#خلقني_أسود

بقلم:fulla_Ali
-٨-
وما كان لوني قبل ذلك أسودآ..ولكن لهيب الشوق أحرق جسماني

🖤🖤🖤

المساء ابوي جا...كان مبسسسوط بس وقت شاف في كهربه في البيت صر وشو..سأل امي مالكم؟؟ ما ردت وبس دخلت غرفتهم
صابرينا جرت ليهو وبي براءتها فتت الشمار كلو..ابوي ما كضب و طوالي مشى جاطها مع حبوبة
في اللحظة دي امي كانت مقطعه نفسها بالبكاء..لانو عارفه الموضوع ما حيمش ساي..وفعلآ ابوي جا وفتح الباب ..رفعت راسها عاينت ليهو ونزلتو
جا قعد قدامها وقال : انتي بتحبيني يا أم صبا ؟
قالت ليهو بعد عاينت في عيونو : وبحبك لغاية روحي تفارق جسمي
غمض عيونو ودموعو نزلو ومسك يدها قووي..قال ليها ان شاء الله بعد خرف
قالت ليهو انا بعتذر ع الشي العملتو امي...هنا رفع راسو وكأنو كان نسى هو جا ليشنو بس امي زكرتو..كان غضب الدنيا كلها في عيونو ..قال ليها امك وانا ما ينفع نعيش في بيت واحد ..بعد دا خلاص يا ام صبا..

ولأول مره أمي تكون عندها شوية شخصيه..قالت ليهو التشوفو انا موافقه بيهو

وفعلآ...مسك يدها وطلعو عشان يكلم حبوبة بي قرارو
واتفاجأو بالشافوهو

حبوبة كانت ماسكه شنطتها وسعيد ومنزلة كم دمعايات ..لزوم ابوي اهانها وكده ..
امي مشت عليها وهي بتبكي : مالك يا امي ماشه وين بالليل دا!!
علويه : انا بيت ما بقدمو لي فيهو الاحترام ما بقعد فيهو نهائي !!!

خالد : يا خالتي عليك الله ما تقولي كده..انا نضمت معاك لانو انتي غلطتي في امي واخواتي ..ودا التصرف الطبيعي المفروض انا اعملو ..

علوية : المهم..ما تكتر حروف ..انا ما حأبيت هنا يعني ما حأبيت هنا !
وياهو....قعدت تعمل فصول خريفها دي لغاية قدرو يقنعوها انو تبيت وتسافر الصباح
دخلت غرفتها هي و ولدها وتاني ما طلعت نهائي
غايتو حبوبتي ربنا يديها العافيه
🖤🖤🖤🖤

بعد حبوبة رجعت بيتها ...ممكن تقولو حياتنا رجعت سمحه من تاني...

وانا ماشه سنه خامس ابوي قال لي امش معاهو الأجازه لي ناس عمتوو..يعني لمدة يومين كده

سافرنا الأبيض عروس الرمال...بالجد البلد دي حلوة ياخ¡¡

اشتقت لحبوبة ولعمتو زهرة وعمتو سوسن ..رحبو بينا ترحيب ما بعده ترحييب
وبعد اليومين ابوي رجع وخلاني معاهم

طبعآ بعد موافقة امي وموافقتي...

ف الفترة دي اتعرفت على عماد...ممكن تقولو حبيتو كمان ههههه بس كنت طفله هوي

عماد دا ساكن في نفس الحي الساكنين فيهو ناس حبوبة..يعني عمرو كده زي 18 ..

كان بقرا في الثانوي..
حبوبة وقت رسلتني الدكان لاقيتو..

كان بتونس مع سيد الدكان..ومن وقت جيت كان بعاين لي

صراحه كده انا حسيت بشعور غريب
حسيت بنظراتو وهي بتلتهمني ..بعد ما شلت حاجاتي من سيد الدكان وانا طالعه طرحتي وقعت .
ويديني كانن ملانات حاجات..وم عرفت اتصرف كيف

قام شال الطرحه ولبسني ليهاا
كنت بعاين ليهو ف وشو...وهو كان بتحاشي النظر لي وشي م عارفه ليي!!!

