📜قصیدة: [ میت من زمان ]

🎤أداء الملا قحطان البدیري
🖋الشاعر: میرزا عادل أشکناني
📅لیلة ۲۰ رمضان ۱٤۳۹ هـ.
--------------------
المستهل:

الدنیا ما بیها أمان
راح أودّعکم و أروح
آنه میّت من زمان
باقي جسمي ابلایه روح
ویّه موت الزهره ودّعت الحیاة
--------------------
۱/
الدنیا خدّاعه ما صفت ساعه
مثل طبع الحیّه ملسه و تحمل اسموم
راودتني اشگد لیّه تتودّد
و یعلم الله ما رِکنت لدنیِتي یوم

اشلون أصدّگ دنیا بس بیها أذیّه
اثمنطعش عام و خذت منّي الزچیّه

الدنیا راوتني العذاب
و انگطع منها رجاي
زهرتي حدر التراب
إلمن أتنفّس هواي
و أشعر ابضلعي تدوس العادیات
--------------------
۲/
لو تعرفوني ما تلوموني
اشلون بالله ابهالحیاة اسنیني مرّت
عایش ابجسمي و روحي مو یمّي
روحي بین الباب و الحایط انعصرت

و یوم جفن أم الحسن وسط اللحد بات
امن اهناك و آنه محسوب اعله الأموات

الدنیا ما إلها اعتبار
من تعیش ابلا حبیب
ینکسر ظهر النهار
الشمس لو عنّه تغیب
عشت عمري نایبات ابـ نایبات
--------------------
۳/
هالطبر راسي خمّد أنفاسي
لچن دمّي بالحقیقه ابذمة اثنین
سیف ابن ملجم ناگع امن السّم
الگوم نفس الگوم رادوا ذبحي مرتین

ما کفاهم موتتي ابموت أم الحسین
غیر طبرة گلبي طبروا راسي نصّین

الدنیا ما تسوی العتاب
اعلیمن اعتابي یطول
عایش اسنین اغتراب
من مشت عنّي البتول
راحت و ترکت وراها الذکریات
--------------------
٤/
في أمان الله بالدمع و الآه
راح أودعك یالحسن و الراس مطبور
و ابجرح گلبي أرجع لربّي
أصلي نور و لازم أرجع تالي للنور

و انت یحسین أفهم بدمعك کلامك
راح أوصّل یبني للزهره سلامك

و انتي یا زینب علیچ
راح أوصّي إبن أبوچ
اشما تخون الدنیا بیچ
هذا أبوفاضل أخوچ
باچر ایثبّت کلامه اعله الفرات




• الّلهُـمَ صَل عَلَی مُحَمّد و آل مُحَمّد
--------------------

• مُحبّي الرادود قَحطانْ البْدیري
• للقصائد المکتوبة

@qahtanqasaed

📜قصیدة: [ لمن سولفتها ]

🎤أداء الملا قحطان البدیري
🖋الشاعر کرار حسین الکربلائي
📅لیلة ۸ شوال ۱٤۳۹ هـ.
📎ذکری تهدیم قبور أئمة البقیع -ع-
--------------------
المستهل:

ابیا نبره گلتها
لمّن سولفتها
لا لن تَفي الدموعُ للعزاءِ
لأبکیَنَ النحرَ بالدماءِ
--------------------
۱/
وین واگف چلمتك و احچیتها
هالزیاره ابیا مچان اقریتها
الرکعتین ابیا کتر صلّیتها
دمعة الدم گلي وین ابچیتها

أحمر دمعك ایطیح
و صوتك شالته الریح
یا مَن بَکاهُ العرشُ في السماءِ
لأبکیَنَ النحرَ بالدماءِ
--------------------
۲/
رکّزت و اتجرّدت من محتواي
أرد أعیش احساسك ابهالچلمه هاي
اشکثر واگف بالشمس و ابلا فیاي
اشگد عطشت و ما ضگت یالمهدي ماي

زرته و شفته مذبوح
و صوتك یمه مبحوح
یا عاریاً ظلَ بِلا رِداءِ
لأبکیَنَ النحرَ بالدماءِ
--------------------
۳/
ما تگلي اشْمَر علی بالك مصاب
المنه دم تبچي و صُفه لشیبك خضاب
أعتقد چوّیت خدك بالتراب
لو وگفت اتلولي و اذکرت الرباب

خلها تسمع الناس
عبدالله بلا راس
جنبَ الفراتِ ماتَ دونَ ماءِ
لأبکیَنَ النحرَ بالدماءِ
--------------------
٤/
بعتقادي ما عشت هاي الطقوس
إلّا بالطف جرّبت نوم الشموس
اتخیّلت فوگك حوافرهم تدوس
و زینب اتحشّم اهل ما عدها روس

بصدر احسینك اسهام
و یزحف صوب الخیام
یا قائلاً و القولُ في البکاءِ
لأبکیَنَ النحرَ بالدماءِ
--------------------
۵/
أرد أسئلك جرّبت هذا المرار
ترکض و طارف عباتك بیها نار
لیل مر عمتکم و ما عدها دار
و من سیاط اعداکم اتصیح الزغار

عمتك بین الخیول
و أسمع گلبك ایگول
فَـ کَم هَوَت زینبُ بالعراءِ
لأبکیَنَ النحرَ بالدماءِ
--------------------
٦/
یا بوصالح أعتذر و آخر سؤال
هم رکبت النوگ بدروب الطوال
اعمامتك هم مالت و بیدك احبال
زینب المسبیه شافت هیچي حال

چم عمه سبیّه
أزغرهن رقیّه
فأيُّ خدرٍ راحَ للسباءِ
لأبکیَنَ النحرَ بالدماءِ



• الّلهُـمَ صَل عَلَی مُحَمّد و آل مُحَمّد
--------------------

• مُحبّي الرادود قَحطانْ البْدیري
• للقصائد المکتوبة

@qahtanqasaed

📜قصیدة: [ مهرة خیل ]

🎤أداء الملا قحطان البدیري
🖋الشاعر: سید عباس الموسوي
📅لیلة ۸ شوال ۱۴۳۹ هـ.
📎ذکری تهدیم قبور أئمة البقیع -ع-
--------------------

مهرة خیل بین العشره تتفرّد
إسرجها بعباتك و إگصد الغرقد
یراچب لا تِنَوِّخ و إتبع المگصود
أمل بیك المچارم من جدید اتعود
یا موعود انت الراید و مریود
أمر واجب علینه ابکل فرض تنعد
--------------------

سابگ ریح و إطوي کل ثلاثه ابیوم
یمأدّي الفرض و انت الفرض معلوم
یشبه السیل انت املازم و ملزوم
ملزوم ابوعد و ابعهده تتعهّد
--------------------

