محـرم 1443هـ

( ام البنين ع )

ضحيتلك ولدي اربعـه .. تاليك جـثه مگـطعه
لبالي سالـم ترجـع .. لنـك وذر بالمصرع
……………………………
ربـيت ولـدي الاربعـه الخـدمتـك والحـبك
وغذيتهم غيره ووفه يموتون كون بدربك
يحسين علمت الولـد يرحون فدوه الگلبك
خالقـهم الله النصرتك هيچـي ارادت ربك

انطاني ربك منزله .. لجلك اضحي بكربله
فدوه بنيني الاربع .. لنك وذر بالمصرع
……………………………
وصيتـهم گبل السفر يبيضون وجـهي عـندك
يلـزمون ظـهرك بالحـرب ممنوع تبقـه لوحدك
ناس الي طلبت نصرتك بالكوفه تصبح ضدك
يخـونـوك ادري بكربلـه الخـانـو ابـوك وجـدك

وصيت يحسين الولـد .. للموت لجلك تستعـد
بالخطر چنت اتوقع .. لنك وذر بالمصرع
……………………………
وصيت ابني وهـيبتي عـباس غيرت حـيدر
للمـوت گـتلـه بكـربلـه دون الحـسين اتحـظر
ويايمـه ابـشـري گـال الي افديـه بهذا المنحر
مادام اشم اني الهوه عله حسين محد يجسر

وادري الگمر گول وفعل .. هذا النفل وابن النفل
عله اطباع ابوه امطبع .. لنك وذر بالمصرع
……………………………
ولن الخبر من كربله جـابه بن حذلم ينعه
يا اهل يثـرب فاجعـه تحضرولـها بالدمعـه
ابكربله حسين انذبح وذبحو اخوته وربعه
تمنيت اناْ بهذا الخبر طمتني كـون السبعه

هد حيلي يحسين الخبر .. گالولي ضل جسمك وذر
معقوله هذا الاسمع .. لنك وذر بالمصرع
……………………………

تمنيت ميته ولا اجـه بهـذا الخـبر بـن حـذلم
مذبوح راسك من گـفه والگـاع فاضت بالدم
وصدرك حوافر سحگته بخيل اعوجيه تهشم
هذا الاسمعنـه صدگ لـو وهـم لــو اني احـلم

يحسن من عگب الذبح .. راسك يشيلونه برمح
وفوگ الثره اموزع .. لنك وذر بالمصرع
……………………………

ذبحـوك يابعـد الگـلب وزينب مشـو يسبـوها
بالنـار يحسين العــده خـيام الستر حرگـوها
وسكينه چتفوها بحبل شماصاحت يضربوها
وبنتك رقيه عله الجمر حافي شكثر ركضوها

حرگوها يحسين الخيم .. وچتفوها كل ذيچ الحرم
وماصح ولي الهن يفزع .. لنك وذر بالمصرع

الشاعر عقيل الحسناوي..

القناه بحاجة الى ادمن لحذف اليستات فقط
الي عندة امكانية لايقصر جزاكم الله خيرا التواصل مع @MlleMastafa

هاي دنيه ولا تأمن بيها
شما تٌطِوٌلَ للگبر تاليها

يابن آدم احذر من الدنيه زين
اشكثر تملك فارغه تروح الادين
گبلك اجيال الي عاشت هسه وين
موته وتراب الثرى مغطيها

بقوتك لا تنغر وكثر العمام
وتنخدع عبالك تعيش الف عام
ترى باچر باالگبر وحدك تنام
وتنفرد بعمال الي مسويها

خلي نفسك دوم جاهز للسفر
هاالمصير الحتمي ما منه مفر
أنظرالموت المفاجئ هاالكثر
توقع بأي لحضه ترحل بيها

لاتأذي الناس،، لا تظلم بشر
صاحب الباطل (زغير) اشما كبر!!
الرايد ينول الكرامه والفخر
احچاية الحگ كل وكت يحچيها

تمسك باأل الرسول بكل وكت
قدوه خليهم الك لو سولفت
جنازتك خليها باچر لو متت
البشر تترحم الراعيها

خلي ناسك تذكرك باالطيبات
ترى الذكر الزين ينفع باالممات
الموت واجب لكن اترك ذكريات
طيبه كون اوادمك ترويها


#سعدالعبودي

(( ثلاث دگات ))

مخطوف وجهي من الخطر واترقبه يعود
مو من حساباتي أظل لا رايه لا جود

ا~~~~~~~~~~ا

لوليته بحضاني شكثر وبزغره اناغيه
ميضيع تعبي بكربله يوافيني ادريه
يخليني بعيونه مثل ما چنت أخليه
هذا الوفي هذا الأبي الما يخلف وعود

