عدت الايام والبت بتجي تديني مراجعه للرقيص لحدي قبل اسبوع من العرس..والايام ديك قسورة متواصل معاي لمن عامل لي صداع( صحي الرجال تفكيرهم واحد) وشي غزل وشي كلام حلو شبعني رومانسيه الحرمني منها الفترة الفاتت كلها بس طول الفترة دي ماحصل قال لي بحبك ..وانا براي قلت ما الا تتقال بتحس بالتصرفات..
وماشاء الله لمه بيتنا شي ريحه وشي خبايز وناس البلد جو وبيتنا عمراااان وانا معاي البت بتعرك لي في جسمي ..والدخان ياحلاة نورتو ..وشي دلوكه وشي زغاريد ..والتجهيزات هناك علي سن ورمح عند قسورة وامي عملت هديه معتبرة وودوها ليهم كم مرة من اهلي..
والايام قربت وشالو لي جسمي ..وجهزو لي فساتين الرقيص ..والليله حنتي البت رسمت لي رسمه علي زوق قسورة والحنه طلعت دمااااار..
واتخيلو بكرة عرسي ..وانا نايمه في الاحلام الورديه وبحلم بي يوم بكرة عامل كيف وياسلااام ياطلعه الصبح...
والليله عرسي...
(والمكتوب علي الجبين لازم تشوفو العين)
نلتقي...

#رضيت_بقدري فكان هو...
بقلم الاء محمد الحسن ابوشمال...
-16-
صحيت من الصباح وكل طاقه ونشاط دخلت لقيت بنات اهلي ومعاهم مرت عمي ببخرو لي في الشنطه اول ماجيت داخله زغرتووو لي ..
مرت عمي..اها يانور ماشه شهر العسل وين عشان نرتب ليك علي حسب..
نور..ماعارفه والله ياخالتو ماكلمني عديل..
مرت عمي ضحكت ..كويس لو مفاجاه خلاص ماحنخت ليك تياب..مرت عمي مفتحه ومره مجيهه ..
قلت ليهم كويس اعملو الشايفنو..
شاغلتني وحدة تانيه..الليله عاد شبعانه نفسيااات..
نور..ههههه اي نفسيات شدييييدة..مشيت استحميت وغيرت هدومي طلعت لقيت سلام داقه علي رجعت ليها..
سلام..يانور اتسلي انتي لي اسي بتعملي في شنو حايمه في بيتكم..
نور..اي لبست خلاص جاياك اها البرنامج شنو...
سلام..انا اجرت لي شقه مفروشه يوم عشان نكون بعيدين وبي مزاجنا..قثاء حتجينا هناك بعد تخلص عزومتا..واسمعي الفال انا كلمت البت تجهزو ليك حيتوزع بعد الرقيص..
نور..طيب طيب كدي خليني اجيك ..
سلام..اصلا انا موقفه العربيه منتظراك اطلعي..
طلعت ولبست نقابي ومشينا..سلام كانت مأجرة شقه في الرياض لذيذة عشان الاوت دور كان في روتانا والصاله قريبه..
وصلنا الشقه وسلام عملت لي كم ماسك لي وشي وشالت لي وشي وحواجبي ولبست العدسات من بدري لاني خفت تعمل لي شي..وبقينا وانا وسلام ونسه كلها قله ادب نظام بتنصح فيني..قليله ادب خلاص...
اتصلت علي نهي بت عمي قريب الضهر كدة واسمع ليك الدلوكه والربه وبرنامج رهيييب...
المهم لحدي اللحظه ديك قسورة ما اتصلت علي سلام قالت لي خلاص نبدأ..وفعلا بدينا والجو رايق انا لمن قربت انوم وهي بتمكيج فيني انا كنت واثقه من سلام خااااالص ومتأكدة انها حتخليني احلي عروس...لحدي قريب ساعه ونص سلام شغاله في وشي وعملت لي تسريحه بسيطه ولبستني الزفاف وقفلتو لي كويس والزفاف فيهو اكمام تلاته ارباع مقفل كويس والطرحه عملتها لي مغربيه بي فوق التسريحه ويادوب شفت نفسي اقسم بالله لمن حبيت روحي طلعت احلي مما انا عايزة ..وسلام اتمكيجت ولبست وبقينا منتظرين قثاء قريب نص ساعه جاتنا لابسه وكانت ممكيجه جاهزة..وقالت لي سلام خفت ااخركم ..سلام قالت ليها يغسي عليك انا منتظراك من قبيل ..
المهم باركت لي وحصنتني وقسورة جا طالع وراها والله انا لمن شفتو لمن حصنتو في نفسي..مسكني سلم علي في يدي وفي راسي..وقال لي مبروك علي انتي يا أحلي عروس في الدنيا..وتشغيلات سلام وقثاء تعجبكم..
نزلنا وسلام سلمت الشقه طلعا ركبنا برانا في العربيه وقسورة سايق براهو انا استغربت ..
قال بس عايزاك تكوني مرتاحه ماف زول بسوقنا انا بسوق براي..
لحدي ماوصلنا السلام روتانا..وواتصورنا للاوت دور وتاني صلحت مكياجي..
وركبنا ماشين علي الصاله فجاه قسورة جاتو رساله في تلفونو لانو سايق ماشافها..ولا اظنو ركز معاها..
وصلنا الصاله وكان في تنظيم خرااافي ..وانا اظن اول وحدة اتزفت بي زفه فيها اسمها واسم راجلا دخلنا والعيون كلها واسم حافظ ورقصنا اسلووو وطبعا قسورة ماف اي خجل وانا عيوني مارفعتها..وقلبي عايز يقيف..وهو يقرب مني ويعمل في حركات وشويه شغلو اغنيه رابه كدة واصحابو قامو يرقصو وهو برقص معاهم وانا عيوني عليهو ..وقعدت في الكوشه واهلي باركو لي والحفله كااانت جميله شديد ..
وانا هججت مع بنات اهلي وناسي شويه والتنظيم ادي اشارة للشباب يطلعو برة عشان الرقيص وحيدخلو للجرتق.. انا مشيت غيرت هدومي ولبستي فستاني الاول وجاني قسورة وطلعنا..
وقفت في نص المسرح والدلوكه واول كلام قالا الفنانه..اسم الله والحااافظ الله ماااشاء الله وياعين قهرك الله..والفنانه اشتغلت توبك فنان شالو التوب العجب الفستان ..وانا برقص مرتاحه وقسورة واقف زي الطيرة مافاهم..وشويه كدة وانا بقع فيهو وهو بحاول يمسكني عشان ما اقع في الواطه وهو منظرو بقي تافه خلاص لمن النسوان لاحظو وهو خجل ..والفستان تاني جاني داخل.. .
قسورة بعاين لي بي طرف عينو ..قمت اتكلمت..يلا الفاصل بدا ياقسورة..
قسورة..ماماشي معاك عايز تهبلي بي تاني قدام النسوان ..
نور..هههههه انت امسك نفسك..
قسورة..انا تاني حاوصلك بس وبطلع ..وكان عايزة تقعي فيني والله اخليك تقعي في الواطه...
نور...ههههههههه ماجادي اقسم بالله ضحكتني ضحك..
سمعت صوت الفنانه بدت...رمزة يارمزة الله يارمزة..طلعنا وقسورة وصلني وطوالي نزل من المسرح.. انا كملت الرقيص وفتحو الباب للرجال دخلو للجرتق..واتجرتقنا وانا حلات مابقيت تعبانه لمن عيوني ماقادرة افتحها..عرسي كان من اجمل الايام في حياتي..
دخلت غرفه الغيار جاني قسورة قال لي طيارتنا الساعه ٣ ونص من هنا يادوب نحصل البسي بنطلون وتونك عشان تكوني مرتاحه..
نور..قسورة ماشين وين نحن..
قسورة..مفاااجاه بس ..
فتحت شنطتي فعلا لقيت سلام ختت لي تونك وبنطلون عرفتها متفقه معاهو ..لبست وودعت امي ومرتضي اخوي والله بكيت من قلبي..وركبنا العربيه وعلي المطار علي طول ..

ونحن في غرفه الانتظار قسورة فتح تلفونو وفجاه وشو قلب الوان ..وحسيت بيهو جاط سالتو ما اداني اجابه مقنعه ..
وفجاه اتزكرت الرساله القبيل..وماكنت عارفه انو الرساله دي حتقلب لي حياتي ..
(علمتني الحياة انو عمرك ماتتوجع شديد لانو الوجع بوجعك براك..
وعلمتني الحياه انك ماتتمسك شديد..لانو لمن تفك بتقع براك..
وعلمتني انك ماتحكي اي شي..ولا لي اقرب زول لانو العاقبه بتألمك براك..
وعلمتني انك ماتنتظر شي من زول..لانو الانتظار بهلكك براك..
ولانو نفسك حقتك..ماتوجعا..ماتتمسك..ماتحكي..وماااتنتظر..دلع نفسك وحبها .. لانو في القبر حتندفن براك..و حتي الحساب يوم القيامه بتتحاسب برااااك وماف زول معاك..) نلتقي..

