#ملك
بقلد سجى اليزيد
-١-
ابوي فكني عليك الله قلتا ليك انا ما عايزا اعرس ي ابوي انا عايزا اتعلم وعايزا اخش الجامعه انت ما نفسك تفرح فيني وتقول بتي بقت دكتوره ابوي عليك الله انا ما عايزا اعرس ما تغصبني على حاجه انا ما عايزاها .
ي بت تعليم شنو ليك انتي تطلعي من هنا عروس وعلى بيتك طوالي وما ح تعرسي غير ابراهيم واي كلمه منك زياده بقتلك انتي فاهمه ولا لا .
ابوي انت وقت عايز تعرس لي تعرسني لي واحد عمرو كم واربعين ما حرام عليك تبيعني بدم بارد كدا انا مش في النهايه بتك .
يا بت ما تكتري كلامك معاي وانا استحملتك كتير ...
#كسره
انا اسمي ملك عمري 18سنه ساكنه في واحده من قري السودان قريت الاساس والثانوي وامتحنت شهاده وكان مفروض اخش الجامعه بس اخواني وابوي اعترضو وقررو يزوجوني لي واحد اسمو ابراهيم ح تتعرفو عليهو لي قدام اكتر ابوي اسمو عبد الوهاب . امي ماتت من انا عمري 7 سنين وعندي اخين اسماعيل ودا اكبر واحد واحمد دا اصغر من اسماعيل بسنتين وانا اصغر وحده والاتنين نفس طبع ابوي وعندي خالتي بتجي تقعد معاي من فتره لي فتره اسمها ابتهال عندها ولد واحد اسمو محمد وصحبتي فاطمه وشخصيات كتيره ح تعرفوها لي قدام
اثنااء ما بنتكلم انا وابوي جو داخلين علينا احمد واسماعيل.
احمد : في شنو يا ابوي مالها البت دي
اسماعيل :اكيد ح تكون فتحت موضوع العرس تاني وانها ما عايزاهو .اسمعي ي بت نحنا رجال البيت دا فاهمه والبنقولو بمشي رضيتي ولا لا وانتي ح تعرسي ابراهيم يعني ح تعرسيهو
ملك : شكلك نسيت وعدك ي اخوي لي امي لمن وعدتها انك تحافظ على وما تخلي حاجه تأذيني تراهو طلع كلام ساي
احمد (مسك ملك من يدها وبكورك):انتي ح تسكتي ولا اسكتك انا بطريقتي
اثناء ما اخوان ملك كلهم متلمين عليها جات داخله خالتها ابتهال وسمعت اصواتهم طالعه بره وجات جاريه عليهم
ابتهال( بتكورك) :فكو البت دي ما حرام عليكم يااخ كرهتوها في عيشتها وانت يا عبد الوهاب انت ما أب ليه تعمل في بتك كدا خافو الله في البت دي ياخ حرام عليكم ياخ
عبد الوهاب :اسمعي ي ابتهال اووعك تتدخلي في حاجات بتخص اولادي دي بتي وانا حر فيها وقلتا ح تتزوج يعني ح تتزوج ابراهيم واحسن ليك ما تتدخلي،في الموضوع دا
ابتهال:لا ح ادخل وعزه جلاله الله اذا ما بتسيبو البت دي في حالها وغصبتوها تعرس الاسمو ابراهيم دا انا ح اشتكيكم وبت اختي ما بخليها ليكم قاعده في البيت دا تاني تمشي معاي انا
احمد :فرضا مشيتي اشتكيتي ح يحصل شنو مافي حاجه بتمنعنا انو ننفذ الدايرنو
ابتهال :خسااااره تعب امك فيكم يا احمد واسماعيل دي اختكم اكتر ناس مفروض تكونو خايفين عليها انتو تجو ترموها للنار بيدكم وانت يا عبد الوهاب انت عايز تبيع بتك لي راجل عمرو كم واربعين سنه عشان قروش اتقي الله ياخ
عبد الوهاب :اسمعي ي مره هوووي كفايه نقاش لغايه هنا والبت ح تعرس يعني ح تعرس دي بتي وانا حر فيها
ملك (وجاات مسكت رجلين ابوها وبتبكي شديد): ابوي عليك الله خليني اقرا ابوي انا عايزا اتعلم عايزا اشتغل وارفع راسك ي ابوي عايزا احقق حلم امي ال ما اتحقق عايزاها تفرح فيني ابوي ما تبيعني كدا يا ابوي انت زهجت مني صح ؟والله تاني ح اعمل اي حاجه انت عايزاها وما بعارضك وح اشتغل في المزرعه وح اشتغل اي حاجه واجيب ليك قروش .مش انت عايزا قروش انا بشتغل يا ابوي وبجيبها ليك بس ما تبيعني وتحرق قلبي عليك الله طيب يعني انت الاكل البعملو ليك ما عاجبك؟والله تاني بعمل ليك حاجات حلوه وما بخليكم تزعلو مني تاني
عبد الوهاب (لزا ملك في الارض وبقى بكورك ) :انا ما داير كلام كتيير معاك ي بت اذا بتكتري كلامك او بتعارضيني في الموضوع دا انا بضبحك ي ملك وللمره الاخيره ح تعرسي ابراهيم فاهمه.
ابتهال (وهي بتكورك ):اطلعو برا يااخ الله لا كسبكم اطلعو برا
عبد والوهاب واخوان ملك طلعو ملك قالت لي ابتهال وهي بتبكي:يا خالتي عليك الله ما تخليهم يعرسو لي انا ما عايزا ابراهيم يا خالتي انا بخاف منو ما عايزاهو عليك الله ما تخليهم يعرسو لي انا لسه عايزا اقرا كل البنات البعرفهم دخلو الجامعات وانا ليه اقعد كدا يا خالتي ليه ؟
ابتهال :ما تشيلي هم يا بتي ما ح يحصل الا الخير وانا معاك ما بخليك برااك انتي بتي يا ملك ما بخليك وامك وصتني عليك
ملك (ولسه بتبكي ):ليه ابوي بكرهني كدا يا خالتي انا مش زي احمد واسماعيل مش بتو ليه عايز يتخلص مني
ابتهال وملك بتكلمو جا داخل عليهم اسماعيل وقال لي ملك : (اجهزي بعدين ابراهيم دا جاي هو وامو هنا اي حركه منك ح اقتلك في ساعتك فاهمه ولا لا
ابتهال : اذا بتقرب منها والله انا البقتلك يا اسماعيل
ملك (وبقت تكورك وتبكي):وااااي ي خالتي انا اسي اعمل شنو ما عايزا اعرس ما عايزا اعرس انا
اثناء ما ملك كانت بتكورك وتبكي جا داخل عليهم محمد ولد خالتو ابتهال وهو مخلوع وقال ليهم : (في شنو مالك ي ملك امي في شنو ؟)
ملك اول ما شافتو بقت تكورك زياده وبتبكي بصوره هستيريه
ابتهال :محمد اطلع برا مافي شي انت ما مف

روض تدخل هنا اطلع برا
محمد (وبقى بتمتم في الكلام) :انا اسف ح اطلع برا بس خفت تكون حاصله حاجه لمن سمعتها بتكورك.
مع كل كلمه بقولها محمد ملك كانت بتكورك وتبكي زياده
ابتهال (بنهره):اطلع برا يا محمد
وجرت قفلت الباب وجات حضنت ملك عليها وبقت تبكي معاها
ابتهال :انا معاك حبيبتي ما تخافي ربنا معاك يا بتي وبقت تقول في سرها (انا اسفه ي ملك اسفه)وبقت حاضناها لغايه ما ملك نامت ومشت على عبد الوهاب
ابتهال :انا قررتا اسوق معاي ملك البيت عايزاها تقعد معاي هناك ما بخليها ليكم هنا
عبد الوهاب :انتي ناسيه حصل شنو ؟ لمن ملك كانت صغيره
اسماعيل واحمد :في شنو يا ابوي حصل شنو ؟
عبد الوهاب ما رد عليهم وقال لي ابتهال :عشان كدا انا عايز اتخلص من ملك عايز ارتاح من همها
ابتهال :ما بالطريقه دي حرام عليك يا شيخ انت عايز تبيعها عشان القروش ما عشان الموضوع داك
عبد الوهاب : عشان الاتنين عايز اتخلص منها عشان الاتنين وما تقولي لي بتك لانو لو كان واحد غيري كان من زمان قتلها وارتاح منها ومن همها
اسماعيل :ابوي انت بتقول في شنو ليه ملك عملت شنو وليه تقتلها من زمان فهمني عملت شنو
عبد الوهاب ولسه ما عايز يرد على اي اسئله من اسئله اولادو
ابتهال :انت عارف كويس انو دا ما غلطها ح يجي يوم وتندم على القرار الاتخذتو في حق بتك دا
عبد الوهاب :الحاجه الوحيده المحسساني بالندم اليوم السمعتا فيهو كلام اختك لمن رضت انها تولد ملك وتجيبها الدنيا دي لانو ما جابت لي حاجه غير العار
ابتهال (وهي بتبكي ):حسبي الله ونعم الوكيل فيك يا عبد الوهاب على البتعملو في بتك دا
عبد الوهاب :اسمعي هنا البت من هنا ما ح تطلع معاك ولا شبر ما ح تتطلع من هنا الا مع راجلها واذا عاوزه تقعدي معانا لغايه ما ابراهيم وامو يجو بعدين تقعدي لكن خشمك ما تفتحيهو بكلمه ولو حصل وفتحتيهو انتي عارفه انا ممكن اعمل شنو
محمد كان ساكت وما قال اي كلمه بس كان متوتر شديد وقال لي امو :امي ارح نرجع البيت
ابتهال :انا راجعه البيت ح امشي اجيب غيارات لي عشان اجي ابيت مع ملك وطلعو
ابتهال :انت بتين جيت ؟ليه ما كلمتني؟والبجيبك هنا شنو اساسا ؟داخل على انا وملك مالك؟
محمد :امي انا سمعتها بتكورك وقلتا ... ابتهال قاطعتو وقالت ليهو :ما عندك بيها شغله انت عارفها كويس انو هي ما بطيقك وشفت بقت تكورك وتبكي كيف لمن شافتك .لمن كانت بتكورك وتبكي وهي صغيره ليه ما قلتا ليها مالك ؟؟
محمد:ارجوك ما تذكريني يا امي وانا اسسف تاني ملك ما ح تشوف وشي وكلها شهر وح ارجع الخرطوم
ابتهال :يا ريت ترجع اي
محمد :شنو يا امي انتي ما اشتقتي لي ؟
ابتهال :وصلني البيت سرعه عشان اجي الحق ملك ما عايزا اخليها براها
اثنااء ما كانو قبيل عبد الوهاب وابتهال بتكلمو ملك سمعت كلامهم وبقت تقول :انا ما عافيه ليك !ما ح اسامحك طول حياتي !بسببك ابوي ح يبيعني وبقت تعاين في صوره امها وبتقول ليه خليتيني اعيش يمه كان تسوقيني معاك وارتاح من العيشه دي شفتي ابوي يمه عايز يبيعني شفتي اخواني يمه بعملو فيني شنو يا ريت لو سقتيني معاك يمه يا ريت وبقت تحضن في الصوره وتبكي شديد ......

يتبع.......

