#رضيت_بقدري فكان هو🔞
بقلم الاء محمد الحسن ابوشمال
-5-
بعد دوام نور انتظم في الشغل كان الكل ملاحظ اهتمام دكتور قثاء بي نور حتي هي كان مخلوعه ومتحيرة ليه الزوله دي بتتعامل معاها كدة..وفي يوم قثاء كان عندها شغل مع نور وبعد خلصو من الشغل ونور طالعه..
قثاء .. نور عايني انتي عندك حاجه ولا نتونس شويه
نور بي علامه استفهام..لا والله يادكتورة ماعندي شي عندي فوايل بقفل فيها بس وبطلع..
قثاء.. طيب حابه احكي معاك شويه اذا ماعندك مانع ..
نور هزت راسها بالايجاب بس..وطلعت والف علامه استفاهم وفي نفسها..يارب عايزة بي شنو نور قفلت شغلها وجات دقت الباب ..
قثاء..اتفضلي يانور مامحتاجه اذن انتي..نور دخلت وقعدت..
قثاء تقريبا قرت افكار نور..اكيييد متحيرة وبتقولي قثاء دي عايزة مني شنو وليه بتعاملني كدة ولو جينا للحق انا زاتي مستغربه بس بلقي نفسي بعاملك كده تصدقي لو قلت ليك من يوم شفتك وانتي بتبكي في الاستقبال انا حسيتك زول غير وحبيتك قبل لا اعرفك لا اتكلم معاك مع اني ما زوله عاطفيه او قولي قاسيه شويه ..بس يانور انتي فيكي حاجه غير والله ..
نور وهي بتسمع بي انصات..وبعد شويه ردت وقالت ليها..حبوبه بتقول مثل (النيه زامله سيدا) يمكن عشان نيتي طيبه ويمكن عشان اتظلمت كتيييير وفقدت حاجات بحبها كتير ربنا كتب ليك فيك طوق النجاة وربنا بدي الزول حسب طيبتو..
قثاء..سبحان الله يانور انتي فيكي فهم غريب وحسيتك فاهمه الحياه كويس رغم انك صغيره حاجه كدة تحير..
نور..يمكن الشفتو في الحياه قواني وخلاني انسانه بعرف اخد قرار ومافي زول فينا معصوم من الغلط بس الحياه بتعلم..
قثاء متكيفه خالص من نور لمن ماعارفه ترد...
طيب يانور ممكن اتدخل في حياتك شويه..واسألك يوم جيتي للمعيانه كنتي بتبكي مالك..
نور..كان المبكيني كتير اولهم امي..
قثاء..مالا امك..
نور..جربتي يادكتورة انك تنظلمي من اقرب الناس ليك جربتي انك تعيشي في غربه بين اهلك طيب جربتي ابوك يموت بي حسرتو بعد اهلو اكلو حقو والبوجع اكتر جربتي امك تصحي من الصباح عشان تعوس الكسرة عشان تبيعها للجيران وتوزعها وترمي الطعميه عشان ماتحوج اولادا لي زول..طيب جربتي تحبي انسان وفجاه الموت ياخدو منك..ياخ انا لو حكيت ليك حتلقي البكاء دا شويه علي الانا حاسه انا كل الكان مبكيني اني فشلت في اني القي وظيفه تعيش امي واخوي وتعيشني كريمه..ويمكن الحمدلله القلتها في عز الوجعه داك ياها الوقفتك في طريقي..ونور بتتكلم وعيونا فايضه دموع..
قثاء ودموع لاشعوريا" جرت...وردت لي نور انتي قويه يانور عارفه زكرتيني منو..زكرتيني قثاء احمد المجذوب ..
نور واتخلعت..كيف..
قثاء..زي مابقول ليك ماتفتكري يانور الانا فيهو دا ورثتو..لا يانور انا تعبت فيهو قرش قرش..يمكن انا انظلمت زيك واكتر..بس انت فرقك انو امك حيه ودي نعمه ..طيب انا البت الكنت لسه في الجامعه امي وابوي ماتو في نفس اللحظه في حادث وحقنا اكلو عينك عينك جربت اخد مسؤوليه اخو واربيهو ..
ياخي انا قسورة دا بحس انو انا امو ..
نور بي تعجب..قسورة ؟؟ قسورة منو ودا شنو الاسم الغريب دا..
قثاء..اخوي الوحيد مقيم في كندا..اكبر رجل اعمال ارجل من ممكن يلاقيك في الدنيا..قسورة دا ربيتو وحسيت بي نجاحو زي وزي اي ام..يمكن عشان فقدت احساس الامومه مع راجل وحش.. نور انا وصلت بي اللحظه انو اغسل في البيوت عشان ما احتاج لي زول انا قريت اخوي احسن قرايه وبديت من الصفر وربنا وقف لي ود حلال في الجامعه ساعدني كتييير لحدي ماوقفت وبقيت انجح سيدة اعمال ..ولما جيت اتزوج وقعت غلط راجل طماع اناني ضوقني المر واطلقت منو ..واسي انا عايشه حضرت ونميت قرايتي واخدت دكتوراه ..صدقيني يانور لو قلت ليك انا اول مرة احكي لي زول عن حياتي..يمكن حسيت فيك الاخت واو البت الانا ماولدتها والله حبيتك من جوة قلبي..وفي نفس الوكت عشان اوريك انو ماكل زول ناجح نجاحو كان هين..وعشان اديكي دفعه لي قدام شويه واقول ليك مرحب حباب طريقك في النجاح..نور كانت بتسمع الكلام وبتبكي حست انها ربنا خت ليها ملاك قدامها وانها داخله علي مرحله جديدة تحدي وفعلا طريق نجاح..
نور طلعت من الشركه بي روح جديدة وايجابيه جدا حبت قثاء شدييييد وحستها فعلا اختها..وكان كل ماتفكر في كلام قثاء براها تبتسم..
وصلت البيت وهي ماشه علي الباب وقلبها بتقبض زيادة خافت شديد من الاحساس..دخلت لاقت مرتضي وعيونو مورمه من البكاء وماشايفه امها بقت تسال فيهو مرتضي في شنو مرتضي امي وين جاوبني..ومرتضي مابرد بس دموعو جاريه نور انهارت وحست الدنيا لافه بيها..
وفقدت الاحساس وفجاة اغمي عليها...
يتبع...

#رضيت_بقدري فكان هو 🔞
بقلم الاء محمد الحسن ابوشمال
-6-
نور ماحست بالدنيا ..وحاسه انها في عالم تاني بعد تستعيد في وعيها شويه شويه لقت نفسها في رجول امها وصوت امها بعيد..
احسان..بسم الله يانور في شنو
نور..فتحت عيونها كويس وعاينت لي امها زي المامصدقه وقعدت تبكي..امي انتي كويسه ..وبقت تحضن في امها ..
احسان ..يابت انا كويسه قولي بسم الله الرحمن الرحيم ..
طيب مرتضي لقيتو ببكي ولقيتك ماف في شنو؟؟ انا قلبي مقبوض من طلعت من الشغل امها دنقرت وعيونا اتملت دموع..عهد بت عمك ضربتها كهربا وماتت ..
نور..ختت يديها في راسها عهودة لا اله الا الله محمد رسول الله..لي متين بس الوجع دا ياخ انا مامستحمله احييييي كر علي عهودة حبيبتي لاحولا ولاقوة الا بالله ..
احسان..انا ومرتضي حانمشي وانتي ماحتقدري تغيبي من شغلك ..
نور ..مستحيل يا امي انا عهودة دي ربيتها مع مرتضي لا اله الا الله دقيقه انا حاتصل علي المديرة ..
نور اتصلت علي قثاء واستأذنت..
قثاء..طيب تعالي شيلي مصاريف للطريق وياستي حاخصمهم من مرتبك..
نور ..لالا والله مامحتاج نحن معانا البكفينا ..
قثاء..طيب ماحاضغط عليكي وتمشي وتجي بالسلامه ..
نور..الله يسلمك..
لمينا هدومنا بي كميه وجع جواي ما قادرة اوصفها حسيت لو جاتني مصيبه تاني ممكن اموووت وانا واقفه ..واتحركنا علي البلد..
في مكان بعيد ..وهو لابس ترينق ولابس لبس رياضي كامل وجاري ومركب سماعاتو ..زي الهارب من نفسو اومن الناس الحولو فجاه تلفونو ضرب..
مسك التلفون وقعد في اقرب مكان ورد زي المامصدقه..
قسورة..جاكي لماذا تتعاملين معي بهذا الاسلوب..
جاكلين..قاس ارجوك كف عن الاتصال بي مللت من الشرح كل مرة والتبرير..انت تعلم انني احبك لكن ليس هناك شي بي يدي هكذا كتبت اقدارنا..
قسورة.. انت تستغلين تعلقي بك..
جاكلين..لا قاس فقط اخبرك للمرة الاخيرة ان اهلي يرفضون ارتباطي بشخص من اصل عربي وبالاخص من عرق اسود..
قسورة..انا رجل لي شأني في المجتمع ربما افضل من ابناء عرقك..وعرقي الذي لاتقبلون به هو اطهر عرق علي الارض..
جاكلين..قسورة ارجوك كف عن الاتصال بي وارجوك ان تنساني انتهي حديثي ولا مجال للعودة..
قسورة ماكمل كلامو قفل الخط في وشها ورمي التلفون في الارض ياخ منعول ابو الزله ومنعول ابو الحب الذي دا يااااخ في ستين ..
واتنهد وقام كمل جريهو وجواهو مليون وجع..
في البلد..
وصلنا البكاء ويا الله من وجعه عهودة كانت زهرة البيت منورة بيتها يادوب فتحت ماتمت ١٦ سنه فرحه امها وسط الاولاد ..
امها لابتبكي ولا بتتكلم ولابتصد ولابترد بس قاعدة وعيونا بعيدة ..ورغم العملتو المرة دي في امي بس حسيت بي كميه وجع لمن شفتها كدة ..ومشيت عليها التقول كانت منتظراني بس جات علي ومن لحظه البكاء هي مابكت لحدي ما حضتني وصرخت احيييي يانور من عهد واحيييي من نار عهد احي من حبيبتك الكنتي بتقريها وكنتي بتسريحها وكنتي بتريدها وانا من العبرة حسيت اضني قفلو وروحي حسيتها في صدري بكيييييت من قلبي علي كل وجع عشتو ابوي هاشم عهد روحي زاتها بكيت عليها ..وحضنت امي احي يا احسان عهد خلتني مدفونه حيه بنيتي الطلعت بيها من الدنيا اعففففي لي يا احسان والناس بي بكاها كل الخلق بكت علي نار البت دي ..
مشيت علي الرجال لقيت مرتضي قاعد قي الواطه وبعزي كيف ياخ رفيقتو من الروضه..وكان منتظرا متين يخشو الجامعه عشان يكون سندا..ناديت مرتضي قام..مرتضي نادي لي الصادق عمي..
شايفه عمي سراب ومعاهو زول جايين علي..والله رغم الظلم الظلمنا ليهو لمن شفتو كدة انهرت وحضنتو والله حسيت فيهو ريحه ابوي وعمي دا بجعر بي اعلي صوت ..
عاينت لقيت منتصر ولدو الكبير كمان لحظه الوجع شلت معاه الفاتحه وهو دموعو عشرة عشرة ورجعت محل النسوان..
عدت ايام البكا مرة زي الحنضل والله ريحه عهد في كل مكان بس ماغاليه علي الكريم..
والناس شويه خفت وانا قاعدة برتب في حالي عشان نرجع الخرطوم جاني مرتضي داخل..
مرتضي..نور عمي الصادق منتظرك في حوش الديوان ..
نور..معاهو منو وعايزني لي شنو؟؟
مرتضي ..والله يانور ماعارف قال لي نادي نور وخلاص..
نور..خلاص خلاص لبست توبي ومشيت ليهو لقيتو قاعدة في فرشه في الارض وماسك سبحتو ودمعتو جاريه والله حنيت عليهو شديييد ..
وقعدت جمبو في الارض ..نعم عمي ..
رفع راسو..حبابك يمه يابت الغالي..
نور ..الله يخليك ياعمي حال الدنيا كدة ربنا يلزمك الصبر يارب..
الصادق..اميين يارب وشويه سرح ..واستعدل قبل اقول ليك اي شي انا دايركم تعفو لينا ..
نور..علي شنو ياعمي ..المفروض ياخد العفو وربنا يرحمو.. اما انا وامي نحمد الله مستورين وعااافين لوجه الله تعالي..
عمي طلع ليهو ورق مطبق من جيبو..امسكي يانور دا حق ابوك ربنا يرحمو علي داير المليم وبي ارباحو كمان قطع الاراضي..وشيك بي حقوقو الماديه انتي واعيه وانت اتكلمت معاك انتي ما اتكلمت مع امك..
نور..طيب ياعمي انا بشيلو لانو دا حق ابوي بس عفو امي اطلبو منها براها ولو علي انا عافيه في الاخر انتو عزي وضهري ..

