‏سهيل وجهك مالمع يالمنتظر
وانته سر النور تضوي بكل دهر

‏اشعجب شمسك ليش جلّلها السحاب
وانت وجه الباري ميحجبك حجاب
چيف ترضى سيدي بهذا الغياب
وشيعتك لضواك مشبوحه النظر

‏صدگ طبع سهيل مطلاعك گصير
هاي ماترهم لأن بيك استنير
ياصغير العمر واغيابك چبير
لشوكت يبن الحسن هذا السفر

‏لشوكت وانت اتگلّب عاللّظى
ولشًوكت أمك مدامعها غضى
عالگضه امسّلب اضلوعه امرضرضه
أمك ابكتره او تجلّب بالنحر

‏ما تشگ يبن الحسن زيج السكوت
وابرهيف الموت خل خمصك يموت
شصعب امن ام الخدر زينب تفوت
على ايزيد الرجس واعليها جسر

‏سيدي لو بس إلك دم الرضيع
هذا كافي ايحشمك تنهض سريع
من نجيعه بالسما صاير نجيع
ما نشف جروانه بثريّا حمر

‏يا ثمال البگه ماظنّك نسيت
ارد اسألك والعذر منّك رجيت
صدگ بهل البيت ظل موحش البيت
شو گضيتوا ابچتل وابسم وابخطر

‏بالخطر عشتوا يهل بيت الرسول
واحنه بيكم خوفنا كله يزول
بالخطر خايف ومبعد واشتگول
الك مابيّن يبن حيدر أثر

‏لو عتبنه اعليك ياذيك العتاب
ولو سكتنه انعيش بأطوار العذاب
گوم يبن الحسن سمّعنه الجواب
اظهرت إلكم واگلبت مجرى القدر

‏اشعجب شمسك ليش جلّلها السحاب
وانت وجه الباري ميحجبك حجاب
چيف ترضى سيدي بهذا الغياب
وشيعتك لضواك مشبوحه النظر

#ندبه #الجمعه #المهدي
الشاعر أبو جعفر العبودي

#الناشر_الحاج_فلاح_حسن_مهدويه
#ندبه_للامام_المنتظر

يا بو صالح ..... الجمعه نتأمل نشوفك
يا بو صالح ..... كلنا بالدنيا ضيوفك
يا بو صالح ..... نترجى لمسة جفوفك
يا بو صالح .....يمته نجتمع بطفوفك

جمعه تتبع جمعه واحنه
نطرق أبواب الامل
انته يا أمن يجيب
نصرخ يمولانا العجل
انته يا عين الحياة
يا ابن خير العمل
دنيانا تترجى العدل
يا امامي المنتظر

&&&&&&&&&&&&&&&&&&

يا ابن طه ومحمد
والنجم والذاريات
يا ابن نون القلم
وق ويه المحكمات
يا ابن ص ونحل
وي النبأ والمرسلات
يا ابن ام الكتاب
وسبع المثاني و الفجر

&&&&&&&&&&&&&&&&&

انته يا يوسف محمد
والباقيات الصالحات
انته يا ثار الحسين
يمته تمحق هالعتاة
نقسم اعليك بقسم
يجرح الحد الممات
عليك بضلوع الزجيه
المنها مكسور الصدر

&&&&&&&&&&&&&&&&&&&&

سيدي دنيانا غصت
بالمكابر والشموع
شمعه نشعل للشباب
شمعه نشعل للضلوع
شمعه نشعلها بدمع
شمعه تشعلها الجذوع
يمته تخلص هالمحن
وينجبر كسر الظهر

تمت بعون الله
خادمة الزهراء/ ليلى زغيب

#الناشر_الحاج_فلاح_حسن

#حلم_مذبوح

#لا_يسمح_بتغير_اسم_الشاعر

⬛️◾️▪️⚫️﷽⚫️▪️◾️⬛️
#الامام_الباقر_عليه السلام
#ندبه للإمام الباقر عليه السلام
بيوم إستشهاده

*شايل حاجتي وجيتك اهم بيها*
*ياابوجعفر ردت هالليله تكضيها*


▼△▼△▼△▼△▼△▼
بالنخوه قاصد مولاي والدمعه جريه
بحسين المنذبح عطشان بالغاضريه
حاشا تردها طلبتي يبن حامي الحميه
وللزهره جينه هاليوم كلنه انواسيها
===================
اريدن حاجتي منك ياابو الشاره
ياباقر اعلوم النبي وحافظ اسراره
بحق جدك المظلوم ويه انصاره
وبحق الزجيه وكل دمعه تجريها
===================
خادمكم سيدي وعندي هالطلبه
اقصد الليله جودك ودمعي اصبه
بزينب الحره سيدي ودمع التسجبه
يالباقر شيعتك من هالوبا تنجيها
===================
جيتك متحير هواي وبگلبي جمره
ياابو جعفر دخيلك خاطري تجبره
زادت اعليه الهموم وبعيوني عبره
نار الحيره مولاي ضلوعي تجويها
====================
يا ابو الصادق اندب بجاه العقيله
الباليسر راحت وياك همي تشيله
ضاقت اعليه دنيتي گيودي ثجيله
بالمشت بذاك الدرب والونه تخفيها

==================
يالباقر الليله اندب والمدمع يسيل
گرب عاشور مولاي يامطول الليل
نحضر مأتم المظلوم اوياه الكفيل
ويحضر المهدي والهموم يجليها
====================
تمت بأقلام خادمات الزهراء عليها السلام
✍الشاعرة زينب راضي الزيني
✍خادمة الزهراء ليلى زغيب
#في (٦)من ذي الحجه ١٤٤١هج ليلة إستشهاد الامام الباقر عليه السلام
#نسألكم الدعاء لوالدينا بالرحمه والمغفرة



الشاعره ليلى زغيب
اين الطالب بذحول الانبياء وابناء الانبياء
https://tttttt.me/Doumooalanin