📋قصیدة: حسین خلیني اعلی بابك - مکتوبة

🎤أداء الملا قحطان البدیري
🖋الشاعر‌: علاء شهیـــــد
------------------

حسین خلیني اعلی بابك
غیر بابك ما أدگ
حسین بس ویاك أشوفه
ینعرف معنی العشگ
یا حبیبي یا حسین نور عیني یا حسین
-------------------

کون مو لجلك علیمن گلبي المن یحترگ
آه یا دگات گلبي حسین أسمعه من یدگ
------------------

من أدگن باب خیّر و أعتني له بحاجتي
آنه أدري مایردني لَوَن یسمع قصتي
ما أبیعن ماي وجهي و لا أصبن دمعتي
إلّا یحسین اعلی بابك کون أطلّع حرگتي
------------------

حسین بالفطره عرفته لا دراسه و لا علم
و انختم اسمه اعلی گلبي گلّي شیزیحه الختم
حسین منطیني کرامه و جاه منطیني و اسم
ایقدّروني بالمجالس من أطبن و أنخدم
------------------

حسین کلني اذنوب اجیت ابمجلسك خلیني أطب
کون ماتلزمني بیدي یعني أضیعن بالدرب
حسین دلّیني اعلی بیتك وین مجلس منّصب
أدري أطهّر گلبي یمك بیدك اتطهر الگلب
------------------

یا حبیب الماکو مثله ساعة الوحشه ونس
لو سمعت بطاري اسمك واللّه ترتاح النفس
ینلچم کل ساع گلبي بکربلا لمّن یحس
انت عرش اللّه مکانك وسفه نایم بالشمس

• الّلهُـــــمَ صَل عَلَی مُحَمّـــــد و آل مُحَمّـــــد

ـﮩﮩৡ✦ عَدَمُ حَذْفِكَ لِلتَّوْقيعِ يَدُلُّ عَلىٰ خُلُقِكَ الرَّفيعِ ✦ৡﮩﮩـ

------------------

• مُحبّي الرادود قَحطانْ البْدیري
• للقصائد المكتوبه

@qahtanqasaed

📋قصیدة‌: کلما أذکرك - مکتوبة

🎤أداء الملا قحطان البدیري
🖋الشاعر: واثق العیساوي
-------------------

بعیوني ماشوف الضوه
و یتعوّض ابیش الهوه یخویه
کلما أذکرك أختنگ
و الحیره طبع الیفترگ یخویه
--------------------

یا ریت اگبال مُهرك ترکض اسنیني
و یصد اسهامهم عنك جفن عیني
أحلفك گبل ما تمشي و تخلّیني
ترد لخیامي لو راید تروّیني
تروي الیتامه بجربتك
بس آنه أروه برجعتك یخویه
لو ناوي ماترجع إلي
حاچیني یا ضنوة علي یخویه
-------------------

کل اللي یروح انعوضه بالتالي
یا حیف الأخو من ینفگد غالي
آ یالماي أخذ من عندي آمالي
یتیمة خوّه بعدك یالگمر حالي
نزلت دمعتي و دمعتك
و اعیوني تبعت رایتك یخویه
تذکر یا عبّاس الوعد
و اتگلّي ماترجع بعد یخویه
------------------

عطشانه و لهیب النار بظنوني
و لا گتلك أرید الماي یعیوني
أخافن ماترد و اعداك یولوني
و لهیب اسیاطهم ما یرحم امتوني
باچر النار بکل کتر
یوصل عدوك للخدر یخویه
و أحتار أطفي بالخیم
لو أجمع أطفال و حرم یخویه
------------------

صوتك اي سمعته و دوّرت وینك
من گطعوا غدر یا خویه چفّینك
سهم دوّر الغیره و شافها ابعینك
أخوك انکسر ظهره و انحنی احسینك
و الیمشي مکسور الظهر
بعیونه میشوف النهر یخویه
من القهر گام او وگع
لمّن ألم صوتك سمع یخویه
-------------------

رجع لي و من سئلته عالگمر وینه
رقیّه امنل عطش تنتظره و اسکینه
عمود الخیمه جرّه و دمّعت عینه
و أشوفه احتار أخوي و محد ایعینه
تقبل یا عبّاس الأمر
یسحگ علی صدره الشمر یخویه
من الگفا ایحز منحره
و الخیل صدره اتکسّره یخویه

• الّلهُـــــمَ صَل عَلَی مُحَمّـــــد و آل مُحَمّـــــد


ـﮩﮩৡ✦ عَدَمُ حَذْفِكَ لِلتَّوْقيعِ يَدُلُّ عَلىٰ خُلُقِكَ الرَّفيعِ ✦ৡﮩﮩـ

------------------

• مُحبّي الرادود قَحطانْ البْدیري
• للقصائد المكتوبه

@qahtanqasaed

📋قصیدة: یوم واحد - مکتوبة

🎤أداء الملا قحطان البدیري
🖋الشاعر: مهدي بارون
--------------------

یوم واحد بي عفتني الدنیا کلشي شوفتني
کافي و ارجع للخیم گلبي مایحمل ألم
کلشي صار اگبالي دم من عفتني
--------------------

