#سيروتونين
بقلمي مرام عبدالقادر
1-
احمد الحقنا سمعت صوت زينب اختي وانا جوه الغرفة بزاكر في كسر من الثانية لقيت روحي في غرفة أمي في شنوو؟؟ أمي مالها يا زينب ؟ ما عارفة كنا بنتونس عادي فجأة تاني بقت ما قادرة ترد علي ، امشي جيبي موية سكر سريع ،طيب طيب ، بعد دقيقة جات راجعة شايلاها اديتها لأمي شربتها ،قلت ل زينب ما قاعده تاخد حبوبها ولا شنو!! -خلصت ليها يومين ،كيف الكلام دا وليه ما وريتيني ؟ قالت لي هي وصتني اجيبهم معاي امس وانا نسيت والله قلت ليها زينب الله يرضى عليك أمي دي ما تفرطي في حاجاتها وأدويتها لو بتنسي كلميني انا ، أمي قالت لينا خلاص يخواني كويسة الحمد لله ما تكبروا الموضوع قلت ليها الحمد لله عدت على خير ،قلت اليومين دي مع إمتحاناتك ما نشغلك بحاجة ، قلت ليها يُمّة مشغولية شنو هي حبوب كان من اقرب صيدلية بتناولهم ليك ، سألت زينب روان لسه ما رجعت؟ الساعة ماشة على 4 ، لسه بتكون ما لاقية مواصلات قبل تتم كلامها جات روان داخلة جدعت الشنطة جنبي ،يخ دا شنو دا واقفة ساعة كاملة للمواصلات اعملوا لي ترحيل يخوانا وريحوني 😭 قلت ليها إنتي الجامعة نزلتيها متين كمان😂 احمد عليك الله اتصرف ما بقدر على المواصلات والشمس دي زينب قالت ليها مدلعة دلع غايتو انا القدامك دي تلاته سنة بتمرمط في المواصلات شوف الشافعة بالله دخلت ليها كم شهر عايزة ترحيل😒 قلت ليهم خلاص ما تصدعوا بالحجه خلوها ترتاح روان عاينت كدا أمي مالها كويسة؟ قلت ليها جاها هبوط في السكري لكن كويسة حاليا يلا انا طالع عندي مشوار ،أمي قالت لي بكرا ما نازل إمتحان يا ولد قلت ليها جاني مشوار مهم ما بتأخر زينب شوفي ناقص شنو في البيت ورسلي لي بعدين اجيبهم معاي ،اوكي كويس ..
--------
طيب .. انا احمد مصطفى بقرأ محاسبة في السنة الاخيرة عندي اختين زينب بتقرأ إدارة اعمال في السنة التالتة وروان في أولي طب أمي إسمها سوسن ، ابوي اتوفى في حادث قبل 4 سنوات.
من صغير اتعودت ألاقي طلباتي مُجابة ابوي كان بوفر لي اي شئ بطلبوا بحكم إني الولد الوحيد والكبير ما كنت بخت حساب لأي شئ فترة المراهقة معظمنا كشباب فهمنا ليها إنك خلاص بقيت كبير بعدا وتبدأ تاخد قرارات حياتك بنفسك وتعيش مستقل لما خشيت الجامعة كنت إنسان ما مسؤول نهائي وإتكالي اتعرفت على شُلة وبقي اغلب وقتي معاهم مرات كتيرة بنكسر حنك محاضرات ونمشي نتصايع في شارع النيل وارجع البيت المساء ومف زول من ناس بيتنا عارف ، يومي كلو بقضيو برا أو في التلفون حتى قعادي وكلامي مع ناس البيت بكون في وقت الوجبات بس. وامكن اغلبنا كشباب مراهقين بنميل لقعدات اصحابنا والجنبات اكتر
-فلاش باك ( قبل 4سنوات)...
كان يوم سبت عادي قاعد في غرفتي وماسك التلفون سمعت اصوات اخواتي بصرخوا طلعت مخلوع لقيت أمي واقعة في الارض جريت ارفع فيها قلت ليهم في شنو؟؟ زينب كانت من البكا ما قادره ترد روان قالت لي ابوي 😭💔 بقيت اقول ليها مالو!! كويس صح !!زينب قالت لي ابوي عمل حادث خلاص فات خلانا يا احمد💔 من لحظتها خشيت في حاله بتاعت صدمه اسبوع كامل ما كنت بتكلم مع زول غبت من الجامعة اكتر من شهر حاولت اكون قريب فيو من أمي واخواتي بعد فترة بسيطة أمي تعبت شديد وظهر في صحتها الدكتور قال لينا عندها سكري ،، كلنا بتحصل لينا مواقف حتكون نقطة تحول كبير في حياتنا وشخصيتنا يومها بتزكر جيت راجع من الجامعة متأخر دخلت غرفتي لقيت روان قاعدة في السرير وحاضنة قميص ابوي وبتبكي قربت منها قلت ليها وونة الحلوة الزعلها منو! قالت لي احمد انا مشتاقة لأبوي شديد💔 قلت ليها طيب انا هنا بتزكر ردها للآن كأنو امس قالت لي انت ما هنا الوقت كلو في الجامعة ومع اصحابك ما شغال بينا ،سكت مسافه وبقيت اعاين ليها قلت ليها طيب تاني وقتي كلو حيكون ليكم بقعد معاكم كتير كدا كويس؟ قالت لي اي وتجيب لينا شيبس وحلاوة زي ابوي ؟ ضحكت عليها حااضر تاني لو عايزين حاجه انتي واختك تعالوا اطلبوا مني سمح؟ قالت لي تمام عارف انا بحبك ،جضمتها وقلت ليها وانا برضو تاني ما تبكي كدا لو زينب ولا أمي شافوك ح يزعلوا كمان ، تمام اتفقنا بعد طلعت قعدت افكر كتير انا فعلا المفروض اكون قريب من اخواتي واكون ليهم الأب اللي هم محتاجين ليهو في عمرهم دا قررت اتغير تماما واشيل المسؤلية ابقى سندهم في الدنيا وما احوجهم لأي زول ، التغيير بدأ من الإجازة وانا نازل تانية دخلت في كورسات برمجه ورا بعض واكتسبت خبرة كفاية مع بداية السنة التانية قدرت اعمل شغلي الخاص ودا كان اول مشروع ناجح في حياتي حسيت بالإنجاز من وقتها بقيت احمد تاني ..

"المشاعر البتطلع مننا من غير تفكير ، الكلام المفرط والتعود الما بشبهنا ،وجع المنتصف والعلاقات المن غير إسم ، الرسائل الصباحية ،الضحكة البتطلع فجأة ،واصحابنا البنحبهم قربنا من شخص معين وكلامنا الما مرتب ليهو تفاصيل اكتر واكتر ما بنلاحظها بس لما تغيب عننا بتأثر علينا حافظوا على تفاصيلكم البحبوها الناس فيكم حافظوا اكتر على روحكم الحلوة💓"
#يتبع

#سيروتونين
بقلمي مرام عبدالقادر
2-
يا بت روان اسرعي اخوك دا بفوتك عندو إمتحان ، قلت ليهم عشان بتتجرجر كدا ما بحب تطلع معاي الصباح ،قالت لي اها خلاص جاهزة ارح زينب قالت ليها دقيقة تاني وكان احمد حيفوتك اقعدي اشربي الشاي ، قالت ليها كدا ح نتأخر لكن ،قلت ليها بقت علي الخمسة دقايق يعني اشربي سرعة بس ، ياا روحي انت😔 قلت ما تحنكي وينو الزمن😂 وصلت روان جامعتها ومشيت على جامعتي بعد طلعت من الإمتحان ضرب لي محمد انت وين يا عمك ؟ قلت ليو طلعت من القاعه، تعال نحنا بهنا في الكفتيريا ،ظابط جاي عليكم مشيت لقيتهم بتكلموا عن الإمتحان زاهر قال لينا دكتور حاقد ياخ اصلي مكجنو من السمستر الفات ، قلت ليو والله امتحانو مسخن لكن بتجازف في اثناء نقاشنا اتصلت علي أمي كنت مسجلها ب ستهم❤️ رديت ليها سألتني من الإمتحان وكدا وقفلت رفعت رأسي لقيتهم بعاينوا لي😂 محمد قال لي هووي شنو منو ستهم دي انت ربطت من ورانا ولا شنو قلت ليو ارتباط شنو يا زول 😂 دي أمي بعدين انا آخر واحد ممكن تتوقعني اعملها، كمال قال لي مف ضمان بكرا لما تقع نشوف احمد تاني😂 بعدها الونسة جرّت اتزكرت إني قلت لروان ح اجيك ارجعك عاينت للساعة قلت ليهم يلا يا شباب وراي مشوار وطلعت مشيت ليها لقيتها منتظراني جات زهجانة وكالعادة تشكي من الجامعه والحر قالت لي انت متخيل نزلوا لينا جدول الامتحانات قلت ليها اهاا متين!! بعد اسبوعين وااي يا احمد انا ما جاهزة ولا مركزة كويس الناس ديل ليه بعملوا فينا كدا 🙂 قلت ليها معلش قاسيين شديد😂 عندك زمن لسه اقري ، قالت لي انت اسي بتضحك ليه يا عديم الإحساس الفيني مكفيني😭 قلت ليها خلاص ما تبدي لي دراما حتعدي ان شاء الله ولو محتاجه اي شئ وريني ظابط؟ ظاابط يا احلى أخ في الدنيا 😔❤️.
فترة إمتحاناتي كنت معصور شديد الماده العندها كم يوم قاب بطلع الصباح مشاوير بالعربية وبعد الظهر بمُّر على المكتب لو الشغل بسيط بخلي باسل ينجزو وبرجع البيت اقرأ باقي اليوم وهكذا لحدي ما انتهت الإمتحانات اخدنا إجازة شهر قبل ننزل آخر سمستر ، يوم راجع البيت المغرب لقيت أمي قاعدة في الهول سلمت عليها وناديت على زينب تعمل لي كباية قهوة أمي قالت لي الصداع دا كلو من التعب ما بترتاح زي الناس ،قلت ليها يمة دايراني انوم اليوم كلو يعني والبجيب حاجات البيت وطلباتكم منو ، قالت لي يا ولدي لكن راعي لنفسك دي شوية ما ممكن ترجع بعد الجامعة وتشيل ليك مشاوير تانية دا قمة الإرهاق وبعدين ابوك الله يرحمه خلى لينا من خيرو الحمد لله ما احتجنا لزول في يوم ، قلت ليها بالضبط كدا ما احتجنا لزول وانا برضو دا واجبي وما بقصر مشاوير العربية على البجيني من المكتب سادي حوجتنا ، بعد شوية زينب جات شايلة القهوة قلت ليها إجازتك بتنتهي متين ؟ - لسه شهر تاني الله يتم لي السنتين الفضلو ديل سرعة بس😩 فجأة جات روان احممد مشتاقين والله قلت ليها كتير والله خير اها😂 قالت لي انت كلب الواحد ما يشتاق ليك ساي قلت ليها عارف ساي بتاعتك دي انا ، يا فاهمني انت😂 طيب بما إنك مؤجز ح اضطر بكرا اصحيك بدري عشان توديني المكتبة ، قلت ليها كويس وبعدين !! قالت لي وبعدين عندي صحبتي إسمها مرام حتجي تقعد معاي في مواد عايزين نظبطها مع بعض رأيك شنو؟ رأيي في شنو بالظبط! قالت لي يعني موضوع إنها ح تقعد معاي ، قلت ليها معندي مشكله ابدا ،حلوو ح امش اكلمها ، خليتهم بتونسوا شلت قهوتي ودخلت الغرفة حاولت انوم ما قدرت شلت مفاتيحي وطلعت قلت ليهم انا زهجان ماشي ألاقي الشباب أمي قالت لي سمح ما تتأخر ، كنت لافي في الشوارع بس بعدها اتصلت على محمد وزاهر نتلاقى في الجبنه قعدنا فيها اكتر من ساعتين وكان في كورة حضرناها واتخارجنا وصلت البيت الساعة 12 دخلت لقيت أمي صاحية اول ما شافتني قالت لي اهلا بالمحروسة ، قلت ليها وين ياا حجه😂😂 خلاص ادخلي نومي قالت لي ساهرت بي ما ممكن ، قلت ليها كان تنومي ساي انا معاي المفتاح ،برري ما بجيني نوم إلا بعد ترجع واطمن عليك ، قلت ليها الله يخليك لي يا ستهم تصبحي على خير طيب ، وانت من اهله يا حبيبي

