#عوده_روح
بقلمي: فاطمه السر
-١٥-
محمد جا كورك لاميره من برا..
اميره طلعت ليهو.. دقيقه و جات داخله..
زهره:( قال ليك شنو?)
اميره:( قال الزول وافق.. و لمن يجو ناس امي حنتم الموضوع)
و بقت تبكي..
قمنا وقفنا جمبها.. انا و زهره و سلافه.. بنهدي فيها...
سلافه:( م بقدر يجبرك ي خالتو.. م تزعلي)
اميره:( محمد م بسمع كلام زول)
قلتا ليها:( بابا حاقيف ليهو و حاخليهو يوافق علي مصطفي.. بس انتي روقي كده عشان نقدر نتفاهم)
زهره:( حنقيف ليهو كلنا م حنخليهو يغصبك علي حاجه انتي م دايراها)
هديناها شويه .. هدت و مشت تتكلم مع مصطفي بالتلفون..
زهره و سلافه مشو بيتهم ينومو..

قعدتا في البلكونه برااي.. شفتا امجد قاعد تحت.. رفع راسو شافني و اشر لي..
امجد:( تعالي نازله)
..قلتا ليهو:( طيب)
.. و نزلتا..
قعدتا معاهو..
امجد:( مالك شكلك متضايقه?)
قلتا ليهو:( موضوع اميره بس)
امجد:( ابوي صعب ياخ م بتفاهم.. بس اميره ترفض و احنا كلنا بنقيف معاها)
قلتا ليهو:( انا ذاتي قلتا ليها كده.. هي زعلانه شديد و بتبكي من قبيل)
امجد:( اي والله ..اميره حنينه م تستاهل كده.. بتحب مصطفي و دايراهو و متمسكين ببعض شديد.. بس ابوي رافضو.. )
قلتا ليهو:( اي والله متمسكين ببعض جددا.. والله انا منها اعرسو ولا اشتغل بكلام محمد)
امجد:( شينه في حقها م ممكن تعمل كده)
قلتا ليهو:( بس مصطفي م فيهو عيب.. يرفضو ليه?? )
امجد:( صح والله م فيهو ااي عيب)
قلتا ليهو:( ابوك بتحكم بطريقه كعبه.. م ممكن كده)
امجد:( ابوي صعب شديد.. بس موضوع اميره ده م بنخليهو.. حنقيف معاها.. م بنخليهو يجبرا علي زول)
قلتا ليهو:( ايوا.. ابوي و حبوبه لمن يجو يتفاهمو معاهو

بقينا انا و امجد نتونس..

جا ايهاب داخل لقانا بنتونس.. عاين لينا سااي و مشي..
بعد شويه امجد تلفونو دقي..
امجد:( عن اذنك دقيقه)
قلتا ليهو:( اتفضل)
بقي بتكلم في التلفون و طلع علي الشارع..
فجاه لقيت ايهاب واقف جمبي.. اتخلعتا..
قلتا ليهو:( خلعتني)
ايهاب بزعل:( عندك شنو مع امجد?)
قلتا ليهو:( بنتونس بس)
ايهاب:( و تاني?)
قلتا ليهو:( بس? داير شنو انت?)
ايهاب:( انتي فهمك شنو بالضبط?)
وقفتا،،
قلتا ليهو:( م عندي ااي فهم)
ايهاب:(اطلعي نومي.. م تقعدي هنا)
قلتا ليهو:( دي م حاجه بتقررا انت)
ايهاب:( لا بقررا)
قلتا ليهو:( م تتحكم فيني)
ايهاب:( م تحكم بس اطلعي نوم و خلاص الوقت اتاخر)
قلتا ليهو:( مستنيه امجد يجي)
مسكني من يدي وكورك فيني
ايهاب:( ياسمين اطلعي غرفتك سرعه)
بقيت بعاين ليهو في عينو..
قلتا ليهو:( داير مني شنو انت?)
ايهاب:( ولا حاجه)
قلتا ليهو:( اوكي.. خليك في حالك و خليني في حالي)
ايهاب:( ياسمين.. حتطلعي وله اتصرف معاك?)
قلتا ليهو:( انا م بتهدد)
مسكني من يدي شديد..
قلتا ليهو:( ايهاب.. يدي)
ايهاب:( حتطلعي فوق وله لا?)
دموعي نزلت من الم يدي..
لمن شاف دموعي... فكي يدي،،

جريت سرعه دخلتا البيت.. و طلعتا غرفتي و قفلتا الباب... بقيت ماسكه يدي و دموعي في عيوني.. زعلتا من ايهاب انو بتعامل معاي بالطريقه دي.. الباب دقي.. و جاني صوت ايهاب:( ياسمين.. افتحي.. ياسمين)
م رديت عليهو..
ايهاب:( ياسمين.. افتحي اسمعيني بس)
قمتا زعلانه قلتا اشاكلو..
فتحتا الباب..
عاين لي في وشي.. لقي دموعي...
ايهاب:( انا اسف.. م كنت داير اتعامل معاك كده.. بس انتي اجبرتيني)
قلتا ليهو بزعل:( انت قايل روحك منو عشان تتعامل معاي كده? انت داير تبقي ذي ابوك?? داير تجبر كل الناس و يعملو ليك الحاجه الانت دايرها?? )
ايهاب اتخلع و بعاين لي..
قلتا ليهو:( م ليك حق تجبرني علي حاجه.. م ليك حق تتحكم فيني.. امشي اتحكم في مياده م فيني انا.. فاهم)
و قفلتا الباب في وشو...

الصباح صحيت لقيت اثر يد ايهاب في يدي.. م ركزتا معاها عشان بكلامي معاهو امبارح ارتحتا شديد...حسيت روحي اتفشيت فيهو.. نزلتا تحت لقيت عمتو سميه قاعده في الصاله... سلمتا و قعدتا...
سميه:( كيف اصبحتي?)
قلتا ليها:( الحمدلله.. انتي كيف?)
سميه:( الحمدلله.. بس من الصباح عندي صداع متعبني.. م قادره اعمل حاجه)
قلتا ليها:( طيب ابلعي بندول)
قالت لي:( م لقيت الا ارسل عم ايوب.. )
قلتا ليها:( انا عندي بجيب ليك.. دقيقه)
و طلعتا غرفتي فوق جبتا ليها بندول و كبايه مويا..
سميه:( شكرا)
قعدتا في مكاني بشرب في شاي..

سميه:( كنت دايره اعمل ملاح روب لفطور،، نفسي فيهو من الصباح بس م قدرتا اقيف،، و الشغالات ديل م بعرفو اظبطوهو)
قلتا ليها:( انا بعرف بعملو ليك)
سميه:( لالا م بتعبكـ ،، بخليهو لمن ابقي كويسه بعملو)
قلتا ليها:( لالا ي عمتو.. دايره اعملو ماف تعب.. اصلا قاعده ساي انا.. بتسلا بيهو)
كنت دايره اكسب عمتو سميه ،، بريدهم هي و امنه و نفسي يتعاملو معاي كويس.. ذي م بتتعامل معاي اميره.. كنت محتاجه ليهم في حياتي..

سميه ابتسمت:( خلاص طيب.. خلصي الشاي و اعمليهو نفطر مع بعض الليله)
ابتسمتا قلتا ليها:( طيب)
فرحتا شديد بتعامل سميه معاي..

دخلتا المطبخ عملتا الملاح و عصيده..و فطرنا انا و عمتو مع بعض.. عجبا الملاح شديد.. بعد الفطور قاعدين نتونس قلتا ليها:( ي عمتو.. انتي م بتحبيني?)
سميه باستغراب:( ليه كده?)
قلتا ليها:(حاسه انك م بتحبيني،،بس انا م لي ذنب في علاقه ابوي و امي و انو ابوي عرس امي بدون رضاكم... انا م لي ذنب.. م بستحق انكم تعاملوني كده او م تحبوني)
سميه سكتت مسااافه..
سميه:( كلامك صح ي بتي.. انتي م ليك ذنب.. بس احنا زمان بنريد عبدالرحمن شديد.. بنحبو اكتر من محمد.. محمد طبعو جافي و حار.. بس عبدالرحمن هو كان صاحبنا و اخونا و حنين شديد معانا... لمن حبا امك و خلي البيت عشانا.. و اتحرمنا منو... كرهنا امك بدون م نعرفها اصلا.. شايفنها م بتستاهل عبدالرحمن.. و كرهنا عيالو برضوو بدون م نشوفهم.. حسينا هي و عيالا حرمونا من اخونا و كده.. مفروض نحبكم عشان انتو بتحبو عبدالرحمن و هو اختار يعيش معاكم.. بس خلاص الحاجه دي بقت فينا.. بس والله ي ياسمين انتي طالعه لابوك.. فيك حنيه و طيبه ابوك.. مفروض نحبك عشان انتي تستاهلي كده و عشان انتي بت عبدالرحمن.. )
كلام سميه اثر فيني شديد لمن دموعي نزلت..

سميه مسحت دموعها و فتحت يدينها ..
سميه:( تعالي ي بت الغالي)
قمتا حضنتي و بقيت ببكي..
سميه:( خلاص.. م تبكي.. انتي ذي ابوك اقل شي دموعو بتنزل..)
قعدتا جمبها..
قلتا ليها:( معاك حق في كل كلمه قلتيها ي عمتو.. انا والله بحبكم.. م حصل كرهتكم.. و لا حصل امي وله ابوي قالو عنكم حاجه كعبه،، بلعكس بذكروكم بالخير طواالي،، و لمن جيت هنا كنت خايفه من تعاملكم معاي بس،، بس من جواي انبسطا بشوفتكم و اني اتعرف عليكم..)
جات مياده عاينت لينا باستغراب..
سميه:( في حاجه ي مياده?)
مياده:( لا لا ي امي.. خلصتا محاضرات و جيت)
سميه:( فطرتي?)
مياده:( لالا)
سميه:( في ملاح روب عملتو ياسمين..حلو شديييد امشي اكلي)
مياده كشرت:( لالا م باكل ملاح روب..بطلع اعمل لي حاجه فوق)
و مشت علي السلم...
اتونسنا انا و عمتو كتيير.. و عملتا معاها الغدا.. جد طلعت طيبه و حنينه جددا... كنت مبسووطه من جواي انو علاقتي اتصلحت ب عمتو سميه..

نتلاقي😊

#عوده_روح
بقلمي: فاطمه السر
-١٦-
المساء قاعدين انا و زهره و اميره في الصاله..
اميره لسه زهجانه و مقلقه شديد.. بقت م بتضحك و تتونس ذي الاول ،، كلنا حاولنا نطمنا بس م اتطمنت...
جانا سامي..
سامي:( مساء الخير)
قلنا ليهو:( مساء النور)
سامي:( اها جاهزين?)
قلتا ليهو:( لشنو?)
سامي:( الليله الخميس نسيتو وله شنو?)
زهره:( والله نسينا عدييل)
قلتا ليهو:( اي والله مع موضوع عمتو ده نسينا ااي حاجه) سامي:( براي م بمشي انتو وعدتوني تمشو معاي.. لو رجعتو في كلامكم م بمشي براي حاضرب اعتذر)
اميره:( لالا م تعتذر.. حامشو معاك.. قومو ي زهره و ياسمين اجهزو و سوق امجد و ايهاب و سلافه و امشو)
سامي:( و انتي?)
اميره:( م عندي مزاج معليش..المره الجايه بمشي معاك)
قلتا ليها:( لالا ي عمتو لازم تمشي معانا)
اميره:( والله م قادره ي ياسمين.. تعبانه و مصدعه.. عايزه ابلع بندول و انوم.. صورو لي بس.. )
زهره:( خليها براحتها ي ياسمين)
سامي:( خلاص يلا اجهزو الزمن جا)
قمنا جهزنا انا و زهره،، كلمنا سلافه.،، مياده كلعاده قالت م ماشه..
جهزنا طلعنا برا الحديقه،، لقينا سامي و شايل شنطه فيها الجيتار حقو.. و امجد و سلافه منتظرين..
زهره:( وين ايهاب?)
سامي:( قال بلحقنا.. يلا)
مشينا بعربيه سامي و زهره...

