شديد وخلوقه على الاقل ما زي سلافه وتماضر ..جو هم الاتنين داخلين ....
تماضر : اهااا ويين عروستنا قالو جات هنا
سلافه ( بضحك) : اااي جات يختي لكن من اولها كدا مشاكل وبكى وكواريك
تماضر ( بضحكه) : لا يااااخ وينها قاعده وين نراضي عروستنا الحلوه
سلافه: ابراهيم حابسها في الغرفه
تماضر : سجمنا مالها عملت شنو عشان يحبسها كمان
نعمه: هوووي ي نسوان اقفلو الموضوع دا وامشو ختو لينا الاكل
سلافه ( بضحكه ) : سمح ماشين
سلافه وتماضر مشو المطبخ طبعا بيت ابراهيم دا كبير حاجه كدا زي العماره فيهو طابقين الطابق الفوق لي تماضر وسلافه وولدها والجزو التحت لي امو ومرتو مريم وفيهو عدد من الغرف بيتو حاجه كبيره
تماضر: انتي يختي البت دي ح تسكن معانا هنا ولا شنو
سلافه: لالا ح يقعدو كم يوم لانو مفترض يسافرو لكن قالو البرنسيسه امبارح غمرت وودوها المستشفي وموعد الطياره فات
تماضر : البت سمحه ولا لا
سلافه: النصيحه البت سمحه وصغيره لكن من اسره فقيره
تماضر: انتي بتكذبي على ساي سمحه شنو عليك الله
عند نعمه ومريم .....
نعمه: انتي طلعتي الليله وين من الصباح ؟
مريم : كنت مع امي تعبانه شويه مشيت شفتها
نعمه: المره الجايه لمن تجي مارقه كلميني عليك الله تمام عشان ما نسمع كلام كتير من ابراهيم احمدي ريك هو الليله ما رايق ليك بس
مريم: عن اذنك ماشه غرفتي
مريم طلعت غرفتها وهي ماشه على غرفتها سمعت صوت بكى شديد وكانت ملك مريم قربت من الباب وسمعت ملك ....
ملك ( بتبكي ) : ي الله كون معاي .ي الله قويني . ي الله ما تخليني برااي انا خايفه كون معاي . ي الله كفايه ظلم .ي الله خليهم يرحموني
مريم عاينت لي ملك بالقده بتاعت الباب ولقتها قاعده في ركن الغرفه ولامه نفسها عليها وبترجف
مريم ( في سرها ) : ي الله م تخلي ابراهيم يأذي البت دي زي ما اذاني هي باين عليها برئيه ي الله خليك معاها
ملك قضت اليوم داك كلو محبوسه في الغرفه بدون اكل وشراب ومن التعب رقدت في الارض وضامه نفسها عليها ابراهيم جا بالليل خالص وكان سكران ودخل عليها في الغرفه
ابراهيم : ملوكه يلا قوومي ..يلا ي عروستي
ملك سمعت صوتو وقامت مخلوعه وطوالي وقفت على حيلها
ابراهيم ( بضحكه ) :اوووو ملوكتي صحيتي ي عمري
ملك ( بتمتم ) : انت عايز شنو اطلع برا عايزا اقعد برااي
ابراهيم ( مسك يدها) : انتي ناسيه الليله كان عرسنا ولا شنو كيف اخليك برااك م بقدر كدا يااخ
ملك لاحظت عيون ابراهيم محمره واتذكرت عيون محمد في اليوم داك برضو كان شارب وبقت تتخيل اي حركه بعملها ابراهيم نفس الحركه البعملها ليها محمد حتي ضحكات ابراهيم في اللحظه دي بقو ليها زي ضحكات محمد لمن اعتدا عليها وهي بتبكي وفجأه بقت تكورك وبتلز في ابراهيم
ملك ( بتبكي وتكورك ) : ززح مني عليك الله خليني علييك الله انت ليه بتأذي فيني عليك الله خليني ابعد مني عليك الله م تعمل فيني شي
ابراهيم ( بضحك ) : تعالي ي حلووه يلا تعالى انا مش راجلك
ملك ( بتكورك) : لااااااا لاااا عليك الله زح مني عليك الله م تعتدي على تاني حرام عليك
ابراهيم قام طوالي اداها كف لمن وقعت في الارض وبقا بمسك فيها ويلاوي فيها وهي تكورك
ابراهيم : ي بت اسكتي اسكتي احسن ليك
ملك كانت خايفه شديد وبتكورك بأعلى حسها ابراهيم طوالي ضربها وختا يدو في خشمها
ابراهيم : اسكتي لانو ما ح ارحمك ي بت
بعدين حصل الحصل ودي كانت صفعه جديده من الصفعات الوجهتا الحياه لي ملك .......

يتبع...........

#ملك
-١١-
بقلم سجى اليزيد

جا الصباح وابراهيم طلع من الغرفه وخلى ملك راقده وبتبكي اول م طلع لاقتو تماضر
تماضر: عريسنا صباح الخير
ابراهيم: انا مافاضي ليك اسي ولي استفزازك
تماضر: الله يسامحك استفزك لي يعني انا ؟انا بس قلتا ابارك ليك عرسك وكدا . قالو لي عرست وحده صغيره
ابراهيم: يبارك فيك . اها خلصتى ولا لسه
تماضر : انت عارف . انت راجل م عندك ضمير ي ابراهيم سنين وانا متحمله قرفك وسنين وانا متحمله اذلالك وظلمك لي . دا كلو عشان ردتك دي جزاي صح ؟
ابراهيم ( بضحكه) : انتي ي مره شكلك شاربه ليك حاجه من الصباح ولا حاضره ليك مسلسل تركي وجايه تعملي الدراما دي فيني
تماضر : انت ولا شي بدوني ي ابراهيم اوريك كيف لولاي انا م كنت وصلت للمرحله الا انت فيها اسي دي .انا عارفاك استغليتني عشان قروشي وبعد دا ما اتكلمت معاك ولا سألتك لكن الظاهر انك استغليت الحاجه دي فيني
ابراهيم: خلصتي المحاضره بتاعتك ؟؟
تماضر بقت بتعاين ليهو وما قالت ليهو شي لانو قلبها كان بتقطع من جوه على المعامله الزفت االبعاملها ليها ابراهيم
ابراهيم: يلا يا ماما امشي ختي لينا الفطور
ومشى خلاها . تماضر قربت من الغرفه بتاعت ملك وسمعتها بتبكي شديد
تماضر : كوويس ي ابراهيم العرستها دي ما بريحها ليك ح اقلب حياتك جهنم ي ابراهيم .وانتي ي ملك مع الاسف ح تدفعي تمن حاجه ما عندك ذنب فيها ي مسكينه
بعد جهزو الفطور كلهم قعدو في سفره وحده ....
نعمه: البت دي من امبارح بدون اكل خلينا نديها حاجه
ابراهيم : لا ما تدوها عايزها تتربى انا
نعمه: البت كدا بموت ..بعدين هي مش امبارح كانت في المستشفي وتعبانه
ابراهيم: مالك فجأه قلبتي كدا يا امي وبقيتي حانه عليها
نعمه : انا ما حانه عليها ولا شي بس كمان ما لي درجه ما نديها اكل اذا حصل ليها حاجه بنشيل ذنبها
ابراهيم : بشيل ذنبها انا ..ما عندكم بيها شغله ..بعدين دي مرتي وانا حر فيها ما تتدخلو
سلافه ( بتضحك ) : اصلا هي بتكون متعوده على الجوع خلوها ما حاجه جديده عليها
ابراهيم ( بضحك) : وانتي كنتي برضو متعوده على الجوع اذكرك ولا نسيتي
(اتغيرت نبره صوتو) : احسن اسكتي ي سلافه لانو اصلا انا زهجان منك ومن الحركه العملتيها لمن مشيتي واتكلمتي لنسوان الاسره عن ملك ولحدي الان ما اتكلمتا معاك في الموضوع دا ما تفتكري اني ناسيك تمام
سلافه(بتمتم) لكن انا ي ابراهيم ......
ابراهيم(قاطعها ) : احسن اسكتي
ابراهيم اتلفت على مريم ....
ابراهيم : وانتي انا برضو ما غافل عنك .كنتي وين امبارح ي مدام
مريم ( بخوف ) : مع امي تعبانه شويه وانت كنت مشغول عشان كدا ما حبيت ازعجك
ابراهيم : ايواااا تمام الحكايه دي تاني ما تتكرر لكن
مريم :ان شااء الله
بعد خلصو اكلهم وابراهيم طلع من البيت مريم دخلت المطبخ براحه وشالت ليها شويه اكل لي ملك لانو قلبها كان متقطع عليها دقت الباب ملك ما ردت عليها ودقتو تاني وتالت ولسه ملك ما بترد مريم فتحت الباب ولقت ملك شايله قزازه وبتحاول تقطع شرايين يدها وطوالي قفلت الباب عليهم وجرت ناحيه ملك وبتحاول تشيل منها القزازه وبتلاوي في ملك .....
مريم : ملك ملك فكى القزازه عليك الله ليه بتعملي كدا استهدي بالله
ملك ( بتبكي) : خليني اموت انا ما قادره اعيش وما عايزا اعيش
مريم : فكيها ي ملك الحاجه دي حرام
مريم ادت ملك كف عشان توعى ملك بقت تبكي شديد
مريم : الكف دا عشان توعى ي ملك الحاجه العايزا تعمليها في نفسك دي حرام عايزا تنتحري وتخشي النار انتي ؟
ملك ( بتبكي ) : انا ما قادره استحمل خلاص تعبتا والله عايزا ارتاح بس
مريم: ولمن تخشي النار وتغضبي رب العالمين بترتاحي انتي زوله واعيه وفاهمه ي ملك انو الحاجه دي حرام
ملك (بتبكي وبصوت متقطع ) : عايزا خالتي عليك الله وديني ليها ما عايزا اقعد هنا
مريم: كدي استهدي ووريني انتي مالك حصل ليك شنو
ملك ختت يديها في وشها وبتبكي شديد مريم فهمت هي مالها وانو ابراهيم هو السبب
مريم: خلاص اهدي م تبكي كلنا متحملين العيشه هنا ي ملك وانتي لازم تكوني قويه .ليه تضعفي كدا؟ استغفري كدى وصلى على الرسول
ملك: عليه الصلاه والسلام
مريم: ونعم بالله ..جبتا ليك اكل لكن ما توري زول طيب
ملك: انا ما جعانه
مريم: لا جعانه انا عارفه من امبارح ما اكلتي وانتي بتاكلي بوريك انا منو طيب ؟
ملك : طيب
مريم: انا اسمي مريم زوجه ابراهيم التالته مش عارفه انو عندو تلاته نسوان
ملك: اي
مريم : طيب . انا عرستا ابراهيم قبل خمسه سنوات ما عندي اولاد منو
ملك : بعاملك كيف؟
مريم( بابتسامه) : الحمد لله بس كلنا متحملين ي ملك ..عايزا اقول ليك حاجه مهمه عليك الله ي ملك ما تتعرضي لي تماضر وسلافه ديل ابعدي منهم ولو انو باين عليك برئيه وما بتاعت مشاكل المهم ما تتعرضي ليهم طيب
ملك: طيب .. هم ما كويسات معاك برضو ؟
مريم: هم صعبات شديد الله يهديهم لكن انا م بتعرض ليهم واي حاجه بقولوها لي بعملها
ملك (بابتسامه خفيفه) : شكرا . الحمد لله لقيت

زول بفهمني هنا
مريم: ما تخافي انا ح اكون معاك
اثناء كلامهم سمعو صوت ابراهيم وهو جاي على الغرفه
ملك (اتخلعت وقامت على حيلها ) : مريم مريم ابراهيم جاي قومي
مريم (بخوف ) : ما بقدر امرق وهو جاي على الغرفه
مريم شالت الصحن بتاع الاكل وطوالي خشت تحت السرير ابراهيم جا داخل الغرفه لقى ملك واقفه بتعاين ليهو وبترجف
ابراهيم(بضحكه وقرب من ملك) : صباح الخير ي عروسه
ملك زحت منو بعيد وصرت ليهو وشها
ابراهيم :ليه كدا يااخ ؟ انتي ليه بتكرهني ي ملك؟ عشان امبارح .......
ملك ختت يدينها في راسها
ابراهيم ( بضحكه) : طيب طيب سكتا .انتي ليه محسساني اني امبارح عملتا ليك شي غلط زي محمد انتي مرتي في النهايه
ملك( بتبكي وتكورك فيهو) : اسكت عليك الله اسكت
ابراهيم ( بضحك وهبش شعر ملك ) : حاضر سكت ..اصلا انا طالع يلا ي حلووه
بعد طلع ابراهيم مريم طلعت من تحت السرير وكانت مخلوعه بالسمعتو وجات مسكت ملك طوالي
مريم: ملك انتي حصل ليك شنو ؟ محمد دا منو ؟
ملك ( عيونها بتدمع) : مافي حاجه مافي،حاجه اطلعي ي مريم خلاص انا كويسه .اطلعي عشان م يعملو ليك مشكله
مريم : ما ح اطلع من هنا الا اعرف مالك ي ملك .ليه ابراهيم كان بتكلم كدا ؟ محمد دا منو وعمل ليك شنو ؟
ملك ( انهارت وبتبكي ) : اغتصبني
مريم ( مخلوعه ) : شنوو ؟؟! لا حوله ولا قوه الا بالله لا حوله ولا قوه الا بالله
ملك كانت بتبكي وخلاص انهارت ومريم حضنتها عليها وبقت تبكي معاها
مريم : الله ياخد ليك حقك منو ي اختي ما تخافي الله دائما مع المظلوم
ملك : خلاص اطلعي عليك الله عشان ما يعملو ليك مشكله بسببي
اثنااء ما بتكلمو جات داخله عليهم تماضر ......

