[أين الأمير]
(طور ريحانة المصطفى)

تشهد ليالي السهر
من يبدي هذا الشهر
أنحب وانوح ابقهر
وينك يا حامي الجار

يا أمير يا أمير يا أمير يا كرار

١/

من يبدي شهرك أحن
واتذكرك من تون
كل ليله بالأسحار

تسبّح إله العرش
ومن خشيته يرتعش
گلبك يبو الأطهار

يالواقعة وهل أتى
غيرك أبد لا فتى
لا تكرر ولا صار

ثغرك صُحف لو نطق
والباري لجلك خلق
الليل وخلق النهار

لا ترحل ولا تروح
وتترك مُحبك ينوح
افراگك يزيد الجروح
ويسعِر بگلبي النار

يا أمير يا أمير يا أمير يا كرار

٢/

اجروك يقين وتسيح
صبر وكرامة وتصيح
وتقسم بالٰه البيت

واسمك يا رب الحرم
فُزت ومَرار الألم
ما همني من وفّيت

ما استحكموني ابحرب
خافَوا يثير الرعب
سيفي إذا سلّيت

ابركعاتي خير العمل
المارق بحقده امتِثل
غدروني من صلّيت

شلون ابصلاتك گدر
خصمك يِسَيْل السور
من راسك اللي انطبر
مستودع الأسرار

يا أمير يا أمير يا أمير يا كرار

٣/

يا سيدي المرتضى
غارت نجوم الفضا
وانذهلت الأكوان

چم گمرة منها اختفت
والعالية اتزلزلت
واتصدّع البنيان

كل آية من الصحف
كل چلمة هم كل حرف
يعتبرك القرآن

تهتف يا رب العدل
هذا وريث الجهل
مزّق وحي الفرقان

من الكتاب الجلي
صوت السور يعتلي
واتنادي آه يا علي
يا موضح الأذكار

يا أمير يا أمير يا أمير يا كرار

٤/

محرابك المنتحب
ابنار وجمر يلتهب
ولفرگتك مسجور

الروح الأمين ابألم
(ركن الهداية انهدم)
صاح ابظهر مكسور

نالت ليالي القدر
عز وشرف ينتثر
من راسك المطبور

تهتف يرب السمه
تباركني هاي الدمه
وليلي يساوي اشهور

إسمَع ليالي القدر
تدعي مريد الفجر
يا رب يا مقتدر
لا أسفرت أنوار

يا أمير يا أمير يا أمير يا كرار

٥/

فقّارك ويفتكر
چفك يا ضيغم بدر
سيفك إلك مشتاق

باسك يحيدر بده
كسّر خشوم العده
من تضرب الأعناق

سيفك بغزوة أحد
ما يحتمل هالبعد
كلفه عليه الفراق

يتذكرك من تصول
ابكل غزوة يم الرسول
خل ترشح الأشواق

لا ترحل وتبتعد
وتخلّي سيف المجد
غافي ابظلام الغمد
يصرخ أنا البتار
يا أمير يا أمير يا أمير يا كرار

٦/

لجلك بچت فاطمه
ابدمع امتزج بالدمه
ينضح كدر واهموم

والهادي يجري الدمع
وابهامتك منفجع
المخضوبة من ادموم

تشبه مصبّ المزن
تعاينها عين الحسن
وبو الأكبر المظلوم

وزينب كئيبة وتود
يرجع أبوها ويرد
وينسى الجرح وايگوم

عم راسه يللي انطبر
ما يوصل الها خبر
بس زينب من القهر
منتظره يم الدار

يا أمير يا أمير يا أمير يا كرار

٧/

مرت سنين ومضت
واحزاني لا ما انگضت
لسّاها تشعل نار

مسجورة ما تنخمد
وعليها آنه اعتمد
وارفع لواء الثار

ويّ ابنك المنتظر
نهتف أيا من كفر
قد جاءك الفقّار

ولو دمي سال ونزف
لساني ابمحبتك هتف
لبيك حامي الجار

درب الولايه الرشيد
عنَه أبد ما نحيد
غيرك ولي ما نريد
يا أول الأبرار

يا أمير يا أمير يا أمير يا كرار

#مهدي_فقيه

يا خويه .. إجيت احني .. إلك ضلعي الذي اتكسّر

بعد موتك .. انسحن صدري .. الحرم و اطفالي تتيسّر

يا خويه يا بو فاضل يا خويه يا بو فاضل

************************

گصدت الشاطي و اتعنيت
أدَوْرك و الــتــفــت يـــمّــي

عــسـانـي ألــــتگي ويّـــاك
وتــطــوّح شــوفـتـك هــمّـي

وَسَـف شـفتك رهين الشاط
جــسـد مـتـعـفّر و مــدمـي

واعــايـن عالأرض چـفـيـن
و اصـــدِّ لــجـودك الـمـرمي

يا خويه يا بو فاضل يا خويه يا بو فاضل

**********************

يـبو فـاضل سـهم عـينك
يصوبني ابوسط صدري

عگب فـرگاك اظل وحدي
رهـيـنـه وحــايـر بـأمـري

اذا شـفتك طحت ظامي
يـخـويه يـنـكسر ظـهـري

ايـتـفـجّر مـنـهل عـيـوني
وعـلى وجناتي دم يجري

يا خويه يا بو فاضل يا خويه يا بو فاضل

******************

يمن للماي رحت و اتريد
تـروّي الـطفلة مـن زودك

ألــف وسـفه يـبو فـاضل
يـطيح اعـله الـنهر جودك

مـثل هـامة علي انطبرت
نـــزل عـالـهامة عـامـودك

ومـثل گطـع الـنحر مـني
يـخويه انگطـعن ازنـودك

يا خويه يا بو فاضل يا خويه يا بو فاضل

************

يــخـويـه تـحـاوشـتـني الگوم
وصرت وحدي وسِط هالناس

عـگـب عـيـنـك يــبـو فــاضـل
انگطـع نـحري يـبو النوماس

الـشمر جـالس على صدري
وانــــا انــــده أيــــا عــبـاس

لــونّــك خـــويــه تــدركــنـي
گبــل اضـلاعـي مـا تـنداس

يا خويه يا بو فاضل يا خويه يا بو فاضل

************

لــونـك تــدري يــا عـبـاس
بـالـصـار اعـلـه صـيـوانك

انحرگ واتشرّدت الاطفال
عگب مــا ذبـحـوا اخـوانك

وتــرى زيـنب عـلى الـناگة
يـسـيره وتـحـدي عـدوانـك

مـصيـبـه يـا ابـو الـنوماس
الاعــادي تـولـي نـسـوانك

يا خويه يا بو فاضل يا خويه يا بو فاضل

#مهدي_فقيه