من في الباب وماهي قلة الذوق هذه الساع ما دريت الا وواحد زبط الباب لما فتحه اقتحمو بيتي ودخلو ما يقارب خمسه عسكر لابسين ميري اسود ومقنعين لاول مره ابسر عسكر بتيك الاحترافيه وذيك السلاح وعمالقه واضح عليهم التدريب واثنين وجهو السلاح لا عندي وبيقلي على بطنك على بطنك تمددت على طول وبنقل خير خير يا خبره ما به وثلاثه دخلو بيتي وقتها حسيت قلبي عيتوقف عيفجعو المره وابني وبنقول من انتو مابه ماابه وانا بنصيح قلي سكته ولا نخس قبل ما اقتلك حسيت انهُ عيقتلني فعلاً سكت مابش عشر ثواني خرجو الثلاثه من البيت وقالو ابيض.. ابيض الاثنين الاعسكر اللي موجهين السلاح لا فوقي انسحبو بيمشو للخلف وهم موجهين السلاح لا عندي وخرجو من الباب قمت على طول وانا خايف والمره حقي قدهي عند الباب الداخلي بتبكي بتقل مابه مابه ! قلت ادخلي يا مره ادخلي وقمت خرجت سريع لقيت واحد فوق طقم لابس ثوب وكوت وفي يده جهاز بيقل حوطو على الحاره كلها وفتشو الحاره بيت بيت قلت له خير يا اخي مابه من انتو وكيف تقتحمو بيوت الناس كذيه قال ادخل بيتك سكته وممنوع احد يدخل ويخرج من بيته وقال لسواق امشي يا ابني وبعده اثنين طقومات ملان عسكر والرجال ملان الحاره دخلت البيت وانا خايف بنحاول اقفل الباب ما قدرتش اكتسرت المغلقه طرحت حجر على باب بيتي من داخل ودخلت عند باب البيت الداخلي في الحوش بنقل للمره سعليش يا مره مابه شي وهي بتبكي وانا مطنن وخايف قوي من هو ذيه اللي دخلته بيتي ولمه العسكر هولا كلهم بيلاحقوه طيب لو يدرو انهو عندي ما عيقع بي و عائلتي طيب ليش البنت راقده مع انهُ كان يجري وهي في حضنه
وصياح ولما طرحها في الديوان وشلها البنت ولا تحركت اكيد مغمى عليها او ميته هذا مش نوم، يا الله خارجني من تيه المصيبه ...

يتبع...

#في_بيتي
#منيرالنقيب

قالت كنت اشتي اتصل لا عند عمي واقله باللي احنا فيه بس ما بش معك رصيد، شليت التلفون من يدها  وقلت لها الحمد لله ان مابش رصيد هيا اخطي افعلي العشا، ورجعت لديوان وفي راسي الف والف سؤال بس كان كل همي كيف اتخارج من المصيبه اللي انا فيها واشتي الرجال يرحله قبل ما اتورط اكثر بمشاكله وصلت لديوان والرجال معه اوراق طارح لهن في الارض ولابتوب وجهاز اسود صغير فيه لمبات بتومض بالوان مختلفه لاول مره ابسر جهاز كذيه  شكله ساع الخازن الصغير بس مشو خازن خرج القلافد هولا كلهن من الشنطه حقه دخلت وقلت له شويه يا اخي ويوصل العشا وابسرت البنت الصغيره وهي بتتنكوز وهي راقده وبتتحرك بطريقه غيربه قربت منها وبنقله خير يا اخي مال البنت مالها او هي مريضه، فلت الاوراق والابتوب و قام سريع لا عندي مسك يدي وقال ما فيها شي  ابعد  منها وما تقربش منها مره ثانيه واجلس بشرح لك كل شي، قلت ناهي اهداء يا اخي انا خايف على البنت  ورجعت جلست في طرف الديوان جنب الباب والرجال مشغول بالابتوب والاوراق قلت له ذلحين يا اخي قلي مابه مشو سابر الوضع اللي انا فيه صبري نفذ ما شتحملش اكثر  وعليا وعلى اعدائي، قفل اللابتوب ودخل الاوراق سريع لشنطه والجهاز دخله في جيبه وخرج تلفون فعل به رساله وقفله وكسر التلفون بيداته ودخله الشنطة  والمره حقي  دقت باب الصاله اجي اشل العشا، شليت العشا ودخلت قلت يا اخي عشا ومعذر من خير، قرب واتعشا معي كان ياكل بشراهه وبطريقة سريعة وكل شويه عينه على البنت كملنا نتعشي، وقلي يا اخي انا شغال في مكان مقدرش اذكر
اسمه لان محد يعرفه ، وعرفت شي في الشغل انها عتضر البلاد والعباد فوق ما قدحنا فيه من بلا فضطريت اشل الشي هذا واخفيه لان الشي هذا انا اللي اخترعته بس اول ما عرفت انه عيبتاع او يُستخدم ضدنا اضطريت اشله واخفيه فقامو بخطف اهلي كلهم وما قدرت اهرب الا ببنتي تيه اللي قبالك ولا عاد تسالنيش اي سؤال ....

