#لمولاي_مسلم_بن_عقيل
#عليه_السلام


المسافه من القصر للگاع
سفرت عشگ لحسينك
طحت والدم نهر مفروش
ونزيفك حته من عينك
يبو طاهر الطف يريد
زلم واهلك متانينك ،

-- هم انكسرت ضلوعك ودمك خَر
-- بس الفرق ما مذبوحلك منحر ،
-- وجسمك گضه كله من الدفع والجر

-- صوت طگت ضلعك
تنسمع بالطف اصياح وسكته
-- آلطحت هسه لخاطره
باچر يكسرون خاطر لخته
_____________________________________
اعله صبعك محبسك موجود
بس دافه الترب والدم ،
وطحت طيحت مطر ع الكاع
يمسلم كلشي ما يسلم
من كد ما الطاح اثكيل
ركن الحايط امثلم ،

-- هم جاسك عطش والعطش ما يخلص
-- الليل يزود بس وجه الگمر ينقص ،
-- الرمل من دمك المنثور كلش غص ،

-- بحبل جروا جسمك
هيه هاي احبالهم سم بيهه
-- هنه ذني الباچر
يشدن ام عون بسبي من ايديهه
_____________________________________
طحت والهوه يدفع بيك
وگاع الصلبه تتلگاك
حته بطيحتك مظلوم
يسارك عاكست يمناك
ياهو يشيل جسمك نام
حسينك هسه ماهو وياك

-- طحت براگ حيطان القصر تنزف
-- متت والدافعك متربع ويرجف ،
-- انطر راسك الچانت بي زلم تحلف

-- انشلت ايد الدافعك
بولد عمك باچر يصير اكثر
-- الهضم والهم والدم ،
وباچر اتلوح السيوف المنحر
_____________________________________
طحت بس وجهك المتعوب
ما خربت معانيه ،
طحت من فوك بس مولاي
اتطيح الشمس يوميه
عظم متنك انطش اتراب
مثل الالف وتسعميه ،

-- حَدَب ظهرك من الطيحه يا وسفه
-- ونزيف الخير من عيونه حد چتفه
-- طيحت ولد هاشم طيحت الكلفه ،

-- انرسم بالدم مشهد
بي حميده احبالهه بأيديهه
-- وطاحت الگمريه ،
الجان بعيونه علي مخليهه ،
_____________________________________

- الخادم
- علي مهدي المالكي

- #اللحن 👇👇




https://tttttt.me/joinchat/AAAAADyvNcFdjoQh-74liA



قناه نشر القصائد المنبريه ثقافه الشعراء