خدام الإمام الحسين(ع)🚩 قصائد و مجالس

[إجيتك]

إجيتك ..والذنب يلهب كياني
وانگلب دهري وزماني
بلمحة من عطفك تراني..يا حسين

اجيتك ..يلمتت ظامي وتعاني
وتنزف ايات ومعاني
بلمحة من عطفك تراني
يا حسين
---
أشوفك عالمِ وبس الله سبحانه يِشِملَكْ
وعجيبه شلون اذا تمشي الأرض تگدر تحملَكْ؟
أسَدْ يا بن الأسد والرحمه يا بنِ الزهرا شبلَكْ
وأظنْ سيف النحرْ صوّب رُگُبتَكْ لنْ يِقَبْلَكْ

حبيبي...من الصغر عايشْ حروفكْ
ابكُلْ شي بالعالمْ أشوفَكْ
عُمري عُنوانَه طفوفك...يا حسين

حبيبي...أدعي بالسبع المثاني
وانتحبْ واصبر وتاني
بلمحة من عطفك تراني
يا حسين

---

خيالي يخترگ سور الزمن ويذبني يمّك
أصيرنْ بالطفوفِ وأزحفِ وأتمنى ضُمّك
وأبد ما تنحسب فرحةْ فؤادي مِنْ أشمَّكْ
ولجن ينفطر گلبي بدموع الزهرا أمّك

أراها ...تمسّحِ بجفها دموعك
تحسبِ لساعةْ وقوعك
خايفه تُكسَرْ ضلوعَك
يا حسين

أراها...وتنصلبْ چدمي بمكاني
واندعي موتنْ عساني
بلمحة من عطفك تراني
يا حسين

---

الوفه ما يعني حَجْيِ الوادم تسولف مراجل
الوفه لله تقدِّمْ إبنَكَ لْجَفِّ العواسلْ
برعاية الله گِتله إنزِلِ وْدوس الجحافلْ
بفعالَكْ تَرْجَمِتْ آيةْ "خليفه بأرضي جاعِلْ"

وليدك...عالأرضْ طايحْ لقيته
توجَّهت لله وحجيته
إقبَلَنْ ذبحي دعيته
يا حسين

وليدك ...ريته من صابه رماني
لن تجي يمّي ثواني
بلمحة من عطفك تراني
يا حسين.

---
انزَلِتْ وحدَكْ تخوضِ بسيفكِ بحور العساكرْ
شبيه الكعبة طافَتْ حولَكِ اجْلافِ العشايرْ
كِسَرْتِ القاعدة لَنْهَ الذي من العالي ناظِرْ
يشوفك جَنْ كتيبة اعلى الزلم بالحومه داير

عدوّك...يِحسِبَكْ خلفَه وأمامه
ويهربِ يريد السلامه
وسفَه بسْ صابَ العمامه
يا حسين

عدوّك...لو چنت بالحومه آني
تدفعه روحي بتفاني
بلمحة من عطفك تراني
يا حسين

---
وحيد آنا وأحسن ليلي وحشه وعمري غُربه
بحسن ظني أسألك لا تِتْركِ الحطّه ذنبه
أنا الظامي الذي من صغره بجفوفك تربّه
أريدِ بموتي تحضر وارتوي بوصل الأحبه

أريدنْ...أنظر لعينك وخاطب
شيبك المدمي وعاتبْ
وجهك لْبي آنا ذايبْ
يا حسين

أريدَنْ...أشرح ويعثر لساني
تحققت كلّ الأماني
بلمحة من عطفك تراني
يا حسين

-

#منير_الخنساء
القناة الخاصة بنشر القصائد الشعرية
https://tttttt.me/monirkhansa

منير الخنساء

القناة الخاصة بنشر القصائد الشعريّة
للتواصل: monirkhansa95@gmail.com

256 views23:24