يتبع...
واشكر كل شخص بيتفاعل ويسوي مشاركة للمنشور ...

#في_بيتي
#منيرالنقيب

كملت رواية #في_بيتي للمبدع #منيرالنقيب
طبعا له عدة روايات ثانية

تحبوا نستمر ڣــې نشرهن او لا? !!

كمان هاتوا لنا انطباعكم عن رواية #في_بيتي وايش رايكم فيها بشكل عام

#في_بيتي2

_ شوية من احداث قصة #في_بيتي2

متحمل لاخي احمد من ارجله واخي صلاح قبالي متحمل احمد فوق ضهره وماسك بيداته ، ابسرت لرجلي وانا حافي وقد اختلط فيهن الدم على التراب وبنزبط الحجار باصابيع ارجلي وانا بنخطي بسرعه وبصعوبه فوق الارض تيك اللي كلها حجار واشواك وتراب ، سمعت مره بتصيح التفت يمني ابسرها وهي بتصيح باب بيتها بكل صوتها ياااااااااااااقهررر قلبي عليك يا ابي وروحي قتلو مرزحي وضهرررري وصاحت بكل صوتها يازوووجي لمادوخت ...

#في_بيتي2

الخميس الساعه 8:00 الليل ...
بنزل البارت الثالث ، وعنرجع نعيش الحماس حق احداث القصة بطريقة فوق الخيال

#منيرالنقيب

متابعي رواية #في_بيتي3 للكاتب الاكثر من رائع #منيرالنقيب

ايـٌِـٌٌِـωhατٌِـٌِـٌٌِـٌِش رايكم ڣــې الرواية لحد الان
الكاتب طلب يبسر ارائكم و اي ملاحظات او انتقادات

والي مابيتابعها انصحه يتابعها ڣــې قناة روايات صنعاء القديمة
@oldsana2

الي كان يتابع رواية #في_بيتي للمبدع جدا #منيرالنقيب وكان مثلي منتظر لنهايتها يدخل الان قناة الروايات 😎
@oldsana2

لان الكاتب دمج الرواية مع روايته الاخيرة #يمني
و اصبح اسمها #في_بيتي_يمني

انطلقوا لهناك سررريع 😍

اللي سألوني ع رواية #في_بيتي للمبدع #منيرالنقيب

اليوم بدينا ننزل البارت الجديد ڣــې قناة الروايات
@oldsana2

ﻣــڼ عادوا متابع رواية #في_بيتي للكاتب #منيرالنقيب

وصلنا للفصل الاخير .. تابعوها هنا

https://tttttt.me/oldsana2

قمت لبست الثوب والعسيب وبنبسر للكوت اللي خدعني في العيد الاول ، وقلت والله ما اشلك ، المهم لبست كوت ثاني وسرت صليت صلاة العيد ورجعت اتخبي في البيت ،ايوه اتخبي من الجهال حقنا عيسمعو بي يشتو عسب وانا مابش معي الا حق عسب عمتي وطارح لها في يدي قدنا حذر من الجيوب حق الاكوات ، المهم سرت سلمت ورجعت دخلت راسي من باب الحوش وبنتشاقر اذا ما بحد الجهال اهرب للغرفه واقلد اننا راقد ، ابسرت ما بش احد ، حمشت الثوب وبنتلفت يمين ويسار خلوني ساع السارق الله اكبر عليهم ، ما دريت الا وهم مرصوصين قبالي وبيبسروني بنضرات يا غارة الله بس ، وبينهم ثنتين بنات اخي التوام ، والبتول طارحه ليد في خصرها ومدت يدها الثانيه لا عندي وقالت هيا سريع ، قلت ماهو ما تشتي ، قالت بطل مسراقه هذا ثاني عيد ما تعسبناش ، هيا ادي العسب حرام ما تنكع ، قلت اهاه وبتحرمي والكل ، قلبت وجهي وقلدت اننا تاعب وضابح ، قلت لهم ناهي بعدا شدي لكم من عيني ، خلوني ادخل ارقد ولما اقوم شديلكم ، عاد الجهال يشتو يصيحو ويقولو ماعه، البتول قالت لهم خلاص تمام خلوه يرقد وعيدي لنا عسب وابسرت لا عندي وقالت صح يا عم وهي بتغمز لي ، قلت ايوه صح اعرفو عسب ، ودخلت للغرفة وانا مطنن كيف لها قامت معي ماهو الخبر ، ما دريت الا وقد بدقدق باب غرفتي فتحت لها ، وجنبها اختها الزهراء ، هيا مالش يا بتول او غيرتي رأيش قالت ماشي يا عمو ، فتحت الشنطه حقها وخرجت العسب ومكنتني ، وانا قلت انها رحمتني ونوت تدي لي العسب حقها مديت يدي اشلها وقد لمعت عيناي ودمعت ، قلت هذه لي ، قالت ماشي خبي العسب حقي عندك ، قلت ماشي خليه معش ، قالت ابداً خليه معك عيشلوه عليا لما اطرح الشنطه ، قلت لها ناهي وانتي يا زهراء عتخبي العسب حقش عندي ، قالت ماشي ، وهربين الثنتين من عندي وهن بيضحكين ، وانا شكيت وقلت يعلم الله ما قد نوين يفعلين بي ، جيت ابسر العسب حقها وما قد معاها الا ثلاثه الف وخمس ميه ، المهم رقدت لا وقت الغداء ، وقد البتول بتقلي قبال ابي يا عمو ادي العسب حقي اللي خبيته عندك قلت لها حاضر لما اكمل اتغدي ، كملت وسرت اديت حقها ومكنتها ، وابي واخوتي كلهم موجودين شلتها وقالت ماهي هذه ورجمتها للارض ونبعت لا عند ابي بتبكي ، وبتقله ابسر عمو كيف سرق حقي العسب ، وانا مقعي للقفي ومطنن ، وابي قال مالك ما تمكن البنت حقها ، قلت يا اباه هي تيه حقها ، والزهراء نبعت قالت ماشي يا كذاب ، ابسر كم عسبي وخرجت من شنطتها ثمانيه الف ، وقالت اختي وقع لها ثمانيه الف والكل ، ابي ابسرني بنص عين وقلي تشتي تخزن بها او مه بنقلك ادي حق البنت لا اقرح الاوهام حق العيد من راسك ، المهم وبعد ما اقنعوهم انها ادت لي ثمانيه الف وانا طلعت المقص ، خرجت قلت اسير ادي الباقيه وامري لله ، قدنا في الحوش ولحقني ابن اخي الثاني وليد وقال يا عمو اقلك ايش الخطه اللي فعلين عليد ، قلت له ايش هي ، قال البتول قسمت نص العسب حقها وخبتها عند الزهراء والزهراء جمعت العسب حقها مع حق البتول ، وادين لك ثلاثه الف على سب يقولين انك سرقت الباقيه والاماريه ان الزهراء معاها عسب خيرات وهن بيقع لهن نفس العسب الثنتين ، وبيجابرني وهو بيضحك ، قلت له ومالك بتضحك وبتشخر ، قال والله انهن حاذقات خرجين عسبهن من عيونك وما مشخر الا انت ، ومن قوة الصدمه عادنا جمعت حسي اليوم وجيت اعترف لكم بمفاجآت العيد،،،،