"سأعترف لك إني لا أزال أخصص جزء من يومي لك ابتعد فيه عن ضجة العالم واتزكر حديثك وضحكاتك فابتسم💓"
#يتبع

#سيروتونين
بقلمي مرام عبدالقادر
3-
الصباح لقيت روان في وشي عاينت للساعة لقيتها 7 يدوب قلت ليها يخ بتبالغي يخ 8 زاتو ما جات ، قالت لي صباح الخير بقولوا هو كويس ما جيت صحيتك من 6ص😂، قلت ليها كان طلعتي من هنا جنازة ستة شنو يا زولة انا نايم واحدة امبارح ،براك تتصايع وتنوم لوقت متأخر قوم اسي أخرتني متفقة مع مرام على زمن انا ،قلت ليها اتخارجي خلاص اجهز واجيك ، تمام، طلعت صبحت عليهم ودورنا بعد جات تنزل قالت لي بعدين ح تجي ترجعنا؟ قلت ليها بشوف انتي اديني خبر لما تنتهي ، طيب اوكي بايات ،في الشارع إتصل علي محمد قال لي انا جيت المكتب ، قلت ليو قربت عليك اسمعني باسل جا ولا لسه؟ قال لي لسه ما وصل لكن قال بجي الليله
-----
في جانب تاني ...
آمنه :انا تعبت يا سوسن الولد حاسة بضيع مني ما بسمع كلامي وووب اعمل شنو لو ابوهو عرف بخلي شغلو وبجي
سوسن: اسمعي كلامي زي ما قلت ليك نخلي احمد ولدي يتكلم معاو هو ولد زيو وقريب ليهو في العُمر بفهِموا براحه
آمنه: طيب إن شاء الله متأكدة احمد ح يأثر فيو ويخلي البعمل فيو دا
سوسن: بإذن الله كدي لما يرجع المساء بكلموا
آمنه: كويس اها النمش علي البيت
سوسن: سلمي على البنات ...
-روان رسلت لي اجيهم واحدة ونص اتحركت عليهم بعد وصلت اتصلت عليها يجوا طالعين بعد شوية لمحتهم صاحبتها كانت بتتكلم في التلفون وواقفة بالجنبة بعد خلصت روان أشرت لي نزلت سلمت عليها قالت ليها دا احمد اخوي الحكيت ليك عنو ودي مرام يا احمد قلت ليها يا اهلين كيفك! ردت لي تمام الحمد لله ما ركزت في وشها طوالي قلت ليهم طيب نمش! ...بالليل جاتني أمي قالت لي عايزاك في موضوع ، صلحت قعدتي وقلت ليها خير في شنو!! قالت لي طارق ود آمنه خالتك ،مالو!! - أمو عرفت إنو بشرب سجار ليو فترة ومتابع شلة اولاد ما كويسين قلت ليها دقيقة طارق دا ما دخل الثانوي السنة الفاتت دي؟! -اي صغير اخواتو اسي قلنا نخليك تتكلم معاو انت هم خايفين ابوهو يعرف وهو صعب قلت ليها طيب انا بتصرف معاو لبكرا بعد طلعت قعدت افكر ادخل ليو بياتو طريقة اسي!! ما كنت دايرو يعرف أمُو ورا الحكاية دي ، تاني يوم كانت الجمعه صحيت قريب وقت الفطور كنا بتونس كلنا ونحنا في السُفرة زينب قالت لي صحي يا احمد عرس نون حددوا بعد اسبوعين قلت ليها كويس والله العريس من وين؟ قالت لي زميلها في الجامعة قالوا اهلو من مدني أمي قالت ليها بكرا نمش علي ناس خالتك نوال نشوف معاهم تجهيزات العرس من بدري روان قالت ليها كمان دي بتها الوحيدة بكرا تعمل ليها العرس الما خمج بتحب البوبار زاتها😂 أمي قالت ليها التسمعك خالتك 😂 ضحكتها لفتتني ما عارف كم بالظبط سرحت فيها سمعت صوت زينب بتقول لي احمد ناولني كباية الموية الجنبك انتبهت لنفسي مديتها ليها وقمت طوالي أمي قالت لي متين لحقت تشبع قلت ليها الحمد لله بالهنا كنت حاسي بنظراتها متابعاني
-كنت بضحك على كلام روان اصلا هي مجنونة فجأة حسيت بيو بعاين لي ما عارفة جاني إحساس غريب اتوترت بعد شوية سمعتو قام ودخل رفعت رأسي عاينت ليو كنت متابعاهو بعيوني دا شنو البعمل فيو!! انا ليه كل ما اشوفو بتوتر ليه ضربات قلبي بتزيد بالطريقة دي!!)
بعد الصلاة كان عندي عقد صاحبي مشيت حضرتو وجبت راجع مع المغرب ،بعد 8 بالظبط طلعت قعدت في مصطبة الشارع عارف طارق بقعد فيها مع اصحابو زي الزمن دا فعلا شوية وهو جا سلم علي وقعد قلت ليو الخبر شنو يا مان قال لي تمام والله غريبة يعني الليله اشوفك هنا قلت ليو ياخ مصدع صداع غريب زاتو لا قهوة لا غيرو ما شالتو قال لي بتشرب ؟ عملت نفسي ما فاهم قصدو قلت لي شنو! -سجار ،سكت مسافه معاك يعني؟ قال لي اي اي طلع لي واحدة من جيبو ومداها لي شلتها منو وبقيت اعاين فيها قال لي يا عمك دقيقتين بس رأسك بظبط ، قلت ليو عارف البتاعه دي ضررها شنو على صحتك؟ -عارف لكن اتعودت قلت ليو من متين؟ - شهر كدا ، قلت ليو يا طارق انا القدامك بعدا قربت اتخرج من الجامعة ولا يوم ما حصل شربت سيجارة لو ابوك كان هنا ح تشربها؟ دنقر رأسو وقال لي لا لا ، اها طيب هو معتبرك راجل البيت حاليا في غيابو يرضيك أمك واخواتك يعرفو إنك ماش في طريق غلط نظرتهم ليك حتكون شنو!! سكت وما رد لي قلت ليو انا بنصح فيك لإني معتبرك اخوي الصغير وما دامك عارف ضرر السجار احسن نخلي دربو واصحاب السوء ابعد منهم وركز في قرايتك عشان ترفع رأسنا اتفقنا؟؟ قال لي كويس اتفقنا قلت ليو كلام راجل ماف رجعه؟ قال لي اي ان شاء الله بعدها اتونسنا مسافه وأي واحد دخل بيتو
#يتبع

#سيروتونين
بقلمي مرام عبدالقادر
4-
جاتني صحية بالليل لقيت نفسي عطشان وموية ماف جنبي طلعت من الغرفة شايف نور غرفة روان لسه مولع دخلت المطبخ وانا ما مركز كويس شايف بت قدامي قلت ليها روان مالك مساهرة!!! كانت ماسكة كباية قهوة في يدها اتلفتت علي والخلعة ظاهرة في وشها قلت ليها مرام معلش ياخ كنت فاكرك روان ما قاصد قالت لي ما حصل شئ كنت متوتر عاينت ليدها في جزء من القهوة اتكشحت في اصابعها قلت ليها يدك! دقيقة دقيقة جبت موية باردة كبتها فيها ، قالت لي بسيطة ما كانت سخنة شديد ، قلت ليها طيب الحمد لله ابتسمت لي وطلعت بقيت واقف وبعاين مكان كانت واقفة قبل لحظات إبتسامتها دي طبيعية!! كل مرة تضحك فيها ولا تبتسم بسرح فيها ليه! احمد مالك انت!! جاني إحساس غريب ما عرفتو قبل كدا طردت الأفكار كلها من رأسي شربت موية ورجعت غرفتي
-قلت لروان ح اعمل لي قهوة عشان اقدر اركز جهزتها وجيت عايزة اطلع حسيت في زول جاي خفت بعد شوية سمعت صوتو من الخلعة ما حسيت بالقهوة الادفقت في يدي شفت نظرة الخوف والحنّية في عيونو في شئ بجذبني اعاين ليو ملامحو مريحة مميزة جدا❤️ جا عايز يشوفها بس انا اتوترت وطلعت طوالي
-----
تاني يوم أمي قالت لي اوديها ناس خالتي وصلتها لما جات نازلة قالت لي انت ما داخل معاي تسلم عليهم؟ قلت ليها خليها بعدين اسي مستعجل وح يمسكوني برنامج بتاع فطور وبتاع ،قالت لي كويس يلا الله معاك ، دورت قلت امش الجامعة تاني كسرت الحنك دق علي واحد صحبي وين انت يا حبووب قلت ليو اوو حبيبنا قاعد والله الخبر ؟ قال لي مية المية اسمعني ما تجي نشرب جبنه في الجو الظابط دا معاي الشباب زاتو قلت ليو قداام جاي عليكم ما كان عندي موضوع مشيت عليهم ودورنا اقيام بتاعت كتشينة مولعة للعصر حتى جيت منهم اتصل علي مجتبى قال لي منتظرك بالغدا قلت ليو قريب جاي قعدت معاهم زي ساعه وطلعنا ، المساء روان قالت لي بتقدر تودي مرام ولا نطلب ترحال قلت ليها ترحال شنو بعد 8 خلي بوصلها ، قالت لي قلنا امكن تعبان طيب هي جاهزة ح اكلمها تتطلع غيرت التشيرت
يلا يا خالتو مع السلامة، أمي قالت ليها حبيبتي سلمي على أمك وربنا يوفقكم إنتي وونة الطب قرايتو تقيله ، حاضر الله يسلمك دعواتك يا خالتو لما جينا طالعين روان قالت لي احمد دقيقة البس عبايتي ماشة معاكم اغير شوية ، قلت ليها فرصة ارح طيب😂طول الطريق كانوا بتونسوا قالت لينا اتفضلوا طيب سلموا على ماما نزلنا لاقتنا أمها إسمها نورا رحبت بينا مرام قالت ليها دا احمد أخو روان أمها قالت لي يا هلا سمعت بيك تسلم ما قصرت قلت ليها العفوو ياخ شرف لي اتعرف بيك اخدنا معاهم زي عشرة دقايق وطلعنا
يُمة زوري لي يُمة زوري الشيخ نصر اعرس الخُدر وكيه للصفر يُمة💃💃
يُمة الزول وبراي بجيب الزول يُمة💃
قلت لروان دي اغنية شنو اسي الشغلتيها دي قالت لي سمحه يخ بتاعت هجيج قلت ليها واضح ما تغني خلي نسمع صوتك الشين دا قالت لي عشان ما عاجبك بغني 😂 قعدنا نتعاور لحدي ما وصلنا البيت