ا~~~~~~~~~~ا

توجهت ليه بدمعتي ووياي الزغار
زينب انه يابو الفضل گال أمرچ وصار
يم الخدر يم الخدر لتهمچ أخطار
انه كفيلج والخدر وياي معهود

ا~~~~~~~~~~ا

راح وبقيت اتنطره لحظات، ساعات
لا هوه لا جوده رجع لا شفت رايات
معقوله يا أهل الخدر حامي الخدر مات
جا وينه عني شعطله لو جان موجود

ا~~~~~~~~~~ا

لكلشي بحياتي حسبت بالحكمه والراي
لكن ابالي ما خِطر انظر بعيناي
وحده الحسين من النهر صوب الخيم جاي
شفنه وكسر كلبي السبط دمعاته متهود

ا~~~~~~~~~~ا

معقوله ما يرجع بعد خلانه بالياس
حامي الضعينه بطيحته تتشمت الناس
متعودين بكل خطر نصرخ يعباس
لحگ علينا يالوفي يا صاحب الزود

الشاعر #مصطفى_الشافعي .

باجر يمي ايذبحونه / حتى اثيابه ايسلبونه
وراسه الفوك ايرفعونه / وعيونه اتصد عليه
***************
باجر يذبحون الولي وبعيوني اشوف المصرع
يامله يادين اوشرع يذبحون حتى اليرضع
وعبد الله منهم ماسلم تمنيت حيدر يرجع
بس الصده من اصرخ يرد والناس ماجن تسمع

مرجعهم شمر اوخولي / بصياط التمو حولي
صبرا يازينب كلي / وعيونه اتصد عليه
****************
باجر يدوسون الصدر وخيولهم ماترحم
بالحافر اجلب الوذر اويطشر اويها الدم
وظلوعك المتهشمه اسمع كسرها اوتلتم
صدرك اتكسر بالسحك ولحيل راح اتهدم

عيونك صدن لعيوني / لاتسال خويه شلوني
كبالك خويه ايضربوني / وعيونه اتصد عليه
************

باجر اشوف الماشفت اكبالي العده يذبحونك
مجتوفه يمك ياترف عيني تصد لعيونك
ذاك ابحجر راسك شمر برماح ويطعنونك
التمو عليه من كل كتر عطشان ميرحمونك

هاي اوصييه من الزهره / كالت شمي من نحره
ادري بهاي اخر نظره / وعيونه اتصد عليه
**********

ظلو الماعدهم رحم يحدون باجر بينه
وحنه بنات اوبل غرب بس الله عينه علينه
ولكمر طايح علنهر اوسهم المنيه ابعينه
ياربي انظر حالتي بين الغرب ظلينه

يابلسم جرحي اوخدري من السوط ازرق ظهري
ماينشف دمعي اليجري وعيونه اتصد عليه
************
ياخويه باجر على الهزل اختك ترد مسبيه
وحشه يظل درب السبي ومن الهظم محنيه
من التفت راسك شفت يحجي اويسولف بيه
ويرتل ايات الحمد دم يبجي عينه اربيه

ياخدري وكل احلامي/ عطشان اوكلبك ضامي
حزو راسه اوكدامي / وعيونه اتصد عليه
************

جنت انه شيخه امدلله وماشاف واحد ظلي
وهسه اسيره امكيده ياعيني حكج هلي
جان الكمر مثل الهوه ونفاس روحي اوخلي
كالو صريع على النهر اسيوف علئ نحره اتصلي

كالو مكطوعه جفوفه / مشتاكه عيوني اتشوفه
لشوفك وجهك ملهوفه / وعيونه اتصد عليه

****************
(يازينب )
كلمات
(حسين الزيدي )

قصيدة مسلم(ع)
.
.
.
 
ماقبل موتي بثواني      چانت اهواي الاماني
وتمنيت 
چانـت امنــيتي الاخيره
جسمي ينشال بحصيره
تمنــيت

*

عالقصر من صعدوني حسـين بس ابراسي چان
وصوت كسر اضلوع صدره بداخلي شاهد عيان
اتذكرت ســــالوفه عـــمي علـــي سولـفها بمـكان
وگال يامســـلم اخـــيك راســـه ينـــشال بســنان
 
اتگـطع اعضـائه البواتر .. اطشر اعـضامه الحوافر
وتمنيت
البي يصـير بروحـي اديـره
جسمـــي ينــشال بحصيره
تمنــيت

