#ملك
-٢٠-
بقلم سجى اليزيد

الرساله بعد وصلت لي ابتهال بقت مستغربه وتفكيرها مشوش وبقت تقول في سرها دا منو الرسل الرساله؟!وقصدو شنو؟!وهاجر دخلها شنو؟!وليه ابعد ملك من هاجر؟!
عند ملك وفاطمه .....
فاطمه: انا من رأئي ي ملك نبعد من هاجر دي
ملك: فاطمه حرام عليك كدي نحنا نفهم اول شي منها هي ليه كذبت علينا احتمال عندها ظروف ي فاطمه
فاطمه: يااخ انتي لي بتين ح تتعاملي كدا مع الناس بقلبك افهمي ي ملك ما كل الناس واحد وم كلهم نواياهم سليمه اتجاهك
ملك: بس انا لحدي الان هاجر ما اذتني
فاطمه: كذبت عليك دي براها كفايه .بعدين انتي ح تستني لبتين لغايه ما تأذيك يعني
هم ماشين في الشارع كانو اولاد الحي قاعدين واول ما شافو ملك قاعدين يقلو في ادبهم معاها وهي خافت شديد واتوترت
واحد من الاولاد:اووو ملوكه حبيبتنا تعالي اقعدي معانا شويه ....اي تعالي ي حلوه انتي وصحبتك خلونا نتونس شويه
فاطمه( بغضب) : احترم نفسك ي بني آدم انت
ملك( بخوف) : فاطمه فاطمه عليك الله ارح نمشي
واحد من الاولاد بدا يمشي بوراهم تاني جاهم قدامهم ..(ليه كدا ياخ ماشه ومخليانا ؟انتي عادي متعوده على امور زي دي)
ملك كانت بترجف وخايفه شديد وماسكه يد فاطمه قوى وواقفه بوراها
فاطمه: احسن ليك امشي من هنا والا والله اكورك واسمع الحله دي كلها.زح من طريقنا
الولد: واذا ما زحيت؟
فجأه جا واحد وقف قدامهم طويل واسمراني كدا وبقى بنهر في الولد وبهدد فيهو حتي الولد مشى خلاهم لانو خاف منو
فاطمه: شكرا ليك والله م عارفه اقول ليك شنو شكرا يا ....
في الاثناء دي بدريه (المره المشهوره في الحي) نادت على الولد
بدريه: خالد خالد تعال ي ولدي عايزاك
فاطمه: انت اسمك خالد
خالد: اي انا ولد خالتكم بدريه بتعرفوها صح
فاطمه: اي بنعرفها وشكرا ليك والله م عارفه اقول ليك شنو
خالد :العفو ياخ على شنو
خالد عاين لي ملك ولقاها بس ماسكه في فاطمه ومنزله راسها في الارض وما اتكلمت معاهو ....
خالد : ي آنسه انتي كويسه؟؟
فاطمه:كويسه كويسه لكن هي بس تعبانه شويه
وجات عليهم بدريه...
بدريه: كيفكن ي بنات؟
فاطمه: حمد لله ي خالتي كيف انتي
بدريه: الحمد لله مالها ملك؟!
فاطمه:تعبانه شويه بس
بدريه: ملك حبيبتي انتي كويسه ؟
ملك هزت ليها راسها بمعني انا كويسه ...
بدريه: دا ولدي خالد محامي كبير
فاطمه:والله ما شاء الله ربنا يوفقك ي خالد
ملك: فاطمه ارح نمشي
خالد : آنسه فاطمه ممكن تمشو لانو واضح صحبتك تعبانه شديد
فاطمه: طيب يلا عن اذنكم
اول ما وصلو البيت ابتهال طوالي بدت تتكلم معاهم وورت ملك الرساله والخوف بدا يدب في قلبها ...
فاطمه: انا ما قلتا ليك هاجر دي مفروض نبعد عنها
ابتهال: فاطمه اتعرفتي على البت دي كيف
فاطمه: والله ي خالتي يوم رحلو هي وحبوبتها هنا هي جاتنا وقالت حابه تتعرف علينا ومن ديك بقت تجيني في البيت كتير وسألتني اذا عندي صحبات وحكيت ليها عن ملك وقالت لي حابه اتعرف عليها ودا الحصل
ابتهال: نفسي اعرف دا منو الرسل الرساله دا؟!وليه يتكلم كدا عن هاجر ويحذرني منها؟!
فاطمه: في حاجه غريبه حاصله لكن ؟!
ابتهال: شنو هي
فاطمه: لمن مشينا انا وملك لحبوبتها وقلنا ليه سلامتك استغربت وقالت م عندها اي حاجه وقالت لينا هاجر ما مشت جابت لي ادويه ولا شي حتي ما عندها ولد خالتها عندو صيدليه هناك وما ورت حبوبتها انها مسافره واتضح انو هاجر م عندها قروش عشان تسافر بيها!!
ابتهال: ي رب هاجر دي قصتها شنو ؟!.
فاطمه: ملك قالت لي كانت قريبه من شقه ابراهيم اليوم داك
ابتهال: اي لكن م ختينا فيها حاجه
ابتهال عاينت لي ملك لقتها سرحانه وبترجف
ابتهال: مالك ي ملك
ملك: لالا ما في حاجه
ابتهال : فاطمه انتي ما لاحظتي حاجه غريبه في هاجر
فاطمه: ابدا والله ي خالتي
بعد سكوت طويل فاطمه اتذكرت حاجه...
فاطمه: كان في زول طوالي بجيها سايق عربيه سودا ولمن اسالها بتقول ولد خالتها
ابتهال: اولاد خالتها م هنا
فاطمه: دا الشي المجنني
فاطمه قعدت معاهم مسافه وملك سامعه كلامهم وما فتحت خشمها بكلمه فاطمه جات طالعه منهم وقفتها خالتها ابتهال..
ابتهال: ملك مالها ي فاطمه؟!
فاطمه: ضايقوها شويه اولاد الحله وبدو يقولو كلام ما في محلو وهي خافت شديد .ما شفتيها كانت خايفه كيف ي خالتي كانت ماسكه فيني قوي يدينها تلجو من الخوف
ابتهال : الله ينتقم منهم ان شاء الله
فاطمه: ملك ببسبب الحاجه الحصلت معاها بقى عندها مرض اسمو الخوف من الاولاد حتى ولد خالتو بدريه الساعدنا كانت خايفه منو وطوالي جرتني
ابتهال: ولدي سبب اي حاجه حاصله معاها ي فاطمه...ولد بدريه جا ؟
فاطمه: اي جا واسمو خالد
ابتهال: كويس انو ساعدكم قبل ما اخوان ملك ولا اخوكي يشوفوكم ويعملة ليكم مشكله .. ... يلا ي بتي امشي الوقت اتأخر...
بعد اسبوع وفي يوم من الايام تماضر ضربت لي ملك ....
تماضر : كيفك ملك؟
ملك: حمد لله
تماضر : ملك ممكن نتلاقى عندي ليك كلام مهم وعايزا اقولو ليك قبل ما امشي وانا بجيك لغايه عندك
ملك( باستغرا

ب) : طيب م عندي مشكله تعالي .تماضر انتي ماشه وين؟
تماضر( بضحكه خفيفه) : ح تعرفي الشي دا قريب
ملك استغربت من كلام تماضر وخصوصا طريقه كلامها م كانت مريحه وبقت تفكر دا شنو الموضوع البخلي تماضر تجيها للدرجه مهم!!ومشت كلمت خالتها وفعلا في نفس اليوم تماضر وصلت عندهم وابتهال وناس البيت كلهم خلو تماضر مع ملك براها ...
تماضر: انا عارفاك انتي مستغربه من جيتي . بس في موضوع حابه اقولو ليك وهو مهم شديد ما عارفه ليه حبيت اقولو ليك انتي بالذات ي ملك م عارفه ليه؟
ملك: تماضر انتي كويسه؟
تماضر : كويسه .بس حابه اقول ليك الموضوع دا انتي بالذات
ملك: طيب
تماضر : اول شي حابه اقول ليك حاجه . انا ال قتلت ابراهيم
ملك( بخلعه وصوت مخنوق) : تماضر انتي بتقولي في شنو ؟؟؟!!
تماضر : ااي انا القتلتو ي ملك .والله العظيم انا القتلتو
ملك اول م سمعت كلامها قامت على حيلها وبقت ترجف وكانت عايزا تتطلع برا لكن تماضر وقفتها...
تماضر: اسمعيني للنهايه عليك الله ي ملك اقعدي م تخافي م ح اعمل ليك شي
ملك: تماضر انتي جنيتي انا مصدقه الكلام البتقولي فيهو
تماضر: لا صدقي ي ملك .حابه تعرفي ليه انا قتلت ابراهيم ؟لانو كان مع صحبتك
ملك( بتمتم) : صحبتي منو؟!
تماضر : هاجر
ملك( بخلعه) : هاجر
تماضر: تتذكري البت الاتكلم عنها عثمان وقال انها مع ابراهيم ؟ دي صحبتك هاجر ي ملك
ملك: هاجر لالا ما بتعمل كدا
تماضر : لكن هي عملتها وانتهت .هي كانت مع ابراهيم لمن كان في الشقه .صحبتك هاجر دي البت ال كان بخونا ابراهيم معاها
ملك الكلام نزل على قلبها زي الصاقعه وبقت تتذكر في حاجات ...
ملك( بتمتم) : دي انتي الرسلتي الرساله لي خالتي وقلتي ليها ابعدي هاجر من ملك
تماضر : اي دي انا .ودي انا ال ضربتا اليوم داك في تلفون البيت ولمن جيت اتكلم معاك اترددتا وما حبيت اعترف ليك بحاجه عشان كدا رسلتا الرساله لخالتك.
ملك: انتي من وين بتعرفي هاجر ؟!
تماضر :شفت صورها في تلفون ابراهيم وللحظه ديك انا م كنت بعرف انها صحبتك !
ملك: وعرفتي كيف انها صحبتي
تماضر : ح احكي ليك ....
يوم قتل ابراهيم.....
تماضر كان مشت لي ابراهيم في الشقه وطبعا هي عندها نسخه من المفتاح بتاع باب الشقه عشان كدا ما دقت الباب اول ما فتحت الباب وقربت على وحده من الفرف سمعت صوت ضحك وصوت ابراهيم ومعاهو وحده (هاجر) بتكلمو ويضحكو مع بعض ....
ابراهيم: انتي عارفه انا ح اطلق وحده من نسواني واعرسك انتي
هاجر : طوالي يااخ اصلا انا منتظره بفارغ الصبر بتين نتزوج انا وانت
ابراهيم: اصبري بس شويه وانا اطلق وحده من النسوان النقناقات ديل واعرسك انتي ي حلوه
هاجر( بضحكه) : وريني ح تتطلق منو؟
ابراهيم: وحده كدا اسمها تماضر مره نقنناقه وم عندها شغله غير النضم الكتيير
هاجر: وانت عرستها ليه طيب ؟
ابراهيم : عرستها مصلحه بس عشان القروش والترطيب ال هي فيهو وهي عارفه على فكره انو انا عرستها عشان كدا
هاجر: عارفه؟!!وهي كيف راضيه تقعد معاك وتستمر في زواجها منك وعارفه حقيقتك
ابراهيم( بضحكه) : قال بتريديني قال .اتخيلي المره الكبيره المخرفه المعجزه دي تريدني انا انتي متخيله معاي المنظر .اني ممكن اريد لي مره كبيره
هاجر: مرتك دي غريبه
ابراهيم: انا ذاتي م عارف عرستها كيف انا م كنت واعي لمن عرست لي مره كبيره ومعجزه زي تماضر .لكن اصبري كلها كم يوم واطلقها عندي معاها مصلحه بس الايام دي واول ما اخلص من مصلحتي معاها ح اطلقها وارميها برا واعرسك انتي . هي متخيله اني بريدها اسي عليك الله المره دي م مجنونه .استنى ليها بس ح ارميها برا بمجرد ما مصلحتي تنتهي معاها
تماضر كانت بتسمع في الكلام البقولو ابراهيم وكلامو عنها وجع قلبها شديد وزي الصاقعه الضربتها وفي لحظه كل حبها لي ابراهيم اتحول لي حقد وغضب وكراهيه وطوالي طلعت برا الشقه وبقت تقول في سرها(انا ح اتخلص منك ي ابراهيم قبل ما انت تتخلص مني وتعمل فيني عملتك) وبقت مستنيه هاجر تتطلع من الشقه وفعلا بعد ساعه هاجر طلعت برا ولمن طلعت هاجر من الشقه لاحظت ليها تماضر انها كانت متوتره بس ما ركزت معاها كتير تماضر استغلت فرصه انو هاجر طلعت وطوالي طلعت الشقه فوق لي ابراهيم وفتحت باب الشقه براحه ودخلت المطبخ وشالت سكين (والوقت داك ابراهيم كان خلص مكالمتو مع ملك لكن قال ليها في موضوع عايز احكيهو ليك) تماضر جاتو فجأه في خلقتو وبقت تقول ليهو وهي غضبانه( عايز تتخلص مني ي ابراهيم؟انا ح اتخلص منك اول وح اريحك وارتاح)قبل م ابراهيم يقول ليها حاجه ولا يقاومها طوالي طعنتو بالسكين في بطنو وفي لحظتو مات تماضر نضفت اي حاجه وراها وبصماتها والسكين الطعنت بيهو ابراهيم وطلعت برا الشقه سرعه سرعه .
دا الكلام االقالتو تماضر لي ملك ال كانت مهجومه من الحاجه العملتها تماضر .
تماضر: ما تستغربي ي ملك انا عملتا كدا ليه .شفتي ابراهيم كان عايز يعمل فيني شنو .للحظه ي ملك انا تعبتا من اي حاجه تعبتا من ضربو لي وتعبت من استغلالو لي وتجاهلو لي وفيي ال

