بعد انفصلو لاقاها بعد سنتين:
سلم عليها وقال ليها كيف عامله؟
ردت عليه بصوت حلو وكانت مبسوطه انا تمام والحمد الله كلو في السليم وتحت السيطره
قال ليها حياتك كيف بعدي انشاء الله مبسوطه وعايشه حياتك قالت ليه الحمد لله باكل وبشرب وبتنفس وعايشه احلي عيشه وكلو تمام
قال ليها ماقاعده تتزكريني ابدا قدرتي تنسيني بالسرعه دي؟ قالت ليه اصلا بعدك بقيت بنسي سرعه سبحان لله بنسي اي شئ هسي اقوم منك مابتزكر حاجه وضحكت قالت ليه بالمناسبه متزكره الشخصيه بس اسمك منو ضحك وقال ليها هههههه معقوله بس
قال ليها ماحبيتي بعدي زول؟ ضحكت وقالت ليه اصلا البحبك مابحب ولا بفكر احب تاني عارف ليه؟ لا نو ح يفهم انو الحب دا اكتر حاجه غزره في الدنيا مستحيل اتعرض للحب تاني ما ناقصه صدمات المهم مخطوبه وعرسي قريب انشاء لله ضحك وقال ليها ربنا يتم ليك علي خير
قال ليها طيب مابتشتاقي لي ابدا؟ قالت ليه الشوق والحب والمشاعر دي راحت زمان ما عاد شئ يهمني هههه شوق شنو كمان انا اكبر من كدا
فجاه دموعها بدت تنزل ماقدرت تتحمل اكتر قامت قالت ليه امكن انا اتاخرتا لازم امشي سلام
جرت ولقت ليها مكان فاضي قعت تبكي بشده وخاته ايديها علي خشمها عشان ماف زول يسمعا
وبدت تتكلم براها وترد علي كل الكلام السالو ليها
اولا ياريتك تعرف اني من يوم غيابك انا عايشه وميته بتزكرك كل يوم مانسيتك ولا ثانيه ومشتاقه ليك شديد تعرف اني ما بنوم وصورتك في حضني ودموعي في خدي بصحي اول حاجه بشوفا صورتك وطول اليوم بفكر فيك معقوله انساك وانسي اسمك انت حنيني وحبيبي واسمك محفور جواي ياسلااام يااحلي وجع ياخ بحبك كمان عاوز يعرف اني حبيت بعدو ياخ دا منقولي انت الدنيا كيف احب بعدك كمان الاهبل صدق اني مخطوبه ياخ انا بهواك انت ح افضل طول عمري علي زكراك وبدت تصرخ اخ يا انا ياريتك تعرف كل دا بس لا يابت انتي اكبر من كدا يلا امسحي دموعك ولازم تنسي
فجاه حست انو في زول وراها قبل ما تتلفت قام لفتا عليهو بي قوه وحضنا عليهو شديد وقعد ابكي
قال ليها كنت عارف انك لسه بتحبيني ياهبله وانا كمان مابقدر بدونك اسف يا انا عزبتك معاي سنتين بس ولله بحبك هبله دي مفتكره اني ماعارف انك لسه بتحبيني ومامخطوبه كلامك كلو كان كزب وانا باريتك وعرفتا كل شئ اصلا مستحيل تكوني لي غيري بحبك يامجنونه♡♥
ورجعو لي بعض
♡♥
النهااااااااااااااااااااااااااااااااايه 💕💕💕💕💕💕💕💕
#هوااري
#مقتطفات

يلاااا حاولو حسو معاي الحكتبو ليكم دا
انو ابوك يقول ليكم انا ماشي اعيد لي امى واحضر عقد بت اخوي واتونس مع امي واخوانى شويه واجيكم طيب خلاس ي ابوى تمام في العافيه وربنا يستر عليك يلااااا هو سافر وقضى حاجاتو .وفي يوم اتصل عليها قال ليها جهزي الغدا انا في الشارع جاي عليكم يلا هي طلعت نجيب العيش من الفرم وهي راجعه ع البيت احساس انها حتلقاهو جا او حتنغدا معاهو سوا دا في حد زاتو كان احساس حلوووو بالنسبه ليها لانو من دون اخوانا بحبها وبتحبو شديد وهى ماشا ع البيت يلقاها واحد يقول ليها ي نسرين ابوكى مات هي دا كلام شنو مات كيف وبتين وهسه هو كان بيتكلم معاي وقال حيتغدى معاى مات بي حادث وهو جاي عليكم المهم حصل الحصل ورضينا بحكم ربنا وقولنا الحمدلله ونسرين واخوانا عانو م عانو من الم وفقد عظيم كانو بيتصبرو بي امهم البقت ليهم سند وام وابو يلااااا يتكرر نفس السيناريو بس في حته تانيه في مدينه تانيه بعد م طلعو من الابيض وجو الخرطوم عسي ولعل تغسل احزانهم شويه بس للاسف زاد الجراح وعاودت نفس الالم بس بي سينارو غير لانو الدنيا رمضان فهي جايه من الشغل وضربت ليها نهى بتها قالت ليها ى ماما جيبي لينا معاكى حاجه نخلطا الكلام دا كان يوم الاربعا الساعه 2ضهر وهى نازله وجات قاطعه النفق جات العربيه الما خلتا تصل بيتا الما خلتا تجيب لي نهى الخليط وبي نفس التلفون يتصلو عليهم ويقولو ليهم امكم عملت حادث وهسه هي في المستشفي يوم الخميس25رمضان المهم المنظر الله م وراكم ليو لا في عدو ولا حبيب احساس انك تمر بنفس الامتحان الصعب المر للمره التانيه وفي اعز زول بالجد حاجه بس الحمدلله ما كان في يدهم غير الدعاء والرجاء لرب العزه يلا الساعه 2الا ربع هى تعبت شدييييييييد والاطباء حاولو بقدر الامكان انو يخففو عليها لكن هيهات لانو خلاص ربنا اراد انو ياخد امانتو الساعه 2 يوم الجمعه اتخيلو هى صايمه فاتت زى م ابوهم فات لا وصت لاقالت فاتت خالتى كاكا المره العديله النضيفه الخجوله الصبوره ام الكل البتهدي الغير العيبه م بتطلع منها فاتت وحرقت قلوبنا عليها فاتت وخلتم من غير سند من غير ابو ومم غير ام
هى م اقدر اقول ليكم عنها شنو بالجد م قادره
كلكم بتكونوا قريتو رواياتها #نسرين_محمد_ادم عليكم تدعو ليها اول مره اطلب منكم طلب ادعو ليهم ربنا يصبرهم ى رب لانو بالجد امتحان صععب
انا لله وانا اليه راجعون
اللهم ارحمها برحمتك
اللهم اكرم نزلها
ووسع مدخلها
واغسلها بالماء والبرد
ى ارحم الراحمين
منقول

- اتصلت ليهآ العصريه كدا وانا ماشي على الميدان ، زهجان على غير العآده واخلاقي في مناخيري ، ردت وقالت لي " خخير مش مواعيد الكوره داقي مالك " ، ققلت ليها أطلعي لي جنب الباب بدور أشوفك ، ولمن وصلت قريب لي بيتهم جاتني بي توب أمها بتاع الصلاه والسفنجه ويا ححلاوه البشتنه فيها .
قلت ليها " جاتني زهجه فجاه ومضايق ياخ قلت أكحل عيني بي شوفتك " .
جات وقفت جنبي وقالت لي " دي رساله من ربنا علشان تمشي تصلي ليك ركعتين عسى ولعلى تتحسن " قالت لي دقيقه ودخلت بيتهم جاني طالع اخوها قال لي تعال تعال اتفضل واقف مالك فلانه قالت لي بتدورني ، عرفت فهمها فقلت ليهو عايز اصلي لي ركعتين ولقيت روحي قريب من بيتكم دخلت اتوضيت وبديت أصلي ولقيت روحي لا إرادياً بقول " يارب اجعلها من نصيببي ، يارب م توريني فيها شر " في كل سجده وبعد انتهيت وسلمت ، لقيت جنبي مصحف فتحتو وكانت في ورقه فيهو كاتبه لي فيها " ولمن تقرا سوره يس حتحس بي راحه اكتر ، السوره في صفحه كدا وما تنساني من دعواتك " عملت زي م قالت لي ، وبعد خلصت لقيتها جايبه الشاي ، اخوها قال ليها يديك العافيه وابتسمت ومرقت .
- لمن اشوفها بتلبش ، بحس يومي كلو حيظبط او بالاصح بكون ظبط وانتهى ، بحبها ياخ لمن تخجل وهي كمان خجاله ، لمن تزعل ومن الزعله م تقدر تتكلم وتبدا تتمتم ، غيرتها البتحاول تدسها وبرضو بتظهر في عيونها ، عيونها ؟ وآخ من عيونهآ ، ومن البُن الفي العيونها ، مجرد م تعاين لي بلقى روحي لا ارادياً بقول " يا حفيظ أحفظ " ، لمن تتشاكل مع اخوها وتقعد تبكي لي التلفون بتكون فيها كميه برائه كدا م تتخيل ، لمن المحها مآشه الدكان ومخمخمه التوب وهي اصلا م بتعرف تلبسو وماشه وتتزهج بكون بس متمني الوقت يقيف هنا واشوفها وهي متنرفزه كدا.
- بحبها وبحب أفكارها البتجنن لي فيها فجاه وبحبها لمن تكون عاقله وتديني النصايح وتكون زي أمي ، بحبها وبحب لهفتها لمن تكون قلقانه علي بحبها وكفى 💘.
" يا حاجه حلوه تخصني ، كل المُنى أنو ربنا يستجيب لي وتكوني حلالي وأكمل بيك نص ديني " 💛💛.
اللهم حلالا يشبه امانينا
- RUBA KHALID 🖤💃🏿.

💙..الزينة
#مقتطفات

قالت..علاقتي كانت كعبه شديد مع ربنا بصلي وقت وبفط البقيه حتي لو صليت بالي بكون ف شي غير وم بعرف نفسي ف ياتو ركعه اصلاا كنت متعلقه ب صحباتي وصحباتي بتاعات الفتره ديك م كانو بصلو او م بصلو قدامي
بعد فتره امي تعبت شديد كانت اكتر المرات بتشخر شخره الموت وانا قلبي دا كان مرات بحس بيه بقيف لي اسي بتزكر لمن هي تعبت شديد وبقو ينعشو فيها الوقت داك م عرفت اعمل شنو بالرغم من انو انا بعرف اسعف وبعرف للحاجات المفروض تتعمل بس م قدرت ...

