اليوم السابع | 💚

صباح الخَير عائلتنا الحبيبة ^^
مُهمّة اليوم، العزم على هجر ذنب من الذنوب ~
لا بد أن تُهاجر إلى الله يا فتى، لا فتحَ من غير هجرة !
وحتى تتوضّح الصورة بشكل أكبر، اقرؤوا المنشور أدناه المنقول من صفحة آرك:
https://tttttt.me/ArkEmbarkwithus
-----------------------------------
مش مطلوب منك غير إنك تمنح نفسك لحظة تراجع حالك فيها..

في حال كنت شب بحكي مع بنت ومعشمها ومطمعها بقصة حب وزواج وإنت في داخلك بتبيت عكس هالحكي تماما..
حاب أذكرك إنه الظلم ظلمات !
والرجولة إنك تعترف بغلطك وتنهي هالإشي بأسرع وقت وتطلب السماح من طرف آذيته وظلمته..
ومش رجولة أبدًا تكمل حكي وتعلّق أي بنت بتصادفها بطريقك..
*
وفي حال كنتي بنت مثلاً ولسانك تعود عالغيبة والنميمة وحكي عن فلانة وعلانة..
هاي فرصتك تتخذي قرار مصيري ومهم في حياتك إنك ما رح ترجعي لهيك إشي..
لإنه بكل مرة بتستغيبي وبتنمي فيها بتكوني بتفقدي إشي من إنسانيتك!
*
وفي حال كنت حد أدمن ع ذنب معين..
أولها كان يصارع ويجاهد نفسه..
ومرة يوقع ومرة ينتصر..
لكن للأسف مع الوقت استمكن منه تماماً..
وبدل ما يزاحم هالغلط بطاعات تانية..قام ترك الطاعات من أصلها..
وبِخِل بخير كبير جواته لإنه فقد الامل من حاله.. ومن رحمة الله..!
دير بالك تفكر هيك..
لإنه رحمة ربنا وسعت كل إشي وإنت إشي !
*
في حال بديتي تتعاملي مع ربنا عز وجل بنديّة..
وبديتي تسألي ليه رزق فلانة وحرمني..؟
وكيف أعطى فلانة ومنعني؟
ليه الإشي اللي بحبه تأخر علي..؟
طيب ليه أنا يا رب؟؟
ممكن جاء الوقت اللي لازم تدركي فيه إنك بشر..وبالتالي نظرتك حتظلها قاصرة عن إدراك كل جوانب الحكمة من تصرفات ربنا عز وجل..
وإنه الأصل بالمسلم يسلّم أموره لربنا ويؤمن في داخله إيمان حقيقي إنه ربنا كاتبله الخير..
وقديش في أشياء بنفكر سعادتنا فيها لكن لو انكشف النا الغيب رح ندرك إنها السبب في تعاستنا..!
*
وفي حال كنت حد ما أحسنه مع الناس بكلامه وأخلاقه وحسن تعامله..
بس عادي كثير بالنسبة إله إمه و أبوه ينادوا عليه وهو عامل حاله مش سامع..
وشو بستسهل يحكي كلمة تغضبهم أو تجرحهم..
فرصتك تروح تبوس على إيدهم وتعاهدهم على علاقة بر وإحسان جديدة..
نصيحة قبل ما تفقدهم وتتندم !

كل حد فينا يقعد مع حاله قعدة ..
ويواجه فيها و بكل صدق ولو لمرة وحدة في حياته كل إشي بعثّر طريقه وسيره إلى الله..

وإلى الله وهذه الدنيا سفــــــر!
#ARK

#لولا_أخرتني
#تمكين
#فكرة_وعمل

7.12.2020

اليوم العاشر | 💚

مرة أختي بتخبرني عن وحدة من صاحباتها بسموها "شكرًا" من كثر ما بتحكي كلمة "شكرًا" في حياتها..

بتحكيلي:
ما في موقف في حياتها ما فيه كلمة "شكرًا"..
مع البياع والدكتور وعامل النظافة وفي المواصلات ولصاحبتها اللي زبطت إلها الشال، ولإمها وابوها ولكل حد في حياتها بتحكيله شكرًا..