يتبع.......

#ملك
-١٢-
بقام سجى اليزيد

اثناء ملك ومريم بتكلمو جات داخله عليهم تماضر ...
تماضر : انتي الجابك شنو هنا ي مره ودي شنو صينيه الاكل الشايلاها دي ؟؟انتي ناسيه كلام ابراهيم ولا شنو ؟
مريم: عليك الله م تكلمي زول ي تماضر انا جيت اديتها اكل حرام البت من امبارح ما اكلت
تماضر : انتي ما شغلتك مش ابراهيم قالو ما يقربو منها ..
ابتهال جات طالعه وبتكورك وتنادي في ابراهيم عايزا تكلمو ...
مريم: تماضر تماضر عليك الله ما تكلميهو
ملك: ما تكلميهو انا السبب مريم م عندها علاقه ي تماضر
تماضر اتلفت على ملك ....
تماضر : انتي زحي من وشي بالله
مريم: خلاص خلاص ي تماضر تعالى عليك الله براحه
وطلعو خلو ملك براها...عند ابراهيم تلفونو ضرب وكانت ابتهال ....
ابراهيم: اوو خالتي كيفك؟؟
ابتهال: الحمد لله وين ملك قاعده جمبك؟
ابراهيم: والله انا برا البيت ملك م معاي
ابتهال: طيب انا يومين وبالكتير بكون معاكم
ابراهيم : ان شااء الله . ابراهيم في سرو ( يعني انتي ما ح تسيبينا في حالنا دي شنو المره اللصقه دي)
ابتهال:ابراهيم اديني رقم امك عشان اقدر اضرب لي ملك واتكلم معاها
ابراهيم : حاضر ح ارسلو ليك في رساله
ابتهال: شكرا
بعد ابراهيم قفل من ابتهال ضرب لي امو
ابراهيم: اسمعي ياامي خلى ملك تطلع من الغرفه
نعمه:بسم الله مالك اسي. قلبك حن عليها ولا شنو؟؟
ابراهيم (بزهج) : خالتها جايه ياخ اسي كانت بتتكلم معاي وح ارسل ليها رقمك لانو عايزا تتكلم معاها
نعمه : استغفر الله ي رب انت غايتو جبتا لي بلوه في البيت دا الله يخلصني منها
ابراهيم: المهم اسي اتكلمي معاها وخليها ما تفتح خشمها بكلمه لي خالتها وهدديها اذا اتكلمت انا م برحمها
نعمه: خلاص خلاص يااه
نعمه مشت ادت التلفون لي ملك وبقت تهدد فيها
نعمه: اسمعي هنا حسك عينك خشمك تفتحيهو لي خالتك بي حاجه عن الكلام الحصل ليك هنا فاهمه واذا اتكلمتي ي ملك ابراهيم قال ما بخليك فاهمه ؟
ملك (بخوف ) : طيب
نعمه: بعد تنتهي من كلامك مع خالتك امشي المطبخ كفايه ليك يومين مرزوعه في الغرفه دي خلينا نشوف شطارتك في البيت
ملك: حاضر
نعمه طلعت من ملك بعد عشره دقايق التلفون ضرب وكانت ابتهال اول ما ملك سمعت صوت خالتها ما قدرت تتكلم كويس زي كانو في حاجه واقفه ليها في حلقها وحست قلبها واجعها شديد ما قدرت تتكلم
نعمه : ملك كيفك ؟حبيبتي مشتاقه ليك
ملك ( بصوت مخنوق) : انا كمان والله اشتقت ليك شديد ي خالتي
نعمه : مالو صوتك دا ي بتي كدا ؟ حاصله ليك حاجه هناك ؟ عملو ليك حاجه الناس ديل
ملك : م حاصله لي حاجه ي خالتي انا كويسه
ابتهال: ان شاء االله تكوني كويسه ي بتي على العموم انا يومين وبكون معاك وفاطمه زاتها جايه معاي
ملك ( بفرحه) : الحمد لله انكم ح تجو مع انها كم يوم خليتكم لكن برضو اشتقت ليكم والله . فاطمه وهاجر كيف ؟
ابتهال : كويسين حبيبتي وهاجر عايزا تضرب ليك لكن قلتا ليها م عندها تلفون واذا ضربت في تلفون واحد من اهل راجلك ديل ح يعملو ليك موضوع
ملك: ي ريت لو بتقدر تجي معاكم
ابتهال : ي ريت بس الايام دي شايفا في عربيه طوالي واقفه جمب بيتهم
ملك: دا ولد خالتها دكتور على ما اظن بجي بشوف حبوبتها
ملك قاعده وبتتكلم جاتها سلافه قالت ليها ..
سلافه : انتي لسه يختي بترغى في التلفون قومي جهزي لينا الغدا بدل قاعده كدا حركات العروسات دي ما بتنفع معاي
ملك: طيب جايه
سلافه طلعت...
ابتهال: دي مالها دي بتكورك كدا ؟
ملك:لازم امشي اخت الفطور ي خالتي
ابتهال : اذا حاصله اي حاجه معاك كلميني ي بت
ملك: طيب
ملك سكتت مسافه ....
ملك ( بصوت متقطع ) : ابوي واخواني كيف ؟
ابتهال : بعد اي حاجه عملوها فيك بتسألي عنهم لسه
ملك : الظفر ما بطلع من اللحم ي خالتي والحاجه العملوها فيني اي وجعتني شديد لكن هم في النهايه ابوي واخواني مهما حصل
ابتهال : هم كويسين ي بتي .انتي عارفه حاجه بالجد انتي ملاك
ملك ( بضحكه) : لالا م كدا بس دي الحقيقه في النهايه هم اخواني ودا ابوي ..يلا ي خالتي عايزا امشي وانا مستنياك انتي وفاطمه
ابتهال: ان شاء الله ح نجى ...يلا في امان الله
محمد كان قاعد مع امه وكان مركز مع كلام ابتهال وملك شديد
محمد : ملك كيف؟؟
ابتهال: كويسه
محمد : كويس انها بخير
ابتهال : وانت بتسأل ومهتم بيها كدا ليه ؟ عشان تكفر ذنبك مثلا والعملتو فيها زمان
محمد: عليك الله ي امي الموضوع دا ليهو اسي كم سنه ؟ خمسه سنين وانتي لحدي الان بتتكلمي فيهو .انسيهو عليك الله وخلينا نعيش حياتنا
ابتهال (بسخريه) : هه تعيش حياتك ؟! عيشها ي اخوي عيشها والمسكينه دي خليها تتعذب كدا . انت مافي حاجه بضرك .الضرر كلو جا لي ملك مع الاسف
محمد : اووف اووف عليك الله خلاص ي امي
ابتهال: وبتتأفف كمان ..انت عارف الحاجه المخليانى شاعره بالذنب شنو اني ما وقفت مع ملك ما شجعتها عشان تاخد حقها منك قلبي ما طاوعني اني أذيك ي جناي لكن ندمانه اني ما وقفت جمب المظلومه دي.لكن عايزا اقول ليك حاجه

ي محمد رب العالمين ما بنسى عبادو المظلومين وح يجي يوم وملك تاخد حقها منك
محمد (بزهج) : ملك م قاعده تتكلم عن الموضوع دا ونستو انتي بتفتحي فيهو كل شويه ليه؟؟
ابتهال: ملك ما نستو ولا ح تنساهو لغايه اخر يوم في حياتها بس ما بتتكلم فيهو لانو نحنا سكتناها بالغصب
محمد : انا طالع
ابتهال: ااي اي اهرب يلا
عند ملك .... دخلت المطبخ وبدت تعمل في الاكل ومعاها مريم ..
ملك: اقنعتي تماضر ي مريم ما ح تقول حاجه لي ابراهيم صح ؟.
مريم: اي ما ح تكلمو لكن انا لسه خايفه منها والله
ملك: انا ما شايفه تماضر زوله كعبه ي مريم
مريم:والله انتي مسكينه وبرئيه ساي ي ملك انتي ما بتعرفيها بس
ملك: لا انا حاسه انها زوله كويسه بعدين احتمال هي اسي بتتعامل معاي كدا لانو انا عرستا ابراهيم لكن بعدين احتمال تتعامل معاي كويس
مريم: ان شااء ي ملك ..انتي عارفه انو هي اكتر وحده مستحملاهو وبتريدو شديد بالرغم من انها اكبر منو وبالرغم من انو معذبها والله
ملك: يمكن عشان كدا هي بتتعامل معانا كدا لكن انا واثقه انو تماضر زوله كويسه
مريم ( بضحكه) : وسلافه الله يهديها بس
عند محمد وبعد كلامو مع امو ابتهال طلع من البيت زهجان شديد قام ضرب لي زول ....
محمد : نحنا لازم بعد دا نبدا الشغل تمام ...لالا م بقدر استنى اكتر من كدا ...اذا استنينا كتيير ما عارف ياتو مصيبه ح تجيني من ورا الموضوع دا عشان كدا لازم نبدا الشغل وبأسرع وقت .....

يتبع......

