*#درب_السبي*

*الملا هادي السيهاتي*
*الشاعر حيدر الدر العاملي*

امچتّفات... بالسبي يابا الفضل
امچتّفات... اوحيل تعّبنا الحبل
آه يا درب السبي
آه يا درب السبي
—

من درونا ابلا عشيره
يابو فاضل وگّفونه
وبالحبل شدّوا لايادي
اخلاف عينك چتّفونه
يله بالنسوان گالوا
خل نطوف اوطوّفونه
عالنياگ الهزله بالبر
آ يخوية استضعفونه

امسلّبات... ها يحمّاي الخدر
امسلّبات... عالهزل ضاع العمر
ما رعانا الناصِبي
آه يا درب السبي
—

غربة يا عباس غربة
والمصيبة اشگد چبيرة
نمشي مچتوفات ايدينا
ويْ زلم ما عدها غيره
روّعونه جيش اْمية
اويا كفيل ابهالمسيرة
خارِجية صار اسمها..
الچانت ابسدّك أميرة

امغرَّبات... ادخلنا چم بلد اوبلد
امغرَّبات... واحنا نصرخلك مدد
من عُيون الأجنبي
آه يا درب السبي
—

ابخيمة محروگه يخويه
بالحبل منّ انجمعنه
غصبن اعلينا خذونا
اوچاسِ الامصايب جرعنا
عذّبونه اوبالبراري
ضعنه يا عباس ضعنه
عالعبي هذي دمانا
السايِلة تشرح وضعنه

حاسِرات... والجرح ما ينوصف
حاسِرات... اعْيالك اعْياها النزف
دمها سال اعله العبي
آه يا درب السبي
—

ضيّعونا اشلون ضيعة
وانولينا اشلون وليْة
اوحادي ظعنك من يسولف
چان يخْمش روحي حچْيه
مرّة عالزهراء يحْچي
اومرّة يتجاسر عليّه
يا گمر ريتك تسِمْعه
هاي چانت عندي مُنْية

اميسّرات... خوية بين اهْل الظلم
اميسّرات... اوننشتم، عندك علم؟
راح عزنا الطالِبي
آه يا درب السبي
—

هذا والأطفال تنشد
عمّة زينب وينه عمنه
ما إجانا.. وينه حضنه
الچان بالخيمه يلمنه!
ما درى العبّاس بينا!؟
غير نشكيله هضمنه
بس ابو فاضل يعمّة
يگدر ايخفّف ألَمنه..

عالفرات... خاف اگلّلهن وگع
عالفرات... اوراسه بالسيف انگطع
لو عدل ما ننسبي
آه يا درب السبي

https://youtu.be/yJ4DNBYFPHw