پندیات ... جوانلار ..

حاج غلامرضا عینی فرد زنجانی

قلم باشلور بیر انشانی جوانلار
یازا تازه بیر عنوانی جوانلار
ایدوم تشریح جریانی جوانلار
غیور و آگه عرفانی جوانلار
منه همشهری زنجانی جوانلار


جوانلیق عالمی چوخ پربهادی
اونون هرلحظه سی چون کیمیادی
جوانلیق دوره سی پرماجرادی
جوانلار چشم کشورده ضیادی
ایدوب آباد ایرانی جوانلار


جوانلق آسمان عمره آی دی
گجه سی گوندوزی بیرپارچا پای دی
قوجالیق قیش جوانلیق مثل یای دی
دره لردن آخان بر سسلی چای دی
آشار داغ داشی هر یانی جوانلار


سلام ایله گورنده پیش کسوت
سنه ائیتسون بیوک لرده محبت
اوشاقلاری گورنده ایله حرمت
بو ایشلرده یقین واردی عبادت
اولار آخر جهان فانی جوانلار


جوان وار حکم قرآنی اینانماز
نقدری موعظه ائتسن دوتانماز
قزل زنجیر سالور قیز تک اوتانماز
اولار غفلتده دور شاید اویانماز
بو دردون یوخدی درمانی جوانلار


بو ایشلر چوخ غلطدی باور ایله
ئوزیوی آز شبیه دختر ایله
جوانلیق گولدی آز پرپر ایله
مسلمانسان اگر دفع شر ایله
یره سال امر شیطانی جوانلار


قزا قز اوغلانا اوغلان دیوبلر
ندن بونلار عوضی یول گیدوبلر
آنالاری نجور لقمه ییوبلر
قز اوغلان بیر بیره بس بنزیولر
سچلمور گزسه میدانی جوانلار


جوان سال بوینوا زنجیر غیرت
ئولوم وار قبر وار واردور قیامت
بیرعده بدحجاب ایلور خیانت
سزی آلاتماقا چوخ ایله دقت
اولار اینجتدی زهرانی جوانلار


جوانلق شاخه دور دیوانه لردن
قوی دور عشقیده پروانه لردن
دولار مسجد بیله دردانه لردن
ال اوزمزلر بو ماتم خانه لردن
حسینی دور بو نورانی جوانلار


جوان واردور هراس ایلر ئولومدن
جوان واردی دیر هیچ ئولمرم من
جوان وار متقی و پاکدامن
جوان وار خلق اوندان اولماز ایمن
سالار هریرده دعوانی جوانلار


جوان وار باصفا و باصلابت
وجودینده محبت واردی غیرت
چه خواهر چه برادر باولایت
اولاری گورسه مردم ایلر حرمت
حق ایستور بوجوانانی جوانلار


جوان چوخ حیفسن نفسونلن اللش
محرمده اقلا گل سوز ئورگش
حسینون پاک دربارینده اگلش
اوزون اصلاح ایله وقت کچدی ترپش
حسیندور دین قربانی جوانلار


یانور قلبیم سیزه عرض ایلورم باز
دریچه شهر دلدن ایلورم باز
منه سیز همدم و من سیزلن همراز
کبوتر با کبوتر باز با باز
یخار بی دینلق انسانی جوانلار


#پندیات
#قلم_باشلور_بیر_انشانی_جوانلار
#عینی_فرد_زنجانی