#رضيت_بقدري فكان هو..🔞
بقلم الاء محمد الحسن ابوشمال...
-17-
يلا من ساعتي ديك حسيت قسورة اتغير بس ماحسيت اني نفسي اسألو لكن قلبي قبضني وقسورة متوتر توتر ظاهر وبقي زي البدردش مع زول سبحان الله ماجاني فضول اعرف دا منو رجعت راسي في الكنبه وغمضت عيوني فجاه حسيت بي عبرة حاااارة في حلقي لمن دمعتي جرت.. فجاه قسورة هبشني من يدي..
نور بسم الله مالك بتبكي..ماعارفه غفيت ولانمت بس الزول الكان مخنوق دي انا..
رديت ليهو..قسورة عليك الله جيب لي مويه..
فعلا جاب لي المويه وجا سألتو..
هي مواعيد الطيارة دي حدها متين..قبل اخلص كلامي جا النداء ..قمنا قسورة مسكني من يدي وطلعنا علي البص ..ومنو علي الطيارة انا ماصدقت قعدت في المقعد والطيارة اقلعت نمت حاسه اني زي البهرب من واقع ماعارفه ليه خفت فجاه ..
لحدي ماقسورة صحاني نور قومي اكلي ليك شي..
رديت وانا نعسانه ما جعانه ياقسورة ورجعت نمت احلامي كانت ملخبطه فجاه حسيت نفسي ماشه لي في غابه مخييفه وبنادي في قسورة وهو ماشي ببعد عني وانا جاريه والخوف قاطع قلبي فجاه لقيت جمبي بحر و جاتني مركب بعيد وسبحان الله فيها قسورة..وفجاه شع لينا نووور من بعيييد لمن انا شفت نقاء البحر..وركبت في المركب..صحيت بي يد قسورة ماعارفه نمت كم ساعه ..كل العرفتو الطيارة نزلت وطلعت تاني وانا دا كلو نايمه..لحدي مانزلنا عرفت انو نحن في المالديف اجمل مكان في العالم وانا حاسه نفسي السكرانه بس قسورة رتب الحال وجاني تاكسي نزلنا في النزل بتاعنا حاااجه كده لااااتوصف ..قسورة اتكلم معاي..
نور انتي شكلك مرهقه استحمي ونومي وفعلا كنت محتاجه استحمه وانوم بس الزمن زاتو عشان الصلاة انا ماعارفاه دخلت استحميت ولبست لي بجامه طلعت لقيت قسورة قاعد في كرسي برة في بلكونه صغيره وماسك ليهو سجارة طبعا اول مره اعرف انو بدخن..
صليت الصبح والضهر..وسالتو..
قسورة تعال اتمد ..ونوم..
قسورة..اوك فعلا انا تعبان انا ما انتظر ردو رقدت ودخلت في سابع نومه ..صحيت والدنيا خلاص ضلمت كنت نشيطه وجسمي مرتاح لقيت قسورة كاتب لي رقم الخدمات وهو نايم جمبي وغرقان ..دخلت الحمام وصليت ومسكت تلفوني لقيتو موصل واي فاي شويه كدة قسورة صحا..
قام استحم وغير هدومو بس انا لاحظت ليهو انا مابصلي..ما اترددت قسورة انت ماصليت..
قسورة..نور طبعا انا ربنا يهديني لكن والله الصلاه دي بقطعها شدييد ربنا يغفر لي بس ..
نور..دا ما كلام ياقسورة دي تواصلك بي ربك حرام ياخ..
قسورة..عارف انا والله بس ساعديني..
نور..ان شاء الله ياقسورة ربنا يهديك...
قسورة.. طيب قومي البسي نطلع ناكل انتي من امس ما اكلتي شي..
حقيقه انا كنت جعانه شديد غيرت بي تونك قصير وبنطلوني الاسود وختيت الطرحه في كتفي جيت لقيت قسورة من مكانو ماقام وماسك التلفون وشكلو مندمج قلت ليه قسورة انا خلصت..بس ماكان مركز معاي..تاني قسوررة انا جاهزة حتي انتبه لي قام سريع غير هدومو وطلعنا حقيقي حسيت انو قسورة مامعاي خالص جابو لينا الاكل وانا بالجد نفسي اتسدت وبطني قلبت بس شربت من الشوربه ووقفت..
قسورة..نور اكلي..
نور..شبعت ياقسورة..
قسورة..بسم الله متين اكلت كدي اكلي شويه ماحسيت نفسي اكسر خاطرو وماكنت عارفه كسرة الخاطر حتجيني بالمزيكا...
اكلت وشربنا قهوة عبارة عن حنضل ورجعنا الشايله حقنا رتب هدومي ..وقمت دخلت الحمام غيرت بي روب نوم كوبي قصير من قدام وطويل شويه من ورا ومشبك من محل الصدر..واتدلكت كويس واتبخرت وفكيت شعري ..وعملت روج صارخ كنا حقيقي بنطق الحجر ومشيت علي قسورة لقيتو راقد قعدت جمبو وانا حقيقي متوترة قسورة قال لي ريحتك حلوة وانا لسه مدنقر فجاه رفعت راسي لقيتو شبه نايم معقووول اللهفه الفي عيون قسورة ماتت والجن كان بعمل فيهو قبل نعرس انتهي مالو قسورة..ياخ انا حسيت نفسي شدة مامقهورة لمن قلبي عايز يتفتح نصين ..ليه ياقسورة تكسر خاطري كدة..اسؤا احساس ممكن تحسو مرة رفض راجل ليها..وانا من عبرتي بس دخلت الحمام وبكيت قدرتي لمن عيوني ورومو غيرت ولبس لي قميص فنايلي منقوش فيهو دباديب ورجعت رقدت جمبو بس حاسه قلبي دا بغلي مابعرف نمت متين زاتو ..صحيت بي صوت الدش عرفت قسورة في الحمام..عاينت لي عيوني المورمه انتظرتو طلع من الحمام..وانا داخله..قال لي صباح الخير..بدون اتلفت عليهو رديت ليهو صباح النور دخلت الحمام وفتحت السخان خليت الحمام اتملا بخار وحاسه لسه في باقي بكا جواي استحميت يمكن قرابه ساعه وانا سارحه لمن قسورة دقه لي الباب ..
قسورة ..نور مالك اتأخرتي قلقتني..
نور..ايوة ياقسورة طالعه..
قمت غيرت وعملت مكياجي في الحمام واتخمرت كوويس مغصه لي روحي دي..وطلعت لبست توبي وصليت لقيتو طلب شاي ..جيت طالعه بي توبي عاين لي كدة حتقعدي ملفلفه بالتوب كدة..
رديت ليهو رد انا زاتي استغربت فيهو..ما امس كنت لابس روب نوم الحصل شنو..

فجاه قسورة جا قعد جمبي ومسكني من يدي..وبقي يسلم علي في يدي نور انا اسف انا فجاه نمت والله ماحاسي اعفي لي حاسي بالانتي حسيتو..وانا في نفسي حسيت انو قسورة من لحظه الرساله وهو كيانو اتلخبط ..وتاني العبرة وقفت لي ودموعي جرت قسورة بقي بعتذر وبمسح لي في دموعي وببوس فينب وبنزل في التوب شويه شويه وبقبل فيني في رقبتي انا بديت اتجاوب معاه بس فجاه اتزكرت الحصل وصحيت من الغيبوبه وقمت زي الطاقاني عقرب ..لمن هو اتخلع ..
دخلت الغرفه وهو ماجا لاحقني حس بي اني ممكن اجرحو بي كلمه جد انا الموقف دا حزاني شديد في نفسي..وبقيت بتعامل معاهو بي جفاف من وجعتي وهو اغلب وكتو ماسك تلفونو يا اما طلعنا ولا هو ف الصاله وانا في الغرفه..واكتر شي كان بستفذو كنت بتريح وبلبس قمصان نومي ومرات بتعمد احوم جمبو وبحس بيهو انو متلهف لي بس لسه خجلان انا اخدت تلاته يوم علي الحال دا لحدي اليوم الرابع قسورة جا لقاني بطلع لي في هدوم من الدولاب وانا لابسه قميص قصير بتحرك مع جسمي..وفجاه مسكني من يدي ولصقني علي الدولاب وانا ماقادرة اقاوم ..نور انتي بتختبري في رجولتي ولاشنو..
انا اتبكمت بس وماقدرت اتحرك وهو شويه بقرب لي وانا ماقادرة اتحرك وبقي بقبل فيني بي طريقه مجنونه وبستنشق في ريحه الخمرة..وبقول لي..
يعني عايزاني اصبر كيف..بتتسدي فيني يانور..ولسه بتحسس في جسمي وانا بردت فجاه شالني وخاتني في السرير فجاه حسيت نفسي في عالم تاني وحسيت انو بقينا جسم واحد ..وشويه الم وهو كان بخفف عني بي لمساتو..بالجد انا بحب قسورة وحبيتو اكتر لانو اول علاقه بينا اثبت لي انو زول حنين..
انا نمت تاني وماحاولت اعاين لي قسورة حاسه نفسي خجلانه ..
الصباح صحيت قدامو ..استحميت وصليت لقيتو قاعد في نص السرير..وهو بغمز لي وقال لي صباح الخير..الليله تشوفي لي ضفورك دي حل مامعقول ضهري كلو مخربش ..انا من الخجل قربت اخش في الارض..قام جا علي وسلم علي في راسي ..تسلمي لي يامدامي..احم احم بقيتي مدامي بي حق وحقيقي ..احرجني احراج الكلب..
وطلع مشي الحمام..انا قعدت بتزكر في الحصل امس وببتسم براي..فجاه تاااني جات في تلفون قسورة رساله...
(وعلي قدر المر..مصيرا تحلا)
نلتقي..

#رضيت_بقدري فكان هو..
بقلم الاء محمد الحسن ابوشمال ..
-18-
جات الرساله وانا قلبي اكلني مشيت علي التلفون لقيت في الشاشه مسجل جاك..بي براءتي الجواي افتكرت انو زول من ناسو الفي كندا واسمو جاك...وطمنت قلبي علي كدة..وقمت غيرت هدومي واتعطرت..
جاني قسورة طالع من الحمام قال لي اجهزي الليله البرنامج حيكون رهيب ماشين جزيرة تانيه ياسلام لبست وفطرنا فطور خفيغ وطلعنا اتفسحت فسحه والجو خرافي والناس دي كلها منشغله بي روحا وكان اكتر نظرات اعجابهم علي الحنه وحنه قسورة يمكن حسو اننا مختلفين ..جد بسطتني واسعدني دخلنا محل تحف جميل لقيتهم بعملو اساور وسلاسل بالاسم عملت اسم قسورة بالكرستال ولبستو طوالي..
قام قسورة سالني ..معقول بتحبيني كدة..
نور خجلت..اكييد مش راجلي ومن حقي احبك ..
قسورة صنه مسافه وسرح..سألتو وانت بتحبني..
طبعا قسورة لفه ودور..اتخيلو اللحظه ديك حسيت بي سهم في قلبي..بس سكت ماحاولت ابين اي حاجه..
ونحن في ملاهي مائيه قسورة فتح تلفونو وحقيقي المرة دي اتقلب مرة وحدة
سألتو..قسورة مالك في شنو ..
اختصرني..ماف شي وماتسألي تاني..
سكت واكلتها في قلبي ومارديت ولحدي ماخلص اليوم قسورة ما اتكلم معاي ولا اتونس معاي بس بقي مكبس في التلفون وانا بالجد بي احساس المرة عرفت انو اكيد دي الزوله الكان عايزها زمان ماهو ماف شي ممكن يقلب كيانو بالطريقه دي ..بي طبعي لا لحوحه لابعرف افرض نفسي من مرة وحدة وبسكت ..
رجعنا الجناح بتاعنا وانا بالجد مخنوقه وحاسه نفسي زهجت مع انو البلد دي مستحيل الزول يزهج منها ..استحميت ورقدت نمت ولا عاينت لي قسورة قاعد بره وماسك تلفونو..نمت لحدي ماصحيت الصباح لقيتو في نفس مكانو نايم ومدخن كميه خرافيه من السجائر دخلت استحميت وصليت دعيييت كتيييير لمن دموعي جرت وناجيت ربنا اني حقيقه مابقدر علي خذلان تاني في حياتي..فجاه بس خطر في بالي هاشم زدت بكي..اوريكم ليه بكيت لانو بالجد هاشم كان بحبني ولو كان مكان قسورة اسي انا كان ممكن اكون في اجمل لحظات حياتي..
طردت الفكرة من راسي حقيقي حسيت اني بخون قسورة حتي بي مجرد التفكير في زول ميت..قريت من تلفوني سورة البقرة لحدي ماخلصت حسيت بي راحه غريبه لقيت قسورة طالع من الحمام..صبح علي رديت عليهو وقلت ليهو ياريت لو تصلي عدم الصلاه بقلب الكيان..فعلا اتوضي وجا جمبي وصلي بي خشوع لمن انا احترت ..صحي ربنا بديك الامان مهما بعدت عنو ..
قام قسورة قبل علي وقال لي ...نور عليك الله كل ماتكوني عايزة تصلي وريني نصلي سوا..
مارديت بس هزيت راسي.. ودخلت عملت لي قهوة لمن اكون عايزة افكر بس بشرب قهوة وعملت ليهو معاي وفتحت التلفزيون انا ماكان نفسي اتكلم ولا عايزو قسورة يتكلم معاي..وسرحت وفكرت كتير جاني قسورة وقعد جمبي وفهمت هو عايز شنو بس ماكان عندي احساس وانا في نص العلاقه مامرتاحه وهو كمان بس عشان يخلص ويقول اداني حقي..وينو هو الحق البدون احساس ياخ انا بطني طمت من نفسب دخلت الحمام وبكيييت عاينت لي روحي ليه بحصل كدة تاني استغفرت وسكت..
عدت يمكن اربعه ايام نحن نفس الحال ماف شي اتغير قسورة وكتو في التلفون والكلام بينا مجرد واجب جيت لقيتو قاعد في الصاله ..
قسورة..
قسورة..نعم...
نور..انا عايزة ارجع السودان..
قسورة نظام اتفأجا..بسم الله في شنو لسه م
نحن عندنا اسبوعين.
نور..لا اسبوعين لا يومين انا بكرة عايزة ارجع السودان انا هنا بتخنق فاهم..
قسورة..نور مالك في شي مضايقك..طبعا حسيت بي كلمتو زي السكين معقول دا كلووو وهو ماحاسي بي نفسو حاسي انو انا مفروض اكون مبسوط غصب..
رديت ليهو..لاااا طبعا واتضايق ليه انا مبسوووطه الناقصني شنو راجل بموت فيني ومغرقني سعادة في شنو تاني..اسمع ياقسورة انا بكرة عايزة امشي بلدي حقيقه محتاجه اشوف امي..طبعا انتو قادرين تفهمو الفجوة الحصلت بين ليله وضحاها بيني وبين قسورة دي مفروض اسعد ايام حياتي وانا ماحاسه اي شي لمن قربت افقد الثقه في نفسي..بس المشكله مافيني الكنت من الاول خايفه منو حصل..
دخلت رتبت شنطتي ورقدت وعايشه حاله صراع غريب كنت بس اتمني ايام شهر العسل دي تعدي وخلاص واكون مبسوطه..لكن ماف مفر من النصيب ياهو قدر واتكتب والحمدلله علي نصيبي..
نمت بعد صراع..صحيت مع الصبح صليت ودعيت ربنا يربط علي قلبي وخلاص
ورجعت اتصلت علي امي وانا بحاول اكون طبيعيه عشان ماتحس اني ماتمام وفهمتها انو ممكن نجي الليله عشان قسورة جاهو قرار انو يرجع كندا.. وقفلت لقيت قسورة وراي ولاصبحت عليهو قلت ليهو فهمت انا وريت امي السبب شنو ..لمن يسألوك قول كدة..
وطلعت من الغرفه ماسمعتو ردو..اتلفت لقيتو بصلي ابتسمت ومشيت..