#ملك
بقلم سجى اليزيد
-٢-
ملك وهي قاعده وبتبكي جات داخله عليها صحبتها فاطمه قالت ليها :انتي يا بت غاطسه وين ؟وتعالي هنا وشك دا ليه عامل كدا ؟
ملك:مافي حاجه ي فاطمه بس اتذكرتا امي
فاطمه :ديل اخوانك تاني ضربوك صح ؟
ملك :لا ما عملو لي شي انا بس براي (بصوت متقطع )فاطمه انا اشتقت لي امي ليه مشت وخلتني ي فاطمه؟
فاطمه :بسم الله مالك ي بت كدي عايني لي هنا وما تبكي عليك الله وجعتي لي قلبي في شنو ؟
ملك (قشت دموعها وابتسمت ليها ابتسامه خفيفه):انا عرسي قرب يا فاطمه
فاطمه (بخلعه):بسم الله عرس شنو ي بت ؟بتين الكلام دا وليه ما بتكلميني ؟
ملك:العرس بس اتحدد فجأه والليله هم جايين
فاطمه :كمان الليله جايين قلتي لي ؟!دا منو ي ملك ؟
ملك :ابراهيم
فاطمه (ب ضحكه ):والله ي ملك انتي ما طبيعيه ابراهيم شنو عليك الله راجل عمرو كم واربعين ومعرس ليهو تلاته نسوان وفوق دا عندو ولد في الجامعه انت بتهظري معاي صح ؟
ملك : لا
فاطمه (مخلوعه): انا ما قادره اصدق انتي كيف توافقي على حاجه زي دي ؟ملك انتي ما واعيه ولا شنو ؟اخوانك وابوك جبروك صح ؟
ملك : لا يا فاطمه انا ما مجبوره وانا خلاص ح اعرس ابراهيم
فاطمه (بصوت عالي ): يا بتي انتي لي بتين ح تقعدي تتستري كدا على اخوانك وابوك لبتين وريني ؟لمن كانو بضربوك وتجي وشك وجسمك كلو مورم كنت بتكذبي على وبتقولي لي وقعتا .لمن كنتي تمشي المزرعه بتاعتكم وبقول ليك انتي ليه تشتغلي وتسيبي قرايتك اخوانك وين ما يشتغلو هم كنتي بتكذبي على وبتقولي لي يا اما عيانين او مشغولين بحاجات تانيه مع انو انا عارفه اخوانك ما بعملو ولا شي بس ما عارفه انتي ليه بتسكتي عنهم ليه ؟ما تعبتي وانتي بتتحملي في العذاب دا اتكلمي ؟
ملك (وهي بتبكي ):يااخ قلتا ليك انا عايزا اعرس ابراهيم وخلاص مافي زول جبرني ما تزيديها على يا فاطمه عليك الله
فاطمه :كويس ي ملك خليك ساكته كدا اذا انتي ساكته انا ما بسكت وح امشي اشتكي على اخوانك وابوك واوريهم بعملو فيك شنو وعايزين يغصبوك تعرسي كمان
ملك (بي ضحكه):تشتكي ؟!تشتكيهم لي منو ؟وح تقولي ليهم شنو ؟ح تقولي ليهم عايزين يعرسو ليها بالغصب ؟فاطمه عليك الله خليك منطقيه ال حيسمع ليك منو ؟والناس بعدين ح يقولو على شنو ؟صدقيني ي اختي لو الشكوه كانت بتنفع كانت نفعتني زمان لمن .....
فاطمه :لمن ؟لمن شنو يا ملك ؟في شنو ؟
ملك :مافي شي انسى
فاطمه :ملك اتكلمي في شنو اصلا انتي من زمان ما طبيعيه ودايمآ بحس في حاجه انتي داساها مني
ملك :قلتا ليك مافي شي يا فاطمه ياخ ما تزيديها على
فاطمه :طيب يا ملك انا بعدين بعرف بطريقتي
ملك وفاطمه سكتو مسافه مافي اي وحده اتكلمت مع التانيه بعد مسافه
فاطمه :انا شالوني جامعه النيلين آداب
ملك (بابتسامه ):مبروك حبيبتي الله يوفقك ي رب
فاطمه:الله يبارك فيك ي رب . كنت بتمني انك تقدمي معاي ي ملك مع انو عارفه انو رغبتك قانون بس برضو كنا ح نكون قريبين لي بعض
ملك (عيونها دمعو):الله ما اراد لي يا فاطمه مع انو كان حلم حياتي من انا وصغيره بس كلو لخير والحمد لله على ما اراد الله
فاطمه (عيونها مدمعين ):اصلا انتي ذاتك وحده عويره ومسكينه ساي ولتخه كمان القانون دا ما حقك اقري ليك حاجه رقيقه كدا زيك وبقو الاتنين بضحكو وبسرعه الضحكه اتقلبت لي بكا وحضنو بعض وبقو ببكو شديد جات عليهم ابتهال وشافتهم وهم ببكو وقلبها اتقطع على ملك وجات داخله عليهم عشان تلطف الجو
ابتهال : فطوومه كيفك ي بتي انتي كويسه ؟
فاطمه (قشت دموعها):حمد لله يا خاله جيت اشوف ملك لي زمن ما شفتها
ابتهال :كويس انك جيتي ي بتي االفتره دي خليك معاها طيب
فاطمه :ان شااء الله يا خالتو . عن اذنكم ما عايزا اتأخر على البيت لازم امشي
ملك:ليه اقعدي شويه عليك الله
فاطمه:ما بقدر والله ي ملك انا ي الله قدرتا ازوغ من ابوي وعبد الله عشان اجيك ولو عبد الله لقاني مافي في البيت انتي عارفه ح يعمل لي شنو
ملك:خلاص حبيبتي امشي يلا
(جات فاطمه حضنت ملك وودعتها)
ملك:جيتي بتين ي خالتي
ابتهال : قبل شويه حبيبتي .اكلتي ي ملك؟
ملك:اي اكلتا حمد لله
ابتهال : عايني انا اسي ح امشي اجيب لي اكل عشان ناكل انا وانتي تمام
ملك(باستسلام):طيب
بعد ما مرقت ابتهال جا داخل احمد على ملك
احمد (بنهره):انتي قاعده لحدي الان بتعملي في شنو ؟مش كلمناك انك تجهزي عشان الراجل دا جاي الليله هو و امو ؟اتحركي امشي نضفي المكان دا برا يلا قومي
ملك:طيب
احمد :بالله صحبتك دي تاني ما اشوفها معاك انتي بعد دا ح تبقى مره لو شفتك تاني معاها ما بخليك
(احمد وبتكلم مع ملك جات داخله ابتهال لمن شافت احمد جات نهرتو ):انت الجابك هنا شنو ؟مش كلمتك ما تجي هنا تاني اطلع برا
احمد :طالع اي
ملك بقت تبكي شديد حضنت خالتها
ابتهال:ما تبكي ي بتي عليك الله وجعتي لي قلبي تعالي اكلي ليك لقمتين ما شايفه نفسك ضعفتي ووشك دا بقا صغير كيف
ملك:ما جعانه ي خالتي عايزا انضف البيت بعد اخلص بجي باكل
ابتهال :طيب ارح انا بمشي معاك

#ملك
بقلم سجى اليزيد
-٣-
جا المسا وعمات واعمام ملك جو .ملك كانت سرحانه جاتها عمتها اسمها بثينه .
بثينه:انتي ي بت وشك دا مالو عامل كدا اول مره اشوف لي عروس ما فرحانه بعرسها
ابتهال:سيبي البت في حالها ي بثينه
بثينه:اصلا انتي السبب في البحصل اسي من زمان وانتي بتحشي في راس البت انها ما تعرس وانها تتعلم وما بعرف شنو وكمان بقيتي تخليها تعاند ابوها واخوانها عايزا تصلي لي شنو يعني في النهايه انتي عايزا تعرسيها لي ولدك يعني
ابتهال(بغضب) :بثينه
بثينه :قومي ي بت قومي شوفي ليك حاجه البسيها بدل قاعده زي المره المات راجلها ولمي شعرك دا عايني ليهو منكش كيف قومي قلتا ليك
(جات بثينه ومسكت ملك من شعرها بقوه )
بثينه:اسي الراجل وامو يقولو عليك شنو ؟اتحركي شوفي ليك حاجه البسيها
ابتهال :انتي بتعملي في شنو فكي البت اطلعي برا انا بجهزها
بثينه (فكت ملك):تجهزي ليها شنو عليك الله هي زاتها شبه عرس ابراهيم دا زاتو كتير عليها
ملك ( بصوت مخنوق) :ومنو القال ليك انا عايزا اعرس ابراهيم ولا غيرو
بثينه (بصوت عالي ):شوف البت كمان لسانها بقى طويل هووووي ي بت هوووي اوعك تقلي ادبك على فاهمه ولا لا اووعك تاني انا اقول ليك كلام تردي على انا لمن اتكلم تنزلي عينك دي في الارض وصوتك دا ما يطلع زي ما طلعتا عين امك زمان ما بغلبني اقتلك انتي
ملك (وبقت بتكورك) :ما تتكلمي عن امي كدا ما تتكلمي عنها
بثينه وجات مسكت ملك من شعرها :ًًاووع ي بت تعلي صوتك على اووعك انتي بت قله ادب مفروض تشكري ربك يا عديمه التربيه انو لقينا ليك زول يلمك بعد الحصل ليك داك حابه اذكرك لو ما نحنا وقفنا في طريق ابوك كان قتلك
ملك(بتبكي وتكورك):يا ريت لو كنتو قتلتوني كان ارتحتا
ابتهال(بصوت عالي):فكي البت يا بثينه انتي بتعملي في شنو
بثينه : احمدي ربك الراجل الليله جاي لو ما كدا كنت شوهتك
ملك مشت قعدت في ركن الغرفه وضمت نفسها عليها وبتبكي جا عبد الوهاب داخل
عبد الوهاب:في شنو مالكن بتكوركو ي نسوان والبت مالها لحدي الان ما جهزت
ابتهال:اطلعو انا بجهزها اسي
ابتهال (جات على ملك وحضنتها) :يلا حبيبتي يلا عشان ما تسمعي منهم كلام كتيير
ملك:ممكن ارتاح لمن اعرس ابراهيم ي خالتي صح ؟ح يعاملني كويس ؟
ابتهال(عيونها دمعو):ان شااء الله ي بتي يلا قومي
ملك جهزت نفسها واكتفت انها لبست عبايه وبس واتحجبت وما عملت اي حاجه تانيه ابراهيم وصل هو وامو وقعد مع عبد الوهاب واخوان ملك واعمامها وعماتها
بثينه:البت دي وين يا ابتهال خليها تمشي تعمل قهوه للراجل وامو
ابتهال(جات عليها) :ما تنقي كتيير بعملها انا وبخليها تجيبها ليهم
بثينه:سمح
عند عبد الوهاب وابراهيم ....
عبد الوهاب:كيفك ي ولدي ؟
ابراهيم:الحمد لله والله ي عمي كيف صحتك ان شااء الله كويس ؟
عبد الوهاب:حمد لله على كل حال .ما عرفتني على الوالده
ابراهيم :دي امي اسمها نعمه
عبد الوهاب:اتشرفنا يا حجه
نعمه(بأخر نفس):الشرف لي
عبد الوهاب :كيف الشغل ي ولدي؟
ابراهيم :تمام والله ي عمي عندي اسبوعين اجازه وبعديها ح ارجع الخرطوم بس جيت عشان اتم الموضوع دا وبعديها ح اسوق ملك وارجع طواالي
عبد الوهاب :ان شااء الله ي ولدي
ابتهال: السلام عليكم
ابراهيم ونعمه:وعليكم السلام
عبد الوهاب :دي خاله ملك .وين ملك يا ابتهال
ابتهال : جايه
جات ملك داخله عليهم وعيونها في الارض
عبد الوهاب : دي ملك بتي حبيبتي
(ملك عاينت لابوها نظره كلها انكسار وابتسمت ليهو وقالت في سرها بتك العايز تقتلها )
بثينه:امشي حبيبتي جيبي القهوه يلا.. ام ابراهيم ما عجبها الوضع وهي من النوع الشايف نفسو دااك ومره عنصريه شديد قربت من ابراهيم براحه وقالت ليهو :دي اسي البت العاجباك؟
ابراهيم:عليك الله كيف يا امي شفتيها سمحه كيف
نعمه :انت ما شايفها ضعيفه كيف؟
ابراهيم:انا عايزها كدا العايز يعرسها منو مش انا
نعمه:دا اسي لبس ليها لابسه
ليها عبايه سودا وجايه تقابلنا بيها
ابراهيم:امي انتي عارفه وضع الناس ديل كويس والبت دي مسكينه ساي وامها ميته يعني ما زي باقي نسواني الاخترتيهم لي انتي
نعمه:خلينا نرجع البيت وانا عندي معاك كلام تاني
ملك جات شايله القهوه وبدت تقدم فيها لمن وصلت ابراهيم اخر حاجه بقا بعاين ليها وهي ما رفعت راسها عشان تعاين ليهو جا مدا يدو شال الكبايه قام ختا يدو في يد ملك براحه ملك اتخلعت والصينيه وقعت من يدها .....
اسماعيل :يا بت يا بت دا شنو انتبهي يااخ
ابراهيم(بقى بتمتم):حصل خير
ابتهال (مسكت ملك):امشي اقعدي انا بلم المكان
ملك جسمها كان كلو برجف وبقت تتذكر في يوم من ابشع الايام المرت عليها في حياتها وطوالي جرت الغرفه الكانت قاعده فيها وام ابراهيم ما كان عاجبها الوضع نهائي
عبد الوهاب (بتمتم) :انا بمشي اشوفها مالها بتكون خجلت لمن وقعت الصينيه
ابتهال:انا بمشي ليها
عبد الوهاب :لا خليك انا عايز اتكلم مع بتي شويه
نعمه(بتأفف) :الله يحلنا
ملك مشت قعدت في ركن الغرفه وبقت خاتا يدها في راسها وبترجف جا

داخل عليها عبد الوهاب غضبان منها شديد مسكها من يدها بقوه
عبد الوهاب(بغضب) :يا بت انا بقتلك مالك عايزا تجننيني
ملك(بتبكي) :ما عايزا اعرس يا ابوي ما عايزا ابراهيم انا بخاف منو عليك الله يا ابوي ما تعرسني ليهو
عبد الوهاب ادا ملك كف لمن وقعت في الارض ومسكها من يدها قاال ليها :والله يا بت الليله ما تسكتي انا بقتلك بيدي وبرتاح منك اخرصي خالص وغصبا عنك ح تعرسي ابراهيم قشي دموعك دي واطلعي قدامي يلا
ملك قشت دموعها وطلعت مع ابوها برا
بثينه:مالك ي عروستنا خجلانه ولا شنو
ابتهال ( قربت من ملك وهمست ليها) :ابوك ضربك صح ؟
ملك:لالا
عبد الوهاب : اها يا ولدي نخش في الموضوع طوالي
ابراهيم : اي كدا احسن ي عمي انا بقترح نعمل الخطوبه اسي وبعد اسبوع العرس طوالي
نعمه:بعد اسبوع كيفن يعني!!
ابراهيم:مافي داعي نطول االشغله ي امي بعدين انا متزوج لكن اذا ملك عايزا حفله وزفاف ما عندي مانع عشان هي البت الوحيده وكدا
بثينه:اي نحنا بتنا عايزين نزفها ما بنرضي ليها اي حاجه وخلاص بعدين الناس يقولو علينا شنو
عبد الوهاب (همس لي بثينه) :اسكتي البت ما اتكلمت انتي فاتحه خشمك لي شنو
بثينه سكتت عبد الوهاب اتلفت لي ابراهيم قال ليهو : البتشوفو مناسب ي ولدي
ابراهيم:خلاص تمام اي حاجه على انا واسي نعمل الخطوبه وبكره بجي اسوق معاي ملك عشان نختار الصاله
ملك (بتمتم):لالا انا ما عايزا اطلع
عبد الوهاب حدر لي ملك نظام اسكتي نعمه:ليه مالك ي عروس ؟ان شااء الله خير
بثينه:لالا هي بس خجلانه طول عمرها كدا انا بكره بمشي معاك ي ملك
ابراهيم:خلاص كدا اتفقنا
عبد الوهاب :تعالي ي ملك اقيفي جمب ابراهيم عشان يلبسك الخاتم
ملك مشت وقفت جمب ابراهيم وهي كلها بترجف
(ابراهيم دا زول كدا طويل وعاتي عمرو في بدايه الاربعينات عندو محلات دهب يعني زول مروق معرس تلاته نسوان )
نعمه كانت بتعاين لي ملك بإشمئزاز قالت ليها :مالك ي بتي ضعيفه كدا ما بتاكلي كويس ولا شنو
ملك:باكل ي خالتي
بثينه:البت دي اصلا كدا من زمان قدر ما نقول ليها اكلى زي الناس ما بتاكل وقصيرونه عكس امها سبحان الله
ابتهال (مسكت ملك وابتسمت ليها) :انا بتي كدا حلوه شديد
ابراهيم :يلا ي جماعه نسيتو الخطوبه ولا شنو
ابراهيم مسك ملك من يدها قال ليها :ليه يدك بارده كدا ؟
ولبسها الخاتم وبسرعه زحت يدها منو وهو مدا يدو ولبستو الخاتم بعد شويه باركو ليهم كلهم
ابراهيم:يلا يا امي بعد دا نمشي يا عمي بكره بتكلم معاك في باقي،التفاصيل
عبد الوهاب :ان شااء الله
هم وطالعين بعد اتاكد ابراهيم انهم كلهم برا جا قرب من ملك وقال ليها بأبتسامه ونظرات خبيثه شديد :بكره نتلاقى بجي اسوقك اجهزي بدري تمام
ملك خافت منو وبدون ما تقول ليهو اي حاجه جرت جوه طوالي
بعد طلعو جات ابتهال على ملك لقتها متكرفسه في السرير جابت ليها اكل
ابتهال :انتي من الصباح ما اكلتي حاجه ي بتي تعالي اكلي ليك لقمتين
فجأه ملك حست بنفسها ما طبيعيه......

