در مدح مرد تنهای تاریخ علی(ع)و ماجرای زن عرب و #گریز به مصیبت حضرت رقیه(س)

مرحوم انور اردبیلی

بخش 1️⃣

بزرگ مرد جهان حجت الهی علی
سپهر معدلتون جاودانه ماهی علی

بسیط مصطبه ی لطفینون گداسی ملک
حبیب لم یزلون مرد دل بخواهی علی

بساط حشمتینه رشک ائدن سلیمانلار
ایاقی آلتدا قویان عالم رفاهی علی

عبادت عالمی هر لیلی مثل لیله ی قدر
صفای عشقی سالان حیرته پگاهی علی

مثال آینه دور کارنامه ی عمری
که قویمیوب ائله آئینه ده سیاهی علی

نه زور ائدوب بیرینه مطلقا نه زوری قبول
سریر منزلتون ذوالجلال شاهی علی

روشِ کاری مسلمانلارا گوزل میزان
خداپسند عملی ایلین گواهی علی

ایشیقلی مشعل اولوب سالکان معنایه
نشان وئروب هامی مخلوقه شاهراهی علی

اؤزی فروتنیدی زندگی سی درویشی
ولی ضعیف و ستمدیده تکیه گاهی علی

لقبینی خبر آلسون دییر سنه تاریخ
یتیم لر آتاسی بیوه لر پناهی علی



قسم خدایه علی ذات حقّه مظهریدی
قسم خدایه علی بی نظیر رهبریدی



تَیَمُّناً بو حدیثی به صورت اشعار
وئروم عریضه بو مجلسده اَیُّهاالحُضّار

کچوردی کوفه ده بیر کوچه دن ولی الله
گوروب بیر عورتی معبرده حیدر کرّار

دولی سو مشکین آلوب چیگنینه گئدور ائوینه
ائدوب اؤ عورتی دل خسته یولدا سنگین بار

دیور الهی داخی جاندا طاقتیم یوخدی
بو شهر کوفه ده یوخ من کیمی بلایه دچار

علی منی نه یامان گونلره قویوب یارب
اراده ایله ئوزون انتقامه یا قهّار

ائشیتدی سؤزلرینی عورتین وصیّ رسول
یاخینلاشوب اونا الطافین ایلدی اظهار

دئدی سو مشکوی وئر حمل ائدوم بیر آز دینجل
یورولموسان بیلورم ای عفیفه ی دیندار

منی ده دینی برادر حساب ائله ئوزوه
باجیا قارداشی حامی گرک اولا ناچار

سو مشکینی گوتوروب مقصده یتوردی علی
بویوردی قارداشوی عفو ائت ای وفا کردار

بو بیر سؤالیمون اما جوابین ایستیورم
علی سنه نه ستم ایلیوبدی قیل اقرار



دگل سن اولما ابوطالب اوغلونا خوش بین
ندور دلیلی اونا دلدن ایلوسن نفرین



دئدی اَخَ العرب ای عبد حضرت باری
سو مشکیمی گتوروب ایلدون منه یاری

ولی بو یاخشیلیقا منده بیر عوض یوخدی
جزا گونینده یقین اجروی وئرر تاری

دئدون علی ائلیوبدور سنه نه ظلم و ستم
ائشیت جوابینی ای خسته لر هواداری

شهید ائدوبله منیم دین یولوندا صاحبیمی
قالوبدی دورد اوشاقیم ائوده یوخ پرستاری

وظیفه دور اونا ایتام شهره باش یتوره
صغیر و بیویه یوز وئرمیه گرفتاری

رئیس مملکت مسلمین دور اما
یولونا منتظروک گلمیوب بیزه ساری

بالالاریما دویونجا غذا تاپانمیورام
آدین قویوبدی علی بیوه لر مددکاری

ائشیتدی شیرخدا عورتین بو سوزلرینی
گلوبدی رقّته گوزیاشینی ائدوب جاری

بویوردی حق سنیلندی قصور ائدوبدی علی
باغیشلا جرمین اونون بیلمیوب بو اسراری

طعاموزه سویوزا من ئوزوم کفیل اولّام
یتیم اوشاقلاروی ایلرم نگهداری



علی مثالی سیزه گونده باش یتورّم من
لباسه حاجتوز اولسا آلوب گتورّم من



وئروبدی قول حمایت اؤ بیکسه مولا
اورکده غصه لری جوشه گلدی چون دریا

دیوردی اؤز اؤزینه غفلت ایلیوبسن علی
قصور اولوبدی وظیفونده ائتمیوبسن ادا

آدون خلیفه الونده کلید بیت المال
خبر یوخون نه چکور خانواده ی شهدا

رئیس مملکت اولماق وظیفه دور سنگین
گرک تعهّد ائدن عهدینه ائده ایفا

چالیشدی ائتدی تهیه امیر گردون جاه
بیر آزجا بوغدا اُونی بیر طبق دولی خرما

رُطب طبقده الی اوسته، اُوندا چیگنینده
اؤ بیوه نون ائوینه حمل ائدوبدی شیر خدا

قاپونی وردی کچوبدور اطاقه خجلتیله
یره قویوبدی آپاردیقلارین شه والا

اوشاقلاری آلوب آغوشه یوزلرین ئوپدی
اؤ ائو محبت ائوی اولدی یعنی سر تا پا

بویوردی عورته قسمت ائدک ائوین ایشینی
مواظبت ائله سن بو اوشاقلارا حالا

گتوردوقوم اُونی دا من اؤزوم خمیر ائلیوم
سیزه چورک پیشیروم فوری ای حمیده لقا



علی اؤ بیوه نون القصّه گوگلونی آلدی
خمیری ائتدی مهیّا تنوره اود سالدی



یواش یواش ...


ادامه دارد ⬇️⬇️

#حیدریه_مدح
#حضرت_رقیه
#بزرگ_مرد_جهان_حجت_الهی_علی
#انور_اردبیلی
#صدای_عاشورا_انور
#ترکی

در مدح مرد تنهای تاریخ علی(ع)و ماجرای زن عرب و #گریز به مصیبت حضرت رقیه(س)

