#انقذوا_البصرة

ياحُسين .. ثوره تشبه ثورتك
ياحُسين .. صارت ابكل بصرتك
بالشوارع أثر . ابهالشباب الفخر
ياحُسين

انته عالسكته ابد ما علمتنه
نطلع او نتظاهر اشگد خبرتنه
مثل ما في كربله طف شوفتنه
هذه طف بالبصرة صار او شاهدتنه

اشگد شباب .. طلعوا او ماتوا سوى
اشگد شباب .. دوروا نسمة هوى
والطلع ماخسر . ابهالشباب الفخر
ياحُسين
___________________
انته ويانه نحسك يابو لاكبر
ثورتك هايه او اكيد اويانه تحظر
لو عطشنه اظماك يالغالي انتذكر
او لو نموت اوياك وسط الجنة نُحشر

هالنداء .. البصرة ماتسكت بعد
هالنداء .. دمنه بالشارع شهد
اوداعة المنتظر . ابهالشباب الفخر
ياحُسين
__________________
الشعب حيل انظلم مثلك يغالي
نام عطشان الشعب مثلك ليالي
الحكومة ايزيد صاير بيها والي
البصرة انته وانظلمت اهواي تالي

سيدي .. البصرة انته او عيلتك
سيدي .. والحكومة ظلمتك
اسنين صار او شهر . ابهالشباب الفخر
ياحُسين
________________
سيدي مثلك طلعنه ابكل سعادة
وربنه من انموت يحسبها شهادة
غيرة العباس بينه إمن الولادة
الما طلع يتظاهر ايخون ابلادة

انتفض .. سيدي هذه الشعب
انتفض .. عاللي باگ او عالسلب
مانهاب الخطر . ابهالشباب الفخر
ياحُسين
_________________
علمتنه اعله الظلم مانسكت احنه
ومثل ما انته اخرجت بالطف خرجنه
موطنك هذه العراق او هم وطنه
شيعة البصرة تصيح إحسين عدنه

ياحُسين .. البصرة بسمك صيحت
ياحُسين .. منك اهيه اتعلمت
انتفضت ابلا مفر . ابهالشباب الفخر
ياحُسين

حيدر الحلفي

#الناشر_الحاج_فلاح_حسن

#حلم_مذبوح

#لايسمح_تغير_اسم_الشاعر

#انقذوا_البصرة
#ثورة_البصرة


صرخة بصرية .. واحتجاجية
ضد الظــــلم .. ضد الظــــلم

~~~~1⃣~~~~

احنه اهل البصرة مانگـعد بعد
نريده حگنه ماهي مننية أحد
كلنه نصرخ ياعلي حـيدر مدد
احنه اهل ثورة يقين ومعـتقد

صرخة ثورية .. واحتجاجية
ضد الظــــلم .. ضد الظــــلم

~~~~2⃣~~~~

مايهمنه شما فقـدنه مـن شباب
حسين علمنـه نـهب لامـانهـاب
ونصرخ بوجه الظلم والاكتئاب
ونطـلع بحمـلات نگلـبها گـلاب

صرخة مدوية .. واحتجاجية
ضد الظـــــلم .. ضد الظــــلم

~~~~3⃣~~~~

احنه ولد الملحة سمونه الخلگ
لجل حگنه ننتفض حـته نـطگ
مانريد الذلة احنه اهـل الصدگ
ننتفض برواحـنه وموش بتفگ

صرخة حتمية .. واحتجاجية
ضد الظــــلم .. ضد الظــــلم

~~~~4⃣~~~~

مو جديد اعلينه ابد هالتضحيه
احنه اهل البـصرة لا مـو جـاليه
وتشهد احروب وسـواتر عاليـه
مانـريد احـنه الحـيـاة الفانــيـه

صرخه عقلية .. واحتجاجية
ضد الظــــلم .. ضد الظـــلم

~~~~5⃣~~~~

على نهج حسـين لازم ننـتفض
گال هيهات ولجل مبـدأ رفـض
ايــده ماخـلاها بـيد المعـترض
مانريـد الذله من طول وعرض

صرخة نهجية .. واحتجاجية
ضد الظــــلم .. ضد الظـــلم

~~~~6⃣~~~~

احنه نتظاهر رغــم كل المـحن
انـصيح لبــيك حســيناً بالعلـن
حيل نصرخ والجـروح اتلچمن
نـروح فـدوه وامـهـات يهلـهلن

صرخة معلية .. واحتجاجية
ضد الظــــلم .. ضد الظـــلم

~~~~~~~~~~~~~~~~~~

#أم_عباس_هيثم_العبادي
؛؛؛ ٦ / ٩ / ٢٠١٨ ؛؛؛

#الناشر_الحاج_فلاح_حسن

#حلم_مذبوح

#لايسمح_تغير_اسم_الشاعر