خدام الإمام الحسين(ع)🚩 قصائد و مجالس

111 views12:32

Forwarded from الشاعر عمار الراشدي (Ammar alrashidy)

إستشهاد الامام الصادق عليه السلام

أبـــا الكاظِــم وَداعاً سَيّدي جَعفَـر
وَفي قَلبي اَمَلْ لُقياكَ في المَحشَر

رحيلك سيـــدي الصـــادق منه ما بعد رجعـه
دمــوع النايبه انهالت عليــك بحرگـه وبلوعه
يريت الليله يم گبرك انوحــن واهمل الدمعـه
سلامي من البعد ريته يِصَل يا ريتك اتسمعه

أبــا الكاظِم وَداعــاً سَيّدي جَعفَــر
وَفي قَلبي اَمَلْ لُقياكَ في المَحشَر

ذنوب اللّي على إچتافي ثگيله وتَعّبَت حالي
محب او ما الي غيرك وسيله سيــدي الغالي
إجيتك معتني بهمي نخيتــك ترحــم بحالي
نخيتك تنظر بنظـــره تِبَيِّض صفحـة اعمالي

أبـــا الكاظِــم وَداعاً سَيّدي جَعفَـر
وَفي قَلبي اَمَلْ لُقياكَ في المَحشَر

حزين ودوهنتي اكثر مصيبة چبــدك المسمــوم
مثــل نــار وعذاب السَّــم دليلي موجــر ومالـوم
أثر هم وهضم فگدك يظل وسط الگلب مرسوم
عدوك تدري ينتظـــره سعيــر الحاميه المضروم

أبـــا الكاظِم وَداعاً سَيّدي جَعفَـــر
وَفي قَلبي اَمَلْ لُقياكَ في المَحشَر

سلام الباري عالمسموم على الصادق ابو الكاظم
بچت عين السماء اعليه حزينه امكدره من الهـم
سحابة ليلـــة مصابك تراكـــم بيهــا نــزف الــدم
نـــزل غيث الحــزن يعلن حـداده ورَوَّى كل مأتم

أبـــا الكاظِم وَداعــاً سَيّدي جَعفَـر
وَفي قَلبي اَمَلْ لُقياكَ في المَحشَر

إمام المذهب وسوره عِلـَـت بي راية الاسلام
منهل للعلوم اصبح أساس او مصدر الاحكام
عالم عابد او زاهد انــولد من أطهر الارحــام
واجــه اظلم الحكـــام عانـــه بدنيتـــه الآلام

أبـــا الكاظِم وَداعاً سَيّدي جَعفَـــر
وَفي قَلبي اَمَلْ لُقياكَ في المَحشَر

أمل عندي يبو الكاظم ازورك حته لــو مره
وأمل ثاني عسن منك أحَصّل سيدي نظره
لمصابك تبقى للمحشر ناره بگلبي متوجره
فلا أنساك يا مظلوم دنيــا وبرزخ او اُخـره

أبــا الكاظِــم وَداعاً سَيّدي جَعفَــر
وَفي قَلبي اَمَلْ لُقياكَ في المَحشَر

كلمات عمار الراشدي

24 views13:23