لدرجة مثلا لو بعتت إلها: كيفك؟
بترد علي: منيحة الحمدلله، جد "شكرًا" لسؤالك..وإنتِ كيفك؟

وأحيانا بتشكرنا كصاحباتها بلا سبب، بس لإنه موجودين في حياتها..!
------
أختي كانت مبتسمة وهي بتحكيلي شوف شو كاتبة عالواتساب:
شكرًا يا الله !

وقتها قلت لأختي ما بستبعد أبدًا إنها تكتب هيك..
لإنه بنت مثلها بتشوف نفسها مدينة لكل حد موجود في حياتها، ومدينة لكل حدى أسدى إلها خدمة بيوم من أيامها..
فأكيد رح تشوف نفسها مدينة لـــ (الله) وهو الكريم والجميل والمنعم واللطيف معاها..

وقتها أختي حكتلي بتعرف شغلة؟
علما إنه هالبنت ظروفها صعبة، وفي كثير مشاكل في حياتها، وممكن محرومة من نعم موجودة عند أغلب صاحباتها، بس مع ذلك هي دايما بتشكر الله وبتحمده عكل إشي!
لو تشوف شو بتكتب شغلات عن (الله)!
وكيف إنه هو سبب كل إشي حلو في حياتها..
وكالعادة بتنهي كلامها بــــ ( شكرًا يا الله) !

----------
لحظتها صفنت بأختي وقلتلها بتعرفي هسا استوعبت حديث:
«مَنْ لمْ يشْكُر النَّاسَ لَمْ يشْكُر الله»

يعني الحديث مش فقط معناه إنه اللي ما بشكر الناس كأنه ما شكر ربنا..

الحديث كمان بحمل معنى: إنه اللي من طبعه يجحد الناس ويكفُر فضلهم وما يشكرهم كمان ما رح يشكر ربنا !

واللي شاف خيرهم وفضلهم وقلهم "شكرًا" عليه، من باب أولى رح يشكر (الله) !
.
.
-----------
بتعرف شغلة؟
مرة بعتت إلها كيفك؟
ردت عليّ: شكرا لسؤالك..الحمد والشكر لله..
انا غرقــــــــــانة بنعم الله ! <3

#ARK

وَمَنْ يُرِدْ ثَوَابَ الْآخِرَةِ نُؤْتِهِ مِنْهَا وَسَنَجْزِي (الشَّاكِرِينَ)

مهمّة اليوم يا عائلتنا الحبيبة هو قول كلمة "شكرًا" لأحد ما ^^
وبالمناسبة..شكرًا لأنكم عائلة رائعة 💚

#لولا_أخرتني
#تمكين
#فكرة_وعمل

10.12.2020

مرّت سنة على أول لقاء بينا..
ما كنت بتصور إنه حياة الإنسان ممكن تنقلب بلحظة !
أنا حياتي انقلبت لحظة ما شفتك فيها..

كنت أشوف فيك شخصين..
شخص مُتّقد مفعم بالنشاط في عيونه مرح ولهو ومغامرة..
بنفس الوقت شخص حازم،صارم، وراكز ومثقف ومؤدب..
كإنك بتعيش حياة مزدوجة وكل جانب فيهم مبهر بحد ذاته..
يومها لما روحت صرفت ساعات بس أعرف عنك وأشوف بوستاتك وشو بكتبولك صحابك واستولت عليّ ولأول مرة مشاعر من نوع غريب..!

حاولت أصرف النظر عنها في البداية وكإنه إشي ما صار..
لكن بكل مرة كنت أشوفك فيها كان يتحرك إشي جواتي..
ولما القدر جمعنا في فريق تطوعي واحد استحالت حياتي لمغامرة نفسيّة ما بعرف شو نهايتها..