وتمت كلامها وقالت مشيت اتوضيت وجيت صليت م كنت عارفه بقرا ف شنو من خوفي عليها لكن كنت متأكده من انو انا م دايره اخسرها م بقدر اصحي بدون م اشوفها بدون م تسرح شعري للمدرسه بدون م توصلني الترحيل بدون م تشاكلني لمن اطلع الشارع ف عز السخانه الحااجات دي وغيرها كانت جايطه لي راسي شديد
بقيت بس بصلي وبعد خلصت جريت جبت المصحف وبقيت خاته يدي ف راسها وبقرا ومن الخوف عضامي دي كلها بترجف للحظه حسيت بيها ارتاحت.... لكن فجاه تعبت اكتر وودوها المستشفي بحكم اني صغيره وم بحب امشي المستشفيات ساقوها وخلوني مع اخواني الاصغر مني

اليوم داك من مصلايتي م قمت عديتو كلو صلاه ودعاء(ي ربي عليك الله امي لا والله تاني بصلي وبقرا قران وم بشاغب وم بعزبها وبقرا عشان الامتحانات وبعمل الانت دايرو بس ي ربي عليك الله امي لا ي رب شيلني قبليها ) وتميت باقي دعائي كلو ب ي رب عليك الله امي لا

بعد الساعه 12 جابوها البيت ادوها ادويه ك العاده بقيت م بفارقها حتي للصلاه وخوفي من اني اخسرها ارتبط ب اني م اعصي ربنا بقيت بصلي وبقرا قران وبعمل اي شي يخلي ربنا راضي عني بس عشانها عشان م دايراها تمشي وتخليني م دايره الناس يقولوا لي بت المرحومه زي اولاد خالتي وحاجات كتيره م دايراها بدونها او بالاحرى م دايره حياتي بدونها

بعد فتره لقيت نفسي انتظمت ف الصلاه بالرغم من انو ف الوقت داك صليت بس عشان امي م تخليني لكن بقيت بصلي خوف من ربنا شويه شويه احساس الخوف قل بقيت خايفه من انو اعمل شي يزعلهه وبقيت عايزاهو يكون راضي علي عشان م يوريني ضر ف امي وابوي و اي زول غيرهم شويه وبقيت بحب ربنا احساس اني اصلي عشان ربنا يرضي علي ويديم لي اهلي زاد لكن بقي م هو السبب البصلي عشانو بقيت بصلي لاني بحب ربنا ف كل سجده بقيت بقولها (ي ربي انا بحبك ) بقيت بحاول اداوم ع المصحف وم انقطع

حاليا بقيت بضربو بي المثل ف الاخلاق ومحافظتي ع صلاتي ودايره ابدا احفظ القران روحي بقت معلقه فيهه م بقدر كل م اكون دايره اقرا اشيل مصحف لانو م كل الاوقات بقدر عشان كداا قررت احفظو بحبو انا عشان اقرا الحاجه الانا دايراها وقت م انا دايره وختمت كلامه...

بقيت واثقه ف ربناا وبقيت م بخاف من انو تحصل لي شي لانو كل الحصل لي لقيت فيه خير م كنت اصلا متخيلاه ...💜
مرض امي الب سببو قربت ل ربنا اتشفت منو تقريبا وطلع الخير من مرضها انو ابقي قريبه من ربنا...بقيت م بقدر افوت صلاه م بقدر انوم قبل الاذان ب وقت بسيط وبقيت لمن اتزكر اني م صليت من الهجمه جسمي برجف بقيت معلقه فكره اني ممكن اموت وانا م صليت اشوف ربنا كيف من خجلي...💔
لمن بقيت بصلي قلبي صفا وروحي بقت طيبه وحياتي اتحسنت مليون درجهه وف الختام قالت...زي م انا الجني ضحك وعباطه شفع وشيطاني مانعني م الصلاه بقيت بحب ربنا وبحب صلاتي وبحب اي شي بخصو💕
م ف شي صعب بس انتي ابدي وادعي وربنا في💜

Omnia Hassan🔐💜
#مقتطفات

هوو كان صحبي ♥..صحبي من اول يوم ف الجامعة اتعرفت عليهووو ولمن ما اتخرجنااا نحناا سواا هو ال دايما بنصحني وبوريني الصاح من الغلط وامشي مع دي وما تمشي مع دي ..وايام الامتحانات بنراجع سوا وبشرح لي حتى لو الحاجة دي او الشيت ده هو مخلصو بقراهو معاي وبقول لي بتزهجي لو قريتي براك😂♥اقول ليهو طيب وانت 🌚بقول لي بقريكي عشان تغششيني😹😹اقول لي كدي خليني اغشش نفسسسي بعدين افكر فيك 😹🤝🏽المهم بنعدي الامتحانات وانا م واجهت اي صعوبة ف اي شئ ف الجامعة ودايما وقتي ف الجامعة بعديهو معاي وم سمحت لي صحبات او اصحاب تانين يدخلو حياتي بس ك زملاء وبيني وبينهم السلام حتى هو ما كان عندو اصحاب كتار واغلب وقتو معاي انا🙂.. حياتي كلهاا محصورة معاهو وهو كمان حياتو محصورة معاااي بس ك اصدقاء ..🙂💔بس الشئ الما عارفو هو انو اناا كل يوم بحبو اكتر من اليوم القبلووو ..هو ما عارف انو كده بعلقني بيهو م بقدر اكضب علي نفسي والله انو انا بحبو ما بقدر اكذب احساسي وقدر ما اقول انو ده حب صداقة وبس قلبي بقول لا وانو انا عايزاهو جمبي اكترررر ..لقيت نفسي ف ورطة انو انا م عايزة اخسرو كصديق ..وكمان م بقدر اتجاهل المشاعر الجواااي تجاهووو 🙂💔وبقيت اغلب وقتي سرحااانة وبفكر الحيحصل شنوو? ?اصارحو بي مشاعري? ولا اسكت عشان ما اخسر صداقتووو ..طيب انا لمن اصارحووو لو رفض انا ح اعاين ف وشو كيف تاني🙂طيب لو رفض ..معقولة صداقتنا دي تنتهي بالسهوولة دي ولا الحيحصل شنو.. بقيت ف دوامة بتاعت تفكييير ..يا ربي اعمل شنو..😭💔وبقيت اقول ي ريت لو ما خليتو يدخل حياتي ي ريت لو كان تعاملي معاهو بسيط ..ي ريت لو فتحت قلبي لي ناس تانية تدخل حياتي وما كنت محصورة فيهو هو بس 💔ما كان ده كلو حصل وما كنت حبيتوو ..واسا هو لو م قبل بالحاجة دي وصداقتنا واي شئ انتهى انا تاني امشي وين وح اعيش كيف🙂💔كل الحاجات دي جايطة معاي وتعاملي معاهو بقااا كعب شديد بقيت احاول اتجاوزو بحاول ابعد.. وبصدووا وكلامي معاهو ما زي اول ..بس م قدرت والله ما قدرت ..ولمن اتكلم معاهو بي اسلوب كعب او اتنرفز بزعل من نفسي شديد والله وم قادرة ابعد والله😭💔ولمن غلبني قلت بس اصارحو واليحصل يحصل حتى لو رفض انا بتحمل وربناا يتولا قلبي الحيكون مكسور 💔وف يوم كنا متفقين نتلاقة ..اها وبقا بقول لي مالك يا صحبتي المنفسنةة ..مالك متغيرة معاي جبتي ليكي حركات كمااان وريني الحاصل معاكي شنو ..وانا طول القعدة سرحانة ما بين احكي ولا لا🙂وهو لسة بتكلم وفجاءة صرررخ وقال لي بتكلم انااا ردي لي بي صوت عالي كده..وانا بس مع الكوراك حقو داك قلت ليهو انا بحبك🙂وما من الليلة ولا من امس ..بحبك من م اتعرفت عليك من ما انت دخلت حياتي ..كل يوم انا بسٲل نفسي من الشعور ده واسمو شنو كل يوم انت بتعلقني بيك وكل يوم انا بحبك زيادة وعشان نحنا اصحاب ومااا اخسرك م كنت قادرة احكي ..🙂والليلة اتشجعت.. انا م عااارفة اذا كنت بتبادلني نفس الشعور ده ولا حبي من طرف واحد اتنهدت كده تنهيدة طويلة وقلت ليهو اعتبرني م حكيت شي..
قام مسح وشو بيدينو وقال لي اسف💔وانا لمن قال كده بس حسيت انو الدنياا دي ضلمت ف وشي ودموعي نزلوو.. قال لي اسف لٲنك بقيتي اشجع واقوى مني وحكيتي.. اسف لاني م كان عندي الشجاعة الكافية عشان اجي اصارحك ولٲنو خايف اخسرك كصديقة اولااا وانا بس احساسي ف اللحظة ديك ملخبط ..بس عايزة زول يديني كف😹😹♥وبس ببكي وهو بتكلم وبقول لي م عارف حبيتك متين بالظبط بس الشي المتٲكد منو انو انتي الزولة الانااا عايزهااا تكون معاي طوالي ..انتي الزولة الانا حاسي اانها بتكملني انتي الزولة الانااا م ح اقدر اعيش من غيرهاا وماف بت حتعوض مكانهااواليوم داك كان احلى يوووم لي وانو الزول الانت بتحبوو ده يبادلك نفس الشعور بالجد احساس ما بتوصف♥♥#كسرة
ما تحصرو نفسكم بين زول واحد ويا هو ولا لا حبو وانبسطو وصادقوو وكونو صداقات كتييرررة واختاري الناس البتحبك بالجد لانهم ظاهرين شديد والاهم من كده لو عندك مشاعر تجاه رول ما تدسها وتكبتها جواك ..امشي واحكي ليهو حتى لو ما بادلك الشعور بس انت حترتاح كده واتٱكد انو ظنك م حيخيب وانو اي حاجة بتحصل مدبرة ولو الشئ ده ما مكتوب لي معناها ما خير لي ولو مكتوب ليك بجيك في محلك❤❤
كونوا بخير احبتي
#Razan-Abas
#مقتطفات

#خربشات
مره كنت مضايقة شديد كنت م مرتاح خالص وانا في الشغل ونفسياتي كعبة شدييييد كان نفسي اتكلم معي زول عشان اقدر افضفض الجوااااي جا علي بالي هووو شلت جوالي واتصلت عليهو الو حبيبي يااااهلا ياااهلا حبيبي مالو صوتك كده م تكوني زعلانه او مضايقه من شي لالا ابدا ماف شي ... يعني انا م بعرفك احكي لي حبيبي المضايقك شنو عشان اقدر اساعدك واطلعك من المووود الانتي فيهو دا لحظتها سكت وم قدرت اقول اي شي قام قال لي طيب اقفلي وبعد شويه برجع ليكي في اللحظه دي انا زعلت قلت يعني هو الوحيد الانا ختيت ليهو مكانه واتصلت عليهو في النهايه يقفل وم يهتم بي .... زعلت شديييد م فضل لي الا ابكي ختيت الجوال في الشنطه واتلخمت مع الشغل بعد ساعه كده شلت الجوال لقيت منو كمية من المكالمات .. .. رجعت اتصلت عليهو الووو يابت وين انتي ياااخ ليه بتحبي تقلقي بي كده م معقولة معاكي انا قلت حصلت ليكي شي ... امممم اطمن انا كويسة . ... طيب انزلي لي تحت 😮 تحت وين 😕 انا تحت جنب الشركة تعالي سرييييع واتصرفي انتي م ح ترجعي تاني اخدي اذن وتعالي 🙂 ياااخ انبسطت شديييد .. قمت نزلت لقيتو منتظرني فتحت باب العربيه لقيتو بعاين لي شدييييد مالك في شنو؟،، ؟؟ كيف يعني مالي موش انا الف مره قلت ليكي جوالك دا خليهو معاكي 😡 انت م عارفه انا بخاف عليك وكل شويه لازم اطمن عليك ومن يوم الليله جوالك يكون في يدك علي طول .. طيب حاضر بس انت م تكشر كده وحصل خير ....
وانتي مثلا كنتي مفتكره انا ح اخليكي مضايقه كده من غير م اعرف الحاصل عليكي شنو انا جيت لي ساعه واقف هنا منتظرك خليت اي شي وجيتك انتي لاني عارفك م بتحبي تحكي لي زول غيري ...
بقى يعاين لي في عيوووني شدييييييد وانا م فضل لي الا ابكي بقول ليهو م تعاين لي كده يووووخ لا بعاين ليكي عيونك دي املاكي الخاصه .. ... بقيت بعاين تحت عشان م اعاين ليهو في عيونو رفع لي راسي قال لي يلا يا نجمتي احكي الضايقك دا منو عشان امشي ادفنو اسي .... لانو انتي بذات م بحب زول يضايقك .... بقيت ببكي شديد ضماني عليهو بقوة قال لي اي شي ولا دموعك حبيبي دموعك ديل غاليين علي وم بحب اشوفك ضعيفة كده انا بتقوه بيكي وانا بتسند بيكي م عايزك تبكي عشان قلبي ح يوجعني... مسح لي دموعي وقال لي انت اصلو الحزن م بشبهك وانا جيت عشان اسعدك ....