نهايه وبعد دا كلو كان عايز يطلقني ويجدعني عشان يعرس صحبتك انتي
ملك( برجفه) : عرفتيها كيف صحبتي
تماضر : لاني كنت عايزا اعرف دي منو .انا م كان غالبني اسلم نفسي ي ملك .عارفه ليه مسحت بصماتي واي حاجه وراي .عشان م عايزاهم يعرفوني انو انا القتلتو قبل ما اعرف دي منو البت ال كان ابراهيم عايز يبيعني عشانها .ومن اليوم داك انا بقيت براقب هاجر وبقيت بسأل منها في محلات كتيره واتوصلتا انو انو هي ساكنه هنا ويوم نعمه ام ابراهيم جاتكم هنا انا جيت معاها خصوصا عشان اشوف هاجر ولمن جو جارين عليك في البيت هي وصحبتك فاطمه عرفتها بتكون صحبتكم عشان كدا رسلتا رساله لي خالتك . وبكدا انتي عرفتي اي حاجه وعرفتي انو انا القتلتا ابراهيم
ملك: وليه جيتي حكيتي لي انا بالذات
تماضر( بضحكه خفيفه) : م عارفه والله م عارفه ليه جيتك انتي بالذات يمكن عشان بشوف فيك برائتي .الصراحه م عارفه ليه جيت حكيت ليك .واسي انا ماشه اسلم نفسسي ي ملك واخلي العداله تاخد مجراها .وبدعي ربنا انو انتو كمان ربنا ينصرك على عدوك انا عارفه اليوم دا ابراهيم ضربك وافترا عليك انا عارفه انك انتي بريئه وعارفه انو في زول اغتصبك
ملك( بتبكي) : تماضر انتي ليه عملتي كدا .حرام عليك العملتيهو ي تماضر .ليه ضيعتي نفسك بالطريقه دي .ليه تعملي في نفسك كدا ي تماضر ليه ليه .انتي عارفه عقوبه الحاجه العمليتها دي شنو اعدام ي تماضر.قولي لي ابراهيم كان بستحق تخسري نفسك عشانو م حرام عليك ي تماضر.
تماضر( عيونها مدمعات) : عشان كدا قلتا ليك قبل ما امشي لازم احكي ليك.قبل ما امشي للموت
تماضر قامت على حيلها وطلعت برا وخلاص ماشه عشان تسلم نفسها وملك بتبكي وقلبها اتقطع على تماضر حالتها كانت صعبه حست بيها في صرخه جواها ما قادره تتطلعها قبل ما تماضر تتطلع اتلفت على ملك ونظرات كلها حسره ....
تماضر ( بصوت مخنوق) : احذري وخلي بالك من هاجر ي ملك . وانتي لازم تاخدي حقك من الزول الاعتدا عليك وعذبك لازم ي ملك .......
يتبع......

#ملك
-٢١-
بقلم سجى اليزيد

اول ما تماضر طلعت ناس البيت كلهم اتلمو في ملك وبقو يسألو فيها تماضر قالت ليها شنو وملك كانت بتبكي..
عبد الوهاب: قالت ليك شنو المره دي ي ملك؟؟
ملك( بتبكي) : تماضر قتلت ابراهيم
ابتهال: شنو؟!!
كلهم بقو مخلوعين في الكلام القالتو ملك
بثينه( بتكورك) : سجمي سجمي مرتو قتلتو
ابتهال ساقت ملك ودخلتها جو وبقو بتكلمو ...
ابتهال: م مصدقه لحدي الان انو تماضر هي القتلتو
ملك: تماضر ما كعبه ي خالتي
ابتهال: عارفه ي بتي لو كانت كعبه ما كانت جات وقالت ليك كلام زي دا وما كان مشت اعترفت وسلمت نفسها بس دا حال الدنيا نعمل شنو
بثينه:لالا ابراهيم عمل شنو عشان هي تقتلو كمان ..عاد الليله نعمه بتموت
ابتهال: م كفايه الظلم الاتعرضت ليهو من ابراهيم صح م كان مفروض تقتلو لانو بالطريقه دي اذت نفسها بس تعمل شنو ما قدرت تتحمل الظلم البحصل
ملك( بتبكي) : ي خالتي م ممكن يخففو حكمها شويه في النهايه هي برضو اتظلمت مع ابراهيم
ابتهال: هي قتلتو لكن ي بتي وانتي عارفه الكلام دا كويس في النهايه هي قتلت انسان عشان كدا لازم يقتص منها ما ح نقدر نعمل حاجه ي بتي ما بنقدر نقيف معاها غير بالدعوات وانو ربنا يغفر ليها
بعد شهر تم اعدام تماضر.
فاطمه: كيفك ملك؟
ملك: الحمد لله
فاطمه: الليله اعدمو تماضر صح؟
ملك: اي
فاطمه:ربنا يفغر ليها
ملك: ان شاء الله ي رب . انا م قادره اصدق المريت بيهو دا ي فاطمه حاسه نفسي في حلم دي شنو المصايب العلى دي ي اختي
فاطمه: كلو لخير حبيبتي
بعد سكوت دام طويلا ....
فاطمه: هاجر جات هنا ي ملك
ملك: جات بتين؟
فاطمه: جات تقريبا امبارح بليل.شفتيها بتعمل كيف . عشان ضمنت نفسها مافي زول ح يسألها وعرفت انو تماضر ح يعدموها جات راجعه
ملك: تماضر قالت لي اخدي حذرك منها
فاطمه: خلاص هي اسي اتعرفت حقيقتها وعرفناها هي شنو
ملك: لا يا فاطمه لسه في حاجه تانيه
فاطمه: في شنو ؟!
ملك: ابراهيم قبل مايموت قال لي في موضوع مهم عايزا احكيهو ليك تتذكري؟ وتماضر لمن كانت هنا قالت لي هاجر طلعت متوتره ومتضايقه من ابراهيم السبب شنو م عارفه ؟
فاطمه: يمكن اتشاكلو .بس صحي الحاجه الغريبه ابراهيم كان عايز يقول ليك شنو
ملك: م عارفه والله .هي اسي ممكن تكون عارفه نحنا عرفنا حقيقتها؟
فاطمه: لالا م بتكون عارفه .خليها بس تجي هنا وانا بعرف اتصرف معاها
ملك: خليها انا عايزا اتكلم معاها .لكن اسي انا اعمل شنو في مصيبتي الجايه على دي
فاطمه: بسم الله في شنو ي ملك
ملك: اعمامي جايين ي فاطمه بعد عرفو ابراهيم طلقني سكتو وما قالو حاجه لكن شايفه الكلام البقولوهو عني الناس وانو انا بت ما كويسه وصلهم جايين عشان يقتلوني
فاطمه: حبيبتي ما تقولي كدا
ملك: اعمامي صعبين ي فاطمه الليله ح يشبعو فيني ضرب وح يقتلوني .احسن زاتو عشان ارتاح من الدنيا دي انا تعبتا والله ي فاطمه
فاطمه( عيونها دمعت) : ملك انتي ليه بتتكلمي كدا ما في زول ح يقرب عليك اخوانك الفتره ديك كلها ما شفتيهم كل ما يحاولو يتعرضو ليك ابوك بقيف في وشهم ابوك اتغير ي ملك وح يحميك منهم .بعدين ح تكوني كدا لبتين ي ملك لازم تاخدي حقك من محمد
ملك: ما تجيبي لي سيرتو
فاطمه: لا ح اجيبها ي ملك لبتين ح تكوني خايفه منو كدا ؟لبتين ح تنومي وانت خايفه تشوفيهو في الحلم؟ لبتين انتي ح تتذكري الحاجه الحصلت ليك في اليوم داك؟ لبتين ح تخلي الناس يفهمو انك مجرد عاهره وانتي الضحيه ؟ لبتين ما ح تقيفي في وش الزول الظلمك وعزبك؟ لبتين ح تكوني خايفه كدا لبتين وريني؟؟ ملك انا بتكلم عشان مصلحتك كفايه ي اختي الظلم الاتعرضتي ليهو لو بقيتي انتي شجاعه واتكلمتي في بنات غيرك عايشين نفس قصتك ح يتكلمو وياخدو حقهم عارفه ليه؟ لانك انتي ح تكوني قدوتهم ح تجيهم القوه منك ح يقدرو يسندو نفسهم
فاطمه وهي بتقول في الكلام دا سمعتها ابتهال وبقت تبكي وتلوم في نفسها لانها هي السمحت الظلم دا يتمارس في ملك ما وقفت معاها ووقفت مع ولدها الاغتصب ملك وحمتو بس لانو هو ولدها وقلبها ما طاوعها تعمل كدا فيهو .المسا اعمام ملك جو وعملو جوطه في البيت وكواريك الحله كلها سمعتهم والناس بقو بقولو في شنو.....
ادريس( عم ملك الكبير) : شفتي نحنا بسببك حصل لينا شنو .شايف ي عبد الوهاب بتعمل في شنو نحنا بقت سمعتنا في الاراضي بسببك ي عديمه التربيه
اسعد( عم ملك) : البت دي مفروض تقتلها وتخلينا نرتاح منها ومن العار الجابتو لينا
ملك( بتبكي) : انا ذي بتك ي عمي لي تعمل فيني كدا .انا م عملتا حاجه غلط
ادريس( بكورك) : ما عملتي حاجه غلط!راجلك طلقك لي طيب .لمن طلقك نحنا ما سألناك لكن تخلي الناس يتكلمو فينا ويقولو نحنا ناس ما شريفين دي انا ما بخليك فيها ي ملك لو كنت مكان ابوك كنت زمان ضبحتك
اسماعيل: ي ريت لو ما كنتي اختي بسببك انا بقيت بمشي وراسي في الارض
ابتهال ( بصوت عالى) : كفايه يااخ حرام عليكم حرام
ملك مشت لي عمها ادريس وقعدت ليهو تحت رجلينو وبتترجى فيهو عشان يسمعها وما