كان يستفزني إنك محطّ أنظار بنات كثير غيري..
نفس البنات اللي كنت أسخر منهم لما يجيبوا سيرة شب ثاني، هيني الآن متلبسة معهم بنفس السخف اللي كنت أشوفه فيهم..
بس أنا والله غير عنهم..
أنا مش بنت سخيفة وخفيفة وممكن إشي زي هيك يأثر عليّ أبدا..
عشان هيك بقدر أحكيلك وبكل ثقة إني جد غير عنهم..
أنا كنت أحتفظ بمشاعري لنفسي وما أبعثرها زيهم..ولا أنتهكها بالكلام فيها..
ما كنت ألهو فيها زي ما بنت صغيرة بتلهو بلعبتها..
لإني مؤمنة إني صادقة اتجاهك..
وهذا الصدق بحتّم عليّ ما أبوح فيه لحد..
غير ربنا !
.
.
مرة صادفتك عالباب وفتحتلي إياه وابتسمت وتفرجت بعيوني وحكيتلي:
تفضلي..!
موقف ما تجاوز ثواني شفت فيه ابتسامتك الرقيقة ونظرتك الوديعة وصوتك الذابل لحظتها..
وقلبي اللي كان حيطير من مكانه!
.............................
*********
مرّت سنة على أول خدعة بحياتي!
على أكبر وهم وأسخف لقاء..
ما بعرف كيف سمحت لنفسي أضيّع سنة بكل تفاصيلها عشان "وهم" !
عشان ابتسامة متكلفة منك..
ونظرات من بعيد أشعرتني إنك بتبادلني الإشي اللي جواتي..
يا الله كيف ممكن تخدعنا المظاهر!
كيف ممكن تغرّنا الكلمات والنظرات..

إنت خدعتني..!
وخدعت كثير غيري بزيفك وتملقك..
خليك عايش على نظرات الإعجاب حتى ترضي غرورك..
وبتدّعي التعفف حتى يبالغوا في تقديرك..
ابتسامتك الرقيقة اللي بتجود فيها على كل بنت بتمر جنبك..
ولطفك المبالغ فيه واهتمامك..
ومراسلاتك الخاصة آخر الليل اللي بتعشّم فيهم ألف بنت..
ترى إشي ما بعكس إلا مرضك..!

الحمدلله صحيت على حالي..
صحيت لما أدركت إنه ربنا بدو يخفف عنا وإحنا بنختار الوجع بإيدينا..
وربنا بدو يتوب علينا وإحنا بنركض للفتنة برجلينا..
صحيت لما عرفت إنه المؤمن عزيز بالاستغناء عن الناس..
وقلبه أطهر من إنه يصرفه على مشاعر ساذجة..
ووقته أثمن من إنه يضيع على شخص ماكله الغرور أكل!
.
.
**
مرّت سنة على أول لقاء بينا..
تعمدت أبدأ رسالتي بإشي ينفخ غرورك..
وأنهيها بإشي يفضح حقيقتك..

مع ذلك..
يا رب تصحى عحالك..!

#ARK

في الحقيقة ربنا بعطينا هدايا !
مرة على شكل حُب ومرة على شكل أصحاب ومرة على شكل مال وصحة ومنصب وجاهه وغيره..

في الغالب بننشغل بالهدية عن مانحها..
وبتسيطر الهدية عقلوبنا وبنحبها أكثر من حبنا لموجدها وخالقها ومانحها ومعطيها..
وبنستمسك بالهدية لدرجة بصير صعب علينا نعيش بدونها..
وقلوبنا المفطورة على حب الله والإفتقار إله بحل فيه ما سوى الله..
..
وربنا لما يعطيك هدية بعطيك إياها في إيدك لكنك للأسف بتمسكها بقلبك..!
عشان هيك بتعيش حياتك خايف من الفقد، ومتوتر من إمكانية ضياع الهدية منك..
وفجأة بتصير الهدية عذاب وسجن من صنع إيديك..
لكنها رحمـــــة ربنا !
بتحررك من هذا السجن وبتنقذك من هذا العذاب..
طيب كيف؟
من خلال الفقد..
لما يسحب الهدية منك..لما يحرمك منها.. !
وقتها لحالك بتسترجع قلبك المفطور على حبه والإفتقار إله..
بترجع إله بقلب منيب لكن هالمرة خالي من كل شيء سوى الله..
بترجع وإنت راضي ومسلّم لحكمته..
ومجرد ما أظهرت تواضعك وإخلاصك وصدقك وتضرعك..
ربنا الكريــــــم بمنحك هدية أخرى..
لكن دير بالك..
استلمها بإيدك...مش بقلبك !
.
.
وَعَسَىٰ أَن تَكْرَهُوا شَيْئًا وَهُوَ خَيْرٌ لَّكُمْ ۖ وَعَسَىٰ أَن تُحِبُّوا شَيْئًا وَهُوَ شَرٌّ لَّكُمْ ۗ وَاللَّهُ يَعْلَمُ وَأَنتُمْ لَا تَعْلَمُونَ