قلت ليه انت....
قوتي عندما يشتد ع الهم، ملاذي حين تعصف بي، اماني لكل اشيائي نعمتي التي احمد الله، واعوذ بالله من زوالها،💙
القلب الذي يحتويني ف كل شئ، فرحي، حزني، سعادتي، تعاستي، غبائي، وعنادي ...🖤

اللهم هو وم دون ذلكـ هين 💙🌸🖤
#Anan_mamoun
#مقتطفات

اللهم لا تخرجنا من #رمضان ،
‏إلا وقد أصلحت حالنا ؛ واسعدت حياتنا ؛ وغفرت ذنوبنا ؛ وتقبلت طاعتنا ؛ واستجبت دعائنا 🙌🏻

#إيلوزيانيس
بقلم سندس مالك
-١-
لما قررت امشي ازور طبيبة نفسيه ، عملت الحاجه دي ورا اهلي كنت عارفه انهم حيرفضوا لأنو في مجتمعنا السوداني عيب شدييد و عارفه انهم حيقولوا علي مجنونه و بالنسبه ليهم تاني ح ياخدوا حذر عشان يتعاملوا معاي .. الحاجه الطمنتني اول زيارة لي لدكتورة ساره اكتشفت هناك انو الشعب السوداني كلو مريض 😂😂 يعني ما براي ، متذكرة اني كنت بتضاحك اول ما دخلتا العيادة و في الاربعه كراسي القدامي رجال ! 😂 طيب و هناك في بنتين ، طيب ليه الناس بره عاملين الدكاترة النفسيين ديل حاجه كعبه !😂😂 و كل الشعب قاعد راجي دورو .. في العيادة كانت في دكتورة ساره و دكتور عصام و اي واحد فيهم بناسوا ، اول جلسه لي كنت منتظرة فيها الدكتورة بره .. كان قدامي على الجهه الشمال جنب الباب ولد شاب وسيم شديد و بسجر و بعاين بره للناس البره ، قعدتو كانت غريبه و مريبه ! ما زي بقية الناس و ما كان شايل جريدة او سبحه زي بقية المرضانين .. قعدتا اتنح فيهو وانا لمن يلفتني زول او منظر بتنح لدرجه كعبه خالص والله😂😂 ، الولد ما كان شايفني و من سجارة للتانيه لمن اتلفت لقاني متمحنه و بعاين ليهو .. عاين لي بتعجب مافاهم انا ليه متنحه فيهو ؟ و انا كنت لسه بعاين ، زول وسيم شديد و انيق و نضيييف الا تكون العين وقعت في جزمتو الانضف من وشي دي والله😂😂 .. الصف كان ماشي و فضلنا انا و هو و بنت تانيه ، لمن جا دور البنت و دخلت .. شلت رجليني و جريت قعدتا في الكرسي الجنبو و لا كذبتا و ابتسمتا ليهو ، ولا عبرني الشاب ده ! قلت ليهو ازييك ؟ انا سندس عاين لي و سكت ! .. قلت ليهو والله انا ما مريضه ولا حاجه بس جيت هنا عشان اشوف صحي الدكاترة النفسيين ديل بعالجوا اي حاجه .. ضحك لي بتريقه قال لي ما مريضه ؟ انت قايله البجوا هنا ديل مريضين ؟ ده في حد زاتو مرض منك ، قلت ليهو انت ليه فظ كده ؟ قال لي اسمعي يا بت الناس اي زول عندو البكفيهو افتكر ! لا بعرفك لا بتعرفيني .. ياريت تخليني براي لأني والله العظيم تلاااته ما ناقص اي شوشرة في راسي ده سمعتيني ؟؟
قلت ليهو هسي انا ازعجتك ! قال لي استغفر الله العظييم يابت الناس ح تقومي ولا اقوم اخلي ليك المكان ؟ قلت ليهو عاين يا انت ما تتزهج خلاص ، قمتا متنفرة بطنطن بتحت انت قايل نفسك منو تكورك كده ، غلطانه انا عامل وشك زي البوم كده و صاري و قاعد ، ان شاء الله نفسيتك تدهور اكتر و تموت وحيد يا ناقص، رجعتا قعدتا مكاني بحمر ليهو من فوق لتحت ، جا دوري و قمتا على حيلي ادخل و مشيه واحده ما اتلفتا اعاين ليهو الكلب 😷 دخلتا و سلمتا على دكتورة ساره ، وشها بشوش جدا و ابتسامتها جذاابه عمرها في التلتينات ❤ و لابسه نضارتها اول ماشافتني قامت سلمت علي ، و رحبت بي بطريقه حلوة خااالص .. قعدنا مواجهين لبعضنا و بدت تسألني سندس كيف حالك ؟ وين درستي؟ كلميني عن روحك شوية .. بديت اجاوب ليها ، الحمد لله كويسه ، في سنه تالته جامعه لسه ما خلصتا بدرس ادارة اعمال في الخرطوم .. و الحمد لله ماشي حالي ، جيتك يادكتورة بعد تعب ما بتتخيلي انا كنت متوترة و خايفه كيف قبل ما اصلك ، جاني احساس اني ممكن اطلع مجنونه بعد ما اتكلم معاك .. و بالمناسبه جيت من ورا اهلي عشان هم ما ح يرضوا لي اجي هنا اطلاقا ، عارفه يادكتورة انا ما عندي اااي مشكله زي الناس الدخلوا ليك ديل .. انا بس عايزة اعرف حاجه واحدة انا لمن اتخيل حاجه او احلم بحاجه بتتحقق طوالي و بتحصل ، بقيت بخاف من روحي و حاسه اني اي شي بقولوا ح يحصل لي .. عاينت لي بإبتسامه و بعدها سألتني الحركه دي بتعمليها طوالي ؟ قلت ليها ياتها ؟ قالت لي بتاكلي في ضفورك ! متوترة ! قلت ليها لالا ما متوترة .. قالت لي بتتكلمي سريع و لمن نفسك قايم ليه ؟ خايفه تغلطي في حاجه؟ قلت ليها لالا طبعا ، قالت لي طيب بتهزي في قدمك و خالفه رجلك ! قعدتك كده ؟ قلت ليها اي انا اساسا طبيعتي كده .. ابتسمت تاني وقالت لي تمي قلت ليها ماعندي شيء اتمو انا قلت ليك مشكلتي بسييييطه جدا ، قالت لي و هي مبتسمه سندس العلاج ببدا لمن الزول يقتنع في الاول انو مريض ، انت مقتنعه انو الحاجه العندك دي طبيغيه و ماخارقه للعادة ! قلت ليها لالا خارقه طبعا ، قالت لي يعني ممكن نسميهو مرض ولا لا ؟ قلت ليها لا ما مرض ممكن تقولي تميز ! يعني احتمال انا مميزة عن غيري ! هنا عاينت لي شديييد في عيوني و قالت لي طيب يا سندس عندك مانع تواصلي مع دكتور غيري ؟ قلت ليها لالا دكتور عصام ده ما شاطر بعرفو .. قالت لي لالا دكتور تاني زميلي شاطر جدا لكن ح اكتب ليك العنوان وين طيب ؟ قلت ليها وليه عايزة تحوليني ليهو ؟ قالت لي لأنو اختصاصو انتي ، انا ما ح اقدر افيدك زي دكتور معمر قلت ليها طيب اساسا مدام انتي شايفاهو كويس طيب .. شالت القلم و كتبت لي العنوان و كلام تاني كتييير بخط الدكاترة ده قالت لي تمشي ليهو و تقولي ليهو حولتني ليك دكتورة ساره ، قلت ليها تمام شكرا ليك يادكتورة و قمتا على حيلي ، كانت بتعاين لي بنفض في ب

بنطلون الجينز حقي و بلوزتي الشفون البيضاء وسلسلي الدهبي ، و اسواري الكتيره الفي يدي الشمال كنت عامله كعكعه كبييييييرة😂😂 و لابسه طرحه ساي بدون لفه طلعتا لقيت غريب الاطوار الصامت راجيني ، لمن شافني ضحك بمسخرة تاني ، يعني ماقلتي مامريضه طيب طولتي في شنو ! 😂 قلت اسفهو و اطلع سريع عشان ما اعمل مشكله معاهو اساسا مافاضيه ليهو هسي ، ركبتا المواصلات و طوالي على الرياض لدكتور معمر ، انا اساسا نحيييفه شديييد من زمان بقولوا الغذاء بمشي في شعري عشان كده طويل ، من قمتا بلبس بناطلين عادي لأنو اساس انا نحييفه قشه بس ، وصلت العيادة و لقيت الصفين 😂😂 الشعب السوداني ده كلو مريض! بتعالج بالدس😂✊ كنت اخر وحده في الصف ، لمن جا دوري المغرب كان على وشك انو يأذن دخلتا لدكتور معمر و انا فترررانه شديد ، بتمغى و رافعه يديني لفوق كان واقف بشرب في موية من الكولر عاين لي اهلا اهلا اتفضلي .. قعدتا بعد سلمتا عليهو قال لي اتصلت علي دكتورة ساره قلت ليهو اي حولتني ليك ، ليه ماعارفه رغم اني قلت ليها انا مامريضه ولا محتاجه علاج كتير اساسا كل القصه انو عندي حاجات مميزاني عن الناس ده ما اسموا مرض ! عاين لي معمر و انا بتكلم و بعبر بيديني و ابتسم و قال لي ايوااا ما اسموا مرض بالجد كلامك صاح فعلا ، قلت ليهو طيب يادكتور 😍 اخيييرا لقيت زول يفهمني ده اسمو شنو ؟ قال لي اسمو تميز فعلا دكتورة سارة قالت لي انك انتي بتشوفي حاجات و بتحصل و الحاجات دي ما بتشوفيها من رؤية ، انتي البتتهيئيها و بعداك بتحصل و تتحقق صح ! قلت ليهو اي صح😍 قال لي طيب ده تميز فعلا ، قلت ليهو يعني انت فهمتني مش ؟ قال لي ايوة قلت ليهو طيب انا عايزة ابقى بت عادية زي بقية البنات ! معمر ابتسم ابتسامه كسااارة شدييد و فاتنه😍❤ و قال لي انتي ما زي البنات لكن ، انتي فيك حاجه مميزاك عن بقية البنات كلهم قلت ليهم شنو ؟ قال لي ثقتك في روحك ، الوقت ده حبيتو شدييد خلاص😍😂😂 انا اساسا بحب الزول العارف قيمتي ، حتى ما كنت متوترة وانا بتكلم معاهو لكن هو كان مركز شديييد في تفاصيل كلامي معاهو كيف ! بي ساعتو الراقيه و قميصو الابيض و بنطلونو الجينز ، و بي خلفة يدينو فوق بعض و تأملوا لي و انا بتكلم

