بَسْمِ اللهِ الرَّحْمَنِ الرَّحِيْمِ

[ شيعي اللّبن ]

ما درسنه محبّتك يا با الحسن
لكن امن الإم إجه شيعي اللّبن

ومن لبن هالإمّهات نبقه شيعة للممات
يا با الحسن
___

محبّتك فرقان يا روح القيادة
تكشف لكل البشر طيب الولادة
نعمة عالنّعمة وعبادة اعله العبادة
واليبغضك ما عرف معنى السّعادة

ويوم اُحُد يشهدلك النَّص الجلي
بس فقاره ولا فتى إلّا علي

وخلها تسمعنا الطّغاة نبقه شيعة للممات
يا با الحسن
___

إحنه مو عالجّنة يا حيدر نرغبك
حتّه لو ندخل النّار انظل نحبّك
ايحاربون اقلامنه وبالدّم نكتبك
إنتَ ابونا وإنتَ صاحبنه نحسبك

حُبّك البوصلة ايدلّينه الطّريق
وانتَ النه ياعلي نِعْم الصّديق

شما تزيد النّايبات نبقه شيعة للممات
يا با الحسن
___

حُبّك الطّاهر يغذّينه الهداية
وأَيْ عمل مرفوض إلّا بالولاية
مو وسيلة ياعلي، حُبّك الغاية
وجاي ندفع بالضّريبة شگد ضحاية

النّاس لو كلها تحبّك يا عظيم
الله ما يخلق أبد نار الجحيم

ورغم كل الموزمات نبقه شيعة للممات
يا با الحسن
___

حُبّك العنوان باچر بالصّحيفة
نِنَجَه بِي من كل الاهوال المُخيفة
خلها رابع عنّك تگول السّقيفة
المهم عند الله إنتَ اوّل خليفة

ذاتك القُدسيّة ما فَوق العقول
ومنو غيرك أجدر ايمثل الرّسول

ياللّي أوحد بالصّفات نبقه شيعة للممات
يا با الحسن
___

ما نخاف الآخرة عدنا قناعة
لإن بايدك ياعلي صَك الشّفاعة
للگبر ناخذ فقط حُبّك بضاعة
وشكرًا لطيب الولادة والرّضاعة

إولايتك ملجئنا والحصن الحصين
نحيى وانموت احنه بيها امأمّنين

ونهتف لحد الوفاة نبقه شيعة للممات
يا با الحسن



شكرًا لله ولآل الله صلوات الله عليهم أجمعين
[ هَذَا مِنْ فَضْلِ رَبِّي ] والحمد لله
بركات الكفيل سلام الله عليه
#أبو_فاضل_هوّه_المفتاح
#رزقهم_صلوات_الله_عليهم_أجمعين
#حيدر #الموسوي



@HxzEU1

قناه نشر القصائد المنبريه