*
 
أطـلب الذبـــاح گــــلي گبــــل ما گـــص الوتين
گتـــله اتمـــنه اصـــلي لـــبواليــمه ركـــعــــتين
بالقنوت ارفعت ايدي انـــــخيت رب العــــالمين
كون من انذبح جـسـمي ينـطحن مـثل الحسين
 
حَلفت ربي بغيـاثه .. ابلا دفن ابقه ثلاثه
وتمنيت
هاذي احــلامي الچبيره
جسمي ينشـال بحصيره
تمنــيت
 
*

الدعوه الاخره ادعيت ربي قبل طبگت ناظري
كون ســلاب المــحابس مثــله يگـطع خنصري
أي يذبـــاحــي احـــلفـــك لــو ردتلـــي تنـــبري
من القـفه بثنعش طبره اطبــرني انتــه بمنحري
 
هالطلب مسلم يريده .. من تحز انته وريده
وتمنيت
مثـله ابقـى ابلا عشـيره
جسمي ينشال بحصيره
تمنـــيت

*

راسم الطف ابـن عمـــي في مخـــيلتي صــور
سالفتهـــن مــو ثوانـــي لا يريـــدالهـــن شــهر
من القصر لمن اطيح اتمنــه لو ظـهـري انكسر
مثل ما ينكسر ظــهر حســــين باچـــر عالگمر
 
حلمي من تلفي المنيه .. كلهن يصـــيرن عليه
وتمنيت
ابنيتـي وي بنـته اسيره
جسمي ينشال بحصيره
تمنيــت
 
*
بالشمس كون ابقى مرمـي ابلا دفن وبلا غسل
وراسي وي راس ابو اليمه برمح عالي ينحمل
وبنتي وي بنته رقيه مچتـــفات اعلــــه الهزل
وين الله وابــوفاــــضل حـــلم عـــمري يكتمل
 
الله شاهد چان حلمي .. يدفن السجاد جسـمي
وتمنيت
مـن يحــطني بالحفيره
جسمي ينشال بحصيره
تمنــيت
*
حيدر تركي الكربلائي

*قصيدة تحاكي الخيول الاعوجية التي داس صدر* *الحسين* *ع😭😭
٠٠٠٠٠٠٠٠٠٠٠٠٠٠٠٠٠٠٠٠
*خيول عشرة الداست حسين الغريب*
*ونعجن ويه التُرب جسم السليب*
*ياخيول الأعوجيه*
*حسين هذا ابن الزجيه*

*ماتعرفينه الحبيب ابن الحبيب*
٠٠٠٠٠٠٠٠٠٠٠٠٠٠٠٠٠٠٠٠٠٠٠

*ياخيول الاعوجيه شلون كلبج طاوعج*

*من وكفتي فوك صدره وحيل دستي بحافرج*

*صوت جم ظلع الكسرتي ليش مامر مسمعج*

*منو كلج رضي صدره*
*وعلى حسين العلمج*


*العلماج ابن الدعيه*
*حسين هذا ابن الزجيه*

*صدره مطبوك عله ظهره والعجيب*
*ماتعرفينه الحبيب ابن الحبيب*
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
*الخيل داست على صدره وهو عينه عله الخيم*

*ما يهمه وجع صدره*
*ولاألم ذاك السهم*

*اليهمه شلون زينب*
*تنسبي ويه الزلم*

*لاكفيل الظل يدافع*
*وطاح شيال العلم*

*رحمي حاله بهل الرزية*
*حسين هذا ابن الزجية*

*هذا ابن الطاهره وابن النجيب*
*ماتعرفين الحبيب ابن الحبيب*
٠٠٠٠٠٠٠٠٠٠٠٠٠٠٠٠
*يسمع اطفاله تصارخ رحمي حاله بهالوضع*

*مابقاله جسم ينهض نكطعت اوصاله گطع*

*عياله تاهت بالبراري*
*بساعة البيهه وگع*

*شلون ينهض ياخيول*
*اوموت من عندج جرع*


*عينه مشبوحه الرقيه*
*حسين هذا ابن الزجيه*

*ماكو رحمه بحافرج لمن يصيب*
*ماتعرفين الحبيب ابن الحبيب*
٠٠٠٠٠٠٠٠٠ ٠٠٠٠٠٠٠٠٠٠٠٠٠٠
*روحه صعدت والحوافر فوگ‌من صدره اعتلت*