" فأرسم بفرشاتك ما شئت فأُقسم بأن كل شئ منك جميل ، فقلبي لا يطيعني يندفع نحوك دائما اقسم بأني وبّخته آلاف المرات وطلبت منه ألا يميل لكنه يجد استقامته اتجاهك فأنت الخيرة فيما اختاره الله 💓"
#يتبع

#سيروتونين
بقلمي مرام عبدالقادر
5-
مرا اسبوع ونزلت الجامعة السمستر الأخير كنت بمش أيام معينة في الاسبوع يوم قاعد في كافتيريا الجامعة فجأة اشوف زول جرا الكرسي الجنبي وقعد رفعت رأسي لقيتها شهد قالت لي شنو يعني بقينا ما ظاهرين قلت ليها اوو شهد بزاتها 😂 والله تقولي شنو ياخ بجي احضر المحاضرات المهمه بس ، قالت لي نفس الشئ بجي يومين في الأسبوع بلاقي محمد وكمال اكتر كيفك يخ؟ قلت ليها تمام والله الحمد لله انتي كيف وجديدك قالت لي الحمد لله الحال لبعضو زي ما شايف لسه حجر ولا 😉 قلت ليها انتي ومحمد دي بقت ليكم التشغيلة الجديدة ولا شنو قالت لي بعدا اتخارجت من حاجه إسمها جامعه عيش حياتك وجرب إحساس جديد بدل الحجرنة الأنت فيها دي - عاان منو بتكلم ،اتلفتنا الاتنين لقينا محمد وكمال واقفين شهد قالت لي اهاا محمد حسين جا خلاص انا النقوم 😂 قال ليها هسي ما كنا بنقول الحب جميل 😂 قالت ليو كلم احمد دا بالله ، قلت ليها بفكر في الموضوع😂 قعدنا فطرنا كلنا بعدها كمال قال لينا الجبنه علي محمد شغلها ليو تاني يا شهد كل يوم تعالي بجاي عليك الله كمال رد عليو انت تافه والله بعمل فيكم حسنة😂 شهد قالت ليهم انتو الاتنين اصلو ما بتتغيروا 😂 يلا يخوانا خليها مرة تانية عزومتي براها قلت ليها ويين !! قالت لي عندي صحبتي منتظراني قريب عندنا مشية السوق في الحر دي قلت ليها الله يعينك على الشمس المارقة فيها دي😂 - اي والله يلا يا شباب نتلاقى ان شاء الله ، تميت قعدتي معاهم وطلعت جيت البيت روان قالت لي بكرا نازله اول إمتحان قلت ليها بالتوفيق يارب ورجعت اعاين في التلفون تاني قالت لي آمين، كدا خلاص يعني!! قلت ليها عارفك دايرة تقولي شنو طيب ح اوديك كل يوم الجامعة قصرت منك والعرض دا ساري فقط فترة الإمتحانات بس😂 قالت لي ما حنك المهم ح ارتاح من المواصلات في شئ تاني 🌚 قلت ليها اها شنو ، قالت لي ممكن يعني لو ماف مانع نسوق مرام معانا هي في شارعنا قلت ليها ظابط تمام ، وااي يخ انا بحبك 😭 قلت ليها قدي خلاص ، يلا تصبح على خير واضبط منبهك على 7 الإمتحان 8 ما تتكاسل لي قلت ليها كويس وانتي من اهل الخير ، الصباح جهزت بدري سلمت على أمي وزينب روان جات قالت لينا دعواتكم إمتحان الليله يجي ساهل 😩 أمي قالت ليها ربنا يوفقك ويسهل عليك ابعدي من التوتر تمام ❤️
مرام كانت منتظرانا اول ما وصلنا جات ركبت قالت السلام عليكم رديت ليها وعليكم السلام جاهزة كويس ! قالت لي الحمد لله غايتو😂 روان قالت ليها حاسة نفسي داخلة حرب نفسية😂 احمد بعدين تعال لينا 12 بالضبط ، قلت ليها تمام ، الفترة دي ووجودها كل يوم كنت بحس نفسي مشدود ليها بتقدر تخلق جو حلو حولينها مرات بتعمد افتح مواضيع معاها عشان اسمع صوتها طريقة ونستها وفهمها للأمور بتجذبني دايما .
كان باقي ل عرس نون بت خالتي يومين أمي قالت لي عايزة تعمل حفله حنه في البيت للعروس قلت ليها كويس اي حاجه ناقصة وروني بيها ، قالت لي اي زينب بترسل ليك الحاجات العايزنها كلها بكرا عندك جامعة؟ - اي محاضرة الصباح كدا ، طيب حاول ارجع طوالي عندي مشاوير تخلصها لي وفي تجهيز الزينة شوف معاك نفر نفرين من اولاد الحله يعلقوها معاك قلت ليها ظابط دا موضوع منتهي ، الصباح لقيت روان جاهزة قلت ليها اول مرة دي عملتيها كيف؟ قالت لي الليله آخر إمتحان 💃 وح امش الكوفير من الجامعة برجع بترحال طيب ، قلت كويس براك ؟ قالت لي لا معاي مرام عزمتها صحيي بالمناسبة دي اتزكرت قالت الليله حيوصلها ود خالتها ما عارف ليه اتضايقت اصلا عملت رايح وقلت ليها يلا ما تتاخري وصلتها ومشيت الجامعة المحاضرة انتهت 10 بعدها لاقيت الشباب زاهر قال لي والله يا صحبي توسع شغل المكتب دا امورك تظبط وقروش تجيبها في البلد دي كمال قال ليو انت ما جادي ولا شنو 😂 الناس تتخارج بس زاهر قال ليو انا اصلا ما قاعد اليوم البستلم فيو شهادتي بدق خروج نهائي والله تاني بشيخ الدمازين ما راجع 😂 محمد قال ليو وراك انا يا عمك ، وراي وين!! انت وهم ولا شنو غيرك الجايب لي الكُج شنو 😂 قلت ليهم الببني ليكم منو سمح😂 زاهر قال لي انت وكمال قاعدين😂 رد ليو كمال بس زووط رسلوا قروش الطوب وما بنقصر 😂 اتصلت علي الحجه قلت ليهم يلا هووي محمد قال لي ونِس يااخ وراك شنو قلت ليو الحجه عامله ليها موضوع بتاع حفله حنه في البيت كمال قال لي هو العرس متين!! - الجمعه شرفوا في الصاله بالله ، زاهر قال لي قداام بتلقانا رد ليو محمد طلعت زيتنا ياخ ببدلتك الكحلية عبد الواحد دي😂 قال ليو يا عمك من زمنها لو فيها مزز بجيكم بالجديد 😂قلت ليهم ظابط يلا
#يتبع