عاملني كأني طفله....الشعور دا كان حلو بالجد

طلعت وانا قلبي كان بدق...واتمنيت اشوفو تاني

💙💙💙💙

بقيت بتسبل عشان اطلع الشارع
وأي مرسال انا فللي بجري اجيبو..
دا كلو عشان اشوف الشاب الأخدراني داك (شفع وما هينيين هههه)...
في عرس جيرانهم صاحبت واحده اسمها عناب..وبقت لي زي الأخت
طوالي كانت بتجيني في بيت ناس حبوبة..وبنلعب سوا
في يوم قالت لي انتي ليي ما زرتيني في بيتنا لي أسي ؟؟
قلت ليها حبوبة شويه صعبه ..قالت لي لو أنتي قلتي ليها ماشه لعناب حتخليكي .

قلت ليها حاضر
المساء كلمت حبوبة..قالت لي أمشي بس ما اتأخر

طلعت وانا مبسسسسوطه..مشيت ليها اتونسسسست معاها كداااا
وكنا بنضحك لمن اخوها جا وقال ليها : كويتي لي القميص وله نسيتي كالعاده !!!!؟

وقت اتلفت اتفاجأت بالششششفتو...

تتوقعو شنو ؟؟

#صلو_علي_محمد

#To_be_Continued

#خلقني_أسود

بقلم :fulla_Ali
-٩-
وما كان لوني قبل ذالك أسودا ولكن لهيب الشوق احرق جسماني
*عنترة

عناب قالت وقت شافت نظراتنا طالت : دي صبا ..بت عمو خالد ود ناس جدو بله ..جات الأجازه لناس حبوبتها من الخرطوم
..وقالت لي دا اخوي عماد..

عماد : دي البت الغلباويه هههه اهلين نورتي الأبيض

طبعآ ياهو زاتو..الشاب الأخدراني داك !!!!

قلت ليهو بنورك..تسلم

قام طلع واختو لحقتو...وخلوني طايرة من الفرح..

***

بقيت بقعد في بيت ناس عناب اكتر من بيت ناس حبوبة.
ده كلو عشان اشوف عماد..حتي لو لمحه ساي
كانت ايام ظريفه شديد انتهت لمن ابوي جا عشان يسوقني...

وزي بكره مسافرين كده مشيت بيت ناس عناب وقيلت معاها بس عماد ما جا..

انا ما فاضل لي الا ابكي لغاية عناب حنت على حالي ...قريب المغرب كده ودعتها وطلعت ما قدمتني لأنو كانت عيانه وكده .

وانا ماشه في الشارع سمعت زول ناداني : يا بت لحظة

م التفت وزدت سرعتي خصوصآ وأنو الشارع فاضي ..

حسيت بحركه وراي وفجأة حد مسكني وقفل لي خشمي !!

قدر ما حاولت اتفكه منو ما قدرت...قعدت ابكي واقاوم وهو شبه شايلني كده ومره رجولي بتكرو في الواطه .

بعد شويه طرت وما حسيت بي روحي تاني ..

****

فتحت عيوني #ببطء...لقيت حبوبه خاته لي يدها في جبهتي بتتحسس درجة حرارة جبهتي ...
وابوي واقف بالجمبه

قلت بصوت مرهههق : ا ا انا و وين !! و و الحاصل شنو !؟؟؟

ابوي قال لي ارتاحي انتي اسي ماف حاجه ... وبعدها باسني وطلع ..

جاتني عناب وبعد سلمت لي كانت خجلانه ...سألتها في شنو والحصل لي شنو !!

قالت لي امس عماد جا شاكلني عشان خليتك مشيتي براك..
قلت ليها في شنو يا عناب ؟؟ انا حسيت بزول مسكني وتاني ما وعيت بي حاجه !!