وصلنا المحل.. كان مطعم كبيره و رااقيه.. و فيهو مسرح صغير.. كان فيهو واحد بغني ب عود..
سامي عرف الويتر بانو سامي عبدالغني ،، الجاي يغني هنا.. الويتر رحبو بينا و كانو مجهزين لينا طاوله مخصوصه لينا..
قعدنا.. و جا مدير المطعم سلم علينا و رحب بينا.. و اتكلم مع سامي و مشي..
بعد شويه واحد اتكلم بالميكروفون و عرف الناس ب سامي و طلب منو يجي يغني..
سامي قام و كلنا صفقنا ليهو و شجعناهو...

طلع المسرح و قعد و شايل الجيتار و بقي يغني في اغنيه هادئه.. و امجد شايل كاميرا بصور فيهو فيديو..
جا ايهاب.. سلم و قعد.. م عبرتو خااالص.. كشرتا ليهو وشي و سكتا.. و هو بتبسم سااي.. م عرفتو مالو...
سامي غني بطريقه حلوه شديد...و م كان ظاهر عليهو انو متوتر او خايف.. بلعكس شكلو انو متعود علي الغنا۽ قدام الناس..

لمن خلص.. الناس صفقو ليهو شديييد.. و احنا كلنا وقفنا نصفق ليهو.. جد الناس اعجبو بيهو جدا...
جابو لينا عصير و حلويات..( الضيافه كلها كانت علي حساب المطعم)
سامي غني اغنيه تانيه..
و بعدها جا قعد معانا...
سامي:( اها كنت كيف? طمنوني)
قلتا ليهو:( والله تجنن ي سامي)
امجد:( ولا كانو اول مره تغني قدام الناس.. بان عليك متعود تغني م ظاهر انك خايف او متوتر)
ايهاب:( جد كنت رائع جدددا)
سلافه:( اتنبئنا ليك بمستقبل باااهر)
زهره:( ناس المطعم م حاخلوك تطلع من هنا لو م وقعو معاك عقد لمدي الحياه)
بقينا نضحك..
بعد نص ساعه.. تاني سامي قام غني اغنيتين و جا...
اتعشينا.. الويتر جا نادي سامي.. و سامي مشي معاهو..
بقينا نتونس.. بعد شويه سامي جا مبسوووط..

ايهاب:( اها بشر)
سامي بكل ثقه:( قالو اغني عندهم هنا يومين من كل اسبوع ال خميس و الجمعه.. و بمبلغ كويس جدددا)
فرحنا ليهو.. و باركنا ليهو.. كان مبسوط جددا..
طلعنا ..
سامي:( يلا نمشي النيل..نقعد شويه و نرجع)
ايهاب:( اوكي ماف مشكله.. يلا)
دايره امشي مع زهره و سلافه ..
ايهاب:( ياسمين.. تعالي معاي م داير امشي براي)
م قدرتا احرجو و اقول لا... مشيت معاهو..
و اتحركنا.. كان راايق و هااادي...
ايهاب:( انتي مياده قالت ليك حاجه)
سكتا ابيت ارد عليهو..
ايهاب:( بسالك انا)
قلتا ليهو:(و م دايره ارد عليك انا)
ايهاب:( خلينا نتفاهم)
قلتا ليهو:( م دايره اتفاهم)
ايهاب:( مياده قالت شنو?)
قلتا ليهو:( قالت الحقيقه)
ايهاب:( اللي هي شنو?)
قلتا ليهو:( علاقتكم ببعض..و انو متفقين علي العرس اول م هي تخلص الجامعه)
ايهاب بقي يضحك..
كشرتا ليهو و سكتا..
ايهاب:( عايني.. اولا مياده كذبت عليك.. ماف بينا ااي حاجه.. مياده بالنسبه لي ذي زهره.. م بحس انها اكتر من اختي.. هي شكلها دايراني.. بس انا م دايرها ولا حسيت نحيتها يوم بآي احساس..ولا حصل يوم وعدتها بحاجه)

قلتا ليهو:( شنو البآكد كلامك ده.. يمكن بتكذب علي)
ايهاب:( ربنا يشهد اني م بكذب عليك.. لو م مصدقه اسالي زهره او ااي زول.. حاقولو ليك ماف بينا شي.. )
سكتا..
ايهاب:( لمن يصلك يوم كلام عني من ااي زول.. ي ريت م تصدقي طوالي.. علي الاقل اساليني.. و انا بوريك.. م بكذب عليك.. طيب?)
قلتا ليهو :( خير)

ايهاب شغل سي دي فيهو اغاني.. و بقي يغني و هو مبسووط..
ارتحتا شديد ب كلام ايهاب.. و فرحتا انو م عندو حاجه مع مياده.. بس ابيت ابين ليهو كده.. و اتعاملتا عاادي...
وصلنا النيل.. قعدنا نتونس و شربنا قهوه.. قضينا وقت حلو شديد..ضحكنا و اتونسنا..
سامي كان مبسووط.. و كلنا فرحنا بفرحو...

رجعنا البيت.. مشت شفتا اميره لقيتها نايمه.. مشيت غيرتا و رقدتا عشان انوم..
تلفوني ضرب.. لقيتو ايهاب.. انبسطا.. رديت..
قلتا:( الو)
ايهاب:( م نفسك تساهري مم

عاي?)
قلتا ليهو:( اسي مش كنا مساهرين? الساعه 12 سهر اكتر من كده كيف?)
ايهاب:( لسه بدري.. قداامنا الليل كلو.. تعالي نازله)
قلتا ليهو:( خايفه عمو محمد يشوفنا)
ايهاب:( بنقعد في مكان ماف زول بشوفنا.. بس تعالي يلا مستنيك جمب غرفه المرسم)
قلتا ليهو:( طيب.. جايه)
نزلتا مشيت.. لقيتو قاعد تحت شجره كبيره..
ايهاب:( اقعدي)
قلتا ليهو:( في الارض?)
ايهاب:( ايوا)
قعدتا قصادو..
ايهاب:( عارفه.. مش افترقنا لينا ربع ساعه.. بس و رب الكعبه اشتقت ليك)
ابتسمتا و سكتا..
ايهاب:( عارفه ي ياسمين...احكي ليك عني.. )
قلتا ليهو:( احكي)
ايهاب:( كنت بحب وحده.. علاقتنا دامت سنتين.. كنا بنحب بعض و جادين.. و كلمتا ابوي... قبل 8 شهور.. فجاه بدون ااي مقدمات ضربت لي قالت لي (اهلي جابرني علي عريس و كده.. ) زعلتا و كوركتا و قلتا ليها بجيكم البيت الليله و بكرا دي بنعرس و كده.. رفضت قالت لي ااهلي ادو كلمه للناس و انساني و كده.. جد زعلتا شديد.. مشيت سالتا اصحابها و كده.. عرفتا انها دايراهو.. زعلتا منها شديد و ضربتا شاكلتها و كده.. و دخلتا في حاله نفسيه بقيت لا بتونس لا بضحك مع زول.. الشغل و البيت بس..
ناس بيتنا هنا كلهم عارفين القصه.. منها كرهتا البنات قلتا عمري م بعرس ولا بثق في بت تاني... بس ... لمن جيتي انتي... غيرتي لي ااي حاجه.. حسيت اني بالجد بقدر احب و اثق في بت تاني.. حسيت اني مبسوط معاك.. شوفتك بس بتخليني اعيش في دنيا تانيه.. )
فرحتا جدددددددا بكلام ايهاب.. م عرفتا ارد ليهو.. م عرفتا اقول ااي حاجه.. ابتسمتا و سكتا بس...
ايهاب:( مش اول ايام م اتعاملتا معاك?)
قلتا ليهو:( ااي صح.. كنت بتكشر لي)
ايهاب:( اول كم يوم م حبيتك.. م عارف ليه.. او حسيت كده.. بس شويه شويه احساسي نحيتك بقي خوف.. عارفه ليه?)
قلتا ليهو:( خوفتا مني?)
ايهاب:(كنت خايف احبك.. قلتا لو اتقربتا منك حاحبك.. لانو بالجد فيك كل الصفات الانا عايزها،، او الصفات الدايراها ااي راجل في الدنيا دي...و فعلا كلامي طلع صح.. و الكنت خايف منو حصل)
ضحكنا...
نتلاقي😊

#عوده_روح
فاطمه السر
-١٧-
ايهاب:( احكي لي عنك.. حصل حبيتي?)
قلتا ليهو:( لالا.. م بؤمن بالعلاقات القبل العرس دي.. اغلبا بتفشل)
ايهاب:( حسب النصيب بس)
قلتا ليهو:( اي.. النصيب بس.. عشان كده كنت برفض ااي علاقه.. قلتا الببقي جادي و يجي البيت ده البوافق بيهو)
ايهاب:( خلاص.. اول م عمي يرجع حاكلمو.. اقول ليهو داير ياسمين.. عشان تبقي علاقه جاده ذي م انتي عايزه)
ابتسمتا و قلتا ليهو:(ان شا۽الله)

قلبي كان طااااير بكلام ايهاب بس م حبيت ابين ليهو.. و هو كمان الفرح كان باين في عيونو و كلامو..

فضلنا انا و هو بنتونس لحدي الساعه 4 الفجر..
قلتا ليهو:( ايهاب...الساعه 4.. انا ماشه انوم)
ايهاب:( لسه بدري)
قلتا ليهو :( من الساعه 12 انت بتقول لسه بدري)
ايهاب:( م قادر امشي انوم و اخليك.. خليك معاي)
قلتا ليهو:( ايهاب.. انت اصلا نعسان اهو نايم علي روحك و انا كمان نعستا.. نتونس بكرا)
ايهاب:( م قارد والله)
ضحكنا و قمتا ..
قلتا ليهو:( يلا)
قام.. مشينا علي البيت جوه.. وصلني غرفتي..
ايهاب بصوت حنيين:( تصبحي علي خير)
قلتا ليهو:( و انت بخير)
و دخلتا رقدتا و انا طاايره من الفرح..
دقي لي..
رديت و انا بضحك..
ايهاب:( ضحكتك دي.. شفا۽ لي )
قلتا ليهو:( ههه ليه انت عيان?)
ايهاب:( عيان بيك والله)
ضحكتا قلتا ليهو:( بعد الشر)
ايهاب:( ده احلي عيا۽ والله... داير اسمع صوتك لحدي م انوم.. ممكن?)
قلتا ليهو:( حاضر)
دقيقتين بس و نام م قدر يتكلم اصلا.. بقيت بضحك علي حالتو... شكلو مضحك هو و تعبان و نعسان و داير ينوم و في نفس الوقت داير يتونس معاي..

ختيت التلفون و نمتا...

صحيت الصباح بصوت زهره..
زهره:( ياسمين.. قومي.. ي بت.. انتي ليه نوامه كده? الساعه 12.. يلا قومي)
قلتا ليها بصوت تعبان:( تعبانه ي زهره خليني انوم)
زهره:( تعبانه ليه? نمتي امبارح من 12.. في زول بنوم من 12 ل12? يلا اصحي...او اجيب مويا بارده اصحيك بيها)
قلتا ليها:( والله اقتلك)
زهره:( ههههه..يلا طيب اصحي)
قمتا قعدتا في السرير بزهج..
قلتا ليها:( اهو صحيت.. دايره شنو?)
زهره:( قومي خلاص كفايا نوم.. اتونسي معاي)
قلتا ليها:( ماف زول في البيت ده ممكن تتونسي معاهو غيري?)
زهره:( ماف غيرك)
قلتا ليها:( خلاص قمتا ي زهره.. خليت النوم ذاتو)
قمتا استحميت و صليت و نزلتا تحت..