يظلمها
ملك( بتبكي) : عليك الله اسمعني ي عمي....
ادريس( بكورك) : اسمع شنو ؟!اسمع قلت ادبك ال كنتي بتعمليها انتي جبتي العار لي اسرتي
ملك( بتبكي) : انا م كدا والله ي عمي ....
ادريس قام على حيلو وداها كف وعبد الوهاب م قادر يتكلم ما قادر يعمل حاجه لي بتو وادريس لسه هايج في ملك جات وقفتو ابتهال وناس الحله كلهم سمعو كواريك ملك ومخلوعين كلهم واقفين برا في الشارع ومستغربين جات فاطمه جاريه ....
ادريس( بكورك) : اطلعي برا البيت دا اطلعي يلا م عندك قعاد هنا تاني
ملك( بتبكي) : والله ي عمي م عندي ذنب في حاجه .ابوي وريهم قول ليهم م عندي ذنب في حاجه انا م غلطا
عبد الوهاب : خلى البت ي ادريس
ادريس: انا اكبر منك وكلمتك ما بتمشي على انا فاهم اسي كان قلتا ح اقتلها ح اقتلها ليك
عم ادريس بقى بجر في ملك مره يمسكها من يدها ومره يجرها من شعرها وبقى بكورك فيها بأعلي حسو وطلعها برا الحوش وفتح باب الشارع عايز يطلعها برا.....
ادريس: والله الليله ما اخليك
عبد الوهاب( بكورك) : زح من بتي يا ادريس قلتا ليك اوعك تاني تمد يدك عليها
ادريس: انت بتعلى في صوتك عشان بتك ال خربت سمعتك ونزلت راسنا في الارض
ابتهال( بتبكي) : انت ليه ما عندك رحمه كدا ياخ .حسبي الله ونعم الوكيل فيك
ادريس (بكورك) : انتي اسكتي ما تتكلمي انتي الربيتيها وخربتيها وبسببك طلعت وحده ما شريفه الليله انا بقتلها ليكم وبرتاح من وسخها
ملك( بتكورك وتبكي) : عايزا تتخلص مني ليه؟عشان انا اغتصبوني وانا مظلومه
ادريس( مخلوع) : انتي بتقولي في شنو ي بت؟!!دا عشان تغطى على فضيحتك ووسخك صح
ملك( بتكورك وتبكي) : انا سكتا عن حاجه وحده بس وهي الحقيقه .الزول ال كنت بعتبرو زي اخوي اغتصبني وابوي وخالتي وعمتي عارفين انا كل يوم كنت بتعذب كل يوم كنت بعاني كل يوم كنت بحلم بابشع زكرى من طفولتي وما قادره انساها كل يوم بعاني من كلام الناس فيني وانو انا في نظرهم بت ليل ما اكتر انا كل يوم بتعذب من الضرب البضربوني ليهو بدون ما يعرفو الحقيقه حتى .الالم ال في قلبي حارقني وواجعني اكتر من الالم ال في جسمي .انا عرست ابراهيم غصبا عني انا م كنت عايزاهو عرستو عشان كان في مصالح بينو وبين ابوي واتحملت العذاب والظلم هناك انا وما ارتحتا . ولدي ال ما شفتو مات ولدي ال كان مفروض يكون فرحتي الوحيده القدمتها لي الدنيا دي وقوتي الوحيده الدنيا جات وشالتو مني،زي م شالت امي .حلمي الوحيد ال كنت بتمناهو ما قدرت احققو ما قدرت اكمل تعليمي وبقيت منبوذه بدون سبب واتحملت العذاب كلو بسبب محمد انتو ال خليتوني اسكت وخرصتوني غصبا عني حتي البكا دا ما خليتوني ابكيهو وغصبا عني خليتوني اتحمل المي وانا ما قادره عليهو دا كلو عشان كلام الناس بدل ما تقيفو معاي وتسندوني طلعتوني وحده عاهره قدام الناس .
الناس كلها كانت مخلوعه في الكلام ال بتقولو ملك وعبد الوهاب حسى قدر شنو هو ظلم بتو وخلاها تتعذب ونزلت منو دمعه وبقى بلوم في نفسو من جوه واخوانها مخلوعين وم مصدقين انو محمد يكون عمل كدا في اختهم وبقو منزلين راسهم وبسمعو فيها وخالتها ابتهال بتبكي فاطمه كانت فرحانه انو ملك قدرت تتكلم وتخلي الناس تعرف الحقيقه ..
ملك( بتبكي) : انا عايزا اكون زي باقي البنات نفسي افرح واضحك زيهم عايزا برائتي ال خسرتها ترجع لي تاني داير الالم ال في قلبي دا كلو يروح نفسي ارجع واتعلم زي باقي البنات واحقق احلامي عايزا احلم زي باقي البنات بالفستان الابيض البحلمو بيهو عايزا يكون عندي بيت واولاد وراجل يخاف الله ويتقى الله فينا عايزا امشي في الشارع بدون م اخاف من زول عايزا انوم وانا مرتاحه بدون ما ارجع واشوف اليوم البشع الحصل معاي انا عايزا اتعالج وابقى كويسه .لسه عايزين تقتلوني ؟اذا انا في نظركم مجرد عاهره وبستاهل تقتلوني اي واحد فيكم يمسك حجر ويرميني بيهو يلا ..
الناس اتأثرت بكلام ملك وعرفو قدر شنو هم ظلموها وعذبوها وما حاولو حتي يسمعوها اكتر واحد فيهم شاعر بالذنب ابوها واخوانها مع انو هم اقرب الناس ليها بس م حاولو يسمعوها وما حاولو يداوو الالم الجواها .
ما تحكم على انسان وانت م عارف ماضيهو ما تجرح الناس بكلامك وانت م عارف عنهم حاجه ما تحكم على انسان بمجرد انك سمعت عنو كلام من الناس انت م اعلم من الله بما في القلوب ما ح تعرف تأثير اي كلمه انت بترميها لي زول في قلبو في منها بجبر كسر ومنها بكون سبب في كسر قلب . الكلمه ال بطلعها من لسانك ما بتقدر تتراجع عنها تاني اذا كسرت قلب انسان ما ح تقدر ترجعو تاني وفي يوم من الايام لمن ربنا يكشف الحقيقه ويوريك حقيقه الزول الاتكلمتا فيهو وطلعت غلطان ح تشعر بندم وضيق عجيب وتتمني انك ما حكمت على الانسان دا لانو ح يجي يوم والناس تحكم عليك غلط ( كما تدين تدان) وح تشعر بفظاعه شعور الانسان ال انت حكمت عليهو غلط دائما خلي كلماتك واحكامك منطقيه وعادله......
يتبع.....

#ملك
-٢٢-
سجى - اليزيد

ادريس: عبد الوهاب البت دي بتقول في شنو الكلام ال بتقول فيهو دا صح؟!
عبد الوهاب ما كان قادر يتكلم وبقى ساكت وبعاين لي ملك .ابتهال ساقت ملك ودخلتها جوه البيت والناس واقفين برا ومخلوعين .. وحده من النسوان قالت دا شنو الكلام القالتو البت دي اكيد بتكذب !....ما اظن انها تكذب ما شفتيها بتتكلم كيف ....اي والله باين عليها م بتكذب بعدين ابوها ما فتح خشمو نهائي ولا حتي عمتها وخالتها معناها الكلام دا صح وفعلا ولد ابتهال اغتصب ملك ....لالا البت دي بتكذب عايزا تغطي على عملتها بس .....ي نسوان هوي استغفرو ربكم حرام عليكم الكلام والتهم البتقولوها في البت دي م كفايه الظلم الاتعرضت ليهو في حياتها بدل ما نقيف معاها ونسندها عشان تقدر تاخد حقها نقيف ضدها ....اي ي جماعه شغلو عقلكم اي وحده مننا نحنا كنسوان ممكن يمر بها الموقف البشع ال حصل مع ملك دا ح يكون شعوركم شنو والناس فاهمنكم غلط!؟....مافي وحده فينا ح تشعر بالحاجه الشعرت بيها ملك الحاجه الحصلت معاها دي ممكن تحصل معاكن انتو ممكن تحصل مع بناتكم .اخواتكم.صحباتكم.وحده قريبه ليكم نحنا بدل نساعدها بقينا نحطم فيها ........
في البيت.....
ادريس: انا عايز اعرف الحقيقه منك ي عبد الوهاب لانك ابوها وريني الحصل مع بتك دا صح
عبد الوهاب(بصوت مخنوق) : اي صح .ملك اعتدا عليها ولد خالتها اسعد كان عارف بالحكايه دي انا منعتو انو يقول ليك حاجه والموضوع دا كان سر بيناتنا بس ما حبينا نطلعو برا عشان م عايزين فضايح
ادريس: هو في فضيحه اكتر من الحصلت الليله
عبد الوهاب: بتي اوعك تفكر تعمل ليها شي ي ادريس
ادريس: هه وانت العملتو ليها دا يسموهو شنو؟!
عبد الوهاب( بصوت مخنوق) : انا ندمان ندمت على اي حاجه سويتها في بتي .من يوم شفت ملك راقده في المستشفي بسبب ضرب ابراهيم ليها ندمت وعرفت كيف انو انا بعتا بتي بالرخيص وما وقفت معاها في عز انكسارها .
ابتهال كانت قاعده هي وفاطمه مع ملك وكانت بتبكي شديد
ابتهال: عليك الله ي ملك ما تبكي خلاص ي بتي
فاطمه ( عيونها مدمعات) : انتي مفروض تكوني فرحانه انك وريتي الناس وخليتيهم يعرفو الحقيقه وما خفتي من حاجه
ملك( بتبكي) : انا عايزا ابقى كويسه عايزا اتعالج واعيش ذي باقي الناس عايزا اضحك وعايزا اكون زي باقي البنات
ابتهال: انتي لازم تاخدي حقك من محمد ولدي لازم تحاسبيهو على اي حاجه عملها معاك عشان ما يعملها تاني م غيرك ي ملك .اي صح محمد ولدي ما ساهل على اعمل فيهو كدا .بس انتي كمان بتي وما بقدر اخليك مظلومه واسكت عن الحق عشان كدا بقول ليك ي ملك اخدي حقك من محمد وانا ح اقيف معاك ي بتي
ملك( بتبكي ) : ما بقدر اواجه محمد تاني ما بقدر
فاطمه: انتي واجهتي الناس ديل كلهم الليله ي ملك وووريتيهم الحقيقه اوعك تخافي من محمد واخدي حقك منو وانا ح اقيف معاك طيب لازم تاخدي حقك
ابتهال: من بكره ح اسوقك نمشي نرفع عليهو دعوه
اثناء هم بتكلمو جا عبد الوهاب داخل عليهم...
عبد الوهاب: انا ح اقيف معاك ي بتي
ملك اول م سمعت ابوها بقول ليها كدا وشافت الحنان في عيونو طوالي جرت عليهو وحضنتو وبقت تبكي شديد وهو زاتو بقى ببكى معاها ...
عبد الوهاب( ببكي) : سامحيني ي بتي لاني ظلمتك اعفي لي ي بتي اعفي لي
ملك( بتبكي) : ما تقول كدا يا ابوي
عبد الوهاب ( ببكي) : انا ظلمتك وعذبتك كتير ي بتي وسلمتك بيدي لواحد ما عندو رحمه عشان مصالحي اعفي لي ي بتي .والله ي ملك اقيف معاك للنهايه واسندك وتقدري تاخدي حقك من محمد وح تاخديهو ان شااء الله
عبد الوهاب بقى بقش في دموع بتو ملك لاول مره تحس بحنان ابوها اتجاها .اول مره تشعر انو ابوها سندها ومنو اخدت قوتها وقررت تاخد حقها من محمد .. في الصباح فاطمه جات لي ملك
فاطمه: ملك هاجر قبيل ضربت لي وقالت جاياك
ملك : جاياني لي شنو عشان تكذب على وتستغبيني تاني
فاطمه: انا ي ملك ما مستحملاها بس لازم نواجها نحنا بالحقيقه ونوريها انو نحنا عرفناها هي شنو وهي لازم تعترف ليه هي عملت معاك كدا
ملك: طيب
وفعلا في نفس اليوم جاتهم هاجر وكانت مبينه انها عاديه .....
هاجر : انا عارفاك ي ملك انك منتظره جيتي دي وعارفه كمان انك انتي عرفتي حقيقتي
ملك: عرفتي كيف؟
هاجر : محمد كلمني
ملك( بخوف وصوت متقطع) : محمد !!
هاجر ( بضحكه) : اي محمد .بالمناسبه اي حاجه حاصله معاك لحدي الان ي ملك هي بتدبير من محمد كل المعاناه العانيتيها دي بسبب محمد
ملك ( بخوف) : وانتي دخلك شنو بمحمد ي هاجر؟!
هاجر : محمد هو الجابني هنا ي ملك جابني للحله دي مخصوص عشان اراقبك تتذكرو العربيه السودا البتقيف جمب بيتنا دا محمد ي ملك
ملك : انتو عايزين مني شنو
هاجر : انا ح اوضح ليك اي حاجه من الاول لغايه اخر شي وح تتكشف ليك اسي كل الاوراق ي ملك انا جابني هنا محمد وكلفني ادخل فيك نظام ابقى صحبتك واتقرب ليك وبعدين اتقرب لي راجلك ابراهيم .الصراحه راجلك ابراهيم م كان ضمن خطه محمد .محمد كان

