بیاد پدران سفر کرده
یادشان گرامی و روحشان شاد

حسرتین اورییمده خیمه قورووبدی
روحیمی سالیبدیر زندانه آتا

داریخیر اورگیم سنسیزله میشه م
گوزیاشیم بولانیب القانه آتا

هایانداسان سنه سسیم یئتیشمز
آغیز آچیب اورک یارام بیتیشمز
دردیم گیزلین اولوب گوزه گوروشمز
امکانی یوخ سنسیز درمانه آتا

ائلین دن آیریلیب اوزاقلاشموسان
قره توپراقیلا قوجاقلاشموسان
کیملریله آیا ایاقلاشموسان
قوشولموسان هانسی کروانه آتا

فلک سنی چکدی قرا توپراقا
ائله ییخیب دورانمازسان ایاقا
شیرین باخیشلارین دوشدی اوزاقا
لعنت گلسین بئله دورانه آتا

آختارروام سني بير دانيشماقا
کوسدورموشم سنی سون باريشماقا
حسنون شعله سینده بير آليشماقا
گزورم سانکی بير پروانه آتا

واریدی عمرومون سنلن صفاسی
سنسیزلیقین چوخدی درد و بلاسی
نامردیدی دونیا یوخدی وفاسی
دوشوبدی گلشنیم خزانه آتا

هاچان بیرده بیزی یادا سالارسان
یول اوسته بیر گلیب قوناق قالارسان
سینیق گوگلری اله آلارسان
گور نه یی ائیلرسن بهانه اتا

چاتمور بیر کس بو دنیادا دادیما
اوزون یئتیش سسیمه فریادیما
گئچمیش خاطره لر دوشور یادیما
اغلیرام گولورم دورانه آتا
#محمد_هوشمند
#پدر
🖤🖤🖤🖤🖤🖤🖤