مرحوم انور اردبیلی

بخش 2️⃣

یواش یواش اوجالوبدور شراره ی سوزان
لب تنوریدن ائتدی زبانه سی فَوَران

یوزین دوتوب اوجالان شعلیه بویوردی علی
جهنّمون اودونا یانما سن، بو شعلیه یان

شرار دوزخی یاددان چیخاتما ای نفْسیم
ائله بیر آتشه هانسی بشرده واردی توان

سن استراحت ائدوبسن یتیملر قالوب آج
دؤزر نه نوعیله بو درده صاحب وجدان

قاپی ویریلدی اؤ وقته گلوبدی بیر عورت
علینی گوردی کنار تنوریده حیران

سؤال ائدوب بو سؤزی خانه صاحب عورتدن
قوناقوی تانوسان کیمدی؟آدین ایله بیان

دئدی تانیمیورام ، آدینی خبر آلدیم
منه بویورمادی امّا اؤ نابلد مهمان

فقط دئدی بو سؤزی کوفه ده غریبم من
تنوری داغ ائلیوبدور بیزه پیشیرسون نان

جواب وئردی دایان قوی آدین دیوم کیمدی
علی ولیّ خدادی اؤ رادمرد زمان

علی آدین ائشیدوب قاچدی مطبخه اؤ خانم
دئدی اؤزوم بالالاریم آقا سنه قربان



گناهیمی آقاجان عفو ائله بو گوزیاشیما
جسارت ایلمیشم ساحتونده کول باشیما



جواب وئردی اونا شهریار ملک حجاز
علینی سن تانیدون کشف اولوندی حیف اولا راز

وظیفه دور گرک عذر ایستیه علی سندن
قصور مندن اولوب سنده یوخدی عذره نیاز

تَفضّل اولسا الٰهیدن ایلرم جبران
باغیشلیون بیلورم غفلتیم اولوبدی بیر آز

گلوب بالالاروی بیر بیر آلّام آغوشه
آتا کیمی دؤزرم هر نقدری ائتسه له ناز

قلم سؤزی گینه ده ایستیور گریزه چکه
سوزون گریزی اگر اولماسا گوزل اولماسا

گرک اورک اودونی گوزیاشیم ائده خاموش
دویونجا آغلاماسام قلبیمون اودی سویوماز

محلّی دور ائلیم عرض شحنه ی نجفه
آقا سنی بشریت تانور یتیم نواز

نوه ن رقیه کیمی نازنین بالا یوخودی
خرابه یرده آجیندان ائدوردی سوز و گداز

بنفشه مثلی قرا ساچلاری پراکنده
آز اولدی عمری ولی تار گیسوانی دراز

دوداقینی گوتورنده اؤ قیز دوداق اوستن
چمن غصه ده عیناً اولوردی غنچه ی باز



سولان یوزی ساری گلدن آلوردی صبر و قرار
خمار گوزلری نرگس لری ائدوردی خمار



زمانه ده اونون آیری زمانه سی واریدی
اورکده آتش غمدن زبانه سی واریدی

همیشه توأمیدی شبنمیله گل مثلی
یوزینده گوزدن آخان اشک دانه سی واریدی

گجه لری اویاقیدی گوزی ستاره کیمی
نجوم و ماهیله بزم شبانه سی واریدی

توکوردی هر نقدر گوزیاشی قوتارموردی
اورکده دُرّ سِرشکه خزانه سی واریدی

ترنُّمی ائلیوردی اثر قناری لره
ز بس قفسده یانقلی ترانه سی واریدی

عزا بهارینه بیر بلبلیدی پر بسته
دمیر قفس مَثَلی آشیانه سی واریدی

سیزیلدیاندا خانم زینبین آلیدی جانین
سؤزینده شرح غم عاشقانه سی واریدی

باخوردی حسرت آتا قارداش آختاروردی گؤزی
قیامت ائتمگه هرگون بهانه سی واریدی

دونی قرا ساچی قاره گونوزی بختی قرا
بدنده قمچی یریندن نشانه سی واریدی

یوزینده طُرّه سی آشفته تار فکری کیمی
تِلین داراماقا فکر ائتمه شانه سی واریدی



کچوردی عمری غم بی شماریلن اؤ قیزون
واریدی کشمکشی روزگاریلن اؤ قیزون



دیوردی عمه آتام سروریم هایاندا قالوب
رئیس سلسله ی اطهریم هایاندا قالوب

گلی گرک بجَره باغبانی گلشنده
سارالموشام بی بی گل پروریم هایاندا قالوب

بابام منی ایتوروبدور و یا که من بابامی
بو شهره نابلَدم رهبریم هایاندا قالوب

اگر مسافرت ائتمیش آتام سؤزوم یوخدی
بویور گوروم اؤ نبی بنذریم هایاندا قالوب

خبری یوخدی قرا بخت اولوب گوزل باجیسی
قبیله نون گوزلی اکبریم هایاندا قالوب

دئسم ملکدی علی اکبره خطا دئمیشم
مدینه یوسفی تاج سریم هایاندا قالوب

جانین نه ارزشی واردور ایتورسه جانانین
دیلیمده یوخدی توان دلبریم هایاندا قالوب

کشیده قامت عَموم بوشلیوب بیزی باشینا
علی نشانی علی مظهریم هایاندا قالوب

هاچاندی قاسم آهو نگاهی گورمه میشم
غزال عترت پیغمبریم هایاندا قالوب

ائلون جوانلاری گیرم سفرده دور هاموسی
ربابه سینه گلی اصغریم هایاندا قالوب

نقاب یوخدی یوزومده بی بی آچیخدی باشیم
سه ساله فاطمیم معجریم هایاندا قالوب



خطالی «انورم» الله اورکده وار محنیم
گناهیمی بو عفیفه قیزا باغیشلا منیم

#حیدریه_مدح
#حضرت_رقیه
#انور_اردبیلی
#صدای_عاشورا_انور
#ترکی

وداع حضرت امام حسین علیه السلام

مرحوم یحیوی اردبیلی

گتمه گتمه دایان
ای شه مهربان
بیر دوش آتدان حسینیم
ای لب عطشان حسینیم

لبلروندن ئوپوم
گوزلروندن ئوپوم
جان حسین جان حسینیم
ای لب عطشان حسینیم

زینبون یوخدی قارداش
سندن ئوزگه پناهی
یدی قارداش ایچینده
سنسن امید گاهی


آند ویرم آنام
فاطمه حقینه
دوش آتوندان برادر
صبر ایله بیر زمانی

گول بوغازون ئوپوم
دولانوم باشیوه
اخذ ایدوم مقدموندن
توشۀ جاودانی

سن که تعجیلیله
آت سورورسن حسین
بس کیمه تاپشورورسان
زینب بی نوانی

بوندان آرتوق منیم
ایلمه غصه دن
باغریمی قان حسینیم
ای لب عطشان حسینیم





کوفه اهلی قبول
ایله سیدی عوض
من گچردیم بو جاندان
سن قالاردون سلامت

یا که عورتلره
شرعون اولسیدی گر
حکمی جایز جهاده
درک ایدردیم شهادت

بیرده سندن صورا
زینبون ساغ قالا
تانه لازمدی گچسون
هر گونی مین قیامت

سن ئولندن صورا
چوخ سزادور جهان
قالسا ویران حسینیم
ای لب عطشان حسینیم





ایلیور عربه ده
کوفیان عرصه ده
گتمه قربانون اولام
گتمه قربانون اولام

قان اولان قلبیمی
تازه دن لخته قان
ائتمه قربانون اولام
گتمه قربانون اولام

اوخشیور گیتمگون
بو وداع ایتمگون
ختمه قربانون اولام
گتمه قربانون اولام

بو گیدیشده سنی
ساغ گورر زینبون
بیرده هاردان حسینیم
ای لب عطشان حسینیم





باجی قارداش بو گون
قالمشوق بی مدد
سنده مظلومِ اعدا
منده مظلومِ اعدا

ختم پیغمبرون
اوغلون ئولدورمگه
آدین امت قویانلار
یکسر اولموش مهیا

تک قالوبسان حسین
یوخدی بیر ناصرون
بی وفا کوفه اهلی
ایلیوللر تماشا

جمله آماده دور
ایلسون لر سنی
قانه غلطان حسینیم
ای لب عطشان حسینیم





کوفه اهلی بوگون
تیشۀ ظلمیلن
سن غریب و وحیدون
سیندیروب اتفاقین

قورخورام یا اخا
گیتسون اهل جفا
ظلم الیله آتامون
سوندورللر چراغین

ال تاپالار بیزی
ویرماقا سویماقا
عترت هاشمینون
محو ایدللر تفاقین

قویما بو عرصه ده
بیر بولوک عترتون
سینه سوزان حسینیم
ای لب عطشان حسینیم

#سبک_خیمه_نی_سیلمیشم
مشابه ⬇️⬇️


#وداع
#گتمه_گتمه_دایان
#یحیوی_اردبیلی

‍ استمداد حضرت قاسم علیه السلام


آهنگ : تا مشکتو تو آب زدی

هرایمه گل آی عمو - قالوب آراده قاسمون
یخلدی تُپراق اوستونه - کرب و بلاده قاسمون
عموجان گل گیتدی الدن صبر و قراریم
یارالاریمدان آخور قان ای شهریاریم
دَم آخر یانیمه گل ای شاه عالم
نفس گلمور ،جان چخور یوخدی اختیاریم
گل داده - عمو جان
امداده - عمو جان


حسن بالاسیم عمو - او مه لقاسیم عمو
علی اکبرون اولوب - اونون فداسیم عمو
یولون حَقدی ، اصغریون حیرانیم من
سنون تک منده بو دشتون مهمانیم من
یتیملوقی سنلن هیچ احساس ایتمدیم من
سنون علی اصغریون قربانیم من
گل داده - عمو جان
امداده - عمو جان



اورک قراریم آی عمو - منیم نگاریم آی عمو
گیدوب توان یوخومدی هیچ- صبر و قراریم آی عمو
آلوبدور دوریم قَصاوتلن قوم عدوان
یتیش فریادیمه سن ای شاه شهیدان
قالوب بیر حاله بو پاره جسمیم عمو جان
آخور صحرایه یارالاریمدان یره قان
گل داده - عمو جان
امداده - عمو جان