#القرآن_الجميل
#ARK

هاي آخر رسالة مني إلـــي..
بعدها رح أطلع من حياتي!!

أنا كل يوم بخسر جزء من روحي..
مش قادرة أتفرج عحالي بالمراي لإني بكرهني!
وما توقعت إني أوصل مرحلة أشعر فيها إني قرفانة من حالي!
مش قادرة أحس إني سعيدة ومرتاحة، عكس تماما ما كنت بتوقع وأنا على أعتاب غلطي.
كنت مفكرة في سعادة وحب وشغف عم بنتظرني..
كـــنت!
بس تعبت أمثل إني مبسوطة حتى أبرر لنفسي غلطي..
وتعبت وأنا بسكّت صوت ضميري..
تعبت وأنا بحاول اتفادى نظرات أهلي!
تعبت وأنا بكل ليلة بكتم صوت دموعي وآهاتي..

تعبت وأنا بتجاهل السؤال المُلح في راسي: إنتِ وين رايحة؟!

نفسي أصرّخ.. نفسي أبكي.. نفسي أورّي الناس اللي بفكروني قوية ضعفي..
مش قادرة أمثّل أكثر من هيك..
مش قادرة لما يسألوني مالك أقلهم: لا ولا إشي..
لإنه مالي كل إشي مؤلم وقاسي!!

ضاعت اللي كان من المفترض تكون احلى أيام حياتي على وهـــــم..
على انتظـــــــــار..!

ما أبشـــــــع الانتظار..
في اللحظة اللي قررت فيها أنتظر سعادتي كنت بتخذ أقسى قرار بحق نفسي..
لإنه الإنتظار بشع..بشع..بشع!

الإنتظار ما بسمحلك تلتفت لحياتك..
نفس فكرة لما تنتظر دورك بالبنك أو المستشفى أو أي مكان..
مهما حاولت تعمل إشي مفيد ما بتقدر لإنه بأي لحظة بيجي دورك..
ما رح تقدر تركز بإشي لإنه بتخاف ينادوا عرقمك وإنت مش سامع..
ممثل تلهي حالك بإشي سخيف زي إنك تلعب بتلفوك بس كل شوي بترفع راسك حتى تشوف لو أجى أو قرب دورك...

انا هيك كنت!
ضاعت أيامي بنتظر الإشي اللي فكرت فيه سعادتي..
ومرت الأيام والأشهر والسنوات ولسه ما اجى دوري!!
.
.
يـــا رب..
خجلانة منك!
خجلانة أدعيك وأنا كنت بتغافل عن صوتك جواتي..
خجلانة اوقف بين إيديك وعن رسائلك كنت أغمض عيوني..
خجلانة وإنت مع كل غلط مني كنت تسترني..!

بـــس يارب..
وإنت الحليم والكريم والرحيم..

ممكن تعطيني آخر فرصة أصحح فيها طريقي ومساري!
وعــــد يكون كلامك مصدر طاقتي وقوتي..
وعد أشكّل من جديد هويتي وكينونتي..
وعد أتعلم من كل غلط وأفتح صفحة جديدة ترضى فيها عني..

يــــــا رب..
أرجوك ما تردني..
--------------------
.
.
هاي آخر رسالة مني إلـــي
بعدها رح أطلع من حياتي!!
.
.
وابدا حياة جديدة بدون وهم.. بدون انتظار
وفيها الله يكون راضي عني <3 !