لقيت زهره و اميره و سميه.. صبحتا عليهم و مشيت المطبخ جبتا كبايه الشاي و جيت قعدتا..
بعد شويه جات مياده قعدت جمبي...
كنا بنتونس.. و تلفوني قاعد علي رجليني..
ايهاب دقي لي.. مياده طوالي عاينت لشاشه شافت اسم و رقم ايهاب.. عاينت لي و كشرت لي.. شلتا التلفون و قمتا مشيت رديت..
ايهاب:( احلي صباح لاحلي بت في الدنيا)
قلتا ليهو:( صباح النور)
ايهاب:( كنت حالف لو م سمعتا صوتك م حاقوم من السرير)
قلتا ليهو:( كويس اهو سمعتو...قوم يلا عشان تلحق الصلاه)
ايهاب:( ااي بعد سمعتا صوتك لازم اقوم )
قلتا ليهو:( انا صحتني زهره قبل نص ساعه م خلتني انوم)
ايهاب:( ااي زهره ثقيله بتحب تصحي الناس انا محزرها انها تقرب من غرفتي وله تصحيني)
قلتا ليهو:( ههههه لو كنت بتديها فرصه كان صحتك كل يوم من الساعه6.. )
ايهاب:( اي والله)
قلتا ليهو:( ايهاب.. مياده شافت التلفون لمن انت دقيت و كشرت لي)
ايهاب:( م بتسالك م تعبريها)
قلتا ليهو:( كويس)

رجعتا قعدتا معاهم...بس مياده م شالت عينها مني..و مكشره.. حتي زهره سالتها مالك قالت ماف شي..

في الغدا كالعاده بنتغدا كلنا تحت..

سميه و اميره جهزو الغدا.. جو الاولاد كلهم...ايهاب لابس جلابيه سودا...تجنننن فيهو.. و انا كنت لابسه جلابيه ورديه،، بعاين لي كل شويه و ابتسم لي.. بعاين بلقي مياده مراقبانا.. ياخ جد اتضايقتا منها...م ممكن تقعـد تراقب فينا كده.. ايهاب ذاتو ركز ليها..

العصر كده كنت قاعده في غرفتي.. جات مياده.. دخلت بدون م تستاذن و قفلت الباب وراها..
استغربتا ..
مياده:( في شنو بينك و بين ايهاب?? )
كانت زعلانه شديد
سكتا ..
مياده:( ردي علي)
قلتا ليها:( انتي كذبتي علي ليه?)
مياده:( كذبتا في شنو?)
قلتا ليها:( في علاقتك انتي و ايهاب)
مياده:( م كذبتا دي الحقيقه)
قلتا ليها:( مياده...المواضيع الذي دي م بالقوه)
مياده:( هو مقتنع بي...بس انتي اطلعي من حياتو)
قلتا ليها:( لو كان مقتنع بيك كان زماان رضي بيك و كلم ابوك)
مياده:( ياخ انتي م تتدخلي.. بس اطلعي من حياتو.. انا بعرف اخليهو يقتنع بي كيف)
قلتا ليها:( عايني.. انا و ايهاب اتفقنا علي ااي شي م تتعبي روحك ساي)
مياده:( كده? كويس.. بتندمي علي كلامك ده)
و طلعت وقفلت الباب وراها بزعل...
قعدتا متضايقه م عارفه اعمل ليها شنو...جاتني زهره.. حست بي متضايقه.. سالتني..
زهره:( في شنو ي ياسمين?)
قلتا ليها:( ماف شي)
زهره:( لالا في حاجه.. احكي)
حكيت ليها بايهاب و بكلام مياده..
زهره فرحت بعلاقتي مع ايهاب..
زهره:( انتي و ايهاب بالجد لايقين علي بعض.. بس مياده ليه بتعمل كده? بتحب ايهاب ب

الجد?)
قلتا ليها:( ايهاب قال هي شكلها بتحبو)
زهره:( بس هو م بحبها.. ليه تتعامل معاك كده? انتي ذنبك شنو? هي و ايهاب متربيين مع بعض.. لو ايهاب كان دايرها كان زمان كلمها.. )
قلتا ليها:( انا من دخلتا البيت ده هي م بتحبني.. ولا بتتعامل معاي)
زهره:( مياده اصلا كده.. م بتدخل في الناس شديد)
قلتا ليها:( بس انا قلقتا منها ي زهره)
زهره:( انا بتكلم معاها.. م تركزي معاها ،، هي بتاعت كلام سااي م بتعمل حاجه)
كلام زهره م طمني..بس مشيتها قلتا ليها :(طيب)...

نتلاقي😊

#عوده_روح
فاطمه السر
-١٨-
المسا۽ ايهاب ضرب لي..
ايهاب:( يلا نطلع شويه)
قلتا ليهو:( طيب.. اصلا دايراك في موضوع)
ايهاب:( اوكي اجهزي سرعه)
قلتا ليهو :( طيب)
جهزتا و نزلتا..
لقيتو قاعد في العربيه مستنيني.. ركبتا و مشينا..
قعدنا في مطعم علي البحر..
كنت متضايقه شديد...
ايهاب:( تاكلي شنو?)
قلتا ليهو:( م دايره اكل)
ايهاب:( ياسمين.. ليه كده?)
قلتا ليهو:( جيب لي نسكافي)
ايهاب:( طيب.. ناخد نسكافي و بعدين ناكل)
طلب لينا النسكافي..
ايهاب:( مالك متضايقه كده? حصل شنو?)
قلتا ليها:( مياده)
ايهاب اخد نفس عمييق..
ايهاب:( مالا مياده تاني?)
قلتا ليهو:( جاتني قبيل و قالت لي عندك شنو مع ايهاب و ايهاب بحبني و انا.. و انتي اطلعي من حياتو .. قلتا ليها هو م بحبك و م دايرك.. قالت لي دايرني بس انتي اطلعي من حياتو و هو برضي بي و اتكلمت معاي بطريقه بايخه شديد)

ايهاب اخد نفس تاني...و كشر وشو و سكت..
انا دموعي رقرقت في عيوني.. شلتا منديل و مسحتا دموعي..
ايهاب:( انا بتكلم معاها... تاني م بتسالك)
قلتا ليهو:( قلتا ليها انا و ايهاب اتفقنا علي ااي شي م تتعبي روحك ساي.. قالت لي حتندمي علي كلامك ده)
ايهاب اتخلع..
ايهاب:( قالت ليك كده? والله البت دي مجنونه.. خليني انا بتفاهم معاها)
الويتر جاب النسكافي و ختاهو..
بقينا بنشرب في النسكافي و ساكتين..
ايهاب:( انسي الكلام ده كانو م حصل.. ولا تعبريها و انا بتفاهم معاها بطريقتي.. طيب)
هزيت راسي و سكتا..
ايهاب ابتسم:( خلصي عشان نمشي مشوار)
قلتا ليهو :( طيب)
طلعنا من المحل.. مشينا بالعربيه محل اكسسوارات.. دخلنا..
ايهاب:( طبعا ده اكتر محل حاجاتو بتعجبني طوالي بشتري منو)
قلتا ليهو:( شكلو حاجاتهم حلوه)
ايهاب:( شيلي الحاجه العاجباك.. و انا داير ساعه بزوقك)
قلتا ليهو:( شيل لي انت بزوقك)
ايهاب :( طيب)

عزل لي طقم اكسسوار ملون كده رهيييب.. و ساعه دهبيه تجنننننن... و عزلتا ليهو ساعه فضيه رهييبه..

طلعنا من المحل.. لقينا جمب المحل في محل حق اطفال فيهو العاب و دباديب كبيره خاتنها برا.. لفت نظري بقيت بعاين ليهو ايهاب انتبه لي..

ايهاب:( تعالي شيلي العاجبك)
قلتا ليهو:( ده حق اطفال)
ايهاب:( انتي كمان طفلتي)
و جراني من يدي دخلنا المحل.. عجبني ارنب كبيير لونو ابيض.. شلتو .. حق المحل ضحك فينا.. طلعنا من المحل بنضحك..
ايهاب:( اضربي ل زهره او اميره قولي ليهم م تاكلو ايهاب جايب العشا۽)
قلتا ليهو :( طيب)
ضربتا لزهره كلمتها..

مشينا مطعم طلبنا بيتزا لينا كلنا.. شلنا البيتزا و مشينا محل ورد.. نزل جاب لي بوكي حق ورد احمر كبييير..
جا شايلو و ركب العربيه.. عاينتا ل بوكي بفرح..
ايهاب مدا لي البوكي:( ياسمين.. تقبليني في حياتك? حبيبك و راجلك و صديقك و اخوك و ابوك.. و ااي شي في حياتك?)
بقيت بضحك..
قلتا ليهو:( ي مجنون)
ايهاب:( اتفضلي)
شلتا منو البوكي و شميت الورد..
قلتا ليهو:( اجنننن.. تسلم ايدك)
ايهاب:( انا حاعيش عشان اسعدك بس.. انتي بقيتي كل اسباب سعادتي)
خجلتا و سكتا..
جد قدر يبدل زعلتي و قلقي بفرح رهيييب...

دخلنا البيت مبسوطين الاتنين و بنضحك.. انا شايله الارنب و بوكي االورد.. و ايهاب شايل اكياس الاكسسوارات و البيتزا.. دخلنا لقينا.. زهره و اميره و سلافه و امجد و سامي و مياده.. قاعدين كلهم من شافونا بقو يعلقو و يضحكو..
سامي:( ماشا۽الله م نسحركم)
امجد:( لايقين جدددا علي بعض)
زهره:( ربنا يحفظكم)
اميره:( ماشا۽الله.. ربنا يديم فرحتكم.. يلا جوعتونا تعالو ناكل)
بقينا نضحك في كلامهم..
ختينا الاكل.. سلافه مشت تجيب الصحانه.. فجاه عاينا لقينا مياده مافيشه..
سالتهم:( مياده مشت وين?)
زهره:( خليك منها.. يلا ناكل)
قعدنا ناكل و نتونس و نضحك..

بعد خلصنا زهره و امجد طلعو قبل ايهاب..
ايهاب وقف معاي جمب غرفتي اتكلم معاي شويه ومشي طالع علي بيتهم.. لقي مياده واقفه في السلم و عيونها حمرا كانو كانت بتبكي..
ايهاب:( مياده.. ليه م اكلتي معانا?)
مياده:( م دايره اكل... ايهاب حتقطع علاقتك ب البت المصريه دي وله لا?)
ايهاب وقف جمبها...
ايهاب:( اولا دي م اسمها البت المصريه.. دي اسمها ياسمين عبدالرحمن.. بت عمي عبدالرحمن)
مياده:( م لي دخل تبقي منو...بس اقطع علاقتك بيها اسي)
ايهاب:( ياسمين.. المواضيع دي م غصب... انا م بحبك انتي لو كنت بقدر كنت حبيتك زمان.. وريتك الف مره.. انتي ذي زهره اختي)
مياده:( لا انا م ذي زهره.. انا بحبك )
ايهاب كورك فيها:( مياده.. م داير اسمع الكلام ده.. وريتك من الاول.. احنا م لبعض.. انا كنت بحب وحده زمان و اسي بحب ياسمين.. شيليني من راسك لو سمحتي.. منو القال ليك الحب بالقوه?)
و مشي خلاها..
قعدت في السلم و دموعها نازله...

كنت بتكلم مع بابا و اتطمنتا عليهم.. قال لي عمليه حبوبه بعد يومين..
قلتا ليهو:( ربنا يسهل)
عبدالرحمن:( ان شا۽الله.. عامله شنو انتي? مرتاحه?)
قلتا ليهو:( ااي الحمدلله.. مبسووطه.. ل

من تجي حاحكي ليك كل الحصل في غيابك)
عبدالرحمن:( ان شا۽الله.. سلمي عليهم كلهم)
قلتا ليهو:( الله يسلمك.. خلي بالك من روحك)
عبدالرحمن:( حاضر.. و انتي كمان خلي بالك من نفسك)
قلتا ليهو :( ان شا۽الله.. يلا سلام)
عبدالرحمن:( مع السلامه)
و قفلتا.. نزلتا قعدتا مع خالتو سميه ...
كلمتها بالعمليه بعد يومين..
سميه:( ربنا يستر جد مقلقه علي امي)
قلتا ليها:( م تقلقي ان شا۽الله بتبقي كويسه)
سميه:( ان شا۽الله.. بدعي ليها في كل صلاه)
قلتا ليها:( و انا كمان.. ربنا يرجعا لينا بالسلامه)

قبل عمليه حبوبه م حصل حاجه جديده... يوم العمليه من بليل اميره و سميه مقلقين شديد.. و احنا كمان م قدرنا ننوم كويس.. صليت الصبح و بقيت بقرا في قران..