يتبع.......

#ملك
-٤-
بقلم سجى اليزيد

ملك حست نفسها ما طبيعيه جات ابتهال سألتها: مالك حبيبتي؟
ملك:بطني مآلماني ي خالتي
ملك طوالي جرت على الحمام وابتهال جات لحقتها
ابتهال(بخلعه):بسم الله ي بت مالك؟
ملك:ما عارفه والله ي خالتي تعبانه شديد
ابتهال :عشان من الصباح ما اكلتي
ملك:لالا ما من الاكل
ملك طلعت حبوب وبقت تبلع فيها ابتهال اول ما شافتها عرفت هي ليه حصل ليها كدا
ابتهال:ليه ما كنتي بتبلعي الحبوب ؟
ملك:بتألمني شديد يا خالتي ما بقدر عليها كل يوم
ابتهال:استحملي ي بتي لازم تبلعيها عشان ما تحصل ليك مشكله
ملك:ان شاء الله
ابتهال:يلا تعالي اكلي
ملك:طيب
ابتهال:اها بكره ح تمشي مع الاسمو ابراهيم دا ؟
ملك:لو قلتا لا ابوي واخواني واعمامي ما ح يرحموني اخير لي اسكت وامشي
ابتهال:انا بمشي معاك ما بخليك براك ما الاسمو ابراهيم وعمتك بثينه دي
ملك:اي يا خالتي امشي معاي عليك الله ما عايزا اكون براي معاهم
ابتهال(حضنت ملك):طيب حبيبتي
في بيت ابراهيم دار نقاش بين ابراهيم وامو
نعمه:انت مجنون ولا شنو؟كييف يعني تعمل الخطوبه الليله ؟انت قايلاني انا سكتا البت ولا اهلها عاجبيني يعني ؟
ابراهيم:ماالها البت يعني ي امي؟
نعمه:انت ما شايفها ضعيفه كيف وبعدين البت دي فيها حاجه ما طبيعيه
ابراهيم:البت دي في النهايه بعرسها انا بعدين
نعمه:انت ولد غبيان اسي،ما كان اخير ليك بت اختي عيبها لي مالا جمال ومال وكلو عليها
ابراهيم:من ناحيه جمال ما تتكلمي عن ملك في الحته دي عليك الله ي امي سيبي البت في حالها ما ممكن من ما جينا انتي تتكلمي،فيها
نعمه(بصوت عالي):اسكت كدا بالله ما كفايه مشيت خطبت ليك وحده فقيره وما من مستوانا اسي الناس تقول علينا شنو
ابراهيم (بنرفزه):يااا امي عليك الله اقفلي الموضوع دا يااخ ..اها ح تمشي معانا بكره ؟
نعمه:لا طبعا امشي غور معاها برااك واسمع هنا البت دي اووعك تجيبها تسكن معاي هنا ما عايزاها
ابراهيم:دا شنو يا امي مش اتفقنا تجي تقعد معاك هنا
نعمه:دا قبل ما اشوفها واشوف اهلها بعد الشفتو دا الليله ما عايزها معاي نهائي
ابراهيم:زي ما دايرا ي امي
جا الصباح وملك صحت ع صوت عمتها بثينه بتكورك وتصحى فيها وهي لسه شاعره نفسها ما طبيعيه
بثينه:يا زفته انتي قومي الله لا جاب باقيك انتي لسه نايمه تنومي ما تقومي شاحده ربي قومي ياخ الراجل ح يجي وانتي لسه نايمه
ملك(بقت تتلفت في المكان):وين خالتي
بثينه (بتحاكي في ملك):ويين خالتي ..دا بس الفالحه ليهو خالتك طلعت قوومي اجهزي ياخ
ملك:طيب
بعد ساعتين ابراهيم وصل عندهم
بثينه (بتكورك):يا بت تعالي جيبي حاجه لخطيبك دا
عبد الوهاب: اتفضل ي ولدي مالك واقف
ابراهيم:مستعجل ي عمي احسن نمشي بدري ونرجع بدري
عبد الوهاب:بثينه تعالي عندي كم حاجه عايزا اوصيك ليها
عبد الوهاب وبثينه طلعو برا وخلو ابراهيم براهو تاني جات ملك شايله صينيه فيها مويه ابراهيم اول ما شافها بقا متنح فيها وهي اتوترت شديد
ابراهيم(بنظره خبيثه):صباح الخير ي عسل
ملك ادتو المويه وطوالي جرت جوه الغرفه
ابراهيم (بصوت عالي):يعني ولا حتي ماافي كيفك ساي؟
عند عبد الوهاب وبثينه .....
عبد الوهاب:اسمعي هنا اووعك تتشابي في حلق الراجل في اي كلمه بقولها
بثينه:والله بتك هي البتخليني افتح خشمي دا بتك دي اصلو ما بتتعدل
عبد الوهاب:هي استسلمت خلاص للامر الواقع ما عندها حل غير تعرس ابراهيم
بثينه (بصوت واطي):انت يا عبد الوهاب كيف تعرس ملك لي ابراهيم وانت عارف انو ملك....
عبد الوهاب:ابراهيم عارف
بثينه(بصوت عالي ):سجمي عارف كيف يعني؟من بتين الكلام دا؟الكلمو منو ؟
عبد الوهاب:يا مره وطي صوتك انتي جنيتي ولا شنو .ابراهيم عارف وانا الكلمتو وهو موافق على ملك بعد الشي القلتو ليهو عنها
بثينه:لالا في حاجه غلط كيف ابراهيم يوافق وهو عارف اي حاجه عن ملك مافي راجل برضى كدا الراجل دا اكيد بعدين ح يعمل لينا مصيبه كبيره كمان اكيد عندو مصلحه
عبد الوهاب:ما تنسى نحنا كمان عندنا مصلحه معاهو الزول دا مرطب والقروش البديني ليها في العرس انا ح استفيد منها وممكن بعدين نطلب منو نمشي الخرطوم معاهو بحجه عايزين نبقى جمب ملك وبخليهو يشغل اسماعيل واحمد معاهو
بثينه (بضحكه):اصلك ما بتتغير يا عبد الوهاب
عبد الوهاب:دي فرصه وجات لغايه عندي وانا ما صدقتا لقيت زول قبلان بي ملك
بثينه:اي والله كدا اتخلصنا منها ومن همها
اثناء ما عبد الوهاب وبثينه بتكلمو جات داخله عليهم ابتهال
بثينه:انتي كنتي وين ؟
ابتهال ما ردت عليها وطوالي خشت جوه حتي السلام ما ادتو لي ابراهيم لمن دخلت جوه دخلت الغرفه وكانت بتبكي شديد جاتها ملك قعدت ليها تحت في الارض وبتعاين ليها
ملك:مالك يا خالتي؟ما تبكي مالك في شنو ؟
ابتهال قلبها اتقطع على ملك لانها سمعت اي حاجه قالها عبد الوهاب وبثينه قبيل نزلت مع ملك في الارض وحضنتها وبقت تبكي شديد
ملك (عيونها دمعو):يا خالتي مالك عليك الله ما تبكي في شنو !!
ابتهال لسه بتبكي وشايله هم ملك والح يحصل

ليها لمن تعرس ابراهيم قالت في سرها هي اصلا ما راحمنها في البيت وحتي لو عرست ابراهيم ما ح يرحموها اااخ يا ربي انا اعمل شنو؟
بثينه جات داخله عليهم في الغرفه
بثينه:يا بت الراجل دا تحت مستنينا امرقي اتخارجي يااخ
ملك:طيب ..خالتي ما ماشه معانا ؟
بثينه:خالتك لا ما تمشي معانا خليها هنا عشان تجهز باقي حاجات العرس قالو ليكن فاضل اسبوع بس ما بتسمعو انتو
ابتهال:ما بقدر والله حبيبتي كنت بمشي معاك اصلا ما بقدر اخليك براك لكن لسه زي ما قالت عمتك ورانا شغل كتير .بثينه خليك مع االبت عليك الله ما تخليها براها
بثينه جات جرت ملك من يدها وطلعتها برا
ملك كانت شايله هم خالتها انو ليه هي بتبكي كدا !
بثينه: انا اقول ليك اطلعي وانتي بترغى معاها
ملك:خالتي كانت بتبكي ما عارفاها مالها
بثينه(بتحاكي في ملك):خالتي كانت بتبكي ....عليك الله يا بت خليك في حالك اسي ما شايفا امبارح ام ابراهيم بتعاين ليك كيف وطوالي علقت عليك انك ضعيفه اسمعي هنا من الليله ولغايه يوم العرس تنزلي اكل بس في عصيده دخن وحاجات تسمنك بجييها ليك انا سامعه
ملك: طيب
بثينه:ما تفتكري انو بعملها ليك عشانك يا حلوه بس عشان الناس ما تنضم كتير ونسمع كلام فارغ
ملك ما قالت حاجه لعمتها وكانت مكتفيه بالسكوت طلعو برا لقو ابراهيم مستنيهم وطلعو معاهو ابراهيم فتح لي ملك الباب القدام وبقى بعاين ليها يعني تعالي اركبي قدام بثينه دفرت ملك
بثينه(بصوت واطي):امشي اركبي قدام
ملك استسلمت ومشت ركبت معاهو قدام
بثينه:ما شااء الله دي عربيتك ؟
ابراهيم:الله ما ضراك ي عمتي
اتلفت على ملك :اي دي عربيتي
طول الطريق ابراهيم وبثينه يتكلمو وملك ساكته وسرحانه
ابراهيم :حصل مشيتي الخرطوم ي ملك ؟ملك؟! يا بت ؟!
بثينه ضربت ملك في كتفها ملك اتخلعت وبثينه تحدر ليها
بثينه:انتي ما سامعه الراجل بتكلم معاك ولا شنو ؟
ابراهيم :خليها ي عمتي بتكون شايله هم العرس وتعبانه من السهر بتاع امبارح
بثينه :تعبانه شنو؟هي دي قاعده تسوى حاجه في البيت؟ اليوم كلو وحاتك ترغى مع صحبتها
ابراهيم:لمن نمشي بيتنا ح تتعلم انا عارف ...اها ي ملك حصل مشيتي الخرطوم قبل كدا ؟
ملك:لا
ابراهيم(بضحكه) :طيب
ملك وابراهيم وبثينه وصلو الصاله بثينه كانت مخلوعه شديد من المناظر ال جوه الصاله والصاله ذاتها
ابراهيم (قرب من ملك): اها الصاله كيف ؟
ملك (زحت منو) : حلوه
ابراهيم (بضحكه خبيثه) :انتي شكلك ح تتعبيني معاك كتير
ملك جسمها كلو بقا برجف خافت من كلام ابراهيم شديد ابراهيم عرفها خافت وهو دائما بحب استغل خوف الناس منو عشان كدا استغل خوف ملك وضعفها لصالحو وبقا ما بفوت ولا لحظه عشان يخوف ملك
ابراهيم: اها ي عمتي الصاله كيف؟
بثينه:عاااد ما شااء الله ي ولدي حاجه جميله والله
بثينه جات قربت من ملك وقالت ليها :بختك ي بت اللذينا لقيتي ليك راجل ذي دا انتي مفروض تشكرينا بعد دا .
ملك ما ردت عليها .
بثينه:خليك ساكته كدا طول عمرك ان شااء الله عمرك ما اتكلمتي دي شنو البت الكريها دي بس عليك
ملك:عايزا ارجع البيت
ابراهيم:ويين ياااخ الليله لفتنا طويله مافي رجوع اسي ختي الكلام دا في راسك
بثينه:عليك الله ما تشتغل بيها دي اصلا كدا اررح ي ولدي ورينا كروت العرس
ابراهيم :امشي للراجل داك يا عمتي خليهم يوريك ليهم
بثينه مشت جات ملك عايزا تمشي بوراها ابراهيم مسكها من يدها
ملك(بخوف) :فكني انت بتعمل في شنو ؟فكى لي يدي
وبقت تحاول تفك يدها من ابراهيم
ملك ( بتبكي) : عليك الله فكني يدي وجعتني عليك الله
ابراهيم (بضحكه) :بالمناسبه انتي قوتك ما زي قوه الراجل عشان تحاولي تفكى يدك
ملك (بتبكي) :الله يرضى عليك فكني
ابراهيم (ولسه بضحك) : طيب فكيناك .مالك بترجفي كدا
ملك جسمها هبط وطوالي قعدت في الكرسي الجنبها ختت يدها في راسها
بثينه شافت ملك لمن ابراهيم مسكها من يدها وهي بتبكي كانت جايه عليها بس اتذكرت المصلحه بتاعتهم مع ابراهيم وخلتها
بثينه:مالك ي بت بتتبكي؟
ملك :خالتي اررح نرجع البيت عليك الله انا تعبانه عليك الله ارح نرجع
بثينه (كوركت في ملك) : انتي ي بت جنيتي كيف يعني نرجع وانتي لسه شايفا ورانا شغل بعدين ما سمعتي ابراهيم قال لسه في حاجات كتيره وانتي تعبانه من شنو يختي من شغلك ال في البيت ولا المزرعه القدر حالكم دي ؟
ملك: خلاص اديني قروش وانا برجع براي بالمواصلات عليك الله
بثينه:اديك قروش واخليك ترجعي براك صح عشان يحصل ليك زي ما حصل زمان ؟ عايزا ابوك يلم فيني الحي كلو ولا شنو يعني انتي طيري كدا بالله
ابراهيم : في شنو ي جماعه مالكم
بثينه: اتخيل قالت عايزا ترجع براها
ابراهيم : لا طبعا مافي ليك رجعه الا نخلص شغلنا
بثينه:ااااي دا الكلام الصح
ملك كانت مضايقه شديد وخايفه من ابراهيم بغد خلصو كل شغلهم مشى وداهم مطعم وقعدو ياكلو
ابراهيم:مالك ي بت ما بتاكلي
ملك:ما جعانه
ابراهيم:اطلب ليك عصير طيب
ملك:لا
بثينه: شفتا كيف عشان كدا ضعيفه لكن اصبر ليها لغايه يوم العرس شوفها