لحدي المساء رتبنا حالنا ورجعنا ورجعنا بدل نكون مع بعض رجعنا وكل روح في حته وانا قلبي دا عبارة شتات احساس الله لاضوقو لي حبيب.. وصلنا لحدي صباح اليوم التاني وطوالي علي بيتنا قسورة سلم بس ومشي بيتهم عشان يجو (للحلاله)..لقيت امي مجهزة ومعانا ضيوف والزغاريد وهو ماعارفين روحهم بزغردو لي جنازة..حضنت امي مسااافه ودموعي عشرة وقلبي بتقطع انا محتاجه حضن امي حقيقي..ودخلت جاتني سلام..حضنتي وبكينا وقالت لي مامحتاج اسالك يارفيقتي جوابك باين من عنوانو ماعايزة اعرف اي شي بس انا ماشه اجيب ليك الحنانه طلعي توب حلو وانا بعمل ليك مكيب خفيف غيري ملامحك دي ..
نور..سلام ياخي..
سلام..ماتقولي لي ياخ قومي بس انا ماعايزة اي كلام..
فعلا سمعت كلام سلام وقمت طلعت لي توب لامي حرير سادة وحننتني البت حنه بسيطه انا طلبتها ومكيجتني مكياج حلو وبسيطه وكانت اللمه وجات قثاء ومعاها ناس من الشغل وانا بس متين الناس دي تمشي عايزة اتخمد انوم..ماحاولت ادي قثاء اي فرصه كلام ماعايزة اكذب عليها وكمان ماعايزة احكي ليها..الناس اتفرتقت لقيت امي نظمت لي غرفتي علي اساس انا وقسورة وفعلا قسورة جاني داخل قمت مشيت المطبخ جبت ليهو عصير وفواكه وكبايه حليب وجيت عايزة ارقد امي نادتني لقيتها ولعت الحفرة دي مصيبه شنو دي ياخ ماف طريقه اتملص منها المهم قعدت في الحفرة مسافه طلعت لي تعب السنين من جسمي واتعمدت اتأخر علي اساس القي قسورة نام..وفعلا قمت لقيتو غافي..قفلت النور واول مارقدت ريحه الدخان كانت قويه وقسورة اتقلب علي وبقي بهبش فيني طبعا اصلا ببقي رومانسي وكت ماهو عايز وانا نفسي طالعه منو ومن اي شي وحاول يقرب لي طوالي قلت ليهو قسورة لوسمحت انا تعبانه وعايزة انوم ممكن..
قسورة..بس يرضيك انا اكون كدة ..
نور..معليش اجلها لي بكرة انا تعبانه يلا تصبح علي خير..
وفعلا خليتو الليل كلو يتقلب بس خليه يضوق شويه من الحنضل المر دا ..
اول مرة انوم مرتاحه كدة سريري زيو ماف صحيت مع الصبح صليت لقيت قسورة صحي قام صلي الصبح وامي عامله زلابيه ريحتها تجنن دخلت معاها المطبخ وحاولت اعمل نفسي مبسوووطه كفايه وجع امي ماحابه اوجعها ..واتونست معاها وحاولت اكون عاديه وطلعنا برة في المظله وشربنا الشاي وامي عملت القهوة بي قلوتها واتكيف شديييد من الجو وحسيتو مفرهد..بس انا جواي في اميااال تجاهو..بعد ااواطه فتحت شويه قال لي لو مافيها مشكله عايزين نمشي نفطر مع قثاء ..
نور..جدا ماعندي مشكله ..وقمت خليتو بتونس مع امي..
طلعت لي توب لذيذ احمر بي اسود مطقماه بي احمر واتمكيجت ..وهو جا غير هدومو ولبس ليهو جلابيه لاحظو انو ماف بينا حوارات زي الغرباء حاجه كدة لاتحكي..مبهمه ومامفهومه ..
طلعنا وطبعا لقيتو اجر عربيه..ركبت ومشينا علي قثاء طبعا طول الطريق ماف زول اتكلم مع زول زي المجبورين علي بعض البشوف قسورة مايشوف لهفتو اول يوم شافني فيهو سبحان الله صحي الانسان مابدوم علي حال وصحي الحب مابالجبر..لانو فعلا قسورة مابحبني ولا حيحبني..بس غايتو جوطه عشان النصيب والحمدلله رضيت بقدري.. وصلنا البيت لقيت قثاء عامله لينا فطور حكايه انا جد كنت مشتاقه ليها ونحن بناكل هي بتعاين لي كويس ..لمن قمنا من الصفرة دخلنا المطبخ قثاء بتقطع في تفاح ومارفعت راسا بس بتتكلم..
شوفي يانور لو انت مرة فاهمه حتعرفي تبسطي روحك وحتعرفي كيف تخلي حياتك جنه انا شفت الرساله واضحه عيونك..وبكرر ليك انتي بعد دا مجبرة..وبس اعفي لي..
انا استغربت معقول انا واضح فيني كدة ..الله يستر رديت ليها ..اصلا دا نصيب وانا رضياااانه ..والله كريم..
في اثناء مابنتكلم قسورة جانا داخل قال لي..نور طبعا جهزي نفسك ورتبي حالك نحن بعد اسبوع حنسافر كندا..
انا حقيقي انخلعت..كندااا؟؟؟
( علي كف القدر تسير الخطي ولااا مفر)
نلتقي..

#رضيت_بقدري فكان هو..
بقلم الاء محمد الحسن ابوشمال..
-19-
طبعا انا من كلام قسورة مخي كبس وماعرفت تاني اتصرف حسيت تفكيري وقف معقول هو بتصرف بدون يشاورني يعني انا زي الغنمايه بجرني ..قثاء قرت افكاري قالت لي نور اسمعيني قسورة دي محتاج سياسه حاولي بس اقلمي نفسك ياااما حتجيك مفاجات منو..بس انتي فكري في الجانب الايجابي وانك يادوب حتبدي حياتك..انا ياخ فكرة الغربه بس قفلت نفسي من التفكير واتزكرت ايام شهر العسل ياخ كوني حأمشي واقعد معاه وتاني ماحاجي تاني دي براها خوفتني يارب دا امتحان شنو دا مابقدر علي دا كلو انا كيييف انا حامشي للمجهول بي كرعي بس دا واقع ماف منو مفر الله يستر ..جد انا عديت اليوم كلو متنشنه ونفسياتي دي في الارض المني انا تكون مبسوطه وطايرة ..بس انا اتمنيت لو الزمن برجع بي شهور بس النصيب..رجعنا البيت لقيت امي قاعدة في الحوش سلمت عليها ودخلت غيرت قسورة خليتو في الشارع مابعرفو مشي وين ..جيت رقدت لي امي في رجولا..امي سألتني..نور انتي مبسوطه في حياتك؟؟
جاوبت ليها ودموعي جاريه..الحمدلله يا امي ياهو نصيبي قسورة شويه صعب ومحتاج اني اتفاهم معاهو ماتخافي علي انا ما زوله ضعيفه..بس انا خايفه من الغربه وطبعا يا امي قسورة قال حنمشي الاسبوع الجاي كندا..انا بس عايزة دعواتك وعفوك..
احسان..انا عافيه ليك يانور وعارفاك مرة بي عشرة رجال وبتقدري تديري حياتك كويس ..وخلي بالك من راجلك واوووعك تفرطي في راجلك لي زول لانك لاناقصه لا عايبه ..ابقي عشرة علي بيتك ونفسك انا وصايا امي دي بكتني حسيت روحي زي الماشه اموت والله فعلا موت..اكتر من كدة شنو ..امي قامت ولعت لي الحفرة..قدر ما اتملصت ماقدرت والليله ماف اي حجج قمت اتدخن واتريحت وجيت رقدت جمب قسورة ياكافي البلا زي الفاقدة الاحساس وصلت مرحله برود عديل بس عايزاه ينجز عشان انا انوم وهو عامل رومانسي معليش انا نفسي قفلت وعرفت الراجل وكت راحه نفسو ممكن عادي يدردق ليك في الواطه طبعا دا علي اساس انك مخلوقه من حجر..ما كل الرجال بس دا الله يديه العافيه خلاني اشوف صنف الرجال كلهم واحد..
عدا الاسبوع بين مد وجزر وامي ماخلت لي شي من ويكا لي دكوة لي شرموط جهزتني تمااام وجا يوم السفر طبعا مامحتاجه احكي اي شي فيكم الحسا بي احساسي..انا حسيت روحي دي طالعه مع امي واخوي الله يقدرني علي الجاييني والله انا خلاااص استويت..
رحله كانت فظيعه خلصت ووصلنا بلد مجهول غريب مامعروف فيهو شنو ..
كندا جميييله وشوارعا رهيييبه والدنيا عند الناس دي بسسسيطه وشويه العربيه بتدخل بي ييوت جمييييله وبسيطه نزلنا قدام بيتنا اول شي لفتني محل الورد الفاتح في بيتي ياخ ارتحت نفسيا" دخلتا البيت فيهو جنينه صغيرة في نصها ممر بالحجر وعلي اليمين مرجيحه صغيرونه وجمبها نافورة بس كانت جافه الزرع والنجيله دخلنا البيت كان حلووو وجميل حاوصف ليكم بيتي عشان تكونو معاي اول ماتدخل البيت بتلقي صاله كبيره يمينها في ممرة مليان اناتيك وفيهو شباك ومقاصد الباب المطبخ وشمال كمان في ممر اخرو فيهو غرفتين مفتوحين في بعض والصاله فيها جلوس كلاسيكي رهيب وصفرة ..حبيت البيت من جوة قلبي.. قسورة..
نور ان شاء الله البيت عجبك هو بسيط بس فيهو راحه نفسيه..
نور..جميل والله عجبني خالص ودخلت غرفه النوم لقيتها مفروشه فرش خرااافي وجواها حمام..والغرفه التانيه فيها سرير كبير نظام غرفه اطفال فيها دولاب ودرج مزاكرة وبرضو فيها حمام بي صورة عامه حبيت البيت..ولسه جواي خوف رهيب..قسوره طلع خلاني غيرت وصليت ودخلت المطبخ لقيت التلاجه مليانه انواغ واشكال بس عملت لي قهوة وقعدت في الصاله وفتحت التلفزيون وانا في قعدتي ديك نمت ماصحيت الا لقيت نفسي في السرير ماعارفه الحصل شنو لقيت قسورة بلبس طالع..
قسورة..صحي النوم صباح الخير..معليش ماكان ودي اخليك براك الليله بس لازم اداوم اوعدك ما اتاخر ..واجهزي عازمك غداء رهيب ..
نور..صباح النور طيب دقيقه اعمل ليك الشاي ..
قسورة..لالا خليك نايمه ارتاحي لاحقه علي التعب ..
وسلم علي في راسي وطلع ياخ حيرني عامل زي الزول منفصم الشخصيه كل شويه بي شخصيه وبي وش ..قمت دخلت الحمام حسيت بي مغص شديد لقيت البريود جات..تصدقو فرحت وحمدت الله انا لسسسسه بدري علي وبدري علي الزول دا انو يشيل مسؤوليه اولاد..غيرت هدومي وطلعت عملت لي شاي بي بسكويت وشربت..طلعت برة الجنينه عاينت ليها كدة ..وطلعت بره محل الورد لقيت مرة كبيره في السن شكلها طيوبه ..طبعا انا انجليزيني فل..
سلمت عليها..
صباح الخير سيدتي..
هي..صباح الياسمين ايتها الجميله من انتي..
نور..انا ادعي نور انا زوجه السيد قسورة..
هي..اوووه هل انتي زوجه قاس الوسيم انتي جميله جدا ايتها الفتاه..ما اجمل نقش الحناء علي يدك..احببته..انا ادعي ميرا..ويمكنك زيارتي دوما انا احب الجميلات مثلك ..
نور..شكرا ميرا واتمني منك زيارتي في منزلي انا ايضا احب الطيبين مثلك..
ميرا..ارجوك ادخلي الي المحل واشربي معي كأس من القهوة ..