اميره و زهره م مشو الشغل.. قعدنا في الصاله تحت..
انا و سميه و اميره و زهره..
اميره اتصلت علي امنه..
امنه:( امي دخلت العمليه.. ادعو ليها)
بقينا مقلقين.. نسكت شويه و نتكلم شويه.. ندعي شويه و نقرا قران شويه.. بس قاعدين علي اعصابنا.. و سلافه و مياده و امجد و سامي و ايهاب.. كل شويه بضربو يسالونا (حبوبه طلعت من العمليه.. الحصل شنو?)

لحدي الساعه 2 ظهر م اتصلو و احنا علي اعصابنا.. حتي الاكل م قدرنا ناكل..
الساعه 2 اتصل ابوي..
عبدالرحمن:( امي عمليتها نجحت الحمدلله..و اسي في العنايه لمده 48 ساعه)
حمدنا ربنا علي سلامه حبوبه.. و فرحنا...
سميه:( ام ايوب حضري الفطور سرعه)..

علاقتي انا و ايهاب قويت شديد.. اتعلقنا ببعض شديد و ايهاب مهتمي بي جدددا... كل يوم لازم هو و راجع من الشغل يجيب لي حاجه معاهو و اي حاجه اقولها في ثواني بتكون عندي.. و كل يوم بنتونس في الحديقه ..
يوم بليل ضرب لي..
ايهاب:( تعالي المرسم سرعه)
قمتا نزلتا مشيت...
لقيتو واقف في المرسم.. و هو مبسووووط..
قلتا ليهو:( مالك مبسوط كده)
ايهاب:( تعالي)
مشيت.. كان واقف قدام لوحه و مغطيها ب غطاء ابيض..
وقفتا جمبو...
ايهاب:( شوفي)
و زح الغطاء..
لقيتو راسمني... راسم وشي من قريب ،، و بعاين بعييد و شعري مفكوك ،، برسم برصاص بس ،،، ي الله... جدددد رسمه خرافييييه عدييييييييل... ياخ جد انبهرتا سكتا بقيت م قادره اتكلم.. و هو بعاين لي بفرررح... ياخ لمن دموعي نزلت..
قلتا ليهو:( ايهاب.. انت جادي? دي انا)
ايهاب بقي يضحك...
ايهاب:( عجبتك?)
قلتا ليهو:( تجنننننن ياااخ.. جد اتصدمتا.. رسمتها متين?)
ايهاب:( الايام الفاتت و ابيت اقول ليك لحدي م اخلصها)
قلتا ليهو:( الرسمه احلي مني)
بقي يضحك..
قلتا ليهو:( تسلم حبيبي .. ربنا يخليك لي.. المره الجايه ارسم صورتنا انا و انت مع بعض)
ايهاب:( ان شاءالله)
طلعنا قعدنا برا نتونس...

نتلاقي😊

#عوده_روح
فاطمه السر
-١٩-
الايام مرت عاديه.. بقينا بس مستنيين رجعت ناس حبوبه و انا اشتقتا ل ابوي شديد.. بس ايهاب معوضني شويه عن اهتمام ابوي.. مياده تاني م اتكلمت معاي.. انبسطا و قلتا الموضوع انتهي..

يوم ايهاب كان تعبان و عندو نزله و وجع حلق م مشي الشغل..
راقد في غرفتو و بتكلم معاي بالتلفون..
ايهاب:( انا تعبان و ماف زول عمل لي عصير لا ادوني حبوب لا ااي شي)
قلتا ليهو:( خلي الشغاله تعمل ليك)
ايهاب:( لالا دايرك انتي تعملي لي)
قلتا ليهو:( م بقدر اطلع.. خالتو ليلي تقول شنو)
ايهاب:( امي مافيشه.. تعالي يااخ)
قلتا ليهو:( برسل ليك عصير و حبوب مع ام ايوب)
ايهاب:( والله م تجي انتي اقعد كده لا اشرب لا ابلع حاجه)
قلتا ليهو:( ايهاب ليه بتعمل كده?)
ايهاب:( وريتك بس.. يلا باي)
و قفل..

بقيت محتاره.. اطلع وله لا.. خايفه اطلع يلاقيني زول و لو م طلعتا ايهاب م حابقي كويس.. في الاخر قلتا اعمل العصير و اطلع سرعه اديهو ليهو و اجي نازله..

مشيت المطبخ عملتا جك عصير برتقال و شلتا الحبوب و مويا كلهم في صينيه و طلعتا سرعه.. مشيت علي غرفتو دقيت الباب.. جاني صوتو من جوه..
ايهاب:( ادخل)
دخلتا لقيتو راقد و شكلو تعبان و جمبو علبه مناديل.. من شافني ابتسم..
ايهاب:( ادخلي حبيبتي)
دخلتا ختيت الصينيه جمبو في الطربيزه..
قلتا ليهو:( يلا انا نازله)
ايهاب:( اقعدي معاي شويه)
قلتا ليهو:( لالا..ماشه)
ايهاب:( دقيقتين بس حبيبتي)
قلتا ليهو:( قول سرعه في شنو?)
ايهاب:( مشتاق ليك بس)
كنت خايفه و متوتره شديييد..
فجاه سمعتا صوت ليلي في الصاله بتنادي...
ليلي:( ايهاب)

عاينتا ليهو بخلعه و هو كمان اتخلع..عاينتا في حته اتدسا فيها عشان ليلي م تشوفني.. قبل م اتحرك ليلي دخلت الغرفه.. الحمدلله الباب كان فاتح.. لقت ايهاب راقد و انا واقفه جمبو.. عاينت بخلعه..
ليلي بكشيره:( ده شنو?)
ايهاب بكل ثقه:( في شنو? كنت عيان و جابت لي عصير وين المشكله?)
ليلي جات علي و هي بتتبسم بسخريه:( م علموك في مصر انو بت تدخل لولد في غرفتو و هو قاعد براهو بقولو عليها شنو?)
اتخلعتا من كلامها.. عاينتا ليها بزعل و دموعي في عيوني..
ايهاب بزعل:( امي)
قلتا ليها:( علموني.. و بعرف الغلط و الصح.. اكتر من اي زول انا...بس م مسئوله عن تفكير الناس الكعب.. عن اذنكم)
و طلعتا بسرعه اول من وصلتا السلم بقيت ببكي.. مشيت غرفتي قفلتا الباب و بقيت ببكي...
ايهاب:( ده شنو ي امي?)
ليلي:( كيف تجيك هنا? و تجيك لشنو اصلا?? مالا و مالك?)
ايهاب:( جابت لي عصير و حبوب.. اهو قدامك)
ليلي:( دي حجتها عشان تطلع ليك صح?)
ايهاب:( والله انا القلتا ليها تعالي لي والله هي رفضت الا انا اصريت حتي جات...)
ليلي:( كذابه ساي حركات البنات دي بعرفا)
ايهاب:( ليه ي امي انتي تفكيرك كعب كده? والله ياسمين دي بت ممتازه و ماف ذيها)
ليلي:( انتي بتعرفا من متين عشان تقول عليها كده?)
ايهاب:( بعرفا كويس)
ليلي:( مخدوع ساي انت.. المهم انا جيت اشيل حاجه و ماشه ل امي.. بجي المسا۽ لو دايرين حاجه اضربو لي) و طلعت مشت..

ايهاب جا دقي لي باب الغرفهه ابيت افتح ليهو.. دقي كتير و بضرب لي في تلفوني برضو ابيت ارد.. لمن اصرا فتحتا الباب عاين لي بخلعه لقاني ببكي..

ايهاب:( انتي جاده ليه كل ده?)
م رديت...
ايهاب:( حبيبتي.. ليه كده? والله الموضوع م بستاهل)
قلتا ليهو:( كيف م بستاهل و امك ظنها بقي كعب فيني)
ايهاب:( انتي مش عارفه روحك م تشتغلي بكلام زول.. انا عارفك كويس حبيبتي)
قلتا ليهو:( انا قلتا ليك م دايره اطلع بس انت الاصريت)
ايهاب:( عارف والله حبيبتي.. انا اسف.. بالجد بعتزر.. يلا امسحي دموعك دي م بتحملا والله)
سكتا..
ايهاب:( اول من عمو يصل حاطلبك منو.. و حنعرس طوالي تاني لا كلام ماما لا كلام بابا)
بقي بحنس فيني لمن هديت حتي طلع بيتهم...

كنا راجعين انا و ايهاب من السينما.. وصلنا جمب البيت.. ايهاب:( انزلي انا ماشي مشوار و جاي)
قلتا ليهو:( لو اتاخرتا حتلقاني نمتا.. عشان بكرا صاحيه بدري دايره احضر لابوي الغدا)
ايهاب:( حتلقي ابوك حتنسيني صح?)
قلتا ليهو:( طبعا)
كشر لي..
ضحكتا..
قلتا ليهو:( اكيد حبيبي م بنساك)
ايهاب:( بعد كلمه حبيبي دي لو بتنسيني موافق)
ضحكنا..
نزلتا و هو مشي...

الصباح صحيت مبسووطه و نشيطه وقفتا في المطبخ عملتا كمميه اصناف للغدا.. عمتو سميه قالت لي اساعدك قلتا ليها:( لالا انا بعمل براي)
عمتو سميه ونستني و انا شغاله..

خلصتا مع مشيه ايهاب و سامي المطار.. مشيت استحميت و جهزتا و استنيت ناس ابوي في الحديقه.. من جات العربيه داخله جريت عليها بشوق و لهفه كبيره.. ابوي نزل من العربيه جيت جاريه عليهو حضنتو.. حضني و لفي بي بقيت بضحك و طايره من الفرح..

سلمتا علي حبوبه و عمتو امنه و دخلنا البيت.. حبوبه كانت كويسه بس مرهقه.. طوالي دخلت ترتاح..

محمد جا سلم عليهم من بعيد و دخل اتطمن علي حبوبه.. ليلي برضو جات سلمت و دخلت ات

طمنت علي حبوبه و طلعت بيتها...

نتلاقي😊

#عوده_روح
فاطمه السر
-٢٠-
اتغدينا مع بعض كلنا .. و ابوي دخلو ارتاح و انا قاعده معاهو..

عبدالرحمن:( ي الله جد تعبان انا...ياخ ال 3 اسابيع دي م نمتا ولا ارتحتا كويس)
قلتا ليهو:( اتاخرتو م كنت قايله حتقعدو كتير كده)
عبدالرحمن:( في مراجعات و فتره نقاهه بعد العمليه.. حتي قدرنا نجي.. هم ذاتهم قال لينا نقعد اسبوع تاني بس امي رفضت قالت دايره ترجع)
قلتا ليهو:( و الدكاتره قالو حبوبه كويسه?)
عبدالرحمن:( اي الحمدلله.. العمليه بسيطه.. توسيع شريان و خلاص..بس ترتاح و تبعد من التوتر و القلق)
قلتا ليهو:( ديل بسيطين)
بقيت بتونس مع ابوي لحدي م نام...طلعتا خليتو يرتاح...

تاني يوم من جيه ناس ابوي.. اميره نادت ابوي و عمتو امنه حكت ليهم بالعريس الجابو ليها عمو محمد..و انو هي م دايراهو و كده...و دايره مصطفي..

اميره:( حاجبرني علي العريس انا م دايراهو والله...و الله لو اموت م بعرس غير مصطفي)
امنه:( مصطفي كويس شديد انا م عارفه ليه محمد رافصو) عبدالرحمن:( مصطفي ده منو?)
اميره:( متذكر عمو الفاتح? الكانو ساكنين جمبنا هنا و رحلو)
عبدالرحمن:( ايوا بتذكرهم.. الفاتح كان صاحب ابوي شديد بقعدو طوالي مع ابوي ففي االبيت هنا)
امنه:( بس ده ولدو)
عبدالرحمن:( طيب ديل ناس ممتازين جدا...ليه محمد يرفضهم?)
امنه:( والله فوق الممتاز.. و مصطفي جا البيت ميه مره و محمد برفضو)
عبدالرحمن:( م قال ليكم السبب شنو?)
امنه:( محمد م محتاج سبب عشان يرفض بيهو زول)
عبدالرحمن:( صح والله)
اميره:( مصر علي كلامو،، اعمل حاجه ي عبدالرحمن)
عبدالرحمن:( اتطمني.. طول م انا عايش علي وش الدنيا ماف زول بقدر يجبرك علي حاجه م دايراها)
اميره:( محمد م حارضي نقول ليهو لا.. نحلها كيف? )
عبدالرحمن:( بتحلا ان شا۽الله.. م تشيلي هم)
اميره:( مصطفي قال الليله مستعد يجي يتقدم و يتم العرس.. بس محمد يوافق)
عبدالرحمن:( اصبري م يجي اسي لمن محمد يجي يكلمني بموضوع العريس الجابو ده)

فعلا المسا۽ محمد مشي غرفه حبوبه و نادي سميه و امنه و ابوي...

