلها لأنها داريه انها عتخربها عليهم .. هآه أين عنسير 😳 .


أحمد : بحسن نيه رآكن إن جنى صدق بتعتبره أخ وانها تشتي تساعده بفرحه أشلها تتعرف ع جنات جالسه حانقه مني تسير تتوسط لي أصالحها هيا احملي البسي بسرعه وجي معانا وغمز لها 😉 .


جنى : حمر وشها وضبحت 😤 قحصت أظافيرها .. وإبسرت سمر وبتمط صوتها .. هآآآآه عتسيري من ورايا ..


أكرم : بيتصل لأحمد 📱 هيا شرق .

أحمد : يله الآن .. وأشر للبنات يله الحقين بسرعه وخرج ..


جنى : قربت لاعند سمر وبكيت 😭 حرآم عليش لاتسيريش والله لأموت لو أحمد يشل غيري .


سمر : حظنتها وبتهديها .. لاتبكيش بس أين أحسن تقتنعي منه من ذلحين وتعتبريه أخ ولا تتزوجي به ويرجع يفلتش ويكتسر قلبش ابسرتي أبوش كيف ماقدرتش يعيش مع هناء بعد أمش مع انه كان يحبها من زمان .


جنى : رآعي لي .. شطلع البس بسرعه أشتي أبسر كيف هي هذا البنت الي جننت أحمد وشلت قلبه ❤ وإطمني ماشفعل شي ابسرها بس .



............

في بيت عآصم ..

سيده : مخزنه هي ومره سامي .

رهآم : في يدها قلص شاهي بتشرب ..


سندس وجنات : بيرقصين ويجننين قدلهن خيرات بكاء وزعل 💃🏼..




باب البيت بيدقدق 🚪 .


رهآم : بتداعي يوسف يفتح الباب.



يوسف : سار يفتحه 😃 .





مهما لفت بنا الدنيا لابد من لحظه لقاء ومهما اختفت حقائق لابدلها من يوم تنكشف فعلا دنيا صغيره 😃



🌹meme_abdalgaleel


@qesasanani

🥀
🥀
143



فوق السياره 🚘 ...

أحمد : مرتبك ..بيهز أرجله ويقرح أصابيعه ..

أكرم : بيضحك عليه 😂 ههههه .. أمانه بتحسسني كأن مرتك في غرفه الولاده ..


أحمد : دكمه .. 👊🏻 قر من اللقانه المفروض إنك قلق ساعي لأنها لارضيت جنات تصالحني عتصالحك سندس .

أكرم : أقسم بالله إنها ودافه أحد يحب قريبات لو شي إني مفتهن وسالي .. هذا انتوا تتصايحوا والحنق فوقي ...


............


في بيت الشيخ ...


نجات : بتداعي سلوى .. ييه أمانه يابنتي اتصلي لمريم تدي لي رقم الدكتور الي قالت أمس أبوش مارقدتش طول الليل ..


سلوى : يا أمه شكلنا زعلناه 😔 لما حاكيناه ع موظوع أحمد .


نجات : يابنتي مشنا دآريه ماله هكذا مزرجن قد فرحنا إنه عيتغير وانه رجع مثل ماكان .


سلوى : انتي دآريه ضروري أحمد يزيد يحاكيه .. إن شاء الله يقتنع إبسرتي كيف جلس رافض موظوع سمر ونزآر وبعدا وافق .


نجات : ذكرتيني صدق .. مدري مالهم أهله مازد جوش بعد ماوافق أبوش ..

سلوى : قالت لي سمر انه وقع معاهم مرض سافروا قد عيجوا هذا الإسبوع ويجوا يحددوا موظوع الخطوبه 💍 .


نجات : رفعت يدها .. ربي يسعدهم ويوفقهم والله مانا مصدقه إني قد شازوج هذه المجنونه 😃 .


سلوى : ولا قدنا مصدقه إن أحمد الجاهل قد بيدحس يشتي يخطب .. تنهدت .. آح الله يرحمك ريت والله وزيد إبسر ابنه رجال 😔..


................
في بيت عآصم ..

يوسف : بيفتح الباب 🚪.

جنى : يووه نسيت تلفوني فالسياره ادخلي امد ما أديه وشلحقش بسرعه 📱.


يوسف : من أنتي ؟.

سمر : مرتبكه وخازيه 😊 جنات هانا .

يوسف : أيوه .. دأخل من أقلها ..

سمر : صاحبتها من الجامعه . ادعيها لي .

يوسف : طيب إدخلي الديوان ودخلها .. لحظه شدعيها لش .. وحمل لاعندهن .. ياجنات جاوبي صاحبتش من الجامعه قد دخلتها الديوان ..

جنات : إستغربت 😳 صآحبتي .. ماقالتش بسمها .


سندس : قامت سنبت وإبتسمت 😁
انتي اجلسي استغربي منهي شاسير ابسرها وحملت للديوان .


...........
فوق السياره 🚘

أكرم : إبسر جنى بتخطى رجعت .. لفت لأحمد بيحانكه 😜 شكلها طردتهن .

أحمد : قلق ومتوتر .. بهرر فوقه 😡 بس من خبالتك هذه الساع فتح الباب ونزل لاعندها .. مالش رجعتي ماحصل .


جنى : بضبح 😤 مالك قد عتجنن هكذا اعصابك لايقرح لك عرق .. نسيت تلفوني جيت أشله .


...........
في الديوان ..

سمر : جالسه خازيه ومتوتره موطيه رآسها مرآعيه لجنات 😊.


سندس : دخلت لاعندها .. مبتسمه 😃 أهلا وسهلا وبتسلم عليها .. من أنتي ماعرفتش أنتي معانا فالجامعه ..


سمر : أنتي جنات صح . بس لاتصيحيش فوقي أنا سمر عمه أحمد 😰 قد الولد عيجنن رسلني أحاكيش ..


سندس: بلمت إيييش 😳 عمه أحمد .. ليش جيتي اصلا خلاص كل شي انتهي وبعدا لو سمحتي ولو قله أدب مني لو تقومي تروحي قبل ماتدخل جنات أنا سندس .


سمر :حست بالاحراج 😰 بتطرديني .. بس والله ماقصدي إلا أصالحهم وبعدا مالش انتي وأكرم .


سندس : مفتجعه تدخل جنات وتعرفها سمر .. قوى اتصلي لي بعدا شلي رقمي من أكرم وشافهمش كلشي بس لاتخليش جنات تبسرش ..



@qesasanani