دخلت معاها المحل والعصافير والورود ياخ اتبسطت بسطه كدة..شويه كدة جات داخله واحدة منقبه انا مدياها ضهري وقعدت تتكلم مع ميرا ..فهمت من كلاما انها عايزة ورد لانو عيد زواجا..شويه البت اتكلمت براها..ياخ انا المرة دي حتجنني كل مرة اطلب منها شي تجيب لي شي تاني..اي انا متاكدة اني سمعت زول بتكلم سوداني..اتلفت علي البت وبدون مقدمات..انتي سودانيه؟؟
البت مخلوعه رفعت نقابا..ايوه انا سودانيه..
ياخ لمن قلبي دا اتنفس ..سلمت عليها ..انا اسمي نور..
البت وانا اسمي سيرين..حضنتها زي الهبله ماصدقت اتونست معاها عرفت انها لي ٧ سنوات مقيمه ومتزوج زول ملتزم وعندها ولد وبت ..
سيرين..ياخ انا مبسوطه اني اتعرفت بيك عليك الله واصليني ..
نور..انا لسع ماعملت رقم بس سجلي لي رفمك وبينا تواصل ..جد المن جنسك في الغربه اخوك..وجد سيرين كانت احلي خوة عرفتها..
رجعت البيت لقيت التلفون الارضي بتصل لقيتو قسورة..نور الله يهديك ياخ وقفتي قلبي انا لي ساعه بتصل..
نور..معليش ياقسوره والله طلعت بره بعاين ومشيت محل الورد ..
قسورة..طيب يانور لمن تكوني طالعه اتصلي من الارضي دا الارقام في النوته الجمبك ماتخليني اقلق عليك..
نور..طيب ياقسورة ماتقلق ..وقفلت منو والله قسورة دا حيجنني الله يلزمني الصبر دخلت لبست لقيتو جايب لي عطور رهيبه وتونكات وبناطلين علي زوقو لبست وفكيت شعري عملت كيرلي وعملت ميكب خفيف وانتظرتو..جا داخل سلم علي وشاغلني حلااات القمر دا ياناس ..مجنون الله يعلم وحيجنني..
طلعنا وداني مطعم في نص المويه فيهو مأكولات بحريه والحته رهيييبه اتغدينا وطلعنا كافي واتفسحنا ونحن راجعين في العربيه قال لي اها انتي مرة شاطرة في المطبخ ولاكيف انا بحب الاكل البلدي..
نور..حأورييييك ..
قسورة..احب التحدي من العسل دا.. صدقوني بقيت ماعارفه اتعامل كيف مع الشخص دا ..
رجعنا البيت بس انتبهت انو قسورة دا من النوع الهمجي ومامرتب خالص
عندي شعاله فحم بخرت البيت كووويس وغيرت مفرش الغرفه وجيت لقيت قسورة طالع من الحمام لابس ليهو جيب شورت بس رقد جمبي وقعد يتمحلس لي ويهبش قلت ليهو معلييش اسفه معاي البريود سبعه ايام ..
قسورة..ووب علي سبعه ايام عديل دي مصيبه شنو...
ضحكت فيهو..وقلت ليهو قسورة اعمل لي خط عشان اقدر اتكلم مع اهلي..
قسورة..اوووه كويس انك زكرتيني انا جبت ليك خط في جزلاني شيليهو وفي واي فاي وصليهو في تلفونك ..يلا تصبحي علي خير.. وعلي فكرة عملت ليك بطاقه صراف تقدري تسحبي في الوكت البريحك وكيف ماعايزاه ..
رديت عليهو شكرا ليك ..ورقدت نمت..صحيت الصباح قبل قسورة عملت ليهو الشاي والعصير وطلعت ليهو بدله كامله لحدي الجزمه والشراب ..
صحي واستحمي وغير هدومو وجا شرب الشاي..
قسورة..تسلم الايادي يا احلي نور واحلي صباح ويلا انا طالع وخلي بالك من نفسك..
طلع طوالي شلت تلفوني اتصلت علي سيرين واتونست معاها قالت لي خلاص انا بطلع الاولاد المدرسه وبجيك ..ياسلام برنامج ظريف..وسيرين جاتني واتونسنا وقفت معاي في المطبخ ظبطت لي قراصه بي ملامح شرموط رهيب وشيلت سيرين منو تصدقو ماحسيت بالغربه..سيرين ملت يومي وقالت لي بوديك يوم محل تقولي ف سوق امدرمان اي شي فيهو..
ودعتني وطلعت ورصيت الصفرة وجهزت الاكل..وقسورة جا داخل ..
اممممم شامي لي ريحه حاجات طيييبه..
نور..احم احم بدينا التحدي..
قسورة..يلا سريع استحم واصلي واجيك ياسلام قسورو بقي بصلي ربنا يهديهو..قعدنا في الصفرة واكلنا وقسورة دا بشكر من جوة قلبو مسك يدي سلم لي علي فيها..تسلم الايادي يا غاليه..قسورة متعود يرفع معنوياتي وفجاه يدق بي الدلجه عشان كدة بقيت بعمل حسابي شديييد.. وعدت اول ايام بينا كويسه انا عامله حسابي في التعامل شديد..
ومامقصرة في واجبي..والايام ماشه مدورة بي..
(وياباكر تعال شايل الفرح اكوام)
نلتقي..