بتبقى كييف بس ي ابراهيم
ابراهيم (بضحكه) : اووو شكلها ح تكون عجيبه عروستي
بثينه (بضحكه) : ح انزل ليك فيها دخن ومديده بس عشان تستلمها عجيبه
ابراهيم (بضحكه) : بركاتك ي عمتو بثينه ... وشوفي لينا حل لي مشكله سكوتها الغريبه دي برضو
بثينه: في البيت نقناقه نقه ما تشوفها كدا ليل ونهار تتكلم اسي يمكن خجلانه البت
بعد خلصو كلامهم ابراهيم مشى وصلهم البيت وطوالي ملك جرت جوه البيت
بثينه:بسم الله البت دي مالها يا كافي البلا مع السلامه ما بتقولها ليك ابراهيم (بضحكه) : خليها ي عمتي يلا اها مع السلامه
بثينه:الله يسلمك وسلم لي على نعمه عليك الله
ابراهيم:يوصل ان شاااء االله
ملك دخلت جوه اول ما شافت خالتها ابتهال طوالي حضنتها
ابتهال:اها الليله اليوم كان كيف حبيبتي؟
ملك : كويس ي خالتي
ابتهال لاحظت انو في اثر في يد ملك لمن اخدر
ابتهال:يدك دي ليه عامله كدا ؟
ملك:مافي شي
ابتهال:كيف يعني مافي شي ي بت عايني يدك دي لمن بقت خدره دا ابراهيم صح
ملك: لالا ي خالتي
ابتهال (بصوت عالى): طيب يدك دي ليه عامله كدا
ملك(بتمتم):ما عارفه انا ذاتي اسي انتبهتا ليها
ابتهال:ملك ما تكذبي في شنو
ملك (بتبكي): دا ابراهيم . انا خفتا شديد ي خالتي ي ريت لو مشيتي معاي
ابتهال :كيف يسمح لي نفسو انو يعمل ليك كدا دا واحد ما عندو اخلاق ولا شنو قومي تعالي معاي
ملك:ماشين وين ي خالتي
ابتهال:ح امشي اوري ابوك الواطي دا عمل ليك شنو
ملك:لالا يا خالتي عليك الله خلاص انسيهو ما عايزا مشاكل ي خالتي
ابتهال:لا ما بنسى هو فاكر نفسو شنو عشان يمد يدو عليك تنقطع يدو ان شااء الله
ملك:عليك الله ي خالتي ما عايزا مشاكل لو وريتي ابوي ح يجي يضربني اسي هو اصلا عايز سبب عشان يقوم على انا ما متحمله ي خالتي خلاص عليك الله
ابتهال(عيونها دمعو ومسكت يد ملك) :واجعاك؟
ملك:شويه بس
ابتهال:امشي اشوف ليك مرهم واجي
ملك: طيب
فجأه سمعو بثينه بتكورك مع عبد الوهاب برا .....

يتبع.......

#ملك
-٥-
بقلم سجى اليزيد

لمن بثينه كانت بتكورك طوالي ملك وابتهال جرو عليهم برا
ابتهال: في شنو ي مره مالك بتكوركي؟
بثينه:انتي اصلو ي ابتهال ما تتدخلي انتي الخاربه البت دي
ملك:مالي عملتا شنو ي عمتي
بثينه (قربت من ملك وبصوت عالي) :وليك عين كمان تقولي عمتي ولا تفتحي خشمك
عبد الوهاب:دا شنو العملتيهو هناك دا ي بت
ملك:مالي عملتا شنو ي ابوي
عبد الوهاب (قام على حيلو وبقى بكورك فيها) : دي شنو الحركات ال كنتي بتعملي فيها دي انتي ناويه تتطفشي الراجل يعني ؟هو بحاول يرضيك بأي شي وانتي عايزا تتطفشيهو
ابتهال:اسمع هنا ما تكورك ساااي بالاول انت شوف هو عمل شنو في بتك
عبد الوهاب:ابتهال قلتا ليك ميه مره ما تتدخلي في حاجه بتخصني انا وبتي (وجا قرب من ملك ومسكها من يدها فوق وبكورك فيها ) :انطقي دا شنو البتعملي فيهو دا لو عملتي شنو داك ي ملك برضو ح تعرسيهو
ابتهال (بكورايك) :ززح يدك دي منها افتحي يدك ي ملك خلي يشوف عمل شنو فيك
ابتهال (فتحت يد ملك) :شووف عاين ليهو عمل شنو وانتي اسي جاي شاقي صوتك فيها ليها حق تتعامل معاهو كدا اذا هو بعمل فيها كدا من اسي
عبد الوهاب اتلفت على بثينه وبقا بعاين ليها
بثينه(بتمتمه) : انا كنت معاهو هو ما عمل ليها شي اكيد بتكون هي عملت كدا في نفسها عشان تقول دا ابراهيم
ابتهال(بضحكه) : عليك الله ي بثينه ما تتكلمي ساي انتي نفسك ما مقتنعه بالكلام البتقولي فيهو دا
ابتهال مسكت ملك ودخلت بيها جوه
ابتهال:مالك ساكته ي ملك؟
ملك (بأبتسامه خفيفه) : ح اقول شنو ي خالتي الحمد لله
ابتهال قلبها اتقطع على ملك جات حضنتها لغايه ما نامت صحو الصباح وملك مشت نضفت البيت وجهزت ليهم الشاي وكانت طالعه على المزرعه بتاعتهم
ابتهال:ماشه وين؟؟
ملك:ماشه اشتغل شويه في المزرعه
جات بثينه داخله عليهم
بثينه:مزرعه شنو يا بت انتي مجنونه عرسك كلها فاضل ليهو خمسه ايام وتقولي لي شغل اقعدي اترزعي هنا ما تمرقي
ابتهال: طيب ممكن تتكلمي براحه مع البت . ملك اقعدي يا بتي ما تمرقي الناس سمعو بالعرس واسي ح يجو يتكلمو ويقولو انتي عروس البمرقك تشتغلي شنو ؟
ملك : عايزا انسى وجعي ي خالتي
ابتهال: كلو بهون ي بتي
بثينه (بتأفف) : غايتو انتو الحمد لله بس اسمعيني انا اسي بمشي اجيب حاجات للحبسه جهزت ليك مديده امشي اكليها
ابتهال: والله .من بتين الحنيه دي
بثينه: ما عشان خلقتها دي بس عشان الراجل وامو ما شفتي امو من ما جات تعاين ليها وتتكلم كيف اسي انا متأكده ح تكون بتتونس بينا للبسوى وال ما بسوى
ابتهال كانت عايزا ترد على بثينه بس ملك وقفتها
ملك:خلاص ي خالتي عليك الله
ابتهال: طيب .اها الاثر رااح من يدك
ملك: بدا يروح
هم قاعدين كدا جات داخله عليهم فاطمه ومعاها بت تانيه
ملك: فطوومه كيفك مشتاقين مالك ما قاعده تجيني
فاطمه:بالاكتر والله ي ملك تقولي شنو بس مش المره الفاتت قلتا ليك عبد الله لو شافني معاك بقتلني اها لكن جيت طالعه منك هو كان واقف مع اخوك وبس نزل فيني ضرب
ملك (بخوف) : طيب انتي كويسه ؟ما يكون حصل ليك حاجه؟
فاطمه: كويسه حبيبتي بس جسمي لحدي الان مكسر من الضرب
ملك: طيب جيتي ليه ي فاطمه اسي كان شافك تاني ح يقوم عليك
فاطمه:لالا هو سافر امبارح وابوي مرق الصباح بدري وجيت اشوفك ماشه كيف مع تجهيزات العرس
ملك عاينت للبت المعاها
فاطمه: نسيت اعرفكم على بعض ملك دي هاجر جارتنا الجديده
ملك ( بابتسامه) : اهلين هاجر
هاجر : اهلا فيك انا سكنت هنا جديده وحبيت اتعرف على بنات الحي هنا واتعرفت على فاطمه وحكت لي عنك وانك زي اختها وحبيت اتعرف عليك ممكن اكون صديقتك
ملك (بابتسامه) : اكييد
فاطمه (بفرحه) : كدا بقينا تلاته اخوات
هاجر : يلا تعالو احكو لي حابه اتعرف عليك اكتر ي ملك
ملك : طيب تعالو نقعد برا احسن من هنا في كتمه
فاطمه: لالا عليك الله اسي بجو اخوانك ويعملو ليك مشكله ما عايزين يشوفونا
ملك: طيب
هاجر : انتي بتقري وين ي ملك
ملك (نزلت راسها) : انا ما بقرا امتحنت شهاده وكان مفروض ادخل الجامعه بس ح اعرس والله اراد لي كدا
هاجر : ليه ي ملك طيب ممكن تكلمي تعليمك عادي ولا انتي ما عايزا
فاطمه: لا هي عايزا تكمل تعليمها بس ...
ملك هزت راسها لي فاطمه يعني ما تحكي
هاجر : بس شنو ؟
فاطمه: يعني هي بس حاليا عايزا تتزوج وكدا
هاجر :نحنا ذي الاخوات عادي ي ملك احكي لي مافيها حاجه بس اذا فيها احراج خليها خلاص
ملك: انا مجبوره بس على الزواج ي هاجر وما بخلوني اكمل تعليمي لاني ح اتزوج بس فاطمه محظوظه لانها ح تكمل باقي تعليمها وتخش الجامعه
فاطمه :انا ساعدني ابوي الحاجه الكويسه انو ما زي عبد الله مخو مقفل من كل النواحي ودي نعمه بالنسبه لي وامي كمان بتساعدني يعني الوحيد ال كان معارضني عبد الله
ملك :يا ريت لو يمه كانت عايشه او ابوي اتغير وبقى زي ابوك ي فاطمه
فاطمه : نحنا معاك ي ملك انا وخالتك وهاجر كلنا بنحبك
ملك: عارفه والله بس لمن يكون اقرب الناس ليك قاسين عليك وعايزين

يبيعوك بأي طريقه وللاسف ابوك واخوانك بتعملي شنو
فاطمه: عليك الله خلاص ي ملك اسي بجي واحد منهم بسمعنا ويجو يضربوك ويعملو ليك مشكله
ملك : عادي اتعودتا والله صدقيني الضرب ال في جسمي دا ما واجعني زي ما قلبي واجعني
فاطمه : ملك ما تقولي كدا خلاص عليك الله ما تقطعي لي قلبي
هاجر : انا ما بفرق منك في شي ي ملك اخوي كمان مانعني القرايه مع انو نفسي اكملها بس يلا نقول شنو هنا نحنا ما عندنا كلمه
فاطمه :الله ينعل التقاليد والعادات البتجبرنا نتزوج غصبا عننا وما نعيش حياتنا
في اثناء ونستهم في زول ضرب لي هاجر
هاجر : عن اذنكم
فاطمه: اتفضلي
ملك: ح تمشي بتين عشان تسجلي ي فاطمه
فاطمه :بعد احضر العرس ان شااء الله
ملك:دا ما عرس دا ح يكون بيت عزا بالنسبه لي
فاطمه: ملك انتي كويسه ؟ما تتكلمي كدا وتخوفيني عليك الله
ملك: مافي حاجه ي فاطمه انسى كلامي
هاجر : ي جماعه انا بستأذن لازم ارجع البيت
فاطمه: ليه مالك اقعدي شويه
هاجر:ما بقدر والله ي فاطمه حبوبه براها ولازم ارجع
فاطمه: طيب .انا ذاتي عايزا امشي
فاطمه وهاجر ودعو ملك ومشت اي وحده على بيتها
ابتهال:دي منو الكانت مع فاطمه
ملك: دي صحبتنا الجديده سكنت قريب من هنا واتعرفت عليها فاطمه وجابتها معاها عشان نتعرف على بعض كلنا
ابتهال:ايوااا طيب .... بس حاسه اني شايفا البت دي قبل كدا او ممكن بتخيل ساي
ملك: ممكن
ابتهال؛ يلا تعالي اكلي وما تنسى تبلعي حبوبك
ملك:طيب
جا دفر الباب احمد وكان غضبان شديد وطوالي جا مسك ملك من شعرها وبقا بكورك
احمد (بصوت عالى) : دا شنو العملتيهو دا انتي بقيتي تشكينا لصحباتك وكمان بتقولي مجبوره على العرس ونحنا ما خليناك تتعلمي
ابتهال ( بتكورك) : زح يدك من البت ي ولد
ملك (بتبكي شديد) : فكني عليك الله فكني ي احمد
احمد :يا بت انتي قايله نفسك شنو انتي عايزا تفضحينا يعني
ابتهال (بتحاول تفك احمد من ملك وبتكورك فيهو) : ما عندك بيها علاقه ززح يدك من البت قلتا ليك دا الهامك انت الفضيحه فضحتك في شنو وريني بعدين البت صحبتها وتتكلم معاها زي ما عايزا انت ما راجل البخليك تجي تتسمع على الكلام البقولوهو البنات شنو
احمد : انتي اسكتي ما تتكلمي اصلا انتي الخارباها ... انا ي بت مش كلمتك المره الفاتت قلتا ليك لو شفتك تاني مع الاسمها فاطمه دي ما بيحصل خير مش قلتا ليك ابعدي منها ما بتسمعي الكلام يعني انتي
احمد ادا ملك كف وخالتو بتحاول تفك ملك منو قام لزاها وقعت في الارض
ملك (بخوف وبتكورك) : خالتي
وجات نزلت في الارض وبقت ماسكه خالتها ابتهال وبتبكي شديد
ابتهال (بتكورك) : اطلع بره اطلع بره يا قليل التربيه ي خساره ي اختي للاسف ما ولدتي راجل
احمد( بكورك) : انا راجل غصبا عنكم كلكم
ابتهال: اطلع برا
بعد احمد طلع
ملك( بتبكي) : اعفى لي ي خالتي كلو بسببي انا آسفه
ابتهال :لالا ما تبكي ي بتي انتي ما عندك ذنب
ملك: تعالي اسندك ارقدي في السرير شاعره بوجع ي خالتي ؟اجيب ليك حاجه ؟
ابتهال: لالا انا كويسه ي بتي بس اسنديني ارقد في السرير ده
ملك: طيب تعالي
بثينه جات داخله عليهم
بثينه: دي نتيجه عنادك وقله ادبك وقوه راسك وعدم سماع كلمه اخوانك
ابتهال (بتكورك) : ح تتطلعي ولا اجي اطلعك بطريقتي
بثينه ( بضحكه) : كدي انتي حاولي قومي بالاول
وطلعت خلتهم ملك قعدت تحت رجلين ابتهال وبتبكي شديد
ملك:امسحيها لي في وشي ي خالتي اتاذيتي بسببي
ابتهال ( عيونها دمعو) : انتي ي بت عويره اتأذيت شنو انتي ما غلطانه ي بتي ما بحملك ذنب حاجه انا امشي جيبي لي مويه بس ابلع حبوبي دي
ملك: طيب
ابتهال : وتعالي يلا اكلي ي بتي حرام عليك والله انتي ما قاعده تاكلي وارقدي نومي طوالي
ملك: بعد الحصل دا ما عندي نفس ي خالتي
ابتهال: م تقولي كدا تعالي يلا
مرت الايام وموعد العرس قرب شديد يوم العرس دا كان بالنسبه لي ملك اليوم ال ح تموت فيهو حتي الفستان الابيض ال بتتمنى اي بت تلبسو بالنسبه ليها زي الكفن كل همها انها تتطلع من البيت ال كان مفروض يكون بالنسبه ليها زي الجنه وحضن يحتضنها من بعد وفاه امها بيت كلو سعاده وحنيه بس االبيت دا كان بالنسبه ليها زي الجحيم البتتمنى تمرق منو عسى ولعل تكون حياتها مع ابراهيم احسن من كدا مع انو هي متأكده انو ابراهيم زيو وزي اخوانها وابوها واحد بس كان عندها بصيص امل صغير حياتها تتغير للاحسن......

