لما تكون سربوت كل الناس تقل الله يهديك
ولما يهديك الله يقولوا هذا كان سربوت
🤣🤣🤣🤣🤣🤣

من كلمان واللحان واداء #فخـامــة_صـنـعـانـي 🐸🤣

-مش رجاله والله لوما تطلع باص بالعاني علشان تآذي بنات الناس..
مش رجاله والله لوما تجلس عينك عليها من اول ماتطلع لوما تنزل كأنك بتتفحصها بالاشعه فوق البنفسجيه يااطلي..

-مش رجاله لوما تكون صاحب متر وتجي من ورا ولا من قدام بنات الناس وتفعل حركات نذاله تمد يدك لاعندها ولا تصيح بصوت ساع الحمار.مع اعتذاري الشديد للحمار.


-مش رجاله والله لوما تدخل سوق او مول وتبسر زحمه نسوان وتسير تحتشر بينهن وتمكنهن طريق طريق ياسعم انك.هاذك المستعجل الله يلعنك من كل.اعماق قلبي .


-مش رجاله والله لوما تكن صاحب سياره وكل مابسرت ثنتين قدامك تهون وترجم لهن كلمتين
مش رجاله لوما تبسر ثنتين ماشيات في امان الله وتوصل جمبهن وتندع ياهاذك التفحيطه عشان تفجعهن

-مش رجاله والله لوما تدخل لبنت خاص في مواقع التواصل الاجتماعي وماتعبرك تقوم ترسل لها صور مشهي سابره
اوقع رجال معك عار

#يعُمم للهلافيت..
#فخـامــة_صـنـعـانـي

السلام عليكم. يااخواني واخواتي
معي لكم اليوم. موضوع. حساس قوي.
وهذا بيحصل في مجتمعنا ولو نكابر ونحاول ننكر انها مابتحصل. لكن هي بتحصل هي تقع

موضوعنا بعنوان #هي_تقع
والليله نبدأ بالرجال

بدايه خراب بيتك. هي لوما تخرب بيتك بيدك
حين تخلي عيونك طايشات يسرحين يمنه ويسره
يتبسرين النسوان.بنظرة اعجاب خاصه ويفتحين في عيونك هولا النسوان وتبدأ تقارنهن بحقك اللي في البيت
#مثلاً تشوف.اي واحده طلعت فوق الباص. وطلعت تلفونها. تجاوب عليه وانت تحسب انها مشروع تعارف لانها كلمت رجال بتلفونها
ليش تفكر كيف توصل لها وليش تطعن بشرفها بسوءضنك
ياخوك. قد يكون المتصل ابوها خالها وقد يكون اخوها

او تشوف واحده خاطيه طريقها للجامعه ومرتبه نفسها ومضهرها مضهر يليق بطالبة جامعه
او تشوف.بنات شابات في.مقر عملك او مقر اعمالهن
وتبدأ تتعمق بنظرك فيهن وتغوص بتفكيرك في اعماق تفاصيلهن
او تجلس تتبسر البنات في السوشال ميديا
وتتأمل اشكالهن وطولهن ونحافتهن وقوامهن ولبسهن
وتبدأ تشوف مرتك وانها مش مثلهن وناقصه عليهن
ويتصورلك انهن احلا من مرتك اللي في البيت
وتبدأ تكره اللي. في البيت وتمل منها

وايضا.كل من صادفتها في طريقك او في محل عملك تتمنى الحصول عليها بأي حال من الاحوال
وتتمنى انك تحصل على شي يوووصلك لها.او يبعث للتواصل بينكم او يلفت نضرها نحوك.