دو شوبدی نعشیم اللره - یارالی دلبروی کیمی
اولوبدی پاره پیکریم - علیِّ اکبرون کیمی
علی اکبرلن نجه پیمان باغلامیشدیم
منه قارداشیدی قلبیمی داغلامیشدیم
شهادت بالداندا شیرین اولدی عمو جان
گجه نی صبحه کیمین گیزلین آغلامیشدیم
گل داده - عمو جان
امداده - عمو جان

بو کربلاده قاسمون - حالی یاماندی آی عمو
دوریم آلوبدی قوم شَر - گور نه دوماندی آی عمو
عموجان گل بی کسم بو چولده غریبم
آتام یوخدی کربلاده آخر یتیمم
یاغور اوخلار پیکرِ بی جانه یاقوش تک
ایاق آلتدا بس کی قالدیم خُرد اولدی سینم
گل داده - عمو جان
امداده - عمو جان


عمو یامان زمانیدی - گوزوم یاشی روانیدی
گلنده آغلاما بو چول - هاموسی ال چالانیدی
عمو جان کاش مَه جمالون بیرده گوریدیم
گلنده سن یاتمیدیم بیرجه دوریدیم
یتیشدی عمروم باشا ای کاش سویلرم کی
عموم عباسی گوریدیم اوندا اولیدیم
گل داده - عمو جان امداده - عمو جان
🌴🍃🌴🍃🌴🍃🌴🍃🌴🍃🌴🌴🍃🌴
http://tttttt.me/naghmehaye_gham

‍ سبک شاخسی و سینه زنی (وصال تبریزی)


من ریزه خوار خوان سر لشگر حسینم
تا وار نفس جانیمدا من چاکر حسینم
قوی بولمینده بولسون کی نوکر حسینم

نوکرم نوکرم من ، ایکی دنیا بسیمدی
بیر کسیم یوخدی اما آقام هر بیر کسیمدی

یاحسین یابن الزهرا....


اهل دیلی ندندور مستانه ایلیوبسن
عشاقه کربلانی ، میخانه ایلیوبسن
الحق منی حسین جان دیوانه ایلیوبسن

به قرا نی بدنون گر ئولم سویمارام من
نقدر سسلیم گل آدیوی دیمارام من

یاحسین یابن الزهرا....



تیر غمیله آقا گل قلب زاری دئلمه
من راضیم اورکدن آرزمدی چون بو کلمه
ای کاش آنام دیه کی گئد کربلایه گلمه

بولوسن ای آقاجان ، بو سوزومده سوزوم وار
آند اولا بو عزایه کرمونده گوزوم وار

یاحسین یابن الزهرا....



الدن عنان صبری مولا آلوب فراقون
یانام دوشنده یاده هر آن سوسوز دوداقون
قسمت ائله گوروام من بیرده گوزل رواقون

عهد ائدیرم آقاجان بو سوز اوسته دایانام
قسمت اولسا حرمون باشونا من دولانام

یاحسین یابن الزهرا....



باشلار دوشوب دوباره بیر آیری شور و شینه
چوخ دردیمیز وار اما دیلده دیاخ حسینه
ایسته بو جمعی مولا بیر بین الحرمینه

منی مست ایلیوبدی کربلانون هواسی
جانم اولسون او آلتی گوشه قبرون فداسی

یاحسین یابن الزهرا....

#امام_حسین
#شاه_حسین_گویی

🌴🍃🌴🍃🌴🍃🌾🍃🌴🍃🌴
http://tttttt.me/naghmehaye_gham

‍ ‍ ‍ #رقیه_{س}

لای لای ای ناله سی آفاقه چاتان نازلی بالا

لای لای ای پاره حصیر اوسته یاتان نازلی بالا

لای لای ای گوز یاشینی قانه قاتان نازلی بالا

لای لای ای عمه لرین گوزدن آتان نازلی بالا

عمون اولسون سنه قربان یارالی جان یارالی

یارالی جان یارالی جان یارالی جان یارالی

عمون اولسون سنه قربان یارالی جان یارالی



لای لای ای غصه قرارین آلانیم نازلی بالا

لای لای ای درده ربابی سالانیم نازلی بالا

لای لای ای نیمه شبلر یوخودا نازلی بالا

قارداشی اصغره لای لای چالانیم نازلی بالا

گئدوسن اصغره مهمان یارالی جان یارالی


یارالی جان یارالی جان یارالی جان یارالی

عمون اولسون سنه قربان یارالی جان یارالی

🌴🍃🌴🍃🌴🍃🌴🍃🌴🍃🌴🍃🌴🍃🌴🍃
http://tttttt.me/naghmehaye_gham

حضرت علی اکبر علیه السلام
کلامی زنجانی

یاراداندا اوغول آللاه سنی زیبا یارادیب
سرو آزاده کیمین قدیوی رعنا یارادیب

حسنوی احسن ائدیب نقشیوی شایسته چکیب
خُلقوی منطقوی مظهر طاها یارادیب

بو گوزل گوزلره باخدیقجا گوزوم روشن اولور
ازلی قدرت عجب دیده شهلا یارادیب

کیم دویوبدی گول اوزوندن بالا تا منده دویام؟
سوگیلیم سنده خدا سومه‌لی سیما یارادیب

عارضین گر گونه تشبیه ائله‌سم ناقص اولار
هانسی نیّرده خدا بیله تجلا یارادیب؟

دامنیمده بودی فخریم سنی من بسله‌میشم
سنه لیلانی کنیز حیّ توانا یارادیب

بو یول آللاه یولیدی ساخلاماق اولماز گئده‌نی
سن کیمی حق بو یولا فدیه عظما یارادیب

ائله باخما منه باخدیقجا امیدیم کسیلیر
یارادان نرگس مستینده معما یارادیب

عشق خیاطی عجب قدیوه خوش جامه بیچیب
بویووا آق کفنی خلعت زیبا یارادیب

خوش گونون خاطره‌سین اهل وفا آتماز اوغول
بو گوزل سوزدی گئچن گونلره گون چاتماز اوغول

سنه من خدمت ائدردیم اودا بیر گونلریدی
نازیوی گونده چکردیم اودا بیر گونلریدی

بیر یاشین واریدی اوغلوم ایاق آتدین یئریدین
ایاق آلتین سوپورردیم اودا بیر گونلریدی

گئجه گوندوز ننه‌ن اولسون بشیگین سینه‌میدی
لای لای آهسته دئیردیم اودا بیر گونلریدی

سایه‌لی سرو کیمین دیللره دوشموشدی آدین
منده سایه‌نده گزردیم اودا بیر گونلریدی

سن اوجالدیقجا قوجالدیم من اوغول عیب ائله‌مز
بو گونه هی تله‌سردیم اودا بیر گونلریدی

بو گونه باخما سن هر وقت گئدنده سفره
من دالینجا سو سپردیم اودا بیر گونلریدی

گئدیقین یولدان اگر گئج قییدیدین وطنه
من ئوله‌ردیم دیریله‌ردیم اودا بیر گونلریدی

من دئیردیم سنه درد دیلیمی سنده منه
گه دئییب گه ائشیده‌ردیم اودا بیر گونلریدی

هی دئیردیم گوزلیم سنله چیخام بیر سفره
سفری سنله سوه‌ردیم اودا بیر گونلریدی

تله‌سردیم ایلیاق بیرده زیارت سفری
سنله آخر سفریم اولدی شهادت سفری

گلمیشم ایندی فغانه بودا بیر گوندی بالا
گتیریب غم منی جانه بودا بیر گوندی بالا

فلک ایستردی همیشه سنی مندن آییرا
کامنه چاتدی زمانه بودا بیر گوندی بالا

صبح اذانین هیجان گتدی آییق قلبلره
قولاق آسدیم یانه یانه بودا بیر گوندی بالا

تللین اوسته دایانیب ظهر اذانیندا ده‌ گئت
آز قالیر وقت اذانه بودا بیر گوندی بالا

بودار خجلت چکیرم گل گئداق ئوز چادریمه
تا وروم زلفوه شانه بودا بیر گوندی بالا


ـــــــــــــــــــــــــــــــــــــــــــــ
یاد آور دو بند از استاد #کریمی_مراغه_ای :