يتبع.......

#ملك
-٦-
بقلم سجى اليزيد
ملك كانت قاعده في غرفتها والعرس خلاص كان يوم الجمعه قاعده في غرفتها وبتتذكر اي حاجه حصلت معاها وقلبها بتقطع من جووه اتذكرت الالم والمعاناه والقسوه والظلم الاتعرضت ليهو في البيت دا ومع الاسف من اقرب الناس ليها اتذكرت يوم وفاه امها .....
ملك: يمه ماالك انتي تعبانه؟ ارح اوديك للدكتور
خديجه (ام ملك) : مافيني حييل ي بتي اقووم نادي لي ابوك واخوانك
ملك جرت بسرعه لابوها وبتبكي
ملك: ابووي الحق امي تعبانه شديد
عبد الوهاب: يااخ عليك الله قولي ليها بطلي استهبالك دا المره دي ما عندها اي شي
ملك (بتبكي وبقت تجر ابوها من الجلابيه بتاعتو ) : ي ابووي علييك الله امي تعبانه ما قادره تتكلم تعال شوفها مالها
عبد الوهاب : انتي وامك فقر طيري ارررح قدامي احمد اسماعيل تعالو سرعه
ولمن وصلو
عبد الوهاب (بزهج ) : في شنو ي مره مالك؟
خديجه ( بتعب وصوت متقطع ) : خلي بالك من الاولاد ي عبد الوهاب ديل امانه عندك خصوصا ملك خلي بالك منها الله يرضى عليك
ملك بقت ماسكه راس امها وبتبكي
عبد الوهاب: دايما بتقولي الكلام دا عليك الله ي خديجه بطلي حركاتك دي
البتعملي فيها دي
خديجه: اسماعيل احمد خلو بالكم من ملك اوووعكم تخلوها براها دي اختكم
اسماعيل : بوعدك ي امي ما اخلي ملك براها
احمد : امي انتي مالك ؟
خديجه: عبد الوهاب خلي بالك من الاولاد
ملك(بتبكي) : يمه ما تخليني براااي خليك معاي انا اعمل شنو لو انتي مشيتي ما بقدر اعيش يمه عليك الله خليك معاي
خديجه: يا بتي ما تزيدي الوجع على ما تبكي
ملك بقت تعصر في جسم امها وبتبكي بس امها كانت لفظت اخر انفسها
ملك (بتجر في يدين امها وبتجرجر فيها من القميص ): يمه يمه عليك الله قومي
عبد الوهاب (برجفه ) : تعالو معاي ي اولاد
ملك :لالا ما ماشه حته عايزا اقعد مع امي
ملك رقدت في حضن امها وبصعوبه عبد الوهاب قدر يفك ملك منها وملك بأعلى حسها بتكورك
ملك: يييمممه
ملك كانت قاعده وبتتذكر موت امها وبتبكي بصوره هستيريه وماسكه صوره امها جاتها ابتهال
ابتهال: بسم الله بسم الله مالك ي بتي في شنو
ملك ما ردت عليها وبس بتبكي ابتهال عاينت للصوره وفهمت انو ملك اتذكرت امها وبقت تبكي معاها
ابتهال: الحمد لله على ما اراد الله ي بتي
ملك : ي ريت لو يمه معاي ي خالتي والله الحاسه بيهو دا كلو كان نسيتو اشتقت ليها يا خالتي نفسي امشي ليها
ابتهال: وتخليني انا ي ملك انا امك حبيبتي
ملك: لمن كنت صغيره وامي عيانه بجي برقد ليها في صدرها عشان اسمع دقات قلبها واتأكد انها معاي وما ح تفارقني
ابتهال (بتبكي) : الله يرحمك ي خديجه خلاص ي بتي ما تبكي عليك الله
ملك: اذا في حاجه ح اشتاق ليها في البيت دا ذكرياتي مع يمه بس
جات داخله عليهم بثينه
بثينه: بسم الله انتو مالكم بتتبكو اسي اجججي انتو جنيتو ولا شنو ..كدي اسمعيني هنا اديني رقم خطيبك
ملك: ما عندي
بثينه:سبحان الله والله انتي بت غريبه خطيبك وما عندك رقمو
ابتهال: انتي دايره بيهو شنو ؟
بثينه:عايزا اقول ليهو نحنا الليله لازم نعمل حاجه ما ممكن كدا العرس في صاله ناس الحي ما كلهم ح يقدرو يمشو هناك ونحنا هنا ما عاملين ولا شي الناس تقول علينا شنو يعني ؟
ابتهال: انتي دا بس البهمك كلام الناس والمسكينه دي ما بتهمك
بثينه: عليك الله ي ابتهال ما تنكدي على من صباح الرحمن .ح امشي اشوف عبد الوهاب بكون عندو الرقم .وانتي هووي اجهزي عشان الحنانه ضربتا ليها جاياك هنا سامعه
ملك: طيب
ابتهال:ملك قاعده تبلعي حبوبك
ملك :اي ي خالتي
عند عبد الوهاب وبثينه
بثينه: اسمع ي عبد الوهاب اديني عايزا اتكلم مع ابراهيم
عبد الوهاب : عايزاهو لي شنو ؟ملك عملت حاجه ولا شنو ؟؟
بثينه: ما عملت شي بس ما ممكن نقضي العرس دا كدا بدون اي شي هنا من اسي ناس الحي بدو يتكلمو
عبد الوهاب :انتي عايزا الراجل يطفش ولا شنو ما كفايه متحمل تكاليف العرس كلها ولا انتي ناسيه
بثينه: ونخلي الناس يتكلمو كدا يعني نعمل ليهم ان شااء الله عشاء ساي وحفله كدا وبتك ما تتطلع ليهم
عبد الوهاب : انتي ي مره ما عندك موضوع ولا شنو بكره مش العقد والناس دي كلها ح تجي ما تتكلمي ساي عليك الله وززحي لي كدا امشي اكلم رجال الحي واعزمهم بكره العقد
بثينه: سمح ي عبد الوهاب
عبد الوهاب طلع بس نسى تلفونو بثينه استغلت الحكايه وبقت تفتش في رقم ابراهيم وفعلا لقتو وطوالي ضربت ليهو
ابراهيم : الوو
بثينه: اهلين ي ولدي كيفك انا عمتك بثينه
ابراهيم: اهليين عمتو بثينه انا الحمد لله كيفك انتي ؟
بثينه: نقول شنو ي ولدي الحمد لله بس
ابراهيم: ليه في شنو ي عمتي ؟
بثينه: الصراحه ي ولدي ملك مضايقه شديد
ابراهيم: ليه خير من شنو ؟
بثينه: الناس بدو يتكلمو انو نحنا هنا ما عملنا حاجه وبدو يتكلمو فينا كلام سااي وملك الحكايه دي مضايقاها فكرت نعمل لينا حاجه هنا الليله بالمساء ان شااء الله عزومه صغيره كدا ان شااء الله وانت عارف ي ولدي النيه في لكن ......
ابراهيم(قاطعها)

: كويس ي عمتي م مشكله انا بوصى ليكم على عشااء يوصلوهو ليكم وانتي اعزمي نسوان الحي
بثينه: كتر خييرك ي ولدي ملك لمن تعرف ح تفرح شويه
ابراهيم: ودا هدفي
بثينه: خلاص ي ولدي تسلم انا بمشى بكلم نسوان الحي ويا ريت لو تعزم امك
ابراهيم : امي
نعمه اتلفت على ابراهيم وعملت ليهو لا بيدها
ابراهيم : والله امي دي الليله تعبانه شويه ودايرا اخليها ترتاح عشان تفضى لينا بكره شويه
بثينه(بضحكه) : سلامتها ان شاااء الله سلم لي عليها .وعليك الله ي ولدي عبد الوهاب كان سألك قول ليهو دا مني وحابب افرح ملك لو قلتا ليهو عكس كدا ح يعمل لينا مشاكل ف ياريت انت تكلمو براك
ابراهيم: طيب ان شاااء الله ي عمتي يلا مع السلامه
بثينه : مع السلامه
نعمه : ممكن افهم انت تاني عملتا شنو ؟
ابراهيم: في شنو ي امي ؟؟
نعمه: انت م ملاحظ انو الناس ديل بقو متحكمين فيك جيب دا وسوى دا
ابراهيم: دي متطلبات العرس ي امي فيها شنو يعني وبعدين نسوان الحي بدو يتكلمو عليهم
نعمه: بدو يتكلمو عليهم قلتا لي والناس البتتكلم فينا نحنا هنا ديل نسوي ليهم شنو البقولو ح تعرس بت فقيره وما من مستوانا ح تعمل ليهم شنو اسي بقى الكلام البقولوهو في ملك مهم
ابراهيم: البت دي في النهايه ح تبقى مرتي وانا ما برضى فيها كلمه
نعمه: وهي استغلت فيك الحته دي ي غبي وبقت تلعبك باصابعيها
ابراهيم: علييك الله ي امي خلاص كفايه
نعمه:دا الفالح فيهو تسكتني انا بس لكن شفت بت القرى دي تجيبها بتوريك ليهو ياهو
ابراهيم: امي قلتا ليك خلاص اقفلي الموضوع
العصر كان وصل العشا لبيت عبد الوهاب
بثينه: دا شنو لي شنو الصحانه دي ؟
اسماعيل: دا ابراهيم قال دا عشاااء عشان نسوان الحي
بثينه (بتزغرت) : ي يمممه ابراهيم الهنا والسرور
عبد الوهاب (قرب منها) : انتي القلتي ليهو يعمل حاجه الليله صح
بثينه: بررري ي عبد الوهاب البخليني اعمل كدا شنو انا ما عندي علاقه
عبد الوهاب(بعاين ليها قوي ) : بثيينه
بثينه: مالك ي عبد الوهاب قلتا ليك ما عندي علاقه بالموضوع الولد ماشااء الله عليهو تقول حسه بكلامي قبيل معاك وعمل الحاجه دي
عبد الوهاب : طيب ي بثينه
وبالمساا عملو العشا ونسوان الحي كلهم كانو بتكلمو وبثينه اصرت يطلعو ليهم الشيله بتاعت ملك واحده من نسوان الحي :عااااد ما شاااء الله شيله عاد تمام تستاهل والله ملك
بثينه: الله م ضراك يختي
نسوان الحي كلهم بقو بشكرو في العشااء بتاعهم والشيله بتاعت ملك
بثينه: اصلا نحنا بتنا ما بنديها لأي زوول وااسي هندا جااها راجل ود اصول وح يعمل ليها عرس الهنا ي يمه في وحده من صالات الخرطوم
واحده من نسوان الحى: ملك بتساهل والله بت ماشااء الله عليها تستاهل كل الخير
بثينه(بضحكه) : ااااي ااااااي
جاتها ابتهال نادتها
ابتهال: انتي العملتي الحركه دي مش مشيتي لي ابراهيم وكلمتيهو يعمل الحركه دي صح
بثينه: هوووي ي مره مالك نافشه ريشك فيني انا مالي كمان ما عندي دخل في الموضوع دا انا
ابتهال: امشي خلاص استأذني من النسوان ديل بكره عندنا شغل كتير مافي داعي يقعدو للوقت دا مش كفايه وريتيهم الشيله نسوان غير الشمارات ما عندهم شي
بثينه: خلاص بالله ما تنقى فينا كتير
ابتهال تلفونها ضرب وكانت فاطمه
فاطمه : الووو ي خالتو مممكن تديني ملك
ابتهال:دقيقه حبيبتي اوصل ليها التلفون
وكانت ملك قاعده في الغرفه وسرحانه جاتها ابتهال
ابتهال: ملك ملك هاك التلفون دي فاطمه
ملك: فطوومه كيفك؟؟
فاطمه : تمام والله حبيبتي ..ملك انا عارفه اليوم داك لمن طلعنا منك انا وهاجر حصل شنو كلمتني خالتو ابتهال بالمشكله العملها ليكم احمد
انا اسفه لانو حصل ليك بسببي
ملك: ما تقولي كدا ي فاطمه خلاص انسى الموضوع حصل خير اها بكره ح تجي تودعيني
فاطمه: ما تقولي ودااع الاخوات ما بتفرقو ي ملك وبكره انا ح اكون معاك ما بخليك برااك واليحصل يحصل
ملك ( عيونها دمعو) : ما تنسيني من دعواتك في ظهر الغيب عسى ولعل حياتي تكون احسن مع ابراهيم ي فاطمه
فاطمه: ان شاااء الله حبيبتي
ملك قفلت من فاطمه بعد ودعتها ونسوان الحي طلعو واول ما طلعو بدو كلام
واحده من نسوان الحي: شفتو بثينه نافشه فينا ريشها كيف عشان بت اخوها عرست واحد مرتاح
بدريه ودي مره معروفه في الحي بتاعتهم
بدريه : انا دخلتا جوه للعروس شكلها زي ما راضيه بالعرس دا ووشها حزين كدا ما بعرفها مالها
وحده من نسوان الحي : سجمنا ي يمه ماالها كمان ما تكون عملت ليها حاجه كمان معاهو وجبروها تعرسو
بدريه: حمانا الله ي يمه لكن البت دي ما بتعمل حاجه ذي دي يلا هووي ي نسوان نشوف بكره بيحصل شنو اي وحده على بيتها
وجا يوم العقد اليوم ال ح تبدا فيهو ملك حياه جديده ومعاناه جديده .....