وكذلك ذيك اللي.خساره اقول فيه رجال
اللي يتلصص على تلفون مرته او اخته ويسترق منه الاسماء والارقام
ويخون الامانه الذي أئتمنته عليه زوجته او اخته
ولوما تشوف. واحده تتسوق بالسوق وهي ماشيه
تدور ذوقها عيب تجري وراها مليان السوق وتمشي وتعارضهن وتزاحمهن وتعمل حركات بايخه ملفته للنظر

ولوما تشوف. صاحبك ومرته وهم ماشيين بالطريق بأمان الله رجال ومرته. عيب ترشقهم بنظرات تمني لوكانت مرتك ساعها
عييييييييب انك تقل.انيييت له والبهمه معه
للمه وانت هكذا. للمه ماجاء لك
ليش ما تقتنع باللي قسم لك الله
ليش ماتضبط عيونك وبصرك وتفكيرك
ليش. ماتطبق. قول الله.(ولاتمدن عينيك الى ما متعنا به ازواج منهم زهرة الحياة الدنيا )
ليش ماتقتنع. ان زوجتك هي. اجمل نساء الارض واكملهن
ليش. ماتملي عيونك منها وتعف نفسك عشان مااحد يتبسر مرتك بغيابك وبدون علمك
ليش ماتشتري. لها الحاجات والملابس. اللي اعجبنك فوق البنات اللي تجلس تتبسرهن

قوا. ابي ومالي اقنع و #قع_رجال
والمعذرة طولت. ونلتقي. غدوة بموضوع عن النسوان

اخوكم #فخـامــة_صـنـعـانـي
اي. تعليق او استفسار لاهانا. @ALFkamah

إذا لم تكن منشوراتي سببا في زرع
الإبتسامه في وجوهكم فأنتم بحاجة
ماسه لزيارة طبيب نفسي🙃

#فخـامــة_صـنـعـانـي

السلام عليكم. يااخواني واخواتي
وجمعتكم مباركه

واليوم نكمل موضوعنا بعنوان #هي_تقع
والليله نتكلم عن النسوان #قعي_مره

يييه.انتي.ايوه انتي.من بين احاكي.مالش مقعيه
ايوه انتي.ابسري.صليا. قعي مرره. قوا امي

المره زارت احيان تخرب بيتها بيدها وهي مقعيه
وزارت احيان يطير زوجها من بين ايديها وهي حسها في وادي.ثاني

اول شي.ياامي وعيني.المره.ماتحاكيش زوجها عن النسوان الباقيات
ولا تقله فلانه حاليه ولا فلانيه حين تلبس الفستنان الوردي تقع حاليه
ولا تقله فلانه.ضحكتها حاليه عيونها حاليات طويله بيضاء مصليه صايمه مؤدبه خزويه
تقع كيف ماوقعت بيضاء شقراء خادمه معها شعر طويل معاها معاها صلعه. معاها شنب معاها لسان طويل👅 عيونها صغار كيف ماكانت ان شاء الله تقع ابو 3كيمرات
اشتحطي.وضمي لسانش.واهتمي.بنفسش وخلي خلق الله على الله
وبدل ماتسردي.هولا الصفات لزوجش.حاولي انش تكتسبيهن لش.وتحسني من مضهرش. وحسني من طبعش وملي عين زوجش بش

فبعض.النسوان حين تسير.عند الوالده ولا عند عرس في صاله ولا عند صاحبتها. تستبك. وتتصلح وتتمكيج وتتغنوج
ولوما تضوي.تبعد المكياج وتبعد الملابس الحاليه
وتلبس الروب حق المطبخ وتجي عند زوجها وتمكنه مريضه اشتي ارقد وكأنها خريجة من السجن المركزي
للمه.هكذا زوجش.اولى بش اولى باللي فعلتيه كله اولى من الوالده ومن الصاله.

جبررررني. قوا لامي والمره ماتكنش تحاكي النسوان
زوجي يحبني زوجي يدللني زوجي حالي فيني.ومعاملته لي حاليه
ولا تكوني تقولي.هذك الحاجه تعجب زوجي
انتبهي.لانه قد تصيبش عين حاسده على هذه النعمه اللي انتي.فيها
والا تجي واحده حمرات عين .تخطف لزوجش وانتي بتمكنيها واداناه. ومش انتي داريه مابيوقع من قفاش

ركززززي.يابنت طاعة الله. اولا. وحافظي على صلاتش
وطاعة زوجش واتحكمي بلسانش. وكلمة زوجش ماتتكرر مرتين
وانتبهي.تكسري.كلمة زوجش قدام اهله.ولا قدام اهلش

قوا لامي. حسسي.زوجش.انه الكل بالكل بحياتش
وانه حياتش له ومن اجله واعطيه كل وقت واهتماماتش
قوا. لش جبرش
المره تحفظ سر زوجها في حضوره وغيابه
ولا احد سألها كيف انتو شي معاكم تكن تقل الحمدلله في ستر
والمره الاصيله ماتخرج اخبار زوجها لا لاهلها ولا لاهله

كم من مره. عدمت بقعتها.ولا جت فوقها طبينه
بسبب اهمالها وسوء تصرفها في ادارة حياتها الزوجيه.