کربلاده دولاناردیق اودا بیر گونلریدی
هره بیر شمعه یاناردیق اودا بیر گونلریدی

مشکین اطرافین آلاردیق هامی پروانه کیمین
سو ایچنده اوتاناردیق اودا بیر گونلریدی
ـــــــــــــــــــــــــــــــــــــــــــــ

#یاراداندا_اوغول_آللاه_سنی_زیبا_یارادیب
#کلامی_زنجانی
#ترکی
🌴🍃🌴🍃🌴🌴🍃🌴🍃🌴🍃🌴🍃🌴🍃🌴🍃
http://tttttt.me/naghmehaye_gham

حضرت علی اکبر(ع)

مرحوم سعدی زمان

آتدان دوشنده اکبر گلگون قبا یره
شان و شرفده غبطه آپاردی سما یره

معناده گلدی عرش خدای جلیلدن
زهرا و مرتضی و رسول خدا یره

یاسین تلاوت ایتماقا یاسین شبیهینه
اگلشدی باشی اوسته شه هل اتی یره

جان اوسته گوردی قبلۀ اصلی اوز عکسینی
دوندردی سالدی قبلیه،آخدی دما یره

سرمشق ویردی لیلیه زهرا فغانیله
افلاکیدن یتوردی ملک لر نوا یره

بیرده آتاسی گلدی اوغول نعشی اوستونه
گوردی دوشوب یارالی او اعظم فدا یره

باشی قلجلانوبدی جفائیله،گوئیا
کحراب کوفه ده یخیلوب مرتضی یره

بیر دسته آتشی گله بنزور یارالاری
اوراق ایدوب توکوبدی نسیم صبا یره

اعضاسی برگ گل کیمی میدانی دولدوروب
قانی ب غیشلیوب اثر کیمیا یره

بیر کیمیادی قلب مسه مسح ایده اگر
سویلر باخان دوشوبدی ارینمیش طلا یره

نه باشدا وار نه سینه ده بیر قطعه صاف یری
اهل جفا ووروبلا یارانی یارا یره

تی غیله آیریلوبدی بدن ارب اربدن
کفار کوفه جسمین ایدوب توتیا یره

گورجک بو حالی چخدی اوزیندن غریب امام
بی اختیار آتدان اوزین سالدی تا یره

یدی قدم سوروندی،یتوب قانلی نعشینه
مظلوم اوغول یانندا اوتوردی آتا یره

یردن گوتوردی قویدی دیزی اوسته باشینی
توکدی در سرشکینی میر هدا یره

دیندیردی،گوردی دینموری،ضعف عالمینده دور
قانی آخور یارالارینون برملا یره

بیر گوزلرینی بیرده سیلوب قانلی دیشلرین
بیگانه گوردی،قویدی باشین آشنا یره

یعنی یارالی باشین اورک باشینه باسوب
قویدی دوباره پادشاه کربلا یره

سالدی اوزین جنازه سی اوسته فغانیله
یوخدور علاجی گوردی گلور بیر رجا یره

قویدی یوزین او قانلی یوزه چکدی آه سرد
اود یاغدیروب او سرد نفسدن هوا یره

بیر صیحه چکدی،آغلادی،سسلندی وای اوغول
هانسی خطالی ال سنی یخدی بالا یره

ای گوزلریم ضیاسی،گوزون من فداسی دور
سنسیز دوشوب گوزیمده کی نور و ضیا یره

من دل شکسته نین الینه سن عصائیدون
قدیم بوکولدی،دوشدی الیمدن عصا یره

هر اوخ سنه ووروبلا منیم باغریمی دلوب
بو قان منیم قانومدی توکوب اشقیا یره

ناز ایلوسن منه سسیمی یا ایشیتموسن؟
جسمون تیکوبدی خنجر و شمشیر یا یره؟

گیرم دورانموسان ایاقا باری آچ گوزون
قلبیم سینوب،سوزوم دوشه اولما رضا یره

ای نوجوان قوجاتدی جوان الماقون منی
لایق بو سرو قدیوی گوردی قضا یره

توپراقلار اوسته ایسی ده یاتما یارالی سان
دور حمل ایدوم جنازه وی بیر با صفا یره

قلبیم دولوبدی قانیله ای مایۀ حیات
توکسون گرک بو قانی خدنگ جفا یره

پیغمبر اوغلی آغلادی،آغلاتدی دشمنی
ووردی عمامه سین او زمان مصطفی یره

قلبین بوشاتدی،دوردی ایاقه فسرده حال
سالدی عبانی خامس آل عبا یره

یخدی عبایه قطعه به قطعه جنازه سین
ووردی فضای صبریده عالی لوا یره

آغلار گوزیله سسلدی فتیان هاشمی
جمع اولدولار او مجمع داد و بکا یره

بیر نحویله گوتوردوله صد پاره جسمینی
مخیمده تا سالندی او فرش عزا یره

اهل حرم توکولدوله،ناگه نه گوردولر
فرش ایلیوبله شورش روز جزا یره

مظلوم آتا دوروبدی اوغول نعشینه باخور
اشکین توکور او آئینۀ حق نما یره

آغلار گوزیله زلفی پریشان مخدرات
اگلشدی گوزده گوز یاشی،دلده نوا یره

بعضی اوپوب یارالارین ایلردی آه و زار
سسلردی قویما صورتون ای مه لقا یره

بعضی او دستۀ گلدن ایدردی کنار خار
بلبل کیمی سالوردی فغان و نوا یره

گلدی هامی،آناسی ولی گلمدی،دوشوب
بی هوش خیمه لرده او بی اقربا یره

امر ایلدی امام چخاتسونلا لیلینی
گلسون اودا او منطقۀ ابتلا یره

قولتوقلارینا گیردیله لیلانین اهل بیت
گلدی او لوح دلده کی ما یرتجی یره

اما نجه که گه یخیلوردی،دوراردی گاه
گوزدن توکردی گوهر عالی بها یره

گلموردی دیزلری،سورونوردی ایاقلاری
دگموردی خط مشیده بالمره پا یره

گلدی یتیشدی تا که اوغول نعشی اوستونه
گوردی او بینوا دوشنوب بیر عبا یره

اما نجه عبا،دولودور قانلی عضویله
هر عضو اوز یرینده دوشوب جابجا یره

مانع اولوب حیا،باشی اوسته اوتورمادی
پائین پاده اگلشوب اول بینوا یره

اوز سینه سی آراسینا باسدی ایاقلارین
ناکام اوغول یانندا دوشندی آنا یره

اول او قانلی چکمه لرین خارج ایلدی
اشکیله یازدی رمزاً او کان حیا یره

شهزاده لر گلنده سفردن کنیزلر
بو رسمیدور جلوس ایدر ای با وفا یره

شهزاده چکمه سین چخادار مهربان کنیز
یورقون گلوب،یتیشمسون امری رخا یره

منده سنه کمینه کنیزم اوغول علی
لازمدی نقش بند اولا بو ماجرا یره

ئولسون آنان،اوغولسوز آنان تاب ایدر مگر
دوشسون بیله یارالی بو قد رسا یره

دور گور نجه قیام قیامت قیام ایدوب
خون دلین توکور حرم لافتی یره

ای نسل مصطفادن اولان اولین قتیل
عطشان دوشن یارالی فدا تک منا یره

مستخدمون حسینی بلورسن مریض دور
لطف ایله تا اوزین سالا خاک‌ شفا یره

محتاج ایلمه بو اطبایه،قیل نظر
دوشسون الینده کی بو زجاج دوا یره

#سعدی_زمان
#آتدان_دوشنده_اکبر_گلگون
#چهارده_معصوم_حسینی ص 297
#ترکی🌴🍃🌴🍃🌴🍃🌴🍃🌴🍃🌴🍃🌴🍃🌴🍃🌴🍃
http://tttttt.me/naghmehaye_gham