إزجر بکرتك و اسبگ زمان الثار
عطش دم الفقار و یندبك فقار
ابیوم الثار ثور ابشفرة البتّار
جابلها ابعزم و اعلیها قیم الحد
--------------------

حِل إحرام صبرك من تِصِل بالحال
حوّل دنیتك یمحوّل الأحوال
ما یروه الفقار ابیمنتك لو حال
و لو حال ابیمینك ما یظل مِرتد
--------------------

أخبرك و الخبر عندك یماي الشوف
جرحنه ابگَي نِعَطبه و ما نفعنه الروف
یمجَفِّل زمانك یا رعید الخوف
من ترعد جبال الغیره تتصلّد
--------------------

یمعَزب المنایه ابساحة المیدان
یا ذخر الرساله و مفخرة عدنان
علگم عالعِده و بین الخلگ ریحان
یچانون الصبر بالحسره تتوگّد
--------------------

یچانون الجِحیل و یا سعیر الگیظ
یا غیظ التِچَوّم من مسیل الفیض
یمفوّض فقارك لو لفاله الغیظ
یگطع بالرگاب و شفرته تنحد
--------------------

ینحر بالرگاب و شفرته اتکبّر
ما یهمل خصیم و لا عذر یعذُر
بلسم للجرح لو کَر فلا یدبر
یجابر بالکسر و ایعمُّر المرقد



• الّلهُـمَ صَل عَلَی مُحَمّد و آل مُحَمّد
--------------------

• مُحبّي الرادود قَحطانْ البْدیري
• للقصائد المکتوبة

@qahtanqasaed

Qasaed:
📜قصیدة: [ أزور کربلا ]

🎤أداء الملا قحطان البدیري
🎤 و مرتضی الحمیداوي
🖋الشاعر: کرار حسین الکربلائي
📎اللیالي الفاطمیه ۱٤۳۹ هـ.
--------------------
المستهل:

أزور کربلا نیابه عن فاطمه
أزور کربلا و إنوي صلاة الضمه
--------------------
۱/
کربلا للکُره الأرضیّه نبُضها
تنزل اعلیها السمه اتقبّل أرُضها
الکعبه بیها اتطوف و اتأدّي فرُضها
جَنّةٌ عَرضُ السماوات ابعُرضها

سؤال ینطرح عن سر لغز کربلا
سؤال ینطرح هیه أرض لو سما
--------------------
۲/
کربلا مو أي بشر یتوفق الها
ایدز علیك احسین یالله تدخل الها
زینب اعله التل تقیّدنه ابسجلها
و چف أبوفاضل یجي و ایوقّع الها

هلا ابزایري نسمع نداء النحر
هلا ابزایري یومي بچفوفه الگمر
--------------------
۳/
هاي أرض الله الحِوَت منحر ذبیحه
ابوکت کل الدنیه سکته هیه صیحه
هالروایه مُسنده عدنه و صحیحه
اتزور الله ابعرشه یا زایر ضریحه

ضریح العرش من توصله ابکربلا
ضریح العرش اتوضّه و إسجد إله
--------------------
٤/
هیّه قرآن و یرتّل بیها الکتاب
الذهب یتمنه یصیر ابکربلا اتراب
احسین من یسمع إجتله لکربلا أحباب
ایعوف شِبّاچه و یجي یرکض علی الباب

کریم النفس یفرح نطب حضرته
کریم النفس بیده یمد سُفرته
--------------------
۵/
من أطبها ینرسم کلشي بخیالي
احسین أشوفن راسه فوگ الرمح عالي
و بعد رکضة زینب اتمر اعله بالي
و صوتها امن اتصیح ماظل بعد غالي

ونین فاطمه ابهاي الأرض ینسمع
ونین فاطمه عالمنحر و عالضلع
--------------------
٦/
والله من أدخل ضریحه أنسه کلشي
کون مکناسة ضریحه ایصیر رمشي
من أرِد لهلي أحس بالگوّه أمشي
أندعي من حضرته ایشیلون نعشي

إلي أمنیه امحلفه بأخوه الحسن
إلي أمنیه موتي اعله باب الصحن




• الّلهُـمَ صَل عَلَی مُحَمّد و آل مُحَمّد
--------------------

• مُحبّي الرادود قَحطانْ البْدیري
• للقصائد المکتوبة

@qahtanqasaed

📜قصیدة: [ مجنون ]

🎤أداء الملا قحطان البدیري
🎤 و الحاج علي باشا
🖋الشاعر: کرار حیدر الخفاجي
📅لیلة ۱۱ ذي القعده ۱٤٣٧ هـ.
📎میلاد الإمام الرضا علیه السلام
--------------------
المستهل:

مجنون و عاشگك چن کلشي بیّه
یالرضا إرضا علیّه مجنون
--------------------
۱/
بیك مجنون العقل
من محبتك ما أمل
یالرضا و طبع الیحب مجنون
ابماي حبك یرتوي
گلبي شیعي و رَضَوي
و اعله گلبي ینکتب مجنون
حبك أحلی امن العسل
ما أعوفك للأجل
ما یهم لو أنحسب مجنون
مشتریك و ما بعت
اویاك باقي و ما مِلِت
حتی لو حبك ذنب مجنون

ویّاك لآخر أنفاسي أحبك
ما مشیت بغیر دربك مجنون
--------------------
۲/
کل سلاطین المِلل
ترکع ابابك خجل
و إلّذي ما یعرفك مجنون
انت سلطان الأمم
سلطتك نار ابعَلَم
سیّدی و الخالفك مجنون
انت یا شمس الشموس
غرّگِت بالخیر طوس
خصمك الما أنصفك مجنون
أرد أوصفك سیّدی
حایر ابیش أبتدي
و یا کلام الیوصفك مجنون

سلطان تفتر الدنیا اعله إیدك
قسم کلمن ما یریدك مجنون
--------------------
۳/
عاشگك گبل المهد
یالرضا لهسه و بعد
عشگك بعیني انفضح مجنون
آنه بالذر عاشگك
ابدنیتي ما فارگك
جفني أول مَنْفِتح مجنون
تاج راسي و لو تصیر
اتراب لجدامك أصیر
و بیك هنیاله الصُبَح مجنون
ما یبعدوني قسم
الحب حلاته اتضحّي دم
خلي نحري ینذبح مجنون

أفدیك بنفسي و أموالي و بنیني
و آنه مکتوب بجبیني مجنون
--------------------
٤/
مرقدك مأوی البشر
اللي ما زارك خسر
عطرك ایخلي العقل مجنون
أرد أجي لزیارتك
و أشم ریحة تربتك
عبدك الآن و قبل مجنون
و آنه یم بابك أجیك
یبو محمّد أرتجیك
حاشه چفّك ما یذل مجنون
حضرتك جَنْةِ العُلی
هیّمت کل المله
شایب و شاب و طفل مجنون