#ARK

اليوم العشرون | 💚

شفت صاحبك اللي كل ما يشوفك ببتسم بوجهك..
طيب شفته كيف عصّب عليك لما حكيتله: يييي انسيت أصلي الظهر!
أو لما مرة شكيتله من حالك وتقصيرك ووقتها هوّن عليك وأحيا الأمل في قلبك..
ذاكر كم مرة حكالك: أبشر ..قبل ما يعرف شو بدك منه ؟
نفسه اللي خطر ببالك لما مريت على آية: سَنَشُدُّ عَضُدَكَ بِأَخِيكَ.
.
.
شفتي صاحبتك اللي شاركتك دموعك أكثر من مرّة..!
لما بكت معك قبل ما تعرف مالك!!
شفتيها وهي بتحكيلك أصبري شوي بدي أزبطلك شالك..
أو لمّا مرة بعتتلك إنها بتحبك من غير أي مناسبة ..
ذاكرة كم مرة جننتك عشان تحضري معها حلقات المصلى ..
وأحلى اشي لما مرة حكتلك: لو بتعرفي قدّيش بدعيلك !
.
.
مع الوقت أدركت إنه الصديق الحقيقي مش بس الحريص على دنيتي ..
لا .. وكمان الحريص على آخرتي !
.
.
.
{وَاصْبِرْ نَفْسَكَ مَعَ الَّذِينَ يَدْعُونَ رَبَّهُمْ بِالْغَدَاةِ وَالْعَشِيِّ يُرِيدُونَ وَجْهَهُ وَلا تَعْدُ عَيْنَاكَ عَنْهُمْ تُرِيدُ زِينَةَ الْحَيَاةِ الدُّنْيَا وَلا تُطِعْ مَنْ أَغْفَلْنَا قَلْبَهُ عَنْ ذِكْرِنَا وَاتَّبَعَ هَوَاهُ وَكَانَ أَمْرُهُ فُرُطًا}

#القرآن_الجميل
#ARK
________________________________________________________________

مهمّة اليوم يا عائلتنا أن نتفقد عائلتنا 😌💚
فمن الآن.. ممنوع أن نترك واحد من أفراد عائلتنا وحيدًا أبدًا
من لا يملك صاحبًا فليترك تعليقًا، ومن يريد زيادة إخوانه فليترك تعليقًا.. ومن قلبه واسع فليصاحب ويشد العضد، ويا موســـى إليك هارونك ^^

وما بدنا نوصيكم بمتابعة آرك 😁🤭

#تمكين
#فكرة_وعمل

20.12.2020

اليوم السابع والعشرون | 💚

عفوًا يا رب..

على كل مرة ضجرنا فيها من قدرٍ قدرته علينا، ونحن نعلم أنما قدرته لخير تعرفه أنت ونجهله نحن!
سامحنا يا رب.. لكل حمد كان يقطر مرارة وشكوى..
نستغفرك من كل لحظة نسينا فيها أنها دُنيا تزول!.. وأن الآخرة خيرٌ وأبقى..
عائلتنا الحبيبة؛ مهمة اليوم كالتالي:
نحضر ورقة وقلم.. نكتب فيه أبرز عشر مشكلات تزعجنا وتؤرقنا.. ثمّ نعرضها على معادلة الآخرة..
فنسأل أنفسنا:
- هل سيعوضنا الله في الآخرة إن لم يتحقق المطلب؟
- هل سيجبرنا الله في الآخرة إن كسرتنا الدنيا؟
- هل سنأخذ حقنا ممن ظلمنا في الآخرة، إن لم يقف معنا أحد في الدنيا؟
فإن كان حل مشكلاتنا بعدما زالت أسباب الأرض من بين أيدينا بوجود آخرة يعوضنا الله بها، فنمسح المشكلة ولا نعتبرها شيئًا يستحق أن نقف عليه كثيرًا.. بل شيئًا مأمولًا، سنحصد ثمرته ولو بعد حين ^^
الشق الثاني: قراءة النص أدناه، وآخر سنضعه في التعليقات 💚
دمتم بهمة 💚
---------------