*ماشفيتي بي غليلج*
*چم‌رزيه‌البییه اجت*

*ياخيول وصعبه كلش* *والضلوع تکسرت*

*عيلته تنظر وليهه*
*ریت عینچ بس عمت*


*شكد شبع منج اذيه*
*حسين هذا ابن الزجيه*

*قصتج ابكلبي تبقى للمشيب*
*ماتعرفين الحبيب ابن الحبيب*
٠٠٠٠٠٠٠٠٠٠٠٠٠٠٠

تمت بقلم خادمه الزهره البتول
1/8/2021

محرم مااريد اهلالك
محرم بس لطم يحلالك

اه يحسين ومصابك بيها يحجي لساني
من يهل اول محرم بس الطم عنواني
حتى لو بالنار الطم ماتهيد احزاني
انه من زغري عشكته مااحبن ثاني

محرم ابجي من خيالك
محرم مااريد اهلالك

العايش بروحي واحسه عنه ميبعدوني
اني حيل احسين احبه ليش ميفهموني
وآلله لو كل خطوه شامت ابجيله دم عيوني
خلهم يكولون عاشك بيه ميعيروني

محرم بس مناحه افضالك
محرم مااريد اهلالك

فخر عندي حسين اخدمه واخدم بخدامه
والله لو يرضه عليه كل ساعه اطبر الهامه
من يدك دمام اسمعه وتلطم الاطامه
كلبي وي الدكه ينزف ماتهيد آللا مه

محرم نحس كلش فالك
محرم مااريد اهلالك

يامحرم شروي عنك يامصيبه ارويها
من هلالك بيك صرخه ثقل هذا الكون بيها
خلني اسولف ع زينب اشلون تدي جروح اديها
شحال زينب بعد اخوها والعده ميسريها

محرم ادري موت بالك
محرم مااريد اهلالك

شنسه اني من لليالي الييها عاش احسيني
حسين هسه بماي اذكره هوه كمل ديني
اني لو بالصحره اعطش حسين هم يرويني
مثلي مااخليك تعطش وانته المواليني

محرم الله يرحم حالك
محرم مااريد اهلالك

الشاعر هاني الحياوي

قصائد محرم يوم الانصار

#قصيدة_للإنصار

أصعب موقف صار… حسين ويلأأنصار
م̷ـــِْن كلهم روحو وعوفوني
مــا يردوكم بس يــردوني..  اصعب موقف صار
*****
دنــگــو كــلهم وقــار ومستحة
ابلا استفهام الحجي ولا شارحة
ثورتك يحسين ثــورة نــاجحة
هــاي بالدنية البطاقة الــرابحة

مــنعيش ابــلــياك… للموت احنة اوياك
بيعة حق م̷ـــِْن بايعتوني
ما يردوكم بس يردوني… اصعب موقف صار
****
ثق الف موتة نموت ومانرد
والمواقف تنذكر ولد الولد
والملك م̷ـــِْن يأمر ايطيعة العبد
الصلاة ما تكمل ابدون الحمد 

لجلك كلنة اسيوف… طشنة ولمنة احروف
ماخيبتو بيوم اضنوني
مايردوكم بس يردوني… اصعب موقف صار
******
أبو فاضل م̷ـــِْن سمع ذب خوذتة
رد حبيب ودمعة تارس شيبتة
استبشر حسين بعضيدة وصحبتة
وكام حب عمة حبيب ابكصتة

صلو خلف حسين… ختمو قرأنيين
عطشانين وما خلوني
مايردوكم بس يردوني… اصعب موقف صار
********
اتحظرو حين انكشف خيط الفجر
اتسابقو لجل الشهادة والنصر
انموت كلنة وما يمسون الخدر
اسباع واحدهم يكر وما يفر

صارو مثل اشراع… سيل وطب عالكاع
شيبة اطيح اكبال اعيوني
ما يردوكم بس يردوني… اصعب موقف صار
********
واحد وسبعين موقف سجلو
حاصرو جيش الكفر وتحاصرو
نجمة نجمة عالتراب اطرحو
لجل عين حسين فدوة استشهدو

الشيب الاحة اتراب… طاح ابصفة الشاب
بالجنة اهناك اتلاكوني
مايردوكم بس يردوني… اصعب موقف صار
****
م̷ـــِْن اهد ما ضحو لهذا العصر
ترسو الكاع ابمواقفهم  ذكــر
بالدماء انكتبت اسماء اشكثر
همة اسمهم كاتبينة ابكل شبر

موقفهم ما مات… ننساهم هيهات
نية عابس تشبه لوني
ما يردوكم بس يردوني… اصعب موقف صار
***
تمت بنظرة مولاي الحسين ع
✍كَلَّمَـےـاتِـ الخادم… حسين حمدان الدلفي