هدفو انك تكوني ساكته على عملتو العملها معاك اذا اتحركتي اي حركه ضدو يكون عارف ويقدر يتصرف عشان كدا جابني ليك هنا ولمن قرر ابوك يعرسك لي ابراهيم .ابراهيم دخل ضمن الخطه بتاعتو لانو محمد كان عندو مصالح مع ابراهيم بتاعت شغل وفي نفس الوقت كان عايزك تكتشفي خيانه ابراهيم ليك وانو هو عرسك عشان مصلحه .محمد م كان عارف انك انتي عارفه حقيقه ابراهيم .عشان كدا قرر يعمل كدا عشان يخليلك طوالي مكسوره بأي طريقه كان عايزك تكوني مكسوره وما تقدري تقيفي على رجلينك وتتكلمي وتقولي الحقيقه لكن لمن ابراهيم مات هنا اتلخبطت كل الموازين . لمن كنت مع ابراهيم في الشقه بعدت منو شويه وكنت بتكلم مع محمد ووقتها ابراهيم عرفني وعرف انو انا بتكلم مع محمد وانو وجودي معاهو لي مصلحه بس م اكتر وعرف انو انا صحبتك ......
يوم الحادثه......
هاجر: محمد انا م بقدر بعد كدا اكمل م بقدر استمر في اللعبه دي
محمد : انتي جنيتي ي بت ولا شنو نسيتي الاتفاق البيناتنا ولا انتي عايزا ترجعي لحياه الفقر مره تانيه عايزاني اكلم اهلك انك انتي وحده لافه وصايعه ساي وبتاعت اولاد
هاجر ( بتبكي) : انت عارف انا كنت بعمل كدا ليه عشان اقدر اسند نفسي في الدنيا دي م كان عندي مصاريف حتى للجامعه وحبوبتي عيانه ولازمها ادويه كنت عايزني اجيب القروش من وين !
محمد : ي بت اسمعيني اسي انا مقصر معاك في حاجه كل مره بديك قروشك لمن تمشي على حسب خططتي انا وتنفذي اي حاجه بقولها ليك قروشك كلها بديك ليها وتتخلصي من الحياه الزفت ال انتي عايشاها دي كل القصه انك تظبطي لي شغلي مع الزول دا وتسرقي لي الاوراق برااحه وشويه شويه نخلى ملك تعرف حقيقه ابراهيم انو عرسها عشان مصلحه ونخليها تنكسر زياده عشان انا اضمن سكوتها بس وانها ما تتكلم في يوم من الايام وتعمل لي فضيحه
هاجر: انا م بقدر اعمل كدا في ملك ي محمد .وما بقدر اكون مع ابراهيم اكتر من كدا
محمد : انتي حره ارجعي لحياه الفقر ال كنتي عايشاها
هاجر لمن كانت بتتكلم برا ابراهيم سمعها ووقتها عرف الحقيقه وطوالي فتح الباب على هاجر وبقى بضرب فيها وطردها برا عشان كدا طلعت منو مضايقه ومتوتره ( تتذكرو لمن تماضر شافتها وكانت طالعه من الشقه متوتره كان بسبب الكلام دا ) ومن هنا ابراهيم لمن عرف الحقيقه كان عايز يورى ملك الحقيقه وانو هاجر دي تبع محمد .....
ملك: معناها دا الموضوع ال كان عايز يوريني ليهو ابراهيم
هاجر: اي دا هو .كان عايز يوريك حقيقتي .لمن اتقتل ابراهيم هو خاف شديد كان خايف انو اسمو يدخل في الموضوع ويتهموهو عشان كدا طوالي سافر وخلاني اسافر انا برضو عشان ما نلفت الانتباه حتي قروش السفره دبرها لي هو ولمن انكشفت الحقيقه انو تماضر هي القتلت ابراهيم قلبو برد حبه وطوالي خلاني ارجع هنا لانو ضمن نفسو انو هو ما في خطر بعد كدا ونبهني ما افتح خشمي لي زول
ملك: انتي ليه اسي جايه بتكلميني ي هاجر؟
هاجر : لانو انا عرفت انتي مظلومه قدر شنو .في يوم من الايام محمد كان معاي وكان سكران وبقى يهلوس ويرمي في الكلام ويقول اغتصبت ملك اغتصبت ملك زي ال كان بحلم بيك .وتعبت من استغلالو لي عشان انا كنت محتاجه للقروش هو استغل الحاجه دي فيني عشان كدت قررت اعترف ليك ي ملك بأي حاجه وانا ح اقيف معاك واحكي كل الكلام القالو محمد
فاطمه: انتي اسي ما خايفه منو؟
هاجر : لا . ما خايفه تصدقي ي ملك امبارح لمن انتي اتكلمتي قدام الناس كلهم ووريتيهم الحقيقه انا قررتا ما اسكت واقول الحقيقه زي ما انتي قلتيها بالرغم من اي حاجه مرت بيك ما كنت متخيله ح يجي يوم وتعملي العملتيهو امبارح دا عشان كدا انا اتشجعتا وقررتا اقيف معاك ومحمد ما بهمني .
فاطمه: انتي وحده كذابه دا كلو عشان تضمني نفسك وما تكوني مشتركه مع محمد في حاجه
هاجر : ابدا ي فاطمه. انا عارفه لو طلبتا منك انك تسامحيني ما ح تقدري ي ملك .بس بتمني انك يجي يوم وتسامحيني على اي اذي سببتو ليك
فاطمه: اذا عايزاها تسامحك اقيفي معاها واعترفي بالحقيقه في المحكمه
هاجر : انا ح اعمل كدا وح اكون معاكم والله
فاطمه: محمد اسي بكون عرف انو ملك قالت الحقيقه للناس كلها صح
هاجر : ما بعيد اكيد ح يكون عرف
فاطمه: موضوع انو تماضر قتلت ابراهيم عرفو كيف؟
هاجر : قال انو اسماعيل اخو ملك كلمو واكيد اسماعيل الوقت داك م كان عارف حقيقه محمد
بعد سكوت دام طويلا....
ملك( بصوت مخنوق) : انا بكره محمد
فاطمه: انتي ح تاخدي حقك منو حبيبتي ان شااء الله والله دائما مع المظلوم وشفتي هاجر قالت ح تقيف معاك وتعترف بأي حاجه
فاطمه وهاجر قعدو مسافه مع ملك وبعدين طلعو منها ....
ملك متعوده تصحى وتصلى صلاه الصبح بدري وهي اساسا ما قدرت تنوم من كترت الهموم العليها كانت بتصلي ولمن انتهت من صلاتها فجأه التلفون البيت ضرب ملك اتهجمت وكانت خايفه ومستغربه في نفس الوقت دا منو البضرب في وقت زي دا؟!......
يتبع.....

#ملك
-٢٣-
سجى- اليزيد

ملك كانت متردده وخايفه ترد على التلفون اول ما رفعت السماعه تسمع ليك صوت محمد .....
محمد( بضحكه) : عرفتك انتي ال ح تردي لي لانو مافي زول غيرك بصحى في وقت زي دا
ملك اول ما سمعت صوتو اتوترت شديد وخافت وما قدرت ترد عليهو..
محمد ( بضحكه) : اهدي اهدي شويه ضربات قلبك سامعها انا
ملك( بخوف وبتمتم) : انت عايز مني شنو !
محمد( بصوت حاد) : سمعت عايزا تمشي وترفعي على قضيه
ملك ( بتكورك ومتوتره) : اي ح امشي وبكره كمان وح اخد حقي منك
محمد ( بعصبيه) : انتي وحده غبيه عايزا تخربي سمعتك اكتر من ما هي خربانه
ملك( بتكورك) : انت الخربتا لي سمعتي انا ما عملت حاجه غلط كلو بسببك انت الضيعت لي مستقبلي وسرقت احلامي وقضيت على طفولتي كلو بسببك
محمد( بعصبيه وصوت عالى) : بقى كمان عندك لسان وبتعلى صوتك فيني .اسمعي هنا اذا بتفكري ترفعى على قضيه انا ما بخليك سامعه ي ملك والله بجي بقتلك في بيتك زي كانو ما حصل شي
ملك( بتبكي وتكورك) : انت اصلا قتلتني من زمان وحقي ح اخدو منك ي محمد وبتشوف
محمد ( بضحك) : الموضوع ليهو سنين ليه عايزا تفتحيهو تاني يااخ وتعبينا معاك .انسى الحصل ياخ زي كانو مافي شي انسى اي حاجه عملتها ليك
ملك( بتبكي وتكورك) : الله لا يسامحك يا محمد على العملتو فيني
ابتهال سمعت ملك بتكورك وتبكي وطوالي جات جاريه عليها .ملك جدعت السماعه بتاعت التلفون وتبكي بهستيريه وخايفه شديد قعدت تبكي في الارض واتذكرت الحاجه الحصلت معاها....
ابتهال ( بخلعه) : بسم الله بسم الله مالك ي بتي ! كنتي بتتكلمي مع منو ي ملك
عبد الوهاب وبثينه جو جارين ....
عبد الوهاب: في شنو ي ملك مالك بتبكي؟!
بثينه: مالها البت دي
ابتهال: ما عارفه لقيتها جدعت سماعه االتلفون وبتبكي
عبد الوهاب: دا منو الاتكلم معاك ي ملك !
ملك( بصوت متقطع) : محمد
ابتهال: محمد!!
عبد الوهاب: قال ليك شنو الحيوان دا ؟!
ملك حكت ليهم اي حاجه قالها محمد وانو هددها عشان ما ترفع عليهو قضيه
ابتهال ( بتبكي) : الله يهديك ي ولدي
عبد الوهاب( بعصبيه) : ولدك دا جنا ولا شنو .شايفاهو كيف بهدد في البت ولا كمان بقول ليها بقتلك
عبد الوهاب طلع وهو متعصب شديد ومعاهو بثينه ابتهال قاعده مع ملك....
ابتهال( بتبكي) : سامحيني ي بتي اي حاجه حاصله ليك بسببي لو من زمان وقفت معاك وقدرتي تاخدي حقك منو دا كلو ما كان حصل ليك
ملك ( بتبكي) : هو ليه بكرهني ؟!انا عملتا ليهو عشان يعمل لي كدا
ابتهال: محمد مريض نفسي بس ما اكتر وبعد الحصل الليله دا بقيت مصره اكتر انك لازم تاخدي حقك منو....
في الصباح... جات فاطمه وهاجر لي ملك وكانو بتكلمو معاها.....
فاطمه: ح تمشو مع منو ي ملك؟
ملك: دكتور حاتم اتكلم مع ابوي لمن عرف انو عايزا اخد حقي من محمد وهو كان بشجع فيني وطلب من ابوي انو يمشي معانا .ح يودينا هو
فاطمه: انتي ما ملاحظه دكتو حاتم مهتم بيك زياده عن اللزوم .
ملك: فاطمه عليك الله ما عايزا افتح مواضيع زي دا
فاطمه: عادي ي ملك انتي لازم تنسى الحاجه الحصلت معاك وتبدى حياه جديده الحاجه الحصلت معاك قبل سته سنين خلاص انسيها
ملك: ما بقدر انساها ي فاطمه .انا كل ما اتذكرها بتعب
هاجر : رأيك شنو تمشى لي دكتوره نفسيه يا ملك؟
فاطمه: اي والله يا ملك عشان تتعالجي من الحاله دي .وزاتو تفضفضي ليها شويه وترتاحي
هاجر: بعد نمشي ونرفع الدعوه طوالي ممكن نسأل هناك في الخرطوم بكون في
ابتهال سمعتهم بتكلمو جات داخله عليهم....
ابتهال: اي والله ي ملك فكره حلوه وبعد تمشي للدكتوره النفسيه دي بترتاحي ان شاء الله
ملك: ان شاء الله
بعد ساعتين دكتور حاتم جاهم ومشو كلهم ومعاهم هاجر لانها اهم شاهد وعارفه كل عمايل محمد وخصوصا اعتراف محمد انو اغتصب ملك . مشو رفعو قضيه في محمد وهاجر ادت اقولها كلها وابتهال برضو وعبد الوهاب وحتي بثينه ديل كانو شاهدين على عمله محمد في ملك. وطوالي قبضو محمد وكان متفاجئ شديد ما اتوقع انو ملك تمشي تشتكي عليهو بعد كلامو وتهديدو ليها امبارح اول ما وصل بقى بكورك في ملك.....
محمد ( بصوت عالى) : انتي وحده كذابه عايزا تفتري على صح .عايزا تغطي على عمايلك الوسخه ال كنتي بتعمليها بي انا والله ما اخليك يا ملك
عبد الوهاب ( جا على محمد ومسكو من رقبتو ) : بتي ح تاخد حقها منك غصبا عنك يا محمد .اوعك تاني تهدد بتي فاهم بقتلك اذا تاني بتحاول تقرب منها
محمد ( بضحك) : اسي بقت بتك مش انت زاتك كنت قرفان منها ومن عمايلها وحبيت تتخلص منها وغصبتها تعرس واحد هي ما عايزاهو وبعد دا طلقها لمن اكتشف انها وحده ما نضيفه
عبد الوهاب ( بصوت عالى ) : .اوعك تتكلم عن بتي كدا فاهم انت السبب في حاجه حصلت مع بتي انت الشوهتا سمعتها
ملك( بتبكي) : ابوي عليك الله خلاص خليهو
بصعوبه الشرطه قدرت تفك عبد الوهاب من محمد وعملو مشكله كبيره والناس كلهم بقو مستغربين وبتكلمو فيهم لمن جو يحققو مع محمد ك