مشتاگ أشتم بصحنك نسایم
و انت تکتب إسمي خادم مجنون
--------------------
۵/
کل طلب مهما صعب
بس من أهله ینطلب
و جیتك أطلب طلبتي مجنون
عندي چم حاجه و حلم
لچن بس واحد مهم
و أنا ابهذة حاجتي مجنون
أمنیه طول السنین
أظل خادم للحسین
و کون أموت ابخدمتي مجنون
الله لا یحرمني لا
من زیارة کربلا
و بیها أختم دنیتي مجنون

محتاج یاللي أقرب من وریدي
و ما أمد لغیرك إیدي مجنون




• الّلهُـمَ صَل عَلَی مُحَمّد و آل مُحَمّد
--------------------

• مُحبّي الرادود قَحطانْ البْدیري
• للقصائد المکتوبة

@qahtanqasaed

📜قصیدة: [ سلطان المجد ]

🎤أداء الملا قحطان البدیري
🖋الشاعر واثق العیساوي
📎میلاد الإمام الرضا علیه السلام
--------------------
المستهل:

سلطان المجد و العزه معناك معناك
مشهد ماتصیر الجنّه لولاك لولاك
بسمك شرّفتها و ما یوم اگصدتها
لولاك لولاك
⭐★⭐🌼⭐★⭐
۱/
یگولون الفرح لو دگ علی الباب یجیبلنه الأماني
و أیام العمر ابّین الأحباب محسوبه بثواني

و أیام العشتها من عمري و شفتها
مو منّه احسبتها تمر طیف الأفراح
الفجر لمّن أزورك یغسل وجهي نورك
فرح همّي و سرورك و لا عیش بالجراح

کل خطوه ابضریحك جنّه مولاي مولاي
أحس طعم العسل من صحنك الماي الماي
دواي و أمنیاتي و لا معنی لحیاتي
لولاك لولاك
⭐★⭐🌼⭐★⭐
۲/
إجیتك و الیجیك امفارگ الناس یا دنیا التِلِمّه
أشِمَّنّك نفس بس غیر الأنفاس عطر الجنّه أشِمّه

بضریحك لیل أتاني ملاذي و بي کیاني
عفت دمعه بمکاني تنادیك و تحاچیك
رساله و بیها اسمي أخطّها و حبري دمّي
کتبت اعلیها همّي و الهموم تبچیك

من أشکي بضریحك أرفع الراس الراس
ترضه اشلون أعوفك و أشکي للناس للناس
صعبه و إنت موجود درب الوفه مسدود
لولاك لولاك
⭐★⭐🌼⭐★⭐
۳/
أثر جدمك إذا ظل فوگ التراب یبو محمّد کرامه
و نور ابگُبتك یا نسل الأطیاب للتایه علامه

ذهب في محتواها شمس تشرق ضواها
کل اللي إجاها بالهموم و الدموع
بالهم گضّه عمره و تعب من کثر صبره
الحسره اتچوّي صدره و الآهات بالضلوع

بحیاتك و بمماتك تسمع الآه الآه
و الیتعنّه لیك اشلون تنساه تنساه
مضیفك دومه مفتوح و أبد ماتطیب الجروح
لولاك لولاك
⭐★⭐🌼⭐★⭐
٤/
إجیت و مولدك چن عالسمه ایدور ضوّاها اللیالي
مو کل نور مثلك ینحسب نور لا والله یغالي

کل الکون فرحان یردّد اسمك آذان
یا وارث القرآن بالورود أهنّیك
اللیله بفرحة العید ویّه الحب مواعید
بعین العالم اجدید بمولود فرح بیك

ابیات الفرح أقراها آیات آیات
هیهات الیحبك ینسه هیهات هیهات
اشلون المثلك أنساه أعیش ابغربه و ابآه
لولاك لولاك
⭐★⭐🌼⭐★⭐
۵/
أحاچي اجروحي أگلها ها یالجروح یمته الفرح یمته
تگلي للرضا و ابمشهد انروح دواه انشوفه کلنه

الجنّه اتطفي کل نار یَسِرّ و شایل أسرار
أوصفك بیش محتار بمولودك شنادیك
باچر یوم الإحساب أریدن منّك اکتاب
تسجّلني اویه الأحباب یمولاي أمل بیك

باچر عطرك علی اهدومي یلگوه یلگوه
یعرفونك شفیعي و ذنبي یمحوه یمحوه
متخلّيني محتار وحدي و أدخل النار
لولاك لولاك




• الّلهُـمَ صَل عَلَی مُحَمّد و آل مُحَمّد 🌹
--------------------

• مُحبّي الرادود قَحطانْ البْدیري
• للقصائد المکتوبة

@qahtanqasaed

📜قصیدة: [ عيدك مبارك ]

🎤أداء الملا قحطان البدیري
🖋الشاعر حیدر النجفي
📅لیلة ۱۱ ذي القعده ۱۴۳۹ هـ.
📎میلاد الإمام الرضا علیه السلام
--------------------
المستهل:

بالفرحه انذاعت اخبارك
و اهتفنا عیدك امبارك
فرحه تتجدد بسم أبومحمّد
و اهتفنا عیدك امبارك
⭐⭐⭐🌼⭐⭐⭐
۱/
بالسمه انذاع الخبر
اللیله سلطان الدهر
نوره عالدنیا انتشر حل علینا
نورك الضوّه الفلك
ثغر أبوك ایقبّلك
و الفرح کله إلك یا ولینا
لهذا نور الهاشمي
یا شفاه اتبسّمي
إلك بالحب ننتمي سَرَبینا

من هاشم نور والینا
و للکاظم کلنا هنینا
و الزمن غرّد بسم أبومحمّد
⭐⭐⭐🌼⭐⭐⭐
۲/
یا ملائك رتّلي
هذا نور الله الجلي
و لیك یا ثالث علي هذي بیعه
هاي بیعه عن یقین
إلك من المؤمنین
یالرضا بطول السنین إلك شیعه
یا أمیر الرافضه
حبك الباري أفرضه
کنز حبك یالرضا ما نبیعه

و بحبك کوکب الثامن
و بحبك کل محب آمن
کل محب یسعد بسم أبومحمدّ
⭐⭐⭐🌼⭐⭐⭐
۳/
بحبك القدسي نطوف
یمك إحسبنا ضیوف
یالرضا انت الرئوف رحمه إلنا
بهاي فرحتنا نجیك
ماترد الیعتنیك
نقسم ابـ أمك علیك ماتردنا
نعمه عدنا اولایتك
و شمس عزنا گبتك
و هاي ساحة حضرتك أحلی جنّه