يتبع.......

#ملك
-٧-
بقلم سجى اليزيد

يوم العقد كل نسوان ورجال الحي اجتمعو في بيت عبد الوهاب والزغاريت والهجيج مالي المكان العقد كان صلاه الضهر والناس قبل المغرب مفروض طوالي يمشو الصاله عشان العرس هناك ملك كانت محبوسه عند صحبتها فاطمه جاتها ابتهال
ابتهال (بتبكي) : مبرروك ي بتي خلاص ح تمشي مني وتبقى في عصمه راجل انا عارفاك ما مبسوطه بس نعمل شنو احتمال تلقى حياتك مع ابراهيم احسن من هنا
ملك : ان شااء الله ي خالتي
ابتهال : انا ح اكون معاك ما بخليك براك
جات بثينه داخله عليهم وبتزغرت
بثينه: ايووووووي يوووووي خلاص بقيتي مره ي بت وعرستي ليك راجل كمان ما شااااء الله كل نسوان الحي يتكلمو فينا وعن العرس
ابتهال:عقدو ولا لسه
بثينه: عقدو اي زماان ..بسم الله والبت دي مالها مكشره كدا انتي ي بت اصلو ما بتتعدلي نحنا نعمل ليك في السمح وانتي ما عاجبك
ابتهال : اسي مافي داعي للكلام الفارغ دا ي بثينه
بثينه: بررري منكم اصلا غلطانه انا البجي ببارك ليك
وطلعت خلتهم
ابتهال: ما تشتغلي بكلامها حبيبتي
جو داخلين فاطمه وهاجر وبارجو لي ملك
فاطمه : ما قادره اصدق ي ملك انك خلاص عرستي ..
ملك: ولا انا
فاطمه: تتذكري زمان لمن كنت بكاويك وبقول ليك انا ح اعرس قبليك وانتي كنتي بتقولي لي انا اصلا ما عايزا اعرس وجيتي اسي عرستي وخليتيني بايره
ملك (بضحكه) : ان شااء الله ربنا يديك الفي مرادك ويديك واحد يخاف الله فيك ويحبك جد ما زي انا
فاطمه : انتي ليه بتتكلمي كدا ي ملك عليك الله ما تحرقي لي قلبي
ملك (بضحكه خفيفه) : المباركات البتدوني ليها دي زي البتعزو في روحي وانا ميته
فاطمه مسكت ملك (عيونها دمعو ) : عليك الله ي اختي ما تتكلمي كدا ان شااء الله ابراهيم يكون كويس معاك
ملك: دي الحاجه البحاول اقنع بيها نفسي لكن ما قادره
فاطمه : عايني الراجل دا لو عمل ليك اي حاجه اضربي لي طوالي وانا اجي اخبتو ليك لمن يقول كفى
ملك (بضحكه) : طيب امشي خبتيهو لي اسي عشان من اسي يعرف ما يعمل لي حاجه
فاطمه: ااااي كدا ياااخ فكي شويه
هاااجر جات قعدت جمب ملك : العرريس طللع اسمو ابراهيم كويس ي ملك ليه ما بتكلميني من اسمو باين عليهو كسار
فاطمه: هووووي هاااا كسااار شنو معرس تلاته نسوان وعندو ولد في الجامعه عمرو كم واربعين
هاجر : وااااي ي ملك يحليلك عرسوك لي راجل عمرو كم واربعين وفوقها كمان معرس
فاطمه : عشان تشوفي بس الحقاره والظلم بتاع العادات والتقاليد العندنا الوحده ما بخلوها تتم تعليمها طوالي اقرب واحد يعرسو ليها
ملك: الحكايه ما عادات وتقاليد بس ي فاطمه حكايتي اكبر من كدا
فاطمه: انتي قصدك شنو ي ملك ؟ وليه بتتكلمي معااي بالالغاز اتكلمي عديل
هاجر : قولي في شنو ي ملك
ملك: ي جماعه انسوو خلاص
فاطمه: قبل كدا كلمتك وقلتا ليك ح اعرف بطريقتي لكن ما تنكري العادات والتقاليد ظالمانا
هاجر : برضو ما تنسو اسم ابراهيم كسااار يااخ
فاطمه : كلميهو عليك الله ي ملك يطلق واحده من نسوانو التانيات ويجي يعرس هاجر تونسك شويه
ملك (بتضحك ) : طوااالي انا لاقياها وين هااجر
هاجر : ح نبقى ضررااات
ملك: اخير ليك ما تقعي الوقعه دي اي حياتك دي ما انتي البتتمنيها ي هاجر لكن على الاقل احسن مني اهلك ما جبروك تعرسي
فاطمه: هوووي ها انتي ما ماشه الكوفير ولا شنو اررح قومي يلا نمشي معاك انا وهاحر وخالتو ابتهال عشان عمتك ما تجي تنق فينا
ملك ( بضحكه ) : طيب
فاطمه : ياااخ حلاتك وانتي بتضحكي
هاجر : كفايه ي بت خجلتيها ..عاينو انا بسبقكم بررا وانتو تعالو لاحقني طيب
ملك: اي كدا احسن عشان ما الاولاد ما يعملو لينا مشاكل
فاطمه : لا احمد ولا اسماعيل ولا عبد الله بقدر يعملو شي امشي ساي
ملك: طيب
في بيت عبد الوهاب النسوان كانو بتكلمو وديل طبعا النسوان الجايين من جهه نعمه ام ابراهيم
واحده من النسوان القاعدين : بسس دا شنو دا عرس شنو دا وعايني اهل العروس عاملين كيف اسي عليك دا عرس من مستوى اسرتنا .....اااي والله اذا كان اهل العروس كدا العروس تكون كيف ان شاااء الله......اسكتي ساااي سلاافه مره ابراهيم كلمتني لمن جات نعمه وابراهيم من الخطوبه سمعتهم وهم بتكلمو عنها البت دي بتنصب عليهو قالو وهي ذاتها ضعيفه ومنتهيه ......اصلا الاشكال الزي دي ما بجي كنها خير .....غاايتو اتفضحنا نحنا معقوله اسره عبد المنعم اشهر من نار على علم يجي واحد من اولادنا يعرسو ليهو بت فقيره كمان وما معروفه هي ذاتها شنو ......الله يسترنا بس من الفضيحه ....اي والله الله يستر ما ننفضح اكتر من كدا ..نعمه كانت بتسمع في كلام النسوان وخلاص دمها فاار وما قدرت تستحمل وهي اصلا ما عايزا عائله ملك تناسبهم وطوالي ضربت لي ولدها
نعمه: الوو وين انت الله لا جاب باقيك
ابراهيم: في شنو ي امي مالك
نعمه:تعااااال ي يمه اسممع الناس بتكلمو وبقولو عننا شنو انا مش كلمتك البت دي ح تعمل لينا فضيحه
ابراهيم: النسوان شافو ملك وين عشان يتكلمو فيها
نعمه: دي ما هي المصيبه

شووف مرتك سلافه عملت شنو سمعتنا نحنا بنتكلم مشت كلمت باقي نسوان الاسره واسي بتكلمو فينا
ابراهيم: انا بتصرف معاها
نعمه: اتصرف بطريقتك انا ما بقعد هنا تعال رجعني البيت
ابراهيم : ارجععك كيف يعني ي امي وانا قاعد مع الرجال اسي
نعمه: انا ما بعرررف ي ابراهيم تجي ترجعني يعني ترجعني وبعدين الصاله انا ما ماشه كلمتك من اسي
ابراهيم: يا امي ياااخ مالك عايزا تنكديها على من اولها يااخ
نعمه: قلتا شننو يعني انا اسي بقيت المنكده عليك وخاربه ليك الموضوع يعني صح كوويس ي ابراهيم دا الفضل لكن
ابراهيم: خلاص خلاص بوصى ليك واحد من الشباب يوديك البيت ومنو توصلو ملك الكوفير
نعمه: لا عليييك الله البت دي ما عايزا اشوف خلقتها ما تركبها معاااي سااامع
ابراهيم: اووووووف اوووف خلاص خلاص يااخ
نعمه: اووعك تتأفف فيني ي ولد بسررعه خلي واحد يجي يسوقني
نعمه رجعت ليهم جوه وبثينه كانت قاعده
نعمه: عن اذنكم ي جماعه عايزا ارجع البيت حاسه نفسي تعبانه والله
بثينه: سلاامتك ان شااء الله مالك ؟
نعمه:والله من امبارح حاسه نفسي ما طبيعيه وراسي دا تقيل
بثينه:ان شااء الله تبقى كويسه ي رب لي بعدين
نعمه:ان شااء الله
بدريه ودي المره القلنا انها معروفه في الحي بتاع ناس ملك قربت من بثينه
بدريه: يخختي مالها ام العريس ذي تقول ما عاجبها الحال
بثينه: برري ما بعرفها وما عندنا شغله بيها مش ولدها راضي يعرس بتنا ما بتهمنا هي
بدريه: ااي خلوكم كدا
عند ملك وفاطمه طلعو حصلو هاااجر لقوها واقفه بتتكلم مع زول في عربيه
فاطمه: دا منو الواقف ليها بالعربيه دا وبتتكلم معاهو
ملك: احتمال اخوها
فاطمه: لالا دا ما اخوها انا متأكده قالت لي اخووي مسافر وابوها وامها مااف يعني حاليا معاها حبوبتها بس
ملك: خلاص معناها زول ببقى ليها
فاطمه بقت تكورك لي هاجر هاجر اتلفت عليها
هاجر : اااي ااي جاياكم
هاجر جات عليهم
هاجر : اها خلصتو اررح نمشي
فاطمه: دا منو الجاك بالعربيه دا
هاجر : دا ولد خالتي اداني قروش كلمتو محتاجاها وجا اداني ليها
فاطمه: ايواااا طيب
هااجر : اها انتو الراجل دا ما رسل ليكم زول عشان نمشي
جاتهم ابتهال
ابتهال: ارررح بالشارع التاني عشان ابراهيم كلم لينا زول مستنينا هناك
ومشو كلهم ركبو العربيه ووصلو الخرطوم محل الكوفير وجهزو ملك وكانت حلووه شديد بس بالرغم من كدا هي ما فرحانه وحاسه الفستان اللابساهو دا زي الكفن
ابتهال (عيونها دمعو ) : طااالعه حلووه ي ملك ما شااااء الله
فاطمه وهاجر : ماشااء الله والله ي ملك عسل
ابتهال: ي ريت لو امك كانت معانا
ملك(بابتسامه خفيفه) : لا ي خالتي لو انا متمنيه انو امي تكون معاي ما بتمني انها تشوفني في اليوم دا لانو بالنسبه لي دا يوم موتي لو كنت متمنيه امي معاي ما بتمني تشوفني وانا مكسوره من عمايل ابوي واخواني فيني ولا بتمني تشوف كيف اخواني خلفو بوعدهم ليها
ابتهال مسكت ملك وبقت بتبكي
فاطمه : خلااص عليك الله ي جماعه ما تبكو خالتو ابتهال علييك الله ما تخلي لينا البت دي تبكي عارفاها عويره وبتخرب المكياج كلوو وبعدين تجي عمتو بثينه تردح لينا
كلهم بقو بضحكو ملك كانت بتضحك ضحكه انكسار
هاجر : انا خلاص قررتا لمن اعرس اتحجب زيك ي ملك والله الحجاب فيك حلووه حلااا
ملك: الله يديك ود الحلال حبيبتي
وجا موعد الزفه وابراهيم مشا الكوفير عشان يستلم ملك ومعاهو عبد الوهاب واسماعيل واحمد
ابراهيم اوول ما شاف ملك ما شال عينو منها بقا بس بعاين ليها من فوق لي تحت وجا مسك يدها وملك خلاص توترها قام عليها
ابراهيم: والله الليله طالعه حلووه شديد بسحروك لي
ملك ما قالت ليهو اي شي
ابراهيم: يعني ولا حتي عايزا تعايني لي
ملك لسه ما بتتكلم معاهو ولا بتعاين ليهو
ابراهيم( بصوره تهديد) : تمام ي ملك خلينا نصل البيت
ملك جسمها كلو رجف وبقت خايفه من ال يحصل ليها لمن تمشي مع ابراهيم وتكون براها......

يتبع.......