#سيروتونين
بقلمي مرام عبدالقادر
6-
رجعت لقيت خالتي رشا وبناتها وكمية من بنات أهل أمي ما عندي بيهم معرفة شديدة قاعدين والبيت جايط بدينا في التجهيزات خلصنا بعد العصر دخلت غرفتي اخدت دوش وغيرت هدومي تلفوني ضرب كان رقم غريب رديت جاني صوت بت قالت لي احمد انا روان قلت ليها كويسة انتي؟؟ قالت لي اي اي كويسة دا رقم مرام عايزة اقول ليك القروش المعاي ما بتكفي حق ترحال قلت ليها انتي اطلبي وتعالي البيت انا بحاسبوا ما حنك ، طيب تمام يلا ، بعد قفلت سجلت الرقم ب مرام تاني رجعت ختيت جنبو قلب ما عارف عملت كدا ليه المهم شلت مفاتيحي وطلعت زينب قالت لي الحفله باقي ليها نص ساعة روان وينها!! قلت ليها جاية بترحال انا قاعد برا تمام طلعت قعدت في العربية مساافه وجو روان ومرام خطفت قلبي بجمالها ما كانت متكلفة زي باقي البنات الفي الحفله على طبيعتها فضلت مراقبها من بعيد ..ما تكون وقعت يا احمد!! لا ياخ معقولة! انت احمد المعندو شغلة في امور الحب والحبكانيات دي كان في صراع بين قلبي وعقلي في النهاية وقفت اتحركت في اتجاه هي واقفة ، احمممد دي شنو الرهابة دي شغال لكن اتلفت لقيتها روان قلت ليها كيف بالله 😉 وبعدين مين القمر دا بقت تلف بفستانها قالت لي حلوة مش قلت ليها جدا جدا امزز واحدة عاينت لمرام لقيتها ماف روان قالت لي بتفتش لمنو!! قلت ليها ولا زول امشي ارقصي زي ما كنتي😂 اتحركت من جنبي جيت عايز اطلع لقيتها واقفة وراي اتلبشت قلت ليها اا مرام كيفك؟ قالت لي تمام الحمد لله وانت؟ - بخير ولله الحفلة كيف معاك قالت لي حلوة بنات اهلك ظريفات قلت ليها تقريبا طالعه حلوة "شت يااا دا شنو البعمل فيو😂 " حسيتها خجلت قالت لي شكرا من ذوقك❤️ في وقفتنا دي روان قالت ليها مرام انتي هنا كنت بفتش فيك ،قالت ليها طلعت ارد لأمي هنا جوطة ،روان قالت لي احمد مرام دي ماشة ممكن ترجعها بعدا الزمن اتأخر قلت ليها تمام عندك حاجه ولا نطلع طوالي قالت لي لا معندي يلا يا روونة باي ، كنا بنتونس مرة ونسكت مرة بعد وصلت قالت لي اوكي تسلم كتير متعباك معاي قلت ليها ماف تعب والله ( كنت ح اقول ليها تعبك راحة كويس ما اتهورت😂 ) قالت لي يلا تصبح على خير ، وانتي من اهله انتظرتها لحدي ما دخلت ولفيت رجعت معظم الضيوف لقيتهم مشو كنت داخل على غرفتي كوركت لي خالتي رشا احمد مشيت قعدت معاها سألتني من الجامعة ماشة كيف والشغل والأمور دي جات بتها سارة قالت لي مالك طولت مننا كدا قلت ليها والله جاري بس ما لاقي زمن بدت تتظارف معاي وانا اصلا معندي ليها حاجه قمت قلت ليهم يلا استأذن قالت لي بدري ما اتونست معاك قلت ليها مرة اوسع تعبان خالتي قالت لي طيب اظهر علينا ، قلت ليها ان شاء الله تصبحوا على خير ،،دخلت الواتس لقيت مرام رافعة صورة ليها معاها روان ونون وكاتبة" عروسنا الجميلة تتهني يارب🖤" رسلت ليها عقبالك انتي وروان 😂 كانت خاشة ردت لي طوالي اميييين بس لسه مشوارنا طويل نحنا😂 قالت لي عارف روان دايما بتحكي عنك الله يخليكم لبعض قلت ليها آمين عندك اخوان انتي؟ قالت لي اي اخوي وائل بس ما قاعد معانا ،وين!! شغال في كندا آخر مرة شفتو قبل سنتين ،قلت ليها ما عندو إجازة قريبة طيب قالت لي مفترض تكون شهر 3 احمد شوف الساعة كم😂 عاينت لقيتها 2ص قلت ليها شت ياا😂 حقيقي الواحد معاك ما بحس بالوقت قالت لي كلامي كتير اصلا 😂 يلا تصبح على خير بكرا وراي جامعة قلت ليها كويس وانتي من اهل الخير كنت مبسوط جدا إني اتكلمت معاها ودي كانت بدايتنا ❤️

" بسيطة هي امنيتي ،،أنت ثم لا أحد❤️"
#يتبع

#سيروتونين
بقلمي مرام عبدالقادر
7-
عدا شهر مرام بقت حاجه اساسية في يومي كنت برجع من الجامعة او الشغل بتكلم معاها ما عارف كيف بس بلاقي نفسي بحكي ليها تفاصيل يومي كلها اتعودنا على بعض في فترة بسيطة بتقدر تغير ليك مزاجك في دقيقة كانت مختلفه بطريقتها❤️. يوم قاعد في المكتب ضرب لي محمد ، وين انت يا بشر ما جاي الجامعة الليله؟ قلت ليو ماف حاجه مهمه ، قال لي في برنامج شهد حق لمّة الدفعة ما شفت الرسايل في القروب ولا شنو!! قلت ليو اي اي شايفهم قايمين في الموضوع وشهد زاتها رسلت لي لكن اعتذرت ليها ، وين انت اسي؟ في المكتب ،ظابط جاي عليك بعد ساعه تقريبا جا داخل قال لي في شنو يا عمك قلت ليو بالنسبة؟ -ما من عوايدك تفوت البرامج الزي دي قلت ليو ماعندي مزاج ساي ، قال لي الفترة الاخيرة دي ملاحظ ليك ما براك قعدت اضحك كيف يعني؟ قال لي يازول ما تعمل رايح امور الغنج دي ما تبعنا😂 قلت ليو محمد قوم قِد من هنا قال لي ماشي ماشي اسمعني بعدين جاي الجبنة؟ قلت ليو ما اظن يخ تعبان والله ، ظابط يلا ،، المساء لما رجعت البيت لقيت في عربية واقفة برا استغربت دا منو الجانا دخلت في الهول قلت السلام عليكم كان في راجل ومعاو ولد شاب قدري كدا قاعدين في الجهة المعاكسة أمي قالت لي وعليكم السلام كويس جيت تعال بعد وصلتهم وقفت تلقائيا كان دا عمي يوسف وولدو ، عمي وقف وبقي يعاين لي احمد! كيفك يا ولدي جا سلم علي حضني مسافه حرفيا انا كنت زي البليد ما حاسي بأي شئ اتجاهو لا حب لا كره عمي المن اتوفى ابوي الله يرحمه ما شفنا ولا سأل مننا جاي الليله يفقدنا!! كنت بسال في نفسي الفترة دي كلها كان وين؟ ناسي عندو اولاد أخو في يوم احتاجو ليهو وما كان موجود في ضهرهم ، سلمت عليهم وقعدنا أمي قالت لي الليله مالك متأخر قلت ليها كان عندي كم حاجه كدا خلصتها عمي قال لي ان شاء الله كويس رديت ليو الحمد لله في نعمه ، قال لي عارف نفسي مقصر فيكم يا أولاد أخوي وانا كنت ، قبل يتم كلامو قلت ليو اسي ما قصرت بجيتك دي يا عمي أمي عاينت لي نظام ما صح تقول كدا حاولت تلطف الجو قالت ليهم اتفضلوا شيلو الشاي ما يبرد الفهمتو من عمي وولدو إنهم جو الخرطوم لمقابله وراجعين طوالي بكرا اخدو قعدتهم وطلعوا مشيت وصلتهم مكان قاعدين وجيت راجع
كان باقي ل تخريجي حكاية شهرين ، زينب نزلت سنة رابعة روان ومرام نزلوا سمستر 3 وعملوا ليهم ترحيل يوم جمعه كنت بتونس مع مرام لاحظت ليها منفسنة قلت ليها مالك انتي الليله؟ قالت لي داخلة على إمتحانات وزهجانة من القراية ، قعدت اتكلم معاها واشجعها وقتها اتزكرت روان حتكون منفسنة زي صحبتها مشيت ليها روان قومي ارح نطلع مشوار بقت تعاين لي مشوار شنو؟ ، قلت ليها خلاص خليك انا طالع وقفت قالت لي انت احمد متأكد ؟ قلت ليها ليه يعني😂 ما تقول ما شايفاك اليومين دي بعدين انا اختك فردتك قلت ليها فردة جزمه ولا سفنجة خخ ، اننن ما وقت ظرافتك انت حبيت شكلك🌚 قلت ليها ما عارف والله ياخ ماشة ولا افوتك ، دقيقة اجهز سمح ،بقيت افكر في كلامها الاخير انا حبيتها ؟ تاني جات راجعة قالت لي نسوق مرام معانا كيف؟ قلت ليها وكأني منتظر تقول كدا اي شوفيها لو بتمش قالت لي وافقت اصلا قاعده على الهبشة 😂 سوقتهم محل آيس كريم فتح جديد كنت عارف البنات بحبوا الحاجات دي ، كانت قاعدة قصادي شردت فيها واتزكرت جملة روان القبيل انت بتحب!.... احمد تعال ناخد سلفي اقيف جنب مرام سريع انتبهت لكلام روان جيت وقفت مرام قالت ليها حلوة شديد قلت ليها اي اي ظابطة نمش بعدا عشان الزمن وصلنا مرام بيتهم ورجعنا اول ما دخلنا جات زينب مارقة قالت لي اهلا خلاص اتفسحتوا وفرفشتوا🙂 قلت ليها زعلانة والله😂 قالت لي اصلو ما زعلانة على شنو، روان قالت ليها كنتي نايمة صحيتك قلتي لي ما ماشة ، قالت ليها من متين انا بصحى كدا حبيبة دي كانت فيها طلعة كنتي تجيبي كباية موية تكشحيها فيني ، قلت ليها اهااا براك اعترفتي نومك زي وشك😂 احمد وشي مالو!! أمي جات لقتنا جايطين ، قالت لينا اجي يخواني الساعه 12 اي زول يشوف غرفتو وين خلاص عاينت لي كدا والنبي عااد احمد بقيت الفترة دي تهظر كتير والضحكة لآخر ضرس لقيت عروس يا ولد ولا شنو ؟ قلت ليها عروس شنو يا حجه خلي نتخرج اول 😂 زينب قالت ليها شوفي وشو دا منور 😏 قلت ليهم انا داخل انوم احسن يلا تصبحوا على خير ،روان قالت لي وانت من اهلو يا أبو وش منور حمرت ليها قالت لي قصدي الله يخليك زينب قالت ليها هرشة لكن😂
#يتبع