مش دايماً للأسف بكون بإيدنا ننتقم وناخد حقنا من كل حد ظلمنا وتعدى على حقوقنا ..!
ما رح نقدر ننتقم من الدكتور اللي نجّح جماعته على حسابنا..
ولا نرجع حق البنت اللي ما نامت الليل وهي بتدرس وثاني يوم الطلاب غشوا كل الإمتحان وجابوا أعلى منها..!
ولا الشخص اللي أخذ محلنا بالوظيفة عشان واسطته قوية وإحنا أحق منه فيها..
ولا الشخص اللي نشر فيديو فضيحة عن وحدة بلحظة ضعفها وكان الإشي سبب في انتحارها!
وبعرف إنه شعور جداً بقهر إنه يظلمنا ويضحك علينا ناس كنّا نظنّهم الأقرب إلنا !
.
.
بس عفكرة..
مش شرط الظالم ينال عقابه في الدنيا..

هي (ستالين) قتل ملايين ومات على فراشه وزجاجات الفودكا جنبه وشيّـعه ملايين بعيون دامعة وورود حمراء على قبره !

ولا ( ماو تسي تونج) اللي قتل ستين مليون وكمان جنكيز خان وهولاكو ونيرون ولينين وكثير غيرهم !

عادي هي (بيريز) مات وصارتله جنازة حضرها كل العالم !
ونسيوا الكيماوي اللي كان فوق رؤوس أطفال غزة..

ما تستبعدوا (نتنياهو) يموت موتة عادية، وعادي بشار الأسد ممكن يموت بين أهله وولاده كمان!
.
.
الدنيا بشعة !
وأبشع ما فيها عجزنا عن الإنتقام..
وضعفنا عن القصاص من الظالمين والمجرمين..
آخ من مرارة القهر..
ودموع الحسرة..
ووجع القلب ..
ونظرات العين المنكسرة في صمت بليغ !
**

استنى..
القرآن بقدملنا العزاء في ذلك (اليوم) !
وبروي جوعنا القارص وظمأنا القاتل في الإنتقام..

وبذكّـرنا إنه الله مش ناسي..
- وَلَا تَحْسَبَنَّ اللَّهَ غَافِلًا عَمَّا يَعْمَلُ الظَّالِمُونَ ۚ إِنَّمَا يُؤَخِّرُهُمْ (لِيَوْمٍ) تَشْخَصُ فِيهِ الْأَبْصَارُ

- (الْيَوْمَ) تُجْزَىٰ كُلُّ نَفْسٍ بِمَا كَسَبَتْ ۚ لَا ظُلْمَ (الْيَوْمَ ۚ) إِنَّ اللَّهَ سَرِيعُ الْحِسَابِ..
.
.
.
المهم إنت ما تنسى إنه مش شرط يصير الإشي في الدنيا..
لكن كون على يقين إنه في ذلك (اليوم) !

#القرآن_الجميل
#ARK
------------------
#تمكين
#لولا_أخرتني
#فكرة_وعمل

27.12.2020

كنت زمان أفكر إنه إذا الواحد خلى مخافة ربنا بين عيونه وبعّد عن الحرام ربنا راح يرزقه مباشرة ويفتحها عليه من أوسع أبوابه .. هيك كنت بفكر؟؟