#نتابع💛

#إيلوزيانيس
بقلم سندس مالك
-٢-
إنو العلاج النفسي ببدا لمن الزول اول يقتنع انو هو مريض ، و أنا ما كنت مقتنعه اني مريضه ولا كنت عايزة اقتنع في البداية لدكتور معمر بسهوله رغم انو حاول يفهمني انو المرض ما بعني انك زول ناقص او مابتشبه الناس نحنا المعقدين المرض النفسي و شايفنو حاجه عيب رغم انو بره الطب النفسي من اهم الدراسات ، حاول يبسط لي فكرة يعني شنو الزول مريض بحاجه سألني سؤال بسيط اني مرتبطه ؟ قلت ليهو لالا قال لي ارتبطي قبل كده ؟ قلت ليهو اي ارتبطتا تلاته مرات قبل كده . سألني الفشل كان منك ولا منو ؟ قلت ليهو ما من زول دي قسمة و نصيب ، قال لي بالضبط المرض قسمة و نصيب الارتباط ما حاجه كعبه ولا معيبه و انتي جربتيها قبل كده صح ! بنفس الطريقه المرض ، الخطوة الاولى عشان تتعالجي ياسندس انك تقتنعي انو تميزك عن الناس ده في حد زاتو حاجه خارقه للعادة ، يعني مرض ! في البداية كنت ما متقبله كلمة مريضه دي منو لكن كلامو و طريقتو بسييسطة جدا ياخ 😍 قلت ليهو طيب ح اعتبر روحي مريضه كأني عندي التهاب طيب 😂😂 قال لي بالضبط كده ، انا ما عايزك تعقدي الفكرة و تزعلي لمن اقول عن حالتك دي مرض ، قلت ليهو طيب انا حالتي دي شنو ؟ قال لي ممكن نأخر الرد على السؤال ده لفترة كده .. طيب؟ قلت ليهو طيب ، قال لي كل العايزو منك تعتبريني صديق بالنسبه ليك تحكي لي البحصل معاك في يومك ، الأنسب انو التلاته ايام البحددها ليك دي تكون بالمساء عشان لمن تجي تحكي لي اكون عرفت جزء كبير من تفاصيل يومك تمام ؟ قلت ليهو تمام مافي مشكله ، قال بي بخلوك تطلعي بالمساء ولا فيها مشكله ؟ قلت ليهو لالا مافي مشكله بطلع عادي لكن حدي الساعه تسعه قال لي طيب انتي الساعه سبعه تكوني هنا ، نتونس زي ساعتين كده و تمشي لاهلك تمام ؟ قلت ليهو تمام .. بصراحه دكتور معمر زول مريح جدا ده غير انو وسيم و اسمر و حلاتو و طويييل😍😍 بس ما ركزتا مع ده كلو بقدر ما ركزتا على اسلوبو و بساطة كلامو و طريقتو البتخلي الواحد يرتاح و ينجذب في الكلام و يعبر براحه تااامه بدون خوف و قلق .. طلعت منو مبسووطه خصوصا بعد ما قرر انو نتعامل كا أصحاب ، و انا اساسا بحب الاصحاب شديد .. وقفتا للمواصلات زي نص ساعه كاامله كده حتى جات حافله ماره و ركبتا عشان اصل البيت ، كالعادة البيت ملان بالهموم و النقاشات 😢 اختي الكبيره و اخوي الوسطاني و نقاشاتهم الما بتخلص ، بخلوني كل يوم اتمنى لو ابوي عايش عشان ما كانوا ح يتشاكلوا كده ، امي قاعدة فترانه مرهقه منهم بعيييد في زاوية البرنده بتعاين ليهم بتناقشوا ، خنساء و أحمد بتناقشوا في موضوع التلفون " كنتي بتتكلمي مع منو ؟ " خنساء شايفه انها كبرت و اتخرجت و من حقها تطلع و تتفسح و تعيش دنيتها حتى مع الاولاد تطلع عادي ، و اخوي أحمد صعب و عصبي و نرفزي شدييد ماعندو شغله في الدنيا غير خنساء و تلفونها .. براقبها و هي طالعة و مرات بمشي وراها عشان يتأكد هي بتمشي وين ؟ و قبل يومين كانوا ح يحرقوا البيت بسبب نقاشهم الطويل ، كانت خنساء جااريه تدس الجوابات بتاعت الهدايا الجايبهم ليها يوسف في الجامعه و احمد لمن جا اتلبشت و خافت ورمت الجوابات في حفرة الدخان المولعه في الحوش و غطتها ، كان البيت حيحرق بسبب عمليتها دي الا انا جيت ماره و طفيت النار بالموية 😫 ، فترتا من نقاشاتهم الما بتخلص بمشي اقعد براي في الغرفه جوا كنت بحاول انفس عن خنقتي بالتلفزيون او النوم ، و النوم الطوييييييل غالباً ، النوم البحلم فيهو الاحلام البحبها .. رغم انو احمد صعب لكن ما كان بحقق معاي في حاجه زي خنساء ، يمكن عارف اني ماعندي حاجه للاولاد كده ! كان بخلني ادخل البيت الساعه تسعه و خنساء الكبيره بخليها لحدي سبعه بس . الوحده ما ضروري الزول يعيشها لو كان براهو ، مرات بتكون وسط اهلك و جيرانك و اصحابك و لسه شايف انك وحيد فعلا ، في الجامعه ما كان عندي اصحاب اوفياء بمعنى اصحاب .. بقعد مع كمية من الشلل و عارفه ومقتنعه اني اول ما اقوم منهم ، ح يقطعوا فيني و عارفه انو البنات فيهم ما برحموا سيرتي ، لبسها ضيق ! بتفتح شعرها ! بتتحنكش قدام الاولاد ، بتغير صوتها ، كلامهم كلو واصلني ، الحاجه البتزعلني انهم قدامي احلى من العسل ، اتأقلمتا على اني اعيش في مجتمع منافق زي ده و ما عندي فيهو ولا زول بقدر اقول عليهو صاحبي رغم انو معارفي كتار جدا .. ميسم و رهف كانوا الاتنين مرافقييني بنمشي نفطر و كده و بنقعد في البنشات بعد الفطور نتونس حبه كنت بحكي ليهم عن اخوي البعاملني زي الأميرة في البيت ، و اختي البتعزمني دايما بره نفطر او نتغدا سوا مثلا .. و عن اسرتنا الحلوة و مكتمله و عن اولاد خالتي البدلعوني كتييير و بفسحوني و كل خميس بنمشي شارع النيل ، و عن الحاجات الحلوة في حياتي يمكن عشان كده كانوا بغيروا مني ؟ لانو الناس مهتمين بي ؟ لانوا في كمية من الاولاد معجبين بي ! .. كنت عارفه انهم بغيروا مني بس برضو كنت بحكي ليهم .. الوحده حاجه مميته خصوصا و حوليك كمية كبير

ة من البشر و انت مفتعل ليك عالم خاص براك ، عالم الاحلام الأنا عايشه فيهو اكتر من الواقع ..
دكتور معمر حضر قهوه ظااابطه و جا ختاها جنبي و قعد مواجهني ، كان انيق جدا و عطروا مالي المكتب جوه 😍 و كالعادة انا اخر وحده في العيادة لانو مواعيدي متأخرة .. جاني سؤال عابر ولازم اسألوا ليهو " انت رياضي ؟ " ضحك على خفيف و قال لي ايوة كابتن فريق ✋ قلت ليهو واااضح جدا ماشاء الله ، قال لي يومك كان كيف في الجامعه ؟ قلت ليهو مرهق شديييد لكن الحمد لله بس ، قال لي سندس كيف الاجواء في البييت ؟ قلت ليهو متوترة ، بس اتعودتا على كده ، شال فنجانو و شرب و ختاهو وسألني انتي قريبه لمنو في البيت ؟ قلت ليهو ابوي الله يرحمو ، قال لي ايواا الله يرحمو ، لا قصدي الهسي الموجودين قلت ليهو امي طبعا لانو احمد و خنساء ما فاضيين من النقه و المشاكل .. قال لي هم سبب التوتر ؟ قلت ليهو ايوة ، قال لي طيب لمن يحصل نقاش في البيت بتمشي وين ؟ قلت ليهو بنوم .. قال لي و تاني بحصل شنو ؟ قمتا ضحكتا قال لي مالك؟ قلت ليهو لو قلتا ليك ح تصدقني ؟؟ قال لي طبعا ح اصدقك قلت ليهو ما حتضحك فيني ولا تستغرب زي دكتورة ساره ؟ قال لي سندس انا قلت ليك انتي ح تحكي لي كصاحبك و انا ح اساعدك بعداك ك دكتورك النفسي ، قلت ليهو و انا بضحك بنوم عشان الاقي فراس ❤ قال لي فراس منو ؟ قلت ليهو حبيبي و راجلي ، عاين لي مع رفعة حاجبو و استفهامات في تعابير وشو ، ضحكتا بصوت و قلت ليهو مش قلت ليك ما حتصدقني .. قال لي انا مصدقك لكن فراس ده منو ؟ انتي متزوجه ؟ قلت ليهو لالا ما متزوجه في الحقيقه ، لكن بحب فراس و متزوجاهو في النوم .. بنوم عشان الاقيهو هناك ❤ بحكي ليهو لو كنت زعلانه و لا مبسوطه برضو ، قاعدة احكي لي صحباتي عنو برضو بس هو البخفف عني غضبي كلوو ، قال لي فراس اسمو ؟ قلت ليهو اي ، قال لي طيب انتي سميتيهو كده ولا هو قال اسمو كده ؟ قلت ليهو انا سميتو كده .. معمر انت مصدقني ؟ قال لي طبعا ياسندس مصدقك انتي ما بتكذبي علي ، هسي انا عرفتا انك بتحبي واحد قاعد في الاحلام و بتلاقيهو هناك و بتحكي ليهو اي حاجه بتزعلك او بتفرحك و هو بخفف عنك همومك ، طيب متزوجين ليه ؟ ما اكتفيتو تكون اصحاب يعني او حبيبين مثلا ؟ صلحتا قعدتي بعد ما شفت دكتور معمر مهتم لقصتنا انا و فراس و بديت احكي ليهو .. انا لمن كنت في الأساس كان في واحد عاجبني شديييد كنت بلاقيهو بالصدفه يعني يا ماشه المدرسه او راجعه منها ، لمن خلصتا الأساس كنت متأكده اني ما ح اشوفو تاني و انا كنت معجبه بيهو لدرجة كان نفسي اتزوجو 😂😂 و ما حصل اتكلمنا و لا شاغلني بالغلط ، عشان كده لمن خلصت المدرسه كنت خايفه اني افقدوا ، بقيت حافظة ملامحو و بحلم بيهو او بألف الحلم مخصوص عشانو .. قال لي بتحلمي بشنو يعني ؟ قلت ليهو يعني مثلا نكون بنتونس او يجيب لي هدايا او يعزمني مثلاً ، قال لي و اتزوجتو بعد داك قمتا ضحكتا و قلت ليهو اي😂😂😂 قال لي مالك بتضحكي ؟ قلت ليهو لاني عارفه اني بقول في كلام مجنون لكن ما مشكله بحكي ليك انت بس😂😂، سكت ووعاين لي شدييييد في عيوني و سألني انتي بتشوفي ابوك في الاحلام دي طيب ؟ قلت ليهو لالا قال لي ولا بالغلط ؟ قلت ليهو لالا .. قال لي يعني انتي مابتحلمي براك لكن بتتصنعي الحلم صح ! قلت ليهو ايوا .. قال لي طيب يا سندس ، فراس بقول ليك شنو ؟ مثلا يعني بحكي ليك حاجه و بتحصل ؟ قلت ليهو اي و كتييير ..

