استشهاد التابعي الجليل سعيد بن جبير ع



ابو محمد يحيي الي يكصدون
مقبوله الزياره امن اليزورون
والصوت اعتله
هلابيكم هله
................

هله بزواري واحبابي  اجوني ووصلو البابي
بكل خطوه اجر
اليمشي وتعبت اجدامه   وشد الخدمتي احزامه
اوكفله ذخر
ياخذ مني حاجاته  وامسح بيدي دمعاته
ويخلص كل عسر

ابو البيت اني واليتعنه خطار
مايرجع البيته وگلبه محتار
تهون المعضله
هلا بيكم هله
.................

موسيد امن الساده  اليجيني ياخذ امراده
عبد صالح صرت
ربي بفطرتي عالم   حجيت الحق على الضالم
وعلى الحق من متت
بحيدر علي ايماني   وكلتهه اكبال عدواني
وغضب منهم شفت

عندي المرتضى واولاده وياي
احبهم واعله حبهم فدوه دنياي
تشهدلي المله
هلا بيكم هله
..................

ولهذا السبب اني   الناس هواي تهواني
وبيوم الحزن
تخنكهم عليّ عبره   ويتعنون للحضره  
من كل المُدن
اليحضرني ويواسيني   ويرفع جفه يدعيني
خله يطمئن

ماخلي ابد دمعاته بالعين
اقسم على الله بنحر الحسين
روحي بكربله
هلا بيكم هله
.................

خلي الماسمع يسمع   الدعوه بصحني ماترجع
توصل للسمه
مقبول اني عد ربي   صبح درب العدل دربي
وناصر فاطمه
ويله الي يعاديهه   وببنهه مايواسيهه
وبكلبه الضمه

موحلوه البشر كل يوم فرحان
وحسين انذبح ياناس عطشان
ابن البسمله
هلا يكم هله
.................

الله ايعودهه اعليكم   وبكل عام احييكم
زواري الفخر
هاي الجَمّعه محلاهه  بيكم والله اتباهه
وگليبي ابتشر
خل ندعي بگلب هايم    عجل ربي للقائم
المهدي المنتضر

سوه ندعي الفرج صاحب الثارات
يارب عجل امره بصدره حسرات
راحو كل هله
هلا بيكم هله


#محمد #هادي #العقابي





@HxzEU1
https://tttttt.me/hxzeu1
قناه نشر القصائد المنبريه

قصيدة لاستشهاد الزهراء ع


عفتيني للنوح. وجروح بالروح يايمه.
ظلت معاناة. آهات. دمعات. يايمه

يديرة عافيه شلوني. من شلتچ على متوني.
اصرخ حرامات

.....

مايرجع المات. لو نبچي كل هذا العمر. مايرجع المات
چلمة حرامات. تترس البيت بفركته. چلمة حرامات

من يوم غابت ضحكتچ مختلف طعم انفاسي
ظليت سكته بروحتج. وسولف الشيب براسي

ياوحشة الدار. والبيت موبيت. يايمه
ومفارك النوم. محروم. مهظوم. يايمه

صحت لو يعمن عيوني. من شلتج على متوني
اصرخ حرامات

....

من ابچي بهداي. والعين غركانه بدمع. من ابچي بهداي
ماعدهه كل راي. زينب تصيح بلايه ام. ماعدهه كل راي

كلما نصد لغرفتچ. نفرفح الج مثل الطير
ونصيح يمه فاطمه. الله يذكرچ بالخير

عفتينه ايتام. وچفون. متنام. يايمه
بالوالد شصار. محتار. بزغار. يايمه

صحت وياهه ادفنوني. من شلتج على متوني
اصرخ حرامات

......

تمنتيچ وياي. يايمه كون بكربله. تمنيتج وياي
تلمين الاطفال. لمن يحركون الخيم. تلمين الاطفال

تمنيت انه بأخر نفس. بحضانچ تخليني
ولو طشروني اعله الترب. تلميني وتغطيني

عباس لو طاح. ظليت. مكسور. يايمه
ويطيح الحزام. والناس. شمات. يايمه

بچيت وخابت ظنوني. من شلتج على متوني
اصرخ حرامات

....