وین ما اندل و أجیلك طف الموادع چبیر
مثلي و یخلیها أخوها الها المعاتب یصیر
أعذرني یا خویه لغیابك دمعي چان اشگد گصیر
سبب شفته حسین شایف دم نحر ابنه الزغیر
ما گدرت اعلیك أبچي
أرد أجیك و یمك أحچي
من رجع لي ابمنحره گتله خویه اشأخره
ها شفت شنهو الجره من عفتني
------------------

شلت طفل حسین و ارجع بالدمه الما تنمسح
اتشابگن عبداللّه و أمه اتگلّه کاروکك یلح
رجعت أشوف حسین وینه شفت راسه اعلی الرمح
اشگد صلف ویایه دهري مهله ماینطي الجرح
یکتب الدم و آنه أقره
وینه عبّاس اعلی نحره
بسمه یا خویه صحت گمت اله و أرکض رحت
بس عثر جدمي و طحت من عفتني
-------------------

شوف شنهو اشسوه بُعدك یالطحت یم النهر
لأختك ارجع واللّه کافي شفت اکثر من نحر
و الیزید اعتابي خویه حسین من یمك حضر
چان بس مکسور ظهره و هسه هم صدره انکسر
من کثر ما خان دهري
خایفه هسه اعلی نحري
صرت أخاف امنل هوه کل نهار ابلا ضوه
عفته جرح ابلا دوه من عفتني
-------------------

راجعه لصوب المخیم راجعه و کلي انکسار
مدري یا خیمه الأطبها و یاهي ما مشتعله نار
ابظلمة الدخان أشوفه مختنگ حتّی النهار
خوف نیران و عساکر گلّي شیلّم الزغار
و الیتامه اگبالي فرّت
بالحوافر خویه عثرت
دوسة الحافر أجل یعني چم طفل انکتل
جرحي ظل ینزف أهل من عفتني
------------------

کلشي صار بیوم واحد گلبي بالطف انلچم
و راح أعذرك ما شفتني خویه بعیونك سهم
و الشمر من یحدي ظعني یعني بزنودك ألم
و الذبحني یابوفاضل الشمر مر یمّي ابتسم
گوم یا عبّاس الیه
ما أرید أمشي سبیّه
تعلم اشبیه حزن تستمع لي من أون
تدري یا لون المتن من عفتني
-------------------

ها یخویه اشگلت ترجع لو أحلفك بالعبي
و راح أظل الیوم کله علی التل الزینبي
ما أریدن کلشي منك هو هذا مطلبي
گلّي ناوي ترد لي باچر حتّی ماروح السبي
ارجع و نرجع سویه
ما ارید الغاضریه
نرجع الذاك الوضع نعلگ لجاسم شمع
و لا نعیش اویه الدمع من عفتني

• الّلهُـــــمَ صَل عَلَی مُحَمّـــــد و آل مُحَمّـــــد

ـﮩﮩৡ✦ عَدَمُ حَذْفِكَ لِلتَّوْقيعِ يَدُلُّ عَلىٰ خُلُقِكَ الرَّفيعِ ✦ৡﮩﮩـ

------------------

• مُحبّي الرادود قَحطانْ البْدیري
• للقصائد المكتوبه

@qahtanqasaed

📋قصیدة: مواکبنا - مکتوبة

🎤أداء الملا قحطان البدیري
🖋الشاعر: حسين العامري
-------------------

مواکبنا بنیناها و أحبابك دعیناها
نخدم الزایر یا والي لبیك یا حسین
نسهر اویاه الیالي لبیك یا حسین
------------------

یا حسین اعلی الدرب ننطي العهد لا مانزل
نخدم المشایه بدموع النظر گول و فعل
نبقی ویاهم لحد گطع النفس ظل ویه ظل
و المواکب تشهد لآخر صفر لا ما نمل
خدامك و نفتخر یحسین
نخدم الزایر و الملایین
موکبنا یصبح گلب واللّه یا هالدرب
خدامك و نفتخر یحسین مواکبنا
----------------

یا حسین و خدمة الزایر شرف منك اله
و المواکب صاحت بوجهه هلا و میّة هلا
نمسح ادموعه و نمهّد له الطریق لکربلا
هلا بأنصار أبوالیمه کلها غیره و مرجله
کل المواکب صاحت بصوت
ویاکم احنه و نبقی للموت
لجلك یهون الصعب واللّه یا هالدرب
کل المواکب مواکبنا
-----------------

یا حسین و نعلگ الظلمه لجل ضیفك ضوه
و نزرع الجدمه لحد مایوصل لگبرك دوه
نصیر نسمه بریّة الزایر لَوَن ضاگ الهوه
صوت کل هاي المواکب یا هلا اینادي سوه
کل المواکب ذوله یبچون
أیام هاي و تخلص اشلون
الدموع صارت تصب واللّه یا هالدرب
أیام و هاي تخلص اشلون مواکبنا
-----------------

یا حسین أجمل درب، درب المشي ابکل العمر
یضوي من زوّارك و لیل الشته بعیني ظهر
بیت واحد کلها تصبح محله لمّتها العصر
واللّه و العبّاس مشایتنه یحسدها بدمع عینه القصر
مشایه و رفعوا رایة الدین
تبقی بضمایرنا یالحسین
بالحسره لمّن تطب واللّه یا هالدرب
تبقی بضمایرنا یا حسین مواکبنا

