رئيسية للعليلة 2023

يالماشي عني بيا صبر تصبر بعد روحي
يالشوفتك راحه ودوه يا مرهم جروحي
اصبر بعد مُحال
ياوالــدي تعـال يا مرهم جروحي
..........

شگد گلتلك بويه خذني وماخذتني
ليش من دون البنات اتعذّرتني
چي عليله وخفت اتأذّه وعفتني
ما دريت اشصار لمّن فارگتني
طفله لكن من غيابك شيّبتني
ليش مو انت بحنانك عوّدتني

رف گلبي من هذا السفر. ونخطفت الواني
ياخوفي ما شوفك بعد يل ما الك ثاني
محتاجه للدلَال
ياوالــدي تعـال          يا مرهم جروحي
..........

ريت يابويه خذتني وي خواتي
وي رقيه وسكنه اجمل ذكرياتي
ظلمه من دونك يبوالأكبر حياتي
صرت كل لحظه التمر اطلب وفاتي
عيني عالباب وتجي كل امنياتي
اندعيلك بويه كل يوم بصلاتي

لو رايحـــــه ولا هالقهـــر. يكتلني يوميه
هجرك اشد من كل مرض ما تنشد عليه
خلّاني كالخيال
ياوالــدي تعـال          يا مرهم جروحي
..........

ما شبعت وداع منك والدي حسين
لا تيتّمني دخيلك ياضوه العين
من يدلّيني ويگلّي موقعك وين
خوفي من غدر آل اميه وغدرت البين
من علامات المصيبه وضحن ثنين
هجرك الطَوّل علية ولا خبر زين

خوفي عليك امن الغدر. بيك انشده بالي
عيني عله بابك ونتظر. ياوالدي الغالي
بُعدك علية طال
ياوالــدي تعـال          يا مرهم جروحي
..........

ابّاب دارك گاعده وحسب ثواني
يمته اشوفك ترجع لديرتنه ثاني
بويه ما تدري البچي بعدك عماني
يالگلت لازم اخبرج عن مكاني
لا علي الأكبر ولا عمي اجاني
لشوكت ياوالدي اسهر وتاني

بس لا مشيت لكربله. خوفي يغدرونك
گلبي تگـطّـع بالألم ياوالدي شلونك
جاوبني عالسؤال
ياوالـــــدي تعـال        يا مرهم جروحي
..........

بويه من كثر شتياقي ولهفة الروح
گلت بويه برؤيا اشوفك بلكي مسموح
غمّضت عيني بدمعتي وشهگت النوح
شفتك بعالم منامي دامي مذبوح
راسك عله الرمح بويه ودمه مسفوح
وجسمك مگطع اشوفه وينزف جروح

فزّيت بويه امن الحلم. الطم على راسي
ما اكدر احچي امن الألم. مختنگه بنفاسي
لا تگطع الوصال
ياوالـــــدي تعـال        يا مرهم جروحي

#سيد #زيد #الفحام
____




@HxzEU1

قناه نشر القصائد المنبريه

مقدمة للعليلة 2023

كربله ابعث الج دمع وسلام
خبّريني اشصار بهلي والخيام
.......

عن ابوي حسين اسألج فدوه لَسمه
فاطمه آنه العليله وروحي يمّه
كربله تجاوبها والموقف ترسمه
لزمي گلبج يالعليله خاف الچمه
هذا ابوج حسين طاح وسال دمّه
بالسيوف مگطع ومسلوب جسمه

ماكو بعيوني ضوه وحشه وضلام
خبّريني اشصار بهلي والخيام
.......

خاف اخبرج فاطمه بحاله وتموتين
آه لو موجودة وتشوفينه بالعين
مثل ما شافت رقية ذبح الحسين
وهجمت عله خيام ابوج الخيل صوبين
وين تنطين الوجه لو بالخيم وين
نار خوف وخيل وسياط الشياطين

طاح حيلي واشعر بصدري السهام
خبّريني اشصار بهلي والخيام
.......

كربله چا وين عمي البي حميه
ليش يرضه تنسلب اختي رقيه
عمج العباس غدروه ال اميه
كطعوا چفوفه كفيل الهاشميه
يالعليله عله النهر عمج رميه
ضحّه دون حسين بچفوفه السخيه

دموعي خنگتني وبعد ما ظل كلام
خبّريني اشصار بهلي والخيام
.......

وين زينب كربله بس لا سبوها
لا تگلّيلي غريبه وسلّبوها
يالتسأليني عله زينب عذبوها
ذيج زينب حايره وذبحوا اخوها
بين خيل ونار تركض شاهدوها
تخلّص الاطفال من غارة عدوها

الله يستر كربله منّ الختام
خبّريني اشصار بهلي والخيام
.......

شصار وي عبدالله اخوي زغير بعده
اغله من روحي الرضيع اهواي اودّه
ما دريتي بسهم نحره حسين ردّه
يالعليله بدم وريده انصبغ مهده
انذهلت امه الشافته وركضت تگعده
شالته ودم منحره عليها تبدّه

يعني راح الچان بحضيني ينام
خبّريني اشصار بهلي والخيام
.......

عن علي الأكبر اخوي وجاسم الشاب
شصار بيهم لا تفجعيني الگلب ذاب
ذاك اخوج مگطع موسّد بلتراب
وجاسم العريس صارت حنّته خضاب
كربله اشسويتي بيه اصواب بمصاب
ريت ميته ولا عشت بفراك الاحباب

رحمي حالي ولا تيتميني حرام
خبّريني اشصار بهلي والخيام

#سيد #زيد #الفحام
_________




@HxzEU1

قناه نشر القصائد المنبريه