#رضيت_بقدري فكان هو..
بقلم الاء محمد الحسن ابوشمال..
-20-
فعلا انا كنت قايمه بي واجبي بس كنت خايفه شديد من تغيرات قسورة انا اصلا ماعارفه هو بتعامل كدة ليه مرة احسو عايزني ومرة ماعايزني يعني متقلب وفعلا الكنت خايفه منو حصل ...
قسورة كان بيطلع من الصباح مواعيد دوامو اتغيرت كتير وبقي بتأخر وانو ماقاعد يراعي لي اني بكون براي بس علاقتي مع سيرين اتطورت وبقت لي اكتر من اخت في الغربه ودايما كانت بتشجعني وبتغير معاي كتير في البيت وطلعنا كم مرة وقسورة ماكان بمانع..
انا بكون براي كتير واصلا ماقاعدة اخلي الحنه تطلع من جسمي وكتير بتدخن يعني جد انا مهتمه بي نفسي بس لاحظت الفترة الاخيره دي قسورة دا متغير مني شديد..
فجاه جا داخل وهو زهجان شديييد ..
سألتو قسورة مالك في شنو..
زاد نرفزة..مافي شي وتاني ماتسأليني..
نور..بس لاني حاساك متغير في شنو ياقسورة ..
قسورة ..يا الله يانور انتي مابتفهمي اسمعي عشان تتجنبي النقاش معاي وماتشوفي وشي التاني ماتسأليني..
نور ..اوك راحتك..
انا قفلت النقاش وانا بغلي من جوة قسورة دا مالو وفي شنو ياربي..
المهم استحمه ولبس وطلع مستعجل ولا حتي سألتو مالك ولا في شنو وانا من جواي بغلي..
ولي الاسف نسي تلفونو..وانا بي فضول اي مرة كنت عايزة اعرف المغير قسورة دا شنو..لقيتو عامل نمط من تلاته حروف واتحيرت ..مرة دخلت قاس..ومرة دخلت اسمي قايله روحي مهمه..اخر شي الهام كدة جربت جاك..وفعلا النمط فتح ..
طوالي مشيت علي الواتساب مالقيتو عامل حمايه فتحت الرسايل واول رساله لقيتها في وشي جاك..
رجعت للرساله الاولي وتاريخا كان يوم زواجنا..ويادوب عرفت الغيرو مني شنو..كاتبه ليهو فيها..
(قسورة انا اعاني مع زوجي لا استطيع نسيانك قل لي ماذا افعل اعمل انني ظلمتك لكني مازلت احبك )
طبعا قسورة رادي ليها
(وماذا افعل انا؟؟ ظلمتني كثيرا لكن لا املك علي قلبي سلطه ارجوكي جاكلين توقفي عن مراسلتي انا اتألم)
المهم ماوقفت من المراسله شويه شويه لحدي مافي الاخير قالت ليهو انها اتطلقت من راجلها وانها ماحتقدر تعيش من غيرو وهو اصلا زي المنتظر سبب ولا حتي كلف نفسو يقول ليها اتزوج يااااه معقول انا تافهه ورخيصه للدرجه دي..
لحدي ما اخر رساله عرفت انها جاتو في المكتب وطلعاتهم كترت..وانا هنا مختوته اسم مرة يا الله من الوجع بكيييييت قدرتي واتوجعت جنس وجع..والوجعني اكتر اني اول راجل احبو بالطريقه دي هو...حبيتو لاني افتكرت انو راجلي وانو حق لقيت نفسي مجرد طباخه ومجرد جسم بفش فيهو رغبتو..وانا اقول في الفترة الاخيرة دي مالو اتغيرت ياخي نومو معاي بقي كميه من البرود..زي المجبور وانا افتش ليهو في التبريرات..لا وعلي شنو..قمت من محلي ديك صليت ركعتين وبكييييت لمن الله غفر لي انا ماقدر الوجع دا..
انا نفسي احكي بس احكي لي منو امي مابقدر سلام برضو هي بتجهز لي عرسها مابقدر اضايقا احيييي وكمان قثاء دي اصعب انسان ممكن احكي ليهو..
مسكت تلفوني لقيت مروان قاعد ..معقول انا نسيت اعز زول علي قلبي..
اتصلت عليهو مكالمه ماسنجر ..
رد علي..ويييين انا اختي المختفيه مشتاااق ليك ياريتك زي زمان كنت بزعجك كل دقيقه..
انا من سمعت صوت مروان بكيت..هو زاتو اتخلع...
مروان..نور مالك بتبكي الله يهديك يانور ماتقلقيني عليك..
نور..مروان انا محتاجه ليك انا محتاجه ليك اخوووي صدقني انا ممكن اموت اسي ف اللحظه ..
مروان..كدي هونيها واستغفري واحكي لي وحدة وحدة..
انا ما اترددت من قوله تيت..اي شي حكيتو ليهو لحدي تفاصيلي الخاصه( انا عارفه انو غلط بس حقيقي كنت محتاجه زول يسمعني وينصحني وربنا عالم انا مروان دا بعتبرو اخوي)
مروان..اتنهد من جوة قلبو لمن حسييتو معبور..وقال لي نور كدي استهدي اولا" انتي في غربه والله الزول دا بحسو تايه من كلامك بي دلاله انو متقلب معاك هو زاتو ماعارف نفسو عايز شنو..بس انا نصيحتي ليك اصبري شويه واحر من الصبر ماف ..ووكلي امرك لي الله يانور العرس دا رابط ماهين..بس امسكي في واجبك واوووعك تبعدي من ربنا..وادعيهو كتير وخلي لله واي شي عندو حد..بس انا عهدتك قويه خليك علي طول قويه..
نور..خليك جمبي بس يا اخوي..
مروان ..وانا جمبك يا اعز من اختي...يلا خلي بالك من نفسك..واهتمي بي نفسك ..
نور..وعليكم السلام ..
ارتحت شديييد مع مكالمه مروان دي قمت رقدت في السرير حسيت بي حركتو داخل عملت نفسي نايمه حسيتو قاعد بتأمل في وشي وزي البقول ليهو في كلام بس ماقدرت افهمو لاني نعسانه ..ربت لي في شعري ورقد نام..
فعلا صحيت الصباح قدامو عملت الشاي وخليتو في الصفرة ودخلت الحمام..بس ماعايزة احتك بيهو ماعايزة اتكلم معاهو لاني بحس نفسي هبله جمبو ..

لمن حسيت بيهو طلع طلعت من الحمام اتصلت علي سيرين جاتني وطلعنا لفينا واشتريت لي حاجات لي امي ومرتضي اخوي ولي روحي دي اتفشيييت.. رجعت البيت عملت الغداء وفتحت التلفزيون قعدت جا داخل سلم علي رديت عليهو بس..وقعدنا اتغدينا ماف زول خاطب ليهو زول ..عملت الشاي جبتو وقعدت ولاحتي عبرني وسألني مالك ولا في شنو..
دخلت الغرفه رقدت وقفلت النور جا لاحقني فهمتو الليله ماطلع عايز شنو ببقي حلو بس للجنس دا...
انا طبعا بقيت زي التلاجه لي درجه بقيت ماحاسه بيهو خاااالص ..والعجب هو بس اداء الواجب دا هو المهم انا خلااااص وصلت حدي معقول ياخي وصل بيهو للدرجه وقمت انفصمت وانا اصلا موجووعه من اي شي ..
ياخي قوووم مني ابعد عني ليييه ماقادر تحس بي ليييه أبسط حق لي بحسو أداء واجب السرير دا بالنسبه ليك زي المشنقه ليه ناقصني شنو انا مرة والله وست النسوان مريحه ومدخنه مهتمه بيك اقول ليك شي ياخ انا لو عاهرة مابتعاملني كده..عارف انا حاسه بي شنو..ولا علي شنو انت عمرك ماحتحس بي و تاني اوعك تقرب لي..لاني حقيقه بقيت ماطايقه..
قمت من تحتو وانا دموعي دي عشره عشره دخلت حمام الغرفه التانيه فتحت فيني الدش وقعدت قسورة دق لي الباب مارديت عليهو لحدي ماسمعت باب الشارع قفل عرفتو طلع اصلا" هو جبان ومابعرف يواجه الامور..
طلعت من الحمام لبست هدومي وقعدت في مصلايتي ناجيت الله كتيييير يحس بي ..الواجعني اني بحبووو.
لحدي قريب الساعه ١ صباحا" جا داخل لقاني قاعدة في المصلايه..قعد جمبي ساكت مسافه..
بعد نطق..
نور اول شي سامحيني..لاني قصرت فيك كتير انا عارف ومتلوم..وانا حاسي اني بظلمك معاي انا ما الانسان الانتي بتستاهليهو.. انتي تستاهلي احسن..نور جد انا قررت انو اطلقك ..واخليك للانسان البستاهلك..
انا اللحظه ديك حسيت بي فأس عايز يشق راسي بس ما غير ملامحي قمت طبقت المصلايه..وقلت ليهو خير يازول..انا ماعندي مشكله عن اذنك وتصبح علي خير ودخلت الغرفه التانيه وقفلتها..
نلتقي في الحلقه الاخيرة...

#رضيت_بقدري فكان هو
بقلم الاء محمد الحسن ابوشمال..
الحلقه الاخيرة...
دخلت الغرفه والله يعلم شايفه الدنيا دي ضلام ضلام انا اتكسرت كسرة مايعلما الا ربنا الكريم معقول هنت عليهو كدة معقووول للدرجه دي ماقادر يستغني عنها لمن باعني بالساهل كدة ..وانا راقدة في الارض غفيت حلمت نفس الحلم الحلمتو في الطيارة انو قسورة ببعد مني في غابه وفجاه ظهر لينا نور ومركب ركبنا فيهو انا وهو..انا صحيت من الحلمه وكل يقين انو في حاجه خير حتحصل وانو الطلاق حتي لو حصل حيحصل لي خير..رقدت في السرير ونمت مرتااااحه صحيت الصباح عملت الشاي لي قسورة وجهزت ليهو لبستو لحدي الجزمه وبخرت البيت..
جاني قسورة وباين انو مستغرب من تصرفي ..قال لي صباح الخير نور..
رديت بي ابتسامه ..صباح النور قسورة طبعا انا الليله صحيت بدري وعملت بسكويت يانسون ان شاء الله يعجبك يارب..
وقسورة ولسه علامات الانبهار في وشو..كيف عرفتي اني بحب اليانسون..
نور..احساس بس والله يلا ممكن اسألك لو مافيها ازعاج؟؟
قسورة..اتفضلي..
نور..متين حتطلقني..
قسورة وعيونو في الارض ..يمكن شهرين تاني عشان اقدر انزل معاك السودان..
نور..اوووك تمااام..تحب اعمل ليك شنو للغداء..
قسورة دا عيونو من الخلعه واضحه بكون قايلني جنيت طبعا ..نور انتي كويسه؟؟.
نور..وفي احسن حالاتي الحمدلله ..المهم بعد النقاش الحصل دا قسورة طلع وانا متأكدة انو عندو قرون من الخلعه ..
انا بالجد حاسه اني ماموجعه ماعارفه ليه ..قمت دخلت لقيت الغرفه منكوشه تضرب تقلب فتحت الدولاب طلعت هدوم قسورة كلها وطلعت البدل وديتهم دراي كلين ..وغسلت الباقي في غسالتي وقعد رتبت الدولاب بي مزاج..وعطرت ليهو كل هدومو..وقعدت في نص السرير كتبت ورق كتييير وكان عندي ورق ملون وانا خطي ابداع..بقيت بكتب وبطبق وبخت في جيب البدله او القميص بس خليت زي قميصن اوتلاته ماختيت فيهم زي برطمان السعادة كدة..وبخرت غرفتي دخلت المطبخ ختيت لي محشي ف النار ظبطتو..
ورتبت الصفرة ..استحميت وصليت وكان عندي مزاج اتدخن بس قلت بعد الغداء ..خلو بالكم انا زوله عايزين يطلقوني..انا زاتي قلت يمكن جنيت ..
جا قسورة استقبلتو بي ابتسامه عريييضه ..وقعدنا اتغدينا..وعملت ليه منقه بالحليب قام سالني..نور انتي رتبتي دولابي؟؟
نور..اكيييد طبعا لقيتو مقلوب ..
قسورة ..تسلمي ياخ رديتي لي روحي..
نور ..ولا علي واجب..دخلت المطبخ غسلت العدة وولعت رحالتي وقعدت طبعا قسورة متعود بطلع بس انا بتدخن سامعه صوت التلفزيون..
استغربت زاتي دا مالو..ولاااركزت كتير بعد ادخنت صليت العشاء وعملت لي جبنه بي فشار وقعدت معاه ف التلفزيون حاساهو عايز يتكلم بس ماقادر..لمن نعست خليتو قاعد ..
دخلت الغرفه التانيه وقفلتها ورقدت نمت ظابطه المنبه بصحي قبلو بظبط ليهو امورو..
بس مابحاول احتك معاهو كتير بالكلام ..بعد قسورة طلع الشغل طلعت برة محل الورد اتونست مع ميرا وقلت ليها انا عايزة اشتغل في حديقتي البرة دي شغل جميل..ماقصرت ادتني شتول وكلمت لي ولد طوالي جا معاي زرع لي النجيله وشال الميت حاوطت الحديقه شتول علي حدها..وصلح لي النافورة وركب لي انوار في الممر ..الحوش بقي رهييييب والنجيله كلها ايام وتكسو وهو بتابع معاي كل يوم بجي يسقيها لي ..قسورة جا المساء داخل اتخلع في البيت وماعرف يعلق..عملت الغداء كبسه خفيفه ونحن بنتغدا قسورة قال لي .. علي فكرة خطك حلووو وكلامك يرد الروح حبيتها شديييد تسلمي يانور..
رديت ليهو..بحاول اخلي ليك زكرة حلوة مني بعد امشي..حسيت اللقمه وقفت ليهو في حلقو..بس اتجاهل طلعت الجنينه عملت الجبنه وشربنا برة والجو كان رهيييب ..عدت كم يوم انا كل يوم بحاول اخلق برنامج من ماف عشان املا فراغي وما اتوجع وانا قاعدة في المرجيحه جاني رساله من قسورة كاتب لي في فيها ..نور انا الليله مالقيت الورق في جيب البدله نسيتها ولاشنو؟؟ اتعودت علي كلامك الحلو بقي لي زي حبه الادمان..
رديت ليهو..لا مانسيتها بس في بدل مافيها وفي وحدات فيهم انت وحظك..
قسورة..لا عليك الله جد مابقدر اكتبي لي كل يوم عليك الله..
نور ..جدا ماطلبت غالي...
قسورة..نور معليش عارف نفسي سقيل بس ممكن طلب ..
نور..من عيوني ..
قسورة..تسلم عيونك الليله معاي اصحابي اصرو يشربو قهوة وانا عايزاك تعملي لينا قهوة لو مافيها مانع..
نور..عيوووني ماطلبت صعب..
اتركبت كدي وشالتني الهاشميه طبعا اشتريت طقم جبنه اون لاين غااالي بس رهيب ظبط ليك الفشار والتسالي والجبنه بي بخورا في فناجين وجهزت المحل وجو الضيوف الغصريه كدة اتنين خواجات واتنين سودانين ومعاهم بتين مشحطات كدة..قعدو وعجبهم ليك الجووو..
واصحابو السودانين بشاغلو فيهو..ياخي مرتك طلقه مرتك رهيبه ..مرتك مقرقبه ياخ ماتشوف لينا منها..اووول مرة اشوف غيرة في عيون قسورة ..
في وحدة من البنات سارحه بي حاستي عرفت انها جاكلين لاني قبل في التعريف ماركزت.. طوالي باغتها بالسؤال..
نور..جاااكي هل اعجبتك العادات السودانيه. .
جاكي اتخلعت..ااااه عاداتكم جميله..