عمي دمعتو جرت وسلم علي في راسي..انا قمت معبورة وفرحانه في نفس الوكت اخيييرا حقنا براهو رجع صحي البياكل حق الناس الله بوريهو في حقو..
مشيت ناديت امي مشت علي عمي ومابعرف الدار بينهم شنو..
دخلت مسكت تلفوني لقيت مروان مرسل لي ما لحقت رديت عليهو جاتني داخله نهي بت عمي سلمت علي وقعدت..رفعت راسي اها خيييير يا تبر..
نهي طبعا النوع الاروش كدة وانا بريدها ساي لانها علي نيتها..
نهي ضحكت..عايني بدون مقدمات منتصر يانور قال عايزاك ..
نور استعدلت عديل للرد...دقيقه دقيقه والله ياهو الفضل منتصر منو وجن احمر منو انا دا اشوف العمي ولا اشوفو كمان معاها فتحت نفس..مش دا الكان السبب في اكل حقنا ابعدي مني ود امو دا...
نهي..يانور منتصر راجل وحقكم والله رجع بي كل طيب خاطر ..وهو شاريك ياخ ..وبعدين عيبو شنو سماحتو تلخم متعلم ومحامي وفاااهم..
نور عوجت خشمها..امشي قولي ليهو نور قالت ليك انا ماعايزة اعرس..واحسن ليك ركز في حزن اختك..وشوف البتناسبك لاني انا مااابنسابك..
نهي عوجت خشمها..عنك سقيله خلاص..
نور لاشعوريا ضحكت في براءة نهي وطلعت خلتا مسكت التلفون وبقت تتونس مع مروان..
يتبع..

#رضيت_بقدري_فكان_هو
بقلم الاء محمد الحسن ابوشمال
-7-
نور قاعدة في محلها وشايله التلفون بتتونس مع مروان..مروان زول عسل ودمو خفيف شديد..
نور..اها يامرمر الخبر شنو..
مروان..مرمر في راسك الكبير انتي شايفاني نص كم ولاشنو كمان معاها مرمر..
نور..هههههه اها يدلعوك بي شنو وشك القبيح دا..
مروان..هوووي اعملي حسابك انا قمت بوقف صفوف بس ما داير اقيف ساي ماناقص..
نور..قووول والله ورسلت ليه الاموشن دا😏
مروان..والله انا بت اختي بتقول ليه شيفاي اوبروي الفي مسلسل شنو كدة جنون😌
نور..هههه للعشق جنون يا أمي..
مروان..انا فارغ لمن احضر الهنود كمان..
نور..والله حقيقه انت حليووو يامروان وفعلا فيك تقاطيع من شيفاي دا بس انت علي احلي واروق..
مروان ..احم احم ماقلنا من الاول.. طيب يانور بالمناسبه لو مافيها ازعاج ممكن اشوف ليك صورة ولو طلبي بزعجك اعفي لي..
نور..عيب عليك يامروان يمكن انا بعرفك فترة بسيطه بس المعدن غلاب واقسم بالله بحسك اخوووي ومن جوة قلبي..
مروان..ياسلام والله كلامك دا دخل قلبي جوووة ..
نور دقيقه طيب..رسلت ليهو صورة بي لبس الشغل وصورة معاها سلام ماخدين فيها وضع الهباله..
مروان وصلتو الصورة..
ولاركز مع نور زاتو يابت المعاك دي منوووو؟؟
نور..اهااا عايزين ندخل شمال..
مروان..انا ماحاتغزل فيك نهائي لاني شفتك زمان ف عيون هاشم بس البت المعاك دي منو..
نور..سلام..
مروان دقيقه دقيقه سلام ماشه وين..
نور..هههههه غبي جنس غباء اسمها سسلام
مروان..ااااه اسمها يشرح النفس ..
نور..ههه ايوااااا شكلي حأغير رايي واحظرك شكلك زي جماعتنا كاسرين التلج ..
مروان..راااضي اديني رقمها واحظريني ..
نور..كلب خلاص
مروان..والكلاب علي اشكالها تقع هيييي ياكا..
نور ضحكت لمن دموعها جرت والله مروان دا عسل..
طيب يامروان انا اقوم ارتب حالي لانو بنسافر الصباح ..
مروان..طيب ياخيتو نتلاقي ان شاء الله بس طمنيني عنكم اول بي اول ..
نور كلمه خيتو دي ريحتها شدييد وحستو فعلا بعتبرا اخت حتي في صورا ماعلق اي تعليق ممكن يزعجها
ونور قاعدة جات امها داخله..وشكلها عيونا فيها دموع..
نور..مالك يا امي في شنو..
احسان..كنت مع عمك ومرتو والله قاطعين قلبي..
نور..ياهو حال الدنيا ربنا يصبرهم..المهم وراك عمي بالعملو؟؟
احسان.. اي قال لي اديت نصيبكم كلو لي نور..
نور ..طيب يا امي اديك ليهم ولا الفهم شنو..
احسان..نور دا ما وكت كلام زي دا كدي خلينا نرجع الخرطوم وبعد داك نتفاهم ..
نور..طيب طيب يا امي خلاص بدري نتحرك انا غبت من الشغل قريب اسبوع كترتها والله..
احسان ..اي ان شاء الله اول بص طالع..
في مكان تاني من ارقي احياء الخرطوم..
في بيتها الفخم..
وهي لابسه عبايه استقبال ظريفه ..وبتتكلم مع الحبشيه حقتها..
زينات اعملي لي قهوة ..
زينات..طيب ماما بس اليوم قهوة كتير شربتي انتي..
قثاء..والله راسي دا ضااارب وضارب اخماس في اعشار ومليون فكرة في راسي ماعارفه اعمل شنو زاتو.. طيب اقول ليك جلي القهوة اعملي لي عصير برتقال باااارد وجيبي لي بطيخه..
زينات..طيب ماما قثاء..
قثاء..كدي ناوليني تلفوني دا وامشي...
زينات مدت التلفون لي قثاء ودخلت المطبخ ..
قثاء بتحاول مرة ومرتين التلفون مابرد ختت التلفون جمبها ومسكت الريموت بتقلب..وهي سارحه تلفونا رن..
ردت..وبعدين معاك ياقسوره مامعقول البتعملو فيني دا ..
قثاء والله انا راسي دا ملخبط لخبطه ياخ كرهت الدنيا والناس..
قثاء..عشان الكافرة دي..
قسورة..ماتقولي كافرة يا قثاء هي كتابيه..
قثاء..لا كتابيه لا مجوسيه ..اسمع هنا ياقسورة انا مشيتك علي الفي راسك كتير وخليتك تجرب كل تجاربك انا عمري ماغصبتك علي حاجه ولا فرضت عليك شي انت مادايرو خليتك شفت الدنيا وجربت اي حاجه صح وغلط بس لحدي هنا انتبه لي مستقبلك وشوف الصح والغلط انت الليله عمرك ٣٢ سنه القدرك عندهم اولاد..واعفي لي لو كلام حار انا خايفه عليك والله بس..
قسورة..عارفاك والله يا اختي وياحبيبتي ويا امي وعمري مابزعل منك بس كدي اديني فترة اتخطي نفسياتي دي وبحصل خير..
قثاء..تمام حبيبي وياقسورة عليك الله صلاااتك اوعك تقطعها ..
قسورة..ادعي لي ربنا يهديني والله بصلي بس مامنتظم..
قثاء..الله يهدي الجميع ياروحي..يلا ودعتك الله في امان الله..
قسورة قفل التلفون واتنهد..الله يخليك ياقثاء حتي لو كلامك نار انا بريح قلبي..ربنا يقدرني واتخطي العقبه دي بس..
باب المكتب دق..
قسوره..تفضل بالدخول..
جوليا..مستر قاس اتيت لاخبرك اني سأذهب لقد انتهي دوامي..
قسورة..حسنا" اذهبي..ورجع راسو لي ورا ومسكو وغمض عيونو..
جوليا..مستر قاس هل تشعر بالصداع؟؟
قسورة..اجل قليلا ..
جوليا حسنا" دعني ادلك لك كتفيك وراسك ستشعر بتحس..
قسورة هز راسو ..

جوليا جات عليهو وفكت ليهو زراير القميص وبدت تلك ليهو في راسو واكتافو وهو مسترخي فجاه بقت بتهبش فيهو بي طريقه غريبه..وبقت تقبل فيهو في وشو وهو اتخلع في التصرف وفجاه بقت تقبل فيهو في خشمو وهو ماقادر يقاوما وبدون مقدمات لقاها بقت بالملابس الداخليه وبتحاول انا تتقرب منو ..
قسورة وقف علي حليو ومسكا من يديها..
جوليا هل جننتني ماذا تفعلين..
جوليا..لماذا قاس الا اعجبك..
قسورة..جوليا ارجوك كفي عن هذا.
جوليا..قاس انت تعجبني كثيرا" واتمني لو امضي معاك ليله واحدة فقط ..
قسورة..جوليا لقد تخطيتي حدودك ارجوك ارتدي ملابسك واخرجي قبل ان افقد السيطرة علي اعصابي..اذهبي ..
جوليا لبست هدوما..وهي جمب الباب..اريد فقط ان اخبرك ان جاكي ستتزوج الاسبوع المقبل..لهذا اردت ان انسيك قليلا من الالم..
قسورة..ارجوك جوليا اخرجي ..
جوليا طلعت ورزعت الباب وراها ..
قسورة مسك راسو اصلا عايز يتكسر ياااا الله دا شنو البحصل لي انا ..دي مصائب شنو .. يا الله عااارفو دا بعدي عنك بس يا الله اكتب لي توووبه نصوووح..
واشرقت شمس الصباح في الولايه الحنينه وحلات صباح الشماليه..
شربو الشاي وودعو اهلهم بالدموع ولسه فراق البنيه حارقهم ..بس دا حال الدنيا...
واتحركوا..وفي البص احسان بتتكلم مع نور..
نور صحي الكلام السمعتو دا..
نور..كلام شنو يا امي..
احسان..ماتعملي نفسك مافاهماني..
نور استعدلت علي امها..والله يا امي مافاهماك بتتكلمي عن شنو..
احسان..منتصر..
نور..ايواااااا دا ما وكتو يا امي كدي خلينا نصل بالسلامه وبعد داك بحكي ليك الكلام وافهمك..
احسان.. طيب يانور نشوف الاخر..
والدنيا دائرة مدورة..
وقفه...
يتبع....