وسامحوني على الاطاله
ونلتقي ان شاء الله .في الجزء الثالث. #هي_تقع
#هي_تقع #قعي_مره
اخوكم #فخـامــة_صـنـعـانـي
اي. استفسار لاهانا. @ALFkamah

السلام عليكم. يااخواني واخواتي

واليوم نكمل موضوعنا بعنوان #هي_تقع
واليوم نتكلم عن الرجال #قع_رجال2

#قع_رجال واتنظف.وامتحط لا تقع ساع الجاهل
اهتم بنظافتك الشخصيه والداخليه.
بعض.الناس. مايهتم بنظافته الشخصيه. ويجلس من الحمام.من الجمعه للجمعه
وتلقى شمه يفوح على مسافة 2 كيلو. شمه ساع السمك
احيان.يكون شمه تقل.الا به كلاب ميتات في ازغانه
اهتم بمضهرك. يااخي صرعتنا.خليتنا سكارى وما نحن بسكارى
وحين تلبس. اهتم بتنسيق.الالوان والملابس. حين تخرج بين الناس
فبعض الناس يلبس كوت احمر ثوب بنفسجي وشال بني وتشوفه مشكل ساع المهرجين.ساع الشيطان حق البطه
مشكل ساع قوس قزح شكله مقرف يدي الغاثي

وبعضهم يخزن وتلقاه مخلط عشره انواع من القات
وخمسه انواع من المشروبات.ويشرب شمه على القات
وحين يبعد القات العشي.يرقد بدون ماينظف اسنانه واضراسه.وتلقى اسنانه.مسطيات ساع جحر الدست
يااخي.نظف.اسنانك واشتري ليفه مشحزه وفيري وليف اسنانك جعلك الجذم ياسدم

وبعض.المزوجيين يجلس.يووز في راس مرته
انتي ماتهتمي بي.انتي.مقصره في حقي
وهي مسكينه ماعاد تدرى كيف تفعل بروحها
نظافة بيت ومطبخ وبزا ونظافه وتربيه وتعليم جهال
ويشتيها تخدم ابوه وتخدم امه وتخدم اخوته وخواته. ويشتيها توحم من جديد ويشتيها تنتبه له
ويشتيها تبيض بوجهه لا جاء عنده ضيف حين يجو اهل البلاد عندهم.وتشتغل قرعه ليل نهار تقل مكينيه
ويشتيها ماتكمل المصروف. ومايشتي تقله انها تعبت
و سمه لا قالت له كملت الدبه الغاز.
وكسر راسه لاقالت المصروف حق البيت كمل
وعاده يقل.للمه ماتستبك له ساع اللبنانيات والسوريات
وعيسير يتزوج عليها لانها مهمله له ومابتدلله
وما بتحسسه انه متزوج
يااخي خاف الله. فيها. انت ضويتها.بعقد زواج مش عقد عمل

وبعض الناس يدمر نفسه بنفسه
لما يجلس يهدد مرته عتتزوج عليش. وهو ماعيتزوج
يااخي ليش.بتهدد. اتزوج.وسكهنا
اما انك تهددها عتتزوج.ومابش معك قلب تتزوج
فااعلم انك فتحت على نفسك حرب عالميه
عتدمرك اقتصاديا. ماعتكن تخليك توالف زلط بجيبك
وكل ما حست ان معك قرشين ادعت المرض وهي بخير عشان تدي حق الاسعاف والعلاجات
وكل ماحست انك مزلط. مكنتك خرجني السوق.اشتي واشتي واشتي.
عتكون تشتري حاجات مالها داعي ومالها لزوم
وعتمكنك ادي كل يوم دجاجه. وترجم نصها للدمم
وعتمكنك جعالة الجهال في اليوم ثلاث مرات ساع العلاج
وعتكون تخزن في اليوم فترتين.مع الماء والببس والتحليه
تستااااهل ياملقوف ليش تهددها عتتزوج وانت مش قدها
كنت عتحمدالله عليها وتقنع.وعتسلم زلطك وتسلم جيبك
لكن #هي_تقع

