.. و حتى الاحتراف في اي منطقة بيكون ليه ثمن و صاحب الاحترافية دا بيكون عنده مميزات وبدلات لتفانيهو دا

المستشفى مصلحة حكومية مثلها مثل اي مصلحة حكومية تذهب اليها لعمل اجراءات ستجدها متكدسة بالصفوف يعني حتنتظر حتنتظر
ومن يملكون زمام الامر يتضجرون يذهبون للصلاة. و الفطور و باخر الامر يغلقون مكاتبهم عن الرابعة عصرا ..
ف كيف بمن يعملون لمدة 24 ساعة ف انت ما المريض الوحيد يعني ولا ممكن تدف الصفوف و تقول زولي دا عيان شوفوهو لي ..كل اللي جايين اعتقد لنفس الغرض

#لما_تجيني في الحوادث 2 ظهر في عز الحر ما تتوقع انك اول مريض قابلته في يومي لانه انا مستلم من 8 صباح وحلتقاني زهجان و جيعان وما صليت عادي جدا
ولما تجيني 2 صباحا وتلقى حركتي بطيئة واستيعابي قليل ما تقارني بيك اللي جيت من دوامك 4 عصر اتغديت واستحميت وصليت و شربتا شاي المغرب وحضرتا مسلسل 9 و نومتا و صحوك واحدة صباح قالو ليك قوم ودينا المستشفى فلان عيان لاني واقف ع حيلي من الصباح و طاقتي خارت ..
دا حتى شركة الانترنت عملت سياسة الاستخدام العادل وعملت ليمت للبيانات ، خليهو انسان

#لسنا_اغنياء .. الاخصائي بياخد 1500 و#نائب الاخصائي بيدفع هو 1000 في الشهر مقابل التدريب و العمومي بياخد 600 و .. فماف داعي لكلمة اكتر ناس مرتاحين و عندهم قروش ، لانو ماف انسان بيرضى بدوام 7 ايام في الاسبوع وكمية الضغط الهائل دا
و نبطشية او اتنين ف الاسبوع لمدة 24ساعة بمبلغ زي دا .. وكل المصلحات الحكومية بتغلق ابوابها عن الرابعة عصرا .. الا المستشفيات
دا غير النواقص اللي بنغطيها من جيوبنا من ادوية لي صور و اشعة لي فحوصات للعاجزين عن ذلك

#الطب ليس مهنة انسانية وماف حاجة اسمها مهنة انسانية في الدنيا دي لانو اي مهنة وراها مقابل حتى المنظمات الطوعية كالامم المتحدة الهلال الاحمر بتدفع لمنسوبيها بما يغطي حاجاتهم الانسانية واكثر من ماكل و مشرب و مواصلات لانها بيعملو في حوجات الانسان الاساسية من الصحة و التعليم كشكر وتقدير و عرفان لخدمتهم للانسان في المجالات الحرجة دي

ف كيف بمن يرضى بمبلغ زهيد و بيغطي النقص من عنده ساعات

ومع كدا ف كل #الاخصائيين في المستشفيات الحكومية مخصصين يووم مجاني في العيادات المحولة بيستقبلو فيه المريض مرة كل اسبوع
ودا تكرم منهم ما قصة الزامية وبيكون معاهم نواب وعموميين و امتياز ..

افهم المنظومة دي قبل تخش اي مستشفى حكومي تعليمي

عشان ما تبخس الناس حقهاا و تحمل الاطباء اخطاء وزارة الصحة او ادارة المستشفى ..

#معدل_الاطباء مقابل #المرضى هو 2000 مريض لكل طبيب مع انه المعدل المعقول هو 600 مريض لكل طبيب

#السودان بلد فقير ثرواته مهدورة منصرفاته للصحة ما بتتجاوز ال 5% من الميزانية رغم انه موقع اتفاقية تنص بانه يصرف 15% من ميزانيته على الصحة
#وزارة_الصحة في شارع النيل
لو ما عاجبك او ما مقتنع بالنظام المشروح دا
طوالي تتوجه مكتب الوزير عشان تبدي احتجاجك وقول الفي دواخلك
#المستشفى ليست ركن نقاش او مكتب لاستقبال الشكاوى والاقتراحات


#ماقدرش_على_الحمار_اتشطر_على_البردعة
#عينه_للفيل_يطعن_في_ضله