#رضيت_بقدري فكان هو 🔞
بقلم الاء محمد الحسن ابوشمال
-8-
(حاحكي بي لسان نور)
وصلنا الخرطوم علي الضهريه فكدا ..ونزلنا في البيت وامي استلمتني..
احسان..اها يانور احكي..
نور..امي كدي خليني اجر نفسي ونروق البيت شويه وبعد داك نقعد نتفاهم..
احسان..نور بطلي اللف والدوران ..
نور..امي انتي عايزة توصلي لي شنو..منتصر رفضتو ومابغير رائي انتي عاجبك؟؟
احسان..مالو يانور ولد مال وهدومو وليهو وزنو ..
نور..دقيقه يا امي انتي ناسيه انو هو كان السبب في اكل قروشنا وحق ابوي لانو محامي ساعد في تزوير الاوراق..ترضي يا امي انا اعيش مع واحد وانا شاكه في قرشو حلال ولا حرام ..امي انا لو ربنا رزقني مابرضي اولاد ياكلو قروش ممكن تكون فيها حرمه ..ماتقولي لي تاب يا امي خليني عليك الله انا يادوب بديت القي نفسي خليني اشتغل واكون نفسي وبعد داك افكر ..
احسان جرت نفسها ..حيرتيني يابتي والله ماعارفه اقول ليك شنو..
نور ..خلي يا امي علي الله وكلو نصيب..وانا زاتي عايزة اتفاهم معاك في موضوع القروش حنعمل شنو ..
احسان..كدي خليهم معاك واديني يومين افكر راسي فيهو كم فكرة كدة ربنا يسهلا..
نور ..امين..
دخلت المطبخ ظبطت لي قهوة وشربنا انا وامي وقعدت في المظله والجو كان مغيم ورهيييب يريح النفس لقيت مروان متصل علي مكالمه عاديه..قمت شلت التلفون وفتحت النت اتصلت عليهو فيديو عشان اوريهو الجو..رد علي وسلم علي وبقينا نتونس فجاة الباب خبط..ياها الخلاقه وانا فاتحه الفيديو فتحت الباب لقيتها لابسه وممكيجه لمن ماعرفتها وبي حس هبالتا قبل تسلم قلعت مني التلفون..
سلام..بتتكلمي مع منو ياواطيه..
نور..يابت اسكتي الخط فاتح ..اتناولت الولد من شمال..
والخط فاتح وهي بي اعلا صوت دا منو المز دا وانا اشيل واقرص فيها شكيتا علي الله المفضوحه..
سلام وهي فاتح الكاميرا..هاااي يا مز..
مروان متنح زي الطيرة الصابه فيها مطرة وعيونو عامله قلوب زي توم وجيري..
سلام..هوي ها انت اخرس ولاشنو..
مروان..اااا معليش ياخ ازيك ياسلام..
سلام رفعت حاجبا..وعرفت اسمي من وين..
مروان اتدبس..اصصص اصلو سمعت نور بتقول ليك سلام..
سلام..اااهاااا قلت لي مامشكله يلا انا طالعه وعلي فكرة حلاتك ومز انت..
مروان رجع لي وضع الهباله..مزه انتي والله..
سلام..يلا يلا سلام عليكم..
وجدعت التلفون لي نور ونور تضحك لمن دموعها جرت ..
شلت التلفون وبأشر لي سلام نظام اقعدي دقيقه وهي طالعه علي الباب بتقول لي بجيك بعدين خلصي تلفونك..
بقيت بعاين لي مروان وانا ماقادرة امسك نفسي من الضحك وهو بحمر لي..
نور..اقسم بالله بس الطيرة الدقاها المطرة..
مروان..تففف عليك وعلي صحبتك في داعي تبشتيني كدة..
نور..هههه ماقلت ليك البت دي ما واعيه ..
مروان..اقسسسم احلي حاجه فيها تصرفاتا الطفوليه دي..ياخ انا ما اخوك..
نور بي اصبعها..نوووووووو ولاااااتفكر..
مروان..اموت ليك ادردق ليييييك..اسف ليك الترااااب..
نور وماتت بالضحك..خلاص خلاص كدي لي بعدين برجع ليك..
مروان..غايتو لو كان لك حاجه عند الكلب..
نور..نععععععععم..
مروان..عند العسسسل..العسسسسسل..
نور..كلب مفضوح يلا سلام..
قعدت العصر وربطت طرحتي في راسي وقمت علي البيت مغبر وحالتو بالبلا نضفت كويس وبخرت التقول قلبي كان حاسي في كبسه حتحصل ..وعاد الجو حلو فرشت الحوش وطلعت عدة الجبنه وعملت فشاري وبقيت بقلي في البن..جاني مرتضي شايل التلفون..
لقيتها دي قثاء..
قثاء..يابت وينك انتي..
نور..هلا هلا دكتوره.
قثاء..يدقك الحرامي اسمي قثاء..
نور..ههههه خلاص قثاء ..
قثاء ايوه كدة اتعدلي..المهم ماعايزة اكتر الكلام..انا حاليا جمب سوبر ماركت العوالي ..ادخل منو ياتو شارع..
وانا في نفسي بقول سجمييي..وقعدت اتمتم المهم وصفت ليها..وبعد شويه سمعت صوت العربيه..
دقت الباب مرتضي فتح ..
ملحوظه(قثاء دي اربعينيه يعني بدايه الاربعين بس النوع الرهيييب داك سمبتيك كدة واستايل ومنظمه ومرتبه)
قثاء جات داخله وعاد الماشايلاه شنو انا عقدتني عديل اقسم بالله وعزتني وسلمت علي سلام وعينا في القهوة وعامله قلوب...
قثاء...ووووب بي دستورهم..عاد دا جويي انا ..احبك ياخ..
نور..هههه شرفتي ونورتي اقسم بالله ماكان في داعي للتعب..
قثاء..يابت انتي غبيه ماتقولي كدة..وين ماما احسان ..
امي جات طالعه من الحمام..
وقثاء سلمت علي امي دي بي حنان لمن دمعتها جرت..
وقعدنا والونسه جرت وحلفت ماتشرب اي شي بس مزاجها في القهوة..
قثاء جرت نفس..ياااااخ لي زمن من الجو دا ماتتصورو انا الليله مبسوطه قدر كيف..
احسان..البيت بيتك يابتي في اي وكت تجي حباااابك حقك من غير كلام..
قثاء..تسلمي يا ماما ياغاليه ❤️
فجاه قثاء جاها تلفون ومشت بعيد وبقت تتكلم وواضح انها متضايقه لانو كل تعابير وشها اتغيرت وشويه دموعها جرو انا صراحه ماجاني فضول بس استئت لاني شفتها بتبكي..
وشويه جات قعدت وبي صوت مبحوح قالت لي نور اديني مويه..
انا جبت ليها المويه ويدي بترجف..وماحابه اتدخل بس سألتها..قثاء في شنو مالك بتبكي خير حبيبه..

وامي جمبها..مالك يابتي خير بتبكي مالك..والله اترمت في صدر امي وقعدت تبكي امي ربتت علي كتفها وقالت ليها ابكي يابتي ابكي شكلك شايله وجع سنين فضفضي ..لحدي ماقثاء راقت كدة شويه واتكلمت..والله انا تعبت من اخوي دا ..مشي غربه واشتغل ماقلت شي..حب ليهو خواجيه مشيتو وماقلت شي..البت خلتو وعرست مشي ليها في العرس وجاط الدنيا ودخلوهو السجن لانو دي فوضي..انا من الاول قلت ليهو ياقسورة البت دي ماتوبنا ماشبهنا ولا دينا..وابوهو عشان شايفين نحن عبيد نحن اسيادهم الكلاب..بس انا اسوي شنو والله تعبت غربه وبعد عني..وياريت لو مرتاحه بي بعدو..الحمدلله بس الحمدلله..ورجعت تاني تبكي..امي روقتها شويه وحبه كدة المطرة صبت ..دخلنا جوه وقثاء قالت بعد دا بتمشي ..
امي اصرت عليها تبيت معانا وهي مامانعت طوالي شالت جلباب مني وغيرت وصلت العشاء ورقدت معاي في غرفتي حكت لي كتييير عن حياتا وانا حكيت ليها عن قصه هاشم ..والوكت سرقنا وماقادرة اصدق انو دي قثاء مديرتي الصعبه حاليا" لابسه جلبابي حق الهزاز ونايمه معاي في غرفتي..
قمت اتكلمت..قثاء عايزة اشاورك في شي..
قثاء.. عيوني ياننتي..
نور..رايك شنو في بيتنا دا
قثاء..حلو شديد وخرطتو جميله..
نور..طيب عايزة اغير العفش وعايزة ادق سراميك..
قثاء..قبلت علي وهي راقده علي بطنها..حلو طيب انا بعرف شركه بتفرش ليك من الف لي ياء..بس بكرة نطلع من الشغل ونمشي ..اوكي..
نور..اوووكي..يلا يختي النوم بكره الشغل بدري..
وقفه
يتبع..