#ملك
-١٣-
سجى اليزيد

بعد محمد طلع من البيت وكان بتكلم في التلفون طبعا هم كانو في بيت عبد الوهاب عشان ابتهال عايزا تشيل حاجاتها لمن كانت قاعده معاهم وماشه لي ملك ...
عبد الوهاب : قالو لي ماشه الخرطوم لي ملك
ابتهال: اها والمشكله وين ي اخوي
عبد الوهاب: طيب ي ابتهال بصراحه كدا انا ما محبز فكره تمشي لي ملك دي نهائي
ابتهال : السبب?!
عبد الوهاب: البت يا دووب ليها يومين متزوجه انتي مستعجله وماشه لي شنو ؟؟ بعدين اهل راجلها ما ح يرضو وانتي عارفاهم كويس هم شنو
ابتهال: اذا انت عارف ابراهيم واهلو هم شنو ليه رميت بتك في النار بيدينك
عبد الوهاب : اوورف رجعنا تاني للموضوع دا انتي ما بتزهجي
ابتهال عاينت لي عبد الوهاب وقرفانه منو شديد وطلعت خلتو ....
عند ملك كانت قاعده في المطبخ وجاها زول من ورا .....
ملك: مريم جيتي ؟؟
ملك اول ما اتلفتت اتخلعت لانو شافت شاب طويل وعريض وبشبه ابراهيم واضح انو ولدو .اسمو عثمان عمرو 20سنه بقرا في الجامعه ...
ملك ( بخلعه) : بسم الله الرحمن الرحيم
عثمان : انا اسف اسف ما كان مفروض اجيك كدا فجأه
ملك اول ما تشوف راجل قدامها بتتوتر وبتخاف بسبب الحاجه الحصلت معاها وجات عايزا تمشي ....
عثمان : انتي ملك صح
ملك هزت ليهو رأسها بمعني اي
عثمان ( بسخريه ) : والله لكن ...معرس ليهو بت قدر اولادو .الله يهديهو بس
عثمان اتلفت على ملك لقاها بتعاين ليهو باستغراب ...
عثمان: ما تستغربي ي ملك انا اصلا كدا بتكلم عن ابوي ..لانو واحد ظالم .بعدين هو ما بخجل معرس وحده قدر اولادو .انتي كيف قبلتي بالحاجه دي ؟؟
ملك: انا.....
عثمان( قاطعها) : ابوي جبرك مش كدا ...م علينا انا اسمي عثمان ولد ابراهيم وسلافه
عثمان مد يدو لي ملك عشان تسلم عليهو ملك عاينت ليهو وما مدت يدها ..
عثمان: عادي تخافي مني بما اني ولد ابراهيم بس بأكد ليك انا ما زيو
اثناء ما عثمان بتكلم مع ملك جات داخله عليهم سلافه ..
سلافه(بتكورك) : انت الجابك هنا شنو ي ولد وبتتكلم مع البت دي ليه ؟
عثمان: جيت اشرب مويه حرام يعني ي امي بعدين مالك بتكوركي كدا
سلافه: غور امشي قدامي ...وانتي تاني ما اشوفك واقفه ولا بتتكلمي مع ولدي فاهمه ..شلتي ابوهو مننا وكمان عايزا تفكري في ولدي جنسك شنو انتي ي بت
ملك: انا ما قاعده اتكلم معاهو هو براهو جا المطبخ وانا والله ما فكرتا في حاجه من الكلام البتقولي فيهو دا
سلافه جات على ملك وبقت بتكورك ...
سلافه :هووي هووي بت بتين انتي عشان تردي على اوعك تقلي ادبك فاهمه
سلافه بقت تلز في ملك وعثمان بمسك في امو
سلافه : اسمعي هنا تاني خشمك دا ما تفتحيهو معاي لمن اتكلم معاك ما تردي على فاهمه
ملك كانت بتبكي فجأه بطنها طمت ووجعتها كانت حاسه نفسها ح تستفرغ وطوالي جرت الحمام
عثمان ( بكورك) : اسي البت عملت ليك شنو ي امي ليه بتتعاملي معاها كدا عملت ليك شنو ؟
سلافه: انت اسكت خالص خشمك ما تفتحو معاي تاني لو شفتك واقف مع البت دي يا عثمان ح اكلم ابوك واليحصل يحصل
ابراهيم: ح تقولي ليهو ولدك واقف مع مرتك ؟؟
سلافه ما ردت عليهو وطلعت برا وهو طلع وراهو وكان شغال بكورك ويتكلم لاقتهم نعمه....
نعمه: بسم الله البت دي مالها؟؟
سلافه: اتخيلي ي عمتي لقيتها بتتمايع مع عثمان جوه
نعمه: سجمنا ي يمه سجمنا البت دي ح تعمل لينا مصيبه والله
عثمان: امي انتي ليه بتكذبي ..البت ما كانت بتتكلم معاي ولمن شافتني قدامها كانت عايزا تطلع انا وقفتها وكنت بتكلم معاها لكن هي ما فتحت خشمها
سلافه: خلاص غسلت ليك مخك زي ما عملت لي ابوك
عثمان( بزهج) : اميي خلاص يااخ ..انا تعبتا من افتراك وظلمك للناس ...سلام انا طالع
سلافه ( بتكورك) : تعال هنا ي ولد
عثمان طلع ورزع الباب وراهو وما اشتغل بكلام امو
جات مريم جاريه من غرفه ملك وبقت تكورك...
مريم: عمتي عمتي الحقي ملك وقعت في الارض
نعمه: بسم الله الرحمن الرحيم البت دي انا مش كلمتكم قلتا ليكم ح تجيب لينا مصيبه
سلافه: دايرا تعمل لينا درامات شكلها
وطلعو عشان يشوفو ملك ...
نعمه: البت دي ما تكون عيانه كمان يكون عندها مرض تقوم تعدينا
سلافه: اي والله سجمنا كان عندها مرض خطير
مريم: انا ح اضرب لي ابراهيم يجيب معاهو دكتور
سلافه: وانتي مالك يختي خايفه عليها كدا عرفه من بتين ؟؟
مريم: ما الا اعرفها عشان اعمل معاها كدا ..انتي السبب ي سلافه البت ما عملت حاجه وجيتي فشيتي غضبك فيها
سلافه (بتكورك) : هووي هووي عايزا تلبسيها لي انا كمان ..
نعمه: اسكتو يااخ انتو الاتنين ما تكوركو يااخ كفايه انا زهجتا منكم اسكتو
مريم ضربت لي ابراهيم جا جاري ومعاهو الدكتور بعد مسافه ملك صحت الدكتور لمن جا عشان يكشف عليها ملك اتوترت وضمت نفسها عليها والدكتور قدر ما اتكلم معاها ما خلتو يكشف عليها نعمه وسلافه كانو مستغربين من الحركات البتعملها بس ابراهيم ومريم عارفين هي ليه بتعمل كدا .......
ابراهيم( بتوتر) : يا بت ما بتخلي الراجل يكشف عليك
ملك(بخوف): لالا م ع

ايزا انا كويسه بس في حبوب يا مريم اديني ليها اسي باخدها وببقى كويسه
ابراهيم: احتمال عندك حاجه تانيه خليهو يكشف عليك احسن ليك
ملك: انا كويسه ما في داعي
مريم كانت مستغربه ليه ابراهيم بعمل كدا ليه مصر انو الدكتور يكشف على ملك وهو عارف انو ما بتتحمل راجل يقرب منها بسبب الحصل ليها وبقت تقول في سرها (يمكن عايز يطلع روحو برئ وما عارف حاجه عنها ..لكن في نفس الوقت دي شنو الحبوب البتبلع فيها ملك دي ؟؟!)
ملك: مريم لو سمحتي بس اديني الحبوب ديك
مريم ادت ملك الحبوب والدكتور وابراهيم وسلافه ونعمه طلعو برا......
نعمه( باستغراب) : البت دي ليه كانت بتتصرف كدا؟
سلافه: بررري انا ذاتي اتحيرتا فيها شفتيها بترجف كيف
نعمه: البت دي شكلها عيانه من الحبوب البتبلع فيها دي ..دي حبوب شنو ي رب كمان ؟
سلافه: ان شاء الله م يكون عندها مرض وتقوم تعدينا نحنا كمان
نعمه: تفي من خشمك ي مره كان عدتنا نحنا نمشي وين ...وووب سجمك وياا حليلك ي ابراهيم الله يحميك من البت دي بس
عند ملك ومريم ......
ملك: مريم ممكن ترسلي رقمك لي خالتي انا بديك رقمها وانتي رسلي رقمك فيهو عشان اقدر اتكلم معاها ما عايزا عمتي نعمه تضايق مننا كل ما خالتي تضرب ليها .اذا ما عندك مشكله ؟؟
مريم: عادي حبيبتي وين المشكله اتكلمي معاها وقت ما انتي عايزا
ملك: شكرا
بعد مسافه وسكوت دام طويلا......
مريم: ملك عايزا اسألك سؤال وعايزاك تجاوبيني بصراحه طيب؟
ملك: اتفضلي اختي
مريم: ملك دي شنو الحبوبه البتبلعي فيها دي من يوم جيتي وانا كل مره بلاحظ ليك بتبلعي فيها وانتي عندك مرض يعني عشان تبلعي حبوب وبالكميه دي ؟!
ملك ( نزلت راسها ) : انا عيانه ي مريم
مريم( بخلعه) : بسم الله مالك ي ملك عندك شنو ؟
ملك ( بتبكي) : من الحصل لي داك ي مريم لمن كنت راقده في المستشفي الدكتور قال لي لازم تبلعيها عشان ما تحصل لي مشكله
مريم : لا حوله ولا قوه الا بالله الله ينتقم منو ان شااء الله اذاك الله ينتقم منو
ملك بقت تبكي شديد ومريم تبكي معاها وبقت حاضناها وبتقرا ليها في قرآن لغايه ما هدت شويه .......

يتبع.....

#ملك
-١٤-
بقلم سجى اليزيد

ملك ومريم قاعدين مع بعض وساكتين مسافه ومريم لسه مخلوعه من الحاجه القالتها ليها ملك وقصه مرضها داك...
مريم: مالها سلافه معاك ي ملك ؟ ليه قبيل كانت بتكورك كدا ؟؟
ملك: كان واقف معاي ولد ابراهيم اسمو....
مريم( قاطعتها) : عثمان قصدك
ملك: ما عارفه اسمو انا ..بس كان واقف معاي وبتكلم وهي افتكرتني انو انا الموقفاهو وبتكلم معاهو وقالت لي انا عايزا العب عليهو زي ما لعبتا على ابراهيم بس قلتا ليها انا ما عندي ذنب وما فكرتا في حاجه من الكلام البتقول فيهو
مريم : الله يهديها المره دي الله يهديها...لكن ولدها عثمان دا عكسها تماما
ملك: انا ذاتي حسيت انو زول كويس.بس انا بدون ما اشعر بقيت بخاف من اي راجل
مريم: صدقيني عثمان كويس .. لكن ابراهيم ما مخليهو في حالو طوالي عامل معاهو مشاكل واسي الولد بسببو بعد ما كان ماشي كويس في الجامعه خلاها وخلا القرايه عشان يشتغل معاهو في محلات الدهب
ملك: مسكين .ان شاء الله ابراهيم يرجع يخليهو يكمل قرايتو .
مريم: ان شاء الله ..انا بمشي اجيب التلفون عشان تسجلي رقم خالتك وتتكلمو مع بعض .
ملك: طيب
عند تماضر جات ولقت نعمه وسلافه بتكلمو .....
تماضر: في شنو مالك؟
سلاافه: يختتتي الليله ما شفتي حصل شنو عشان اتكلمتا مع السيده ملك كلمتين البت غمرت وعملت نفسها تعبانه
تماضر : ليه انتي قلتي ليها شنو ؟؟
سلافه: اتخيلي لقيتها واقفه مع عثمان ولدي وبتتمايع معاهو
تماضر: سجمنا لالا البت دي ما هينه
سلافه: يا عمتي البت دي من م جات البيت دا ونحنا ما شفنا يوم حلو في البيت دا وبعدين ابراهيم مش قال كلها يومين وح يمشو عليك الله استعجلي وكلميهو يسوقها من هنا
نعمه(بخبث) : لالا البت دي في وراها شي انا من زمان حاسه كدا تصرفاتها غريبه لاحظتا ليها من يوم مشينا نخطبها لي ابراهيم وانا ما بخليها الا اعرف قصتها شنو
تماضر: يعني ح تكون شنو ي عمتي ياها حركات بنات الزمن ديل بعدين ي عمتي انتي ما خايفه على عثمان من البت دي
اثناء كلامهم جو داخلين عثمان وابوهو ابراهيم ...
ابراهيم( باستغراب) : عثمان مالو؟؟
سلافه( بتمتمه) : لالا مافي شي
ابراهيم ( بصوت عالى) : انتي جبتي سيره ملك وعثمان في شنو!
عثمان: بحكي ليك انا ...كل القصه امي جات لقتني واقف مع ملك وملك اول ما شافتني كانت عايزا تطلع بس انا وقفتها وبقيت بتكلم معاها
ابراهيم ( بصوت حاد) : بتتكلم معاها في شنو حضرتك ؟؟!
عثمان: سألتها هي كيف قبلت بيك وهي لسه صغيره اكيد بتكون مجبوره عليك ما تستغرب اني بتكلم معاك كدا وبالاسلوب دا انا ما خايف منك واي حاجه غلط انت بتسويها انا ما ح اسكت عليها. عارف ليه لانك ابوي وانت بتعمل في اغلاط كتيره ومن واجبي اوريك الصح لمن انت تعمل غلط
كلهم كان مخلوعين بالطريقه البتكلم بيها عثمان مع ابوهو ومستغربين شنو هي الاغلاط البعمل فيها ابراهيم .ابراهيم كان م مصدق انو ولدو بتكلم معاهو كدا وغضب شديد منو وطوالي قااام ضربو ...
ابراهيم( بكورك وبضرب في عثمان) : انت كيف تتكلم معاي بالطريقه دي انت ناسي انو انا ابوك ؟لا وكمان عامل نفسك بتنصح فيني .والله الليله ما اخليك يا حيوان
سلافه( بتكورك وتبكي) : عليك الله خليهو ي ابراهيم هو في النهايه ولدك عليك الله سيبو خلاص
نعمه (بصوت عالى) : فك الولد يا ابراهيم
عثمان: اضرب اضرب لسه دا انت البتعرف تعملو ...متعود على الفيلم دا من زماان لمن تضرب امي قدامي وانا صغير
ابراهيم: اخرص ي ولد
عثمان : ما ح اسكت ..يلا احكي ليهم عن البت الكانت معاك في العربيه
كلهم سكتو وبقو بعاينو لي عثمان ومستغربين في الكلام البقول فيهو
عثمان ( بضحكه) : ما تستغربو انا من زمان متعود على حركات زي دي من ابوي .والليله شفتو كانت معاهو بت في العربيه
نعمه ( مخلوعه) : بت شنو يا ابراهيم ؟؟
ابراهيم ( بتمتم) : دي زبونه لمحلاتنا ي امي ما اكتر
عثمان( بضحك) : زبونه !! الزبونه عادي تقعد معاك جوه العربيه!
ابراهيم كان عايز يضرب عثمان تاني بس سلافه منعتو وعثمان طلع من البيت متعصب وسلافه تبكي وتنادي في ولدها
ابراهيم: دا اخر دلعك ليهو .شوفيهو بتكلم معاي كيف .انت السبب الله ياخدك
ابراهيم طلع من البيت .تماضر جات قربت من سلافه
تماضر : تستاهلي ي سلافه شفتي من ورا كذبك ولدك اتأذى كيف؟!انتي عارفه انو البت دي مسكينه واساسا هي باين عليها خوافه البخليها تتمايع مع ولدك شنو .انا ما واقفه في صفها ولا بدافع ليها لكن عاد النصيحه بقولها انتي كنتي عايزاهو يمشي يضربها ويطلعها من البيت هي لكن زي ما شايفه حصل العكس وولدك براهو اعترف بلسانو ..
سلافه: تماضر زحي من وشي انا م طايقاك
نعمه طلعت فوق لي ملك ومريم....
نعمه( بصوت حاد ومسكت ملك من يدها) : كلو حصل بسببك انتي ي ملك بسببك ابراهيم ضرب ولدو .بسببك عثمان طلع من البيت.ناويه تعملي شنو اكتر من كدا وريني ح تعملي شنو
مريم : حرام عليك يا عمتي البت مالها عملت شنو اسي ؟بعدين دي سل