جلالت حضرت اباعبدالله الحسین علیه السلام
گریز به حضرت علی اکبر علیه السلام

حسن صبری

یا حسین موهبتون عالم امکانه دگر
کربلانون آدی تک روضۀ رضوانه دگر

یوخ مثالون گزلر کل خلائقده سنون
آدوون نقطه لری خلقت انسانه دگر

یتوب اثباته کرم درگهیسن باب سخا
قاپوون سائلی گور حشمتی سلطانه دگر

منی نوکر بیل آقا درگهوون نوکرینه
عزتی نوکریوون ملک سلیمانه دگر

جان وئرنده قویاسان گر باشیم اوسته قدمون
جان وئرن ساعتی والله نچه دورانه دگر

آغلارام عشقوه هر صبح و مسا دائمی من
بیلورم چشم تریم بو لب خندانه دگر

چوخلاری درگهیوه گلدی آلا درده دوا
گوروب اوندا کی آدون مین دنه درمانه دگر

سنی تک هاردا اولار اکبرینی ائتدی فدا
هانسی اکبر کی تلی یوسف کنعانه دگر

هانسی اکبر که اونون وصفی سیغشماز کتابا
لبینون لعلی فقط یوز دنه دیوانه دگر

مست ائلردی باخانی بیر باخیشیلان او گوزل
نازیلن بیر باخشی ساغر و پیمانه دگر

حوریدور یا کی ملکدور یر او چون سیره گلوب
دئمرم حور و ملک دیرناقی قیلمانه دگر

گجه لر سیره چیخاندا ائله بیل آیدی چیخوب
او گوزل صورته باخ گور مَه تابانه دگر

طاق ابروسی اونون بنزیر عرشون طاقنا
هاشمی خالی اونون مهر درخشانه دگر

فخر ائلر یر کی اولوب خاک ره و کوی علی
هریره قویسا قدم توپراقی مرجانه دگر

توز قونوب چکمه سینه تا کی اوپه مقدمینی
مقدمیندن اوپنون منسبی شاهانه دگر

یل اسردی او قرا زلفیلره بوسه وورا
دسته دسته ائله بیل زلفیلره شانه دگر

گون دوشوب مقدمینه شعلۀ سوزانیلن
سویلیور گئتمه علی گوزلره بیگانه دگر

خیمه ده لیلیِ بیچاره ده معجر گوتوروب
الی گه دیزلره گه سینۀ سوزانه دگر

سسلیوب گئتمه علی بیرده دایان بیر منه باخ
کشتیِ صبریمی گور هر دمی طوفانه دگر

نیلیوب لیلی سنه چوخلی اونا ناز ائدوسن
گر خطا ائتسه اونا عفو کریمانه دگر

بِئله دور قاعده هر عشقون آراسیندا علی
شمع یاناندا اونا تئز تئز پر پروانه دگر

چوخ تلاش ایلر او پروانه اودی رام ائله سون
دولانار شمع باشینا آتشی تا جانه دگر

گل اوتور خیمه ده قوی باشووه من بیر دولانیم
بوباشی من بیلورم نیزه ی عدوانه دگر

قوی اوپوم لبلروئی گلمگیوه یوخدی گمان
بیلورم تیر و خدنگ بو لب و دندانه دگر

دوتولار آی کیمی رخسارون اولار قرمزی قان
او قرا تل بویانوب ظلمیله القانه دگر

دشمن خیره سرون رحم ائله مز قامتیوه
خنجر کینه بو گون سرو خرامانه دگر

گئدوسن رزمگه صبرینی ده ایله دعا
نوکرون زحمتی هر آینده سلطانه دگر

🌴🍃🌴🍃🌴🍃🌴🍃🌴🍃🌴🍃
http://tttttt.me/naghmehaye_gham

رباعیات حضرت علی اکبر علیه السلام


✅حاج ولی الله کلامی زنجانی
آفرین ای اولین قربانی آل رسول
تو شبیه عقل کل از همتت حیران عقول
در منای عشق جان دادی و ابراهیم گفت
ای خلیل کربلا قربانیت بادا قبول


✅ حاج غلامرضا سازگار
عدو خنجر به قلب پاره می زد
غمت آتش به سنگ خاره می زد
به چشم خویش دیدم جان بابا
که از فرق تو خون فوّاره می زد


✅ سید رضا مؤید
ماهی که ز آفتاب روشن تر بود
لب تشنه ی آب و تشنه ی باور بود
می رفت و دل از حسین می برد که او
پیغمبر کربلا علی اکبر بود

در تابش آفتاب ای ماه برو
اکنون که روی به سوی الله برو
هنگام وداع آخر ای جان حسین
در پیش رخم چند قدم راه برو


✅ ؟؟؟؟
خواهی که ببینی رخ پیغمبر را
بنگر رخ زیبای علی اکبر را
در منطق و خُلق و خوی او می بینی
با دیده ی جان محمدی دیگر را


✅ ؟؟؟؟
قیامت قامت ای قامت قیامت
قیامت می کند آن قد و قامت
مؤذن گر ببیند قامتت را
به قد قامت بماند تا قیامت

🌴🍃🌴🍃🌴🍃🌴🍃🌴🍃🌴🍃
http://tttttt.me/naghmehaye_gham

عزم میدان حضرت علی اکبر علیه السلام

مرحوم منزوی

غلط سوزدور دیللر بیرده یوسف تک گوزل گلمز
گلر یوسف مثالی اکبره اما مثل گلمز

بو بیر تمثیل مهملدور که چوخ ال وار ال اوستوندن
بله صورت چکن ال اوسته والله بیرده ال گلمز

حیاقیل دفتر نقش و نگارون باغلا ای مانی
کتابون باطل ایله چون بو اصل اوسته بدل گلمز

نجه اکبر ئوز عصرینده فقط بیر اکبره بنذر
مدلل سوز داخی بوندان گوزل قل و دل گلمز

ایله یرده قویوب خالین سر مو قدری کج دوشسه
اولار صورتده فرقی سیرتا اما خلل گلمز

قدم آتسا گوررسن بیر ایله زیبا غزال اولماز
دانشسا فکر ایدرسن بیر بیله شیرین غزل اولماز

اوشاقلقدان دوداقینون دادی لیلایه داد ویردی
ئوپوب تزتز دیردی بو حلاوتده عسل گلمز

گورن لیلایه سویلردی چکیلمز سینوه داغی
ترحم ایتسه مقراض اجل پیمان گسل گلمز

قضا میدانیده اما اوتوزمین شخصی کور ایتدی
گورن گوز قالمادی گورسون ایله زیبا گوزل گلمز

قفادن یوزقویوب هر بیر بلا باشینه خنجر تک
خجالتدور یوزیندن چون مقابلدن اجل گلمز

🌴🍃🌴🍃🌴🍃🌴🍃🌴🍃🌴🍃
http://tttttt.me/naghmehaye_gham

عزم میدان حضرت علی اکبر علیه السلام

حاج رسول امینی خویی

ای گوز عشقیله گوزللر گوزلی اکبره باخ
عزم رزم ایلوری مردانه ملک منظره باخ

عرش طاقینده قیامتدی تماشاچیلره
انبیاقویوب افغانیله یوز محشره باخ

یرده یر اهلینی مبهوت ایلیوبدوریری وار
گورسه هرکیم دیه بیر بیرلره پیغمبره باخ

بعضی گورموشدی رسول اللهی مبهوت اولدی
ایسته دی گیزلنه خجلتدن او خاینلره باخ

آتین استونده حمایت قوشی شهپر چالدی
دل طوفاندا اوزین قوشدی اسن یللره باخ

ایله طوفاندی که داشلارتوخوشور بیربیرینه
گلوب ایجاده بیاباندا گوزل منظره باخ

جنگ صفینی گورنلر هامیسی ایتدی فرار
سویلیوب بیربیره اعجاز ایلیوب حیدره باخ

اول زمان باشلارین اوستونده شاخوب برق بلا
توکولوب برگ خزان مثلی قوشون یکسره باخ

دیدی شمشیرچکم غفلتی انصاف دگول
یری وار حق دیه احسن بله رزم آوره باخ
🌴🍃🌴🍃🌴🍃🌴🍃🌴🍃🌴🍃
http://tttttt.me/naghmehaye_gham

استمداد حضرت قاسم علیه السلام


مجید قلعه بیگی ( فقیر خویی )