#رضيت_بقدري فكان هو 🔞
بقلم الاء محمد ابوشمال
-9-
اصبح الصباح ..وطلعنا انا وقثاء علي الشغل والله لقيت الشغل مردوم ردم بس نزلت فيهو بي نمرة خمسه..
ملخومه ومصمته التلفون ولا رفعت راسي ولا حتي قمت للفطور .. لمن نهايه الدوام جاتني قثاء..
قثاء..يابت هلكتي نفسك اصلو لي شنو يعني..
نور..مابقدر اخلي كده قلت نخلص منو ..
قثاء وقعدت..طيب ياستي انا رجعت للولد بي خصوص قصه العفش وكدة..
نور..اووووه تصدقي نسيتو ..
قثاء..بس انا قاعدة وبزكرك كدي اخلصي وانا منتظراك بره..
المهم قفلت شغلي ورجعت للتلفون لقيت ميييه مكالمه من مروان فايق ورايق الليله يوم اجازتو ..المهم اتصلت علي ست الحبايب..
احسان..اي يانور كيفك..
نور..عايني يا امي انا ناويه افرش البيت واغير فيهو شويه وعايزة ادق سراميك ..وعايزة اشاورك في باقي القروش حاختها في البنك لمن نلقي لينا برنامج ونرتبو..
احسان..والله زاتي كنت مفكرة في القصه طوالي واصلي وانا عافيه ليك..
نور..ربنا يخليك لي ياست الحبايب ..يلا لانو قثاء منتظراني..
احسان..خليها تجي تتغدا معانا..
نور..بكلمها ان شاء الله تقدر يارب..
طلعنا انا وقثاء وقفتني في شركه كدة انا المعارض بس والعفش خلاني فقدت المنطق جنس رقي رهيييب وقثاء من النوع التقيييل دا المدير راس..المهم اتكلمت معاهو طلعو لي الاثاث بي سعر ولا في الاحلام..وكمان اتفقت معاهم يعملو لي مطبخ علي بال ما ادق السراميك واعمل للبيت ديكور..وقثاء حار حار طوالي مشينا مغلق من اكبر مغالق الخرطوم وكمان اتفقت لي لي علي كل شي اقسم بالله خوة ماليها مثيل..وحتي العمال اتفقت معاهم متين يبدو لي الشغل بكرة وفي ظرف اسبوع بستلم البيت مشطب..
وانا في العربيه ..
نور..قثاء بتعرفي زول في بنك..
قثاء ..شوفي يانور انا مابعرف زول انا تقدري تقولي بعرف كبارات البلد دي بي حكم شغلي وفي كل مصلحه انا عندي ناسي انا انتي عايزة البنك لي شنو ..
نور..عندي شيك عايزة اصرفو واخلي الباقي في الحساب لحدي ما ارتب اموري..
قثاء ..بي كم الشيك
نور..٣٥٠ مليون عايزة اوردو..
قثاء..بسيييطه جدا اعتبري الموضوع خلصان وبكرة تستلمي كاشك وتبدي في شغلك تمام..
نور ..تمااام وهااااك بوسه ياخ من غيرك انا اعمل شنو..
قثاء..احم احم انا مهمه ياخ..بس انتي كسرتي لي قلبي والله..
نور..الله يديم الخوة بينا والله احلي خوة..
قثاء..اميييين.
رجعت البيت هلكانه..اتصل علي رقمك زين ١٢٣ والرقم رهيييب طبعا رديت عاد كيف مابرد الرقم رقم وزراء جنس رشاقه علي..
الوووو..
يلوي قلبك ان شاء الله انا من الصباح بتصل عليك ..
نور..انت جيت السودان متين تجيك الكشه ان شاء الله..
مروان..كلبه خلاس اقسم بالله غايتو خميت ليك بالاحساس طلع مقاسك ظابط ولالا تتفلقي عامله فيها وزيرة ولاشنو ..
نور...ههههه انت الجابك شنو وليه ماكلمتني..
مروان بقي جادي..اقسسسم بالله جابتني سلام اصلا انا عايز انزل بس مامتشجع..ولقيت لي سبب..
نور..والله ماجادي يامروان ..
مروان..جادي لو ربنا كاتب لي نصيب بلقاه ..ولو كمان ماف نصيب انا كسبت اخت وحأكسب شوفتك..
نور..ياسلااام عليك والله انت احلي اخ في الدنيا..
مروان..نور كلميها لي انا جااادي وعايز انجز .
نور..عيوني يا اخوي هي سلام تلقي احسن منك وين ياخ..
مروان.. تسلمي لي خيتي..وانا بنتظر منك..
قفلت من مروان دقيت علي سلام وقلت ليها تجيني فورا" وطبعا دي مابتفوت ليها شمار..جاتني طايرة طيران .. قعدتها في الواطه وحكيت ليها الموضوع ..ولمن خلصت لقيت وشها عامل قلوووب ..
رصعتها في ضهرا لمن وعت..
احي..يضربك البلا يانور..
نور..يبلاك يارب افتحي بوزك دا قولي شي..
سلام..وووب المز اليوم داك لالا مابقدر اصدق الحقيني عايزة اغمررر..
نور..غمرة بلا وعي ان شاء الله ياخ خليك جادة..
سلام..والله جادة يابت دا العجبو فيني شنو؟؟
نور..عجبتو خلقنتك وهبالتك يامتخلفه عايني انا حأتصل عليهو واقول ليهو سلام رفضت..
سلام..يايمه يرفسك حصان بركه الله هو انا مصدقه..خلاص كربي لي الموضوع واديني اوكي وانا طايرة ختيت اللبن في النار الليله امي بتعدمني وقامت جاريه المجنونه الماطبيعيه ..
انا اتصلت لي مروان ووريتو الولد مافضل ليهو الايزغرد..واتفقنا نتلاقي بكرة في شارع المطار..
اصبح اليوم جمعه وقشطنا انا وصحبتي وطلعنا ..ومشينا لاقيناهو والله مروان في الحقيقه قياااامه ..وقعدنا اكلنا واتونسنا حبه شلت تلفوني وطلعت عملت نفسي بتكلم عشان اخليهم ياخدو راحتهم..وقريب نص ساعه جو طالعين وطلعنا لمن جيت نازله مروان اداني كيس هدايا كبييير وكمان ادي سلام واحد..
ودعناه ودخلنا البيت ونحن مقرصين من الشمار..طبعا جاب لي بدلتين نفسيااات وجاب لي تلفون وعطور وكريمات اقسم بالله ماقصر معاي..وجاب لي سلام عطور وساعه كدة نفسيات..وكرت كاتب ليها فيهو هديتك الكبيره لمن توافقي علي..الولد عسل ياخ..
سلام ودعتني وطلعت ..وانا حاسه نفسي مبسوووووطه لمن طايرة عشان بالجد انا بحب سلام من جوة قلبي...

وعدت الايام والعمال اشتغلو لي والبيت ماشي رهيب وانا مشرفه علي الشغل والناس يدهم نضيييفه ونفسيات..
وانا واقفه من واحد من العمال تلفون دق رديت لقيتها قثاء..
قثاء..نور مساك فل ..
نور..مساك عسل ياعسل..
قثاء..نور انا عايزة الاقيك ممكن بس برة البيت..
نور..خير..
قثاء لمن الاقيك بتعرفي الموضوع ضروري يانور...
نور..قلقتني في شنو ..
قثاء..اطمني ماف عوجه بس اطلعي اسي وانا بلاقيك في امازوون..تمام..
نور ..تمام..
قفلت من قثاء وقلبي في يدي..شلت لي قروش ختيتهم في جراب التلفون وطلعت ركبت لي رقشه وانا قلبي ماشي قدامي..
يتبع..

#رضيت_بقدري فكان هو 🔞
بقلم الاء ابوشمال..
-10-
وانا راكبه الركشه وقلبي يودي ويجيب وعلي بشتنه حياتي ماطلعت بي منظري الخرافي دا وبالي يودي ويجيب ياربي قثاء دي مالا..واش معني طلبت انو نتلاقي برة البيت..
وانا بستعجل في بتاع الركشه ذي الحاصله مصيبه..
المهم وصلت حاسبت الولد ودخلت لقيت قثاء قاعدة ليها في ركن بعيد كدة..
مشيت سلمت عليها وقعدت حسيت بيها شاردة..
مسافه حتي فتحت خشمها ..اها الامور كيف والبيت ماشي كيف..
نور..تمااااام والله الحمدلله باقي كدة يومين ويسلموني..
قثاء..اهااا تمام وماما احسان كويسه..
نور..تماام الحمدلله بس مع لخمه البيت الجايط دا..
وانا بقول في قلبي قثاء دا مالا ماعارفه تدخل ف الموضوع..
المهم سألتها..قثاء انتي مالك مرتبكه في شنووو حاساك ماقادرة تدخلي ف الموضوع ..
قثاء..اول مرة في حياتي ارتبك قدام زول وما اعرف اتكلم..
نور..الله يخليك انا فيني الكملت ياخ بعدين انا مازول ياقثاء انا نور وخليك عاديه ..
قثاء..احم طيب يانور انا عايزة اسألك سؤال
نور..اسألي..انتي نسيتي هاشم؟
حقيقه استغربت من السؤال بس جاوبت بي برود..قثاء هاشم كان محطه في حياتي وانا والله فقدتو بس ربنا يرحمو ..بس ليه السؤال؟
قثاء..طيب منتصر..
نور..قثاء والله اسالتك غريبه وترتيني ياخي في شنو..
قثاء ..جاوبني..
نور..اوكي منتصر دا اخر زول افكر فيهو..
قثاء..طيب يانور انا ماحالف كتير..انتي بتفكري حاليا" في الارتباط؟؟
نور..حاليا" لا..
قثاء..ليه يانور..
نور..عشان انا لسه بكون في زاتي بفتش في نفسي ماعندي استعداد اخسر زاتي عشان اي زول..بس برضو مافهمت ياقثاء انتي عايزة توصلي لي شنو..
قثاء..نور بدون لف ودوران انا عايزاك لي قسورة اخوي..وانا من حقي اضغطك ولا اجبرك..بس انا بتمني من جوة قلبي انك توافقي وماترفضي ..ما اتمنيت حاجه قدر انك تكوني مرتو والله يانور انا من اول يوم عجبني شخصك واتمنيت تكوني جزء مننا..ولو رفضتي حتظلي لي اخت وحبيبه والله..
انا سكت مساااافه لاني عمري ما اتوقعت اني ممكن اعرس بالطريقه دي نهائي ..ولازول مابعرفو وعندي خلفيه كااامله عن طباعو وانا حياتي مامتحمله اي لخبطه في الوكت الراهن دا..سرحتي طولت..
قثاء..نوووور ..انا اترددت مليون مرة قبل افتح معاك الموضوع ..انا ماعايزاك انك تحتاري ولا عايزاك تردي لي اسي فكري علي مهلتك واستخيري وردي ..
نور..دقيقه ياقثاء ممكن اسألك سؤال؟؟
قثاء..اتفضلي
نور..قسورة هو الطلب منك تشوفي ليهو عروس..
قثاء سكتت مسافه..حقيقه لا بس انا حاقول ليهو اني لقيت ليهو بت لو قعد عمرو كلو ماحيلقي زيها..
نور..طيب وهو حيوافق؟؟
قثاء..نور قسورة بحترمني شدييد وعمرو مابرفض حاجه انا شايفاها ليهو كويسه..
نور..الا دي ياقثاء..دي رحله عمر ..وكضمت وخشمي مافتحتو تقدرو تقولو زعلت اتحسست بس ماقدرت اعتب علي قثاء يمكن لاني عرفتها علي حقيقتا..
فجاة انتبهت لي قثاء ودموعها جرت..اكيد يانور حتقولي اني انانيه واني بفكر في مصلحه اخوي بس..بس والله العظيم ربنا يعلم انو معزتك عندي لاتقل من قسورة .. وماعايزاك تاخدي مني نور وانا ملخبطه ..انا ماكلمت قسورة وقلت اشاورك انتي اول ..ولا اقول ليك اعتبريني ماقلت ليك شي..
انا اللحظة ديك حقيقه حسيت نفسي زاتي مافاهمه انا اقول شنو وحسيت قثاء دي كيانا مقلووب..قمت مسكت يدها ..قثاء خلي الامور لله وخلي الموضوع دا شويه ولو في قسمه ربنا بهون خليني اروق من لخبطتي دي شويه وارتب حياتي واخلص من خطوبه سلام وربنا يهون..انا قلت الكلام دا عشان اخفف عليها حقيقه هي عندي ماهينه ..
استأذنت من قثاء ..واصرت انها توصلني ومافاصلت كتير ركبت معاها وطلعت ..
طول السكه ما اتكلمت معاي خااالص وصلتني ونزلت سلمت علي امي وادتني رايها في الشغل والديكور..بس تصدقو ماحسيت انها قثاء بالجد حسيت فيها حاجه واجعاها..وكسرت الاحساس عشان مستحيل اجامل في موضوع زي دا..الا دا المابنفع فيهو مجامله..
اتكلمت معاي وقالت لي بكرة حاتصل لبتاع الشركه عشان يجي يسلمك العفش وكمان كلمت شركه بتاعت حيشان تطلع ليك سراميك للحوش ..يلا استأذن يانور يلا ماما احسان..
امي قالت ليها الا تتغدي معانا..قثاء رفضت انا اشرت لي امي نظام خليها هي متضايقه..المهم طلعت واستلمتني ليك امي اها مالا الليله صاحبتك زعلانه شكلها ووشها قدر السمسمه ..في شنو مالك احي والله امي دي مابعرف ازوغ منها نهائي حلتني دقه الباب واختصرت الموضوع لقيتها سلام بس الليله غريبه متضايقه وماهظرت معاي خالص طبعا دخلنا المطبخ وانا بعمل لي في قهوه طلعت في الديبفرزر وقعدت..اصلا ماسألتها..بعد مسافه قالت لي نور..
رديت ليها..نعم مالك الليله وشك ينعل قفاك..انا خايفه..
اتلفت عليها..من شنو خايفه يابت انتي غبيه..
سلام..اتعلقت بي مروان وبقيت خايفه افقدو اصلا الحاجه البحبها بفقدا..
نور..استغفري يابت مروان دا جاااادي وود حلال وكلها ايام ان شاء واموركم تظبط ..
سلام..عليك الله ادعي لي انا مابتمني افقدو..