• الّلهُـــــم صَل عَلَی مُحَمّـــــد و آل مُحَمّـــــد

ـﮩﮩৡ✦ عَدَمُ حَذْفِكَ لِلتَّوْقيعِ يَدُلُّ عَلىٰ خُلُقِكَ الرَّفيعِ ✦ৡﮩﮩـ
-----------------

• مُحبّي الرادود قَحطانْ البْدیري
• للقصائد المكتوبه

@qahtanqasaed

📋قصیدة: أشتکیلك - مکتوبة

🎤أداء الملا قحطان البدیري
🖋الشاعر: واثق العیساوي
-------------------

أشتکیلك من رحیلك
و آني للموت أنتظر و أحسب ثواني
و بغیابك ظل عتابك
دمعه طاحت عالگبر تحچي ابمکاني
-------------------
۱/
أشتکي من الزمن و اشسوه ویاي
لیلي بعیوني سکن یالوجهك ادواي
رحت و دموعي جرن و امکدره دنیاي
حزني یالعفت الوطن وي گلبي وفّاي
حگي أعاتب گلبي ذایب
ویه کل دگه یگلك رد علیه
بویه ارجع أدري تسمع
صوتي بي حرگه و یسولف کلشي بیه
-----------------
۲/

روح بس عوف الگلب لایمشي ویاك
بابي وي گبرك درب بدموعي حاچاك
وجوههم کلهم غُرُب و ابلحظه تنساك
العمر دونك صعب یا ساعه ألگاك
واعدتني یالعفتني
گتلي من بعدي شهیده و آني أتاني
و انتظرته یومي ردته
عمري بعدك ما أریده حتی أعاني
--------------------
۳/

حسرتي اتکسر الضلع و ابگلبي نارین
الحسن ویه الدمع و ولیدي الحسین
عبره صوته المنفجع و ادموعه بالعین
وینه جدي و استمع وین النبي وین
من إجوني عذّبوني
ذوله أعز أحباب یا بویه بحیاتك
شرد أگلهم یالعفتهم
عینهم عالباب یالغبت ابمماتك
--------------------
٤/

من یأذّن حیدره تنزل دمعته
یمر إسمك و أعذره تلهب حسرته
نار گلبه اموجّره یا من ترکته
ناصرك یالتنصره بفگدك فجعته
چن خصومك ذوله گومك
جابوا إحبال الغدر چتفوا وزیرك
بویه دمعي و هذا ضلعي
محسن و بابي جمر أصبح مصیرك
--------------------
۵/

لیلي بغیابك حزن لا ما أنامه
و گعدت ابابك تِوِن هاي الیتامه
الکساء اللي یحن و جنح الحمامه
آه یا لیل الیجن یذبح ظلامه
و انتظرتك طیفي ردتك
تمسح جروحي و تنشّف لي دمعتي
ما لگیتك وحشه بیتك
یرتفع نوحي و أنادیك بعبرتي

• شُـلّـتْ یَـــــد الطُغْیـــــان و التَعَـــــدّي

• الّلهُـــــمَ صَل عَلَی مُحَمّـــــد و آل مُحَمّـــــد

ـﮩﮩৡ✦ عَدَمُ حَذْفِكَ لِلتَّوْقيعِ يَدُلُّ عَلىٰ خُلُقِكَ الرَّفيعِ ✦ৡﮩﮩـ

------------------

• مُحبّي الرادود قَحطانْ البْدیري
• للقصائد المكتوبه

@qahtanqasaed

📋 قصیدة: وجیهاً بالحسین - مکتوبه

🎤 أداء ملا قحطان البدیري
🖋 الشاعر کرار حیدر الخفاجي
--------------------

الّلهمَ اجعلني وجیهاً عندكَ بالحُسین
--------------------
۱/

الوجاهه احسین ینطیها هدیه
یحتاج الها خدمه ابصُدُق نیّه
الیدور صیت متدوره الزچیه
الصیت مو بسوالف دِنِیّه
صَفّي نیتك و التزم
تصبح أعلی امن النجم
--------------------
۲/

الیرید احسین عالوادم یرفعه
خلها الدنیا تلتم ما توگعه
لیغُرك المظهر و التسمعه
تره احسین ایعرف یا هُمَّ ربعه
اخدم و اخلص بعد
احسین میعوفك ابد
--------------------
۳/

الخادم لا ابخادم ثاني یکسر
احسین ایرید واحد گلبه خیّر
تره الألقاب بسمك ما تأثر
حمزه اشکُبره بس حمزه الزغیر
و الألقاب شتنفعك
لقب خادم یرفعك
--------------------
٤/

الیرید ابخدمته اعله اخوانه یگوه
ابزود احسین ما جایبها هوه
الخادم لا تسمعه ابیوم کلمه
الیخاصم خادم الزهراء خصمه
و الخدم کون ابشرط
یرضي فاطم و السبط
------------------
۵/

احسین ایرید منك من تخدمه
تکون اخلاقه بیك و بیك حلمه
الخادم لا تسمعه ابیوم کلمه
الیخاصم خادم الزهراء خصمه
و الخدم کون ابشرط
یرضي فاطم و السبط