#سيروتونين
بقلمي مرام عبدالقادر
8-
ظابط طيب منتظرك قفلت الخط ، أمي عاينت لي دا منو الجايك بعدين قلت ليها دا محمد صحبي جاي يشرب معاي شاي المغرب ، خلي زينب تعمل لينا كيك مع الشاي ، اي احسن كدي اقوم اكلمها ، محمد جا قعدنا كلنا في الهول أمي قالت ليو يخسي عليك مالك مطول مننا كدا قال ليها دا ولدك دا قال لي ما تجيني في البيت😂 شوف الوسخ قلت ليو يزول متين حصل وبعدين يا أمي محمد دا ما عارفة محنو كمان قالت لي عارفة تب صاحب منو هو ، محمد قال ليها اضررب يااا😂 والله كلامك صح يا خالتي 😂 جات زينب شايلة الشاي قمت شلتو منها سلمت علي محمد وقعدت محمد قال لينا الكيكة شكلها مُغري شديد تسلم يدك ياخ ردت عليو الله يسلمك بالهنا، بعد أمي وزينب مشوا محمد اتلفت علي فجأة قال لي احمد الله كم! قلت ليو في شنو اسي 😂 قال لي انا جاييك في موضوع تاني اصلا ما شاي وكيك😂قلت ليو خير شكلك جادي ، انت عارف اقل من شهرين ونتخرج ،اي وبعدين!! طيب ظابط بعدها زي ما عارف ح اسافر استلم شغل أبوي في الإمارات المهم بدون المقدمات دي كلها انا جاي و داير اطلب يد اختك زينب على سنه الله ورسوله🖤 حقيقي ما كنت متوقع يكون دا الموضوع اتفاجئت سكتا مسافه بعدها قلت ليو انت أخوي قبل تكون صحبي والظروف والمواقف الكنت بلقاك فيها اثبتو لي كدا كان بعاين لي ومنتظر ردي حيكون شنو قلت ليو عارفك حتشيلها في عيونك قال لي خليك مطمئن حتكون مع راجل حيعمل اي شي عشان يسعدها لأنها بتستاهل قلت ليو وانا متأكد ما ح يجي يوم وتهون عليك ، ابدا يا احمد انا كنت منتظر الوقت دا من زمن وما عايز ادخل معاها في علاقة إلا انا اكون جاهز ليها لإني اوصلها لأهلنا قلت ليو بعرف اخلاقك كويس ياصحبي انت وزينب مبروك عليكم الفرحة الشفتها في عيونو ما بتتوصف قال لي لما جا طالع اسمعني ما توريها اسي بالكلام دا خلي لما يجي الوقت المناسب ظابط قلت ليو جدا ظابط طلعت معاو للشارع وجيت راجع لقيت روان وزينب بغنوا السمبتيك كلمو ود البلد ديك كلمو 💃
البقرا محاسبة كلمووو
العذب البنات كلموو بالصفوف واقفات كلموو قعدت اضحك عليهم دا غُنا شنو اسي😂 روان قالت لي هي اصلا البقرأ مختبرات لكن عشانك قلبناها محاسبة 🌚 قلت ليها اهااا ما قصرتوا😂 زينب اسمعيني تعالي دايرك ،أمي قالت لي لا لا تمام بقي فيها أسرار كمان، قالت ليها طبعا الأسرار دي يا أمي ياها مكوة قميص وبنطلون 😊 قلت ليها شاطرة😂 اكويهم سريع طالع بعد شوية ، مشيت شارع النيل كنت محتاج لقعده مع نفسي افهم الحاصل معاي الفترة دي ما كان عندي مزاج لشئ اتصلت علي مرام قالت لي مالك شكلك زهجان ، قلت ليها فعلا عرفتي كيف !! من صوتك حسيت بكدا تاني سكتت مسافه قالت لي احمد انا عايزة اقول ليك حاجه ، قلت ليها قولي سامعك ، طيب خلاص خليها وقت تاني ، مرام حاجه مهمه ؟ قالت لي ما عارفه خلاص انسى انت برا البيت ولا شنو! اي متأكدة إنك كويسة! ولا في شئ تاني مترددة تقولي ؟ قالت لي كويسة والله لا ماف شئ قلت اطمن عليك يلا بايات ،بعد قفلت فكرت في الكلام الكانت دايرة تقولو هل كان نفس الفي بالي؟ رجعت البيت بعد 10 لاقاني طارق جاي من البقالة قال لي ابوحميد قلت ليها ياا مان الخبر ؟، تمام التمام وينك انت بقيت ما قاعد اشوفك في المصطبة😂 قلت ليو والله اخوك جاري ومشغوليات😂 اها المدرسة كيف والقراية ؟ -ماشي الحال عاينت ليو نظرة هو فهمها قال لي يزول خليتها من الزمن داك ما تحمر لي😂 قلت ليو كويس الحمد لله يُعتمد عليك تاني يعني؟ -ان شاء الله قلت ليو قداام

"اساسا هو زول واحد بس بحرك فينا كل مشاعرنا💗 زول واحد بتحمل نوبات اكتئابنا مهما نزعل منو اول ما بنشوف صورتو أو نسمع صوتو قلوبنا بتهدأ كأنو تلينا عليها قرآن ، زول واحد إحساسنا اتجاهو بكون ما مفهوم لكن صادق 💙، زول واحد من كل اللي مرو علينا ولسه حيمرو بنكون متأكدين إنو هو فعلا شبيه الروح💕💕💕".
#نتلاقى

#سيروتونين
بقلمي مرام عبدالقادر
9-
احمد قوم احمد ،صحيت مخلوع في شنو!!! لقيت أمي وزينب ببكوا قلت ليهم انا ما فاهم حصل شنو! أمي قالت لي عمك يوسف الله يرحمه💔 بقيت ما مستوعب الكلام شنو!!! متين!!قبل يومين كنت بتكلم مع مجاهد طمني عليه ،زينب قالت لي اتصلوا علينا اسي قالوا مات جاتو جلطة في المخ، قوم اجهزوا ارح نمش نحصلهم في المستشفى ، الساعة 6 صباحا كنا قدام المستشفى دخلنا سامعين اصوات البكى طلعنا الطابق التالت محل كانوا مرقدنو لقينا كمية من الناس وصلت بقيت افتش ل مجاهد من بينهم لمحتو واقف بعيد معاو صحبو كان مقبل علي الحيطة وببكي مشيت عليو وشلت معاو الفاتحه بعدها قال لي ابوي يا احمد فات 💔 جملتو دي رجعت بي 4سنة لورا في اللحظه دي ما كنت قادر ابكي زي في حاجه قابضة على قلبي اتلفت على الجهة التانية شفت مرت عمي وبناتها وأمي واخواتي ببكوا ، بعد نص ساعة الدكتور قال لينا حيطلعوا الجثمان نزلت تحت مع مجاهد نعمل الإجراءات خلصناها كلها والناس بدت تتحرك على البلد قلت لأمي انتو ارجعوا البيت انا ح امش مع الجماعه وقفت ليهم امجاد توصلهم ومشيت مع الجثمان وصلنا بعد 3 ساعات حتى دفنا ال تلاته يوم القعدتها هناك كانت صعبة علينا كلنا .
-----
روان :دقيقة دقيقة افهم !! انتي واحمد اخوي حاليا اصحاب ولا كيف!
مرام :يا روان انا ما عارفة بس انا بحبو 😩،
روان: احمد انا فاهمه كويس حرفيا الفترة العرفك فيها دي غيرتي فيو كتير وكلنا لاحظنا احمد ما حصل كان مبسوط كدا متاكدة هو كمان بحبك ، مرام :بالجد يا روان😭
روان :وااي ياهبلة عارفة لو ارتبطوا جد حا اتبسط اكتر منكم 😂 بس انتي ما توريهو اول بعد نتأكد مع إني عارفه هو ثقيل وإنسان بارد ومستفز بس ح ادردقو في الكلام 😂بس اوعك تبقي خفيفة زي شاي البكى😒
مرام :خلاص ح تبدي تعيشي لي دور رضوى الشربيني من اسي واعملي وبتاع
روان: يبت لازم يكون في اكشن في الموضوع😂 عايني هو بكرا راجع بتقدري تجينا ؟
مرام: بكرا شنو هو!!
روان:الجمعه، يخ انتي تعالي وانا عندي فهم
مرام :روان انتي افكارك كلها سوداوية🙂
روان: حتفهمي يامزة لبكرا منتظراك يلا اقفلي 😘
مرام : سمح ،الله يستر باي
بعد رجعت من البلد لقيت مرام قاعدة في البيت سلمت عليهم وقعدت أمي قالت لي خليتهم كيف ؟ قلت ليها الحمد لله مرت عمي وبناتها لسه ما استوعبوا قلت ل مجاهد يخلي بالو منهم ، قالت لي يحليلهم قدر ربنا ماف اعتراض ، زينب قالت لي وشك دا مخطوف من التعب ،قلت ليها اي والله مرهق شديد ياريت بس كباية جبنه ، تأكل حاجه اول؟ لا لا فطرت في الشارع زينب مشت المطبخ وروان وراها بقينا قاعدين انا وأمي ومرام قلت ليها كيف مع الجامعه ؟ كان لازم اسألها كدا عشان أمي ما تحس 😂 قالت لي كويسة وسكتت حسيت من ردها في شئ قلت ح اعرف منها بعدين قلت لأمي انا داخل اغير خلي روان تجيب لي القهوة جوه ، اخدت لي غفوة كدا جات روان قالت لي لو عايز تنوم ارجعها احسن قلت ليها لا لا خليها كانت شايله تلفون في يدها بضرب قلت ليها ردي قالت لي دا حق مرام ارد ساي مسجلاهو ma soul امكن حبيبها قلت ليها شنو!! كيف دا ما اظن عندها قالت لي اسي مالك انفعلت كدا امكن مرتبطة انت حتعرف من وين يعني🌚 قلت ليها ما انفعلت تاني شئ ما حصل قالت لي إنها مرتبطة ولا لمحت بكدا ، قالت لي ما معناها انت صاحبها تحكي ليك بحياتها الشخصية ، قلت ليها روان اتخارجي ما مهم ، قالت لي اصلا زاتو حبيبها لس برن بكون اسي خاف حصل ليها شئ🌚 كلامها دا غاظني قلت ليها اي والله بكون مشتاقة ليو اجري ودي ليها التلفون ما تصدعي بي اقفلي معاك الباب داير انوم بالله🙂 - سمح ما تتضايق انت بس يلا اشرب القهوة بردت زاتها 😘 بعد طلعت قعدت افكر معقوله تكون مرتبطة؟ ما ظاهر طيب! شلت التلفون عايز اتصل تاني قلت دا شنو الأنا بعمل فيو دا افرض طلعت بتحب واحد تاني! جدعت التلفون من الزعل طيب انا بحبها! بحبها والله❤️.