# تنويه : القصه حقيقيه من الواقع ، انا كاتباها و سندس بطلت القصه مش انا سندس نفسها ..
# تنويه تاني : القصه دي انا تابعتا فيها كم حالة عشان اقدر اكتبها في صورة رواية💛 العايز يتابعها يعرف انها رواية و بحلقات .. و رجاء خاص ما تستخفوا بالمرض ده ، الماعارف معنى إيلوزيانيس .. مرض الوهم
نتابع

#إيلوزيانيس
بقلم سندس مالك
-٣-
مره جاني زول في النوم و قال لي: راجل جيرانكم حيموت الساعه ٤ص صحيت الساعه ٤ص مخلوعه بصوت بكاء ؟ اتلفتا يمين و شمال لقيت اخوي بلبس و طالع سألتوا الحاصل شنو ؟ قال لي عم اسماعيل اتوفى هسي ، بقيت بعاين لي احمد اخوي مخلوعه و في لحظتي شلت التلفون بسرعه اشوف الساعه كم لقيتها الساعه ٤ ص ! سألت روحي هل ده كان حلم او حقيقه ؟ لكن انا يادوب صحيت ؟ ماممكن يكون ده احمد الكان بتكلم معاي ! لا ده ما احمد ده زول وراني انو فلان ده حيموت ! ، معمر عاين لي و رجع لي الكرسي و كتف ايدينو وقال لي ما خفتي ؟ قلت ليهو خفتا شديييد خوف ماعادي ، قال لي و عملتي شنو لمن خفتي ! يعني مثلا قمتي صليتي كده ركعتين ولا سبحتي ولا اتحصنتي ولا قريتي قرآن ؟ قلت ليهو لا رجعتا نمتا ! قال لي و بعد ما نمتي ؟ قلت ليهو شفتا فراس في الحلم و كلمتوا اني خايفه قال لي و عمل ليك شنو ؟ قلت ليهو قال لي ما تخافي انا جنبك و اتطمنتا فعلا بعداك ، ابتسم لي معمر وقال لي ابوك اتوفى متين ؟ قلت ليهو لمن كنت في خامسه ابتدائي نهاية السنه بعد الامتحانات ، قال لي و علاقتك كيف مع احمد اخوك ؟ قلت ليهو والله يعني ما بنتناقش كتير و لا اصحاب برضو .. قال لي طيب مافي زول من اهلك مصاحباهو ؟ يعني مثلا بنت خالتك او ولد خالتك ؟ قلت ليهو لا .. قال لي تمام طيب ، عندك مانع اني اتعرف على واحد من اهلك يعني احمد ! قمتا طوالي اتوترتا قلت ليهو لا لا مستحيل انا مافي زول عارفني بجي هنا يا دكتور ، قال لي طيب طيب روقي ما تنفعلي قلت ليهو ما تجيب لي سيرة اهلي هنا كويس و ما تدخل فيهم طيب؟ قال لي طيب ما تتوتري و تخافي ، ما ح اعمل حاجه بدون رضاك ياسندس روقي .. قلت ليهو طيب انا ح اقوم امشي البيت هسي ، قال لي طيب تمام نتلاقى بكره بس المواعيد بكره بتختلف ح تجي الصباح تمام ؟ قلت ليهو بس شغاله جامعه قال لي ما مشكله اخدي اليوم ده و دكيهو طيب؟ قلت ليهو تمام مافي مشكله ، طلعتا و وصلتا البيت لقيته صانيي ناديت على امي لحدي ما ردت و سألتها ، وين ديل؟ قالت لي اختك لسه ما جات و أحمد الليله بايت بره قلت ليها طيب ريحة الدخان الطالع ده ! قالت لي دي نوسه بهناك ، صريت ليها وشي قلت ليها تمام ، قالت لي ادخلي سلمي عليها قلت ليها امي عليك الله البت دي انا ما بطيقها و بعدين بتجي تدخن هنا كل يومين مالها ! عندها بيت اهلها ! حجتها البيت فاضي هنا ؟ طيب و احمد ولدك الشايفها طالعه و داخله بدخانها قدامو ؟ بت صغيره و سمحه بتعمل كده ليه؟ امي قالت لي يابت لمي لسانك الطويل ده ، البت دي صحبتك بتتكلمي فيها ! قلت ليها ما صحبتي ، اتقربت مني و صاحبتني كانت دايره احمد ولمن ما لقت فرقه دخلت فيكم و عرفت البيت كلو و هسي بقت بتجي البيت كأنوا بيتها .. انا عارفاها دايرة تصل لشنو ، امي تاني انفعلت و قالت لي انتي بقيتي قليلة ادب شديييد البت دي بت ناس و مسكينه و انتي هسي بتظني فيها و كلامك ده حرام عديل ماشفتي منها حاجه ما تظني و تظلميها ، انتي بعد شوية ح تجني بتوهماتك الكتيره و افكارك السوداء و تحليلك للأمور براك بعد شوية حتجني ساامعه كلامي ده حتجني لو قعدتي تباري امورك الفارغه دي .. و مشت خلتني في المطبخ ما علقت في راسي الا كلمتين توهماتك، و حتجني ؟ انا مريضه يا امي ؟ مريضة عشان تقولي عني كده ؟ و عشان وحده انا عارفاها قليلة ادب ما اتربت ، غلطانه انا البوريكم الصاح من الغلط .. دخلتا غرفتي و قفلت بابها فتحت المروحه و قاعده في السرير بجرجر في شعري و بعاين للمروحه نزلت مني دمعه و بعد دقيقتين قعدتا في نص السرير مسكتا المخده و بكيت بقيت بختها في خشمي عشان اكتم الصوت و ابكي 😢 بكاني كلام امي و بكاني عدم تصديقها لي ، و انا زاتي شكيت في نفسي انا بتهيأ لي و ظالمه بت الناس ؟ عشتا حاله بتاعت توهان كده لمدة ساعتين كده لحدي ما نمتا ، صحيت الصباح لقيت تلفون من دكتور معمر اول مره يتصل علي الصباح ! رجعتا ليهو و انا لسه راقدة ، قلت ليهو صباح الخير معمر .. قال لي صباح النورر كيفك ؟ قلت ليهو تمام الحمد لله بخير و انت ؟ قال لي تماميين والله ، اها صاحيه و لا لسه؟ من صوتك واضح انك لسه ما صحصحتي .قلت ليهو والله لسه في السرير ماقمتا لكن ان شاء الله بقوم و بجهز و بصل قال لي طيب منتظرك بالفطور تمام ! قلت ليهو تماام .. لسه كنت بتثااائب في سريري تعباانه دخل علي أحمد سلم علي " صباح الخير " قلت ليهو صباح النور و قمتا الف كعكتي في نص راسي قال لي ماصليتي الصبح حاضر مالك ؟ قلت ليهو كنت فترانه و نمتا نومه واحده ، قال لي و ضاربه منكير ليه ! قلت ليهو احمد في شنو من الصباح ؟ بطلعوا خلاص ، نسيتو امبارح برضو نمتا بيهو انت عارفني بطلعوا اوقات الصلاه و تاني بضربوا ، عاين لي مسافه و قال لي سندس المنكير مشرتم ! المنكير ده قديم ! .. لمن عاينتا لي يديني هو فعلا كان قديم بس انا كذبتا ، لكن صليت بيهو العشاء كده والله .. قال لي و هو بلمس في جبهتي مالك ما اكلتي امبارح امي قالت ان

ك ما اتغديتي ، ليه محمومه ؟ قلت ليهو ماعارفه حمى عادية بتكون ، ما كنت جعانه قال لي طييب و لفى يدي بقوة لمن كوركتا " احمد براحه يدي حتكسرها ماممكن معاك! " قال لي الرضوخات او الجروح دي شنو ؟ قلت ليهو والله ما عارفه .. بكون نمتا و انا مضغوطه ، قال لي طيب قومي تطهزي اوصلك الجامعه ، قلت ليهو طيب .. خليتو طلع و اتجهزتا للجامعه خليتو يوصلني الباب و بعدها طوالي ركبتا المواصلات و مشيت للعيادة وصلت و انا متوترة من حركات احمد الصباح ، سلمتا على معمر و قعدتا معاهو لقيتو عامل سلطه دكوة في صحن كبير و بزيت سمسم و اندومي لي عشان بحبهم الاتنين .. سألتوا انت عرفت من وين اني بحب السلطه 😂😂 قال لي من مقابلتك الاولى سألتك بتحبي شنو ؟ تتذكري ؟ قلت ليهو ايواا نسيت والله 😂😂 قال لي نقول بسم الله ونبدا ! قلت ليهو طيب و قمتا غسلتا يديني و جيت قعدتا للأكل .. فطرنا و شربنا بيبسي بااارد بتاع قزاز و بعدها قعدنا ، كنت مستغربه من انو معمر عايز المقابله تكون الصباح و اصر اني اجي الصباح و الفطور و القهوه ! مستغربه لكن بالنسبه لي كان تغيير جو ، بعدها و احنا بنشرب في القهوة سألني شعورك هسي شنو ؟ قلت ليهو والله حاسه بتغيير جو يعني ظريف، قال لي سندس يومك كان كيف لمن رجعتي ! قلت ليهو تمام و سكتا .. لاحظ للعلامات في يديني الظهرت علامات تجمع الدم ، قال لي نمتي زعلانه ! اتخلعتا انو عرف كيف ؟ قلت ليهو اي عرفتا كيف ؟ قال لي التجلطات الصغيرة في يدينك ، قلت ليهو مالها ؟ قال لي دلاله على الزعل او الغضب المكتوم .. قلت ليهو معلومه والله يادكتور😂😂 ح اقولها لي احمد لمن ارجع 😂😂 قال لي كويس طيب ؛ زعلانه مالك ؟ قلت ليهو اتناقشتا مع امي في موضوع بت جيرانه نوسه قال لي صارة مالك ؟ عايزة تحكي لي حاجه ؟ ولا ما حابه تحكي ؟ شايفك اتضايقتي لمن جبتي سيرتها ! قلت ليهو مادايرة اتكلم عنها خليها بس ، قال لي طيب حكيتي لفراس المزعلك ! قلت ليهو اي ، قال لي و قال ليك شنو ؟ قلت ليهو قال لي كلامك صاح و ظنونك في محلها كلها ..