انستنا ياعيد مرتين .

#منيرالنقيب

مساكم الله بالخير ،، كيف كلاً وحاله ،، طبعاً وحشتوني ، ورجعنا بعد فترة انقطاع ، ما علينا مما فات خلونا في الحاضر ، طبعا متابعين رواية #فيــبيتي عنزل الرواية كامله بطريقة حاليه قوي ومختلفه ومفاجأة للجميع ،وجالسين نشتغل عليها ، وقد عنزلها ، فلا تقلقوش ،،، انا سبق ونزلت جزء بسيط من بداية قصة جديده اسمها #المهرب
وحالياً شا انزل البارت الاول للقصة واتمنى لكم متعة القراءة ،،،

#منيرالنقيب

من عيني ، خرجت وقفلت الغرفه ، ودخلت للغرفه الي فيها اخي عمار ، وابسرت ابنه النقيب راقد فوق ركبته الدموع يابسات فوق خدودة ، واخي جالس مطنن وامواج القهر بتلطم مشاعره بكل قهر ولا وقفت ، قلت اذكر الله يا اخي ، ابسرني وقال هااااه ، وابسر لا عند ابنه وقال يوووه قدهو راقد...! قلت ايوه قربت وشليت النقيب لا فوق حضني ودخلته الغرفه عند ابي والزهراء والبتول ، اول ما فتحت الباب ابسرني البنات وقالين هيا مه لقيت ماما ، اشرت لهن يسكتين لا عاد ينكزين النقيب من نومه وابي قال اووصص النقيب راقد ، وطرحته وسطهم وخرجت سكته وابي بيغالطهم باسلوبه الحالي ، ورجعت وجلست في الغرفه عند عمار ، اشتي اوانس ولو شويه من القهر الي بصدرة ، مع ان القهر ال بصدري انا قد احرق كياني كله ، فما بالكم بالي داخل صدر عمار في تيه اللحظه ،ومشنا داري كيف افتح معه موضوع او اخرجه ولو شويه من القهر ، ما دريت الا لما ابسرني وقال بنبرة صوت تذبح الفؤاد ذبح نبرة صوت مخلوطه بوجع وباطل وحسرة ، ذلحين يا اخي منير اسالك بالله كيف اقنع الجهال ان ماعدبش معاهم ام ولا عاد عيبسروها طول حياتهم ، قلي كيف اقنعهم..! والنقيب لا ذلحين يشتي يروح البيت ومشو داري ان ماعدبش بيت والكل ؟؟ فرحت حين بدأ معي يتكلم ، ذلحين خاطركم شا اقفل التلفون اشتي اركز معه ......

#منيرالنقيب
#شظاياالقصف