#النبي_الاكرم_ص



فاطمه تهمل العبره
فگدك يالابو جمره
آه يمصاب البتول
والكسر ياهو اليجبره


تندب بدمع اليهل
آه يا سيد الرسل
صابني بفگدك نحول
وي حيدره خير العمل


تصوب دليلي ومهجتي
بفگدك يبويه وعزوتي
من دمه دمعي همول
ونار تسعر جبدتي


غاب نورك يا نبينه
واصبحت فاطم حزينه
بالگبر نور الرسول
ظلمه من عگبه المدينه


تدري بعدك يهظموني
فوق خدي يسطروني
عمري عگبك ما يطول
ريت وياك ادفنوني


يا رسول الله الامين
انثلم بمصابك الدين
فروعه تنحب والاصول
ومن علي تهمل العين


زينب وحسين وحسن
عيونهم صب المزن
ينوحوا بالدمع الهطول
آه من غدر الزمن

تمت بعون الله تعالى
خادمة الزهراء /ليلى زغيب


الشاعره ليلى زغيب
اين الطالب بذحول الانبياء وابناء الانبياء
https://tttttt.me/Doumooalanin

#النبي_الاكرم_ص


من بعد فگد النبي
عالدار يهجم ناصبي
والنكر امر الوصيه
مهد طريق السبي


من بعد عينك يطه استوحدوا البضعه البتول
مجتف بحبل الوصيه حيدره فحل الفحول
ما يسل فقاره عرفوا وهجموا لدارك نغول
رادوا يهدمون دينك بكسر ضلعي يارسول

ما رعوا بنتك فاطمه
وانكسر ضلع السمه
آه يا خير البريه
عيوني بجوها دمه

🏴🏴🏴🏴🏴🏴🏴🏴🏴🏴🏴🏴

نزلت الأملاك تنحب تنادي يا لهادي محمد
أظلم الكون بغيابك والعرش حسره تنهد
انفتحت أبواب الجنان لروح طه تستعد
بالسمه جبريل ينحب وبالحزن گلبه توگد


نزل يواسي بضعته
وكل ملك هل دمعته
يلطم بنوح وعزيه
آه يمصابه وفجعته

🏴🏴🏴🏴🏴🏴🏴🏴🏴🏴🏴🏴

بالهجر نعتوا نبينه وقدره ابدا ما رعوه
خالفوا نهج الديانه وحگ ابن عمه انكروه
بعده ما مدفون طه وهجموا لداره حرگوه
بالسقيفه اتجمعوا والخليفه نصبوه

خالفوا نهج الرساله
واتركوا الماكو مثاله
نكروا حيدر والوصيه
ورجعوا حكم الضلاله

🏴🏴🏴🏴🏴🏴🏴🏴🏴🏴🏴🏴

آه يفراگ الرسول تنحب الزهره وولدها
أظلم الكون بغيابه والسمه تفرهد جبدها
تدري بعد عينه بجم صفعه ينصفع خدها
نكروا اشوصى ابوها وغاضبه تنزل لحدها

اليرضى الله لرضاها
ويغضب اذا واحد اذاها
بضعة الهادي الزجيه
الحاقد بناره اجاها

🏴🏴🏴🏴🏴🏴🏴🏴🏴🏴🏴🏴

انفتحت أبواب المصايب من بعد عينك يطه
حرگ وضلع نار وسهم وطاح محسن من حشاها
حيدر مجتف تشوفه وحاقد بسوطه لفاها
وصيته اصبر يحيدر لوما الوصيه فناها

اصبر لدين الرسول
واحمل امصاب البتول
بعينك تشوف الاذيه
لا تسل سيف وتصول


تمت بعون الله تعالى
خادمة الزهراء /ليلى زغيب


الشاعره ليلى زغيب
اين الطالب بذحول الانبياء وابناء الانبياء
https://tttttt.me/Doumooalanin