ضربتها في كتفها..يابت انا خايفه لاني حافقدك اصلا مروان لو عرسك مابخليك وراه ولوووف الاخ وغمزت ليها..ضحكت ضحكه حلوة كدة وحسيت كلامي ريحها شويه بحبها البت دي ياخ..
فجاه اتزكرت كلام قثاء وحاسه في طوبه في قلبي ..
سلام..اها وانتي مالك..
سكت مسافه وحكيت ليهاا القصه من طقطق..سلام زاتها احتارت..وماردت..
نور..انا خايفه افقدا ياسلام البت دي تقريبا من عرفتني وانا بقيت محور حياتها يمكن شافت فيني الاخت والصديقه..وخايفه كلامي يكون زعلا وانا ماحاقدر اجامل في الحاجه دي..
سلام..ياخ والله البت دي ما انانيه بس يمكن حست انك ممكن تغيري اخوها وشافتك زوله كويسه وحبتك تكوني جزء من اسرتهم..
نور..اووووف ياخ انا راسي جاط وكل ما اتزكر الموضوع قلبي بوجعني..
سلام..انتي شفتيهو؟؟
نور..غبيه انتي شفتو وين يابت اقول ليك الولد في كندا..
سلام..فاهمه والله..قصدي في صورة في كدة..
نور..سلام انتي اكتر وحدة عارفه انا مابهمني الشكل..
سلام..صاح انا عارفه بس يمكن لو شفتيهو قلبك يرتاح ليهو..
نور..ارتاح ليهو من صورة انتي طيرة ولاشنو؟؟
سلام تلبت من التلاجه..لو ماطيره بقعد معاك انتي..
نور..كويس قمتي علي الفصاحه..كلبه ومافيك فايدة..
سلام.. يلا يلا انا ماشه..وبالمناسبه فكري في كلامي..
نور..طيري من خلقتي خليني في جوطتي الفي راسي..
سلام طلعت اتصل علي مروان..
المهم بعد السلام والنبز قال لي انا عايز اجي لي ابو سلام مع اهلي انا المرة الفاتت جيتو براي وماعارف الفهم شنو وحاسي راسي شاطب ..الليله الخلق دي مالا كلها رؤسينا شاطبه.. المهم فهمتو الحنك..ولو ادوكم موافقه الخطوه الجايه خطوبة صغيرة كدة واطلب الله ..
مروان..قنعتي مني ياخ قدي كدة خليني ارتب حالي..(وانا البرتب الجواي منو)..
عدا اليوم وانا بكرة نزلت الشغل قثاء كانت عاديه معاي بس انا ماعارفه ليه متحسسه والله جواي لخبطه غريبه..
المهم بعد خلص انا الدوام انا متعودة بدخل تووش علي قثاء بدون استأذان..
وياااريتني استأذنت..
وقفه ..
يتبع...

#رضيت_بقدري فكان هو🔞
بقلم الاء محمد الحسن ابوشمال..
-11-
دخلت لقيت قثاء فاتحه الفيديو وبتتكلم قمت اشرت لي نظام تعالي..
مشيت عليها وانا مافاهمه شي بس عيني وقعت في الشخص البتكلم اقسم بالله العظيم من شفتو قلبي دا عمل شححححححح..وحسيتو في بطني..واتبكمت لمن لكزتني قثاء..قسورة دي نور..قال لي هاي نور ..هاو ار يو..انا حسيت روحي نسيت الانجليزي وطار لي..كويسه الحمدلله وانت كيفك كويس..
قسورة ..الحمدلله انا كويس فرصه سعيدة مس نور..
نور..انا الاسعد قسوره ..طلعت زاتي دون ما اتكلم..بس مشيت علي كرسيني وعصرت قلبي انا زاااتي مستغربه ليه اتلبشت كدة يمكن دا كلام سلام صاح..طبعا اوصف ليكم شفتو كيف ..شفتو زمااان في ولد اسمو خالد حسن في البوم نجوم العرب..بس انا حسيتو فيهو اللحمه منو العيون الشعر بس دا علي اخشن شويه..كلوو علي بعضو كدة رااااجل طبعا الكلام دا من شوفتي ليهو الدقايق ..حسيت المطرة دي صابه فيني واقسم بالله انا مابهمني الشكل بس نوع البعجب صحي صحي والراجل الرزين داااا في كلامو ساي بعجب ..في نفسي..تفففف عليها الحلبيه الكافرة..دا بخلووو ..وخفت قثاء تجي تحس بي لبشتي دي ومنظري يبقي زي الكوشه..
استغفرت وشلت تلفون لكزت مروان وسلام وبقيت بدردش معاهم قامو ضافوني في قروب فيهو انا وسلام ومروان نظام بورو فيني تحضيراتهم..وانا العين معاهم والقلب في حته في تانيه..
جات قثاء طالعه ..اها يانور نتحرك..
انا اتكهربت..اااي طوالي نمشي عشان راسي جاط من جوطه البيت والله..
قثاء..حاسه بيك والله ياخ...فعلا جوطه البيت بتجوط الواحد..
اتحركنا..وبحاول اكون طبيعيه وبقيت افكر في البيت وكيف حارتبو وياسلام بعد الحوش يتظبط بيتنا اصلا حلوو رغم ظروفنا بس فخم وكبير ..وصلنا ولقيت شغلي جااااهز وحتي النقل جاهزين..شفتو الواسطه في البلد دي بتعزك عز..
شلت عفشي الجديد وكان رهييييب غرفه جلوس وصفره وسريرين وكنبه وغرفه كامله لي مرتضي..وغرفه كامله كمان لي انا..والمطبخ جاااهز اسود بي ابيض عجييييب..والله حسيت بالانجاز..وصلنا البيت والعفش وراي لقيت البنات نضفو البيت ونزلو لي العفش وبقي من اروع البيوت تقدرو تتكلمو عن الفخامه ..فرشت الملايات وبخرت البيت وبقت لي اخر خطوة الحوش يارب يخلص وكلو يبقي لي مع بعض ااه نسيت..عملت لي طقم بلدي للمظله حاجه رهيييبه ياريتكم تجو تشوفو بيتي بقي كيف..
عدي يومي داك بالتعب انا نمت وتاني يوم استأذنت من الشغل ..مسكت تلفوني ودخلت الفيس ودخلت صفحه قثاء..لقيت قسورة فتحت صفحتو وبقيت بقلب في صورو وصور مؤتمراتو وانا مركبه لي ابتسامه هبله كدة خلاص وجات صور مع خواجيات تصدقو لو قلت اني غرت منهم..ااي والله مالي انا بقيت هبله وتخه كدة ..ياخ نفسي ادي روحي كفين عشان اطلع من الوهم الدخلت فيهو دا..انا ماااعايزة ارجع لكوني اعرس بي طريقه غبيه زي دي.. حاولت اتخلص من الفكرة بس والله بلقي نفسي تلقائيا" بفكر ف الولد دا..ياخوفي تبقي لي مشكله..
اتصل علي مروان..الوووو
مروان..هلا هلا اختي الغاليه..
نور..اختك ساعه المصلحه البركه فيني اللميتك في مرتك..بس مافيك فايدة
مروان..فيني والله بس محتاجك ضروري عايز اشتري لي كم هديه كدة لي سلامي..
نور..اموووت انا سلامي عديل..
مروان..سلبه تخنقك يانور قولي امين اقول ليك شي خليتك..
نور..خلاص كتلتك الكرامه يعني ..طيب تعال لي بخش لي في عبايه وبطلع..
مروان..تمام..
فعلا طلعه مروان دي غيرت لي مودي شويه وعزمني كافيه ظريف وشربنا قهوة واتونسنا شويه مروان مستاء انو حيسافر بعد الخطوبه طوالي..بس حيجي سريع يتم العرس..
اصبح الخميس والليله خطوبه الخلاقه دي..والله التقول خطوبتي فرحانه فرح.. جاتني من الصباح قاعدة معاي ماكانت خطوبه كبيرة يعني اهل وجيران بس..لحدي العصر كدة طليت عليهم لقيتهم ظبطو العشاء عاملنو بوفيه مفتوح.. رجعت البيت استحميت ولقيت سلام بدت تتمكيج لبست لينسس بي الازرق وهي اصلا حلبيه.. وكانت عامله حنه رفيعه..ولابسه فستان ملكي رصاصي فيه كريستالات بالكحلي وطبعا هي ما احكي ليكم عنها هي حقيقه بتعمل مكياج رهيييب اتمكيجت وانا لبست لي فستان عنابي طويل اكمامو شفافه ومكبوس جوه بي نفس اللون وانا مع جسمي طالع حلو وسلام مكيجتني والله لمن روحي عجبتني ..سلومه سرحت تسريحه بسيطه خلت شعرا نازل بي وخلصه بسيطه كسرتا بي تاج كحلي طلعت رهيييبه..بعد شويه سمعنا الزغاريد عرفنا اهل مروان جوو وشويه كدة قثاء جاتنا في البيت..
لابسه ليها عبايه خليجيه وووووب من الزوووق سلمت علينا..عيني باااارده حلاتكم حلاااتكم لمن تكمل باست سلام مبروك سلومه..وعقباااالك انتي مع الفي بالي..لقيت نفسي تلقائيا" بقول ليها امييييين بي هباله كدة...
قثاء بي خلعه..نعم نعم قلت امين..
انا اتهجمت.. ااااي في وحدة ماعايزة العرس😏 حاولت اغير الموضوع شويه مروان اتصل وقال لي سلام اطلعي انا برة...
طلعنا معاها..ووووب من مروان بالقميص الكحلي وبنطلون اسود يحردو ليهو الشكه ياخ وسلام دي ركبا بتطاقشو ..ونحن بنزغرد عشان نطمنا..

والله سرحت واتخيلت نفسي مكانا..بس مع منووو وطردت الفكرة من راسي..
وكانت الخطوووبه حلوووة..وانا مبسووطه ..
وعقبااالي..وعقبااااال كل وحدة بتقرا في كلامي دا..
وقفه ..
يتبع..