"لم يكُن الحُب شعوري الدائم نحوها بقدر ما كنت أحس بأنها جُزء مني💓"
#نتلاقى

#سيروتونين
بقلمي مرام عبدالقادر
10-
الليل كلو ما قدرت انوم خصوصا إني شايفها اونلاين في الواتس ما من عوايدها ما ترسل لي دخلت الشات بتاعها كذا مرة ومتردد ارسل اسألها ! في النهاية طلعت من الواتس كلو وقفلت التلفون مشيت ل روان في غرفتها صحيتها قامت مخلوعة بسم الله في شنو!! قلت ليها ما بتعرفي تصحي براحه يعني قالت انت خالعني في زول بصحي زول الساعه 1ص 🙂؟ قلت ليها عايني انا بحبها ،منو هي؟؟ قلت ليها يا زفتة انتي فاهمة قعدت في نص السرير وقالت لي البعرفو انتو اصحاب غايتو قلت ليها اديك اسي عرفتي إني حبيتها ، عاينت لي وقعدت تضحك قلت ليها خلاص انتهيتي؟ -من متين طيب ،ما عارف بالظبط بس متأكد ، القبيل طلع حبيبها؟ قالت لي لا كنت ملخبطة شكلي داك اخوها وائل 🌚 بعد كلامها دا حسيت بالراحه قلت ليها كويس حمد لله ، قالت لي احمد انت بتحبها بالجد ظاهر عليك الفترة الفاتت دي اتغيرت انا طولت ما شفتك مبسوط كدا قلت ليها معاها بكون مبسوط ، قالت لي انت أخوي الوحيد وبعرفك كويس ومبسوطة ليك شديد عشان انت فعلا حبيت اجدع واحنّ قلب في الدنيا حافظ عليها هي أعز رفيقة عندي❤️ قلت ليها ما بحتاج توصية بقينا نعاين لي بعض بعد شوية فكينها ضحكة😂 قالت لي الكلام الرومانسي ما جاي معاك خالص 😂 قلت ليها حيوانه جزمة ،ايوة كدا ياعم احمد البعرفو😂 اها حتوريها متين؟ قلت ليها في الوقت المناسب اوع تفتحي خشمك دا عارفو انا قالت لي كويس بطريقتكم تاني😂 ياا الله حلوين مع بعض يخ😩 قلت ليها خلاص ارجعي كملي نومك ، قالت لي انا خليني الليله انت ما بتنوم عاد😂 ضربتها بالمخدة يلا تصبحي على خير ، وانت من اهله يارب.
تاني يوم صحيت رايق كنت بغني أمي قالت لي ما شاء الله المزاج عالي ماشي عندك شغل الليله؟ قلت ليها اي وبمر علي الجامعه وعندي مشوار تاني امكن اتأخر الليله ، كويس الله يحفظك يا ولدي ويغطي عليك قلت ليها آمين ويخليك لينا يا حجه يلا سلام طلعت معاي زينب وصلتها في شارعي ومشيت الجامعة اول كان في موضوع البحث بتاع التخرج شغال فيو بعدها طلعت على المكتب ، " اشوفك بكرة في الموعد تصور روعه المشهد💜" كنت سايق وبسمع لمحمد الأمين وصلت وضربت ليها اي جيت برا ،طيب تمام ، لمحتها جاية علي نزلت سلمت عليها واتحركنا مشينا قعدنا في كافي قريب من جامعتها كنت بعاين ليها وساكت قالت لي وبعدين ما تعاين لي كدا انا متوترة براي 😂، قلت ليها ظاهر من حركة يدينك الكتيرة وبعدين زول قدامو حاجه سمحه يعاين وين مثلا 😉 دنقرت رأسها (قليل ادب زي اختو) قلت ليها سامعك على فكرة😂 قالت لي احمد يخ بطل توترني ، قولي إسمي تاني كدي😂 ، ياربي صبرني اها الموضوع المهم شديد العايزني فيو شنو؟ قلت ليها عايني في عيوني ،قالت لي كيف!! اهاا قول ، حصلت لحظه بتاعت صمت قلت ليها مرام حيدر السيد مش دا إسمك؟ قالت لي ايوة عرفتو من وين😂 قلت ليها ما وقتو اسي انا بحبك يا بت الناس❤️ ، لا ما قاادره وقفت على حيلها وقعدت تاني 😂 قالت لي انا ما سمعت غلط مش واااي😭 وانا كمان والله وكنت عايزة اقول ليك بس خفت تجرحني وتقول لي نحنا اصحاب بس عشان كدا اليوم داك اترددت كانت بتتكلم بسرعة وانا بضحك عليها قلت ليها براحة براحة 😂❤️انا قاعد سامعك قالت والله بريدك شديد😭 قلت ليها اسي الدموع شنو درامية زي صحبتك 😂 قالت لي رمه ما تخرب اللحظه خليك ساكت قعدنا نتزكر لما كنا مركبين مكنه اصحاب وبستات ومستحيل نحب بعض😂 قالت لي تزكر لما قلت لي إنتي زي روان اختي انا وقتها زعلت شديد عشان كنت حبيتك من وقتها😂 قلت ليها اييك الكلام ده طول ،قالت لي عارف دا احلي يوم في حياتي انا محظوظة بيك وبوجودك في كل تفاصيلي ❤️

"انا معك حين تحزن عيناك، انا سندك وضلعك ومبتغاك ومرامك، معك حين يزبل قلبك، حين يُزهق جسدك وحين تُسد جميع الطرق ولم تحصل على ما تريد انا معك دائما وابدا 💜"
#نتلاقى

#سيروتونين
بقلمي مرام عبدالقادر
11-
23/8 كان تاريخ إرتباطنا ❤ الليله لينا شهرين مع بعض هي احلي حاجه حصلت لي فحياتي كانت متقبلاني بكل السوء الفيني بمزاجي المتقلب وبتعاملني بكل الحنّية الفي الدنيا كأنو ربنا خلقها بس عشان تسكن قلبي وتستقر فيو ويكون ليها وطن ❤️️انا ما بحبها ! انا واقع للأبد في غرامها❤️
------
خالتو نورا: مرام حبيبتي اصحي معندك إمتحان الليله إنتي ؟
مرام : يا ماما عندي لكن الظهر خليني انوم شوية مصدعه
خالتو نورا: الحاله نبهتك ما تساهري طيب ساعه وتعالي نفطر وتجهزي
مرام : حاضر اطفي معاك النور....
-احمد انت طالع وقفت قلت ليها اي يُّمة دايرة حاجه؟ لا لا سلامتك بس بعد الفطور انا وزينب ماشين ناس خالتك رشا راجلها جا من السفر عاملين ليهو كرامه ، قلت ليها ايوا حمد لله ع السلامه مجتبى ما قال لي ، بكون نسى بتقدر تجي علينا بعدين ! والله ما عارف لو لقيت زمن بجي لكن ما تضمنوني كان اتأخرت ارجعوا بترحال ، قالت لي الرجعة هينة خلاص خير ، كنت في الجامعة اتصلت علي روان اجي ارجعهم بتاع الترحيل عندو ظروف قلت ليها ظابط مسافه السكة قلت ل محمد يلا هوي انا ماشي قال لي انا زاتي متخارج الحاج داقي جرس من قبيل عندو مواضيع كدا قلت ليها تمام اسمعني الجمعه عند عبد الوهاب العقد قال لي قدام بجي عليك نمش سوا ، ظاابط يلا طلعت مشيت ليهم وقفت جنب البوابة برا قالت لي جايين عليك نزلت اشتريت لي موية صحه ووقفت جو شُلة بتاعت بنات مارين جنبي واحدة قالت ليهم القميص الاسود يحردو لناسو قعدت اضحك على تعليقها التانية قالت ليها دي ضحكة ولا جبر خاطر🤤 في نفس الدقيقة دي اتلفت لقيت مرام وروان واقفين روان قالت ليها شكلو الأخ مستكين كان نتأخر ليو شوية🌚 مرام قالت ليها اي واضح حمرت لي ومشت فتحت باب العربية ركبت ورزعت الباب روان قالت لي الليله شكلو يومك اسود 😂 ارح ارح ركبنا واتحركنا قلت ليهم الإمتحان جا كيف روان قالت لي ما كعب عاينت ل مرام بالمراية قلت ليها اشتغلتي كيف؟ امس نمتي متأخرة قالت لي كويس برضو قلت ليها برضو دي شنو !! احمد ركز حبيبي ركز و رجعت تعاين بالشباك كنت عارفها متضايقة😂قلت ليها ما علقتي على لون القميص المرة دي قالت لي ما سمح ما تلبسوا تاني بالله🙂 قعدت اضحك روان غنّت ليها "غيرتو علي بريدها ، قالت ليها ما بغير ولا شئ ، روان قالت ليها ظاهر ظاهر يعمري😂 بعد جات تنزل قلت ليها براحه علي الباب بعدين😂 قالت لي عارف إنك إنسان مستفز! يلا يا روان ،يلا حبيبتي روان عاينت لي حتمووت البت 😂 بعد وصلنا البيت اتصلت عليها جرس طويل ما ردت تاني رجعت اتصلت ردت لي اهلا نسيت حاجه!! قلت ليها نسيت روحي عندك ،قعدت تضحك قالت لي احمد انت بتفصلني سريع كدا ليه 😂 قلت ليها ما شفتي شكلك وانتي زعلانه قبيل 😂 قالت لي وانت كان عاجبك كلامهم يعني الضحكة لآخر ضرس😒 ، قلت ليها اعمل ليهم شنو مشكله لما يكون الواحد سمح لازم يشاغلو 😂 قالت لي اننننن ظريف خالص سكت مسافه تاني غنيت ليها
ابداكي من وين..
وفيني منك لسه حاجات ..من مخاوف ومن شجن🎵
ابداكي مني ..ولا منِّك
ابتديكي محل محل
من ياتو منفذ ادخلك وكل المنافذ فيكي سدّاها النحل
من ياتو شارع اوصلك.. وكل الدروب معطوفة لي آخر الوحل 🎵

كنت كل ما تكون زهجانة ولا مضغوطة من القراية برسل ليها رسالة طويلة تفرحها إني اشوفها مرتاحه ومبسوطة اهم شي عندي ، لما تزعل مني بقعد اغني ليها واتعاور لحدي ما تضحك😂 مرة اتصلت تبكي قلت ليها في شنو!! إنتي وين!!قالت لي في البيت ، أمك كويسة ولا حاصل شنو؟- كويسة ياخ ،طيب مالك بتبكي؟ اتخيل يا إنسان بتبكي عشان ضفرها اتكسر والقهوة بردت وما لاقية قلمها إحترت فيها وانت هنا كولد وعندك اخوات مريت بحاجة زي دي لازم تحزن معاها علي ضفرها وتحاول تقول ليها كلام يطلعها من الجو دا لأنك لو مشيت قلت ليها وانا اعمل ليك شنو حتشوف شعاع والله😂😂البنات ديل من اقل شئ بعملوا موضوع اقسم عندهم هرمونات ودراميات بس لطيفات وبتحبو 😂❤️