افه الكبرت الموضوع قدر دا .عليك الله ي عمتي خلاص انسى الموضوع والله م بستاهل
نعمه بقت تعاين لي ملك نظرات كلها خبيثه وطلعت خلتهم وملك ما قالت حاجه ....
مريم : ما تركزي كتير معاهم انسى الموضوع
ملك: عادي اتعودتا انا
مرت الايام وخاله ملك وفاطمه جو لي ملك وقررو يقعدو معاها زي شهر وكانت فرحانه شديد بجيتهم اول ما شافتهم قعدت تبكي وحضنت خالتها شديد وهم زاتو بقو ببكو معاها وفي الفتره الكانت قاعده فيها ابتهال وفاطمه مع ملك ابراهيم كان بحاول يبين انو هو معيش ملك احسن عيشه حتي امو كانت بتعاملها على اساس كدا تعاملهم معاها في الفتره دي اتغير 360درجه ملك ما كانت بتقول حاجه لخالتها وفاطمه طبعا لانو ابراهيم هددها...
ملك ( بتبكي) : والله اشتقت ليكم ي خالتي شديد ما تصدقي فرحانه كيف انو شفتكم تاني كيفك عليك الله
ابتهال: كويسين حبيبتي نحنا برضو اشتقنا ليك والله بعد مشيتي مسختي على اي شي ي بتي
وحضنو بعضهم وبقو ببكو ....
فاطمه: هوووي هوووي شنو عايزين تقلبوها لينا فيلم هندي .كدي ي خالتي زحي لي ليكم ساعتين بتسلمو على بعض ادونا فرصه معاكم شويه ..
ملك ( بضحكه) : اشتقت ليك والله ي مجنونه
ابتهال: اها ي ملك الحياه هنا كيف ؟ ابراهيم واهلو بتعاملو معاك كيف
ملك( نزلت راسها وبصوت متقطع) : الحمد لله كويسين معاي هم
ابتهال: متأكده؟؟
ملك: اي ي خالتي انا كويسه والله
ابتهال: ان شااء الله ي بتي تكوني كدا
ملك: ابوي واخواني ليه ما جو معاكم؟ هم كيف كويسين؟
ابتهال عاينت لي ملك مسافه وقلبها واجعها عليها لانو بعد الشافتو منهم هي لسه بتسأل منهم وشايله همهم..
ابتهال : كويسين حبيبتي كويسين
فاطمه: هههي ملك ما كلمتك هاجر جات الخرطوم عشان الجامعه بتاعتها قالت لمن تلقى فرصه ح تجي تشوفك
ملك( بفرحه) : واخيرا ح نقعد مع بعض تاني
ابتهال: فاطمه زاتها ح تقعد هنا فتره عشان الجامعه
نعمه كانت قاعده معاهم وبتعاين ليهم بطرف عينها والوضع نهائي ما عاجبها ...
نعمه: عن اذنكم
مشت خلتهم ..وسلافه وتماضر كانو قاعدين مع بعض..
سلافه: بالله شوفي عليك الله جابت لينا اهلها هنا عشان نخدمهم نحنا اتخيلي بس!
تماضر : كدي عايني لي هنا سيبيني منها اسي البت دي .تتذكري عثمان قال شنو .قال انو كان في بت مع ابراهيم دي منو ي ربي؟
سلافه: ما قال زبونه ليهو وبعدين انتي فاتحه الموضوع تاني لي شنو عشان اسي يجي يسمعك يزفتها معاك
تماضر: لالا دي ما زبونه بعدين ما ملاحظه الايام دي ابرااهيم بتجيهو تلفونات في اوقات متأخره وبقى ما بقعد في البيت طوالي هو برا
سلافه: اي والله ي ربي دي منو
نعمه جات داخله عليهم وبتتأفف.....
نعمه: الناس ديل انا ما بطيقهم لا هم لا بتهم الله يسامحك ي ابراهيم بس جيت ختيتهم لي في وشي كدا وخليتني
سلافه: معليش استحمليهم ي عمتي.
عند ابراهيم....كان بتكلم بالتلفون مع عبد الوهاب ...
ابراهيم: اهااا وعدك لي انك تسلمني الارض ما شفتو للان مش كان اتفاقنا اني بمجرد م اعرس بتك واستر عليها تسلمني ليها؟
عبد الوهاب: وانا كمان لحدي الان ما شفت منك شي الضمني شنو اني بمجرد ما اسلمك الانت عايزو انك ما تسيب ملك والضمني شنو انك ما تنفذ الوعود الوعدتها لي ؟
ابراهيم( بضحكه) : للدرجه دي عايز تتخلص من بتك وما عايزها
عبد الوهاب: شوف ي ابراهيم انا ما ح اسلمك قطعه الارض دي الا لمن انت تنفذ الحاجه الطلبتها منك .يلا مع السلامه.
عبد الوهاب قفل الخط في وش ابراهيم .ابراهيم بقى متعصب وجدع التلفون .
مر اليوم دا بسرعه وملك فرحانه لانو رجعت اتلمت مع خالتها . ملك وفاطمه كانو طول اليوم بتونسو مع بعض لغايه الليل .
فاطمه: ملك عايزا اقول ليك حاجه.
ملك: يلا قولي
فاطمه: في زول قال عايز يتكلم معاك وضروري ي ملك تتكلمي معاهو !!.....

يتبع......

🌹ملك
الجزء ( 15)
سجى - اليزيد

ملك مستغربه من كلام فاطمه ودا منو الزول المفروض تتكلم معاهو دا؟!....
ملك: دا منو ي فاطمه المفروض اتكلم معاهو ؟؟
فاطمه : طيب عايني انا ح احكي ليك اي حاجه طيب لكن خليك هادئه وبفهمك براحه براحه انا عملتا كدا ليه وصدقيني لمصحلتك.
ملك: في شنو يا فاطمه خوفتيني
فاطمه: تتذكري لمن غمرتي يوم العرس ووديناك المستشفي؟
ملك: اي
فاطمه: تتذكري الدكتور داك ؟لمن جا يكشف عليك وانتي رفضتي وبقيتي تبكي وهو كان مستغرب انتي ليه اتصرفتي كدا وبقى بسأل فينا ؟
ملك سكتت مسافه وكانت بتتذكر في الدكتور..
ملك: اي اتذكرتو .مالو؟
فاطمه: بعد طلع هو كان شاكي انو في حاجه حاصله ليك واستغرب في تصرفك عشان كدا قام شال رقمي عشان يعرف انتي مالك ومشكلتك شنو ؟ وكان عايز يعرف مني بس انا كلمتو انو انا ما عارفه حاجه...
ملك( قاطعتها) : انتي كيف تديهو رقمك ي فاطمه؟ احتمال اسي بلعب عليك .وهو دخلو شنو فيني .منو هو عشان يتدخل فيني
فاطمه: عليك الله ي ملك اهدي واسمعيني للنهايه
ملك: لالا يا فاطمه انتي عملتي حاجه م صح .ما كان مفروض تعملي كدا
فاطمه: اسمعي ي ملك انا اصلا من الاول حاسه انك داسه مني حاجه وما عايزا توريني ليها وهو وعدني انو يساعدني ويساعدك اذا في اي مشكله
ملك ( بتكورك وبتوتر) : انتي م كان تعملي كدا يا فاطمه كم مره قلتا ليك انو انا ما عندي حاجه ليه انت م بتصدقيني
فاطمه: لمن اقول ليك ي ملك انتي مالك انتي طوالي بترجفي وبتتوتري زي اسي وما عايزاني اقول انو حاصله ليك حاجه؟ وقصه الحبوب بتاعتك البتبلعيها دي وزواجك المفاجئ من ابراهيم وبعد دا ما اسألك؟
ملك: للمره الاخيره يا فاطمه قلتا ليك مافي حاجه
فاطمه: طيب ي ملك على راحتك لكن برضو ما ح اسيبك
فاطمه طلعت خلت ملك براها وكانت خايفه وبترجف الدكتور ليه مهتم بقصتها كدا؟ وبقت تفكر في الموضوع . اذا زول عرف بقصه اغتصابها وقتها اهلها ما ح يرحموها .وكيف تقدر تخلي فاطمه تنسى الموضوع دا ؟قطع تفكيرها ابراهيم جا داخل عليها ...
ابراهيم ( بزهج) : صحبتك دي بتعمل هنا شنو؟؟
ملك: كانت بتتونس معاي بس
ابراهيم( قرب من ملك) : اوعك تكوني حكيتي ليها بالحاجات الحصلت معاك هنا ؟ فتحتي خشمك وكلمتيهم صح ؟
ملك ( بخوف وتمتمه) : لا لا ما قلتا لي زول حاجه
ابراهيم : ايوااااا كدا ياااه خليك كدا يا مرتي الحلوه .لمن تكوني فالحه وبتسمعي الكلام انا بحبك اكتر ولمن احبك اكتر عذابي ليك ح يخف اكتر يلا قوومي كدا ي عسل اعملي لي قهوه
ملك( بخوف) : طيب
ملك طلعت وخلت ابراهيم براهو .تلفونو ضرب .....
ابراهيم: اهلييين ي عسسسل كيفك يااه مشتاقين ...ما ح نشوف بعض تاني ...عايني اديني نص ساعه كدا وبلاقيك في نفس المكان الاتلاقينا فيهو اول مره تماام..يلا سلاااام
ملك دخلت المطبخ وكانت قاعده سلافه وملك بقدر الامكان بتحاول تتحاشاها....
سلافه: انتي يختي جبتي لينا اهلك هنا وقعدتيهم والشغله كلها بقت فوق راسنا .وانتي ولا قشه ما رفعتيها
ملك ما ردت عليها ...
سلافه : بسببك انتي حصلت مشكله بين ابراهيم وعثمان واسي عثمان طلع من البيت ما عارفاهو وين كلو بسببك ( قربت من ملك) انتي سبب البلاوي من يوم ما جيتي على البيت دا ونحنا ما شفنا الخير بعيونا
ملك سامعه كلامها ولسه ما بترد عليها
سلافه( بصوت عالي) : هوووي هاااا انا بتكلم معاك ي بت افتحي خشمك دا
تماضر سمعت سلافه بتكورك وجات جاريه للمطبخ
تماضر: في شنو ي مره مالك بتكوركي
سلافه: عليك الله تعالي شوفي الشافعه بتقل في ادبها معاي
تماضر: عليك الله اطلعي ي سلافه اررح اررح اطلعي ما عندك بيها شغله
سلافه طلعت وكانت بتعاين لي ملك نظرات كلها حقد وحسد وملك شافتها وخافت منها شديد حست بيها عايزا تقتلها بعد سلافه طلعت.....
تماضر : اعملي لي معاك قهوه وجيبيها لي سامعه؟
ملك: طيب
ملك طلعت من المطبخ ومشت ودت القهوه لي ابراهيم وكان لسه بتكلم بالتلفون وبضحك لمن شاف ملك طوالي استعجل الزول البتكلم معاهو وقفل منو بعد شرب قهوتو طلع مستعجل قابلاتو سلافه برا ....
سلافه: وين ماشي ي ابراهيم؟
ابراهيم: عفوا !انتي من بتين بتسأليني انا طالع وين ولا جاي من وين؟
سلافه: ما قصدي حاجه ي ابراهيم ....
ابراهيم ( قاطعها) : احسن اسكتي طيب .كلمي امي انا م بجي الا المسا.
سلافه: سمح
عند ملك وتماضر ...ملك جابت لي تماضر القهوه وبقت تماضر تعاين ليها من فوق لي تحت وبتسأل فيها...
تماضر : اقعدي مالك واقفه كدا؟
ملك قعدت ...
تماضر : هه ما تخافي ما ح اعمل ليك حاجه ....عايزا اسألك انتي عارفه حاجه عن موضوع البت الاتكلم عنها عثمان المره الفاتت ؟؟
ملك: ياتو بت ؟
تماضر : ما تعملي نفسك غبيه ي ملك يعني ما عارفه ابراهيم بخون فينا ملك( نزلت راسها) انا انا ما عارفه اي حاجه عن الموضوع دا
تماضر : ايوااا تمام
ملك : عن اذنك
تماضر: ابعدي من سلافه واتحاشيها لانها مجنونه
ملك هزت ليها راسها يعني طيب.
بعد مرور شهر ابتهال فاطمه لسه كانو قاعد