#رضيت_بقدري فكان هو..🔞
بقلم الاء محمد الحسن ابوشمال..
-12-
المهم خلصت الخطوبه ورجعنا انا وامي البيت وحيلي مهدود من الوقفه والزغاريد..لقيت رساله من مروان كاتب لي فيها( عارفه احلي حاجه خلاها لي هاشم وراهو انتي بحسك اختي بحس سند لي كل زول بحسك بتوزعي الفرح علي الناس فرحتك الشوفتها في عيونك لينا عمري يانور ماحانساها اردها ليك يانور في فرحك مع البستاهلك لانو حقيقه البستاهلك لسه ماجا بريدك ياخ ياخييتي وقدر ما اكتب ماحاقدر اوفي حقك ولا اقول ليك عشان كدة حاقول ليك اتمني دايما" اشوفك سعيدة وكوني بي خير) والله بعد رساله مروان دي العبرة خنقتني وحسيت اني زوله مفيدة..جاتني لحظه اشتقت لي هاشم وجاتني لحظه فكرت في قسورة حسيت قدر شنو انا ملخبطه وماعارفه نفسي عايزة شنو جدعت تلفوني ونمت بي مكياجي.. لمن صحيت بي صوت امي بتصحي فيني يابت الساعه ٩ قومي مرتضي دا عايزك تشرحي ليهو شويه حاجات انتي الفترة الاخيرة دي بقيتي ماشغاله بيهو بس انا عاذراك يمه وعافيه ليك..صحيت اتسوكت وصليت وريحه دعاش المطر تلخم والهواء دا يريح الاعصاب من جوة فطرنا وشلت الكتاب قعدت اشرح لي مرتضي في المظله قريب ساعتين قال ماشي الجمعه بقيت احاول اشغل نفسي بي شي عشان ما اجوط كياني..وانا صليت وقريت الكهف..وعاد دا مزاج جماعتي جهزت قهوتي وبخوري وعملت فشاري وقعدت جاتني امي..
اتحكرت في نص السرير وهي مبيته النيه وماناسيه يوم قثاء اتصلت علي..
قامت سالتني ..نور احكي لي بابتي حاساك ملخبطه شديييد الايام دي وانا مابحب أسالك وعارفاك مابتحبي تحكي لي كتير ..
نور..امي انا ماعندي غيرك في الدنيا بس انا مابحب اشيلك هموم فارغه وانتي الفيكي كان مكفيكي ..
احسان..وهديني الحمدلله رقت وفضيت وبعدين يانور انتي مابتشيلي هم فارغ..
سبحان الله انا بحب امي شديد بس ظروفنا الصعبه المرينا بيها دي خلتني اشوف اني احكي ليها كلام فارغ وانو دي هوامش والحياه اكبر..
قمت قلت ليها يمه اسمعي انا بالجد محتاجه نصيحتك ومحتاجه تدليني يمه انا تايهه وحكيت ليها من قصه هاشم دون ما احذف شي ..وحكيت ليها يوم قثاء اتصلت علي..وكل التفاصيل الصغيرة والحصل لي لمن شفت الولد..
قامت امي قالت لي ..كدي لقمي القهوة دي واديني فنجان وانا بديك الصاح في الفنجان دا..
لقمت القهوة وشربنا ياخ جو المطر دا لو كان السنه كلها انا مابزهج منو..امي شربت قهوتا وسرحت مسافه وقالت لي اسمعي يانور..
اي حاجه في الدنيا قدر واي شي قسمه ونصيب وربنا بجعل الاسباب عشان النصيب بكون حق زول تاني..
طيب يمكن ايام هاشم خلصت عشان نصيبك تلاقي الولد دا ..ويمكن شوفتك ليهو اللخبطه كيانك دي ارادة من الله عشان تفكري في الموضوع دا بعدين يانور صاحبتك دي بت بي الف راجل والراجل مابعيبو شي السواه عشان الخواجيه اتسجن فيهو كيف بت البلد وصاحبت اختو..
رديت علي امي.. يا امي انا رافضه فكرة اعرس بالطريقه دي ماعايزة احس اني هينه ولا ساهل..
امي..يابت الجاب الهوان هنا شنو تتعدد الاسباب عشان النصيب واحد ..وخليني من الحديث دا كلو صلي ليك ركعتين استخارة وادعي الله والمكتوب بظهر ليك في دقايق..
كلام امي صاح صحي امي لاقرت لا اتعلمت بس الحكمه الفيها تكفي قبيله..سلمت عليها في راسها وقلت لي ربنا يخليك ليك ..
ردت علي..انا في الدنيا دي وجعكم وجعي وغير الخير ان شاء الله ماتشوفو..وتانيا انا عايزة اطرح عليك موضوع دايرة اعمل لي مشروع خبايز صغير كدة انا قعدت البيت دي ماباقيه لي..
نور ..امي ارتاحي ياخي كفايه الشقا الشفتيهو في حياتك..
احسان..انا راحتي في الشغل بس انتي طاوعيني..
نور..طيب يا امي عيوني ليك حبيبتي..
احسان..يطيب عملك ويجبر خاطرك يا بت حشاي يا الماهينه..
لميت عدة الجبنه ودخلت المطبخ وانا بفكر كتيييير ماعارفه اخد قرار قلت خلاص زي ماقالت امي بستخير وبخلي الامور لله..
في جانب تاني..
انت امورك شنو نفسياتك ماهدت حبه ..
.. الحمدلله ياقثو ماعندي عوجه احسن كتير انتي عارفاني انا بجلي المواضيع ومابتمسك شديد..
قثاء..قسورة انت تستاهل احسن بس صلح علاقتك مع ربك وفكر شويه في مصلحتك انت غير بت البلد ما ليك..
قسورة..وانا اتأكدت بي حق وحقيقي من الحاجه دي..
قثاء..عايزة اسألك ..رايك شنو في نور البت الاتكلمت معاها يوم داك..
قسورة..المعاك في المكتب..
قثاء ...ايوة..
قسورة ..كيوووته والله ورقيقه...
قثاء..بتعجب صح؟؟
قسورة..اي بتعجب بس ليه السؤال..
قثاء..ساي عاجباني والله بحبها وبحب جمالا الرايق دا..
قسورة..امممممم كويس..يلا اذنك انا طالع عندي غداء..
قثاء..اوكي في امان الله وخلي بالك من نفسك..
في بيتنا..
بتونس مع سلام بالواتساب وهي طبعا الكلبه بقت مابتنطط علي زي زمان..انا خايفه بعد تعرس تاني السلام بالعود..
سألتني..اها الزول داك مافكرتي في موضوع..
نور..بالحيييل بي دلاله راسي عامل زي مثلث برمودا..
سلام..ماتحتاري ياخ الولد شكلو رهيب ماتركزي في ماضيهو..
نور ..حاسه الناس دي كلها ماقادرة تفهمني..

سلام ..فاهماك ياخ تتعدد الاسباب والنصيب واحد
نور..سبحان الله نفس كل امي
في نفسي بتكلم ياخ كل الناس كلامهم واحد وانا مالي محتارة بس حاخلي الامور تمشي كدة والباقيه من الله بتبقي حقيقه ما انكر اني اعجبت بالولد دا لمن امين..وانا اول مرة اندفع كدة واستخرت وخليت الامور للمولي بس..
عدي زي اسبوع كدة ماف جديد وفي يوم انا قاعدة في الشغل وراسي مزحوم وماقادرة احكو جاتني قثاء نور شكلك مشغوووله كدي خلي الشغل دا مابخلص ارح نفطر ..
نور ..مابقدر ياقثاء ياخ الشغل كميه
قثاء..نوور الشغل ماطاير ياخ ارح نفطر برة ونشرب وقهوة ونجي..
عرفت ماف مجال للتناقش لميت شغلي وطلعت..
مشينا محل لذيذ جمبنا قطعه الشارع بس وطلبنا بيتزا لذيذة واكلنا وقثاء مافتحت خشمها..
بعد طلبنا القهوة ..قثاء فتحت خشمها بي ثقه ..نور قلتي شنو في موضوع قسورة..
نور ارتبكت..والله ياقثاء لسه بفكر..
قثاء..علي فكرة انا المرة دي بقول ليك انتي طلبو وانتي عجبتيهو ..(في كذبه هنا لو كنت عارفاها ماكنت وافقت بس لانو خسرتني كتير)
ونور حست روحها طايرة ومافاهمه اي حاجه ..متين الكلام دا..
قثاء..يوم شافك في الفيديو..
نور..يعني دون ماتفتحي معاه موضوع انتي..
قثاء..ابدا" عجبتيهو وقال انتي كيوت..
نور..ابتسمت بس..
قثاء..اها اعتبرك موافقه..
زي الفي زول سحبني من لساني بس وقلت ليها..ايوة ياقثاء موافقه..(دا النصيب)
قثاء..وقفت ماقادرة اصدق اخيييرا ياخ...
نور..ابتسمت بس وقالت كلووو نصيب..
رجعنا المكتب وقثاء اتصلت علي قسورة..
قسورة..انا عايزة اشاورك في موضوع مش انت نور عجبتك..
قسورة..اي ..وانا عارف اسألتك حقت اليوم داك وراها فهم واقول ليك شي سيري ساااي واعمل العايزاه وانا ماعندي مانع ..
نقطه سطر جديد...
(مرات نصيبنا بوجعنا)
نلتقي....

#رضيت_بقدري فكان هو..🔞
بقلم الاء محمد الحسن ابوشمال..
-13-
سبحان الله من يسطر النصيب ويكتبو..ولا حتي بنقدر نعترض..
انا ماكنت في نفسي رافضه وماحاقول كمان مبسوطه..حاسه ارتباطي دا شي من المجهول وفي الاخر علي كف القدر نمشي..
رجعت البيت..ومسكت امي وحكيت ليها بالقصه كلها امي ماكترت كلامها معاي ..وكان قولا..ربنا يكتب ليك السعادة في الدارين ..ودعت لي كتير ..وانا بقول اميييين وعلي امل ربنا يهون لي الجاي..
كمان اتصلت علي سلام وحكيت ليها بالحصل كلوو وسلام اصلا كانت حاسه انو قسورة دا نصيبي ..مرت الاحداث بي سرعه غريبه..تاني يوم قثاء جات البيت بي صورة رسميه وكلمت امي بي صفتها اختو الكبيرة وفي مكان امو..جاتني داخله جوة..
قثاء..مرت اخوي الحلوة..
نور..بسم الله يا بت وين اسي مرة اخوك..
قثاء..بس اوووعك تقولي لي عايزة تغيري رايك..
نور..ههههه لالا وين تاني خلاص النصيب انكتب علي ما اظن..
قثاء..ياااااخ والله احلي نصيب ماتتصوري انا فرحانه كيف بس يانور انا من اسي بوريك وانتي اختي والله مابفرقك من قسورة نور قسورة مر بي احداث كتيرة في حياتو وممكن طبعو يكون صعب شويه بس انا علي امل انو انتي تغيريهو بل انا وااااثقه وبتمني تطولي بالك وتاخدي الامور بي رواقه وماتشدي معاهو وانتي انسانه قويه متأكدة انك حتكوني السند الصاح ..وربنا يهون الامور..ويصب اللبن بينكم..
نور..اطمني ياقثاء اصلا من كتبت عليه خطي مشاها..
قثاء..نور اتمني موافقتك تكون من جواك ماعشان اي شي تاني..
نور..مستحيييل ياقثاء انتي جمايلك في عيوني بس صدقيني انا وافقته لاني مقتنعه..
قثاء حضنتني..ياخ ربنا يخليك لينا انا واخوي ويجعلك لينا اجمل حاجه جايه في حياتنا..يلا انا استأذن وعلي فكرة انا حأدي قسورة رقمك وتتواصلو لحدي ماهو يحدد لي ونعمل خطوة رسميه..
نور..ان شاء الله يارب..
قثاء طلعت مننا وفي جانب قثاء وهي سايقه وسارحه مع نفسها..(خايفه والله يانور اكون سبب في تعاستك احييي انا باقي بعرف اخوي وخايفه اكون انانيه واظلم البت وقسورة دا ربنا يلين قلبو علي البت دي اتظلمت كتييير ..غايتو انا بواصل وربنا يلين القلوب ويهون الامور..ويسهل علي البنيه المسكينه دي والله يستر)
في جانب نور..
انا قاعدة وسارحه ماقادرة اصدق انو انا خلاص حاتزوج وحأبقي مرة ومسؤوليه راجل ومجرد ماسرحت اني حاكون مع قسورة الشعور خلاني ابتسم براي..في شعور جمييل جواي..بس للاسف ماكنت عارفه انو حيعقبو الم كتير..
وفي اثناء سرحتي جاتني رساله من رقم غريب عرفت من رمز البلد انو دا قسورة اكييييد في شعور كدة ماحاقدر اوصفو وفيكم من جربو..
انا مسكت الرساله وبعاين ليها قريب نص ساعه وانا برجف وهو بس كاتب لي مساء الخير نور انا قسورة واحفظي الرقم معاك..
انا رديت بعد مسافه ..هلا مساء النور قسورة اوك ان شاء الله بحفظو..
قسورة..ان شاء الله يلا نتلاقي تاني لاني عندي دوام بدري قلت امسي عليك واقول ليك تحفظي الرقم ..
نور..تمام موفق..
رغم اختصارو لي بس كنت فرحانه وقلت دي اول مكالمه بينا الجاي حيكون احلي..
رقدت نمت وانا احلامي ورديه اول مرة احس الشعور دا..وقمت الصباح بدري صليت ولبست بي مزاج واتمكيجت تغير نفسيات وطلعت الشغل بس الليله مزاجي حلو طلبت ترحال وبعاين للتلفون كل دقيقه وبفتح صفحه قسورة علي امل يصبح علي..واول ماوصلت المكتب لقيت الناس كلها بتعاين لي صورة غريبه عرفت انو قثاء ادتهم خبر ودخلت غرفه مكتبي لقيتو عباره عن مسلسل هندي شي ورود وشي بالونات وفي مكتبي بوكيه ورد وجمبو كرت مكتوب فيهو ( حتنوري عايلتنا يا احلي نور في الدنيا) اتبسطت شديد بي اهتمام قثاء بي وقدر كيف هي مبسوطه بي ودا كفاني اني ما افكر في اي حاجه تانيه..وانشغلت بي شغلي وكل دقيقه بعاين وقسورة مارسل..
لحدي نهايه الدوام طلعت..ورجعت البيت اتغديت ونمت شويه صحيت لقيت قسورة مرسل لي..مساء الخير نور انا اتفقت مع قثاء علي شويه تفاصيل كدة وهي حتديك خبر ..كان الرساله قبل نص ساعه رديت مساء النور خير ان شاء الله..الرساله ماوصلت هو قافل الاشعارات شكلو سرحت بيني وبين نفسي هو ليه بتعامل معاي رسمي كدة المنو يتونس صباح ومساء اقل شي يتعرف بي وانا اتعرف بيهو حقيقي انسان غريب وفي عزز تفكيري اتصلت علي قثاء..
الووو يانونتي مساك فل ..
نور..هلا هلا حبيبتي..كيفك ..
قثاء..الحمدلله ياقلبي يلا اسمعيني قسورة قبيل كان بتكلم معاي وقال لي الاسبوع الجاي نحاول نكمل جزء من التفاصيل يعني بي صراحه هو عايز عقد عشان نرسل ليهو القسيمه يعمل الاجراءات لانو عايز يسوقك معاهو طوالي..وبعد شهرين حينزل ونتمم العرس وانا قلت ليهو كدي اشاور نور واديك رد..
نور انبهرت..دقيقه ياقثاء انا مافكرت الموضوع يمشي سريع كدة انا لازم اكلم اعمامي انتي عارفه انهم في الاخر ضهري..
قثاء..حققققك والله يا روحي انتي كلميهم وانا بي دوري بتصل عليهم وقسورة كمان بتصل عليهم..دي الاصول يانور ونحن بنعرف الاصول..