سنگریم اولوبدی قانیمیله الوان
گَل عمو هرایه قاسمون وئرور جان

العطش دئیور قاسم
تشنه جان وئرور قاسم

گل عمو هرایه
باخ بو جان فدایه




شیریوی سالوبدی اشقیا کمنده
پرپر اولدی یاسین،غم یِلی اسنده
قالموشام کمکسیز دشمنون الینده
ریزه ریزه دوغراندوم
تشنه لب عمو یاندوم

باشیم اوسته تز گل
شاه خسته تز گل




دوشموشم اوز اوسته تشنه لب عمو جان
باش باشا چاتوبدی سینَم اوسته پیکان
اوخلار ایلیوبدی جسمیمی گلستان
پیکریمده یِر یوخدی
باخسان هر هارا اوخدی

اکبره فدایم
اصغره فدایم




بیر بیره دگوبدی جسم و پیکریم گل
حجله گاهیم اولدی قانلی سنگریم گل
آختارور جمالون،قانلی گوزلریم گل

دردیمه دوا تز گل
شاه کربلا تز گل

گل امیدگاهیم
رهبریم پناهیم




ایلَمور ترّحم حالیمه بو دوران
هلهله سالوبدی باشیم عدوان
سینه می داغیتدی ناخن ستوران
هاردا قالدی عباسیم
سسله جان وئرور قاسم

سسله قهرمانی
داده پهلوانی




کوفیان ویروللار یاره اوسته یاره
سینم آسماندی یاره لر ستاره
پیکریم اولوبدی گورنه پاره پاره

آت چاپوللا دشمنلر
مادریم گوره نیلر

امریوه فدایم
عاشق بلایم


#سبک_دولدوروب_جهانی
🌴🍃🌴🍃🌴🍃🌴🍃🌴🍃🌴🍃
http://tttttt.me/naghmehaye_gham

زبانحال حضرت اباعبدالله الحسین (ع) در بالین حضرت قاسم (ع
ابوالفضل عباسی معروفان اهری ( معروف )

ای مجتبی نشانی شایسته نوجوانی
قانین ائدوبدی گلشن صحرای کربلانی
ای مرغ خسته لایلای
ای پر شکسته لایلای


اذن جهاد آلاندا گئتمه اوغول دئدیم من
وئردون جواب عموجان میدانه قوی گئدیم من
ئوپدوم قرا گؤزوندن سالدیم یولا سلامت
ایندی نجه بو جسمی اخیامه حمل ائدیم من
ای مرغ خسته لایلای
ای پر شکسته لایلای


احسن سنه زمان حساسی درک ائدوبسن
سلطان کربلایه عشقون نشان وئروبسن
میداندا قهرمانلار جنگی زره گییللر
بوقانلی قتلگاهه سن بی زره گئدوبسن
ای مرغ خسته لایلای
ای پر شکسته لایلای


یومدون گؤزون عزیزیم شهلا گؤزون فداسی
قان بسترینده یاتدون ای قارداشیم بالاسی
گل پیکرین گؤرنده پرپر دوشوی ترابه
سینمده تازه لندی دلبندیمون یاراسی
ای مرغ خسته لایلای
ای پرشکسته لایلای


سن صبح کربلاده نور حقه باخوبسان
گون تک طلوع ائدوبسن اولدوز کیمین آخوبسان
داماد نامرادیم قانلی کفن مبارک
قان اولدی حجله گاهون قاندان حنا یاخوبسان
ای مرغ خسته لایلای
ای پر شکسته لایلای


#سبک_احوالیمیز_یاماندی

#ای_مجتبی_نشانی_شایسته_نوجوانی
#معروف_اهری
#ترکی 🌴🍃🌴🍃🌴🍃🌴🍃🌴🍃🌴🍃
http://tttttt.me/naghmehaye_gham

استمداد حضرت قاسم علیه السلام

کربلایی احمد پوریا شریف آبادی

یتیش دادیمه ای عمو جان
یخلدیم یوز اوسته من آتدان
آلوب دوره می قوم عُدوان
گل ای جان جانان
یوخ قاسمون چاره سی دشت کرب و بلاده
اخیامه حمل ایت منی اکبرون تک عباده
((گل دادیمه ای عمو جان عمو جان عمو جان
فریادیمه ای عمو جان عمو جان عمو جان))2



اورک داغلیام من حزینم
اولوبدور آتام دل غمینم
یتیمم یارالی جَبینم
گل ای ماه دینم

گل بیرده بوسه وروم گُل یوزوندن عمو جان
آخر زمانیمدی باشیم کَسر قوم عدوان

((گل دادیمه ای عمو جان عمو جان عمو جان
فریادیمه ای عمو جان عمو جان عمو جان))2




منه اکبرون یولداشیدی
نه یولداش منه قارداشیدی
بو غمده گوزی قان یاشیدی
عجب قارداشیدی

اکبر اولندن صورا لذّتی یوخ جهانون
مهمان گیدر اکبره قاسم نوجوانون

((گل دادیمه ای عمو جان عمو جان عمو جان
فریادیمه ای عمو جان عمو جان عمو جان))2




عمو گل کی حالیم یاماندی
گوزوم گوزموری پارچا قاندی
منیم قتلگاهیم دوماندی
گل اشگیم رواندی

گل دادیمه تز یتیش من اورکدن غمینم
قالدیم بو آتلار ایاقینده خرد اولدی سینم

((گل دادیمه ای عمو جان عمو جان عمو جان
فریادیمه ای عمو جان عمو جان عمو جان))2




داغیلدی منیم عِزُّ و جاهیم
عمو یوخدی سنسیز پناهیم
چخوب گوگلره سوز و آهیم
آخان قان گواهیم

گل ناز ایله قاسمی چون یتیمم عمو جان
ای سن گلن یولارا قاسمون جانی قربان

((گل دادیمه ای عمو جان عمو جان عمو جان
فریادیمه ای عمو جان عمو جان عمو جان))2




گلوب قاسمی تاپدی بیردن
آلوبدور قوجاقینه یردن
دیدی وای بالام گیتدی الدن
گولوم دوشدی دیلدن

ای قارداشیم یادگاری بالام لای گولوم لای
ای اکبریمون نگاری بالان لای گولوم لای

((گل دادیمه ای عمو جان عمو جان عمو جان
فریادیمه ای عمو جان عمو جان عمو جان))2





گوزوندن منی آتمازیدون
قانون اشکه هیچ قاتمازیدون
یانیمدا منیم یاتمازیدون
بالا یاتمازیدون

آچ گوزلرون دور گیدک خیمده چوخ فغان وار
دشمن باخور یالقوزام یاتما سن ال چالان وار

((گل دادیمه ای عمو جان عمو جان عمو جان
فریادیمه ای عمو جان عمو جان عمو جان))2





بالا ساق یرین یوخ بدنده
علی تک ادب واردی سنده
اوزانمازدون هیچ من گلنده
یارا واردی منده

دور قاسمیم گلمیشم باشین اوسته یارالی
سس ویر منه جان زهرا ننم ای وفالی

((گل دادیمه ای عمو جان عمو جان عمو جان
فریادیمه ای عمو جان عمو جان عمو جان))2


#سبک ⬇️⬇️⬇️


#یتیش_دادیمه_ای_عموجان
#احمد_پوریا
#ترکی
🌴🍃🌴🍃🌴🍃🌴🍃🌴🍃🌴🍃
http://tttttt.me/naghmehaye_gham

اذن میدان حضرت قاسم علیه السلام

مرحوم ذهنی تبریزی

اذن میدان ایسترم ویرمور عمو رخصت آنا
اولموری فیض شهادت قاسمه قسمت آنا


یالواروب هر بیر دلیله ایلدیم الحاح تام
قویمادیم عجزیمده نقصان ایتدیم اصرار تمام
بولمورم سرّی ندور اولمور رضا شاه اَنام
اذن ویرمور ایلیم بو بی کسه نصرت آنا


سرّی وار پوزقوندور احوالیم، پریشاندور حواس
نا امید ایتدی حضوریندن منی امّید ناس
دامنیندن دوتدوم ایتدیم هر نه عجز و التماس
اولمادی عرضیم قبول ایتدی غمیم شدّت آنا