من بابك سهله طِلبتنا
من بابك تگضي حاجتنا
و کل دعا یصعد بسم أبومحمّد
⭐⭐⭐🌼⭐⭐⭐
٤/
یالرضا بطول الزمان
حضرتك لینا الأمان
هیه مفتاح الجنان أسمه غایه
یا کهفنا امن العذاب
و الأمل یوم الحساب
انت یا عدل الکتاب أعظم آیه
امحبتك کنز الکنوز
بیها عالمعبر نجوز
آخره و دنیا نفوز بالولایه

بالمحشر عینك اعلینا
بالمحشر انت تنجینا
و الگلب یبرد بسم أبومحمّد
⭐⭐⭐🌼⭐⭐⭐
بیت أبوذیه/

ألف هنیاله من زاره و صلّه
بضریحه و من طلب حاجه و صلّه
الرضا متعلق بروحي و صلّه
الوصل ماینگطع حد المنیه




• الّلهُـمَ صَل عَلَی مُحَمّد و آل مُحَمّد 🌹
--------------------

• مُحبّي الرادود قَحطانْ البْدیري
• للقصائد المکتوبة

@qahtanqasaed

📜قصیدة: [ بكاء جوارحي ]

🎤أداء الملا قحطان البدیري
🖋الشاعر علي عسیلي العاملي
📅شوال ۱٤٣٩ هـ.
📎لیالي استشهاد الإمام الصادق علیه السلام
--------------------
المستهل:

یا ربِّ قَوِّ علی البُکاءِ جَوارِحي
و اشدُد علی قصدِ الحُسینِ جَوانِحي
حتی انقِضائي یَبقی رَجائي
یَبقی رَجائي بابُ الحُسین
--------------------
۱/
مِقدارَ ما في القلبِ یا اللهُ مِن لَوعه
إنّي أنا المُضطَرُ و المحتاجُ للدمعه
لیسَت کـ شَيءٍ یُشتری کلّا و لا صَنعه
لکِنَّها " مَــنٌّ " مِنَ الصِدیقَةِ البَضعه

مَحرومةٌ عینُ الّذي لَم یُرزَقِ
فَـ علی عُبَیدِكِ یا بَتولُ تَصدّقي
رِزقي بُکائي یَبقی رَجائي
یَبقی رجائي بابُ الحُسین
--------------------
۲/
تَحتاجُ عَیني دمعتینِ لِأعرِفَ الرّبّا
الدمعةُ الأولی لِکَي أمحو بِها الذَّنبا
و الدمعةُ الأخری تَقودُ بِنُورِها القلبا
حتّی تُصَبَّ علیهِ رحمةُ فاطِمٍ صَبّا

إن صارَ قَلبُكَ بینَ أیدي فاطِمه
إبشِر بِتَوفیقٍ و حُسنِ الخاتِمه
فیها بَقائي یَبقی رَجائي
یَبقی رَجائي بابُ الحُسین
--------------------
۳/
و أنا المُسيءُ أنا الّذي حتّی أنا ضِدّي
عِندي و لکِن صَفحَتي خَجلَی بِما عِندي
مَن ذا أکونُ لِأذرِفَ الدمعاتِ في خدّي
في لَحظةٍ فیها أشارِكُ دمعةَ المَهدي

القَائمُ المَهديُّ حتماً یَحضَرُ
و إلی عُیونِكَ حینَ تبکي یَنظرُ
یَدري دُعائي یَبقی رَجائي
یَبقی رَجائي بابُ الحُسین
--------------------
٤/
کُلٌّ لَهُ تَسبیحُهُ کَي یَشکُرَ الباري
و العینُ تشکُرُ ربّها بالمَدمعِ الجاري
تَبکي علی مَحبوبهِ في کَربلا عاري
للهِ کَیفَ الشَمسُ تکوي النورَ بالنارِ

یَومَ اللِقا طُوبی لِعینٍ هامِله
قَد بَلّلَت شَفَةَ الحُسینِ الذابِله
جِفني سِقائي یَبقی رَجائي
یَبقی رَجائي بابُ الحُسین




• الّلهُـمَ صَل عَلَی مُحَمّد و آل مُحَمّد
--------------------

• مُحبّي الرادود قَحطانْ البْدیري
• للقصائد المکتوبة

@qahtanqasaed

📜قصیدة: [ بلا كلام ]

🎤أداء الملا قحطان البدیري
🖋الشاعر مصطفی الصائغ الکاظمي
--------------------

ابلا کلام و لا عتب
یحرگ سنابل شوگ بچفوف الیتاني
و لا رسالة عشگ خضره
و لا جرح ینزف أماني
جیتك و ممشیت خطوه
و گلبي بجناحه اعتناك
و آنه ضلّیت بمکاني
و بنتظارك روحي شمعه
تنتظر دمعه اعله دمعه
و گطّع چفوف الأمل سیف الثواني
★★★⭐★★★

و تشرب الساعات عمري
و مسمعت صوتك بذاني
و آنه أشرب کاس صبري
و أغفه بوسادة زماني
براسي تتزاحم سوالف
و عالبحر کل جمعه واگف
لحظه حایر لحظه خایف
و أسألك یالمبعد اشهالغیبه
و بنتظاري الموت یاخذني و یردني
أدعي ربي و انت تسمع
بلکي یرجع بلکي یرجع
حِن اعله حالي و تعال
★★★⭐★★★

أحسب أیامك نزیف
و گطره گطره
تنزل ادموعي بدعاء الفرج لجلك
گطره گطره
کل حرف أزرع دمع
یالمهدي و یخضّرلي شجره
قَذیت عیني بغیابك
و الجفن مابیه عبره
و مثل حرث الگاع أحرث روحي
یالملگاك مطره
و ما لفت منك سحابة شوگ الیّه
و لا خبر منك و لا مرسال إجاني
مِنتظر یالمُنتظر یصرخ لساني
ابلا کلام




• الّلهُـمَ صَل عَلَی مُحَمّد و آل مُحَمّد
--------------------

• مُحبّي الرادود قَحطانْ البْدیري
• للقصائد المکتوبة

@qahtanqasaed

📜قصیدة: [ معنی الفرح]

🎤أداء الملا قحطان البدیري
🎤 ملا نصیر الکربلائي
🖊الشاعر میرزا عادل أشکناني
——————————

اشما تباعدني البلاد حتی لو دهري اختلف
تبقی کل أیامي عاشر او کل مکان ابعیني طف
——————————

حتی لو جسمي ابتعد روحي تظل یمك تحف
و آنه واعدتك جناحي ابغیر جوّك ما یرف
اجروح البگلبي چثیره لچن جرحك یختلف

اویاك یا أقدس جرح
عندي سر ما ینشرح
و آنه ساکت منفضح

اشلون لو أحچي او أگول اشلون لو سرنه انکشف
تبقی کل أیامي عاشر او کل مکان ابعیني طف
——————————