نور..كذلك رجالنا وكذلك نحن..
جاكي زي الفهتني بلمح لي شنو قال لي..اعلم هذا..حقا انك جميله وانا ايضا احب اللون الخمري فلون بشرتك يعجب اي شخص...
اتكيييفت انها شكرتني قدام قسورة يمكن حسيت بالانتصار لحظتها نفسيا كدة..طبيعه المرة كدة..
وفي نفسي بالله دي العولاقه المبدلني بيها صحي الرجال بحبو الرمرمه..
بعد القعدة خلصت طلعو وقسورة كان مبسوط اني شرفتو ..
جاني ف المطبخ.. نور شكرا ليك كتييير جد تسلمي ياخ ..
نور ولا علي واجب ياقسورة..
طلع وانا طوالي مشيت الغرفه رقدت نمت وانا هلكانه طبعا انا عودت نفسي علي البرنامج دا بقيت طوالي مبرمجه لي نفسي بي حاجات حلوة في البيت وعدا زي شهر كدة ..بس لاحظت قسورة بقي مابطلع كتير..واتعود علي جبنه المغرب بقت ليهو برنامج..وكتير بنشربا في الجنينه طبعا بقت رهيييبه ونفسيات ونحن في المرجيحه جاتو رساله..عاين ليها بي طرف عينو كدة وقفل.. جاهو زول من برة ناداهو طبعا انا اكلني الفضول شلت التلفون دخلت الاسم قال خطأ..جاني احباط..فجاه كدة قلبي قال لي دخلي اسمك دخلتو النمط فتح..
معقووول قسورة عامل اسمي نمط؟؟؟ طبعا انا مخلوووعه ..فتحت الرساله لقيت جاكلين مرسل ليهو..(علمت الان لماذا اصبحت تتجاهلني..علمت جيدا بعد رؤيتي لزوجتك انني خسرتك للابد حقا هي تستحق ..نظرات الحب في عينك لها لاتخفي..خسرتك قاس واعلم ذلك وانا السبب ولاينفع الندم..اعتذر للازعاج) فرحت ياجماعه فرحت بالجد يمكن انا مالاحظت نظرات قسورة دي لكن هي لاحظت هي انسحبت براها بس جواي لسه في الم وكسرة..
قسورة جا بعد مسافه كدة انا دخلت الغرفه عايزة انوم قسورة دق لي الباب..
قسوره..نور انا حاسي بي شويه حمي وصداع ممكن انوم معاك بنوم في الارض..
نور..لالا ليه تنوم في الارض انا مازلت مرتك ياقسورة..لسه طلاقنا باقي ليهو شويه..
قسورة مانطق حسيت كلمتي وجعتو في قلبو..المهم دخل رقد جمبي وفعلا كان جسمو مسخن شديد جبت ليه مسكن حسيتو نام..رقدت جمبو الصباح كان اجازة قمت عملت ليهو شوربه خفيفه قام صلي الصبح طبعا قسورة بقي منتظم شديييد في صلاتو ودي الحاجه المريحاني..فطرنا سوا كدة وقلت ليهو قوم ارتاح دخل غرفت النوم انا جيت رقدت جمبو بالجد انا مامستحمله اشوفو عيان ما اتعودت عليهو كدة..رقدت حاوطني بي يدينو..ماحبيت اجرحو نمت جمبو كدة لي قريب العصر..قمت عملت الغداء ..
جاني داخل في المطبخ..وانا برص في الاكل حضني من وراء زكرني اول يوم اتلاقينا فيهو حاضني زي الخايف اني افارقو..قبلني عليهو وبقي يبوس فيني شديد وانا ماقادرة اقاوم..فجاه لقيت قسورة دا دموعو جاريه..انا خفت عليهو ..قسورة بتكلم نور انا اناني ومابستاهلك اقسم بالله..لكن يانور انا والله بحبك ربنا يعلم ويشهد انا سيرة انك تفارقيني دي ساي مرضتني..نور انتي بقيت لي نور لي حياتي انا كنت تايه حاسي نفسي مريض..بالجد يانور عليك الله ماتخليني..طبعا انا ببكي لاني بالجد اتوجعت..اتلفت عليهو وانا اسفه ياقسورة بس انا مصرة علي الطلاق.. فجاه حسيت الدنيا لافه بي ما وعيت الا في المستشفي..وقسورة جمبي..ودموعو جاريه انا اول مرة اشوف قسورة المفتري التقيل الرزين دموعو جاريه..قسورة بتكلم..نور عليك الله عشان خاطر ولدنا اوبتنا الجايه دي سامحيني وانا رضيان بي اي عقاب..بس انك انتي وولدي تفارقوني لاااا...طبعا انا يادوب بستوغب..انا حامل؟؟ معقول؟؟ ..
قسورة ايوه يانور انتي حامل..دي اشارة من ربنا انك ماتفارقيني..سبحان الله اتزكرت الرؤيه الانا شفتها مرتين..جد قسورة صعب علي شديد..وانا بعد دا كلو بحبووو ..اي عصرت علي كرامتي بس لقيت قلبي ..
قلت ليهو طيب توعدني عمرك ماتجرحني..
قسورة..والله اكسر نفسي وما اكسرك كفايه الضوقتك ليهو..
قلت ليهو خلاص لو جات بت سميها انت ولو جا ولد بسميهو انا..قسورة حضني ودموعو دي زي النار ..وبقي يبوس فيني بس الدكتورة جات داخله نحن دخلنا في ضفورنا..الدكتورة غمزت لي قسورة..ارجوك تعامل معاها برفق ايها الوسيم انت تفهم قصدي وغمزت ليهو تاني..
هو زاتو غمز ليها ..وقال ليها..وهل ترين انني امامها استطيع ان اسيطر علي نفسي؟؟
الدكتورة ضحكت..في الحقيقه لاااا..
ضحكت انا في هظار قسورة..قسورة انا غيرتو وقلبت كيانو.. لقيت نفسي ولقاني هو رفيقه في اصعب اوقات حياتو..
صبرت..ورضيت..كسبت بيتي وقلب راجلي..
وانا لمن حكيت ليكم عشان تبقو علي بيوتكم ١٠..وحكيت لي الاء القصه دي وانا تؤامي مغلبني نوران..وانور..سميتهم علي النور الشفتو في الحلم..
( وياااارب ماتحرم بيت من الاطفال..)
وربنا يرزقني ويرزق كل مشتاااق..
محبتكم الاء محمد الحسن ابوشمال..
ولنا في القريب لقاء استودعكم الاء.
ابريل ٢٠١٩

#عوده_روح
بقلمي: فاطمه السر
-١-
اسمي ياسمين.. عمري 23 سنه.. من اب سوداني اسمو (عبدالرحمن) و ام مصريه اسمها(ايمان) .. ( شايله اللون الابيض من امي...و شايله ملامح ابوي)
م عندي اخوان ولا اخوات.. عايشه في مصر.. احكي لليكم عن زواج امي و ابوي زمان.. ابوي شغال في التجاره بين مصر و السودان.. لاقي امي في مصر عند اصحابو مصريين.. و اعجب بيها و اتعرف عليهاو قرر يعرسها.. لمن رجع السودان كلم امو و ابوهو.. ابوي عندو اخو اكبر منو واحد اسمو (محمد) و هو بعديهو و عندو 3 اخوات اصغر من ابوي ( اسمهم سميه و امنه و اميره) .. بس اهل ابوي كلهم رفضو .. انو يعرس وحده مصريه.. ليه م يعرس سودانيه!!.. بس ابوي اصرا علي زواجو من امي.. في الاخر قرر يجي يعيش في مصر و يعرس امي.. و فعلا جا و عرسو و عاشو مع بعض..
في ولادتي،، امي تعبت شديد و جاها نزيف حاااد.. و قربت تموت.. الا شالو ليها رحمها.. عشان كده بقيت وحيده من دون اخوان.. ابوي من عرس امي علاقتو انقطعت ب اهلو.. م ضرب ليهم ولا هم ضربو ليهو.. امي كانت حاسه بالذنب طوالي انو هي السبب في انقطاع ابوي عن اهلو.. بس ابوي بقول ليها:( م ليك ذنب ده اختياري انا.. اهلي مشكلتهم عنصريين..)
قبل سنتين امي اتوفت..كانت عيانه شديد.. جاها فشل كلوي..و كانت بتغسل... بس بعد سنه من جاها الفشل ماتت...انا و ابوي زعلنا عليها شديد.. و اتاثرنا بموتها جدا.. ابوي زعل عليها شديد..
المهم...مرت الشهور و رجعنا لحياتنا العاديه ابوي بحبني شديد و بهتمي بي جدددا.. عوضني عن امي و اخواني.. بقي لي الاب والام و الاخوان
،،، ابوي عندو شركه استيراد و تصدير و انا شغاله معاهو..
بحب ابوي شديد و بهتما بيهو و بحاول اعوضو عن فقد امي... برجع من الشغل و بعمل ليهو الاكل.. كان بحب الاكل السوداني شديد.. امي كانت بتعرفو بس انا م بعرف.. كان عندنا جارتنا سودانيه.. بقت توريني اطبخ الاكل السوداني كيف.. شويه شويه اتعلمتا كم اكله و بعملهم لابوي..
يوم قاعدين انا و ابوي نتونس..
عبدالرحمن :( عارفه ي ياسمين.. نفسي اعمل فرغ ل شركتنا في السودان...)
قلتا ليهو: ( السودان?) باستغراب...
كنت بخاف من حاجه اسمها السودان م عارفه ليه.. مع انو امي م كانت بتقول لي حاجه كعبه عنو.. ولا حصل حكت عن اهل ابوي حاجه كعبه بس بتقول لي:( رفضو زواجنا) و هي م احتكت بيهم عشان تعرفهم...ابوي كان بحكي لي بالحاجات الحلوه بس عن السودان .. حكي لي بابوهو و امو و اخوانو و طفولتو و الجامعه و قرايتو.. ابوي لمن يحكي لي بكون متاثر شديد و زعلان من بعدو من اهلو و امو و ابوهو..
لمن كان عمري 10 سنوات جدي حسين ابو ابوي اتوفي... ابوي عرف بعد كم شهر انو ابوهو اتوفي...اتاثر شديد و بكي..