قاعدين انا و زهره و اميره و سلافه و مياده.. و امجد و ايهاب و سامي.. كلنا مقلقين و سامعين نقاشاتهم جوه...اميره متوتره جددددا....

محمد:( انا جمعتكم كلكم عشان جبتا عريس ل اميره.. زول كويس و بعرفو و جاهز مستعد يعرس الليله قبل بكرا.. )
عبدالرحمن:( اميره وافقت?)
محمد:( هو زول كويس و انا بعرفو...)
سميه:( بس اميره م موافقه ي محمد)
محمد:( هي م بتعرفو...ليه ترفضو?)
عبدالرحمن:( و انت مش بتعرف مصطفي? ليه رفضتو?) محمد كشر وشو: ( مصطفي دده م عاجبني خالص... اسي خليكم مع علا۽ ده...رايكم شنو?)
عبدالرحمن:( م موافقين عليهو و اميره ذاتها م موافقه)
محمد:( كيف م توافقو بيهو? انا اديت الزول كلمه)
عبدالرحمن:( تديهو كلمه بدون م تسالنا ليه? و بدون م تسال اميره انها موافقه وله لا ليه?)
محمد زعل و بقي يكورك:( انا بعرف مصلحه اميره اكتر منها...انا شايف علا۽ ده كويس ليها...مصطفي ده لا بنفع معاها لا ااي شي)
عبدالرحمن:( انت بتقرر كده سااي? انو ده بنفع و ده لا?? داير دليل انو علا۽ بنفع معاها و مصطفي لا?)
محمد:( دليل كيف ي عبدالرحمن?)
عبدالرحمن:( خلاص م تقرر ساي.. اميره البتقرر ،، الدايراهو هو البكون بس)
محمد:( اميره م عندها حق تقرر)
عبدالرحمن:( ليه? جاهله وله م بتعرف? بت كبيره فاهمه و واعيه و بتعرف تقرر ااي شي في حياتها)
محمد:( م بتعرف لا اي شي.. انا قررتا خلاص .. حاكلم علا۽ انو احنا موافقين و يجيب اهلو و يجي يتم العرس)
حبوبه:( محمد...انا ساكته من قبيل مستنياك تخلص كلامك... محمد م بتجبر اميره،، اسي انا بنادي اميره بسالها ولو قالت لا... م بتعرس صحبك ده لو انطبقت الدنيا علي الارض.. امشي ي امنه نادي اميره)
جات طالعه امنه...
امنه:( تعالي ي اميره)

اميره قامت مقلقه و بتعاين لينا و دخلت الغرفه...
حبوبه:( تعالي ي اميره...)
اميره مشت علي حبوبه.. قعدت جمبها و خايفه شديد..

حبوبه:( انتي موافقه علي العريس الجابو ليك محمد?)
اميره سكتت و خافت...
حبوبه:( قولي)
اميره:( لا م موافقه)
محمد كشر وشو و الزعل باين عليهو...
محمد:( انتي بتعرفيهو عشان تقولي م دايراهو?)
اميره:( م دايره اعرفو)
محمد:( شايفه بتك بتتكلم معاي كيف? دي نهايه دلعك ليها ي امي)

حبوبه بكل هدؤ۽ :( محمد.. م دايره جوطه انا.. طالعه من عمليه و م متحمله حاجه ...البت م دايراهو م بغصبها عليهو.. قول لصحبك ماف نصيب.. بس)
محمد:( حتقعد كده طول عمرها م حتعرس? هي قايله روحها صغيره? عدت ال30 زماان)
حبوبه:( حتعرس.. لمن ربنا يكتب ليها...و بدون غصب )

محمد قام زعلان و بكورك..
محمد:( انا بقي م عندي كلمه في البيت ده? وجودي و عدمو بقي وااحد??... انا كبير البيت ده...و كلامي اتسمع.. بدون ااي مناقشات)
حبوبه:( اطلعو برا خلوني مع محمد براي)
كلهم جو طالعين.. قعدو جمبنا...
حبوبه:( محمد تعال جمبي هنا)
محمد مشي قعد جمب حبوبه..

حبوبه:( محمد ي ولد

ي.. منو القال ليك الزول الا يغصب الناس و يمشي كلامو حتي لو غلط عشان يبقي راجل البيت و الكبير? محمد صح انت كبير البيت و كلمتك فوق راسنا.. بس ي ولدي بدون غلط او غصب.. اميره اختك و انت المسئول منها بعد ابوك الله يرحمو... شوف ليها الزول الكويس.. بس برضاها م تغصبها علي حاجه... ابقي حنين ذي عبدالرحمن م تبقي قاسي كده)

محمد وقف علي حيلو و بقي يكورك:( ايواا.. بس قولي انت عاجبك عبدالرحمن...و من وقت م هو جا و انا بقيت صفر علي الشمال.. وجودي م ليهو ااي فايده... كنتو بتسمعو كلامي..و كلمتي ماشه ذي السيف في البيت ده..اسي حصل شنو? لقيتو عبدالرحمن اتمردتو علي? لقيتو عبدالرحمن هو البحل ااي شي في البيت و هو السفرك و عالجك و هو اسي حاعرس ل اميره ،،الزول الدايراهو ..و هو الحيعمل ااي شي! !! ..عبدالرحمن ده كان وين وقت انا وابوي تعبانين و شقيانين و بنبني في البيت ده طوبه طوبه.. كان وين وقت عيا ابوي?? كان وين وقت وفاه ابوي? سهر معانا? تعب معانا? ساهر الليالي معانا?? منو الكان ماسك الشغل و البقالات ?? مش انا?? في زول كان بساعدني? في زول تعب معاي? في زول شال الهم معاي? عبد الرحمن كان عايش مرتاح هنا و بالو رايك.. انا الكنت تعبان و شايل الهم.. انا الشايل همكم...عبدالرحمن بكرا بسوق بتو و برجع بلدو.. م حتلقو غيري البتعب و يشيل همكم.. انا ي امي كبير البيت ده.. و انا كلمتي البتمشي.. لو دايرين كلام عبدالرحمن اليمشي كلميني.. قول لي عبدالرحمن البقي كبير البيت و انت م ليك لازمه...انا وقتها م بقول ااي كلمه بسوق اولادي و بمشي من البيت ده)

وطلع من الغرفه زعلان و طلع علي الشارع...

كنا سامعين كلام محمد و حبوبه في الغرفه جوه..
كلنا ساكتين م قادرين نقول كلمه.. حتي حبوبه جوه م قدرت تقول ليهو كلمه...

نتلاقي😊

#عوده_روح
بقلمي: فاطمه السر
-٢١-
الاجوا۽ اتوترت في البيت شديد بعد كلام عمو محمد.. كلهم انسحبو من الصاله.. فضلنا انا و ابوي و اميره بس...
كنا جايطين في روحنا.. م عرفنا عمو محمد صح وله غلط.. صح هو الماسك ااي شي و هو التعب مع جدو في الشغل بس م من حقو يتحكم كده..يقرر مصير اي زول في البيت بدون حتي م ياخد رايو.. صح هو االكبير بس م شرط عشان كبير يبقي كل كلامو و قراراتو صح... حنيت علي عمو محمد.. لانو زعلان شديد.. فهمتا انو هو بغير من ابوي شديد عشان كده بتعامل كده.. فكرتا لو كان عندي اخوان.. كنت ممكن اتعامل معاهم كده? اغير منهم كده??

ايهاب كان متضايق شديد و مقلق علي ابوهو.. كنت بتكلم معاهو بالتلفون..
ايهاب :( انا مقلق علي ابوي شديد)
قلتا ليهو:( لسه م رجع?)
ايهاب:( لا و تلفونو مقفول و امي مقلقه شديد)
قلتا ليهو:( الموضوع بسيط بس هم كبرو الموضوع)
ايهاب:( ابوي م برضي زول يقول ليهو لا او يكسر ليهو كلمه بجن عديييل... وهو شكلو بغير من عمي عشان كده كبر الموضوع كده)
قلتا ليهو:( لو قعدو براحه كده بحلو ااي شي.. صح ابوك فضايلو علي البيت كتيره و هو الماسك الشغل و اي حاجه.. و هو برضو كبير البيت...بس م لدرجه يتحكم كده يتحكم في مصير ااي زول في البيت)
ايهاب:( صح هو بدي روحو حق تقرير مصير ااي زول هنا و دي م حاجه كويسه.. بدي روحو حق التملك في اي شي يخص عائله حسين الطيب)
قلتا ليهو:( انا حاكلم ابوي يراضيهو)
ايهاب:( ان شا۽الله.. ربنا يهديهم)

عمو محمد رجع البيت بس رفض يتكلم مع اي زول.. ابوي حاول يلاقيهو بس رفض.. قال كلامو وااحد،، ي انا ي عبدالرحمن.. بس..

ايهاب شال هم علاقتنا شديد و بقي مقلق.. قال لي ابوي حارفض زواجنا...
انا كمان قلقتا... كنت ناويه احكي لابوي ب ايهاب بس بعد الحصل م قدرتا اكلمو..
اميره حبست روحها في الغرفه و زعلانه..

قاعدين انا و زهره و اميره.. اميره كانت بتبكي...
اميره:( انا السبب في كل الحصل ده)
زهره:( انتي م ليك ذنب .. انتي الضحيه.. كنتي دايره تعملي شنو يعني?)
اميره:( كنت اوافق و امشي كلام محمد بس)
قلتا ليها:( انتي جنيتي? دايره تقتلي روحك? لو لقيتي علاا۽ ده بعدين م كويس? لو طلقتك? حتعملي شنو? محمد بعدين حيفيدك بشنو?)
زهره:( كلام ياسمين صح... العرس م فيهو مجامله)
اميره:( اسي وروني الحل شنو? محمد زعلان و عبدالرحمن كمان...و امي برضو بس م دايره تبين لينا)
قلتا ليها:( بروقو بس انتي اصبري م تعملي كده)..

بقينا علي الحال ده كم يوم..ماف زول قادر يحل حاجه..
يوم بليل ابوي ناداني.. مشيت ليهو غرفتو..
دقيت الباب.. جاني صوتو..
عبدالرحمن:( تعالي ي ياسمين)
دخلتا قعدتا جمبو.. .
عبدالرحمن:( احنا حنرجع مصر.. بكرا الصباح حاحجز علي اول طياره ماشه مصر...و نرجع...تمام?)
اتخلعتا من كلام ابوي.. و قلبي وجعني شديد.. م قدرتا اقول اي حاجه..هزيت راسي ب ( نعم) و خلاص..

طلعتا مشيت غرفتي بقيت ببكي.. كيف نرجع اسي? كيف ارجع و اخلي ايهاب? و الحيحصل شنو? علاقتنا انا و ايهاب حتقيف? م حنعرس? راسي جاط شديييد... كان نفسي اكلم ابوي اقول ليهو لا استني ...نقعد شويه...خلي المواضيع تهدا عشان ايهاب داير يطلبني منك.. بس م قدرتا سكتا م قدرتا اقول حاجه..

دقيت ل زهره.. قلتا ليها تعالي لي سرعه..
زهره جات جاريه..
لقتني ببكي..قعدت جمبي مخلوعه..
زهره:( ياسمين.. في شنو? قولي)
قلتا ليها:( ابوي قال نرجع مصر خلاص)
زهره اتخلعت..
قلتا ليها:( ايهاب م حاقدر يكلم ابوي او عمو محمد في الظروف دي.. علاقتنا خلاص انتهت)
زهره:( عمو ليه قرر كده فجاه?)
قلتا ليها:( م عارفه.. شكلو كان داير يحل المواضيع مع عمو محمد و م قدر ..عشان كده قرر يمشي)
زهره:( اسي نعمل شنو احنا? لازم نكلم ايهاب.. خلي يتصرف)
شالت تلفوني و دقت ل ايهاب...
زهره:( الو...انا زهره ي ايهاب...لالا ماف شي...بس تعال البيت دايراك.. ايوا طوالي..يلا)
و قفلت..
ربع ساعه و ايهاب جا..