وین ما ینزل رکابي چنّي نازل بالطفوف
ألتفت بربع جهات او غیر شخصك ما أشوف
صرت ما أسمع بذاني غیر رنّات السیوف

او صرت بعدک ما أحس
کلشي أشوفه بالعکس
مظلمه ابعیني الشمس

و البدر لیلة تمامه ابعیني أشوفنّه انخسف
تبقی کل أیامي عاشر او کل مکان ابعیني طف
——————————

آنه من یوم العرفتك طلّگت معنی الفرح
او کلشي مربوط اویه غیرك من وسط گلبي انمسح
صدّگ ابغیر الجرالك أبد فکري ما سرح

ذکریاتي و الصور
راحن و ماظل أثر
بس بقت صورة نحر

او عین نابت سهم بیها او علم مرمي او یمّه چف
تبقی کل أیامي عاشر او کل مکان ابعیني طف
——————————

آنه کل ونسه أعتبرها ابغیر أبوالیمّه حرام
و اللي ما جرّب غرامك لا یسولف عالغرام
الدنیا لو مابیها انته چا عله الدنیا السلام

بیك یحسین الجمال
مدري واقع لو خیال
یا جلالة ذوالجلال

العلگمي ظامي إجاك او من عذب مایك غرف
تبقی کل أیامي عاشر او کل مکان ابعیني طف
——————————

بین أحبابي او هلي عایش لچن عایش وحید
حتی لو بالجنّه أنزل ما أظن أصبح سعید
إخذ کلشي من حیاتي غیر دمعي ما أرید

إخذ عمري او دنیتي
خلني آنه او دمعتي
بیها أسلّي وحشتي

یا طعم یبقی لحیاتي لو دمع عیني نشف
تبقی کل أیامي عاشر او کل مکان ابعیني طف
——————————

گلبي یستوحش تره ابغیر المدامع و النحیب
و أشعر ابروحي ترد من أسمع الونّة خطیب
من أدگ صدري اویه رادود أشعر ابصدري یطیب

ابدنیتي یکفیني بس
شلتك ابصدري نفس
و ابوجودك گلبي حس

یا نبض دلالي لو لا امحبّتك نبضي وگف
تبقی کل أیامي عاشر او کل مکان ابعیني طف




• الّلهُـمَ صَل عَلَی مُحَمّد و آل مُحَمّد
--------------------

• مُحبّي الرادود قَحطانْ البْدیري
• للقصائد المکتوبة

@qahtanqasaed

📜قصیدة: [ أعوذ بالله ]

🎤أداء الملا قحطان البدیري
🖊الشاعر میرزا عادل أشکناني
📆شوال 1439 هـ.
📎لیالي استشهاد الإمام الصادق ع
——————————
المستهل:

أعوذُ باللهِ مِن عَینٍ لا تَدمَع .. قَلبٍ لا یَجزَع
علی الحُسین ابنِ علي

——————————

ابآیة الکُرسي .. عَوّذت عیني .. خاف ما تِدمَع
اشگد دعیت الله .. یِمسَح ابگلبي .. خاف ما یِخشَع
کُل جَزَع یُکرَه .. بس لبوالیِمّه .. یُستَحَب أجزَع
امصاب أبو الأکبر .. ابجبل لو یِنزِل .. انشوفه یِتصَدّع

البَلاء أنواع موت او نایِبه او بین
او أشد نوع الینحرم یبچي علی حسین

اُریدُ لِلجَفنِ أن یَبقَی مِهراقا .. یُجري الأحداقا
علی الحُسین ابنِ علي
——————————

الدنیا مَخطوره .. یا مَعَاذ الله .. مِن عواقِبها
اشگد بَشَر قَبلي .. ابعین ما تِبچي .. الله عاقبها
الهالسبب أدعي .. الفاجعه ابگلبي .. اتحِط مَخالِبها
خوفي لا أبرَد .. عن حزن زینب .. او عن مصایبها

ادعیت ربّي یحرگ ابنُص گلبي خیمه
حتّی تُبقی للقیامه اعیوني غیمه

فَدَمعَتي و البُکا تُذکي في القَلبِ .. نیرانَ الکَربِ
علی الحُسین ابنِ علي
——————————

خلها آهاتي .. تِکبَر او تِکبَر .. اشما کُبَر عُمري
خلها حسراتي .. تنگلُب حافِر .. او تسحگ ابصدري
علیمن أتصبّر .. و أمنع ادموعي .. عالوجِن تجري
و ابظُهر عاشِر .. یا وِسَف ذِبحَوا .. ( سُورهَ الفَجرِ)

( وَ لَیالٍ عَشرَ) خَلّت عُمري بس لیل
عاللي جسمه اترضرضه عشره امن الخیل

فَیا لَیالي الأسی عادَت ذِکراكِ .. فَلیَبكِ الباکي
علی الحُسین ابنِ علي
——————————

ابصدري لو شایل .. مو گلُب صَخره .. اتذوب هالصَخره
لو بِدَه اونیني .. الطود من صوتي .. ینکِسِر ظَهرَه
امن أذکُر احسیني .. عالرُمح راسه .. او جسمه عالغبره
الطَعنه عالطَعنه .. الضَربه عالضَربه .. الطَبره عالطَبره

اجروح أبوالأکبر چثیره بس أشدها
زینب إخته ظلّت أخلافه وحدها

وا لَهفَتي في السِبا کَم کانت تُضرَب .. کَم کانت تَنحَب
علی الحُسین ابنِ علي
——————————

ألبَس الأسود .. حتّی دلّالي .. لا یظل أسود
او عالّذي اتعفّر .. خَدّه بالغبره .. دمعتي اعله الخَد
أمشي عالجمره .. خاف بضلوعي .. جمرتي تُبرَد
و أجرح ابراسي .. خاطر ابروحي .. جرحي لا ینشَد

إخذ شوفي او لو رِدِت إسلِبني سَمعي
إخذ کلشي بس خلّیلي دَمعي

فَمَن یَلُمني إذا اُزهِقُ النَفسا .. أطبِرُ الرأسا
علی الحُسین ابنِ علي




• الّلهُـمَ صَل عَلَی مُحَمّد و آل مُحَمّد
--------------------

• مُحبّي الرادود قَحطانْ البْدیري
• للقصائد المکتوبة

@qahtanqasaed

📜قصیدة: [ يعرابي ]

🎤أداء الملا قحطان البدیري
🖊الشاعر مصطفی العیساوي
📆 لیلة ۳ محرم الحرام ۱٤٤٠ هـ.
——————————
المستهل:

یعرابي یالگاصد للعراگ
ویّاك اخذ مرسال الفراگ
گلهم أبد ما غمّضت عیناها
بدیارکم بس رحمة الله اویاها
▪️▪️▪️◾️▪️▪️▪️

یعرابي أحلفك بالدمع و الما غفت من الآه
هاك اخذ مرسالي لهلي و احچیلهم عن فحواه
گلهم الغربه مو وطن الغربه فگد التهواه
هو الفگد لمّت هله یا سالفه اتفید اویاه

الچانوا أمس بالبیت یضوون
ودیلهم ویّاك العیون
العفتوها و اجروح الهجر مرساها
بدیارکم بس رحمة الله اویاها
▪️▪️▪️◾️▪️▪️▪️

یمسافر اسمع قصّتي و اخذ الرساله ابلا خوف
مکتوب بیها یا ضعن للقصّه ماتکفي احروف
او لو شفت مصباح الهدی گله الگلب ظل ملهوف
طبع الیفارگ یعرُبي یسئل العین اعله الشوف

طشیت شوفي ابخطوة النوگ
و غیر البواچي اعلیّه شیلوگ
ابحرگة گلب هاي الرساله أقراها
بدیارکم بس رحمة الله اویاها
▪️▪️▪️◾️▪️▪️▪️

آنه العلیله الودّعت ضحکاتها بدمع العین
یا عمّي من نار الهجر ماظلت بعمري اسنین
هنیالها العدها أهل لو عدها أبو مثل احسین
من یوم ما راح الضعن و آنه اسئل الوادم وین

ماشفتوا هودج هاله من نور
و ابیرغ العبّاس مستور
و عبّاس ماظن بنت أخو ینساها
بدیارکم بس رحمة الله اویاها
▪️▪️▪️◾️▪️▪️▪️

ابداعت ابنیتك لو رحت لاتنسه گلبي المکسور
أنخاك اسأل عن أخو ناغیتله ست اشهور
ظل یمي کاروك الطفل منتظره یرجعله النور
عبدالله لاچمني الگلب کلش خفت من عاشور

لاچمني گلبي و خایفه اهواي
لا سامح الله یاخذه الماي
لو ظال چا روحي التحن واساها
بدیارکم بس رحمة الله اویاها
▪️▪️▪️◾️▪️▪️▪️

یالماخذ اویاك العمر آنه أدري ما الهم دار
اتحاچیك بنت وادم عرش ربّك خلقهم أنوار
عنوانهم مثل الشمس واضح أبد لا تحتار
اسأل شکو ماي بنهر ما حاجه تسألّك مار

عنوانهم قرآن عالگاع
اخذ الرساله و ارجع ابساع
گلهم علیلتکم یعترة طه
بدیارکم بس رحمة الله اویاها



• الّلهُـمَ صَل عَلَی مُحَمّد و آل مُحَمّد
--------------------

• مُحبّي الرادود قَحطانْ البْدیري
• للقصائد المکتوبة

@qahtanqasaed

📜قصیدة: [ أماه ]

🎤أداء الملا قحطان البدیري
🖊الشاعر کرار حسین الکربلائي
📆 لیلة ۲ محرم الحرام ۱٤٤٠ هـ.
——————————
المستهل:

لَهفي علیكِ قد أتی شهري
اُماهُ قومي و اندُبي نحري
ثمّ اکتُبي أسماء
مَن جائني بَکّاء
▪️▪️▪️◾️▪️▪️▪️

یالوالده شهر الحزن هذي بدت أیامه
نشري قمیصي بالسمه خلها تطش آلامه
کل موکب اتحضّر إلي ناشر لحزني أعلامه
کل مجلس اتطبین إله سلمیلي عاللطامه

یَبکونَ مِن عامٍ إلی عامِ
اُماهُ اوصیكِ بِخُدامي
کفٌ لكِ قد شاء
مَن جائني بَکّاء
▪️▪️▪️◾️▪️▪️▪️

اتحضرین أدري ابمجلسي من ناعي بسمي ینادي
اتسجلین بَکّاء النحر لو وحده چان ابوادي
یالوالده عندي خدم حاسبها مثل اولادي
شعدهم وفه تجري الدمع حته ابوکت میلادي

حاشاكِ أن تنسي لهم دمعه
تجري علی أصابعي التسعه
یَندِبُ یا زهراء
مَن جائني بَکّاء
▪️▪️▪️◾️▪️▪️▪️

خدّام إلي یا فاطمه ماتنسه گطع المنحر
عایش اویاهم بالنفس مثل الهوه و بل أکثر
الیفگد أخو ما یبچي اله لچف الگمر یتذکّر
و الراح من عنده ولد ینصب عزا اعله الأکبر

قولي لهم یا أمّةَ الوَجدِ
أعمالکم مَقبولةٌ عندي
سَیرتقي العلیاء
مَن جائني بَکّاء
▪️▪️▪️◾️▪️▪️▪️

یالوالده الناس ابوکت بي راحت الحنیّه
ابشهر الحزن بس خادمي اتشوفینه حایر بیّه
لو یگعد ابآخر أرض تلگینه یبچي اعلیّه
یشعر دخل جنة عدن من یدخل احسینیه

فدمعَةُ العَینِ لها فضلُ
أکبرُ مِما یُدرِكُ العَقلُ
رزقٌ لهُ قد جاء
مَن جائني بَکّاء
▪️▪️▪️◾️▪️▪️▪️

خدّامي ما الهم شبه و أعدادهم ما تنعد
ابعاشورنه حته الطفل تلگینه لابس أسود
مجلس عزائي گُبّتي بي کل دَعا ما ینرد
الما یحضر ابمجلس عزا باب السمه اعلیه ینسد

للهِ أبوابٌ سَماویّه
مِفتاحُها الخدمه الحسینیّه
یُسألُ بالدُعاء
مَن جائني بَکّاء
▪️▪️▪️◾️▪️▪️▪️

أمّا الّذي عنده مرض بس یعترض عالخدمه
عاشور إجه لو ما یجي هذا الأمر میهِمّه
یهدیهم الله لخدمتي ادعیلهم یا یُمه
بس الیحارب خادمي ماتنبریله الذمّه

فَکُلُّ شَيءٍ ینتهي حقّا
إلّا عزائي خالداً یبقی
قد حاربَ الأعداء
مَن جائني بَکّاء



• الّلهُـمَ صَل عَلَی مُحَمّد و آل مُحَمّد
--------------------

• مُحبّي الرادود قَحطانْ البْدیري
• للقصائد المکتوبة

@qahtanqasaed

📜قصیدة: [ اقرأ ]

🎤أداء الملا قحطان البدیري
🖊الشاعر واثق العیساوي
📆 لیلة ۱ محرم الحرام ۱٤٤٠ هـ.
——————————
المستهل:

سورة حزن اقرأ و أون
خل الدموع اتسیل
بسم النحر بسم الگمر
نزّلها جبرائیل
ابغار الطفوف المُستقر
کل آیه مکتوبه ابقهر
نزّلها جبرائیل
▪️▪️▪️◾️▪️▪️▪️

من یقترب شهر الدمع و ایهل هلال النوح
من العرش ینزل ملك شایل قمیص اجروح
تمطر دمه اعیون السمه و اتخط اسم باللوح
و اینادي جبریل ابألم ‹ اقرأ › علی المذبوح


ماکو عذر و ابکل سطر
من سورة الآلام
ربّك خلق منحر نطق
فوگ الرمح أحکام
و من یحچي إعجاز النحر
کل آیه مکتوبه ابقهر
نزّلها جبرائیل
▪️▪️▪️◾️▪️▪️▪️

نفس القمیص التنذکر اوصافه بالقرآن
أول محرم بالسمه یرفع أذان أحزان
رجّع لیعگوب النظر بعد الفراق الچان
بس إحنه رد إلنه الدمع کلما محرّم حان

مثل الصُحُف من ینوصف
بأفق السما منشور
بي چم أثر من دم نحر
و اچّم ضلع مکسور
و داست حوافر عالسوَر
کل آیه مکتوبه ابقهر
نزّلها جبرائیل
▪️▪️▪️◾️▪️▪️▪️

الماي انجعل من عنده کلشي و صُبَح مقیاس
آیه و صریحه امنزّله تحفظها کل الناس
لکن شنو السر ما شرب عالمشرعه العبّاس
و ظل عایش امعاند نهر لسه ویفیض احساس

عکس البشر یم النهر
هو الوحید ابهاي
رغم الضمه صد للسمه
و شاف الحسین الماي
و مرّت علی اعیونه صور
کل آیه مکتوبه ابقهر
نزّلها جبرائیل
▪️▪️▪️◾️▪️▪️▪️

إذا الموؤدةُ سُئلت بعد النفخ بالصور
مقتوله انتِ ابیا ذنب تحچي و یجیها الدور
یطلع طفل یبچي و یون و ابنحره سهم الجور
عبدالله آني ابیا ذنب من رگبتي منحور

یحچي ابألم من السهم
یطلع ضعیف الصوت
أشرب ردت لکن ضگت
حر السهم و الموت
و ابدمي أکتب هالأثر
کل آیه مکتوبه ابقهر
نزّلها جبرائیل
▪️▪️▪️◾️▪️▪️▪️

ابراهیم ناره اللي طفت من هدّم الأصنام
چا ما تحن اعله الحرم حرگت علیها اخیام
صوت الصدی بالطف یجي و ایردد ابآلام
یالشایل السوط انتظر لاتقهر الأیتام

موقف صعب من تنضرب
طفله ابلهیب السوط
لو تنسبي و بنت النبي
چفها ابحبل مربوط
آیات خاطرها انکسر
کل آیه مکتوبه ابقهر
نزّلها جبرائیل



• الّلهُـمَ صَل عَلَی مُحَمّد و آل مُحَمّد
--------------------

• مُحبّي الرادود قَحطانْ البْدیري
• للقصائد المکتوبة

@qahtanqasaed

📜قصیدة: [ أسكن جراحك ]

🎤أداء الملا قحطان البدیري
🖊الشاعر الدكتور عادل البصيصي
📎 استقبال شهر محرم ١٤٤٠ هـ.
——————————

أسکُن جِراحَكَ نابِذاً أرجائَك
أنتَ أقتَرَحتَ علی البَقاءِ بقائَك
هذة حروفُ اللهِ آصِرَةٌ بِها
تَسعی إلیكَ و تَشتهي إملائَك
ــــــــــــــــــــ

یا أیُّها المعنی اللذیذُ قِوامُهُ
الأسمَاءُ غَنّت بالمُنی أسمائَك
تَمشي یُصَلّي الطفُ خَلفَكَ
یستعیدُ جِهاتِهِ یا مُتقِناً أنحائَك
ــــــــــــــــــــ

إقرأ صَباحَكَ مُستَفِزّاً
فَوقَ مَتنِ الوَردِ و أسکُب بالشَذی أندائَك
شَیبٌ بِطَعمِ الساکِبینَ نِقائهُم
یا أیُّها الشَیبُ أحترَفتَ نَقائَك
ــــــــــــــــــــ

شَیبٌ حَيٌّ تَصطَفیكَ مَواسِمٌ
ها قَد نَثَرتَ علی الربیعِ حَیائَك

▪️▪️▪️◾️▪️▪️▪️

إغرِس بوجهِ الماءِ حُلماً یانِعاً
وطَناً سَیَنمو یَستَطیبُ نمائَك
یا أینَ تَمضي و اصطِبارُكَ شَیِّقٌ
کَیفَ اختصَرتَ مع الشُموسِ لقائَك
ــــــــــــــــــــ

کَیفَ اختصَرتَ الضَوءَ یبنَ الراحلینَ
إلی هُناكَ فَهَل سَکبتَ ضیائَك
أ حُسَینُ أنقی مِن جِهاتِكَ کُلِّها
یا مَن نَشَرتَ علی النجومِ رِدائَك
ــــــــــــــــــــ

أتقَنتَ صبرَ الأرضِ عُمراً ناصعاً
و خَتَمتَ لَونَ الیانعیین سمائَك
عُمرٌ تَبرّأَ مِن خَریفٍ ساذِجٍ
أدفَنتَ في عُمرِ الفصولِ شِتائَك
ــــــــــــــــــــ

قَلبٌ تَعدّی الأفقَ لَونُ صِیامِهِ
أسکَنتَ في شَفَةِ القُنوتِ دُعائَك
الصَبرُ یأخُذُ مِن قِوامِكَ طَبعهُ
یدنو إلیكَ لِیَرتَدي سیمائَك
ــــــــــــــــــــ

طَعمُ الفَسائِلِ یَشتَهیكَ سُلالةً
شَمّاءَ فاکشِف للنَخیلِ إبائَك
أبناؤكَ الثُوّارُ و الشُعراءُ
و الأحلامُ ها هُم یَرقبونَ رِوائَك
ــــــــــــــــــــ

إعزِف أو إرحَل أنتَ لَحنٌ ناضِجٌ
فَأسبُق لِکُلِّ القادمینَ غِنائك



• الّلهُـمَ صَل عَلَی مُحَمّد و آل مُحَمّد
--------------------

• مُحبّي الرادود قَحطانْ البْدیري
• للقصائد المکتوبة

@qahtanqasaed

📜قصیدة: [ الحمدلله ]

🎤أداء الملا قحطان البدیري
🖊الشاعر مصطفی العیساوي
📆 لیلة ۱ محرم الحرام ۱٤٤٠ هـ.
——————————
المستهل:

الحَمدُلله باقي بسنیني عُمُر
أحسب أیام لمُحرّم و أنتظُر
الحَمدُلله و الشُکُر
▪️▪️▪️◾️▪️▪️▪️

ما أرید الدنیه هایه ردت عاشورك یهل
یا چبیر ابلا مُنازع یالعرفتك من یهل
یا بُخیت الدمع عینه الخاطر امصابك یهل

لو دمع عینك طاح و اتذکّر الطف
باچر اهناك اتشوف نص الحِمِل خَف

ربّك ایقدّر دمعتك بالعزاء
ایصیح دخلو عبدي جنّة کربلاء
جنّة احسین العمُر
الحَمدُلله و الشُکُر
▪️▪️▪️◾️▪️▪️▪️

اشمحله عمرك لو تخلصه بالمجالس و الحرم
و تبچي من تسمع مُخیّم محترگ فوگ الحرم
یا حلال الله یعشگي یالعشگ غیرك حرم

مارید أوَصفَك ماي خاف ألچم امتون
انته أهم امن الشوف عد هاي العیون

شلّي بعیوني إذا ما واسِتَك
حسین خلّیني أظل ابخدمتك
عمري خیمه ابلا جَمُر
الحَمدُلله و الشُکُر
▪️▪️▪️◾️▪️▪️▪️

اهواي بیك امن المَحنّه حسین یا أول وطن
یا أثر ربّك ابأرضه کلهن الیومك وطن
حسین أحلفك بالقراهن و البچه اعلیهن وطن

صاح اعله زینب صوت بیه نلطم الهام
من قرا ابنص الخوف یا زینب الشام

من قرا زینب خذوا منها گمر
نامت اعیونك و عیني للسهر
کون أواسي البلیسُر
الحَمدُلله و الشُکُر
▪️▪️▪️◾️▪️▪️▪️

عایش ابخیرك حیاتي و ماردت غیرك هوه
فاز الیسمونه خادم و النسه احسینه هوه
سامع الآیه الکریمه ‹ في ذَوي القُربی › هوه

مُختصر بالقرآن شفت الإمامه
انت الأصل یحسین و الطف علامه

غیر الحسین الأصل و المحتوی
الما یعرفك هو و الماکو سوی
ابدرب الحسین أستقر
الحَمدُلله و الشُکُر
▪️▪️▪️◾️▪️▪️▪️

حسین یا دنیة محنّه ابمجلسك لازم أمُر
شهد بین الریج حُبه لو حصل منّه الأمر
اشما عشت أبقی آنه خادم تحت تنفیذ الأمر

یحسین ألف هنیال کلمن یخدمك
و ابدفتر الخدّام صار إسمه یمك

ابدفتر الخدمه إذا إسمي انذکر
ألف هنیالي عشت هذا الفخر
ابخدمتك کون أستمر
الحَمدُلله و الشُکُر



• الّلهُـمَ صَل عَلَی مُحَمّد و آل مُحَمّد
--------------------

• مُحبّي الرادود قَحطانْ البْدیري
• للقصائد المکتوبة

@qahtanqasaed

📜قصیدة: [ دنيا بلا علي ]

🎤أداء الملا قحطان البدیري
🖊الشاعر كرار حسين الكربلائي
📆 ليلة ٩ محرم الحرام ١٤٤٠
——————————
المستهل:

یا دنیا هالواحد و أخذتیه
یا دنیا ماعدني ولد غیره
یا دنیا جیت لکربلا اویاه
و ابلا علي راح أمشي للدیره
مو حلوه دنیا ابلا علي آه
▪️▪️▪️◾️▪️▪️▪️

أنا لیلی العله إبني ما نمت لیله
تنام الناس و آنه أسهر و أباریله
چنت لیلی ابوجوده او هسه مو لیلی
خلیني یدنیا ابراحتي أبچیله

صارت دللولي نواعي
و ابمِعوَل افراگه کسر ضلعي
فارگني أبو حلو المحاچي
او جرحي إذا یغفه یفز دمعي
و امنین أجیبنه بعد راح
▪️▪️▪️◾️▪️▪️▪️

الفرح متطشر و أحزاني ملتمه
عاشرت الدمع و امهاجره البسمه
اشحلاة اولیدي چان ایگول یا یمه
یا ماي او تبدّه الماي شیلمّه

اولیدي تلوگ البسمه بشفاه
هالدم و لا لایگ عله اولیدي
أرد أغسل اجروحه بالدموع
جرح لجرح و أحسبهن ابإیدي
عمري رحل بدر السعد لیل
▪️▪️▪️◾️▪️▪️▪️

عساني میته و لکربلا ما جیت
اجیت أم علي و هسه ابلا علي ظلیت
لبیته اشلون أطب و هو مو بالبیت
اعیوني الما تشوفه تنعمي یا ریت

التفگد ولدها سامعه اتموت
یا دنیا و آنه لموتي منتظره
چان النبض و أتنفّس اویاه
و ابلا نبض دلّالي شیصبره
بعد الولد شوفي انفگد آه
▪️▪️▪️◾️▪️▪️▪️

انچوت روحي یدنیا ابنار هجرانه
راح او راسي شیّب گبل میحانه
اشلون اعیوني من اتشوف صحبانه
ریحانة علي و ماتت الریحانه

وجهه حرام ایلوحه التراب
ابني ترف یا مگبره اتضمّه
و اعصابتي بیدي و أنادیه
ظهري کسرته و رحت یا یمه
بضلوعي ما تخمد أبد نار
▪️▪️▪️◾️▪️▪️▪️

دعیت الله یحل یومي گبل یومه
الیموت اولیده خله ایموت ما لومه
تغیّر حالي بعده حیل مهظومه
من أشتاگ لبني أشم بهدومه

أتمنی یگرب موتي و أرتاح
مو دنیا هذي و ابني مو یمي
راحت حیاتي من علي راح
من عفته طلعت روحي من جسمي
روحي و ترکني بس جسد شال
▪️▪️▪️◾️▪️▪️▪️

راح الحیل یا دنیا اشبعد بیّه
أحط إیدي اعله ظهري و أمشي محنیّه
ما أنسه رحت من بعده مسبیّه
راسه اعله الرماح او ینحب اعلیّه

یا دنیا ما قصّرتي ویّاي
خلیتي ریجي امن الهظم یابس
عگب المهابه و عزّتي ذیچ
لنّي ابدواوین و مجالس
عایفني وحدي ابلا سند لیش




• الّلهُـمَ صَل عَلَی مُحَمّد و آل مُحَمّد
--------------------

• مُحبّي الرادود قَحطانْ البْدیري
• للقصائد المکتوبة

@qahtanqasaed