ي

ن مع ملك وهي فرحانه بيهم شديد وتوترها خفه شويه في يوم كانت قاعده في غرفتها جات عليها نعمه......
نعمه: عايني بعدين جايننا ضيوف
ملك: طيب
نعمه: بالله حاولي تغيري من شكلك شويه البسي ليك شي راقي بدل الهلافيت البتلبسي فيها دي لانو ما حلوه تقابلي بيها ضيوف مستواهم عالى واعملي ليك حاجه في وشك والبسي دهب واتجيهي كويس والحركات الناقصه الجبتيها من قريتكم دي ما تعمليها قدام ضيوفي كفايه اني مستحملاك بيها هنا فاهمه؟
ملك: طيب
الكلام كان جارح بالنسبه لي ملك وكانت مستغربه انو في ناس لسه بالعنصريه والتكبر دا وما قدرت تقول ليها حاجه غير انها توافق ....
جا المسا وضيوف نعمه جو عشان يشوفو ملك ابتهال وفاطمه مانو مافيشين ما قدرو يقعدو بسبب الحركات ال كانت بتعملها نعمه عشان تخليهم يطلعو من البيت اول ما وصلو الضيوف بدو تعليقات على ملك ونعمه كانت بتتظاهر انها بتحب ملك وكانت بتعاملها كيف قدامهم وحده من النسوان ( والله مرت ولدك الصغيره ماشاااء الله سمحه شديد والله ي زين ما اختار ولدك)
نعمه( باشمئزاز) : تسلمي حبيبتي عقبال ولدك ان شااء الله
ملك كانت مخنوقه من النفاق الحاصل قدامها ونعمه كانت كل دقيقه تديها اوامر عشان تعمل الحاجه العايزاها هي اول ما الضيوف طلعو منهم طوالي ملك مشت غرفتها وجات لحقتها مريم ....
مريم: اها كالعاده حصل نفاق ومظاهر لمن جو الضيوف صح ؟
ملك : انا ما بقدر اقول حاجه ي مريم غير الحمد لله
مريم: ونعم بالله . ملك انا لاحظتا لحبوبك كملت جبت ليك وحدات معاي ابلعيهم في مواعيدهم طييب
ملك': شكرا ي مريم
مريم: العفو حبيبتي .عايزا اسألك .دي خالتك ابتهال صح ؟ دي الولدها اسمو محمد صح؟
ملك: اي .مريم عايزاك توعديني انو مافي زول يعرف بحاجه من الكلام القلتو ليك اوعديني انو مافي زول يعرف انو محمد اغتصبني
في اللحظه ديك نعمه كانت واقفه وبتسمع فيهم ورا الباب وسمعت اي حاجه قالتها ملك واول ما سمعت اتخلعت وبقت بتكورك ......

يتبع.......

#ملك
-١٦-
بقلم سجى اليزيد

نعمه اول ما سمعت الكلام القالتو ملك بقت تكورك ودفرت الباب وجات مسكت ملك من شعرها وبتكورك فيها
نعمه( بصوت عالي ) : طلعتي وحده لافه ساااي الحق علينا نحنا اللميناك يا قليله الادب.انتي بتستغلي في منو ؟ اطلعي برا ما عايزا اشوفك في البيت دا هنا تاني . عشان كدا اهلك استعجلو عشان يعرسو ليك ابراهيم استغليتونا انتو يعني .اطلعي برا ما عايزا اشوف خلقتك في البيت دا هنا تاني
ملك( بتبكي) : عليك الله ي عمتي فكيني واسمعيني شويه عليك الله
مريم ( بتمسك في نعمه من ملك) : ي عمتي البت م عندها ذنب عليك الله فكيها
نعمه( بتضرب في ملك) : ي قليله الادب بتخدعي في ولدي انا الليله دي بخليهو يطلقك ويرميك برا
في الاثنااء دي ابراهيم جا البيت وسمع الكواريك .تماضر وسلافه كانو واقفين بعاينو ومخلوعين وم عارفين حصل شنو .ابراهيم جا داخل عليهم في الغرفه ومخلوع....
ابراهيم( بصوت عالي) : في شنو ي امي في شنو ؟؟ لي اصواتكم دي طالعه برا
نعمه( بتكورك) : واااااي انا ي ولدي يحليلك خدعوك ي ولدي واستغفلووك مرتك يا ولدي مرتك طلعت وحده فاكه ولافه ساي
ابراهيم ( بخلعه) : انتي بتقولي في شنو ي امي ؟
نعمه: جايب ليك وحده مغتصبنها لي هنا ! دا اذا اصلا ما كانت بت ليل ساي. انت عااااارف المصيبه الواقع فيها انت .عارف حجم البلوه دي انت
ابراهيم اتهجم وكان بفكر امو عرفت الكلام من وين وكان خايف انو لو الناس عرفو انو ابراهيم عارف بموضوع ملك واغتصابها يحرموهو من الورثه والاملاك ال عندهم وخصوصا اهلو وح يبقى منبوذ قدام اهلو ومعارفو وح يبدو يسألوهو هي كيف رضى انو يعرس ملك وعارف حقيقتها لانو اهل ابراهيم صعبين شديد ومتطلعين وما بحبو يتورطو في شي كعب واكيد كانو ح يتبرو منو ويحرموهو من اي شي وهو الكلام دا كلو ما كان خاتي ليهو اهميه اهم حاجه عندو كانت الورثه الممكن يخسرها اذا زول عرف انو هو عارف موضوع ملك دي كلها افكار دارت في راس ابراهيم.....
نعمه: واااااي نحنا فضيحتنا وااااي انا خلاص اتفضحنا منو تاني نحنا ال م بتكلم فينا بسببك ي قليله الادب نحنا ح نتمرمط بسببك انتي
ملك( بتبكي) : عليك الله ي عمتي خليني اشرح ليك
ملك كانت ماشه ناحيه نعمه ابراهيم جا وقف قدامها ...
ابرااهيم: عايزا تشرحي شنو؟ عايزا تشرحي خيانتك لي؟ واني عرست البت الغلط؟ لانو الصراحه انتي الغلط زاتو .ليه ما حكيتي لي قصتك ليه ما وريتيني انو اغتصبوك ؟ دا اذا انتي اصلا م كنتي كذابه وعايزا تغطي خيانتك لي
الكلام دا نزل على ملك زي الصاقعه ما قدرت ترد على ابراهيم بحاجه ...
مريم ( بتبكي) : ابراهيم دا شنو البتقول فيهو دا ؟ انت واعي بتقول في شنو؟ انت بتطعن وتقذف مرتك الكلام دا حرام البتعمل فيهو دا ! ابراهيم انت عارف قصه ملك بتعمل كدا ليه اسي ؟؟
نعمه( بخلعه) : شنووووو؟؟
مريم: اي خالتي ابراهيم عارف والله والله عارف قصه ملك وهو اسي بكذب وعامل نفسو ما عارف حاجه
ابراهيم: انتي بتقولي في شنو ي مره ؟ كيف يعني عارف ؟ امي انا م عارف اي حاجه عن الموضوع دا .
ملك( بخلعه وبتبكي ) : ابراهيم انت ليه بتكذب انت عارف اي حاجه عني وبعد دا عرستني ليه اسي بتكذب انا سمعتك يوم العرس وانت بتتكلم مع ابوي وانت عارف اي حاجه
ابراهيم ( قرب من ملك) : اخرصى خالص .انتي مجرد وحده لعبه بس ما اكتر انتي بت هوى .وللاسف انتي خدعتيني
ملك ( بتكورك) : انت واحد كذاب كذاب انت عارف اي حاجه عني واسي بتقول لي بت هوى
ابراهيم ضرب ملك كف
ابراهيم(بعصبيه) : وكمان بتعلى صوتك فيني ي وسخه والله الليله اربيك وارميك برا.
مريم( بتبكي) : زح منها يا ابراهيم عليك الله م تعمل ليها حاجه .اعترف انو انت عارف اي حاجه ليه اسي بتكذب وبتحمل فيها الذنب
ابراهيم جرا مريم وطلعها برا ...
ابراهيم ( بعصبيه) : اطلعو برا كلكم اطلعو برا
ابراهيم طلع امو ونسوانو كلهم برا وقفل الباب بالمفتاح مريم كانت واقفه برا وبتبكي وبتتضرب في الباب بكل قوتها وبتتوسل فيهو انو ما يعمل حاجه لي ملك .....
ابراهيم: وكمان بتحكي اي حاجه لي مريم وبتخليها تكون ضدي
ملك( بتبكي) : انت ليه افتريت على وكذبت قدام امك ونسوانك ليه بتعمل فيني كدا ؟ مش قلتا لي بحميك؟! وانا عارفه انت معرسني ليه عشان قطعه الارض الوعدك ابوي انو يديك ليها .انت م عرستني عشان تحميني وعارف قصتي وبتنكر فيها ليه؟
ابراهيم( بصوت عالى ) : اخرصي ي وسخه انا م عارف اي حاجه اوعك تفتري على وتحمليني ذنب وساختك.
ابراهيم كان شغال يضرب في ملك ضربها شديد ملك كانت بتكورك بأعلى حسها وتبكي وبتنادي في خالتها وابتهال كانت مافيشه وبتستنجد في مريم .ومريم ما قادره تفتح الباب ولا حتى تعمل حاجه
مريم ( بتبكي وتصرخ) : ابراهيم كفايه عليك الله خلى البت ح تموت عليك الله خليها
مريم مشت قعدت تحت رجلين نعمه وبتتوسل فيها وتترجاها تتكلم مع ابراهيم عشان ما يضرب ملك ...
مريم( بتبكي) : عليك الله ي عمتي قولي ليهو كفايه البت ح تموت م

ن الضرب ي عمتي ما سامعاها بتبكي وتصرخ كيف عليك الله ي عمتي قولي ليهو كفايه
نعمه: خليها تستاهل ان شااء الله تموت لانها وحده ما نضيفه احتمال الضرب دا ينضفها شويه وبعدين دي نتيجه لمن خدعت ولدي تستاهل
مريم( بصوت عالي) : البت م عندها ذنب ي خالتي البت اغتصبوها يعني هي م عندها ذنب ليه بتعملو فيها كدا مش حرام عليكم
نعمه: كذابه والف كذابه لو كانت هي كدا كانت بتكلم ابراهيم دي حجه عشان تبين انها برئيه لكن هي اصلا م نضيفه
مريم: والله ي خالتي ابراهيم عارف اي حاجه هو كذب عليك وقال م عارف
نعمه: م بكذب ولدي عشان بت هوى
مريم عرفت انو مافي فايده منها مشت جرت غرفتها شالت التلفون وضربت لي خاله ملك ....
ابتهال: الو اهلين مريم ....دي شنو الكواريك دي في شنو؟
مريم( بتبكي) : عليك الله تعالي الحقى ملك ح تموت وابراهيم نازل فيها ضرب
ابتهال اتخلعت وبقت تجري في الشارع عشان تلحق ملك ....
ملك حيلها من الضرب يموت وتقع في الارض وصوتها راح من شده ما صرخت ابراهيم جا مسكها من اكتافها ورفعها .....
ملك( بتعب وصوت مبحوح) : الله يرضى عليك م تضربني خلاص انا تعبتا
ابراهيم( بصوت عالى) : الليله م برحمك
ابراهيم لزاها في الارض وقام على حيلو وبقى بضرب فيها برجلو في بطنها وملك م كانت قادره تبكي ولا تصرخ من شده الالم طوالي غمرت ونزفت ابراهيم اتخلع وافتكر انو هو قتلها وبقى بنادي فيها عشان تصحى وملك كانت لا حول ولا قوه ابراهيم خاف وطوالي طلع برا الغرفه وفي نفس الوقت ابتهال وفاطمه جو جارين اول ما شفتو ابتهال بقت تكورك فيهو ...
ابتهال ( بتكورك) : الليله كات حصل شي لي بتي ما بخليك ي ابراهيم
نعمه : بتك ولدي ح يطلقها وم ح تقعد في البيت دا ولا ثانيه والعملو فيها من حقو لانو راجلها وهي خدعتو وتستاهل اكتر من كدا
ابراهيم طوالي طلع برا البيت وكانت يدينو بترجف وخاف انو يكون قتل ملك وعاين لي يدينو ولقى فيها اثار دم ...
ابتهال اول م وصلت غرفه ملك لقتها واقعه في الارض وجمبها مريم بتحاول تصحى فيها وتبكي ابتهال جات بتكورك وبتحاول تخليها تصحى نعمه وتماضر وسلافه جو داخلين ولمن شافو حالتها بقو مخلوعين لمن شافوها بتنزف فاطمه طوالي ضربت الاسعاف لانو قدر ما حاولو يصحوها ملك م صحت وجا الاسعاف شالها ونقولها المستشفي ودخلوها قسم الطوارئ ملك قعدت هناك ساعتين .
ابتهال( بتبكي) : الله يسامحك ي ابراهيم على العملتو في بتي ما عافيه ليك لا دنيا لا آخره
فاطمه( بتبكي) : ي رب تشفيها ي رب
ابتهال( بتكورك) : الحق على انا .انا م كان مفروض اخليها تعرس ابراهيم انا الغلطانه انا م سمعتها وقت قالت لي انا بخاف من ابراهيم م تخليهم يعرسوني ليهو .انا م سمعتها لمن ولدي ظلمها واعتدى عليها واتعذبت بسببو .انا م سمعتها وقت قالت لي انا عايزا اكمل تعليمي . انا م سمعتها لمن كانت كل يوم بتبكي بالليل .انا م وقغت معاها لمن كانت محتاجاني .انا م وفيت بوعدي لاختي اني احافظ على بتها .ليه الظلم الاتعرضت ليهو البت دي ليه ي ربي آآآآآه ي ربي تشفيها ي رب كون معاها .
فاطمه( مخلوعه وبتمتم) : محمد ولدك اعتدا على ملك!!
ابتهال بقت تبكي شديد وشالت ضربت لي عبد الوهاب واحمد واسماعيل عشان يجو ....
فاطمه تلفونها ضرب وكان دكتور حاتم ( الدكتور ال كان حابب يعرف قصه ملك وشال رقم فاطمه عشان يعرف اخبار ملك وحقيقتها وشغال في نفس المستشفي الرقدت فيها ملك قبل كدا واسى برضو .فاطمه حكت ليهو اي حاجه حصلت )
حاتم : انا ساعه وح اكون معاكم خليك معاهم طيب
فاطمه: طيب
بعد ساعتين الدكتور طلع ابتهال وفاطمه اول م شافوهو طوالي جرو عليهو ...
ابتهال: بتي كيف ؟ بقت كوييسه صح؟
الدكتور: ملك حالتها م مستقره حصل معاها نزيف حاد بسبب الضرب في منطقه البطن والشي دا أدي لفقدان الجنين وفي كدمات برضو في منطقه البطن
ابتهال( بخلعه) : ملك كانت حامل؟
الدكتور: اي .لكن مع الاسف هي خسرتو اسي
فاطمه: طيب اهم شي هي ح تبقى كيف ؟
الدكتور: والله ادعو ليها تكون كويسه بس وان شااء الله تصحى ووضعها يستقر .......