امي قالت ليهو :(ارجع السودان شيل العزا في ابوك)
بس ابوي رفض قال :(لو كانو دايرني اجيهم كانو ضربو كلموني..)
في الاخر ابوي رفض يمشي..

عبدالرحمن:( ايوا السودان.. مالك استغربتي كده? )
قلتا ليهو:( م عارفه بس بخاف لمن تجيب سيره السودان)
عبدالرحمن:( ياسمين حبيبتي.. لازم تحبي السودان م تخافي منو،، ما فيهو شي يخوف،، حاجي يوم و تمشي السودان و تعرفي عنو ااي شي)
قلتا ليهو:( لالا م دايره امشي هناك ي ابوي)
عبدالرحمن:( ليه? ماف شي بخوف... انا كان عندي اسبابي الخلتني اعيش هنا.. و انتي عارفاها.. بس انتي م دايرك تعيشي بعيد من اهلك.. دايرك تعرفيهم و تحبيهم.. منآي في الدنيا دي انك تعيشي في السودان وسط اهلي)

قلتا ليهو:( بس هم م بعرفوني ولا بحبوني)
عبدالرحمن:( اهلي بعرفهم كويس ...صح صعبين شويه بس طيبين.. لو عرفوك اكيد حيحبوك.. ياسمين،، انا م حصل ندمتا اني عرستا امك و كسرتا كلمه اهلي... بس اانا زعلان اني عشتا بعيد منهم.. و اتحرمتا منهم و حرمتهم مني..
كان مفروض ابقي شجاع و ارجع ليهم.. احاول اعرفهم بايمان.. و بيك،، و اطلب من امي و ابوي السماح و العفو... بس جبنتا و م حاولتا اواجههم تاني)
حسيت ابوي متاثر شديد لمن دموعو رقرقو في عيونو..
قلتا ليهو:( اسي م فات شي ممكن ترجع السودان و تمشي ليهم.. )
عبدالرحمن:( م عاارف)
قلتا ليهو: ( حاول ي ابوي) ...

جوني خالاتي المساء.. بقيت بتونس معاهم في البلكونه اسمهم.. سهي و تسنيم..
سهي:( يلا ي بت ي ياسمين.. شدي حيلك كده دايرين نفرح بيك)
قلتا ليها:( لسه بدري ي خالتو سهي)
سهي:( بدري ليه? اهو اتخرجتي و ليك كم شهر شغاله مع ابوك)
قلتا ليها:( اعرس كيف و اخلي ابوي براهو? م بقدر)
تسنيم:( يعني حتقضي عمرك قاعده جمب ابوك?)
قلتا ليها:( لا م كده.. بس انا م بؤمن بالعلاقات قبل العرس.. لو زول جا دقي الباب و قال دايرني م بقول لا)
تسنيم:( طيب نشوف كلامك ده)
سهي:( اوكي تكوني بتفكري تتزوجي سوداني?)
ضحكتا قلتا ليها:( لالا طبعا...مستحيييل)
سهي:( ايوا...لازم تتزوجي مصري)
قلتا ليها:( اكيد ان شاءالله) ..

خالاتي ساكنين بعيد مني.. بس بجوني طوالي م بقصرو معاي في حاجه.. بهتمو بي و بحاول بر

ضو

يعوضوني عن امي..

بعد نقاشنا انا و ابوي عن السودان.. باسبوع كنت في البيت بعمل في الغدا.. تلفون البيت ضرب.. مشيت رديت..
قلتا:( الو)
جاني صوت راجل:( الو..ده منزل عبدالرحمن حسين الطيب? )
قلتا ليهو:( ايوا.. منو معاي?)
الراجل:( انا محمد اخوهو الكبير...انتي منو?)
اللحظه ديك جسمي برد و قلبي بقي يدق سرعه.. اول مره اتكلم مع واحد من اهل ابوي.. م قدرتا اتكلم..
محمد:( الو...)
رديت:( ايوا...انا ياسمين)
محمد:( عبدالرحمن وين?)
طريقتو كانت بايخه شديد ممعاي...ولا حتي سلم علي ولا قال لي اي شي.. طوالي سال من ابوي...
قلتا ليهو:( في الصلاه.. )
محمد:( لمن يرجع خليهو يضرب لي ضروري..اكتبي رقمي ده عندك)
قلتا ليهو:( حاضر) شلتا النوته و كتبتا الرقم..
محمد:( شكرا) و قفل...
نتلاقي😊

#عوده_روح
بقلمي: فاطمه السر
-٢-
اتضايقتا من مكالمه عمي محمد و قلقتا شديد م عارفه ليه.. و طريقه كلامو معاي كانت بايخه شديد.. بقيت شايله الورقه الفيها الرقم في يدي و بعاين فيها.. بعد شويه ابوي جا داخل.. قعد في الكنبه جمبي و شايل سبحه بسبح.. مديت ليهو الورقه..
قلتا ليهو:( محمد اخوك ضرب و قال ليك ارجع ليهو ضروري)
ابوي اتخلع و قال لي:( محمد?? ?)
و شال الورقه من يدي و جرا علي التلفون اتصل و انا مشيت وقفتا جمبو...
عبدالرحمن:( الو.. محمد.. )
محمد:( عبدالرحمن.. امي بتسال منك)
م سلم عليهو كانو م ليهم سنين م اتكلمو مع بعض..

عبدالرحمن:( امي كويسه?? )
محمد:( لا.. عيانه شديد و ليها كم يوم بتسال منك و دايره تشوفك)
ابوي طوالي دموعو نزلت..
عبدالرحمن:( امي مالا ي محمد?)
محمد:( تعبانه .. السكري و الضغط متعبنها شديد.. و عندها مشكله في القلب.. عبدالرحمن تعال شوف امك)
عبدالرحمن:( حاضر.. بجي.. قول ليها حاجي اشوفها)
محمد:( تمام.. سلام.. )
و قفل الخط...
ابوي ختا السماعه و حيلو م شايلو.. سندتو و قعد في الكرسي..
قلتا ليهو:( حبوبه مالا?)
عبدالرحمن:( عيانه.. و بتسال مني.. )
قلتا ليهو:( امشي ليها ي ابوي.. دي فرصتك)
عبدالرحمن:( تمشي معاي?)
سكتا مساافه...
قلتا ليهو: ( ااي بمشي.. )
و ابتسمتا ليهو....
عبدالرحمن:( خلاص اضربي احجزي لينا،، علي اول طياره ماشه الخرطوم)
قلتا ليهو:( حاضر) ..

ضربتا و لقيت حجز تاني يوم المساء.. حجزتا ..
كنت مقلقه شديد من السفر لسودان و ملاقاه اهل ابوي.. الليل كلو م نمتا كويس.. بفكر في السودان.. و عماتي و اعمامي و حبوبتي.. كيف اشاكلهم و كيف حاستقبلوني و يعاملوني !!!
الصباح جهزتا شنطتي و شنطه ابوي.. و الظهر مشيت سلمتا علي خالاتي و حكيت ليهم انو حبوبه عيانه و كده... هم كمان قلقو من مشيتي ل اهل ابوي..

خالتي سهي:( م تمشيش مع ابوك ي ياسمين)
خالتي تسنيم:( ليه بس ي سهي? خليها تروح مع ابوها)
سهي:( مش عارفه.. مش متطمنه لمشيتها.. دول زمان رفضو امها.. و اسي اكيد حيرفضوها)
تسنيم:( ابوها معاها م تخافيش عليها)
سهي:( ممكن يآذوك ي بت )
تسنيم:( خلاص ي سهي.. م تكبريش الموضوع.. خلي البت تروح مع ابوها...ابوها محتاج ليها جمبو.. و كلها كم يوم و برجعو...مش حاقعدو هناك للابد)
قلتا ليهم:( م تقلقو.. م بحصل شي.. هم م حاضروني انا بت ولدهم.. م غريبه.. و ابوي جمبي م تخافو اتطمنو)

قلقتا ذياده ب كلام خالتو سهي.. بس م كان ممككن ارجع في كلامي و اخلي ابوي يمشي براهو.. و هو محتاج لي جمبو.. ودعتا خالاتي و بناتهم بعد كمييييه وصايا منهم و رجعتا البيت...
لقيت ابوي قاعد في الصاله،، سلمتا و قعدتا..
عبدالرحمن: (اعتزرتي ل خالاتك اني م قدرتا اصلهم? )
قلتا ليهو: ( ايوا .. قالو بتصلو عليك.. )
عبدالرحمن:( طيب..جهزتي حاجاتك?)
قلتا ليهو:( ايوا..)
عبدالرحمن: ( كلمتا سمير يجي يودينا المطار و يخلي عربيتي معاهو لحدي م نرجع)
قلتا ليهو:( كويس طيب.. يلا قوم اجهز.. بقي ساعتين علي المطار) ...
نتلاقي😊

#عوده_روح
بقلمي: فاطمه السر
-٣-
ابوي كان مقلق من السفر و انا كمان.. بس كل واحد فينا داسي الخوف و القلق جواهو من التاني.. ابوي ضرب ل عمي محمد ،،،
قال ليهو (حنصل الساعه 9 مساء...)