#تابعوني💛💛
الناس الشفقانه ماتستبقوا الاحداث دي رواية ياجماعه😂😂اصبروا ليها ❤ ، قريت كم تعليق بنات كاتبين انهم لقوا نفسهم في الرواية دي و انو اي وحده حست بي روحها هي البطله ..
انا قبل ما انزلها و من اول ما بديت اكتبها ليكم زمان ، كتبت بوست في صفحتي قلت انو الرواية دي حتعبر عن اي وحده و حتلقى روحها فيها .. ما كتبت البوست داك من فراغ 💔

#نتابع

#إيلوزيانيس
بقلم سندس مالك
-٤-
في حكم الجنون إنو يكون عندك زول وهمي بتثق فيهو اكتر من الناس البره الناس العايش معاهم حتى اهلك زاتهم انا بثق في فراس اكتر من اي زول تاني ، كونوا هو صدقني فمعناها انو كلامي صاح و ظنوني ياها زاتها و سونه بت كعبه ، ده الكلام القلتو لي معمر و هو كان بسمع فيني لحدي ما الجلسه خلصت و قال لي نتلاقى المره الجايه و لمن وقفتا على حيلي عشان امشي سألني سندس ؟ فراس حصل مره غلطك ؟ او قال ليك الحاجه دي غلط او كلامك غلط ! قلت ليهو لا ما حصل قال لي طيب تمام متفقين يا ستي ، خلاص المره الجايه نتقابل في مواعيدنا .. قلت ليهو يادكتور عندي سؤال مجيرني ليه المرة دي اصريت الجلسه تكون الصباح ؟ قال لي فترة الصباح جزء مهم من يومك ف كان لازم اعرف مشاعرك الصباحيه و طريقة ظهورك الفترة الصباحيه ، يعني عشان تفهميني اكتر مودك بكون كيف بالصباح ده كلو الكنت محتاج اعرفوا حاليا هسي .. قلت ليهو والله غايتو طيب تمام 😂😂😂 طلعت من العيادة ما كان نفسي امشي البيت ، ركبتا مشيت توتي قعدتا براااي باكل في تبش بالشطه حاااره و بعاين للناس خالطين ، عاينت بعيييد في ولد بسجر براهو من سيجارة لسيجارة ؟ ده فلان داك ؟ اااي ياهو زاتو بتاع العيادة ؟ تاني قاعد براهو ! الزول ده مالوا بسم الله ! يوم ح يطن او يموت بسبب الكميه الهائله البشربها دي ! زاد فضولي اكتر اني امشي اسألوا هو مالوا ؟ ختيت القروش لخالتوا و مشيت جرري عليهو جريت البمبر و قعدتا جنبو ، عاين لي هو شكلوا ناسي الشكل لأنو لاقاني في العيادة لابسه الطرحه و هسي لاقاني جادعاها في كتفي سااي ، قلت ليهو انا سندس لاقيتك عند دكتورة ساره ، عاين لي بنظرة عميييقه لمن اتذكر قال لي ايوا ايوا ، و سكت ! سألتوا انت اسمك منو؟ قال لي انتي طبيعتك كده ؟ ولا معاي انا بس ! قلت ليهو سؤالي ما كان وراهو مقصد كعب ، انا مهتمه اعرف انت مالك ؟ بتسجر كتير ليه ؟ قال لي وانتي دكتترة ساره ولا كيف ! بعدين انتي لنفسك دايرة علاج خليني انا بالله 😒 قلت ليهو والله انت فظ بشكل و عدواني شديد ياخ ، قال لي دقيقه كدي خليك مني و من مشكلتي ، انتي الوداك لدكتورة نفسيه شنو ! مشكلتك شنو ؟ قلت ليهو ما عندي مشكله بس لمن اكون متضايقه بمشي العيادة و عشان احكي لي زول و خلاص .. عاين لي و سكت قلت ليهو عموما اسفه اذا اتحشرتا او ضايقتك كل الكان شاغلني علب السيجاير الهااائله البتكملها في دقايق ! و العفو ياخ ، قمتا على حيلي و سمعتوا يادوب نطق بقول لي مهما كانت مشكلتك عويصه ما حتكون زي مشكلة زول عرف انو مرتو كانت السبب في موت اختو الصغيره و سممتها بي بدرة و انو ماقادر يعترف انو مرتو السبب عشان عندو منها ولد ، قلت ليهو لاحولا ولاقوة الابالله ده انت ؟؟ عايش كيف و انت عارف بجريمه زي دي ؟ عايش كيف مع مرتك اساسا ؟ انت ! ماقادرة اتخيل ما قادرة والله ، ختيت يدي في راسي وبعاين ليهو بجد ما كنت قادرة استوعب انو في ناس عايشين بالطريقه دي ! ياخ انا في رحمة و صحي البشوف مصيبة غيرو تهون عليهو مصيبتو ، قال لي احمدي ربك مليون مره على الحاله الإنتي فيها و قام من مكانوا و خلاني .. اتمشيت لحدي ما اصل المواصلات و قطعتا الكبري برجليني كنت بفكر ووانا ماشه الخلا مرتو تقتل اختو شنو ؟ طيب هو البتعالج ليه ! المفروض تتعالج مرتو .. طيب ساكت عليها ليه ؟ القصه كانت غريبه و مريبه بالنسبه لي و فيها حاجات كتيييرة ناقصه ، عموما يومي اتخرب بعد التبش بالشطه الكان عدل مزاجي .. ختيت سماعاتي و شغلتا الاغاني حقتي طول الطريق بسمع لحدي ما وصلتا البيت .. سلمت على امي قالت لي الغداء جاهز سألتها شنو ؟ ام رقيقه بي كسرة و سلطه دكوة و شطه خضراء .. قلت ليها ظااابط شديييد استحمى و اجي لاحقاكم ، خنساء على غير عادتها جات بدري سلمت و جات قعدت معانا في صينية الغداء ، عاينت للأكل كده قالت ما عندها نفس تاكل امي قالت ليها يابت الله يرضى عليك اكلي معانا ، و هي مصرة ما دايرة تاكل قلت لي امي ياخ خليها براحتها احتمال ما جعانه ، قالت لي خنساء اي خلوني ما دايرة اكل قلت ليكم و مشت دخلت جوه ، بدينا ناكل انا و امي عاينت لي امي مهموومه و ملامح وشها كئيبه ، يمكن انا اكتر زوله محترمه في البيت دا ، بنكورك في وشها و بنتزهج و هي صابره و ساكته أحمد الأساسا ما عايش في البيت و عادي يطلع و يدخل براحتو ولا خنساء المحيطها كل اولاااد و طلعات و فسوحات وماعايزة تعرس و لا شغاله بكلام امي معاها ، طيب الغلط انو ابونا مافي ؟ ولا الغلط مننا ؟ ولا من امي الخلتنا نركب في راسها كلنا و بعداك فلتت التربيه من يدها .. كانت مهمومه اول مره اعاين لي امي كده 💔 وشها مليان تجاعيد و باين عليها الحزن من زماان متراكم ، اخدت نفس طويييل في نص الاكل سألتني مالك يا بتي ؟ قلت ليها مافي شيء تعبانه بس قالت لي طيب ادخلي ارقدي شويه .. قلت ليها لالا ما دايرة ارقد .. حسيت انو امي زوله مهمومه الوقت كلو حيحصل شنو لو واحد من اولادها حاول يديها من زمنو ! زمن