• الّلهُـم صَل عَلَی مُحَمّـد و آل مُحَمّـد

ـﮩﮩৡ✦ عَدَمُ حَذْفِكَ لِلتَّوْقيعِ يَدُلُّ عَلىٰ خُلُقِكَ الرَّفيعِ ✦ৡﮩﮩـ

------------------

• مُحبّي الرادود قَحطانْ البْدیري
• للقصائد المكتوبه

@qahtanqasaed

📋قصیدة: نطقت الجماد - مکتوبه

🎤 أداء ملا قحطان البدیري
🎤 و الحاج باسم الکربلائي
🖋الشاعر: سید عبدالخالق المحنه
--------------------

یا دمع المحبه الـ یغسل ذنوبي
کل شي بهالوجود یصیح محبوبي
نَطّقت الجماد و صاح حبیته
خلیت البحر مجنون خلیته
--------------------

سبحانه الجعل هذا العشق فطري
بالدم بالنبات و بالحجر یسري
کل شي یصیح بیدك سلمت أمري
مالکني هواك و فدوه لك عمري
بچّیت القمر و اللیل بچّیته
خلیت البحر مجنون خلیته
--------------------

مشتاق التراب ایقبّل اچفوفه
و اتصیح الشمس باللیل ملهوفه
و ایذوب الجبل لو رتّل احروفه
کل شي یصیح أحبه و غایته ایشوفه
نسّیت الیحبك اسمه نسّیته
خلیت البحر مجنون خلیته
--------------------

راد اللیل فترة لیل ممدوده
و ایرید النهار اطّول احدوده
واحد یحسد الثاني علی اوجوده
یحسین اعلی حبك کلها محسوده
راویت العجب للناس راویته
خلیت البحر مجنون خلیته
--------------------

یا شوق الأرض من تسحق اعلیها
تتباهی و یغار الماي تالیها
قطرات المطر نعرف معانیها
کل قطره قصیدة شوق یهدیها
دلّیت الشجر عالماي دلّیته
خلیت البحر مجنون خلیته
--------------------

یا أجمل حبیب ایعیش في بالي
تحسدني علیك عیوني و خیالي
مو بس آنه أحبك کلها یالغالي
کلها اتصیح بس حسین یحلالي
من حبك ألف فرعون ذلّیته
خلیت البحر مجنون خلیته


• الّلهُـم صَل عَلَی مُحَمّـد و آل مُحَمّـد


ـﮩﮩৡ✦ عَدَمُ حَذْفِكَ لِلتَّوْقيعِ يَدُلُّ عَلىٰ خُلُقِكَ الرَّفيعِ ✦ৡﮩﮩـ
--------------------

• مُحبّي الرادود قَحطانْ البْدیري
• للقصائد المكتوبه

@qahtanqasaed

📋 قصیدة: أنت الحسین - مکتوبه

🎤 أداء الملا قحطان البدیري
🖋 الشاعر: مصطفی الصائغ الکاظمي
-------------------

تهوي القلوبُ علی ثَراك سجودا
و تُیَمَّمُ الأعضاءُ فیك خلودا
أنت الحسینُ و کلُّ قلبٍ مؤمنٍ
یهدي الیك تحیةً و عهودا
--------------------

أوسعتَ في معنی السَخاءِ مَروئتاً
و وهبتَ للأمواتِ روحك جودا
یا واهباً للکونِ نحراً ناطقاً
و دماً یُفصّمُ للخُنوعِ قیودا
و یداً تلوحُ المَکرُماتُ بإثرها
و تَحِلُ غیماً ماطراً و رعودا

لبیك ثار اللّه لبیك ثار اللّه
--------------------

خالفتَ في المهدِ الطبیعةَ
عندما لاحَ اسمُك الزاکي قَدوتَ شهیدا
و بیومِ مقتلكَ العظیمِ و رُزئهِ
أصبحتَ بین العالمین ولیدا
یا مَن نزیفُ جراحهِ طول المدی
یسري بـِ آکام الرمالِ ورودا

لبیك ثار اللّه لبیك ثار اللّه
-------------------

فعفوتَ غُصناً حین داعَبهُ الندی
و شمختَ طوداً في النزالِ صمودا
و صمدْتَ مبتسماً بوجهِ سیوفهم
و شفاهُ جرحك تشکر المعبودا
و بکیتَ یا للحلم حین بکیتهم
إذ أصبحوا للضی الجحیمِ وقودا

لبیك ثار اللّه لبیك ثار اللّه
--------------------

و الفجرِ قد طعنوك لا لجهالةٍ
لکنما حقداً بها و جحودا
لم یفقهوا ما قلتَ حیثُ قلوبهم
غلفٌ و صاروا للعبیدِ عبیدا
سامحتَ حتی السیفَ لمّا إندنا
یحتزُ من نحر السماءِ وریدا
أعطیتَ حتی الموتَ جُلَّ مرادهِ
و بقا عطائوك یقبلُ التجدیدا

لبیك ثار اللّه لبیك ثار اللّه
--------------------

فَسَموتَ تحسدُك الجنانُ منازلاً
و مضیت تستبقُ الصعود صعودا
ستظلُ یا وجه السماء مهابتاً
تغفو لدیك النیران رقودا
و یظل قبرك جنّةً فواحةً
و تحِفُ فيه الأنبیاءُ وفودا