#ملك
-٨-
بقلم سجى اليزيد

ملك كانت بتعاين لابوها واخوانها نظره بتاعت انكسار ما قالت ليهم اي شي .لمن وصلو الصاله واول ما دخلو اهل ابراهيم بعلقو على ملك ....والله ي جماعه البت سمحه لكن عيبها فقيره بس ....اااي بالله عليك الله شوفى الناس الجو معاهم عايني ليهم عاملين كيف ....عاد ابراهيم لكن فضحنا فضيحه اسي الناس تقول علينا شنو عايني الناس ديل عاملين كيف بالله ......انتو ي نسوان هوووي نعمه وين مالها ما جات العرس ؟؟...يختي بتكون عامله نفسها عيانه عشان ما تجي وتسمع كلام الناس ....ليها حق والله مع منظرهم دا الناس ديل ...لكن انتو العروس دي مالها مكشره كدا زي تقول ما راضيه بالعرس....هييي هي بت القرى دي مفروض تشكر ربها انو اداها عريس مرتاح لاقيه وين هي ..كل الناس بتكلمو عن ملك لانو اول مره يشوفها وويتكلمو عن اهلها ...
بثينه: عليك الله شوفي النسوان ديل عاملين كيف صحى الناس ديل مرتاحين نحنا ح نستفيد كتير من ورا العرس دا
ابتهال: طيب وملك
بثينه: وووب علينا نحنا مالها ملك اها عرست الراجل اسي مالها ح تعيش مرتاحه
ابتهال: تعيش مرتاحه ...هي معاكم وانتو اقرب الناس ليها ما ارتاحت معاكم ترتاح مع ابراهيم وهي ما دايراهو ومغصوبه عليهو
بثينه: انتي عارفه حاجه اصلا انا ح اقوم منك لانك انسانه نكديه
ابتهال: مش احسن من ما اكون وحده ظالمه
بثينه: ح اقوم منك بس عشان ما اعلق معاك ونعمل مشكله ونخلي الناس يتكلمو فينا
ابتهال: اصلا دا البهمك كلام الناس
اقعدي اسمعي فيهو وخافي منو نشوف بقدمك ولا لا
عند ابراهيم وملك
ابراهيم: اها العرس كيف عجبك
ملك ما ردت عليهو
ابراهيم : انا بتكلم معاك ؟!
ملك لسه ما عايزا تتكلم معاهو
ابراهيم: بالمناسبه انا بديت اتعصب منك.....قاطعتو ملك
ملك: وح تمشي تكلم لي ابوي واخواني عشان يضربوني ولا ح تضربني انت
ابراهيم: يا بت الحلال كل القصه انا عايز اتقرب ليك ي ملك
ملك: ما عايزاك تتقرب لي
ابراهيم: انا عرستك عايز احميك من ابوك واخوانك
ملك: ابوي واخواني ما قدرو يحموني من نفسهم وهم اقرب الناس لي ح تحميني انت كيف
ابراهيم: ابوك واخوانك وحتي عمتك واعمامك انانين كانو عايزين يعرسوك لواحد اسمو محمد تقريبا كدا ولد خالتو ابتهال مش اسمو محمد ؟
ملك جسمها كلو بقى برجف اول ما سمعت اسم محمد وبقت ساكته مسافه وسرحانه
ابراهيم مسك يدها وهي اتخلعت حتي معظم الناس ال في الصاله لاحظو ليهم
ابراهيم: يا بت مالك بتعملي كدا عايزا تفضحينا يعني انت
ملك (بتمتم) : ما تقرب مني
ابراهيم: والله انتي انسانه غريبه .فجأه قمتي ترجفي ويدك بارده في شنو
ملك: مافي حاجه
ابراهيم كان ببتسم لانو عارف الكلام القالو لي ملك عمل فيها شنو
ابتهال جات لي ملك
ابتهال : في شنو ي ملك
ملك: مافي حاجه ي خالتي
ابتهال وبتعاين لي ابراهيم
ابتهال: انا افتكرتا في حاجه
ابراهيم: مافي حاجه ي خالتي اطمني
بعد خلصو حفلتهم جو عملو الجرتق ودا كلو ملك مستحملاهو مع انو ما كانت طايقه اي حاجه ونفسها تخلص بس وفي نفس الوقت خايفه من حياتها الجديده مع ابراهيم بعد انتهت الحفله كل الناس طلعو وبقو هم بس في الصاله
ابراهيم: ح نمشي نسافر طوالي ي ملك
ملك(بخوف) : نسافر وين؟ انا ما عايزا اسافر عايزا اقعد هنا
ابراهيم: الموضوع انتهى خلاص وانا حجزتا ح نسافر السعوديه ونقعد كم يوم هناك
ملك(بصوت عالي) : قلتا ليك ما عايزا اسافر انا ما عايزا
عبد الوهاب :اوعك تعلى صوتك في راجلك ي بت انتي ما عندك احترام
ملك: ما عايزا اسافر قلتا ليكم انا عايزا اكون جمب خالتي بس
ابتهال: حبيبتي كلها يومين وح ترجعو ما تخافي وح تلقيني منتظراك وكل يوم ح اتكلم معاك هناك طيب
ملك (عيونها اتملو دموع) : ما عايزا ي خالتي اسافر عايزا اكون معاك بس ما تخليني
ابراهيم اتلفت على عبد الوهاب : يا عمي عندي معاك كلام ممكن نطلع برا
عبد الوهاب : اتفضل
بعد طلعو جا اسماعيل لي ملك وبحدر ليها
اسماعيل( جا قرب من ملك ومسكها من يدها قوي وبصوت واطي) : يااخ انتي مالك يااخ عايزانا نقوم نتجنن عليك ونعمل ليك شي ما ياهو قدام راجلك
ملك بتبكي ابتهال زحتها من اسماعيل وساقتها
ابتهال: تعالي غسلي وشك برا وشمي ليك هوا شويه طيب
ابتهال طلعت ملك برا
ابتهال: اقيفي كدا هنا شويه ي بتي احتمال ترتاحي انا بمشي اجيب ليك مويه من جوه واجيك كويس
ملك: طيب
اثناء ما ملك واقفه سمعت صوت عبد الوهاب وابراهيم وابراهيم كان بكورك فيهو جات قربت منهم وبقت تسمع في الكلام ...
ابراهيم: انا بتك دي بقيت ما قادر استحملها بسببها اتحملت كلام الناس وكل شويه امي تقعد تنق فيني
عبد الوهاب: وانت معرسها ليه طيب ما دام انت ما طايقها
ابراهيم: انت عارف انا ليه عرستها كويس اوووعك تنسى انك وعدتني بمجرد اعرس بتك واستر عليها انتي ح تبعيني الارض بتاعتك عشان استثمر فيها
عبد الوهاب: ايوااا كدا كويس جدا انت عرست بتي عشان انا اسجل الارض بأسمك يعني مصلحه وانا وافقت اعرس ليك بتي عشان انت تستر عليها

ابراهيم( بضحكه) : عشان تستر عليها؟! ..انت واحد كذاب انت ما عايز مصلحه بتك انت عرستها عشان انت عندك معاي مصلحه وانا عارفها كويس ي سيد عبد الوهاب شنو هي ..اذا كان بتهمك بتك وعايز مصلحتها كان مشيت اخدتا ليها حقها بالقانون من الزول الاغتصبها وهي صغيره
عبد الوهاب: ما كنت ح استفيد شي غير اني اجيب العار لاسرتي تفتكر هم بعد الموضوع دا ح يخلوها يعني كانو ح يقتلوها تفتكر هم ما كانو ح يعملو كدا يعني اذا انا فكرتا من زمان اني اتخلص منها ومن العار بتاعها
ابراهيم: وانت جيت حملتني ليهو انا ..يعني في النهايه انت مجبور تنفذ اي حاجه بقولها ليك عشان ما اعمل ليك مصيبه كبيره ي سيد
عبد الوهاب( بضحكه) : وانت كمان ح تتفضح معانا ي استاذ لانك في النهايه معرس وحده معتدى عليها
ابراهيم: انت واحد ما عندك رحمه ما بتستاهل انو ملك تكون بتك لانو بعد اي حاجه انت عملتها فيها هي لسه بتحترمك وبتقول انك ابوها
عبد الوهاب : ما تعمل لي نفسك انت اسي حنين على ملك وموضوع اغتصابها لمن كانت صغيره دا ما مفروض ذول يعرف فيهو
ابراهيم(بضحك) : زي ما حابي ي عمي بس بالله اتصرف معاها خليها تفك معاي شويه
عبد الوهاب: تمام
ملك الكلام دا وقع فيها زي الصاقعه ما كانت قادره تقيف حتى الدموع في اللحظه ديك اتجمدت عند ملك ما كانت عارفه تعمل شنو اترمت في الكرسي الجمبها واتذكرت ابشع ذكرى من طفولتها حصلت معاها الذكرى الدمرت برائتها وسرقت منها طفولتها محمد ال كان زي اخوها سرق منها كل احلامها وحتي رغبتها في الحياه فقدتها بسببو واتذكرت ابشع ايام حياتها .....
في يوم وملك كانت راجعه من المدرسه مشت عند خالتها ابتهال في البيت اول ما دخلت لاقاها محمد
ملك(بضحكه ووجه برئ) : محمد كيفك ؟ وين خالتو ابتهال ؟
محمد (بعاين لي ملك من فوق لي تحت ونظرات خبيثه) : اووو ملوكه اشتقت ليك ياخ
ملك ابتسمت ليهو : انا ذاتي والله ي احلى اخ جبتا لي خالتو ابتهال معاي حلاوه عرديب من المدرسه هي بتحبها شديد اديك معاي ؟
محمد : ما اسمعك تاني تقولي لي اخووي تمام
ملك (باستغراب) : ليه يااخ ؟ بالعكس بحب اقول الكلمه دي ليك واسي انا محظوظه عندي تلاته اخوان جمبي يحموني ويخافو على دي حاجه حلوه والله وانا محظوظه شديد
محمد ( بضحك وجا قرب من ملك ) : تعالي خشي جوه معاي
ملك : محمد ليه عيونك حمره كدا ؟؟
محمد : دا العصير دا بعمل كدا تعالي اديك منو
ملك ( بتضحك) : العصير كمان بحمر العيون
محمد (بقرب منها) : اااي تعالي جربيهو
ملك: لالا ما عايزا عيوني يبقو حمر وما وريتني ي محمد يااخ خالتو ابتهال قاعده
محمد ( هبش شعر ملك) : ااي صح عيونك حلوه ما مفروض حاجه تأذيهم
ملك: زح يدك دي يا عوير هاك امسك لي الشنطه دي ما تختها في الارض طيب لانو فيها كتاب قرآن وما صح اخت الشنطه في الارض وفي كتاب قرآن انا بمشي اشوف خالتو ابتهال وين
محمد ( بضحك) : امششي ااااي طواالي شوفيها بتلقيها قاعده في غرفتي بتكوي في الهدوم
ملك : يا عوير ما كان تتكلم من الاول طيب
محمد : اسي امشي ما فات شي
اول ما دخلت ملك جوه الغرفه جا محمد لحقها وقفل الباب عليهم بالمفتاح
ملك: محمد انت عوير وين خالتو ابتهال مش قلتا لي قاعده هنا
محمد (بقرب منها ) : بتجي اسي اقعدي معاي حبه
ملك : لالا خلاص بمشي وبجيها بعدين
اول ما ملك مشت على الباب جات تفتحو لقتو مقفول اتلفت على محمد لقتو جاي عليها قالت ليهو : محمد ليه قافل الباب تعال افتحو لي
محمد ( مسك ملك من يدها وبجر فيها) : قلتا ليك اقعدي معاي شويه يااخ
ملك ( بخوفه ) : محمد انت مالك عامل كدا ؟ فكني انا عايزا امشي
محمد ( بصوت عالي وجر ملك ) : قلتا ليك اقعدي
ملك ( بتمتم وخافت شديد ) : محمد خليني امشي
محمد بقا بمسك في ملك وبلاوي فيها وهي تلاوي فيهو وبتكورك بأعلي حسها وحصل الحصل بعداك
خالتها اول ما وصلت البيت سمعت صوت بكى جات فتحت الغرفه واتهجمت لقت ملك واقعه في الارض ومنظرها يرثى له جات جاريه عليها وبتكورك
ابتهال ( بخلعه وبتكورك ) : ملك ملك مالك ي بتي دا منو العمل فيك كدا
ملك ما كانت قادره تتكلم
ابتهال ( بتبكي ) : ملك يا بتي دا منو العمل فيك كدا
خالتها سمعتها بتمتم براحه وبتقول محمد
خالتها اول ما سمعت بقت تكورك وتقول لا لا محمد ما بعمل كدا ما بعمل كدا ي ملك وضمت ملك عليها وبتبكي شديد في اللحظه ديك ملك غمرت وما عرفت ابتهال تعمل شنو وضربت لي عبد الوهاب ونقلوها للمستشفي بدون ما يشعر اي زول وقعدت فيها اسبوعين لانو وضعها كان متأذم شديد من ناحيه نفسيه وجسديه ما كان في زول عارف غير ابوها الكان بضربها كل مره وبلوم فيها وبحملها الذنب وعمتها بثينه الكانت ما راحمها بالكلام وبطعن فيها كل ما تشوفها وما بتفوت فرصه عشان تذكرها بالحصل معاها وقت كان عمرها 12سنه ولحد الان وخالتها ابتهال ....كل دا اتذكرتو ملك ونزلت منها دمعه حارقه وكان نفسها تكورك وتطلع الف آآآآه من جواها لكن ما قادره اول ما ما قامت حست راسها تقيل وشاي

شايفا سواد سواد قدامها وطوالي وقعت في الارض......

يتبع......