يتبع......

#ملك
-١٧-
بقلم سجى اليزيد

ابراهيم بعد السواهو في ملك شعر بالذنب ورجع البيت في وقت متأخر بعد م كان مع البت المعاها وكان سكران جات عليهو تماضر ..
تماضر: انت كنت عارف بالقصه صح ي ابراهيم
ابراهيم: اووف يااخ قلتا ليكم ما عارف حاجه ملك م كلمتني بعدين هي كذابه
تماضر : شوف انا ما بدافع عن البت دي لكن باين عليها ما بتكذب
ابراهيم قرب من تماضر وقرب يضربها
ابراهيم: انتي من بتين بتحققي؟ معاي غوري من وشي قصدك انا الكذاب يعني
تماضر خلتو وطلعت غرفتها فوق جاتها سلافه ....
سلافه( بفرح) : ابراهيم ح يطلق البت .اخيرا ح تغور من خلقتنا .تستاهل الحصل ليها دا كلو بسبب المشاكل العملتها بين ولدي وابراهيم
تماضر : انتي ال عملتي المشكله دي هي م عندها ذنب
سلافه: تماضر .انتي مالك يختي الايام دي بتدافعي كدا كتير للبت دي
تماضر : انا م بدافع عنها بس دي الحقيقه
سلافه: لالا انتي اصلو ما طبيعيه الايام دي
تماضر (عيونها دمعو) : لاني تعبتا من الظلم الحاصل هنا من ساعه جيت البيت دا وانا اتغيرتا حتى اهلى بقو ما بحبوني انا م كنت كدا .من يوم جات ملك ما عارفه البت دي ذكرتني ايام كنت صغيره وبرئيه البت دي انا بشوف فيها برائتي .ابراهيم هو الغيرني بسببو انا خسرتا حاجات كتيره ولسه بخسر انا لمن عرست ابراهيم عشان كنت بريدو بالرغم من انو انا اكبر منو بس ما شفت زول غيرو انا كنت مستعده اعمل ليهو اي حاجه هو عايزاها وهو استغل الحاجه دي فيني وخدعني
سلافه: كيف يعني ي مره انتي جنيتي ولا شنو ؟؟
تماضر : ابراهيم عرسني عشان قروشي بس وبعد اديتو اي حاجه هو عايزها شفتيهو بتعامل معاي كيف .وبالمناسبه انا عرفت البت الاتكلم عنها ولدك عثمان وقال انها كانت مع ابراهيم
سلافه ( مخلوعه) : دي منو دي؟ وعرفتي كيف؟
تماضر: من يوم عثمان ولدك قال بت وما بت انا بقيت اراقب ابراهيم ويوم من الايام نسى موبايلو عندي وانا انتهزتا الفرصه واتخيلي لقيت البت مرسله ليهو صورها ...
سلافه: وووب على وووب على كدي كدي وريني ليها قليله الادب والله كان شفتها ما ارحمها
تماضر : صورها ما قدرت احولها ولا رقمها حتي لانو ابراهيم داهمني ورجع بسرعه وما قدرت اعمل شي لكن المهم عرفناها وولدك كان كلامو صح ابراهيم كذب علينا ي سلافه .
سلافه : طيب ممكن يكون الكلام القالتو ملك عن ابراهيم صح وانو هو عارفه قصتها ؟!
تماضر : اذا الكلام دا صح معناها ابراهيم غلط وغلطه كبيره كمان .ونحنا ح نكون ظلمنا البت دي ساي
سلافه: طيب مريم قالت ليك شنو بخصوص وضعها اسي صحت ولا لا .
تماضر: لسه وضعها حرج .
سلافه وتماضر سكتو مسافه....
تماضر: ملك كانت حامل .لكن الجنين مات
سلافه كانت مخلوعه من الكلام السمعتو وحتي نعمه لمن عرفت انو ملك كانت حامل وانو الجنين مات اتأثرت وفجأه شعرت بالندم اتجاه ملك وبسبب المشكله الحصلت خسرت حفيدها لكن بعد دا غرورها اكبر منها وكانت بتقول انو ملك بت ما كويسه وتستاهل الحاجه الحصلت ليها وكانت بتحكي لي كل نسوان اسرتها عن ملك وبرضو للجيران لانو كانو بسألو عن الاسعاف الجا نقل ملك وانو هي مالها .وحكت ليهم اي شي وانو ولدها خدعوهو بالمختصر كدا شوهت سمعه ملك قدام الناس بدون ما تعرف انو ملك مظلومه ..
عند ملك لسه ما صحت وخالتها وفاطمه قلقانين عليها شديد ودكتور حاتم وصل وعبد الوهاب وبثينه واخوان ملك كمان جو المستشفي ...
حاتم: ملك بقت كيف ي جماعه ؟؟
ابتهال( بتبكي) : والله ي ولدي ما عارفها الدكاتره بقولو لي كويسه لكن انا عارفه انو بتي ما كويسه هي تعبانه وانا خايفه اخسرها . ابراهيم الله لا كسبو خير ضرب بتك ي عبد الوهاب وعذبها وقتل ولدو .
حاتم: لا حول ولا قوه الا بالله . انا من رائي ي جماعه تمشو تشتكو عليهو
عبد الوهاب: لا ما ح نشتكي عليهو انت عايزانا ننفضح قدام العالم يعني من اسي ناس حلتنا سمعو الخبر وبدو يتكلمو
بثينه: اي والله نحنا اسي بنحاول نلملم في الموضوع ما عايزين لينا كلام كتير بسبب البت دي كفايه المصايب الجابتها لينا
ابتهال( بغضب وبتكورك) : مصايب؟! ملك لسه هي ال بتجيب المصايب اختشو على دمكم يااخ اختشو انا بقول ليكم البت اضربت لمن عايزا تموت وانتو بتفكرو كيف ما تخلو الناس ما يتكلمو
عبد الوهاب: ي مره هوي كفايه عليك الله ما تكوركي ساي اسكتي
ابتهال: لا ما ح اسكت والليله انا ح اقول اي حاجه تعال امشي شوف ابراهيم ضرب بتك كيف ادخل شوفها مضروبه كيف اشوفك لسه ح تفكر في كلام الناس
ابتهال جرت عبد الوهاب ودخلتو الغرفه الراقده فيها ملك عبد الوهاب اول ما شاف بتو بالوضع دا انصدم وبقى كلو برجف
ابتهال: شفت عمل فيها شنو شفت بعيونك تاني عندك كلام عايز تقولو؟!
عبد الوهاب سكت وما قدر يقول شي وطوالي طلع برا المستشفي وكان غضبان وطوالي ضرب لي ابراهيم ..
ابراهيم: الو
عبد الوهاب: دا شنو العملتو في بتي دي ي حيوان والله ما اخليك
ابراهيم: حيلك حيلك .انت كنت بتعمل فيها اكتر من كدا بقت على انا
عبد الوهاب: والله م اخليك ي ابراهيم وح اندمك ع

لى السويتو في ملك انا اديتك بتي عشان تضربها كدا؟! كل القلتو ليك تسترها وبس ما قلتا ليك عذبها وما تقولي لي مصالحك ومصالحك لانو انا مصالحي معاك بعد الشفتو دا الليله اتخليت عنها وما داير منك شي والاتفاق البيناتنا والمصالح انساها
ابراهيم( بضحكه) : اسي ي دوب بقيت تفكر في بتك ي استاذ عبد الوهاب
عبد الوهاب( بصوت عالى) : والله اندمك على العملتو فيها
ابراهيم: كدي خليني انا اسي اخوانك ح تقول ليهم شنو لمن يعرفو قصه ملك ههههه نصيحه مني ليك امشي حضر كفن ملك من اسي
عبد الوهاب: انت قتلتا ولدك قبل ما تشوفو
ابراهيم سكت مسافه ومخلوع من الكلام القالو عبد الوهاب
ابراهيم: انت بتقول في شنو ؟ ملك كانت حامل؟ !
عبد الوهاب : اي .وانا ما ح اخليك ي ابراهيم وح اشتكيك
عبد الوهاب قفل من ابراهيم وخشى جوه جوهو اولادو بسألو فيهو انو ليه ابراهيم عمل كدا في ملك هم م كانو عارفين القصه عبد الوهاب اكتفى بالسكوت وما رد عليهم عبد الوهاب ابتدا يشعر بالذنب اتجاه بتو وضميرو انبو شديد وبقى بتذكر لمن ملك قالت ليهو ما تعرسني لي ابراهيم وبتترجى فيهو بس هو ما كان بسمعها اتذكر لمن هو يكون عيان اولادو ما بشتغلو بيهو بتجي ملك تقعد تحت رجلينو وتعمل ليهو اي شي عشان يبقى كويس اتذكر لمن كانت ملك بتشتغل وترجع في الليل عشان تقدر تجيب قروش لابوها وتخلي قرايتها اتذكر لمن حملها الذنب ولامها على حاجه هي ما عندها ذنب فيها بالرغم من انو هو عارف المذنب منو.اتذكر لمن باعها عشان مصالحو وعشان خايف من كلام الناس كل دا اتذكرو عبد الوهاب ونزلت من دمعو وما حاول يبين للناس ندمو على العملو في ملك. اشتكو على ابراهيم وطلع من الموضوع ذي الشعره من العجين واستفاد من انو ملك لسه ما صحت وقدمت افادتها واهلو اتحججو ليهو بانو هو عقلو ما تمام يعني ما مفروض يلوموهو وبالحجه دي طلعوهو وطبعا بمساعده بعض معارفو ال عندهم سلطه اخلو سبيلو وهم زاتهم بحاولو يقنعو في نفسهم انو ابراهيم م غلطان لمن عمل في ملك كدا لانو هي غلطانه وبكدا ملك حقها ضاع المره دي كمان. بعد تلاته ايام ملك بقت تصحصح ووضعها استقر ...
فاطمه: يا خالتي رأيك شنو نكلم ملك انو هي كانت حامل لكن ولدها مات
ابتهال: م عارفه والله ي بتي انا متأكده انو هي م عارفه لانو لو كانت عارفه انها حامل كانت كلمتنا
فاطمه: اها نكلمها يعني
ابتهال: انا ما شايفه انو في داعي ي فاطمه اساسا الولد دا لو كانت ولدتو كان ح يتعذب زي ما ملك اتعذبت وكانت طوالي ح تكون مربوطه مع ابراهيم لانو عندها ولد منو انا شايفا الحاجه دي لخير
فاطمه: لكن في النهايه من حقها تعرف
ابتهال: طيب انا بكلمها براحه
عبد الوهاب وعمتها بثينه واخوانها وهاجر كانو قاعدين معاها
هاجر : حاسه نفسك بقيتي كيف ي ملك؟
ملك: الحمد لله
ابتهال جات داخله عليهم...
ابتهال: ملك عايزا اقول ليك حاجه
ملك: قولي ي خالتي
ابتهال: ملك انتي كنتي حامل لكن مع الاسف ولدك مات
ملك كانت مصدومه من الكلام القالتو ليها خالتها وبقت تبكي شديد خالتها حضنتها وبقت تبكي معاها وهدتا شويه في الفتره دي ملك نفسياتها كانت م كويسه وتعبانه شديد وكان ظاهر في وشها بعد اسبوع طلعوها من المستشفي وطوالي مشت بيتهم معاها خالتها ابتهال اول م وصلت هناك ناس الحله ما رحموها ورجعو يتكلمو فيها انو هي ليه راجلها ضربها كدا؟! وقصتها شنو؟! وبقو بتكلمو قدامها عادي في الحته دي وعمتها مهدداها ما تفتح خشمها لي زول بعد شهرين وضغط من نعمه واسره ابراهيم .ابراهيم طلق ملك .ورجعو الناس بعد م هدو شويه رجعو يتكلمو عن ملك وملك تعبت شديد من البيحصل ليها .ملك خلصت عده الطلاق بتاعها وفي يوم من الايام جاها خبر موت ابراهيم......