"وكنتِ لي زي غيمة في عِز الهجير صبت مطيرات الهوى ونزلن علي 💛"
#نتلاقى

#سيروتونين
بقلمي مرام عبدالقادر
12-
كان باقي اسبوعين واتخرج وح ابدأ حياة ما بعد الجامعة يوم بتكلم مع مرام قلت ليها على فكرة انا وريت الحجه تجي تخطبك لي من أمك 😂 قالت لي احمد وبعللي منك ما قادرة عليك مستعجل مالك 😂 قلت ليها يا ستي انا داير بعد موضوع التخريج دا يخلص نعمل خطوبة طوالي حتكوني نزلتي تالته رأيك؟ قالت لي طيب ممكن تأجل موضوع الخطوبة دي اسي لحدي ما يجي وائل انت عارف هو في مكانة ابوي وعاوزة يكون حاضر ، قلت ليها كويس زي ما عايزة بحصل ❤️❤️
----
روان : وااي يا مرام بنات خالتي ديل بشلوني يخ ما شفتي لما يجي بتمايعوا كيف في الكلام وظرافة شديدة طبعا من يشوفوا احمد🙂
مرام: يشوفوا مين ياا روحي!!🙂 روان بنات خالتك ديل احسن يختو راجلي
روان: متت😂😂😂 بقينا نقول راجلي خلاص 😂 انتي فاضية الليله ولا عندك حاجه ؟
مرام: فاضية ليه يعني!!
روان: خلاص تعالي ياخ على الأقل اتونس معاك انتي بدل ما سارة ولمياء ديل يكونوا في وشي
مرام: طيب اوك اكلم ماما
روان: حلوو منتظراك تعالي قاشرة 😉
مرام: تافهة 😂😂 فهمتك اوكي باي باي
-كان عندي شغل مهم من الصباح مشيت المكتب باسل قال لي ياا معلم خبرك ، قلت ليها مية المية جهزت لي الفايلات القلت ليك عليها ، اي في الدرج علي يدك اليمين ، طلعتها قدامي وقلت ليو بس كباية قهوة عشان ننجز سريع ، ظابط دقيقتين تجهز ، تقريبا للظهر ما رفعت راسي في نص زحمتي دي اتصلت عليها عارف صوتها بنسيني كل التعب اتكلمت معاها خمس دقايق وقفلت طلعنا صلينا الظهر ورجعت اكمل ضربت لي أمي حترجع متأخر الليله؟ قلت ليها لا قربت نص ساعة بالكتير واخلص ، طيب كويس ما تنسى تجيب معاك العيش ،قلت ليها اي متزكر وفي حاجات شايف زينب مرسلاهم لي برضو ، كويس في أمان الله ، تسلمي قفلت منها تلت ساعه خلصنا وطلعنا لما قربت من البيت نزلت السوبر ماركت الجنبا اشتريت ليهم حاجاتهم ودخلت أمي وزينب كانوا قاعدين في الهول دخلت الأكياس المطبخ لقيت مرام في وشي😂 قلت ليها يبت إنتي قبل ساعتين ما كنت بتكلم معاك ما قلتي لي إنك في بيتنا😂 قالت لي جيت قبل شوية اصلا قلت اعملها ليك مفاجأة😂❤️ روان قالت لي خلاص يخوانا شبعتو من شوفة بعض انا هنا قاعدة يعني ، قلت ليها تصدقي ما شفتك إلا اسي😂 ، لا لا ظابط يا باشا اطلع امش ارتاح خلينا ننجز ، قلت لي مرام براحة ما تجرحي يدك وعاينت لي روان 😂 روان قالت لي اصلا انا عشان ما عندي حبيب ولا قريب يقول لي كدا قلت ليها بطلي دراما اول كدي 😂 وطلعت خليتهم بعد العصر خالتي وبناتها جو انا كنت بحضر في كورة سلمت عليهم وجيت عايز امش خالتي قالت لي احمد خربنا ليك برنامجك شكلو قلت ليها لا لا عادي اخدو راحتكم و طلعت الشارع لحدي ما جا زمن الغدا دخلت سارة قالت لي احممد( بمياعة كدا) عامله ليك بسبوسة رهييبة ح تحبها متأكدة زينب قالت ليها عاملاها لأحمد بس ولا شنو! اي طبعا اجتهدت فيها شديد مع إني ما قاعدة ادخل المطبخ ، بتتكلم وفخورة بأنها دخلت المطبخ وعملت حاجه درعه وبتاع مرام كانت ساكتة وبتعاين فيني عرفتها حتكون متضايقة ،سارة وقفت وجات مدت لي الصحن شيل قطعة واديني رأيك فيها قلت ليها منو قال ليك بحب البسبوسة!! كلهم بقوا يعاينوا لي روان طوالي ادخلت صحيي احمد اخوي ع فكرة ما بياكل بسبوسة ولا باسطة من زمان خالتي قالت لي بالجد؟ في زول ما بحب الحلويات دي ، قلت ليها ما بتنفع معاي ، سارة قالت لي ما مشكله كان ظاهر إنها زعلت مشت قعدت جنب أمها زينب قالت ليهم اتفضلوا يخوانا وزعت ليهم الشاي وقعدت
روان: عجبني ليها عشان تاني تتراشق😂
زينب: احمد اداها ليها في حنانا😂 قمة الإحراج يخواني😂
مرام: ما عارفة لكن تستاهل ما بتنهضم البت دي قدرت ما حاولت😭😂😂
روان: يارب اغفر لينا 😂
مرام: بنات الساعة بقت 8 م هملة السواد ماما براها
جيت داخل زينب قالت لي ابن حلال كنت عايزة اضرب ليك ، مرام قالت لي احمد انا راجعة بعدا قلت ليها ارح نجدعك سريع لإنو في كورة مهمة الليله ، قالت لي تجدعني!! ليه ان شاء الله شايفني شوال🙂 قلت ليها سمح معلش😂 اهااا شايفة كدا مرت دقيقتين وانتي بتتكلمي ، طيب يلا سلموا على خالتو سوسن

" إنها الأجمل على الإطلاق ،الأنقى قلباً هي في كل الوقت جاهزة لتطمئنك لا إرادياً أن الصعب يهون 💜🌸"
#نتلاقى

#سيروتونين
بقلمي مرام عبدالقادر
13-
ألف مبروك يا عريس شنو المفاجآت دي يا مان😂 كمال رد ليو الله يبارك فيك😂 عقبالكم يشباب زاهر قال ليو ياخ انت مصاحب ليك شلة حجار 😂 قلت لي كمال طلعت غانج يا كلب 😂 وانا اقول كل ما تشوف شهد تقعد تتكبكب قلت مكرش تطلع مربط عديل😂 قال لي يا عمك عشان امورك تمش تمام في البلد دي والناس ما تركز في حياتك اغنج بس الغنج سمح والله اعتبرها نصيحة مني"
اتزكرت كلامنا الأخير دا كان قبل تخريجنا بيومين لما جا ورانا إنو داير يعرس حاليا شهد وكمال اتزوجوا، بالنسبة ل زاهر سافر اشتغل مع عمو في الكويت وامورو ظبطت محمد كمان ح يسافر قريب جاني يوم في المكتب إنو داير يجيب اهلو ويعمل تعارف قلت ليهم تمام شوف اليوم المناسب معاك
روان :يا زينب اسرعي يخ ماف زمن لسه ما لفينا على باقي الحاجات
زينب: عايني احلي الكبدي ولا البيج !؟
روان: امم البيج طبعا جاي مع لونك وبعدين بسيط حلو شديد💛
زينب: اوك برضو قلت كدا الساعه كم!!
روان: 11 ح نلحق الكوفير انجزي بس الباقي هين
فلاش بااك :
محمد قابل زينب ووراها إنو بحبها من زمان وطلعت زينب برضو معجبة بيو اتفق معاها يجي يعمل خطوبة طوالي وح يسافر سنة تكون خلصت فيها الجامعة ويعملوا العرس
كان باقي لخطوبة زينب إسبوع خلالو كنت مدروش عشان اوفر ليها اي حاجة في اليوم دا ، يوم جاتني قالت لي احمد انا عايزاها حاجة بسيطة ماف داعي نعمل خطوبة وااو شديد كنت فاهم هي بتلمح لشنو قلت ليها انا عندي كم اخت عشان ما اخليكم مبسوطات وبعدين ياستي ماف تكلف ولاشئ إنتي بس عليك تطلعي لينا قمر وما تشيلي هم الباقي ، طيب اصلا عارفاك مابتقتنع لي😂 قلت ليها بالظبط شوفي بتحتاجوا كم بالنسبة للفستان والحنه والكوفير ، قالت لي طيب حاضر الله يخليك لي 😔❤️
قبل المغرب بنص ساعة اتصلت علي روان اجيبهم من الكوفير الضيوف حيصلوا علي 8 كدا مشيت ليهم انتظرتهم في الأثناء دي ضرب لي محمد يسأل من الوضع قلت ليو الحممد لله إننا أولاد اسي كان نكون في الكوفير ويملو ليك وشك بوهية وبلاوي😂 قال لي الحمد لله يااخ😂 نحنا شوية ونطلع ، ظابط، قفلت منو رجعت ل مرام ما خلاص؟ اصلو شنو هو ، اي اي طالعين عليك شوية كدا شفتهم زينب جات وقفت قدامي قلت ليها اللهم بارك ياخ❤️ الحجاب حياكل منك، الله يسعدك دايما يارب عاينت لي وعايزة تبكي قلت ليها من غير دموع حتخربي أم المكياج دا بقروش 😂 قعدت تضحك قالت لي احمد انا بحبك شديد ما انحرم منك😭 سلمت عليها في رأسها روان قالت لينا دقيقة تاني وح تشوفوا شلال دموع ، اتلفت عليها هي ومرام قلت ليهم دا ايه الحلاوة دي!❤️ انا كدا ممكن اخطفكم التلاته😂 مرام قالت لينا دقيقة نتصور كلنا وقفنا واخدت السلفي قلت ليهم انتو نسيتو الناس دي ولا شنو اركبوا
-قاعدين قدامي اعز صاحب لي واختي نور عيني ❤️ صوت الزغاريد المالي المكان اصوات ضحكاتهم ، الدبل في يدينهم أمي وروان الفرحة الفي عيونهم ومُرامي ❤️ سرحت فيها اتخيلت ديل نحنا ابتسمت تلقائيا هي عاينت لي كأنها بتقول لي بفكر في نفس تفكيرك مشيت وقفت جنبها وهمست ليها "عقبالنا❤️" ردت لي " آميين ،عارف انا لحظتها ح اكون اسعد إنسانة عشان محظوظة بيك❤️" روان جاتنا قالت لي اها يا العشاق انجزو بالله😂
"و زي ما الرحول عِز العرب انا عِزي ضحكة وغُنيتين وطريق نهايتو عيونو تبّ 💜".
#نتلاقى