ان بنكر في اي حاجه .....
المحقق: ملك رافعه عليك قضيه اغتصاب لمن كانت صغيره انت اعتديت عليها صح
محمد : لا البت دي كذابه انا ما اغتصبتها .واذا اغتصبتها ليه هي واهلها سكتو السنين دي كلها
المحقق: لكن امك قالت في افادتها ضدك انك اغتصبتها
محمد ( بتوتر) : يا جنابو فكر معاي شويه اذا انا اغتصبتها هم ليه سكتو طيب ليه عرسو ليها واحد تاني مش كان يقولو لي عرسها انت .وراجلها العرستو طلقها لانو اكتشف انها بت ما كويسه
المحقق: انا ما جايبك هنا عشان افكر معاك. امك قالت في الافاده القدمتها ضدك لمن قالت ليك عرسها انت رفضت انك تعرسها .وذكرت انك انت اغتصبتها في بيتك ذاتو وهي جات لقت ملك واقعه في الارض ولمن سألتها قالت انك اغتصبتها
محمد ( بتوتر وعصبيه ) : كذابه انا ما عملتا ليها حاجه
المحقق: يعني انت بتكذب امك !!
محمد : اي الكلام القالتو دا كلو ما صاح. هي بتحب ملك من صغيره لمن امها اتوفت امي ربتها ويمكن عشان كدا هي حانه عليها وحابه انو تغطي على وساخه ملك
المحقق: اممم انت شايف انو دي اجابه مقنعه. يعني امك عادي تبيعك انت وتتهمك زور عشان بت اختها وعشان تغطى على عمايلها
محمد ( بتوتر وتمتمه) : ااي وليه لا؟
المحقق : حاول اقنع نفسك بالاجابه دي اول وصدقها. عشان انا اقدر اقتنع بيها .
محمد : قلتا ليك انا ما عملتا حاجه
المحقق: طيب ي محمد .وبالنسبه لي هاجر صحبت ملك.....
محمد ( قاطعو) : اها شفت البت دي بت ما كويسه وبتاعت اولاد وما بعيد انها تكون بتشتغل شغل ما كويس
المحقق: وانت عرفت من وين انها بت ما كويسه !!!
محمد حسا نفسو استعجل لمن اتكلم كدا عن هاجر ولفت النظر ليهو واتوتر شديد....
محمد ( بتمتم) : امي امي حكت لي وقالت حصلت مشكله بين ملك وهاجر لانو اكتشفت انو هي بتخونها مع راجلها ابراهيم
المحقق: انت بتعرف هاجر ؟
محمد : لا ما بعرفها .اعرفها من وين يعني انا
المحقق: براحه براحه مالك متوتر كدا .لكن هاجر قالت انك بتعرفها وانت جبتها نفس الحى الساكنه فيهو ملك خصوصا. وانت كمان خليتها تدخل في حياه ابراهيم لانو كان عندك شغل معاهو وطلبتا منها تسرق منو اوراق وتجيبها ليك وطبعا ابراهيم ما كان عارف انو الشغل معاك لانك كنت بتتواصل معاهو عن طريق زول تاني عشان يغطي عليك
محمد ( بتوتر) : لا البت دي كذابه انا ما بعرفها ولا حصل شفتها عشان اطلب منها كدا ..وبعدين كلامك دا زي بتلمح لي انو ممكن اكون مشترك في قضيه قتل ابراهيم
المحقق: شوف يا محمد ما تحاول تلف لي راسي وتعمل فيها ذكي قضيه قتل ابراهيم براها وعرفنا منو العمل كدا انت حاليا متهم بقضيه اغتصاب بت خالتك وكل الشهود والدلائل بتشير ليك انت ..
محمد : قلتا ليك انا ما عملتا حاجه .ملك اصلا بت ما كويسه ولمن ابراهيم اكتشف انها كدا اليوم داك ضربها وطلقها طوالي
المحقق: طيب وعبد الوهاب.....
محمد ( بعصبيه وبتمتم وقاطع المحقق) : برضو كذاب انا ما عملتا لي بتو حاجه وما قربتا منها وبنفى اي حاجه قالتها
المحقق: احسن ليك تبدا من اسي تفتش محامي .ونحنا ح نستضيفك معانا كدا كم يوم
محمد ( بكورك ) : انت بتقول في شنو انا ما عملتا حاجه عشان تحبسوني انا مظلوم ما عملتا ليها حاجه .....
محمد طلعوهو برا وكانو ماشين يسجنوهو لغايه ما القاضي يحدد موعد للمحكمه وكان هايج شديد وخاتين ليهو الكلبشات ( الاصفاد) في يدينو ملك اول ما شافتو فرحت وحست انها انتصرت عليهو وشجاعتها زادت
محمد ( بهدد ) : اصبري يا ملك انا ح اطلع ولمن اطلع ما ترجيني
عبد الوهاب( بغضب ) : انت لسه بطول في لسانك اسكت قبل ما اقتلك بيدي
محمد : سمعتوهو عاينو ليهو بهدد فيني كيف
محمد ساقوهو وخلاص ماشى على السجن ملك عاينت لي ابتهال ولقت عيونها مدمعه ومنزله راسها في الارض...
ملك: انا اسفه يا خالتي .عارفه انو الحاجه دي بالنسبه ليك صعبه
ابتهال( بتبكي ) : انتي ما عندك ذنب يا ملك .واصلا كان من الطبيعي تاخدي حقك دا كان المفروض يحصل من زمان . انا قلبي واجعني انو ولدي الكان مفروض يكون سندي وربيتو وتعبتا فيهو عشان يقيف معاي في الدنيا دي يطلع واحد مجرم ومغتصب وواحد كذاب
ملك: خلاص يا خالتي عليك الله ما تبكى
ابتهال: طيب حبيبتي
ابتهال قلبها من جوه كان بتقطع ما حبت تظهر الشي دا لي ملك ولا تبكى قدامها حتى لانو ما عايزاها تشعر بالذنب ....
عبد الوهاب: كدا اول خطوه لينا انتهت .
ابتهال: المفروض نمشي نوكل محامي عشان يستلم القضيه
حاتم: انا بتكفل بالموضوع دا
عبد الوهاب : شكرا يا ولدي تعبناك معانا . انا ما عايز اخليك تتحمل مشاكلنا اكتر من كدا
حاتم: ما تقول كدا يا عمي انا حابب اسندكم واقيف مع ملك في قضيتها دي
عبد الوهاب: تسلم ما بتقصر يا ولدي
ابتهال: المفروض نمشي نشوف دكتوره نفسيه عشان ملك
حاتم: انا عندي زميله لي بعرفها هنا في الخرطوم دارسه علم نفس وحاليا فاتحه عياده ممكن اوديكم ليها
ملك: انا كويسه ما دايره دكتوره نفسيه ولا حاجه
ابتهال: انتي ما كويسه . الخ

وف لسه فيك يا ملك انتي لازم تمشي تقابليها
حاتم: طيب انا بضرب ليها وبكلمها واذا عايزين ممكن نمشي ليها اسي او اخليها تجيكم في البيت عادي ما عندها مشكله
ابتهال: طيب
وهم بتكلمو كانت في بت بتسمع فيهم وهاجر انتبهت ليها وصرت ليها وشها بمعني في شنو!البت طوالي جات وقفت قدامهم وبدت تسلم عليهم وعرفتهم عن نفسها وهي شغاله صحفيه اسمها ايمان ...
ايمان: انتي زوجه ابراهيم القتلتو مرتو ؟
ملك : اي طليقتو
ايمان : طيب يا ملك انا كنت متابعاك من دخلتي المكان دا وقدرت اعرف قصتك انتي اتعرضتي للاغتصاب من قريبك صح
ملك اضايقت من كلامها وكانت عايزا تمشي بس الصحفيه جات ووقفت ليها ولسه بتتكلم معاها ...
ايمان: استنى عليك الله ما تمشي .انا ممكن ادعمك وتكسبي الرأي العام
ملك: لا ما عايزا
ايمان: اسمعيني شويه . قضيتك ما قضيه عاديه انتي اتعرضتي للاغتصاب من واحد قريب ليك وفي كتير من البنات زيك اتعرضو ليهو من اقاربهم وما قادرين يتكلمو وياخدو حقوقهم وانتي الحادثه دي حصلت ليك وانتي عمرك 12سنه واضررتي كتير منها وفي بنات اغتصبوهم وهم صغار وسكتو على الحاجه دي وما اتكلمو وبحاولو ينسو الموضوع واهلهم ما اتكلمو صدقيني قضيتك ممكن تخلى بنات كتار مظلومات ياخدو حقهم ... ع العموم انا ما ح اضغط عليك ودا رقمي خليهو عندك وانا ذي ما وعدتك ح اقيف معاك وح اعمل حمله واخلى الرأي العام كلو يقيف معاك والناس كلهم تعرف قصتك وتتشجع . ...
حاتم: انتي ما مضطره يا ملك تعملي كدا اذا الشي دا بضايقك
ملك كانت بتعاين للورقه وبتفكر في كلام ايمان وخايفه من انو تحصل ليها مفآجات ما حلوه لي قدام.....
يتبع.......

#ملك
-٢٤-
سجى - اليزيد

بعد مرور عشره ايام......
ابتهال: اها قررتي تعملي شنو يا ملك بخصوص الصحفيه ايمان ؟
ملك: ما عارفه متردده اني احكي قصتي ليها وخايفه .
بثينه: انا غايتو ما شايفه انو لازم تتكلمي وتوري قصتك للناس الناس تقول القصه ليها سنين ويا دوب جايا تفتحها وح يقولو عليك عايزا تعمل ليها موضوع من ماف . برضو ما تتأملي كتير انو القانون ينصفك عشان القصه طولت وهم ما ح يهتمو ليك ومحمد ح يطلع بكره بكفاله وح تشوفي
ابتهال: منو القال ليك القانون ما بنصفها حتى لو كانت القصه قبل ميه سنه الحق ياهو حق وما بتغير واذا ملك سكتت اكتر من كدا ربنا بعدين بسألها من نفسها وليه سكتت على الظلم وخلتو يتمارس فيها وما منعتو وليه الناس تهاجم ملك مش حقها برضو وعايزا تاخدو اي وحده مننا ممكن تتعرض لي الحاجه الاتعرضت ليها ملك .بسبب الحاجه الحصلت معاها عاشت من هي صغيره تتعذب وتتذكر في الحاجه الحصلت وكمان جاها مرض واتشوهت سمعتها وهي مظلومه دا كلو وما عايزاها تاخد حقها!
بثينه: انا شايفا انو مافي داعي قصتها تنتشر اكتر من كدا وتجرجرنا معاها اصلا مش كفايه اهل الحي هنا كلهم عرفو وبدو يتكلمو فينا لأي زول احمدو ربكم انو ما طلعونا من البيت
ملك اضايقت من كلام بثينه وطوالي طلعت برا الحوش وبدت تفكر في كلام بثينه انو ما لازم تتكلم مع الصحفيه وتوريها قصتها ومحمد يمكن يطلع وما يثبتو عليهو شي وبدت تيأس تاني وهي قااعده بتفكر جوها اخوانها احمد واسماعيل....
احمد ( بتمتم) : انا عارف انك زعلانه مني ويمكن تكوني بتكرهيني لاني ظلمتك وعذبتك وما وفيت بالوعد القطعتو لي امي وما حميتك...
ملك( قاطعتو وابتسمت ليهو) : حصل خير ..ما تتكلم كدا يا اخوي وانا ما بكرهك ولا زعلانه منك
اسماعيل ( عيونو مدمعه) : نحنا عيشناك ظروف صعبه وما حميناك من نفسنا ما حميناك من اقرب الناس لينا ما حميناك من الناس ما حميناك من ابراهيم وجبرناك على حاجه انتي م عايزاها وظلمناك حتى ابسط حقوقك حرمناك منها من اليوم الا انتي وقفتي فيهو قدامنا وقدام الناس وقلتي الحقيقه عرفت انو انا مجرد واحد جبان ولو كانت عندي بس ذره من الشجاعه العندك كنت حميتك من اي حاجه اتعرضتي ليها كنت اخدتا ليك حقك من محمد . من اليوم ال عرفتا فيهو الحقيقه النوم ما جاني .انتي ما بتستحقي انو يكون عندك اخوان جبانين زينا
احمد ( ببكي) : انا ما قادر حتى اعاين ليك في وشك يا ريت لو متنا قبل ما نظلمك
ملك ( بتبكي) : ما تقول كدا عليك الله انا البسندني منو لو انتو ما معاي .اااا. البسندني منو !. انا زعلتا شويه بس لكن انا ما بكرهكم لانكم في النهايه اخواني وما بقدر اكرهكم .وانتو كنتو بتتعاملو معاي كدا لانو ما عارفين الحقيقه واسي عرفتوها وانا محتاجاكم تقيفو معاي لانو ح اخد قوتي منكم ..
اسماعيل حضن ملك وبقى ببكي معاها ....
اسماعيل : سامحيني يا ملك
ملك: مسامحاك يا اخوي
احمد : ح نقيف معاك وح تقدري تاخدي حقك من محمد بوعدك ما اخلى زول تاني يتعرض ليك ويأذيك
ملك( بابتسامه) : ان شاء الله
ملك بدت تشعر بالامان وفرحانه انو اخوانها عرفو الحقيقه وبدو يحبوها ويتعاملو معاها معامله حلوه قعدو مع بعض يتونسو ويضحكو ويتذكرو في طفولتهم .ملك كانت اول مره تضحك من قلبها وحست انو الدنيا بدت تضحك ليها....
اسماعيل : تتذكرو زمان احمد لمن كان صغير عمل شنو لي عمي ادريس ...
احمد : خلاص اسكت ما تتكلم اليوم داك اخدتا علقه جد لكن
اسماعيل : لمن كان عمي ادريس نايم مشى احمد شال ليهو نمله وفتح ليهو جلابيتو بفوق وختا النمله في ضهرو عم ادريس بعد عشره دقايق قام يتنفض ونحنا كنا كاتمين الضحكه لمن خلاص غلبنا فكيناها ...
احمد ( بضحك) : طبعا لحدي الان بكرهني عشان سويت ليهو الحركه دي . وانت مشيت فتنتني وكلمتو لي.
وهم بضحكو وبتذكرو في طفولتهم جا عبد الوهاب ومعاهو بدريه وولدها خالد المحامي (الدافع عن ملك وفاطمه لمن الاولاد اتعرضو ليهم) وقعدو يتكلمو مع بعض.....
عبد الوهاب: انا وكلتا خالد يا ملك عشان يستلم قضيتك هو محامي شاطر وان شاء الله يقدر يساعدنا
بدريه: ان شاء الله والله نقدر نساعدكم وتاخدي حقك يا ملك .تاريك يا بتي كنتي معذبه السنين دي كلها والتصرفات ال كنتي بتعمليها نحنا فسرناها غلط وظلمناك ساي يا بتي اعفي لينا عليك الله
ملك: لله يا خالتي وانا ما زعلانه من زول كفايه انكم اسي واقفين معاي ما دايره حاجه تانيه
بدريه: خالد اول ما عرف قصتك قال لي انا عايز ادافع عن البت دي وح اتكلم مع عبد الوهاب وسبحان الله براهو عبد الوهاب جا اتكلم معانا
ملك: كتر خيرك وشكرا ليك
بثينه: وانت عايز تدافع عنها على ياتو اساس الخلاك تتأكد شنو انها برئيه؟!
ابتهال: انتي ما ممكن تسكتي شويه وتبطلي ترمي في كلامك الفارغ دا
خالد: اذا ملك كذابه البخليها تقيف قدام الناس كلها شنو وتقول الحاجه الحصلت معاها .حاجه صعبه انو بت اتعرضت للاغتصاب تواجه المجتمع وتكون شجاعه وتقول الحقيقه دا براهو دليل على انها ما كذابه

. ولمن اولاد الحي اتعرضو ليها كانت خايفه حتى كانت خايفه مني انا دليل على انو بتكره جنس الرجال بسبب حاجه حاصله معاها .واسي نحنا المفروض نركز على قدام اكتر عشان نربح القضيه عايز اي زول فيكم يحكي لي اي حاجه عن الحصل اليوم داك وبالتفصيل وح ابدا بيك انتي يا ملك عارف انو صعب عليك بس لازم تتكلمي ...وبدت ملك تحكي في الحاجه الحصلت معاها ..ودكتور حاتم كان واقف مع ملك والدكتوره النفسيه كانت بتجيها اسمها دكتوره ندى وكلهم كانو واقفين معاها وبدعمو فيها.القضيه اتحددت انها بعد شهرين ومحمد طلع بكفاله وساعدوهو ناس عندهم سلطه وناس كبار كدا يعني عشان يطلع بحجه مافي دليل قوي عليهو بالرغم من الشهادات القدمتها امو ابتهال وهاجر وبحجه انو القصه ليها سنين وآثار الاغتصاب كلها اختفت من ملك وبحجه كمان انهم سكتو السنين دي كلها ليه. عشان كدا القاضي قرر المحكمه تكون بعد شهرين وخالد وحاتم وصحبات ملك كانو واقفين معاها وبشجعو فيها طواالي.....