عناب : في ولدين كان ماشين وراك وكانو ناوين على شر ...وياهو مسكوك بس الله ستر عماد كان جاي بنفس الطريق ..واتناوش معاهم وانتي مع وقعتك فقدتي الوعي ي حساس
اتخلعت طبعآ..يعني لو ما عماد كان انا اسي حصل لي شنو !!!!

قلت ليها تقول ليهو شكرآ

قالت لي قوليها ليهو براك لمن تلاقيو ...

المهم...المساء كده مشيت الدكان ..بعد اخدت حاجاتي لاقاني وانا طالعه..قال لي دقيقه بس انتظريني ..

مشى اشتري حاجاتو وجا طالع ...قال لي ليي حبوبتك خلتك مرقتي براك !!

قلت ليهو ما تخاف ..الشارع ملان ناس ما بتجيني حاجه...
سكت ما رد لي..ونحن ماشين قلت ليهو :شكرآ ليك..ما عارفه لو انت ما جيت كان حصل لي شنو

قال لي انتي بس خلي بالك من نفسك...ما بتجيك عوجه..

وياهو لغاية وصلني البيت...قبل ما ادخل قال لي : توصلو بالسلامه..ونتلاقو ساعة خير ...بعدها خت لي شي في يدي وقال لي لمن تدخلي شوفيها

دخلت جوه البيت وختيت الحاجات في المطبخ وجريت الغرفه فتحت يدي لقيتو سلسل فيهو حرفS !! كان مرصع بجوهرات صغار كده ..******.

المساء جاتني صحيه كده..مشيت الحمام و انا راجعه سمعت اصوات في الصالون حق ناس ابوي...
طبعآ جريت قلت اسلم علي ابوي بس لمن سمعت جوطه وقفت طوالي

عمتي زهرة كانت بتقول : لازم تعرس ي خالد...فاديه صاح مرا كويسه واي حاجه لكن مشكلتها بتسمع كلام امها ...م عندها شخصيه ياخ

هدى : عاين شوف نفسك اتبشنت كيف !!! اسي الزول اليشوفك يقول عمرك 80!!!
خالد : خلاص يا امي خير ...

وانا واقفه مصدومة عمتو زهرة جات مارقه شايله صينية الشاي ...وقت شافتني لغاية اتخلعت...جرتني من يدي وساقتني غرفتي ...قفلت الباب وقعدت قدامي وانا بس عيوني بنقطو دموع

بالرغم من عمري الصغير لكن كنت فاهمه انو الموضوع ده بآزي امي!!

عمتو قالت لي : صبا..انتي سمعتي شنو !
قلت ليها وانا بتمتم : ا ا اب بوي ع عاوز ي ي يعمل ش شنو !!

قالت لي : اسمعيني يا صبا ...انتي الاخت الكبيرة يا صبا...ابوك لو عرس حبوبتك تاني ما حتتحكم في امك فاهمه ¿¿¿ حتعيشو في سعاده تامه

ما رديت ليها وبس دموعي كانت بتنقط...قالت لي شوفي يا صبا...يا ريت الموضوع ده ما تجيبي سيرتو لي امك...وانا عارفاك ما بتعملي كده عشان انتي بتحبيها وم بتريدي زعلها ¡¡

قالت كلامها ده وطلعت خلتني محتارة في أمري

**

رجعنا الخرطوم...بالجد فقدتها كتيييير واشتقت لأمي ولي صابر ولي صابرينا ...

من وصلت سلمت عليهم ودخلت غرفتي تاني ما طلعت لي تاني يوم .. كلامي بقى قليل...وما بتكلم الا لو سألوني

لغاية ضعفت من الهم الشايلاهو لي امي لو عرفت بموضوع عرس ابوي ...

في يوم كنت ماسكه السلسل الهداهو لي عماد وسرحانه...امي جات فتحت الباب ودخلت ...جات قعدت قدامي وقالت لي: في زول لمسك يا صبا !!!

عاينت ليها بأستغراب وهي واصلت : قولي لي في زول عمل ليك حاجه !!! وقسمآ اشرب من دمهم كلهم لو آزوك !

#صلو_علي_محمد

#To_be_Continued