لبیك ثار اللّه لبیك ثار اللّه


• الّلهُـم صَـل عَلَی مُحَمّـد و آل مُحَمّـد

ـﮩﮩৡ✦ عَدَمُ حَذْفِكَ لِلتَّوْقيعِ يَدُلُّ عَلىٰ خُلُقِكَ الرَّفيعِ ✦ৡﮩﮩـ

--------------------

• مُحبّي الرادود قَحطانْ البْدیري
• للقصائد المكتوبه

@qahtanqasaed

📋قصیدة: شکرا علی النعمه - مکتوبة

🎤أداء الملا قحطان البدیري
🖋الشعر: علي عبّاس الربیعاوي
-----------------
المستهل:

شکرا علی النعمه جبتیني للخدمه
یالمنبرچ رحمه یا فـــــاطـمـــــه
-----------------
۱/

الدنیا بعیوني منابر امرصّعه کلها دمع
وین ما عاین یا فاطم أنظر لکسر الضلع
براسي متربعه المجالس ألطم و ما أمتنع
لو گلت طایح جنینچ ضلعي ویاه ینشلع
من أدخل المأتم ریحة ورد أشتم
بعیني دمع یلتم یا فـــــاطـمـــــه
--------------------
۲/

أوگف ابمجلس عزائچ نیّتي خادم الچ
أقنت و أرفع إدیّه أبقی خادم منبرچ
حاجتي مگضیّه أدري گبل لا آنه أسئلچ
أمنیة عمري الوحیده سجّلیني بدفترچ
تعرفني هالوادم إنّي أنا الخادم
فوگ السما راسم یا فـــــاطـمـــــه
--------------------
۳/

أشعر ادموعي اللي تنزل بالعزاء امحزّمه
ابدنیا ما اتشرّف أبقی ماکو بیها فاطمه
ما أکلّف روحي و ألطم لا و حگ رب السما
إیدي من وحدها تلطم عالعزاء امعلّمه
بچفوفي ما أدري لمن تدگ صدري
صار اللطم عمري یا فـــــاطـمـــــه
-------------------
٤/

خطوه خطوه للمجالس من أروحن تنحسب
أدري کل خطوه لحضرتچ هیه عندچ تنکتب
أعز ما أملك دمعتي عني لا ما تنسلب
أبچي حد ما دمعه حره علی خدودي تنصلب
عمري صُبَح دمعه حد ماتجي الرجعه
و القائم انسمعه یا فـــــاطـمـــــه

• شُـلـتْ یَـــــد الطُغْیـــــان و التَعَـــــدّي

• الّلهُـــــمَ صَل عَلَی مُحَمّـــــد و آل مُحَمّـــــد

ـﮩﮩৡ✦ عَدَمُ حَذْفِكَ لِلتَّوْقيعِ يَدُلُّ عَلىٰ خُلُقِكَ الرَّفيعِ ✦ৡﮩﮩـ

------------------

• مُحبّي الرادود قَحطانْ البْدیري
• للقصائد المكتوبه

@qahtanqasaed

📋 قصیدة: سماوات الجنون - مکتوبه

🎤 أداء الملا قحطان البدیري
🖋الشاعر: علي عسیلي العاملي
--------------------

أیها السائلُ عنّي لستَ تدري مَن أکون
عابسٌ أصلي و دیني مِن سماوات الجنون
--------------------

في قدیمِ الدهرِ إنّي کنتُ ذَراً مِن ولاء
نفخَ المولا حسینٌ فيَّ روحَ الکبریاء
ماءُ خلقي مِن دموعٍ طینتي مِن کربلاء
ساکنٌ رحمَ البواکي بعدَ أصلابِ العزاء
هکذا جئتُ الحیاة زینبيُ التلبیات
ناثراً ماءَ العیون من سماوات الجنون
--------------------

ساعةَ المیلادِ أمي وجّهت شطرَ البقیع
نادت الزهراءُ قومي أنظري هذا الرضیع
باکيَ العینین ینعی صاحبَ الرأسِ القطیع
رتبةَ الخُدّامِ یرجو یالذا الشأن الرفیع
لم یکن طعمُ الحلیب غیر شوقٍ للحبیب
إنه أرقی الفنون من سماوات الجنون
--------------------

قبلَ أن نادیتَ أمي کانَ نُطقي یا حسین
و علیهِ قبلَ إسمي درّبت هذه الیدین
کُلَّ ما خطّیتُ حاءاً فاض حزنُ المقلتین
دونَ لطمٍ دونَ دمعٍ لیس لي صدرٌ و عین
ذوّبتني في هواك عشتُ لا أرجو سواك
أنت وحي للمَنون من سماوات الجنون
--------------------

علّمتني الحُب طفلاً أودعتني في یدیك
اسمُ رحمنٍ تجلّی فیك مصبوبٌ علیك
أيُّ غیبٍ في المطاول لم یکن منك الیك
کُلّ ما عندي فناءٌ کُلّ ما یبقی لدیك
أنت یا سرّ الوجود بعضُ معناك الخلود
أنت یا کافٌ و نون من سماوات الجنون