في احدى جلسات المعالجه النفسيه.....
دكتوره ندى : لينا كم جلسه وانتي ما قدرتي تتكلمي يا ملك لازم تحكي وتتطلعي الكلام الجواك معليش حتي لو بكيتي واتوجعتي بس لازم تحكي
ملك: خلاص انا قررتا اتكلم وتاني ما ح اخاف من حاجه وح اقول الحقيقه حتي لو ليها سنين
ندى : صح الحق في النهايه هو حق. انتي خايفه انو قصتك يعرفها الناس ويهاجموك صح
ملك: اكيد ما كل الناس ح ينصفوني في منهم ال ح يقول القصه حصلت ليها وهي صغيره وجايه تتكلم لي فيها وفي منهم ال م ح يهتم بالموضوع وممكن كمان يتهموني بحاجات تانيه . عشان كدا خايفه
ندى : لكن اذا انتي وصلتي قصتك للرأي العام في بنات كتار عاشو نفس قصتك عارفه وساكتين ما قادرين يتكلمو في منها الجبروها اهلها على انها تتزوج .في منهم الاتعرضت للعنف الزوجي بكل انواعو .في منهم الاتحرمو من التعليم وهم لسه صغار.في بنات اتعرضو للاغتصاب من اقربائهم وسكتو عشان في نظرهم دا بجلب ليهم فضايح .وفي منهم اغتصبوهم وهم صغار وماتو بسبب الشي دا وجاتهم امراض دي كلها قصص عشتيها انتي واتذيتي منها وفي بنات عاشوها واذا اتكلمتي وقتها ح يظهر المسكوت عنه في مجتمعنا والحق ح يرجع لاصحابو
ملك: في رأيك لازم اتكلم واحكي قصتي
ندي: اذا كان الشي دا بريحك .اتكلمي يا ملك عندك رقم الصحفيه ايمان بتقدري تكلميها وح تقيف معاك ان شاء الله
ملك: ان شاء الله قصتي يقدرو يستفيدو منها البنات
ندي: اسي شعورك شنو والمحكمه بعد شهرين؟شعورك شنو وانتي وصلتي للمرحله دي
ملك: متوتره اكيد . انا مبسوطه اني قدرت اتكلم وعندي كل الظن الحسن بالله انو ح ينصفني واقدر اخد حقي من محمد وانو كل اهلي واقفين معاي بعد ما كانو ضدي .وفي نفس الوقت زعلانه على خالتي انو في يوم اضطرت تسلم ولدها وتقيف ضدو هي ما اتخيلت في يوم من الايام انو ولدها يكون مجرم وحاسه قلبها واجعها شديد لكن هي ما قاعده تظهر لي الشي دا لانو ما عايزاني اشعر بالذنب
ندي: ح تقدري في يوم من الايام تسامحي محمد؟
ملك( بعد سكوت دام طويلا) : حاليا ما بقدر اقول ليك اني ممكن اسامحو لانو اذاني كتير .بس الزمن كفيل انو يعالج اي شي.
ندى : شعورك شنو وهو اسي طلع من السجن بمساعده ناسو .خايفه منو؟
ملك: شعرتا للحظه انو انا مظلومه في الحته دي .ما خايفه منو اصلا هو ما ح يأذيني اكتر من كدا
ندي: طيب .اتأثرتي بموت تماضر يا ملك شايفه انو العقوبه دي كانت بتستحقها
ملك: تماضر اتعذبت مع ابراهيم مرات بسمعو بكورك ويضربها تقريبا هي اكتر وحده اتعذبت فينا .تماضر ما كانت زوله كعبه بس تصرفات ابراهيم وظلمو ليها خلاها تكون كدا .كان عندي امل انو اسره ابراهيم ترضى بالديه ويعفو عنها ويسامحوها لانو هي كمان انظلمت وعاشت معاهو كل السنين دي في عذاب مستمر في النهايه ما بقدر اقول شي غير انو ربنا يرحمها ويغفر ليها..
ندى: اهل الحى بتعاملو معاك كيف ؟
ملك: في منهم واقفين معاي كتر خيرهم وفي منهم مانعين بناتهم واولادهم يتعاملو معاي لانو شايفين انو انا ضرر بالنسبه ليهم لكن ما بلومهم لانو في النهايه ديل اولادهم وخايفين عليهم لكن بتمنى انو القضيه دي تخلص عشان يعرفو الحقيقه بس.
انتهت جلسه المعالجه النفسيه بتاعت ملك .ملك في كل جلساتها مع ندى كانت تشعر براحه عجيبه وتشعر بالثقه وقدرت تتكلم مع الصحفيه ايمان وتحكي ليها قصتها ووصلت قضيتها للرأي العام وكانت مبسوطه شديد لانو لقت ردود فعل ايجابيه وفي بنات كانو بشجعوها وواقفين معاها وانتشرت حملات في وسائل التواصل الاجتماعي منها #لا للعنف ضد المرأه .#لا لاغتصاب الاطغال .#لا للعنف الزوجي
محمد كان منزعج ومتعصب شديد بسبب ملك وانها نشرت القصه وبسببها بقى ما قادر يمشي في الشارع حتى الناس الكانو واقفين معاهو خلوهو وخسر كتير في شغلو ومع ذلك لسه بحاول يشوه صوره ملك قدام الناس لكن في كل مره كان بطلع فيها للناس بواجه هجوم من قبل الناس .
بعد مرور شهر .....
ملك كانت قاعده مع صحباتها هاجر وفاطمه عبد الوهاب وابتهال واخوانها كانو مافيشين

....
فاطمه: المحكمه قربت متوتره شديد انا
هاجر: انتي متوتره لي شنو؟اذا ملك ما متوتره بعدين الرأي العام ملو واقف معانا
ملك: انا ما خايفه لانو واثقه رب العالمين ح ينصرني
فاطمه( بضحكه) : اسي محمد ح يكون ما طايق روحو وعايز يطرشق
وهم بتكلمو سمعو في زول رزع باب الشارع وكان هايج شديد وبكورك وبنادي في ملك.....
يتبع.....

#ملك
-٢٥-
بقلم سجى اليزيد
ملك وصحباتها كانو قاعدين وبتونسو وبعدين سمعو صوت محمد وكان هايج شديد وبكورك وبنادي في ملك وطوالي خشى جوه البيت ......
محمد ( هايج وبكورك) : والله ما اخليك يا ملك الليله بقتلك عايزا تفتري على انا
لمن محمد جاي عليهم في الغرفه فاطمه مخلوعه وعايزا تقفل الباب لمن جات تقفلو محمد ثبت الباب ودفرو في فاطمه هاجر وقفت ليهو في طريقو عشان ما يقرب من ملك..
هاجر ( بتكورك) : محمد انت بتعمل في شنو اطلع برا احسن ليك اوعك تقرب مننا فاهم
محمد ( بقى بضرب في هاجر وبكورك) : انتي كمان بتفتري على والله الليله اقتلك انتي وصحبتك
ملك ( بتكورك) : اطلع برا .زح من هاجر عليك الله عليك الله ما تضربها
محمد جا مسك ملك وبقى بهدد فيها لكن ما ضربها لانو ما عايز تظهر فيها اثار الضرب .ملك لمن مسكها محمد اتذكرت اي حاجه وبقت تكورك وتبكى بهستيريه وتضرب في محمد ومحمد ما عايز يفكها .فاطمه طوالي جرت برا الشارع وبقت تصرخ وتبكي وتستنجد في الناس عشان يساعدوهم خالد سمع فاطمه بتكورك لانو اصلا كان ماشى على بيت عبد الوهاب ....
خالد ( مخلوع) : في شنو في شنو يا فاطمه
فاطمه ( بتبكي) : محمد جا هنا واسي ماسك ملك وبهدد فيها
خالد اول ما سمع كلام فاطمه طوالى جرا جوه ولقى محمد ماسك ملك وبهدد فيها وملك تكورك وتبكي وهاجر بتحاول تبعد فيهو منها وما قادره وطوالي جا نزل في محمد ضرب . وهو لسه شغال بهدد في ملك....
محمد :بسببك انتي انا سمعتي ادمرت .انا ما عملت ليك حاجه عشان تفتري على حابه تنضفي وسخك بي انا صح والله ما اخليك يا ملك
خالد ( هايج وبكورك ) : انت الدمرت سمعه البت . انت ما راجل عشان تجي وتمد يدك على بت وكمان تغتصبها ومنو ؟! بت خالتك يا حقير .انا ح اشتكي عليك بسبب الحاجه العملتها دي
محمد ( بكورك) : اعلى مافي خيلك اركبو .االقضيه دي ح اكسبها انا يا ملك ولمن اكسبها وقتها انا ما ح ارحمك
ملك كانت بتكورك بأعلى حسها وتبكي وخاتا يدها في راسها وقاعده في الارض وما بتقول غير جمله ( ما تغتصبني تاني عليك الله)
خالد بقى بطلع في محمد لمن ناس الحى سمعو اصواتهم وكلهم طلعو برا .....
محمد ( بصوت عالى) : اسمعو هنا انا البت دي ما عملتا ليها حاجه وبتفتري على وكذابه واصلا هي وحده وسخه زيها وزي صحبتها
واحد من رجال الحي : انت الوسخ يا محمد . انت ما راجل بالعكس نحنا بقينا نخجل انو انت من جنس الرجال انت والزيك شوهتو صورتنا .انت ما راجل لمن تفكر تمد يدك على بت وانت ما راجل لمن تغتصب وحده في مقام اختك .اذا لسه فيك نخوه وعايز تثبت انك انت راجل امشى اعترف بالحقيقه وخلى البت دي تاخد حقها واذا لا اتفضل اطلع من الحي عشان ما نوريك ليهو اسي لانو ح تندم على الساعه الجيت فيها هنا .محمد خاف من كلام الراجل والناس كانو بعاينو ليهو باحتقار وطوالي مشى جا عبد الوهاب وبثينه وابتهال جارين ومستغربين في شنو؟!!طوالي دخلو البيت ولقو ملك قاعده تبكي وصحباتها معاها .....
عبد الوهاب: انا عايز افهم الولد دا عايز يصل لوين يعني ما كفايه اي حاجه عملها في بتي
اسماعيل: محمد دا غبى .كدا هو ثبت التهمه على نفسو وما بقدر يطلع المره دي منها .البخليهو يجي هنا ويعمل المشكله دي شنو !
خالد: لانو القضيه بقت قضيه رأي عام هو بقى ما قادر يمشى في الشارع زي الناس وخسر شغلو ومعارفو وخسر قوتو لمن ملك اتكلمت عشان كدا هو حسى نفسو ما ح يقدر يتخلص من القصه دي وجا عمل الدرامات دي كلها هنا ويعمل نفسو برئ لكن هو ما عارف انو غلط غلطه حياتو هنا وبنقدر اسي نثبت هجومو على ملك والاعتدا على هاجر بالضرب بسهوله وكفايه انو كان في شهود
احمد : يعني ممكن نكسب القضيه من اول جلسه ؟
خالد : اي وبنسبه200في المئه كمان.
عبد الوهاب: ملك انتي كويسه؟
ملك: كويسه يا ابوي .وبعد الحاجه الحصلت الليله دي بقيت مصره اني اخد حقي منو
ابتهال كانت بتعاين لي ملك وشعرت بيها مهزوزه وخايفه من جوه وخلاص تعبت من تصرفات محمد مع ملك عشان كدا قررت تمشي وتتكلم معاهو.....
ابتهال: انا ماشه قرييب وبرجع ليكم
بثينه : ماشه وين ؟
ابتهال طوالي طلعت بدون ما ترد على سؤال بثينه....مشت لي محمد في بيتو اول ما دخلت محمد ما اتفاجئ...
محمد ( بضحك) : اوووو امي العزيزه كنت متوقع جيتك لكن ما اتوقعت بالسرعه دي
ابتهال كانت محروقه منو شديد وضربتو كف طوالي ....
ابتهال ( بحزم) : اوعك تقولي لي امي لانو ما بشرفني اني اكون ام ولد مجرم ذيك .انت فاكر نفسك شنو للدرجه دي وصلتك حقارتك وتفاهتك تمشي لي ملك في البيت وتهددا وتضرب صحبتها قايل نفسك شنو انت ااااا؟!
محمد( بصوت عالى) : اي طبعا اكيد لازم تخافي على ملك بعتيني عشانها وانا مش ولدك
ابتهال: لا ما ولدي .انا ما بعتبر نفسي ولدتا .انت ما الولد الا انا بتمناهو يا محمد .
محمد ( بصوت عالي) : وانتي ما ام لمن تبيعي ولدك
ابتهال( بتكورك وتبكي) : على الاقل انا انسانه ما زيك انت . انا شعرت بالشعرت بيهو ملك كل السنين