عبين ما تخرجت وصحلّي أكثر من شغل بس المشكلة فيهم حرام..فما قبلت ولا بوظيفة عشان من "ترك شيئا لله عوضه الله خيرا منه"..!!
بس صارلي سنتين وانا يلا يلا أطلع مصروفي..
وصحابي اللي قبلوا بهديك الوظائف هيهم مبسوطين ونزّلوا سيارات وأغلبهم تزوجوا وأنا قاعد مكاني..!!
.
.
طيب بلاش أنا .. هي أختي..
أحسن بنت بالكوكب..
بنت متمسكة بدينها وحجابها..
بحياتها ما فرطت بإشي من مبادئها..
طول حياتها معتزة بدينها وأخلاقها..
ما سمحت لأي حد يعبث بقلبها ..
وكانت مخافة ربنا بين عيونها..
ومع ذلك ..
معظم صاحباتها خطبوا واتزوجوا وهي لسه !!
علما إنه صاحباتها ما كانوا على هذا القدر من الإلتزام وجزء كبير منهم عاش حياة عادية بدون ضوابط.. بس هيهم هلأ معظمهم مبسوطين وأحلى من هيك ما في !!
.
.
بلاش أنا وأختي.. هيّ كثير ناس غيرنا ماشيين صح بحياتهم..
وملتزمين بكل أوامر ربنا إلهم..
بس حياتهم مش ماشية..وعايشين في ابتلاء ورا ابتلاء..
==
.
.
بحكي مرة لأختي وإحنا طالعين..
إنه وين "من ترك شيئا لله عوضه الله خيرا منه ؟"
وينها...؟؟؟
كنت بتصور لحظتها إنه اختي راح تأيدني بكلامي أو تفضفضلي شو بقلبها ؟
أو تشكيلي من ظروفها..
سكتت ثواني وطلبت مني ما أقاطعها بالكلام اللي بدها تحكيه:
.
.
اسمع..
ما بحب هاي الطريقة الساذجة بالتفكير..
وما بحب الواحد يتعامل مع ربنا بمنطق (الصفقات)!
إنه يلا يا رب هيّ عبدتك وفقني !!
ما بحب حد ينظر لعلاقته مع ربنا بهاي السطحية..
وحابة أذكرك إنه ربنا غني عنك وعن صلاتك وعبادتك!
غني عني وعن حجابي وجلبابي..
بس إحنا الفقراء إله...إحنا اللي ولا إشي بدونه..
وإذا إنت بتعبد ربنا عشان تنزّل سيارة أو تتزوج البنت اللي بتحبها أو تشتغل شغل أحسن..
فحابة أحكيلك عيد النظر بالاشي اللي إنت عليه..
وإذا إنت عايش حياتك بتقلّب نظرك في الناس اللي ربنا انعم عليها وحرمك..
فبنصحك تعيد النظر في طريقة تفكيرك!
ممكن أعرف وين مفهوم "الآخرة " بحياتك إذا كل إشي بدك ثوابه هلأ ؟؟
.
.
عفكرة ممكن ما تقاطعني؟ خليني أكمل فكرتني..
ما تفكرني بحكيلك ما تسعى وتآخذ بالأسباب..
وما بحكيلك إنه ربنا مش ممكن يعوضك بالدنيا..
بس بحكيلك ما تتعامل مع ربنا هيك..

(إحنا انخلقنا ليختبرنا مش لنختبره) !
.
.
وَلَا تَمُدَّنَّ عَيْنَيْكَ إِلَىٰ مَا مَتَّعْنَا بِهِ أَزْوَاجًا مِّنْهُمْ زَهْرَةَ الْحَيَاةِ الدُّنْيَا لِنَفْتِنَهُمْ فِيهِ ۚ وَرِزْقُ رَبِّكَ خَيْرٌ وَأَبْقَىٰ

#القرآن_الجميل
#ARK
#كتاب_شبهة.

الملف المضغوط (zipped folder):
هو نسخة عن الملف الأصلي لكن بحجم أصغر حتى تتمكن من حفظه على مساحة الـHard Disk.

بالنسبة إلي بتعامل مع بعض الكلمات في القرآن على كونها ملف مضغوط!
يعني بكبس عالكلمة وبفك ضغطها حتى أقدر أفهمها وأستوعبها وأستخرج معادلات منها.

على سبيل المثال:
لما أقرأ سورة الفاتحة مثلًا، وأمر على آية: اهْدِنَا الصِّرَاطَ الْمُسْتَقِيمَ.
بكبس على (الصراط المستقيم) فبطلع عندي مجموعة آيات بتحكي عن الصراط المستقيم!
ما بكتفي إنه حد يحكيلي: هو الطريق الذي لا اعوجاج فيه.
لإني صراحة بعرف هالحكي..