نزلنا الحديقه ورا جمب المرسم عشان م يلاحظو لينا..
انا و زهره و ايهاب..
ايهاب:( في شنو? و ليه ياسمين بتبكي?)
زهره:( عمو عبدالرحمن قال حارجعو مصر)
ايهاب اتخلع..
ايهاب:( مصر? اسي? )
زهره:( ااي... لازم تتصرف ي ايهاب)
ابهاب:( اعمل شنو? ابوي م حاتفاهم معاي اسي?)
زهره:( خلاص خليهم يرجعو بدون م تطلبها من ابوها)
ايهاب:( لا طبعا.. م ينفع)
زهره:( خلاص شوف حل ي ايهاب)
قلتا ليهو:( ابوك م حيوافق.. لو زمان كان ممكن يواافق.. بس اسي م حيوافق)
ايهاب:( لا بوافق.. انا بكلمو... اسي هو قاعد?)
زهره:( ايوا.. قاعد في مكتبو)
ايهاب طوالي مشي علي فوق...
قلتا :( ربنا يستر)..
قعدنا انا و زهره مقلقين شديد..

دخل ايهاب ل ابوهو في المكتب..
ايهاب:( ابوي ممكن اتكلم معاك?)
محمد:( ادخل)
دخل قعد..
محمد:( قول)
ايهاب سكت.. م قدر يتكلم..
محمد:( في شنو? اتكلم)
ايهاب:( ي ابوي... انا داير اتزوج)
محمد:( كويس طيب.. منو سعيده الحظ دي?)
ايه

اب سكت..
محمد:( م تتكلم ساكت كده ليه?)
ايهاب:( ياسمين)
محممد اتخلع...
محمد:( ياسمين منو?)
ايهاب:( ياسمين.. بت عمو عبدالرحمن)
محمد كورك:( ياسمين بت المصريه?? انت جنيت ي ولد?? داير تعرس بت المصريه?)
ايهاب:( ي ابوي مصريه شنو...دي بت عمي)
محمد:( انا زمان رفضتا امها...تجي تجيب لي بتها? )
ايهاب:( ي ابوي المشكله شنو?)
محمد:( هوي ي ايهاب.. كلامي ده وااحد ولا داير معاك فيهو نقاش لا كلام كتير....ياسمين لا...بت المصريه لا...فاهم وله لا?? لو فتحتا معاي الموضوع ده تاني.. تشيل حاجاتك و تمشي تقعد في مكان تاني..يلا اطلع برا)

ايهاب وقف مخلوع م قادر يصدق كلام ابوهو...كان خاتي انو ابوهو يرفض بس م لدرجه دي..
ايهاب طلع زعلان و دموعو في عيونو..
دخل غرفتو و قفل الباب.. م قدر يجي نازل لينا تحت..

نتلاقي😊

#عوده_روح
فاطمه السر
-٢٢-
لمن ايهاب اتاخر...دخلنا انا و زهره البيت...انا دخلتا غرفتي و زهره طلعت بيتهم تشوف ايهاب حصل معاهو شنو...

طلعت بيتهم لقت امها و ابوها بتناقشو بصوت عالي في المكتب.. سمعت ابوها بقول..
محمد:( ايهاب يزعل يطرشق م شغال بيهو.. البت دي لا يعني لا..يعزل ااي وحده تانيه.. و انا مستعد مغمض امشي معاهو)
ليلي:( ايهاب غلطان من الاول عارف عندنا راي فيهم... يمشي يوعدها بالعرس ليه? بدون م يسالنا? لو قعد طول عمره بدون عرس.. م بوافق ليهو علي البت دي)

زهره زعلت من الكلام...دخلت علي غرفه ايهاب و دقت الباب.. ايهاب جا فتح و مشي قعد بدون م يقول اي حاجه.. زهره قعدت جمبو...
زهره:( حنعمل شنو?)
ايهاب مدنقر و خاتي يدينو في راسو..
ايهاب:( م عارف والله م عارف)
زهره:( حتخليها تسافر كده?)
ايهاب:( اعمل شنو ي زهره.. شايفه امك و ابوك بقولو شنو)
فجاه جا محمد داخل الغرفه..
ايهاب رفع راسو عاين ليهو..
محمد:( صحي امك لقت يوم معاك البت دي في غرفتك هنا براكم?? )
ايهاب اتخلع..
محمد كورك:( جاوب)
ايهاب:( ااي.. بس ...)
قاطعو محمد...
محمد:( اسمع هنا... لو فتحتا موضوع البت دي تاني لا انت ولدي لا بعرفك.. و تمشي تشوف ليك بيت و شغل تاني بعيد من هنا)
طلع و قفل الباب...
زهره بقت مخلوعه...
زهره:( ده شنو ي ايهاب? انا م فاهمه شي?)
ايهاب قام زعلان ذي المجنون و لقي فاظه كبيره قدامو رماها علي الارض اتكسرت كلها...
زهره صرخت ..
زهره:( ايهاب)
قعد علي الكرسي و ختي يدينو في راسو.. و دموعو نازله..
زهره مشت عليهو...و هي كمان دموعها في عيونها...
زهره:( ايهاب...م تعمل كده...اي شي بتحلا.. انت اهدا بس)
ايهاب:( امي فهمت ابوي الموضوع غلط.. ليه عملت كده? ليه?? )
زهره:( اهدي ي ايهاب.. براحه ااي شي بتحلا)
ايهاب بقي يكورك..
ايهاب:( م بتحلا.. ماف ااي شي بتحلا تاني...خلاص عرسنا انا و ياسمين بقي من المستحيلات)
زهره:( م تقول كده.. وضح ليهم الحصل بس.. م تخلي تفكيرهم يمشي بعيد كده)
ايهاب:( م حافهمو اي شي تاني.. م حافهمو)

جاتني زهره قالت لي امي و ابوي م وافقو... م اتصدمتا كنت متوقعه كده..
سكتا ابيت ابكي مسكتا روحي قدام زهره ..
قلتا ليها:( كنت متوقعه كده)
زهره :( بس ايهاب حالقي حل...اكيد حالقي.. و انا ذاتي حاشوف معاكم حل...و بنلقي ان شاءالله)
قلتا ليها:( ان شاءالله)

زهره مشت... قمتا قفلتا باب الغرفه.. و قعدتا جمب الباب في الارض ببكي..

تاني يوم ابوي طلع يشوف الحجز ...

عمتو اميره و زهره و سلافه قعدو معاي زعلانين علي سفري و علي الحاله الانا مسافره بيها..
اميره:( م تعملي كده ي ياسمين..موضوعكم لسه في الاول.. و حتستسلمي طوالي كده?.. اسي انا و مصطفي لينا اكتر من 8 سنين و لا يوم فقدنا الامل)
قلتا ليها:( ي عمتو...ده عمي..عارفه يعني شنو عمي يرفضني? لو كان غريب م كنت زعلتا..)
سلافه:( ي ياسمين الايام دي اصلا خالو محمد جايط و عارفه كده انتي كويس.. عشان كده حاجه عاديه انو م يوافق.. بس ادو وقت خلو يهدا و ايهاب يتكلم معاهو براحه و بوافق)
زهره:( ابوي اصلا عنيد.. بس لو لقي ايهاب متمسك بيك حيوافق)
مياده:( م حتسافري كده ي ياسمين.. الا تهدي و تضحكي معانا.. مستحيل تسافري مننا زعلانه و بتبكي كده)
قلتا ليهم:( من زمان م بحب العلاقات القبل العرس.. و لا بدخل فيها.. عشان البحصل ده)

بعد شويه قفلو موضوعنا انا و ايهاب.. و بقو بتونسو معاي و بحكو لي و يضحكوني..

ابوي جا قال لي حنسافر الصباح.. قلبي وجعني ذياده..
مشيت ل حبوبه.. قعدتا جمبها بتونس معاها و بتحكي لي.. كنت محتاجه ليها.. نفسي اشتكي ليها يمكن تحل لينا موضوعنا.. بس م قدرتا..
حبوبه:( حنشتاق ليك والله ي ياسمين.. جد اتعودنا عليك.. لازم تجيبنا كل فتره)
قلتا ليها:( اكيد ي حبوبه حاجيكم...و انا والله اتعودتا عليكم شديد و م نفسي امشي و اخليكم.. بس ابوي هناك براهو م بقدر اخليهو)
حبوبه:( انا كلمتو ينقل شغلو كلو هنا و يجي يستقر معانا كفاهو غربه)
قلتا ليها:( ان شاءالله والله)

مشيت حضرتا شنطي و شنطه ابوي.. ابوي كان مافيش.. م فكرتا اضرب لايهاب ولا هو ضرب لي..

قعدو معاي زهره و سلافه و مياده لحدي بليل.. حضرو معاي حاجاتي.. و جابو لي هدايا.. لي و لي خالاتي قالو لي م ممكن ترجعي ليهم فاضيه.. جد انبسطا منهم ... لاني كنت ناسيه موضوع هدايا خالاتي ديل..

كنت مستغربه من ايهاب.. ليه م جا? ليه م اتكلم معاي? ليه م طمني? ليه م خفف علي الانا فيهو?? ...
رقدتا دايره انوم.. دقي لي ايهاب..
رديت:( الو)
جاني صوتو بيكي:( ياسمين)
قلتا ليهو:( ايوا.. مالك?)
ايهاب:( ياسمين م تسافري.. عليك الله م تسافري)
دموعي نزلت..
قلتا ليهو:( م بقدر.. اقعد عشان شنو? ماف شي بقعدني هنا تاني)
ايهاب:( و انا ي ياسمين? انا اعمل شنو? اعيش كيف بدونك..)
قلتا ليهو:( ربنا بحلها ان شاءالله)
ايهاب:( ان شاءالله،، تعالي نازله انا جمب غرفه المرسم)
قلتا ليهو:( حاضر)

نزلتا..
لق

يتو قاعد علي الارض في النجيله و دموعو نازله..
قلتا ليهو:( ايهاب.. م تضعف.. مفروض تبقي اقوي من كده)
قعدتا جمبو.. مديت يدي مسكتا يدو..
قلتا ليهو:( ايهاب.. اسمع كلامي ده.. ايهاب اسمع كلام ابوك م تكسر كلامو.. لو ربنا كاتب لينا نصيب.. بنعرس.. لو لا م حنعرس.. خلي موضوعنا كلو بيد ربنا.. انا م زعلانه.. بلعكس.. مبسوطه انو اول زول يدق ليهو قلبي ده انت.. اول زول احبو انت..انت ايهاب محمد حسين الطيب... جد مبسوطه اني قضيت معاك. احلا ايام عمري.. ايام عمري مم حانساها.. جد كفايا علي الذكري دي تخليني اعيش مبسوطه طووول عمري..
ابوك م ناقص تعب .. كفايا عليهو موضوع اميره.. م تجي انت كمان تتعبو تاني...شايفو براك عمل شنو.. اتفقنا? )
ايهاب:( لا م اتفقنا.. م بتفق علي حاجه ذي دي.. حاحارب الدنيا كلها عشان.. و حاكسر كلام ابوي ..و حاجي مصر و نعرس و اقعد هناك)
قلتا ليهو:( تاني? حتعيد نفس العملو ابوي زمان? حتعمل ذي م عمل? حتندم ي ايهاب.. ماف زول بقدر يعيش بدون اهلو.. ماف زول بقدر يعيش بدون امو و ابوهو و اخوانو.. اسال ابوي عاني كيف بدونهم.. و اسي ابوي بدفع التمن..جا راجع بس م لقي مكانه بينكم.. اوعي تغلط غلط ابوي .. اوعي تعمل ذي م عمل.. وريتك.. لو ربنا كاتب لينا نصيب بنبقي لبعض)
ايهاب:( م بتنازل عنك.. م بندم.. دايرك انتي بس.. و م داير اي شي تاني.. م داير شي تاني والله)
مديت يدي مسحتا ليهو دموعو..
قلتا ليهو:( ايهاب خليك قوي.. و بالتفاهم اي شي بتحلا.. اصبر.. يمكن ابوك و امك يوافقو م معروف.. اتفقنا? يلا انا ماشه انوم بكرا صاحين بدري)
دايره اقوم مسكني من يدي..
ايهاب:( استني)
مدا يدو في جيبو طلع علبه.. فتحا.. طلع منها سلسل دهب مكتوب فيهو اسمي بالانجليزي( yasmeen)
ايهاب:( داير البسك ده)
دموعي نزلت.. مدا يدينو لبسني ليهو..
قلتا ليهو:( حلو شديد.. اجنن م حاطلعو خالص )
ايهاب:( خليك لابساهو لمن ربنا يجمعنا تاني.. دقيقه)

و قام دخل المرسم.. جاب لوحه مداها لي.. عاينتا ليها لقيتها رسمتي الرسمها.. مشي عمل ليها برواز زجاج..
ايهاب:( بروزتها عشان م تحصل ليها حاجه)
ابتسمتا.. مديت يدي مسكتا يدو حبيت عليها..
قلتا ليهو:( ربنا يخليك لي ي ايهاب... يلا تصبح علي خير)

و مشيت سرعه من جمبو بقيت ببكي انا و ماشه.. مسكتا روحي شديد قدامو.. م عارفه جبتا القوه دي من وين و قلتا ليهو الكلام ده.. كنت خايفه م اقدر اقولو ،، خايفه م اقوي قدامو.. بس الحمدلله قويت و قلتا كل الدايره اقولو...
كنت خايفه اشيل ذنبو.. ذي م امي زمان كانت حاسه بالذنب ببعد ابوي من اهلو...