وبعض الناس.لا سار عند احد ضيف.يخزن عندهم ويمسي.عندهم. حين يقوم الحمام يبعد القات.يفتح لقفه ساع المرش. يرش الحمام
تجي.وقد لون المرحاض.اخضر من القات وما يسكب بعده ماء
وبعضهم.من شدة الذوق الذي.فيه.يتمضمض. ويرش الجدار حق.الحمام ببواقي القات يمنه ويسره
وماينظف.بعده.
يااخي.خليك ذواق. واعرف.ان نظافة الحمام من بعد استعمالك له. تعكس نظافة البيئه اللي انت عايش فيها
لكن #هي_تقع
مليييييي عيييييييب. الله يقلعكم ياجغصين

وسامحوني على الاطاله
ونلتقي ان شاء الله .في الجزء الرابع. #هي_تقع
#هي_تقع #قع_رجال
اخوكم #فخـامــة_صـنـعـانـي
اي. استفسار لاهانا. @ALFkamah

8 مارس اليوم العالمي للمرأة،،
كل عام والمرأة اليمنية أقوى ،أعظم وأجمل
هذه المرأة التي تحملت وتتحمل كل شيء ❤

#فخـامــة_صـنـعـانـي

أنا يامعذبتي قتيل هوااااااكِ
أنا من ضحايا لحظك الفتاك

أنا من يموت بنار هجرك والجفا
وتعود فيه الروح حين يراك

من قال أنك لي ملاك واحد
ما أنت إلا ألف ألف ملاك

سبحان من اولاك أجمل صورة
وعلى عروش الحسن قد وَلاّك

يا وردة تركت فؤادي مغرما
فالورد يصعد سلم الاشواك

مهما نسيت هواي فيك فانني
آليت أن أحيا على ذكراك

ان كان لا يرضيك غير تلهفي
فالحر في سعير نار جفاك

فعلى المحبين السلام وليتهم
عرفوا معاني الحب في دنياك

#فخـامــة_صـنـعـانـي

من ارشيف #فخـامــة_صـنـعـانـي


جواب. متواضع. مني. #فــخـامـة_صــنـعـانـي

على قصيدة الشاعر #رايتي_اخلاقي


يابارق الاشعار انظر لي في امري
وافهم المضمون وايش الموضوع

وانا الفخامة الرجوله فيني تسري
والنخوة والشرف بااسمي مطبوع

مادام وابو ود مرزحي في ضهري
لي الفخر. مانا من شجرة مقطوع

حنيت من قلبي حنه شقت صدري
صوتها يملي العالم صداها مسموع

ياابو ود ليتك بما في خاطري تدري
ليش الغاز معدوم والبترول مقطوع

ترقد وكل شي متوفر والنهار تجري
لايغلقوها المحطات قدك مفجوع

لكن شلها مني ياابو ود وبالمصري
من رضي بشنقه بايموت مخنوع

ومطرحك ياسيدي يسري مايمري
كله من المواطن قد جلده مجدوع

ذا حالنا بعد عفاش افتقدنا البدري
نعيش في ضلماء وسموه المخلوع

ااه عليك ياعفاش بعدك ياكم قهري
واللي من بعدك حب قشام مجموع

الصبر وربك بايحتسب لي اجري
لاني مكافح من الهم قلبي منجوع

وربك لاابتلاني بايخفف لي وزري
ويعوضني خير لاني كنت مخدوع

المضاهر خدعتني وخدعت بصري
وكنت اعز اللي مايستاهل بالمربوع

وما خسرني الا اللي ماعرف قدري
هو الخاسر لو تشوفه كيف مصروع

اما اليوم قد نظرتي تفوقت للصقري
واعرف خيار القوم من اول اسبوع

ان وفقني الله لما قلت في شعري
وان شي خطأ فهو عليا مرجوع

وسلامتكم


للمجاراه. @ALFkamah

جننتني يا لابس الستاره
خليتني بعدك في كل حاره🌹❤️