بعد شويه مناقشات انا قفلت من قثاء..ولقيت امي في المصلايه وشايله سبحتها بتسبح قعدت جمبها في الارض وحكيت ليها بالكلام القالتو قثاء وطلبت منها تتصل علي عمي تكلمو..
احسان..نور عايني انا بكلم اعمامك بس ماف داعي نستعجل اقل شي يدونا زمن نجهز شويه ..
نور..انا كمان قلت لي قثاء كده..
احسان..كدي اديني تلفوني دا واتصلي لي بي عمك (امي ماقاريه بس حافظه الاسم بالرسم) قلت ليها الزمن اتأخر..قالت لي لالا لسه بدري اتصلي بس..مافاصلتها كتير اتصلت علي عمي واديتها التلفون دخلت الحمام واتوضيت طلعت لقيتها قفلت منو..سألتها..اها خير عمي قال شنو بس مايكون اعترض..
احسان..بالعكس والله فرح شديد انو نحن احترمنا الاصول وخليناهو محل ابوك وقال لي ماعندي مشكله يتصلو علي وانا بجي اعقد ليها بي نفسي والله..
نور..طيب تمام يا امي انا حارسل لي قثاء رقمو وخلي الامور تمشي كدة وربنا يسهلا..
وعدت الايام والله زي البرق وقسورة اتكلم مع عمي والامور ماشه تمام بس المحيرني انو ماحاسه بي قسورة دا نهائي كل كلامو معاي بكون في حد تفصيل او عايزين نعمل كدة..او صباح الخير ومساء الخير..انا بحاول اتجاهل الشعور دا ياخ دا حتي ماطلب مني صورة زي مابعملو الناس..حاسه في حاجه ناقصه بس بمشي في نفسي..التفاصيل ماشه كويس لمن تحير وحتي انهم حددو اخر الاسبوع يجو يعملو العقد ويجيبو المال مرة واحدة ..انا في الاسبوع دا قثاء ادتني خلاص اجازة مفتوحه عشان ارتب لي للعقد وفعلا اشتريت لي فستان بسيط بني محروق وطقمتو بي دهبي والاسبوع عدا ويوم الجمعه جا واهلي في البلد جو والبيت اتعجج بالضيوف والزغاريد والقيامه وانت حاسه نفسي زي البحلم مشيت قعدت مع سلام من الصباح جاتني البت حننتي حنه بسيطه كده وشكل في اصابع رجولي لاني لابسه شبط بس والله كان في حاجه جواي مفقودة قدر ماحاولت اغيرا ماقدرت (وكيف نغير قدر مكتوب)..
لحدي المغرب كدة لبست الفستان طالع جميييل وانا حقيقي جسمي بظبط اي شي ومع الحنه حلووو انا لوني نضيف..قعدت لي سلام وانا مغمضه وهي بتمكيج فيني وقدامي شريط من الاحداث واكتر شي مؤلمني انو قسورة من الصباح ولاحتي رسل ولاسأل مني ولا من يومي بس كان عزاي انو مشغول وظروفو ضاغطه لانو حيجي للاجازة..شويه سمعت صوت العربات عرفت انو الضيوف وصلو ..بعد سلام خلصت عاينت لي نفسي بي رضي شديد..وشويه سمعت الزغاريد وصوت الرصاص عرفت انهم عقدو نزلت مني دمعه ماقدرت امسكا بس والله ما اظن دمعه فرح..
طلعت علي الناس ودخلت بي الزغاريدوالدلوكه والهجيج وسمعت عبارات الاطراء من جانب ضيوف قسورة جزء اهلو من بعيد واصحابو مشاء الله مرت قسورة سمحه ..قسورة عزااال وزوقو حلو..وقثاء دي دموعها جاريه ولبستني الدبله وباستني في راسي وحقيقي الحفله كانت حلوووة والناس كلها شرقانه في الجيب الجابو لي قسورة..وكيف انو عزاني.. وخلصت الحفله انا حتي ماعاينت جابو شنو زاتو..لاني خليت قثاء علي زوقها براها..امي واهلي من البلد باركو لي بالدموع ودخلت غرفتي طلعت تلفوني لقيت قسورة مرسل لي ( مبروك علينا الحلال)..رغم بساطه الرساله فرحت بيها شديييد رديت ليهو( وربنا يبارك لينا في حياتنا)..وانا كنت تعبانه شديييد نمت حتي ماشفت ردو..
وعلي كف القدر نمشي ولاندري بالمكتوب..
وقفه..
نلتقي..

#رضيت_بقدري فكان قدري🔞
بقلم الاء محمد الحسن ابوشمال..
-14-
نمت ماصحيت الا بي زغاريد ناس البلد وهو طالعين صحيت سريع اتسوكت وصليت ودعوني وطلعو والله لمتهم كانت بالدنيا وجونا جاراتنا داخلين ودخلو الغرفه بتفرجو في الدهب والريحه انا للان تصدقو ماشفت جابو لي شنو؟؟
لبست لي عبايه حق استقبال وانا بعاين للدبله الفي يدي وحاسه اني مامصدقه دخلت معاهم وهم بباركو لي وقعدت معاهم شويه وطلعو بقيت بتفرج في الحاجات انا نفسي اتخلعت جايبين لي سدين حقات دهب فخمات عديل واحد فيهم لحدي اخر البطن..و١٢ غويشه ومعاهم حباستين وكوز خراااافي معاهو تلاته خواتم..انا لي روحي بقيت فاتحه خشمي زي الهبله دا غير المال انا اللحدي الانا ماعارفاه كم بس الريحه جايبين لي ٦ من كل نوع والتزيين حاجه كدة الزول يقعد يتفرج فيها بس..حسيت بالعزة شدييييد لانو بالجد قسورة عزاني عز شديييد ..وعدت يومين فرتقنا المال لقيتهم جايبين لي ١٥٠ مليون متكفي وفي نفس اليوم جاتني قثاء المساء طبعا بقت ماعندها موضوع غيري 😂😂
قثاء..ياحلو ياحلو يخواني يشبه القمر..
نور..احم احم انتي قايله مرت اخوك هينه..
قثاء..اااااه حلات مرت اخوك دي ساااي..
اها قررتي تبدي من وين والفهم شنو ..
نور..انا زاااتي راسي ضارب ماعارفه وامي طبعا دااااقه الجرس قالت بعد الدخان وانا قلت ليها الا اخلص اموري وارتب حالي..
قثاء..طيب كدي البسي عبايتك وارح معاي..
نور..وين؟؟
قثاء..ماشه اخطفك قومي اتحركي..
نور..اهاااا بدينا حركات الحموات.
قثاء..هههههه الله لاوراك..
نور..دقيقه طيب اكلم سلام تمشي معانا..
قثاء..حلاتا البت دي بريدا صغنونه كدة اي خليها..
اتصلت علي سلام وتعجبكم هموله بت قدال جات طايرة طيران ركبنا اول شي قثاء عزمتنا في حته كدة رهيييبه مامتزكرة الاسم ..اكلنا تمام وشربنا العصير..وطلعنا ماعارفه ماشين وين وقثاء بتتكلم في التلفون شكلو من كلام زول عندو صاله..وقفنا جمب صاله اسمها(الوداد) دخلنا شفنا الصاله حكاااايه كدة رهيبه ..
قثاء..نور الصاله لو ماعجبتك ممكن نشوف خيار تاني..
نور..لالا حلوة خااالص ..
قثاء..نحجز يانور خلاص اكيد؟
نور..اي طوالي احجزي..
اتلفت لقيت سلام ماخدة وضع الهباله رصعتها في كتفها..
سلام..كلبه لكن صالتك نفسيات يلا انا حاعمل فيها عرسي ..وحاشوف باقي حاجاتك عشان اكون متنورة .
نور..عايزة تشوفي الحجامه في مال اليتامي صح ..كلبه جنس كلبنه..
قثاء ..جات لقتنا نتناقر ..مدت لي عقد الصاله لقيت انو الحجز كامل حتي العشاء..اعترضت في انو العشاء علي العروس..
قثاء..نور قسورة قال لي اي حاجه عليهو هو بس عايزاك انتي واعملي عزومتك زي ماعايزة بس العشاء والصاله والفنان هو متكفل بيهم قسورة..
انا سكت مسافه وتاني اتكلمت..
قثاء ياخ انا نفسسسي ارقص..
قثاء..اححححلي حاجه ياخ انا كنت عايزة اقترح عليك ترقصي ياخ انا لو عندي زي جسمك دا ارقص بلا عرس ماشاء الله عيني باردة..
نور..طيب انا بكلم قسورة وبستأذن منو..
قثاء..حقو تشاوري وخلي الموضوع دا علي فنانه رهيييبه تعلمك ..
(حقيقي انا فرحانه بس في جزء في فرحتي ناقص تقريبا انتو كلكم حاسين بيهو صح)
طلعنا لفينا علي محلات التياب اشتريت لي كم توب كدة واشتريت توب الجرتق..قثاء قالت لي ماتكتري في التياب لانو اصلا من شهر العسل حتسافري اشتري لبس اكتر ولبس بيت..اما اللانجري طلبت من وحدة في الفيس بتجيب لانجري من امريكا ..
وركبنا ونحن راجعين..قثاء اتكلمت..نور عايني اها الزفاف كيف والارتست قبلت علي سلام انا ارتستي قاااعدة.. اما الزفاف بأجر بس في زفافات حلوة والله ..
سلام..انا بري بري انتي غبيه ولاشنو..
نور..اقسم بالله اجعص خبيره ماحتمكيجني احلي منك انا واثقه فيك اصلا حاشتري مكياجات رهيبه كامله وانتي عليك بس تظبطي الوش ..
قثاء..تمام طيب مكيوجني معاك..
سلام..بس كدة عيوووني ليك ياخ..
رجعنا البيت حيلي مهدود ولا قادرة اتفاهم..طلعت تلفوني لقيت قسورة مرسل لي.. مدامي مساك حلو..
طبعا الكلمه دي نستني اي شي رديت ليهو ..وحلو زيك
المهم بقي يسأل فيني عن اخباري والصاله عجبتني..
قمت قلت ليهو.
قسورة..
قسورة..نعم مدام قسورة احكي..
نور..احم انا عايزة ارقص..
قسورة..ترقصي كيف مافهمت..
نور..رقيص عروس قبل الجرتق..
قسورة..ااااه عرفتو..جدا ماعندي مانع اعملي الانت عايزاه انا مابحرمك من شي..
نور..تسلم لي ياخ ..
قسورة..الله يسلمك يانور..يلا اذنك وتصبحي علي خير ..
نور.. وانت من اهلو. خلي بالك من نفسك..
بعد محادثه قسورة دي حسيت نفسي شحنت معنويات تكفيني سنه لي قدام كلام بسيط بسعدني منو..قفلت منو نمت نوم تعب..
صحيت الصباح لقيت امي تغسل ليها في طلح ومرتضي شغال بحفر بالعتله..
نور..امي كيف اصبحتي..
احسان ..كويسه حسيت امي ماياها
نور.. امي في شنو؟
احسان..ليه يانور تخليهم يعملو العشاء هم اصلا العشاء علي العروس والحمدلله نحن مامحتاجين
نور..امي قسورة هو الاصر وبعدين نحن حنعمل عزومه ..الموضوع بسيط..