نتلاقي😊

#عوده_روح
بقلمي: فاطمه السر
-٢٣-
دخلتا غرفتي قفلتا الباب و بقيت ببكي بحرقه.. فصلتا كده لحدي قريب الصبح.. نمتا شويه و ابوي جا صحاني..

قمتا جهزتا و نزلتا شربتا الشاي في الصاله تحت مع عماتي و حبوبه.. كنت قدامهم عامله مبسوطه و كانو ماف شي.. م عارفه عماتي عارفين وله لا.. بس حبوبه م عارفه حاجه..
ابوي جا نازل سال من سامي..
سلافه:( فوق بجهز حاجيكم)
ابوي ققعد..
عبدالرحمن:( اميره.. دايرك تسمعي كلام اخوك...م شرط تعرسي الزول الجابو ليك.. بس م تكسري كلامو.. محمد بحبك و عارف مصلحتك)
اميره هزت راسها ب نعم و سكتت.. حسيتها دايره تبكي..

سامي جا و قمنا ودعناهم...جد قلبي وجعني شديد و انا بودع فيهم م عارفه حاشوفهم تاني وله لا.. بقيت ببكي و كلهم بكو حتي ابوي.. وصيت زهره و مياده علي ايهاب ...ايهاب كان مافيش.. حتي عمي و ليلي و مياده م شفناهم..

طلعنا ماشين علي المطار..قلبي كان بتقطع.. كل م نبعد من البيت.. حسيت روحي جواهو.. دايره ارجع...م دايره امشي ولا ابعد منو..

وصلنا المطار..بننزل في الشنط.. جا ايهاب.. سلم علينا.. شكلو م نام خالص ..كان شكلو تعبان شديد.. وقفتا بتكلم مع سامي.. وصيتو علي ايهاب..
قلتا ليهو:( خايفه عليهو شديد)
سامي:( م تخافي.. ببقي كويس.. و بحل اي حاجه.. بس انتو م تفقدو الامل)
قلتا ليهو:( ماف امل.. م تخلي يكسر كلام ابوهو...م تخليهو يغلط غلطه ابوي)
سامي:( لازم يدافع علي حبكم)
قلتا ليهو:( يدافع.. بس بالصح م بالغلط)
بقينا نتناقش انا و سامي..
و ابوي و ايهاب واقفين بعيد مننا بتكلمو.. م عارفاهم بتكلمو في شنو..
ابوي:(يلا ي ياسمين)
سلمتا علي سامي..
مشيت اسلم علي ايهاب...قلبي وجعني شديد م قدرتا اقول ليهو ااي حاجه..
ايهاب:( خلي بالك من نفسك،،، تصلو بالسلامه...بتصل عليك اول من تصلو)
هزيت راسي.. و دموعي في عيوني و مشيت سرعه لحقتا ابوي الكان اتقدم قدامي..

خلصنا الاجرا۽ات و طلعنا الطياره...ابوي كان اغلب الوقت ساكت.. م بتكلم.. الا للضروره.. شكلو زعلان شديد..

وصلنا مصر.. دخلتا البيت حسيتو غريب علي.. اتعودتا علي بيتنا في السودان.. ختينا حاجاتنا و شغلتا شريحه مصر دقيت لخالاتي..
قلتا ليهم:( وصلنا)
قالو لي:( بنجيب الغدا و نجي)
ايهاب دقي لي... اتطمن علي و كده وقفل طوالي..

جو خالاتي و بناتهم.. سلمو علينا بشوق...قعدنا نتونس و اكلنا.. بس خالاتي حسو في حاجه انا و ابوي م طبيعيين.. ابوي مشي ينوم.. فضلتا انا معاهم..

خالتو سهي:( انتي و ابوك مش طبيعيين ي ياسمين.. في حاجه?)
قلتا ليها:( مفيش بس تعبانين من السفر و الايام الفاتت كنا جايطين م ارتحنا)
تسنيم:( مش مصددقاك.. في حاجه.. قولي)
قلتا ليهم:( مفيش)
سهي:( السودان كيف? انبسطي?)
قلتا ليهم:( ايوا كتير.. جد حلو.. و اهل ابوي حبوني كتير) سهي:( الحمدلله طيب)
قلتا ليهم:(يلا احكو لي.. حصل شنو في غيابنا)
بقو يحكو لي الحصل كلو..

الحصل في السودان بعد سفرنا حكتو لي زهره بالتفاصبل...

قاعدين زهره و اميره و عمتو سميه و سلافه في الصاله..
زهره:( يحليلا ياسمين.. خلت البيت مسيخ)
سميه:( اي والله.. كانت بتقعد معاي الصباح و نتونس و تعمل معاي الاكل)
اميره:( والله جد اتعودتا عليها.. ربنا يرجعهم لينا تاني)
سلافه:( امين ي رب.. والله هي و عبدالرحمن مفروض يقعدو هنا م يقعدو هناك براهم كده)
زهره:( في خالاتها م براهم)
سميه:( برضو م ذينا.. ديلك عايشين بعيد منهم.. بس هنا هم معانا في بيت واحد)
امنه:( ربنا يهدي محمد.. عبدالرحمن طلع من هنا زعلان شديد جد وجع لي قلبي.. محمد م كان يقول كده .. عبدالرحمن ضحي هو و مشي)
سميه: ( صح.. من سمع كلام محمد اتضايق شديد و حاول اتكلم معاهو بس محمد رفض.. كده اتضايق اكتر)

ليلي و مياده.. الوحيدين كانو مبسوطين ب مشيتنا.. محمد كان متضايق م عارفه من شنو..

خالاتي قعدو معاي لحدي بليل و مشو.. و ابوي نايم م صحي.. قعدتا براي حسيت بالوحده شديد..افتقدتا زهره و اميره و الونسه و القعده في الحديقه..

مشيت انوم م قدرتا بقيت بفكر في ايهاب و الحاصل.. في الاخر نمتا بدون م احس..
ابوي صحاني الصباح نزلنا الشغل طوالي.. كان في شغل متاخر كتييير...

رسلت لي زهره و دخلتني قروب فيهو كلللهم.. حتي عماتي.. سلمتا عليهم و كده..

ايهاب كان مقضي يومو كلووو في الشغل بدخل البيت للنوم بس.. و بدخل متاخر بلاقي الناس كلها نامت.. ينوم و بصحي اول واحد و بمشي الشغل لا بياكل لا بشرب لا بتكلم مع زول في البيت ...

نتلاقي😊

#عوده_روح
بقلمي: فاطمه السر
-٢٤-
مرت الايام بطيئه و مسييخه.. بدون ااي طعم.. ايهاب بضرب لي بليل بتطمن علي.. دقيقه دقيقتين و بقفل بس.. بدون م يقول ااي حاجه.. بقيت مقلقه..
و بسال في نفسي:( خلاص استسلم? ليه م بجيب سيره موضوعنا? ليه م قال لي كلمتا ابوي او حاكلمو او ااي شي?? ) الحاجه دي كانت مضايقاني شديد..

كنت بتفرج في الفيس.. لقيت سامي عامل صفحه فيها اغاني بتاعتو و كده.. دخلتا لقيت كميه ناس معجبين بيهو و بصوتو...و هو منزل اغاني بصوتو و صورو و كده.. جد انبسطا ليهو...

ايهاب ادي ابوهو فرصه يفكر و يرجع في قرارو..
ايهاب مشي لابوهو في غرفتو.. الكلام ده بعد 10 يوم من سفرنا..
ايهاب:( ي ابوي داير اتكلم معاك)
محمد:( قول)
ايهاب مشي قعد جمب ابوهو..
ايهاب:( ي ابوي.. ممكن نتكلم براحه و بدون ااي جوطه )
محمد:( لو موضوع عرسك ده انساهو)
ايهاب:( ي ابوي ممكن توريني اسباب رفضك شنو?)
محمد:( م بتنفع معاي.. م حبيتها...م دايرها ليك... بتستاهل ست ستها)
ايهاب:( ي ابوي ياسمين كويسه و انت عارف كده كويس.. انت بس ماخد موقف من زمان اتجاه عمي و مرتو و بتو.. ي ابوي انا بحبها و عايزها..)
محمد:( ايهاب.. اعزل ااي وحده و انا موافق عليها.. الا البت دي)
ايهاب:( و انا م داير غير دي)
محمد:( و دي انا م موافق بيها...ايهاب كلام كتير م داير معاك.. م داير تعرس.. اقعد كده طول عمرك بدون عرس ذي عمتك اميره)
ايهاب:( ي ابوي.. انا بحبك و بحترمك و انت كبير البيت و كبيرنا.. و ربنا يخليك لينا...بس ي ابوي م تحطمنا كده.. م تحرمنا من الحاجه الدايرنها.. انا و اميره سعادتنا متوقفه علي زول معين و انت حارمنا منها.. انت خت نفسك مكانا.. لو كنت بتحب وحده وعايزا و ابوك حرمك منها بدون ااي سبب مقنع حترضي?)
محمد:( ايوا حارضي و اسمع كلامو)
ايهاب:(راجع نفسك.. عشان م تخسرني)
محمد:( اخسرك? انت بتهددني?)
ايهاب وقف علي حيلو:( ي ابوي انا راجل كبير و واعي و بعرف اختار.. و اخترتا ياسمين)
محمد وقف:( و انا قلتا لا ي ايهاب)
ايهاب:( خلاص م تزعل مني )
و مشي طلع..

دخل غرفتو شال شنطه بقي يخت هدومو في الشنطه...
جات زهره شافتو اتخلعت..
زهره:( بتعمل في شنو ي ايهاب)
ايهاب:( ماشي.. م داير اقعد في البيت ده)
زهره:( ايهاب مش متفقين حنتكلم براحه?)
ايهاب:( ابوك جربتا معاهو كل الطرق.. م نفع.. و انا م حارجع البيت ده الا لمن يوافق علي ياسمين)
جات ليلي سمعت كلامو..
ليلي:( ايهاب.. انت جنيت.. داير تسيب البيت عشان وحده ذي دي?)
ايهاب:( ايوا حاسييب البيت عشان وحده ذي دي)
ليلي:( البت دي عامله ليك حاجه.. انت اصلا م طبيعي)
ايهاب:( ي امي.. انا كبير و واعي و بعرف اختار.. و اخترتا دي بس.. م تخلوني اعمل ذي عمي زمان...و امشي اعرسها و اقعد هناك و م تشوفوني تاني)
ليلي:( كدي بس تعمل حاجه ذي دي...شوف لو م وصلتك هنا و شوف حاعمل فيك شنو)

ايهاب شال شنطتو و طلع و زهره و ليلي بوراهو بتكلمو معاهو.. بس كان مصر علي قرارو.. ركب عربيتو و مشي...
ليلي:( الله يجازيك ي ياسمين.. انتي سبب كل الحاصل لينا ده)
زهره:( ي امي.. م تدعي علي البت.. البت م ذنبها حاجه)
ليلي:( دي ذي الشيطان الدخل بينا ... الله يجازيك ي ياسمين)

ايهاب مشي قعد في شقه براهو.. و بقي م بمشي الشغل بس قاعد في الشقه.. و ماف زول عارف مكانو الا امجد و سامي..