جننتني يالابس البراقع
خليتتي بعدك في كل شارع💋😍

جننتني يالابس العبايه
خليتني احبي بعدك حبايه🥰😘

#فخـامــة_صـنـعـانـي

السلام عليكم
وكيفكم كلكم اخواني واخواتي
كيف انتو. معي.لكم مجبر. قلتي.اجابركم به

اولا. الله يحفظ كل امهاتنا.ويوفقنا لطاعتهن
ومن فقد امه. الله يرحمها بحرمة الفاتحه.ونقراها كلنا
ثانيا. جننونا.المحتفلين بما يسمى بعيد الام في يوم واحد بالسنه. ويعلم الله كيف حالهم مع امهاتهم طوال السنه

واذا تشتوا تعرفوا حالهم طوال السنه مع امهاتهم
.اقرأو المنشور التالي👇👇

★مايحتفل بمايسمى بعيد الام الا العصاه العاصيين امهم
اما. الطايعين. مايجننوناش بطاعتهم لاميتاهم
ولا يقلقونا بعطاياهم لاميتاهم

★عيد الام. بيحتفلوا به المزيفين. والمخادعين
اللي طووول السنه وهم يعصوا امهم. وفي هذا اليوم يقلدوا انهم طايعين لامهم
★ذيك او تيك. اللي. طول السنه يبكي امه وتبكي امها ويقهروا اميتاهم. ويحاولو يمشوا كلامهم على كلام امهم. واللي يكسرو كلام امهم
وفي ذيه اليوم يشتو يورونا انهم طايعين لامهم

★ما بيحتفل بهذا العيد الا البخلاء
ذيك او تيك اللي ناسي لامه طول السنه. ماتعرف منه حتى.شكلاته تفرحها ولا حتى جزمه تلبسها.
وفي هذا اليوم يقلقنا بميداليه مكتوب فيها امي.ويجلس يمن عليها بها للسنه الثانيه

★بيحتفل بهذا اليوم ذيك او تيك اللي. واصل وامهم تدعي عليهم طوال السنه. ويجي في هذا اليوم يلتمس رضاها ويقول امي جنتي
مالك ياحبيبي. انت جنتك في جهنم قد معك 200 لبنه في جهنم من كثر مابتعصي امك وتدعي عليك. وتشتي. تمسحهن مقابل دب ولا كيكه ولاترته ولا ورده. ماااااابش عقل

★مابيحتفل بهذا اليوم. الا المناافقين. واسمحوا لي اقول منافقين
اللي عشان يقولوا الناس. عنهم انهم طايعين لاميتاهم
والله سبحانه مسجل لهم بخانة عاقيين والديهم

★مابيحتفل بعيد الام الا ذيك اللي مايعرف لله مسجد
وفي هذا اليوم يجي يقول. الله امرني بطاعتك يااماه وجعلها من طاعته
سلامات.انت لا طعت الله ولا طعت امك. يعلم من بتطيع. غمزه

★مابيحتفل بهذا اليوم.الا الضاااايعين .الصااايعين.اللي مايعرفوا يستشيرروا او يوالو اميتاهم في حياتهم كلها
واللي مايعرفوش.يقلوا. ياامه ادعي لي شااسوي كذا وكذا
وفي هذا اليوم يجي.يقول امي ضوء عيني.ونور حياتي

★مابيحتفل بهذا اليوم. الا ذوليك اللي مايحاكو الامهم الا وهم يتقارحوا. وما يجاوبوهن الا من راس نخرهم
وفي هذا اليوم يجي يتفلسف ويرص الكلام عن الام

✿هذا بعض حقائق المدعيين لحب امهاتهم بهذا اليوم
اما الطايعين. قدهم يطيعوهن طول السنه. طوال العمر
بدون ضجه ويهدوهن الهدايا طوال العمر بدون ما يمنوا عليها وبدون مايدرونا انهم ادوا لامهم
لانها امهم. واجب عليهم طاعتها طوال السنه وليس في يوم محد