وصلنا المطار عملنا الاجراءات و مستنيين الطياره..
عبدالرحمن:( مقلقه ي ياسمين?)
قلتا ليهو:( يعني .. شويه.. )
عبدالرحمن:( خايفه من شنو?)
قلتا ليهو:( انا م بخاف و انت جمبي.. بس... مقلقه عشان م حصل لاقيتهم و لا بعرفهم.. و هم زمان كانو رافضين زواجك من امي ( الله يرحمها) و اسي خايفه يرفضوني انا كمان.. )
عبدالرحمن:( م تخافي حبيبتي.. ماف زول بقدر يعمل ليك حاجه وله يزعلك.. عارفك طيبه و عاقله و حتتفهمي ااي حاجه تحصل)
قلتا ليهو:( ان شاءالله)

وصلنا الخرطوم.. من نزلنا المطار انا قلبي بقي يدق شديد.. و بعاين في وشوش الناس و خايفه.. م عارفه خايفه من شنو..
شلنا شنطنا و طلعنا .. ابوي بقي بفتش علي عمي محمد.. بعد شويه لقااهو جاي عليهو من بعيد و لابس جلابيه و عمه.. ( نفس ملامح ابوي ..اللون الاسمر.. بس ابوي جسمو مليان.. و عمو محمد انحف من ابوي بشويه) جا علينا سلم علي ابوي بالحضن بس في جفا في سلامو و سلم علي في يدي ..
عمو محمد:( كيفك)
قلتا ليهو:( الحمدلله)
لا قال لي حمدلله علي االسلامه لا ااي شي.. و سلامو من طرف يدو.. اتضايقتا جدا من طريقتو.. بس قلتا في نفسي:( من اولها كده.. ربنا يستر علي الجاي)

مشينا باتجاه عربيتو.. سايق لاندكروزر .. ركبنا.. هو و ابوي طول السكه بتكلمو عن مرض حبوبه..
محمد:( قالو شاكين في مشكله في قلبها.. بس م متاكدين.. دايرين نعمل ليها عمليه قسطره عشان نعرف المشكله)
عبدالرحمن:( ي ساتر...هي عيانه من متين?)
محمد:( من سنين جاها سكري.. تقريبا بعد عرسك بشويه و تاني بعد كم سنه جاها ضغط... هي م بتحافظ و لا بتاكل و من وفاه ابوي اكلها بقي بسيط شديد.. و كل مره سكريها بيعلا او بهبط و مرات تمشي المستشفي و مرات م بكون محتاج...و احنا طبعا كلنا في البيت معاها... ابوي عمل لينا شقق فوق.. و عايشبن انا و اخواتي فوق.. و امي و اميره تحت)
عبدالرحمن:( كويس والله.. ماشاءالله)

كنت بسمع في كلامهم باهتمام كبير.. دايره اعرف الحاصل..
وصلنا قدام بيت ابيض كبيير.. عمي دقي البوري.. فتح البواب الباب و دخل بالعربيه علي حوش كبييير و يمين و شمال الحوش في حديقه كبييره.. البيت كان حلو و كبير شديد.. نزلنا،، عمي قدامنا و اناا ماسكه يد ابوي و قلبي بضرب شديد.. ابوي كمان كان متوتر شديد...

دخلنا علي صاله كبيره.. لقينا فيها ناس قاعدين.. عماتي ال 3 قاعدين و معاهم اولادهم.. طبعا انا م بعرفهم.. بس عرفتا انو ديل حاكونو عماتي من الشبه البينهم.. من شافو ابوي جو جارين عليهو و حضنوهو ال تلاته و ببكو... ابوي كمان حضنهم و ببكي... كانو مشتاقين ليهو و فاقدنو شديد... انا وقفتا بعيد بعاين بس..و دموعي نازله.. لمن خلصو سلامهم.. ابوي بمسح في دموعو و مسكني من يدي..
قال ليهم:( دي ياسمين بتي)
سلمو علي بيدهم بس.. حسيتهم جافين ذي محمد.. الا اميره خالتي الصغيره.. حضنتني و سلمت علي كويس..
اميره قبلت علي بنات و اولاد عماتي ..
اميره:( تعالو سلمو علي عمكم عبدالرحمن و ياسمين)
جو كانو 4 بنات و 3 اولاد..
اميره بقت تعرفنا عليهم..
اميره:( ديل مياده و دلال بنات سميه .. ) ابوي بحضنهم و بقول:( اهلا اهلا..ماشاءالله...)
و انا بسلم بيدي..
اميره:( و ديل سلافه و سامي اولاد امنه)
اميره: ( و ديل اولاد محمد .. ايهاب و امجد و زهره.. مسمينها علي امي)
عبدالرحمن: ( اهلا اهلا...مااشاءالله..عيال محمد كبرو والله اما الباقين ديل م شفتهم)
امنه: ( ايوا انت شفتا عيال محمد كانو صغار.. بس ديل م حضرتهم)
عبدالرحمن:( العمر جرا سرعه والله.. ربنا يبارك بس... وين امي?)
امنه:( امي فوق نايمه)
عبدالرحمن( بس اشوفها.. م بقدر استني تصحي)
محمد:( تعال)
مشي عمي محمد و انا و ابوي وراهو.. و ورانا سعاد و اميره و امنه.. طلعنا السلم.. و مشينا يمين في ابواب كتيره.. عمي محمد فتح باب..

محمد :( ادخلو)
دخلنا الغرفه..عمي فتح النور.. لقينا حبوبه راقده نايمه... كانت حجمها مااشاءالله مليان و لونها قمحي.. و فيها شبه كبير من ابوي.. ابوي جرا عليها مسك يدها حبي عليها و دموعو نازله.. و حبي في راسها.. و في قدمها.. و انا بقيت ببكي من المنظر... حبوبه فتحت عيونها عاينت لقت ابوي...
حبوبه:( عبدالرحمن..ي ولدي)
و فتحت يدينها.. حضنت ابوي عليها و بقت تبكي و ابوي كمان ببكي... و عماتي دموعهم نزلت.. الا عمي محمد ساكت م اثر فيهو شي..
ابوي و حبوبه حاضنين بعض قريب 10 دقايق.. ابوي بقول لحبوبه:( اعفي لي ي امي.. اعفي لي)
و حبوبه:( عافيه ليك ي ولدي.. اشتقت ليك ي عبدالرحمن ،، اشتقت ليك ي ولدي)
عبدالرحمن:( و انا كمان اشتقت ليك ي امي.. اشتقت لابوي.. اشتقت ليكم كلكم.. )
حبوبه:( ابوك مشي ي عبدالرحمن

.. بس كان راضي عنك ،، و عافي منك ي ولدي)
ابوي بقي يبكي ذياده.. الا عماتي هدوهو... قعد جمب حبوبه في السرير..
عبدالرحمن:( تعالي ي ياسمين.. سلمي علي حبوبتك)
حبوبه:( ماشاءالله.. تعالي) مشيت عليها حضنتني و باستني..
حبوبه:( ماشاءالله.. قمر منور بس.. شبه حبوبتك لمن كانت شباب)
ابوي و عماتي ضحكو...

قعدتا انا و ابوي جمب حبوبه.. و عماتي في الكنبه و عمي محمد في الكرسي جمب الباب..
جات دلال شايله عصير و مويا و قدمت لينا...
بقو بتونسو.. حبوبه و عماتي و عمي محمد شويه بتونس م كتير.. كان شكلو صعب شديد و جافي.. و نظراتو لي م مريحه..
نتلاقي😊

#عوده_روح
فاطمه السر
-٤-
بعد ساعه من الونسه حسيت روحي تعبانه.. اميره عمتي لاحظت لي..
اميره:( تعبانه انتي ياسمين?)
قلتا ليها:( يعني شويه)
ابوي:( امشي نومي ي ياسمين )
اميره:( تعالي معاي)
مشيت مع عمتي طلعنا برا مشينا علي غرفه .. دخلنا. . عمتي.. دي حتبقي غرفتك ،، نومي هنا..

قلتا ليها: (طيب بس ممكن زول يرفع لي شنطتي? )
اميره:( طيب... حاكلم الاولاد يجيبوها ليك)
قلتا ليها: ( شنطتي السودا ،، حقت ابوي ال كحليه)
اميره:( طيب)
و طلعت.. بقيت بعاين في الغرفه.. كانت كبيره و حلوه و فيها سرير كبير و دولاب و كومدينا.. بعد شويه الباب دقي قلت:( ادخل) .. جا داخل امجد ولد عمي محمد..
امجد:( شنطتك) و هو مبتسم...
قلت ليهو:( شكرا)
ختاها و طلع قفل الباب..

استحميت و غيرتا رقدتا انوم.. م نمتا طوالي و قلقتا ،، نمتا و صحيت كم مره..
صحيت الصباح بصوت ابوي بقول لي...
عبدالرحمن:( ياسمين.. اصحي.. )
فتحتا عيني..
عبدالرحمن:( صباح الخير)
قلتا ليهو بابتسامه( صباح النور)
عبدالرحمن:( يلا الساعه 10.. قومي)
قلتا ليهو:( حاضر.. )
عبدالرحمن: ( انا قاعد تحت في الصاله)
و قام طلع..

لمن طلعتا الصاله..لقيت ابوي و حبوبه و عماتي امنه و سميه.. و دلال و شايله ولد صغير عمره كم شهر.. و قدامهم في صينيه شاي كبيره و صحانه فيها حلويات..

قلتا ليهم:( صباح الخير) و قعدتا..
ردو كلهم:( صباح النور)
حبوبه:( نمتي كيف حبيبتي?)
قلتا ليها:( كويس الحمدلله.. انتي اصبحتي كيف?)
حبوبه:( بشوفتكم بقيت كويسه)
قلتا ليها:( الحمدلله.. ان شاءالله دائما)
حبوبه:( ادي ياسمين شاي ي سميه)
سميه كبت لي الشاي .. قمتا شلتو و ادتني صحن فيهو حلويات.. بقيت بشرب و هم بتونسو..
عاينتا ل دلال قلتا ليها:( ده ولدك)
دلال:( ايوا)
قلتا ليها:( ماشاءالله)
قمتا شلتو و بقيت بلعب معاهو..
بعد شويه جات نازله مرا.. ابوي لمن شافها.. قام مبتسم.. عبدالرحمن:( ليلي)
ليلي:( عبدالرحمن.. حمدلله علي السلامه)
و سلمت عليهو.. عاينت لي بطرف عينها..
عبدالرحمن:( دي ياسمين)
مدت يدها سلمت بطرف يدها..
قالت لي:( كيفك)
قلت في نفسي:( دي منو!! حتكون مرت محمد.. مسيخه ذيو)
عبدالرحمن:( دي ليلي مرت محمد عمك)
ابتسمتا و سكتا...
الظهر طلعتا الحديقه،، كان في جزء ورا فيهو حوض سباحه و في مرجحانيه و ذي مظلات كده،، قعدتا هناك و خاته السماعات بسمع في اغاني..
جات ماشه زهره علي البيت لمن شافتني جات علي مبتسمه..و بتتكلم ...
طلعتا السماعه..
قلتا ليها:( قلتي شنو?)
زهره:( مليتي براك?)
قلتا ليها:( يعني.. انتي في الجامعه?)
زهره:( ايوا.. بقرا طب اسنان)
و قعدت جمبي...
قلتا ليها:( كويس والله.. انا درستا اداره اعمال.. و شغاله مع ابوي في شركته)
زهره:( كويس والله.. احنا كلنا بالنهار بنكون مافيشين.. بنرجع الظهر.. حسب الجامعه او الشغل)
قلتا ليها:( ايوا شايفه دلال بس القاعده)
زهره:( ايوا دلال الايام دي هنا.. بترجع بيتها بكرا.. م شغاله... راجلها م بخليها تشتغل.. صعب شديد)
قلتا ليها:( مع ولدها الشغل صعب)
زهره:( ايوا صح.. بس من عرست منعها الشغل.. انتي بقيتي تعرفينا?)
ضحكتا قلتا ليها:( لسه)
ضحكت و قالت لي:( بوريك... انا عندي اخواني اتنين.. امجد و إيهاب... امجد قاري هندسه ميكانيكا.. و إيهاب قاري اداره و ماسك البقالات حقت ابوي و جدو ،،، م برجعو الا قريب المغرب... و تاني في بنات عمتو آمنه.. سلافه و سامي... سلافه في الجامعه و سامي شغال في شركه طيران... تاني اولاد عمتو سميه.. دلال المتزوجه و مياده في الجامعه... بقرو هي و سلافه في جامعه وحده.... كده عرفتي? )
ضحكتا قلتا ليها:( ايوا) ...
نتلاقي😊