محمد جا داخل لقي ليلي و زهره قاعدين..
محمد:( شايفه ولدك ي ليلي? م قعد يجي الشغل.. و الشغل واقف بسببو.. )
زهره:( امشي صالحو عشان يجي)
محمد:( م يجي.. ولا دايرو يمسك لي اي شغل.. هو قايل نفسو بمسكني من يدي البتوجعني? ولا فارق معاي.. خلي القي شغل تاني ياكل منو او يقعد بدون شغل طول عمره)
دخل الغرفه زعلان..
زهره: ( ي امي.. ياخ اتكلمي مع ابوي .. خليهو يوافق ل ايهاب عشان يرجع البيت)
ليلي:( ايهاب م بجبرنا.. و م بننجبر ليهو.. م بعرس البت دي الا علي جثتي)
و قامت دخلت غرفتها...
زهره:( ربنا يهديكم)

ايهاب قاعد في شقتو.. و فاتح تلفونو و بتفرج في صوري.. ايهاب:( اشتقت ليك حبيبتي.. م قادر بدونك والله ي ياسمين..الحياه بدونك صعبه،،، الشهرين القعدتيهم معانا ديل.. غيرو لي حياتي كلها.. حاسي اني بعرفك من سنييين.. اتعودتا عليك شديد،، اسي انا خجلان منك والله..م قادر اتكلم معاك.. حاسي اني خزلتك و م قدرتا اعمل شي.. مفروض م كان اخليك تطلعي من السودان.. كنت اقيف قدام ابوي و قدام الناس كلها و اقول انا دايرك.. بس ضعفتا م قدرتا.. م عارف اسي انا اعمل شنو.. جد محتار شديد)

امجد و سامي بجو لايهاب كل يوم بليل بحاولو يونسوهو و يطلعوهو من جو الحزن العايش فيهو..

انا حياتي كلها بقت شغل بس.. بحاول اشغل روحي عشان م افكر فيهو.. بس م قدرتا .. اول من ارقد عايزه انوم بفكر فيهو لمن النوم يطير مني.. بخت الارنب الجابو لي و صورتي الرسمها و اي حاجه جابا لي اختها قدامي و بعاين فيها بشوف فيها ايهاب،، بقيت م بنوم الا قريب الصبح.. بنوم ساعتين و

اقوم امشي الشغل.. نومي و اكلي قلو شديييد حتي ابوي لاحظ لي.. بس قلتا ليهو معدتي واجعاني م قادره اكل.. كان نفسي احكي لابوي بس م دايراهو يزعل ذياده كفايا زعلو من عمو محمد.. كمان يعرف انو رفض انو انا و ايهاب نعرس ..حازعل شديد..

ايهاب م جاب لي سيره انو خلي البيت و كده.. زهره الحكت لي.. كانت بتديني الاخبار اول باول.. فرحتا من جواي انو ايهاب عمل خطوه و كده.. بس برضو قلقتا من الممكن يحصل ل قدام..

سامي كان مواظب علي الغناء في المطعم.. و الناس بدو يعرفوهو.. و الناس مخصوص بقو يجو المطعم عشان يسمعوهو.. بقي عندو جمهور.. وبالذات عشان منزل اغاني بصوتو في صفحتو كده خلت الناس كلها تعوفو.. و الطلبات بقت تجيهو للحفلات و كده.. بس هو برفض قال م بغني في حفلات..

يوم قاعدين سامي و سلافه في بيتهم فوق.. و امنه في المطبخ.. سمعو صوت محمد بكورك في السلم..
محمد:( سامي...سامي)
سامي و سلافه اتخلعو ماشين علي الباب جا داخل محمد زعلان شديد...و بكورك...
محمد:( سامي...انا مش حزرتك من الغناء ده?)
سامي و سلافه اتخلعو.. و امنه جات من المطبخ...
امنه:( في شنو ي محمد?)
محمد:( انا مش حزرتا ولدك ده ميه مرا من الغناء و الكلام الفاضي ده?? )
امنه:( ايوا...و حصل شنو?)
محمد:( الحصل انو ولدك بغني في المطاعم.. صح ولا غلط ي سامي?)
سامي:( ي خالي.. الحاجه دي موهبه بس.. انا م بشتغل عشان القروش)
محمد:( انا م قلتا قروش وله غيرو..بس حزرتك..م تغني ي سامي.. م بتسمع الكلام ليه? كلكم بقيتو م بتسمعو الكلام? اسمع هنا... و خليك شاهده ي امنه...ولدك ده لو تاني غني م يلوم الا نفسو)
و طلع مشي...

سامي قعد زعلان في الكرسي...و امنه و سلافه بعاينو لبعض سااي بدون م يقولو حاجه..

نتلاقي😊

#عوده_روح
فاطمه السر
-٢٥-
ابوي شويه شويه حالتو اتصلحت ،، كنت جد شايله همو،، خايفه الزعل الفيهو ده م يروح ،، لمن لقيتو بقي كويس فرحتا و نسيت الزعل الكنت فيهو ،،

يوم قاعدين انا و ابوي بنحضر في التليفزيون.. ابوي قاعد و انا راقده في رجلينو و ابوي بلعب لي في شعري( طبعا دي قعدتي المفضله مع ابوي)
كنت سرحانه بفكر في ايهاب.. و ابوي مندمج مع الاخبار ،، ابوي ركز لي انتي سرحانه.. مسك الريموت خفض صوت الاخبار ،،
عبدالرحمن:( لدرجه دي بتحبيهو?)
اتخلعتا.. قمتا عاينتا ليهو..
عبدالرحمن بابتسامه:( مالك مخلوعه?)
سكتا..تاني سالتو..
قلتا ليهو:( انت عارف?)
عبدالرحمن:( طبعا)
قلتا ليهو:( من وين?)
عبدالرحمن:( انا من رجعتا من الاردن حسيت في حاجه فيك.. بس م كنت متاكد.. و يوم مسافرين.. ايهاب كلمني في المطار..)
قلتا ليهو:( قال ليك شنو?)
عبدالرحمن:( قال لي انو انتو دايرين بعض..و هو كلم ابوهو بس رفض.. عشان الجوطه الكانت حاصله بس هو حاحاول معاهو و اكيد حاقبل )

فرحتا من قلبي انو ايهاب كلم ابوي.. معناها لسه متمسك بي..
قلتا ليهو:( و انت قلتا ليهو شنو?)
عبدالرحمن:( قلتا ليهو م بلقي احسن منك ل بتي.. بس خلي ابوك يرضي.. م تعمل حاجه بدون رضاهو)
سكتا..
عبدالرحمن:( م تخافي.. ان شاءالله الامور بتتصلح.. و ايهاب حيوفي بوعدو ليك.. اتطمني)
ابتسمتا لابوي.. و سكتا...
جد ارتحتا بكلام ابوي..

محمد بقي جايط في الشغل شديد م قادر يحصل الشغل.. ايهاب هو الكان ماسك ااي شي.. محمد م بعرف ااي شي عن الشغل في الفتره الاخيره.. بسبب شغل الاسبيرات الشغالو...وقف شغل الاسبيرات.. و بقي ماسك شغلو حق البقالات.. و بقعد في الشغل لحدي الساعه 10 بليل..

يوم مشي استلم بضاعه كتيره و ختاها في المخزن الكبير بضاعه تكفي المحلات لكم شهر ل قدام.. محمد كان مبسوط انو قدر استلم البضاعه دي كلها اسي.. و انو حارتاح شويه من تفتيش البضاعه...كان فيها حاجات نادره م بتتلقي بسهوله..

سامي كلم ناس المطعم انو حاوقف غني شويه الفتره الجايه لاسباب خاصه.. مدير المطعم سالو ليه و لو القروش بنذيد ليك و كده.. بس رفض قال ليهو فتره و برجع تاني...الناس افتقدوهو و بقو يسالو عنو.. و العروض لسه بتجيهو بس برفض ااي حاجه.. كان زعلان انو وقف غناء بس م بقدر يكسر كلام خالو و امو... امنه ذاتها وقفت مع اخوها و قالت ليهو توقف غناء...

محمد م فتح موضوع العريس تاني ل زهره.. و زهره لسه متمسكه ب مصطفي.. و مصطفي مصر يجي البيت تاني و كان داير يلاقي عبدالرحمن قبل م يسافر و يطلب زهره منو بس زهره رفضت قالت ليهو م وقتو اسي.. استني لمن الامور تهدا شويه..

حبوبه حالتا اتحسن كتير بس كانت فاقدانا انا و ابوي شديد كل يوم بتضرب لينا او نضرب ليها نسلم عليها..

محمد بقي م بجي البيت تحت.. حتي يوم الجمعه م بجي اتغدا معاهم.. مرتو و عيالو بس البجو...

حبوبه افتقدت ايهاب و سالت منو قالو ليها سافر شغل و كده..قالت كيف م يجي يسلم علي و يقول لي مسافر..

صحي محمد بتلفون الساعه 3 صباحا.. ردا..
محمد :( الو)
الصوت:( الحق ي ريس.. المخزن الكبير بتحرق)
محمد بخلعه:( شنوو?? )
و جدع التلفون و قام..
ليلي صحت..
ليلي:( في شنو ي محمد?)
محمد و هو بغير ..
محمد: ( المخزن الكبير حرق)
ليلي بقت تصرخ..
ليلي:(لا حول لله ي ربي لا حول لله ...جيب العواقب سليمه ي رب)
امجد و زهره جو جارين بصراخ امهم..
امجد:( في شنو?)
ليلي:( امشي ممع ابوك.. المخزن الكبير حرق)
امجد و محمد طلعو جري علي المخزن...محمد كان خايف شديد و جسمو كلو برجف..

اول من وصلو ..و شافو النار و المطافي و الناس و البوليس.. محمد م قدر يتحمل المنظر و وقع علي الارض،،
امجد جرا علي ابوهو و بقي يكورك...
امجد:( ابوي .. ابوي)

في البيت هناك نزلو زهره و ليلي لبيت تحت..
زهره:( حبوبه.. اميره.. )
طلعت اميره و سميه و امنه و حبوبه و كلهم..
اميره:( في شنو?? )
ليلي:( المخزن الكبير اتحرق و محمد وقع ودوهو المستشفي)

حبوبه:( لااله الا الله.. لا اله الا الله)
سميه:( استر ي رب) امنه بقت تكورك ل سامي..
امنه:( سامي.. ي سامي)
زهره و ليلي كانو منهارين..
زهره:( ابوي وقع م اتحمل)
ليلي:( ربنا استر.. ربنا استر.. ربنا يجيب العواقب سلميه ي رب )

ركبو كلهم و جرو علي المستشفي.. دخلو لقو امجد و كم زول معارف محمد واقفين مع امجد..
ليلي جاريه علي امجد:( ابوك كيف?)
امجد:( في الغرفه جوه لسه م قالو حاجه)
قعدو كلهم ببكو و خايفين..
جا ايهاب جاري..
ايهاب:( ابوي مالو ي امجد،، الحصل شنو?)
امجد:( المخزن الكبير اتحرق كلو.. و ابوك م اتحمل )
ايهاب:( لا حول ولا قوه الا بالله... سترك ي رب)
حبوبه كانت خايفه شديد و بتبكي..
حبوبه:( اضربو لي ل عبدالرحمن.. اضربو ليهو اسي)
اميره:( خلي عبدالرحمن ي امي.. م تقلقي بيهو ساي هو بعيد)
حبوبه:( اضربي ليهو ي اميره بس)

اميره ضربت ل ابوي ...
كنتا نايمه..
صحيت بصوت ابوي بتكلم..
عاينتا