وتقبلوا خالص تحياتي. اخوكم #فخـامــة_صـنـعـانـي

اي تعليق. او اضافه. لا هانا. @ALFkamah

تهنــــئـة.من.القَلـ♡ــب.tt
🎀🎊🎀🎊🎀🎊🎀

✿ اتقدم اليكم. انا #فخـامــة_صـنـعـانـي
إخواني وأخواتي وجمهوري العزيز وكل متابعيني
بٲصدق أيات التهاني والتبريكات🎉🎊🎉🎀
بمناسبة حلول شهر ﴿ رمضان المبارك ﴾ المبارك

❀راجياً من الله أن يوفقنا وإياكم على فعل الصالحات
وأن يجعل أيامكم كلها. طاعة. وخير، وبر، وإحسان
♔وحفظكم الله جميعاً اينما كنتم
ويسر أمركم ورزقكم من حظوظ الدنيا أجملها •
#وأتمنى أن أكون عند حسن ظنكم
فأنتم جمهوري الجميل وأنتم أصل النجاح 💙⚘

#رمضانكم_مبارك
#كل_عام_وأنتم_بخير

اخوكم. ومحبكم. @ALFkamah
#فخـامــة_صـنـعـانـي

السلام. عليكم.
مااسرع. خطي. رمضان.

المهم. رجع لكم #فخـامــة_صـنـعـانـي
ومعه. لكم مجبر الليله. مدري عيعجبكم او مع

بعض بناتنا.واخواتنا. فاهمات كلمة النصيب.فهم غلط. واصل وهن يقولين مابش نصيب

اذا.جاء الخااااطب. وشافين انه ماجاء على التفصول.اللي فصلينه في عقولهن. يقولين مابش نصيب

انتو داريين. ان كلمة النصيب
اخترعوها الاغنياء. عشان يردوا بها عيال الفقراء

ولكن البعض من بنات هذه الايام.
متأثرات. بالمسلسلات التركيه والمكسيكيه والهنديه
بيشوفين. العشاق في هذه المسلسلات كيفهم
ويشتين. ازواجهن المستقبليين يجوا. ساعهم

مالش.يابنتي.صلي عالنبي
مابش يمني.معه شعر اشقر. وشنب. بصلي
ومعه عين خظراء.وعين زرقاء ووجهه ملان غمازات

انا عارف.ان اشكال بعض الشباب اليمني. حدث بلا حرج
صوابره ناطلات من كثر التخازين. لان البعض يخزن في الشقين. ونص شنبه منتف من كثر ما ينتف شنبه بعد القات
ولحيته قدها ساع الكلمات المتقاطعه. من كثر.مايشتغل فوقها بعد التخديره
واسنانه مذحلات ساع جحر الدست حين مايغسلوش.اسنانهم خصوصا بعد القات
وفيهم ضعف وسوء.تغذيه بسبب القات من قوة التخديره
مايرضوا يتعشوا ويقواموا الصبح مسددين وما يصتبحوا
ما معاهم الا وجبة واحده. وهي وجبة الغداء
يتغدا. ويفلل.كأنه بيشحن نفسه باقة اكل ل24 ساعه
وعيونه حمررر.قد عيتناكعين بسبب اضطرابات النوم
هذا الشاب اليمني.اللي.انصدمين به في الواقع
ماهو حسب ما في مخيلتهن لانه مشو. ساع اللي في الحلقه
وما هو ساع اللي. قرأين عنه في قصص العشق
يرحعين يرفضنه. ويتحججين. بالنصيب.

وعاد باقي نوع نادر. الله يسترنا من هذا النوع
التي ترفض الخااااطب وتحاكي نفسها انه مشو رومنسي ساع حبيبها الذي تعرفت عليه في وسائل التواصل
ولانه مايستر يرص الكلمات ويعزف على وتر احاسيسها. سعما بيفعل لها الحبيب السابق

هنا تنقلب حياتها جحيم. فبحجة ان مابش نصيب
تغلق ابوابها امام النصيب الذي جاء لها من الباب
وتجلس تفكر بحبيبها الاول في فراغها
ويتصور لها أن الخاطب الجديد خبيث ومتوحش
وانه ما عيحبهاش وانها ما عترتاحش معه بحياتها
لانها تفكر. لو انها كانت نصيب حبيبها الوهمي السابق
أن حياتها عتكون افضل وافضل