و الضايع في حاجات فارغه كتيره ، طيب لو بديت انا ؟ اساسا كنت ح انوم و احلم بي فراس و األف الحلم بما يرضيني ، لو اتأخرتا شويه من الاحلام دي ح يحصل شنو ! دخلتا المطبخ عملت شاي احمر بنعناع و جبتو كانت السراير مفرشه في الحوش و الحوش مرشوش بي موية والهواء بااارد .. الجو كان جمييل ، عاينتا للحوش الفرشوا منو ! امي 💔 امي الشقياانه يومها كلووو تغسل و تطبخ و تفرش و تكوي لناس ما بتحس ولا بتشعر ، عايشه يومها كلو وحيدة ماعندها راجل يونسها ، ولا زول يقعد معاها خلال اليوم ، حتى نوسه البتجيبها و تجهزها انا عملت ليها موضوع فيها ! نحنا اولاد سيئيين لأبعد الحدود .. الشاي الأنا عملتو كان بمثابة طبطه على أكتاف امي الشقيانه ، ناديتها وجات لابسه قميصها المخطط بالكحلي و الابيض و ريحتها الحلوة و قعدت في السرير شربت معاي الشاي ، قلت ليها امي شعرك ده لافاهو كده فوق مالك ؟ قالت لي خليهو غسلتو قبيل قلت ليها دقيقه طيب .. جريت لجوه فتحتا ادراج التسريحه شلت الدهن والمشط والفرشه و قمتا مسحتو ليها و بديت اسلكوا كان ملبك شديد 💔 قالت لي و هي بتضحك يا بتي سرحي سااي هو وينو الشعر .. قلت ليها هييي كمان امي ماعندها شعر ! انتي الشعر العندك ما عند زوله ، قالت لي الحمد لله الجا فيكم انا عشتا زمني و انتهى .. ان شاء الله تسريحيهو لي راجلك و تتفنني فيهو ياسندس ربنا يديك ود الحلال اليصونك و يحفظك و يبقى عليك عشرة و يسعدك.. قلت ليها آمييين يا امي .. " رغم اني ما خاته العرس حاجه مهمه في حياتي ، يمكن السبب الاول فراس .. حاجه مممكن تتشاف ابعد من الخيال ، بس انا في النوم عايشه حياه كااامله ما ناقصها شيء حياه خالاني استغنى عن حياتي الأصليه ، قلت امين لاني عارفه امي نفسها تسمع الكلمه دي من بناتها " .. بعد خلصت تسريحها رقدتا في رجلينها و كانت بتمشي بي اصابعها علي خصلات شعري ، مرقت خنساء لافه شعرها المبلول و عاينت لينا يمكن حست شويه بالغيرة مني ! قالت لي ماناديتوني ليه لمن عملتوا الشاي ؟ عاينت ليها وسكتا ردت عليها امي انتي لو نادوك بتقولي ما دايره ، جات صاارة كده وقعدت في السرير مقابلانا كبت الشاي و قعدت تشرب و تعاين لينا .. انا متأكده انها غارت😂😂 غارت من قعدتي مع امي 😂 لكن ما دايره تقول ، شايفه روحها كبيرة لو ما كده كان قالت لي قومي من امي 😒 .. حسيت بغيرتها و قلت اخليها تحس شويه انو عندها ام ، قمتا عشان اخليهم يتكلموا او يتونسوا براهم و دخلتا الغرفه جوه شلتا تلفوني لقيت رساله من دكتور معمر " مساء الخير سندس ، كجزء من العلاج انا عايز اتعرف على محيطك بقصد هنا صحباتك الفي الجامعه ، احتراما لخصوصيتك ممكن تعرفيني عليهم كصديق او كأي حاجه مثلا .. الخطوة ح تساعدك و تساعدني انا عشان اقدر اساعدك " كنت عايزة ارد ليهو بي لا طوالي ، لكن لمن سرحتا كده قلت ياسلااام معمر الوسيم السمح يمشي معاي الجامعه 😍 ياخي صحباتي بموتوا موووت العجب لو قلت ده حبيبي او دايرني هو مثلا و انا ما مدياهو وش😂💔شلت التلفون ح ارد ليهو " مساء النور معمر ، اذا كاخطوة علاجيه مافي مشكله انا موافقه " رد لي في نفس الزمن " بكره كيف ؟ " قلت ليهو " نمشي الجامعه ؟" قال لي انا بزورك في الجامعه زي الظهر كده تمام ؟ قلت ليهو تمام .. انا كنت ح ارقص من الفرحه ، ياخي جاني زول كسار رهيب مدهش و خرافي رياضي .. ياخي بكره يومي في الجامعه 😍😍 جريت نزلت الدولاب في الارض عشان القى لي لبسه سمممحه كده 😍 بما اني ضعيفه ، طلعت اسكيرت منفوش من تحت و بلوزة على الجسم ، و جزمه كلاسيك وشنطة خنساء الصبه😍 العاجباني 😍 ختيت اللبسه في السرير خنساء لمن جات داخله شافتها عاينت لي و مشت ، متأكده انها استغربت و سألت نفسها دي مالها دي ؟ 😂😂💔 ياخي نمت كيف اليوم داك ! ماعارفه صحيت كيف من الفرحه و قدرت البس و اتأنق و امشي الجامعه ، كنت حريصه اني ما اتوسخ نهاااائيا خلال اليوم و ريحتي تكون ثابته😂💔 و المناديل دي اشتريتها بالردوم اليوم داك ، المنكير اول يوم يظبط ، صحباتي لمن شافوني اول سؤال مالك في شنو ؟ عرس منو الليله ؟ قلت ليهم مش قلت ليكم في زول كان دايرني بس انا رافضاهو ؟ قالوا لي القصه دي كل يوم بتقوليها و هو لا في زول لا حاجه ، قلت ليهم انتو اصبروا لكن ، امبارح قابل اخوي احمد من وراي 😢 احمد قال لي ده راجل يرفضوهو هسي ؟ طبعا لمن قلت احمد خلاص البنات اخدوا الموضوع جادي ، قالوا لي اها حصل شنو ياسندس ؟ قلت ليهم احمد جا قعد معاي و حنسني اديهو فرصه .. المهم قلت ليهو طيب بحاول استلطفوا ، ضرب لي بالليل طواالي قال لي عايز اقابلك .. قالوا لي و هم منتبهات و مركزات شدييد اها ؟؟ قلت ليهم وافقتا يجي الليله ، قال لي طيب ح اعزمك غداء في برج الفاتح ، قالت لي دينا اها وافقتي😍 قلت ليها طبعا وافقتا ، حيجي يسوقني من الجامعه بعد شوية كده .. دينا قالت لي النبي و عليك الرسول خلينا نشوفو ، قلت ليهم طيب ح اعرفوا عليكم .. طبعا هم بين مصدقين و بين انا كذابه و ما ح

يقتنعوا الا يشوفوا العريس قدامهم ، كانت جيت معمر للجامعه فرصه و استغليتها صاح 😂💔 و خلوا اي شيء و قعدنا في البنش راجييين العريس ، ضرب لي تلفون البنات اتشالقوا سندس ردي ردي 😍 ده هو صاح ؛ قلت ليهم اصبروا شويه 😂 اي ده هو .. رفعتا الخط و بصوت واطي و براحه الووووو😂💔

#تابعوني💛

#إيلوزيانيس
بقلم سندس مالك
-٥-
السلام عليكم مساء الخير، وعليكم السلام مساء النور .. انا قدام جامعة الخرطوم السنتر انتي وين ! قلت ليهو في ياتو بوابه ؟ الشرقيه قلت ليهو طيب ثواني و اكون جنب الباب ، دينا قالت لي حنمشي معاك قلت ليها يابنات اصبروا بجيبوا و بجيكم قالوا لي لالا بس الانمشي نجيبو معاك .. قلت ليهم طيب تمام ارحكم ، صراحة ماكنت بعرف الوقت داك اذا معمر عندو عربية او لا ! حيجي قاشر ولا لا ! اتوترتا فجأة ، و احنا ماشين على البوابه تاني ضرب لي تلفون ، قلت ليهو انت وين ؟ قال لي في توسان بره لونها ابيض انا واقف بره .. و هو بتكلم معاي لمحتو واقف و لابس النضارة الشمسيه و بتكلم بالتلفون معاي 😍 لابس جينز غاامق و قميص ابيض مع سمار لونو 😢😢😢 انا زاتي انبرشتا اللحظة ديك مع صحباتي 😢💔، قلت ليهم معمر هداااك ليهو الواقف جنب التوسان قالوا لي احلللفي بس قلت ليهم دقيقه و رفعتتا يدي اشرتا ليهو ، قفل العربيه و جاي علينا .. تقريبا اللحظة ديك كلنا ريالتنا سالت عدييل 😖 قرب و قرب و انا قلبي كان بدق و الخوف زايد ، خفتا من الكذبه بتاعتي اكتر .. قال لينا السلام عليكم رديت ليهو وعليكم السلام معمر كيفك .. دينا رميساء شجن ديل صحباتي .. معمر ياخوانا دكتور و سكتا على كده دينا اتشالقت و سألتني دكتور شنو ! عاينت ليهو و أنقذ الموقف في ساعتها قال ليها دكتور صيدلاني ، ابتسمت ليهو ابتسامه عريييضه الكلبه 😂💔 عاينتا ليها بتتبسم قالت ليهو اتفضل طيب ، دخلنا جوا الجامعه كلنا .. كانوا ببحلقوا فيهو لمن خجلوهو و انا كل ما ادي وحدة فيهم عين حااارة عشان تكسر عينها بتكون بتتمادى لسه ياناس 😒✋ لحدي ما وصلنا البنش بره و قعدنا كلنا ، سألهم الجامعه كيف ؟ و شعوركم شنو و انتو توب سنير و كده ! كانت بتجاوب عليهو شجن و الباقيات بعاينوا ليها متغايظات من لفحها ، و انا مستغربه في انو البنات ديل انا قلت ليهم ده عريسي ! و لسه بتعولقوا كده ياخوانا😂💔 معمر كان بعاين لي و انا متمحنه فيهم ! كان بتبسم لي من غير ما اشوفو ، و فجأة قال لي سندس ما ناوية تضيفيني ! قلت ليهو طبعا ياخ العفو والله اتلخمتا بعد شفتك ، دينا قالت لي احييييا ، حمرتا ليها شديييد 😒 هو تقريبا فهم حاجه بس شكلوا فهمها غلط 😂 عموما فتحت شنطتي و شلت المحفظة و قمتا على الكفتريا مشت معاي شجن و الباقيات قعدن ، معمر هنا سأل ناس دينا القرايه كيف ! سندس ماشه كويس ؟ قالت ليهو دينا هي والله بنقول ليها اقري و كمان داخلين على ميترمات لكن هي فاضيه سندس من الطلوعات والفسح ، كل يومين طالعه مع اولاد اهلها سعد و حسام من شارع النيل لي الكافيهات الفي الخرطوم ما خاله مكااان فظيييعه ياخ ، قال ليها يعني ما بتقرا البت دي تخلي كيف الدلع ده و تقعد تقرا ، قال ليها مستواها كيف! قالت ليهو كعب والله و شايله ملاحق كتيييرة و ما مستعده تجتهد او تتعب نفسها .. قال ليها ايواا ، طيب اها بتعملوا شنو انتو في يومكم ! قالت ليهو والله بعد المحاضرات مرات بنطلع البيت و مرات بنقعد شويه نتونس ، طيب و سندس! قالت ليهو نادرا ما تقعد معانا طوالي بترجع و بعد ده ما بتقرا 😂😂💔 .. لمن انا جيت هم سكتوا كان معمر بعاين لي ، و بتبسم لحدي ماقعدتا مقابلاهو في البنش التاني قدمتا ليهو العصير .. دينا انا عارفه انها عندها افكار خبيثه و ما بتصدق بسرعه فكان لازم تتأكد انو فعلا معمر دايرني ؟ قالت ليهو اها يا اخونا البت دي ناوي تريحنا منها متين ياخ ! قال ليها كيف ؟ عاينتا ليها اسكتي 😒 قالت ليهو يعني ما حددتوا حاجه رسميه قريب ؟ ولا أحمد عايزها تتم الجامعه ؟ هنا معمر فهم القصه و قال ليها والله انا زاتي الدايرها تتم الجامعه و ابتسم ليها وسكت شال عصيرو يشربوا .. هنا انا عاينتا ليها بعين حقاااره و شماااته ، و انبسطتا من ردو شديييد قال لي بعد خلص العصير قمنا ؟ قلت ليهو تمام ارح 😍 .. سلمنا عليهم و طلعنا ركبنا التوسان 😍 و اتحركنا ، قلت ليهو يامعمر انا بعتذر عن كلام دينا ، ضحك وقال لي ياخ ولا يهمك دي امور عادية ياخ 😂💔 انا دكتور و فااهم حركات البنات كوويس .. قلت ليهو الحمد لله طيب اتطمنتا ، قال لي اوصلك وين ؟ قلت ليهو كبري الحديد قال لي طيب تمام .. نزلني هناك و واصل طريقو ، مشى البيت عايش فيهو هو و امو بس برجع يتغداء معاها و لو عندو عيادة برجع و لو ماعندو بواصل يومو مع امو .. قعد معاها لانو ماكان عندو شغل ، لأول مره كان يونسها بي بنت 💛 كنت انا البنت دي قال ليها يا امي في وحده بتجي العيادة ، بنت صغيرة يا امي و جميله جمال 😍 ماشاء الله شعرهل طويييل شديييد و نحيفه لكن نحافتها مع ملامح وشها حلوة شديد ، بريييئة جدا ياخ قالت ليهو امو اها يا معمر مالها ؟ اول مره تجيب سيرة وحده مريضه عندك ! قال ليها مريضة شديييد كمان ، مرض بينو و بين الجنون شعره بس ، مرض مممكن ينتهي من حياتها و يعيشها في توهان و يدمر مستقبلها كلو ، هي ما عارفه خطورة مرضها ده شنو 💔 هي ما قادرة تتخيل انو الهي فيهو مم