خاطریمی دائماً ‌ایستردی شاه خوش خصال
ایستمزدی قلبیمه یوز ویرسون اندوه و ملال
ایمدی هر قدر ایسترم ویرمور منه اذن قتال
لطفینی مندن کسوب بیلمم ندور علّت آنا


حسرتم قانه باتام گلسون اَله مقصود پاک
آرزومه یِتمَسَم ایلر بو غملر زهرا چاک
اولماسا چاره بو درده من یقین اولّام هلاک
قورخورم سینَمده گیتسون قبره بو حسرت آنا


دیگ غم جوش ایلوب آیا گوزده داشماز گوز یاشیم
باش و جان ویردی یتوب مقصوده یار و یولداشیم
خاکِ پای یاره یوخسا بی لیاقتدور باشیم
نقد جان معیارینه ناقصدی یا قیمت آنا


سن اوغولسوزلوق خیالاتیله اولما دلغمین
کاش قربانون قبول ایتسون بو گون قربان دین
سنده زهرا محضرینده رو سفید اول حشره دین
منده پیغمبر یانندا چکمیوم خجلت آنا


بسدی بو خجلات منه گیتدی هامی پیر و جوان
بذل جان ایتدی، مقدّس مقصده اولدی روان
من گرک اوّل ایدِیدیم ترک سر ایثار جان
ایلیِیدیم اکبره بو باره ده سبقت آنا


چاره قیل تدبیر ایله بو دردیمین درمانینه
گوندَر اوغلون سنده لیلا تک اُلوم میدانینه
قانیمی منده قاتوم شهزاده اکبر قانینه
وقت فرصتدور اماندور ایلمه غفلت آنا


ویردی هم مسلک لریم راه فنا فی اللهده گام
مقصدِ اصله تاپوب یول ایتدیلر تحصیل کام
من مرامه یِتمَه ماقدان اولموشام چوخ تلخ کام
ایلیوب والِه هوای وادی حیرت آنا


نفسی هم مسلک لریم حق یولدا قربان ویردیلر
سلک اوّل عشقده نظمه دوشوب سان ویردیلر
دوغرانوب کوی وفاده تشنه لب جان ویردیلر
تاپدیلار بیر شهرت مشهوریله شهرت آنا


منده مشتاقم بو عالی سلکده ساندان گیچم
آتش عشقیله باشدا جوش ایدن قاندان گیچم
ایتمیَم ترک وفا باشدان گیچم جاندان گیچم
جان ویرم جانان یولوندا تا اولا راحت آنا


اون اوچ ایل چکدون تماماً نازیمی لیل و نهار
دُزدون هر بیر زحمته چوخ حقلرون بوینومدادور
ایمدیده اول واسطه تا اذن ویرسون شهریار
بوینوما بیر حقّیله قوی عُمده بیر منّت آنا


ویرمیشم هر دردسر رافتدن ایلوبسن قبول
عرضیمی ردّ ایتمیوبسن اولمیام تا من ملول
بیر کفن سال بوینوما بو عرصه ده ایتمه نکول
طُوی لباسیندن منه فاخردی بو خلعت آنا


ایتدی هر کس قدرتینجه جنگ قوم بد سِگال
عشقِ شاهِ دینیله قانه بویاندی بِالمَآل
منده لازمدور ایدم نصرت بو شاهه لامَحال
نارَشیدم یوخسا یوخدور منده بو قدرت آنا


اهل عشقه امتحان گَهدور بو دشت کربلا
سنده گوستَر امتحانون ویر منی حقّه فدا
اولما چوخ «ذهنی» پریشان ایلمه شور و نوا
یوز ویروبدور قلبوه هر چند چوخ رقّت آنا


#سبک_زینبم_جان_اوستیم #اذن_میدان_ایسترم_ویرمور_عمو_رخصت_آنا
#ذهنی_تبریزی
#ترکی
🌴🍃🌴🍃🌴🍃🌴🍃🌴🍃🌴🍃
http://tttttt.me/naghmehaye_gham

استمداد حضرت قاسم علیه السلام

سبک :: ای درد بی درمانلارا ...

كریمی مراغه ای

یخدی منی آتدان قوشون، امداده تئز گل
قویما قالا نعشیم عمو، صحراده تئز گل



لشگر عمو آلدی بو بی‌یاری آرایه
یوخ بیر کسیم، چخمیر سسیم، تئز گل هرایه
اولما رضا باشیم گئچه، نوکِ جدایه
آهو کیمی صید اولموشام، صیّاده تئز گل
فریاده تئز گل



قالدی ئورکده حسر‌تیم، ای پادشاهیم
جان اوستیم، دشمن ویرور، یوخ دادخواهیم
سنده‌ن سورا کیمدیر منیم، پشت و پناهیم
قویما بو قدری یالواریم، جلاده تئز گل
فریاده تئز گل



ازبس ویروبلار سینمه، اوخ دسته دسته
قان چوخ گئدیب دوشدوم یره، من زار و خسته
بو جان وئر‌ن وقتیمده بیر، گل باشیم اوسته
آخر یتیمَم‌ لطف ائله، سال یاده تئز گل
فریاده تئز گل



باشیم سنوب باتیب نفس، گل ایله چاره
وئرمز امان تا بیر زمان، قاتل بو زاره
دشمن باخار اشکیم آخار، گؤزد‌ن عذاره
یوخدور آتام لطف ایله بو ناشاده تئز گل
فریاده تئز گل



توپراقلار اوسته قالمیشام، یوخ سایه‌ بانیم
قانیم آخور جانیم چخور، یوخدور توانیم
قویما آنام اولسون همیشه، نوحه‌خوانیم
قالدی یارالی پیكریم، اثناده تئز گل
فریاده تئز گل
#سبک_ای_درد_بی_درمانلارا_درمان_اباالفضل

#یخدی_منی_آتدان_قوشون_امداده_تئز_گل
#کریمی_مراغه_ای
#ترکی
🌴🍃🌴🍃🌴🍃🌴🍃🌴🍃🌴🍃
http://tttttt.me/naghmehaye_gham

استمداد حضرت قاسم علیه السلام

مرحوم حسینی سعدی زمان

صید اولدوم آهو تک عمو بو دشتیده صیاده من
یوخ بیر پناهیم سسلیوم بو دشتیده فریاده من


کفّار کوفه ایتدیله از بس منی تیره نشان
قانیم یارالاردان آخوب قالموب داخی تاب و توان
قاتل قویوبدور حلقیمه خنجر منه ویرمور امان
سن گلمه سن فریادیمه باش ویرمرم جلاده من


دوشدوم نفسدن ظلمیدن ال چکمدی قوم شرور
آز قالدی پامال ایلسون یرده منی سُمِّ سُتور
گل باشیم اوسته سایه سال ای سید یوم النّشور
بلکه اولام بو غصه و غمدن بوگون آزاده من


باشه یتوب عمریم داخی یوخدور سنه چوخ زحمتیم
باشدان گوتوردوم ال، باشا یتدی بو چولده محنتیم
آتلار ایاقینده قالوب نعشیم گیدوبدور طاقتیم
جانان یولوندا اولموشام جان ویرماقا آماده من


من بیکسی ئولدورماقا کفّاریده چوخدور هوس
بسکه ووروبلار اوخ قلج سینم باتوب گلمور نفس
جان اوستیم ویر صوتیمه آخِر نفسده بیرجه سس
یوخ طاقتیم تا سسلیوم بیرده سنی امداده من


طغیان ایدوبلر ظلمیده گل گورنجه اهل جفا
تیغ و سِنان و تیریله بسکه ووروبلار چوخ یارا
موجه گلوبدور صرصر ظلمیله دریای بلا
اولقدر قالمور غرق اولام ای ناخدا دریاده من


علت نولوب تاخیریوه یا سالموسان گوزدن منی
گلمور سسیم تا سسلیم برده هرایه من سنی
دلدن سالار ایمدی منی ظلمیله بو قوم دنی
القانه غلطان دوشموشم گل گورنجه صحراده من


یوخ بیر نفر رحم ایلین جان اوسته گلسین دادیمه
اولسون منیله همنفس یتسون عمو امدادیمه
جان تاپشوراندا قویماسون عجز ایلیوم جلّادیمه
نیلوم یتیمم بیکسم بیچاره ام دنیاده من