لذلك يامعشر البنات
يابنات حواء. ياشقائق الرجال
كلمة مافيش نصيب. امسحينها من قواميسكن للابد
وعيشين واقعكن ولا تخلين احد يأثر عليكن
واذا جاء لكن الخاطبي. من الباب فهو النصيب
افرشي سجادتش واستخيري واستشيري ربك
وربك. مابايخيبك. وما بيختار لك الا مافيه خير لك
في الدنيا والاخره. والخيرة فيما اختاره الله

#هيه_تقع
#فخـامــة_صـنـعـانـي

واللي عنده اعتراض. يدخل يناقشني. @ALFkamah

اثناء مشاركتها في فقرات #فخـامــة_صـنـعـانـي
😎😎😎😎😎

بمناسبة ان اليوم يوم الوحده اليمنيه المباركه❤️🇾🇪

انا #فخـامــة_صـنـعـانـي

اعلن. ان بيتي مفتوح. لكل مواطن يمني جنوبي وحدوي يزور صنعاء
ولكل اسره ولكل عائله تأتي من المحافظات الجنوبيه تزور صنعاء لغرض العلاج. او الزياره
يجلسوا.ببيتي.لما يخلصوا عملهم الذي جاءو لصنعاء من اجله
بدال مايستأجروا فندق.ويخسروا حق اقامة بفنادق صنعاء
بيتي. مفتوح لهم. وبيوتنا.بيوتهم. واحنا اهلهم

#مافيش_غريب_في_صنعاء
#وطن_واحد. #جسد_واحد
والله على مااقول شهيد. @ALFkamah

اول بيتين. للفنان.زعلي.عنبه.
وانا كملت الباقي



جننتني يا لابس الستاره
خليتني بعدك في كل حاره🌹❤️

جننتني يالابس البراقع
خليتتي بعدك في كل شارع💋😍

جننتني يالابس العبايه
خليتني احبي بعدك حبايه🥰😘

جننتني يالابس البوالط
خليتني بعدك في الزغاطط💋🌹

جننتني يالابس الفساتين
خليت خلق الله عليك مجانين🤪🥰

جننتني يا ناقشي كفوفك
ياليتني وانا كل يوم اشوفك😍💋


جننتني يالابس السماطه
مابش بيننا وانت اية وساطه🌹🥰

جننتني ياحالي ياممكيج
خليتني بعدك ساع الممنج🤪🥰

جننتني ياذي شعرك اسود
قلبي حلف غيرك مايشتي احد😍😇

جننتني يالابس كعب عالي
مااحلاك حين تتمخطر من قبالي🌹😍😘

#فخـامــة_صـنـعـانـي. @ALFkamah

حبيت نشارككم هذا الفيديو. الرهيب
من احد صديقات القناه🌹
من منطقة السدة محافظة اب 😍😍😍

ادعمونا. بفيديوهات من تصويركم لمناطقكم
لننشرها لكم هنا بقنواتنا. 🌹🌹🌹

#فخـامــة_صـنـعـانـي. @ALFkamah

تشتو الصدق أنا احبه حبيبي ليش ماتنسوه
أنا والله ما اسيبه وما في راسكم سووه
,,
عنتلاقا ونتقابل ونتبادل كلام الحب
ونتواعد ونتغازل من صدق احساس مانكذب
وعنه أنا ما اتنازل وما في راسكم سووه
,,
عشقته عشق لاقبله ولا بعده عشق انسان
أنا دنياه وكل اهله وافراحه مع الاحزان
بانغنم كل ما اشتقنا نعانق بعضنا الاثنين
ونطفي نار لهفتنا اذا العين جت قبال العين
ولا قوه عتمنعنا. اذا اجتمع حبنا الاثنين
,,,
قلولي من عيبقالي ويمسح دمعتي غيره
ويرخص لجلي الغالي بغير منه ولاكبره
ومن قال يبعده عني فهذا قد فقد عقله


جمعتكم مباركه. احبتي جميعا مني انا
#فخـامــة_صـنـعـانـي. @ALFkamah

مشاركتي
يقول النبي صل الله عليه وسلم(لا تكرهوا البنات
فهن المؤنسات الغاليات)
وكما يقولوا. ياسعد من بكره بنيه
ليش. لان البنات هن الحانيات الطايعات
لان البنات هن ابواب الرزق في الدنيا
وهن الطريق الموصل للجنه في الاخره