الفاتت دي كنت شاهده على العذاب والظلم العانتو بسببك .بقيت اخجل اعاين في وشها من عملتك المقرفه العملتها فيها انا بقيت امشي في الشارع وراسي في الارض.وبقيت اخجل اقول انك ولدي .
محمد ( عيونو مدمعه) : انا كنت ما واعي لمن عملتا كدا
ابتهال( بتكورك وتبكي) : وذنبها شنو انك ما كنت واعي .دي حجه ليك عشان تعمل في البت كدا .بسببك البت ما قدرت تعيش طفولتها لانك سرقت منها اي شي حلو في حياتها .اذا انت ضمير بتمشي وتعترف بالحقيقه لانو بعدين ربنا ح يسألك ويسألني من حق البت دي
محمد ( بكورك) : انا كمان اتعذبتا في الكم يوم القعدتا فيها في السجن اتعذبتا
ابتهال( بتضحك) : اتعذبتا!. انت ما اتعذبتا زي ما اتعذبت ملك وانت عارف الحاجه دي كويس
محمد ( ببكي) : للدرجه دي انتي بتكرهيني يا امي ؟لو كانت العقوبه اعدام ح تعملي شنو
ابتهال( بتبكي) : محمد امشي اعترف .الله يرضى عليك ي ولدي .ما بقدر اقول حاجه غير انو ربنا يسامحك وادعى ملك تسامحك .وخليك عارف حاجه انو رب العالمين دائما مع المظلومين عشان كدا ما تحاول تنكر اكتر من كدا وامشي اعترف وريحني وريحك نفسك..
ابتهال وهي بتقول في الكلام دا قلبها كان واجعها شديد وما قادره تتحمل فكره تخسر ولدها ومحمد قعد تحت رجلين امو وببكي.....
محمد : طيب . انا ح اعترف . وبتك ملك ح تاخد حقها
ابتهال ما صدقت الكلام القالتو محمد وبالسهوله دي يقتنع بالكلام القالتو . محمد كان ببكي قدامها وبظهر انو هو ندمان وهي حضنتو وبقت تبكي معاهو وقلبها بتقطع من جوه وما مصدقه انو ولدها خلاص ح يمشي ويعترف بالحقيقه لمن طلعت منو طوالي مشت لبيت عبد الوهاب وحكت ليهم الحصل وكلهم فرحو انو محمد ح يمشي ويعترف بالحقيقه بس ملك وخالد ما كانو مقتنعين بالكلام دا وعارفين انو محمد ح يعمل ليهم مفآجاه يوم المحكمه .
عند محمد مشى لي بيت ابراهيم وكان عايز يلاقى نعمه وفعلا قعد معاها وكانو بتكلمو.....
نعمه: انت الجابك هنا شنو؟
محمد : اول شي البركه فيكم يااه .ربنا يغفر ليهو ان شاء الله
نعمه: امين .اتفضل عايز مني شنو
محمد : طيب انا ح ادخل في الموضوع طوالي .بصراحه انا كنت شغال مع ولدك ابراهيم لكن عن طريق زول تاني يعني ما شغال معاهو بطريقه مباشره وبيني وبينك عمايل ولدك ما حلوه .يعني مثلا اديك وحده منها تزوير اوراق .تبييض اموال
نعمه( بتكورك) : انت كذاب .ولدي ما كان كدا
محمد : لا كدا ونص وخمسه . اذا اسرتكم الكريمه عرفت بالكلام العملو ولدك وعندي دلائل بتثبت الكلام دا تفتكري ح يحصل شنو . خليني اقول ليك بصوره مختصره بما انكم اسره مرطبه ومتعصبه في نفس الوقت ببساطه ح يحرموك من اي شي انتي ولد ابراهيم
نعمه: انت عايز شنو؟
محمد : طيب .عشان الشي دا ما يحصل عايزك في المحكمه تكوني في صفى وتكون شهادتك لصالحي .تشهدي انو ملك بت ما كويسه عشان كدا ابراهيم ضربها وطلقها وتقولي انك في يوم شفتيها وهي جايه البيت في وقت متأخره وسلوكها غير اخلاقي .يعني ببساطه تشوهي سمعتها وانا مقابل الشي دا ما ح اقول عمايل ولدك وانتي ما ح تتحرمي من الورثه .هااااا قلتي شنو؟
بعد سكوت دام طويلا....
نعمه: موافقه .......
يتبع.......

#ملك
-٢٦-
سجى - اليزيد

خالد : انتي مقتنعه بالكلام القالو محمد لامو ابتهال يا ملك؟
ملك: لا . وخايفه انو يعمل لينا مفآجاه يوم المحكمه .وخايفه اني ما اكسب القضيه دي خايفه شديد
خالد : ما تخافي .كفايه دعم الناس ليك
ملك ( بابتسامه) : دي الحاجه الوحيده المطمنه .انو الحمد لله الناس ما هاجمتني ووقفت معاي صح قصتي حصلت من انا صغيره بس ما اتوقعتا الناس يكونو متعاطفين معاي للدرجه دي
خالد : دي حاجه كويسه .الحمد لله ومن الجلسه الاولى انا بأكد ليك انو ح نكسب القضيه دي
ملك: عندي فضول اعرف محمد لمن تثبت عليهو التهمه ح تكون عقوبتو شنو؟
محمد : اعدام. بالاضافه لي انو هددك قدام الناس بالقتل .واعتدا على صحبتك بالضرب . وشوه سمعتك .والسكوت عن الحق .واخفاء الحقائق ودا طبعا اذا ما كان عندو مصايب تانيه
ملك ( بتمتم) : اعدام !!
خالد : اي .لانو اعتدا عليك وانتي صغيره وبسببو جاك مرض وممكن نثبت الحاجه دي عن طريق التقرير ال ح نجيبو من المستشفي
ملك ( عيونها مدمعه) : طيب وخالتي
خالد : خالتك مره قويه لانو قدرت تتحمل الظروف دي كلها .وما عندنا حاجه غير انو ندعى ربنا يصبرها
مرت الايام وملك كانت مواصله حياتها عادي والناس كلهم واقفين معاها البعرفوها وال ما بعرفوها وبتحاول بقدر الامكان ما تخلى خالتها تزعل او تتضايق لانو عارفه مصير ولدها وكانت بتساندها وابتهال ما بتحاول تظهر لي ملك حاجه بس هي من جوه محطمه ......

يوم المحكمه........
عبد الوهاب: نعمه الجابها هنا شنو يا خالد
خالد : جات عشان تشهد ضدنا اكيد .انا كنت عارف انو محمد ح يعمل حركه ناقصه
اسماعيل: معقوله المره دي تكون انانيه للدرجه دي
احمد : احتمال محمد مهددا بحاجه
خالد : خلاص هانت .اسي ح ندخل القاعه وح تتكشف اي حاجه
ملك : خالتي انتي كويسه
ابتهال( بابتسامه) : كويسه حبيبتي
محمد كان بعاين لي ملك نظرات خبيثه وملك كمان كانت بتعاين ليهو جوه عينو ولاول مره تحس انها ما خايفه من حاجه ودعم الناس ليها قواها وكانت بتقول في سرها ( يا رب انصرني عليهو يا رب اخد لي حقي منو .يا رب تهون على خالتي وجعها انا عارفها مكسوره من جوه يا رب اديها القوه عشان تقدر تتحمل يا ربي كون معاها ).....
فاطمه: انا مستغربه خالتو نعمه البجيبها هنا شنو وليه واقفه مع محمد
ملك: ان شاء الله خير خير
بعد ساعه دخلو قاعه المحكمه.... والشهود كانو قاعدين برا دخل محامي الدفاع ( المحامي بتاع محمد) ومحامي الاتهام( خالد) ودخل محمد وملك اول ما دخل القاضي وقفو ليهو وتاني بعدين قعدو ......
القاضي: تقدمت السيده ملك عبد الوهاب برفع قضيه على المتهم محمد احمد عباس المتهم باغتصابها في صغرها والمتهم ايضا بالهجوم عليها في بيتها واالاعتدا على صديقتها .هل لدي محامي الدفاع ما يقوله....؟
محامي الدفاع: سيدي القاضي جميع التهم التي نسبت الي موكلي باطله وانا انفيها نفيا تاما .صحيح ان موكلي قام بالذهاب الى بيتها وذلك لكي ينصحها ان تعود لي رشدها والا تتهمه اتهامات باطله ولكي يزيل الخلافات بينهما ولكن قابلته بالعداء وقامت بمهاجمته وضربه هي وصديقاتها لذلك قام موكلي بضرب احداهن للدفاع عن نفسه.فاالسيده ملك مشتبه فيها باعمال غير اخلاقيه وهي ارادت ان توجه كل تلك التهم االباطله في حق موكلي لتغطيه اعمالها الغير مشروعه وهناك من يؤكد صحه كلامي في حقها وهي ام المدعو ابراهيم عبد المنعم رحمه الله
القاضي: هل لدي محامي الاتهام ما يقوله؟
خالد : سيدي .السيد محمد اقدم على هذه الاتهامات الباطله والشنيعه بحق موكلتي وقام بتشويه سمعتها امام الناس لكي يستطيع ان ينجو من فعلته القبيحه التي قام بفعلها ولدي الكثير من الشهود الذين يشهدون على ما فعله منذ لحظه اغتصاب موكلتي ومن هؤلاء الشهود امه السيده ابتهال ارجو منكم ان تعيرو كل الانتباه الى شهادتها والتركيز ايضا على شهاده هاجر عبد الرحمن باعتبارها شاهده مهمه في هذه القضيه . ولدي كثير من الشهود ايضا على هجومه عليها في منزلها وانا كنت احد هؤلاء الشهود
محامي الدفاع : سيدي القاضي ان السيده هاجر متهمه ايضا بممارسه اعمال غير اخلاقيه وهي تعد الصديقه المقربه للسيده ملك ارجو منكم الا تاخذو شهادتها بعين الاعتبار
خالد: سيدي . لقد قام المدعو محمد احمد عباس باحضار السيده هاجر وجعلها كجاسوسه له ليضمن سكوت موكلتي وقام بامرها بسرقه اوراق مهمه من السيد ابراهيم طليق موكلتي رحمه الله بعد ان امرها بان تكون على علاقه معه ...
القاضي: استدعاء السيده هاجر عبد الرحمن
----------
القاضي: هل انتي صديقه السيده ملك عبد الوهاب
هاجر : نعم
القاضي: هل هناك صله بينك وبين السيد محمد احمد عباس
هاجر: نعم . انا ما كنت بعرف ملك وجيت الحى الساكنه فيهو ملك عن طريق محمد وبعدين امرنى اكون جاسوسه ليهو كان حاسي انو ملك ح تعمل حركه ضدو عشان كدا كان حابي يكون جاهز .وكمان امرني اسرق اوراق من ابراهيم لانو كان شغال معاهو لكن عن طريق زول تاني .والحاجه الحبرتني اني اعمل اي