كن يقتلها بالبطيء ممكن يتلف خلايا مخها براحه 💔 هي عايشه في وهم متحكم في حياتها الطبيعيه المفروض تعيشها ، هي عايشه تفاصيل حياة ما حقتها و موقفه حياتها بسبب الهي عايشاهو في الاحلام ، قالت ليهو لا حولا ولا قوة الا بالله .. قال ليها انا لازم اساعدها بأسرع وقت أنا بحاول القى حلول سريعه ، محتاج لي دعواتك ليها يا امي💛 البت دي مسكيينه و نيتها بيضاء والله ، قالت ليهو ربنا يشفيها ويصلحها بقولوا العين بتقع على الجمال الساحر و هي العين وقعت فيها 💔 قال ليها انا بحاول والله بكل قدرتي ، علاجها لا بسهولة و لا بالهين علاجها لازم يبدا من اسرتها ، بس اصل ليهم كيف ما عارف ! و المشكله انها قالت جات تتعاجل من وراهم و هم ما عارفين حاجه على الاقل لو كان وصلت لي واحد فيهم بس .. قالت ليهو يا معمر لو وضعها صعب كده حاول معاها ، قال ليها لالالالا انا لو جبتا ليها سيرة ساي اني داير رقم لي اهلها ممكن ما تجي تاني العيادة ، قالت ليهو والله دي عوجه دي ياولدي طيب اها حتعمل شنو ! شبك يدو و يدو التانيه و ختاهم في راسو و رقد و قال ليها ما عارف يا امي ماعارف والله ، قالت ليهو طيب عندك رقمها ! قال ليها اي .. قالت ليهو بس ولد جارتنا خالتك انفال عندها ولد شاااطر خلاص و مجرم في الحاجات دي طوالي تودي ليهو نمرتها ، بدخل لي تلفونها من تلفونو و بجيب ليك الارقام الدايرها .. الولد الاسمو مازن ده مجرم خلاص في الحاجات دي ، بطلع ليك اي شيء دايرو من على بعد انت بس وصيهو برقمها و قول ليهو محتاج ضروووري رقم اهلها ، قال ليها بقدر يا امي؟ قالت ليهو والله بقدر ماتتذكر لما عمك الحاج تلفونو اتسرق و انا ماشه السوق لقيت مازن معاهو شال رقمو و مشى بعد يومين جاب ليهو التلفون راجع ، قال بيها والله ما عارف لكن بحاول كدي اديني رقم خالتي انفال ، قالت ليهو هاك التلفون طلعوا براك .. شال التلفون و ضرب ليها بعد ماسلم عليها و قال ليها انا محتاج لي رقم مازن ضروري ادتو ليهو .. ضرب لي مازن و قال ليهو عندي تلفون بت زميلتنا و عايزين نعمل ليها مفاجأة في زول متقدم ليها ، عايزين ناخد راي اهلها ضروري و لو قلنا نشيل الرقم منها الموضوع ببقى بايخ .. مازن طوالي قال ليهو مافي مشكله رسل لي رقمها ورقم الزول الدايرو ، رسل ليهو رقمي و قال ليهو احمد اخوها بس كيف حتعرفوا مسيفاهو بشنو ! قال ليهو بفتح للتلفون بتاعها من اللابتوب بتاعي بهكر الوتساب بتاعها من المسجات بعرف انو اخوها منو و رقمو شنو .. قال ليهو تمام والله تكون خدمتني خدمه كبيييره يا مازن و كتر خيرك مقدما و ربنا يجزيك خير انت ساعدتني شديييد ، قال ليهو تسلم ياخوه .. بعد ساعات و لمن كان قاعد معمر في القيادة بالمساء و صلتو رساله من مازن فيها " رقم احمد " طوالي معمر كتب الرقم و ضرب ليهو ، رد عليهو احمد مرحب معاي منو ؟ قال ليهو احمد عباس ؟ قال ليهو ايوة اتفضل ياحبيب ! قال ليهو معاك معمر النور و عايزك في موضوع والله ضروري ما بتحكي بالتلفون ، قال ليهو معليش ! انت داير شنو بالضبط ؟ قال ليهو داير اختك سندس ، قال ليهو نعم !!!! انت منو ؟ عيد لي اسمك تاني ؟؟ قال ليهو انا قلت ليك الموضوع مهم و عايز اقابلك عشان اعرفك على نفسي و اهلي و انا زول جاييكم بالباب ، احمد طبعا لانو زول احمق و دمو حار قال ليهو انت وين هسي ! قال ليهو في شارع الستين ، قال ليهو قبلك بس بجي عليم بعد نص ساعه مكانك وين ؟ قال ليهو بوصف ليك مكان نتقابل فيهو طيب ..

#تابعووووني💛

#إيلوزيانيس
بقلم سندس مالك
-٦-
اخوي لاقى معمر في كافي من كافيهات الخرطوم ، سلم عليهو و قعدوا و الغريبه أحمد اخوي كان صابر ليهو ، بدا معمر بدا يعرفوا على نفسو قال ليهو دكتور معمر في الطب النفسي ، عارف انك حاليا مندهش علاقتي شنو بأختك سندس .. قبل شهر جات زارتني سندس في العيادة ، ما عارف الحالة الكانت واصله ليها الأقنعتها انها تتعالج و كويس انها قررت الحاجه دي .. قال ليهو دقيقه ! ما قادر افهم؟ سندس جاتك العيادة و انت دكتور نفسي! طيب جات ليه ؟ بتعرفك من وين ؟ قال ليهو جاتني من خلال دكتورة حولتها لي ، قال ليهو سندس مالها كمان ؟ جاتك ليه ! من ورانا كمان ! معمر قال ليهو دقيقه انا جاييك في الكلام و ياريت تصبر و تسمعني ، اول حاجه انا ماعندي علاقه بي اختك لا من قريب و لا من بعيد الا اني دكتورها النفساني بس .. تتفضل معاي للعيادة ؟ احمد قال ليهو عشان شنو ! انا عايز اعرف اول سندس عندها شنو و البوديها العيادة شنو ! انا ماشايف انها محتاجه لي حاجه زي دي ؟ و من ورانا كلنا ليه ! معمر قال ليهو ممكن نمشي العيادة عايز اشرح ليك الوضع ، قال ليهو طيب ح امشي معاك .. ركبو معاهو معمر في عربيتوو و وصلوا للعيادة بتاعت دكتور معمر .. طلب ليهو قهوة و موية صحه و فتح المكيف و قعد معاهو ، طلع ليهو ورق فيهو صور و بدا يتكلم معاهو ، سندس يا احمد بتعاني من مرض اسمو الوهم 💔 ح تشوف الحاجه دي فارغه بس انت اهدى و روق و طول لي بالك عشان انا اقدر افهمك وضع اختك حاليا و المفروض يتعمل ليها ، خلينا نخلي قصة انها جات العيادة كيف و ليه ، كونها جات دي حاجه كويسه شديييد لأنها حست بنفسها محتاجه توري زول مشكلتها و عايزة تحل المشكله ودي اول خطوات العلاج .. لازم نحنا نساعدها و نقيف معاها لانها حابه تتخطى الهي فيهو ، رغم انها شايفه كلمة مريضه دي حاجه كعبه وما متقبلاها ، لكن خلينا نحنا نسميها مريضة بمرض اسمو الوهم او طبيّاً كده بنسميهو بمصطلح (delusional disorder)؛ وهو واحد من أخطر وأصعب الأمراض النفسيّة، وفرعٌ من فروع اضطراب الذهن البتكون مشكلته الأساسية هي طريقة تفكير المريض وكيفيّة استخدامه لعقله. بيحصل الوَهم نتيجة اختلالٍ كيميائي في عقل المريض؛ ممكن تتراود ليهو بعض الشكوك في زوجته أو أهله، أو ممكن يفكّر بإنو معظم الناس دايرين يؤذوه، أو إنو عنده قدرات خارقة، وعلى الرغم من خطر المرض ده إلا إنو علاجه موجود وبيُشفى منه المريض. و مرات بيكون الرّهاب والخوف من الناس جُزءاً من الوهم، و ده بيخلي الزول يتصرّف بطريقة فيها خوف وحذر زائد، وبالتالي بيكون ده خطراً على نفسه وعلى غيره، سندس فقدت ابوها و بعدها بفترة كان معجبه بي شخصيه هي واقعيه جدا و موجودة بس خوفها الإتولد من فقدان ابوها خلاها تخاف من فقدان الشخصيه التانيه المعجبه بيها ، الغلط الحصل منكم انكم اهملتوها في فترة الوفاة كانت بتقعد براها وحيدة معظم الاوقات ، خليتوها تنفرد بنفسها كتير و ده الدافع الاول الخلاها تفكر في شخصية الولد المعجبه بيهو و خافت من انو المدرسه لو خلصت هي تاني ما حتشوفو ، ف عقلها الباطني صور ليها انها لازم تحافظ على الزول ده من الخساره و انو تخليهو ابدي ما يفارقها لحدي الموت ف اخترعت شخصية و سمتها فراس شخصية بنفس الشكل و المواصفات بتاعت الزول العاجبها ، خلتو جزء اساسي من نومها و بعد فترة بقى جزء اساسي من حياتها لا و كمان جزء لازم ما يعدي اليوم الا و هي نايمه مخصوص عشان تشوفو و تحلم بيهو و تخترع حلم مناسب مع الحياه الهي عايزاها ، حياة خاليه من الروتين الممل العايشاهو معاكم في البيت ، حياه مافيها مشاكل و نقاشاتكم البتحصل في البيت ، وسط كل الحاجات الكعبه بتهرب لشخصية فراس الاخترعتها هي .. بتستشيروا و بتاخد رايو و هي حقيقة بتطبق الراي العايزاهو هي لكن في صورة فراس قال لي و فراس ايدني ، ما حصل فراس غلطها لانو عقلها الباطن بيقول ليها انتي الصح دايما و انتي مميزة عن غيرك و عندك القدرة انك تغرفي الحيحصل معاك شنو لفترة طويله لقدام ، كانت قبل كده حلمت براجل جيرانكم حيموت و مات .. هي في الحقيقه سمعتك بتقول انو اتوفى بس صحت على تهيأ فراس قال ليها الراجل بتوفى ، خلطت بين الحقيقة و الخيال بسبب الصوت السمعتو بقول في وفاة و اصوات البكا و الصواريخ .. لمن سالتها الساعه كم و لقتها اربعه فعلا، حست بي انو الكلام ده حصل قبل كده ! ده فراس وراها انو الراجل حيموت و في الحقيقه فراس ما كان موجود ساعة انك بتصحي فيها للوفاة .. مشيت الجامعه ولاقيت اصحابها قالوا انها بتتكلم عن حياة مثاليه كلها فسح و دلع و اولاد خالتها سعد و حسام المامقصرين معاها في حاجه " احمد قاطعوا في لحظتها و قال ليهو دقيقه! نحنا ما عندنا اولاد خاله اساسا ! سعد و حسام ديل منو ؟" في اللحظه دي معمر ختى يدينو في حنكو و اتمحن بقى بعاين لي احمد و احمد عاين ليهو باستغراب ، معمر قال ليهو يبقى ديل شخصيات مفتعلات برضو عشان يرضوا الواقع بتاعها العايشه فيهو .. إيلوزيانيس الع