يتبع......

#ملك
-١٨-
بقلم سجى اليزيد

قبل يوم موت ابراهيم .......
نسوان الحله كانو قاعدين مع ملك وخالتها بعد طلقها ابراهيم وخلصت العده بتاعتها...
وحده من نسوان الحله: ان شااء الله ربنا يعوضك ي ملك بالاحسن منو
ملك: ان شااء الله
ابتهال: المهم اسي انو ملك كويسه
وحده من النسوان: ليه هو حصل شنو ؟؟
وحده من النسوان: اي والله زواجكم ما استمر كتير. ي زوله بكره يجيك الاحسن منو
بعد طلعو نسوان الحله منهم بدو يتكلمو..انا م قلتا ليكم البت دي وراها قصه...اي والله شفتي عمتها بثينه بتعمل كيف ؟! ..اكيد في قصه حاصله معاهم ما عايزين زول يعرف ...والله ي جماعه انا عايزا اقول ليكم حاجه لكن الكلام دا ما يطلع من هنا وخصوصا حجه بدريه كان عرفتني انا اتكلمتا كدا عن ملك ما بتخليني ... اها اها اتكلمي ... انا مره جيت داخله عليهم لقيتهم بتكلمو قالو انو ام ابراهيم قالت على ملك انها م تمام..كيف يعني ما تمام ....يعني بت م كويسه بت هوى ...ووووب على سجمنا سجمنا معقوله ملك كدا ...والله دا الكلام القالوهو عنها ...اذا اهلها بتكلمو كدا معناها الكلام دا صح ...معاهو حق الراجل يضربها كدا ويطلقها ....اي والله تستاهل قليله الادب ...
وانتشر الخبر في الحله وكل الناس عرفو انو ملك ما تمام واخوانها عرفو من كلام الناس انها بت ما كويسه وما حاولو يعرفو الحقيقه منها وملك ما قادره تتكلم لانو عمتها مهدداها ما تتكلم وتتحمل العذاب البحصل ليها دا بس .واخوانها مره يشاكلوها ومره يضربوها دا كلو كوم وكلام الناس انها بت ما كويسه كوم تاني دا كلو بتتحمل فيهو ملك وما عندها ذنب في حاجه.....
ابتهال: انا اسفه ي ملك بسببي انتي قاعده تتحملي العذاب دا كلو ي بتي
ملك: ما تقولي كدا ي خالتي انتي م عندك ذنب في حاجه
ابتهال( بتبكي) : وانتي كمان م عندك ذنب ي بتي وبتتعذبي لسه
ملك: دي قدري ي خالتي الحمد لله وان شاء الله اي حاجه ح تتحسن
ابتهال: ان شاااء الله ي بتي
ملك ما حبت تخلي خالتها تشعر بالذنب وقالت الكلام دا وهي منهاره ومخنوقه من جوه كانت قاعده وسرحانه فجأه تلفون خالتها ضرب.....
ملك: الو
ابراهيم: ملك .كويس انك رديتي انتي
ملك( مخلوعه) : ابراهيم؟!
ابراهيم: اي دا انا .ملك انا محتاج ليك عايز اتكلم معاك في موضوع
ملك: مافي حاجه عشان نحكيها مع بعض
ابراهيم: عليك الله اسمعيني في موضوع خطير انتي لازم تعرفيهو !!
ملك: ابراهيم انا م عايزا اعرف اي حاجه الله يرضى خليني
ابراهيم: ملك والله ما عايز اعمل ليك حاجه اسمعيني والله انتي مفروض تعرفي بالموضوع دا
ملك: موضوع شنو؟
ابراهيم: ما بقدر اقولو ليك بالتلفون رأيك شنو بكره نتقابل وانا اوعدك ما خ اعمل ليك حاجه واذا ما واثقه فيني جيبي معاك خالتك ومعاكم دكتور حاتم
ملك: لالا ما عايزا اعرف حاجه
ابراهيم: عليك الله ي ملك اسمعيني والله الموضوع خطير وانتي لازم تعرفيهو وما بنفع احكيهو ليك بالتلفون بكره تعالي ومعاك خالتك والدكتور والله ما اعمل ليكم شي
ملك سكتت ما قالت ليهو حاجه ..
ابراهيم: اعتبر سكوتك موافقه .طيب اذا بكره ح تجيني تعالو انا قاعد في الشقه بتاعتي ال في الخرطوم وبرسل ليك العنوان في رساله طيب
ملك: طيب
ملك قفلت من ابراهيم وكان بالها مشغول في الموضوع المفروض انها تعرفو من ابراهيم؟! واكتر حاجه خلتها توافق تمشي تشوف ابراهيم انو صوتو ما كان طبيعي ..
ابتهال: كنتي بتتكلمي مع منو ي ملك ؟!
ملك: ابراهيم
ابتهال: شنوو ؟؟عايز منك شنو كمان الراجل ال م بخجل دا ؟!
ملك: قال انو لازم نمشي نقابلو بكره لانو في موضوع انا لازم اعرفو
ابتهال: موضوع شنو كمان الراجل دا خرف ولا شنو ما ح نمشي ليهو ولا شي
ملك: لكن ي خالتي هو صوتو ما كان طبيعي حاسه انو في حاجه وهو اصر على شديد عشان الاقيهو بكره واعرف منو الحاصل
ابتهال: ملك انتي جنيتي بعد العملو فيك دا وعايزا تمشي ليهو؟!
ملك: خالتي انا م ح اكون براي امشي معاي انتي عليك الله ونكلم دكتور حاتم اذا بقدر يمشي معانا عشان ما نكون برانا وبعدين اذا انتو كنتو معاي هو ما ح يقدر يعمل لي حاجه
ابتهال سكتت مسافه ....
ابتهال : ح نتلاقى وين؟؟
ملك: في الشقه بتاعتو في الخرطوم وهو اسي رسل العنوان في تلفونك شوفيهو
ابتهال: طيب ي بتي .الله يستر بس نتوكل ونمشى .دكتور حاتم خليهو انا بكلمو
جا المسا ودكتور حاتم جا لي ناس ملك....
حاتم: ملك كيفك؟؟
ملك: حمد لله
حاتم: لسه شاعره نفسك ما كويسه ولا الوجع خف شويه
ملك: احسن بكتير الحمد لله
حاتم: خالتك كلمتني بموضوع ابراهيم وبكره الصباح ان شاااء الله بدري بكون معاكم ونمشي ليهو
ملك: شكرا ..انا اسفه لانو ورطك في مشاكل م عندك علاقه بيها كان مفروض يمشو معانا ابوي او واحد من اخواني لكن هم......
حاتم ( قاطعها) : م تقولي كدا اعتبريني زول قريب ليكم .انا من يوم شفتك في المستشفي عرفت انك ما طبيعيه عشان كدا كنت حابي اساعدك وللان م عرفت قصتك .عموما ي ستي مهما كانت قصتك انا ح اقيف معاك واساعدك والحاجه المتأكد منها انك ما زيم

الناس بقولو
ملك( بابتسامه) : شكرا
بعد دكتور حاتم طلع منهم اسماعيل جا لي ملك....
اسماعيل: دا الجابو هنا شنو؟
ملك: بكره ح يمشي معاي انا وخالتي لي ابراهيم
اسماعيل: انتي ي بت ما بتتوبي بعد العملو فيك ابراهيم ولسه عايزا تمشي ليهو وبعدين تعالي هنا عايزا ناس الحله يتكلمو فينا زياده م كفايه الكلام السمعناهو عنك انا م عارف ابوي دا صابر عليك كيف؟ لو كنت مكانو كان قتلتك وارتحت منك
ملك( بتبكي) : الله يرضى عليك م تتكلم كدا ي اخوي ليه انا في النهايه مش اختك
اسماعيل: بسببك نحنا اسي راسنا في الارض احمدي ربك اعمامك م هنا اسي لكن لمن يجو ح تعملي شنو؟
ملك خلت اخوها ومشت غرفتها وقاعده تبكي .بعد شويه تلفون خالتها ضرب وكانت هاجر خالتها ادتها التلفون وقاعده تتكلم معاها ...
هاجر: ملك كيفك؟؟
ملك: تمام والله حبيبتي انتي كيف وحبوبه كيف ؟؟
هاجر : الحمد لله .مالو صوتك تعبان تعبان كدا
ملك: مافي حاجه والله انا كويسه
هاجر: طيب رأيك شنو بكره نطلع انا وانتي طولنا ما قعدنا مع بعض وما تقولي لي ما بطلع عشان الناس وكلامهم ما عندك بيهم شغله ي ملك
ملك: ي ريت والله ي هاجر لكن ما بقدر
هاجر: ليه في شنو؟؟
ملك: بكره في موضوع ابراهيم قال عايز يحكيهو لي واصر على لازم امشي اقابلو ومعاي خالتي ودكتور حاتم
هاجر: موضوع شنو دا ي ربي العايز يحكيهو معاك دا ؟
ملك: م عارفه والله لكن شكلو موضوع خطير
هاجر: ايوااا ي زوله دا بكون موضوع فارغ منو ساي
ملك: لالا ي هاجر من صوتو باين في حاجه
هاجر: الله يقدم فيهو الخير
ملك: ان شاء الله
جا اليوم المفروض ملك تلاقي فيهو ابراهيم وجهزت بدري هي وخالتها وجاهم حاتم وركبو مشو معاهو واول ما وصلو لقو الاسعاف والشرطه في المكان ونعمه تبكي وتكورك سااي وتماضر وسلافه حالتها صعبه ملك اول ما شافت الوضع كدا اتخلعت هي وخالتها حاتم مشى يسأل من الحاصل .....
ابتهال : في شنو ي حاتم الحاصل شنو؟؟
حاتم: ابراهيم مات مقتول
ملك(بخلعه) : شنو؟؟
حاتم: لقوهو في الشقه مطعون بسكين
ابتهال: لا حول ولا قوه الا بالله لا حول ولا قوه الا بالله .دا شنو البحصل دا ؟حاتم انحنا اخير نمشي من هنا عشان ما يعملو لينا مشكله
ملك كانت مخلوعه من الكلام السمعتو وما مصدقه انو ابراهيم مات....
حاتم : اي احسن نمشي من هنا لانو الوضع مكركب هنا...
ركبو العربيه وماشين على البيت وهم لسه مخلوعين من الشي الحصل في الطريق ملك لمحت هاجر قريبه من شقه ابراهيم .....

يتبع......