• الّلهُـم صَـل عَلَی مُحَمّـد و آل مُحَمّـد
--------------------

• مُحبّي الرادود قَحطانْ البْدیري
• للقصائد المكتوبه

@qahtanqasaed

📋قصیدة: صنیع یدیك - مکتوبة

🎤أداء الملا قحطان البدیري
🖋الشاعر: میرزا عادل أشکناني
📀اصدار عطشت أقلامنا
🏴مُـحَـــــرّم الحَـــــرام ۱٤۳۸ هـ.
--------------------

خُذني فإنني صَنیعُ یدیکا
هَبْ لي دُموعاً للبُکاءِ علیکا
حُسیـــــنْ حُسیـــــنْ
حُسیـــــناً وا حُسیـــــنا
--------------------
۱/

اردود اجیتك و انت تدري
ما شفت غیرك أمان
خلني جمره أحترگ لك
جروحي مو مالت جنان
لو ما أشم ریحة نعي أنفاسي مختنگه
حُبك ربط دیني بخیام محترگه
حگه الگلب یجزع إذا یدري انذبح عشگه
واللّه حگه

اللّهُ مِن ماءٍ و طینٍ براني
أم من دموعٍ و رمادٍ تُراني
حُسیـــــناً وا حُسیـــــنا
-------------------
۲/

اللّه جاعل للبرایه
أرزاق قسّمها بعدل
و آنه رزقي اشما أذکره
دمعه من عیني تهل
یحسین هذا أکبر رزق بي الله مکرمني
و ادخیل ابن موسی الرضا من دمعي تحرمني
ما دام بعیوني دمع شترید اخذ مني مایهمني

یا رازق البرایا یا رفقاً بعشقي
ذي دمعتي رزقي فأوسع برزقي
حُسیـــــناً وا حُسیـــــنا
-------------------
۳/

بحزني عاین دمعي لجلك
هو زادي و مشربي
و لو أموتن ما أوفّي
خطوه من درب السبي
راید مدد یا سیدي حتّی أشعر بهمّك
بلچن إذا گلبي انکسر ترضی علیه أمك
أقسم علیك بچف رقیّه البلطشت ضمك خلني یمك

إرحم خضوعَ البائس المُستکینِ
وسیلتي إلیكَ أمَّ البنینِ
حُسیـــــناً وا حُسیـــــنا
-------------------
٤/

غیري یحسین ساعه ساعه
و یدري چم صار العمر
و آنه عمري راح أحسبه
بعدد لطمات الصدر
ابیوم الّذي مابي أوِن محذوف من عمري
و النسمه لو ما بیها انت ماتطب صدري
من تربتك ماخذ کیاني و شمرتي و عطري و انت تدري

حُزني علیكَ من دواعي السرورِ
یا مالكَ الشعور و الـ لا شعورِ
حُسیـــــناً وا حُسیـــــنا
--------------------
۵/

اشلون أکابر و لمصابك
اللّه سوه الدنیا عین
کلشي لجلك یجري دمعه
و کلشي یصرخ یا حسین
حتی اللعین اللي حرگ خیمتکم ابناره
یسلب تراچي طفلتك و ادموعه تتجاره
و هذا الشفق وسط السما یکشف عن أسراره بحمراره

فَـ بالجوابِ الأسا سرمدي
لقد نعاكَ کُلّ میتٍ و حَيِ
حُسیـــــناً وا حُسیـــــنا


• الّلهُـــــمَ صَل عَلَی مُحَمّـــــد و آل مُحَمّـــــد

ـﮩﮩৡ✦ عَدَمُ حَذْفِكَ لِلتَّوْقيعِ يَدُلُّ عَلىٰ خُلُقِكَ الرَّفيعِ ✦ৡﮩﮩـ

--------------------

• مُحبّي الرادود قَحطانْ البْدیري
• للقصائد المكتوبه

@qahtanqasaed

خذني فأنني صنيع يديكا
هبني دموعا للبكاء عليكا

#ياحسين 💔

@Q_albudeiri

📋قصیدة: سیدي عندي سؤال - مکتوبة

🎤أداء الملا قحطان البدیري
🖋الشاعر: واثق العیساوي
------------------

سیدي عندي سؤال اسمح لي بي
و لو ما أدري إلي الحق مو إلي
بکل شي أحبك عندي هذا الشي أکید
شوق ویه الدم قدیم و أزلي
حاشه ماعندي أبد أي اعتراض
بس سؤالي بي جواب لـ عاذلي
لیش حیدر مقترن وي کل شي بیك
و حتی بنفاسك أشم ریحة علي
-------------------

بکل شي متتفقین حیدر و الرسول
الیعترض مولاي عالگلته غبي
حتی بالنومه علي طالع علیك
و لذلك چان بفراشك نبي
أذکر أول بعثتك من عیّروك
گالوا اللي ایتابعه واحد صبي
و بطل ربّیته و کُبر ما بین ادیك
تالي عرفوا شنهو معنی الطالبي

• الّلهُـــــمَ صَل عَلَی مُحَمّـــــد و آل مُحَمّـــــد

ـﮩﮩৡ✦ عَدَمُ حَذْفِكَ لِلتَّوْقيعِ يَدُلُّ عَلىٰ خُلُقِكَ الرَّفيعِ ✦ৡﮩﮩـ
--------------------