حاجه بقولها لي لانو استغل حاجتي للقروش وظروفي كانت صعبه ومقابل اي حاجه كنت بعملها ليهو كان بدفع لي ولمن حبيت اتراجع عن اي حاجه بعملها هو رفض .وفي يوم من الايام كان قاعد معاي في البيت وسكران وكان بهلوس بملك وبقول انا اغتصبتها
القاضي : استدعاء السيد عبد الوهاب
--------
عبد الوهاب: يوم اعتدا محمد على بتي كلمتني ابتهال وجيت بيتهم وشوفت بتي في وضع صعب شديد وكان مغمي عليها ابتهال قالت لي محمد اغتصبها ولمن مشيت وواجهتو قولتا ليهو اتزوج بتي اذا انت عملتا فيها كدا استرها .هو رفض انو يتزوجها وبعدين بكل سهوله هرب
القاضي : كيف تسمح بتزوجيها من مغتصبها ؟!
عبد الوهاب ( عيونو مدمعه) : ما كان عندي حل غيرو عشان استر بتي او بالاحرى كنت خايف من كلام الناس عشان كدا انا زوجتها لي ابراهيم
القاضي: هل قمت تزوجيها رغما عنها الى ابراهيم؟!! كان السيد ابراهيم يعرف بقصه اغتصابها؟!
عبد الوهاب: نعم انا زوجتها بالغصب من ابراهيم .وابراهيم كان عارف اي حاجه عن قصتها
القاضي: استدعااء السيده بثينه
---------
بثينه( بتمتم) : انا كنت عارفه بموضوع ملك وانو محمد اغتصبها بس ما كان في زول عارف غيرنا ونحنا جبرناها تسكت لانو ما كان عايزين فضايح ولمن محمد رفض يتزوجها زوجناها لي ابراهيم
القاضي: كيف ترضون بتزوجيها من مغتصبها وهي صغيره!!
بثينه: ما كنا بنفكر في حاجه تانيه غير الفضايح وكلام الناس لو اتعرف الموضوع
ملك كانت منزله راسها وبتبكي .القاضي انتبه ليها وامرها اذا تعبانه تطلع برا بس هي رفضت وقررت تكمل للنهايه
محامي الدفاع: سيدي هذه كلها افعال مصطنعه من السيده ملك لتكسب عطفكم عليها
خالد: موكلتي غير مضطره للقيام بمثل هذه الافعال الناقصه ..
القاضي: هدوووء ...استدعاء السيد حاتم
--------
حاتم: ملك كانت راقده في المستشفي يوم عرسهم ولمن جيت اكشف عليها كانت بتعمل حركات غريبه جدا وكانت خايفه مني دليل على انها ما طبيعيه وكل ما اتكلم معاها كانت بتكورك وبتطلب مني اطلع برا . والمره التانيه رقدت في المستشفي بسبب ضرب مبرح من ابراهيم خلاها تفقد الجنين
القاضى: استدعاء السيده فاطمه
------
فاطمه: ملك كانت ما طبيعيه من هي وصغيره ولمن اسألها مالك ما بتجاوب على وبتتهرب حسيت انو في حاجه حاصله ليها وما عايزا توريني ولمن كانت راقده في المستشفي خالتو ابتهال كلمتني ووقتها عرفت انو محمد اغتصبها .وفي يوم كنا قاعدين برانا في البيت جا وكان متعصب شديد وكان بضرب في هاجر وبعدين بقى بهدد في ملك وبقول انو ح يقتلها
بعدين القاضي استدعاء مل الشهود البشهدو انو جاهم في البيت وبقى بهدد فيهم يعني صدرو يثبتو انو محمد هدد ملك بالقتل .ومحمد بدا يتوتر شديد لانو حس نفسو اتزنق خلاص وما ح يقدر يتمرق من الحكايه دي لكن لسه عندو ورقه لسه ما استخدمها وهي نعمه....
القاضي: استدعاء السيده ابتهال
--------
القاضى : ان شهادتك مختلفه عن البقيه نسبه لانك ام المتهم وخاله للمعتدي عليها ونظرا لذلك قررنا ان تقسمي بالله ان تقولي الحق ولا شي غير الحق.
ابتهال: اقسم بأن اقول الحق ولا شي غير الحق
القاضي: تفضلي
ابتهال ( بصوت مخنوق) : بعد وفاه ام ملك انا ربتيها وبعتبرها زي بتي .وولدي محمد هو الاعتدا عليها كانت جاياني من المدرسه ولمن لقتني ماف محمد استغل الحكايه دي وعمل عملتو فيها.وانا اول وحده شفتها بالحاله دي واستعفتها وبعدين ودينها المستشفي وحالتها كانت صعبه شديد وبسبب الموضوع دا جاها مرض وبعدين زوجناها لي ابراهيم
القاضي: اذن هل تعترفين ان ابنك هو من اقدم بالاعتدا عليها!
ابتهال: نعم
القاضي: استدعاء السيده مريم.
--------
مريم: من اول يوم جات فيهو ملك البيت وابراهيم الله يرحمو كان قاسي معاها شديد وكان بعنفها وفي يوم من الايام سمعتو وهو بقول ليها انا ما عملتا ليك حاجه كعبه زي ما محمد عمل ليك وكان عارف بقصتها ومع ذلك افترا عليها الله يسامحو وضربها
القاضي: استدعاء السيده نعمه
--------
القاضي: شهادتك تعد من الشهادات المهمه بحق السيده ملك وبما انك كنت امآ لزوجها وحماتها ذات يوم اقسمي بالله ان تقولي الحق ولا شي غير الحق
نعمه: اقسم بالله العظيم ان اقول الحق ولا شي غير الحق
القاضي: هل حصيح انك شاهده على ان السيده ملك وطول فتره مكوثها معكم تقوم باعمال غير اخلاقيه وتخرج في ساعات متأخره من البيت!؟
نعمه: لا . ملك ما كانت كدا . انا ما شفت من البت دي شي كعب وغير اخلاقي بالعكس عدم الاخلاق والظلم نحن مارسناهو فيها هي ما كانت بتتكلم ..
القاضي: لكن محامي الدفاع يقول بأنك سوف تشهدين ضدها وبأنها تقوم باعمال غير اخلاقيه !! هل تقوم بنفى هذه الادعائات !!
نعمه: نعم بنفيها . وسبب جيتي هنا انو محمد هددني انو يمشي ويكشف اعمال ولدي ال كان بعملها وانا ما كنت عارفه انو ابراهيم بشتغل شغل كعب وعلى حسب الكلام القالو لي انو بشتغل في تزوير اوراق وتبيض اموال وهددني انو يمشي ويقول الكلام دا للاسره ويحرموني من حقي في مال ولدي وراجلي بعد ما مات

و
القاضى: اذن السيد محمد قام باحضارك شاهده لتشويه سمعه السيده ملك !
نعمه: نعم جابني عشان اشهد ضدها واتهمها انها بت ما نضيفه
القاضى : ولماذا قمتي بتغير رأيك حول الشهاده الزور هذه ضدها؟
نعمه: لانو بت نضيفه نحنا وسخنها وما رحمناها وهي ما كانت بتتكلم وانا ظلمتها كتير ظلمتها لمن شوهت سمعتها ظلمتها لمن ما وقفت معاها لمن ولدي ضربها ضرب الموت وافترا عليها عشان كدل قررتا اكفر عن ذنبي لانو من اليوم الظلمتو فيها وانا ما شفت الراحه .عشان كدا بطلب منك لو سمحت تاخد حق البت المسكينه دي من المجرم دا ...
محمد كان مخلوع وما مصدق انو نعمه غدرت بيهو وللحظه حسى نفسو خلاص اتدمر ومافي مفر انو يوجه عقابو .نعمه اتلفت على ملك وكانت بتبكي ....
نعمه: سامحيني يا بتي .الله يرضى عليك اعفى لي
ملك( بتبكي) : لله
محامي الدفاع: سيدي القاضي لقد قامو بشراء السيده نعمه انا انفى كل هذا الكلام الباطل الذي وجه لموكلي
خالد: سيدي لقد انكشفت كل الاوراق التي تدين المتهم وانا اطلب منك تطبيق اقصى العقوبات فيه .والنظر ايضا الي تقرير المستشفي الذي يثبت اصابه موكلتي بالمرض .
القاضي : يتم استئناف الجلسه بعد نصف ساعه للنطق بالحكم الاخير.....
يتبع......

#ملك
-٢٧-
بقلم سجى اليزيد

بعد نصف ساعه.....
القاضي: بعد النظر في هذه القضيه والاستماع الي الشهود والاخذ بالاعتبار شهاده السيده ابتهال ام المتهم والسيده نعمه وبالنظر الى التقرير الذي يثبت تعرض المغتصبه لاضرار كثيره وهي في عمر صغير تم اثبات التهمه على السيد محمد احمد عباس باغتصاب ملك عبد الوهاب وفي عمر صغير .ولأن جريمه الاغتصاب من ابشع اشكال العنف التي تتعرض ليها المرأه والطفل على الاطلاق لتعديها على حقوق السلامه النفسيه والجسديه وانتهاكها للانسانيه وتأثيرها على النسيج الاجتماعي .ووفقا للقانون الجنائي السوداني لسنه 1991تحت الماده الثانيه ووفقا لقانون الطفل الذي صدر عام2010الذي رفع عقوبه الاغتصاب لتصل الى الاعدام لتكون ردعا ونظرا الى ان المتهم قام باخفاء الحقايق عن العداله والمشاركه في اعمال غير مشروعه والتهديذ بالقتل والاعتدا على السيده هاحر بالضرب مع وضع الاغتصاب في المرتبه الاولى تم الحكم عليه بالاعدام رفعت الجلسه....
الكل كان فرحان انو ملك قدرت تاخد حقها اخير معاناتها انتهت كل الناس قدرت تعرف الحقيقه واهلها فرحانين والدنيا ما ساعياهم ملك كانت بس بتعاين لخالتها ال كانت بتعاين ليها بابتسامه وقلب متقطع في نفس الوقت ابتهال كانت مره قويه لانو قدرت تتحمل كل الظروف دي كانت حاجه غريبه انو ابتهال تمشي وتشهد ضد ولدها وكانت بتدعى ربنا يلهمها الصبر ..وهم طالعين من المحكمه كان في بنات كتار واقفين برا وفرحانين انو ملك قدرت تاخد حقها كانو رافعين شعارات كتيره ( لا لاغتصاب المرأه) ( لا للعنف ضد المرأه) ( لا لاغتصاب الطفل ) .....
ملك( بابتسامه) : اخيرا قصتي انتهت
خالد: لا ما انتهت .انتي قصتك يا دووب بدت
ابتهال قررت انها تسافر لانو ما كانت قادره تتحمل فراق ولدها بالرغم من انو ظالم وفرحانه انو ملك اخدت حقها وارتاحت .وخالد كمان سافر . هاجر اثبتو انها نضيفه لانو كان مشتبه فيها باعمال غير اخلاقيه وبعدين اتزوجت اسماعيل اخو ملك وفاطمه اتزوجت من دكتور حاتم .وعبد الوهاب باع الارض ومن قروشها عمل مشروع عشان يستفيد منو وشغل ولدو احمد معاهو .نعمه بقت مع مريم وعايشه معاها وعثمان وسلافه كمان بقو عايشين براهم .ملك اتعافت وبقت طبيعيه وواصلت تعليمها وامتحنت شهاده من اول وجديد وخشت كليه القانون لانو نسبتها حلوه شديد وبعد سته سنين اتخرجت واشتغلت محاميه وبقت تدافع عن البنات القصتهم زي قصتها وقصتها بقت ملهمه لكتير من البنات .....
بعد مرور 7سنين اتلاقت ملك مع خالد وكانو الاتنين محامين في قضيه وحده وملك قدرت تربح القضيه وتفوز على خالد ...
خالد: منو الكان يتخيل انو في يوم من الايام البت الدافعتا عنها بقت محاميه وانتصرت على كمان
ملك( بابتسامه) : دا القدر .وحمد ع السلامه
خالد : الله يسلمك ي رب . انا كنت متابع اخبارك اول بأول وبالحد فرحان ومبسوط منك شديد يا ملك بسببك بنات قدرو ياخدو حقهم وبقيتي كمان محاميه ومن الشخصيات الملهمه كمان
ملك ( بضحكه) : ما للدرجه دي
خالد( بضحك) : لا للدرجه دي صدقيني .لو مشيت اسي لي ابوك وطلبتا يدك منو ح توافقي ولا ح تديني شاكوش ؟
ملك كانت بتضحك وقلبها كان بدق من جوه واخيرا بعد زمن قلبها قدر يفرح
خالد : السكوت علامه رضا
ملك: ربنا يقدم ال فيهو الخير
فعلا بعد سته شهور خالد اتزوج ملك وملك كانت فرحانه شديد وكل الحواليها فرحانين في كل لحظه ملك كانت بتتخيل امها معاها وبعد سنه من زواجهم ملك ولدت تؤام ولد وبت البت سمتها على اسم امها ( خديجه) والولد( فارس) ملك وخالد الاتنين كانو جميلين وجمالهم الداخلي اتعكس على جمالهم الخارجي وبكدا تكون انتهت قصه ملك ال ممكن تكون قصه كتير من البنات العانو من الظلم اتحرمو من التعليم وعانو من العنف والاغتصاب من قبل اقاربهم وما اتكلمو لانهم خايفين من الناس وكلامهم وومن الفضايح . المرأه هي نصف المجتمع هي زوجه وام واخت .تواجه العنف في ذاتها بكل انواعه .عشان كدا ديينا الاسلامي ادها مكانه مرموقه عشان تقدر تاخد حقوقها .المرأه مخلوق حساس بفطرتها فما بالك انت تجي وتظلمها وتعنفها بأي شكل من الاشكال ح تتذكر كل حاجه سيئه حصلت معاها وربنا ما بوفق عبد في يوم من الايام بكت بسببو انثي .الرجال دائما هم بصنعو عظائم الامور دي حقيقه .لكن النساء هم من يصنعن الرجال ودي حقيقه بننساها دائما مع الاسف .ظلم المرأه بأي شكل يعتبر من اكبر الذنوب عند الله سبحانه وتعالى .قول الرسول صلى الله عليه وسلم ( رفقا بالقوارير ) لو اتأملنا القول النبوي دا ما ح نلقى احسن منو في وصف المرأه وانصافها والرفق بها عشان كدا ...
#رفقا بالقوارير

النهايه❤