#ملك
-١٩-
بقلم سجى اليزيد

ملك شافت هاجر قريبه من شقه ابراهيم وكان ظاهر عليها متوتره شديد ..
ملك: حاتم حاتم دقيقه وقف العربيه
ابتهال: في شنو ي ملك؟؟
ملك: ديك مش هاجر
ابتهال (باستغراب) : اي والله الجابها هنا شنو البت دي
ملك بقت تكورك لي هاجر وهاجر سمعتها واول ما عرفت انو دي ملك عملت نفسها ما سامعه وطوالي جرت جرى
ابتهال: البت دي مالها بتعمل كدا اجججي والجابها هنا شنو؟!
ملك: شكلها ما سمعتني
ابتهال: ارح ي حاتم .ملك خليها لمن نصل البيت نفهم منها الجابها هنا شنو
ملك:طيب
في البيت....
عبد الوهاب: شنو ؟! لالا م بصدق كيف يعني ابراهيم مات مقتول دا منو البعمل كدا في ابراهيم
حاتم: والله ي عمي دي قصه غريبه
بثينه: سجمنا احتمال يتهمونا نحنا اسي ويقولو نحنا القتلناهو
بعد بثينه قالت الكلام دا كلهم سكتو مسافه وعبد الوهاب كان متوتر شديد وحتى توترو كان ملاحظ ابتهال بقت تعاين ليهو شديد
ابتهال: انت كنت وين امبارح ي عبد الوهاب؟!
عبذ الوهاب( بتوتر وبتمتم) : انتي قصدك شنو يعني من السؤال دا؟! قصدك انا قتلت ابراهيم؟!انا م عندي علاقه بموتو .انا من زمان قطعت علاقتي فيهو.ما اتواصلت معاهو تاني .تاني ما تتكلمي معاي كدا .انا ما قتلتو
عبد الوهاب طوالي قام منهم وطلع برا وكلهم استغربو فيهو انو ليه هو اتوتر كدا .
بعد مرور تلاته ايام الناس كانت كلها عرفت انو ابراهيم مات مقتول لانو الخبر انتشر في وسائل الاعلام والناس بدت تتكلم .ام ابراهيم ومعاها تماضر جو لي بيت عبد الوهاب ونعمه كانت هايجه شديد وبتكورك وبتضرب في الباب بتاعهم بكل قوتها ومره ترمي فيهم الحجاره والناس كلها طلعت الشارع .
نعمه( هايجه وبتكورك) : ملك اطلعي برا اطلعي لي والله الليله ما اخليك انتي القتلتي ولدي .عايزا تنتقمي مني بعد العملتو فيك صح .اطلعي برا ي ملك .قتلتي ولدي انتي بعد الشي العملو فيك صح
وبقت ترمي فيهم بالحجاره والرجال والنسوان بمسكو فيها وهي كل مره تقعد تلاويهم وتزح منهم وتهيج فيهم وما قدرو عليها ...
عبد الوهاب( بتوتر) : المره دي جنت ولا شنو بتعمل كدا ليه؟؟
ابتهال: انا خايفه تجينا مصيبه من ورا الكلام دا
ملك كانت قاعده ومتوتره شديد...
بثينه: كل المصايب بسببك انتي ي ملك الله يريحنا منك
عند نعمه لسه بتكورك وهايجه شديد..
نعمه: افتحي الباب دا ي خاينه والله افضحك الليله قدام الناس واوريهم انتي عملتي شنو .انتي الخنتي ولدي ي عاهره والله اندمك على اي حاجه عملتيها فينا ...
الناس اول ما سمعو نعمه بتتكلم كدا خلاص كلهم بدو يتكلمو وعرفو السبب الخلا ابراهيم يطلق ملك وبدو يشكو فيها فيها انو هي القتلتو عشان تنتقم منو .ملك اول ما سمعت الكلمه القالتها نعمه انهارت وبقت تبكي وختت يدينها في راسها
بثينه: بتبكي على شنو هووي مش دي الحقيقه
ابتهال( بنهره) : بثينه .اخرصي انت عارفه انو اي كلمه قالتها نعمه افترا وكذب فيك ملك
بثينه( بتكورك) : ووب علينا نحنا خلاص انفضحنا اذا اهل الحي قالو لينا امرقو من هنا ما تستغرب ي عبد الوهاب .بسببك انتي ي ملك الله ياخدك
بعد هدا الوضع شويه ونعمه مشت جات فاطمه وهاجر لي ملك وكانت تعبانه شديد...
ملك( بتبكي) : انا والله تعبتا والله ما قادره اتحمل ليه انا سبب اي حاجه ليه؟ ليه الناس شايفين انو انا مذنبه وبت ما كويسه؟ للدرجه دي انا لعنه في حياه الناس؟!
فاطمه( بتبكي) : ملك ما تقولي كدا الله يخليك نحنا عارفين انتي شنو م عندك شغله بالناس
ملك: الناس بدو يتكلمو فيني ي فاطمه وبسبب الحاجه الحصلت الليله والكلام القالتو عمتو نعمه جو رجال الحي وطلبو من ابوي نطلع من هنا ونرحل مكان تاني
هاجر : اي حاجه بتتهون ان شااء الله ي ملك ما تحملي نفسك ذنب حاجه انتي م عملتيها
ملك: انتو ما سمعتوهم بتكلمو عني كيف .قالو عني بت ما كويسه وفاكه ساي وقالو ما بشرفهم وحده زي تكون معاهم ولا وسطهم .قالو اني ح اخرب اخلاق اولادهم كانو بتكلمو كدا مع ابوي
فاطمه: عليك الله اهدي شويه ي اختي ما تشتغلي بيهم هم اصلا دايرين موضوع عشان يتكلمو فيهو انتي عارفاهم م عندهم موضوع
هاجر: انتي ما سمعتيها قالت شنو قالت ح يطلعوهم من البيت
فاطمه: على كيفهم هم .ملك مظلومه وما عندهم حق يطلعوها من بيتها
بعد مسافه ملك هدت شويه والبنات كانو بتكلمو وهي ساكته وبتعاين لي هاجر ...
ملك: هاجر
هاجر: اي حبيبتي
ملك: انا امبارح شفتك قريبه من شقه ابراهيم وبقيت بنادي ليك ما سمعتيني
هاجر ( بتوتر) : بري والله م سمعتك انا كان مشيت لي ولد خالتي هناك عندو صيدليه مشيت جبتا ادويه لي حبوبه وانا كنت حاسه انو في حاجه م طبيعيه لانو فجأه لقيت الناس هايجه لكن ما اتوقعتو ابراهيم الله يرحمو
ملك: طيب
فاطمه( باستغراب) : انتي امبارح م كلمتيني انك ماشه الخرطوم؟!
هاجر( بتوتر وبتمتم) : والله ما انتبهتا ي فطومه فجأه لقيت نفسي في الخرطوم مشيت جبت الادويه
فاطمه: طيب م مشكله بالشفاء ان شاء الله لحبوبه
هاجر : ان شااء الله ي رب .عايزا اقول

ليكم انا بعد يومين تلاته ايام كدا ح اسافر
فاطمه: بسم الله فجأه كدا ي بت قررتي تسافري !!
هاجر : اي والله ي فاطمه ماشه لي ابوي وخالتي ح تجي تقعد مع حبوبه هنا
فاطمه : ح تسافري وين؟
هاجر : ااااا ماشه القاهره ح اقعد هناك زي شهر وبرجع
ملك:ح اشتاف ليك
هاجر: انا كمان والله حبيبتي
فاطمه: ربنا يجيبك بالسلامه حبيبه
هاجر: ان شااء الله تسلمي حبيبتي .يلا عن اذنكم عشان امشي الحق اجهز شنطتي
فاطمه: ارح انا زاتي بمرق معاك .يلا ي ملك بجيك بكره ان شاء الله
ملك: ان شاء الله
بعد طلعت فاطمه وهاجر اي وحده مشت على بيتها . في نفس اليوم محمد ضرب لي امو ابتهال ،،،
ابتهال: قلتا شنو مسافر بتين ووين ولي شنو؟؟!
محمد: عندي شغل مستعجل ي امي بعدين انا اول مره اسافر يعني ؟!
ابتهال: لالا اتفأجات بس لانك قلتا ح تقعد هنا فتره واسي فجأه قررتا تسافر .اها مسافر وين
محمد : والله لسه م معروف وين اسافر لكن ناس الشغل كلموني بس اجهز نفسي عشان في اليومين ديل انا ح اسافر بعدين بحددو لي وجهتي
ابتهال: طيب . تمشي وترجع بالسلامه
محمد : ان شااء الله . صحي ابراهيم مات ؟؟
ابتهال: اي اتوفى
محمد : ربنا يرحمو ان شااء الله
ابتهال: اميين ي رب
محمد : يلا مع السلامه في امان الله
في صباح اليوم التاني ...
ناس عبد الوهاب عندهم تلفون البيت التلفون بتاع زمان داك .اها التلفون ضرب بالصباح بدري وملك سمعتو وجات ترد ...
ملك: الو ..الو ...الو
ملك لمن ردت ما كان في زول برد عليها وطوالي الزول الاتصل قفل الخط ملك افتكرتو زول غلطان في الرقم لانو رقم بيتهم دا منتشر وكدا في الحي وما ركزت في الحاجه الحصلت واتجاهلت الموضوع..بعد شويه تاتي التلفون ضرب وكانت فاطمه ...
ملك( بضحكه) : دي انتي الكنتي بتضربي قبل شويه
فاطمه: برري انا ما ضربت .والحمد لله زاتك انتي الرديتي
ملك: بكون زول غلطان بس
فاطمه: اي .عايزا اقول ليك ارح نمشي لي هاجر نساعدها وكدا عشان قربت تسافر ونقعد معاها شويه عشان تاني قريب دا ما ح نشوفها
ملك( بتردد) : لكن انا ما بقدر امرق .الناس كلها ح تقعد تعاين لي وتتكلم فيني
فاطمه: ملك خليك قويه وواجهي الناس انتي لمن تقعدي كدا في البيت بتثبتي ليهم انك غلطانه والكلام القالتو فيك نعمه كلو صح انتي حابه انو يفكرو كدا فيك
ملك: لكن انا....
فاطمه( قاطعتها) : مافي حاجه اسمها لكن ي ملك. بعدين الناس ديل اصلا ما ح يسكتو اذا انتي غلطانه ولا م غلطانه هم ما ح يسكتو عشان كدا بالله اجهزي وانا بجي اسوقك وبستأذن من ابوك وخالتك عشان اخوانك ما يعملو ليك مشاكل
ملك ( باستسلام) : طيب
فاطمه: ملك انتي م ملاحظه حاجه
ملك: شنو؟؟
فاطمه: ما شايفه ابوك معاملتو ليك اتغيرت واحسن من الاول
ملك ( بابتسامه) : اي والله ودي الحاجه المصبراني على المي ال في قلبي
فاطمه: ان شاء الله حبيبتي كل تعب فيك يزول وترتاحي من الهم دا
ملك: ان شاء الله
فاطمه: يلا انا اسي بجيك
فعلا جات فاطمه وبعد استأذنت من ابو ملك واقنعتو خلاها تطلع معاها واخوانها ما قدرو يعملو ليها شي اول ما وصلو بيت هاجر لقوها ماف وكانت بس في حبوبتها اسمها حجه ساره ...
فاطمه: اهلين حبوبه كيف صحتك ؟
حجه ساره: الحمد لله ي بتي انتو كيف ؟
ملك: الحمد لله ي حبوبه
حجه ساره: اقعدو اتفضلو ي بناتي مالكن واقفات
فاطمه: سلامتك ي حبوبه
حجه ساره( باستغراب) : الله يسلمك ي بتي .ليه في شنو
فاطمه( باستغراب) : هاجر قالت لي امبارح كنتي تعبانه وحتي مشت الخرطوم جابت ليك ادويه
حجه ساره ( بضحكه) : والله البت دي مجنونه .ابدا والله ي بتي انا الحمد لله كويسه .ادويه شنو الجابتها لي المجنونه دي
ملك وفاطمه استغربو من كلام حجه ساره
فاطمه: يعني هي امبارح م مشت جابت ليك ادويه من الصيدليه بتاعت ولد خالتها ال في الخرطوم
حجه ساره : برري ي بتي ما جابت لي ادويه وما عندها ولد خاله عندو صيدليه في الخرطوم اولاد خالتها كلهم مغتربين .اي هي امبارح مشت الخرطوم قالت لي ماشه تكمل رسوم الجامعه
فاطمه: اها طيب .وان شاء الله ربنا يرجعها بالسلامه من مصر هي وابوها
حجه ساره( بضحكه) : انتن ي بنات جنيتو والله ولا يمكن دي البوره
ملك( بضحك) : مالنا ي حبوبه ؟هاجر مش مسافره مصر
حجه ساره: برري والله م كلمتني انها مسافره نهائي
فاطمه: احتمال نست ي حبوبه تكلمك
حجه ساره: بري والله م كلمتني نهائي وهي ذاتها ح تجيب القروش من وين عشان تسافر بيها
ملك وفاطمه يستغربو بتصرفات هاجر وكذبها عليهم في موضوع الادويه لي حبوبتها واتضح انو هي ما مشت الخرطوم عشان كدا . وانها ليه ما كلمت حبوبتها انها مسافره؟!!.ومن وين القروش البتسافر بيها؟!
بعد طلعو فاطمه وملك من حجه ساره...
فاطمه: ملك انا بديت اخاف من هاجر
ملك: ليه .مافي حاجه ي فاطمه بتكون نست تكلم حبوبتها بس
فاطمه: ياخ في شي ما طبيعي انتي م ملاحظه ليها انو بقت تكذب علينا كتير .وبعدين قصه انو كانت في الخرطوم وقريبه من شقه ابراهيم وفي اليوم الاتقتل فيهو وانتي شف

تيها دي ما داخله لي في راسي البوديها شنو هناك البت دي واسي حبوبتها بتقول بلسانها انو ما عندها زول في الخرطوم
ملك كانت مشوشه وما قادره تفكر في حاجه كل الكانت بتغكر فيهو انو ليه هاجر بتتصرف كدا !! في نفس الوقت ابتهال وصلتها رساله من رقم غريب وكان مكتوب في الرساله ( حذري بتك ملك تبعد من صحبتها هاجر ) .......

يتبع......