• مُحبّي الرادود قَحطانْ البْدیري
• للقصائد المكتوبه

@qahtanqasaed

📋قصیدة: عطشت أقلامنا - مكتوبة

🎤أداء الملا قحطان البدیري
🖋الشاعر الأديب مهدي جناح الكاظمي
💿ضمن إصدار #عطشت_أقلامنا
🏴 مُحَرّم الحَرام ۱٤۳۸ هـ.
--------------------
المستهل:

عَطَشتْ أقْلامنا فَسَقاها دَمنا
حُسَیْنـــــا حُسَیْنـــــا
یا نَشیداً في فَمي أنتَ سرٌ في دَمي
حُسَیْنـــــا حُسَیْنـــــا
--------------------
۱/
زلزلَ الأرضَ نداءٌ قُتِلَ الیومَ الحُسین
فَأتیناهُ نُلَبّي یا قطیعَ الوَدَجَین
لِنُواسي فیهِ طه و إمامَ المَشْرقَین
منهُ سُفیانُ اسْتَرَدتْ ثأرَ بَدْرٍ و حُنَین

إنّهُ للمُصطَفی کـ عَليٍّ و کفی
حُسَیْنـــــا حُسَیْنـــــا
یا إمامَ الألَمِ أنتَ سرٌ في دَمي
حُسَیْنـــــا حُسَیْنـــــا
--------------------
۲/
حینَ أصبحتَ وحیداً أقْدَحتْ فیكَ السیوف
کعبةً صِرتَ و راحتْ بِكَ تسعی و تَطوف
یا وریدَ الحقِ منهُ یَستقي وادي الطفوف
قَدْ أخذنا منكَ درساً في میادینِ الحتوف

نحنُ جئنا مَصْرعكْ و وَردنا مَنْبعكْ
حُسَیْنـــــا حُسَیْنـــــا
یا شَفیعَ الأممِ أنتَ سرٌ في دَمي
حُسَیْنـــــا حُسَیْنـــــا
--------------------
۳/
نحنُ جئناكَ حَیاری یا دلیلَ الحائرین
منكَ نَسْتلهِمُ صبراً یا إمامَ الصابرین
إنّما منهُ نُعاني فوقَ وصفِ الواصفین
هدفاً صِرنا و مَرمی لِسهامِ الظالمین

أنتَ سُورٌ و حِمی أنتَ للأرضِ سَما
حُسَیْنـــــا حُسَیْنـــــا
فیكَ جئنا نَحتمي أنتَ سرٌ في دَمي
حُسَیْنـــــا حُسَیْنـــــا
--------------------
٤/
خَیمةُ الحَوراء صارتْ للیتامی مَعْقلا
و دُخانُ النارِ منها للسَماواتِ اعتَلا
نَسَجَ الحُزنَ ثیاباً و ارتدتها کربلا
لِنُواسي في أساها زینباً أمَّ العُلی

حینَ سَارتْ في السِبا صَرختْ بنتُ الإبا
حُسَیْنـــــا حُسَیْنـــــا
یا حلیفَ العَلَمِ أنتَ سرٌ في دَمي
حُسَیْنـــــا حُسَیْنـــــا
--------------------
۵/
أینُ عبّاسُكَ أمسی یا حُسَیْنَ المَکرُمات
قُطِعَتْ کَفّانِ منهُ کَيْ تَخُطَ المُعْجزات
و انحنی المَوتُ إلیهِ و انحنی ماءُ الفُرات
شَبَحَتْ عینُ العطاشا و عیونُ الحائرات

جُودُهُ لمّا جَری أبحُراً فوقَ الثَری
حُسَیْنـــــا حُسَیْنـــــا
صاحَ فوقَ العَلقَمِ أنتَ سرٌ في دَمي
حُسَیْنـــــا حُسَیْنـــــا


• الّلهُـمَ صَل عَلَی مُحَمّد و آل مُحَمّد

ـﮩﮩৡ✦ عَدَمُ حَذْفِكَ لِلتَّوْقيعِ يَدُلُّ عَلىٰ خُلُقِكَ الرَّفيعِ ✦ৡﮩﮩـ
--------------------

• مُحبّي الرادود قَحطانْ البْدیري
• للقصائد المکتوبة

@qahtanqasaed

📋قصيدة: دمك الطهور - مكتوبة

🎤أداء الملا قحطان البديري
🎤 و الحاج باسم الكربلائي
🖋الشاعر الأديب مهدي جناح الكاظمي
--------------------

دَمُكَ الطَهورُ کتابِيَ المنشورُ
یَومَ القیامةِ أیُّها المنحورُ
--------------------
۱/
قَدْ أصبحَ حُبُكَ لي نورا
و أراهُ کتاباً مسطورا
و علیهِ أغْدو محشورا
ألقاهُ کتاباً منشورا

و هَواك أعمالي فَـ کیفَ أحیرُ
یَومَ القیامةِ أیُّها المنحورُ
--------------------
۲/
بكَ ربّكَ أودعَ أسرارا
مِن طَفِّكَ تصنعُ ثوّارا
تحیی في ظِلّكَ أحرارا
فَجّرتَ بِجُرحك أنهارا

و إلیكَ کُلُّ الضَامئینَ تَسیرُ
یَومَ القیامةِ أیُّها المنحورُ
--------------------
۳/
عُشّاقُكَ نحنُ الخُدّامُ
مُؤتَمّونَ و أنتَ إمامُ
أنتَ الکعبةُ و الأحکامُ
و علیك یَدورُ الإسلامُ