#ملك
-٩-
بقلم سجى اليزيد

فاطمه: خالتو ابتهال ملك كيف؟ هدت شويه؟
ابتهال: بتبكي والله ما عارفه اعمل ليها شنو زاتو ابراهيم دا ليه كدا يااخ البت ما كانت عارفه وهو اسي جا هجمها كدا فجأه
فاطمه: واضحه يا خالتو هو قاصد يعمل كدا
ابتهال: امشي ليها برا عليك الله وشوفيها واتكلمي معاها شويه احتمال تهدا مسافه ما اجيها
فاطمه: حاضر
ابتهال: صحي انتي هاجر وين ؟
فاطمه: والله ي خالتي فجأه طلعت حبوبتها تعبت شويه قالت لي
ابتهال: ي ستار الله يشفيها ي رب ان شااء الله م يكون في حاجه كعبه حاصله ليها
فاطمه: ان شااء الله ي خالتو
وطلعت فاطمه برا لي ملك وفجأه لقتها واقعه في الارض
فاطمه(بتكورك) : ملك ملك ردي على في شنو ملك قومي
فاطمه وبتكورك سمعها عبد الوهاب وابراهيم وجو جارين
ابراهيم: في شنو مالها البت دي ؟
فاطمه( بتبكي ) : ما عارفه والله جيت لقيتها واقعه في الارض
عبد الوهاب : يا بت يا بت قومي
فاطمه ( بتبكي وخايفه) : ح امشي انادي خالتو ابتهال
فاطمه مشت تنادي ابتهال وابتهال طوالي جات جاريه لي ملك
ابتهال(بخلعه) : مالها ملك ؟حصل ليها شنو ؟
ابراهيم: ما عارف بس فاطمه كانت بتكورك فجأه لقينا ملك واقعه
عبد الوهاب كان بكفت في ملك بقوه عشان تقوم ابتهال مسكت ليهو يدو
ابتهال (بتكورك) : ززح يدك دي منها انت السبب عملتا شنو للبت لمن خليتها تغمر عملتا ليها شنو انطق
عبد الوهاب (بكورك) : اوعك تعلي صوتك ي مرا انا م عملتا ليها حاجه وانا اسي متفاجئ زيك حصل ليها شنو
فاطمه (بتبكي ) : عليكم الله ي جماعه اسي دا ما وقتو شوفوها مالها ابت تصحى ..ي ملك ملك قومي عليك الله
ابراهيم : عمي ارح افتح لي باب العربيه انا بشيلها بوديها المستشفي
ابراهيم شال ملك وطوالي ودوها المستشفي ودخلوها عشان يكشفو عليها وهي لسه ما صحت ..ابراهيم مشى جرا عبد الوهاب براحه وبقى بتكلم معاهو
ابراهيم : بس ما تكون قبيل البت دي سمعت كلامنا
عبد الوهاب : ما اظن تكون سمعت بعدين حتى لو سمعت ما بتفهم حاجه من كلامنا
ابراهيم (بكورك) : كيف يعني ما ح تفهم ما ح تفهم انو انا عارف انو محمد اعتدى عليها ؟
عبد الوهاب : لو سمعت ح يحصل شنو ؟ ما تخاف هي اضعف من انها تفتح خشمها وتقول كلمه لي زول بتي وانا عارفها
ابراهيم:كويس ي عبد الوهاب لكن اذا بجيني اي كلام فارغ او شوشره من ورا الموضوع ما ح اريحك لا انت ولا بتك
ابتهال شافتهم من بعيد بتناقشو وابراهيم منفعل في الكلام وطوالي جات عليهم
ابتهال: في شنو مالكم انتو الاتنين
عبد الوهاب : مافي حاجه انتي مالك حاشره نفسك في اي حاجه ي مرا والله راجلك ليهو حق يطلقك
ابتهال (بابتسامه) : دا الطلع معاك ي عبد الوهاب شكرا ليك ي اخوي
فاطمه جات جاريه
فاطمه: خالتو ابتهال تعالي الدكتور قال ملك صحت
اول ما وصلو سألو الدكتور عن وضع ملك
ابراهيم: في شنو ي دكتور مالها مرتي ؟؟
الدكتور: ما تخافو شويه ارهاق بس ودمها ضعيف شويه
ابتهال: يعني وضعها ما خطير
الدكتور: لالا م عندها حاجه م تخافو حاليا ح نديها دربين عشان تقدر تقوى شويه وح اوصيكم على الاكل بتاعها لازم تاكل حاجات تزيد من دمها
الدكتور اتلفت على ملك وكانت سرحانه وبتعاين للسقف وما بتقول اي كلمه
الدكتور : مدام ملك انتي لازم تنتبهي لي نفسك شويه عشان صحتك تبقى كويسه تمام؟
ملك ما قالت كلمه
الدكتور: حصل جاتك ملاريا قبل كدا
ملك لسه ما اتكلمت والدكتور استغرب واتلفت على اهلها
الدكتور: عفوا في شنو مالها المريضه
ابراهيم : ما عندها حاجه بس الليله كان عرسنا وهي تعبانه شويه مش كدا ي ملك
الدكتور: طيب ي مدام ممكن تخليني اكشف عليك
لمن جا الدكتور عشان يكشف على ملك اتهجمت واتكرفست بالتوب اللابساهو بقت تكورك وتبكي
ملك: زح مني عليك الله م تعمل لي شي
الدكتور استغرب شديد وطوالي طلع برا وعرف انو في حاجه م طبيعيه
عبد الوهاب : اسكتي ي بت اسكتي عايزا تفضحينا في المستشغي كمان
ملك (بتبكي) : زحوو مني عليكم الله خلووني ما عايزا زول فيكم عايزا اقعد برااي
ابراهيم: الله يعينا نحنا من الليله الزفته دي
ابتهال:اطلعو برا خلوني معاها
ابتهال قعدت مع ملك وحضنتها لغايه ما نامت
فاطمه: ملك مالها ي خالتو ؟ليه اتصرفت كدا؟
ابتهال(بتمتم) : بتكون تعبانه من العرس بس وبعدين عارفاها انو هي مجبوره
فاطمه (بصرامه) : ليه ما وقفتي معاها طيب وهي مغصوبه تعرس ابراهيم
ابتهال (بتمتم ) : انا م بيدي اعمل حاجه ي بتي
وفعلا ابتهال ما كان في يدها تعمل حاجه لانو لو منعت زواج ابراهيم من ملك وهي عارفه مصلحه زواجو من ملك وعارفه مصالح ابوها ابراهيم ح يفضحهم لانو عارف قصه محمد مع ملك وملك ح تواجه المجتمع القاسي وح ينظرو ليها كانها بت ما كوييسه وخافت من كلام الناس ومعامله ابوها واخوانها واعمامها ليها ويمكن كمان يقتلوها لانو عارفه نظره المجتمع للمغتصبه بتكون كيف كلها ظلم
ملك رقدت في المستشفي لغايه الصباح وبعدين طلعوها وطبعا موضوع السفر طرشق
ابراهيم: ح نضطر نمشي بيت امي لانو

الطياره امبارح قامت مافي طريقه نسافر
ابتهال: اي احسن امشو البيت
ملك: اررح امشو معاي ي خالتي انتي وفاطمه ما تخلوني براي ارح معاي
ابتهال: ي قلبي انتي
فاطمه: والله ي ملك لو كان عندي طريقه بمشي معاك لكن انتي عارفه امي براها م بقدر اخليها براها
ابتهال: انا م بقدر اخليك تمشي براك ي فاطمه مع الرجال ديل
فاطمه: ما تخافي على ي خالتو مافي حاجه بتحصل انتي خليك مع ملك ما تخليها براها
ملك: خلاص ي خالتي ما صح تخلى فاطمه مع ابوي واخواني ترجع براها عشان م تسمع كلام كتير
فاطمه:وانتي ي ملك
ملك(بابتسامه) : ما تخافي على الله معاي
اثناء كلامهم تلفون ابراهيم ضرب
وكانت امو نعمه
نعمه: اها ي ولد سافرتو
ابراهيم: لا الموضوع طرشق لانو بايتين امبارح في المستشفي ملك تعبت شويه
نعمه: سجمي ي يمه سجمي ما تكون البت كمان عيانه ولا حاجه ي ولدي تقوم تعمل ليك حاجه كمان لا سمح الله
ابراهيم: لا ما عندها حاجه قلتا ليك تعب بس عايز اقول ليك شنو ي امي ح نجي نقعد معاك فتره في البيت
نعمه ( بتكورك) : شنو شنو ي ولد هوووي انا مش كلمتك قلتا ليك بت القري دي ما تجيبها لي هنا مش قلتا لي بفتش بيت لينا برانا
ابراهيم: امي ممكن تهدي نحنا مفروض كان نسافر ومن هناك كنت ح ادبر لينا اي مكان هنا وكنت ح اجهز ليها بيت ليها هنا براها لكن انتي شايفا اسي المواضيع اتلخبطت
نعمه: دي ما شغلتي وبعدين بت القري دي عليك الله سكنها في اي حته وخلاص .الجيهها والبيوت الفخمه دي شبها يعني عليك الله م تفضحنا اكتر من ما فضحتنا
ابراهيم: امي عليك الله انا م قادر اتكلم عايزا نجي ولا لا
نعمه: وعايز تجيبها كيف ونسوانك التلاته هنا جيبها عشان يقطعوها ليك قطيع
ابراهيم: مافي شي ح يحصل ما تخافي اها نجي عليك ؟
نعمه: سمح تعااالو حبابها عروستنا الجديده
ابراهيم: خلاص ساعه ونكون عندكم
سلافه كانت قاعده مع نعمه وسمعت الكلام كلو وسلافه دي مره ابراهيم الاولى وعندها منو ولد عمرها اربعين سنه سلافه دي نفس نعمه ام ابراهيم وجهان لعمله واحده
سلافه: مالو ابراهيم ي عمتي ؟
نعمه: قال عايز يجيب البت هنا
سلافه: ممش كانو مسافرين مالهم غيرو رأيهم؟
نعمه(بضحكه) : البت قالو تعبت وودوها المستشفي
سلافه: عاد لكن الله يجيرنا منها البت دي شكلها كدا صعبه وبت ما تمام
نعمه كانت بتعاين لي سلافه وشايفا الحقد في عيون سلافه وكان عاجبها الوضع وهي ما وافقت ساي على انو ملك تجي عندهم كان عندها هدف !
نعمه(في سرها) : تعاالي ي ملك تعالى لي والله انتي ح تشوفي ايام جميله معانا .......

يتبع........

#ملك
-١٠-
بقلم سجى اليزيد

ابراهيم بعد خلص مكالمتو مع امو جا لي ملك واهلها
ابراهيم: اها ي ملك ارح البيت يلا عشان امي مستنيانا
ملك: خالتي عليك االله تعالي لي ما تنسيني طيب ما تخليني براي هنا
اسماعيل: برااك شنو ي بت انتي مجنونه وراجلك بعمل في شنو
ابتهال ( حضنت ملك) : ما بقدر انساك انا اصلا حبيبتي وكلها كم يوم وارجع ليك تاني
ملك ودعت خالتها وفاطمه وكانت بتبكي اتلفت على ابوها واخوانها على امل واحد فيهم يقول ليها كلمه طيبه بس مافي زول فيهم عبرها وطوالي مشو
ابراهيم(بزهج) : اررح يااخ خلاص مش كلمتك خالتك قالت ليك كلها يومين وبتكون معاك اطلعي يلا
ملك عاينت لابراهيم بنظره احتقار وكانت قرفانه منو شديد
ابراهيم: بتعايني لي كدا مالك؟
ملك ما اشتغلت بيهو وطوالي ركبت العربيه في الطريق ابراهيم كان شغال يتكلم ساي بس هي م كانت معبراهو ولا حتى فتحت خشمها معاهو
ابراهيم : عايني انتي مش عارفه انو انا معرس تلاته نسوان
ملك: اي
ابراهيم: طيب تمام شوفي ي ستي اوعك تتعرضي لي واحده منهم واذا واحده اتكلمت معاك ما تردي عليها عشان انا والله م ناقص جوطه نسوان وكلام كتير مع امي اذا حصل خلاف كدا ي ملك ما بخليك سامعه ؟
ملك: لمن تنتهي مصلحتك مع ابوي ممكن ترتاح مني
ابراهيم (وقف العربيه وبقى بعاين لي ملك) : انتي سمعتي شنو امبارح؟
ملك : سمعت اي حاجه قلتها انت وابوي
ابراهيم: ايوااااا عشان كدا حصل ليك الحصل
ملك: تتذكر انت قلتا لي شنو قلتا لي انا عرستك عشان احميك من اهلك لكن كلو طلع كذب وجبت سيره محمد عشان تضايقني
ابراهيم (بصوت عالى) : اسمعي ي بت الناس انا م داير منك كلام كتييير انتي مش مفروض تحمدي ربك اني عرستك وسترتك وحميتك من كلام الناس
ملك: منو القال انا فارق معاي كلام الناس
ابراهيم ( بضحكه ) : طيب اذا كدا ليه ما مشيتي اشتكيتي على ولدك خالتك ؟ خايفه من كلام الناس؟ ولا من محمد ؟ ولا اهلك خرصوك ؟ اهلك كانو ح يقتلوك ي مدام
ملك: ي ريت لو كان قتلوني
ابراهيم( بضحكه وقرب من ملك) : لا ياااخ الحمد لله ما قتلوك لو كنتي انتي ميته انا مصلحتي ح احققها كيف وبعدين ما حرام قمر ذيك كدا يضيع ؟!
ملك: اذا انت عايز تحميني كان تدافع عني وتكون راجل قدر كلمتك وتحميني من نفسك اول
ابراهيم ( هااج وبكورك ومسك ملك من يدها ) : اسمعي هنا انا راجل رجلك فوق ركبتك واذا كان راجل غيري وعارف حقيقتك ما كان بقرب منك واذا تاني فتحتي الموضوع دا ما برحمك ي ملك وبرجعك لي ابوك جثه فاهمه
ملك ( بتبكي وتكورك ) : اقتلني اسي دي اقتلني وريحني من العيشه العايشاها دي
ابراهيم : اوعك تكوركي فيني ي بت
ملك ( لسه بتكورك وتبكي) : اقتلني قلتا ليك
ابراهيم: انا لحدي الان ما مديت يدي عليك لكن واضح عايزا تتربي من اول وجديد خلينا نصل البيت بس
وطوالي دور العربيه وصلو البيت
سلافه: عمتي عمتي ابراهيم وصل
نعمه: امشي افتحي ليهم الباب
وقبل ما سلافه تفتح الباب ابراهيم فتحو وكان بكورك في ملك وهي بتبكي وجاريها من يدها
نعمه (مخلوعه) : بسم الله ي ولدي في شنو عملت ليك شنو البت دي
سلافه: ابراهيم في شنو ؟
ابراهيم( هايج) : اوعكم تتدخلو فاهمين
ملك (بتبكي) : فكني عليك الله يدي وجعتني
ابراهيم : ولسه ح تتوجعي زياده
ابراهيم مشى طلع ملك غرفتهم ورماها في الارض
ابراهيم ( بكورك ) : ح تقعدي هنا لغايه ما تتأدبي واذا ما ادادبتي ح اضربك لمن تطلع روحك واكل وشراب مااف عشان تاني تعرفي تتكلمي مع راجلك كدا العذاب الشفتيهو عند اهلك هناك داك ح يكون ولا شي قدامي عذابي ليك ي ملك من هنا وجاي
ابراهيم طلع وقفل الباب على ملك
ملك ( بتبكي ) : عايزا خالتي
ابراهيم مشى لي امو نعمه وسلافه
ابراهيم : البت دي ما تفتحو ليها الباب نهائي الا اجي افتحو ليها انا واكل ما تدوها
نعمه : عاد ي ولدي بالغتا ما لدرجه الاكل والشراب ما نديها
ابراهيم (هاج) : البقولو ليكم عليكم الله ي امي نفذوهو عشان ما اتجنن فيكم
ابراهيم طلع وساب البيت
سلافه : بسم الله الراجل مالو البت دي بتكون قالت ليهو شنو خلتو مضايق كدا
نعمه : خليها تستاهل دا مصيرها اصلا كدا اذا حاولت تتذاكي ما عارفه نفسها علقت مع منو هي
سلافه : كدي امشي اشوفها
نعمه :انتي ما سمعتيهو قال ليك شنو
سلافه : امشي اسمعها بتقول شنو
نعمه : قلتا ليك لا ما ناقصين اسي الراجل يجي يجوط فينا
سلافه : لكن ي عمتي البت دي صغيره عمرها كم ؟
نعمه : قالو 18سنه كان صحى ما بعرف
سلافه: اججي واهلها مالهم مستعجلين عليها كدا
نعمه: اصلا البت دي فيها حاجه ما مريحه الله يكفينا شرها بس
اثناء ما هم بتكلمو جات داخله عليهم تماضر ودي زوجه ابراهيم التانيه عمرها في اواخر الاربعينات وبالرغم من انها كبيره في العمر من ابراهيم الا انها بتحبو شديد اكتر من باقي زوجاتو بس ابراهيم لا لانو برضو عندو مصلحه معاها لانها كانت مروقه شديد واهلها مرطبين .ومريم دي زوجتو التالته وعمرها كم وعشرين ومتدينه