احسان..خلاص انا بودي الهديه قثاء حلفت من الفطور..لكن بودي هديه علي مستوي..
نور..اكيد يا امي تودي البعجبك..
حاولت اروق علي امي عارفاها امي لمن تقفل..
احسان..نور استحمي وادعكي جسمك كويس العصر حنقعدك في الدخان..
نور..امي انا لسه ماخلصت..
احسان..نووور انا ماعايزة اي مفاصلات كتيرة انتي قايلاك عرس باقي ليهو اقل من شهرين ولسه بتتفاصحي ماعايزة اي كلام..انا كلمت الجيران والعصر حنقعدك في الدخان..
سكت عاااارفه راس امي بقيت داخله ومارقه عايزة افتح موضوع الرقيص وعااارفه امي حتعترض..
احسان..نور اتكلمي سااااي ماف داعي للدخله والمرقه عملتي لي منخوليا..(بتفهمني ست الحبايب)
نور..امي انا عايزة ارقص ..
امي رفعت لي حاجبا..
نعم؟؟ ترقصي وين..
نور..امي اموووت ليك ماترفضي قسورة قال موافق عليك الله اموت بي نفيستي ..
احسان..يابت..
مافضل لي الا ادردق ليها في الواطه حتي وافقت انا قمت نططت زي الهبله زي الشافعه..
والعصر ماشاء الله البيت عمران..والدلوكه اشتغلت والقهوة والقعدة تشهي وقعدوني في الدخان ..والحفرة اول ما استعدلت تاني شويه بديت اتحمل ..وماشاء الله من اول قعدة الدخان شال فيني..عدت يومين ..طلعنا تحت اعتراض امي خلصت كل حاجاتي جينا راجعين المساء ..مافضل كتير الا بس اختار الزفاف..
تاني يوم الضهر قثاء جاتني وقالت لي البت حتجيك المساء يلا لو عندكم عادة ناس يحضرو تعليمه العروس كلمي جيرانكم ..كلمت امي بس كلمت جيران المساء..وجو وقفت في السبات طبعا دي عند امي عمر كامل قاعدة السباته..والدلوكه اشتغلت ..
وووب وووب شالو التوب..المهيرة وعقد الجلاد النار يانور دا قسورة قلبو الثبات..وانا مسبقا" بعرف ارقص ماعذبت البت..والبيت كان فيهو نفس الفرح وفرحه امي بالدنيا ولمه الجيران بي تحضيرات العرس..
عدت الايام بي سرعه غريبه وباقي للعرس بس اسبوعين وفي الايام دا قسورة بحكي معاي بس في حدود تحضيرات العرس وانا بتجاهل في الشعور بحاول اني افرح بي عرسي ..
اتصل علي رقم غريب وانا بتدخن ماقدرت ارد..تاني اتصل..
رديت..وكان الصوت المابغباني❤️
(ليس كل( الم) يستمر فربما انعكست الحروف وخذت الميم محل اللام)
نلتقي..

#رضيت_بقدري فكان هو..
بقلم الاء محمد الحسن ابوشمال..
-15-
تلفوني رنه وانا رديت بس يجيني الصوت وانا اتخلعت في محلي حسيت روحي اتلصقت في الحفرة ديك قبلي..
هو..يامدام قسورة ..
نور..ايوة ايوة معاك انت قسورة ولا انا بحلم..
قسورة...ههههه اي قسورة يعني حيكون منو ...
نور..بسم الله انت جيت متين مش قلت حتجي الاسبوع الجاي..
نور..ياخ كان تكلمني اسي لخبطني لخبطه شديدة..
قسورة..بالضبط كدة انا كنت عايز اللخبطه دي تحصل وانا كدة مبسوط..وياستي انا جيت عشان السيدة قثاء عملت لي جوطه في راسي عايزة تجهزني قايلاني عروس اظني بس وماحبيت اكسر خاطر..علي اي حال انا المساء حاجي عشان اشوفك واسلم عليك..
انا جطت جوطه وقلبي دا اشتغل دلوكه وحسيت نفسي عرقت وقلبي ماشي يقيف وسكت بس ماعرفت ارد اقول شنو..
قسورة..الوووو يامرة يلا اعملي لي شاي حليب تقيييل وياريت معاهو كيكه لحدي ما اشوفك..وقفل..
واااااي انا وحات الله قمت بي شملتي وبقيت اكورك امي امي..
امي جاتني مارقه من المطبخ لقيت دموعي جاريه..
امي ..يابت مالك في شنو خلعتيني
وانا بجر في نفسي قسورة ..
احسان..يابت مالو قسورة كدي قولي بسم الله..
نور..قسورة جا يا امي وجاي المساء عشان يشوفني..
احسان..هههههه والربكه دي كلها عشان راجلك جا يابت عادي وحقو..
نور..امي وااااي يشوفني وين بي خلقتي دي ودخاني دا وووب علي من البشتنه..
امي ولسه بتضحك علي..كدي امشي البسي هدومك خليني اطفي الحفرة دي واجيك غايتو الله يصبر قسورة حتجبي ليهو ضقلو يكركب..
لبست هدومي وانا ببكي جاااادة وبجعر كمان اتصلت علي سلام..
نور..سلااااام افزعيني ..
سلام.. يابت مالك...
نور..قسورة جا ياسلام وجاي يشوفني بعدين انا اطيير وين بي بشتني دي..
سلام...هههههه خلعتيني ياخ اطمني انا اسي بجيب عدتي وبجيك ماتقلقي وبعدين اقسم بالله العظيم انتي كدة ووشك نضيف قمر ولو علي الحواجب دي بسيطه..
نور..ماااابعرف بس تعالي لي اسي ...
سلام..خلاص ياخلاقه اسي بجيك..
سلام جاتني وعملت لي الكيكه هي الله يحفظا لي ..
وقريب العصر كدة قعدنا وسلام ظبطت لي ميكب خفيف ولبست جوناتي وعبايه حقت استقبال ظريفه وانا بقيت بس ارجف زي الجدادة الحارقاها البيضه ..وحاسي روحي مهبطه..حبه الباب دق وانا دموعي جرت والله موقف لا احسد عليه جات قثاء داخله وشايله كم كيس هدايا..
ووراها قسورة ياخ انا من شدة ما انخلعت لمن حسيت نفسي هبله معقول دا راجلي انا ووووب من النضافه وووب من العلا الله اللابسه والشعر مهذب طالع من الطاقيه كدة وحلااااات الدقن اليادوووب بدت تقوم سلمو علينا وقسورة سلم علي امي وامي عاد تعالو شوفو بسم الله والحافظ الله ويحصنو في الراجل لمن انا غرت منو وللحظه ديك ماسلم علي ..وجا ماشي بي عندي وهمس لي في اضاني عسسسل يامدامي..والله انا هبطت وقربت ابرك كدي في الواطه ..وامي شغاله يابت سلمي علي راجلك انا يايمه ارجي المسيح الداجل .. وهو دا راجلي انا كدي خلوني استوعب القصه ..
وقمت زي الطاقاني عقرب جريت المطبخ عشان اجر نفسي وانا الكنت قايله راجلي رزين ومالي مركزو قوم ياالرشيق تعال لي ف المطبخ اظنا دي فكرة قثاء بتحب البلاوي زي عيونا..وماحسيت بي شي الا الزول حضني من وراء انا خلااااص قربت ارقد في الواطه وارتبكت ودموعي جرت وهو بقي بهمس لي في اضاني ياخ عسسل طاعمه مرتي فرسسه ..وانا اصلا في المواقف دي بتشل ولا بعرف اتصرف ..وهو لسه بتكلم ياخ انا قربت اتهور واحضنك قدام امك..احييي الله يصبرني من هنا للعرس ..
وانا يادوب جمعت قوتي واريتني كان ما اتكلمت ..قسورة فكني حرام الله بودينا النار..قسورة فكاني وبضحك لمن دموعو جرت وانا مسبهلة ماعارفه قلت شنو وسارحه في ضحكتو المن جوه قلبو ..وفجاه جا علي وبتحسس في شعري وبقول شعرك زي سبيب الخيل..وتاني قرب حضني عديييل لمن بقيت حاسه بي نبضات قلبو في صدري..ووب علي دي مصيبه شنو ..وحبه فكاني وبقي بقرب لي في وشي وبحاول يبوسني وانا خلااااص بردت امي نادت يابت يانور...
والله اللحظه ديك حمدت الله الحلاني وقسورة غمز لي وطلع من المطبخ وطبعا منظرو كااااان بييييش وموقفو صعب😉 عرفتو ماحيدخل علي امي واختو وسمعتو فتح باب الشارع وانا جريت نفس..وشلت الشاي والعصير وبقينا نتونس رفعت راسي علي قثاء قامت غمزت لي..شكيتا علي الله دي بتاعت المصايب ..قسورة شويه كدة وجا داخل وقعد وكل ما ارفع راسي يغمز لي الله يجازيهو وترني..والله ماقايلاهو خفيف ورشيق..شربو الشاي وكملو الونسه وطلعو وانا ياااادوب اتنفست بعد دقايق جاتني رساله من قسورة كاتب لي فيها (ياخ بهدلتيني بهدله اول مره اعرف روحي خفيف كدة بس العندو مرة زيك واااا خراب حالو)
طبعا انا اللحظه ديك حسيت بالثقه شديد وحسيت اني حقيقه حلوة وبملا العين..ماكنت عارفه اللحظه دي اجمل لحظه وتاني ماحتتكرر..