و لأنتَ في أمرِ العبادِ بصیرُ
یَومَ القیامةِ أیُّها المنحورُ
--------------------
٤/
أضلاعُكَ للدینِ أصُولُ
و مُحَمّدُ فیها مَحْمولُ
وطَأتها في الطفِّ خُیولُ
و علیها یَلطِمُ جبریلُ

و کأنّما في الطفِّ راحَ یصیرُ
یَومَ القیامةِ أیُّها المنحورُ
--------------------
۵/
رأسُكَ للتوحیدِ کیانُ
و إلیهِ یأوي القُرآنُ
و عجیبٌ کیفَ الأکوانُ
یَحمِلُها رُمحٌ و سِنانُ

لُغزٌ علیهِ الأنبیاءُ تدورُ
یَومَ القیامةِ أیُّها المنحورُ
--------------------
٦/
زینبُ لـِ الآنَ بِمُهجتها
تستعرُ النارَ کَـ خیمتها
یهتزُ العرشُ لصیحتها
لَو مَرَّ الصبرُ بمحنتها

لَشَکی القَضاءَ و إنهُ معذورُ
یَومَ القیامةِ أیُّها المنحورُ


• الّلهُـمَ صَل عَلَی مُحَمّد و آل مُحَمّد

ـﮩﮩৡ✦ عَدَمُ حَذْفِكَ لِلتَّوْقيعِ يَدُلُّ عَلىٰ خُلُقِكَ الرَّفيعِ ✦ৡﮩﮩـ
--------------------

• مُحبّي الرادود قَحطانْ البْدیري
• للقصائد المکتوبة

@qahtanqasaed

📋قصيدة: خير الحسين)ع( - مكتوبة

🎤أداء الملا قحطان البديري
🖋الشاعر علي عويز الشويلي
🏴ليالي استشهاد الإمام الجواد)ع(
📆ليلة ٢٨ ذوالقعدة ١٤٣٨ هـ.
--------------------
المستهل:

گال ابخیر أعَیْشَكْ عوف الحسین
و احزام اللطم و الخدمة فِلّه
ضحکت و گتله انت امنین لك خیر
غیر حسین هو الخیر کله
--------------------
۱/
حچیك عدم خیرك وهم
او من خیره خالقني الإله
ابدنیتي و ابعلمه
منطي عهد ماعوف أبد
حتّی الهوه المو من الحسین
آنه أبد ماشِمّه

جنون أفکارك قارن ظلامك بالشمس
وجوده ابروحي و انت ابوجودك ما أحس

غیر حسین یاهو الـ منه طلبیت
ویگلك هاك ماکو انطیني مهلة
غیر حسین هو الخیر کله
--------------------
۲/
هاگد بچت أمي او دَعَت
ابنص حضرته و اتگلي جبتك
یمه أسجلك خادم
هذا الولد مُلکك بعد
مو ابني لا هذا ابن الحسین
أرد أگل للوادم

خیالي ابینه مجروح واگف مبتسم
بچینه اثنینه من گال سجلته الإسم

امن أمد چفي ابکرامة ایترسه مولاي
و إذا مده اعلی غیره ایترسه ذلّه
غیر حسین هو الخیر کله
--------------------
۳/
حتّی النفس أسود لبس
نار الخیم کل لحظه أحس
چن تشتعل بالریّه
ابروحي طفل و اید و حبل
و رکضة حَرَم و ابمتنه ألم
صوط بمتن علویّة

لیش اتریدني أترك إمامي ایشع فخر
و أعیش اتشوفني بصیته ما بین البشر

إذا ویاك أصیر او عفت الحسین
بعد یاهو الیگلي ادعیلي ملا
غیر حسین هو الخیر کله
--------------------
٤/
بيَّ الهلا من کربلا
و اعلی الغرب کسرة گلب
من غربة المسبیة
او بيَّ العشگ فطري و صدگ
لو ما خدمت احسین أبد
ما أمتلك حنیّه

الحنین ابگلبي من گلبه الانصاب ابنبل
غرامي اعیونه خلاني أدنگ عالطفل

ابقواعد روحي تلگه إعراب عاشور
اشما تنزل لناسك راح تعله
غیر حسین هو الخیر کله
--------------------
۵/
ابعینك شفت ضایع چنت
ناسي أهلي من طرف البشر
بین الخلگ منسیّة
حسین و کفو ایزیدك سمو
هذا آنه ابن فُقره و بقت
وادم تسولف بیّه

بکاء اعیالهم لي هسه أسمعه ابمهجتي
و ادموع اطفالهم مو دمعي هذا ابوجنتي

درب للشام بيَّ او نسوة و أیتام
و أحس کل ساعة ضاعت مني طفلة
غیر حسین هو الخیر کله


• الّلهُـمَ صَل عَلَی مُحَمّد و آل مُحَمّد

ـﮩﮩৡ✦ عَدَمُ حَذْفِكَ لِلتَّوْقيعِ يَدُلُّ عَلىٰ خُلُقِكَ الرَّفيعِ ✦ৡﮩﮩـ
--------------------

• مُحبّي الرادود قَحطانْ البْدیري
• للقصائد المکتوبة

@qahtanqasaed