💥 القصيدة والنعي كلها تحكي عن موضوع واحد … دقق وتَذَوَق ..
في لقآءها مع العقيلة زينب ع
🔳نعي مجردات
🔳نعي نصاري
🔳مجرشة
🔳أبوذية
🔳قصيدة تجليبة
🔳القصيدة لأم البنين ع

أتيتُ إليكِ #زينبُ فاعذُريني
لعلَّ البعض َقصر َّمن بَنيني
عَلِمتُ بأنَهُم قُتِلوا جميعاً
أمامَ #السبطِ #مولايَ #الحُسين ِ
#وعباس ٌمَضىٰ نحوَ الفرات ِ
لـمَلئ ِ الجُود ِ بالمآء ِ المَعين ِ
فلَم يشرَبْ وقلبُ أخيهِ ظامٍ
وكانَ فُراتُـه ُ بَين َ اليَدَيّن ِ
وكَـرَّ عليهِمُ والغدر ُ أودىٰ
بقَطعِ شِمالـِه ِوكذا اليمين ِ
وسهمٌ جآءَ قِربَتَـهُ فسالَت
وسهمُ العين ِليتَ أصاب َعيني
وهامَتَه ُ عمودٌ قد أتاها
وصارَ البدر ُ مفضوخ َالجبين ِ
أنا يا زينَب ٌ أم ّ ٌ تَمَنَت
ترىٰ أبنآءَها في كل ِِّحين ِ ..
…فدآءً يذهبون َلكُم وألآ
يَرَوا #سبطَ #النبيِّ بلا مُعين ِ
فَياابنةَ#حيدرٍ هـلاّ سمَحتي
بأن ْ أبكي الأحبة َ في أنيني
وأنعىٰ فِلذةَ #الزهرآء ِ حتىٰ
أُواسيكُم بفاضِلِها سنيّني

#سمير_الصالحي
#النجف_الأشرف
https://telegram.me/ShaikhSameerAlSsalehi

أم البنين ع
أنشد اجيتچ جاوبيني
بس كون ماگصروا بنيني
زينب واخاف تعاتبيني
وتنشف دمعتي بوسط عيني

زينب ع
ماگصّروا خُوّاني لحيود
وعباس ابَشرچ وَفـه لوعود
من ترس ماي وجابه بالجود
لاچن وسف مالَـحّگ يعود
طفّوا عيونه وگطعوا زنود


#سمير_الصالحي
#النجف_الأشرف

🏴 لقاؤها مع زينب ع

إجيتچ يالوديعه ألطم الراس
واعينچ وانشد على الشهم عباس
بس لا تشمتت بيكم الناس ؟
دحاچيني يزينب شنهو الأخبار ؟

تگلله أخيي وفّـه الوعود
لَحد ما گطّعوا من عنده الزنود
كل همه يوَصَلِ الماي بالجود
وسافه انچتل هذا الصار والدار

أبو فاضل كلف يشهد حنانه
يحره وداعتچ لا ما نسانه
بنص الماي اهو ويابس لسانه
خاف يضوگ گطره وتنحسب عار

حليبچ طاهر ولمن ترضعيه
بحسين وهله چنتي توصيه
وعلامه بيوم قدّم گطعة ايديه
مارد للخيم چيف انه محتار

#سمير_الصالحي
#البصرة_الفيحاء
🏴 ولما أراد الركب المسير
حضرت ع لتؤكد وصيتها لأبنآءها

جيتك يبن حيدر علي
مشدوهه دمعاتي تهلي
آنه وبنيني وكل هلي
فدوه لحياتك ياحسين

هذا آخر وداع وسفر
واشبيدي لوعني الدهر
عگبك أظل بلا نظر
ربيت الك هاي البنين

خليني اَوَصي هالوِلِد
حتى عليهم تعتمد
عباس اخافن ماترد
بالك عله گرة العين

چفوفك تقدمهن فده
لاجله ولاتهاب العده
لتعوف اخييك وحده
لحد مايفرگكم البين

وزينب تصيرلهه حِمى
ومحملهه هم تتوزمه
تفديهه لو سال الدمه
من عينك وليدي الحنين

🏴 الأبوذية
نظر عيني أبوسكينه وارى بيه
وتعرفوني وفيه الكم وربي
علي يشهد أبوفاضل و اربيه
واعلمه يطيح گبل ابن الزچيه

#سمير_الصالحي
#البصرة_الفيحاء

🔳عن اولادي أنشدچ جيت الچ أسعه
🔳أخافن گصروا ياريحة البضعه

خفت لاچني أدري اولادي ميگصرون
وانه الربيتهم خدام الچ يـَم عون
كلشي يصير تالي وعني شتگولون !
ماأملك فقط حبكم وهالسُمعه

حبكم غايتي وخدمتكم تمنيت
وعلمت البنين الطاعه لاهل البيت
والله وداعتچ حقكم فلا وفيّت
روحي بحب ابو السجاد متولعه

صدگ يا زينب احچيلي اشجره وشصار!
بالطف گالوا النزلوا گبل لانصار
گلت بس لا يجيني من بنيني العار !
عله الموت الانصار اشعجب متسرعه!

إذا عباس ما وَفـّه فلا أبريه
الذمه وأبد يا زينب ولا أبچيه
بس اعرف ابو فاضل سبع وادريه
گالوا بالحرب زندينه متگطعه

تگلهه ام الخدر يم البنين أرجوچ
شتگولين ! اخوتي حيود ما خذلوچ
بوگفتهم خلدتي وبالسمه خلوچ
كفوا منهم ومنچ والله ياشمعه

كفوا من جعفر وعبدالله وعثمان
نزلوا چن أسود لخطة الميدان
بيهم يالوفيه حارت العدوان
راحوا چتل والأجساد متوزعه

أسولفلچ يحره اعله البطل عباس
بافعاله ووگفته تحچي كل الناس
أخو وماله مثيل الهبه رفعة راس
حسين ولبو فاضل منحني ضلعه

وحگ هو الشهم خلاهم يرجفون
يسموهم زلم بس منه يشردون
خوف ورعب قاده وجيش يتوسلون
غضب نازل وضاگت بيهم الوسعه

ما ضاع الربه أم وثلث تنعام
تـظل بيهم وبيچ تسولف الأيام
بس جرح ابو فاضل أبد مايلتام
تعاي ويه الحرم نبچي وعليه ننعه

نبچي ونلطم وما نگطع الونه
ونجيم النوح وبحرگه اعله چافلنه
حسافه عليه راح وأيست منه
لظل عمري حزينه واهمل الدمعه


#سمير_الصالحي
#البصرة_الفيحاء
https://telegram.me/ShaikhSameerAlSsalehi