آدیم «حسینی» من اوزوم جدیم حسینه نوحه گر
یوخدور انیس و مونسیم بو عالم ایچره بر نفر
یارب نصیب ایله اوزون حضاریله با چشم تر
طوی حجله گاهنده قوروم بزم عزا داماده من

#سعدی_زمان
#صید_اولدوم_آهو_تک_عمو_بو_دشتیده_صیاده_من
#کنزالحسینی2 ص 17
#ترکی

🌴🍃🌴🍃🌴🍃🌴🍃🌴🍃🌴🍃
http://tttttt.me/naghmehaye_gham

احوالات عروس حضرت قاسم (ع)

وفا منافی اردبیلی

اولوبدی شعریمه نیسگیللی استعاره حنا
دوباره تازه عروسین سوزی دوباره حنا

ایکی جوانه گلون سالگرد عشق دوتاق
گوزلدی گراولاعنوان یادواره حنا

ایکی آداخلی پرستو ایکی خزان دیده
ائدوب ئورکلرین افسوس پاره پاره حنا

ئوزومده بیلمیورم هانسی غملرین دانیشام
هزار نوحیه چون ایلیور اشاره حنا

ئورک قانین قاتارام اشک نابه مجلسده
گوزومده ایسلادارام بو ایکی نگاره حنا

تمام ذهنیمی بومحتوا خضاب ائلیوب
قلم حنالی مرکب حنا عصاره حنا

عجب ردیفه گرفتاراولوب بوشاعرخام
یرینده گلمسه مطلب، دونر شعاره حنا

چیخارتمیشام سیزه بش کلمه دن بیرعالم غم
جهیز، حجله سرا ، شمع، گوشواره، حنا

طویی بهانه ائدوب قورموشام بساط عزا
ووروبدی دفتریمه آتش وشراره حنا

گلین حسین قیزی داماد مجتبی گوزلی
سالوبدی هرایکی سین درد بی شماره حنا

اولاره شام یولوندا دوتولدی ماه عسل
کی حسرت اولدی ایکی قلب داغداره حنا

جداده ماه اوتوروبدی ستاره محملده
یاخوبدی ماه قانیندان اله ستاره حنا


زمین سکوته باتوب اهل آسمان آلیشور
غریبه منظره دی یار یاریلن دانیشور


دئیور عم اوغلی او چشم خماره مشتریم
علاجون اولسا دل بی قراره مشتریم

گوزون قاداسین اگرساتماقا خیالون وار
نیازی یوخ آچاسان استخاره مشتریم

رعایت ایله دالونجاق گلن پیاده لری
تلسمه گتمگه چوخ ای سواره مشتریم

غم فراقه دچارم وصالی آختارورام
خزان الینده اسیرم بهاره مشتریم

اسارتیم یازیلوب گر سنون رکابونده
ئولونجه من بو قرا روزگاره مشتریم

چکم بو دیده کم نوره توتیا مثلی
او تللرونده کی گرد و غباره مشتریم

نسیم اسنده همان تللری کناره وورار
بیلر کی منده تماشای یاره مشتریم

اوقدری خال لبون مست ائلر بو بیماری
نسیمه یالوارارام اس دوباره مشتریم

بیرآن زیارتووه مین قدم دعا اوخورام
بیرعطرون آلماقامین نیش خاره مشتریم

داغیت بو فاصله نی چون کول اولماق ایستیورم
نجور دئیوم من پروانه ناره مشتریم

سویولمیشام نه نشانون قالورنه خلخالیم
بو درده تاپسون اگر راه چاره مشتریم

بلالی باشه یاراشماز عم اوغلی قرمزی شال
نقدری دست قضا بیچسه قاره مشتریم

قولومدا قمچیلر آچدی شکوفه یوردی منی
قسم وقارووه بازار کوفه یوردی منی


#اولوبدی_شعریمه_نیسگیللی_استعاره_حنا
#منافی_اردبیلی
#ترکی

🌴🍃🌴🍃🌴🍃🌴🍃🌴🍃🌴🍃
http://tttttt.me/naghmehaye_gham

احوالات حضرت قاسم علیه السلام

الماسی اهری

القصه باتدی قانه حسینون دلاوری
منقذ الیله ئولدی او شبه پیمبری

اهل حرم خیمده اودم ائتدیلر فغان
لیلا آناسی آچدی باشین اولدی باغریقان

ابن حسن عزیز ولد چیخدی خیمدن
گوردی بالاسی قارداشینی شاه ممتحن

آغوشه آلدی قاسیمینی توکدی گوز یاشین
سسلندی ظلمیله بویانیب قانه قارداشین

آغوش شاه کربوبلاده ، ابن الحسن
بیهوش اولوندی شدت حزنیله زاریدن

تا گوردی بیر بئله اوضاع نی زینب آغلادی
چیخدی چوله خییَمدن اودم سینه داغلادی

بعد از دقایقی اویانیب صحبت ایلدی
اوغلی ئولن آتانی او ناراحت ایلدی

سسلندی اذن وئر عمو منده شهید اولوم
اکبر یولون گئدیم بویانیم قانیمه ئولوم

ردّ ایلدی جوابینی دلبند فاطمه
قاسم بویاندی ماتمه دوشدی طلاطمه

بوینون قویوبدی چیگنینه سسلندی ای عمو
آهیله باشلادی سوزونی ائتدی گفتگو

گویلوم بابامی ایستوری هجرونده یانموشام
چوخداندی گورمورم عمو غمله بویانموشام

وئرسون اجازه جانیمی من ایلرم فدا
باشدان ایاقه قانه بویانّام شه ولا

جنتده گوزلیور آتام ایندی منی عمو
وئرّم قسم علیِ اکبره سنی عمو

یالواردی قاسم ابن الحسن اولدی اشکبار
اذن آلدی شاه کربوبلادن اوباوقار

غمگین اولوندی بیر بئله دٌرِّ شاهوارینه
باخدی دویونجا قارداشینون یادگارینه

قویدی رکابه چون قدمین عالم آغلادی
جنتده قوردی بزم عزا خاتم آغلادی

شوقیله توکدی گوزیاشینی پاره ی قمر
یوز دوتدی کوفه اهلینه سسنلدی چون ظفر

اِن تنکرونی فَاَناَ فَرعٌ الحسن منم
سِبط النبیّ المصطفی وَالموتَمَن منم

میدان جنگه اگر چه او نوجوایدی
حاضر اولوندی شیر کیمین پر توانیدی

ثابت ائدوبدی جنگیده رزم آور اوغلیدی
نوباوه ی رسول نبی، حیدر اوغلیدی

اول گیروداریده اوجالوب گویلره غبار
فرصت تاپوبدی دشمن بی دین ونابکار

عَمرو نٌفَیلِ اَزدی آلوب خنجرین اَله
حمله اِدوبدی تا گتیسون ایستَگین اَله

وئرّم قسم او پست دئدی حیِّ داوره
سالّام اونی الآن من اوزوم حال اکبره

منقذ کیمین ویروبدی باشیندان او بی حیا
جنتده سسلدی آتاسی کی جان بالا

باش پارچالاندی آخدی یوزه قانی ظلمیله
یوز اوسته دوشدی تپراقا قربانی ظلمیله

سسلندی گل هرایه عمو جان وئرور بالان
عطشان،یارالی،جنتده یورقون گئدور بالان

گلدی عزیز فاطمه سسلندی جان بالا
جانیم اولا یارالی جانیوه قربان بالا

آلدی باشون دیز اوسته توکوب گوز یاشین یوزه
سیلدی گوزون قانین او بیر آز باخدی گوز گوزه

سسلندی ماتمینده سر افکنده اولموشام
بیر ایش گورنمورم سنه شرمنده اولموشام

عطشانلیقون اگر چه اشکناب ائدر سنی
جنتده فاطمه ولی سیراب ائدر سنی

بو درگهونده گرچه آقا منده، عاصیم
قاسم کیمی منه، لطف ایلسون، الماسیم

#القصه_باتدی_قانه_حسینون_دلاوری
#الماسی_اهری
#ترکی
🌴🍃🌴🍃🌴🍃🌴🍃🌴🍃🌴🍃
http://tttttt.me/naghmehaye_gham