وكم من اب يمرض بأخر عمره. وما يقومين بواجبه غير بناته

ليس كل من امتلك الولد يعني انه امتلك الدنيا
بالعكس. قد يكون الولد الذي ينتظره. قد يكون سبب تعاسته
وسبب لمشاكله وسبب لشقاءه في الدنيا والاخره
كما سمعنا في قصة موسى عن الغلام الذي قتله النبي الخضر لماذا قتله⁉️
قال عسى ربه ان يبدلهما ربهما خير منه زكاة واقرب رحما
اي انه كان في علم الله الازلي. ان هذا الولد عندما يكبر
سيكون سبب لتعاسة وشقاء والديه مستقبلا
فقضت حكمة الله ان يموت ويبدل ابويه بولد خير منه زكاة واقرب رحما

على مااعتقد. لازال في مجتمعنا منهم بقايا ابو جهل
لان الجهل مخيم على افكارهم ومعتقداتهم
من يعتقدون ان البنات عار.
لانهم بدون عقول. ولم يفكروا. كيف لوما جاؤ للدنيا هذه
ومن كان سببا في وجودهم. بهذه الحياه. اليس من يعتبرونهن عار


واما من ناحية الخلفه. وتحديد النسل
فالمرأه لا حول لها ولا قوه
تعاني الامرررررين
تعاني. من معتقدات الزوج الخاطئه وخطابه لها
باانها ان لم تنجب له ولد فسيتزوج عليها
وكأنه يخاطب شركة تصنيع. ان لم تصنعي لي نفس المواصفات المطلوبه. فسااقاطعك وانتقل لمصنع اخر
ونسي انه هو مصدر الكروموسومات الانثويه
واحيان يكون الرجل حاملا جينات وراثيه
ونسي قوله تعالى.(يهب لمن يشاء ذكورا ويهب لمن يشاء اناثا)
فلو تأملنا في هذه الايه. قوله. يهب. اي ان الاولاد والبنات هبه من الله. وهبك الله اياها
او بمعنى اخر. هدية او عطيه. اعطاك الله اياها
فكيف يعترضون على هبة وعطيه الله.

المفروض يحمدوا الله ويشكروه. انه ماجعلهم من الصنف الثالث
(ويجعل من يشاء. عقيما)
فلو جعلهم الله من هذه الصنف. لحمدوا الله. على مارزقهم من الابناء
فكم من عقيم باامر الله. يتمنى البنت التي مايريدوها هولا الناس

واحب انوه ان الزواج بالثانيه ليس حل لهذه المشكله
لانه ماعيتزوج بطابعه تطبع له على مايشتي

#ونصيحتي له.يستغفر ربه ويكثر من الاستغفار
كما قال الله فقلت استغفروا ربكم انه كان غفارا
يرسل السماء عليكم مدرارا.ويمددكم بااموال وبنين
ركزووووو على كلمة #بنين تعني اولاد
قلي له الحل اذا هو يشتي اولاد فعليه بالاستغفار
وليس بالزواج

اعرف اني طولت بكلامي
الحمدلله معي بنتي شۣۗہذۣى اشوفها الدنيا وما فيها
والحمدلله مقتنع بها. والولد بايجي ايحين مااراد الله

والله يهدينا ويهديه ويهدي جميع عباده

اخوكم #فخـامــة_صـنـعـانـي.
@ALFkamah

من المعيب حقاً
أن ننظر لانفسنا بعين الامانه
وننظر لغيرنا بعين الخيانه
وأن لا ننظر لانفسنا بعين الصواب
وننظر لغيرنا بعين الخطأ
وأن ننظر لأنفسنا بعين الحق
وننظر لغيرنا بعين الباطل
وأن ننظر لانفسنا بعين الجمال
وننظر لغيرنا بعين القبح

وبالاصح انه من المعيب
أن ننظر لغيرنا بعين النقص
وننظر لانفسنا بعين الكمال
فهذا هو الغلط بعينه
لانه لا يحوز الكمال الا الله سبحانه وتعالئ وحده
هكذا تحدث #فخـامــة_صـنـعـانـي.
@ALFkamah