ومجرد ما فكيت ضغط هالكلمة بكتشف إنه في معادلة للصراط المستقيم مكونه من 10 وصايا في سورة الأنعام وهي:
۞ قُلْ تَعَالَوْا أَتْلُ مَا حَرَّمَ رَبُّكُمْ عَلَيْكُمْ ۖ أَلَّا تُشْرِكُوا بِهِ شَيْئًا ۖ وَبِالْوَالِدَيْنِ إِحْسَانًا ۖ وَلَا تَقْتُلُوا أَوْلَادَكُم مِّنْ إِمْلَاقٍ ۖ نَّحْنُ نَرْزُقُكُمْ وَإِيَّاهُمْ ۖ وَلَا تَقْرَبُوا الْفَوَاحِشَ مَا ظَهَرَ مِنْهَا وَمَا بَطَنَ ۖ وَلَا تَقْتُلُوا النَّفْسَ الَّتِي حَرَّمَ اللَّهُ إِلَّا بِالْحَقِّ ۚ ذَٰلِكُمْ وَصَّاكُم بِهِ لَعَلَّكُمْ تَعْقِلُونَ (151)وَلَا تَقْرَبُوا مَالَ الْيَتِيمِ إِلَّا بِالَّتِي هِيَ أَحْسَنُ حَتَّىٰ يَبْلُغَ أَشُدَّهُ ۖ وَأَوْفُوا الْكَيْلَ وَالْمِيزَانَ بِالْقِسْطِ ۖ لَا نُكَلِّفُ نَفْسًا إِلَّا وُسْعَهَا ۖ وَإِذَا قُلْتُمْ فَاعْدِلُوا وَلَوْ كَانَ ذَا قُرْبَىٰ ۖ وَبِعَهْدِ اللَّهِ أَوْفُوا ۚ ذَٰلِكُمْ وَصَّاكُم بِهِ لَعَلَّكُمْ تَذَكَّرُونَ (152) وَأَنَّ هَٰذَا (صِرَاطِي مُسْتَقِيمًا) فَاتَّبِعُوهُ ۖ وَلَا تَتَّبِعُوا السُّبُلَ فَتَفَرَّقَ بِكُمْ عَن سَبِيلِهِ ۚ ذَٰلِكُمْ وَصَّاكُم بِهِ لَعَلَّكُمْ تَتَّقُونَ (153)
.
.
ومثلًا:
بكبس على (أَنْعَمْتَ عَلَيْهِمْ) حتى أشوف مين همه، أو كيف أكون منهم؟
فسورة النساء بتوضحلي وبتحكيلي:
وَمَن يُطِعِ اللَّهَ وَالرَّسُولَ فَأُولَٰئِكَ مَعَ الَّذِينَ (أَنْعَمَ اللَّهُ عَلَيْهِم) مِّنَ النَّبِيِّينَ وَالصِّدِّيقِينَ وَالشُّهَدَاءِ وَالصَّالِحِينَ ۚ وَحَسُنَ أُولَٰئِكَ رَفِيقًا (69)

وأيضًا على (الْمَغْضُوبِ عَلَيْهِمْ)
وبلاقي آيات عديدة بتوضح مين المغضوب عليهم، مثلا:
ومَن يَقْتُلْ مُؤْمِنًا مُّتَعَمِّدًا فَجَزَآؤُهُ جَهَنَّمُ خَالِدًا فِيهَا (وَغَضِبَ اللّهُ عَلَيْهِ) وَلَعَنَهُ وَأَعَدَّ لَهُ عَذَابًا عَظِيمًا {93}

(الضَّالِّينَ) كذلك:
-وَمَنْ يُشْرِكْ بِاللَّهِ فَقَدْ (ضَلَّ ضَلَالًا) بَعِيدًا
- وَمَنْ يَتَبَدَّلِ الْكُفْرَ بِالْإِيمَانِ فَقَدْ (ضَلَّ) سَوَاءَ السَّبِيلِ
.
.
.
القرآن مدهش!
وجميل أيضًا <3

#القرآن_الجميل
#ARK