#مامۆستا_قانع
#دوژمن_بەخێو_کردن
#شێعری_ژمارە ۳۰۱
دیوانی قانع لاپەڕە ۵۴۷ــ۵۴٨


سەعدی فەرموویەتی: افعی کشتن وبچە نگاە داشتن کار خردمندان نیست


ساڵێ لەشوێنێ مارێ هاتەڕێم
لێم هاتە سەرکلک خۆی خستە بەرپێم
مار چ مار! ڕەش مار،بەقەد مژانێ
ژێر چەناگەی سوور عەجەب سەرپانێ

تەمای بوو لەویا بمکوژێ بێکەس
منیش کوڕانە لێی هاتمەدەس
کوتەکێ سەرخڕ،داری بەڵاڵووک
بزمار ڕێژکراو،سەرزلی خۆسووک

ئاراستەم کردو کێشام بەملیا
دووبارە کێشام بەسەری زلیا
هەروەکوو ژیژوو خۆی گڵۆڵە کرد
لەپاش نیوسەعات بەتەواوی مرد

ڕوانیم بەچکەیەک سەرڕەشی سوورکار
ئەجووڵێتەوە لەژێر لاشەی مار
بەزەییم پیا هات خستمە ناو قوتوو
بردمە ماڵەوە هەروا زووبەزوو

بەماست و کەرە،بەشیروپەنێر
پەروەردەم ئەکرد بەئومێدی خێر
هەتا گەورە بوو بەچکە بوو بەمار
لەباوکی زلتر، پیس وژەهردار

نەمزانی قینی باوکی لەدڵە
بۆڕۆژ ئەگەڕێ لەمن بەکوڵە
زەربولمەسەلم لەبیری خۆم برد
کەمارم کوشت و بەچکەم بەخێوکرد

لەنیوەشەودافرسەتی هانی
هاتەسەرجێگەم زۆر بەنیهانی
لەناخڵافا دای بەپێمەوە
ئەمەشەش ساڵە ئەتلێمەوە

هەرچی هەوڵم دا هیچ سوودی نەبوو
چۆن بۆم نەکوژرا لەدەسم دەرچوو
هەرکەس عاقڵ بێ ئیشی واناکا
دوژمنی ڕۆحی بۆلای خۆی نابا

کوردە وەسیەتم چاک بگرە لەدڵ
نەوا دوژمنت بتنێتەژێر گڵ
ئەگەر هیچ کەس گوێ ناگرێ لێم
من وەزیفەمە ئەبێ هەر بیڵێم

ئەی براکانم ئێوەکوردانن
لەپاش مردنم قەدرم ئەزانن


کاناڵی ژیان جوانە
http://telegram.me/Mostafazadeh2