وبحرك الخيام. تلكين زينب حايره. وبحرك الخيام
كلهن رقيات. اليمشن على حر الجمر. كلهن رقيات

لزينب اذا يعثر جدم. تصيحين يمه اسم الله
لو شفتي كاروك احترك. يعني انذبح عبد الله

تعلكين شمعات. جسام. بدموع. يايمه
والاكبر يموت. عطشان. مذبوح. يايمه

اموت ومايخلوني. من شلتچ على متوني
اصرخ حرامات

......

يايمه هيهات. بالبيت مانلتم سوه. يايمه هيهات
يفراك الاحباب. شلعان كلبي وحسرتي. يفراك الاحباب

يكبر ابنادم لو فگد. امه ويحس بغربه
يم النعش يوكف جرح. يتمنه يوكف كلبه

يظل عمره مخنوك. ملچوم. مجروح. يايمه
مايوم ننساچ. وياچ. للموت. يايمه

انه الميت يحسبوني. من شلتج على متوني
اصرخ حرامات

.......

نسألكم الدعاء
#حسين #صادق #العقابي




@HxzEU1
https://tttttt.me/hxzeu1
قناه نشر القصائد المنبريه

شهادة ام البنين ع

بعيونك. بعيونك. خليني وموت. بعيونك
من دونك. من دونك. ديره بلا صوت. من دونك

علي ياخيمتي. يتيمه حچايتي. من دونك

……

ام العباس. عشتك احساس. بعالم گلبك يمعيشني
دوم بدنياي. الكاك فياي. جرف ويالماي معاشرني
يحنيّن چان. وجهك آذان. من خوف الدنيا مطمني

ياروحي. ياروحي. ياطعم الماي. ياروحي
لجروحي. لجروحي. ردتك وياي. لجروحي

يعزي وهيبتي. يتيمه حچايتي. من دونك

……..

اخر رمضان. شفتك تعبان. وكل ثكل الدنيا اعله متونك
نظرات وداع. ياعمري الضاع. يابعد اهلي الليله شلونك
شنهو مأذيك. تأشر بيديك. وادير لزينب بعيونك.

يوليدي. يوليدي. تصيح لعباس. يوليدي ودعوني. ودعوني. بآخر انفاس. ودعوني

اعيش بدنيتي. يتيمه حچايتي. من دونك

……

تكبيرة اه. انا لله. كالو طاح ودمه بطوله
وانفك الباب. دلالي انصاب. حيدرنه الحيد يتچوله
طحت من الصار. يم باب الدار. اولاده اسم الله يصيحوله

يازينب. يازينب. شيفيد النوح. يازينب
يايمه. يايمه. صرت بلا روح. يايمه

اصيح بونتي. يتيمه حچايتي. من دونك

…………..

لو ابچي. عيون. واطيح متون. من ايدي الراح مايرجعلي
چنت اتمناك. هسه آنه انعاك. ما نتفارك چنت تگلي
يم التابوت. كون احنه نموت. فدوه احنه نروح بس ارجعلي

تخليني. تخليني. ليا دنيا وضيم. تخليني
حاچيني. حاچيني. عايفني لوين. حاچيني

اعيش بونتي. يتيمه حچايتي. من دونك

…،،
هيهات اتعود. واترد اردود. ذيج الايام المملوحه
تموت الجلمات. وحتى الضحكات.ياحيدر صارت مذبوحه
ياموت ارجاك. . تاخذني وياك. المن باقي الفاكد روحه

اولادي. اولادي. صارو ايتام. اولادي
بعيوني. بعيوني . تموت الاحلام. بعيوني

عفتني بوحدتي. يتيمه حچايتي. من دونك

……..

نسألكم الدعاء
#حسين #صادق #العقابي





@HxzEU1
https://tttttt.me/hxzeu1
قناه نشر القصائد المنبريه