#يـاحسـين*
#يا_ذبيح_الله*
*حسين يا دمعة عشق
قلبي بحروفك يدق*

انصبني خيمة للعزا بيها تگعد فاطمه
خلني عبره بالنحر تجري عالخد لاطمه
احرگني بنار العشق والدموع الساجمه
سجل اسمي يا حسين خادم انه بدفترك

#ياحسـين*

لچبدك تفتت جمر گلبي لاجلك محترگ
ظاميِ وچفك نهر بيه تروّى ٱهل العشگ
يالعشگ غيرك وهم وحبك انت بس صدگ
ليته نحري يا حسين فدوى كان لمنحرك

#يـاحسـين*

اخذني غيمه الكربله تطفي نار مخيمك
تفيي لاجلك بالفله تدواي جرح يألّمك
تغسّل دموم النحر ومن وريدك تلثمك
چبدک اروي سیدي و ابچي گطعة خنصرک

#يـاحسـين*

خليني درع اعلى الصدر شيله انت بيمنتك
عنّك اتلگه الحجر لصوبك من جبهتك
أحنيِ ضلوعي عليك للسهام لصابتك
بصیحتک هل من نصیر افزع آنه و انصرک

#يـاحسـين*

اريد اصيرن بالسبي هودج بطول الدرب
يحديِ بظعن الحرم يحجب عيون الغرب
محمل يفيّي وستر لزينب بحرّ اللهب
استر بكفي الخدر لينكشف من خدّرك

#يـاحسـين*

روحي خلها بمركبك تبحر بركب الفداء
صوبك تشد الرحال وشْراعي الحب والفناء
ترسي بشاطي الدموع بفيافي كربلاء
تأدي لك فرض العشگ بأربعينك تحضرك
#يـاحسـين*

الشاعرة الحسينية
خادمة آل محمد ص✍🏻
@kadimatAlmouhamad