Уцякала зіма ад вясны
Па кустах вербалозаў рагатых, —
Ёй каптан абарвалі яны,
I на голлі матляецца вата.

🌷❄️ Уцякала зіма ад вясны,
Уцякала па рэках, азёрах,
Лёд затрэскаў, закрэктаў, заныў,
Здрадзіў лёд —
і вада на прасторы.

Толькі звон крыгалому ачах —
Брод шукаюць бярозы-бяглянкі
I трымаюць на ніцых плячах,
Як дзяцей палахлівых,
буслянкі.

А вясна даганяла зіму;
Заяц скочыў у лужу блакіту,
Бо на хвост наступіла яму,
I пралескі распырскаў, раскідаў.

I уцякала зіма ад вясны,
Пад нагамі ламачча затлела,
Парастрэсла па сцежках лясных
Снег апошні свой
з ландышаў белых.

Уцякала зіма ад вясны —
Уцякала.☀️🌷
©Рыгор Барадулін
#па_беларуску
#люблюжыццё

ВЯСНОВЫЯ НАРОДНЫЯ ПРЫКМЕТЫ: САКАВІК ❄️☀️

У пачатку вясны надвор'е пераменлівае. Сакавік прыносіць першыя праталіны. Марозная раніца змяняецца цёплым днём, капяжом. Чаргуюцца дождж і снег.

🌱Вясновыя народныя прыкметы прыроды былі неабходныя для таго, каб даведацца, якімі будуць вясна і лета, чакаць засуху або праліўны дождж.

🌱Назва месяца паходзіць ад імя старажытнарымскага бога вайны Марса. Сакавік таксама суровы і непрадказальны. Менавіта ў гэтым месяцы язычнікі праводзілі выгнанне зімы.

✨Снег ляжыць хвалямі на палях – добра ўродзіцца гародніна.

✨Чым даўжэйшыя ледзяшы ў сакавіку – тым даўжэйшая вясна.

✨Пачаў рана раставаць снег – значыць, яшчэ доўга праляжыць.

✨Рана вярнуліся жаўрукі і гракі – чакай раннюю вясну.

✨Высокія аблокі прынясуць добрае надвор'е.
#па_беларуску
#люблюжыццё