#سيروتونين
بقلمي مرام عبدالقادر
14-
بعد مرور شهر....
قدام صاله المغادرة كنا انا وكمال واقفين مع محمد -توصل بالسلامة يا غالي، الله يسلمك ياخ خليت موضوع بريطانيا ولا شنو انت، كمال قال ليو وين مع المدام 😂 ما خليتو والله لكن لقدام اسي عملت لي بزنس مع خليجيين الأمور ماشة غايتو ، قال ليو لا تمام قعدنا معاو لحدي ما جا زمن طيارتو سلم علينا ودخل ..
يوم قاعد في المكتب ومعاي ضيوف اتصلت علي مرام استأذنت منهم وطلعت ارد عليها جاني صوت روان احمد مرام دي تعبت في الجامعة نحنا في مستشفى(..) قلت ليها تمام جاي عليكم اسي رجعت ليهم جوه وكان ظاهر علي متوتر باسل قال لي خير ان شاء الله! قلت ليو مضطر امش والله الموضوع مستعجل ، قلت للجماعه معليش يخوانا على الحصل باسل ح يكمل معاكم ونتلاقى تاني إن شاء الله في اقرب فرصة، اتفضل حصل خير يا باشمهندس ، طلعت مشيت على المستشفي طوالي اتصلت على روان انتو في ياتو طابق؟ -التاني ، تمام تمام طلعت ليهم فوق لقيت معاهم الدكتورة ومرام مركبين ليها درب قلت ليها حصل شنوو؟ قالت لي احمد انا كويسة ما كان تخلي شغلك موضوع بسيط ، قلت ليها بسيط!!! وإنتي في المستشفى ؟ قالت لي ما عارفه بس حسيت بلفة رأس تاني لقيت نفسي هنا الدكتورة قالت لي ما تخاف عليها كويسة حاليا قلت ليها الحمد لله💛 قلت لروان جيتو كيف ؟ قالت لي واحد معانا في الدفعة وصلنا بعربتو ، الدكتورة قالت ليها شكلك ارهقتي نفسك الفترة دي اهتمي باكلك وأُخدي راحة كفاية وأي توتر ابعدي منو مرام قالت ليها طيب إن شاء الله تسلمي ، العفو بعد يخلص الدري تقدروا تمشوا شكرت الدكتورة بعد تلت ساعة طلعنا في الشارع ماف واحد اتكلم مع التاني قالت لي مالك انت؟؟ قلت ليها ولا شئ ممكن تهتمي بروحك شوية بس ،قالت لي عشان الحصل دا يعني!! قلت ليها عشان ما يتكرر تاني عارف داخلة على إمتحانات فاينل والطب قرايتو ما هينة الله يرضى عليك ما تهملي نفسك دي فاهمه؟سكتت مسافه وقالت لي طيب كويس واتلفتت على الشباك قلت ليها ما تزعلي مني ، ما زعلانة ابدا عارفة عايز مصلحتي وانا بحبك ❤️ قلت ليها انا اكتر ،- الليله وووب حنمووت يخواني بطلوا حب نحنا في الشارع انا لسه ما ارتبطت ولا شفت عيالي😂😂 مرام قالت ليها روان الله يجازيك موتيني ضحك😂😭😂 قلت لروان حباك برص انا ناسيك عديل والله😂 اي لازم تنسوني ما انا حيطة قاعدة هنا المركبني معاكم شنو كرفستو لي مشاعري ساي😭😂 مرام قالت لي احمد بالمناسبة وائل حيجي نهاية الشهر دا ،قلت ليها كويس والله إجازتو طويلة ان شاء الله ، اي شهرين اظن مبسوطة شديد، روان قالت ليها اخيرا حنشوف الباشمهندش معطاني بيو معط😂 قلت ليها دا نسيبي هوي 😂.
-مرا الاسبوع سريع ووائل اخوها نزل السودان عملوا ليهو كرامه مشيت مع ناس البيت اتعرفت عليو من قريب وائل إنسان محترم وطموح جدا كان في نقاط كتيرة مشتركه بينا ،
روان: ماف زمن للخوف يابتي كلو إسبوع والفاينل يبدأ بتتجازف زي كل مرة
مرام: إن شاء الله يعدي الفترة دي على خير ونخلص
روان: امييين😫 ما مصدقة ماشين رابع نحنا 😂 السنوات عدوا سريع والله
مرام: بالجد😂 يلا يلا ياقلبي اي واحدة على قرايتها
روان: خارجيني اي عارفة احمد متصل عليك😏
مرام: ياهو😂 بااي يعمري حقفل
---
يا حبووب كيف مع البلد دي ، والله اسي الكهرباء قاطعه ليها 4 ساعات ما فاهم اي شي 😂 قلت ليو قول واحد لسه حتشوف قال لي الله يطمنك يخ😂 ،اسمعني عايزك في موضوع كدا فاضي بعد العصر؟ قال لي كويس موضوعك جا في وقتو كدا كدا قافلة معاي نتلاقى اسي كيف!!قلت ليو قدام بجيك في(..) بعد ساعة اتلاقينا ياا وائل الخبر ، تمام والله كيف انت والشغل معاك؟ الحمد لله ادخل ليك في الموضوع طوالي قال لي بتاع مرام؟ قلت ليو ياهو فعلا عرفتو كيف !!😂 قال لي عارف انا 😂 وعاجبني فيك إنك زول دغري( وائل اصلا كان عارف بعلاقتنا ومرام ما كانت بتدس منو اي شئ بحصل معاها)

"بثمانية وعشرين حرفاً فقيرة اقول إني أحبك جداً ودائماً ❤️"
#نتلاقى

#سيروتونين
بقلمي مرام عبدالقادر
15-والأخيرة
طيب انا عايزها تكون مفاجأة ظابطة والتخطيط لازم يكون مية مية ، روان قالت لي حلو مرام خليها عليها بظبطها بالنسبة للباقي معاك زينب ووائل بتنجزو لسه قدامنا إسبوع قلت ليها اهم حاجة مرام ما تعرف لسانك دا ما يغلط قدامها 😒 قالت لي كويس يعم😂 يلا بايات الترحيل وصل دعواتكم يجماعة إمتحان الليله يجي حلو ، أمي قالت ليها الله معاك ركزي تمام ، بعد روان طلعت زينب قالت لي عارف مرام دي من شفتها دخلت قلبي واتمنيتها ليك والله الحمد لله❤ لاحظت أمي شاردة قلت ليها يُمة ما فرحانة؟ قالت لي مبسوطة ليك شديد يا ولدي الله يعدلها عليك عارف ابوكم لو كان بينا كان ح يحضر عرسكم الاتنين ويفرح بيكم ،قلت ليها ربنا يرحمه ويغفر ليه ، بقينا ساكتين زينب قالت لينا اقوم اظبط ليكم احلى شاي 😘
-----
مرام: يعني انا ما فاهمة الكوفير لزومو شنو والناس طالعة من إمتحان
روان: بالظبط كدا دا آخر إمتحان💃 لازم نغير نفسياتنا شوية
مرام: روان نحنا ماشين عرس ولا خطوبة وانا ما عارفة رسم اليدين لشنو
روان: تغيير حبيبتي😂 وكمان لسه حنكوي شعرنا وميك اب فل
مرام: قولي نلبس فستاتين بعدا ونكون عروسات بالجد🙂
روان: 😂😂 عارفة انا بحبك عشان قله ادبك دي😂
مرام: عايني نضرب ل زينب تجي برضو نعمل حفلة بالمرة عندنا التظبيطة دي ما تروح ساي😂
روان: اصلا في حف..ااا قصدي وريتها جاية قالت🌚
-الساعه 4 كنا انا وأمي وزينب في بيت ناس مرام ومجهزين اي شي حسب ما خططنا كنت قاعد وعيوني على الباب،
-اول ما فتحت الباب لقيت أمي ووائل معاهم خالتو سوسن وزينب اتفاجأت بعد شوية انتبهت للبيت مزين قلت ليهم في شنو يجماعة كلكم متلمين كدا انا ما فاهمة شئ!! -ما محتاجه فهم ،اتلفت وراي لقيتو احمد! كان لابس قميص كبدي غامق ومتشيك يدووب كدا فهمت اي شي قعدت اصرخ واضحك في نفس الوقت😭😂ما قاادرة اصدق فهمت ليه روان عملت موضوع الكوفير واصرت البس فستان كبدي!❤️قلت ليو أحلى سبررايز اتعملت لي في حياتي 😭
-كانت مبسوطة لدرجة بكت 😂 قالت لي احمد انا ما قادرة اعبر والله حاسة نفسي طايرة من الفرح❤️ وائل قال ليها احمد عمل كدا عشان يشوف الفرحة الإنتي فيها دي ،عاينت لي في عيوني عارف إنك مجنون؟ وانا بموت فيك😔 قلت ليها رأيك شنو نعقد طوالي😂 ، روان "احمد بطل قله ادب وتعالوا لبسوا المحابس لبعض" وقتها كنت اسعد زول في الدنيا مرام هي أعظم إنتصاراتي الفزت بيها للأبد❤️ .
بعد مرور 6 شهور....
حبيبي انا كفاية سهر بكرا ورانا يوم بحالو ، احمد انا متوترة ، حضنتها علي وقلت ليها ياقلبي ماف داعي للتوتر وبعدين مرتي الحلوة مف شئ بصعب عليها بكرا تدخل الإمتحان وحيجي ساهل دي آخر سنة حنعديها سوا زي كل مرة❤️ عارف كلامك بطمني قدر شنو😔 امم قدر شنو!😂 احممد يااخ ،يخرب جمالك وانتي زعلانه ،ح اضحك كدا ،وانا عايز شنو غير ضحكتك المالية علي دنيتي❤️ دنقرت رأسها وبدت تلعب في أصابع يدي كانت دي عادتها كل ما اقول ليها كلام حلو وما تعرف ترد قلت ليها ارح البسي ليك عباية ، قالت لي ليه!! ارح بس نمشي نأكل ايسكريم ونتصايع ونرجع نطت فيني قالت لي بحببك شديد ❤️❤️اوكي دقيقة واجهز 💃 .....عرسوا حبيباتكم يخوانا ح تعيشوا في سعادة أبدية حتكون ليك الحبيبة والاخت والأم ، اتزوج حبيبتك لانو غيرها ما اشرف منها ولا اجمل منها ولا بتعرفك اكتر منها ، اتزوجها عشان هي اللي ح تراعي ليك عشان هي بتحبك وما حِمل خزلان ولا قسوة ح تشاركك كل تفاصيلك بحُب ولو حبكم صادق ربنا حيسهل ليهو كل السبل عشان تكونوا لبعض ❤️
الارتباط والحب ما بالقرار ولا بالتفكير ولا حتى بالاختيار بحصلوا فجأة زي القدر غصباً عننا بنلاقى روحنا جوه الدايرة اختار رفيق قلبك بعناية ❤️
#كسرة روان ووائل اتخطبوا لبعض❤️ زينب اختي كملت الجامعة والعرس حيتم بعد ينزل محمد اول إجازة انا ومرام رحلنا جنب ناس أمي حياتي اتغيرت في وجودها 180درجه للأحسن وبعد كم شهرر ح يشرف مصطفى الصغير على الدنيا ويملأ حياتنا بهجة ❤️".
#سيروتونين إسم الرواية بمعني هرمون السعادة و ممكن نقول هرمون مسؤول عن العواطف يعني زواجك من الشخص البتحبو ح يحسن مشاعرك وسعادتك " زي ما كانت بتقول لي دائما انت السيروتونين السحري لسعادتي ❤️"

"حِنوا على بعض ما تخلوا فُرقة للحزن يتوهط حنّايا الروح ابقوا للخاطر جبُر ❤️"
#النهاية 💜✨